[درة الاحساء]

الج 15 زء

خالي : شفيج انتي جنيتي .. شلون جي تكلمين الريال .. هذا يزاه ياي يسلم عليج ..
صحت : بس خلااااص .. ودوني البيت .. ما ابي اسمع شي ..
ومشينا وطول الطريج انا اصيح وهم ساكتين .. ومن طريقه سواقه خالي عرفت انه معصب .. بس هو ما يعرف شي .. والي قلته انا ولا شي .. انا ما اخذت حقي منه للحين .. انا ضعيفه وما اقدر عليه .. بس الله فوق ..
نزلت من السياره رايحه غرفتي على طول .. قفلت الباب وطحت على السرير وانا ميته من الصايح ..
كلهم يحسبوني انا الغلطانه .. لو شنو صار انا الغلطانه .. ربي ينتقم منك يا ذياب .. الله يحاسبك ان شالله .. غسلت ويهي وخذت المصحف وتميت اقرى وعقب نمت بملابسي ..
وعيت وانا متضايقه على اللي علي .. كنت نايمه بملابس امس .. بتنورتي وبديي .. اووف .. قمت تسبحت ولبست لي بجامه ورديه .. ومشطت شعري وخليته مفتوح عشان ينشف .. وحطيت كريم مرطب على ويهي .. وشخطت الكحل على عيني .. و طلعت .. لقيت امي نايمه في الصاله وجنبها فاطمه وناصر نايمين .. وميمي قاعده تدور وريم وخالد في المدرسه للحين ..
قلت : يمه ..
امي : هممم ..
قلت : روحي رقدي في غرفتج ..
امي قامت : لا مب راقده .. ما جو خوانج من المدرسه .؟.
قلت : لا ..
طالعت الساعه كانت 1 .. يعني الحين بيجون .. شوي الا خالي داش ومعاه اليهال ..
خالي : يلا حطو الغدى ميت من اليوع ..
امي : يلا دقيقه ويكون جاهز ..
لاعت جبدي .. رحت الغرفه وفتحت الكمبيوتر وقعدت اكمل باقي القصه .. تميت اقراها لين خلصتها ..
عيووني عورتني .. صار لي ساعه مجابله الكمبيوتر ..
رن جوالي .. رحت اركض .. شفت المتصل لطوف ..
رديت : هلا والله ..
لطوف : اهلين .. شخبارج ؟
قلت: تمام . وانتي ؟
لطوف : الحمدلله طيبه .. بكره دوام هاا ..
قلت : ايه اوف سكتي ..
لطوف : والله انج وحشتيني .. بكره اللقاء ..
قلت : ايه والله . انتي بعد لج وحشقه فديتج ..
وتمينا نسولف عن الجامعه وعقب تذكرت سالفه خالي ..
قلت: ايه لطوووووووف ..
لطوف : هااا هاا ؟؟
قلت : خالي .
لطوف : شفيه ؟
قلت : لقينا له عروس .
لطوف: صج والله .. مبرووك يستاهل .. منو ؟؟
قلت : وحده انا اموووت عليها ..
لطوف : منو ؟؟ هاجر ؟؟
قلت: لا لا . هاجر تعتبر مخطوبه ..
لطوف : عيل منو ؟؟
قلت : جيرانا .
لطوف : من سلمى ؟
قلت : لا سلمى ياهل .. جيرانا .. بيتهم لازق في بيتنا .. وعندها اخو واحد .. وامها لبنانيه .. وابوها متوفي الله يرحمه .. عرفتيها ..
تمت سااكته ..
قلت : عرفتيها .ههههههههه ؟
لطوف: انا ؟
قلت : ايه انتي فديتج .. ابيج تقولين لي رايج قبل لا يخطبج خالي رسمي ..
لطوف : شلون جي .. من مرشحني له ؟
قلت : والله العظيم مب انا .. هو يه وسألني عنج .. من جي طرشت لج ذيج الرساله ..
لطوف : اهاا .. انا اقول ليش مهتمه هالبنت ..
قلت : عرفتي ليش مهتمه ..
لطوف: ايه مب حباَ فيني ..
قلت : والله اني اموت عليج .. بس بعد احب خالي ..
لطوف : بفكر وبرد عليج..
قلت : فكري على راحتج حبيبني .. ترى خالي مستعيل ..
لطوف : هههههههه مشتعيل وافكر على راحتي ؟؟
قلت : ايه عشاان اذله.. ههههههههههههههههه ..
لطوف : حرام عليج ..
قلت : هااااااا .. بدا القلب يحن ..
لطوف : لا يحن ولا شي .. يلا يلا بااي ..
ضحكت : هههههههههههههه اعرفج لين تنحرجين ..
لطوف : قلت بااااااااي ..
وسكرت وانا ميته من الضحك .. من زمان ما شفتها انحرجت .. يحليلج يا لطوف. . اسميج بتموتين من الحيا اذا خذتي خالي .. بيغرقج بالكلام العسل .. مادري من وين يجيبه ..
الله يهنيهم ويكتب اللي فيه الخير ..
طلعت من الغرفه لقيت خالتي زينب ونجوى ..
قلت : خااااااالتي عندنا ومحد قااالي ..
خالتي : ايه اندسي في الغرفه .. بتجيج العصفوره بتقول لج ..
ضحكت وسلمت عليها .. وسلمت على نجوى ..
قلت : الا وين نور .. ليش ما جات ..
نجوى : الله يسلمج نور بكره عندها جامعه ..وراحت السوق تكمل اغراضها .. بعد ما تخلص بتجي ..
قلت : اهاا ..
تمينا نسولف وشوي الا جات غايوه ومعاها نور ..
وكلمت سوالفنا وضحكنا ..

جا رمضان وصمنا .. وبعده العيد وعيدنا .. وكان هالشهر من اورع الشهور اللي مرت علي .. ما كان في مشاكل ولا عوار راس .. الحمدلله .. يارب تدوم هالسعاده علينا ..مرت 4 شهور .. وامتحنت وخذت في كل المواد جيد جدا .. لان ما وراي شي غير دراستي ..وفهد الي تقدم لي رفضته .. انا صج صليت صلاه الاستخاره ومارتحت ..ولقيتها حجه ورفضته ... وغايوه بطنها شوي انتفخ .. وانا ونور ولطوف كنا نتنافس من يجيب اعلى في الجامعه .. وتقريبا طلعنا كلنا نفس المستوى .. وخالي خطب لطوف .. وبعد فتره وافقت وخالي طار من الوناسه .. وسوو ملجه بس ما سوو خطوبه .. احسن .. لان عرسها قريب .. وعبدالله ملج على هاجر.. طبعا عمتي مب موافقه .. بس بو غيث قال انها راح تتزوجه .. وعمتي ما دري شلون سمعت كلامه .. والحمدلله الله تمم على خير ..

وعيت على رنه تلفون .. شفت المتصل هاجر ..
رديت بكسل : الووه ..
هاجر : بل للحين راقده ..؟
قلت : اجازه كيفي ..
هاجر : انزين صحصحي .. انا في مهمه ..
قلت : شنو ؟
هاجر : بدون لف ودوران .. راكان يبي يخطبج .. وقال لي كلميها شوفي رايها ..
قلت : شنوووووو ؟؟
هاجر : ها صحصحتي ؟
قلت : راكان بيخطبني انا .؟
هاجر : ايه حبيبتي .. ليش انتي شفيج .؟
قلت : مافيني شي .. بس من غاصبه ؟
هاجر : يمه ساره حبيبتي .. من متى الرجاجيل ينغصبون على الزواج ..؟ هو اختارج انتي ..
لا ماايصير .. وبدوووووور ..؟ حبيبته .. معقوووله نساهاااا .؟ لا هذا خبر ما يتصدق ..
هاجر : الوووووو .. شفيج .؟
قلت : انتي متأكده ان راكان اللي تلكم مب ذياب ..
هاجر: الله يهداج يعني بخربط بين خواني .. اصلا ذياب من ذيك السالفه وانا ما اكلمه ولا هو يكلمني .. اصلا ما يكلم حد في البيت .. كله برع .. وصاير يرقد في الملحق .. يعني محد يشوفه ولا حد يدري عنه ..
تنهدت : مادري والله .
هاجر : ليش يعني .. انتي ما تبين راكان .؟
قلت : لا مب جي السالفه .. بس ما خطر على بالي ..
هاجر : حبيبتي فكري بالموضوع زين .. وردي علي ..
قلت : ان شالله ..
هاجر: لا تطولين ..
قلت : زين ..
هاجر : يلا باايو ..
سكرت منها وانا مب مصدقه .. راكان يخطبني .. شلوون .. هو يحب بدوور .. شلون يفكر يتزوج .. يااربي .. كل شي في الدنيا يحير ..
قممت واغتسلت وصليت الظهر ورحت الصاله ..
امي : صباااح الظهر .
ضحكت : ههههههههههههه صبارح النور ..
مشاعل : انا كنت بقعدج بس هونت ..
قلت : جان قعدتيني .. من متى انتي قاعده .؟
مشاعل : من 9 الصبح ..
قلت : انا عندي اجازه . . خلوني ارتاح ..
خذت الجهاز (| الريموت ) وفرت على الدوحه وقعدت اطالع الطبخ ..
امي : ايه تعودي على الطبخ.. بكره اذا تزوجتي شبتطبخين حق زوجج ..
مشاعل : مكرونه .. هههههههههههههههه
ضحكت : ههههههههههههه بيموت ..
امي : ههههههههه لا تعلمي ..
قلت : يمه على طار الزواج ..
امي : خير.؟
قلت : هاجر اليوم متصله لي وقالت ان راكان يبي يخطبني ..
امي : رااكاان .. هذا الي زفيته من كم يوم ..
قلت : انا زفيته ؟؟
امي : ايه في السياره ..
قلت : بااال .. اولا هذا ذياب .. ثانيا هذا مب من كم يوم .. هذا من شهوور .
امي : ايه صح .. والله راكان خوش ريال .. انتي فكرتي .؟
قلت : لا توها هاجر قالت لي ..
امي : فكري حبيبتي زين ما زين هاا .. هذا زواج يمه ..
قلت : ان شالله ..
انا اللي مب داش مزاجي ان راكان هو اللي خطبني .. ياربي شلون وهو يحب بدور الله يرحمها .. بهالسرعه نساها .. على قولته يمووت عليها .. والا يمكن يبيني انا انسيه اياها .. ياربي شلون .. شاسوي .. لا ما راح اوافق .. بتوهق معاه .. واذا تزوجنا .. يعني بشوف ذياب كل يوم .. لا لا لا .. ماابيه ..
التفت على امي وقلت : يمه ما ابيه ..
امي : بسم الله .. من .؟
قلت : ما ابي راكان .
امي : ليش يا حافظ ..؟
قلت : خلاص ما ابيه .. ما يصلح لي ..
وقمت بروح غرفتي .. سمعت امي تقول : شوفيها مشاعل .. ليكون البنت صار فيها شي .. توها شزينها ..
ما سمعت الباقي لاني وصلت غرفتي وسكرت الباب ..
ياربي الي سويته صح والا خطأ .. بس ما اقدر اتزوجه .. شلون وانا بعيش معاه ومع ذياب في نفس البيت .. ما اقدر .. انا اذا شفت ذياب اموت .. شلون اذا بجابله كل يوم .. في الروحه والجيه ..
سمعت طقة باب ..
قلت : الباب مفتوح ..
دخلت مشاعل : عادي ادخل ..
قلت : حياج افا عليج ..
مشاعل : بقول لج بصراحه .. امج تضايقت من اسلوبج ..
قلت : اي اسلوب ؟
مشاعل : كنتي تتكلمين عادي .. وسكتي ..وفجأه صدميتها بقرارج ..
قلت : لاني فكرت عدل .
مشاعل : ما يسمونه تفكير هذا اللي سويته .. التفكير هو انج تجمعين افاكر وتستقرين على قرار .. مب اي فكره جاتك قلتيها وتعتبرينها قرارج ..
قلت : بس انا فكرت زين .,. ما اعتقد اني راح اتراجع في قراري .
مشاعل : حبيبتي لا تخلين مشاكلج مع هاجر والا اريج بنات عمتج تكون سبب الرفض ..
قلت بتردد : انا .. ان .. اناا اللي مضايقني ومخليني ارفض شيين ..
مشاعل : قولي ..
قلت : بس ما تقولين حق حد ..
مشاعل : اوعدج ما اقول ..
قلت : ذياب اخوه .. انا ما احبه .. ويضايقني وايد .. واريج اخته ما تستحملني ولا انا استحملها .. يعني اذا تزونا بتصير مشاكل مع عايلته ..
مشاعل : والشي الثاني ..
قلت : اممم .. راكان ..
مشاعل : شفيه ؟
قلت : كان يحب وحده .. واعترف لي .. بس ماتت من 7 شهور على ما اعتقد ..
مشاعل : وهذا الي مخليج ترفضين ..
قلت : لا بس هوز كان يحبها .. يحبها وايد .. شلون قدر ينساها ..
مشاعل : المشكله الاولى سهله .. انتي قلتي ان ذياب واريج يضايقونج صح .
قلت : ايه ..
مشاعل : طلبي بيت بروحج .. وان شالله راح تتعدل امورج كلها .. والمشكله الثانيه .. انا ما اعتبرها مشكله .. لان كل انسان يحب .. وفيه الي يلتقي بحبيبه .. وفيه اللي يفترق .. وراكان ما كان له نصيب فيها .. ويمكن راكان يدور الحنان والحب .. من جي راح وراها .. ويوم فقدها يبي وحده تسد مكانها .. يبي وحده يتعلق فيها ويحبها .. وراح يتكون الحب في الحياه الزوجيه ..
كلام مشاعل دخل راسي .. و تميت افكر فيه ..
يمكن يكون راكان احسن من ذياب .. بس لازم اشرط عليه بيت بروحي .. والا بقعد اجابل ذياب واريج ..
والي قطع افكاري صوت خالي ..
خالي : هوووود ..
مشاعل عدلت شيلتها ..
قلت : اقلط ..
خالي : ساره تعالي ابيج بسرعه ..
قلت : خير ان شاءالله ..
الله يستر .. ليكون في مصيبه ثانيه ..
رحت وراه ودخل غرفته ولحقته ..
قلت : خير .؟ لطوف فيها شي ..
خالي : لا لطيفه بخير ..
قلت : عيل شالسالفه .؟
خالي : ابوج .
تخرعت : شفيه ؟
خالي : مافيه شي .. بس كلمني في موضوع .. وما اقدر افتح هالموضوع الا معاج ..
قلت : خالي تراك خرعتني .. ثواني وبتصيدني جلطه .. تكلم .
خالي : ههههههه ليش جي خايفه .. تفائلي ..
قلت : خالي ارجووك ..
خالي : ابوج اليوم جا عشان يشوف عياله .. وانا طبعا كالعاده اقول حق امج ان رفيجي يه يبي يشوف عياله .. وابوج كلمني .. وقال لي انه يبي يرد فاطمه ..
قلت : شنوو ؟؟
خالي : ابوج يبي يرد امج .. ودورنا انا وانتي ان نفاتح امج في الموضوع ..
قلت : الله .. ابوي بيرد امي .. يعني بنصير عايله من جديد .. واكيد المشاكل بتخف ..
خالي : ايه وان شالله امج توافق ..
قلت : ما اعتقد انها راح ترفض .. لانها تحب فطوم ونصور ووايد متعلقه فيهم .. ويوم بتدري انهم عيال ابوي بتحبهم اكثر .. والا انت شرايك ؟
خالي : والله مادري ..
قلت : الحين نقول لها .؟
خالي : لا شوفي مزاجها اول ..
قلت : اوكي .. بس اقول لها ان فاطمه وناصر مب عيال رفيجك ..
خالي : ايه شي طبيعي لازم بتقولين لها ..
قلت : اوكي ..
طلعت من غرفة خالي ورحت الصاله .. لقيت امي تتكلم في التلفون ..
امي : الله يسلمج .. يوصل .. مع السلامه ..
قلت وانا مبتسمه : منو تكلمين .
امي : عمتج نهله .. اتحمد لها بالسلامه .. سلم عليج ..
قلت :الله يسلمج و الله يسلمها ..
امم . ابتدي الحين ..
قلت : يمه ..
امي : خير .؟
قلت : شوراج الحين ..
امي : ما وراي شي .. فاضيه .. ليش .؟
قلت : لا ابي اكلمج في موضوع .
امي : بخصوص راكان ..؟
قلت : لا راكان خليه بعدين ..
امي : عيل منو ؟
قلت : بخصوص ابوي ..
تغير ملامح امي : ابوج ..؟؟
قلت : ايه يمه ..
امي : شفيه ؟
قلت : يبيج ..!
امي: شنوو ؟؟ يبيني .. من قال لج انتي .. من اللي قاص عليج ..
قلت : يمه ابوي هو اللي كلم خالي .. يمه ارجعي له ..
امي : لا مب راجعه له .. انا جي مرتاحه في حياتي ..
قلت : يمه بس احنا مب مرتاحين ..
امي : شنو اللي مضااايقكم اذا انا صرت لكم الام والابو ..؟
قلت : يمه ناقصنا جو العائله .. ابي احس فيه .. اذا يمكن كبرت وقريب اتزوج .. بس خالد وريم وميمي .. وناصر وفاطمه ..
شفت على وجه امي علامه التعجب : وفااطمه وناصر شدخلهم في الموضووع ..؟
نزلت راسي .. لان شكلي توهقت ..
امي: شدخل فاطمه وناصر بعيالي .؟.
قلت : يمه فاطمه وناصر اخواني ..
امي وشكلها فهمت الموضوع على طوول : شنوووووووو ؟؟ اخوانج .. يعني ابوووج ما خذ وحده علي ..؟؟ ولا تبيني ارد له بعد ..
قلت : يمه انتي كبرتي .. بسج من هالكلام الفاضي .. يمه لا تفكرين في نفسج بس .. فكري في اليهال .. فكري فيهم .. صدقيني يا يمه بيتشتتون .. انا وغايوه بنكون محد .. بنكون في بيت ازواجنا .. وتركي وخالي تزوجو وقريب بيطلعون من البيت .. يمه محد بيتم عندج يربي هاليهال غيرج انتي وابوي .. يمه ارجووووووو ج لا تحرمينهم من جو الاسره ..
امي نزلت دمعها وانا ما قدرت اقاوم .. صحت ..
قلت : يمه فكر بالموضوع زين .. احنا محتاجين هالجو رغم كبرنا .. بس محد يشبع من الحنان ومن الدفا .. نبي نعيش حالنا حال غيرنا .. ما ناقصنا شي ..
امي : يعني شنو اللي ناقصكم وما جبته لكم ..
قلت : يمه اللي ناقصنا مب ملابس ولا فلوس ولا اكل .. احنا اللي ناقصنا بيت .. بيت فيه الام اللي تخاف على عيالها وتراعيهم .. فيه الاب اللي يحافظ على عياله ويلبي طلباتهم .. فيه الاخوان اللي يحبون بعض ..
شفت امي منزله راسها ..
رحت غرفتي على طول وطحت على السرير اصيح .. انا ما كنت ابي اسوي السالفه جي .. كنت بتكلم معاها ببرود .. ليش صحت ياربي ليش .. ليش دموعي ما تخلص .. خدي شبع من هالدموع اللي تنزل عليه كل يوم .. بسبب وبدون سبب .. آآآآآه ياربي ارحمني وارأف بحالي ..
سمعت طقة الباب .. مسحت دموعي وعدلت قعدتي ..
خالي : ادخل ..
قلت : حياك ..
خالي دخل : هااا شسويتي .؟ ما اشوفها في الصاله .. وينها .؟ انتي كلمتيها والا لا ..
قلت : خالي شوي شوي علي ..
خالي : انزين كلمتيها .؟
قلت : ايه كلمتها .. مادري شنو رايها ..
خالي : ياسلااام .. عيل انا مطرشج لها ليش ..
قلت : رفضت .. بس انا عطيتها من الكلام الزين وسكتت .. يمكن بتفكر بالموضوع ..
خالي تنهد : يالله تنحل الامور على خير ..
طلع خالي من الغرفه وانا فرشت السياده وصليت العصر ودعيت ربي في صلاتي ييسر الامور ..
بعد ما خلصت صلاه رن جوالي .. رحت شفت هاجر المتصله ..
رديت : هلا هاجر ..
هاجر تقلد صوتي : هلا ساره ..
ضحكت : هههههههههههههه شخبارج .؟
هاجر : بخير .. انتي شخباارج .؟ شمسويه ..
قلت : والله تمام ..
هاجر : حددنا عرسنا انا وعبدالله ..
قلت : صج ؟؟ متى .؟
هاجر : يعني بعد شهر ..
قلت : شنو .؟. بعد شهر ..
هاجر : ايه ليش .؟
قلت : قريب ..
هاجر : الناس يخلون فترة الملجه طويله عشان يتعرفون على بعض .. اما انا اعرف عبدالله زين ما زين ..
قلت : الله يهنيكم ..
هاجر: آآآمين ..
قلت : شكانت ردة فعل امج .؟؟
هاجر : الله يسلمج اول شي انا قلت حق ابوي .. وابوي قال حق غيث اخوي يسأل عنهم .. والحمدلله طلعو خوش ناس .. وبعدها بيومين جو الريايل يخطبون رسمي ..
قلت : مب المفروض اول شي يجون الحريم ..
هاجر : ايه .. بس امي كانت مسافره .. راجعه من كم يوم .. واهلها شافوني ذاك اليوم ..
قلت : انزين كملي ..
هاجر : و بعد ما خطبوني وخلصوا خذت فتره افكر يابلفيت عشان ما يشكون بشي .. وصليت الاستخاره للمره المليون .. والحمدلله ارتحت وقلت لهم رايي ..
قلت : ويوم امج درت .؟
هاجر : يوم امي درت جد انا ملجت .. ويوم رجعت ابوي ناداها وكلمها بهالسالفه ..ويوم سألت ابوي شصار قال لي انها صاحت.. بس انا ماادري شصار بالضبط .. لان كان الحوار في غرفه ابوي ..
قلت : والحين تكلمج ..؟
هاجر : لا بينا حوار بسيط .. روحي نادي وروحي سوي وجي بس .. واصلا انا من متى اسولف معاها والا اكلمها ..
قلت : هجوور مب زين .. هذي امج .. والجنه تحت اقدامها ..
هاجر : يه .. اللي يقول بتدخل الجنه الحين ..
عاتبتها : هجوووووووووووووووووووور !!
هاجر : هههه ايه صج .. ما تدل الجبله .. انا الحمدلله من قلتيلي ذاك اليوم عن الصلاه وانا ما اتركها فرض .. و هي لا تعامل زوجها ولا عيالها معامله عدله .. بالله عليج شلون بتدخل عيالها الجنه وهي لا ..
قلت : حتى ولوووووو .. ما تقولين عن امج جي .. بدال ما تكلمينها وتنبهينها تشمتين الناس فيها ..
هاجر: ما راح تسمعني .. وبتطلعني انا الغلطانه ..
قلت : عادي كلميها مره مرتين .. الدق يفج اللحام ..
هاجر : بحاول ..
قلت : ايه حاولي ..
هاجر : ساروه ساروه .. اكلمج بعدين .. عبود اتصل لي .
قلت : لحظه زين ..
هاجر: شنو ؟
قلت : الحين صار زوجج وللحين تقولين له عبود .. استحي ..
هاجر : هههههه ايه هو بعد يهاوشني .. يقول قبل غير والحين انتي زوجتي .. ياااااااي ساروه مب مصدقه ..
ضحكت : هههههه اعقلي بسج خبال ..
هاجر : زين يلا بررررررب ..
قلت : تت .
هاجر : عنز شايفتني ..؟ لج حساب عسير بعدين .. يلا تيك كير ..
وسكرت .. يحليلها هاجر .. رغم المشاكل اللي تمر فيها تظل قويه .. اما انا من اقل مشكله انهار .. ابي اصير قويه نفسها ياربي ..
خرعني صوت رنه موبايلي ..
رديت : هلا ..
لطوف : اهلين .. شخباارج .؟ شمسويه .؟
قلت : تمام .. وانتي شخباارج .؟
لطوف : الحمدلله .. اوف الاجازه قربت تخلص ..
قلت : ايه والله .. اوف ما ابي اروح الجامعه ..
لطوف : بعد الاجازه قصيره .. كلها شهر وكم يوم ..
قلت : ايه الحمدلله عطونا اجازه ..
لطوف : لازم يعطونا .. هذي اجازه الربيع ..
قلت : ايه وانتي الصاجه .. الا ما سافرتو هالاجازه .. ليش ؟؟
لطوف : والله انا مب متفيقه .. وحمد مشغول مع زوجته .. وييي نسيت اقول لج .. حمد ملج من فتره .. وكانت ملجه عاديه .. ما سوو خطوبه .. مع ان بنت خالتي ميته تبي تسوي .. بس حمد رفض ..
قلت من قلبي : الله يهنيهم ..
لطوف : يارب ..
قلت : ايه صج ..
لطوف : شنو ؟
قلت : قلت لج ان راكان ولد عمتي خطبني ..
لطوف : صج ؟؟ وافقتي والا للحين ..
قمت رحت الصاله وانا اكلمها لاني تمللت في الغرفه ..
قلت : لا للحين .. بس مرتاحه شوي ..
لطوف : الله يهنيكم ويسعدكم ..
شفت خالي قاعد .. اشر لي من تكلمين ..
قلت : لحظه لطووف ..
سديت السماعه وهمست : لطوف ..
خالي : اهاا .. سلمي عليها ..
قلت : لطوف خالي يسلم عليج ..
لطوف : الله يسلمه ..
قعدت : انزين ..
لطوف : انتو ما تبون تسافرون .؟
قلت : لا والله .. محد تكلم .. من بعد بيتفرغ يسفرنا الله يهداج ..
لطوف : لا قلت يمكن تتغير الامور ..
قلت : لا مابتتغير ..
لطوف : وي فديت مشاري انا .. متصل لي ..
رفعت عيني اطالع خالي .. لقيته ماسك الجوال ومبتسم لي ..
قلت : يالنحيس .. ما تخليني اتهنى معاها ..
خالي : هههههههههه خلص وقتج يلااا ..
قلت : عيل اخليج مع قيس ..
لطوف : هههههههههههههههههه اوكي حبي .. سلمي على خالج ..
قلت : حلفي عااااااااد ..؟
لطوف : هههههههههههه خلاص ااناا بسلم عليه ..
قلت : قلبو ويهكم انتو الاثنين ..
وسكرت عنها وخليتهم هالثنائي ورحت ادور امي بشوفها وين ..
لقيتها تسقي الزرع .. امي كل ما تضايق تسقي الزرع ..
رحت عندها وبست راسها ..
قلت : اسفه يمه .. قسيت عليج بالكلام ..
امي : بس كان كلامج صح .. وبعد ما خلصتي كلامج حسيت اني انانيه ..
قلت : يعني افهم من كلامج انج موافقه ..
امي : لا ابي افكر ..
قلت : اخذي راحتج ..
ورحت الصاله لقيت خالي شاق الحلج ويكلم لطوف .. ابتسمت ورحت غرفتي .. فتحت الكمبيوتر وقعدت على المنتديات .. وسجلت في منتدى (................) وكان حلووو .. من الستايل ومن الاعضاء .. استانست فيه واايد .. وشوي الا يدخل علي خالي ..
خالي : شتسوووووووووووووين ..؟
قلت : ليش جيت .. رووح كلم لطوف .. مخليها تسكر من عندي عشان تكلمها انت .. رووح كلمها روح خلها تنفعك .
خالي : بل بل بل .. شوي شوي .. كلتيني بقشووري ..
ابتسم : انزين اسف ..
قلت : شوراك انت ..؟
خالي : لطوف كلمتني وقال لي انها تبيج تجين بيتهم ..
طرت من الوناسه : صج ؟؟
خالي : ايه ايه صج .. مشاري بن فيصل ما يكذب ..
قلت : ومنو يكون مشاري بن فيصل ؟..
خالي : تاااج فوق راسج يالعنز ..
ضحكت : ههههههههه اسفين .. غلطنا عليك ..
خالي : ها بتروحين ؟؟
قلت : وانت شفيك جي مشتط وشاد حيلك ؟
خالي : عشان قالت لي " ويقلد صوتها " عشان خاتري مشاري ..
ضحكت : هههههههههههه وهذا كله عشان خاطرها .. عيل مب رايحه ..
خالي : سااروه لا تصيرين بايخه .. البنت تبيج تجينها .. حمدي ربج انتي ..
قلت : الف والحمدلله والشكر لك يارب .. بس بعد مب رايحه ..
طبعا هالكلام من ورى قلبي .. والا انا بموت عشان اروح لها فديتها ..
خالي : اوكي لا تروحين .. وعرسي لا تحظرينه .. وبقول لها ما تعزمج .. وبشووف شلون بتدخلين ..
قلت : مب على كيفك .. بدخل مع الطبالات ..
خالي : هههههههههههههه خلهم ينفعونج ..واصلا انا ماراح اجيب طبالات في عرسي .. بجيب فرقه تغني ورى حاجز .. جي احسن .
وي ليكون من صجه ..
قلت بدلع : خااااااااالييييييي ..!!
خالي يصد عني اونه زعلان ..
خالي : بتروحين ..
قلت : وانا مينونه عشان ما اروح .. تجيني الفرصه لعندي وارفض .. ليش انا هبله ..
خالي : ومن قال العكس ..؟
ضحكت : ههههههههه طالعه على اخو امي ..
خالي : الحمدلله مب انا ..
ضحكت : هههههههه انزين ممكن تطلع عشان ابدل .. والا مب رايحه ..
خالي : لا بروح شدعوه ..
وطلع خالي يحليله .. والله لطوف هبلته .. جي الحب يسوي ..
تنهدت وفتحت الكبت .. وتميت اطالع اللي فيه .. غمضت عيوني وطلعت لي بدله ..
لبست تنوره ورديه فااااتحه .. وعليها بدي ابيض وفيه حركات بالوردي .. حطيت لي بودره وزيدتها شوي .. وحطيت كحل بطريقه غجريه .. وقلوس وردي .. واستشورت غرتي اللي توصل لنص خدي .. وفتحت شعر الكستنائي الطويل ومشطته ..
ما يحتاج استشوار لانه سيده مافيه كسرات وايد .. طالعه على امي فديتها ..
وحطيت لي بتر فلاي صغيره على طرف شعري .. ومسكت عباتي وشيلتي وشنطتي ..
دخلت الصاله شفت خالي كاشخ قاعد في الصاله ..
قلت : يلا ..
خالي : يه يه يه .. شهالزين ..
ابتسمت بخجل : ايه طالعه على امي ..
امي ابتسمت : فديتج .. الله يحفظج ويحرسج من عين الحسود ..
خالي : يه .. شوفوا هذي " ويأشر علي "
قلت : شنو ؟
خالي : الحين انا اللي امدح وتقولين طالعه على امي ..
قلت : ما قلت شي غلط .. طالعه على حلوه اللبن ..
خالي : امشي امشي لا اهون ..
قلت : لحظه انت ليش كاشخ ..؟ خير ؟
خالي : بروح ..
قلت :وين ؟
خالي : معاج ,.
قلت : شتبي ..
خالي : خطيبتي هناك بعد شنو ..
قلت : اااهاااااااااااا .. يعني صار لك ساعه تحن علي عشان اروح بيتهم .. بالاخير طلعت انا الواسطه اللي بينكم ..
خالي : بعد شاسوي .. قلت لها ابي اجي بيتكم .. قالت جيب ساروه وياك .. شاسوي انا ..
قلت : اوكي ..
مشيت ..
قلت : يلا وراي ..
خالي مسكني من يدي وسحبني وراه ..
خالي : ورااي ..
سمعت امي تضحك : الله يهديكم ..
وركب السياره ..
قلت : شحقه راكب السياره ؟ بيتهم كاهو ..
خالي : رزه شفيج ..
قلت : رزه الفيس من طبايع الشسمه هاااا ..
خالي نزل بسرعه : شنوووووو .؟
رحت بسرعه عند باب بيت لطوف وانا اضحك ..
خالي : يالغجريه يطقون الجرس ما يوقفون عند الباب ..
رن خالي الجرس والخدامه فتحت لنا الباب ..
خالي : مدام لطيفه هنيه ..؟
الخدامه : يس ..
قلت : توها مسكره من عندك وتسأل اذا هي في البيت والا لا .؟
خالي : لازم نرز ويهنا شوي ..
قلت : انا قلت رزه الفي ...
قاطعني ودخلني داخل بسرعه ..
طقيت باب المجلس وانفتح الباب .. وشفت حمد كان كاشخ بالغتره والعقال والثوب .. من طالعته نزلت راسي بسرعه وقلبي يدق بقوه .. وقمت ارتجف .. للحظه فكرت ان ارجع البيت ..
حمد : هلا مشاري هلا ..
خالي : هلا فيك ..
وسلموا على بعض ..
حمد : حيااكم .. لطيف داخل ..
دخل خالي وانا وراه وماسكه ثوبه كأني ياهل ..
خالي يهمس لي : هدي ثوبي عفستيه (كرمشتيه ) .. بتخترب الكشخه الحين ..
هديت ثوبه .. وشوي الا تدخل لطوف ..
كانت لابسه فستان قصير يوصل لنص الساق احمر وفاتحه شعرها القصير وحاطه ميك اب احمر خفيف وطالعه تحفه .. شفت خالي لقيته مفتح شفايفه ويطالعها ..
لطوف بابتسامه خجل : السلام عليكم ..
خالي وقف وانا وقفت معاه : وعليكم السلام والرحمه ..
سلمت على خالي بيدها وشكلها منحرررررررررجه ..
وسلمت عليها وقعدت جنب اخوها ..
وانا طول الوقت منزله راسي واهز ريلي .. مرتبكه وخايفه .. اما خالي معتبر البيت بيته .. يسولف ويضحك مع لطوف وحمد ..
رفعت عيني شفت حمد يطالعني .. صادتني رجفه .. وجسيت بالبرد .. وحسيت بالشوق لايام الحب اللي كانت بينا .. للحين يا حمد سوالفك ما تغير .. ولا ضحكتك .. مافيك شي تغير .. الكل تمر عليه ظروف ومشاكل وتعدى وينساها .. الا انا .. ما ادري ليش المشاكل والهموم تنحبس فيني .. في كل دقيقه اتذكرها واتألم وكأن توني عايشتها .. آآآه ياعذابي آه ..
قلت : لطوف ..
لطوف : هلا .
قلت : ابيج شوي ..
وقفت ورحت اخر الميلس .. وشفت حمد وخالي يطالعوني ..
لطوف تهمس : خير خرعتيني ..
قلت بهمس : لطوف ابي اطلع من الميلس .. ما ابي اقعد معاه ...
لطوف : بس انتي مب معاه بروحكم ..
قلت : لطووووووووف طلعيييييييييني من الميلس الحين ..
لطوف : زين خلاص .. يلا امشي الصاله ..
ومشينا شوي ..
حمد : على وين ..؟
لطوف : بنروح الصاله وبنخليكم على راحتكم ..
حمد : اوكي .. مع ان كنا مرتاحين معاكم .. مو جي مشاري ..
خالي يطالع لطوف : ايه وااااااااايد ..
لطوف استحت مسكت يدي وودتني الصاله ..
ما اقدر اوصف لكم شنو شعوري في هاللحظه .. حسيت برااحه مو معقوله .. في الميلس كنت قاعده باعصاابي .. وكنت مرتبكه .. والحين حسيت براحه فضيعه ..
انا الحين في بيت لطوف ..
ومعانا حمد ..شتتوقعون حمد يسوي ..؟
والا شتتوقعون يصير في هالبيت ..
والا ما راح يصير شي دام ان خالي موجود ..؟
وانا هل بوافق على راكان والا بحن حق حمد وبرفض راكان ؟؟
كل هذا في جزء ال 16 ..