موعد مع السعادة للكاتبة العيناوية مذهلللللللللة - الصفحة 3

نبض القلب · 18-01-11, 01:02 AM

الجزء التاسع..

-------------------------------------------

اليوم: الجمعة..

المكان: في صالة بيت خلفان..

الوقت: الواحدة والخامسة والاربعين دقيقة..

--------------------------------------------

(سهيل)...

بعد ماراحت مهرة تتلبس...التفت انا لحمد مستغرب....

سهيل: ليش توديها العين مول..!!

حمد: بتسير هي وعفرا.. مهرة ناقصنها اغراض للجامعه..

سهيل: هههههههه غريبه من وين طالعه الشمس...قبل ماتفتكر فيها...

حمد: حرام سهيل...هذي يتيمه ام.... وعمتي مب زود مسوتلها سالفه... نحن رياييل ماعلينا لكن هي الوحيده بنت بينا.. انا لو ماخبرتني عفرا مابفتكر اسالها..وهي ماظني تقولي..تخاف..

ابتسمت انا بسخرية مستغرب من المصادفة... كل جمعه الظهر نروح انا وراشد نلعب بليارد في العين مول..!!..وطبعا مابعزم على حمد اني اوديهن لاني مافيني عالصدعه..وانا راشد بيمر علي لانه ماعندي سياره... وعلى طاري راشد.. ولد حلال...يتصل تيلفوون..

سهيل:آآلووو..

راشد: مرحبا سهيل..شحالك؟

سهيل: بخير وسهاله شحالك انته..؟ وشحال خالتي..؟ عساها بخير الحين..

راشد: لا اطمن الحمد لله اليوم احسن بوايد عن امس..

سهيل: ياحيها...

راشد: تغديت؟

سهيل: هي نعم تغدينا...بتخطف عليه..؟

راشد: طالع...انا اترياك انته تخطف...

سهيل: وين اخطف ماعندي سياره..!!

راشد: اووووووه صح والله نسيت...خلاص عيل بتلبس وبمرك الحين..

سهيل: اترياك...

راشد: فمان الله..

سهيل: فمان الكريم..

سكرت تيلفوني وقمت ركبت فوق عشان اتلبس...

وبعد ماتلبست..وقفت جدام المنظرة اتسفر...ومسحت على لحيتي اللي طولت شوي..وتلعوزت..يبالها تحليق...وترتيب.. اما شعري بخليه يطول شوي..مسكت بوكي وحطيته فمخباي..وشليت مفاتيحي...ويلست اطالع الميدالية..وابتسمت... حليلج ياشيخه...

اهدتني هالميدالية من ست سنين يوم كانت بعدها في المدرسه..وكانت الوالده بعدها عايشه ...وشيخه مودينها رحلة لمعرض مع المدرسه...كانت مسويه لابوها..وراشد..وانا..ميداليا ت.. وفرحت يوم اعتبرتني واحد من العايله مثل اخوها وابوها...اهدتني اياها بطيبة نفس...والظحه على ويهها...

رغم ان الميدالية بسيطه ...وقديمه نوعا ما....بس احتفظت فيها...باختصار..شيخه هي اول انسانه اهدتني شي بطيبة قلب وبدون مقابل...وعنالي الشي الكبير انها تذكرتني في لحظات كانت مستانسه فيها... صح كانت صغيره ساعتها..كان عمرها 17 سنه..بس حتى لو..فرحت بها وايد...

سمعت هرنات راشد عند الباب..وخشيت مفاتيحي في مخباي وشليت تيلفوني وطلعت بسرعه...

يوم نزلت تحت شفت عفرا حرمه اخوي يالسه عالكرسي..ومهرة واقفة عند الدريشه... وكلهن بعباياهن...

سهيل: لمنوو توايجين..؟؟

انتفظت مهرة واطالعتني باستغراب...

مهرة: اتريا حمد يخلص سلاماته...

عقدت حياتي انا..ويييت وقفت عدالها...شفت راشد بنظاراته الشمسية واقف يسلم على حمد ويسولف معاه..... انقهرت..وعصبت...اطالعت مهرة بنص عين..

سهيل: البنت ماتوايج عالرياييل...عيب..

اطالعتني هي باستنكار واضح...

مهرة: مالت عليه ولد خالتك شو ابابه...؟؟ انا اطالع حمد..

سهيل: جب يالله... سيري قعدي ويوم بيخلص اخوج رمسته بيزقركم...المول مابيطير...

حاست لي مهرة بوزها زعلانه وسارت ويلست عدال عفرا الي منزله راسها وشكلها منحرجه انها شافت نزاعي لمهرة... خليتهن وطلعت...سلمت على راشد.. ويوم خلصنا صد صوبي حمد..معقد حياته..

حمد: صدق بتسيرون العين مول..؟؟

سهيل: هي..

حمد: شحقه ماتقول...تدري انته انه وراي اشغال..ولا تعزم عنبوو توديهن عني..؟؟

راشد: يودي منوووه..؟؟

حمد: مهرووه تبا تسير تتشرا للجامعه...

سهيل: حمد نحن بنسير نلعب بليارد وانا مافيني اتبعهن من مكان لمكان...

راشد: فاطمه من شوي تقولي تبا تسير العين مول هي وشيخه وماطعت اييبهن وياي....

اطالعت راشد معصب... انا مافيني اشلهن...

سهيل: لا تشجعه انته بعد...

حمد: عيل خلاص..شلووا مهرووه وردوا على خوات راشد وخلوها تشتري وياهن..ماعليها يوم وياهن حرمه كبيره..

سهيل: يوووووووووه الله يخسك ياراشد... زين جذي..!!!..

ابتسم راشد..وابتسم حمد ورد داخل البيت عشان يزف الخبر للحريم...

------------------------------------------

اليوم: الجمعه..

المكان: صالة بيت خلفان..

الوقت: الثانية والربع ظهرا...

-----------------------------------------

(مهرة)....

لا تخافون..تعودت عالتهزيء وماحطيت فبالي هزبة سهيل لي...من قال اني بسمع كلامه..؟؟..خله يثبت وجوده واحترامه كاخو اول عشان يفرض رايه علي....

كلام بنات صح..؟؟؟ شوورانا نحن غير الررمسه..!!!

المهم... اول ماطلع سهيل رديت اوقف وعفرا تظحك علي وهي تراقبني امشي للدريشه وارجع اراقب...

كنت متحمسه للسيره...نادر ما اطلع...وما اطلب اني اطلع...مالي ويه...احس محد بيسويلي سالفه وبينفذ طلباتي...

اطالعت حمد وسهيل...وراشد...شوبلاه سهيل معصب..!!! اكيد هذا طايح من الشبرية اليوم الصبح...

وبعد دقيقه شفت حمد يرجع يدخل البيت...ابتعدت عن الدريشه ويلست عدال عفرا...

دخل حمد يبتسم...

حمد: راشد وسهيل بيودونج مهرووه..انتي ويا بنات خالتج...

شهقت انا...وشهقت عفرا...

مهرة: لييييييييييش.؟؟

حمد: والله مافيني اوديج وراي اشغال..قلت دامهم هم بيسيرون اصلا ..خلهم يودوونج شحقه نسوي المشوار مشوارين..!!

عفرا: حمــــــــد...!!!..وانا..؟؟

يا حمد ويلس عدال حرمته على نفس الكرسي... حسيت باحراج..مادري ليش يوم اشوفهم مع بعض انحرج...!!!!..

حمد: انتي شووو ياحرمي المصووون...؟

قالت له بدلع..

عفرا: حرمك المصون تبا تتشرى بعد اغراض من هوم سنتر...

ابتسم لها حمد بحب واضح...ياااااااااااااااااا� �ه قمة الاحراج اني اراقبهم جي... من وين طلعت الحنية على اخوي؟؟ والا بس عند حرمته هالحنان..!!!

صدق اني فقيرة على باب الله...ماحصلت من "الجنس الآخر" غير اخواني وابوي شي غير تحـــ...لا...ليش اتذكر وانكد بعمري... هذاك انسان بايع اخرته..والحمد لله ماصابني شي منه...ليش اهويس به عيل..!!!..اوففف...

حمد: بوديج يوم ثاني مخصوص...لا تزعلين...

عفرا: انزين بس انا واعده مهرة عاد...يمكن تستحي تتشرا مع بنات خالتها..

قلت انا بعصبية...

مهرة: هي استحي...

حمد: وابوي عليج تستحين من بنات خالتج..!!.. شيخه الا كبرج...

شهقت انا بصدمه....

مهرة: شيخه عمرها 22 وانا 19...

حمد: ماشي فرق كبير...بنت شراتج...

مهرة: بعدين انا استحي اركب ويا راشد...

دخل في هاللحظة سهيل المتنرفز...

واطالعني بعصبية..

سهيل: خلصي جان تبين تروحين والا والله ياروح عنج...موقفين الريال في الشمس..!!!...

تاففت انا...الظاهر لازم اسير وياهم ادري انه محد بيوديني عقب...

تقربت من حمد ومديت ايدي..

مهرة: نسيت اطلب ابويه فلوس...عطني...

ماقصر حمد...عطاني اللي يكفي وزياده بعد....حطيتهن في شنطتي وتغشيت وطلعت...

جابلت راشد اللي كان معقد حياته ويطالع سهيل...

راشد: سمعتك تنازع...ليش تنازع..!!! انا شو قايلك في دبي..!!!

سهيل: قسم بالله تستاهل تقعد في الشمس...عالخيانه هذي...

مافهمت عن اي خيانه يقصد سهيل...لكن راشد ابتسم...

راشد: شحالج مهرة...

مهرة: بخير...

راشد: اعق نظارتي..!!!

انقهرت...افصخ نعالي واعطيه على ويهه ياناس والا شو..!!

مهرة: اوهوووووووووووووووه علينا....

ظحك راشد..وسهيل عصب زياده..

سهيل: شو بعد افصخ نظارتي هاي...يالله يالله خلصنا...

مشى راشد وهو يضحك لسيارته وركب سهيل عداله... وانا ركبت ورا سهيل...

اول مره فحياتي اركب مع ريال غريب...صح مب غريب لكن اول مره....كان خاطري اركب في الدبه..لكن بيستنكرون هالشي طبعا...من كثر ماكنت منحرجه ومتوتره...

شفت راشد من طرف عيني يتصل ويكلم فاطمه اخته...ويقولها تجهز هي وشيخه لانه يايبني اتسوق معاهم...

حسيت اني رزززززززه....

-------------------------------------

اليوم: الجمعه..

المكان: في غرفة ناصر...

الوقت: الثانية والنصف ظهرا..

----------------------------------

(ناصر)....

كلت وايد اليوم...انسدحت على شبريتي عشان اريح شوي احس بطني متروس... توني بريح ظهري الا اسمع حد يدق الباب ويدخل...

منى: نااااااصر...ليش ماتلبست...!!

اطالعت منى باستغراب ... كملت هي كلامها بعد مابرطمت...

منى: عرفت انك كنت تطنزبي...وانا اقول من وين طالعه الشمس....

لفت عني وكانت بتطلع معصبه والصيحه فعيونها....نقعت انا من الضحك..صدق اني نسيت مووول سالفه السوق..

ركظت وراها ومسكتها...

ناصر: اييه....مــنّــــووه...والله والله اني نسيت...بوديج لا تزعلين...دقايق بتلبس وبنزل.. نسيت والله..

كان كلامي كله مدموج بضحك....صدق ظحكني شكلها وهي شوي بتصيح وتتحرطم علي...حليلها...ماصدقت على الله تحصل حد يوديها....

راقبت ملامحها وهي تبعد الظيجه عن ويهها تحط مكانها ابتسامه فرح...

منى: بترياك تحت...

نزلت منى ورديت انا داخل الحجره... غسلت ويهي عن الكسل..ولبست كندورتي الكركمية....والسفره اللي نفس اللون... وتسبحت بغرشة العطر...

وبعد ماخلصت انعفس ويهي.. تذكرت اني تعودت اتكشخ يوم اروح مراكز واسواق..للغراشيب مثل ماكنت اسميهن... بس الحين لمنوه اتكشخ..؟؟ مب قايلين بنلتزم..!!..

اووهووو يالله ماعليه الواحد يتكشخ لعمره...وانا ارتاح جي... ماحب اطلع من دون ماكون متكشخ وهذا شي مب عيب ابدا ولا حرام..بالعكس شي محموود ....

خذت اغراضي الشخصية وطلعت...

مريت على غرفة يوسف...ماتغدى اليوم...تذكرت كلامنا الصبح... وتظايقت عشانه...واستغربت فنفس الوقت...والا منوو كان يتصور ان يوسف منعفس فوق تحت بحب عن طريق النت..!!!...

دخلت الحجرة بهدوء وحصلته راقد... يالله..احسن له...الرقاد بيريح اعصابه شوي...رجعت اسكر الباب ونزلت تحت...حصلت منى تترياني في الصاله...

ناصر: يالله نسير...يالله كيف مبسووطه عالسيره..مايسوى عليج الا سوق...

منى: شي مميز في هالسيره مب مثل كل سيره..

ناصر: شو المميز يعني..!!

وراقبت باندهااااش كبير منى وهي تتقرب وتلوي على ايدي اليمين...مثل الياهل..

منى: اخووي بيتعبل مني وبيوديني هالمره السوق...

ابتسمت...بس تبون الصدق بغيت اصيح....

ماكنت ادري ان اهتمام الاخو يعني هالشي الكبير عند البنات..!!.. يالله كم كنت مقصر..!!..

ناصر: ههههههههههههه ويا ويهج... صبري بسير اييب سويج الستيشن من عند ابوويه...

مشيت عنها وسرت عند ابويه فغرفته حصلته راقد..لكن امي واعية...خذت من عندها سويج ابويه ورديت اطلع لمنى...وركبنا السياره ومشينا....

طول الدرب ونحن نتظارب عالاشرطه... هي تبا عيضه وانا ابا ميحد...

ناصر: يالسباااااله محد يعطيج ويه انتي...بردج البيت ترا...

منى: ماريييد ميحد اييبلي الضغط والسكري...

ناصر: عيل عييضه..!!..ماعندج سالفه خلي ميحد انا اللي اسوق...

منى: مب سيارتك سيارة ابويه...

ناصر: عيل ادب لج ماشي اغاني...يالله الاغاني حرام...

وبدلت الاذاعه وحطيت ابوظبي القرآنية...

وسكتنا لفتره....بعدها سالتني منى بصوت هادي..

منى: ناصر..بسالك سؤال...

ناصر: ليش الفضول..

منى: عنبوو ماعرفت السؤال تقولي فضول..

ناصر: ادري انه يخصني وهذا فضول...

منى: اخووويه كيفي استوي فضولية ...

ابتسمت...

ناصر: سالي..

منى: همممممم.... احسك هالمره متغير علينا....للاحسن...يعني مادري ..شو صار في هالاسبوعين اللي غبت فيهن عنا وغيرك جذي..!!!

ماتوقعت هالسؤال...تحسبتها بتسالني ليش رافض العرس لهالدرجه ومظيج خاطر امايه بسببه..!!...

ماعرفت شو اقولها....

بس الفت اسباب ثانوية...

ناصر: غبت عنكم فتره طويله من اشتغلت فبوظبي..وعرفت قيمة الاهل...واني مقصر فيكم كلكم....يوم فكرت من كم يوم باخواني اكتشفت اني ما اعرفكم عدل..وانصدمت...خواني وما اعرفهم؟ وربعي اعرف ادق التفاصيل عنهم..!!... هذا سبب..والسبب الثاني... من يومين صارلي حادث بسيط...وخفت اني امووت وانا مب مسوي فحياتي شي عليه قيمه ...وخفت انه محد بيذكرني بالخير منكم لاني ماكنت زين فيكم....

وصلني صوتها بتاثر واضح والعبره خانقتنها...

منى: حرااام عليك انته اخوونا مهما يكون..كيف مابنذكرك بالخير..وبعدين لا تفاول على عمرك الله يعطيك طولة العمر...

التفت لها بابتسامه على ويهي...وشفت عيونها تلمع...بلاها هذي جاهزة للصياح اليوم..!!!..

ناصر: لا تسويلي فلم هندي الحين...!!

ابتسمت...وبعد شوي ردت تلتفت لي..

منى: دامك متظايق في بوظبي لين ماتحول شغلك العين..!!!..

ناصر: ياريت..شغلي انا مايصير الا فبوظبي...

منى: الله يعينك...

سكت منى... وسكت انا بعد...

ماشي باقي وبنوصل العين مول...

--------------------------------------

اليوم: الجمعه.

المكان: في سيارة راشد...

الوقت: الثالثه الا ربع ظهرا..

----------------------------------------

( راشد),,,,

مادري شو اللي خلاني اعزم نودي مهرة... من شوي كنت رافض اني اودي قوم فطيم وشويخ وياي رفضا باتا على قولتهم...بس يوم يت مهرة في الموضوع مادري... هالبنت تكسر خاطري احسها دوم ظايعه في الطوشه....وقهرني بان خوانها يتعازمون عشان يودونها مكان...من الخاطر مب مهتمين فيها حليلها...عشان جي عرضت انا عمري..لانه يسعدني اني اوديها مكان اذا بغت...وعشان مايتمون خوانها يتمننون عليها بهالسيره ...!!..لو اشلها اسكنها فبيتنا وايد احسن....مسكينه يتيمه ام....

كان سهيل متنرفز صدق لاني شليتها.... مع انه مابينقص عمره لو يت ويانا خصوصا انها ما بتاذيه ولا بيطالع عليها لانها بتكون مع خواتي.... بس هو مادري كيف يفكر...!!!

وقفت جدام بيتنا وظربت هرنات....طلعت فاطمه بكرشتها متنقبه...وشويخ وراها متغشيه...

دخلت شوي السياره ..وفاطمه وراها..

شيخه: السلام عليكم....وااااي الله مهرة بتي ويانا...(وباستها) شحالج حبيبتي..؟!!

مهرة: بخير شيخه شحالج انتي.؟!!

شيخه: مستااااااااانسه...

دخلت فاطمه بعدها وقعدت وراي...

فاطمه: السلام عليكم... هلا والله مهرة شحاااااالج..

حركت انا سيارتي وريوست وانا اشوف فاطمه تبوس مهرة وتسلم عليها...

فاطمه: فديتج والله من زمان ماشفتج...

مهرة: شو نسوي انا ماطلع من البيت...وانتي تراج في دبي...شحالج فاطمه؟

فاطمه: بخير الغاليه...

تقربت شيخه مني انا وسهيل (سنفور غضبان)... وقالت بحماس..

شيخه: شحااااااالكم شباب...بتروحون تلعبون بليارد هاااا..؟؟

راشد: هيي عندج ماانع..؟؟

شيخه: بلعب وياكم...

تنرفزت انا...صرنا اثنين سنفور غضبان....هالبنت بتذبحني فيوم...بتيبلي الجلطه...بتذبحني قاصر عمر..ماتيووز...

راشد: بععععععطيج بكس على خشمج وبكسره لج الحين ...ردي على ورا ويلسي مثل البنات عنبووووووووووج زااد....

زاعجت شيخه..

شيخة: لييييييييييش تسب ماي فاذر..؟؟؟..والله بخبر...

راشد: وانا بعد بخبر عشان يحرمج من السيرة مولية...ماينلام والله يوم رافض يشغلج...بدال ماتشتغلين فقسم حريم بتشلين مكتبج وبتحطينه عند الشباب....

ظحك سهيل...وظحكت فاطمه...مهرة باختصار ساكته... بس حسيت انها تبتسم..

شيخه: ظحكوا ظحكوا...قسم بالله انا مظلومه في هالعايله...

مدت ايدها تبا تبدل الشريط اللي انا حاطنه...وظربتها على ايدها...

شيخه: آآآآآآي...

راشد: ترانا قراب من البيت ان مايزتي ورديتي على وراج بردج البيت....

شيخه: بسم الله منك خلاص انزين...
تراجعت شيخه على وراها وقعدت باحترام...سمعت فاطمه وهي تقول لمهرة..

فاطمه: مهرة عقي غشوتج..

مهرة: ليش.؟؟

فاطمه: ابا اشووفج تغيرتي او لا...

استحيت التفت واشوفها اذا عقت غشوتها او لا..بس بعد شوي وصلني صوت فاطمه تقول بحنان..

فاطمه: فديييييييييييت هالويه...تشبهين خالوووه الله يرحمها....

مهرة: تسلميين...

شيخه: ماشاء الله مهاري بتشترين للجامعه...بساعدج انا....

راشد: قصدها بتخبلبج وبتفرر لج راسج...تمي ويا فاطمه احسن...

شيخه: اخويه فديت روحك لا تدخل فسوالف البنات ممكن..!!!..

سكت عنها وتمت شيخه تقرقر على راس مهرة....بصراحه مهرة في موقف لا تحسد عليه...
توقعات

نبض القلب · 18-01-11, 01:04 AM

الجزء العاشر...

-----------------------------------------------

اليوم: الجمعه...

المكان: في غرفة يوسف..

الوقت: الخامسة والنصف مساءا...

----------------------------------------------

(يوسف)....

ازعجني صياح التيلفون...وقمت من رقادي منقهر.. بعدني ماشبعت رقاد عشان انش.. افففف.....

مديت ايدي بسرعه ومسكت التيلفون... خالد...اكيد...منوو غيره بيزعجني...

رديت عليه..بصوت كله رقااد...

يوسف: آآآلووووه...!

خالد: تفوووو عليك...

ابتسمت.... وبعدها ضحكت...مادري من وين ياني المزاج للضحك بس هالانسان مادري كيف..

يوسف: هههههه شو سويتلك..!!

خالد: مالت عليك من ربيع... والله انك خااام انزين....

عرفت ليش هو متظايق... امس كانت خطبته...وانا ما اتصلت به ولا خاويته ولا سالت عنه... كان امس يوم مهم بالنسبه له...

يوسف: انا ما ارابع مرتبطين....

خالد: طالع..!!!.. عنبوو ذاك الشكل لك... وين انته..؟؟؟

يوسف: والله الا في البيت... مبرووك خالد... الله يوفقك ان شاء الله.

خالد: الحين عاده.!!...الله يبارك فيك وعقباالك...

يوسف: لا انا ماريد...

خالد: مب على كيفك...وين انته..؟؟

يوسف: راقد...وانته..

خالد: شو مرقدنك..!!..انا احين ياينك البيت قم ابا اشوفك عند بابكم...

يوسف: لا لا تي الحين ابا ارقد ياخي...

خالد: والله يا ايي... وانته تخسي ترقد مره ثانيه...قممم يالله....باي

وسكر فويهي.. اطالعت التيلفون...وظحكت...اسميك ياخالد..!!

قمت دخلت الحمام وتسبحت في خمس دقايق...تلبست ثيابي وصليت...وبعدها خذت اغراضي الشخصية والسفره اللي حطيتها على جتفي بشكل مهمل..ونزلت تحت...

شفت امي ويالسه عندها يارتنا ام حميد اللي دوم تينا...ما استحيت لاني متعود عليها ..وتقريبا هي مربتنا مع امي..

وولدها حميد اللي حاليا مسافر من سنتين ونص يكمل دراسته في الخارج دكتوراه..

يوسف: السلام عليج ام حميد...

ام حميد: مرحبا مرحبا...هلا والله بالغالي شحالك ابويه..؟!!

يوسف: بخير الله يسلمج شحالج انتي وشحال العيال..!!

ام حميد: بخير وسهاله يسلموون عليك..

يوسف: وشحال حمييد..؟ شو مسوي فدراسته ومتى بيخلص..!!

ام حميد: والله ياولدي مايشكي باس..ويقول باقيله سنه مادري سنه ونص..مادريبه..متى ماخلص بيي ان شاء الله.

ابتسمت..

يوسف: تحملي خالتي عن اييج ساحبله شقرا وياه..ان ماحشرتيه تراه بيعرس هناك ..

ظحكت امي وظحكت ام حميد..

ام حميد: لا عاد انته تعرفه انه مايسوي هالحركات... الله يحفظه ياربي...

يوسف: آمين... امايه خالد بييني الميلس بعد شوي..طرشولنا الدلال واذا عندكم فواله زين...

ام محمد: ان شاء الله احين بامر البشكاره..

خليت العيايز وطلعت من البيت...توني بدخل الميلس الا وخالد واصل...

ابتسمت..وتوايهت وياه...شكله كان معتفس... اطالعني بمعاتب...

خالد: والله انك سبال..

ودخل عني الميلس وانا رديت الا اضحك عليه...

يوسف: مايسوى عليك ياخي قلت لك مابحظر وياك ..خطبة اهلية انا وين ارز بالويه..!!!

يلس خالد عالكرسي..

خالد: انا ما ارمس عن سيرتك للخطبه...انا زعلان لانك لا اتصلت بي ولا طرشت لي مسج ولا باركت لي...

يييت انا وعلى ويهي ابتسامه..ويلست عداله...

يوسف: حقك عليه..والله ماحصلت وقت.. خبرني شو صار امس..

اطالعني خالد بنص عين..بعده متظيج...

خالد:..... ماشي... كل حد عطى رمسته... وصارت رسمية...بس قهرني ابويه يوم قال مستعيلين عالعرس...!!

يوسف: ههههههههههههاي بيورطك...

خالد: منو قالك خليته..قتلهم لا...انا بعدني ادرس باقلي هالكورس واخلص..وبعدها ابا اشتغل..وابا املج.. وعقب العرس..

يوسف: وافقوا عالملجه...؟!!..

خالد: والله مادري شفتهم مترددين...قالوا عقب بنتشاور في الملجه هذي...شكلهم مايبونها اطول...

يوسف: هممم وايد ناس جي..

خالد: زين بس انا ماعرف البنت...ولا اعرف كيف تفكر وماريد انصدم بعد العرس...واعتقد هذا من حقي..

يوسف: ماعليك ماعليك بيوافقون... يتغلون عليكم الحين....بس اهم شي تكون انته مرتاح ومستعد للالتزام..مب تاخذ لك حرمه وعقب اطنشها وماتعطيها حقوقها...

شفت خالد شوي يفكر...

خالد: وشو ناقصني انا ما اعرس...وشو اتريا اصلا..!!

يوسف: مثلا تتريا لين ماتحس انك صدق صدق تبغي تعرس...

خالد: ابا اعرس..بس مب الحين...خلاص الحين ماتنفع الرمسة...

يوسف: ترمس احين احسن عن ترمس بعد الملجه... هذي الا خطبه بس هذاك يعتبر زواج...

خالد: انته ليش متشائم..!!.. كلهم مدحووها لي...خلاص خلاص انا مرتاح من هالخطبه...يابوي اذتني والله امي عالعرس ابا افتك من صدعتها..

يوسف: هههههه احين بتاذيك على ترتيبات العرس...

خالد: ههههه والله انها من اليوم الصبح بدت بهالصدعه اليديده...

يوسف: الله يعينك...ويوفقك..

خالد: آآمين... اخوك ناصر رد بوظبي.؟!!

عقدت انا حياتي...

يوسف: مادري...ستيشن ابويه محد يمكن شلها وسار بوظبي...

تمينا انا وخالد نسوولف عن اشياء مختلفه...واهمها كان رجعتنا للجامعه بعد اسبوع..وعن المساقات اللي سجلناها رباعه والمشروع اللي بنسويه للتخرج... وايد كنا نحاتي هالكورس الاخير...!!.

-------------------------------------

اليوم: الجمعة..

المكان: في سيارة ناصر..

الوقت: السادسة الا ربع مساءا..

--------------------------------------

(ناصر)....

حسيت براحه يوم طلعت من المول... لاني تعبت من مشتريات منى..لكني مابينتلها هالشي.. وشي ثاني كنت متنرفز وابا اطلع عشان ما اشوف لا سهيل ولا راشد... يذكروني بيوم اسود ... كنت فيه شيطان مب ناصر.... مسكينه...اظن انها عايشه اسوأ فتره فحياتها بسببي..

كنت متنكد ومزاجي مثل ماتقولون اسود...سمعت منى تقولي..

منى: انته بتاخذ سيارة ابويه هالاسبوع..!!

ناصر: هي..سيارتي مابتخلص لين الاسبوع الياي....

من طرف عيني شفت منى اطلع شي من كيس صغير..كانت سلسله.. مدت ايدها وعلقتها في مراية السيارة الامامية وانا اراقبها بفضول..

بعد ما خلصت شفت السلسلة...مكتوب عليها" عين الله ترعاك"... تاثرت...ابتسمت..انا شفتها يوم اشترت السلسلة بس ماتوقعت انها لي...!!

ناصر: حقي.؟!!

منى: هي... عشان ماتسوي حوادث ثاني مره ...

ابتسمت اكثر... حليلها منى... بطريقة عجيبه خوزت كل المزاج الاسود اللي كان مسيطر علي من طلعنا من المول..

ناصر: بس هذي مب سيارتي..

منى: بس بتستخدمها هالاسبوع..ولا تنسى تاخذها يوم تخلص سيارتك وتعلقها...

ناصر: مشكووره...

قالت منى بفرح ملحوظ..

منى: العفوو...

وصلنا البيت...ولاحظت وجود سيارة غريبه علي... سالت نفسي بس بصوت عالي.

ناصر: سيارة منو هذي..؟!!..

منى: آآه..احم..هذي سيارة خالد ربيع يوسف...

استغربت..والتفت لها بسرعه..

ناصر: شدراج انتي..!!

منى: تراه دوم اييينا....هذي سيارته اظن..

كانت تتكلم بارتباك....جني زيغتها..!!..

دخلنا البيت ووقفت الستيشن جدام الباب في الحوش..

نزلت انا ومنى...شللت هي اكياسها وانا مشيت صوب الميلس عشان اشوف منو هناك..

فعلا ..كان خالد...حافظ على منى الظاهر حافظه الساير والراد...

ناصر: السلام عليكم...

نش خالد ويوسف يوم دخلت انا..سلمت على خالد...وخذت علومه وعطيت يوسف نظرة تفحصية...ابتسمت لي عشان يطمني بانه بخير وحالة الاكتئاب اللي كانت فيه الصبح ماعاادت موجوده...

ناصر: مبرووووك ياخالد...الله يوفقك ان شاء الله...

خالد: الله يبارك فيك...

ناصر: غلبتني ماشاء الله عليك... انا هالعيوز من تشوفني حشرتني عالعرس...

خالد: وشحقه ماتعرس..

يوسف: لا ترد عليه...ذبحنا...خلاص خطب يبا العالم كلها تعرس الحين عشان مايفتقد العزوبية..

ظحكت انا ...لكني خذت سؤال خالد على محمل الجد في نفسي...

وانا شو قاصرني ماعرس..؟!!!...

تميت اسولف وياهم لين ما اذن المغرب...وبعد الصلاة في المسيد رجعت البيت ولميت اغراضي..

سلمت على اهلي..وشليت الستيشن وتوكلت صوب بوظبي...

------------------------------------

اليوم: الجمعة...

المكان: العين مول...

الوقت: السادسة والنصف مساءا..

------------------------------------

(سهيل)...

تلاقينا بعد الصلاة عند الدري في العين مول...فاطمه كانت شاله كيستين كبار اغراض للبيبي..وشيخه شاله بعد اكياس مهرة...لانها رفضت تخلي مهرة تشل شي بايد مكسووره...

حشى مهرة هالكثر متشرية اغراض للجامعه..!!!..

راشد: ترانا تاخرنا وايد..يالله نسير...محتاييين شي غير..

شيخه: لا خلصنا...انا ريولي بعد عورتني..

مهرة: شيخه هاتي عنج...هاتي انزين عالاقل كيس واحد..

لزت شيخه عن مهرة بعيد...

شيخه: لالالا والله ماتشلين عنبووو....ماعليه انا عادي...

مهرة: الله يهديج...

شيخه من دون قصد يوم لزت بعيد عن مهرة...كانت متجهة صوبي...ويوم شفتهن يظاربن منو تشل الاكياس قلت فخاطري مابنخلص اليوم...!!

مديت ايدي وسحبت الاكياس من شيخه..

سهيل: هاتيهن عنج...

فاطمه: اوهووو ياسلام جنتل مااان...

ظحكت انا على فاطمه...وشيخه ...

شيخه: لالا برايهن خفاف...

سهيل: هاتيهن اقووولج...

سحبتهن عن شيخه وشليتهن عشان نفتك من الصدعه..

فاطمه: وانا ..حد يشل عني ...

راشد: هههههههههه سوري ما انتبهت...

شل راشد الاكياس عن فاطمه واتجهنا للباركنات ..وركبنا السياره ... طلعنا في شوارع العين وراشد يسوقبنا...

السياره كانت الازعاج بعينه... شيخه وفاطمه ومهرة يقرقرن رباعه ولو ان مهرة كلامها قليل... وانا اسولف ويا راشد عن امور مختلفه... والمسجل يرمس ارووحه...

ما انتبهنا الا وراشد داخل بيتهم وموقف سيارته...

التفت له انا مستغرب منه....

سهيل: شحقه ييت هني..؟؟

بادلني الاستغراب هو بعد...

راشد: ليش.؟!.

سهيل: وابوي..!!...ليش ماخطفتنا البيت عشان انزل مهرة..!!

راشد: اووووووووووووووه والله نسيت..الله يحشركن من حريم صدعتن لي راسي ونسيت...

شيخه: الا قول متعايز...

راشد: لا والله اني نسيت...

فاطمه: وابوي عليكم هي شعليها بيت خالتها....نزلي حبيبتي بتعشين ويانا وبنسولف وياج شوي..

مهرة:آآه..لا مره ثانيه ان شاء الله..

شيخه: لاااااا شو مره ثانيه دامنا في البيت...يالله يالله انزلي ويلسي ويانا شوي وبيوصلج راشد بعدين...

انا ماكان عندي مانع...عشان جي سكت...وترييت يتفقون على شي...

شفت راشد يصد صوب مهرة اللي كانت يالسه وراي وقالها..

راشد: هااه مهرة..!!. بتنزلين وبتطيعين الشور وبوصلج عقب والا اوصلج احين..؟!!..يالله خلج عاقل ونزلي امي اكيد بتفرحبج...دومها تهاذيبج...

مهرة:......او..اوكي...

نزلناكلنا من السياره وخلينا الاكياس في السياره ماعدى اكياس فاطمه نزلناهن...

توجهت انا صوب الميلس على بالي راشد بيي وياي لكنه زقرني واشرلي عشان ندخل كلنا البيت...مع البنات..

سهيل: تعاااااااااااااال وين نبا نتفيزر ويا الحريم...

راشد: الحريم هذيلا خواتك وخواتي وامي محد غريب...تعال تعال..

رجعت للبيت ودخلت بعد راشد ...خالتي كانت يالسه في الصالة...ييت وسلمت عليها ومن بعدي يت مهرة تسلم على خالتها...

يوم يلست عالكرسي..لصقت مهرة فيني...وراشد عدالي من الصوب الثاني...

صاصرت مهرة وانا اقول..

سهيل: شحقه لاصقه فيني جي سيري عند شيخه يلسي...

هزت مهرة راسها باصرار...تفضل انها تقعد عدالي عن تسير تقعد عند البنات...شو هالحاله..!!..

خالتي كانت مستانسه وايد بمهرة...ولابسه الكل وطايحه الا تسولف معاها.... مهرة فعلا تشبه الوالده الله يرحمها... والظاهر خالتي تشوف فيها امي... تذكرت كيف ان خالتي بعد وفاة امي اقترحت انها تربي مهرة بنفسها..وتيبها معاها البيت...بس ابوي وحمد رفضوا... بحجة ان مهرة صارت حرمه ولا عليها...ومابتقعد مهرة متحجبه طول الوقت بسبب بو راشد...مابترتاح... بالاضافه الى وجود راشد..!!..

وخالتي ما اصرت على رايها...

دخل بو راشد علينا في الصالة...حسيت بمهرة بانها منحرجة ومرتبكه وودها تشرد..

بوراشد: ماشااااااااااااااء الله الكل متيمع هني اليوم...مرحبا مرحبا الساااع بعيال خلفان...

سلمت على بوراشد ..وسلم هو على مهرة اللي ردت عليه سلامه وهي تحاول تندس ورا ظهري... غريبه اختي.. موول ما اجارب الناس..!!!.. هذي كيف بتروح الجامعه وبتدرس فيها..؟!!..

تقربت شيخه من مهرة..ومني.. راقبت انا ملامح شيخه الحلوه...وعيونها السوود..ورموشها الطوال..!!..

شيخه: مهاااري تعالي نسير فوق...براويج حجرتي انتي ماشفتي فبيتنا غير الصالة والحوش...

مسكت شيخه مهرة من ايدها وسحبتها وراها للطابق الفوقي...وانا اتبعهن بعيوني.. وطولت على هالحال لين ما اختفت شيخه ومهرة عن نظري... وفجاة تصادمت نظرتي مع نظرة راشد وهو يطالعني بنص عين...وابتسامه ساخره على شفايفه...

سهيل: شفيك.؟

قالي بمكر..

راشد: سلامت راسك..

ظحكت انا...السبال انتبه لي وانا اطالع شيخه ومهرة...وهواصلا منتبه علي من زمان بس ساكت عني..

رغم ربعتي الطويلة براشد الا اني اعجز احيانا افهم اللي يدور فباله..وليش يتصرف مثل مايتصرف..!!..

هو يدري اني اهتم بشيخه...بطريقه انا بنفسي ما افهمها...وهو يدري...لكنه ساكت...

----------------------------------------------

اليوم: الجمعه...

المكان: غرفة شيخه...

الوقت: السابعه والنصف مساءا...

--------------------------------------------

(مهرة)....

المكان الوحيد اللي كنت ابغي اكون فيه هو غرفتي....لكن الظروف جرجرتني معاها لغرفة شيخه... وارتحت مبدئيا لهالشي...لاني ببتعد عن الصدعه..ولو انه نص الصدعه كانت صادره من عند شيخه...

دخلت غرفتها اللي كان لونها بطيخي والوانها هادية وحلوه... تجاهلت الكرسي ويلست عالشبرية ويلست هي معاي..

مهرة: مااشاء الله حجرتج وايد حلوه...

شيخه: تسلمييين عيونج الحلوه.. قوليلي مهرة...متحمسه لحياة الجامعه..!!

مهرة: هممممم... تقريبا هي..متحمسه..ولو اني ماعرف شي فيها لكن حالي من حال هالبنات...

شيخه: ليتني كنت ادرس جان علمتج كل شي...عالعموم أي شي تحتاجينه انا حاضره...

مهرة: تسلمييين..اكيد اني كل يوم بحشرج بسالج عن شي...

شيخه: افاا عليج والله...خبريني متى بتمتحنين تحديد مستوى..!!

مهرة: باجر ارشاد.... بنستلم بطايقنا الجامعية اظن..وبنشوف بعدها شو بيصير..

كنت متوتره ومتحمسه بنفس الوقت بسبب قرب بداية الدوام في الجامعه...ادري اني بتلعوز وبتمشكل بسبب جهلي لكل امور الجامعه... لكن بمشي حالي ان شاء الله...

شيخه: همممممم مهرة...قوليلي.. ليش طلعتي من المحل بهالطريقه..!!!...

نقز قلبي بسبب الذكرى....وتوترت..وعين شيخه تراقبني مثل الصقر...

مهرة: قتلج...شفت بنت مادانيها...

شيخه: بس اللي اذكره انا..ماكانت في المحل الي كنا فيه بنت كاشفه ويهها...ماكانت غير بنت وريال وياها وكانت متغشيه...كيف شفتيها..!!

توترت اكثر.... ماشاء الله ياشيخه هب عين عليج...

مهرة: اعرفها حتى لو متغشيه...

ابتسمت شيخه بطريقه غريبه...

شيخه: عنبووو يامهرة...وين بتعرفينها وهي متغشيه ..!!..وبعدين مايستاهل كل هذا انج تشردين من المحل بهالطريقه حتى عالكاونتر ماوقفتي...!!!

قمت من الشبرية وانا متظايقه...ليش هالتحقيق..شو يهمج فحياتي عشان تساليني..!!!..وقفت عند الدريشه وانا احظن ايدي المكسوره ...وسكت...

بعد لحظات حسيت بايد شيخه على كتفي... اطالعتني بحنية..

شيخه: انتي ماعندج خوات...وانا بعد وحيده في البيت وما احصل حد اتكلم معاه...خبريني...وكل كلامنا واسرارنا بتكون فبير..صدقيني...
رفعت لشيخه عيون مليانه دموع...وابتسمت..رغم دموعي... شيخه طاحت عالعوق فعلا...انا وحيده وماعندي حد اكلمه ويخفف عني...

شيخه: فديت هالويه والله...لا تصيحين حبيبتي...تعالي..

وسحبتني ويلستني عالشبرية مثل ماكنا قبل...

شيخه: خبريني...ليش شردتي من المحل بهالطريقه..!!!

ماقدر اقولها...شو بتفكر فيني..!!!...اخافها تخبر حد...كيف اقدر اثق فيها..!!..

سكت..وما اتكلمت...

شيخه: سكوتج هذا وتوترج ياكدلي بان السالفه جايده..وما اقدر افكر غير ان مب البنت..الريال اللي معاها كان هو السبب...

شهقت...ورفعت نظري لها بصدمه....كيف عرفت..!!!!!!..

شيخه: صح..؟!!..

نزلت عيني لحظني مره ثانيه....

مهرة: لا تكملين شيخه بليز...

شيخه: كنتي خايفه من وجوده...اناماعرف هالريال..يقرب لج..؟؟ وبعدين ليش كنتي خايفه منه جي...خبريني مهرة يمكن ترتاحين...!!

ماتتصورون الصراع اللي كان في نفسي...كنت اتمنى اخبر حد حيادي وارتاح...بنفس الوقت خايفه تخون فيني وتخبر حد... انا ما عرفها عدل عشان اجزم انها توفي بوعدها....بس كيف بعرف اذا ماجربت..!! لكن اجرب بشي خطير مثل هذا...!!!

رفعت نظري لها وشفت عيونها هادية..وابتسامتها مطمئنه...

لا...اكيد مابتقول لحد...

مهرة: ماعرف هالريال...ولا يقرب لي...وماشفته غير مره فبيتنا..وهذي المره الثانيه...

عقدت شيخه حياتها باستغراب..

شيخه: عيل ليش خفتي منه جي..!!

نزلت عيوني مره ثانيه خايفه اني انطق...

مهرة: هممم....الريال هذا...تـــ...تــحـــ...همم...تح رش فيني..!!..

شهقت شيخه بقو يدل على صدمه...

شيخه: شو تقوولين..؟؟ كيف يعني تحرش فيج..!!

فجاه اندفعت الكلمات مني بدون ما اقدر اوقفها..

مهرة: مسك ايدي...وكشف عن ويهي يوم كنت متغشيه...

شهقت شيخه مره ثانيه...

شيخه: خيبه..!!..هممم..وطي صوتج...صبري بشغل المسجل عشان محد يسمعنا...

التدبير هذا اللي سوته شيخه اثبت لي انها ماتبا حد يدري غيرها..راحت وشغلت المسجل وطولت عليه وقفلت الباب عشان نتكلم براحه...ردت تقعد جدامي وقالت بلهفة..

شيخه: خبريني كل شي بالتفصيل...شو سوا هالسبال..؟!!..

مهرة: همم...تدرين بشكارتنا شردت...وصتني عمتي بان أي حد يدق الباب سواء ريال او او حرمه..باني اقرب بهم واجدم لهم الفواله...

شيخه: وبعدين.؟؟

مهرة: اول امس.. صادف ان الكل غايب عن البيت..وعمتي طلعت للسوق...ومحد غيري انا في البيت... دق هذا الباب وانا فتحت له وقربت به في الميلس...

شيخه: خبله انتي...؟!!!!!!!!!!!..

مهرة: شو اسوي عمتي قالت لي ياويلج ان مانفذتي...

شيخه: عمتج مادري كيف تفكر..!!!!..وبعدييييين..؟!!

مهرة: يوم يبت له الفواله مسكني...وكشف عن ويهي وشعري...والله شيخه مت من الخوف...تم كل شوي يتقرب مني ويمسكني بقو اكثر وانا اظارب لكن ماشي فايده..اضطريت استخدم ايدي المكسوره وتمت تعورني....ترجيته يتركني..وبعدين...وبعدين... بس..

صرخت شيخه وهي تمسك راسها..

شيخه: لاااااااااااااا ...لا تقولين..ياويلي ياويلي...

على طول فهمت شو فهمت شيخه...وطمنتها...

مهرة: لاااا لاا شيخه...ماصار شي...يوم ترجيته فجني..وشردت انا لبيتنا وقفلت على نفسي...

شيخه: آآآآآه خوفتيني يامهرووه..حسبي الله عليه...ييعله مايتوفق وين مايسير ليش يسوي فيج جذي...؟!!.. يزاج انج اكرمتيه وظيفتيه..!!

نزلت عيوني بحزن عاللي صابني...

مهرة: والله ماتتصورين الرعب اللي عايشه فيه من ذيج الساعه...يوم شفته اليوم مت من الخووووف..زين ما اغمى علي...

هزت شيخه راسها باسف..

شيخه: ماخبرتي حد..!!

مهرة: لا..ولا بخبر...دخيلج شيخه لا تقولين لحد ابدا ابدا...والله بتدمر حياتي ...

شيخه: بس لازم ياخذ عقابه...

مهرة: الله بيتكفل فيه وبيعاقبه...واذا مب في الدنيا في الآخره... بليز شيخه لا تخبرين حد ابدا..

شيخه: ولا يهمج.... بس والله ماتوقعت السالفه تطلع جذي خطيرة...فديتج يابنت خالتي..الله يعينج عاللي صابج.. بس الحمد لله ماصار شي جايد ياثر على حياتج...

رفعت نظري لشيخه بعصبية..

مهرة: لكنه اثر علي ياشيخه...انا صرت اكره الرياييل...ماداني اشوفهم ولا اني احتك فيهم...

شيخه: مالوومج..لكن مب كل الرياييل واحد ياشيخه...

مهرة: لا كلهم واحد...ماشفتيهم اليوم في المول..!!..

شيخة: هي والله صدقج...الناس استوت تافهه...الرياييل من يشوفون عباة سودا لو كانت اللي لابستنها كبر امهم بعد يربعون وراها..صاروا مايحشمون اعراض الناس...والبنات صارن اتفه بعد من يشوفن كنادير بيض بلقن بعيونهن يبصبصن لو من تحت الغشوة....ويسون يميع الحركات عشان يلفتن انتباه الشباب ...

مهرة: مادري هذيلا وين اهلهن عنهن....الشباب بنقول غير عن طبيعة البنات..لكن البنات جي كاشفات في الاسواق . وبروحهن..

شيخه: لا تجمعين...مثلا نحن صح اليوم سايرين ويا خوانا...لكنا انا وانتي اعتزلنا وروحنا رواحنا...واللي يشوفنا بيقول هذيلا بنات يايات ارووحهن..!!!..

مهرة: صدقج...الواحد لازم مايجمع....والظاهر ان الزين والشين فكل مكان حتى في العين ...!!

شيخه: هي بس الفتره الاخيره صاروا الشين اكثر من الزين....

ارتحت للكلام مع شيخه... صحيح ان اربع سنين فرق بيني وبينها لكن افكارنا متقاربه...باختصار تمينا يالسين في غرفتها لين مازقرونا للعشا...

وبعد العشا ركبنا سيارة راشد اللي وصلنا للبيت...!!
اليوم: الجمعه...

المكان: في شقة ناصر..

الوقت: الثامنة والنصف مساءا..

--------------------------------------------------

( ناصر)....

فتحت باب شقتي بالمفتاح...وسكرت الباب وراي...شغلت الليتات والمكيف المركزي ...سرت صوب حجرتي وحطيت شنطتي هناك...الحمد لله اني صليت العشا في الطريج..عشان ماقعد احاتي الصلاة واأجلها لين اخر شي انساها...

طلعت من غرفتي ورحت للمطبخ.. فتحت الكبت اللي كانت فيه غرشة الخمر..مازالت مكانها...وقبل ما اضعف جدامها..مسكتها وجبيتها كلها في المغسل..ومن بعدها عقيتها في الزباله... ارتحت نفسيا بانه ماعندي مصدر ثاني للخمر في شقتي وفي متناول ايدي..كله تخلصت منه.. مسكت الجبريت مال الغاز وشليت طاسه معدينة .ورجعت لغرفتي وفتحت الكبت..وطلعت الصندوق المربع وجبيت محتوياته كلها عالشبرية...

صور بنات..تذكارات...واوراق ارقام...واسامي...وهدايا رمزية....حطيتهم في الطاسه وشليتهم معاي وطلعت للبلكونه.. حطيت الطاسه عالارض...وولعت فيهم وحرقتهم...

راقبت الصور وهي تذبل وتتعفس وتحترق...حسيت برعشة تسري فجسمي...هالبنات ان ماتابن..بتاكلهن نار جهنم مثل ماتاكل الظو صورهن الحين... ياويلي من ربي..ابا اغسل ذنوبي باي طريقه...

بعد ما احترقن كل الذكريات السودا...شليت الطاسه ورجعت للمطبخ.. وجبيت الرماد في الزباله وغسلت الطاسه ورجعتها مكانها في الكبت..

خلاص..حسب ما اذكر ما تم شي ماتخلصت منه...طلعت من الشقة وقفلتها..

ورحت للجميعة... واشتريت كل شي ناقص في المطبخ...مب كل شي..اللي قدرت اتذكره ...لايغركم اغلب اللي اشتريته معلبات سهلة التحضير وكيك وكافي وجبس وعصاير ..ونقانق وهمبرغر ...مثل ماقلت..جميع انواع المعلبات والكراتين..رن تيلفوني يوم كنت عند الكاونتر...

اوففففففف....امررره توقيت..قلت لها دقي الجمعه المسا ودقت...

سكرت فويهها... وحاسبت عن اغراضي وشليت الاكياس وطلعت للسياره ...اتصلت مره ثانيه...

يوم دخلت سيارتي وركبت وامنت بانه محد بيسمعني اكلمها..رديت...

ناصر: مرحباا..

سومه: اهلييييييييييين حبيبي...فديت هالصوت واللي اني تولهت عليك...

حست بوزي انا...

ناصر: شحالج سومه..!!

سومه: بخيير بس زعلانه...شياك سكرت فويهي..!!

ناصر: كنت في السوبرماركت والرياييل وايد...

سومه: اهااااااااا..متى وصلت بوظبي عيوني..

ناصر: قبل شوي والله...اقول سومه..

سومه: ياعيون سوومه...

ناصر: انا خطبت...

ابد..ماشي ردت فعل...سكتت سومه منصدمه...

سومه: شوووووووووووه..؟؟؟

ناصر: مثل ماسمعتي... ودام نحن متفقين بان اللي مبينا فتره وخلاص...احين اقولج ان هالفتره انتهت...

سومه: نصوووري..شو تقول انته..؟ خطبت منووه..؟

ناصر: مايخصج... خلينا نتفارق على خير..

سومه: حرااام عليك نصوور...حبيبي ماقدر اعيش بدوونك لا تتركني جي حراااام...

ناصر: الحرام اني اكلمج...بليز لا ادقين لي مره ثانيه عشان تحافظين على ماي ويهج...والسموحه اذا غلطنا عليج...فمان الله..

وسكرت فويهها قبل ماتقولي أي كلمه..واغلقت التيلفون بعدها...

اعرف سومه...واعرف صدعتها...ماعندها كبرياء او شخصية... وبتم تترجاني وبتاذيني...وانا ماقدر على صدعتها عندي امور اهم اهتم فيها...

شغلت السياره وطلعت رايح صوب الشقة...

وقضيت بقية الليل وانا ارتب الاغراض اللي اشتريتهن في الكبت...ومب بس جي... سويت لي سندويش همبرغر وتفننت فيه...وظحكت اخر شي عالنتيجه...لكنه لاباس فيه يترس بطن...

صبيتلي عصير وشليت السندويش ورحت للصالة ..شغلت التلفزيوون.... وجابلتني القنوات المشفره...اوهووووووووو هذا شي نسيت اسويه...!!

القنوات المشفره هذي لازم امسحها..واركب لي دش عاادي .. وبما اني ماقدر احين...

حطيت لي مسرحية عالفيديو ويلست اطالعها .. لين ماياني الرقاد وسرت ارقد...

هذا نموذج عن حياتي المستقبلية..؟!!!... لازم احصل لي شي يشغلني عن هالفراغ والا بظيع مره ثانيه...

----------------------------------------------------------

اليوم: السبت..

المكان: غرفة الطعام فبيت خلفان...

الوقت: السادسة والخامسة واالاربعون دقيقة..

---------------------------------------------------

(سيف).....

فيني رقاد...رغم الرقاد الطويل اللي رقدته لكني مازلت احس بكسل..بس شو نسوي اليوم اول يوم مدارس ولازم اقوم... تسفرت وشليت اغراضي..ونزلت اتريق...

حصلت ابويه وعمتي وسهيل يالسين يتريقون...

سيف: السلام عليكم...

ردوا علي السلام ...سلمت على ابويه وعمتي ويلست...صبت لي عمتي جاهي..

سهيل: ياااااااااااااالله يالعيوون كيف ميفن...ماجنك امس معبر الرقاد كله...

سيف: سكت عني سهيل والله فيني صداع...

سهيل: ههههههههههههه بدت عوارض المدارس... مااييكم المرض الا يوم تبدا المدرسه...

سيف: ما تهنيت في الاجازه مسرع ماخلصت حشىىىىى....

آمنه: يااالله ياسيف جاانك ماخليت مكان ماسرت له وبعد ماتهنيت..!!..الا ماتشبعووون..

سكت عن عمتي ويلست اتريق... شوي وداخله علينا مهرة..ببجامه نوم طويلة...

مهرة: السلام عليكم...

الكل: وعليكم السلام...

سهيل: انتي شو موعنج من الصبح مب عوايدج..؟!!..

مهرة: مادري من الحماس مارمت ارقد...

بوحمد: حماااس لشوووووو.؟!!.

مهرة: ابويه اليوم عندي ارشاد...اول يوم في الجامعه...

بوحمد: شو تبين بالدرااسه انتي...يلسي في البيت اخير لج..

شفت في عيون مهرة الرعب...

مهرة: لالالا ابويه دخيلك ابا ادرس ...لا تحرموني من الدراسه احين...

سهيل: يسولف وياج درسي برايج.. بس منوو بيوصلج...

سيف: يعني ماسالت منو بيوصلني انا...

سهيل: انته حتى لو تسير مشي عاااادي...

انقهرت...

سيف: لا والله ماسرت مشي ..عشان تظربني الشمس فراسي..

مهرة: هههههه قصده عشان ماتصيبه ظربة شمس...

سيف: لا تقعدين تتفلسفين..مب عشان بتدخلين الجامعه تبدين بالفلسفات..

مهرة: ليش ؟ من حقي..الوحيده اللي بستوي جامعية فيكم...

سيف: خليناها لج الجامعه واللي فيها...

مهرة: المهم صدق منو بيوصلني...؟؟؟

آمنه: انا سيارتي بياخذها سهيل...ماعندي سيارة اوصلج..

سهيل: انا بوصل سيف لانه جاهز ومتلبس انتي بعدج بكشتج ولا بوصلج....

مهرة: حرام عليكم... مب من الحين اسير ..بيقولون هذي ماصدقت على الله تفتح الجامعه...الساعه ثمان بسير..

بوحمد: خلاص جان بتسيرين ثمان انا بوصلج..

استانست مهرة ...ويلست تتريق هي بعد..بعد دقايق...

سهيل: يالله يالله بسك...لاتزط وايد....

سيف: خلني اتريق لا تيني الصفرا واطيح عليهم...

كنت امزح...قالي سهيل بتطنيز..

سهيل: ههههههههه ياااااااااااااارج الله انتي...هي فديتج تريقي تريقي عن اطيحين عليهم في المدرسه...

سيف: ههههههههههههههههههههه جب...

مهرة: ههههههههههههههههههههههههه هههههههاي..تستاهل...يبتيه ا لعمرج..اقصد يبتها لعمرك...هههههاي..

سيف: بلمج عثمج احين سكتي لا اسويلج درايش امامية في اول يوم جامعي....

سهيل: صدقها...عيل مره فيني صداع...ومره منو بيوصلني....ومره بتظربني الشمس....ومره بتيني الصفرا...قم لا اسير عنك وراي دوام والا نسيت..!!

خليت ريوقي اللي ماكملته ونشيت ..

سيف: انزين انزين...بتغسل لحظة بس..

سرت الحمام وتغسلت...ورجعت لسهيل ورحت معاه لسيارة عمتي الاودي وركبنا فيها وسرنا....

للنكد...ولوعه الجبد.... للثانوية العامه....وعدت نفسي بانها اخر سنه ادرسها طول حياتي.. بعد الثانوية خلااااااااااااااص ماشي دراسه ..بشتغل سيده وبفتك من الكراف...

--------------------------------------------------

نبض القلب · 18-01-11, 01:08 AM

مرااااااااااااااااحب كيفكم انشالله الكل تمام وسعيد وبصحة وعافية
الروااااية هاي حبيتها كتيييييير
هشان هيك نزلت منها عشر اجزاء اذا عجبتكم وحبيتوها راح اسير انزل انشالله كل يوم جزئين او ثلاث حسب ردودكم وقدرتي
لا تنسونا من ردودكم الحلوووة
تحياتي وحبي

نبض القلب · 18-01-11, 03:53 PM

الجزء الحادي عشر...

------------------------------
اليوم: السبت..
المكان: في سيارة ناصر..
الوقت: السابعة صباحا...
------------------------------
(ناصر)...
سقت سيارتي في شوارع بوظبي المزحومه...وانا احاول اني اركز في سواقتي...لكن غصبن عني كل شوي يشرد تفكيري لياري عبدالعزيز...اللي تلاقيت معاه في المسيد القريب وقت صلاة الفجر...
ابتسمت... تذكرت نظرته الفخورة الهادية..وابتسامته الطيبه لي..لاول مره يبتسم لي جذي..
تذكرت...اني يوم دخلت المسيد اصلي وقفت عداله بدون قصد مني...يمكن اني كنت ادور حد اعرفه عشان ما احس اني وحيد او غريب...!!!...وبعد الصلاة...صد صوبي واطالعني بنظرة غريبه...وابتسمت لي بشكل يريح النفس...قالي بكل بساطه...
عبدالعزيز:.. نـــوّر ويهك ياناصر...!!
ساعتها سكت عنه... حسيت كاني ولد صغير وهذا الاستاذ..وقاعد يهنيني على نجاحي...حسيت بايده وهي "تربت" على جتفي بخفه...خلاني وقام عني وطلع من المسيد...تذكرت كلامه...نور ويهي..!!..والله..!!..
ويه عبدالعزيز حنطي البشره بطبيعته..لكن دايما يوم تشوفه تحس انه فيه نور..وراحة بال..معقوله انا الحين منور ويهي..!!!.. لا اكيد يبالغ...صح اني بديت التزم لكني ماوصلت لهالدرجه من الالتزام والتدين مثله...
قعدت في المسيد وخذت مصحف من عند الزاوية وقعدت اقرا فيه... من زمان ماقريت قرآن...من زمان من زمان ...يعني من سنين...
وقفت عند الاشاره ...ومسكت تيلفوني اللي مغلق من امس وفتحته...على طول انهلت عليه المسجات...اكيد من عند سومه..عوذ بالله...ماكنت واضح انا بكلامي والا شووو..؟!!!..قعدت اقرى وحده واخطف ثلاث..ومسحتهن كلهن...وكتبت لها مسج وحده..."انسي..خلاص.. وان دقيتي بخبر اهلج عليج...وتعرفين اني اسوي اي شي.."..
اعتقد من بعد هالمسج مابتتصلبي وبتفكني..مسحت رقمها من تيلفوني...وفكرت اني اغير رقمي...لكني غيرت رايي...وايد ناس يعرفون هالرقم وانا مافيني اغيره...
وصلت دوامي..ونزلت...واول ماوصلت المكتب طلبت من راجو اييبلي ريوق لاني ماتريقت ...
وبعد نص ساعه..اتصل بي عبدالله ...
ماعرفت شو اسوي..ارد عليه او لا...في النهاية رديت..مافي مجال للهرب..
ناصر: مرحبتييين...
عبدالله: هلالا واللله بناصر...وينك يارياااال..؟!!
ناصر: والله في الدوام...شحالك؟
عبدالله: بخير والله...شحالهم اهلك؟؟
ناصر: مايشكون باس بخير وسهاله..وانته ماسرت لاهلك هالاسبوع..
عبدالله: لاااااااه قلت لهم عندي زام...ولا سرت..
ناصر: والله انك مقصر...
عبدالله: شو ابابهم هم وصدعتهم...مابغيت افوت الحفله..فاتتك بصراحه...
ناصر: برايها تفوتني...
سكت عبدالله عني فتره....وحسيت انه في نفسه يتسائل...
عبدالله: ناصر شفيك..؟؟ زعلان من حد..!!
ناصر:..زعلان من نفسي...
عبدالله: افاا...شحقه..!!..
ناصر: بس...بصراحه عبوود انا قررت اودر كل هالسوالف ...
عبدالله: اي سواالف..؟!!
ناصر: انته عارف اللي بالي بالك...
عبدالله: شوووووووه..؟؟ خبال هوو تودر مني والدرب..!!!
ناصر: والله الخبال اني استمر عبود...
عبدالله: انزين شوو يااك...انقلبت مره وحده جي...قول بعد بتودرنا نحن..!!
ناصر: والله ان ما اصطلبتوا وودرتوا هالامور انتوا بعد...مافي مجال غير اني ابتعد واخليكم براحتكم..
عبدالله: ناصر..!!..ينيت انته...اســـ...
قاطعته بسرعه..
ناصر: عبدالله برمسك بعدين...احين انا في الدوام.. فمان الله..
ماحصلت رد من عبدالله شكله عصب...خله يعصب..سكرت فويهه...انا قلت له فمان الله محد قاله مايرد علي...
---------------------------------------
اليوم: السبت...
المكان: غرفة مهرة...
الوقت: الثامنه الا عشر دقائق صباحا..
--------------------------------------
(مهرة)...
متوتره..آآآآآآخ حيسة فبطني....ياربي ماعرف شي في الجامعه وين بدق براسي...!!!... ماعرف غير مبنى واحد سرناله يوم سلمنا فحوصاتنا الطبية وخلصنا اوراق القبول..
لبست قميص سماوي مريح وتنوره بيظا..ولبست بووت..عشان امشي برااحه... معاقم القميص ماطاعن يتعقمن في ايدي اليسار بسبب الجبس...وشكله الكم متلعوز...يالله ماعليه العباة بتغطي...
لبست عباتي والشيله...وحطيت اغراضي في وحده من الشنط اليديده..وكل شي خطر فبالي اني بحتاجه..
كنت متوتره ومتحمسه فنفس الوقت...
اجحلت جحال بسيط..وماحطيت شادو او اي شي ثاني... البساطه احلى...وويهي انا ..ماينفع عليه الميك اب وايد...ماينفع غير بسيط..
تعطرت وخذت شنطتي ونزلت...
ابوي كان مازال في غرفة الطعام يقرى الجريده...
مهرة: احمم...ابويه..يالله جان بتوصلني...
حط ابويه الجريده عالارض وقام...واطالعني بعين متفحصه...حسيت انه يقارن بيني وبين امي..شفته ينزل راسه ..وبعدها قال..
بوحمد: محتايه فلوس..!!
مهرة: لا ابويه عندي بيزات...
بوحمد: يالله عيل..
ركبت مع ابويه السياره وتغشيت...
ويوم وصلني لباب الجامعه..قالي..
بوحمد: متى بتردين..؟!!.
مهرة: ماعرف والله..
بوحمد: شقايل ماتعرفين...انزين اتصليبي تيلفون يوم بتخلصين ..شي تيلفونات داخل الجامعه..!!
مهرة: ابوويه مادري والله..وماعندي بطاقه اتصل بعد.. ماسويت حسابي ولا شريت..
شفت ابويه متوتر مب عارف كيف الحل..
مهرة: خلاص ماعليك بدبر عمري..باخذ بطاقه من عند حد وبتصلبك يوم بخلص..
بوحمد: زين..
مهرة: فمان الله..
نزلت من سيارة ابوي وراقبته برعب وهو يمشي ويخليني بروحي...دخلت من البوابه..
اوففف...بطني يعورني...زحمه بناااات... وايد زحمه..
سمعت حد يزقر...
المشرفة: لو سمحتي...لو سمحتي...
التفت لها وقلت..
مهرة: اناا..؟!!
المشرفه: هي انتي..تعالي استلمي بطاقتج..
تقربت منها بابتسامه شاحبة..
المشرفة: شو اسمج الكامل...؟!
قلت لها اسمي...وبدت هي بعملية بحث...
وانابعد بديت بعملية استطلاع... نقلت نظري عالبنات كلهن... وايد منهن مسويات تجمعات مع ربعهن يظحكن ويسولفن.. وفي مجموعه من البنات كل وحده يالسه ارووحها تتريا.. هذيلا الوحيدات مثلي..
الله يعدي هاليوم على خير...
لاحظت كذا بنت من جهات مختلفه من الرسبشن يالسات يطالعني بفضول..!!
ولاحظت بعد كذا بنت اذكرها من ايام المدارس...زميلاتي في الصفوف..ياحليلهن..
خلصت المشرفه بحث وسلمتني بطاقتي..وحطيتها فشنطتي...وسالتها..
مهرة: لو سمحتي...همم ليش البنات متيمعات هني..؟ احين وين نسير وشو نسوي..؟
ابتسمت لي المشرفه بصبر...الظاهر انها هاذي المره المليون اللي تجاوب عن هالسؤال اليوم..
المشرفه: تريي مع البنات وعقب بتيكم مشرفه ثانيه تاخذكم لمكان الارشاد...وهناك بيعلمونكم كل شي..
ابتسمت لها انا بشكر...
مهرة: شكرا...
خليتها ودخلت القاعه اكثر..ادور كرسي فاظي.. لكن ماحصلت...اغلب البنات واقفات ... دورت لي زاويه عدال الدريشه ووقفت هناك اتريا مثل البنات..
كانت عدالي بنت.. اطالعني بفضول...كل شوي تصد صوبي...بس انا تجاهلتها.....لكنها بعد مرور دقايق سالتني..
البنت: لو سمحتي...
مهرة: هلا...
البنت: انتي كنتي فمدرسه (.....) الاعدادية..؟!!
استغربت..هالبنت من وين تعرفني...!!
مهرة: هي نعم...
ابتسمت البنت...
البنت: اسمج مهرة..؟!!
رفعت حواجبي وظحكت..وادركت البنت ان جوابي هو هي اسمي مهرة...
وقالت لي تشرح لي وهي تبتسم ...
البنت: انا كنت معاج في ثالث اعدادي في الصف... بس في الثانوية رحت مدرسة (....)... غير عنكم...
مهرة: اهاااااااااا...ماشاء الله عليج تذكرين...انا ذاكرتي ظعيفه لاني مااحتك وايد بالبنات...
البنت: هي كنت الاحظ عليج....انا اسمي عليا...عليا سيف الـ(.....)...
ابتسمت انا للبنت...
مهرة: عاااشت الاسامي ياعليا... وانا مهرة مثل ماتعرفين...من متى انتي هني.؟!!
عليا: انا من نص ساعه هني اوني بايي اول العرب لقيت الدنيا زحمه وكل ما يتجدم الوقت تزيد الزحمه... متى بيفجون هالباب..!!! ..سلامات شوفيها ايديج.؟!!
مهرة: الله يسلمج ياربي..ماشي الا طحت من الدري... عندج حد انتي في الجامعه؟....كد ييتيها..؟!!
عليا: من زمااااااااااااااان اختي كانت تدرس فيها...بس مادري جان غيرووها..اكيد غيروا شي فيها...بس ماعرف عنها ذاك الزود ولو انهم يايبينا رحلة في ثالث ثانوي..
مهرة: حظظظكم نحن ودووونا التقنية...!!.. ليتهم يابونا الجامعه عالاقل بتخف الزييغه اللي فيني..
عليا: لا اتروعين عادي,,هي اول ما تدخلين بتزيغين من كثر المباني لكن بتتعودين عقب عليها.....شفتي بطاقتج..!!
ظحكت وانا اتذكر صورتي الزياغ اللي حاطينها لي بالبطاقه...
مهرة: يوووه الله لا يراويج الصورة...
عليا: ههههههه والله حتى انا صورتي كاني مخلوق فضائي...
ظحكت انا على كلامها.... بصراحه هالعليا حبوبه...وان شاء الله تكون سند لي في الجامعه...
مهرة: وين ربعج عنج..؟!!
عليا: ربيعتي حمده مايت لين الحين...والباقيات سارن التقنية..
مهرة: اهاااااااا...اي كلية داخله عليا..!!
عليا: هندسة...وانتي...
مهرة: انا علوم انسانية...
وقعدت اسوولف مع عليا بسوالف عادية حالنا حال اي بنات في اول يوم جامعي لهن...
الساعه تسع الا ربع فتحوا الباب...
ودخلن 3 مشرفات وطلبن منا اننا نتبعهن للصالة الرياضية...المكان اللي بيكون فيه الارشاد...
مسكت عليا ايدي عشان مانظيع عن بعض...بما انه تعارفنا..ماحبينا ان نفترق بقية هذا اليوم..
------------------------------------
اليوم: السبت..
المكان: صالة بيت بو راشد...
الوقت: العاشره صباحا..
------------------------------
(شيخة).....
نشيت من رقادي مدوخه...رقدت امس متاخر...كله افكر بمهرة ..احاول اتخيل الموقف البايخ اللي انحطت فيه...ماقدرت...
ماقدر اتخيل نفسي مكانها...بموت من الزياغ....
مهرة رغم ضعفها الخارجي...الا انها قوية وايد من داخل وقدرت تتحمل...لو انا بتيني حالة نفسية والكل بيدري عني...اما هي..احتفظت بهالشي لنفسها...
قمت من الشبرية ودخلت الحمام اتسبح...
فكرت في هوو...اي نوع من الناس بيتهجم على بنت فبيتهم..؟؟..ماخاف..؟؟ ماقال فخاطره اهلها بيدخلون في اي لحظة وانا بروح فيها...
طلعت باستنتاج...في الوقت اللي طلعت فيه من الحمام....
الريال ذاك ماكان صاحي...ابدا ماكان صاحي..اكيد شي كان فيه..يمكن مينون...او..شي ثاني...بس الاكيد انه عقله ماكان فراسه..
يلست جدام التواليت وخوزت الفوطه عن شعري..وقعدت انشف فيه...وانا اطالعه في المرايه...
ابتسمت...لو اني ابتسم على هالسالفه الجديمه في خاطري..الا اني جدامهم مستحيل اسامح عمر هذا...
عيل يروح يقص لي شعري..!!!!!...
ابتسمت اكثر يوم تذكرت ردة فعل سهيل ولد خالتي يوم خبره راشد وهو ميت من الظحك...
سهيل ماظحك...لكنه عصب وايد عالموضوع..ياني ببرود وقالي..
سهيل: بروح انتف له شعره جان تبين...
قلت انا بحماس..
شيخه: هيي...ابا...
سهيل: صدق والله..؟!!
وقاطعه راشد في هذيج اللحظة...
راشد: لا يابوووي لا تفظحوونا في نسايبنا...عن لخباال...
سهيل: العين بالعين والسن بالسن..والبادي اظلم..
راشد: سهيل عيب...لا تكبر راسها...شعرها هي بسرعه يطول..
شيخه: الله واكبر ..تف تف تف تف من عينك...
راشد: خيستيينا تفال...
شيخه: سهيل قص له شعره اذا كان عنده شعر بليز..انتقم لي..
ابتسمت لي سهيل وقال..
سهيل: فالج طيب...
ابتسمت للذكرى... وتذكرت كيف ياني سهيل بعد اسبوع من العرس..يوم كانت فاطمه يايه زواره واهل ريلها كلهم معزومين... ياني سهيل وفي ايده خصلة شعر...وقالي وهو يظحك بانه عمر تفهم الموضوع وقال اذا بتخوز ظيجتها بقص لها من شعري وتنحل المشكله...
لكني مارضيت...صح استانست ساعتها...لكن خسارته هو مب مثل خسارتي انا....لكني شكرت سهيل لانه دافع عني مب مثل راشد ميت من الظحك علي...
سحيت شعري وانا ابتسم بخبث واذكر كيف اني حرقت خصلة الشعر ذيج...وتمنيت احرق له راسه بعد...عشان يتوووب من الخاطر...
لميت شعري وغيرت ملابسي وطلعت من الغرفة..مريت على غرفة فاطمه اللي عدال غرفتي ..كان الباب مفتوح..بطلت الباب وحصلتها راقده لكن فهوود محد...
شيخه: قوووومي يام كرشه...!!
لا جواب...
كسرت خاطري..قلت اخليها ترقد يمكن ماترقد وايد فبيتهم....!!
سكرت الباب ونزلت تحت...حصلت امي يالسه ترمس في التيلفون..وفهوود يالس يلعب بلاي ستيشن...
حبيت امي على راسها ومابغيت اقاطعها برمستها في التيلفون...ورحت عند فهود..
شيخه: فهوودي شو تلعب..
فهد: العب تييكن...تلعبين وياي..!!!
شيخه: هي بلعب يالله...
سكر فهد اللعبه وحطها من اول لشخصين... ويلس اتبارى وياه اخليه كل شوي يغلبني...ويوم يغلبني اقعد اظاربه اوني معصبه ويقعد هو يتكركر...
خلصت امي تيلفونها ..
شيخه: هااا امايه شو تانسين اليوم؟ اهون..!!
ام راشد: انا بخير بنتي لا تحاتين...اختج راقده..!!
شيخه: هي مريت عليها حصلتها راقده..
ام راشد: حليلها..ترا هالولد ناش من الفجر لا طاع يتريق ولاطاع يتسبح..بس يبا يلعب هاللعبه..زقرت البشكاره تي تركبله وايراتها انا ماعرفلها..
اطالعت فهد انا اوني عاد معصبة...
شيخه: فهوود..صدق اللي تقوله امايه..؟
سكت عني فهوود... جان اقوم اشل عنه الايد وافرها وابند اللعبه..وشليته هو فوق..
شيخه: يالله سبووح...
شليته معاي فوق وهو يظاربني عشان اسبحه والبسه..مسكينه فاطمه ماتقدر تعبانه...

نبض القلب · 18-01-11, 03:54 PM

اليوم: السبت..
المكان: في الجامعه...
الوقت: الحادية عشرة الا ربع صباحا...
-------------------------------------------
(مهرة)....
طلعت من الصالة الرياضية ادور عليا...واخيرا خلص الارشاد اللي مافهمت غير نصه بس..
من كثر الزحمه ظيعتها..والا نحن ناشين من كراسينا رباعه...
وقفت عدال الرصيف اتلفت... فجاه حسيت حد يمسكني من جتفي..
عليا: زخيييييييييتج..مسرع ما تظيعين...
ظحكت انا براحه..
مهرة: والله اني يالسه ادورج...
عليا: ههههه انتي ادورين برا وانا ادور داخل القاعه...
مهرة: احين وين نسير..!! اشوف البنات كل حد سار صوب..
عليا: لان الارشاد خلص.. اللي يبا يسير البيت يسير واللي يبا يتحوط يتحوط... ونحن بنتحوط...يالله..
ظحكت على حماسها ومشيت معاها...وكل ماسرنا مكان ارجع التفت عشان احفظ مكان البوابه ومااظيعها..
بصراحه الجامعه كبيرة لدرجة المبالغه...يمكن بسبب البنات وعددهن الكبير...
عليا: شووفي...هذا المبنى اسمه القبول والتسجيل هذا اللي سلمنا فيه فحوصاتنا..وهذي القاعه هممم..اسمها متعددة الاغراض..وهذااااا الكافتيريا اهم مكااااااااااان....يالله ندخله..مفتووح...
مشيت معاها للكافتيريا اللي تطريه...اول مادخلنا سمعنا وشفنا بعد صدعة البنات..تراجعت على ورا..
مهرة: لالالا عليا زحمه وايد..
مسكت ايدي وسحبتني علىداخل..
عليا: حتى لو زحمه حالنا حال البنات بندخل وبنتريق بعد...
دخلت معاها وانا احس بالغربة...صدق فرق..بين مقصف المدرسه ..وكافتيريا الجامعه اللي قالت لي علياانه مب الوحيد في الجامعه وفي اكثر من واحد...
دخلنا... عليا تكفلت بانها تدور طاولة بعيونها..اما انا...درت بعيوني اطالع باستغراب البنات...وحشرتهن..شو هذيلااا...صدعه وصريخ وظحك باعلى الحسوس...هذي كلها وناسه حق الجامعه..!!..
مسكتني عليا وسحبتني معاها ويلسنا على طاولة صغيره ...
مهرة: اووووف يالصدعه...
عليا: صدقج والله..نحن بعد ماقصرنا يلسنا عدال شله كلها زعيج...

مهرة: في الارشاد..احس زادن البنات عن اللي كانن في الرسبشن ويانا...!! مالاحظتي..

عليا: هذيلا بنات السكن...

مهرة: اهااااااااا اتحسب لهن ارشاد بروحهن..!!..

عليا: لالا ويانا حطوهن عشان مره وحده...

قعدنا انا وعليا نتصفح البروشورات والاوراق اللي عطونا اياهن ونتناقش فيهن...فجاه طبت علينا بنت...طويله..جميلة...لها احلى حيات مقرونات شفتهن فحياتي....

حمده: انتي هنيييييييي مسودة الويه وانا ادورج...!!

ابتسمت انا...وعليا قامت وسلمت على ربيعتها ولوت عليها بعد...

عليا: فديتج والله اني تميت اترياج في الرسبشن لكنج ماييتي..

حمده: تاخرت شوي ماحصلت حد اييبني...شحالج ويا هالراس والله اشتقت لج...

عليا: وانا اكثر والله...حمده اعرفج على مهرة..كانت معاي في ثالث اعدادي...مهرة هذي حمده ربيعتي في ثلاث سنوات الاخيره في الثانوي...

ابتسمت لي حمده...وسلمت علي...

حمده: تشرفت الغاليه شحالج؟

مهرة: الحمد لله بخير ..شحالج انتي..؟؟

حمده: بخير وعافيه...

يلست حمده معانا في الطاولة بعد ماسحبت لها كرسي...

حمده: تريقتن؟ تراني على لحم بطني وامس ماتعشيت ميته من اليوع..

عليا: لا ماتريقنا...قبل شوي واصلين هني نحن...نسير نشتري..

حمده: بسير انا وياج البنت ايدها مكسوره حليلها ماتروم عالدعسه...مهرة شو نيبلج..؟؟

مهرة: لا انا متريقة في البيت...

عليا: لازم تاكلين ويانا...

مهرة: خلاص على ذوقكن..وعصير منغا اذا فيه..

حمده: تمااام...

قامت حمده مع عليا وراحن يشترن ريوق ..وانا تميت بروحي احس بالغربة...الله رحمني بهالبنات الحشام اليوم والا مادري شو كنت بسوي..!!..

يلست على ذيج الطاولة والازعاج حوالي يتصاعد..ويزيد...وانا اتسائل... بلاهن ياناس البنات تخبلن..!!

وقعدت اجلب البروشورات في ايدي...

مرت عشر دقايق.... عليا وربيعتها حمده تاخرن وايد...ماصار ريوق..يوم رفعت نظري حصلت ان مكان البيع زحمه من الخاطر... وبعد شوي.. حسيت ببنت توقف عدال طاولتي..رفعت نظري وشفت بنت غريبه عني..تبتسم...ابتسمت ماعرف شو تبا...لكني مارمست...حطت البنت ورقة صغيره على الطاولة وراحت قعدت مكانها بعيد شوي عني...

استغربت من هالحركه...شو هذا بعد..!!

مديت ايدي وفتحت الورقه.... كان مكتوب فيها.."انعم ويه شفته لين الحين في الجامعه...ماشاء الله عليج..وسلامات بخصوص ايدج"....

ابتسمت غصبن عني...شو سالفة هالبنت خبله..!!...رجعت الورقه عالطاولة مثل ماكانت وطنشت السالفه.. لاني ماعرفت كيف اتصرف ..او شو ممكن اقول للبنت اللي خلت هالورقة وراحت...شو تتوقع اكتب لها مشكوره وعيونج الحلوه واروح اعطيها الورقه..!!..لا والله ماطرالي...

بعد دقايق رجعن عليا وحمده مع صينية الريوق..

حمده: اووووووووووووف..حشى يالزحمه....

مهرة: يعطيكن العافية..

عليا: الله يعافيج...

حطت جدامي عليا عصير وسندويش...والبطاطس كان بينا ...

حمده: شو هذي..؟؟

مسكت حمده الورقه وقرتها...وابتسمت..بعدها ظحكت...

حمده: اوهووووووووو من قدج من اول يوم طيحت بنات...

ظحكت انا...وعليا ابتسمت ولو هي مب عارفه السالفه..

عليا: شو هذا..اشوف..

وسحبت الورقه من حمده...وظحكت هي بعد...

عليا: صدقها بصراحه مهرة ناعمه وحلوه وايد...

انحرجت..

مهرة: عاد مب وايد لا تبالغين...

حمده: لا والله صدقها...ماشاء الله عليج...

مهرة: عيونكن الحلوه تسلمن....

وقعدنا نتريق ونسولف عن اشياء مختلفه...

مهرة: متى بتردن البيت..

حمده: انا قايلتلهم مابطول...

عليا: ليش حمدوووه..

حمده: اهل ريلي بيتغدون فبيتنا اليوم....

انصدمت..وبطلت عيوني...

مهرة: حمده معرسه..!!

ابتسمت حمده بحياا..

حمده: ههههه لا فديتج مالجه قبل ثلاث اسابيع...

مهرة: ماشاء الله..مبرووك...

لكني بصراحه قلت فخاطري الله يعينها عالرياييل....!!...انا ابدا مابعرس...ابدا....

حمده: الله يبارك فيج وعقبالج...

ابتسمت لكني ماقلت آمين....

مهرة: احين كيف بتصل لاهلي..!!...

عليا: عندي انا بطاقه..بنستخدمها في الكابينه وبنتصل...

وبعد ماخلصنا ريوقنا قمنا كلنا..وبدون حاسية مني..خذت الورقة الصغيرة وخشيتها فشنطتي...ولميت اوراقي ورحت مع عليا وحمده واتصلنا تيلفون...عشان كل وحده ترد بيتها...

---------------------------------------

اليوم: السبت...

المكان: صالة بيت خلفان..

الوقت: الثانية الا ربع..ظهرا..

--------------------------------------

( سيف)...

يالله ياللووووعه...!!... حطوني في صف فيه اثنينه ما اطيقهم ولا هم يطيقوني وكم مره متظاربين...ويوم طلبت من الادارة ينقلوني مدولي لسان... كانهم يعاندون فيني ويتريووني اتمشكل عشان يسوولي صدعة...

دخلت البيت وانا شال كتبي ...

شفت مهرة يالسه في الصالة تسولف مع عفرا..وابويه يالس جدام التلفزيون يطالعه...

سيف: السلام عليكم...

مهرة وعفرا: وعليكم السلام والرحمه..

سرت عند ابويه ووايهته...

بوحمد: هااااااااه...شو المدرسه..

قلت فخاطري زفت....

سيف: الحمد لله ابويه كل شي زين...

سرت صوب مهرة وعقيت كتبي عالطاولة اللي جدامها....

سيف: شوفي شغلج...

مهرة: لا الغالي هالسنه انا ايدي مكسووره ما اروم اجلد لك...

سيف: شقايل يعني اخليهن يطرطرن يعني...انا ماعرف اجلد...

عفرا: احين مهرة كل سنه اجلد لك كتبك..؟؟؟

سيف: هي..كانت اجلد كتبها وكتبي...وقبل...قبل الوالده اللي يرحمها اجلد لي...

حسيت بحزن يوم ذكرت امي...رغم ان الذكرى بالنسبه لي ضبابية...لكن حبها موجود اكيد...

مهرة: والله لو اييدي صاحية بجلد لك..حاول اجلد اروحك هالسنه.. مهما كان تجليدك زفت بيطلع احسن عن تجليدي بايد مكسووره..!!

عفرا: خلاص ولا يهمك سيف انا بجلدهن لك...

سيف: لالالا عفرا خلاص بحاول اجلدهن ارووحي...

عفرا: خل عنك المستحى خلهن وانا بجلدهن لك ان شاء الله...

استحيت بصراحه... مافيني اعبل على حرمه اخوي...لكن فعلاانا ماعرف اجلد....يعني ابركلي اخلي كتبي بلا تجليد عن اجلدهن واخربهن اروحي...

سيف: مشكووره ياعفرا ماتقصرين....

خليت كتبي عندهم ورحت لغرفتي...

دخلت اتسبح..وصليت الظهر.. وانسدحت شوي اريح ظهري...اتذكر منصور وفارس..الثنينه اللي ماطيقهم..كيف نقعوا من الظحك يوم شافوني فصفهم...مستانسين بيحصلون حد يتمشكلون معاه...وانا مافيني عالمشاكل هذي اخر سنه لي مافيني انطرد والا ارسب والا يسوولي مشاكل فيها... اوففف الله يعدي هالسنه على خير....

سمعت دق عالباب...

مهرة: سييييييييف...تعال تغدى ويا ابويه ..

سيف: سهيل وحمد يووا..!!!

مهرة: سهيل بيتغدى فبيت خالوووه وحمد وابويه تحت...يالله بسرعه..

سيف: انزييين...

قمت من الشبرية وانا افكر بسهيل..ليش مايشل ثيابه ويسكن فبيت خالووه احسن..!!!..والله...عيل ساير راد عليهم...عنبوو الواحد يطلع من دوامه يبا يرد بيته يرتاح وهو ينط هناك...!!..امره غريب هالانسان...

بطلت باب حجرتي ونزلت يوم دخلت غرفة الطعام شفت وجه جديد علي..غريب...مكرفخ...

سيف: عمووه منو هذي..؟؟

آمنه: هذي بشكارتنا اليديده امس يايه... لا اطفروبها عاد...

ظحكت انا..

سيف: شو نبابها نطفربها...هذي المهمة لج انتي عمتي...

آمنه: شو قصدك ولد خلفان..!!!

سيف: اقصد عمتي البشكاره تخصصج انتي نحن مالنا خص فيها...

آمنه:هيي..على بالي بعد تطري شي ثاني...شو اخبار المدرسه..

سيف: لووعه...

آمنه: دوم هالرمسه...ايلس ايلس تغدى.. ابوك سار يغسل ايده وحمد توه ياي من الدوام سار يبدل ثيابه..

يلست انا جدام صحن السلطه آكل خيار...لين ما ايوون الباقين...

نبض القلب · 18-01-11, 03:55 PM

------------------------------------------

اليوم: السبت..

المكان: في صالة بيت بو راشد...

الوقت: الثالثه والربع ظهرا..

----------------------------------------

(سهيل)....

اليوم ماكنت مخطط اني اتغدى فبيت خالتي..لكن راشد اتصل واصر عليه ايي واتغدى وياه لانه ابوه محد اليوم...فبوظبي..وماحب انه يتغدى بروحه ويا الحريم...وانا ماعارضت وايد...لانه عادي عندي متعود...

بعد ماطلعت من حمام الميلس وانا امش ايدي بالفوطه..كنا مخلصين غدا... اطالعت راشد ببسمه على حلجي..

سهيل: روح بدلها انزين...

اطالع راشد كندورته اللي انجبت عليها الصالونه وغادية حمراااا بعصبية واضحه وقرف...

راشد: ابدلها...!!..الا بتسبح مره وحده...ريحتي كلها صالوونه...

سهيل: سير انزين بترياك...

نش راشد ودخل حمام الميلس وغسل ايده...ويوم طلع قال..

راشد: نسير البيت لا اتم هني اروحك...

سهيل: اخاف اثقل عليهن...

اطالعني راشد بنظرة..

راشد: عن هالخريط..متعودات عليك في البيت اكثر عني...يالله..

ابتسمت ومشيت معاه للبيت...يوم دخلنا..شفته يقول حق اللي في الصالة اني ياي...دخلت انا الصاله..شفت فاطمه يالسه على كرسي وحاطه الجريده عالطاولة جدامها وتتصفح...اما شويخ..مجابله التلفزيون تلعب بلاي ستيشن هي وولد اختها فهود...

سهيل: السلااام عليكم...

فاطمه: وعليكم السلام مرحبا الساع...شحالك سهيل..

شيخه: وعليكم السلام...

سهيل: بخير الله يسلمج فاطمه شحالج انتي..؟

فاطمه: والله مانشكي باااس بخير وعافيه..شحالهم اهلك؟

سهيل: كلهم بخير وعافيه..

راشد: انا بسير اتسبح وبرد...

طلع راشد من الصاله...اما انا مشيت صوب شويخ ويلست عدال فهوود اللي كان بيني وبين شويخ..

سهيل: وابووي عليك فهود تخلي حرمه تغلبك..

فهود: انا من الصبح اغلبها..تغش والله تغش...غشااااشه...

صرخ على شويخ بقهر...وانا ظحكت عليه... وشويخ تبتسم بخبث..

سهيل: شوييييييخ...خليه يغلبج شوي...

شيخه: طول الصبح وانا مخلتنه يغلبني عاد صدق نفسه...

مسكت انا فهود وشليته وحطيته فحظني...وشليت الايد عنه وكملت لعب بداله...

سهيل: شوف شوف الحين كيف بنتفها لك تنتييييف...

ظحك فهود ببراءة..وصاصرني..

فهد: مثل الديااايه هههههههه...

صاصرته في اذنه عشان شيخه ماتسمع...

سهيل: هي مثل الديايه..ترا خالتك ديايه ماتدري..

فهد: هههههههههههههه...

شيخه: وييييييييين اطالع الخط مالك شويه ويخلص وبتموت وين تروم لي انا مترووس...

سهيل: حتى وهو جي بغلبج ..راقبي بس انتي...

شوي شوي...انغلبت شويخ...ماتت قهر...شوي وتفر الايد بويهي... وفهوود يصفق مستانس..وانا ابتسم بمغايظ...

شيخه: هذي لعبة مب عادلة....

سهيل: ولج عين بعد..؟!!..لعبة مب عادلة لي انا...مع ذلك غلبتج...

شيخه: انته شحقه يييت انا كنت مستانسه باللعب ويا فهود...!!

سهيل: عيل اخليج تحطمين ثقة الولد بنفسه من هو صغير...شقايل بيكبر وبيستوي ريال وهو يذكر بانه حرمه غالبتنه..!!!. مايستوي...

شيخه: اهاااااااااا ماشاء الله بتريا بشوف كيف بتربي عيالك...افكارك نـيّرة ماشاء الله...

سهيل: ههههههههههههه بتشوفين كيف بربيهم...بيطلعون رياييل...

شيخه: بعيد اللعبه من اول بنشوف...

عادت شيخه اللعبه وبدينا نلعب....غلبتها بدون ماتظربني ظربه وحده....من الخاطر بغت تموت من الغصه... واللي قاهرنها اكثر اني العب وانا اظحك واسولف ويا فهود يعني مش مركز ابدا مع ذلك مارامتلي...

فرّت الايد معصبه...

شيخه: شوو هذا ياخي...انتوا محترفين بلايستيشن وانا مالعب دوم...انتوا كنتوا تشربون هذي بدال الحليب...

سهيل: بعطيج مهلة يومين تدربين عليها بشكل مكثف وعقب بنرد نتبارى...

شيخه:...مـــــــــــااااابـ ــــــــــــا....

سهيل: شحقه زعلانه انزين...

شيخه: مب زعلانه بس ماحب حد يتخقق علي...

سهيل: وانتي اتخققين عادي..!!

شيخه: هي...

سهيل: عدال بيتكم درام...روحي نقعي فيه...

سمعت صوت فاطمه..

فاطمه: حوووه ..حوووه.... شويخ بعد شو رايج تمطين شعره...وانته سهيل شرايك ادوس فبطنها... صدعتولي راسي...

سهيل: اختج خقاقه...

شيخه: متعلمه الخقة منك...

سهيل: يعني تعترفين اني استاذ في كل شي..وانتي مجرد تلميذه...شحقه تين تتحدين عيل...

شيخه: آآخ ياربي يقهر..

شفت شيخه وهي تتلفت حواليها شكلها ادور شي تكفخني به...وظحكت عليها من خاطري...

سهيل: شويخ..

شيخه: شوووووووه..!!

سهيل: قومي صبيلي جاهي حمر...

شيخه: ماباا..

فاطمه: شويخ..عيـــب وابوي عليج انا...

سهيل: قوووووووومي...

نشت شيخه غصبن عنها عشان ماتحصل هزبه من عند اختها... وصبت لي جاهي وترست لي الكوب عمدا عشان ما ارووم اشله...لكني عاندت فيها وشليته وشربت منه بعد...وابتسمت لها ابتسامه وسيعه..

سهيل: تسسسسلم ايدج...نخدمج بعرسج ان شاء الله..

شيخه: مابعزمك انا على عرسي..

رفعت حواجبي..مادري مستغرب مادري منقهر...مادري اعتبرته تحدي لي...ماعرف...

سهيل: غصبن عنج بحظر العرس بدوني مايسوى اصلا..مايستوي عرس...

شيخه: بنشوف..

سهيل: بشتووفين يا شيخه بنت بو راشد.....

دخل راشد في هاللحظه ..والسفره على جتفه..وكان يعقم معاقم كندورته...وهو يطالعنا انا وشيخه بطريقه غريبه..لكنه سكت وماعلق..وبعد ماخلص معاقمه صد صوب المنظرة المعلقه عالايدار ويلس يتسفر..

سهيل: نعيماا بو سنيده...

راشد: الله ينعم عليك... خلص شاهيك لانه بنظهر....

سهيل: مابكمله..الشاهي هذا مررر وفيه طعم خايس مع اني متاكد ان الدله فيها شاهي حلو و عدل...يمكن لو قلت لفاطمه تصبلي بيطلع احلى ...

نطت لي شويخ...

شيخه: طالع..!!..قسم بالله مب منك من اللي يصب لك شاهي...

راشد: يووووووووووه هم بدووا اثرهم من وراي...

راشد كان يكلم فاطمه..

ابتسمت فاطمه وردت على راشد.

فاطمه: هي يابوك شوي ويتناتفون....

ظحك فهوود فجاه وقال بصوت عالي..

فهد: هههههههههههههههههههه خالي سهيل بعد ديايه..!!!

شيخه: ليش منو قالك انته اني ديايه بعد..!!

اشر فهوود علي بشكل مجرم...وشفت شيخه ترصص عيونها وهي اطالعني ...

راشد: يالله يالله نسير...

سهيل: يالله...

حطيت الجاهي جدام شيخه وقلت لها بصوت واطي..

سهيل: شربيه انتي..

وقمت وطلعت مع راشد... وانا داخل ميت من الظحك على شويخ وحركاتها....

----------------------------------------------------

نهاية الجزء..

نبض القلب · 18-01-11, 03:56 PM

الجزء الثاني عشر..
-----------------------------------
اليوم: السبت...
المكان: في بيت بو محمد..
الوقت: الرابعه والنصف مساءا..
--------------------------------------
(يوسف)...
بطلت باب حجرتي وطلعت... توجهت لحجرة منى ودقيت الباب...
يوسف: منّـوووووووووووه...!! بطلي الباب...
منى: لحظااااااااااااه....!!
ترييت عند الباب...وزهقت..
يوسف: شووو تسووييين..!!
انفتح الباب ووقفت عنده منى وهي رافعه حواجبها بخقه...!!!
منى: اجرب قمصاني اليديده...
حست بوزي انا ودخلت الغرفه...شبريتها كانت متروسه قمصان منعفله وتنانيير...
يوسف: بطلي الطابعه عن كمبيوترج ...
منى: يوووووه مافيني اركبها مره ثانيه عقب...
يوسف: بطلييها ابا اطبع جدولي...
منى: انا بعد ماطبعت جدولي... اطبع جدولك هني انزين..
يوسف: اوهوووووووو انا عندي خط انترنيت في حجرتي انتي ماعندج الا جان بتسحبين واير التيلفون.... بطلي الطابعه وانتي تعالي طبعي جدولج هناك....
سكتت منى عني وراحت تبطل الطابعه عن الكمبيوتر...
يوسف: هاتيها حجرتي وركبيها انا بنزل شوي تحت وبرد...
طلعت عن منى ونزلت تحت .. امي ومحمد وحرمته ميثا كانوا يالسين... ميثا كانت حاطه فثبانها بنتها الصغيره ثريا ..اما سلطون الصغيروون ولد محمد كان يلعب في الحوش عدال الباب اللي كان مفتوح ...
يوسف: السلام عليكم....
سلمت على محمد اخوي اللي ماشفته من ثلاث ايام بسبب الحمجه اللي فيه واللي خازت الحين ماعدى اثار بسيطه...
يوسف: سلامااات ...هااا شو تانس احين اهون..؟؟
محمد: الله يسلمك..بخير انا....والله فظيحه ريال شكبري تيني الحمجه ويا عيالي..!!!...
واطالع امي وكلمها...
محمد: شحقه ما طعمتوووني عنها واناصغير..!!
ام محمد: هههههههههههههههه الله يهديك ياولدي احين عاد تحاسبني عالتطعيم..!! مادري ماذكر....
يلست انا عندهم شوي مجامله لاخوي...
كلمت ميثا حرمه محمد امي..
ميثا:.. عموووه..ماخبرج محمد..؟!!
التفت محمد لها مستغرب..
محمد: اخبرها عن شووو...؟
ميثا: يعني ماخبرتها..!!..عمووه..اخويه مايد رد من السفر تراه امس...
استغربت انا واستانست في نفس الوقت...
ميثا تصير بنت عمي..واخوها مايد طبعا بعد ولد عمي...اللي مسافر صارله خمس سنين للدراسه بالخارج... عمره 25 سنه... كبر ناصر اخوي....
محمد: اوووه صح نسيت السالفه والله..
ام محمد: ماشااااااااااء الله ياحيه يابنتي تستاهلين سلامته عيل...خلص دراسته..؟
ميثا: هيي ماشاء الله عليه عمووه عنده ماجستير احين تدرين هو ساير صغير ودراسته مكثفه كانت...
يوسف: عاد احين بتزخه يدووه وامج زخه..شغل وعرس ماشي لعب خلاص...
ميثا: ههههههههههههه والله مادريبهم عاد جان تشاوروا في هالسالفه هو الا امس واصل...
ام محمد: والله يبالي انا اسوي بناصر جذي اخطب له من وراه واغصبه عالعرس..
محمد: هههههههههه لو بعدج ماتعرفينه ناصر...بيقولج انتي خذيها دامج خطبتيها من وراي...
ابتسمت وانا افكر بمايد....
مايد الشاب الوحيد بين خمس خوات...اكبرهن ميثا حرمه اخوي... وبعدها يا هو...ومن بعده نوره الخقاقه اللي هي كبري بس انا اكبر عنها بشهرين..اذكر انه كنا نتجاكر منو بييب نسبه اعلى في الثانويه العامه... واللي اعرفه انها دخلت التقنية وتخرجت دبلوم عالي..انا تاخرت بدراستي الجامعية بسبب الدورة اللي دخلتها في الجيش بعد الثانوية العامه...
وبعد نوره كنّه المينونه .. اللي اظن عمرها 20 سنه كبر منى اختي... ومن بعد كنه عايشه وهي بعدها في المدرسه..اظن انها في ثاني ثانوي او ثالث الله اعلم... وعندهم بنت مراهقة صغيره اسمها لطيفة.. اظن انها في الاعدادية...
عمي توفى من عشر سنين... عشان جي العيال هذيلا تربوا على ايد امهم عفرا ويدتي موزه...في بيت يدووه العوود... ولهالسبب ابويه طلع من البيت..لانه نحن شباب وصعب نتربا فبيت واحد مع بنات عمي الخمس...
قبل مايسافر مايد مع خاله سعيد للدراسه..كنا نروح بيت يدووه بحرية..لكن من سافر مايد ونحن مانسير الا نادر.. وبصراحه وبما يخصني انا..صرت استحي..البنات كبرن...ويمشن في بيت يدوه بحرية واغلب الوقت بدون شيل..وكذا مره صارلي موقف محرج معاهن...
اما بما يخص مايد وخطوبته على بنت خاله اللي ماعرف اسمها...كل اللي اعرفه ان الخطبه صارت في غيابه لكن بموافقته.. واعتقد البنت اللي خاطبنها كبري في السن...
نبهتني امي من سرحاني وهي تصك ركبتي..
ام محمد: وااابووي...يوسف..!!!
يوسف: هااااه....!!..شوو.؟.ها امي شو تبين.!!
ام محمد: في شووو سرحان..؟!!
يوسف: اتذكر مايد الله يذكره بالخير...
ام محمد: عاد قوموا بالواجب...ترا يدتكم من متى اتحظى عليكم ماشافتكم...
محمد: سايرلها انا الاسبوع اللي طاف..
ام محمد: انته ياولدي ادريبك ماتقصر...لكن هذيلا اخوانك مايستحووون...
كانت تقصدني انا وناصر...
يوسف: امي... البيت متروس بنات ماشاء الله استحي اسير...
ام محمد: سيرلها الصبح وقت مايكونن البنات مداومات..
يوسف: السنه اللي طافت ساير حصلت كنووووه غايبة عن جامعتها ومنسدحه في الصالة...
ظحكت امي وهي تتذكر كنه الخبله... وظحكت ميثاعلى اختها..
ميثا: صدقه عموووه خواتي طفسات مايلبسن شيل في البيت...بعدني برمس امايه انا خلها تنازعهن...
ام محمد: انزين مب دوم هي بتغيب...
يوسف: عاد هذا حظي ويا بنات عمي شو اسوي يعني..!!! خلي يدووه تي تسكن عندنا..
ام محمد: يوووووووه العيوز لو تقطعها ماتطلع من بيتها...
يوسف: عاد انا مالي خص...مابسير ارووحي.. بتريا ناصر اخر الاسبوع وبسير وياه وبندخل ميلسهم هاللي مسكر اربع وعشرين ساعه...اما عن مايد بتصلبه تيلفون وبسلم عليه ..
ساعتها خذت رقم مايد من عند ميثاا.وسجلته في تيلفوني...وصبيت لي شاهي ورحت فوق وانا اسمع امي تقول...
ام محمد: بعدني بشل منى وبسير عليها العيوز من زمان ماييناها حليلها...
ابتسمت...وكملت طريقي للطابق الفوقي...دخلت حجرتي حصلت منى تتكركر واطالع الشاشه...
يوسف: شو تسوييين..؟!!...
منى: هههههههههههههههههههههه تعال شوف ربيعك قاعد يتقحطن...
يييت انا بسرعه اشووف شو تقصد... كان الماسنجر مفتووح وواحد من الشباب اللي اعرفهم بالنت سعودي الجنسية قاعد يتحرطم لاني ماسلمت عليه وفوق هذا يرمسني ولا ارد عليه.. ولاني من يومين مواعدنه ولا ييته اون...هالانسان بالذات خفيف دم بشكل فظيع... يوم اقعد وياه ماروم امسك عمري من الظحك...كيف عاد منى الكركووره على كل شي بتظحك..!!
يوسف: ليش فتحتي الماسنجر..؟؟
منى: برووحه فتح يوم شبكت النت...
يوسف: وليش ماسكرتييه..؟؟
منى: خفت ربعك يحسوون بالاهانه...
اطالعتها بنظرة...دايما جوابها جاهز لكل سؤال ماشاء الله....!!
يوسف: قومي قومي...
قامت منى وخذت ورقه من الطابعه ...
يوسف: طبعتي جدولج.!!
منى: هي انته تاخرت...
يوسف: يلست اسولف وياهم شوي تحت...ماسمعتي بالخبر..!!
منى: أي خبر؟
يوسف: ولد عمج مايد رد من السفر...
قالت منى من دون اهتمام يذكر...
منى: والله.؟!!..تصدق نسيت ان عندي ولد عم ومسافر..
يوسف: هههههههههه مالت عليج... وتوني بعد سامع امايه تقول بتسير صوب بيت يدوه وبتشلج وياها...
شقت منى ويهها بالظحكه...وحظنت جدولها وقامت تنطط..
منى: الله الله احلف..؟؟ اللــــــــــــه بسير عند قوم كنووووه...
اطالعتها انا باستنكار...
يوسف: بدال ماتقولين بسلم على يدوووه تصيحين بنت عمج..؟؟ صدق ماتستحين...
لكن منى طنشت كلامي ووقفت تنطيط وقالت..
منى: الله ونااااااااااسه بسير اتاكد من امايه..
وطارت براا الحجره ونزلت تحت.... حست انا بوزي...حتى ماسكرت الباب...!! مالت عليج انتي وبنت عمج الخبله...!!!
------------------------------------
اليوم: السبت..
المكان: صالة بيت خلفان..
الوقت: الخامسة والنصف مساءا..
-------------------------------------
( مهرة)....
كنت يالسه مع عفرا اللي يالسه اجلد كتب سيف... كنت اساعدها باني اقصص لها قطع الجلاد واحط الطوابع عالكتب...وبعد ماتجلد..كنت اشطب عالتجليد واقص الزوائد وارتب الكتاب ...
رن التيلفون..!
قمت ورديت عليه...
مهرة: آلوووه...
شيخه: مرحباااااااااا بنت خالتي...
ابتسمت...واستانست بعد...
مهرة: هلا والله شيخه...
شيخه: شحااااااااااالج مهااري..؟
مهرة: بخير الحمد لله شحالج انتي..؟؟ وشحال خالووه..؟؟
شيخه: كلنا بخير وسهاااله... سرتي الجامعه اليووم..؟؟
مهرة: هيي سرت..رديت حوالي الـ12 جي..
شيخه: شوو سويتي..!!
مهرة: والله..ماشي.. حضرنا الارشاااد... وتريقنا في الكافتيريا... وردينا البيت...
شيخه: انتي ومنوووه..ماقلتيلي ان عندج ربع..
مهرة: ماعندي...بس تعرفت على بنتين طيبات جي وحشام كلهن من كلية الهندسة.. ماقصرن وياي يعني..
شيخه: والله زييين...انتبهي عالبنات اللي ترابعينهن يامهرة...
مهرة: ان شاء الله..بصراحه الجامعه مول مب مثل ماتوقعت...
شيخه: ليش؟
مهرة: مادري.. قلت فخاطري البنات يعقلن يوم يكبرن ويدخلن الجامعه..والمسؤولية تكبر.. لكن بصراحه اللي شفتهن مستخفات من الخاطر..
شيخه: هههههههههه ماشفتي شي...
مهرة: وزححمه...
شيخه: بعد ماشفتي شي....هذيلا بنات التاسيسي ..الدفعات الجديمه ماداومن بعدهن اظن الاسبوع الياي...
مهرة: الله يعييينا... وتعالي بعد يغازلن شرا الشباب....
شيخه: ههههههههههههههههههههههههه ههههههههههههههههههه...
ظحكت انا على ظحك شيخه....
مهرة: والله صدق...
شيخه: ههههههههههههاي ليييييش..؟؟
مهرة: وحده عطتني ورقة اليوم...
شيخه: وووووووووووه بدينا بالحركات...شو كاتبه لج..؟؟ بيت شعر؟
مهرة: ههههههههه لا...كاتبه اون انعم ويه شفته في الجامعه وسلامات بخصوص ايدج..ومادري اشو بعد..
شيخه: ياحافظ عليها...بتشوفين بعد اشد من هالحركات...
مهرة: ههههههههه والله ولا علي منهن...
شيخه: باجر بعدج بتسيرين..؟؟
مهرة: هي عطونا جدول.. باجر علي امتحانين..واللي وراه امتحانين...ويوم الثلاثاء على حسب نتايجنا نستلم الجداول..والسبت الدوام...بس
شيخه: اهااا حلوو..غير عن نظامنا نحن يوم دخلنا الجامعه...
مهرة: لا باس فيه...بس شويخ حاطيلي ارقام اماكن ومباني ماعرف وين هالاماكن انا ...
شيخه: على كل مبنى بتحصلين رقمه...وسالي..اللي يسال مايتوه...
مهرة: الله ييستر بس ما اطوف لي الامتحانات...
شيخه: تعالي عمتج قايله بتووونا متى بتون..؟
مهرة: والله مادري بعموووه مشغوله ويا البشكاره اليديده تعلمها القواعد والقوانين والطبخ...
شيخه: هممم...خلاص عيل بخليج احيينه بغيت بس اطمن شو سويتي في الجامعه...باجر دقيلي عشان تقوليلي شو سويتي بالامتحانات..
مهرة: ان شاءالله بتصل..مشكووره الغاليه عالاتصال..
شيخه: العفوووو عيوني...فمان الله
مهرة: فمان الكريم..
سكرت عن شيخه وانا مستانسه من اهتمامها فيني...الكل سئل سيف شو اخبار المدرسه وشو اخبار اول يوم...لكن محد سئلني انا شو اخبار اول يوم جامعي..ماعدا عفرا... والا اهلي..عمتي ..ابوي..سيف وحمد... محد سالني...
-----------------------------------
اليوم: السبت..
المكان: شقة ناصر...
الوقت: الثامنه والنصف مساءا..
----------------------------------
( ناصر)...
حاسبت مهندس القنوات وعطيته حقه ووصلته لباب الشقه... سكرت الباب ورجعت للصالة... افتكيت من قنوات التشفير والافلام اللي مالها داعي وحطيت لي عربسات ونايلسات...مسكت الرموت وبدلت القنوات وحطيت قناة 2 التابعه للام بي سي... اوكي... من قنوات افلام لقنوات افلام ثانيه..!!! همممم..يالله عالاقل( تو) ارحم من القنوات اللي كانن عندي والافلام اللي يعرضونها...المشكله اني تعودت اشوف قنوات الاجانب...
رن جرس الباب...قلت فخاطري اكيد المهندس رد نسى شي من اغراضه..سرت وفتحت الباب....
ماكان المهندس... كان عبدالله... وياي من دون مايتصل...ماسوى هالحركه من قبل...
ناصر: هلا والله عبدالله...
عبدالله: السلام عليكم...
توايهت مع عبدالله ودخلته البيت وسكرت الباب...
ناصر: وعليكم السلام والرحمه..اقرب...ياحيالله عبدالله..
دخل عبدالله صالتي...ويلس عالكرسي..
عبدالله: الله يحيييك... شحالك ناصر.؟
ناصر: بخير وسهااله...شحالك انته..؟ وشحال ربعك..؟
رفع عبدالله حواجبه...
عبدالله: بخير...ربعك؟؟؟..جي مب ربعك بعد..؟؟
ابتسمت... شكله عبدالله ياي يشن علي حرب اقناااع... رفعت كفوفي باشاره...
ناصر: بس...لا تبدا عبدالله...دقيقه اسمحلي شوي..
نشيت عنه وطلعت من الصالة ودخلت المطبخ...
ماعندي شي اظيف الريال... لا قهوة ولا شاهي... يبت كوبين وصبيت فيهم عصير وشليتهم معاي...
وعطيت عبدالله كوب...
ناصر: تفضل...
عبدالله: دام فضلك...
يلست انا في كرسي مجابل لعبدالله...
عبدالله: شف انا ياينك ولو اني زعلان..جي تسكر فويهي اليوم..!!
ابتسمت..
ناصر: قلت لك فمان الله...
عبدالله: وانا مارديت عليك...
ناصر: مشكلتك..
عبدالله: يالله ياناصر..مووول بايعنا ثرك...
حطيت العصير عالطاوله وقلت له بجدية..
ناصر: عبدالله...اسمك عبدالله...ماعنالك شي..؟؟ حرام ادنسه بالافعال اللي كنا نسويها... عبدالله انا ماريد اخسر ربعتكم لكن ماريد ارابعكم دامكم جي...ليش ماترجع للدرب الصحيح مثلي..انتبه لنفسك مثل ما انا انتبهت لنفسي.. والله بتحس بلذه الهداية...!!
عبدالله كان مطنش كلامي ويحيس بووزه...
وقالي بكل وقاحه...
عبدالله: انا جذي عايش بلذه...
ناصر: استغفر الله...
رفع حواجبة باستهزاء...
عبدالله: عدااااااااال...
ناصر: عبدالله... حق شوو تباني ارجع مثل ماكنت قبل...حق شو ارجع للشرب والصياعه وحياة الليل ويا الينانوه...!!! تدري.. انا بغيت اظيع حياتي مرتين اخر هالاسبوع... اول مره بغيت ادمر حياتي مع حياة شخص ثاني لكني انتبهت لنفسي... وبعدها على طول سويت حادث زين مارحت فيها ومت وانا بكبري محمل معاصي...ساعتها قلت خلاص... بتوب...هذا غضب من ربي اذا ما اصطلحت الحين بروح فيها ....
عبدالله: الخلاصه...؟
ناصر: الخلاصه الله يسلمك يا انكم تهتدوون معاي.. يا خلاص انا مب وياكم في المشوار اللي قاعدين تمشوونه هذا... ومابينا غير معرفه وسلام...
عبدالله: ناصر...
ناصر: لا تحاول عبدالله خلاص...خلاص انا مصر على رايي ومابغيره....انا مرتاح جذي..بالي مرتاح...نفسيا مرتاح...واذا مت ..بموت وانا مرتاح...
حط عبدالله العصير عالطاولة ونش معصب...وطلع من شقتي بطريقة همجية...
زعلت... فعلا زعلت.... ماكنت اتمنى هاللقاء ينتهي بهالطريقه...كان خاطري انه يهتدي معاي خصوصا عبدالله بما انه الاقرب لي بينهم كلهم...لكن راسه يابس...ومع الوقت بيفهم..وبيرجع عن هالطريق...انا متاكد من هالشي...
قمت وسكرت باب الشقة ورجعت للصالة اجلب القنوات... الظاهر اني وحيد فبوظبي من اليوم ورايح...!! كيف بقضي وقتي الله اعلم...
حسيت باليووع... ليش ما اسير اطبخلي شي..!!..
مسكت الروموت وبدلت عن قناة تو وحطيت قناة روتانا للاغاني وطولت عليه شوي عشان الصوت يوصلني للمطبخ...
شليت كواب العصير وانا ادندن مع الاغاني...

الجزء الثالث عشر..

-----------------------

اليوم: الاحد..

المكان: في بيت ام سلطان..

الوقت: السادسة الا عشر دقائق مساءا..

-------------------------

(يوسف)....

رفعت راسي..وعلى طول اختفت البسمة عن ويهي... مادري ليش ماارتاح بالتواجد مع نورة بنت عمي فمكان واحد... ما ارتاحلها..ما احسها تسوي شي بعفوية وبحسن نية...كله تتصنع حركاتها...ورداة فعلها...وكل شي..

قام مايد من مكانه وشل صينية الفواله الثقيلة عن اخته وحطها جدام قوم يدووه..عدلت نورة شيلتها وهي تسلم وتدخل.. انا وناصر ..قمنا من عدال يدووه وسرنا وقفنا عدال مايد...

نورة: هلا والله..مرحبتييييين الساع ....

تقربت نورة وهي تبتسم من امي وسلمت عليها وحبتها...

ام محمد: مرحباابج يابنتي ...

نورة: حيالله ام ناااااصر...شحالج خالتي عساج بخير...؟؟

ابتسمت وانا انتبه لتحريف نورة لاسم امي من ام محمد...لام ناصر...واللي ظحكني اكثر ردة فعل ناصر...

خش ايدينه فمخابيه ونزل راسه وهو يطالع الارض...هو بعد انتبه لهالحركه المقصوده من نورة...

ام محمد: بخير الله يعافيج يانورة شحالج انتي..؟

نورة: بخير فديت روحج خالتي...الا مشتاقيلكم...

ام محمد: تشتاقلج العافيه ..

نورة: الله يعافيج ياربي...

انا كنت مبتسم اطمش على مسرحية الحب هذي...لكن ابتسامتي اختفت يوم صدت نورة صوبنا ..وهي اطالع ناصر بنظرات مادري شو اسميها بصراحه...!!!...

نورة: شحالك ناصر..؟؟

رفع ناصر راسه وهو يطالع نورة بنظرة بارده..

ناصر: بخير يابنت عمي شحالج انتي عساج طيبه..؟

نورة: بخير الله يعافيك...عنبوو ياناصر...جنك الا انته اللي مسافر مب مايد..!!

ناصر: ليش يعني..؟!!..

قالت بدلع مايع..

نورة: موووووول ما نشووووفك...!!

قوية الكلمه... حسيت ناصر تورط ومابيعرف كيف يرد عليها بوجود اهلها كلهم...لو هي اروحها جان رد بوقاحه باي رد يخطر على باله....قلت فخاطري بسوي عملية انقاذ...وفي نفس الوقت..مب ملاحظين انها مطنشتني..!!

يوسف: شحالج يانوووره...!!

التفتت لي نورة وهي كانها توها بس شافتني...

نورة: بخير الحمد لله شحالك انته يوسف.؟!

يوسف: نشقح...

لاحظت ناصر يبتسم على اسلوبي في الكلام...

ام مايد: نوره...بنتي زقري خواتج يسلمن على خالتهن شحقه منزربات داخل..؟!

ام محمد: هههه عاد يتهن منّـــووه احين بتشغلهن....

ام مايد: ماشاء الله عليهن يا ام محمد...منى وكنه من يتلاقن مايرومن يسكرن ثاميتهن....يخلصن الرمسة كلها من كثر السوالف...

طلعت نورة من الصالة بعد ماعطت ناصر نظرة تيبس الواحد...

لكن اللي يعجبني في ناصر بانه يتجاهل..طنشها وصد صوب قوم يدوه يطالعهم ...وبعد ماطلعت هي..يلسنا كلنا نتفاول ويا قوم يدوه... وبعد مرور حوالي ربع ساعه...قمت ودخلت المغاسل على اتغسل..

وفوق هذا ماباقي شي عن صلاة المغرب...

غسلت ايدي ..وسمعت اصوات بنات يدخلن الصالة وظحكات وتراحيب... حست بوزي..مافيني اطلع...

مادري متى بودر هالمستحى من البنات...وضحه الوحيده اللي ماكنت استحي عندها...آآخ ياوضحه..!!..اوفف ليش اذكر عمري..خلني ناسي...!.. نشفت ايدي في الفوطه وقررت اتاخر اكثر لين مايطلعن البنات... بطلت سفرتي اللي ماكانت خربانه اصلا بس عشان اقضي وقت اكثر...وقعدت اتسفر مره ثانيه جدام المرايه...

فجاه سمعت شي ينكسر...

التفت بسرعه جهة الصوت..وشفت كنه بنت عمي...اطالعني باندهاش.. وبعيون تلمع..وكل شي فويهها مفتوح..عيونها وحلجها...

يوسف: سلمتي...فدوة عن راسج...

وهروبا من الموقف المحرج...لفيت سفرتي عالسريع ونزلت القط قطع الزجاج الكبير عن الارض...

نزلت كنه معاي وهي تحاول تلقط معاي الزجاج لكن لاحظت ان ايدها كانت ترتجف بشده...

كنه: لاااا..خله عنك يوووسف...انا بلقطهن...

يوسف: انتي غسلي الاكواب اللي يايبتنهن وخلي هذا علي..

كنه: لااااااء...

يوسف: اووووه...سوي اللي اقولج عليه...

رفعت نظري لها وجابلت عيونها....تبون الصدق..؟!!

كنه كانت لها عيون حلللوه...طوال وناعسات وعسليات يلمعن بشده... وشفايف ورديات ومليانات...وخشم رفيع وناعم...وبشرة مثل بشرة الاطفال...

لا تفكرون غلط.. انا مايهمني الجمال ولا اتاثر به....لكن بصراحه كانت حلوه... لكن عقل ماشي...!!!

كنه: شحالك يوسف.؟!!.

ابتسمت..

يوسف: بخير كنوه شحالج انتي..

كنه: الحمد لله...خله دخييلك لا تلقطه...

يوسف: هاتي الزباله انتي..

كنه: لاااء..

يوسف: كنوووووه.!!!.

كنه: والله امي بتنازعني ان درت اني خليتك تلقط الزجاج..

يوسف: امج مب لازم تدري...هاتي الزباله وغسلي الاكواب وسيري عقب هاتي البروش وخمي الباقي..

برطمت كنه وقامت...عطتني الزباله وغسلت الاكواب اللي يايبتنها وراحت...

اما انا...لقطت كل الزجاج الكبير وتام الصغير...غسلت ايدي عن بقايا الزجاج...وعدلت سفرتي شوي وطلعت...

اول ماطلعت كانت كنه شاله البروش وداخله المغاسل وهي مبرطمه من "عملتها السوده" اللي تتحسب انها سوتها...ابتسمت انا لنفسي...لكن الظاهر الاخت تتحسبني اظحك لها هي...ابتسمت بحيا ودخلت هي وبروشها للمغاسل...اما انا كملت قعدتي مع قوم يدوووه...

اللي كل شوي تروغنا من عدالها انا وناصر...دلووعه هالعيوز...ليتها كانت عندنا في البيت...جان وناسه..

------------------------

نبض القلب · 18-01-11, 03:58 PM

اليوم: الاحد...

المكان: غرفة كنه...

الوقت: السادسة والربع مساء..

------------------------

(منى)....

رجعت البرواز اللي يضم صورة عمي المرحوم لمكانه على طاولة كنه الصغيره... عمي الله يرحمه كان وسيم...احلى من ابوي...وحرمته بعد ماشاء الله حلللوه...عشان جي عيالهم كلهم حلويييين ماشاء الله عليهم...

تساندت عالمخدات وانا افكر بخالد... اللي خطب وراح في حال سبيله...تنهدت بحزن....آآآآخ ياحسرتي عليه....زين اني ماتعلقت فيه بشكل كبير وايد والا بروح فيها..... والحمد لله انه مايدري عن شي...ومصيري انا بنسى...

فزيت يووم اقتحمت كنه الغرفه وهي تتقحطن ..وسكرت الباب وراها وتساندت عليه وهي اطالعني بنظرات صرت متعوده عليها...

ابتسمت...

لكني مارمت اكتفي بهالقدر وقمت ظحكت عليها...

منى: ههههههههههههههههه هاااااااااااه ياعبله...!!...شخبار عنتر وياج..؟

يتني كنه وقعدت مجابلتني عالشبرية....

كنه: احبـّـــــــــــه....بس اكرهج لانج ماتساعديني....

منى: ههههههههه اسفه ..ماروم اساعدج...لازم تكسبينه بنفسج ومن دون غشش...

كنه: منووووه اخوج مب سائل فيني ولا بيدري...

منى: لانه يستحي من البنات...المهمة عليج صعبه...

كنه: احسن يوم يستحي...مصيره بيحسسسس ... وانا بقرة ما اغبي مشاعري كله يطلع فعيوني...

منى: فديتج والله انتي مب بقرة انتي شيخه البنات..والا ياحظه يوسف يوم انج حبيتيه...

قالت كنه بترجي..

كنه: عيل ساعديني...

منى: ماقدر...خبريني شو صار تحت...اشوف جرعه الخبال زايده اليوم...

ابتسمت كنه وحطت راسها على ريلي بدلع تعودنا عليه مع بعض....

كنه: آآآآآآخ يامنّوووه..فديته ياربي...شو تخبلت..!..الا قولي ذبت ذوباااااااااااان ماشي أي فريزر ولا ثلاجه بيردوني لحالتي الطبيعية...!!

تحمست اعرف شوو صار...

منى: خبريني...شو استوى..!!

كنة: دخلت عليه الحمام....

انصعقت...

منى: شوووووووووووووووووووه..!!..ش و سويتي..!!!...دخلتي عليه الحـــ ...مينوووووونه انتي..؟! ماتستحين..!! قومي عني يالطفسه...

ومن غيظي دزيت راسها عن ريلي....اما كنوووه فكانت ميييييييييييته من الظحك علي.... اعتدلت في قعدتها وقالت...

كنه: لا يالخبله....كان عند المغاسل يتسفر...وانا مادريبه انه هناك....قالت لي يدوه شلي الكواب وغسليهن.. واااااااي فديته محلاته يامنوووه يوم يتسفر...وسيم وهاادي وحشيم...يوم شفته طاح الكوب من ايدي وانكسر...!!

كنت اظحك على كنه وهي تشرح بملامح تظحك ..كانت متحمسه...وكل شي تقول شي يخليني انقع من الظحك....يلومووني فيها هالبنت...احبها والله اكثر من اخت حتى...!!

منى: وشوو صار...

كنه: آآآآآخ قالي سلمتي...وفدوه عن راسج....

وكملت بعدها تقولي كل الحوار اللي دار بالتفصيل.... وانا اظحك عليها وعلى خبالها...

بنات عمي..من صغر سنهن...نوره وكنه ..وهن يحبن خواني ناصر ويوسف...وانا ادري بهالامور من سنين لكني ساكته....

مجتمع بنات عمي صغير...وكبرن وهن مايعرفن غير عيال العم.... وبما انهم الاقرب...ولانهن بعد بنات صغار ومتعطشات للحب حالهن حال أي بنت في هالسن...ماحصلن غير ناصر ويوسف... اللي مب دارين عن شي..

ناصر..انا موافقه على تصرفه لانه نورة ماتستاهله...

اما يوسف...ثووور...

سمعنا آذان المغرب ياذن...طااارت كنه عند الدريشه اما انا ابتسمت وانا اشوفها لاصقه في الدريشه جنها سبال واطالع خواني ومايد وهم طالعين من البيت سايرين صوب المسيد...

وبعد ماصلينا...ويلسنا عالشبرية...

منى: كنوووه...تعرفين خالد...ربيع يوسف اللي اخبرج عنه دوم...!!

كنه: هي بلااه..!

قلت بحزن...

منى: ..خطب...

برطمت كنه معاااي...كانت تدري باني بديت امييل لهالانسان... تقربت مني كنه وباستني على خدي...

كنه: فديت روحج والله...تعرفين مب نصيبج...والحمد لله انج عرفتي احين قبل ما تكبر مشاعرج صوبه...وبتشووفين بييج واحد احسن منه بمية مره...وبتقولين كنه قالت...

منى: ههههه من وين ياحسره...اخوج وخطب...وعيال خوالي كلهم صغار علي...يهالووه...من وين بييب ريل..!!

كنة: شووف مسودة الويه ثرها تحاتي العرس..!!!..

منى: هههههههههههههههه لا والله اسوولف وياج...

وقعدنا انا وكنه نسوولف لين مازقروونا عشان اروح للبيت....وانا بعدني ماشبعت من كنه...

------------------------------

اليوم: الاحد...

المكان: سيارة سهيل..

الوقت: السابعه والنصف مساءا...

------------------------------

(راشد)....

طلعنا انا وسهيل من الحلاق...وسهيل شال سفرته بايده وقاعده ينفض بقايا الشعر عن جتفه...

ركبنا السياره...شغلت انا المسجل بينما سهيل يتسفر جدام المنظرة الامامية...

وروحنا..صوب بيتنا..

بدون قصد مني قعدت اتذكر مهرة بنت خالتي...يوم اتصلت بسهيل الظهر من الجامعه تباه اييها...ساعتها شفت سهيل يتافف ويتظايق...

كنا انا وسهيل طالعين بنسير عند ريال يبا يبيع سيارته الرنج الفضية...وكنا مواعدينه انه نسيرله هالوقت ...لكن اتصال مهرة غير الخطط...قلت له حرام البنت تتريا في الجامعه اروحها لكن الريال بنتصله بنقوله انه بنتاخر شوي...

وكان بها...

سرنا الجامعه...وركبت مهرة ورا..بعد ماتفاجئت بوجودي في الكرسي الجدامي...

لاحظت ان سهيل متجاهل وجودها لا سالها عن جامعتها ولا عن شو سوت ولا أي شي....الله يهديك ياسهيل مادري متى بيصطلح... التفت انا لجهة مهرة وبديت اسالها...عن الجامعه والترتيبات والامتحانات...واذا فيه مشاكل او لا...

لاحظت انها تجاوبني باجابات مقتضبة...كانها ماتبا تتكلم معاي..

مالت عليج..

هذا وانا اللي ابا احسسج اني مهتم تعامليني جي..!!

سيري نقعي عيل...

بصراحه ماعرف شو مشكلتها هالبنت...شكلها ما ادانيني...برايها..الخساره لها هي...

ويوم شفت اسلوبها هذا معاي..صديت عنها وتجاهلتها كليا...لين ماوصلناها البيت ونزلت..وبعدها رحنا انا وسهيل عند الريال وشفنا الرنج الفضية مالته...وسهيل يازت له السياره وعقب مشاور قرر انه يتوكل وياخذها... وباجر بيستلمها وبيدفع عنها للريال...ومن بعد الاتفاقات هذي ..صلينا المغرب..وتحلقنا واحين سايرين البيت...

في الطريج...غصبن عني مره ثانيه تذكرت مهرة...فجاه صديت صوب سهيل..

راشد: سهيل....بسالك...

سهيل: خير..؟

راشد: مهرة اختك...انتوا وايد تطنزون عليها في البيت..!!!..

سهيل: نحن..!!..لاااه..ليش؟؟

راشد: مادري مره قالت لي كل اللي في البيت يطنزون علي ليش بتكون انته مختلف عنهم..؟

سهيل: متى هذا..؟

راشد: يوم عزمنا ابوك عالغدا ذاك اليوم يوم عنده الشباب ناصر ويوسف...

سهيل: ماعليك منها خراطه...

راشد: ليش عيل قالت جي..؟

سهيل: دلووووووعه....

سكت انا عن سهيل...هو ادرى باخته....يمكن صدق دلووعه..انا اشوف تعاملها معاي مب زين بصراحه تقولون ماكل حلالها....

وصلنا حارتنا...وكنا نمشي في شارع فرعي داخلي... فجاه قلت لسهيل يخفف السرعه..

سهيل: ليش..؟

راشد: خفف السرعه اقولك...

سكت عني سهيل وهو مستغرب لكنه نفذ اللي قلت له عليه...بطلت انا دريشتي وطلعت راسي وظحكت...

راشد: يازييييييييين هالمشيه والله...نااااقة بوسط صحرااا...ياسلااااااااااام عذاااااب ....

سهيل: ايييييييييييييييه ...!!..شو تسوي يالهرم...!!

قلت له بصوت واطي..

راشد: هههههه جب فاطمه وشويخ قاعدات يمشن...

سهيل: هاااااه..؟؟ ليش يمشن الحين في الليل..!!!!

لاحظت نبرة الغضب اللي في صوت سهيل....لكني طنشت..

راشد: فاطمه موصّل ولازم تمشي وايد هالفتره....

سهيل: وانته ليش ماتمشي وياهن عن حد يتعرضلهن..!!

راشد: الدنيا اماااااان...

سهيل: لا مب اماااان...

سكت عن سهيل "الغيور" ورديت اطلع راسي...واظحك..

راشد: فدييييييت روحج...الشيييمه تتصليبي الشيمه....مارووم بقعد اتحلمبج اليوم...

ونقلتهن رقمي وانا ناقع من الظحك على اشكالهن المتروعه.....

فجاه وقفت شويخ..ويوم شافتنا بعد ماعرفت الرقم..حطت ايدها على خواصرها معصبه...

شيخه: ويا ويهك روعتنييييي يالسبااااااااااال......

فاطمه: راشد..!!!!..ماعليه ماعليه ياراشد عند ابووويه....

راشد: مب انا هذا سهيييل....!!!

شيخه: لا سهيل مايسوي هالحركات....

رفعت حواجبي مستغرب وانا اشوف هالثقة الزايده عند شويخ....تقرب سهيل من الدريشه بعد وقال..

سهيل: شو قصدج.؟ اصلا انا اللي معلم اخوج اصول المغازل...!!!

ظحكت...اصلا لا انا ولا سهيل نغازل...صح نطاالع اذا شفنا وحده حلوه يعني حالنا حال الشباب...لكن مانتعرض للبنات بصراحه...ولا نلاحقهن....بس نطالع...

قالت شيخه بشكل درامي لسهيل...

شيخه: طحت من عيني بعد ماكنت عااالي...

سهيل: عسى ماتعورت بس..!!...برايني اتعور المهم اطلع من عينج اللي لاعت جبدي منها...

شيخه: اللي مايطول العنب حامضٍ عنه يقول....!!..

سهيل: الخمر اصله العنب....وهو من اكبر المحرمات...

شيخه: ماعندك سالفه....

سهيل: وانتي ماعندج مخ....!!

لين هني وبس...بغيت اموت من الظحك على سهيل....طول عمره يقول عكس اللي يحس فيه...وانا معطنه الحرية مع اختي لاني اعرفه مايغلط ولا بيطيح الميانه وايد...ومهما وصل بسوالفه مع شويخ بيتم دايما يحشم وجودنا... يظاربها احسن من انه يتغزل فيها....اصلا هذا مايعرف كيف يتغزل...مايعرف كيف يحن...مايعرف كيف يبين اهتمامه....يعرف يتعيوف بس...!!

فاطمه: شويخ...امشي امشي يالله خلصينا..فضحتووونا شو بيقولون الناس عنا واقفين نتلاسن ويا شباب...شو يعرفهم ان هذيل خوانج..امشي جدامي...

سهيل: وييييييييييييو هزئووووها...

فاطمه: وانته ان ما حركت سيارتك احين بخلي امي تغسل شراعك...

سهيل: ان شاء الله خالتي...

وطار بسيارته مخلف وراه دخنه على فاطمه وشويخ...ونحن ناقعين من الظحك عليهن...
------------------------------------
اليوم: الاحد...

المكان: غرفة مهرة..

الوقت: التاسعه مساءا..

-------------------------------------
(مهرة)....

لفيت الفوطه على شعري وطلعت من الحمام...حطيت كريم مرطب على بشرتي وايدي وريووولي...وبعدها قعدت اجهز اغراضي وملابسي لباجر...دورت الآلة الحاسبة في مكتبي ماحصلتها...باجر عندي امتحان رياضيات لازم تكون عندي آلة...

اوهوووو في حجرة سيف اكيد....هو شلها السنه اللي طافت وقت الامتحانات...

طلعت من حجرتي ودخلت حجرة سيف.. قعدت ادور الآلة في ادراج مكتبه... فتحت اخر درج وكان فاظي الا من غرض واحد...وهو مب الآلة...كنت بسكره على طول لكن هالغرض لفت انتباهي ....

زقارة...!!!!...

عمري ماشفت زقارة فبيتنا...مسكتها وفتحتها..كانت مستخدمه مب يديده...انصدمت...ماعرفت كيف اتصرف...

شو اسوي..اخبر منووه..؟؟؟ابويه لا...امي الله يرحمها كانت دايما تخاف من ردة فعل ابويه...منو اخبر..حمد.؟؟؟ والا سهيل..!!..يوووه..ياهي بلشه...

ليش تسوي جي ياسيف ليش..!!..

رجعت الزقاره محلها وسكرت الدرج...وكلمت بحثي عن الآلة الحاسبه مالتي....لين ماحصلتها في درج الطاولة اللي عدال الشبرية...شليتها وطلعت ورجعت غرفتي..حطيتها في شنطتي الصغيره مع بقية الاغراض اللي احتاجها...وخوزت الفوطه عن راسي وسحيته ولفيته بربطه..لبست شيلتي البيظا ونزلت تحت...

حصلت ابوي يالس مع عمتي بروحهم يطالعون التلفزيوون على برنامج ثقافي مال الحيوانات...!!..

يلست اطالع وياهم لين ماخلص البرنامج...بعدها قعدت عدال ابوي وقلت له..

مهرة: ابووويه...انا محتايه شي بس مستحيه منك...

بوحمد: قوولي يامهرة شو محتايه..!!..

مهرة: ابوويه انا محتاجه كمبيوتر ومستلزماااته.....

بوحمد: كمبيوووتر..!!.. شو تبينه يابنتي..؟ هذا الا حق اللعب...

مهرة: لالالالا ابوويه مب للعب انا ابااه...انا محتايتنه للجامعه..كل البنات عندهن كمبيوترات..وكلهن يقولن في الجامعه مايطيعون بالواجبات اللا بالكمبيوتر والبحوث وغيره...حتى الدروس يعطونا اياها عالكمبيوتر...

بوحمد: ماشي عند خوانج مثله..!!

مهرة: لا ابوويه هذيلا شو دراهم بالكمبيوترات...

بوحمد: وانا شوودراني عيل عشان اشتريلج الزين...

مهرة: قوول حق سهيييل...

بوحمد: وسهيل شو دراه اخوج مب مكمل دراااسه ولا له خص بهذا اللي تقولين عنه..

مهرة: رااشد ولد خالووه مكمل جامعه واكيد يعرف..وهو دوم ويا سهيل...بياخذون لي اذا قلت لهم..

بوحمد: ان شاء الله يصير خير...انتي محتايتنه عاد صدق والا بس جذي لعب..!!

مهرة: لا والله ابويه محتايتنه صدق ابااااه...

بوحمد: خلاص ان شاء الله بقول لاخوج اييبلج واحد...

مهرة: تسلم يابوويه ماتقصر...

بوحمد: سيري عاد قولي للبشكاره هذي تحط لي عشاي..

مهرة: ان شاء الله...

قمت وانا مستانسه من هالانجاز..نااادرا ما كنت اجرأ واطلب ابوويه أي شي...والحمد لله يوم اطلبه مايقصر...لكن بعد استحي واحيانا اخاف اطلبه..وما اطلبه الا اذا جان شي مهم وايد...

طلعت من البيت...وخوفي من اني اصد صوب الميلس مازال يلازمني...!!..

-----------------------------------

اليوم: الاثنين..

المكان: غرفة سهيل..

الوقت: الخامسة والنصف صباحا...

-----------------------------------

( سهيل)...

دخلت البيت وسكرت الباب وراي...بعده الوقت فير ومحد نش حتى الخدامه مانشت الظاهر.. تظايقت شوي لانه لا ابويه ولا حمد ولا حتى سيف اخوي يقومون لصلاة الفجر ...شو بيكلفهم يعني..!!..فالحين بس من ينشوون الصبح يصلوونها فايته...

صح اني تعبان لاني سهرت امس والسبب كله من شويخ لكني نشيت للصلاة... اما شويخ..فدواها عسير..السباله تبا تنتقم مني انا وراشد..قامت ترست السندويشات اللي سوتها لنا كلها فلفل...راشد خلّى السندويشه وماكملها..اما انا كلتها عنادا في شويخ...وعشان اقهرها...ولو ان معدتي حساسه شوي من الفلفل...

والنتيجه اني من كلت هالسندويشه وانا كل ربع ساعه اسير الحمام....الله يسامحج ياشويخ..بس ماعليه مردوده...

ركبت فوق ودخلت حجرتي وانا افكر انسدح لي ساعه لين ماانش حق الدوام...

وانصدمت يوم شفت مهرة قاعده على شبريتي وهي لابسه بجامة نوم..وشيلة الصلاة...!!..هذي الساحره شو موعنها احين..!!..

سهيل: مهروووه...روعتيني... (وبطلت ليت الحجرة)..شو بلاج..؟

ييت ويلست عدالها عالشبرية وانا اسمعها تقولي بوجه بريئ...

مهرة: ماشي..بس ابا اقولك شي..مهم...

فصخت كندورتي وتميت بوزار وفانيله... وفريت الكندوره بعيد...

سهيل: شو بلاج..؟؟

لاحظت توتر مهرة..وترددها بالكلام...

سهيل: رمسي...شوفيج شو مستوي..؟؟

مهرة: اباك توعدني اول...بانك ماتكبر المساله...ولا تسوي مشاكل..انا مب قصدي اني افتن..بس لاني خايفه...

قاطعتها وقلت...

سهيل: روعتيني تراج صدق..

مهرة: اوعدني اول انك ماتظرب ولا تصارخ...

سهيل: اوعدج خلاص قولي..

ترددت مهرة مره ثانيه لين زهقت....لكني سكت وانا اترياها تطمن مني عشان ترمس وتخليني ارتاح شوي...

مهرة: همم...امس ..كنت ادور الآلة الحاسبة مالتي ..كانت عند سيف...وو...وفي واحد من ادراجه...حصلت...حصلت زقاره...!!..

انصدمت....

سيف يدوووخ..!!!!... ولا واحد منا داااخ...حتى ابويه ماكد داخ...ايي هذا يدوخ احين..!!!..

سهيل: شووووووووووه..!!! من وين يابها...؟

رفعت مهرة كتوفها علامه الحيرة والعجز...

سهيل: اكيد من عند ربعه السبلان....انا اراويه..

مهرة: انته وعدتني سهيل...ماريد سيف يدري اني مخبره عليه عقب مابيكلمني...

رفعت نظري لمهرة وهديت اعصابي....ذكرتني بالوالده...!!!... جذي كانت تخبر بالمشكله وماتبانا نتصرف..تبا المشكله تنحل لكن بدون لا صريخ ولا ظرب ولا مشاكل...كل شي بالتفاهم....

تنهدت بتعب....

سهيل: خلاص خلي هالموضوع علي انا...وسيف مابيدري انج اللي قايله ...

ابتسمت مهرة لي بشكر صامت...وقامت عني عشان تطلع... وحصلت نفسي لاول مره اسالها عنها هي..عن احوالها..

سهيل: انتي شو موعنج احين..؟

التفتت لي مهرة وعلى ويهها نظرة هادية...

مهرة: نشيت اصلي..

سهيل: كل يوم تنشين وقت الصلاة..!!

مهرة: هي...

حبيت هالشي فيها...ماكنت ادري ان فبيتنا حد ينش لصلاة الفجر غيري...

سهيل: متى دوامج اليوم...؟

ابتسمت مهرة شوي...

مهرة: عندي امتحان رياضيات الساعه 8 لين عشر...والساعه 12 عندي امتحان ثاني كمبيوتر...وبخلص 2...

سهيل: يعني تخلصين دوام 2..؟؟

مهرة: هي...

فكرت شوي...

سهيل: خلاص انا بمر عليج الساعه 2 في الجامعه وبييبج..

توسعت ابتسامه مهرة وقالت بفرح..

مهرة: والله...؟

سهيل: هي...انا بييبج...

مهرة: شكراا... بخليك تبغي شي؟

سهيل: لا مشكووره..

خلتني وطلعت وسكرت الباب وراها بهدوء..اما انا فانسدحت على شبريتي وانا احاول ارتاح شوي قبل الدوام...لكن وين تيني الراحه..!!وانا دريت بعلووم سواااف من ورانا..!!!

يدووخ..!!..

شو يبابها الزقاره احين..!!..شوبتزيد عليه..!!

الحمد لله انها وقفت عند زقاره مب عند مخدرات والا شي لاسمح الله...واذا ما انتبهنا لهالولد بيظيع تراه...!!

الله يستر...

نبض القلب · 18-01-11, 03:58 PM

----------------------------------

اليوم: الاثنين..

المكان: شقة ناصر...

الوقت: الثالثة والنصف ظهرا...

-----------------------------------

(ناصر)....

فصخت التي شيرت الاسود اللي كنت لابسنه وتميت بالشوورت...ووقفت جدام منظرة الكبت الطويله...وانا اطالع جسمي...

ماعيبني اللي شفته...قبل كنت راضي عنه لانه فعلا لاباس فيه...لكن تغير رايي بخصوص جسمي من شفت جسم مايد....ليش انا شو قاصرني ما خلي جسمي مثله...او احسن..!!..

الحقيقه اني اهملته فتره طويله...والخمر..ماساعد على التحسين بالعكس خرب جسمي اكثر...

دخلت الحمام وانا اتخذ قراري...بعد صلاة العصر بروح اشترك في وحده من صالات كمال الاجسام عشان اتمرن العصر..وبعد صلاة المغرب اركض عالكورنيش...

شو ورايه انا ما اسوي رياضه..؟؟.. عندي فضاوة الدنيا كلها... خلني اشغل وقتي...!!

تسبحت وتلبست ثيابي وتعطرت ...خذت اغراضي وطلعت متجه للمسيد....اول مافجيت باب شقتي شفت عبدالعزيز راكب المصعد..مسك لي الباب وهو يبتسم..وانا ابتسمت بعد...

هذي رابع مره اشووفه...

شفته عند صلاة الفجر...ووقت الطلعه للدوام...وعند الرجعه بعد...وهذي الرابعه...!!!..

ناصر: السلام عليكم...

عبدالعزيز: وعليكم السلام...

ناصر: شو السالفه اليوووم ياعبدالعزيز...!!!

عبدالعزيز: ههههههههههههههه بعد ربّك يبغي جذه...

ناصر: ههههه لو ساكن فبيتكم بعدنا مابنتلاقى هالكثر...

عبدالعزيز: جنك الا زهقت مني..!!

ناصر: ههههههههه لا والله الا ياحظي... تفضل..

اشرت له عشان يطلع من المصعد... ظحك عبدالعزيز وتجدمني ومشينا رباعه للمسيد...

وبعد الصلاة..التفت لي عبدالعزيز وقال..

عبدالعزيز: تقبل الله منك ياناصر..

رديت انا الشهادة على ويهي وقلت له..

ناصر: منا ومنك صالح الاعمال...

عبدالعزيز: ناصر..وراك شغل احين والا فاظي..!!

فكرت شوي..بان الصالة والتسجيل يتاجل عادي..

ناصر: آمرني اخووي..

عبدالعزيز: مايامر عليك عدوو ولا ظالم...اباك تخاويني عند ريال...

ناصر: ومنوو هذا الريال..؟؟

عبدالعزيز: اسمه علي بن سالم...ريال حشيم وشهم ومتدين والله منعم عليه بالعلم ماشاء الله...وانا كنت افكر بكلامك بانك اروحك فبوظبي..قلت فخاطري..ربعه اهل الذكر مابتظرك..بالعكس بتنفعك اذا كنت تبغي..واذا تشوف انته ان هالشي تطفل مني اعتذر واسحب الدعوة هذي...

تاثرت بكلامه..حسيته صدق مهتم فيني ويدور مصلحتي...

ناصر: افا عليك ياخوووي ...لا والله بالعكس هالشي يفرحني..يالله قم...

ابتسم عبدالعزيز وقام معاي وطلعنا من المسيد وتوجهنا لسيارة عبدالعزيز...طول الدرب كنا نتكلم عن اموور..حتى اني قلت له اني ناوي اسجل في صالة لكمال الاجسام وقرر انه يسجل معاي..وفاجاني بانه هو بعد يركض بعد المغرب..لكنه ماكان مسجل في صالة...واستانست..يوم تركض مع شخص احلى بوايد عن تركظ بروحك...

وصلنا لبيت ..كانت فيلا..وحلوه ومرتبه...

ناصر: نحن سايرين بيته اثرنا..؟؟ ماقلت لي...

عبدالعزيز: هو مواعدني فبيته.. انزل انزل ماعليك...

بصراحه كنت مستحي...

مب شكلي جذي رززه..!!!.. لكن نزلت على اي حال...ودخلنا الميلس..وين كان يتريانا علي..وابنه الصغير سالم....

------------------------------

اليوم: الاثنين..

المكان: في صالة بيت خلفان...

الوقت: الخامسة عصرا..

-----------------------------

(سيف)....

كنت يالس في الصالة العب بلاي ستيشن 2..وانا يايب فلم يديد مال الكوره... ومندمج فيه...ومهرة يالسه عدالي وتتحرطم علي...

سيف: جب لا رووغج...

مهرة: سواااااف حرام عطني العب شوي..انا فريق وانته فريق انزين...

سيف: ماتعرفين...

مهرة: بتعلمني انته...

سيف: مافيني وبعدين ايدج مكسووره ماترومين تمسكين الايد عدل..

مهرة: لا هاا شووف صبووعي مب ملفوفه اروم امسكها...

سيف: قتلج لا...

مهرة: اوهووووووووو...!! بتشوف ابويه بيشتريلي كمبيوتر وهذا ويهي ان خليتك تشتغل عليه...

ظحكت انا عليها بسخرية...

سيف: هههههههه...ابويه بيشتريلج كمبيوتر..!!!..

مهرة: هيي..رمسته امس وطااااع..قال برمس حد من خوانج وبييبوون لج..

سيف: رمسة...

مهرة: بخليها فعل وبتشووف...

سيف: انزين بنشوووف...اقول متى بتراجعين في المستشفى عشان ايدج..؟!

مهرة: هممم..قالوا بعد اسبووعين..وانا اليوم كملت اسبووع...يعني الاثنين الياي ان شاء الله...

سيف: بعدها تعورج..؟!!..

مهرة: احيانا يوم اهوس عليها...

كنت بعدني متلوم من اللي سويته في اختي... ولو انه من دون قصد بس انا اللي دزييتها....

نزل سهيل من حجرته في هاللحظات...وقال..

سهيل: سيف...شو ها شوو تلعب..؟؟

سيف: فلم يديد يبته من عند جمااال...تعال العب..

مهرة: هييي.!!.هوووه تعال العب ..وانا!!.. جب لا اروغج..شو هالتفرقه..!!..

سهيل: لا مافيني...خل اللعبه وتعال الميلس اباك في رمسه...

وطلع من البيت وراح الميلس بدون مايتاكد من اني بلحقه .....

التفت انا باستغراب لمهرة..

سيف: شو يبغيني..؟؟

جاوبتني مهرة بتوتر..؟

مهرة: مادري روح شوفه...

وسحبت الايد من ايدي وبدلت الفلم وتجاهلتني...اما انا ..قمت من مكاني وانا امسك سفرتي والفها على راسي..وطلعت من البيت ولحقت سهيل للميلس وين كان يالس ارووحه...ويطالع التلفزيوون...

يلست عداله...

سيف: هاا سهيل...شو بغيت...؟!!.

قال لي فجاه وبدون مقدمات... وعينه مازالت عالتلفزيوون...

سهيل: شو سالفه الزقاره ياسيف..!!!

توترت...ودقات قلبي زادت....هذا شوو درااااه..انا كنت ماخذ كل احتياطاتي...

قلت بانكار...

سيف: اي زقااااره..!!!..

كنت ناوي انكر للنهاية....هذيلا يكبرون المسائل وبيسوونها مشكله..وبيدخلون ابويه في السالفه... صح ابوويه من يوم توفت امي هدت اطباعه وماقام يهتم زود...لكني اذكر ظيجته...اذكر حرارته...وياما شفته يظرب خواني يوم يغلطووون بشي كاسلوب في التاديب...وانا بصراحه مازلت اخاف منه...حالي حال كل اخواني...

صد صوبي سهيل بهداااوة...وقال لي بهدوء ياما تحلّى فيه كجزء مكون من شخصيته...

سهيل: اي زقاره بعد..؟؟ الزقاره اللي ادوووخها من فتره ياسيف..!!..

حسيت اني مكشوف مكشوف لا محاله... سهيل ماقاعد يسالني..هو متاكد من كلامه ...اتخذت الهجوم كسلاح للدفاع عن نفسي...

سيف: وانته ليييييييش تفتش في اغرااااضي وادراجي هااااه..؟!!!...وين الخصووصية في هالبيت..!!

رفع سهيل حواجبه وهو يشوف محاولتي اليائسه...وقال بهدوء مره ثانيه...

سهيل: انا ما فتشت في اغراضك ياراعي الخصوصية انته...!!..

سيف: عيل..؟؟

اعتدل سهيل في يلسته وتقرب مني...

سهيل: شمّييتها في ثياااابك.....

سيف: انزين شو يعني يمكن كنت قاعد عند واحد كان يدوخ..!!

ابتسم سهيل بسخرية...

سهيل: وشميتها في غرفتك بعد...وبعدين توك تقول ليش تفتش..معناته شي مدسوس بين ادراجك ياسيف...!!..ليش تنكر...اذا انته ريال ارمس...

انقهرت...وحسيت بالغيظ...ابا اطلع برا البيت...!!..

ماحب احس اني محاصر جي...

سيف: انزين وشوو يعني..دخت...فيها شي...؟

اطالعني سهيل بهدووء...كيف مايقدر يفقد اعصابه هالانسان...من وين يايب هالبرود..!!!...

بعد لحظات قالي...

سهيل: فيها صحتك ياسيف.... الله عاطنك صحه يتمنونها ملاييين من الناس..ليش تفرط فيها..!!..

سكت...ماعرف كيف اجاوبة...

سهيل: مب لانه اميه توفت..وابويه في حالته من وفاتها يعني خلاص..مالك لا ولي ولا مسؤول.. انا مب اني يالس احاسبك انته ريال ومسؤول عن تصرفاتك..وتعرف زين الصح من الغلط...لكن لا تحطنا نحن اهلك بموقف ماريد حتى اني اتخيله... مثل مافقدنا الوالده بالسرطان ماريدك تيب هالمرض لنفسك بنفسك ...وانته كيفك..!!

لاحظت عيون سهيل تلمع كانها بتدمع من ذكر الوالده...كلنا ندري ان سهيل اكثر واحد تاثر بوفاتها... ومايتحمل يذكرها الا ويصيح...

وبعدها خلاني في الميلس ارووحي وطلع...

وتاثرت انا بعد بموقفه ....جمال..كان يزعل ويجبرني اني اودرها لكني ماودرتها... اما سهيل...

كان يطلب مني...او بالاحرى يترجاني...باني ما اسبب الاذى لنفسي...

بصراحه ماعرف شو موقفي من هالشي....

-------------------------------------

نبض القلب · 18-01-11, 04:00 PM

الجزء الرابع عشر

---------------------------------
اليوم: الاثنين..
المكان: في صالة بيت خلفان..
الوقت: الخامسة والنصف مساءا..
----------------------------------
(مهرة)....
بعد ماطلع سيف من الصالة وراح ورا سهيل...تميت انا على اعصااابي...اول مره اواشي على سيف...دايما كنت اخطف له هفواته ولا اخبر حد عنه...لكن الزقااره موضووع ماقدرت اسكت عنه لانه بيضره...
وبصراحه زقرة سهيل له ماتبشر بخير..الله يستر بس ماتستوي ظرابه..!
اخاف سهيل يقول له وسيف ايي يكفخني انا.. هالمره بيكسر لي ايدي الثانيه وريوولي بعد. واذا رام يقص لساني بعد بيقصه يسويها...!!..
سكرت اللعبه اللي ماقدرت اندمج فيها من كثر ما انا متوتره...وقعدت في كرسي مجابل باب الصاله عشان اشوف شو يصير في الحووش..وماكفاني هالشي..رحت وفتحت باب بيتنا اللي يودي للحوش عشان اسمع اصواتهم اذا صارخوا....!!!
ليش انا اتوقع الاسوا دوم..!!..عافان الله متشائمة في حياتي... قعدت في مكاني ارقب أي حركه تصير لكن ماصار شي ..واصوات عاليه ما سمعت...وبعدها بدقايق.. شفت سهيل يطلع بسرعه من الميلس..وايي صوب البيت وملامحه ماتفصح عن أي شي....وقف جدامي وقال..
سهيل: وين عمتج.؟
مهرة: مادريبها...ليش؟
سهيل: تبا تسير بيت خالووه تقول..بوصلها فطريجي...وانتي ليش ماتلبستي لين الحين..!!
مهرة: اتلبس ليش؟
سهيل: تراج بتسيرين والا..!!
مهرة: ويا عمووه..!!...لاااا..ماقالت لي....
سهيل: المهم سيري تاكدي منها بسرعه قوليلها سهيل يترياج في الصالة...
قمت انا ورحت اتاكد من عمووه....ملامح سهيل وتكدر مزاجه ماشجعني اني اساله عن أي شي صار داخل الميلس....
دخلت حجرة عمتي اللي كانت واقفه تجحل وتتزين جدام المرايه...
مهرة: عموووه...سهيل يقولج خلصتي.؟!
صدت صوبي عمووه بسرعه...وعقدت حياتها..
آمنه: وانتي شحقه ماتلبستي..؟؟؟
مهرة: ماقلتيلي اني بسير وياج...
آمنه: مطرشه البشكاره تقولج...
مهرة: ولا يتني ولا قالت شي...
آمنه: الله ينطبها ياربي...سيري يامهرة تلبسي فظيحه بتسلمين على خالتج صار لها ثلاث ايام طالعه من المستشفى..
مهرة: لازم اسير عموووه..!!...
آمنه: عيب عليج يامهرة...هي لازم تسيرين يالله خلصيني بسرعه...
حست بووزي انا..وطلعت من حجرة عمتي ورحت حجرتي..بدلت ثيابي ولبست لي قميص سماوي يديد وتنوره بيظا مريحه... حطيت كريم مرطب على بشرتي وايدي..وتزينت على خفيف ...
يوم نزلت حصلتهم يتريووني تحت ..عمتي وسهيل.. وكانوا يتكلمون مع بعض...
آمنه: شو من السيايير..؟
سهيل: رنج فضية...
آمنه: والله حلوو... يعني انته بتسير تستلمها وبترد علينا عقب والا كيف؟
سهيل: بوصلكم وبشل راشد وياي..ويوم بنرد انا بسوق الرنج وهو بيسوق الاودي... وعقب انتي خذي سيارتج وردوا البيت..!.
آمنه: على خير...يالله يالله نسير ...
ركبنا الاودي وطلعنا من البيت... وسرنا بيت خالووه...
---------------------------
اليوم: الاثنين..
المكان: في شقة ناصر..
الوقت: السابعه والنصف مساءا..
----------------------------
( ناصر)....
ربطت الخيط مال جوتي الرياضه وقمت من الشبرية... وعالوقت بالضبط..سمعت جرس الباب... خذت اغراضي الشخصية بسرعه وفتحت الباب...
ناصر: عالوقت ماشاء الله عليك ياعبد العزيز...
ابتسم لي عبدالعزيز وقال..
عبدالعزيز: جاهز..؟
ناصر: هي نعم...توكلنا على الله.... وهالمره بنسير بسيارتي....
قفلت باب شقتي ونزلت مع عبدالعزيز وركبنا السياره...
عبدالعزيز: ماقلت لي شو شفته علي..؟؟ ارتحت معاه؟
فكرت شوي بلقائي البسيط مع ربيع عبدالعزيز علي...
ناصر: ماعليه قصور ماشاء الله....ريال مثقف وملتزم..واحس شخصيته قوية ويقنع أي حد بكلامه بدون مايبذل جهد...
عبدالعزيز: فعلا.... لانه يكون واثق من كلامه مايقول كلام خرابيط...
ناصر: انا بعد حسيت جي...ماشاء الله قعدتنا كلها كانت مفيده ....
عبدالعزيز: الحمد لله انك ارتحت معاه...وان شاء الله الربعه بينكم تقوى مع الاياام...
ابتسمت انا بتسامح... لاني ما اعرف شو مستقبل هالربعه...لكن اكيد مابتكون مضره...
ناصر: ان شاء الله... وين نسير..الكورنيش؟
عبدالعزيز: كيفك انا اركض هناك كل يوم...
توجهت للكورنيش بدون نقاش.. ويوم وصلنا ..خلينا تيلفوناتنا واغراضنا في السياره وقفلناها ونزلنا..بدينا بالمشي السريع... تسخين قبل الركض...
ناصر: الا بسالك ياعبدالعزيز... من متى تعرف علي؟
عبدالعزيز: اعرفه الله يسلمك من ييت بوظبي...يعني من اربع سنين ونص تقريبا...
ناصر: ليش انته من وين اصلا؟
عبدالعزيز: الله يسلمك انا من خور فكان...
ناصر: وعلي كيف تعرفت عليه؟ يشتغل وياك؟
ظحك عبدالعزيز...
عبدالعزيز: ههههههه علي هو مدير الشركه اللي اشتغل فيها...
ناصر: اهااااا ماشاء الله اشوفه عنده خييير الله يزيده...
عبدالعزيز: هي ماشاء الله...
سكت شوي وبدينا بالركض.... وفجاه قلت بفضول...
ناصر: اقول...ولده الصغير سالم... عيونه خضر..!!!!!...
ظحك عبد العزيز على سؤالي الغريب...
عبدالعزيز: ههههههههههه عرفت انك بتسال عن هالشي من شفتك معقد حياتك وتطالع الصغيرون...
ظحكت انا بعد على دقة ملاحظة عبدالعزيز...هذا معناته انه كان يراقبني طول الوقت..!!!..
ناصر: هههه صدق والله... يعني علي..حنطي البشره ...عيونه بنياات... وولده شي مختلف..!!
عبدالعزيز: الله يسلمك علي ماخذ شاميّة... واظن الولد طالع عليها...وعلى فكره عنده بنتين صغار ...اصغر وحده اربع سنوات... شفتهم في بداية تعارفنا... لكن الريال من شدة التزامه مايحب يعود بناته مهما كانن صغار انهن يطلعن جدام رياييل...!!
عقدت انا حياتي لهالمبالغه....
ناصر: بس ماجنه مبالغ شوي..يعني هذيلا يهال شدراهن..!!
عبدالعزيز: هذا تفكيره ومعتقداته....انا ناقشته مره بهالشي...وقالي انه بين اهله وخواته كلهم تربوا جذي... ويقول ان الدنيا هالزمن مالها امان...والبلاد متروسه ذيابه...ومهما كان سن البنت صغير بيتمون يدققون فمفاتنها... وهو في منصب يخليه يجتمع بكل انواع الناس... هذي طريقته بالمحافظة على سمعة اهلة وبناته...
سكت...مب لاقتناعي بالكلام اللي انقال...لكني حسيت اني المقصود... "ذيابه"... مب انا كنت من هالفئة؟ او مازلت...!!...وهالافكار خلتني اوقف ركض من دون ما ادري... تسارعت انفاسي وانا اتذكر ابشع موقف سويته او مريت فيه في حياتي كلها...!!!.... وغمضت عيوني باسف....وندم شديد.... امثال علي وايدين..يحاولون يحمون اعراضهم وبناتهم من الشباب من امثالي انا..!!!.... انا من الفئة المنبوذه من الناس... محد يقدّر او يحترم الشباب من امثالي... كيف كنت استمتع بحياة مثل هذي مادري..!!!...
حسيت بايد عبدالعزيز على جتفي بعد ماانتبه لوقوفي عن الركض.ورجع لي يستفسر شوفيني...
عبدالعزيز: فيك شي؟
هزيت راسي بالنفي...وعيوني للارض...
طال سكوت عبدالعزيز ..ويوم رفعت عيني اشوفه..لقيته يبتسم...
عبدالعزيز: انا اسف ان كنت جرحتك بكلامي..لكني ابدا ما لمحت لك باي كلمه ومب قصدي هالشي... تدري ياناصر.. علي وانا..تربينا على الدين والالتزام.. لكن لا تفكر بان هالشي بيخلينا احسن منك باي مجال... لانك انته اقوى مني ومن علي...انته خضت امتحان..وامتحان صعب..خلاك تلتزم...والامتحان الاقوى انك تحافظ على هالتوبه وتثبت عليها... ماريد اشوفك منزل راسك خجل...اباك ترفع راسك بتفاخر بانك قدرت تتغلب على الشيطان بداخلك .. ودايما حط فبالك فكره انه مابيستسلم..وبيستمر بالاغراء... بس خلك انته اقوى منه واثبت....
سكت...وابتسمت بامتنان...كلامه ريح اعصابي شوي... لكنه لو يدري باللي انا سويته.. بيحتقرني طول عمره... ومابكون واقف معاه هني ومرابعنه..!!... حتى لو كنت تايب وملتزم... اللي سويته انا ما ينمحي بهالسهولة... هذا اذا كان ينمحي اصلا.... !..
-------------------------------
اليوم: الاثنين...
المكان: بيت بو راشد..
الوقت: الثامنه والربع مساءا..
-------------------------------
(راشد)....
بصراحه كانت سيارة سهيل فنانه.... وانا غرت... وبديت افكر اغير سيارتي انا بعد..... نزلت من سيارة عمته الاودي ...وانا اسب سهيل فخاطري لانه ماطاع يرجع معاي البيت.... اون شوو..؟؟ ناش من الفجر وتعبان... السبال..!!!... احين شو اسوي انا ارووحي..!!
دخلت البيت ووقفت عند باب الصالة... سمعت اصوات حريم...واستحيت ادخل... خليتهن ورحت فوق ابدل كندورتي اللي خاست يوم كنا في الصناعية...
كان باب حجرة شويخ مفتووح... دخلت.. او بالاحرى دخلت راسي بس... وابتسمت...شيخه ومهرة كانن لابسات شيل صلاة ويصلن مع بعض صلاة العشا...حليلهن...
وقفت ثواني اتامل بويه مهرة الهادي... وكيف انها غمضت عيونها يوم انتبهت لدخولي حتى وهي تصلي... اكيد غمضت عشان تندمج في صلاتها...!!.. بس ماقدرت اتزحزح من الباب..وقفت هناك متساند اتاملها.... واتامل رشاقة حركاتها...وايدها الصغيره وهي لابسه خاتمين صغااااار ناعمات... وشفايفها الناعمة وهي تقرا الآيات بصوت واطي...
شو هاا.!!.. عيب علي..
تحركت ودخلت الحجرة اكثر... ادور شنطة مهرة اللي اكيد انها يابتها ... عشان احط فيها سويج السيارة..
ويوم حصلتها عالطاولة الجانبية مسكتها وفتحتها...
فجاه حسيت بحد يمط الشنطه من ايدي... التفت بسرعه وحصلت مهرة تسحب شنطتها من ايدي...تركت لها الشنطة وابتسمت...
بينما هي كانت تحظن شنطتها واطالعني بعين زايغه... وتبتعد بعيد..
راشد: شحالج مهرة...تقبل الله منج...
مهرة: منا ومنك صالح الاعمال...
نزلت عيونها للارض.. وبعدها نقلت عينها لشيخه اللي خلصت العشا وبدت تصلي السنه ومطنشة وجودي...
راشد: شو اخبار الجامعه..؟
مهرة: زينه...
ماعرفت شو اقول لها...البنت ماتشجع أي شخص انه يكلمها....او هي بس تتصرف جي معاي..!!!..
واللي قاهرني اني احس نفسي معجب فيها...واتاثر بتقبلها او رفضها لي...واهتم لامرها.... بينما هي كارهه حتى شوفتي وكلامي معاها....
ليش اهتم؟؟؟....
راشد: لا تفكرين غلط ماكنت اسرق من شنطتج شي...
مهرة: بس كنت تفتش..!!
زمّيت شفايفي بعصبية....انا افتش..؟؟؟...عمري مافتشت حجر خواتي من كثر الثقة....اقوم افتش شنطة بنت خالتي..!!!!!...
رفعت ايدي بالمفاتيح...وقلت بسخرية..
راشد: كنت ابا احط سويج سيارة عمتج...الا اذا كنتي ناوية تردين مشي لبيتكم...!!.
رفعت نظرها لي....وبغيت اموت قهر يوم شفتها اطالعني من فوق لتحت بوقاحه...!!...شفيها هذي..؟ شو مشكلتها..!!!..
صديت عنها بتقزز...فعلا لاعت جبدي من تصرفاتها معاي... فريت سويج السياره عالشبرية وطلعت من الحجرة وانا اهز راسي باسف....
هي الخسرانه...اكررها للمره الالف....انا مية بنت تتمناني... منو تكون الانسه مهرة عشان ترد لي اهتمامي بمعاملة زفته مثل هذي..!!!..
هذي انسانه مريضة نفسيا.... ودلووعه مثل ماقال سهيل....
رحت غرفتي وانا ابذل جهدي اطرد مهرة من مخي .... بدلت ثيابي ورجعت طلعت بسيارتي وسرت للسوق اشتري شوية اغراض شخصية لي...
-------------------------
اليوم: الثلاثاء ...
المكان: في صالة بيت سلطان..
الوقت: الرابعه عصرا..
-------------------------
(منى)....
سكرت عن كنه وانا مهموومه باللي خبرتني به....المشكله ان انا وهي تقريبا عديمات الخبره في امور حماية الكمبيوتر....ومانعرف فيه شي.... بس لازم حد يتصرف...مسكينه ميته من الخوف...
يوسف..!!..
ماشي غير يوسف...
ركظت على الدري ودقيت الباب على حجرة يوسف ودخلت...حصلته كالعاده مثل ماتوقعت...لابس نظاراته الطبيّة ويطقطق على هالكمبيوتر ومعقد حياته..
منى: اقوول يووسف...شو تسوي.؟
يوسف: شو تبين.؟
منى: ابا استشاره كومبيوتريه..!!
ابتسم يوسف....
يوسف: لحظة..
وبعد دقايق..شكله سكر الماسنجر ماله وصار فاظي للكلام...
يوسف: آمري اخت منى.... شو خربتي في كمبيوترج..!!!
ابتسمت ....
منى: لا الموضوع مايخصني بس ابا اسالك...
يوسف: سالي..
منى: ربيعتي تستخدم النت انزين..!!..واليوم تقولي حست ان كمبيوترها يخضع لعملية تفتيش...!!!!..
عقد يوسف حيّاته وماقال شي...ويوم طال سكوتي انا بعد..سالني..
يوسف: فسري اكثر...تفتيش كيف..؟؟
منى: هممم..مادري هي قالت ..حسيت ان الملفات تنفتح..والفلوبي يتحرك مع اني ماشغلت الفلوبي...يعني مثل هالاشياء...
يوسف: يمكن هاكر....
حست انا بوزي متظايجه..هذا اللي كنا خايفين منه.....
منى: والحل..؟
يوسف: اكيد الكمبيوتر فيه باتش... يعني ملف تجسس...ملف يخلي الهاكر يقدر يدخل على الكمبيوتر...مثل فتحه في الايدار.. ولازم يتنظف من هالملفات...
فجيت حلجي بغباء مب فاهمه شي.... انا فاهمه...لكني فكرت بردة فعل كنه يوم اقولها هالسوالف كلها... اكيد مابتعرف تتصرف...وبتيها هستيريا.!!!...
فاجاني يوسف بسؤاله ونبهني من سرحاني...
يوسف: ربيعتج مخزنه صورها في الكمبيوتر..؟؟؟؟؟
منى: لا مب سالفه صور...لكن بحوثها وجي..كلها حاطه فيها اسمها الكامل ورقمها الجامعي... يعني...فضايح..!!
عقد يوسف حياته اكثر...
يوسف: قولي الصدق منّوووه... كمبيوترج هذا اللي ترمسين عنه.!!!
منى: لا والله مب كمبيوتري... كمبيوتر كننووه...بنت عمك...
راقبت الصراع الداير على ويه يوسف.... كنه بنت عمه..مهما صار مابيرضى عليها...لكني حسيت بان يوسف ماقاعد يفكر فيها شخصيا...يفكر باسمها...بنت عمه..واسمها مثل اسمه...واذا لحقتها فظيحه بتلحقه هو بعد...!!...
قلت له برجاء...
منى: ماتروم تتصرف..!!!...
ركز يوسف نظراته على الشاشه بتركيز غريب...
يوسف: شو تبيني اسوي يعني..!!!..خليها اطرش كمبيوترها الفورمات ينظفونه..!!
منى: هي ماتبا توديه الفورمات تقول وايد ملفات بيظيعن عليها...
يوسف: تقول له يخزن ملفاتها في " ديرايف دي"... وجذي مابيظيعن...
منى: بس مب جنه المشكله هي نفسها..!!..يعني اذا مثل ماتقول فيه ملف تجسس معناته اكيد موجود في واحد من هالملفات ومدسوس...اذا احتفظت بالملفات بيتم الملف موجود...
عقد يوسف حياته اكثر وحسيت انه متظايق من خبرتي" البسيطة" بالكمبيوتر اللي استمديتها منه هو شخصيا...!!!..
عرف ان كلامي صحيح...ودامني طلبت منه...غصبن عليه بيدخل...
يوسف: خلاص بشوف شو اقدر اسوي...انتي قوليلها لا تشبك النت لين ما اصلح لها الكمبيوتر....
قلت بحماس...
منى: شو رايك نسير اليوم..؟؟...
يوسف: خلاص عاد منى لا تحشريني...
منى: فدييييييتك...
يوسف: فداج الند...
منى: ههههههههههههههههههههه دخيلك يوووسف...
يوسف: قلت لج بشووووف...وبعدين مب لازم انتي ترزين بالويه كل مره حد يسير عندهم...
منى: لازم اسير عشان اكون مع منى يوم تشرح لك المشكله...
يوسف: اظن عندها خوات...
منى: انا اختها اكثر منهن...
يوسف: اوهوووووووووو فكينا خلاص طلعي....
قلت له بفضول...
منى: منوو تغازل عالمسنجر..؟؟
يوسف: عنبووو هالويه لج يالسباله...طلعي برا..ومالت عليج انتي وبنت عمج واللي يفكر يساعدكن...
منى: هههههههههههههههه امزح والله امزح... يوم بتسيرلهم خبرني...
يوسف: جلبي ويهج...
ظحكت على يوسف اللي رجع فتح المسنجر ورجع يطقطق بعصبية... طلعت من حجرته وفكرت اني اخلي سيرة يوسف لبيت يدووه عشان يصلح كمبيوترها مفاجاه... وبتستانس يوم بيتعنّالها وبيساعدها في مشكلتها...!!

اليوم : الثلاثاء...

المكان: سيارة آمنه..

الوقت: الخامسة مساءا...

-----------------------------

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري