بنت الجيران / للكاتبة القلب الحنون ، مكتملة

لامارا · 14-03-13, 10:24 AM


	بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية بنت الجيران للكاتبة القلب الحنون كلمة الكاتبة بسم الله الرحمن الرحيم بنت الجيران هالقصه كتبتها من كم يوم.. وأتمنى أشوف تعليقاتكم عليها وياليت تعجب كل من يقراها وودي أعرف تقييمكم عليها.. بنزل الجزء الأول.. واذا عجبتكم ولقيت تشجيع بنزل الباقي القلب الحنون

لامارا · 14-03-13, 10:51 AM

الأجزاء 1 ، 2 ، 3 ...

السبت الساعه 4ونص بمجمع السيتي سنتر.. مها كانت تتسوق ومعاها أخوها راشد

وعنود.. مها خذت لها شموع ومفرش جديد حق غرفتها اللي في بيتهم الجديد من يومين ساكنينه

راشد: الله يقطع ابليسكم من الظهر وانتوا تلفون.. أنا ريولي اذبحتني وانتوا ولا على بالكم

عنود.. والله محد غاصبك تمشي معانا.. روح اقعد لك في مكان لين نخلص

مها: لا..يمشي معانا وايد أحسن..السيتي زحمه اليوم وأنا ما أحب نمشي من غير رجال معانا

راشد: فديتج انتي أم السنع .. هاذي لوعلى كيفها تمشي بروحها..

عنود: شتقصد؟

راشد: أقصد امشي ونحاس لج أنا بتم معاكم حتى لين بكره..(عنود أكبر من راشد بسنتين لكنها ماتقدر تقوله شي لأنه ياكلها بلسانه ويفتن عليها عند مشعل)

عنود مدت بوزها ومشت ومها ابتسمت لراشد وادخلوا محل عطورات..

راشد عجبه عطر جديد وخذ راي مها اللي قبل ماتشمه شرته له علطول

راشد: دايما تحرجيني..أنا قلت لج شميه مب اشتريه!

مها: شدعوه رشود الا عطر فديتك

عنود واقفه بصوب ثاني من المحل تشوف المكياج

راحوا صوبها وراشد يتحندى: اللي يشوف هالسباله يقول تعرف تحط مكياج.. ماادري شبتسوي فينا هاذي اذا خلصت الثانويه..

مها: لاتقول عن اختك سباله..والله يستر بس السنه ..تنجح وتجيب مجموع(ثانويه عامه)

راشد: هاذي مب ويه مجموع

مها: عنود يله اخذي اللي تبين علشان تأخرنا على البيت..

عنود: توالناس .. وبعدين أنا أبي أحضر فلم وأمي ماعندها مانع

راشد: شنو؟ ومن بيقعد معاج ان شاء الله.. احنا بنرجع أصلا

عنود: أنا ماقلت لكم قعدوا معاي..ربعي بيجون الحين وعقب مااخلص أمي بتطرش الدريول

مها توها بترد عليها صرخ عليها راشد : وخططتي بعد الشيخه.. والله لوماطلعتي معانا الحين تلفون واحد حق مشعل يسحبج من شعرج لين البيت

عنود: اووووه معليه والله لا اعلم أمي

راشد: يمه.. خوفتيني.. أمج أصلا سبب خرابج

عنود: جب يا.. قاطعتها مها: خلاص طلعوا الحين .. وفروا هواشكم للبيت

وهم طالعين.. كانوا محمد ورفيجه عبدالله يدورون .. عبدالله شاف مها وعنود وقال حق محمد شوف هالثنتين اشرايك نلعوزهم شوي

محمد: عبود.. صج انت رفيجي لكني مب مثلك مااحب هالحركات ..

عبدالله: شسوي مليت ..أبي أتزوج

محمد: علبالك بتتزوج بهالاسلوب.. تلاحق بنات الناس

عبدالله انتبه حق راشد اللي كان يمشي ورا خواته..: أصلا مافيه أمل معاهم أخوهم

محمد مات من الضحك..

عبدالله تنرفز وراحوا صوب السياره (عبدالله كان يطالع عنود لأن مها متغطيه ومايحب البنات اللي مايعرف أشكالهم)

عند مواقف السيارات..تفاجئوا محمد وعبدالله لأن سيارتهم عند سيارة راشد وخواته الكل ركب سيارته ومحمد في سيارة عبدالله..

محمد في خاطره( صج فرق بين هالبنتين.. ماشاء الله الثانيه ولا التفتت لنا "قصده مها" )

في الطريج.. محمد: عبود وصلني البيت..

عبدالله: يعني أكيد بوصلك البيت لأنني تمللت من ويهك.. من الظهر مجابلك

محمد: زين ياعبود عقب يومين بتطلع سيارتي مب شايف ويهي..

عبدالله: تسويها انت والله

ضحك محمد..وخذتهم السوالف..

وقربوا من بيت محمد واستغرب محمد لأنه انتبه على سيارة راشد وخواته جدامهم قال حق عبدالله: مب كأنهم في نفس فريجنا

عبدالله: يابخت فريجكم

محمد: هذا وانت للحين ماعرفت البنت.. لوعرفتها شبتسوي

في هاللحظه راشد يكلم مها: مها .. تصدقين السياره اللي كانت احذانا بمواقف السيتي ورانا الحين

مها: يمكن طريقهم نفس طريقنا

راشد: يمكن .. بيبين الحين

وصلوا بيتهم.. وتفاجأ راشد ان السياره وقفت مقابل بيتهم .. مثل ماتفاجأ محمد ان بيتهم مقابل بيته

عبدالله: حمود.. الحق طلعتوا جيران.. لا وجدام بيتكم بعد

محمد: أدري.. يعني مااشوف .. أمي أمس تتكلم عن جيراننا الجداد..أكيد تقصدهم

عبدالله: تكفى عرفني عليهم

محمد: صج انك ماتستحي..يله روح.. ونزل عنه

،

لامارا · 14-03-13, 10:56 AM

الجزء الرابع

الموظف أول ما اكتشف من هم.. تم يطالع مها ويحاول يشوف ملامحها اللي ماكانت واضحه من تحت الشيله

وماعجبته عنود ولا اسلوبها..لأنها وايد فري وتتكلم معاه(أبي رقم حلو.. باين عليك طيب وتساعد.. عاد أنا ما آخذ أي رقم......الخ)

ومها كانت هاديه .. ومب عاجبها اسلوب أختها بس ماقدرت تفشلها جدامه..

خلصوا من كيوتل واطلعوا..

عنود: عرفتي من هذا؟

مها: من يعني؟

عنود: ولد جيراننا اللي كان معانا في السيتي

مها: لايكون ولد أم خالد.. الله يفشلج.. فضحتينا

عنود: ليش شسويت..الرياييل مايجون الا جذيه

مها: كل هذا علشان رقم..!

مها تضايقت وايد من اسلوب اختها.. وتضايقت أكثر لما عرفت انه ولد جيرانهم..

في هاللحظه محمد يكلم نفسه( أنا شاسوي هنيه..ليش مااروح وراها.. بس أبي أشوفها..)

ومن دون تركيز استأذن وقال حق واحد من زملاءه يوقف مكانه لين يرجع ومشى وراهم

محمد (شفيني.. أنا ألحقهم.. لو درى عني عبود شبيقول عني.. لا.. لا بدخل كارفور باخذ لي كافي واطلع)

دخلوا كارفور ومحمد وراهم .. مها راحت صوب الشوربات .. رفعت الشيله علشان تشوف عدل

بس فجأه قلبها نغزها.. وحست انه فيه أحد يراقبها..

محمد كان واقف يشوفها.. وأول ماشاف وييها فز قلبه واستانس..هو مايعرف شسبب هالفرحه!! بس ارتاح يوم شافها.. هي علطول لفت ويهها شافته .. انتفضت وتغطت علطول..

انتبه محمد حق نفسه وانحرج .. وطلع من كارفور.. رجع لشغله

عنود: مهوي.. شفتي ولد جيراننا المزيون كان هنيه..

مها: لحقتي تدققين بويهه.. امشي نخلص أغراضنا..

مها كانت تدري ان نظره وحده لمحمد تنعرف فيها انه حلو ومزيون فعلا.. مها مستغربه وألف سؤال يدور في بالها.. متى طلع؟ توه في كيوتل؟ وليش كان واقف يطالعني.. لايكون يتوقعني مثل اختي.. طلع مغازلجي.. بس هو ماقال شي.. واللي يغازلون يتكلمون..وليش وقف مجابلني .. ليش مب عنود!!........الخ

محمد رجع لدوامه وكان مشغول البال..(أنا شسويت؟؟ الحين شبتقول عني البنت.. بس أنا ماكلمتها.. شاللي صار فيني.. ليش فز قلبي يوم شفتها..أنا شفت بنات حلوين من قبل.. اشمعنى هاذي.....)

محمد ومها رجعوا البيت وكل واحد يفكر في الثاني..

محمد كان منسدح في الصاله يغني..

( بعيده وقفت وأنا بعيد بلهفتي.. مااحد عرف باللي حصل.....الخ)

أم خالد: حمود.. غريبه قاعد.. العاده اذا دوامك طويل تنام.. وتغني.. رايق بعد

محمد: يمه ماادري أحس اني مرتاح اليوم

أم خالد: الحمدلله.. ان شاء الله دوم مو يوم

محمد..كان متفاجئ من نفسه.. ومب عارف شالسالفه..غير انه رايق ومايبي شي يعكر مزاجه..

طلع محمد يتمشى في الفريج لأول مره في حياته يمشي في فريجهم..كان متعمد يدور جدام بيتهم..

وفجأه شاف مشعل.. توه راجع من الدوام وقف سيارته ونزل.. محمد راح صوبه من غير مايحس ولايدري شبيقول!!

محمد: السلام عليكم

مشعل: هلا..عليكم السلام ورحمة الله وبركاته

محمد: أنا جاركم وهذا بيتنا

مشعل: مجابلنا يعني.. زين والله.. أنا من جيت ماشفت أحد بالفريج غير الياهال

محمد: وأنا أول مره أشوفك

مشعل: أنا أغلب أوقاتي مناوب واليوم خلصت وعندي اجازه بكره..فرجعت البيت

محمد: زين يوم انه عندك اجازه.. بكره عشاكم عندنا

مشعل: ليش التكلفه ياخوي

محمد: لا تكلفه ولاشي.. وبالمره نتعرف على بعض أكثر

مشعل: ان شاءالله

محمد: ايه وقول حق الأهل بعد.. الوالده بتنتظرهم

مشعل: يبلغ ياخوي

ورجع محمد بيتهم.. وهو متوهق ومايدري شلون عزمهم.. من غير مايتفق مع أمه.. يمكن أمه مرتبطه بشي.. لا بس أمه طلعاتها نادره..

شاف أمه قاعده.. باسها على راسها

محمد: أمي اسمحي لي سويت شي من غير ما أشاورج

أمه: شمسوي فديتك؟

محمد: عزمت الجيران عندنا على العشا بكره

أمه: زين سويت ياولدي عسى عزمت المره وبنتها بعد.. أنا بعد متملله وودي بقعدتهم

محمد: صج يمه.. يعني ماعندج مانع

أمه: لا فديتك.. واذا على العشا بوصي أبوك وبنرتب كل شي.. وبقول حق مرت أخوك تجي وتسوي الحلو

محمد طار من الفرحه.. واستانس على اسلوب أمه.. وحبها وطلع

،

لامارا · 14-03-13, 10:57 AM

الأجزاء 5 ، 6 ، 7 ......

في بيت أم مشعل

مشعل دخل وبلغ أمه وخواته.. وماعندهم مانع..وأصلا مايقدرون يقولون شي لأن مشعل عطا الرجال كلمه

مها فز قلبها من سمعت طاريهم.. وتمنت ان نواري تكون هناك علشان تخفف من توترها..

في يوم العزيمه..

مشعل وراشد اجهزوا.. بس ينتظرون مها اللي أول مره تأخرهم..كانت متوتره ومب عارفه شتلبس أو شتحط في ويهها..وشتسوي بشعرها!!

أمها: شفيها هاذي.. لايكون علبالها بتروح عرس.. شتسوي للحين

مشعل: خليها على راحتها يمه.. ماتأخرنا

راشد: ايه لوبعض الناس متأخرين جان ماقلتي شي.. مع انها دوم تنقعنا والا بس هالمسجينه

عنود: من قصدك؟

أمهم: رشود لسانك يبي له قطع..اسكت انت وياها أحسن

مشعل طالعهم وضحك

طلعت مها وكانت حاطه ظل وردي خفيف على عينها ومتكحله.. وفاتحه شعرها

مشعل: ماشاء الله..شكلج بتنخطبين اليوم

عنود احترت لأن على كثر المكياج اللي حاطته محد علق عليه الا مشعل اللي كان بيخليها تغسل ويهها بس أمه سكتته..

أول ماوصلوا استقبلهم خالد وأشر على صالة الحريم وراحوا الشباب الميلس..

?ومحمد انقهر لأنه مالحق يشوفهم..

أم خالد كانت وايد فرحانه فيهم وفاطمه مرت خالد عجبتها مها.. وتمنت انها تكون من نصيب محمد

طبعا أم خالد سولفت عن عيالها والبنات فهموا ان اللي يشتغل في كيوتل اسمه محمد ..

مها ارتاحت يوم سمعت أمه تمدحه وحست ان أمه متعلقه فيه وايد..

في الميلس.. الشباب بسرعه خذوا على بعض وكل واحد يسولف عن المواقف اللي تصير في الشغل

وبالذات مشعل بحكم انه شرطي.. وكان يتكلم عن مغامراته..وسوالفه وايد حلوه.. استانسوا خالد ومحمد عليه وضحكهم مغطي المكان..

راشد: ماجنكم نسيتوني..كل سوالفكم عن الشغل .. ماتبون سوالف عن ?المدرسه

بوخالد: ايه والله ياراشد..شكلهم بيطردوننا بعد شوي

مشعل: البيت بيتك..احنا الطالعين وانت الداخل

بوخالد: بيتي بيتكم يالغالي.. والتفت على عياله وقال: شفتوا شلون الكلام الذرب مب انتوا..!

خالد: ماهقيتها منك يبه .. احنا كلامنا مب ذرب؟

محمد: ايه خلاص الحين لقيت مشعل في صفك.. بتستغني عنا

بومحمد ومشعل اضحكوا..

مشعل ارتاح لهم وحس انهم طيبين وحليوين..وكان محتاج لقعده مثل هاذي من زمان ..

وراشد بعد استانس عليهم بس كان يتمنى يلقى حد في سنه

طبعا محمد كان يحاول يكسب مشعل .. مايدري ان راشد حبيب مها ?وقريب منها والا جان ماهده

من هذا اليوم .. مشعل ومحمد وخالد مايقطعون بعض .. كل واحد يتصل للثاني بين كل يومين

،

لامارا · 14-03-13, 10:58 AM

الجزء الثامن

أهل ناصر راحوا بيت أم مشعل وحددوا الملجه وكانوا مستعدين لكل شي.. ومها مثل المحكوم عليها ماتقدر تغير أي شي مع انها ياما حاولت..

ومحمد اللي ماكان يدري بأي شي .. قاعد على أحر من الجمر ينتظر كلمه من أمه.. واعتقد انها كلمتهم بس أكيد البنت تفكر ( الله يهديج يامها كل هذا تفكير.. عن التغلي عاد.. أنا خلاص مااقدر أصبر..أبيييج)

وبعد اسبوع بين انتظار محمد وضيقة مها..تحددت الملجه.. واتصلت أم مشعل تعزم أم خالد وفاطمه

ومشعل قال بيعزم بوخالد وعياله .. اتصل مشعل لخالد وبلغه وطلب منه يبلغ ابوه ومحمد.. خالد انصدم لأنه فاطمه قالت له انهم بيخطبونها لمحمد.. ونست تقول له انها طلعت مخطوبه..

وكان خالد في طريجه للبيت.. وأول مادخل شاف فاطمه قاعده تأكل حمود..

خالد: حياتي

فاطمه: آمر عيوني

خالد: وقال لها عن مكالمة مشعل

فاطمه: وقالت له عن رد أم مشعل

خالد: حسافه .. يعني طلعت مخطوبه من قبل

فاطمه: يمكن الله مب كاتب محمد لمها

خالد: ومحمد لايكون في خاطره البنت

فاطمه: مااعتقد.. هو أصلا كان رافض فكرة الزواج بس الظاهر عمتي اقنعته

واتصل خالد في اخوه اللي كان قاعد مع أمه وأبوه يتابعون مسلسل الدريشه.. وأول مابلغ خالد محمد مناسبة العشا صرخ محمد

محمد: انت شتقول؟

خالد: أقول لك ملجة اخته

محمد: قصدك الثانيه

خالد: لا.. اللي أكبر منها

محمد: بس هاذي مها

خالد: أدري

محمد التفت على أمه ومن غير مايحس طاح التلفون من يده.. أمه وأبوه تخرعوا ينتظرونه يتكلم: يمه ليش ماخطبتي لي مها ليش؟

أمه: ومن قال لك اني ماخطبتها

محمد: يعني ردتني

أمه: لا.. أنا كلمت أمها وقالت انها مخطوبه

طلع محمد وشخط بسيارته وأمه وأبوه مب فاهمين شفيه..هو مايدري وين رايح لكنه كان تعبان.. ومايبي يقعد في البيت ..بعدين فكر في عبدالله وراح له

أول ماشافه عبدالله حس انه فيه شي.. ويهه كان متغير وتخرع على رفيجه.. ومحمد ماكان يقدر ينطق.. يحس انه صوته مب قادر يطلع منه.. لين هدا شوي وتكلم.. كلامه كان مقطع بس عبدالله فهمه.. وتضايق أكثر لأنه كان يعتقد انه أقرب واحد لمحمد ومحمد ماقال له أي شي من قبل.. بس عبدالله كان حاس انه محمد متغير.. حتى ابتسامته كانت غير لما عرف مها.. لكنه كان ينتظر محمد بنفسه يقول له..

عبدالله: ماودي أزيدك.. بس ليش ماقلت لي من قبل..كل اللي صار فيك اناماادري عنه..ليش؟

محمد: آآآآآآآآآآآخ ياعبود.. أنا ماكنت حاس بنفسي ولامتأكد من مشاعري وخفت أقول لك تستهزئ فيني

عبدالله: انت غلطان.. وليش أستهزئ فيك!! بالعكس أنا مب مصدق انك حبيت وطحت

محمد: خلاص.. حبي ضاع

عبدالله: أهم شي انت يامحمد.. مايصير تسوي بنفسك جذيه.. كان لازم تتأكد قبل كل شي..

محمد: شلون كنت تبيني أدري انها مخطوبه.. ودام انها مخطوبه ليش خذت الورده وليش عطتني أمل!

عبدالله: هي ماعطتك شي ..انت اللي تسرعت

محمد ماكان قادر يمر بنفس الفريج ويشوف بيتها.. وبات عند رفيجه.. اللي اتصل في أبوه وبلغه وأبوه سأل عبدالله عن ولده اللي مب متعود يبات برا.. وعبدالله قال له انه مافيه شي وهو حلف عليه يبات عندهم.

محمد ماقدر ينام.. وأغلب الوقت كان يفكر ويتخيلها ويتذكر نظرتها وويهها يوم كانوا بكارفور.. ومب متخيل انها بتكون لغيره..

صدق مخطوبه يافلانه.. وصدق باكر يزفونج

عسى انه لايجي باجر..وأشوف الدمع بعيونج

ومها.. الله العالم بحالها.. ملجتها بعد كم يوم وهي مالها نفس تشتري شي .. كل اللي كانت تتمناه تاخذ واحد مثل محمد طيب ويحبها.. وتحس انه فيه أشباء وايد مشتركه بينهم.. وأكثر شي أكد لها حبه.. وقفاته عند البيت والورده اللي كانت دليل.. وتقول في خاطرها ياليتك انت اللي خاطبني..

مجبوره وغصب يافلان.. خطبوني ورضيت أنا

يذبحوني من أصيح اللا.. وأصير لك خبر كان

،

لامارا · 14-03-13, 10:59 AM

الجزء التاسع

محمد مارجع لأهله الا ثاني يوم في الليل.. وأمه كانت وايد تحاتيه ومشغول بالها عليه.. قعدت معاه واسئلته عن سبب طلعته من غير مايتكلم.. وليش تضايق وعصب لأن مها مخطوبه.. محمد ماعرف شيقول لها غير انه كان تعبان وماتوقع أول وحده يخطبها ترده.. وفهمها انه كان يبيها علشانها بس..

أمه: أدري يايمه فديتك انك تبي رضاي.. بكره أخطب لك غيرها

محمد: لا يمه.. فديتج مب الحين.. عطيني وقت

أمه: ان شاءالله متى ماتكون مستعد قول لي

في بيت مها كان الكل مشغول بالتجهيز للملجه الا هي.. وطلبت من عنود تاخذ لها فستان ناعم جاهز على ذوقها..

وحاولوا يخلونها تطلع تاخذ لها بنفسها بس هي مارضت.. وتحججت انها تعبانه وان عنود تعرف ذوقها ومقاسها

عنود وافقت وماصدقت لأنها تحب تتشرى .. وقعدت مع مها في حجرتها .. تسألها شناقصها.. وقعدوا يسولفون

عنود: تدرين أمي عزمت جيراننا.. زين منهم بيجون

مها: وليش مايجون!

عنود: ماادري.. بس حسيت ان أم خالد انحرجت من اسلوب أمي

مها: ليش؟ شلون أمي أحرجتها!

عنود: يعني يوم اخطبوج

مها صرخت: من خطبني؟

عنود: شفيج ماتدرين؟

مها: عنود والله ماادري تكلمي من اللي خطبني؟

عنود: قالت حق مها عن المكالمه اللي دارت بين أمهم وأم خالد

مها: عنود.. اطلعي.. خليني بروحي أرجووووووج..

مها في هاللحظه صكت الباب.. وانفجرت.. دموعها كانت تسيل بشكل مب طبيعي.. وبداخلها ألف عنوان للحزن وتمت تكلم نفسها المفروض انه هالأمر يعنيها وكان لازم أمها تبلغها.. ليش تخطط على كيفها.. ليش أمها وايد ظالمتها.. ودها تفهم .. ومحمد آآآه يامحمد .. يعني كنت جاد وتبيني .. سامحني.. ماعطوني فرصه.. لوعلى كيفي ماصار اللي صار..

في هاليوم مها ماطلعت من غرفتها.. ومن كثر ماكانت تعبانه ودموعها على خدها.. نامت من غير ماتحس

وماقامت الا على دق الباب..

مها: من؟

عنود: آنا.. فتحي أبيج تقيسين الفستان ..أحسه عجيب عليج

مها: مب وقته ياعنود.. بكره

عنود: بكره ملجتج وماراح تلحقين تعدلين أو تغيرين شي

مها تكلم نفسها ..( بكره............! ملجتي بكره).. والله اني نسيت .. يارب ارحمني

عنود: بتفتحين والا لا

مها قامت افتحت حق عنود لأنها مب فايقه لحنة عنود وأمها اللي بتتنرفز لودرت انها ماجربت الفستان

ولبسته.. كان وااايد حلو عليها..

عنود: كنت حاسه انه بيطلع يجنن عليج

مها: تسلمين

عنود: هذا شكل وحده بتتزوج بكره.. على الأقل ابتسمي

مها: الله يخليج مالي خلق

عنود: زين طلعي خلي أمي تشوفه

مها: لامايحتاج.. بتشوفه بكره

عنود: براحتج..أنا باروح أقيس اللي شريت

في يوم الملجه..

حطوا ليتات الأعراس من الظهر على بيت مها.. وهم يركبونها كان محمد راجع من برا وشافهم..

وحس انه كل شي داخله انكسر خلاص.. اللي تمناها اليوم بتكون لغيره.. وماتحمل يشوف بيتها ..

رجع شغل سيارته وراح لعبدالله.. وقرر انه يقعد عنده لين آخر الليل.. وبلغ أمه انه مشغول ومايقدر يحضر الملجه..

الكوافيره كانت تمكيج مها وتسوي لها شعرها.. ومها ساااكته ماعلقت.. ولا قالت هذا عاجبني أو لاتحطين لي هاللون.. حتى الكوافيره تسألها.. تقول لها سوي أي شي.. كان مبين عليها انها مب راضيه..

تحس انها مخنوووقه بس ماتقدر تبين لأحد..

لما جهزت.. دخل عليها راشد

راشد: وااااااااو.. شكلج يجنن.. بيستخف ناصر عليج

وهي نزلت راسها من غير ماتعلق..

راشد: مها.. الله يخليج .. ابتسمي علشاني أو علشان ابوي اللي كان يتمنى يشوف هاليوم

مها: أبوي ياراشد مستحيل كان بيرضى يزوجني بالغصب

راشد: واحنا بعد مانرضاها لج.. حكم القوي يامها.. وناصر ترى حليو .. وأنا متأكد انه بيعجبج..

على العموم.. أنا جيت أقول لج ابتسمي على الأقل جدام الناس.. مب حلوه يعرفون انج مغصوبه

وترى ناصر أكيد بيقعد معاج عقب ماتملجون.. يبي يشوفج ويتعرف عليج

مها: خلك معاي ياخوي

راشد: انتي تامرين

وطلع عنها.. تطمنت أكثر لأن أخوها بيقعد معاهم.. لأنها ماتبي تجابله .. تحس انها مب طايقته من قبل ماتعرفه

وانملج على مها.. وأول من بارك لها أم خالد وفاطمه وعنود.. وآخرهم أمها

ماقدرت تتمالك نفسها لما شافت أم خالد.. دموعها وقفت في عينها وتمت كاتمه .. ماكانت تبي تحسس أحد فيها

محمد في هاللحظه كان قاعد مع عبدالله وكل شوي يسأله.. تظن املجوا عليها والا للحين.. كان عنده أمل يتغير كل شي وياخذها..لكن للأسف مها خلاص صارت لواحد غيره..

ردي روحي اللي بروحي.. لاتتسلين بجروحي

والله هالدنيا ماتسوى.. مااحد ماخذ منها شي

بس أنا بلوتي بلوى.." فيك ميت وأنا حي.."

في بيت أم مشعل..

مشعل كلم مها علشان تروح الميلس تقعد مع ناصر.. ومها كانت تتنافض وماودها تشوفه.. لكن مشعل سحبها من يدها وهو يضحك عليها لأنها كانت وايد منحرجه وفي نفس الوقت مقهوره..

أول مادخلت الميلس وقف لها ناصر وانبهر فيها لأنها كانت وايد أحلى من الصور.. وقعدها يمه.. ومشعل انحرج يتم قاعد.. وطلع عنهم..,,ومها تقول بخاطرها( معليه يارشود..نسيتني.. وانت يامشعل.. ليش خليتوني معاه!) كانت معاهم المصوره تاخذ صورهم وكل ماتقول حق مها تقرب من زوجها ترتبك وتبعد أكثر.. وناصر كان جريء وكان ينفذ كل طلبات المصوره.. وهي ماتحركت من مكانها.. طلعت المصوره من عندهم.. والتفت ناصر لمها..

ناصر: ماتوقعتج جذيه.. تراج أحلى من الصور

مها: شكرا

ناصر: ودي نستعجل في حفلة الزواج.. اشرايج؟

مها: ماادري..!

ناصر: شلون يعني ماعندج مانع

مها(شتفرق يعني؟): لوسمحت لي أبي أكمل دراستي

ناصر: من جاب طاري الدراسه الحين.. زواجنا ماراح يمنعج من دراستج.. شقلتي؟

مها: اللي الله كاتبه بيصير

ناصر: حبي..

مها:!!!!!!!!!!!!!!!!!!!!

ناصر: حبي ليش ماتردين؟

مها: نعم؟

ناصر: عطيني رقمج..

مها: رقمي!

ناصر: ايه خلاص بعد انتي مرتي ولازم أتعرف عليج أكثر

مها عطته الرقم وهي مغصوبه.. وطلع ناصر ورجعت مها غرفتها.. وقبل ماتبدل ثيابها دخلت عليها أمها

أمها: اشرايج في ناصر؟

مها: عادي

أمها: شنهو اللي عادي؟ ماعجبج

مها: يمه ماادري مالحقت آخذ واعطي معاه.. وشالفرق.. خلاص صار زوجي

أمها: هذا اللي أبيه منج.. هو خلاص صار زوجج.. يعني لازم تحبينه

وطلعت أم مها.. ومها تقول في خاطرها: ( لازم...!!!! من متى الحب صار بالغصب؟)

،

لامارا · 14-03-13, 11:01 AM

الجزء العاشر

محمد مارجع بيتهم.. نام بيت عبدالله.. وأصلا مانام وعبدالله مثله.. كان طول الليل متضايق وعبدالله يحاول يلهيه وينسيه مها.. بس ماقدر..

رجع محمد البيت .. وملامح ويهه كانت متغيره.. يبين عليه التعب.. وأول مادخل شاف أمه قاعده وكانت مب مرتاحه.. تنتظره.. محمد باسها على راسها ومشى بس أمه وقفته

أمه: محمد.. تعال أبيك

محمد: آمري يالغاليه

أمه: اذا أنا صج غاليه..عيل قول لي شاللي مضايقك

محمد: مافيه شي يمه

أمه: انت ماتعودت تكذب علي.. صار لك كم يوم متغير وحتى أكل مالك نفس تاكل..وصرت تبات برا

محمد: يمه لاتحاتين ماراح أبات برا مره ثانيه وباكل عدل فديتج.. ( وباسها مره ثانيه وراح حجرته.. وأمه مازالت تتسائل.. وحست انه فيه شي بس مايبي يقول لها)

خايف أشكي وانفضح .. والناس تدري بعلتي

وخايف أسكت وانجرح.. والنار تحرق مهجتي

محمد قعد بينه وبين نفسه يقول .. أنا لازم أرجع مثل ماكنت ماابي أتعب أمي.. أدري انها ماراح ترتاح الا لين ماتعرف شفيني..

مر على ملجة مها يومين.. ومحمد يحاول يتناساها .. لكنه ماقدر .. صعبه انه ينساها وبيتهم مقابل بيته.. وكل ماراح شغله يتذكر وقفتها.. ورقتها وأدبها.. واللي ماكان يغيب عن باله أبدا .. عيونهم اللي تلاقت يوم لحقها في كارفور.. ونظرتها اللي مااستمرت ..أقل من ثانيه.. ومع ذلك خذت قلبه وشلت تركيزه..

وكل مادخل البيت يبذل أكبر طاقه علشان مايبين لأمه وأبوه شي..

ومها.. مثل حالته وأكثر.. تحاول تلهى بدراستها.. وناصر اللي كان متشوق علشان يكلمها ويتعرف عليها أكثر.. ماتدري عنه من بعد الملجه.. غير انه طرش لها كم مسج..!!

وهي نفسها مستغربه من تصرفاته!!

الساعه 11ونص في الليل .. مها كانت ترتب أغراضها للجامعه.. وبتنام لأن يومها كان طويل.. وهي كل ماتفضى تغصب نفسها على النوم علشان ماتفكر بشي..

رن جوالها.. شافت الرقم.. وكان ناصر اللي متصل.. وخلته يرن كذا مره لين مااقتنعت ترد..

مها: ألو

ناصر: هلا حياتي.. شتسوين؟

مها:!!! ولاشي كنت بنام..

ناصر: زين اني لحقت عليج.. وحشتيني..بس مب هذا سبب اتصالي

مها: عيل وشو؟!

ناصر: أنا عندي شغل برا ولازم أسافر

مها: بالسلامه ان شاء الله

ناصر: وياج ياعمري.. لأني باخذج معاي

مها: متى؟ وشلون احنا ما..... ... ... وقاطعها ناصر

ناصر: أدري خاطرج تسوين عرس .. لكني مب فاضي وماله داعي أنتظر وانتي خلاص مرتي.. وأوعدج اذا رجعنا.. بسوي لج عرس ماصار ولااستوى..

مها(وشالفايده اذا رجعنا؟): ماادري شاقول لك

ناصر: المره اذا زوجها قال لها شي تقول ان شاءالله.. وأنا كلمت أمج .. قالت هاذي زوجتك وانت حر فيها

مها..دمعت عينها: متى؟

ناصر: بعد بكره

مها: بهالسرعه.. ودراستي!

ناصر: لاحقه عليها..من الأهم دراستج والا زوجج؟ عندج يومين تقدرين ترتبين فيهم أمورج..

تصبحين على خير حبيبتي..

وسكر منها.. وهي مصدومه.. حتى ماتقدر تسوي حفلة زواج وتعزم ربعها وأهلها.. حتى لوكانت مغصوبه على هالزواج.. على الأقل جدام الناس بس!!

انسدحت ولمت المخده وقعدت تصيييييييييح بصوت مسموع وشافت صورة أبوها.. وزاد صياحها.. مااحد حاس باللي هي تحس فيه.. ولا احد بيقدر يساعدها..

،

لامارا · 14-03-13, 11:10 AM

الجزء الحادي عشر

في اليوم الثاني.. مها ماغمضت لها عين.. كانت قاعده في الصاله تنتظر مشعل..

دخل مشعل وتفاجئ من شكلها.. كان يبين عليها التعب وعيونها محمره من الصياح.. تخرع أخوها وقعد احذاها وهي تطالعه بحزن ..

مشعل: مها.. فديت عيونج يااختي شصاير؟ ليش كل هذا!

مها: طبعا قالت له عن مكالمتها مع ناصر..

مشعل: ماادري شاقول لج.. هو صج زوجج وله حق فيج بس مب هالشكل يسوي.. أنا بكلمه وبنشوف شبيصير..

مها: الله يخليك مشعل.. أهم شي دراستي.. أبي أكملها

مشعل: ان شاءالله بتكملين

وطلع مشعل وهو متنرفز من ناصر.. وفعلا كلمه لكنه ندم انه تكلم معاه..اسلوبه كان سخيف وطبعا مارضى.. مصر ياخذ مها معاه..

مشعل ماوده يكسر بخاطر أخته..بس مب على كيفه.. هي صارت في حكم زوجها..

مها كانت تنتظر مشعل على أحر من الجمر وماقدرت تروح الجامعه الا لما تعرف مصيرها..

بس أخوها بيتأخر في الشغل وقررت تتصل له.. بس ما رد عليها.. لأنه كان مشغول وبعد ثلث ساعه اتصل لها

مها: وينك يااخوي؟

مشعل: موجود فديتج بس تدرين ماقدرت أرد لأني في الشغل وكان الضابط يكلمني..

مها: كلمته؟

مشعل: ايه.. مها بصراحه هو مصر ياخذج ومايهمه العرس.. ويقول انه بيعوضج وماراح يقصر عليج في شي

وفرصه انج تسافرين وتغيرين جو..واذا تبين رايي اعتذري هالكورس وكملي دراستج بعد ماترجعين.. سامحيني ماقدرت أسوي شي

مها: يكفي انك كلمته.. خلاص مب هامني العرس ..أهم شي دراستي.. مشكور أخوي تعبتك معاي

مشعل: تعبج راحه وانا ماسويت شي علشان تشكريني

مها: أشوفك على الغدا

مشعل: ان شاءالله

محمد كان في الدوام.. ماله خلق لشي.. ويفكر شلون هالأيام اللي طافت كانت غير.. من شاف مها..

حتى احساسه وحبه للحياه تغير.. صارت حلم حياته.. ومثل مادخلت حياته بسرعه طلعت بسرعه مع انها عايشه في قلبه ومازالت شاغله تفكيره..

في بيت أم مشعل:

أم مها كانت تحن عليها تطلع تتشرى لأنه ماعندها وقت.. بتسافر بكره ولازم تاخذ لها ثياب جديده وتكشخ حق زوجها.. دخلت عليهم عنود اللي كانت راجعه من المدرسه

عنود: أشم ريحة طلعه

أمها: حتى الطلعه لها ريحه!! أختج بتروح تتشرى حق السفر

عنود: خلاص بتسافر.. حسافه كان خاطري تسوي عرس واعزم ربعي..

مها تقول في خاطرها(بس هذا اللي يهمج ياعنود)

أمها: بتستانس في السفر أكثر من العرس

عنود: زين مهوي متى مابتطلعين عطيني خبر باروح معاج

أمها: عقب الغدا اجهزوا.. مها ماعندج وقت .. خلصي شغلج اليوم

مها طالعت أمها وهزت راسها.. وطلعت

نرجع لمحمد.. اللي اتصل في عبدالله

محمد: عبود

عبدالله: آمر

محمد: أنا متضايق .. ودي أطلع

عبدالله: متى بيخلص دوامك اليوم؟

محمد: الساعه 3

عبدالله: أنا ودي أحضر فلم.. اشرايك؟

محمد: ماعندي مانع

عبدالله: الساعه 3 باكون عندك

أما عن مها وعنود.. تغدوا واطلعوا.. مها ماكان عندها وقت تروح أماكن وايد.. فالحل الوحيد انها تروح السيتي لأنه كل شي متوفر فيه.. بتلقى محلات للملابس والاكسسوارات والجواتي..الخ

ادخلوا مها وعنود السيتي.. وراحوا في طريجهم..

أما محمد.. مر عليه عبدالله ومشوا في طريجهم صوب السينما..

بس وهم ماشيين.. انتبهوا لعنود اللي كانت طالعه من المحل .. وقف محمد بمكانه ..

محمد: عبدالله.. هاذي أختها

عبدالله: واحنا شلنا فيهم.. محمد انسى وجودها وكمل طريقك

محمد: لحظه بس أشوف اذا أختها معاها.. أكيد معاها

وفعلا كانت مها ورا عنود.. بس اطلعوا وكملوا طريقهم.. مها ماانتبهت لاحد.. بس عنود شافت محمد وهي طالعه من المحل..

محمد شافها.. انتفض كل شي فيه.. ورجعت له كل الأحاسيس اللي توقع انها ممكن تتغير

وكانوا يمشون وراهم..

عبدالله: محمد الله يخليك.. البنت متزوجه

محمد: أنا ماسويت شي.. وهذا طريقنا وماراح نغيره..

بس نوصل عند اللفت بنروح فوق عند السينمات.. يعني ماراح نلاحقهم

عنود: شهالصدف.. صرنا لازم نشوفه كل مانجي السيتي

مها: من؟

عنود: وانتي ماتنتبهين حق شي.. ولد جيراننا..محمد مع رفيجه

مها: محمد.. وين شفتيه؟

عنود: واحنا طالعين من المحل.. واعتقد انه ورانا

مها تلخبطت وماعرفت وين تبي تروح .. وتفاجئت انه موجود .. توقعت انه يا في الشغل يا في البيت يعني ماتخيلته يطلع من الشغل ويتمشى..

أول ماوصلوا محمد وعبدالله عند اللفت .. وقف محمد يشوف مها لين غابت عن عينه وراح..

محمد: عبدالله.. مااحس انه لي خلق أحضر فلم.. خلنا نرجع

عبدالله: نلاحقهم يغني!!

محمد: لا طبعا .. نروح البيت أو أي مكان ثاني

عبدالله: لا بنحضر فلم.. علشان خاطري.. انسى وجودها.. بعدين بيتهم مجابل بيتكم يعني ماردك بتشوفها..

لازم تعود نفسك على هالشي..

وتم يحن على محمد لين ماوافق انه يدخل السينما

أما عن مها.. حاولت تطرد كل احساس تحس فيه تجاه محمد.. لأنها خلاص صارت لواحد ثاني

طول الفيلم ومحمد سرحان.. وأول ماطلعوا من السينما.. كان يمشي وكل شوي يلتفت يدورها.. وماشافها.. اعتقد انها راحت.. مع انها مازالت في السيتي .. قعدت في المطعم تشرب شي مع أختها.. لأنهم تعبوا من الدواره..

،

لامارا · 14-03-13, 11:13 AM

الجزء الثاني عشر

كان يوم السفر.. راشد ومشعل كانوا متضايقين علشان مها بتطلع هالشكل من غير عرس ولافرحه.. ومها وصت لولوه رفيجتها تكمل لها أوراق الاعتذار حق الجامعه.. وجهزت أغراضها

كلهم كانوا مجتمعين في الصاله.. ووصل ناصر وخذ مها ..

اخوانها وقفوا معاها عند الباب وما ادخلوا الا لما راحوا.. وكان خاطرهم مكسور على فراق أختهم.. هي كانت أحلى شي في البيت بالنسبه لهم..واللي محزنهم أكثر انها طلعت ودموعها على خدها..

مشعل: ارتحتي يمه.. راحت مها من غير حتى مانفرح فيها

أمه: وأنا شدخلني.. زوجها اللي يبيها تروح معاه.. شكنت تبيني أسوي

مشعل: ولاشي يمه.. مثل ماتعودنا عليج.. ماتسوين شي

أمه: مشعل احترم نفسك وثمن كلامك قبل ماتقوله

وطلع مشعل من البيت وهو متضايق مب عارف وين يروح.. وماكان عنده شغل..

اتصل لخالد اخومحمد..

مشعل: شلونك يالقاطع

خالد: أنا القاطع.. انا بخير.. انت شأخبارك؟

مشعل: تمام.. ماشي الحال

خالد: صوتك مب عاجبني.. فيك شي

مشعل: لا مافيني شي.. الا شأخبار محمد أحسه متغير.. شفيه

خالد: ماادري والله.. شكله تعبان هالأيام.. يمكن من الشغل

مشعل: الله يعينه

خالد: على طاري محمد.. اشرايك نتجمع اليوم في بيت أبوي.. وبالمره نشوفه

مشعل: سبحان الله.. تدري انك تقرا أفكاري.. أنا كنت بقول لك خل نتجمع في أي مكان

خالد: عيل خلاص أشوفك بعدين

مشعل: ان شاءالله

وتلاقوا بعدالمغرب في بيت بوخالد.. خالد ومشعل كانوا موجودين في الميلس..

بس محمد مادرى عنهم .. ماكان موجود في البيت.. كلمه خالد.. وقال لهم انه في الطريق

في المطار

ناصر: مهاوي شفيج أحسج متضايقه

مها: مافيني شي بس اول مره أفارق أهلي

ناصر: بتتعودين حبيبتي ..

مها: بنطول في هالسفره؟

ناصر: على حسب متى مااخلص شغلي..

مها: ممكن أسأل سؤال؟

ناصر: أكيد

مها: دام انها سفرة شغل ليش خذتني معاك؟!

ناصر: هي صج سفرة شغل وبنفس الوقت شهرعسل مره وحده.. وهالبلاد تجنن وصدقيني بتستانسين فيها

في بيت بوخالد:

وصل محمد وسلم عليه مشعل

مشعل: هلا.. شأخبارك؟ وينك ماتبين؟

محمد: موجود..انت شلونك؟

وقطعهم جوال مشعل اللي رن.. واول ماشاف الرقم..قال له لحظه لحظه

مشعل: هلا وغلا أختي.. وصلتوا؟

مها: ايه وصلنا

مشعل: حمدالله على السلامه.. شلون الجو عندكم؟

محمد.. من أول ماسمع كلمة أختي وهو مركز معاه.. ويقول في خاطره ..( ياترى أي أخت؟ ووين رايحه؟)

وسمع مشعل في نهاية مكالمته يقول: سلمي على ناصر.. وخطي بالج على نفسج

محمد.. بغى يستخف يوم سمع اسم ناصر.. لأنها أكيد مها.. زين شلون وليش سافروا.. يبي يسأل بس مايقدر)

مشعل: محمد..محمد.. أكلمك وين سرحت؟

محمد: هاااه.. لاماسرحت ..شقلت

مشعل: لا.. شكلك مب معانا لايكون تحب

محمد: أحب ..من؟ لا لا

خالد: شفيك يااخوي اليوم .. مب طبيعي؟

محمد: أنا تعبان شوي وابي أروح أنام!

مشعل: شكلك ماتبينا؟

محمد: لا والله بس دايخ

مشعل: خلاص هالمره سماح

وطلع عنهم محمد(أنا كنت طبيعي.. بس من سمعت سيرتها تلخبطت.. ليش كل مااحاول انساها .. يصير شي يرجعني لشوقي..واسرح فيها.. البنت خلاص تزوجت وراحت مع زوجها.. بس متى؟! وليش حتى ماسوت عرس؟! ودي أفهم شفيها وليش استعجلت؟!)

،

لامارا · 14-03-13, 11:15 AM

الجزء الثالث عشر

مرت الليله على مها.. مثل كل ليله.. ماكأنها متزوجه.. زوجها طلع ومارجع الاالفجر.. وهي كانت نايمه..

وقامت الصبح.. ماقدرت تنام عدل.. واستغربت انها شافته نايم احذاها لأنها ماحست بدخلته وقعدت تسأل نفسها هو ليش أصلا خذها معاه؟!.. المفروض الليله اللي طافت تكون لهم.. على الأقل هم معاريس جداد.. وكان المفروض يقعد معاها ولاحق على شغله..!!

لفت في الشقه اللي كانوا مستأجرينها.. المكان وايد حلو.. والأثاث راقي

والشقه تطل على مناظر حلوه..

دخلت تسبحت ولبست تنوره بنيه قصيره شوي مع بدي بيج.. وحطت شادو خفيف بني وتكحلت

وروج بيج.. وكان شعرها مرول بطريقه حلوه..

جهزت الفطور حق زوجها ووقظته بناء على رغبته أمس انه يقوم الساعه 9ونص.. بس ماقام الاالساعه عشر..

وبدل ثيابه وكشخ وتعطر.. وطلع غرفة الطعام.. لقى أحلى فطور ينتظره..

ناصر: ماشاءالله .. من وين كل هذا؟

مها: كلمت البواب وجاب لي كل اللي وصيته عليه

ناصر: انتي خوش مره.. وباسها

مها: ابتسمت له.. وقعدت احذاه

ناصر: حبيبتي اسمحي لي على اللي صار أمس.. المفروض انه يكون يومج بس بعوضه لج اليوم

مها: ماصار شي..

ناصر: عندي بس شغله صغيره.. أخلصها واجيج.. بنتغدى برا..

مها: ان شاء الله

خلص أكله وطلع.. واتفق معاها يجي يلقاها جاهزه للطلعه

وتأخر على موعدهم ثلث ساعه بس المهم انه وصل.. خذ مها واطلعوا

مها كانت لابسه أزرق سماوي.. وشيلتها فيها أزرق خفيف.. ومحتشمه بحجابها

ناصر: ليش ماحطيتي مكياج؟

مها:!!!!! لأني كاشفه

ناصر: مهاوي .. اخذي راحتج احنا في بلد غريب

مها: شلون يعني؟

ناصر: يعني حطي مكياج ورخي الشيله شوي

مها: احنا صج مب في بلدنا.. لكن رب العالمين واحد ويحاسبنا في كل مكان..

وانا مااحب اسوي شي يغضب ربي

ناصر: أنا ماقلت لج اغضبي الله.. أنا قلت بس تمدني شوي

مها: وهذا التمدن في نظرك!

ناصر: خلاص يامها سكري الموضوع.. توقعتج مثل أختج

مها: وشفيها العنود؟

ناصر: مافيها شي.. بالعكس تصرفاتها تعجبني..

مها: تعجبك! وليش خذتني أنا؟

ناصر: أهلي اختاروج .. بعدين انتي الكبيره مب هي

مها: الله يخليك.. رجعني الشقه

ناصر: بس احنا طالعين نتمشى

مها: وأنا أبي أرجع.. راسي يعورني

ناصر: ماتوقعتج جذيه

مها: وشلون توقعتني؟

ناصر: مب وقته.. بنتغدى ونرجع

مها كانت تفكر وماقدرت تاكل .. ولاحطت عينها بعينه.. تقول بخاطرها تفكيري يختلف عن تفكيره.. وماصار لي يومين معاه ومااتفقنا .. عيل شلون لوعشت معاه العمر كله.. والمصيبه انه يقارنني بأختي.. ليش؟ واذا هو يحب هالنوع من البنات .. ليش اقترن فيني .. وكانت طول الوقت حابسه دموعها في عيونها وودها لوالزمن يرجع وترجع أيامها الحلوه تحت ظل أبوها.. اللي مااحد بيعوضها مكانه!

أول مارجعوا الشقه.. رن تلفون ناصر.. وراح بعيد عنها.. ماقدرت تسمع مكالمته

وطول عليها..

هي دخلت الحجره وبدلت ثيابها وانسدحت.. ومن غيرماتحس بنفسها من كثر ماصاحت

نامت من التعب..

في بيت أم مشعل

أم مشعل حست بشي غريب.. طلعة مها كانت لها تأثير على البيت كله..

صار هدوء وملل.. مااحد يسأل عن الثاني.. مها اللي كانت تجمعهم.. وتسأل عن كل واحد فيهم

ومع ان أمها قاسيه عليها الا انها كانت دايما ترضيها..

عنود: شعندها أم مشعل سرحانه؟

أمها: ماعندي شي.. بس مها ماتصلت فيني.. كلمت مشعل بس

عنود: أكيد أول ماتلقى فرصه بتتصل..

أمها سكتت.. وهي حاسه انه مها هالمره ماتبي تكلمها.. لأن اللي صار مب شوي فيها ويكفي انها قطعت دراستها وماسوت عرس.. صج ان أمها ماتعاملها عدل وهي بنفسها مب عارفه السبب! يمكن لأنها كانت تحس انها تحب أبوها أكثر منها.. بس بعد هذا مب تبرير لتصرفاتها..

.. بس هي ترتاح في وجود مها.. لأنها مخففه عنها حمل البيت كله ..

نرجع لمها اللي فزت متخرعه.. واستغربت انها نامت.. مع انها ماخذت ساعتين..

وناصر وين كان.. وتذكرت انه كان يتكلم.. واكيد طلع لما شافها نامت

وطلعت من الغرفه..

وقفت في الممر اللي يودي للصاله.. لأنها سمعت صوت ناصر يتكلم .. مع من يتكلم ياترى..

كانت بتدخل عليه بس تجمدت في مكانها لما سمعته يقول

ناصر: بس انتي السبب حبيبتي.. وانا ماجبتها معاي الا علشان أقهرج مثل ماانا انقهرت

......أمي مالها دخل يانوف انتي اللي كنتي متردده.. مع انج متأكده من حبي لج

مها حست انه رجلها انشلت وماقدرت تتحرك من مكانها..انتبه ناصر لصوتها لأنها كانت تصيح بصوت مسموع..

وسكر الخط علطول وقام لها..

ناصر: مها.. شفيج حبيبتي؟

مها: لاتقول حبيبتي..

ناصر: انتي من متى واقفه؟

مها: شل يدك عني.. أنا أكرهك.. وأنا بعد تزوجتك غصب

ناصر: انتي اهدي الحين وبنتفاهم بعدين

مها: مافيه بعدين..أنا ماابيك

ناصر.. حس انه ظلمها معاه.. وانكسر خاطره لما شاف دموعها.. توه مكتشف انه عذبها..

دخلها الغرفه.. وقعد احذاها وهي معطته ظهرها يطالعها وهي تبكي .. وتترجاه انه يطلقها

ناصر: أرجوج مها.. عطيني فرصه أخيره.. واوعدج اني انسى كل شي ونوف هذي ماراح

يكون لي صله فيها.. بعيش معاج.. انتي وبس

مها بصوت مكسور: أنا ماابي أعيش معاك.. طلقني أرجوووووك

ناصر: بس احنا ماكملنا اسبوع.. شبيقولون عنا الناس

مها: مايهمني.. أبي أتطلق وبس

ناصر: مها..أمي تنتظرنا نرجع علشان العرس وقاعده تجهز بيتنا

مها: خل بيتك لك ولحبيبتك

ناصر: انتي متضايقه الحين.. وهالموضوع لازم تفكرين فيه (وحط يده على شعرها)

مها: شيل يدك عني.. توك تذكرت انه عندك مره.. طلقني ياناصر.. ابي ارجع لأهلي

ناصر: خلاص باروح أشوف الحجوزات ونرجع.. بس اوعديني انج تفكرين

مها: أوعدك.. بس أبي أرجع

وطلع عنها ناصر.. وحاول يلقى حجز بس مافيه الا بعد اسبوع

الموظف: للأسف ماعندنا حجز لبكره ولابعده.. يمكن بعد اسبوع

ناصر: بس عندي حاله طارئه ولازم ارجع واحنا شخصين بس وبعطيك زياده بس تصرف

الموظف: المشكله انه ماعندي حجز.. لوجيتني أمس كنت باحجز لك على طيارة اليوم

ناصر: ومتى طيارة اليوم؟

الموظف: الساعه 7ونص

ناصر: يعني فيه وقت.. شوف لي طيارة اليوم

الموظف: فيها 3اماكن شاغره

ناصر: خلاص.. احجز لي مكانين

الموظف: متأكد؟

ناصر: ايه

ورجع ناصر الشقه.. ولقى مها نايمه.. وقعد يتأملها.. أول مره ينتبه لها ويدقق فيها.. كان شكلها وايد حلو وهي نايمه.. بريئه.. هاديه.. وقف يطالعها لين انتبه على خدها اللي مازالت عليه دمعه ماجفت.. وقرب منها ومسح دمعتها بكل خفه.. لكنها حست فيه وفزت من نومها..

ناصر: ماكنت اقصد ازعجج حبيبتي

مها: شسويت

ناصر: اوه نسيت.. ماعندنا وقت.. لازم نجهز أغراضنا الحين وبلغها بموعد السفر

مها: ماشاء الله لقيت حجز والليله بعد

ناصر: هذا كله علشان تعرفين اني جاد في كلامي.. وبتغير .. لاتنسين انج وعدتيني تفكرين

مها ماردت عليه وقامت جهزت أغراضها.. وبدلت ثيابها وكأنها ماصدقت ترجع لديرتها..

في الطياره.. وبما ان الطريق طويل.. ناصر قعد يكلم مها عن طفولته ودراسته وعن نوف وشلون عرفها وانه ماكان يبي يتزوج غيرها .. وأمه تبي تفرح فيه وماكانت راضيه انه يتزوج وحده كانت تكلمه قبل الزواج.. مع انها مب متزمته وايد.. الا انها قالت له مثل ماكلمتك بتكلم غيرك.. وحتى يوم حاول يقنع أمه نوف ترددت!!!

ومها كانت تعلق تعليقات صغيره وخلته يفضفض من غير ماتناقشه وحست انهم الاثنين انغصبوا على هالزواج

ووعدها انها لوفكرت وسامحته.. بيكون لها طول العمر.. لأنه فعلا بدا يحبها.. !!

،

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري