11-12-13, 10:24 AM
| #21 | ||||||||
| مراقبة عامة ومشرفة منتدى الروايات المنقولة  
|  " الفصل العاشر " في عيادة دكتور الاسنان....  شمة:دكتور تكفى شوي شوي علي.. الدكتور(ابتسم):لاتحاتين الابرة مابتخليج تحسين بشي..(مسك الابرة) شمة:دكتور.. الدكتور:شمة خلينا نشوف شغلنا..ياللا.. شمة(استسلمت ودخل الدكتور الابرة وتحركت شمة شوي) الدكتور:خلاص خلاص (حط الابرة)..كل شي اوكي..شوي شوي مابتحسين بشي.. راشد:ماادري يادكتور ليش الناس تخاف من دكاترة الاسنان؟ الدكتور(يلتفت له):والله شاقولك يادكتور راشد يجوني أطفال مايخافون (يطالع شمة) وفي كبار يخافون..(ييود مكان البنج)...تحسين بشي؟ شمة:اي شوي.. راشد:بتخلص لها اياه في جلسة وحده؟ الدكتور:لا بخليها على جلستين..(ييود مكان البنج مرة ثانية)..تحسين بشي؟ شمة:اي.. الدكتور:شمة صج ولا تبين تهربين؟ شمة:لا والله صج.. الدكتور:اوكي بننتظر..اخبار الشغل معاك يادكتور راشد؟ راشد:الحمدلله.. الدكتور:تاخذ مناوبات؟ راشد:كنت في البداية..عقب بديت اشتغل بالعيادات الخارجية..وعقب خف دوامي صرت آخذ جم يوم بالعيادات وجم يوم مناوبة.. الدكتور:كل هذا وتقول خف؟ راشد:بالنسبة حق قبل اي.. الدكتور:واشلون الدكتور فارس؟ راشد:الحمدلله..تزوج.. الدكتور:صج..بالمبارك.. راشد:الله يبارك فيك.. الدكتور(ييود مكان البنج):تحسين بشي؟ شمة(بخوف):لا الدكتور:اوكي الحين بنبتدي شغل واذا حسيتي بألم قولي لي..اتفقنا؟ شمة:اتفقنا.. في الجامعة .... وديمة تطلع من المحاضرة ومعاها رفيجتها سوسن.... وديمة:سوسن فهمتي على الدكتور؟ سوسن:شوي..مابعرف من وين بجيب هالمعلومات.. وديمة:يحسب كلنا مثقفين مثله.. سوسن:الله يكون بعونا.. وديمة:أقولج خلنا نروح المكتبة باجر الصبح علشان نستعير كتابين حق البحث.. سوسن:طب شو فيها لو دورنا بالانترنت؟ وديمة:اشفيج انت ناسية الدكتور قالنا ابي كتب المكتبة وماابي اي بحث من الانترنت.. سوسن:أفف منو.. وديمة(يرن تليفونها):ياللا انا ماشية سيارتي برع.. سوسن:بااي.. وديمة:بااي..(تركب السيارة)..السلام عليكم. خالد:وعليكم السلام والرحمة.. وديمة:خالد ممكن توديني المكتبة ابي اشتري شي.. خالد:اي مكتبة؟ وديمة:اي مكتبة ان شاء الله القريبة من البيت.. خالد:اي بس المكتبات مسكرة هالحزة.. وديمة:يوووه..انزين خلاص نرد البيت.. خالد:ماتبين شي ثاني؟ وديمة:لا بس ارد البيت وارقد.. في بيت بوفهد....شمة وراشد يدخلون البيت..... راشد:السلام عليكم.. بوراشد:وعليكم السلام.. راشد:وين امي؟ بوراشد:في المطبخ..ايش سويتوا؟ راشد:شالها العصب.. شمة:بروح ابدل.. بوراشد:وليش ماوديتها المدرسة؟ راشد:خلص دوامهم.. ام راشد(جات):قوة يمه.. راشد:الله يقويج.. ام راشد:عيل وين اختك؟ راشد:راحت تبدل.. ام راشد:لعوزتك؟ في الشركة..... راكان:فهد ليحين داخل؟ علي:اي نعم طال عمرك.. راكان:في حد عنده؟ علي:لا.. راكان(دخل حصل فهد عينه بين الاوراق والكمبيوتر):فهد.. فهد(عينه بالشغل):نعم؟ راكان:ايش قاعد تسوي؟ فهد:شغل.. راكان:انزين ايش قاعد تسوي؟ فهد(يطالعه):ايش تبي؟ راكان:ماتشوف الساعة كم؟ فهد:ادري.. راكان:انزين ماانت راد البيت؟ فهد:بعدين.. راكان(قعد):فهد طالعني شوي.. فهد(رفع راسه) راكان:ممكن تقولي باللي تفكر فيه.. فهد:انا قلت لك.. راكان:بس شكلك قاعد تخطط حق شي ثاني.. فهد:راكان ممكن تخليني اشتغل بهدوء..لخلصت صدقني بقولك.. راكان:على راحتك ماني جابرك..بس السكرتير بتخليه ينتظرك؟ فهد:اووه نسيته..خلاص وانت طالع قوله يروح.. راكان:بتقعد بروحك؟ فهد:عادي.. راكان:انزين ماتبي اجيب لك شي؟ فهد:لالا مشكور.. قاعدة بغرفتها ومنسدحة على السرير...وتتصل في ليلى.... وديمة:وين ريلج؟ ليلى:ليحين مارد من الدوام.. وديمة:انزين سمعي أبيج بسالفة.. ليلى:خير؟ وديمة:ايش سالفة خالد؟ ليلى:اشفيه خالد؟ وديمة:ماادري احسه متغير..مو خالد الاولي لهالدرجة طيحتي غيرته ولا ابوي قايله شي؟ ليلى:اشلون يعني تغير؟ وديمة:ماادري بس احس ان تصرفاته تغيرت.. ليلى:خالد مافيه الا العافية يتهيأ لج..يمكن عنده مشكله بشغله..لاتحاتين الريال بخير..هو وينه فيه؟ وديمة:تحت..بداره.. ليلى:جدتي وخالي متى بيردون؟ وديمة:اليوم ان شاء الله العصر بيروح خالد مع السايق يجيبونهم من المطار.. ليلى:خلاص انا بعد بس يرد بوخالد بغديه وبييكم..تبين شي اجيب لج معاي؟ وديمة:لا ماابي شي.. في غرفة شمة وشيماء....  شمة:قولي لي ايش سويتي في المدرسة؟ شيماء:فاتج اليوم شموه ماتدرين ايش صار.. شمة:ايش صار شوقتيني.. شيماء:أبلة الشرعية تهاوشت ويا أبلة الرياضيات.. شمة:اشلون؟ شيماء:وحدة تقول هذي حصتي والثانية لا حصتي..شوي وبيتضاربون واحنا ميتين ضحك..صج كان وناسة نص الحصة ضاعت وعقب الهواش طلعت الحصة رياضيات جان حسينا بخيبة أمل على الاقل حصة الشرعية نقدر نلعب عليها بس الرياضيات من يقدر عليها.. شمة:واي وناسة..عاد ابلة الشرعية كلش مايي عليها تتهاوش..وشنو صار؟ شيماء:تعرفين سميرة ودينا؟ شمة:اي اعرفهم اشلون مااعرفهم.. شيماء:حصلتهم الادارة قاعدين في الحمام يسولفون.. شمة:قلة الاماكن.. شيماء:انا ادري عنهم.. شمة:وايش سووا فيهم؟ شيماء:ماادري بس اللي سمعته ان المديرة مسحت فيهم الارض.. شمة:وبعد ايش صار؟ شيماء:اليوم وقفتني أبلة العربي.. شمة:ليش؟ سلطان يحصل الباب مفتوح وسمع آخر جملة..ووقف.... شيماء:علشان هي قالت لي ياشيماء انت تتكلمين وايد..وتشغلين البنات عن الدرس..قلت لها ابلة شسوي متمللة..الا تعصب علي وتقولي انا درسي ممل..طيب قومي وقفي طول الحصة..قلت لها وانا اضحك وناسة على الاقل تغيير جو.. شمة:شيوم ايش سويتي فيها؟ شيماء:طلعت لها قرون..كانت وايد معصبة..عقب الحصة راحت عند الاخصائية وقالت لها وشوي الا ينادوني..الاخصائية قعدت تسألني ليش لساني طويل..قلت لها أبلة مب بس انا اللي كنت اسولف بس ابلة العربي ماادري اشفيها علي انا بالذات مع ان والله ماعمري سويت لها شي..قعدت تقول جم كلمة ومشتني.. سلطان(يدخل ويصفق):ماشاء الله عليج..بارك الله فيج..والله انج تبيضين الوجه ياشيماء..ان ماخبرت ابوي مااكون سلطان.. شيماء:روح انزين قوله اللي تبيه.. شمة:سلطان اذا مايلعوز مايكون سلطان.. سلطان:انت الزمينا بسكوتج يالخوافة..صبري يالمياء.. شيماء(عصبت):لاتقول لمياء.. سلطان(يضحك):أقول لمياء انتظري هواش الليلة.. يردون من الحج الجدة وعيسى....بوخالد يلتقي بخالد عند الباب.... بوخالد:خالد انتبه ترى وديمة قاعدة تلاحظ عليك تغير في تصرفاتك.. خالد:تغير؟!! بوخالد:اي ليلى قالت لي ان وديمة اتصلت فيها وسألتها عنك.. خالد:وانت قلت حق ليلى؟ بوخالد:شسوي انت تدري يوم اختك تحن وبعدين هي كانت خايفة عليك.. خالد:......... بوخالد:ايش بتسوي؟ خالد:ولاشي..انتظر الوالد يتصل فيني علشان اشوف متى احجز لها.. بوخالد:وبتحجر لها؟ خالد:دام ابوي طلب مني خلاص مااقدر ارفض هذا امر.. في الصالة.... الجدة:اشلونج يمه وديمة؟ وديمة:بخير جدتي اشتقت لج وايد.. الجدة:حتى انت دوم انا بسيرتج عند خالج كل يوم افكر فيج شيتسوين.. وديمة(تصيح) الجدة:بسم الله عليج الرحمن الرحيم..اشفيج يمه؟ عيسى:وديمة اشفيج خالد مسوي فيج شي؟ وديمة(قامت وراحت غرفتها) الجدة(بكل اهتمام):ليلى وديمة اشفيها؟ ليلى:ماادري ياجدتي مع انها الظهر كلمتني وماكان فيها شي.. خالد(جى):اشفيكم؟ عيسى:انت مسوي في وديمة شي؟ خالد:لا..ليش؟ عيسى:قامت من هني وهي تصيح.. خالد:تصيح؟!! ليلى(قامت):بروح اشوفها.. دخلت غرفتها...وقعدت وياها على السرير.... ليلى:وديمة اشفيج؟ وديمة:مافيني شي.. ليلى:الا فيج شي.. يرن تليفون خالد..... خالد:السلام عليكم......هلا يبه.....بخير الله يسلمك انت اشلونك؟ بوسلمان:احنا بخير..اخبار وديمة؟ وديمة:الحمدلله هي بخير.. بوسلمان:وتاخذ ادويتها؟ خالد:اي.. بوسلمان:جدتك وخالك ردوا؟ خالد:اي نعم ردوا.. بوسلمان:حجزت حق وديمة؟ خالد(مابغى يسمع هالسؤال):لا.. بوسلمان:ليش ايش تنتظر.. خالد:متى تبيني احجز لها؟ بوسلمان:شوف اقرب طيارة واحجز لها.. خالد:وعادي تسافر بروحها؟ بوسلمان:اي عادي لأن ماكو حد يرافقها.. خالد:خلاص اللي تشوفه......ان شاء الله باتصل فيك...مع السلامة.. عيسى:خالد تبي تحجز حق من؟ خالد:وديمة.. الجدة:ليش؟؟ خالد:ابوي يبيها تروح لهم.. الجدة:تروح لهم؟؟ عيسى:شالي تغير؟؟ الجدة:خالد صاير شي؟ خالد: بس وديمة تعبت شوي وابوي مصر الا انها تسافر لهم ويتطمن عليها.. الجدة:ايش صار فيها؟ خالد:السكر نزل عندها.. عيسى:علشان جذي كانت تصيح؟ خالد:لا هي ماتدري بهالسالفة.. في الغرفة..... وديمة:ماادري انا احس ان خالد فيه شي بس مايقول.. ليلى:يابنت اخوج مافيه شي..هذا صوت خالد..بروح اشوفه.. ونزلوا تحت.... خالد:وديمة اشفيج؟ وديمة:مافيني شي.. خالد:عيل ليش كنت تصيحين؟ وديمة:مافيني شي.. خالد:انزين ابي اقولج شي.. وديمة:شنو؟ خالد:ابوي من شوي اتصل..(ليلى خايفة ان خالد بيقولها)..ويبيني احجز لج علشان تسافرين لهم.. وديمة:اسافر لهم؟!!...انت ايش قاعد تقول؟؟ خالد:هذا اللي قاله ابوي..وانا بروح باجر وبشوف اقرب طيارة لج.. وديمة:انت ايش قاعد تخربط..ومن اللي قال اني بسافر لهم؟ ليلى:ابوي ياوديمة يبي يتطمن عليج ويبي يشوفج.. وديمة:لا ياليلى انا متأكدة ان ابوي يفكر بشي ثاني..(قامت)..انا مستحيل اسافر لهم..وقول حق ابوي اللي في راسه ماراح اسويه.. خالد:وديمة انت ملزومة تسمعين كلام ابوي.. وديمة:ماني رايحة واللي تبيه ياخالد سوه.. وديمة تركتهم وراحت دارها.... الجدة:خالد يمه ليش قلت لها؟ خالد(قام):جدتي رجاءا محد يقولي شي توج سامعة ابوي متصل فيني ويبيني احجز لها.. ليلى:انزين انت وين رايح؟ خالد:بروح ارتاح تعبان.. راح غرفته.. الجدة:وعليه عليج يابنيتي..ماادري اشفيهم امها وابوها.. عيسى:الحين وديمة بدت الدراسة ليش يخربون عليها بنص الطريج.. ليلى:والله ماادري ياخالي..الظاهر ابوي وايد يحاتيها.. خالد يطلع من الغرفة ويكون لابس.... الجدة:يمه خالد وين رايح؟ خالد:طالع شوي..واذا تأخرت لاتحاتون..مع السلامة.. عيسى:بتطلع بروحك؟ خالد:واحد من الربع بيمرني..مع السلامة.. الجميع:مع السلامة.. عيسى:اشفيه خالد اليوم شكله متضايق.. ليلى:يمكن تعبان شوي من ريوله.. في السيارة..... محمد:وين تبينا نروح؟ خالد:ماادري اي مكان..بس تحرك.. محمد(استغرب) الجو كان هادي...خالد لعب بالرديو لين ماحط على اغنية كان دايم يحب يسمعها من يوم ماصادته مشاكل بحياته..وكل مايسمعه كل مايحس بضيقة اكثر..ومحمد حس ان هالاغنية مضايقته اكثر..غيرها وحط على اذاعة قرآن... خالد:ليش غيرت؟ محمد:القرآن احسن.. خالد:وين رايح؟ محمد:ماادري..انت ماقلت وين تبنيا نروح.. خالد:وين أحمد؟ محمد:أحمد قاعد في الكوفي شوب مع عبدالله.. خالد:وانت ليش مب قاعد وياهم؟ محمد:كنت مودي الوالدة بيت خالتي وعقب انت اتصلت فيني قلت امرك ونروح لهم.. خالد:انزين روح لهم.. فهد يدخل البيت مايحصل حد قاعد شاف الساعة 10 ونص ماتوقع انه كان قاعد كل هالفترة في الشركة...سمع صوت تلفزيون يوم قرب من الجلسة حصل راكان قاعد يطالع برنامج وثائقي.. فهد(حط المفاتيح في مخباته وقعد وحط التليفون على الطاولة):مساء الخير.. راكان:مساء النور..جنك تأخرت؟ فهد:اي شوي..ماانتبهت ان الوقت تأخر الا يوم دخلت البيت.. راكان:وشالي خلاك ترد البيت؟ فهد:نعست.. راكان:انزين ايش سويت؟ فهد:في شنو؟ راكان:ليش قاعد لهالحزة؟ فهد:خلني ارتاح والصبح ان شاء الله لي قعدة معاك..(قام) راكان:جوعان؟ فهد:اي.. راكان:بقول للطباخ يزهب لك العشاء.. فهد:الطباخ ليحين قاعد؟ راكان:امي ماخلته يرقد لين مايعشيك.. فهد:يحليلها الوالدة.. راكان(قام):بروح اقول للطباخ يزهب لك العشاء وانت بدل ملابسك.. الصبح.... شيماء وشمة جاهزين ويركبون السيارة مع عيسى..ويوصلون المدرسة ويدخلون ويسلمون على البنات وشوي يبتدي الطابور..وعقب الطابور يدخلون صفوفهم.... شمة:الابلة تأخرت.. شيماء:عساها ماتجي..فراقها عيد.. أمل:هذي ماتغيب لو فيها القلب تحضر.. تييهم الضابطة.... الضابطة:وين الابلة؟ شيماء:ماندري.. الضابطة:من عليكم؟ وضحة:احتياط ياابلة.. الضابطة:من عليكم؟ وضحة:أبلة التاريخ.. الضابطة:من ابلتكم؟ شيماء:أبلة فوزية.. الضابطة:انا ماشفتها على الطابور..روحي ياوضحة شوفيها موجودة ولا لا.. وضحة(بمكر):ان شاء الله.. تروح الادارة وترد..تشوفها من بعيد الضابطة وتسألها..... وضحة:الابلة غايبة.. الضابطة ومن عليكم؟ وضحة:أبلة الرياضيات.. الضابطة:ناديتيها؟ وضحة:اي.. دخلت الصف.... شيماء:وضوح من قالج ان ابلة التاريخ غايبة؟ وضحة:حبيبتي هذا بس حجي علشان نمشيها..ولا ابلة التاريخ موجودة وابلة الرياضيات الحين بتيي وبتشوفون ايش بيصير.. شمة:ايش ناوية عليهم؟ وضحة:كل شي في وقته حلو.. تدخل مدرسة الرياضيات..وتسلم..وشوي تدخل مدرسة التاريخ..... مدرسة ر:في حاجة؟ مدرسة ت:حصتي.. مدرسةر:نعم يااختي؟ مدرسة ت:انا كل اثنين عندي الاولى في ثاني ادبي 3.. مدرسة ر:ياحبيبتي الادارة مخبراني انو عندي حصة هنا.. مدرسة ت:انت غلطانة..انا متأكدة وتقدرين تروحين الادارة وسألي.. مدرسة ر:انا مش خارجة مكان انت عاوزة تروحي تتأكدي براحتك..ممكن دالؤتي تروحي علشان عاوزة اشرح الدرس.. مدرسة ت:نعم؟!! شيماء(بصوت واطي):الحين بيتهاشون.. وضحة:مب انتي مابغيتي الاولى..خلاص هذولا الحين بيتهاوشون وعقب بيروحون الادارة علشان يتأكدون وعقبها بتخلص الاولى..ايش رايج فيني؟ شيماء:والله مب هينة انتي.. فهد ينزل تحت وهو لابس يحصل امه وابوه وراكان يتريقون.... فهد:صباح الخير.. الجميع:صباح النور.. ام فهد:تأخرت يمه في النوم.. فهد:لأني امس كنت سهران ومن التعب ماحسيت بعمري ورقدت بزيادة اليوم..(يقعد)..يمه وين الخدامة؟ ام فهد:اي وحده فيهم؟ فهد:اي وحده المهم وحدة تروح تلم اغراض هبة من الغرفة ابي ارد من الدوام ماابي اشوف شي في الجناح وعقب باتصل في مركز خيري ياخذون طقم الغرفة.. بوفهد:ليش هذا كله؟ فهد:بس..(قام)..ماابي اشوف شي يخصها في هالبيت.. ام فهد:وين رايح؟ فهد:بروح الشركة..راكان تعال بسرعة لأني ابيك..مع السلامة.. بوفهد:راكان فهد ماقالك شي؟ راكان:لا..كل مااسأله مايتحجى..(قام)..بس اليوم لازم اعرف باللي يخطط له..مع السلامة.. ام فهد:اقولهم يسوون اللي قاله فهد؟ بوفهد(قام):اللي يقوله فهد سووه.. ام فهد:من غير ماتعرف ليش؟ بوفهد:فهد ياموزة ماينخاف عليه..أكثر واحد يعرف مصلحته ومصلحة غيره هو فهد.. ام فهد:رايح الشركة؟ بوفهد:بالاول بمر مكان وعقب بروح الشركة..مع السلامة.. ام فهد:مع السلامة.. في ماليزيا...  وتحديدا في إحدى شواطئها شيخة وفارس يفصخون الجوتي ويمشون على الشاطئ ونسمات الهواء اللي تطاير اوراق الشجر.. شيخة(تضحك) فارس:ايش رايج؟ شيخة:ماشاء الله عليك.. فارس:ايش رايج نقعد؟ شيخة:نقعد.. قعدوا على الرمل... فارس(كتب على الرمل احبج) شيخة(كتبت تحته احبك) فارس:شيخة انت مستانسة؟ شيخة:وايد بشكل ماتصور..ماكنت متوقعة اني بستانس هالكثر وياك.. فارس(شاف موجة البحر اللي تقرب):تعرفين ياشيخة ان احنا كلنا ساكنين ويابعض في بيت واحد.. شيخة:اذكر انك قلت هالشي من قبل..بس من غير التفاصيل.. فارس:ابوي مايحب حد يروح بعيد..تمينا فترة ابعاد عن بعض لأن اخوي تميم قرر يتزوج وراشد طلع من البيت علشان عياله كبار شباب ماشاء الله..وراح يعيش في بيت معطينه المستشفى..ابوي ماقدر على فراق راشد وعياله..فقرر يبني فيلا عودة في ارضه..وهذي الارض جنبها ارض راشد..بنينا هالبيت على اساس انه يكون حق طول العمر ولاحد يحتاج يطلع منه يوم..ارض ابوي اكبر من ارض راشد..راشد بنى في ارضه فيلا حقه وحق عياله لأن عيسى مابقى له شي الا سنة ويتخرج من الجامعة وسلطان سنة ويتخرج من الثانوية فمرتب عمره..وتميم وزوجته لهم بيت فيلا أرضية ورى بيتنا..واللي بيتم في البيت وياامي وابوي انا وانت وعيالنا ان شاء الله..فهم يحبون ان احنا نكون حولهم على الاقل بحياتهم يبون يشوفون قلوبنا على بعض نتساعد في الشدة..مايبينا نفترق لا بالقلوب والا بالاجساد.. شيخة:يحليلهم.. فارس:انا يمكن ماسألتج اذا كنتي تحبين تعيشين ويااهلي في بيت واحد..ولاابي اسألج ألحين..ودي تعيشين معاهم شوي وعقب تقررين اذا تقدرين تكملين ولا لا..جربي وعقب قرري..ترى حتى حريم اخواني طيبات..واي شي بغيتي منهم تراهم مايقصرون..وخواتي شيماء وشمة عايشين حياتهم غير عنا شوي..عليهم شطانة شوي..حتى ابوي وامي دايما يتناجرون معاهم تدرين جيلهم غير عنا..بس تراهم خدومين..وراشد اخوي صديق عمري..هو اللي علمني على درب الدراسة..انا كنت كسول في الدراسة هو ساعدني وايد ..وحبيت مهنة الطب منه..علشان جذي دخلت الطب..وتميم اخوي صحيح مرات يحب يقعد بروحه بس هو بعد ضحى بوايد اشياء بحياته علشان البيت.. شيخة:ماشاء الله عليكم..الله يخليكم حق بعض.. فارس:آآمين.. شيخة:وشنو تخصص اخوك راشد؟ فارس:اخوي راشد استشاري جراحة عامة مثلي..دكتور له مكانة كبيرة في المستشفى وناجح بعمله وايد.. شيخة:ماشاء الله عليه.. فارس:وانا اخترت الجراحة العامة مثله..وقاعد احاول استفيد من تجاربه.. شيخة:وانا بساعدك يافارس علشان تصير مثل اخوك.. فارس(ابتسم):كلميني عن اهلج.. شيخة:هلي..انت تدري ان ماعندي غير فيصل..فيصل توأمي نختلف كثير ونتهاوش كثير لكن عقب ماسافر مكانه يبين وايد واشتاق حتى حق هوشته..لكن الله يوفقه وين مايكون..امي فديت قلبها هي كل شي بحياتي..كل شي بحياتي اقولها اياه..قصصي في الجامعة وحياة ربعي ودراستي كلها عند امي..حتى مشاعري اتجاهك كنت اقولها حق امي..احبها وايد..فديت عمرها ماقصرت معاي..كان وايد صعب عليها اني اطلع من البيت خاصة ان فيصل مش موجود.. فارس:الله يخليها لكم.. شيخة:آمين..وابوي فديته صج ان طول وقته بالشغل لكنه يحب يسولف معانا وايد ويتغشمر وحتى لما يكون تعبان يطلعنا ندور ويسفرنا بعد..وبعدين انا احب ابوي وايد لأنه اختار امي.. فارس(ضحك) شيخة:من صجي.. فارس:يحليلج.. شيخة(انحرجت) فارس:اشفيج سكتي..كملي كملي.. شيخة:ورفيجة عمري وطفولتي وديمة بنت خالي..كنا مع بعض من ايام الدراسة في المدرسة لين مادخلنا الجامعة وتخصصنا واحد..بس هي دخلت قبلي بكورس علشان التوفل..وايد ألعب وياها اتغشمر العب على اعصابها ويوم تكون مريضة او مرقدة في المستشفى احس ان نصي الثاني مفقود..واتضايق على حالها يوم تتدمر علشان المرض والابر اللي تاخذها كل يوم..نفسيتها وايد تأثر عليها.. فارس:من متى وهي فيها السكري؟ شيخة:من ثلاث سنين تقريبا.. فارس:ومن شنو صادها؟ شيخة:ماادري..بس يقولون مرة وحدة تعبت وودوها المستشفى وطلع معاها السكري..وخالي وايد تضايق على حال بنته يوم يشوفها تصيح وتقول ماابي اتعالج..تعب معاها وايد لين شوي شوي حاولت انها تمشي حالها مع العلاج..حتى خالي صار وايد يخاف عليها ويحاول يلبي لها كل مطالبها بس علشان يشوفها مرتاحة ومستانسة..صج مرات كان يعصب عليها لأنها ماكانت تسمع الكلام بس شيسوي.. فارس:خالج دكتور صح؟ شيخة:اي نعم دكتور.. فارس:دكتور وشو؟ شيخة:دكتور عظام..وجاته دورة في ألمانيا لمدة سنة وتدريب لمدة سنة..راح ويازوجته وثنتين من بناته وولده حمد.. فارس:ليش الباقي ماراحوا معاهم؟ شيخة:وديمة عارفة لو راحت هناك ابوها بيوديها للعلاج..وبعدين هي ماحبت تغير الجامعة..وخالد من زمان مستقر بحياته وهالسفرة ماهو محتاج لها علشان دوامه..واختهم الثانية متزوجة.. فارس:وبنت خالج ساكنة مع اخوها؟ شيخة:جدتها وخالها بعد موجودين..ترى خالهم ممثل.. فارس:ممثل!! شيخة:اي نعم..فارس..نقدر نقوم تعبت من القعدة على الارض.. فارس(مسك يدها وقاموا):ايش رايج نروح نشرب عصير جوز الهند؟ شيخة:ماجربته من قبل.. فارس:لازم تجربينه..امشي.. في الشركة...راكان يدخل مكتب فهد.... راكان(قعد):ممكن تقولي باللي تخطط له؟ فهد(ابتسم):أكيد ممكن..بس بالاول قولي ايش تشرب؟ راكان:شاي.. فهد(يكلم السكرتير):جيب لنا الشاي وماابي اي مكالمة او اي ضيف يدخل..اذا في شي مهم اتصل على المكتب.. علي:حاضر طال عمرك.. راكان:ياللا تحجى.. فهد:خله يجيب الشاي علشان آخذ راحتي في الحجي.. بعد ماجابوا الشاي..... راكان:ياللا اسمعك.. فهد:طبعا اللي احنا نعرفه ان بنت عمك أعلنت علينا الحرب وراحت اشتكت علينا علشان تبي تاخذ نصيبها من البرج المشترك بين ابوي وعمي..وعمي كان من زمان وده يفصل هالشراكة بس ابوي اللي كان رافض..وبنت عمك الفاضلة بدل لتعب نفسها وتيي تكلم ابوي مرة ثانية بهالموضوع راحت اشتكت علينا في المحكمة ان ابوي مايبي يعطيهم نصيبهم.. راكان:اوكي.. فهد:تعرف ان ابوي وعمي عندهم فندق في فرنسا؟ راكان:فندق في فرنسا؟!! فهد:اي نعم فندق..وهذا الفندق مكلفهم وايد..وضخم وكبيير ومعروف..وكل فترة كان ابوي ولا عمي يروحون فرنسا علشان يجيكون على الحلال وكان في واحد اسمه بوأحمد عايش في فرنسا هو وزوجته وعياله ويعطونه معاش محترم بس علشان يدير هالفندق في غيابهم.. راكان:وشيخص هالفندق في سالفة بنت عمك؟ فهد:انا ياراكان راح آخذ منهم الفندق..مقابل البرج اللي في الدوحة.. راكان:راح تستغنى عن برج الدوحة؟؟ فهد(بكل ثقة):اي نعم راح استغنى عنه من غير تفكير.. راكان:ليش؟ فهد:هي تحسب ان هالبرج راح يفيدها وايد..هي غلطانة..وبعدين اللي سمعته ان هي قاعدة تصفي حساباتهم اللي برع في اوروبا..وتبي تبني كل مشاريعهم هني في الدوحة والخليج..وانا راح اكون اشطر منها..وهي مب شاطرة وايد بالتجارة والشغل..وعمي عنده مستشفى في لندن..واللي سمعته بعد انهم يبون يسكرونه علشان قاعدين يخسرون والمستشفى طالعه عليه شكاوي..وانا راح اشتري منهم المستشفى.. راكان:ماتلاحظ يافهد انك كل تبي تشتري.. فهد:علشان اربح.. راكان:وشالي يضمن الربح؟ فهد:انا درست الموضوع مع المحامي وبعض الاختصاصيين..وماقلت هالكلام الا لأني متأكد وواثق من اللي اقوله.. راكان:ومن وين لك الفلوس علشان تشتري؟ فهد:لاتحاتي كل شي موجود..الفندق اللي في فرنسا بخلي الوالد يشتريه والمستشفى انا بشتريه وبسميه بإسمي..يعني ابوي يقدر يبيع نصيبه من البرج على عمي وفلوس البرج ابوي ياخذه ويشتري نصيبهم من الفندق.. راكان:متى ناوي تقول حق ابوي؟ فهد:اذا موجود بروح له ألحين..اشوفك ماعلقت.. راكان:ماادري..بس احس ان بنت عمي قاعدة تلعب وهي ماتدري انها قاعدة تخسر.. فهد:خلها ياراكان تسوي اللي تبيه..بس علشان تحس انها غلطانة.. راكان:انزين وشنو هدفك من المستشفى؟ فهد:عندي له مشروع وناوي اسويه.. راكان:تهقى يبعطونكم المستشفى؟ فهد:اكيد..من غير مايترددون.. راكان:انزين انت بتطلقها؟؟ فهد:من غير تفكير..انت تدري من زمان اني ناوي اطلقها.. راكان:متى؟ فهد:كل شي في وقته حلو..(قعد على مكتبه واتصل بالسكرتير)..علي شوف ابوي وصل.. علي:حاضر.. راكان(قام) فهد:وين؟ راكان:بروح مكتبي عندي شغل..تبي شي؟ فهد:لا.. راكان:فهد ابوي وعمي في اشياء ثانية بينهم شراكة؟ فهد:اي نعم في..بس انا ماجبت طاريهم لأني أدري انها ماتدري عنهم شي..لجى الوقت المناسب بقولك ليش ماتكلمت عن هالشراكة.. راكان:فمان الله.. فهد:فمان الله.. طلع فهد من المكتب وراح مكتب ابوه... بوفهد:ان شاء الله انت تامر...حياك الله فمان الله.. فهد:من هذا؟ بوفهد:هذا بوغالية.. فهد:وينه مامبين.. بوفهد:كان مسافر للعلاج وتوه راد.. فهد:يبه ابيك بسالفة.. بوفهد:خير يبه؟ فهد:يبه ايش رايك نتنازل عن نصيبنا لهم.. بوفهد:نصيبنا من البرج؟ فهد:اي نعم.. بوفهد:نتنازل ولا نبيع؟ فهد:اقصد نبيع لهم..لكن بسعر معقول..وبالمقابل احنا نشتري منهم المستشفى اللي في لندن.. بوفهد:ايش تبي في المستشفى؟..تراهم بيسكرونها.. فهد:ادري يبه..انا بشتريه بفلوسي وبسميه بإسمي وبعيد الادارة والدكاترة من اول وجديد..عندي افكار علشان اقدر اكسب واربح.. بوفهد:يبه صعبه نبيع نصيبنا من البرج.. فهد:ادري انها صعبه خاصة ان هالبرج فايدتها كانت زينة بالنسبة لنا..بس لو بعناها ماراح نخسر لاتحاتي الخير وايد والمشاريع كثيرة الحمدلله..ولاتنسى ان راكان عنده المجمع اللي بيفتحه..وغير هذا..أبيك تشتري نصيب عمي من الفندق اللي في فرنسا.. بوفهد:ليش؟ فهد:هذا بدل هالبرج اللي هني.. بوفهد:اي بس تكفلة الفندق في فرنسا واايد.. فهد:يعني ماتقدر تشتريه منهم؟ بوفهد:بلا اقدر..بس ليش تبيني اشتريه؟ فهد:يكون لك كسب من طرف ثاني دام استغنينا عن هالبرج..بعدين هبة قاعدة تحاول تبيع كل حلالهم برع الخليج..فماراح تمانع لو باعت البرج اللي في فرنسا..خاصة انها بتربح فلوس من ورى هالبيعه.. بوفهد:والله ماادري شاقولك ياولدي..اللي تشوفه صح سووه انا اثق برايك..توكل على الله..بس ترى في اشياء ثانية لنا شراكة وياعمك.. فهد:أدري..بس خلهم حق الوقت المناسب.. بوفهد:بس ماقلت لي ليش وافقت تستغنى عن البرج؟ فهد:يبه هبة تعتقد انهم يقدرون يديرون شغلهم اللي بالبرج من غيرنا..خلها تجرب تشتغل من غيرنا وشوف اللي بيصير لها.. بوفهد:انت تبي تعاقبها؟ فهد:مااعاقبها..هي بدتت وتتحمل اللي ييها..اعتقد يبه ان ابوها عطاها وجه زيادة عن اللزوم واحنا مب مضطرين نسبب حق عمرنا مشاكل وياهبة..ولاتنسى سمعتنا بين الناس..وهي شكلها مستعدة تسوي كل شي علشان تقهرني..(قام)..عن اذنك.. بوفهد:يبه فهد.. فهد(لف):لبيه يبه.. بوفهد:بتطلقها؟؟ فهد:ان شاء الله في القريب العاجل..عن اذنك.. | ||||||||
|  |
|
11-12-13, 10:28 AM
| #22 | ||||||||
| مراقبة عامة ومشرفة منتدى الروايات المنقولة
| متابعة الفصل العاشر في شركة بوهبة..... هلا(تدخل المكتب):خير ياهبة؟ هبة:تعالي سمعي عمي ببيع نصيبه لنا.. هلا:وانت ايش بتسوين؟ هبة:راح اشتريه منهم طبعا مو هذا اللي بغيناه.. هلا:وبكم؟ هبة:هم عرضوا لنا سعر وشكله معقول.. هلا:والمستشفى خلاص بتستغنين عنه؟ هبة:والله انا اعتقد ان وجوده ماله لزمة ومشاكله قاعدة تكثر خلني ابيعه وافتك.. هلا:لمن بتبيعينه؟ هبة:لأي حد عايش في لندن..وافتك..لاتنسين الليلة معزومين على عرس سميرة.. هلا:مالي خلق.. هبة:ماكو شي اسمه مالي خلق..بتيين يعني بتيين.. يوم الخميس...بمكتب محمد وأحمد..... محمد:بروح استأذن من المدير.. أحمد:حق شنو؟ محمد:بروح اشتري اغراض حق طلعتنا اليوم.. أحمد:وانا؟ محمد:تقدر تيي؟ أحمد:بيي معاك عند المدير.. في الجامعة.... عبدالله:متى الاجتماع؟.......لي متى؟......ان شاء الله بتواجد.....ليش وين دكتور سيف؟......خلاص بحاول اخلص شغلي واييكم بدري..مع السلامة.. الطالب(يدخل):السلام عليكم.. عبدالله:وعليكم السلام.. الطالب:اشلونك استاذ عبدالله؟ عبدالله:بخير انت اشلونك؟ الطالب:الحمدلله.. عبدالله:هاا طمني عنك اخبار الدراسة؟ الطالب:والله شاقولك.. عبدالله:حياك اقعد.. الطالب(يقعد):والله شاقولك..مااعرف اشلون اشكرك..عديت مرحلة الخطر..ومستانس حدي خذت في الامتحان الثاني 16 من 20 وسويت له بحث عطاني فيه 7 من 10 وقالي بيساعدني بجم واجب اسويه تعويضا عن الامتحان الاول وقالي بحاول اعطيك C اذا شديت حيلك في الفاينل.. عبدالله:الحمدلله هذي اخبار طيبة وتفرح.. الطالب:مااعرف اشلون اشكرك.. عبدالله:والله شكرك واصلني اذا جبت عنده درجات زينة..شد حيلك..واذا احتجت اي شي وتوهقت بسؤال ولاشي مافهمته انا حاضر.. الطالب(قام):ماتقصر يااستاذ عبدالله.. عبدالله:وين؟ الطالب:عندي محاضرة عقب شوي..ان شاء الله بزورك مرة ثانية.. عبدالله:زورني بأخبار طيبة مثل اليوم.. الطالب:ان شاء الله..في امان الله.. عبدالله:فمان الله.. الساعة 2ونص في السيارة.... خالد:أنا بنزلج البيت وبروح.. وديمة:وين؟ خالد:بطلع ويالربع ويمكن ارد في الليل..اذا بغيتي شي قولي حق عيسى وليلى بتييج البيت اليوم عقب المغرب.. وديمة:خالد انت كلمت ابوي؟ خالد:لا..ليش؟..بغيتي شي منه؟ وديمة:لا ولاابي اكلمه.. خالد:ليش؟ وديمة:جذي.. وصلوا البيت.... خالد:ياللا نزلي..(نزل) وديمة:مب انت بتروح ليش نزلت؟ خالد:بروح ويارفيجي.. على الغداء.... الجدة:ليش ماتاكلين يايمه؟ وديمة:شبعت جدتي.. عيسى:وديمة كلي وخل بالج مرتاح..ماراح تسافرين.. وديمة:ومن اللي قال؟ عيسى:تحصلين ابوج كان متضايق وقال هالحجي.. وديمة(قامت):بروح ارقد.. الجدة:وعليه عليج ياوديمة ماادري ليش هالبنت مااشوفها مستانسة..الله يهديك يابوسلمان.. في غرفة وديمة....يرن تليفونها..ماتهتم وتلبس بيجامتها وسكرت الستاير والليتات وقفلت الباب وفتحت المكيف وراحت تحت البطانية رن تليفونها مرة ثانية..جاها فضول تعرف من اللي ذكرها في هالوقت وكانت خايفه يكون ابوها...شافت الرقم ماصدقت.... وديمة:شيخووووه انت رديتي؟؟ شيخة(بضحك):اي رديت..مفاجأة؟ وديمة:فديت قلبج والله..مشتاقة لج بالحيل..وينج فيه؟ شيخة:انا في بيتي..مت وانا اتصل فيج علشان اخبرج ماتردين.. وديمة:اصلا ماكنت ابي ارد بس بعدين غيرت رايي..حمدلله على سلامتج.. شيخة:الله يسلمج.. وديمة:شيخوه ابي اشوفج.. شيخة:من عيوني العصر ان شاء الله بروح بيت ابوي وانت تعالي في الوقت اللي يناسبج.. وديمة:خلاص انا بعد بييج العصر.. شيخة:ديري بالج على نفسج..مع السلامة.. سكرت التليفون وراحت تفضي شنطة السفر وترتب اغراضها في الغرفة...يندق الباب تلبس شيلتها وتروح تفتح الباب..... شيماء وشمة:مرحبا.. شيخة:هلا والله..حياكم.. شيماء:فارس راقد؟ شيخة:اي راقد..بس مو مشكلة بسكر باب الغرفة وخلنا نقعد هني...حياكم.. سكرت الباب..وقعدت وياهم.... شمة:قولي لنا ايش سويتوا في ماليزيا وين وداج فارس؟ شيماء:أكيد دوراج ماليزيا كلها.. شيخة:مب كلها كلها..بس عجبتني وايد..مناظرها رهيبة مع ان جوها حار.. شمة:صج ان جوها حار بس انا حبيتها وااايد.. شيخة:انت زرتوها؟ شمة:اي رحناها قبل ثلاث سنين كلنا رحنا صج كانت احلى سفرة لأن كلنا كنا ويابعض واستانسنا تمينا هناك تقريبا شهر.. شيخة:انتوا في المدرسة؟ شيماء:اي في المدرسة.. شيخة:اي صف؟ شيماء:ثاني ثانوي.. شيخة:وانتوا ويابعض في الصف؟ شمة:اي..وفي مدرسات يلخبطون بينا..عاد احنا نستانس نلعوزهم.. شيخة:يحليلكم..ترى فارس مانساكم صوغتكم موجودة عندي في الحفظ والصون بس لما يقوم هو بيعطيكم.. شيماء:اموت واعرف فارس ايش جايب لنا.. شمة(قامت):ياللا شيوم خلنا نروح.. شيخة:ليش تو الناس.. شمة:بنخليج ترتاحين شوي بس عقب تنزلين تحت وتعطينا التفاصيل والصور.. شيخة:بس انا طالعة عقب الصلاة بروح بيت أهلي.. شيماء(قامت):مو مشكلة انت ويانا في البيت بنقعد وياج لين ماتملين.. شيخة:ايش دعوة عاد امل.. في بيت بوسلمان....وديمة تنزل تحت...... وديمة:جدتي راقدة؟ الجدة:لا..في شي يمه؟ وديمة:شيخة بنت عمتي ردت من السفر وابي اروح لها.. الجدة:ومتى تبين تروحين؟ وديمة:يعني بعد الصلاة.. الجدة:بس خالج راح يرقد ومهب قايب الا قريب المغرب.. وديمة:لا لاتقولين..تكفين جدتي ابي اروح..مشتاقة لها وايد..تكفين.. الجدة:روحي شوفيه يمكن ليحين مارقد.. وديمة راحت غرفة خالها..... وديمة:خالي؟ عيسى(يتكلم في التليفون):الساعة جم؟.....وسعيد بيحضر؟.....لا ماراح انسى يصير خير..فمان الله.. وديمة:خالي.. عيسى:ايش تبين؟ وديمة:بتنام؟ عيسى:اي.. وديمة(حست بخيبة امل) عيسى:ليش؟ وديمة:شيخة بنت عمتي ردت من السفر وابي اروح بيتهم.. عيسى:متى؟ وديمة:تصلي وتوديني؟ عيسى:انزين..بس خلج جاهزة.. وديمة(استانست):تسلم حبيبي خالي..(طلعت) شيخة تروح تقّعد فارس.... شيخة:فارس.. فارس(فتج عيونه):حياتي انتي.. شيخة(ابتسمت):اذن العصر.. فارس(قام):بتروحين بيت ابوج؟ شيخة:اي.. فارس:خلج جاهزة بروح اتوضى وبصلي ماني جاي فوق بدق لج ونزلي.. شيخة:ان شاء الله.. في الشاليهات.... محمد:سمعت من اخوي ان الشركة اللي يشتغل فيها يبون دكتور.. خالد:دكتور في الشركة؟ محمد:يقول بيفتحون مستشفى في لندن ويبي واحد عنده خبره في الطب وادارة المستشفى..عاد انا تذكرت ابوك.. خالد:ابوي مايقدر انت ناسي انه في المانيا وعنده تدريب..وبعدين مااعتقد ابوي بيوافق جذي بيضطر يعيش في لندن فترة..ظروفه شوي صعبة.. محمد:انزين شوف ابوك مايعرف حد.. خالد:بشوف..احمد وين الفيلم اللي جبته؟ أحمد:تبون تشوفونه الحين؟ خالد:اي ليش لا..والفيلم الثاني في الليل.. عبدالله:قلت حق محي الدين عن اللحم؟ محمد:اي قلت له..تعال اقعد هو بيرتب كل شي.. في بيت بوفيصل..... شيخة:اشتقت لج وايد.. وديمة:حتى انا.. شيخة:ايش رايج نروح فوق نقعد نسولف في غرفتي؟ وديمة:ياللا.. شيخة(قاموا):يمه احنا بروح فوق اذا حد جى خبريني.. ام فيصل:ان شاء الله وانا عقب شوي بجيب لكم كيك.. في الغرفة.... شيخة:طمنيني عنج ودوم قولي لي اخبارج.. وديمة:بخير..انت قولي لي ايش سويتي في شهر العسل؟ شيخة:استانست وايد عقبالج ياوديمة.. وديمة:صورتي؟ شيخة:اي بس ماحمضنا الصور.. وديمة:مستانسة مع فارس؟ شيخة:واايد..الحمدلله فارس واحد عاقل ومتفهم وحنون ولابعد رومااانسي.. وديمة:الحمدلله.. شيخة:ودوم اشفيج احس ان فيج شي.. وديمة:متضايقة وايد ياشيخة ماحصلت حد علشان افضفض له.. شيخة:أفاا وانا وين رحت؟ وديمة:ليش انت كنتي هني؟ شيخة:هذاني موجودة وقولي لي كل اللي في خاطرج..انا اسمعج.. وديمة:ماابي اذيج بمشاكلي.. شيخة:ياللا عاد عن الحجي اللي ماله معنى.. وديمة:شاقولج شيخوه..ابوي معزم اني اروح لهم.. شيخة:متى؟ وديمة:متصل على خالد علشان يحجز لي تذكرة واسافر لهم هالجم يوم.. شيخة:انت من صجج؟؟ وديمة:اي...وانا بروحي متضايقة وماابي اروح..بس شسوي خالد يقول مااقدر ارفض طلب حق ابوي.. شيخة:وليش ابوج مرة وحده غير رايه؟؟ وديمة: لأني تعبت بعد عرسج.. شيخة:هاذي عين وصابتج ولا انت صحتج ماكانت فيها شي..يعلها ماتتهنى اللي حسدتج.. وديمة:ماادري شسوي.. شيخة:لاتسافرين.. وديمة:وابوي؟ شيخة:انا بكلم امي علشان تقول حق ابوج يمكن يقتنع.. وديمة:اخاف يعصب لأني قلت حق عمتي تتوسط لي عنده.. شيخة:خله يعصب وهو بعيد احسن من انه يعصب وهو قريب..الحين امي جايه قولي لها..أخبار الجامعة محد سأل عني؟ وديمة:بلا كل البنات يسألون عنج متى بترجع شيخة؟...حتى الدكتور خليفة سأل عنج قلت له دكتور تزوجت.. شيخة:واااي احراج.. وديمة:عاد انت محظوظة دكتور فوزي ماسجل الغياب المحاضرة اللي طافت ماادري شكله نسى.. شيخة:الحمدلله طمنتيني..ان شاء الله الاحد بروح لهم..مع اني خبرتهم.. وديمة:فاتج الامتحان..كان صعب.. شيخة:والدرجات؟ وديمة:ليحين ماعطانا.. ام فيصل(تدق الباب وتدخل):وهذا الكيك وصل.. وديمة:شكله يشهي..انت مسويته عمتي؟ ام فيصل:اي..ذوقيه وعطينا رايج,,وعلى فكرة مافيه سكر واايد مسويته مخصوص لج.. وديمة:مشكورة عمتي.. ام فيصل:هاج يمه شيخة.. شيخة:مشتهيه اكلج يايمه.. ام فيصل:حبيبتي.. شيخة:يمه قعدي شوي.. ام فيصل(قعدت) شيخة:يمه وديمة ودها تقولج شي.. ام فيصل:خير وديمة؟ وديمة:انت قولي لها.. شيخة:على راحتج..يمه خالي متصل في خالد علشان يطرش وديمة.. يوم الجمعة....  عيسى يدخل الصالة..ويحب راس ابوه وجده وجدته.... راشد:وين أخوك؟ عيسى:جاي.. راشد:وخواتك؟ عيسى:قعدتهم وماادري اذا قايمين ولا لا.. فارس في الحمام وشيخة تتعدل جدام المنظرة...يطلع فارس وينشف وجهه بالفوطة... فارس(يبتسم لها):صباح الورد.. شيخة(وهي تبتسم):صباح الورد.. فارس:بنروح نتريق تحت.. شيخة:ابدل ملابسي وننزل.. كلهم يلتمون على طاولة الفطور.... سلطان:يدتي تدرين فواز ملج.. ام راشد:فواز ولد سارة؟ سلطان:اي.. ام راشد:متى؟ سلطان:امس كانت ملجته.. ام راشد:زين خبرتني علشان اتصل في امه وابارك لها.. عيسى:وين شيماء؟ شمة:راقدة.. بوراشد:وليش ماقعدتيها؟ شمة:مت وانا اناديها ماكو فايدة.. بعد الفطور...شمة قاعدة مع سلطان وخواته..وعيسى يقرأ الجريدة وتميم قاعد يشرب شاي وهو يتساسر مع زوجته..وبوراشد يسولف وياراشد وفارس..وشيخة قاعدة وياام راشد وهي مستحية منهم...... الجوهرة(تقعد عند راشد):أقول خالتي متى بتكون ليلة الهدية؟ ام راشد:ان شاء الله الثلاثاء.. شيماء(جات):لالا..مانبي الثلاثاء.. ام راشد:الناس تصبح.. شمياء:سوري مام..صباح الخير جميعا.. بوراشد:الساعة جم؟ شيماء:يبه توها تسع بدري..ماادري انتوا ليش تحبون تقومون بدري..اليوم الجمعة.. بوراشد:وسورة الكهف متى الواحد يقراها؟ شيماء:اممم..وين ريوقي؟ سلطان:خلاص راح عليج الريوق.. شيماء:لا والله وين قاعدين في الفندق..بروح اتريق..بس يمه مانبي العزيمة الثلاثاء.. ام راشد:وليش ان شاء الله؟ شيماء:لأن بكرته ورانا دوام..خليها الخميس أحسن بكرته اجازة..بليييز مامي.. بوراشد:يابنت تحجي عدل.. شمة:اي يمه شيماء صاجة..خليها آخر الاسبوع.. الجوهرة:اي خالتي البنات معاهم حق..احنا عيالنا وراهم مدارس بكرته وين يقدرون على السهر.. ام راشد:انزين الخميس..ذكريني ياام عيسى نقعد بعد صلاة العصر نعزم الحريم.. الجوهرة:ان شاء الله.. بوراشد:روضة.. روضة:لبيه عمي.. بوراشد:رايحة بيت أهلج؟ روضة:ان شاء الله.. بوراشد:تمي الغداء عندنا نتم حول بعض دام ان زوجة فارس ويانا.. روضة(تناظر تميم):اللي تشوفه ياعمي..بتم الغداء وياكم.. بوراشد(قام) شيماء(ومعاها الساندويتش والكوب):وين بابي؟ بوراشد(من وراها):كم مرة اقولج تحجي عدل.. شمياء:اوكي..اقصد ان شاء الله..وين رايح..الحين انا جيت وانت تقوم.. سلطان:ذهبت الملائكة وجاءت الشياطين.. شيماء:هااي احترم نفسك.. بوراشد:استعدلي يابنت..الحين مرت فارس شتقول عنج؟ شيماء(قعدت عندها):فديت مرت فارس..مابتقول شي..احنا خلاص خذنا عليه وهي مب غريبة.. راشد:بتشوف العجب في هالبيت.. شيخة(ابتسمت خجلانة لأنها مو متعودة عليهم) وديمة(تشرب الكوفي وهي تطالع التلفزيون) يطلع خالد من الغرفة..... خالد:صباح الخير.. وديمة:صباح الخير.. خالد:وينج مانزلتي بدري؟ وديمة:كنت نعسانة.. خالد:تريقتي؟ وديمة:لا.. خالد:وقاعدة تشربين الكوفي على الريق؟ وديمة:شسوي مااشتهي.. خالد:وين جدتي؟ وديمة:ماادري دشت غرفتها من شوي.. خالد:وعيسى راقد؟ وديمة:ماادري عنه.. خالد:انزين انا رايح الصلاة.. وديمة:خالد.. خالد:نعم؟ وديمة:ابوي مااتصل فيك؟ خالد:لا..مع السلامة.. في ألمانيا... بوسلمان:هي اشتكت لج؟ ام فيصل:هي تتمنى شوفتكم ياخوي بس انت تدري انها الحين في الجامعة ووسط الدراسة والامتحانات وحرام تضيع فصل كامل دام بدت فيه.. بوسلمان:بس انا ابي اتطمن على صحتها.. ام فيصل:انا شايفتها امس بصحتها وعافيتها الحمدلله مافيها شي..بعدين خالد داير باله عليها وليلى بين فترة وفترة عندها..وبعدين هالمضاعفات اللي تصير لها بين الوقت والثاني عادي..ماهو خطر عليها..يابوسلمان وديمة ماعادت صغيرة تراها في الجامعة وعلى وجه زواج..قلل خوفك عليها شوي..صدقني اذا كان فيها شي انا اول وحدة باتصل فيك وبخبرك..انت بس تطمن..قولي أخبار زوجتك وعيالك؟ بوسلمان:الحمدلله..كلهم بخير.. ام فيصل:وأخبار حمد؟ بوسلمان:زين..شيخة ردت؟ ام فيصل:اي فديتها ردت.. بوسلمان:تحصلين وديمة وايد مستانسة بردتها.. ام فيصل:امس طول اليوم قاعدين يسولفون.. بوسلمان:ديري بالج على وديمة وكل جم يوم تطمني عليها.. ام فيصل:لاتحاتي وديمة بعيوني وغلاتها من غلات شيخة.. بوسلمان:ماتقصرين ياعائشة.. شيخة في غرفتها وترتب الغرفة من ديكور وملابسهم وعطور ومكياجها..وعقب راحت تسبح..ولبست وتكشخت وبخرت الغرفة..تسمع صوت الباب..تبتسم... فارس:السلام عليكم.. شيخة:وعليكم السلام..تقبل الله طاعتك.. فارس:وياج حبي..رتبتي الغرفة؟ شيخة:اي..ايش رايك؟ فارس:يعني في شي تسويه حبيبتي ومايعجبني؟ شيخة:من حبيبتك؟ فارس:اللي لابسه أصفر..(مسك يدها)..تعالي نقعد مناك.. وعقب ماقعدوا.... فارس:ماقلتي لي ايش رايج بأجواء بيتنا؟ شيخة:مرتاحة الحمدلله..بس يبيلي وقت لين مااتعود عليكم.. فارس:عليكم؟!!..وانا منهم؟؟ شيخة(استحت) فارس(مسك يدها بقو):أحبج ياشيخة.. يندق الباب...يقوم فارس يفتح الباب.... فارس:هلا بشيماء.. شيماء:الغداء زاهب..حياكم.. فارس:انت اللي طابخة؟ شيماء:اذا ناوي على عمرك ليش لا.. فارس:انا اقول بعد انت مو مال هالشغلات..ياللا جايين..(سك الباب)...شيخة.. شيخة(في غرفة الملابس):نعم؟ فارس:شتسوين هناك؟ شيخة:أبدل الجلابية.. فارس:ليش؟ شيخة:لإني تعطرت فيها.. بعد الغداء.... بويوسف:انا بروح ارقد شوي لاتنسون تقعدوني حق صلاة العصر.. ام يوسف:ان شاء الله.. يوسف:محمد كلمت رفيجك علشان المستشفى؟ محمد:اي كلمته وقال ابوه مسافر المانيا عند دورة ومهب راد الا عقب سنة..واصلا ابوه مايقدر يدير مستشفى لأنه مايقدر يسافر ويتم هناك ظروف حياتهم شوي صعبة.. يوسف:انزين ماقلت له يشوف لنا حد غيره؟ محمد:قلت له..قالي بشوف وبرد عليكم.. يوسف:بس خله يرد علينا بسرعة..لأن الريال مستعجل.. في بيت بوهبة...هبة وهلا يتغدون..... هلا:اشفيج سرحانة؟ هبة:أفكر بشي.. هلا:شنو؟ هبة:غريبة ان عمي استغنى عن البرج وباع نصيبه بسعر ماهو غالي.. هلا:يمكن مايستاهل اكثر من جذي.. هبة:لا مااعتقد..احس ان في شي.. هلا:مافهمت ايش تقصدين.. هبة:ناسية يوم عمي جى وقالنا ببيع لكم نصيبنا من البرج مقابل ماتبيعون لنا المستشفى اللي في لندن.. هلا:اي.. هبة:ليش بغى المستشفى؟مع انها خسرانة وعليها شكاوي من وزارة الصحة.. هلا:تحصلينه يبي يهدمها ولايسوي فيها عمل خيري.. هبة:لالا..انا متأكدة ان في ان في الموضوع.. هلا:تغدي وخل بالج مرتاح..بعدين يوم انج تحاتين ان في شي ليش قبلتي الصفقة وبعتي المستشفى؟ هبة:غبية..غبية بعيد عنج..احس ان فهد ورى هالفكرة..وماسوى هالشي الا لأنه يبي ينتقم مني.. هلا:وليش ينتقم منج انت ايش سويتي فيه؟ هبة:ماادري.. هلا:هبة ليش ماترجعين له؟ هبة:هلا كم مرة قايلة لج لاتجيبين طاري هالسالفة..لو هو صج يبيني لازم يي ويعتذر مني..ووقتها انا اقرر اذا ارجع له او لا.. هلا:وين تحصلين احسن واغنى من فهد.. هبة:الله يخلي حلال ابوي ولايحجيني لواحد مثل فهد.. يوم الاحد...في الجامعة..... وديمة:فديت هالطلة الحلوة علي من الصبح.. شيخة:حبيبتي والله..مشتاقة لج..طول الليل وانا افكر متى يي الصبح علشان اشوفج.. وديمة:لاتقولين انج تريقتي.. شيخة(هزت راسها):اي تريقت..مااقدر اشوف ريلي يتريق واقعد اطالعه.. وديمة:ياللا بمشيها لج اليوم.. شيخة:ترى بجوع لاتحاتين نطري علي شوي.. وديمة:انزين خلنا نمشي قبل لنتأخر على الدكتور.. شيخة:وعقب المحاضرة خلنا نروح مكتب الدكتور خليفة.. وديمة:اوجي.. في شركة بوفهد..... السكرتير:وهذي طال عمرك فاكس الشركة المصرية مالت بوآدم.. فهد:خلها عندي..وغيرها.. السكرتير:وهذا الايميل جانا من مصنع في اليابان..يبون نتعاقد وياهم.. فهد:مصنع وشو؟ هبة(تدخل مكتب فهد) فهد(يرفع راسه وانصدم من وجودها) هبة(بكل ثقة):السلام عليكم.. فهد:خل الورقة عندي بدرسها وعقب بكلمك..تقدر تروح.. علي:حاضر طال عمرك..(طلع وسك الباب) هبة:اشلونك يافهد؟ فهد:خير؟ هبة(ابتسمت):ايش دعوة لاسلام ولاسؤال.. فهد:اخلصي..ترى ورانا شغل.. هبة:انا جايه أسألك سؤال..انت ليش اشتريت المستشفى؟ فهد(يضحك بسخرية):اعتقد ان المستشفى صارت لي ومالج حق تسألين عنها.. هبة:ايش كنت تقصد ببيع نصيبكم وتشتري المستشفى؟ فهد(وقف):ترى احنا تجار يابنت عمي وفاهمين شنسوي..واعتقد انج فاهمة انا ايش سويت لكن فهمج جى متأخر وهذا من صالحنا.. هبة:يعني خدعتوني؟؟؟ فهد:نخدعج؟!!..ليش ناقصتنا فلوس..الحمدلله..اعتقد ان البيعة تمت حسب العقد اللي بينا ومحد خدع حد..والمستشفى انت استغنيتي عنه قبل لأعرض عليج صفقتي..صح ولا لا؟ هبة:بس انت قاعد تحفر حفرة.. فهد:حفرة؟!!..ليش انا عندي وقت احفر..اذا ماانتوا قد حلال ابوكم ايش لكم بهالشغل.. هبة:مايخصك.. فهد(عصب):سمعي ماابي اشوفج في هالشركة ولااحش ريلج حش..وانت تعرفين اني انا اقدر ايش اسوي علشان شركتج تخسر وتقعدين على الحديدة.. هبة:لو فيك خير سوه وشوف ايش بسوي فيك.. فهد(مسك ذراعها بقو) هبة:هدني.. فهد:انا اذا بسوي شي بسويه ولابفكر فيج..برع..(هدها) هبة:انا طالعة يافهد..لكن صدقني ماراح اخليك بحالك..ان ماخليتك تندم على كل كلمة قلتها مابكون هبة.. فهد:اللي ماتطولينه بيدج طوليه بريلج..برع..برع.. هبة:الزمن بينا يافهد..(راحت) فهد:على فكرة..(وقفت وفهد قعد على الكرسي)..كلها جم يوم وورقتج بتوصلج..فخلج مستعدة انج بتمين في البيت.. هبة(انقهرت من كلامه وطلعت) راكان (دش عند فهد):شتسوي هبة عندك؟ فهد(اتصل على السكرتير):علي تعال.. علي:ان شاء الله.. دخل.... فهد:ابيك تحجز لي تذكرة سفر على لندن..شوف اذا في رحلة باجر.. علي:واخلي لك الرحلة مفتوحة؟ فهد:لا..خلها اسبوع.. علي:شخص واحد؟ فهد:احجز لي انا حاليا وعقب بشوف.. علي:حاضر..تامرني بشي ثاني؟ فهد:لا.. علي:عن اذنك..(طلع) راكان:فهد اشفيك؟ فهد:مافيني شي.. راكان:اشلون مافيك شي وهبة طالعة من عندك وانت توك تقول تبي تسافر.. فهد:ابي اسافر لأن عندي شغل.. راكان:هبة ايش كانت تبي؟ فهد:جايه تستفسر عن البيعة اللي صارت..مستغربة ليش اشتريت منها المستشفى.. راكان:وانت ايش قلت لها؟ فهد:هي خلاص فهمت كل شي من غير مااتحجى.. راكان:فهد طلقها وريح عمرك.. فهد:بطلقها بس مب الحين..في الوقت المناسب.. راكان:يااخي ايش تبي فيها مخليها معلقة..خلها بحال سبيلها..ولاتعاند نفسك..واشغل نفسك بالشغل ويمكن حصلت بنت الحلال.. فهد:خلك من هذا الحجي كله..انا مسافر وابيك تاخذ مكاني في الشغل..وكل الاوراق بخليها تتحول لمكتبك..واذا في شي ولاشي اتصل فيني.. راكان:ايش عندك مسافر لندن؟ فهد:علشان المستشفى..(اتصل على علي)...علي اتصل في يوسف وخله يجيني.. علي:ان شاء الله.. في الجامعة...في مكتب الدكتور خليفة...... شيخة:السلام عليكم.. د.خليفة:وعليكم السلام..اشلونكم؟ شيخة+وديمة:بخير.. شيخة:دكتور انا جايه علشان الغياب.. د.خليفة اي انت ماشاء الله عليج غايبة الاسبوع اللي طاف.. شيخة:دكتور انا كنت مسافرة.. د.خليفة:أدري قالت لي وديمة انج تزوجتي وسافرتي.. شيخة(استحت):دكتور واذا تبي تتأكد بجيب لك تذكرة السفر او الجواز.. وديمة:واذا تبي بعد دكتور بنجيب لك بطاقة العرس.. د.خليفة(ابتسم):لامايحتاي..مص دقج.. شيخة:يعني دكتور ايش بتسوي على الغياب؟ د.خليفة:ولاشي.. شيخة:بس دكتور انا عندي عذر.. د.خليفة:أدري..حاليا انت ماغبتي من قبل..اذا صار لج ظرف واضطريتي للغياب كلميني..لكن دام انج ماغايبة من قبل فماعندج مشكلة..واذا مافهمتي شي من اللي فاتج تعالي المكتب بس بالاول خبريني قبله يمكن مااكون موجود.. شيخة:تسلم دكتور ماقصرت..جزاك الله خير.. د.خليفة:وديمة..ترى صلحت اوراقكم.. وديمة:صج دكتور؟..الله ياستر..واشلون الدرجات؟ د.خليفة:في بنات ماشاء الله عليهم جايبين درجات عالية مع اني ماتوقعت منهم..وفي بنات جايبين درجات نازلة ماادري ليش.. وديمة:لأن الامتحان كان صعب.. د.خليفة:امتحاني كان صعب؟!! وديمة:تبي الصج دكتور..اي كان صعب..ويالله خلصت الامتحان على آخر دقيقة.. شيخة:دكتور وديمة كم جابت؟ وديمة:لا دكتور لاتقول دام الدرجات فيها نازلة ماابي اعرف.. الدكتور(طلع الاوراق) وديمة:دكتور.. د.خليفة:صبري..مردج بتشوفين الدرجات..(يدور على الورقة)...هاج..هذي ورقتج.. وديمة(بخوف تاخذ الورقة وتقراها وهي مصدومة بالدرجة وماهي مصدقة):دكتور انت متأكد ان هذي ورقتي؟ د.خليفة:ماتشوفين اسمج وخطج؟ وديمة:بلا..بس ماني مصدقة.. عل الغداء... يرن تليفون فارس..... فارس:السلام عليكم......هلا خالد....بخير الله يسلمك انت اشلونك؟.....الحمدلله.....طيب الله يعافيك...انت طمني اخبار ريولك؟.....والدكتور ايش قالك؟.......انزين......ترى هالدكتور وايد زين...ان شاء الله قريب....خير؟......لا عادي حياك في اي وقت......مستشفى؟!!.....وين؟........� �متى يبون؟.......والله ماادري ولااقدر اقولك شي حاليا بحاول اشوف لك حد وبرد عليك.....متى؟......بحاول وان شاء الله بعد المغرب ارد عليك....ان شاء الله....لاتحاتي.....انا فاهمك وعارف الشخص اللي تبونه.....ان شاء الله... لاعادي ايش دعوة ياريال خذ راحتك..لاازعاج ولاشي....فمان الله..(قعد مكانه) بوراشد:من اللي متصل فيك حزة الغداء؟ فارس:واحد من الشباب..أقول راشد..يقول الريال ان في مستشفى بلندن مسكرينه وزارة الصحة وفي ريال يبي يفتحها ويبي يعيد خطة المستشفى ويحسنها عن قبل بس يبي حد يديرها..تعرف حد؟ راشد:في لندن؟؟ فارس:اي.. راشد:وليش مسكرينه؟ فارس:ماادري يقول جات عليها شكاوي..وصاحبها باعها وهو اشتراها.. راشد:وليش اشتراها دام فيها خسارة وتسكرت؟ فارس:مااادري..قولي تعرف حد؟ راشد:والله ماادري..بس بشوف لك.. فارس:يقول يبي الرد اليوم بعد المغرب.. راشد:ايش عنده مستعجل؟ فارس:يقول بيسافر في هاليومين..بس يقول يبي واحد يعرف يدير مستشفى والاهم من هذا كله عنده خبره واخلاق..وياحبذا لو كان مسلم.. راشد(يفكر):خلاص بعد صلاة العصر انا برد عليك..بس اشوف لي واحد وبقولك.. في البيت...وديمة تدخل البيت مع خالد...خالد يقعد في الصالة.... وديمة(تحط اغراضها على الكنب وتفتح الملف واطلع الورقة):خالد هاك هالورقة.. خالد:ايش فيها؟ وديمة:انت شوفها وبتعرف.. خالد(يقراها):لا مانقدر..انا اقول اليوم ايش عندها شاقة الحلج من الوناسة..بالمبارك.. وديمة:الله يبارك فيك..مع ان الامتحان كان صعب.. خالد:هذا الامتحان اللي ماتغديتي علشانه؟ وديمة:اي.. خالد:شفتي قلت لج تغدي قلتي لي لا الامتحان كان صعب.. وديمة:الحمدلله ان مانقصت اكثر من درجتين ماني مصدقة.. خالد:سكي عمرج بعين.. وديمة:ماشاء الله علي..(تقعد عنده)..خالد الحين انا جبت درجة زينة ودني مكان.. خالد:وين قاعدين احنا عيال مدارس؟ وديمة:لما درجاتي نازلة تقعد اتهزأ فيني..والحين درجتي عالية ماتعطيني شي.. خالد:تبين خمس ريالات(يدور في مخباته خمس ريالات) وديمة:لا..ماابي انزين..انا الغلطانة اني طلبت..(سوت عمرها زعلانة) يرن تليفون خالد.... خالد:السلام عليكم.....الحمدلله انت شاخبارك يبه؟....(وديمة انقبض قلبها)...الحمدلله كلنا بخير اخبار امي والبنات وحمد؟......الحمدلله كل الامور ماشية....شنو؟....بلا رحت السفريات..(وديمة تخرعت)....وماحصلت حجز الا عقب خمسة ايام......اي حجزت لها...(وديمة دمعت عينها وخذت اغراضها)....ليش؟......اي دفعت.....ليش يعني صاير شي؟...(وديمة وقفت).......على راحتك.....خلاص اليوم بروح لهم......ان شاء الله لاتحاتي..ان شاء الله مو صاير الا كل خير......يوصل فمان الله.. وديمة(ركبت الدري) خالد:وين؟ وديمة:بروح انام.. خالد:اشفيج تصيحين؟ وديمة:مافيني شي.. خالد:عيني بعينج..عيني بعينج..عيل هذي مو دموع؟ وديمة(مسحت دموعها) خالد:شنو صحتي علشان قلت حق ابوي حجزت لها؟ وديمة(هزت راسها) خالد:انزين بسج دلع..بروح اليوم علشان انكسلها.. وديمة(فجت عيونها):تنكسلها!!..ليش؟ خالد:لأن ابوي قالي خلاص ماله داعي وديمة تيي.. وديمة:من صجك؟..ولاتلعب بأعصابي؟ خالد:من صجي..وبعد المغرب بوديج مكان..ايش تبين بعد؟ وديمة(بوناسة):وااااو...فديت عمتي..الله لايحرمني منها.. خالد:شنو؟؟شيخص عمتي؟؟؟ وديمة:هاا..ولاشي.. خالد:تعالي اشوف..ماكو طلعة لين ماتقولين لي السالفة.. عرفنا أحدااث كثيرة..وتعرفنا على شخصيات جديدة... ياترى فهد بيطلق هبة؟؟ وهبة شالي تخطط له لفهد؟؟ والمستشفى مشروع فهد بينجح؟؟ وشيخة كيف بتكون حياتها مع أهل زوجها في بيت واحد؟؟ ووديمة؟؟ وخالد؟؟ والكثييير من الشخصيات تحمل في طياتها احدااث مشوقة.. تابعوني في الفصل ال 11 في حفظ الله | ||||||||
|
| |
|
11-12-13, 10:34 AM
| #23 | ||||||||
| مراقبة عامة ومشرفة منتدى الروايات المنقولة
| " فصل الـ 11 " في غرفة فارس وشيخة....  فارس:اشلون كان الدوام اليوم؟ شيخة:الحمدلله.. فارس:فاتتج وايد اشياء؟ شيخة:اي..فارس.. فارس:عيون فارس..حياة فارس.. شيخة(ابتسمت بخجل):ايش رايك نطلع اليوم.. فارس:نطلع ليش مانطلع..وين تبينا نروح؟ شيخة:ابي اروح اشتري شوية اغراض حق الغرفة.. فارس:اغراض حق الغرفة مثل شنو؟ شيخة:في خاطري نشتري لنا غلاية ماي..يعني ودي مرة اسوي نسكافيه ولا كابتشينو واحنا نطالع تلفزيون ولانسولف.. فارس:ياسلالام..وبعد شنو؟ شيخة:خلنا نروح عقب الجمعيه ودي اشتري كوافي وعصاير نحطها في الثلاجة.. فارس:ياللا قومي لبسي..(قامت)..تدرين اليوم على الغداء من كلمني؟ شيخة:لا.. فارس:خالد ولد خالج.. شيخة:خالد! في بيت بويوسف...... يوسف:كلمت رفيجك؟ محمد:اي كلمته..وقالي بيرد علي اليوم.. يوسف:تعتقد بيحصل حد؟ محمد:ماادري.. يوسف:اشوفك لابس وين رايح؟ محمد:طالع ويااحمد بروح اشتري لي شوية اغراض ناقصتني.. يوسف:اغراض وشو؟ محمد:فنايل وقطع حق الدشاديش.. يوسف:تو الناس على هالمحلات.. محمد:بروح الستي بالاول..بشتري لي ازرار..تبي شي؟ يوسف:لا..مع ان ودي اروح اشتري ساعة بس مااقدر..وراي دوام.. محمد:انزين استأذن.. يوسف:لا مااقدر عندنا شغل هالايام.. محمد:اقول يوسف.. يوسف(وهو يقرأ المجلة):نعم؟ محمد:انت صج مرتاح بشغلك؟ يوسف:ليش تسأل؟ محمد:يعني عندك دوامين..وتتعب بالشغل..خاصة انك تشتغل وايد.. يوسف:صج اني اشتغل وايد ودوامين مثل ماتقول..لكن انا احب شغلي وايد..ولاتنسى ان الريال اللي اشتغل في شركته يقّدر شغلي وتعبي..ويعطيني راتب احسن من اللي كنت آخذه في شغلي الاولي..واذا في ارباح يعطينا زيادات..والاهم من هذا كله انه يعتمد علي في مشاريع كثيرة..وهذا الشي ازداد حبي في شركته والدوام مايفرق معاي ان كان طويل ولا لا.. محمد:الحمدلله انك مرتاح..دام ان امورك طيبة ليش ماتتزوج؟ يوسف:مب الحين خلني شوي اتفرغ بعدين بتزوج.. محمد:ياللا انا ماشي بتأخر على أحمد..فمان الله.. يوسف:فمان الله...لاتنسى تخبرني اذا رفجيك اتصل فيك.. محمد:اوكي..(سك الباب) عبدالله يرد من الصلاة.... يفتح التلفزيون ويحط على الاخبار..تيي امه.... ام عبدالله:رديت يمه.. عبدالله:اي يمه..يمه وين الشاي؟ ام عبدالله:ألحين بجيبه لك.. عبدالله:خلج قاعدة..انا بروح.. ام عبدالله:لا يمه خلك مرتاح.. جابت الشاي وقعدوا يشربون وعبدالله يطالع الاخبار.... ام عبدالله:عبدالله.. عبدالله:نعم يمه؟ ام عبدالله:انت تعبان؟ عبدالله:تعبان؟..لا..ليش؟ ام عبدالله:ماادري احس ان فيك شي.. عبدالله:لا يمه انا بخير تطمني.. ام عبدالله:حلفت عليك تقول الصج.. عبدالله:دام حلفتي خلاص بقولج..اليوم عمي جاني المكتب.. ام عبدالله(مستغربة):عمك!!..ايش بغى منك؟ عبدالله:ماتتصورين يايمه اشلون انصدمت بوجوده جدامي..قلت الحين بيسوي شي وبيحرجني جدام الناس.. ام عبدالله:ايش بغى؟ عبدالله:سمّعني جم كلمة عن خاطره.. ام عبدالله:ايش قالك؟ عبدالله:قعد يحاجيني بهدواه واحترام..انا عمك وحسبت ابوك وانت غلاتك من غلات عيالي..ليش ماتزورني..ماتسأل عن عيال عمك..ويقول انهم طالعين الشاليهات آخر الاسبوع وقالي جيب امك وخواتك وتعالوا نقعد جميع.. ام عبدالله:والله ريلي ماتطب مكانهم..زوجته ماتطقيني ولاتحب تشوفني..تبيني اروح اقعد وياها؟..ولابناته اللي مايحترمون وجودي..مرة عودة قاعدة بينهم مايعطوني وجه.. عبدالله:ليش عياله شنو..لشافوني يسوون عمرهم ماشافوني ويحقروني ويمشون..ولاتبين انسى كلام عمي اللي كان يسمعني اياه دايما مع تهديداته..آآآه يايمه الله يسامح ابوي اللي وثق بأخوه.. ام عبدالله:الله يرحمه..ليش هو الوحيد اللي وثق في اخوه ولادخل شراكه وياه..وايد ناس سووها.. عبدالله:بس يايمه غلط..ابوي غلط واحنا قاعدين ندفع ثمن هالغلطة.. ام عبدالله:ايش قلت حق عمك؟ عبدالله:قلت له ان حسنة عندها امتحانات ومانقدر نيي..قالي تجيب كتبها وتدرس هناك..قلت له مااقدر انا ادرس دكتوراه وعندي دراسة..قالي خلاص خل الوالدة والبنات يجون..ماادري في ايش يفكر..اكيد في شي في باله..بس يحلم يوصل للي يبيه.. ام عبدالله:المهم مشيته؟ عبدالله:مشيته..آخر شي قالي..اسمعني ياولدي ياعبدالله..اي شي تحتاجون ولاناقصكم شي مايردك الا لسانك.. ام عبدالله:الدنيا ياولدي فيها العجب.. عبدالله:يمه ديري بالج لاتفتحون الباب لأي حد مهما قالج اني مطرشه..حتى لو كان عمي لاتفتحون الباب.. ام عبدالله:ماافتح له الباب! عبدالله:اي يمه قولي له ولدي مو في البيت ومااقدر ادخلك..لازم يعرف ان ماكو امل انه يقنعنا باللي يبيه.. في الشركة.... فهد:علي اتصل في يوسف خله يمرني المكتب.. علي:ان شاء الله.. فهد:ايش صار على المناقصة عرضتوها في الجريدة؟ علي:اي نعم اليوم عرضناها.. فهد:وفي حد جاكم؟ علي:في واحد وقال يبي يشوف الوالد.. فهد:انزين اذا في حد قدم على هالمناقصة حوله على راكان.. علي:حاضر..تامرني بشي ثاني؟ فهد:لا.. راكان(يدخل):السلام عليكم.. فهد:وعليكم السلام.. راكان:شنو حصلت تذكرة؟ فهد:باجر على الساعة 7 الصبح.. راكان:انزين انت فاضي الحين؟ فهد:ليش عندك شي؟ راكان:عندي شي ابيك تشوفه.. فهد:اقعد.. راكان(قعد) قعد فهد يقرأ....يندق الباب... فهد:تفضل.. يوسف(يدخل):السلام عليكم.. الجميع:وعليكم السلام.. فهد:هلا يوسف..أخبارك؟ يوسف:بخير.. فهد:حياك.. يوسف(يقعد) راكان:اشلونك يوسف؟ يوسف:بخير..انت اشلونك؟ راكان:الحمدلله.. فهد:يوسف ايش صار على ربعك..حصلت لنا حد؟ يوسف:اخوي رد علي ويقول ان في واحد يبي يقابلك ويبي يعرف منك التفاصيل.. فهد:اوكي..اتصل فيه وقوله انا في انتظاره الساعة 6 ونص بعد المغرب.. يوسف:حاضر.. في السيارة.... فارس:ايش رايج قبل لنروح الجمعية نروح نشرب لنا شي؟ شيخة:على راحتك.. فارس:ايش في خاطرج بارد ولا حار؟ شيخة:بارد.. فارس:خلاص بوديج مكان عليه عصاير وكوكتيلات رهيبة..بس شوي مكانه بعيد..بس طعمه يسوى هالدرب كله.. في الشركة.... فهد:ايش تشرب؟ راشد:قهوة.. فهد:صب يابوحسين.. بوحسين:ان شاء الله.. بعد الضيافة..... فهد:انزين يادكتور راشد..ممكن تعطينا معلومات او اذا عندك سؤال ودك نجاوب عليه.. راشد:من وين تعرف اني دكتور؟ فهد:أفاا يادكتور..من مايعرف الدكتور راشد.. راشد(ابتسم):انزين يافهد..ممكن اعرف وين المستشفى وليش تسكرت من قبل وشنهي الاقسام الموجودة يعني ابي شوية معلومات.. فهد:المستشفى كبير وفيه جميع الاقسام..حتى قسم الطوارئ موجود..لكن سكروا المستشفى لأن كانت عليها شكاوي على الدكاترة والاخطاء اللي صارت خاصة ان في ناس راحوا فيها..وكانت في شكوى على النظافة..ومن هالاشياء.. راشد:وانت كنت صاحبه؟ فهد:لا..انا شريته وابي اعيد المستشفى من الاول وجديد..يعني من اقسام جديدة وتصليحات واشتري اجهزة اذا ماكانت موجودة والاهم من هذا ابي اغير اسمه.. راشد:ليش؟ فهد:هذا هو طبيعة شغلي.. راشد:انزين..انا اقدر اساعدك كون اني قعدت ادرس هناك فترة طويلة.. فهد:انت درست البكالريوس؟ راشد:البكالريوس والماجستير والدكتوراه بعد.. فهد:ماشاء الله عليك..ايش رايك يادكتور راشد انت تدير المستشفى؟ راشد(ابتسم):ياليتك جيتني قبل جان قدرت اديرها لك..بس الحين صعبه..انا متزوج وعيالي كبار..ومااقدر اهد البيت.. فهد:الله يخليهم لك..شنهي نوع المساعدة اللي بتقدمها لي؟ راشد:انا اقدر اساعدك اوفر لك احسن الاطباء في المستشفى..واقدر اقولك شنهي الاجهزة الضرورية اللي لازم تتوفر في كل المستشفى..راح أخلي المستشفى من أحسن المستشفيات بس على شرط.. فهد(استغرب):شرط؟!!..شرط وشو؟ راشد:هالمستشفى لازم يكون باب خير لك وللناس.. فهد:مافهمت قصدك.. راشد:انا عارف ان تكاليفها راح تكون كبيرة عليك بس انت لازم تنزل اسعار المستشفى..وتراعي الطبقات المختلفة بين الناس..يعني..مو كل الناس قادرة تدفع هالمبالغ الغالية للعلاج..انت تدري ان التصوير بأنواعه والتحاليل والكشف غالي..ومااعتقد تحصل حد يراعي ظروف الناس.. فهد:والله ياليتك يا دكتور راشد انت اللي تدير المستشفى..كنت باقعد وانا بالي مرتاح.. راشد:موافق؟ فهد:موافق..وانا معاك في كل كلمة قلتها..وبسعى ان المستشفى يكون مثل ماقلت..بس تعرف حد يدير لي المستشفى؟ راشد:لاتحاتي هالشخص موجود..بس اصبر شوي..انت متى مسافر؟ فهد:باجر الصبح.. راشد:تقدر تأجله شوي.. فهد:ليش؟ راشد:علشان اقدر اسافر معاك..واقدر ارتب امورك.. فهد:والله اني مستانس بجيتك ومساعدتك..ويوسف له مني هدية لأنه عرفني على واحد مثلك.. راشد:هذا من طيب اصلك يافهد..(قام) فهد:وين؟ راشد:عندي شغل لازم اروح..حاول تأجل السفرة لين يوم السبت.. فهد:بس السبت بعيد.. راشد:عندي عمليات لين السبت.. فهد:يعطيك العافية.. راشد:الله يعافيك..انا في الانتظار..فمان الله.. فهد:فمان الله.. طلع راشد...ودخل علي... فهد:كلم يوسف وقوله اني ابيه.. علي:حاضر طال عمرك..تامرني بشي ثاني؟ فهد:اي..أجل سفرة لندن ليوم السبت بعد الظهر.. علي:واذا ماحصلت؟ فهد:خلها الاحد.. علي:تامرني بشي ثاني؟ فهد:لا..بس لاتنسى يوسف.. في السيارة.... فارس:استانستي؟ شيخة:وايد..والايس كريم عجبني وايد..لازم مرة اجيب بنت خالي.. فارس:ان شاء الله..الحين نروح الجمعية؟ شيخة:اي.. فارس:ياللا مشينا.. في الشركة.... يوسف:نعم طال عمرك؟ فهد:انت تستحق مني هدية كبيرة.. يوسف:أنا!!..ليش؟ فهد:علشان عرفتني على راشد.. يوسف:والله اللي عرفاك على الدكتور راشد رفيج اخوي.. فهد:اي بس هذا كله عن طريقك..المهم لك مني شي..بس مب قايل لين ماارجع من سفرتي والامور كلها منتهية.. يوسف:على راحتك.. في بيت بوراشد... شيخة قاعدة ترتب الاغراض اللي شروها..وفارس كان يبدل ملابسه وعقب قعد على الكنب وفتح التلفزيون..... شيخة:ودك تشرب شي ولا حاب تنزل تحت؟ فارس:لا بنزل تحت بشرب الشاي ويالوالد والوالدة..عطيني علبة الكافي اللي شريناها.. شيخة:من عيوني..(جات ومعاها صندوق حلو اول مرة يشوفه فارس) فارس:شنو ذي؟ شيخة(ابتسمت):افتح وبتعرف.. فارس(استغرب فتح الصندوق وشاف الكوافي كلها اللي شاريينها بكل أحجامها حاطتهم في الصندوق):ياسلام عليج ياشيخة..شكلي بقعد هني وباكل في هالكوافي لين ماتخلص.. شيخة(ضحكت) فارس(مسك يدها وقعدها):تعالي جنبي..حبيت الكافي أكثر من هالحركة اللي سويتيها.. شيخة:قولي شنهي الاشياء اللي ماتحبها وانا بخليك تحبها.. فارس:ياسلام عليج بتغرقيني بالعسل انت.. يندق الباب...قام فارس وفتح الباب..... سلوى:مساء الخير.. فارس:هلا والله بسلوى..مساء النور.. سلوى:جدي يقولك انزل.. فارس:ياللا كاني جاي.. تحت..... بوراشد:وين شفته؟ راشد:اليوم رحت له الشركة..تعرفهم؟ بوراشد:يابوك من مايعرفهم..ذولا هوامير معروفين في السوق..ومن يوم يومهم وهم ماشاء الله عندهم خير..هذا بوفهد بدى تجارته اول شي فتح له خياط عقب دكان وشوي شوي جات فلوس في يده فتح له شركة ****ات..وكبرت هالشركة وصار يستثمر فلوسه في وايد اماكن وميراث ابوه ساعده في تحسين وضعه المادي..لين ما الله رزقاه بخير وفتح له هالشركة العودة.. راشد:بس تدري يبه عياله ماشاء الله عليهم ناس متواضعين وأخلاقهم عاليه.. بوراشد:هو ايشقد عنده عيال؟ راشد:ماادري..بس اللي شفته فهد.. بوراشد:متزوج؟ راشد:ماعندي فكرة..يقولي ياليتك تقدر تدير المستشفى.. فارس وشيخة يقعدون.... فارس:السلام عليكم.. الجميع:وعليكم السلام.. ام راشد:شيماء قومي صبي الشاي لأخوج.. شيماء:ألحين بس خلني اخلص هالجملة.. ام راشد:قومي يابنت..لما اقولج شي قولي لبيه وفزي.. شيماء:عاد يمه شوي شوي علي..فشلتيني..لازم تزاعقين في وجهي.. ام راشد:تستاهلين..قومي ياللا.. شيماء(قامت):شيخة ترى عادي..تراج بتتعودين على التهزيئة اللي احصلها من امي كل يوم.. شيخة(تبتسم) فارس:ماقلت يابوعيسى ايش سويت اليوم شفت الريال؟ راشد:اي رحت له..واتفقنا على اشياء..بس ان شاء الله مسافر وياه.. سلطان(هد الكتاب):وين؟؟ راشد:بسافر لندن.. سلطان:يبه بتسافر؟؟ الجوهرة:أقول ليش تدرس هني..هذا مو مكان دراسة..روح غرفتك.. سلطان:بالاول ابوي يكمل سالفته.. فارس:وليش بتسافر وياه؟ راشد:علشان اقدر ارتب اموره واشوف له اللي بيدير له المستشفى والدكاترة.. فارس:وحاط في بالك حد يديرها؟ راشد:اي.. فارس:من؟ راشد:البروفيسور عمر.. فارس:والله وزين اخترت..ماشاء الله عليه هذا الدكتور عجيب..يعني اخترت الشخص المناسب في المكان المناسب.. سلطان:يعني انت مسافر؟ راشد:ان شاء الله.. سلطان:واحنا؟ راشد:انتوا شنو؟ سلطان:ماتودينا وياك؟ راشد:ليش ماوراكم مدرسة؟ سلطان:بلا.. راشد:باجر ان شاء الله لخلصت الثانوية بتسافر لندن وبتدرس طب وبتشبع من السفر.. سلطان:اصلا انا مب دارس طب.. راشد:نعم؟!! سلطان(قام):انا زين اخلص ثانوية.. بوراشد:بتدرس طب مثل ابوك غصب عنك.. فارس:حجزت للسفر؟ راشد:هم بيتكفلون فيها..قال بيتصل فيني علشان يخبرني عن موعد السفر.. في يوم الاربعاء...الساعة 12 الظهر...... سوسن:انا خلاص مابقدر اتحمل اكتر من هيك..بدي آكل شي جوعانة..من الاولى مااكلت شي لين هلى.. وديمة:وليش ماتريقتي؟ سوسن:مش متعودة.. وديمة:ياحظج محد يجبرج.. سوسن:شو؟ وديمة:ماشي..اذا جوعانة روحي خذي لج شيبس ولا كافي..لأن بنتأخر على المحاضرة.. سوسن:وانت مابدك شي؟ وديمة:لا ماابي..بس لاتأخرين انا بانتظرج في القاعة.. في مكتب محمد وأحمد.... محمد(قام):بروح اقدم الاجازة.. أحمد:اجازة العرس؟ محمد(وهو مستانس):اي.. احمد:وايشقد مقدم اجازة؟ محمد:اسبوعين.. احمد:ياحظك بتفتك من وجه بوعابد.. محمد:في هذي صدقت..ياللا انا رايح.. العصر...عيسى يرد من المسجد..... عيسى:سلطان..سلطان.. سلطان(وهو نايم):شنووو؟ عيسى:قوم صل.. سلطان:زين زين.. عيسى طلع من الغرفة وراح غرفة البنات.... عيسى:السلام عليكم.. سلوى:وعليكم السلام.. عيسى:مشاعل راقدة؟ سلوى:اي.. عيسى:انزين قولي لي عندج اوراق A4؟ سلوى:اي عندي..ايشقد تبي؟ عيسى:عطيني 25 ورقة.. سلوى(قامت علشان تعطيه الاوراق) عيسى:سمعي انا بطلع عندي شغل..روحي عقب شوي طلي على سلطان..علشان يقوم يصلي العصر..واذا شفتي امي قولي لها اني طلعت.. سلوى:انزين.. وديمة تنزل على الساعة 6 ونص وتنزل اللاب توب وكتابها واوراقها تحطهم وتروح المطبخ تسوي لها كوفي...شغلت التلفزيون وقعدت.... الجدة(تيي):تدرسين يمه؟ وديمة:اي.. الجدة:انزين انا رايحة اتسبح.. وديمة:خالي راقد؟ الجدة:لايمه طلع قبل شوي.. وراحت الجدة وتمت وديمة بين الدراسة وتشوف تلفزيون وتشرب الكوفي...جى خالد وهو يمشي بعكازته..حصلها على هالحال..وانتبه كوب الكوفي وقف جدامها خذ الكوب وخذ له رشفه ورده..ووديمة تطالعه بعيون مستغربة.... وديمة:اذا تبي بروح اسوي لك.. خالد:لا مااشتهي.. وديمة:عيل ليش شربت؟ خالد(قعد):كنت بتأكد اذا فيه سكر ولا لا.. وديمة:وايش حصلت فيه؟ خالد:لا مناسب.. وديمة:الحين اشلون اشرب؟ خالد:يعني شنو؟ وديمة:لازم اروح اسوي لي واحد ثاني.. خالد:وليش ماتكملينه؟ وديمة:مااحب اشرب شي حد شارب منه.. خالد(عصب وكط عليها المخدة):بس قربي مني لأضربج بالعكازة .. وديمة(تضحك):ليش انا ايش سويت..ماقلت الا الصج.. خالد:ييلج الشرف تشربين وراي كلها بركة..قعدي مكانج بسرعة وشربي كله جدامي.. وديمة:ماابي..مااقدر.. خالد:قلت لج قعدي شربيه.. وديمة:ماابي.. خالد:والله لو ماشربتيه بعلمج من خالد.. وديمة(باستسلام):زين بس لاتعصب.. شيخة قاعدة في غرفتها وهي تدرس حق الامتحان...يندق الباب..... شيخة(تروح تفتح الباب):شمة...هلا.. شمة:اشلونج؟ شيخة:بخير..انتي اخبارج؟ شمة:بخير.. شيخة:حياج..تعالي.. دخلوا... شيخة:حياج قعدي.. قعدت شمة.... شمة:وين فارس؟ شيخة:طالع.. شمة:زين فرصة علشان نزورج..اصلا امي سألت عنج وقالت لي روحي شوفي شيخة وينهي ليش مانزلت وجيت اشوفج.. شيخة:حياج حبيبتي..فارس محد..وانا عندي امتحان فقلت استغل الفرصة علشان ادرس..(قعدت)...عيل وين شيماء؟ شمة:تحت تحل واجباتها.. شيخة:اشلون الدراسة وياكم؟ شمة:زينة..دراسة الجامعة اسهل من المدرسة؟ شيخة:لا طبعا..الحياة الجامعية شي ثاني..لخلصتي الثانوية ان شاء الله بتعرفين شنهي الجامعة على اصولها..(قامت)..خلج قاعدة الحين بيي..قولي لي تحبين تشربين عصير ليمون تفاح مانجا جوافة؟ شمة:واو عندكم عصير...اممم بشرب مانجا.. شيخة(راحت تييب العصير):شمة فتحي الصندوق اللي عندج.. شمة:من صجج افتحه؟ شيخة:اي فتحيه وخذي اللي تبينه.. شمة(فتحت الصندوق وحصلت كوافي استانست خذت لها كافي) شيخة(جات ومعاها عصير وشيبس):تفضلي.. شمة:دلعتيني وايد ياشيخة..وينها شيماء مابتقوم من هني.. فارس يدخل البيت ويسلم..... ام راشد:وين كنت يمه؟ فارس:كان عندي شغل ويالربع..عيل وين شمة؟ ام راشد:طرشتها علشان تشوف زوجتك وينهي فيه ليش ماتنزل راحت ومارجعت.. شيماء:تحصلين شموه تسولف في التليفون.. فارس:انا بروح اشوفها.. راح فوق ودخل... فارس:عندنا ضيوف..حيالله بضيوفنا..السلام عليكم.. الجميع:وعليكم السلام.. فارس(يقعد):اشوف العصير والشيبس والكافي..وانا وين نصيبي؟ شيخة:من عيوني الحين بجيب لك..(قامت فارس مسك يدها وقعدها) شمة(قامت):الحين امي تحصلونها معصبة علي لأني تأخرت عليها.. فارس:امي معصبه وخالصة..خلج مستعدة.. شمة:الله ياستر..باخذ نصيبي مابخليه هني..ياللا باااي.. شيخة(ضحكت عليهم) شمة راحت... فارس(ماسك يدها ويطالعها بنظرة):تأخرت عليج؟ شيخة:يعني.. فارس:طول الوقت وانا افكر فيج وودي ارجع بسرعة..اشتقت لج.. شيخة(ابتسمت بخجل) فارس(قام):ابدل ملابسي وننزل تحت علشان نتعشى.. دخل الغرفة... فارس:كنتي تدرسين؟ شيخة:اي عندي امتحان.. فارس:متى؟ شيخة:الخميس.. فارس:وبديتي؟ شيخة:تقريبا.. فارس:اذا محتاجة مساعدة تراني مستعد.. تحت.... شيماء:شمووه من وين لج؟؟ شمة(تحرها):شيخة عطتني..حرة.. شيماء:انا ابي.. ام راشد:مو وقته هالخرابيط الحين بنتعشى.. شيماء:ماابي ماابي..ابي مثل شمة.. ام راشد:شيماء حركات الياهال مالي خلقها..خلج عاقل.. فارس وشيخة ينزلون.... فارس:ماقلت لج شيخة ان شيماء جذي بتقول.. شيخة(ضحكت):الحين بروح اجيب لج.. ام راشد:ان رحتي ياشيخة ماكلمج.. شيخة:مساج الله بالخير عمتي.. ام راشد:مساج الله بالنور فديتج..وينج يمه مانزلتي.. شيخة:عندي امتحان وكنت ادرس..(قعدوا) شيماء:يمه ليش ماتخلين شيخة تجيب لي؟ ام راشد:لأن مو وقت هالاشياء..الحين بنتعشى.. فارس:وين ابوي؟ ام راشد:الحين بيوصل..راح القهوة.. وتمر أيام..ويسافر راشد ويافهد لندن....وهم بالمطار..... فهد:تراك معزوم عندي وبتبات وياي في الفيلا.. راشد:مشكور وماقصرت..لكن انا مب جاي وياك.. فهد:ليش؟ راشد:ان شاء الله بيكون بينا اتصال.. فهد:لا يادكتور راشد انت ضيفي ولازم تكون وياي..وماراح ارضى انك تبات بمكان غير فيلتنا.. راشد:انا مواعد واحد من الربع يمرني ونروح.. فهد:لاتخليني احلف عليك..انت جاي وياي..والفيلا مافيها حد غير الخدم فبتاخذ راحتك.. راشد:مابغيت اثقل عليك.. فهد:لاانت مثقل علي ولاشي..انا بكون سعيد بضيافتك يادكتور راشد..خلنا نمشي اعتقد السايق في انتظارنا.. محمد يتصل في أحمد ويلبس وينزل تحت...... ام يوسف:وين طالع؟ محمد:بروح ويارفيجي..تبين شي يمه؟ ام يوسف:بغيتك توديني الجمعية ابي اشتري شوية اغراض للبيت..ابوك مريض ومايقدر يوديني..ويوسف في الدوام.. محمد:ابوي خذ دواه؟ ام يوسف:اي عطيته.. محمد:اذا تبين اوديج الجمعية..باتصل في رفيجي وبقوله اني مب جاي.. ام يوسف:لا يمه روح..وانا بروح بوقت ثاني.. محمد(قعد):لا خلاص ماني رايح..انت اهم.. ام يوسف:صدقني يمه الاغراض اللي ابيها تتأجل..انت روح.. محمد:على راحتج يمه..بروح(قام)..وبحاول اني ارد بسرعة.. ام يوسف:دير بالك وانت تسوق لاتسرع.. محمد:ان شاء الله.. في السيارة....أحمد يغير الاذاعة ويحط اغنية..... محمد:يااخي ليش غيرت.. احمد:حاط لي اخبار وتقولي ليش غيرت..لاعت جبودنا من الاخبار..وياليت في شي جديد.. محمد:احسن من هالاغنية اللي انت حاطها.. احمد:شنو مقاطع الاغاني؟ محمد:لا..بس قاعد احاول اني اقاطعها لأنها ماجابت لي غير الهم والذنوب.. احمد:يااخي شنسوي قلوبنا تعلقت بهالاغاني ومااحنا قادرين على فرقاها.. محمد:لو تبي بتفارقها طول العمر..تصدق تعرفت على واحد في المسجد وقعدت اسولف وياه ساعتين..وتحجى عن الاغاني..واستغربت انه مايسمع اغاني كلش..جان يقولي انا كنت اسمع اغاني 20 سنة لكن عقب ما الله هداني تركتها للأبد وبدلتها بالاناشيد والقرآن.. احمد:واشلون تحمل؟ محمد:الارادة وحب الله..تدري شنو قال بعد؟ احمد:ايش قال؟ محمد:قال يوم قررت اترك الاغاني رحت خذت كل الاشرطة والسديهات ووديتهم يحولونها لي للقرآن وتروح توزيع خيري.. احمد:ايش هالقوة القلب اللي كانت عنده؟ محمد:ايييه يااحمد..الناس قاعدة تفكر بالاخرة واحنا مشغولين بهالدنيا..ماادري وايش بنحصل من هالدنيا غير اعمالنا الصالحة.. احمد:اشوفك قلبت علي شيخ المسجد.. محمد:شسوي يااحمد..كل مااروح المقبرة علشان نحضر دفن حد من الجماعة ولا حد نعرفه اقول بخاطري لو انا مكان هالشخص هل انا مستعد ولا لا..اقدر اجاوب على اسئلة منكر ونكير؟..بعّدي عذاب القبر ولا لا؟..بدخل الجنة ولا لا؟؟...أسئلة كثيرة يااحمد تدور في بالي.. احمد:يالله بحسن الخاتمة.. محمد:آآمين..تبي تدفع فاتورتك؟ احمد:اي بدفع الفاتورة وعقب بروح آخذ ساعتي من التصليح.. محمد:متى وديتها؟ احمد(نزل من السيارة):قبل ثلاثة ايام.. محمد(ينزل):من غيري؟ احمد:شسوي كنت راد من الدوام قلت اوديها شسوي ابي البسها ماني قادر بسبت البطارية.. محمد:خل نحاول نخلص من وهل.. احمد:ايش عندك بتروح عندها؟ محمد:لا طبعا..خلاص مااقدر اشوفها لين ليلة العرس.. احمد:متعذب؟ محمد:لملجت ان شاء الله بتحس فيني.. احمد:المهم تكلمها.. محمد:مب دايما..تدري العروس لقرب عرسها تنشغل وايد.. احمد:عيل ايش عندك تبي ترد مبجر؟ محمد:عندي شغل ويالاهل.. احمد:هذا مب صلاح؟ محمد:اي صلاح؟ احمد:صلاح اللي كان ويانا بالجامعة.. محمد:وينه؟ احمد:كاهو مناك واقف عند محل التليفونات.. محمد:اي والله صلاح..امش نسلم عليه.. بعد اربعة ايام... خالد يطلع من المستشفى وياعبدالله...وهم في السيارة...... عبدالله:الحمدلله ان ريلك في تحسن.. خالد:الحمدلله..ماتتخيل ايشكثر كنت احاتي العملية.. عبدالله:استمر على العلاج علشان على آخر الشهر يشيل لك الجبس.. خالد:ان شاء الله..الحين تحمست للعلاج اكثر.. عبدالله:خلني اوصلك الشغل وانا اروح شغلي لأن عندي اجتماع..وعقبها عندي محاضرة.. خالد:عطلتك معاي.. عبدالله:اقول لو تسكت يكون احسن.. خالد:متى بتخلص محاضرتك اليوم؟ عبدالله:على الست.. خالد:الله يكون بعونك.. في الجامعة... وديمة قاعدة قريب كلية العلوم... وديمة:شيخوه وينج فيه؟.....ياللا بسرعة...بااي.. شوي وتوصل شيخة..بعد السلام... شيخة:اشلونج؟ وديمة:بخير..(مدت يدها) شيخة:لي؟ وديمة:شور.. شيخة:فديت قلبج ودوم..حبيبتي انتي..من وين لج الوردة؟ وديمة:من بيتنا..عجبتج؟ شيخة:وااايد.. وديمة:خلاص خذيها حق ريلج على اساس منج.. شيخة:فكرة..خلني احافظ عليها.. وديمة:متى بتردين؟ شيخة:بخلص 2.. وديمة:ريلج بيمرج؟ شيخة:ان شاء الله.. وديمة:انزين امشي خلنا نروح نشتري شي نشربه ولا ناكله وعقب نروح المحاضرة.. وهم يمشون... شيخة:اخبار امج وابوج؟ وديمة:بخير.. شيخة:مب رادين؟ وديمة:يقول يمكن ييون حزة اجازة الكريسمس.. شيخة:ان شاء الله ييون علشان تستانسين.. وديمة:اشلون حياتج ويااهل ريلج؟ شيخة:الحمدلله..قلت لج من قبل ان فارس عنده خوات توم؟ وديمة:لا.. شيخة:ايش دعوة ماشفتيهم في العرس؟ وديمة:ماانتبهت انهم توم.. شيخة:عنده خوات توم..ماتتخيلين ياوديمة ايشقد حليوات..عليهم خفة دم..وكل شوي امهم تناجرهم..وانا اضحك على حركاتهم.. وديمة:شسمهم؟ شيخة:شيماء وشمة.. وديمة:ايش كبرهم؟ شيخة:ثاني ثانوي.. في المدرسة...في الصف...شيماء تقوم وتقرب من المدرسة..... شيماء:أبلة رايحة الحمام.. المدرسة:انت تستأذنين ولا بس تخبريني؟ شيماء:اللي تحبينه ابلة.. المدرسة:صج انتوا جيل مايستحي على وجهه.. شيماء:ابلة انا ايش قلت؟؟ المدرسة:لازم تقولين ابلة ممكن اروح الحمام.. شيماء:يعني فرق المعنى؟..المهم انا ابي اروح.. المدرسة:ماانتي رايحة.. شيماء:اي عاد ليش؟ المدرسة:في شي مهم بشرحه الحين.. شيماء(بصوت واطي):امحق شرح.. المدرسة:نعم؟!! شيماء:ولاشي..بس انا ابي اروح الحمام بسرعة..حرام عليج ابلة.. المدرسة:سمعي ياشيماء..روحة للحمام مافي..وياللا اشوف مكانج.. شيماء:لاحول ولا قوة الا بالله.. المدرسة:وبعدين وياج.. شيماء:ياربي..انا ايش قلت؟ المدرسة:وتراددين..انا لما كنت كبركم ماكنت ارفع راسي او احط عيني بعين ابلتي وانتوا عليكم لسان.. شيماء(راحت تقعد) المدرسة:زين عقلتي.. شيماء(بصوت واطي):ماعقلت بس انا برويج من شيماء.. رن الجرس.... شيماء(قامت وصفقت بقو):ياللا بنات خلنا نستغل الخمس دقايق.. المدرسة(عصبت):شيماء..ايش هالقلة الادب؟ شيماء:اعتقد الحصة خلصت ..(مشت لين وصلت عند الباب)..عن اذنج ياابلة..ياللا شمة.. | ||||||||
|
| |
|
11-12-13, 10:38 AM
| #24 | ||||||||
| مراقبة عامة ومشرفة منتدى الروايات المنقولة
| متابعة فصل الـ 11 في بيت بوفهد.... كاملة:ماقلتي لي ياموزة..ايش صار على هبة؟ ام فهد:ولاشي..فهد شكله خلاص مايبيها.. كاملة:لاحول ولا قوة الا بالله..امها وابوها ليحين ماردوا من السفر؟ ام فهد:لا..شكلهم مطولين..الظاهر بوهبة مطول في العلاج.. كاملة:انزين ماحاولتي تصالحونهم؟ ام فهد:عيزت وياه..ماكو فايدة..يقول هذا قرار اتخذته وماني راجع فيه.. كاملة:متى بيرد من السفر؟ ام فهد:عقب باجر ان شاء الله.. كاملة:خلاص انا بحاول فيه يمكن يغير رايه.. ام فهد:ياليت ياكاملة.. في المدرسة...عند الاخصائية..... الاخصائية:شيماء جات اليوم مدرسة العلوم تشتكي منج؟؟ شيماء:وانا ايش سويت؟ الاخصائية:تقول انج قليتي ادبج عليها.. شيماء:انا؟!! ..الله واكبر عليها..ابلة اللي صار اني قلت لها ابي اروح الحمام وهي ماخلتني ترجيت فيها وهي مب راضية تقول ابي اشرح شي مهم عاد والشرح.. الاخصائية:شيماء.. شيماء:وانا صاجة ياابلة..تخيلي علوم يبيله شرح وهي ماتعرف تشرح تقرأ..يعني احنا مانعرف نقرأ؟..المديرة تدري انها ماتعرف تشرح..بس شنسووي.. الاخصائية:جيبي لج مدرس خصوصي.. شيماء:مااقدر..يعني انتوا ماتوفرون لنا مدرسات كفء واحنا نكسب المدرسين الخصوصيين.. الاخصائية:شيماء..لاحظي ترى انت قاعدة تحاجين ابلتج ماني اختج شمة.. شيماء:ابلة انا ايش قلت علشان تهاوشيني.. الاخصائية:انا فاهمتج ياشيماء..بس انت لازم تحترمين اللي اكبر منج..يعني انت لما تكلمين اختج شمة مو مثل لما تكلمين امج ولا ابوج..صح ولا انا غلطانة؟ شيماء:ابلة انا عندي كلكم واحد..دام اني مااغلط.. في بيت بوسلمان.... عيسى:يمه تراني بسافر الاردن.. الجدة:ايش عندك في الاردن؟ عيسى:شغل عندنا مشهد تمثلي.. الجدة:ومتى رايح؟ عيسى:يمكن عقب اسبوعين ثلاث.. الجدة:وبتطول؟ عيسى:ماادري على حسب..شنو الغداء تراني ميت من الجوع.. الجدة:مسوية لكم برياني.. عيسى:انزين انا نجبي لي ابي آكل الحين وبروح ارقد لأن العصر عندي شغل وطالع.. في البيت....تدخل شيماء وشمة مع الخدامة وهي شايلة شنطهم.... ام راشد(بعصبية):شيمااااء.. شيماء:بسم الله الرحمن الرحيم..امي شكلها معصبة الله ياستر.. شمة:شمسويه؟ شيماء:ايش دراني..خير يمه؟ ام راشد:انت ماتستحين على وجهج..البنات بكبرج متزوجات وعندهم عيال وانت مسودة وجيهنا جدام خلق الله.. شيماء(تطالع شمة وهي مستغربة):أنا!! ام راشد:لا أجل انا..يابنت عقلي في حد يسوي سواتج فشلتيني شيقولون عني الناس ماتعرف تربي عيالها.. شيماء:يمه انا ايش سويت؟ ام راشد:انت اللي قولي لي شمسويه اليوم بالمدرسة؟ شيماء(تطالع شمة):انا!!..شمسوية؟ شمة:يمه شيماء ماسوت شي اليوم؟ ام راشد:عيل ليش الاخصائية متصلة وتقولي تعالي باجر.. شيماء:يمكن تبي تشكرج على انج جبتي وحده مثلي.. ام راشد:الا هذي مااصدقها..الا انت مسويه شي.. شمة:انزين يمه هي ماقالت لج ليش تبيج؟ ام راشد:قالت لي لجيتي بتعرفين..لكن سمعيني ياشيماء ان دريت انج مسوية شي غلط والله لأسوي فيج شي عمري ماسويته اضربج ضرب جدام البنات.. شيماء(تقرب من امها):أفاا يمه اهون عليج تسوين فيني جذي..انا بنتج آخر العنقود..(تبوسها) ام راشد:وخري عني..ملعوزتني..كل شوي حد يتصل من المدرسة ويشتكي منج..انتي ماتيوزين من هبالج..عقلي..بنات كبرج متزوجات وعندهم عيال.. شيماء:انا اقولج زوجيني لكن ماانت راضية.. ام راشد(تضربها بعصاتها):جليلة حيا ماتستحين على وجهج..هذي آخر تربيتي فيج.. شيماء:عاد يمه انا ايش قلت؟ ام راشد:استحي على وجهج..بنت تقول هالحجي حق امها.. شيماء:يمه اذا ماقلت لج انت اقول لمن..انت امي واولى من غيرج.. شمة(تضحك) ام راشد:رفعتي لي الضغط والسكر..ذلفي عن وجهي.. شمة:شيوم قومي لتقعد فيج ضرب.. وهم يتغدون..... ام يوسف:خذت لك اجازة يمه؟ محمد:اي يمه.. يوسف:وايشقد خذت اجازة؟ محمد:اسبوعين..مارضوا اكثر.. ام يوسف:اسبوعين زينين.. بويوسف:مو ناقصك شي؟ محمد:لا يبه.. يوسف:انا ان شاء الله يوم العرس باخذ اجازة.. بويوسف:وايش صار على بيتك؟ محمد:البيت جاهز..بس بقى المطبخ..قلت بخلي لها..شغلة حريم هذي.. الساعة 4 العصر.... فارس:عندج شي باجر؟ شيخة:قصدك امتحان ولا شي؟ فارس:اي.. شيخة:لا ماعندي..ناوي توديني مكان.. فارس:والله في خاطري.. شيخة:وين؟ فارس:بوديج مكان دايما احب اروح له.. شيخة:شوقتني.. يندق الباب...فارس يفتح الباب.... شيماء:سلالام.. فارس:سلام.. شيماء:اشلونك فارس؟ فارس:طيب..انتي اشلونج؟ شيماء:Fine.. شمة:اشلونك فارس؟ فارس:بخير انتي اشلونج؟ شمة:بخير.. شيماء:جايين نزوركم..في مجال ولامطرودين؟ فارس:ماعاش اللي يطردكم.. شيماء:فديت اخوي.حياج شمة.. وقعدوا... شيماء:عيل وين شيخة؟ فارس:ألحين بتيي..اخبار المدرسة وياكم؟ شمة:فاتك يافارس..امي اشلون تهزأ في شيوم.. فارس:امي دوم تهزأ فيها..ماهو بشي جديد.. شيماء:مامي ماتصدق حد يتصل فيها ويقولها شي عني على طول تطيح فيني هواش.. فارس:أكيد مسوية شي..شمسوية؟ شمة:الاخصائية متصلة في امي وقايلة لها تعالي باجر.. فارس:شمسوية شيوم؟ شيماء:مامسوية شي..عندك شمة اسألها.. شمة:انا مااذكر انها مسوية شي غلط.. فارس:باجر ببين.. شيخة(جات):السلام عليكم..(سلمت عليهم وقعدت)..اشلونكم؟ شيماء:احنا بخير..انتي اخبارج..واشلون اخونا وياج..اذا يأذيج ولاشي قولي لي.. فارس:شيوم سكتي.. شيخة:فارس مايعرف الاذية..قولوا لي ايش تشربون حار ولابارد؟ شيماء:ياسلام عندكم حار وبارد..اممممم...انا ابي بارد.. شيخة:وانت شمة؟ شمة:انا بعد بارد.. شيخة:انزين اي عصير تبون ليمون ولامانجا و..... شيماء(تقاطعها):لاتقولين ماعندكم جوافة؟ شيخة(ابتسمت):بلا عندنا..مع اني مااشرب لكن فارس يشرب.. شيماء:خلاص انا ابي جوافة.. شمة:وانا باشرب مانجا.. فارس:اصلا محد يحب الجوافة في البيت غيري انا وشيماء.. شيخة:وانت فارس ايش تشرب؟ فارس:بشرب جوافة.. شيخة:ضيفهم فارس الين اجي.. فارس:من عيوني...(فتح الصندوق)..تفضلوا.. شيماء:لا..مااصدق..مستحيل.. شمة:الله يهداك يافارس فتحت الصندوق شيماء الحين بتقعد فيه.. فارس:تسويها.. شيماء:امم..اقدر اذوق اللي ابيه؟ فارس:ذوقي..بس اذا ضروسج تسوست انا مالي خص.. شيماء:لو على الضروس بنجيب غيرها..الله يخلي الزراعة.. فارس:والله انا اشك..انت ماينفع معاج الا الطقم الصناعي.. شيماء:لا فارس لاتقول جذي..(تاخذ كافي وتفتحه وتاكل)...يممي..لذيذ.. فارس:شنو انتي اول مرة تاكلين كافي.. شيماء:بهالطريقة اي..كافيكم وايد احلى من اللي اشتريه.. شيخة:تفضلوا..وهذا بسكوت امي مسويته.. شيماء:لا..هذا كثير ياشيخة..انا الظاهر ماني طالعة من عندكم.. شمة:لاتشوفج امي.. شيماء:ماني رايحة جدامها..حبيبتي شيخة..اموت عليج..انا كل يوم عندج.. يضحكون..... في بيت بوسلمان... يرن تليفون وديمة...لكن محد يرد...خالد يدخل البيت.... خالد:السلام عليكم.. الجدة:وعليكم السلام والرحمة.. خالد:عيل وين وديمة؟ الجدة:فوق.. خالد(قعد وشوي يرن تليفون وديمة) الجدة:تليفونها صار له كم مرة ران.. خالد(خذ التليفون):هذي عمتي.. الجدة:رد عليها يمكن تبي شي.. خالد:آلو..وعليكم السلام.....هلا عمتي....بخير الله يسلمج انتي اشلونج؟.....ادري والله اني مقصر بس شسوي انت ادرى بالحال...لا الحمدلله احسن من قبل.....وديمة والله ماادري وينهي فيه..توني راد من برع واسمع تليفونها يرن....شكلها فوق بدارها وناسية تليفونها بالصالة.....ان شاء الله فمان الله.....سلمت عليج.. الجدة:الله يسلمها.. وديمة(تنزل) خالد:وين كنتي؟ وديمة:كنت اسبح..(تقعد) خالد:عمتي اتصلت فيج.. وديمة:عمتي! خالد:اي.. وديمة:جدتي انا جوعانة..شنو بنتعشى؟ خالد:ماشاء الله الشهية مفتوحة.. وديمة:ترى اغير رايي.. خالد:غيري انتي الخسرانة.. الجدة:الحين بخلي الخدامة تنجب لكم.. خالد(قام):وانا بروح ابدل.. في بيت بوراشد.... ام راشد:ان شفتكم شاريين هالخرابيط مرة ثانية.. شمياء:يمه شنو خرابيط..I like it very much.. بوراشد:كم مرة اقولج تحجى عدل.. شمة:مامي هالاكل مافيه شي ساندويتش لحم.. ام راشد:انا مااحبه كلش..وماابي اشوفه مرة ثانية في البيت.. بوراشد:عيل وين فارس وزوجته؟ ام راشد:هم خذوا عشاهم من بدري.. بوراشد:ليش؟ ام راشد:يقول فارس عنده عملية من الصبح..ويبي يطلع بدري فيبون ينامون بدري.. وتمر أيام..كل واحد مشغول بنفسه..وقربت امتحانات آخر الفصل..وعيال المدارس رابطينهم اهاليهم بالدراسة..وعيال الجامعة مشغولين طول الوقت..والفراغ موجود في البيت على فراق حسهم .... عبدالله:فهمتي؟ حسنة:فهمت.. عبدالله:صج؟ حسنة:صدقني فهمت.. عبدالله:بعطيج سؤال وبشوف اذا فهمتي ولا لا.. ام عبدالله(تيي ومعاها عصير برتقال):يعطيكم العافية.. عبدالله:الله يعافيج يالغالية.. ام عبدالله(تقعد):شربوا العصير.. عبدالله(ياخذ منها):تسلم احلى ايدين سوت هالعصير..عسى عمرها طويل ولايحرمنا ابتسامتها.. ام عبدالله:فديت قلبك يايمه.. عبدالله:تعبناج معانا يالغالية.. ام عبدالله:تعبك راحة حبيبي.. عبدالله:بكتب لج السؤال وحليه.. كتب لها السؤال وخذ عصيره وقام... عبدالله:تعالي يمه نقعد هناك.. وقعدوا بالصالة.... عبدالله:اخبار خلود؟ ام عبدالله:بخير..عندها امتحان عقب باجر.. عبدالله:الله يوفقها..خلود ماشاء الله عليها ماينخاف عليها..هي شاطرة وتعرف مصلحتها.. ام عبدالله:وانت صاج يمه.. عبدالله(ركز نظرته على امه..وتذكر كلام خالد له) ام عبدالله:وانت بعد يمه ماشاء الله عليك..كنت شاطر بالدراسة والكل يشهد لك بهالشي..كنت نشيط أذكر يوم كنت بالمدرسة تصلي الفجر وتقعد ترتب اغراضك وتدرس لك شوي لين مايجيك الباص.. عبدالله(مسك يدها وحبها):هذا بفضل الله ثم برعايتج يالغالية.. ام عبدالله(ابتسمت) عبدالله:يمه.. ام عبدالله:عيوني لك حبيبي..قول.. عبدالله(ابتسم):يمه ايش رايج تدورين لنا على بنت الحلال اللي تناسبني.. ام عبدالله:صدق يمه؟؟..انت تقول الصدق؟ عبدالله:مااقول الا الصدق يالغالية..انا ابي اتزوج..وعليج البنت انت اختاريها..ابي وحده تقّدر قيمتج وتحترمج وتحطج فوق راسها.. ام عبدالله:ان شاء الله خلال هالجم يوم بتسمع اخبار طيبة..الله يسعد قلبك يايمه مثل مااسعدت قلبي.. عبدالله:عسى دوم اشوف هالفرحة على هالوجه الحلو.. في غرفة فارس وشيخة.... فارس(في يده النسكافيه):تفضلي حياتي.. شيخة(ابتسمت له):تسلم ايدينك.. فارس:بقى لج وايد؟ شيخة:يعني..فارس روح نام..انت من الصبح كنت في الدوام لين العصر.. فارس:معليه انا جذي مرتاح.. شيخة:جذي بتعبك وياي..تكفى روح نام علشاني..يمكن اطول..وانت باجر من الصبح عندك دوام..لكن انا لا امتحاني العصر.. فارس:خليني معاج..لتعبت برقد.. يوم الأثنين..الساعة 5 العصر..... ام راشد:يابنت قومي اشوف..باجر عندج امتحان.. شيماء:مالي خاطر.. ام راشد:شيوم بالعصا ان ماقمتي.. شيماء:خليني اشوف هالمسلسل بعدين بروح.. ام راشد(عصبت):بتقومين ولا اشلون؟ شيماء:زين زين.. راشد(يدخل البيت):السلام عليكم.. ام راشد:وعليكم السلام.. شيماء:Hi my brother, how are you? ام راشد:والله لتنضربين..(تضربها بالعصا).. شيماء:يمه..حرام عليج.. ام راشد:كم مرة قايلة لج تحجي عدل.. شيماء:شنو محترة علشان ماتعرفين حق هاللغة؟ ام راشد:استعدلي بالحجي..انت يبيلج تربية من اول وجديد.. راشد:عيب ياشيماء.. شيماء:ماتشوفها من الصبح وهي تصارخ علي وودها تضربني.. راشد:لأنج زودتيها وايد.. ام راشد:هاوشها..انت اخوها..عندها باجر امتحان وقاعدة مجابلة هاللي مايتسمى اربع ساعات.. شيماء:يمــــــــــه..اربع ساعات!!..لا 10 ساعات..لاتصدقها..ماصار لي ساعتين.. راشد:شيماء..تحجي عدل عن امي.. ام راشد:خلاص لاتجين عندي ولاتحاجيني.. شيماء(قربت منها وحبت راسها):أفاا مامي..تزعلين مني..اشلون يهون قلبج ماتكلميني؟ ام راشد:لصرتي عاقلة بعدين بحاجيج.. شيماء:مامي..انا آسفة..عاد انا مااقدر على زعلج..سوري مام.. ام راشد:وبعد تحجين بذيج اللغة.. شيماء:شسوي يمه يوم كنا صغار وديتونا علشان نتعلم انجليزي علشان نتحجى عدل..والحين يوم تعلمنا تهاوشونا ليش نتحجى.. ام راشد:والله ماادري شالفايدة من هاللغة..واشفيها لغتنا؟؟ راشد:يايمه الانجليزي بفيديهم حق باجر يوم يدشون الجامعة ولما يشتغلون.. ام راشد:وليش مايدرسون بالعربي..لازم انجليزي؟ راشد:علشان يقدرون يتواصلون مع العالم بسهولة.. ام راشد:يايمه هذا كله حجي فاضي مامنه فايدة..وليش هم مايتعلمون لغتنا..وايش معنى عيالنا؟؟..مثل ماعيالنا يتحجون لغتهم خلهم هم بعد يتحجون لغتنا..ولا يبونا نسوي اللي هم يبونه وهم لا.. شيماء:انا بروح داري..(قامت) راشد:وين شمة؟ شيماء:راقدة.. راشد:ليحين تعبانة؟ شيماء:قبل لأنزل كانت راقدة وماادري عنها.. راشد:بروح اشوفها.. دخلوا الغرفة وفتحوا الليتات.. راشد(يمسك جبينها حارة):شمة..شمة.. شمة(تفتح عيونها بتعب) راشد:تعبانة؟ شمة:اي.. راشد:انزين قومي خذي دواج..(قعد يعطيها الدواء) شمة:ماابي هذا.. راشد:ليش؟ شمة:وايد مر.. راشد:معليه..علشان تصيرين زينة..باجر عندج امتحان..سمعي شمة اذا مانزلت حرارتج بوديج المستشفى مرة ثانية.. شمة:لا ماابي.. شيماء:راشد اذا بيعطونها اجازة خذني عنها.. راشد:والله انج متفيجة..الناس تشرد من المرض وانت تبي تلاحقينه.. في غرفة فارس وشيخة.... شيخة(تتكلم في التليفون):لاتحاتين ان شاء الله خير.......والله حتى انا مثلج بس شسوي اللي علينا سويناه والباقي على رب العالمين......ياليت والله.....ماادري ماقررنا....(يدخل فارس)...انزين حبيبتي بسكر الحين.....اي..باي.. فارس:مساء الخيرات.. شيخة:مساء الانوار..اشلون كان مريضك؟ فارس:الحمدلله..تحسنت حالته واستقرت.. شيخة:يعطيك العافية.. فارس:الله يعافيج حبي..ايش رايج نسافر عقب ماتخلصين امتحانات.. شيخة:نسافر! فارس:اي نسافر العمرة.. شيخة:صج فارس بنعتمر؟ فارس:اي..لازم نروح ويابعض العمرة.. شيخة:ومتى؟ فارس:ان شاء الله على نهاية الاسبوع الجاي..نروح الخميس ونرد الاحد..لأن مااقدر آخذ اجازة اكثر من يومين..علشان شغلي.. شيخة:مايخالف لو يوم واكون معاك يسوى عندي الدنيا كلها.. فارس(ابتسم لها):من كنتي تحاجين؟ شيخة:وديمة بنت خالي.. فارس:اشلون صحتها؟ شيخة:الحمدلله.. فارس(قام):ببدل ملابسي وبانزل تحت اقعد ويااخواني وابوي..تيين؟ شيخة:لا..حريمهم مشغولين بعيالهم ومااحب اقعد بروحي بينكم..ان شاء الله المرات الجاية.. فارس:خلاص وانا ماني مطول.. شيخة:خذ راحتك حبيبي..ذولا اهلك.. في الشركة... فهد:يعني شنو؟؟ علي:ماادري طال عمرك..بس هم خبروني انهم سحبوا الصفقة عنا..واختاروا شركة ثانية.. فهد(عصب):انزين انا اوريه..ناد لي راكان والمستشار.. علي:حاضر طال عمرك.. في بيت بوراشد..... راشد:وين كنت اليوم؟ فارس:في مريض صاده نزيف فجأة.. ورحت اشوفه.. راشد:ايش منه؟ فارس:ماادري ليش..مع ان كل اموره كانت اوكي..بس من ايش صارت له مضاعفات ماادري..لأن لما رحنا له كان ضغطه مرتفع زين وصلنا في الوقت المناسب.. راشد:اكيد في حد قايلة شي..ولاشايف حد.. فارس:يمكن.. راشد:وجرحه مالتأم؟ فارس:لا توه امس مسوي العمليه واليوم صاده نزيف..بس الحمدلله حالته مستقرة.. راشد:المفروض اهل المريض يديرون بالهم على المريض اكثر منا.. فارس:المفروض..ايش صار على المستشفى فتحها صاحبها؟ راشد:لا ليحين بقى لها جم شغلة لين مايخلصونها..بس ماشاء الله عليه خلص اكثر من نص الشغل..شغلهم ماشي زين.. بوراشد:دام عندهم فلوس ليش شغلهم مايمشي.. راشد:هالريال وايد يثق برايي لدرجة كل مااحد بغى يتوظف عنده يطرش اوراقه عندي.. فارس:وانت ايش سويت؟ راشد:حاولت انقي له احسن الدكاترة منهم..لأن هو قالي لاتفكر في الراتب انا بعطيهم راتب على حسب خبرتهم.. بوراشد:الحمدلله انه يثق فيك..ابوه ماشاء الله عليه كل المجالس تتكلم عنه..عن طيبته وكرمه وشهامته بين الناس.. راشد:انا ماشفت ابوه.. بوراشد:شفت هالمسجد العود بو أربع منارات اللي جنب بيت بوثامر؟ تميم:اي انا شفته..وايد كبير.. راشد(قعد يتذكر):اي بلا تذكرت اشفيه.. بوراشد:هذا هو بانيه على حسابه..وشوف كم واحد يصلي في هالمسجد وايشقد يحصل اجر من وراه..ماشاء الله عليه خيره وايد.. في الكوفي شوب..... خالد:والله زين..أخيرا مابغيت تقولها.. عبدالله:بس علشان خاطر الوالدة.. خالد:معليه باجر لتزوجت بتعيش حياة ثانية وبتشكرني.. عبدالله:الله يسمع منك.. خالد:وانت أحمد متى ان شاء الله معزم على الزواج؟ احمد:والله ناوي من زمان بس شسوي ادور على وحده تعجبني وتناسبني.. خالد:وماحلصتها؟ احمد:حاليا لا..شفت وايد وسمعت وايد لكن اللي ابيها ماهي بينهم..شكلي بسافر برع يمكن حصلت.. عبدالله:انت اشفيك..بتسافر علشان تتزوج وحده من برع..واشفيهم بنات الديرة؟؟..اذا كل واحد فكر بطريقتك بنات الديرة تموا ولاتزوجوا..وبنات برع اشفيهم زود عن بناتنا؟ خالد:عبدالله صاج يااحمد..بنات الديرة مافيهم شي..يعني اذا ماحصلت مب معناته ان البنات خلصوا..في وايد بنات انت ماشفتهم.. عبدالله:من اللي يختار لك امك ولا انت؟ احمد:انا.. عبدالله:لاتتشرط وايد ترى بالاخر بتستغنى عن شروطك..في واحد من الشباب..كان يدور على وحده وحاط عليها شروط وكأنه راسمها بخياله..بالاخر تزوج وحده عكس كل الشروط اللي كان حاطها.. محمد(يي):السلام عليكم..(يقعد) الجميع:وعليكم السلام.. عبدالله:وينك تأخرت.. محمد:شسوي الشوارع زحمة..مت لين ماقدرت اوصل..ساعة ونص وانا بالشوارع..ياللا ناكل..ايش تبون نطلب.. خالد:بالاول بارك لأخوك.. محمد(يفكر):اخوي!!..من فيكم يبي يتزوج؟ خالد:عبدالله.. محمد:لا لاتقول..بالمبارك ياريال..مابغيت تقرر..لقيتها؟ عبدالله:جاري البحث عنها.. محمد:ان شاء الله بتحصلها..ياللا زين احنا معزومين الليلة عندك..جرسون.. عبدالله(يطالع محمد):نعم!! محمد(يضحك):والله محد قالك تقرر تتزوج.. جرسون:تفضل.. محمد:المنيو لو سمحت.. جرسون:حاضر.. عبدالله:شكلي بفلس عن قريب على عزايم محمد.. في الشركة.... راكان:ايش بتسوي؟ فهد:ولاشي..هو الخسران لأنه ماتعامل ويانا.. بوفهد:غريبة مو من عوايده يسويه هالحركة.. راكان:يمكن في حد عطاه سعر ارخص.. فهد:وبنفس جودة شركتنا؟...على العموم هو الخسران.. بوفهد:انا لازم اعرف السالفة..عمره ماسواها..احنا من الشركات اللي دوم يتعامل معاها.. فهد:يبه ريح بالك منه ولاتفكر..مب بعيدة تكون هبة وراء هالسالفة.. بوفهد:لاتقول هالحجي يافهد.. فهد:انت اصبر يايبه وشوف ايش بتسوي هبه.. بوفهد:انت مو كنت ناوي تطلقها.. فهد:ان شاء الله..(قام) راكان:وين؟ فهد:بروح البيت جعت.. بوفهد(يتصل في السكرتير):محمد تعال.. محمد:ان شاء الله طال عمرك.. بوفهد:فهد خلنا نرد البيت جميع.. محمد(يدخل):نعم طال عمرك.. بوفهد:ابيك تعرف من اللي ماخذ الصفقة عنا..بس تكون بطريقة سرية ماابي حد يعرف.. محمد:طال عمرك..(بتردد)..هو قدم الصفقة على شركة ثانية.. بوفهد:انت تعرف الشركة؟ محمد:اي نعم.. بوفهد:من؟ محمد:شركة العم بوهبة.. فهد(ابتسم بسخرية):ماقلت لك يبه..(راح) الصبح الساعة 11 وديمة تقعد من النوم وتنزل تحت.... وديمة:صباح الخير جدتي.. الجدة:هلا ببنيتي صباح الخير.. وديمة:عمتي! ام فيصل(تسلم عليها):اخبارج؟ وديمة:الحمدلله..انتي شاخبارج؟ ام فيصل:بخير..تعالي قعدي عندي.. وديمة(قعدت):اخبار شيخة؟ ام فيصل:الحمدلله..صار لي اسبوع ماشفتها.. وديمة:ليش؟ ام فيصل:ريلها عنده شغل.. الجدة:أخبار فيصل؟ ام فيصل:الحمدلله..الله يسهل عليه الدراسة في هالغربة.. الجدة:ومتى ان شاء الله راد؟ ام فيصل:باجر ان شاء الله.. وديمة:صج عمتي؟ ام فيصل:اي ان شاء الله.. وديمة:مشتاقة حق شيخوه وحق طلعاتنا.. ام فيصل:هي قالت انها بتيي الجمعة وبنروح السوق نشتري شوية اغراض..تيين؟ وديمة:شووور..من زمان وانا ودي اطلع.. في بيت بوراشد....يدخلون البيت..... ام راشد:اشفيج ؟ شيماء:ليش تأخر السايق علينا؟ ام راشد:راح يجيب سلطان من المدرسة.. شيماء:يعني كان لازم يمرونه.. سلطان:لا..وايش صار يعني؟ شيماء:تعبت من الوقفة.. ام راشد:ايش سويتي في الامتحان؟ شيماء:ماادري.. ام راشد:شنو ماادري؟؟ شيماء:يمه بتشوفين الدرجات في الشهادة..بروح ابدل وبرقد.. ام راشد:ماترقدين لين الغداء.. شمياء:مب يوعانة.. ام راشد:شمة يمه اشلونج الحين؟ شمة(تكح):الحمدلله..بس الكحة ماهي راضية تفارقني.. ام راشد:خلي راشد اخوج يي ويشوفج..ايش سويتي في الامتحان؟ شمة:زين.. ام راشد:وانت سلطان؟ سلطان:زين..جدتي ايش عندكم غداء؟ في الشركة..... راكان:عندك شي الحين؟ فهد:عندي اجتماع عقب ساعتين.. راكان:انزين قوم معاي.. فهد:وين؟ راكان:ابيك تشوف المجمع.. فهد:زهب؟ راكان:تقريبا..بس بقى آخر اللمسات.. فهد:ماشاء الله ماتوقعت يزهب بهالسرعة..(قام) ويوم راحوا المجمع..... فهد:ماشاء الله على المكان..مرتب وفخم..ويبين عليه انه غالي.. راكان:ترى هذا تصميم واحد من الربع.. فهد:ماشاء الله عليه..بس ليش مسوي اربع طوابق بس.. راكان:لأن العرض اكبر..واعتمدت على العرض.. فهد:واشلون ناوي ترتب المجمع؟ راكان:بخلي الطابق الاول كلها كافيهات..والثاني محلات خاصة للرجال..والثالث للياهال..والرابع للحريم.. فهد:وليش قسمتهم بهالطريقة؟ راكان:علشان كل واحد فيهم ياخذ راحته في التسوق.. فهد:بس طابق الياهال بيجتمعون فيه الرجال والنساء.. راكان:خلهم يتجمعون..مو مهم..المهم سويت شي ثاني بالمقابل..اني قسمت طابق الكافيهات لثلاث اقسام..عزابية وعوائل وحريم..علشان كل واحد ياخذ راحته.. فهد:سويت شي مو موجود..تعتقد بتحصل زباين؟ راكان(ابتسم):اكيد ان شاء الله..وبتشوف.. فهد:ان شاء الله ياليت والله..وليش مب فاتح مطاعم؟ راكان:ماحبيت افتح مطاعم..خليت بس الكافيهات.. فهد:واتفقت مع اصحاب الكافيهات؟ راكان:اي نعم..اخترت ارقى الكافيهات في العالم وجبتهم.. فهد:والمحلات؟ راكان:هم المحلات نفس الشي..جمعت احسن الماركات في العالم وجبتهم في هالمجمع.. فهد:يعني مجمعك ماراح يدخله الا الناس الراهية.. راكان:تقدر تقول..لكن انا مسوي شي ثاني..يعني الشي الماركة اللي يبيعونه هني ارخص من مكان ثاني.. فهد:اشلون يعني مافهمت؟ راكان:في محلات تبيع البضاعة ب8000 ريال وسعرها الاصلي 3000 ريال انا شمسوي البضاعة اللي بسعر 3000 ريال أبيعها ب 5000.. فهد:وتعتقد بتربح؟ راكان:بإذن الله..لاتحاتي كل شي مدروس.. فهد:انت ماينخاف عليك..عقلك حاسب كل شي ماشاء الله عليك..ابوي شافه؟ راكان:لا..بوديه اليوم قبل لنرد البيت.. فهد:بيستانس عليك.. فارس يرد البيت...يحصل امه قاعدة مع ابوه..بعد السلام.... ام راشد:وين راشد؟ فارس:بيرد العصر.. ام راشد:ليش؟ فارس:عنده شغل.. ام راشد:بغيت يشوف شمه..شكلها تعبانة.. فارس:ليحين تعبانة؟ ام راشد:تقول فيها كحة ماهي راضية تروح.. فارس:انا الحين بروح اشوفها..هي وينهي في غرفتها؟ ام راشد:لا..قاعدة مناك تطالع تلفزيون .. فارس(راح وحصلها قاعدة مع سلطان ومشاعل وسلوى):السلام عليكم.. الجميع:وعليكم السلام.. فارس(قعد جنب شمة):اشلونج؟ شمة:زينة.. فارس:ايش سويتي في الامتحان؟ شمة:زين.. فارس(مسك جبينها):حرارتج اوكي..تحسين بشي؟ شمة:فيني كحة..وايد متعبتني.. فارس:كحة مع البلغم؟ شمة:اي.. فارس:انا الحين بروح الصيدلية وبشتري لج دواء خذيه وان شاء الله لين باجر بتتحسنين..عيل وين شيماء؟ شمة:راقدة.. يدخل غرفته...يحصل شيخة مستقبلته.. شيخة(تاخذ عنه الجاكيت):يعطيك العافية.. فارس:الله يعافيج يابعد عمري..(يطلع ساعته)..تعبااااان حدي..وودي انام لين المغرب.. شيخة:نام حبيبي..ريح لك شوي.. فارس:بروح الصيدلية ابي اشتري دواء حق شمة.. شيخة:هي ليحين ماطابت؟ فارس:لا.. شيخة:انزين اذا انت تعبان لاتسوق روح ويالسواق.. فارس:ان شاء الله اللي تامرين فيه حبيبتي..عطيني ثوبي.. شيخة:من عيوني.. وديمة تلبس بنطلون سبورتي ويا تي شيرت وجاكيت وتلم شعرها وماسكة تليفونها وتنزل من الدري تحصل خالد قاعد في الصالة.... وديمة:هااي.. خالد:هلا.. وديمة:متى رديت؟ خالد:من زماان..انتي وينج؟ وديمة:كنت فوق خذت لي شاور..تغديت؟ خالد:اي..وليش ماتغديتي؟ وديمة:كنت شبعانة..تريقت متأخر.. خالد:كم مرة اقولج عدلي نومتج..طلعت نتايجكم؟ وديمة:بروح باجر.. خالد:متى؟ وديمة:بشوف يمكن على العشر.. خالد:بس انا مااقدر اوصلج..بمرج على الوحدة.. وديمة(فتحت التلفيزون):على راحتك.. عبدالله يدخل البيت.... عبدالله:السلام عليكم.. الجميع:وعليكم السلام.. خلود(تقوم تحب راس اخوها):اشلونك ياخوي؟ عبدالله:بخير..انتي اشلونج واشلون ريلج؟ خلود:الحمدلله.. عبدالله:وينج ماتبينين؟ خلود:شسوي عبدالعزيز كان مشغول هالفترة وماقدرت اييكم.. عبدالله:ماطلعت نتايجج؟ خلود:بس مقرر واحد.. عبدالله:اي شفته.. ام عبدالله:يمه خلود قبل لأنسى ام عبدالرحمن عازمتنا الاربعاء في بيتها.. خلود:شالمناسبة؟ ام عبدالله:مسوية عزيمة حريم.. عبدالله:ومو تنسون عرس رفيجي.. ام عبدالله:متى العرس؟ عبدالله:السبت.. خلود:ليش ماسووها الخميس والا الجمعة؟ عبدالله:ماحصل حجز..وين حسنة؟ ام عبدالله:راقدة.. فهد يشتغل على الانترنت في غرفته..يندق باب الغرفة.... فهد:حياك.. كاملة(تفتح الباب):مساء الخير.. فهد:مساء النور..هلا خالتي..انا اقول البيت منور.. كاملة:منور بوجودك حبيبي..وينك مانشوفك ولاتسأل عنا.. فهد:شسوي ياخالتي انتي ادرى بالحال والشغل.. كاملة:من متى وانا قايلة لأمك خل فهد يمرني.. فهد:سامحيني..شسوي لهيت بالشغل..حتى انا من زمان ماشايفج ومشتاق لج..حتى سعد من فترة ماسمعت اخباره..اشلونه؟ كاملة:الحمدلله..وقريب بيصير ابو.. فهد:بالمبارك..لازم اتصل فيه وابارك له.. كاملة:انت اخبارك طمني عنك؟ فهد:شوفة عينج..انا بخير.. كاملة:وزوجتك؟ فهد:من تقصدين؟ كاملة:ليش متزوج كم وحده؟ فهد(يضحك):اييه ياخالتي خلتيني اضحك وانا مو في خاطري اضحك.. كاملة:ليش يافهد؟ فهد:ان شاء الله كلها جم يوم وبطلقها.. كاملة:ليش يافهد..انت ماصار لك وايد متزوجها.. فهد:خلاص احنا ماننفع لبعض.. كاملة:بس مايصير يايمه تطلقها..حاول تكلمها مرة ثانية تصالحوا..سافروا.. فهد:انت ياخالتي تقولين هالحجي!!..غريبة انتي اللي كنت رافضة زواجي منها.. كاملة:حتى لو كنت رافضة مو معناته اني اتمنى لها الطلاق.. فهد:خالتي..انت ليش كنت رافضتها؟ كاملة:خلاص يافهد..اعتقد خلصنا من هالسالفة.. فهد:لا ياخالتي ماخلصنا..انا مصر اعرف السالفة.. كاملة:ماشي..بس هي ماتنفعك عكس افكارك وماراح تتفاهمون.. فهد:واشلون عرفتي؟ كاملة:عرفت طبعها واعرف طبعك يافهد..يمكن يافهد اختلفت معها بشي..بس حاول ترجع المياه لمجاريها.. فهد:خلاص ياخالتي ماعاد في شي بيرجع لطبيعته..هي طبيعتها جذي وانا طبيعتي جذي..وكل واحد يروح بطريق وايد احسن لنا..ماابي يجيني ولد ولا بنت وتكون هذي امهم.. كاملة:فهد!!! فهد:لاتستغربين..هبة ماهي من النوع اللي احبه..يمكن غيري يحبه بس انا لا.. كاملة:يعني خلاص مصمم؟ فهد:اي.. كاملة:وبتتتزوج وحده غيرها؟ فهد:حاليا لا..ماافكر بشي غير الشغل..عندنا مشاريع ولازم اخلصها ولفضيت يمكن افكر بالزواج.. طلعت من عنده كامله وهي متضايق من تصرفات هبة..ومب عارف لوين تبي توصل وشالي تفكر فيه.. [ هذه الانشودة لشخص عايش هم فشله الاول بحياته مثل فهد ] متى فهد بيطلق هبة؟؟ وياترى خلاص ماراح يتزوج مرة ثانية؟؟ وشنهي مخططات هبة؟؟ وعبدالله متى بيتزوج؟؟وهل حياته بتتغير عقب الزواج؟؟ وشيماء وشمة الثنائي المرح...شنهو جديدهم؟؟ ووديمة؟؟ خالد؟؟ زواج محمد؟؟ أحمد ؟؟ وشخصية راشد؟؟ أشياء كثيرة..أحدااث ممتعة ومشوقة بإنتظاركم في الفصل12 تابعوني.. التعديل الأخير تم بواسطة فيتامين سي ; 11-12-13 الساعة 12:14 PM | ||||||||
|
| |
|
11-12-13, 12:17 PM
| #25 | ||||||||
| مراقبة عامة ومشرفة منتدى الروايات المنقولة
| " الفصل الـ12 " هالاسبوع يصادف عرس محمد..وهله ينشغلون بتجهيزات العرس..وعبدالله وأحمد يجهزون المعرس..... في بيت بوسلمان..... سلمان:اشلونج جدتي؟ الجدة:بخير يمه..انت اشلونك واشلون زوجتك وعيالك؟ سلمان:كلهم بخير ويسلمون عليج.. وديمة(تنزل وتسلم على اخوها):وين عيالك؟ سلمان:كنت برع مب جاي من البيت..مو على اساس معزومين ليش مارحتوا؟ الجدة:يايمه انا مااقدر اروح مكان..البيت هو احسن مكان لي.. سلمان:وانت وديمة؟ وديمة:مالي خاطر اروح عرس ناس مااعرفهم ولايعرفوني..وبعدين اروح بروحي شسوي..اقعد بالبيت احسن لي.. سلمان:دام انج في اجازة ليش ماتروحين عند امي وابوي؟ وديمة(ماعجبها الكلام):مااقدر اروح.. سلمان:ليش؟ وديمة:اروح بروحي؟ سلمان:مافيها شي.. وديمة:بس انا مااقدر اسافر بروحي..(قامت) الجدة:وين رايحة؟ وديمة:بروح اسوي لي نسكافيه.. الجدة:يايمه لاتتكلم وياها بهالموضوع.. سلمان:ليش؟ الجدة:تخاف ابوك يوديها تتعالج.. سلمان:واشفيها لو تعالجت..ترى وديمة وايد مدلعينها ومشيينها على هواها..هي ياهل وماتدري شي.. الجدة:معليه يايمه..خالد ماهو مقصر كل فترة يوديها المستشفى..ويقول السكر عندها زين.. سلمان:حتى لو.. وديمة كانت واقفة على جنب وسمعتهم.. على الساعة 12 ونص يرد خالد البيت...ومايحصل حد قاعد...ركب الدري شوي شوي...ودق باب غرفة وديمة... وديمة:منو؟ خالد(استغرب انها قاعده لهالوقت):خالد.. وديمة:ادخل.. خالد(فتح الباب وحصلها قاعدة):السلام عليكم.. وديمة:وعليكم.. خالد:ايش عندج قاعدة جذي؟ وديمة:ولاشي..انت ليش جيت فوق؟ خالد:جيت فوق واشفيها؟ وديمة:وريولك؟ خالد:ريولي بخير..الجبس وشالوه الحمدلله..واقدر امشي اموري..انت اشفيج؟ وديمة:مافيني.. خالد:جان رحتي العرس وغيرتي لج جو.. وديمة:ماابي.. خالد:اشفيج..شكلج يقول ان في شي صاير؟..حد مكلمج ولا قايلج شي؟ وديمة:مرة ثانية لما يي سلمان قولوا لي علشان ماانزل.. خالد(استغرب):ليش؟ وديمة:بس.. خالد:سلمان اخوج!! وديمة:عيل ولد عمي..اكيد اخوي.. خالد:ودوم تحجي عدل..اشفيه سلمان؟ وديمة:....... خالد:تحجين ولا اشلون؟ وديمة:قعد يقولي ليش ماتسافرين عند امي وابوي..وقال حق جدتي وديمة وايد مدلعينها ومخليينها على هواها خلها تروح وتتعالج..وهي ياهل.. خالد:الحين هالحجي مزعلج منه؟ وديمة:اشوف عاجبك الحجي؟ خالد(يقوم):تراج تجيبين الهم والغم..الواحد يغلط يوم يقعد عندج.. وديمة:مشكور.. خالد:يعني انا ماشفت بحياتي شخص يزعل ويضايق عمره على شي ماصار ويتخيل انه بيصير..حمدلله والشكر..ضايقي عمرج وازعلي علشان السكر عندج ماينتظم وتتعبين ونوديج المستشفى..بروح ارقد احسن لي..(طلع) في يوم جديد..يقوم عبدالله من النوم..وهو نشيط ومستانس..يصبح على امه ويحب راسها..ويقعد يتريق معاها.... عبدالله:الله يخليج لنا يالغالية.. ام عبدالله(ابتسمت):وانت بعد حبيبي.. عبدالله(يقوم):ياللا يالغالية انا رايح الدوام..تامريني بشي؟ ام عبدالله:سلامتك ياقلبي..دير بالك وانت تسوق..ولاتسرع.. عبدالله:ان شاء الله.. ام عبدالله:ولاتتكلم في التليفون وانت تسوق.. عبدالله:ان شاء الله.. ام عبدالله:واول ماتركب السيارة لاتنسى دعاء الركوب.. عبدالله:من عيوني.. ام عبدالله:وخل القرآن شغال بدربك وربي يحفظك ويرعاك يابعد عمري.. عبدالله(يحب يدها):اوامرج كلها طاعة يالغالية..دعواتج.. ام عبدالله:الله يوفقك ويحقق امانيك ويوصلك لي سالم.. عبدالله:مع السلامة.. ام عبدالله:في حفظ الله ورعايته.. ولما وصل الجامعة...بالعادة يصبح على رفيجه أسامة..بس هالمرة حصل مكتبه مسكر..سأل عنه قالوا له انه ماجى..استغرب..دخل مكتبه وقعد على الكرسي واتصل فيه لكن مايرد..اتصل فيه كم مرة لين مارد..وكان صوته هالمرة غريب عن كل مرة.. عبدالله:أسامة اشفيك تعبان؟........ماني سامعك عدل......متى؟؟!!...لاحول ولاقوة الا بالله....عظم الله أجرك.....ادعي لها يااسامة.......انت وينك؟....خلاص انا جايك الحين...مع السلامة.. طلع من المكتب...وبلغ واحد من الموظفين.... عبدالله:عادل..بلغ الموظفين ان ام اسامة توفت اليوم.. عادل:صج..لاحول ولاقوة الا بالله..ومتى الدفن؟ عبدالله:ماادري..بس انا رايح له الحين..اذا حد سأل عني قوله اني عند اسامة.. عادل:بلغنا عن وقت الدفان والعزاء.. عبدالله:ان شاء الله.. في بيت بوفيصل.... شيخة:يمه ودي اتصل في وديمة علشان تيي عندنا..مشتاقة لها وايد ومن زمان ماشفتها ولاتكلمت وياها.. ام فيصل:تحصلينها راقدة.. شيخة(تشوف الساعة):ثمان ونص اكيد راقدة..معليه انا بقعدها..لأن الظهر فارس بيمرني.. ام فيصل:ومن بييبها؟ شيخة:اي صح..خالها.. ام فيصل:اذا كان موجود..واذا ماكان انا بروح اجيبها.. شيخة:فديتج يايمه..احبج.. في بيت اسامة...عبدالله يدخل ويحصل اسامة بين دموعه وهمه.... عبدالله:عظم الله اجرك يااسامة.. اسامة:............ عبدالله:ادعي لها يااسامة..هي محتاجة منك الدعوة والصدقة.. اسامة:عبدالله..انا قصرت بحقها واايد..ياما هي بغتني وانا رحت بعيد عنها..انشغلت عنها بشغلي ودراستي وحياتي.. عبدالله:بس انت كنت دايما تتحجى عنها انك كنت بار فيها يااسامة.. اسامة:لا ياعبدالله..انا مابريت فيها بكفاية..ضيعت علي الجنة..ماتتخيل ياعبدالله ايش كثر انا نادم لأني ماسمعت كلامها..يوم تطلب مني وتترجى فيني.. عبدالله:وشنو كان طلبها؟ اسامة:طلبت مني اتزوج..كان حلمها اتزوج واجيب لها عيال..كان مناها..مناها..(نزلت دموعه)..والحين خلاص لابتشوف زوجتي ولاعيالي.. عبدالله(حزن وحز بخاطره تذكر امه ونفسه) اسامة:كل ماادخل البيت ولا اطلع تدعي لي اني اتزوج وربي يرزقني بعيال صالحين..وكل ماتفتح لي سالفة الزواج انا اسكره..واقولها مو وقته..اشلون مو وقته وانا صار عمري 27 سنة..اشلون!!..اشلون قلبي طاوعني وماسمعت كلامها..ماخلت بنت الا وقالت لي يايمه هذي تنفعك..راحت الغالية ياعبدالله وماعاد في شي يرجعها لي..راااااااحت.. عبدالله:الله يرحمها ويغمد روحها الجنة..ومثواها الفردوس ان شاء الله..انت قادر تتزوج وتجيب عيال وتفرحها بقبرها.. اسامة:ماعاد للحياة طعم من بعدها..لا الزواج ولا العيال.. عبدالله:الحياة مازالت موجودة..وامك يااسامة لازم تدعي لها ليل ونهار وتتصدق عنها..واعتمر عنها..صدقني دموعك هذي مابترجعها..ابوك وينه؟ اسامة:راح يخلص اجراءاتها في المستشفى.. عبدالله:ابوك الحين بروحه..ومافي حد وياه..هو الحين محتاج لك تكون بجنبه..تواسيه..تراها كانت زوجته..وهو الحين ماهو قادر يسوي شي بروحه..روح له يااسامة..ابوك بحاجتك.. اسامة:مااقدر..مااقدر..صورته� � في بالي..صوتها يرن بإذني..أشوفها بكل ركن بهالبيت..كيف هي الحياة من غيرها؟؟..والله الحياة ماتسوى من غيرها..مااقدر..مااقدر اعيش حياتي من غيرها..مااقدر.. عبدالله:لا يااسامة..لاتقول مااقدر..انت لازم تروح لأبوك..علشان الدفن والصلاة عليها..والعزاء..ابوك مايقدر بروحه..هو يبيك..انت روح له وانا برتب لكم امور عزاء الرجال..لاتفكر ولاتحاتي..روح غير ملابسك وخلني اوصلك عند ابوك..ياللا.. أسامة(قاعد ومايتحرك ودموعها على خده) عبدالله:أسامة..ادعي لها..دموعك هذي مابتغير شي.. أسامة:على الاقل افرغ اللي فيني..هذي أمي ياعبدالله..أنت اكثر واحد تعرف يعني شنو ام..الله يخليها لك..بس انا خلاص امي راحت عني..راحت وماشافت مني شي..الله يسامحني..الله يسامحني.. في بيت بوفيصل..... ام فيصل:واشلون وافق خالد تيين مع السايق؟ وديمة:انا بروحي مستغربة..بس طبعا مع الخدامة..وطول الطريق يتصل فيني يتطمن.. ام فيصل:الحمدلله وصلتي بالسلامة..اشلونها جدتج؟ وديمة:بخير.. ام فيصل(قامت):ياللا انا بروح ازهب الغداء..انت بتمين عندنا.. وديمة:عاد هذا ماقلته حق خالد.. ام فيصل:مو مهم انا بقوله..ياللا بخليكم بروحكم.. شيخة:عطيني اخبارج..شتسوين في الاجازة؟ وديمة:ولاشي..لايعة جبدي من الملل..زهقت من النت والمجلات والتلفزيون اشتهي اطلع اغير جو مثل اول يوم كنت وياج.. شيخة:الله بيرزقج بواحد يغير حياتج وماتحسين بالملل.. وديمة:يعني انت مب حاسة بملل ؟ شيخة:صج مرات ازهق من القعدة بروحي يوم يروح الدوام..بس اشغل وقتي بشي.. وديمة:خلينا نطلع مثل اول.. شيخة:بحاول..بس مب الحين لرديت من السفر.. وديمة:بتسافرين!! شيخة:اي ان شاء الله.. وديمة:وين؟ شيخة:العمرة.. وديمة:وياريلج؟ شيخة:اي نعم.. وديمة:وايشقد بتمين؟ شيخة:اربعة ايام.. وديمة:ياليت لو اقدر اسافر.. شيخة:وليش ماتسافرين؟ وديمة:ماابي اسافر..عندي القعدة في البيت ومن غير طلعات اهون علي من السفر.. شيخة:ليش عاد؟ وديمة(بضيقة):اول شي خالد ريله انكسرت بسبتي..لو انا ماكنت معاه جان ماراح التزلج وطاح..وهو الحين بخير بس يبيله فترة لين ماترجع ريله مثل اول..وثاني شي لو بغيت اسافر بيوديني عند امي وابوي..وانا ماابي اروح لهم..لأن لو رحت لهم ابوي على طول بيوديني المستشفى للعلاج..وانا ماابي اروح المستشفى..عندي قعدة البيت تسوى عندي اكثر من السفر اللي مابيي من وراه الا الهم.. شيخة:واشفيها لو رحتي المستشفى وعرضتي نفسج على دكتور؟ وديمة:شيخة..انت تعرفين ان السكر ماله علاج..تبين اروح عند الدكتور علشان شيقول؟؟ شيخة:ماتدرين..الطب تطور ماعاد مثل اول..وكل فترة يخترعون علاج.. وديمة:لخترعوا حزتها بروح.. في بيت بوراشد....شمة تقوم من النوم الساعة 10:45 الصبح وتنزل تحت ماتحصل حد في الصالة..تروح الصالة الثانية تحصل ابوها قاعد.. شمة:صباح الخير دادي.. بوراشد:الناس تسلم.. شمة(تقعد):السلام عليكم.. بوراشد:وعليج السلام..انتوا ماتشبعون رقاد؟ شمة:دادي..خلنا نرقد بالاجازة لاحقين على قومة الصبح..ويرز مامي؟ بوراشد:يابنت تحجي عدل لانسيج اسمج.. شمة:اووه سوري داد..امي وين؟ بوراشد:في المطبخ.. شمة:اووه..مامي في المطبخ..ان شاء الله تطبخ؟ بوراشد:عيل مثلكم راقدة لهالحزة؟؟ شمة:دادي ليش تخلي الوالدة تطبخ..عندنا الخدامة الله يخليها لنا هي اللي تطبخ.. بوراشد:والله انا طبخ الخدم مايعجبني..اذا تبين تريحين امج تعلمي منها الطبخ وطبخي عنها.. شمة(قامت):انا بروح اشوف مامي.. بوراشد:وين اختج؟ شمة:نايمة.. بوارشد:وليش ماقعدتيها؟ شمة:ماتبي تقوم.. بوراشد:روحي ناديها وقولي لها اذا ماقعدتي ابوي بييج بالعصا.. شمة:دادي اشفيها لو نامت..خلوها على راحتها.. بوراشد(عصب):شموو..سمعي الحجي.. شمة(خافت):اوكي دادي..الحين بروح.. راحت فوق...قعدت عند شيماء..... شمة:شيوم..شيوم قومي.. شيماء(عصبت):ايش تبين ماتخلون الواحد ينام.. شمة:ابوي يقولج اذا ماقعدتي بييج بالعصا.. شمياء:ياهالعصا اللي ودها تقطعني..الظاهر بسرقها حزة نومهم.. شمة:قومي.. شيماء:اووووو..اف..انزين انتي روحي وانا بيي وراج.. شمة:لا حبيبتي..ماني نازلة من غيرج..ابوي كلاني بقشوري من الصبح..تبين يسوي فيني شي اذا نزلت من غيرج.. شيماء:لاحول..اففف.. في الشركة... فهد:خير يبه..بغيتني؟ بوفهد:ابي اقولك..اني ناوي افتح مكتب ****ات في السعودية.. فهد:وين في السعودية؟ بوفهد:في الرياض.. فهد:وعندك دراسة الفكرة؟ بوفهد:اي نعم كل شي موجود عند السكرتير..وانت طالع خذ منه..ابيك تشوفه عدل..وشوف لي واحد من ربعك في السعودية يحصلون لنا واحد زين يمشي امورنا هناك.. فهد:وليش تبي تفتح مكتب ****ات في السعودية..مع ان عندك واحد في الامارات.. بوفهد:زيادة الخير خيرين.. فهد(قام):تامرني بشي ثاني؟ بوفهد:ترى حمدان كلمني اليوم وعزمنا على المعرض.. وقال لازم نحضر.. فهد:خلاص روح انت وراكان.. بوفهد:وليش انت مب جاي؟ فهد:عندي شوية شغل لازم اخلصه..ياللا انا راد المكتب.. في مكتب فهد.... راكان:لايافهد انا مااقدر.. فهد:ليش؟ راكان:انت تدري اني بفتح المول عقب شهر بالضبط وياللا يمديني اخلص اشغالي..انت روح ويالوالد وانا بدير بالي على الشغل.. فهد(يتصل بعلي):علي تعال المكتب.. يدخل السكرتير والمحامي بوحامد.. المحامي:السلام عليكم.. الجميع:وعليكم السلام.. المحامي:كيف حالك يافهد؟ فهد:بخير يابوحامد.. المحامي:اشلونك راكان؟ راكان:الحمدلله..انت اشلونك؟ المحامي:طيب..دام انكم موجودين ابي اخبركم بشي.. فهد:انزين..(يكلم علي) انت روح وانا عقب باتصل فيك ولادخل حد علينا.. السكرتير:حاضر طال عمرك..عن اذنك..(سك الباب) فهد:خير يابوحامد؟ بوحامد:والله بصراحة ماني عارف اشلون اخبركم.. راكان:خير..ايش صاير؟ بوحامد:شركة المواد الاستهلاكية..سكرتها البلدية في امريكا.. فهد(مستغرب):سكرتها!!..ليش؟؟ بوحامد:يقولون ان في مواد كانت تنباع بتواريخ منتهية..وفي ناس تسممت..واصاباتهم خطيرة.. فهد(منصدم) راكان:اشلون صار هالحجي كله..اصلا هالشركة صار لها عشر سنين شغالة الحين جات تبيع بتواريخ منتهية..اكيد في شي.. فهد:بوحامد تحجي..ايش هالحجي اللي قاعد تقوله..انت تدري يعني شنو اغلاق هالشركة..يعني 13 فرع بيتسكر..يعني الخسارة مابتكون قليلة.. بوحامد:حاليا ماعندي معلومات كثيرة..بس اللي اعرفه ان جميع المعلومات صحيحة عن حالات التسمم والمشاكل اللي موجودة في البلدية.. فهد:انا ماني مصدق..اشلون هالشي يصير..انا لازم اسافر امريكا وفورا..(اتصل في علي)..علي شوف لي اسرع طيارة على امريكا.. علي:لشخص؟ فهد:لا احجز لثلاث اشخاص.. علي:حاضر طال عمرك.. راكان:من بتودي معاك؟ فهد:طبعا بوحامد لازم يي..وبشوف لي حد يي ويانا.. عبدالله يرد من الدوام...يدخل البيت...... عبدالله:وين ماما؟ الخدامة:ماما يتكلم تليفون.. عبدالله(راح الصالة حصل امه قاعدة تتكلم في التليفون حب راسها وقعد عندها) ام عبدالله:ان شاء الله مايصير خاطرج الا طيب....الله يكتب اللي فيه الخير....سلمي على البنات مع السلامة..هلا يمه يعطيك العافية.. عبدالله:الله يعافيج..من تحاجين؟ ام عبدالله:هذي ام نواف..جوعان؟ عبدالله:ليش الغداء مب زاهب؟ ام عبدالله:بلا اشلون مب زاهب..(قامت)..ألحين بروح انجب لك الغداء.. عبدالله:يمه.. ام عبدالله:عيوني.. عبدالله:ماحصلتي لنا على وحدة؟ ام عبدالله:بلا يمه..بس انا كنت ناوية اخبرك بعد الغداء.. عبدالله:تعالي قعدي وخبريني الحين.. ام عبدالله(قعدت):في بنت أخلاق أدب ومتدينة..ماشاء الله عليها حلوة..وشوي عليها طول وضعيفة..وحافظة القرآن..ودوم لسانها فيه ذكر الله.. عبدالله:وينهي هي ساكنة في الفريج؟ ام عبدالله:لا يمه ماهي من الفريج..بس يايمه في مشكلة.. عبدالله:شنهي المشكلة؟؟ ام عبدالله:والله شاقولك يايمه..البنت ماهي قطرية..بس هي من مواليد الدوحة واهلها عايشين من سنين في الدوحة..واذا تشوفهم ولاتقعد تسولف وياهم ماتعرف انهم مب قطريين.. عبدالله:مب قطريين!! ام عبدالله:بس يايمه اهلها ماعليهم كلام..ناس ماشاء الله عليهم..الكل يتمنى يناسبهم بس مب قطريين..صدقني يايمه مابتتحسف..وبعدين زوجتك بتحصل على الجنسية بعد الزواج.. عبدالله:يعني البنت تستاهل الواحد يتزوجها وهم بهالوضعية؟ ام عبدالله:تبي الصج اي..انا من تعرفت عليهم وماشفت منهم الا كل خير..واشفيها لو تزوجت وحده مب قطرية.. عبدالله:بس يايمه القطريات من يتزوجهم؟ ام عبدالله:معاك حق..بس انا اعتبر هالناس من اهل البلد..انت براحتك يايمه..انا ماني جابرتك عليها..فكر قبل لنروح لهم ونتقدم لهم رسمي..(قامت) عبدالله:وين؟ ام عبدالله:بروح انجب الغداء..شكلك ماتبي تتغدى..المفروض كنت قايلة لك السالفة بعد الغداء.. عبدالله(ابتسم لها):لاتحاتين عبدالله بيكون مو صاحي لو يفوت اكل امه.. ام عبدالله:فديت عبدالله.. بعد الغداء في بيت بوراشد...فارس يقعد جنب شيخة..... شيخة:ماانت راقد؟ فارس:بلا..بس ودي اسولف وياج بالاول..ابي اقولج شي حبيبتي.. شيخة:خير حبيبي.. فارس:اليوم المستشفى كلمتني وتبيني اقعد في العيادة فترة المساء.. شيخة:المساء!!..بدل الصبح؟ فارس:لاطبعا..الصبح والمساء... شيخة:بس هذا وايد عليك يافارس.. فارس:ادري..بس انا اعتقد لو خذت المساء احنا بنستفيد.. شيخة:بنستفيد!..اشلون؟ فارس:الراتب بيكون اكثر..واحنا محتاجين نجمع فلوس اكثر علشان نقدر باجر نشتري لنا ارض ولاشي من ال****ات ونترزق منهم..ولا انت ايش رايج؟ شيخة:ماادري يافارس..بس جذي انا مابشوفك عدل.. فارس:ادري انا هالشي مضايقني.. شيخة:وانت ايش قلت للمستشفى؟ فارس:قلت بالاول استشيرج.. شيخة:على راحتك حبيبي..اللي انت حاب تسويه سوه..اهم شي راحتك..(قامت) فارس(مسك يدها):وين؟ شيخة:بروح اجيب تليفوني.. فارس:زعلتي؟ شيخة:ليش ازعل..انت ماقلت شي..انا راضية بكل اللي تقوله..(ابتسمت) خالد قاعد في غرفته....يرن تليفونه.... خالد:السلام عليكم....بخير انت اشلونك؟.....الحمدلله....ولاشي توني قاعد من النوم.......متى؟.......وين؟؟.......� �نزين انت مرني......اوكي ياللا مع السلامة.. غير ملابسه وطلع من الغرفة...حصل جدته قاعدة..... خالد:وين وديمة؟ الجدة:فوق.. خالد(يناديها):وديييييييييي� �ة...وديييييمة.. الجدة:ايش تبي فيها؟ خالد:انا طالع قلت يمكن تبي شي من برع.. وديمة:شنوووو؟ خالد:شتسوين فوق؟ وديمة:عندي شوية شغل.. خالد:انزين انا طالع تبين شي؟ وديمة:وين؟ خالد:مكان..تبين شي؟ وديمة:اي ابي آيس كريم.. خالد:اي نكهة؟ وديمة:ابي الشوكولاتة.. خالد:ياللا جدتي انا ماشي تبين شي؟ في الكوفي شوب..... خالد:وايش سويت؟ عبدالله:رتبت امور العزاء...وبعد ماصلينا الظهر صلينا عليها..الله يرحمها..ورحت العصر عزيت الريال وقلت برجع لهم في الليل.. خالد:واشلون حالته؟ عبدالله:الله يعينه هو وابوه ..مسكين وايد متضايق.. خالد:الله يصبره.. عبدالله:امي حصلت لي على وحده.. خالد:زين..بالمبارك.. عبدالله:مو بالاول اسمع قصتها.. خالد:ليش البنت لها قصة؟ عبدالله:عيل شالي خلاني اجيبك في هاليوم المفروض اقعد ويارفيجي.. خالد:انا بعد استغربت..شالسالفة؟؟ عبدالله:في بنت امي تمدح فيها وفي اهلها..وحده متدينة وحافظة القرآن..بس البنت ماهي قطرية.. خالد:مب قطرية؟ عبدالله:لا.. خالد:وانت ايش رايك؟ عبدالله:والله ماادري..محتار.. خالد:اشفيها لو خذت لك وحدة مب قطرية..عيالك بيكونون قطريين.. عبدالله:ادري..بس... خالد:بس شنو؟..اسمعني ياعبدالله..دام البنت يمدحونها واهلها ماعليهم كلام شالمانع؟ عبدالله:امي تقول انها من مواليد الدوحة واهلها من سنين عايشين في الدوحة واللي يشوفوهم مايصدق انهم مب قطريين.. خالد:هذا انت قلتها بلسانك..يعني عادي.. عبدالله:ماادري ليش متردد.. خالد:اذا تبي رايي..مثل ماقلت لك..تزوجها وتوكل على الله..ترى في هالزمن نادر تحصل وحده بأخلاق والكل يمدح فيها ومستورة..ترى الفتن زادت..والبنات صاروا يتغيرون اللي تطلع شعرها واللي تتميكج واللي حالتها حالة..الواحد صار يخاف يتزوج من ولا من..فكر في الموضوع عدل ومن كم جانب وعقب قرر..ولاتنسى تستخير.. عبدالله:ماادري.. خالد:قوم خلنا نكمل حجي بالسيارة..انت لازم تروح عند رفيجك..هو بحاجتك ياعبدالله.. عبدالله:انت ماتدري ياخالد ان هالشخص هو اللي شجعني بزود اني اتزوج.. خالد:اشلون؟ عبدالله:خلنا نركب السيارة وبقولك.. في مكتب بوفهد.... فهد:يبه تطمن..انا بحاول احل المشكلة.. بوفهد:اشلون والمحامي يقولك الخسارة بتكون كبيرة..وماكو حل للموضوع.. فهد:اكيد في حد ورى هالسالفة..احنا صار لنا سنين ماصادتنا مشاكل شالي صار لنا الحين؟؟ راكان:لازم تفهم السالفة كلها.. فهد:هذا اللي بسويه.. بوفهد:الله ياستر.. فهد:لاتحاتي يبه..الخير وايد.. بوفهد:الخير وايد..بس الخسارة بتكون كبيرة..لاتنسى ان في مشاريع معتمدة على اسهم هالشركة.. فهد:ادري..بس لاتعب عمرك وانت تفكر وتحاتي..انا ان شاء الله باجر مسافر وبعرف السالفة وبحاول نحل هالازمة.. في السيارة..... خالد:دام انك مستعجل ياعبدالله..خلاص البنت موجودة.. عبدالله:هي مب قطرية..ولازم ناخذ ورقة من الداخلية.. خالد:خذها وشالمانع؟ عبدالله:انا سمعت ان ورقة الداخلية تطول وايد.. خالد:يعني ايشقد شهر؟ عبدالله:شنو شهر!..انا سمعت ثلاث شهور وفوق.. خالد:هذا اذا كانت هي قطرية وانت لا.. عبدالله:حتى هذا.. خالد:المهم..اذا لك نصيب وياها بصير..وبعدين رب العالمين كاتب لك الزواج في اليوم الفلاني ان كان مع هالبنت او غيرها..قبل لترد ابي اشتري آيس كريم حق اختي.. عبدالله:نفس المحل؟ خالد:اي.. في يوم من الايام من شهر 2 الساعة 3ونص العصر..قاعدة شيماء مع شمة ومشاعل وسلوى يشوفون فيلم في الصالة...راشد يدخل البيت.... راشد:السلام عليكم.. شيماء:هاااي براذر..حياك سي ويانا..هالفيلم عجيييب.. راشد:لا شكرا..انا جاي تعبان من الدوام ومالي خلق افلام..وين امكم بنات؟ سلوى:في البيت.. راشد:وامي وين؟ شمة:راحت تقيل.. راشد:فارس ماهو في البيت؟ شمة:لا ماشفناه على الغداء..تقول شيخة عنده عملية وماهو راد.. راشد:انا رايح انام.. شيخة قاعدة بين الطوف...ومتضايقة وايد لأن فارس ماجى يتغدى وياها..وودها تبجي..مسكت عمرها..وحاولت تسوي شي..لكنها ماقدرت وحست بخنقة..فتحت الدريشة شافت الدنيا صخة..سكت الدريشة والستارة وراحت تقعد تطالع تلفزيون..اندق الباب..فتحته.... شيخة:هلا شمة.. شمة:شتسوين؟ شيخة:ولاشي قاعدة اطالع تلفزيون.. شمة:انزين ايش رايج تيين تطالعين ويانا فيلم؟ شيخة:لا مشكورة..انا شوي تعبانة ومااقدر انزل..خليها في المرات الجاية.. شمة:على راحتج..باااي.. شيخة:باي..(سكت الباب ودمعت عينها) تحت تنزل شمة وتقعد مع البنات تيي ام راشد.... ام راشد:اخوكم راشد ماوصل؟ شيماء:بلا مام..سأل عنج وعقب راح يرقد.. ام راشد:وفارس؟ شمة:لا يمه فارس مارد.. ام راشد:وشيخة وينهي؟ شمة:بدارها..قلت لها تعالي نزلي شوفي ويانا تلفزيون مارضت..تقول تعبانة وماتقدر تنزل.. ام راشد:تعبانة!!..اشفيها؟ شمة:ماادري.. ام راشد:بروح اشوفها.. ركبت ام راشد المصعد وراحت غرفة فارس دقت الباب...قامت شيخة وفتحت الباب.... شيخة:هلا خالتي..حياج.. ام راشد(دشت):اشفيج يمه؟..تعبانة؟ شيخة:اي خالتي شوي تعبانة.. ام راشد:عسى ماشر..شي يعورج؟ شيخة:بس راسي يعورني.. ام راشد:مارقدتي؟ شيخة:لا.. ام راشد:ليش يمه؟ شيخة:ماحبيت انام..بس لاتحاتين اذا ريحت شوي بصير زينة.. ام راشد:خليني اتصل في فارس واقوله يرد البيت.. شيخة:لا ياخالتي لاتتتصلين فيه..هو الحين مشغول..ومايقدر يرد الا بالليل.. في شركة بوفهد...فهد يرد من المطار على الشركة...يدخل المكتب..... فهد(يمد يده):خبر هالموظفين بإجتماع ضروري الساعة 7.. علي:حاضر طالع عمرك..تامرني بشي ثاني؟ فهد:اتصل في راكان خله يي.. علي:ان شاء الله.. يدش راكان مكتب فهد..بعد السلام.... فهد:ليش ابوي ماداوم اليوم؟ راكان:انت ناسي ان عنده معرض في الامارات.. فهد:بلا..وانت ليش مارحت وياه؟ راكان:ومن يقعد بالشركة؟..خذ وياه السكرتير..قولي ايش سويت؟ فهد:شاقولك ياراكان..خسرنا وايد.. راكان:انت من صجك؟ فهد:من 13 فرع تسكروا منهم 8 .. راكان:8!!!ليش؟؟؟ فهد: 8 جات منهم حالات تسمم..والخمسة اللي بقوا مالهم امان..ممكن بأي لحظة يتسكرون.. راكان:عيل رحت هناك ايش سويت؟ فهد:في حد ورى هالسالفة..يبي ينتقم منا..وسوى هالشي فينا..بس من هو هالشخص مااعرف..الحساد وايديين..والخسارة بتكون بالملايين..ولاتنسى ان في مشاريع كبيرة راح تتوقف.. راكان:مايصير جذي يافهد..لازم في حل.. فهد:علينا ضرايب لازم نسددها.. راكان:وكم قيمة الضرايب؟ في بيت ام عبدالله.... ام عبدالله:هلا والله بوليدي..حبيب قلبي.. عبدالله:اشلونج يالغالية؟ ام عبدالله:بخير دام اني اشوفك بخير..قولي ايش سويت اخبار المعرس؟ عبدالله:لا المعرس مستانس حده..ماهو مصدق انه تزوج..الحمدلله رد من شهر العسل.. ام عبدالله:بسرعة ردوا.. عبدالله:ماعطوه اكثر من اسبوعين.. ام عبدالله:الله يهنيه..ويسعده..وعقبالك انت.. عبدالله:ان شاء الله.. ام عبدالله:انت مارديت علي ياولدي علشان البنت..تبيها ولا لا..وانا بعد انشغلت بحمال اختك وتعبها وماقدرت افضي نفسي علشانك..ابي اعرف رايك اذا كنت تبيها بروح اخطبها لك واذا لا علشان اشوفك لك وحده غيرها.. عبدالله:خلاص يمه توكلي على الله..وربي يكتب لنا اللي فيه الخير.. في مكتب فهد..... يوسف:ليش؟ فهد:علينا ضرايب بمبالغ مرتفعة..وماادري اشلون بنسددها.. يوسف:بس انت قادر تسدد هالضرايب.. فهد:اي نعم قادر..بس بالمقابل راح اخسر اشياء وايدة..بخسر الفلوس اللي بدفعها للضرايب..بخسر 13 فرع كان دخلهم كبير..بخسر مشاريع اعتمدت على هالفروع.. يوسف:اسمح لي يااستاذ فهد..انتوا غلطتوا يوم فكرتوا ان ارباح شركة تدخلونها في مشاريعكم..ماكنتوا المفروض تعتمدون على هالفكرة..لأن يوم من الايام يمكن خسرتوا اشلون بتمشون مشاريعكم.. فهد:انا ماسويت هالفكرة الا على مشروعين.. يوسف:وهالمشروعين كبار.. فهد:بس انا ماجى على بالي ان يوم من الايام جذي بصير.. يوسف:التجارة فيها خسارة وربح..انت وحظك..المهم ان لازم يكون في حل..نسترتجع 13 فرع وتدفع الضرايب من غير خساير.. فهد:اشلون؟ فارس يدش البيت يحصل امه وابوه يسولفون...والبنات قاعدين يسولفون.... ام راشد:يمه راشد روح تطمن على زوجتك.. فارس(تخرع):زوجتي اشفيها؟؟؟ ام راشد:رحت لها العصر كانت تعبانة شوي.. فارس(قام) بوراشد:ليش مارديت الظهر؟ فارس:كانت عندي عملية..عن اذنكم.. دخل المصعد ومشى بخطوات سريعة للغرفة..دش على طول حصلها قاعدة على السرير ومادة ريولها وتقرأ مجلة...قعد عندها على طول وحط ايده على جبينها ومسك يدها... شيخة(هدت المجلة) فارس:شيخة اشفيج؟؟..تعبانة؟ شيخة:ليش تسأل؟ فارس:امي قالت لي انج تعبانة..في شي يعورج..قولي لي.. شيخة:خايف علي؟ فارس:أكيد..انت حبيبتي..اشلون مااخاف عليج.. شيخة:انا بخير..(قامت من على السرير) فارس(وقف جدامها):قولي لي اشفيج تعبانة؟ شيخة:ماكو..بس كنت مصدعة.. فارس:انزين تعالي خليني اشوف ضغطج.. شيخة:مايحتاي..انا بخير..والصداع راح.. فارس:لا انا جذي مااتطمن.. شيخة:فارس صدقني انا بخير..روح بدل ملابسك وخلنا نتعشى.. فارس:انت متأكدة.. شيخة:اي نعم.. فارس:شيخة.. شيخة(وقفت) فارس:أنا آسف لأني ماجيت حزة الغداء..بس الموضوع كان طارئ في واحد كان مسوي حادث وحالته حرجة وكان لازم يدخل العمليات وماكان في جراح موجود حزتها..فأنا اعتذر.. شيخة(ابتسمت غصب عنها):لا عادي حبيبي..انت دكتور وهذي وظيفتك..قوم بدل ملابسك.. بعد العشاء....الكل قاعد يسولف والتلفزيون شغال على الاخبار..شيخة تقوم... فارس(مسك يدها):وين؟ شيخة:رايحة انام..نعست.. ام راشد:يمه شيخة اذا تعبانة خلي فارس يوديج المستشفى.. شيخة:لا خالتي انا بخير..بس نعست وابي انام.. ام راشد:على راحتج يمه.. راحت... راشد:اشفيها زوجتك؟ فارس:ولاشي تقول مصدعة شوي.. سكت الباب وقعدت على السرير ودمعت عينها..رن تليفونها.... شيخة:هلا وديمة.....بخير انت اشلونج؟....مااعتقد.....بحاول... مافيني شي....صدقيني مافيني شي...(فارس يدخل الغرفة)....تطمني انا بخير....بحاول...ياللا وديمة انا بسكر...باااي.. فارس(قعد جنبها):اشلونج الحين؟ شيخة(قامت):بخير..تطمن.. فارس:وين رايحة؟ شيخة:بروح افرش اسناني.. في بيت بوفهد..... بوفهد:الحين ايش بنسوي؟ راكان:يبه السالفة تعقدت وايد..يبلينا نقعد عدل ونحسب السالفة عدل.. بوفهد:هاا فهد.. فهد:انا ماابي اسحب اي مبلغ من البنك..ولا ابي ابيع شي.. بوفهد:عيل ايش تبي تسوي؟ فهد:بحاول ارجع شركتنا.. راكان:بس هم خلاص خذوا الرخصة.. فهد:ادري..بحاول بطريقتي..بس عطوني مهلة افكر.. بوفهد:بس احنا محتاجين تمويل حق المشروع.. فهد:ادري..بس عطوني يومين وبتنحل المشكلة..(قام) راكان:وين رايح؟ فهد:طالع ويا غانم.. الصبح الساعة 6...يقوم فارس من على السرير ويتجهز للدوام...قامت شيخة من النوم... شيخة:صباح الخير حبيبي.. فارس:صباح الورد يااغلى وردة بحياتي.. شيخة(ابتسمت):لاتنسى تريق.. فارس:من عيوني.. شيخة:فارس.. فارس:قلب فارس آمري.. شيخة:ابي اروح السوق ويابنت خالي وامي.. فارس:متى؟ شيخة:على التسع بطلع.. فارس:ومتى بترجعين؟ شيخة:انت بترد على الغداء؟ فارس:ان شاء الله.. شيخة:خلاص انا بعد برد علشان نتغدى جميع.. فارس:خلي السايق يوصلج بيت ابوج.. شيخة:مايحتاي امي بتمرني.. فارس:ديري بالج على نفسج..(طلع بوكه)..هاج هالفلوس..واذا بغيتي زيادة بتحصلين في الصندوق البني في الكبت فتحيه خذي المبلغ اللي تبينه.. شيخة:تسلم حبيبي.. فارس:ماقلتي لي اشلون راسج الحين؟ شيخة(ابتسمت له):بخير.. فارس:الحمدلله..مع السلامة.. شيخة:مع السلامة..(استانست وردت تنام مرة ثانية) في بيت أسامة.....أسامة نايم وعبدالله يغطيه باللحاف ويسك الليتات والستاير ويطلع من غرفته..... بوأسامة:اشلونه ألحين؟ عبدالله:زين..(يقعد)...بس هو محتاج دكتور..حرارته مرتفعة ويكح وايد..لازم دكتور يشوفه.. بوأسامة:ياليت لو نعرف دكتور يجينا البيت..حالته ماتستحمل الطلعة من البيت.. عبدالله(قعد يفكر):دكتور......(طلع تليفونه)..أنا بسأل وبشوف..اذا حصلنا وايد زين..........آلو...السلام عليكم.......بخير انت اشلونك؟....اقول محمد تعرف دكتور حولك ممكن يساعدنا.....واحد من الربع تعبان شوي ومايقدر يروح المستشفى فقلنا نشوف له دكتور يشوفه.........جنه ماادري....خلاص انا باتصل فيه...مشكور...فمان الله.. بوأسامة:حصلت؟ عبدالله:في واحد من الربع يعرف دكتور..باتصل فيه.....رد..رد.....السلام عليكم....اشلونك خالد؟....وينك فيه ماترد؟...انزين اقول تعرف دكتور يقدر يجينا البيت.....ماكو بس واحد من الربع شوي تعبان ومحتاج دكتور يشوفه.......من؟.......انت كلمه اذا هو مايقدر يشوف لنا حد غيره يقدر ييي...والله ياليت .....حرارته مرتفعة وتعبان......انزين تكفى شوف لنا ورد علي..فمان الله. | ||||||||
|
| |
|
11-12-13, 12:19 PM
| #26 | ||||||||
| مراقبة عامة ومشرفة منتدى الروايات المنقولة
| متابعة فصل الـ 12 في بيت بوراشد.....شيخة تنزل تحت وتسلم على ام ريلها..... ام راشد:اشلونج الحين يايمه؟ شيخة:بخير عمتي..الحمدلله احسن.. راشد:خذتي لج بندول ولاشي؟ شيخة:لا..بس الحمدلله رقدت وتحسنت..خالتي انا طالعة وياامي وبرد على الغداء.. ام راشد:روحي يمه وديري بالج على عمرج..وسلمي على الوالدة.. شيخة:يوصل ان شاء الله..مع السلامة.. راشد:يمه اشفيها مرت فارس؟ ام راشد:ماادري يايمك..شكلها يقول ان فيها شي.. يرن تليفون راشد... راشد:هذا فارس....السلام عليكم....انا في البيت......انزين واشفيه؟......وين بيته؟.......انا ببدل ملابسي وانت اتصل فيهم وشوف وين بيتهم ورد علي...فمان الله.. ام راشد:ايش يبي فارس؟ راشد:واحد تعبان ويبوني اروح اشوفه في البيت.. ام راشد:تروح بيتهم!!..تعرفهم يمه؟ راشد(يقوم):لاتحاتين يمه..بكون بخير..بروح ابدل ملابسي..مع السلامة.. ام راشد:الله يحفظك ويرعاك.. في بيت أسامة...عبدالله يفتح الباب ويدخل راشد.... بوأسامة:دكتور ولدي وايد تعبان ونفسيته تعبانة بعد..تكفى عطه علاج يريحه ويرحني.. راشد:ان شاء الله.. في السوق.... وديمة:شيخة شوفي هالبنطلون يهبل.. شيخة:واااو عجيب واللون بعد رهيب..خلاص انا باشتريه.. وديمة:انا بعد باشتريه..ياسلام لابسين نفس الشي.. شيخة:ايش رايج في هالبادي وياه؟ وديمة:حلو..والبيج حلو بعد.. شيخة:بس الاسود عاجبني.. وديمة:بس البيج غير يفتح لون بشرتج وانت لابسه البنطلون.. ام فيصل:هاا بنات خلصتوا؟ شيخة:يمه ايش رايج؟ في بيت اسامة...في غرفة اسامة..... راشد:ليش صاير فيه جذي؟ عبدالله:امه توفت وهو وايد متضايق على فراقها..حتى الشغل مامعطيه حقه.. راشد:الظاهر امه كانت كل شي بحياته.. عبدالله:امه كانت تتمنى انه يتزوج ويكون عنده عيال..لكن هو ماحقق هالامنية.. راشد:الله يعينه.. عبدالله:اشلونه الحين؟ راشد:عطيته ابره وهو الحين راقد..وبكتب له على ادوية روح خذ له من الصيدلية..وخله يستخدم الادوية بانتظام لمدة خمسة ايام.. حزة الغداء....يطلع خالد من غرفته ينزل تحت... خالد:عيل وين وديمة؟ الجدة:ليحين ماردت.. خالد:بس هي قالت بترد حزة الغداء.. الجدة:ماادري يايمه.. وديمة(دشت البيت):السلام عليكم.. الجميع:وعليكم السلام.. خالد:وين تأخرتي.. وديمة:شسوي الشوارع زحمة بعدين عمتي وصلت شيخة وعقب وصلتني..صبروا لاتتغدون من غيري.. خالد:اشوف خامة السوق.. وديمة:شسوي منزلين اشياء حلوة وجديده.. بعد الغداء..شيخة تسبق فارس وتروح تغير ملابسها وترتب المكان...يدش فارس الغرفة ويشم ريحة طيبة..ويشوف الكيك اللي بوسط الطاولة..والورد اللي متناثر حول الكيكة..ابتسم وجات شيخة.... شيخة:احم احم.. فارس:ياسلام..وايد محلوة.. شيخة:ايش رايك؟ فارس:جميلة ماشاء الله عليج..ايش هالزين..وايش سالفة الكيك؟ شيخة:ماشي..بس بمناسبة حبي لك.. فارس:ياسلام عليج..(قعد)..قعدي جنبي..وخلنا نقطع الكيكة.. قطع الكيكة وكلوها.... فارس:وايد لذيذة.. شيخة:عليك بالعافية حبيبي.. فارس(يشوف الساعة):اوو..بتأخر على المستشفى..لازم اروح الحين.. شيخة(تضايقت) فارس قام وبدل ملابسه وتجهز..حصل شيخة ليحين قاعدة مكانها لكن لاهي قاعدة تاكل ولا تسوي شي ساكتة...استغرب... فارس:شيخة اشفيج؟ شيخة(قامت):لا ماكو شي.. فارس:وين رايحة؟ شيخة:بروح ابدل ملابسي وبنام.. فارس:حبيبتي لاتزعلين لأني طالع.. شيخة:ماني زعلانة.. فارس:ادري اني خربت عليج هالجو..آسف..بس انت تدرين اني بتأخر لازم اروح بدري.. شيخة:لا عادي..روح.. فارس:مع السلامة.. شيخة:مع السلامة.. سك الباب..وشيخة مسحت المكياج وبدلت ملابسها وحطيت الكيك بالثلاجة وفتحت المكيف ونامت.. الصبح بدوام أحمد ومحمد...يدخل المستخدم ومعاه ورقة لأحمد..أحمد قعد يقراها وهو متقاجأ وماهو متوقع هالشي.. أحمد(وهو يطالع في الورقة):محمد..انا بحلم ولا بعلم.. محمد(في وسط الشغل):شتقول؟ أحمد(قام وراح له):أقرا الورقة..انا مب مصدق..اكيد في شي غلط بالموضوع.. محمد(قعد يقراها استانس وقام علشان يبارك له):مبروك ياريال تستاهل.. احمد:يعني الكلام المكتوب صج؟ محمد:اي صج..هذا توقيع المدير وهذا اسمك..بالمبارك..وأخيرا بتاخذ مكان بعض الناس..ودي اشوف وجهه.. أحمد:ماني مصدق.. محمد:تستاهل وانا اخوك..انت ماشاء الله عليك كنت تشتغل بذمة وضمير.. احمد:وانت بعد.. محمد:لا انا غير وانت غير..بعدين لو ماكنت تستاهل هالمنصب جان المدير مارقاك.. احمد:ورئيس القسم ايش سووا فيه رقوه؟ محمد:ماادري.. دخل واحد من الموظفين... الموظف:السلام عليكم.. الجميع:وعليكم السلامة.. الموظف:سمعتوا آخر الاخبار؟ محمد:لا سمعنا.. الموظف:رئيس قسمكم نزلوه بالدرجة وبيقعد وياكم في المكتب.. محمد(يشوف احمد):لا لاتقولها.. الموظف:ايش دعوة ماتدرون؟ محمد:لا..وليش؟ الموظف:يقولون ان سمعته السيئة واصلة لعند المدير والمدير حب يعاقبه ونزل درجته في التوظيف..بس ماادري من اللي حطوه مكانه.. محمد(يضحك):اللي حطوه مكانه هو احمد.. الموظف:بالمبارك يااحمد..تستاهل..عاد نبي الحلاوة.. احمد:الله يبارك فيك.. الموظف:الله يعينك يامحمد على الضيف الثقيل اللي بيرافجك في المكتب..فمان الله.. محمد:فمان الله..احمد اشفيك؟ احمد:ماني مصدق اني صرت رئيس القسم.. محمد:الحمدلله..عاد اليوم انا مب راد البيت.. احمد:ليش؟ محمد:لأنك حلفت علي اتغدى وياك..وانا ماابي ازعلك.. احمد(يضحك):والله انت تصيد الواحد غصب عنه.. شيماء تنزل تحت وهي تنادي امها...... شيماء:مامي..مام..مامي.. ام راشد:سكتي يابنت خلني اعرف اتحجى..انزين ياام سالم ايش كنت تقولين؟ شمة(تنزل وتروح لهم):قلتي لها؟ شيماء:لا..ماتخليني..قاعدة تسولف.. شمة:ايش رايج نروح عند شيخة لين ماامي تسكر.. شيماء:لا..صبري بالاول انقولها وعقب نروح.. ام راشد:ان شاء الله...الله يسمع منج وعيالج ان شاء الله....تسلمين فديتج....مع السلامة..انتوا ماتقدرون تسكتون شوي..ماعرفت الحرمة ايش قالت من صوتكم.. شيماء:مام..انا وشمة نبي نروح السوق.. ام راشد:ليش بعد؟ شمة:نبي نشتري شوية اغراض للمدرسة..بلييز مامي.. شيماء:وبعدين احنا في هاالاجازة ماطلعنا مكان.. ام راشد:ومع من تبون تروحون؟ شيماء:مع السايق يوصلنا.. ام راشد:بنات بروحكم لا..ماني موافقة.. شيماء:يمه مانقدر نروح ويا سلطان.. ام راشد:وليش ان شاء الله؟ شمة:يمه لأن رفجيتنا جايه ونبي نشوفها.. ام راشد:نعم!! شمة:يمه لاتخافين انت تعرفينها خولة..وبنقعد شوي ويابعض في المطعم بنشرب لنا شي وبنتسوق جميع.. ام راشد:انزين روحوا وياروضة.. شيماء:مامي روضة ماتقدر على المشي وهي حامل.. ام راشد:روحوا وياشيخة.. شمة:اي صح فكرة.. شيماء:واذا مااقدرت؟ ام راشد:اذا مااقدرت روحوا عند الجوهرة وخلها تيي وياكم.. شمة(مسكت يد شيماء):امشي خلنا نروح عند شيخة ونقولها.. دقوا عليها الباب...كانت لابسه جلابيه سادة وفاله شعرها بس من غير مكياج..فجت الباب.... شيماء+شمة:هاااي.. شيخة:اهلين..حياكم.. قعدوا... شيماء:شتسوين شيخة؟ شيخة:ولاشي كنت قاعدة ارتب الغرفة.. شيماء:انزين انت حاسة بملل؟ شيخة:يعني.. شيماء:انا وشمة طالعين الستي تيين؟ شيخة:الستي؟ شمة:اي الستي..بنروح نشتري لنا شوية اغراض للمدرسة..ورفجيتنا جايه بعد..فقلنا نخبرج اذا تقدرين تجين ويانا.. شيخة:ماادري..متى رايحين؟ شيماء:يعني بعد صلاة العصر.. شيخة:ماادري خلني اشوف فارس وعقب برد عليكم.. في بيت بوفهد..... كاملة:ايش صار على هبة..طلقها؟؟ ام فهد:لا والله..ماادري هالولد على ايش ناوي..ومتى يبي يطلقها ماادري.. كاملة:يمكن مشغول.. ام فهد:حتى لو مشغول..مو ينسى هالسالفة.. كاملة:يمكن يبي يرجعها.. ام فهد:مااعتقد ياكاملة..فهد عافت نفسه منها..حتى الجناح اللي كانوا فيهم من يوم ماهي طلعت من هالبيت وهو مادخل فيه يقعد بداره الاولية.. كاملة:الله يكون بعونه..تعتقدين بيتزوج عقب اللي صار؟ ام فهد:ماادري..ياليت يتزوج ونشوف حفيدنا.. كاملة:ان شاء الله.. ام فهد:انا الغلطانة..ماكنت المفروض اوافق على هالزواج..ياليت سمعت كلامج.. كاملة:خلاص ياموزة..لافات الفوت ماينفع الصوت..كل شي في هالدنيا نصيب.. الساعة 3...فارس يروح يتوضى وشيخة قاعدة تقرأ مجلة...يطلع فارس من الحمام.... فارس:تدرين شيخة اليوم جاتني مريضة على اساس تاخذ نتايج التحاليل والاشعة اللي سوتها واكتشفنا ان فيها ورم..البنت بغت تستخف ماهي مصدقة قعدت تصيح صياح..كسرت خاطري.. شيخة:الله يشافيها..وبتسوي لها عملية؟ فارس:هي ورمها حميد..ولو شلناه بسرعة وايد احسن لها..بس هي رافضة.. شيخة:فارس.. فارس(قعد جنبها):عيون فارس.. شيخة:خواتك يبون يروحون الستي ويبوني اروح وياهم..فاايش رايك؟ فارس:اللي يريحج حبيبتي..اذا في خاطرج تروحين روحي..انا ماعندي مانع.. شيخة(كملت قراية) فارس:شنو بتروحين؟ شيخة:يمكن.. فارس(رفع راسها):شيخة اشفيج؟ شيخة(ناظرته بسكوت وهي تفكر بمية شغله):مافيني.. فارس:الا فيج..انت حالج كلش مب عاجبني..اذا تعبانة خليني اوديج المستشفى.. شيخة:فارس حبيبي..ترى بتتأخر على المستشفى..روح صل العصر.. فارس:ماني رايح مكان..ترى باعتذر عن الروحة اليوم للمستشفى..انت شكلج مب عاجبني من جم يوم.. شيخة:صدقني مافيني شي..روح ولاتفكر فيني..(قامت) فارس(مسكها):تعالي..وين رايحة؟ شيخة:بروح اقول حق خواتك اني رايحة وياهم.. فارس(وقف جدامها ولعب بخصلها):حبيبتي..انتي فيج شي..وانا متأكد..تكفين قولي لي..ترى صار لي فترة وانا افكر فيج واقول اليوم بتقولي..ولا في شي صاير في بيت اهلها ماتبي حد يعرف.. شيخة:فارس.. فارس:عيون فارس.. شيخة:احبك.. فارس:وانا بعد احبج..قولي لي باللي في خاطرج.. شيخة(نزلت راسها وتمنت ايام العسل ترجع) فارس(رفع راسها):ليش الوردة ذبلانة؟ يندق الباب...راح فارس علشان يفتح الباب.... فارس:خير شيوم؟ شيماء:جايه اعرف شيخة بتيي ولا لا؟ فارس:لا ماهي جاية.. شيماء:لالا..ليش؟؟ فارس:جذي..ياللا روحي احنا مشغولين.. شيماء:زين..بااي.. فارس:باااي.. شيخة:ليش قلتها اني مب رايحة؟ فارس:لأن صج مب رايحة.. شيخة:مع انك كنت موافق.. فارس:غيرت رايي..ابيج تطلعين وياي.. شيخة:بس انت عندك شغل.. فارس:عادي باعتذر عن الشغل اليوم وبطلع وياج..بروح الصلاة وعقب باتفق وياج على شي..اوكي؟ شيخة:اوكي.. وديمة حاسة بملل..تدخل النت وتدور في هالمواقع...يرن تليفونها.... وديمة:آلو.....من حمد؟....هلا والله.....انت وينك فيك لانسمع اخبارك ولاندري عنك شي.......بخير انت اشلونك؟.....كلنا بخير....اخبار الجامعة وياك؟.......شكلك مستانس وماتبي ترد.......ايش ماخذ؟......وايد زين..لا حبيبي لاتفكر فيها....بس جذي..صج متى؟؟؟....واااااو وناسة...لا ماادري محد قالي....اكيد ماتبي تقول....اوكي....مع السلامة.. يندق الباب.... وديمة:حياك.. خالد:السلام عليكم.. وديمة:وعليكم السلام.. خالد:انت مابتغيرين نظام نومج؟ وديمة:ليش؟ خالد:صار لج جم يوم ماتتغدين ويانا.. وديمة:شسوي خلني انام..جايتنا ايام مابنرقد عدل.. خالد:من كنتي تحاجين؟ وديمة:حمد.. خالد:حمد!! وديمة:اي..وقالي انهم بيوون اسبوع الدوحة.. خالد:اي ابوي قالي.. وديمة:وليش ماقلت لي؟ خالد:نسيت..شتسوين؟ وديمة:يااخي ملانة..مااعرف شسوي.. خالد:سوي شي مفيد.. وديمة:تعبت..ودي اطلع واغير جو.. خالد:اذا فضيت بحاول اطلعج المساء.. وديمة:يارب تفضى يارب تفضى.. خالد(يبتسم) في المطعم..... فارس:ايش تشربين؟ شيخة:ماادري..اممم..باخذ عصير ليمون بالنعناع.. فارس: excuse me.. الجرسون:yes please فارس:.one lemon with mint and one guava ..(راح الجرسون)..شيخة.. شيخة:نعم؟ فارس:تشكين بحبي واخلاصي لج؟ شيخة:طبعا لا..انا متأكدة.. فارس:ان ايش؟ شيخة:انك تحبني.. فارس:دام انج متأكدة ليش زعلانة ومضايقة عمرج؟ شيخة:انا مب زعلانة..بس انا... فارس:انت شنو؟..قولي لي كل اللي في خاطرج..انا اسمعج.. شيخة:انا مفتقدتك يافارس..انت كنت كل شي بحياتي..اقعد الصبح اشوفك اتريق وياك..كل مافضيت في الدوام تتصل فيني ولاتطرش لي مسج..وحزة الغداء لازم نتغدى مع بعض..والعصرية عقب مانريح نطلع ندور ولانقعد نسولف ونطالع تلفزيون ويابعض..والعشاء دوم ويابعض..فارس انا هذا كله مفتقدته هالفترة..شغلك قاعد ياخذك مني وانت مو منتبه.. فارس:انا حاس فيج وفاهم كل كلمة تقولينها..بس ياشيخة انا ماسويت هالشي الا علشانا احنا الاثنين وعيالنا ان شاء الله..لازم نفكر في المستقبل..ولازم بعد نضحي في بعض الاشياء في حياتنا علشان نقدر نوصل لمبتغانا.. شيخة:فارس افهمني..انا احبك..ومااقدر على فرقاك..ومافي شي في هالدنيا يخليني اضحي بحبك.. فارس:شيخة حبيبتي..انا ماطلبت منج تضحين بحبج لي..انا ابيج تتفهمين وضع شغلي..بعدين انا ماخذ رايج قبل لأقولهم على الدوام المسائي.. شيخة:ليش راشد مو مثلك؟ فارس:شيخة لاتقارنين بيني وبين راشد..راشد ياشيخة انتي ماتعرفينه عدل ولاتعرفين قصة حياته..راشد ياشيخة عاش سنين طويلة بعيد عنا..تزوج وراح يكمل مسيرة دراسته العليا برع الديرة ويا زوجته وهناك الله رزقهم بعيسى وسلطان وسلوى ومشاعل..عياله كلهم مواليد برع الدوحة..تخيلي وياي اشلون تغربوا عن الديرة واهلها علشان بس يقدر يوصل للي يبيه..الحين عياله مستفيدين من ابوهم..الوظيفة اللي هو فيها تعطيه معاش قوي..بيت كبير وعنده ويوم يفكر عيسى بالزواج راشد زاهب علشان يساعد ولده..يعني راشد جى الوقت اللي يهتم بأمور عياله الشخصية وهو في السن..عرفتي ليش راشد غير عني؟ شيخة:أنا آسفة.. الجرسون جاب العصير وراح.... فارس:لاتتأسفين على شي..انا بس كنت ابي اوضح لج..احنا محتاجين نوقف جنب بعض ونتساعد..جدامنا درب طويل..ومانعرف هالدرب ايش بيكون موجود فيه..الشي اللي ابيج تعرفينه ياشيخة ان راشد اخوي هو قدوتي في الدنيا..اتعلم منه كل تجاربه..احطه فوق راسي..ومقامه من مقام ابوي..علمني اشياء في الحياة ماكنت اعرفها..ساعدني في الدراسة بشكل ماتتصورين..يعني ماكنت اصدق اني بطلع من الاوائل في التخرج..وهذا بفضل من؟..بفضل الله ثم راشد..راشد ياشيخة شهادتي فيه مجروحة..اهتم بكل شي يخصنا خذ حمل ابوي..حتى الزواج هو اللي شجعنا عليه..حتى شمة وشيماء ترى راشد مايقصر وياهم بشي من ناحية الفلوس والهدايا والطلعات والسفرات..يعتبرهم مثل بناته..انا قاعد احاول اني اصير لو شوي مثله.. في بيت بوراشد...الساعة 8... بوراشد:الحمدلله على النعمة.. ام راشد:شبعت؟ بوراشد:الحمدلله..(قام يغسل ايدينه) ام راشد:ميري..ياميري.. ميري:نعم ماما.. ام راشد:تعالي شيلي الصينية.. ميري:زين ماما.. ام راشد:جيبي ماي.. وراحوا يقعدون في القعدة الثانية..... بوراشد:وين العيال؟ ام راشد:فارس طلع وياشيخة..وتميم طلع العصر وصل زوجته بيت ابوها..وراشد في الدوام..والجوهرة اخوانها عندها.. بوراشد:والبنات؟ ام راشد:فوق بدارهم.. بوراشد:ناديهم..مااحب اقعد مكان محد فيه.. ام راشد(قامت):مايايزيين لك.. بوراشد:ماقلت جذي..بس متعود على حشرتهم.. ام راشد:ميري.. ميري:نعم ماما.. ام راشد:روحي فوق نادي شيماء وشمة.. في الغرفة.... شيماء:شموه لحقي..شوفي ايش كاتب هالعبيط.. شمة(تيي وتشوف وتموت من الضحك):يحليله.. شيماء:يحليله!!..والله كريه ويجيب المرض..ماشفت واحد يستخف دمه كثره..تدرين ايش بسوي..بقيمه سلبي.. شمة:شيوم حرام عليج..هو مسكين وايد حبوب.. شيماء:حبته القرادة..ياعل في بطنه الدوود.. شمة:شيوم اشفيج على الريال..لاتقولين عنه جذي.. شيماء:الا بقول..ولا هو يتجرأ ويقط علي نغزات جدام كل الاعضاء.. يندق الباب.... شمة:منو؟ ميري:ماما تقول تعالوا تحت.. شمة:زين زين..امشي تبينا.. شيماء:صبري علي خلني ابرد جبدي فيه.. شمة:قومي بعدين..خلنا نشوف امي ايش تبي.. شيماء:انزين..(سكت اللاب توب وقامت) تحت....البنات يسلمون ويقعدون..... شيماء:اشلونك بابي؟ بوراشد:الحمدلله..وينكم فيه؟ شيماء:فوق..ولا المفروض هالحزة نكون في السوق.. بوراشد:واشله تروحون السوق؟ شيماء:يبه نبي نشتري اغراض للمدرسة..مابقى شي على الدوام.. بوراشد:وليش مارحتوا؟ شيماء:امي ماخلتنا.. بوراشد:وليش ماخليتي البنات يروحون؟ ام راشد:ماكو حد يروح وياهم..وماقدرت اخليهم يروحون بروحهم.. بوراشد:انت ليش مارحتي وياهم؟ ام راشد:انا وين فيني شدة على روحة السوق.. بوراشد:يعني بناتج اذا ماراحوا وياج يروحون ويامن؟ ام راشد:البركة فيك..انت روح وياهم.. بوراشد:هذي شغلتج انتي مب انا..انت المسؤولة عن البنات.. ام راشد:وانت شنو وظيفتك؟ شمة:يمه يبه..خلاص احنا مب رايحين السوق..بس لاتهاوشون.. راشد(يدخل البيت):السلام عليكم.. الجميع:وعليكم السلام.. راشد:اشلونكم؟ بوراشد:بخير.. راشد(يقعد جنب شيماء) شيماء(بصوت واطي):تراهم متهاوشين.. راشد:متى؟ شيماء:توهم فرش.. راشد:فارس ماوصل؟ ام راشد(قامت) راشد:وين يمه؟ ام راشد:بروح اتصل في اختي.. بوراشد:وانت تقولين لها سوالفج لاتزودين بهارات وتقولين شي ماصار.. ام راشد:ماادري من اللي يزود بهارات.. راشد:يبه اشفيكم؟؟..ايش صاير؟ بوراشد:امك وتعرف طبعها.. راشد:تعوذ من ابليس..وين فارس؟ شيماء:برع.. راشد:ليش ماراح الدوام؟ شيماء:ماادري.. فارس(دخل البيت وياشيخة):السلام عليكم.. في بيت بوفهد... بوفهد:ايش سويت؟ فهد:عرفت الشخص اللي كان ورى هالشي..وهو اللي باع اشياء بتواريخ منتهية وسمم الناس.. بوفهد:من؟ فهد:واحد من الموظفين..طلب منه مدير شركة منافسة لنا علشان يربح اكثر منا.. راكان:واشلون عرفت؟ فهد:عرفت بطريقتي الخاصة..والقانون هو اللي بيتولاهم والشركة ارجعت لنا الحمدلله..وحاولت اقضي على المنافقين اللي في الشركة وغيرتهم..والحمدلله كل شي بخير.. بعد مرور خمسة أيام..بقى اربعة ايام ويبتدي فصل جديد ودراسة جدية....أحمد انتقل لمكتبه الجديد اول مااستلم ورقة الترقية..والرئيس القسم القديم خذ مكان احمد وللأسف صار زميل محمد في العمل.... محمد:اشفيك ماتشتغل..ترى شغلك يزيد وانت قاعد تلعب بالكلمات المتقاطعة.. حسين:كيفي..انا حر..وبعدين لاتنسى اني انا المسؤول هني..ومو انت اللي تيي وتحاسبني.. محمد(ابتسم له بخبث):هني مافي حد مسؤول عن حد ياحسين..المسؤول عني وعنك هو الاستاذ احمد..عرفت..(يعلي صوته)..الاستاذ احمد..عن اذنك.. حسين:وين؟ محمد:في ارض الله الواسعة..اشتغل.. حسين احتر من تصرف محمد..محمد راح مكتب أحمد.... محمد:السلام عليكم.. أحمد:هلا..وعليكم السلام..حياك..تفضل.. محمد(يقعد):مانقدر..ايش هالزين..مكتبك حلو.. أحمد:حاولت اغير فيه كثر مااقدر علشان امحي اثار حسين.. محمد(يضحك):زين سويت..يااخي هالشخص ماينطاق خير شر..عليه اسلوب اعوذ بالله تقول ذابح له حد.. أحمد:مأذيك؟ محمد:وااايد..وياليت يغيرون مكانه..ماادري شالي مصبرني عليه.. أحمد:اذا مأذيك ماعليك الا انك تقدم بشكوى رسمية لي وانا باتصرف وياه.. محمد:لا يامعود لا شكوى ولامايحزنون..خلني بعيد عن هالمشاكل..انا ريال متزوج وقريب بصير ابو..ماابي يصير شي ولاشي وتروح علي الوظيفة..قبلنا فيه.. أحمد:الله يعينك.. محمد:اشلون الشغل وياك؟ احمد:الحمدلله زين..بس طبعا اكثر واصعب من شغلتي الاولية.. محمد:اي مايحتاي تقول..رئيس قسم..ماناوي تضيفني شي؟ احمد:صج ماعندي سالفة..اشلون نسيت وماضيفتك..اي صح تعال.. محمد:خير؟ أحمد:انت توك قلت قريب بصير ابو..صج ولاحجي؟ محمد(يبتسم):صج.. أحمد:ياسلام عليك يامحمد..بالمبارك..ان شاء الله تكون ذرية صالحة.. محمد:يااارب..متشوق على شوفته.. أحمد:انزين يعني الليلة معزومين عندك.. محمد:هاا..مين قال؟ أحمد:لاتشرد..(يرن تليفون المكتب)...السلام عليكم...نعم.....اي حاضر...ان شاء الله...مع السلامة..ياللا قوم روح مكتبك.. محمد:ليش؟ أحمد:بروح عند المدير يبيني..وعقب عندنا اجتماع.. محمد(يقوم):فمان الله.. يوم صارت الساعة 9ونص الصبح...راحت ام راشد تقعد البنات من النوم.... شيماء:مامي خليني انام.. ام راشد:ماكو رقاد..سمعتوا..ياللا اشوف جدامي قوموا.. شيماء:مامي بليييز..مارقدنا الا الساعة 3.. ام راشد:وليش ان شاء الله؟ شمياء:كنا سهرانين.. ام راشد:وشالي حادكم على السهر؟..امتحان ولا واجب؟..صبروا ان ماخليت راشد يشيل التلفزيون من غرفتكم ..انا اوريكم..اكيد حق الصلاة ماقمتوا؟ شمة:لا.. ام راشد:وتقولينها بعد..انتوا بنات مامنكم فايدة..ياللا اشوف قوموا.. وعقب راحت تشوف شيخة.... شيخة سمعت صوت الباب قامت وراحت تفتح الباب.... شيخة:عمتي! ام راشد:صباح الخير.. شيخة:صباح النور عمتي..حياج..تفضلي.. وقعدوا.... ام راشد:اشلونج يمه؟ شيخة:بخير..الحمدلله.. ام راشد:اشلون الوالدة؟ شيخة:طيبة ودوم تسأل عنج.. ام راشد:سألت عنها الجنة..كنتي راقدة؟ شيخة:لا كنت قاعدة.. ام راشد:ياليت البنات يتعلمون منج ويقعدون من وهل.. شيخة:عادي ياعمتي..اغلبية البنات حزة الاجازة ينامون اكثر من نص اليوم.. ام راشد:بس الحياة ماهي رقاد في رقاد.. شيخة:المشكلة انهم مايقتنعون بهالكلام..مابقى شي على المدارس وساعات نومهم بتتغير.. ام راشد:ليش مانزلتي تتريقين؟ شيخة:مااشتهي.. ام راشد:ليش يمه؟ شيخة:انا متعودة اتريق متأخر..فألحين مااشتهي.. ام راشد:بس يايمه الريوق وايد زين لصحتج.. شيخة:امي عيزت وهي تقنع فيني وانا ابد مااسمع لها..شسوي ياخالتي من الصبح مااشتهي اكل شي..اتم لين ال11 واروح آكل لي شي.. ام راشد:علشان جذي وجهج مصفر وشكلج تعبان..ماتاكلين عدل..(قامت) شيخة:وين عمتي؟ ام راشد:بنزل تحت..عمج الحين بيرد ومابيحصلني تحت..نزلي تحت واكلي لج شي..واذا تستحين يمه البنات بيتريقون وياج.. شيخة:مشكورة عمتي.. فهد قاعد يوقع البريد..يدخل عليه السكرتير.... السكرتير:طال عمرك وصلنا ايميل من المستشفى في لندن.. فهد(بكل اهتمام):وايش قالوا لك؟ السكرتير(يمد يده):تفضل طال عمرك.. فهد(قعد يقرأ واستانس):الحمدلله..الامور جذي ماشية على حسب التخطيط..اسمع ابيك تتصل في الدكتور راشد وتقول يمرنا الشركة.. السكرتير:حاضر..تامرني بشي ثاني؟ فهد:حاليا لا..وايش صار على المهندسيين محد رد عليك؟ السكرتير:لا..كلهم راحوا المشروع ومحد رد فيهم.. فهد:اوكي لما يوصل حد فيهم خل يدخل عندي.. لكن أوضاع شركة بوهبة كانت في تدهور غير ملاحظ عند هبة واختها..واضطرت انها تبيع وايد وبالمقابل خسرت مبالغ كبيرة في الاسهم.. وديمة تنزل تحت وتروح المطبخ..تسوي لها توست وتحطه في المكيروييف وتجهز شاي كرك وتروح تقعد جدام التلفزيون وتفر بهالقنوات...حصلت لها مسلسل وتمت تابعه وهي تاكل.... الجدة(تطلع من غرفتها):صباح الخير.. وديمة:صباح الخير جدتي.. الجدة:قاعدة من وهل اليوم؟ وديمة:شسوي خالد موصييني اغير نظام نومي.. الجدة:زين سوى..ايش تاكلين؟ وديمة:جبنة وكرك.. الجدة:جان كلتي بيض.. وديمة:بيض!!..حرام عليج جدتي مااحبه.. الجدة:حد مايحب البيض..متى دوامج بيبتدي؟ وديمة:اسبوع الجاي..ماعندي صبر.. الجدة:ليش؟ وديمة:مليت من القعدة في البيت..على الاقل الجامعة اقدر اغير فيها جو اشوف البنات اشم هواء.. يرن تليفونها..... الجدة:بروح اشوف الخدامة شتسوي.. وديمة(تحط السماعة على اذنها):صباح الورد..صباح الحبايب..صباح الريحة الطيبة..بعد شاقول؟ شيخة(تضحك):فديت قلبج والله..عساني ماانحرم من هاللسان العسل..اشلونج؟ وديمة:آآآآه..زي كل يوم..شيخوه تعبت من القعدة في البيت..صرت مخلل.. شيخة:ههههههه..ياللا مابقى شي على الجامعة.. وديمة:والله مرات الجامعة تكون ارحم من الاجازة..اخبارج؟ شيخة:زينة..شتسوين؟ وديمة:اتريق واطالع مسلسل.. شيخة:مو من عادتج قاعدة هالحزة؟ وديمة:شسوي اوامر السيد خالد..انت شتسوين؟ شيخة:ولاشي..متمللة وقلت اتصل فيج.. وديمة:ريلج في الدوام؟ شيخة:اي.. وديمة:ليش ماتقعدين وياخواته امه سلفاتج.. شيخة:الصبح من فاضي لمن..كل واحد يدور حق مشاويره.. وديمة:ماعندج شي تسوينه؟ شيخة:لا..غرفتي منظفة ومرتبة..والحمام الله يعزج غسلته الصبح لما قمت..قريت كتاب..وماحصلت شي في التلفزيون علشان اشوفه.. وديمة:شيخوه انت تغسلين الحمام؟ شيخة:اي.. وديمة:عيل وين الخدامة؟ شيخة:فارس مايحب الخدامة تدخل الغرفة الا للضرورة..وبعدين من زود الشغل علشان مااغسل الحمام.. وديمة:انزين ليش ماتروحين بيت ابوج؟ شيخة:من يوصلني؟ وديمة:السايق.. شيخة:استحي اطلب سايقهم.. وديمة:اي بس مرات ياخذج من الجامعة.. شيخة:لأن فارس معطيهم جدولي حزات هو مايقدر يمرني يطرش السايق.. وديمة:شيخوه ليش ماتسوقين؟ شيخة:ياليت فارس مهب راضي.. وديمة:ايييه..ريلج معقد مال اول.. شيخة:لا ودوم..لاتقولين جذي..فديته ريلي لاهو معقد ولاشي.. وديمة:لامانقدر بعض الناس يدافعون عنه.. بعد الغداء في بيت بوفهد..قاعدين يسولفون..... فهد:يبه انا مسافر الاسبوع الجاي لندن.. بوفهد:ليش؟ فهد:علشان افتتاح المستشفى.. بوفهد:خلصوا؟ فهد:اي نعم المستشفى جاهزة..بس الافتتاح بيكون عقب اسبوعين وانا بروح علشان اجيك على كل شي قبل الافتتاح وهم اوقع اوراق واخلص جم شغله.. بوفهد:احنا لازم نحضر الافتتاح.. فهد:ياليت.. بوفهد:احجز لي انا..لازم احضر افتتاح المستشفى.. ام فهد:ودوني معاكم.. بوفهد:وين؟ ام فهد:لندن..من زمان ماسافرنا يابوفهد..خلنا نروح شوي نغير جو.. بوفهد:خلاص احجز لي انا وامك..هم احضر الافتتاح وهم ندور لنا جم مكان.. شالجديد في حياة شيخة وفارس؟؟ افتتاح مستشفى فهد؟؟ زواج عبدالله هل بيتم؟؟ وشنو الجديد في بيت بوسلمان؟؟ شيماء وشمة؟؟ والكثير من الشخصيات.. انتظروني مع فصل جديد.. | ||||||||
|
| |
|
11-12-13, 12:22 PM
| #27 | ||||||||
| مراقبة عامة ومشرفة منتدى الروايات المنقولة
| " الفصل الـ 13 " راشد يقعد في الصالة جنب فارس.... راشد:اشلون الدوام المسائي معاك؟ فارس:زين.. راشد:زحمة؟ فارس:واااايد..انهلك لين مايخلصون المرضى.. شيماء وشمة يقعدون...... شيماء:راشد اليوم مب طالع ؟ راشد:ليش؟ شيماء:ابيك تجيب عبايتي وشيلتي.. شمة:انا بعد.. راشد:باجر ان شاء الله بتيين معاي ونخلص شغلنا وعقب نروح نجيب عبيكم.. شيماء(مستغربة وتطالع شمة):شغل!!..شغل شنو؟ راشد:ناسية ان باجر عندج موعد ويا دكتور الاذن والحنجرة؟ شيماء(مصدومة):متى باجر؟ راشد:اي الصبح.. شيماء:لا لاتقول..ماابي اروح.. راشد:ليش؟ شيماء:خايفة يقولي سوي العملية.. راشد:خلنا نروح بالاول وعقب نشوف ايش بيقول لاتستعجلين..(يقوم)..بروح ارقد..وباجر الساعة 8ونص خلج جاهزة..(راح) شيماء:وبكل بروود يكلمني وانا اعصابي تلفت من سمعته يخبرني عن الموعد.. فارس(يضحك):وليش خايفة؟ شيماء:لا والله.يقولي سوي العمليه واقوله خوش فكرة.. فارس:ترى العملية ماهي خطرة.. شيخة(قعدت جنب فارس):شنو اللي ماهي خطرة؟ فارس:العملية.. شيخة:عملية شنو؟ فارس:عملية لحمية الخشم.. شيخة:ومن بيسويها؟ فارس:شيماء.. شيماء:فال الله ولافالك..لاتقولها ان شاء الله ماسويها.. شيخة:ليش اشفيها خشمج؟ شيماء:انا ادري هاللحمية من وين طالعة لي..الله ياستر بس مايقولي عملية.. شيخة:وايد متعتبج؟ شيماء:يعني..بس اذا فيها عملية ماني مسويتها.. شيخة:الله يعينج..ومتى بتعرفين؟ شيماء:اليوم.. فارس(يقوم):قومي شيخة خلنا نروح نريح..وانت شيماء عطينا الاخبار الطيبة عقب.. شيماء:اشك.. وركبوا المصعد وراحوا الغرفة...فارس تمدد على السرير وشيخة فصخت شيلتها وقعدت ارتب شعرها... فارس:حبيبتي.. شيخة(تطالعه من المنظرة) فارس:تعالي جنبي.. شيخة(ابتسمت وراحت له):لبيه.. فارس:ياااااه..ياكثر ماقلبي مشتاق لج..ياكثر ماعيوني مشتاقة لشوفتج..اعشقج.. شيخة:مييي تو.. فارس:تحبيني؟ شيخة:عندك شك بهالشي؟ فارس:لا.. شيخة:فارس..متى بنروح العمرة؟ فارس:الخميس ان شاء الله..انا حجزت التذاكر والامور كلها مرتبة..وماعليج الا تزهبين الجناط.. شيخة:من عيوني..متى موعد الطيارة؟ فارس:الصبح من وهل..نصلي الفجر ونطلع من البيت على المطار.. شيخة:مستانسة.. فارس:مستانسة؟ شيخة:أكيد بكون مستانسة دام اني معاك.. محمد يتصل في عبدالله..... محمد:انت وين ياريال؟ عبدالله:بهالدنيا.. محمد:صار لكم فترة مامبينين.. عبدالله:شسوي مشغولين شوي في الشغل..انت اخبارك واخبار الشغل؟ محمد:اخباري طيبة..بس اخبار الشغل مو لين هناك.. عبدالله:ليش؟؟ محمد:انت تدري من يوم ماطلع من عندي احمد وهالموظف اللي عندي مطلع عيني.. عبدالله:الله يساعدك على مابلاك.. محمد:هذا ابتلاء من رب العالمين.. عبدالله:ترى احنا نطالبكم بعزيمة.. محمد:من تقصد؟ عبدالله:انت واحمد.. محمد:ليش؟ عبدالله:احمد بمناسبة تعيينه رئيس قسم وانت بمناسبة انك بتصير ابو ان شاء الله.. محمد:أفا عليكم لكم مني عزيمة..بس بالاول احمد.. باجر الصبح في بيت بوراشد.... شيماء:شموه تكفين تعالي معاي.. شمة:سوري..انا لما بغيتج تيين معاي موعد الاسنان ماجيتي.. شيماء:هذاك غير انت كنتي بتشيلين العصب بس انا فيها عملية.. شمة:لما بسوون لج عملية بكون موجودة معاج حتى المدرسة ماني رايحتها.. شيماء:فال الله ولافالج..ان شاء الله مابسويها.. شمة:ياللا نزلي قبل ليعصب راشد.. شيماء:الله ياستر.. ونزلت تحت حصلت سلطان يشرب شاي وياجدته.. سلطان:شنو بيسوون لج العملية؟ شيماء:لا.. سلطان:بس انا سمعت اي.. شيماء:اصلا مابوافق انزين.. سلطان:كلش ابوي بيخليج.. شيماء:ماني مسوية زين.. سلطان:جابليني اليوم اذا كان على كيفج.. شيماء(عصبت):سلطانو اسكت.. سلطان:سلطانو بعيونج..احترمي نفسج تراني اكبر منج.. ام راشد:بس انتي وياه..روحي لتأخرين على اخوج..روحي.. شيماء:زين..بس خلني ارد انا اوريك..باااي.. سلطان(يقلدها):انا اوريك..مالت عليج.. ام راشد:اشفيك انت كل مناجرة وياها.. سلطان:ماتشوفينها جدتي لسانها طويل يبيله قص.. فهد قاعد يتحجى في التليفون يدخل عليه السكرتير..... فهد:في امان الله..خير علي؟ السكرتير:ماحصلت حجز في الدرجة الاولى.. فهد:لمن؟ السكرتير:لك انت طال عمرك.. فهد:بس انا لازم اروح ومااقدر اجل الرحلة يوم.. السكرتير:حاولت وياهم بس قالي الرحلة فل.. فهد:لو كانت الرحلة قريبة جان رحت بالدرجة العادية..بس الرحلة طويلة وماتنفع الا بالاولى..شوف لي طيارة غيرها..دبر بأي طريقة..ان شاء الله لو ادفع اكثر..ولا اقول لا..لاتقول اني دافع اكثر..مااحب هالطريقة..المهم احصل حجز.. السكرتير:ان شاء الله..تامرني بشي ثاني؟ فهد:شوف اذا يوسف وصل..وخله يمرني المكتب.. السكرتير:حاضر..عن اذنك.. الساعة 9 وربع تدخل شيماء اول مريضة على الدكتور برفقة راشد.. الدكتور:اخبارج ياشيماء؟ شيماء:زينة.. الدكتور:اشلون تحسين عمرج؟ شيماء:مثل مانا.. الدكتور:انزين خلينا نشوف اللحمية.. قامت شيماء وهي خايفة..وقعدت على كرسي الفحص..جاها الدكتور وقعد..وخذ الجهاز علشان يشوف اللحمية... الدكتور:اشفيج؟ شيماء:هاا ولاشي.. الدكتور:انزين طالعي التلفزيون خلينا نشوف اللحمية..(يشوف)...هذي اللحمية تشوفينها؟ شيماء:اي.. وبعد ماكشف عليها الدكتور..قعد يسجل ملاحظاته في الملف.... راشد:طمنا دكتور.. الدكتور:شيماء لازم تشيل اللحمية.. شيماء:لا..ماني شايلتها.. الدكتور:بس هذا احسن لصحتج.. شيماء:معليه انا متحملة.. الدكتور:هو مو انج تقدرين تتحملين او لا..المسألة ان هذي اللحمية لازم تنشال لأسباب صحية..بعدين انت ليش ماتبين تشيلينها؟ راشد:تخاف.. الدكتور:العملية مافيها خوف..انت بتكونين تحت البنج الكامل..مابتحسين بشي.. شيماء:ماابي..ماني مسويتها..على الاقل مب الحين لما أكبر.. الدكتور:وليش انت صغيرة؟ شيماء:يعني اخلص مدرسة.. الدكتور:اي صف انتي ياشيماء؟ شيماء:ثاني ثانوي.. الدكتور:يعني بنت شاطرة وعاقلة وبتسمع الكلام وبتسوي العملية.. شيماء(قامت):انا ماني مسوية العملية.. راشد:نطريني برع.. طلعت.... راشد:دكتور يعني ابش بنسوي؟ الدكتور:مثل ماقلت يادكتور راشد..شيماء لازم تسوي العملية وتشيل اللحمية وبعدين ماهي اول وحدة بتسويها..وهي عملية سهلة ولاهي خطرة.. راشد:انا عارف هالشي..بس هي اشلون تقتنع.. الدكتور:حاول وياها..انا كنت بعطيها موعد للعملية..بس انت ايش رايك؟ راشد:عطها الموعد حاليا واذا صار شي انا بخبرك.. الدكتور:اللي تشوفه.. راشد(قام):ماقصرت دكتور..اسمح لنا..في امان الله.. الدكتور:حياك الله.. في دوام عبدالله....يندق الباب..... أسامة:عبدالله.. عبدالله(رفع اسه):هلا اسامه..خير؟ اسامة:عبدالله انا طالع من الدوام..اذا حد سأل عني قوله طالع.. عبدالله:عسى ماشر؟ اسامة:ماشر..بس شوي تعبان وابي اروح ارتاح.. عبدالله:وايش سويت على شغل بويعقوب؟ اسامة:خلصته..هاك خذ الاوراق وعطه اياهم..فمان الله.. عبدالله:والله امرك غريب.. خالد(يدخل عليه):قواك الله.. عبدالله:خالد!! خالد: اي خالد.. عبدالله:حياك.. خالد(قعد) عبدالله:انت وين كنت علشان مريتنا؟ خالد:كان عندي موعد وقلت امرك شوي..ادردش..اذا عندك شغل بروح.. عبدالله:والله عندي شغل..بس عطني خمس دقايق..مابقى شي اخلصهم واتفرغ لك..الشاي والقهوة والتمر جدام مامحتاج اضيفك.. خالد:لا طبعا..ماني غريب.. حزة الغداء...الكل قاعد على طاولة الاكل.... راشد:وين شيماء؟ ام راشد:اي والله وينهي؟ فارس:شمة وين شيماء؟ شمة:في الغرفة.. راشد:وليش مانزلت تتغدى؟ شمة:تقول نعسانة وتبي تنام.. راشد(فهم السالفة) والكل تغدى...لكن بعد الغداء...راشد راح لها الغرفة...حصلها قاعدة تفكر والاغنية شغاله...... راشد:ليش مانزلتي تتغدين؟ شيماء:ماني مشتهية.. راشد:اي بس شمة قالت انج نعسانة..وانت قاعدة.. شيماء:اللي هو..اني ماابي اتغدى.. راشد:ليش؟ شيماء:جذي.. راشد:كل هذا علشان العملية؟ شيماء:وهذا الشي بالنسبة لك شي تافه ماله معنى صح؟ راشد:ومن اللي قال؟ شيماء:كلامك.. راشد:بس انت مضطرة تسوين العملية.. شيماء:ماني مسويتها..خلاص.. راشد:خايفة؟ شيماء:وانت ايش رايك؟ راشد:ليش تكلميني بهالطريقة؟ شيماء(قامت):لأنك ماخذ الامور بكل بساطة وتبتسم وبارد في الحجي..بصراحة استفزيتني.. راشد(انصدم):انا استفزيتج؟!!! شيماء:اي.. راشد(قام):مشكورة..جزاج الله خير..على العموم قبل لأروح لازم تعرفين شي..ان مردج تسوين هالعملية..وماراح تقدرين تتهربين منها اكثر من جذي..وانا حددت موعد العملية مع الدكتور فخلج مستعدة.. شيماء(تضايقت وكان ودها ترد لكن شمة سكتتها بنظراتها) راشد طلع من الغرفة لحقته شمة.... شمة:بوعيسى.. راشد(وقف) شمة:لاتحط بخاطرك على اسلوب شيوم تراها تخور بالحجي لأنها خايفة من العملية.. راشد(ابتسم لها):لاتحاتين انا مب زعلان..حاولي تقنعينها بالعملية.. شمة:ان شاء الله.. دخلت الغرفة وسكت الباب.... شمة:شيومو يالدبة..انت اشفيج ليش تحاجين راشد بهالطريقة..انت تدرين لو ابوي ولاامي سمعوج وانت تحاجينه بهالطريقة ليسطرونج.. شيماء:وخري عاد..اللي فيني كافيني.. شمة:انت اشفيج استخفيتي؟ شيماء:اي استخفيت..زين..محد حاس فيني..بسوي عملية..ولأول مرة في حياتي..وتقولين لي استخفيت..(تبجي) شمة(انكسر خاطرها على اختها قعدت عندها):انا آسفة شيوم..والله مااقصد..بس انت تدرين ان راشد يحبنا ومايسوي هالشي الا لأنه يحبنا ويعزنا مثل عياله..واحترامه واجب علينا..ومايستاهل اللي سويتي فيه.. شيماء:ماكنت اقصد ياشمة..شسوي من حر قلبي على برودة اعصابه..ولاجني بسوي عملية.. الساعة 3ونص في غرفة فارس وشيخة.... فارس:شيخة عطيني الغتر علشان اوديهم الدوبي.. شيخة:جاهزين في الكيس عند الباب.. فارس:تسلمين حبيبتي..تبين اجيب لج شي وانا راجع؟ شيخة:لا مشكور..فارس تقدر توصلني بيت ابوي في دربك؟ فارس:الحين؟ شيخة:اي.. فارس:جاهزة؟ شيخة:دقيقة وتشوفني جاهزة.. فارس:ياللا عيل انا بنزل تحت وبانتظرج لاتأخرين.. شيخة:ان شاء الله.. وديمة قاعدة في غرفتها مع هالنت..راحت تنادي الخدامة.... خالد(من تحت):ايش تبين فيها؟ وديمة(من فوق):ابيها تجيب لي عصير.. خالد:نزلي تحت ابيج.. وديمة:شنو؟ خالد:نزلي.. وديمة(نزلت وقعدت):شنو؟ خالد:شتسوين فوق؟ وديمة:على النت.. خالد:فراغ بفراغ.. وديمة:البركة فيك.. خالد:وانا شيخصني؟ وديمة:مب راضي اطلعني من البيت..مليت من قعدة البيت.. خالد:انزين روحي لبسي بوديج مكان تشتري منه شي ناقصج وعقب بعشيج.. وديمة:قول والله.. خالد:ماني حالف..وياللا قومي.. وديمة(استانست):ياسلالالالا� �..والله اني مستانسة انك بتوديني.. خالد:بسرعة قبل لأغير رايي.. وديمة:لا لاتكفى..دقايق.. الساعة خمس العصر...تروح شيماء تتمشى في الحوش..وعقب تقعد على المرجيحة وهي تفكر بهدوء والهواء يطير شعرها....ترفع راسها تحصل راشد.... شيماء(قامت وبكل هدوء):آسفة..ماكان قصدي يابوعيسى..سامحني(بدت تبجي) راشد(انكسر خاطره على اخته الخايفة حضنها) قعدت شيماء تبجي وهي بحض اخوها راشد... راشد:شيماء..روحي بدلي ملابسج علشان بوديج مكان.. شيماء:مكان!! راشد:لايروح فكرج بعيد..بنروح مكان حلو نقعد نسولف فيه.. شمة(وهي جايه):وانا؟؟ راشد:وانت تعالي..بس لاتأخرون علي..ياللا شيماء ليش واقفة؟ شيماء:ماابي اروح.. راشد:انت خايفة اوديج مكان ثاني؟..لاتخافين عليج الامان..يعني انا اجذب عليج؟ شيماء:حااشاك.. راشد:عيل ياللا تحركي.. في شركة بوفهد...يوسف يدخل مكتب فهد..... يوسف:السلام عليكم.. فهد:وعليكم السلام..وينك فيه يوسف؟ يوسف:كنت بالمشروع وعقب استأذنت من الدوام كان عندي شغل ويالاهل.. فهد:حياك اقعد.. يوسف(قعد) فهد:أخبار المشروع؟ يوسف:المشروع ماشي..بس الشي الغريب ان أمور الكهرباء تأخرت.. فهد:ليش؟ يوسف:ماادري..حاولنا نتواصل وياهم كم مرة بس مافي شي جديد.. فهد:انا باتصل فيهم..وغيره؟ يوسف:السيراميك اللي انت كنت طالبه ماوصل لحد الحين.. فهد:بس انا طلبته من خمس شهور.. يوسف:قالوا لي..بس ليحين ماوصل.. فهد:غريبة..لحظة شوي..(اتصل في السكرتير)..علي تعال.. علي:ان شاء الله.. فهد:والعمال شغالين في المشروع؟ يوسف:اي شغالين فيه.. علي(يدخل):نعم طال عمرك.. فهد:شوف لي ليش ماوصلت السيراميك اللي طلبناهم للمشروع.. علي:حاضر طال عمرك..تامرني بشي ثاني؟ فهد:اي وشوف لي سالفة الكهرباء.. علي:حاضر..عن اذنك.. فهد:يوسف تعال وياي..ابي اروح اشوف المشروع.. في المطعم.... راشد:شنو تشربون؟ شمة(تشوف المنيو):انا ابي هالآيس كريم.. راشد:وانت شيماء؟ شيماء:باخذ نفس شمة.. راشد:لو سمحت.. الجرسون:نعم استاذ.. راشد:جب لنا اثنين من هالايس كريم..وواحد عصير رمان.. الجرسون:شي تاني استاذ؟ راشد:لا شكرا..شيماء ترى خذت موعد للعملية وان شاء الله بيكون عقب اسبوع.. شيماء(طالعت شمة):بس ياراشد انا ماابي اسوي العملية.. راشد:ليش؟ شيماء:خايفة.. راشد:خايفة من شنو؟ شمياء:......... راشد:شيماء يبه قولي لي كل شي..كل اللي تفكرين فيه قوليه لي.. شيماء:خايفة من كل شي..اجواء العملية ماهي سهلة..اصلا مجرد انك تقول عملية القلب بروحه ينقز من الخرعة.. راشد:هذي كلها تهيآت..انت مابتحسين بشي اثناء العملية..وبعد العملية لو حسيتي بألم راح يعطونج مسكن على طول..يعني الامور كلها بتكون بخير..بعدين ياشيماء في ياهال عمرهم 10 سنين و اصغر يسوون عمليات خطرة يكونون بين الحياة الموت وتشوفينهم مبتسمين ولايفكرون بأي شي ثاني غير انهم يطلعون بالسلامة.. شيماء:بس هذا ياهل ومايدري شي.. راشد:وانت بعد ماتعرفين شي..على اي اساس حكمتي ان العملية تخرع ولا تخوف..مجربتها من قبل؟ شيماء:لا.. راشد:عيل اشلون عرفتي؟ شيماء:اللون الاخضر والليتات والدكاترة المتلثمين..والسجاجين وادواتهم هذي كلها تخرع.. راشد:حد قالج انج بتشوفين هذا كله؟ شيماء:بس بيدخل بجسمي.. راشد:بتحسين فيه؟..ايش هالدكتور الغبي اللي بخليج تحسين بكل هذا؟ شيماء:........ راشد:سمعيني ياشيماء..الواحد لازم يتوكل على الله..ومب صاير شي الا ورب العالمين كاتبه لنا..والعملية اللي انتي بتسوينها عملية سهلة وااايد والدكتور مسويها اكثر من 50 او 60 مرة..ولا انت ايش رايج ياشمة؟ شمة:انا بعد اقول..خلها تسوي العملية الحين احسن لها من بعدين.. شيماء:لو كنتي مكاني كنت بتوافقين؟ شمة:يمكن.. راشد:شيماء انا اوعدج انج مابتحسين بشي..وعد مني لج..حتى على قولتج سجاجين وماادري وشو ماراح تشوفينهم.. الجرسون جاب الطلبية وراح.... شيماء:انزين..بس على شرط.. راشد:شنو؟ شيماء(تطالع شمة):ابيك.....ابيك تكون معاي في العملية.. راشد(ابتسم):وليش يعني؟ شيماء:بس جذي..ابي احس بالامان اكثر.. راشد:خلاص اللي تبينه..بكون معاج لين ماتنامين.. شيماء:لا..ابيك تكون لين نهاية العملية.. راشد:ان شاء الله..المهم تسوين العملية.. شيماء:يعني ماكو خطورة علي؟ راشد:لا..ان شاء الله مو صاير شي..وانا بختار لج احسن دكتور في التخدير..لاتحاتين.. شمة:زين شيوم بتغيبين عن المدرسة..وبتحصلين هدايا ايش كثر من مدرساتج وربعج.. شيماء:وايد متفيجة.. راشد:ياللا كلوا الايس كريم علشان نمشي.. شيماء:راشد..اقصد بوعيسى.. راشد:خير؟ شيماء:متى بتكون العملية؟ راشد:يوم الاربعاء الجاي الساعة 7 الصبح.. في بيت بوفيصل.... شيخة:ايش قالت لج خالتي؟ ام فيصل:تقول انها بتيي.. شيخة:صج!!..ياسلالالالام ماني مصدقة خالتو نجلاء فديتها..متى جاية؟ ام فيصل:تقول الجمعة.. شيخة:وااااو..وأخيرا بنشوفها..عاد مابشوفها الا الاحد او الاثنين.. ام فيصل:المهم تروحون وتردون بالسلامة.. شيخة:يمه بتيي بروحها؟ ام فيصل:لا طبعا بتيي وياخالج.. شيخة:بروحه؟ ام فيصل:اي.. شيخة:وزوجته وعياله؟ ام فيصل:زوجته عندها دوام وعياله عندهم مدارس.. شيخة:وخالتو نجلاء شنو ماعندها جامعة؟ ام فيصل:بلا..بس خالج عنده شغل هني جم يوم وهي قالت بغيب وبيي.. شيخة:فديتها والله..مشتاقة لها..لو تدرين ودوم مابترقد من الوناسة.. وديمة وخالد يردون البيت.... وديمة:مشكور على الطلعة اللي اعتبرها مميزة.. يرن تليفونها بمسج..... وديمة:مستحييييييييييييل..م� �اصدق.. خالد:شنو..ايش صاير؟؟ وديمة:عمتي نجلاء بتيي.. خالد:متى؟ وديمة:تقول الجمعة.. خالد:من هذي نجلاء؟ وديمة:لا شيخة اللي مطرشة لي المسج..واااااو وناسة عمتي نجلاء بتيي.. خالد:حق الهياته والدوارة في السوق وناسة؟ وديمة:حراام عليك خالد..والله مشتاقة لها بالحيل..من زمان ماشايفتها..حتى لما رحنا دبي مامريناهم.. خالد(قام):انا رايح داري..اذا بترقدين لاتنسين تاخذين دواج وابرتج.. وديمة:ان شاء الله.. وهم يشربون الشاي والقهوة.... بوراشد:ومتى بتكون عمليتها؟ راشد:7 الصبح..بس بيرقدونها يوم قبل.. تميم:وايشقد فترة العملية؟ راشد:مو اكثر من نص ساعة..ماتطول..عملية سهلة وتخلص بسرعة.. ام راشد:وبتم جم يوم في المستشفى؟ راشد:ماادري..بس اعتقد بعد العملية يوم كلش يومين..ان شاء الله ماعليها شر..وبتقوم بالسلامة.. ام راشد:ان شاء الله.. شيماء كانت قاعدة جنب راشد وهي ساكتة وحاسة بخوف وتوتر.. سلطان:واشلون وافقت ست الهانم على العملية؟ راشد:شيماء قوية وماتخاف من شي..ووافقت على العملية بسهولة.. سلطان:مااصدق..على اساس قالت مابوافق..ها شيوم شالي تغير صرتي ماتخافين.. شيماء:مالك خص زين.. تميم(يهمس له):اشفيك انت..راشد ماصدق يقنعها..اسكت عنها شوي.. سلطان:باطة جبدي عمي عليها لسان طويل.. تميم:وانت شنو؟ سلطان(سكت) شيماء(قامت) راشد:وين؟ شيماء:بروح ارقد..نعسانة.. فارس وشيخة يسافرون العمرة وعلى اساس يردون يوم السبت بالليل..يوم الجمعة قامت وديمة على رنة التليفون.... وديمة:أفف من هالمزعجة اذتني يعلها(تشوف الرقم تستغرب)...آلو........عموووووه فديتج....انتي متى وصلتي؟....حبيبة قلبي...مشتاقة لج بالحيل.....انا نايمة شسوي ماسمعتج...صج والله.....وااااو ياوناستي بشوفتج....الحين بروح عند خالد بخليه يوصلني عندج....باااايات..( فزت من مكانها وهي مستانسة غسلت وجهها وبدلت ملابسها وركيض لعند غرفة خالد... خالد:منو؟؟ وديمة:وديمة.. خالد:خير؟ وديمة(افتحت الباب) خالد:ومن اللي اذن لج تفتحين الباب؟ وديمة:اذنت لنفسي..تكفى خالد لاتقولي شي تراني ميتة من الوناااسة.. خالد(وهو على السرير وتحت اللحاف):ايش عندج فرحانة؟ وديمة:عمتي نجلاء وصلت.. خالد:صج..متى؟ وديمة:تقول الصبح الساعة 6 وصلوا الدوحة..خالد تكفى وصلني ابي اشوفها.. خالد:هي جايه بروحها؟ وديمة:لا طبعا عمي جبر وياها.. خالد:ووين قاعدين؟ وديمة:في بيت عمتي ام فيصل..ياللا قوم بلا أسئلة.. خالد:انزين..بس بالاول اتريق عقب نروح.. وديمة:يعني لازم؟ خالد:اي لازم وانت بعد بتتريقين معاي.. وديمة:اوكي راضية..بس بسرعة.. خالد:قولي حق الخدامة تسوي لي بيض بوعيون.. وديمة:بوعيون!!..اي ان شاء الله.. نزلت وديمة تحت وخبرت الخدامة تسوي البيض وتسوي لها ساندويتش لبنة وحليب....وراحت تلبس واكشخت من قلب..ونزلت تحت حصلت خالد يتريق.. في بيت بوفيصل...في المطبخ... نجلاء:اقول اختي..شو اخبار فيصل؟ ام فيصل:الحمدلله..مكانه يبين وايد يانجلاء.. نجلاء:ان شاء الله يرد بالسلامة ويتخرج ويرفع راسكم.. ام فيصل:ان شاء الله..قولي لي انتي اخبار دراستج؟ نجلاء:دراستي زينة..بس شوي صعبة..على الله اتخرج على خير وافتك.. ام فيصل:ان شاء الله..ايشقد بقى لج؟ نجلاء:بقى لي سنة.. ام فيصل:ان شاء الله تتخرجين بالسلامة.. نجلاء:بنتج متى رادة؟ ام فيصل:باجر ان شاء الله المساء.. نجلاء:يعني مب شايفتنها الا الاحد؟ ام فيصل:على حسب ظروفها..وتشوف اذا ريلها يقدر يرجعها ولا لا.. نجلاء:ليش مو بنتج تسوق.. ام فيصل:ريلها مايخليها..هو يوصلها ومرات سايق بيت أهله..(تقوم تشيل الاغراض) نجلاء:خليني اساعدج.. وقعدوا يتريقون...واول ماخلصوا وصلت وديمة ودخل معاها خالد..... وديمة:فديت قلبج عموووه.. خالد(يسلم على عمته):اشلونج عمتي؟ ام فيصل:هلا خالد..بخير يمه انت اشلونك؟ خالد:الحمدلله.. ويسلم على عمه جبر.... جبر:شخبارج وديمة؟ وديمة:بخير عمي.. نجلاء:انا ووديمة بنسير غرفتي.. ام فيصل:حياك خالد يمه اقعد.. في الغرفة يقعدون على السرير..... نجلاء:قولي لي اخبارج..شمسوية ماعرستي؟ وديمة:خلينا الزواج لج عمووه.. نجلاء:ياليت والله اعرس..بس اخلص من هالجامعة..شيخو فديتها ماهي موجودة مشتاقة لها.. وديمة:عاد انا تعودت على فراقها من عقب ماتزوجت.. عبدالله قاعد يتريق وياامه.... عبدالله:تعرفين يمه..اسامة اللي امه توفت وايد متغير هالريال..كل حزين..ومتضايق ماعاد اسامة اللي ينعرف بغشمرته وسوالفه.. ام عبدالله:يايمه ماينلام فقد امه..الام ماهي شوية ياولدي.. عبدالله:الله لايحرمني منج يالغالية..عسى عمرج طويل..يمه ايش صار على البنت؟ ام عبدالله:رحنا لهم وشفنا البنت وتعرفنا على اهلها..وماشاء الله عليهم ناس طيبين ومحترمين.. عبدالله:وانزين ايش صار؟ ام عبدالله:ولاشي ننتظر راي البنت هي واهلها.. عبدالله:اكيد يسألون عني؟ ام عبدالله:اكيد..مامحتاي يسألون عنك انت ماشاء الله عليك مافيك الا كل خير..واللي بيناسبك ياولدي بيكون محظوظ.. عبدالله(يبتسم):فديتج يالغالية.. في بيت بوفيصل.... خالد(قام) ام فيصل:وين يمه؟ خالد:بروح البيت اتزهب للصلاة.. بوفيصل(يشوف الساعة):انا بعد بروح اتزهب للصلاة.. ام فيصل:انزين يمه عقب الصلاة رد تغدى ويانا.. خالد:لاعمتي مشكورة..مايحتاي.. ام فيصل:لافديتك..انت معزوم على الغداء..لاتقولي مب جاي.. جبر:اقعد ويانا من زمان مب شايفينك.. خالد:حتى انا والله ودي اقعد وياكم اكثر..بس جدتي في البيت بروحها ومااقدر اخليها تتغدى بروحها.. ام فيصل:ومن اللي قالك خلها في البيت جيبها وياك..وانا الحين باتصل فيها وبعزمها.. خالد:جدتي واعرفها زين ماراح تيي..هي ماتطلع من البيت.. بوفيصل:وين خالك؟ خالد:خالي مسافر عنده شغل..وهي بروحها.. جبر:خلاص اذا جي خلي وديمة تتغدى ويانا.. خالد:دام تبونها خلها وانا عقب بمر آخذها.. ام فيصل:اقول يمه خالد اشلونها ريلك الحين؟ خالد:الحمدلله..قاعدة تتحسن شوي شوي..ياللا في امان الله.. في غرفة شيماء وشمة..شمة قاعدة على النت وشيماء منسدحة على السرير ساكتة.... شمة:شيوم تعالي شوفي هالعضو ايش كاتب.. شيماء:ايش كاتب؟ شمة:تعالي اقري..لاتفوتج.. شيماء:جيبي الاب توب.. راحت لها وقعدت تقرأ.... شيماء:والله انه اهبل..لو انا مكان المدير جان اشيله من العضوية..يبط الجبد..مو هذا اللي عاجبج..ليش مستغربة؟ شمة:هو طيب..بس مرات عليه كلام ينرفز.. شيماء:مالت عليه.. شمة:شيوم بتقولين حق المدرسة انج بتسوين عملية؟ شيماء:اكيد..لأني بغيب..راشد قال بيرقدوني قبل العملية.. شمة:يعني الثلاثاء..بفتقدج في المدرسة شيوم..قومي خلنا نتريق..حسيت بالجوع.. شيماء:ماابي مااشتهي.. شمة:قومي عاد..الساعة صارت 10..مافيني انتظر لين مايردون من المسجد علشان نتغدى.. شيماء:روحي انت..فارس وشيخة ماردوا من العمرة؟ شمة:لا..باجر بيردون..قومي شيوم..علشان خاطري تكفين..مااحب اتريق بروحي.. شيماء:صدقيني مااشتهي.. شمة:علشاني..ياللا.. ام فيصل تروح غرفة شيخة..... ام فيصل:انتوا ليحين ماخلصتوا سوالف.. نجلاء:لا وين انخلص..انا مشتاقة لها وايد..وفيني رمسة وايد ودي اقوله..لو بنتج ردت بالسلامة مابخليها ترد بيت ريلها.. وديمة:على كيفج..بخليج العاشق الولهان.. نجلاء:بخليني غصب عنه.. وديمة:عمتي..خالد قاعد؟ ام فيصل:لا راح يقول يبي يزهب للصلاة..حاولت فيه يتم للغداء ماوافق يقول جدته بروحها..عاد انا قلت له خل وديمة تتغدى عندنا.. وديمة:لا انا مااقدر اتغدى..استحي.. نجلاء(تقلدها):استحي..انا بتغدى وياج..عاد مول انا اللي اقدر اتغدى وياريلها..شمسوية لنا غداء؟ ام فيصل:شنو في خاطرج سمج؟ نجلاء:لا مااريد سمج..هناك مرت جبر كل يومين سمج..خلاص لايعة جبدي.. وديمة:وليش كل يومين؟ نجلاء:لأن عمج الكريم يحب السمج وايد..ولو ياكلونه ريوق وغداء وعشاء بيوم واحد مايمانع.. وديمة:مو لهالدرجة.. ام فيصل:جبر قايلي ابي سمج الدوحة ومن طباخي.. نجلاء:لا لاتقولين..تراني بشرد.. ام فيصل(تضحك):لاتحاتين انا مسوية لج لحم..ياللا انا رايحة المطبخ.. وديمة:عمتي تبين اساعدج؟ ام فيصل:لافديتج..خلج قاعدة ويانجلاء الخدامة بتساعدني.. جبر(يدخل):السلام عليكم.. الجميع:وعليكم السلام.. جبر:اسمعكم ترمسون عن السمج.. ام فيصل:هذي اختك ماتحبه.. نجلاء:ومنو اللي قالج اني مااحبه..احبه بس مب اني اكله كل يوم مثل بعض الناس.. جبر(يقط عليها المخدة):مو مثل بعض الناس..سكتي..السمج لذيذ..واللي مايعرف قيمته خسران.. نجلاء:قبلنا الخسارة.. ام فيصل:ياللا انا رايحة المطبخ.. راحت..... جبر:شخبارج وديمة؟ وديمة:بخير عمي.. جبر:اخبار ابوج واخوانج؟ وديمة:الحمدلله كلهم بخير.. جبر:خالد يقول عندهم اجازة اسبوع وبييون.. وديمة:اي ان شاء الله.. جبر:ودي اشوف ابوج من زمااان مب شايفنه..شكلي مابلحق عليه.. نجلاء:ليش متى جايين؟ جبر:عقب اسبوع.. نجلاء:انزين عادي انتم.. جبر:علشان يفصلونج من الجامعة.. نجلاء:وليش يفصلوني الله يخلي واسطتك.. جبر:لا حبيبتي انا مابتوسط لج على شي.. نجلاء:الله يسامحك..دخيلك جبر دام ان يينا الدوحة خلنا نتم نشوف بوسلمان..دخيلك ياخوي..والله مشتاقة لهم..والله العالم متى بنيي مرة ثانية.. وديمة:وليش ماتييون الصيف؟ جبر:الصيف عندي شغل..ومااروم ايي الدوحة..لأن الصيف اللي طاف خذت اجازة وسافرنا فرنسا وهالصيف مااروم.. وديمة:انزين خلي عمتي نجلاء تيينا.. جبر:ومن اللي بييبها؟..مايصير..بخليها تاخذ صيفي يمكن تتخرج بسرعة.. نجلاء:شوف جبر صيفي ماني ماخذه كفاية مخليني اسجل 18 ساعة هالكورس.. جبر:علشان تفتكين.. نجلاء:والرسوب يزيد عندي.. جبر:فال الله ولافالج..ماعليج منها وديمة..قولي اخبارج ويالجامعة؟ وديمة:زينة.. جبر:وايشكثر بقى لج؟ وديمة:ثلاث سنين..لو ذبحت عمري سنتين ونص.. جبر:ذبحي عمرج علشان تخلصين وتفتكين..يحليلج ياوديمة..شوفي يانجلاء البنت مؤدبة وتستحي وتتكلم بهدوء.. نجلاء:لايغرك هدوءها..تراها بس جدامك..تعال شوفها ويانا شكل ثاني.. وديمة(انحرجت) جبر:على الاقل مؤدبة وياي..مو انتي تهذرين وايد.. نجلاء:انا اهذر وايد..الله يسامحك.. جبر:خلج جي ياوديمة ليكون تخربج نجول..ترى ماتيب من وراها الا المشاكل حتى العرس ماادري من بيعرس عليها.. نجلاء:لا..زين ياجبر..بنشوف باجر لعرست تعال جابلني.. جبر(يضحك):الايام بينا..(قام)..ياللا انا رايح الصلاة..مو تروحين وديمة تراج بتتغدين ويانا.. وديمة:ان شاء الله عمي.. وطلع وسكر الباب وراه.. وديمة:عموووه ليش سويتي فيني جذي..فشلتيني جدام عمي.. نجلاء:خله يشوفج على حقيقتج.. وديمة:ماابي انا زعلت برد بيتنا.. نجلاء:لافديتج لاتروحين..مافيني اقعد بروحي بلاج.. | ||||||||
|
| |
|
11-12-13, 12:26 PM
| #28 | ||||||||
| مراقبة عامة ومشرفة منتدى الروايات المنقولة
| متابعة فصل الـ13 الساعة 1 ونص يرد عبدالله من المسجد.....يدخل البيت ويسلم على امه ويحب راسها.... ام عبدالله:تقبل الله طاعتك ياولدي.. عبدالله:منا ومنج يالغالية.. ام عبدالله:اليوم تأخرت يمه.. عبدالله:جانا خطيب لا اله الا الله عليه..كلامه ومواعظه تخلي الواحد يعيد حساباته.. ام عبدالله:جزاه ربي خير..جوعان؟ عبدالله:اي يمه..عيل وين البنات؟ ام عبدالله:فوق.. عبدالله:خلود جات؟ ام عبدالله:اي يمه جات..انت روح بدل ملابسك وناد خواتك وانا بنجب لكم الغداء.. في الصالة.... راشد:تعالي وين رايحة؟ شيماء:بروح غرفتي.. راشد:ايش بتسوين هناك؟ شيماء:بكلم رفيجتي.. راشد:هالوقت؟!!..تعالي قعدي جنبي.. شيماء(قعدت) ام راشد(تقعد) راشد:تسلم يدج ياام راشد..الغداء كان لذيذ.. ام راشد:عليك بالعافية ياولدي..الغداء زاد منه وايد انتوا ماكلتوا وايد.. راشد:الا يمه كلينا وايد..يمه فارس متى بيرد من العمرة؟ ام راشد:باجر ان شاء الله في الليل.. شمة:ام عيسى ماتبين تروحين السوق اليوم؟ الجوهرة:بلا بودي مشاعل وسلوى يبون يشترون لهم جوتي للمدرسة.. شمة:صج..شيوم شيوم.. شيماء:خير؟ شمة:الجوهرة اليوم بتروح السوق ايش رايج نروح وياهم؟ شيماء:انا مالي خاطر اروح..اذا تبين روحي..(قامت) راشد:وين؟ شيماء:بروح داري.. راشد:اي بس احنا كلنا قاعدين.. شيماء:تكفى راشد خلني اروح.. بوراشد:لي متى بقولج ناديه بوعيسى..انت ماتستحين هذا اخوج العود.. شيماء(ودها تبجي بس يودت دمعتها وراحت) تميم:اشفيها شيوم مو بالعادة تم جذي ساكتة ولاتتحجى.. راشد:شيماء وايد تحاتي العملية..علشان جذي متضايقة..حاولوا ماتوترونها اكثر من جذي..شجعوها.. ام راشد:الله يقومها بالسلامة وترتاح.. شمة(قامت) بوراشد:وانت بعد وين رايحة؟ شمة:بروح أشوفها.. راحت فوق.... شمة:شيوم عاد ليش صايرة كل حزينة وتفكرين.. شيماء:شمة ترى قلبي مابيرتاح لين مااخلص العملية.. شمة:بس بقى وايد..يعني معقولة مابشوف شيوم اختي اللي اعرفها لين بعد العملية؟ عند وديمة ونجلاء....... نجلاء(تشرب العصير):تسلم ايدينج ياام فيصل..مجبوس اللحم كان عجييب.. وديمة:تسلمين عمتي على الغداء.. ام فيصل:بالعافية فديتج.. تروح نجلاء ووديمة الغرفة..يرن تليفون وديمة.... وديمة:السلام عليكم....بخير...اي تغديت من شوي خلصنا....ليش؟؟...اي طبعا بدري.....انزين(يقاطعها).....خلا ص خلاص..متى جاي؟....اول ماتوصل دق..مع السلامة.. نجلاء(تنبش بعطور شيخة):شو هالريحة..وع..منو اللي كان في التليفون؟ وديمة:خالد.. نجلاء:وشو يبا؟ وديمة:يبيني ارد البيت.. نجلاء:وليش ان شاء الله؟ وديمة:علشان ماخذت دواي.. نجلاء:وانت ايش له تنسين دواج؟ وديمة:شسوي ياعمتي من زود الشوق والوله على شوفتج نسيت.. نجلاء:دام السبب جي بنسامحج..بس لاوديمة لاتسيرين..بتملل بروحي.. وديمة:تعالي وياي.. نجلاء:لافديتج استحي جدتج مناك.. وديمة:جدتي مرة عودة واحنا بنقعد فوق وهي كلش ماتقدر تيي فوق.. نجلاء:لا ..استحي.. وديمة:الله يسامحج.. نجلاء:يعني خالد بيي الحين؟ وديمة:اي الحين.. نجلاء:اممم..انزين بستأذن من جبر بشوفه شو يقول.. في بيت راشد...قاعد يطالع الاخبار والجوهرة تيي تقعد جنبه.... سلطان(يي):يبه.. راشد:نعم.. سلطان:يبه ابي فلوس.. راشد:وين معاشك؟ سلطان:يبه ابي اشتري شوية اغراض للمدرسة..مو معقولة اشتري اغراض المدرسة بمعاشي.. راشد:وشنهي الاغراض اللي تبيها؟ سلطان:عقال غتر زرار.. راشد:وينك عن التشري الفترة اللي راحت..ماتذكر الا قبل الدوام بيوم.. سلطان:ماكان لي خلق اطلع.. راشد:ومع من طالع؟ سلطان:مع ربعي.. راشد:وكم تبي؟ سلطان:ايدك على 3000 ريال.. راشد:انزين بس المرة الجايه انا اللي بيي وياك.. سلطان:ان شاء الله.. راشد:روحي الجوهرة عطيه.. الجوهرة:ان شاء الله.. في غرفة شيخة..كانت وديمة تلعب بتليفونها جات نجلاء... وديمة:هاا بشري؟ نجلاء(مادة البوز):ماوافق.. وديمة:ليش؟ نجلاء:يلست ساعة اتناقش وياه..ماوافق..يقول نبي نروح نسلم على الجماعة..ولازم تيين معاي.. وديمة:الله يهداه عمي..يعني لازم تروحين؟ نجلاء:عمج..شو اقول عنه بس..خليني ساكتة.. شمة تنزل تحت...تفتح التلفزيون.... راشد:عيل وين اختج؟ شمة:فوق.. راشد:وليش مانزلت وياج؟ شمة:قاعدة تحاجي رفيجتها.. خالد وصل ووديمة لبست عبايتها علشان تروح........ نجلاء:ودوم فديتج لاتسيرين..والله بمل بروحي.. وديمة:مي تو عمووه بس شسوي حكم القوي على الضعيف.. نجلاء:الله يسامح اللي كان السبب.. وديمة(تسلم عليها):ياللا بااااي عمتي.. نجلاء:بااايات فديتج.. وديمة:مع السلامة عمتي.. ام فيصل:مع السلامة حبيبتي.. وديمة راحت تركب السيارة حصلت عمها جبر قاعد يسولف ويا خالد.... جبر:خلاص بتسيرين؟ وديمة:مع ان ماكان ودي اهد عمتي نجلاء..بس شسوي.. خالد:جان جات وياج؟ وديمة:ياليت بس عمي جبر ماهو موافق.. خالد:ليش؟ جبر:وين تسير تأذيكم بطلباتها..اختي واعرفها.. خالد:انا فاهمك..لاتحاتي ترى خالي ماهو موجود مسافر ومب راد الا عقب ثلاث اسابيع عنده شغل برع الديرة.. جبر:ماادري.. وديمة:تكفى عمي..والله اني متمللة بروحي..وعمتي نجلاء من زمان ماشايفتها..وانتوا بتردون بسرعة..مايمديني استانس معاها.. جبر:انزين..خليني اسير اقولها..تتريونها؟ خالد:اي بننتظرها.. وديمة وخالد ركبوا السيارة..وجبر دخل البيت وحصل نجلاء تسولف ويا ام فيصل.... جبر:نجلاء.. نجلاء(سوت عمرها زعلانة) جبر:لا مانقدر على الزعلانين..واذا نبي نراضيهم؟ ام فيصل:الله يعينك عليها.. جبر:واذا قلت لج سيري وياوديمة؟ نجلاء:صج جبر..احلف.. جبر:من صجي قومي سيري وياهم.. نجلاء(تمسك جبينه):لا جبر بخير..يعني من صجك؟ جبر:صج ماتستحين..انا الغلطان اللي معطيج وجه..بروح اخبر خالد يسير عنج.. نجلاء(قامت):لالالا..هم وين؟يتريوني برع؟ جبر:اي يتريونج..بسرعة.. راحت نجلاء تتزهب... ام فبصل:قولي اخبارك واخبار مرتك وعيالك.. جبر:كلنا بخير الحمدلله.. ام فيصل:واشلون خالاتك وعيالهم وجدك؟ جبر:الحمدلله الكل بخير ويسلم عليج.. ام فيصل:الله يسلمهم..أخبار جدك اشلون صحته الحين؟ جبر:الحمدلله احسن عن قبل..بس تدرين وايد خايفين عليه من مرض القلب اللي فيه..صرنا نحاتيه ونخاف نخليه بروحه.. ام فيصل:الله يشافيه ويعطيه الصحة والعافية.. جبر:آآمين..حتى وانا رايح اقوله اني مسافر..ماكان موافق..يقول اخاف تسير عني واموت ومااشوفك.. ام فيصل:يحليله.. جبر:جدي الله يحفظه وايد متعلق فيني وفي نجلاء..عاد نجلاء دوم مسوية له جو خاص بالضحك والغشمرة..حتى يوم كان مريض ماكان مشتهي ياكل..محد قدر يأكله غير نجلاء.. ام فيصل:فديتها والله.. نجلاء(تيي):ياللا باي.. ام فيصل:مع السلامة.. جبر(يقوم) ام فيصل:وين رايح؟ جبر:خلني اتأكد ركبت وياهم ولا لا.. ركبت السيارة وهي متسانسة.... خالد:اشوفج مستانسة؟ نجلاء:وانت اشلون شايفني من وراء النقاب؟ خالد:اعرف من غير مااشوف وجهج.. نجلاء:أكيد بكون مستانسة دام اني ويا ودوم فديت عمرها.. ويوم ردوا البيت....نجلاء سلمت على جدة وديمة وراحوا غرفة وديمة..وسكت الباب.... نجلاء:ودوم وايد مغيرة في غرفتج.. وديمة:شسوي احب التغيير.. نجلاء:وااااو هالدبدوب العود من وين لج؟ وديمة:شرته لي شيخة في يوم ميلادي.. نجلاء:يهبببل..هذا لاب توبج؟ وديمة:الا قولي لاب توب الجامعة.. نجلاء:الجامعة توزع لاب توبات؟!!! وديمة:تخيلي عند الباب توزع صدقات..لاطبعا بفلوس بس ارخص من سعره الاصلي.. نجلاء:وي حمدوا ربكم..جزاها الله خير الجامعة يوم فكرت تسوي فيكم جذي..مو احنا حتى ولامعبرينا..حظ.. وديمة(فصخت العباة):خلج بانزل اشرب ماي.. نجلاء:ودوم حبيبتي جيبي لي وياج..عطشت.. وديمة:من عنوني.. ولما دخلت وديمة الغرفة سكت الباب وراها... وديمة:هاج الماي.. نجلاء:تسلمين ياقلبي..اشوف عندج ثلاجة بس غريبة ليش مافيها ماي؟ وديمة:كان فيها بس خلص ونسيت اقول حق خالد يشتري لي كرتون ثاني.. نجلاء:وايش عندج شارية لج ثلاجة؟ وديمة:علشان ادويتي.. نجلاء:والله ومدلعينج.. وديمة:لا وين..يعرفوني عدل اذا الادوية تمت تحت ماراح آخذها..فقالوا خلاص نجيب لها ثلاجة علشان ماتتعذر.. نجلاء:وانت قصيتي عليهم وشريتي كل شي وحاطته بالثلاجة؟ وديمة:حرام عليج..ليش هو خالد يخليني..خليني ساكتة احسن.. نجلاء:تدرين انا يوم قلت حق عمج ابي ثلاجة حق غرفتي كلاني بقشوري خلاني بيزة مااسوى فشلني جدام عياله..انت حق شو تبين ثلاجة واحنا وين قاعدين بالصحراء..ومن هالحجي.تبت قلت خلاص حتى لو عرست ماني طالبة ثلاجة.. وديمة(تضحك):ضحكتيني..خلني آخذ دواي قبل ليي خالد ويعصب.. نجلاء(تشرب الماي) يرن تليفون نجلاء.... نجلاء:هلا والله بخوي فديته مشتاقة لك.. جبر:تجذبين بعد..توج رايحة مااسرع مااشتقتي.. نجلاء:حشى انت ماينقالك شي..حتى الكلمة الحلوة ماتعجبك..سكتنا.. جبر:وينج؟ نجلاء:في الشارع..ويني في بيت اخوي فديته .. جبر:وانا؟ نجلاء:انت ماتبا الحجى الزين.. جبر:وين قاعدة؟ نجلاء:بدار ودوم.. جبر:شتسوون؟ نجلاء:تبا الصدق..نشرب ماي.. جبر:انزين المغرب بمرج.. نجلاء:لا ياعيوني ليش المغرب..تعال الحين..اصلا انا مليت من القعدة هني من الصبح وانا قاعدة في بيتهم ثقلت عليهم..انت من صجك..توني ماتحجيت الا متصل فيني وتبي تمرني.. جبر:بل بل بل..اشفيج انت كلش صرتي ماتحسبين لي حساب ولااحترام.. نجلاء:السموحة فديتك..ادري مصختها انا..سامحني يالغالي؟ جبر:ماشي مسامحة..باااي.. نجلاء:جبر..جبر..اووه سكه..الحين تحصلينه زعلان ومايحاجيني.. وديمة:وانت الله يهداج هذا حجي تقولين له؟ نجلاء:شسوي..لساني مااروم عليه..الحين شو يراضيه عمج..ماعلينا..خلينا نستانس وعقب نفكر فيه..عندكم واير لس؟ وديمة:لا.. نجلاء:انتوا مال اي عصر؟ وديمة(تضحك):شسوي ابوي ماسوى لنا وخالد ماهو راضي..يقولي البرق يكفي.. نجلاء:وشو؟؟..والله هذا اخوج ماعنده سالفة..الناس تتطور وهو قاعد مكانه..تحصلينه هو في بيته عنده بس هني ممنوع.. وديمة:اي صج هو عنده في البيت.. نجلاء:وانت شو دراج؟ وديمة:انا عشت وياه فترة في بيته.. نجلاء:عشتي وياه؟؟..اشلون وكيف؟فهميني السالفة من طق طق لين السلام عليكو.. في بيت بوراشد..شيماء وشمة قاعدين في الغرفة يسولفون....يندق الباب... شمة:منو؟ راشد:هذا انا راشد.. شمة:حياك بوعيسى.. شيماء ظلت مكانها ولاتحركت بعكس شمة اللي قامت وقفت من دخل راشد عليهم.... راشد:شتسوون؟ شمة:ولاشي قاعدين نسولف حياك اقعد ويانا.. راشد(قعد):شنو شيماء تبين تنامين؟ شيماء:مب الحين.. راشد:عيل ايش عندج متلحفة؟ شيماء:استبردت شوي.. راشد(قام وحط ايده على جبينها):حسبتج مسخنة..اشوه مافيج شي..ليحين متضايقة؟ شيماء:ماني متضايقة..بس خايفة..وودي يي هاليوم بسرعة علشان افتك وارتاح من هالخوف.. راشد:ان شاء الله بتخلص العملية وبترتاحين..(يقوم)..لاتسهرون علشان تعودوا على قعدة الصبح.. شمة:وين رايح..اقعد ويانا.. راشد:بروح انام..وراي شغل من الصبح..تصبحون على خير.. شمة:وانت من هله.. وطللع راشد.. شيماء:تعالي شموه شوفي هالريال ايش كاتب عني.. شمة(تيي وتطالع):ويي الريال مامحصل حد يتناجر وياه في المنتدى غيرج والحين بيفتدقج علشان جذي يسأل عنج.. شيماء:كلاه الدود..ايش يبي فيني..صج مايستحي..تدرين اشلون..بس اخلص من عمليتي انا اوريه من تكون شيماء.. وتمت وديمة تسولف ويانجلاء عن مختلف المواضيع اللي مرت بحياتها...لين ماصارت الساعة 11 وخمس دقايق.. نجلاء:ودوم صارت الساعة 11 وشوي وجبر مايى ياخذني.. وديمة:يمكن ناسيج.. نجلاء:لا ودوم عمج انا اعرفه ماينسى مستحيل.. وديمة:انزين باتي وياي.. نجلاء:لافديتج مافيني..خليها مرات الجاية..(طلعت تليفونها)..باتصل فيه....(اتصلت).......مايرد.. وديمة:اتصلي مرة ثانية.. نجلاء:اتصل بعد مايرد.. وديمة:يمكن نايم.. نجلاء:وانا؟؟..لالا جبر مايسويها..يمكن هو تحت ويسولف وياخالد.. وديمة:يمكن..خلينا نروح نشوف.. وراحت الصالة ماحصلت حد والليتات مسكرة....راحوا غرفته...حصلوه منسدح على السرير ويتكلم بالتليفون... خالد:احاجيك باجر ان شاء الله..فمان الله....اشفيكم؟ نجلاء:جبر مااتصل فيك؟ خالد:ليش؟ نجلاء:المفروض يمر علي والوقت تأخر وهو مايى.. خالد:خلاص دام انه ماجى تمي عندنا الليلة وباجر ونوديج.. نجلاء(شوي وبتصيح):لا ماابي..ابي ارد بيت اختي..تكفى خالد وصلني.. خالد:لو بيدي جان وصلتج بس انا مااقدر اسوق والسايق نايم ومااقدر اصحيه..مافيها شي لو تميتي الليلة عندنا.. وديمة:اي عمتي تمي الليلة.. نجلاء:ماابي..فهموني..باتصل في جبر مرة ثانية..(اتصلت ومحد رد)..انا عرفت جبر ليش مايرد .(قعدت تصيح)..الله يسامحه..ليش يسوي فيني جذي.. وديمة:فديتج عمووه ليش تصيحين؟ نجلاء:مو قلت لج عمج زعلان علي..وهذا عقابه.. وديمة:ايش دعوة عمي جبر مايسويها.. خالد:شكلج مسويه فيه شي جايد.. نجلاء(قامت وراحت غرفة وديمة واتصلت في اختها):انت وين؟ ام فيصل:في بيتي.. نجلاء:وليش محد مرني؟ ام فيصل:على اساس بتنامين عند وديمة.. نجلاء:ومنو اللي خبرج اني بنام هني؟ ام فيصل:جبر.. نجلاء:انا مارمسته ولا قلت له شي..هذا جبر قص عليج..تكفين ام فيصل تعالي خذيني.. ام فيصل:ياليت بس مااقدر اطلع من البيت هالحزة ريلي مايرضى.. نجلاء:لا لاتقولين..يعني شسوي.. ام فيصل:مافيها شي تمي هناك..وباجر الصبح انا بمرج.. نجلاء:ليش جبر سوى فيني جذي الله يسامحه..هو وينه فيه؟ ام فيصل:راح ينام.. نجلاء:انزين انا اوريه..ان ماعلمت أبويااا..ياللا باي..الحين شسوي.. وديمة:خلاص عمووه تمي الليلة وياي..والله لأسوي لج سهرة حلوة.. نجلاء:بس بيجاماتي هناك.. وديمة:مو مشكلة..انا شريت من فترة بيجامة مالبستها..بعطيج اياها..بس تدرين ماكنت اعرف ان عمي جبر قاسي لهالدرجة.. نجلاء:مب بعيدة بعد لو تسمعين انه سافر وخلاني بروحي هني.. وديمة:لاعاد هذي مستحيلة.. نجلاء:عادي جبر يسويها..مرة نتزاعل ونتم مانرمس بعض اسبوع ونتفاهم بواسطة زوجته ولاعياله ولا الخدامة..حتى مرة الصبح راح دوامه وماوداني الجامعة.. وديمة:ليش؟ نجلاء:لأني قلت له شي..وعصب علي وماوداني..وراحت علي المحاضرات.. وديمة:انزين شالسبب؟ نجلاء:لساني ودوم يبيله قص بعيد عنج..سيري جيبي لي بيجامتج.. في يوم جديد..والدنيا مغيمة والجو حلو وشكلها بتمطر..يقوم عبدالله من النوم علشان يصلي الفجر..توضى وراح المسجد..صلى الفجر ورد البيت سمع صوت امه وهي تقرأ القرآن حس بخشوع..دق عليها الباب..... ام عبدالله:حياك يالغالي.. عبدالله(فتح الباب):صباح الخير ياالغالية.. ام عبدالله:صباحك نور وسرور يابعد قلبي.. عبدالله(يحب راسها):اشلونج يالغلا؟ ام عبدالله:بخير يايمه..صليت الفجر؟ عبدالله:الحمدلله.. ام عبدالله:الله يتقبل.. عبدالله:منا ومنج..انا رايح انام تامريني بشي؟ ام عبدالله:سلامتك يابعد قلبي..روح يمه.. فهد وراكان كانوا يتمشون على البحر وهم لابسين ملابس الرياضة..والجو كان حلو.. راكان:قاعدة تمطر.. فهد:خلها تمطر..يمكن نظفت قلوب وعقول ناس.. راكان:خلنا نركب السيارة.. فهد:انطر شوي.. راكان:بتمرض.. فهد:مب صاير فينا شي..واذا المرض جاينا من المطر حياه الله.. عقب عشر دقايق ركبوا السيارة.... فهد:المطر اشتد..ياسلام على المطر..ماتتخيل ياراكان ايش كثر احب المطر.. راكان:السيارة مافيها بنزين..انا موصي محي الدين يصب فيها بنزين.. فهد:يمكن نسى..مو مشكلة في الدرب بتحصل محطة بنزين.. راكان:تراني جوعان..ايش رايك نروح نتريق.. فهد:وين؟ راكان:في مطعم عنده أكل شرقي عجيييب..ومع هالجو ياسلام.. فهد:بس يكون عنده قعدة برع.. راكان:عنده..شوف اشلون الشوارع فاضية.. فهد:ليحين مابدت الزحمة..انطر عشر دقايق وتعال شوف الزحمة.. ولما وقفوا عند محطة البنزين.. راكان:سوبر فل.. الرجال:ان شاء الله.. فهد:هالريال شكله مواطن.. راكان:وشالي يبين فيه؟ فهد:ماادري عندي احساس انه مواطن.. راكان:مواطن ويشتغل هالشغلة؟ فهد:عادي عمره الشغل ماكان عيب.. راكان:مااقصد..بس اللي اعرفه ان المواطنين مايشتغلون هالشغلة.. فهد:الحين بنعرف.. راكان:ايش بتسوي؟ فهد:الحين بتشوف..ناده لي.. راكان:اي قولي ايش تبي فيه؟ فهد:انت ناده.. راكان:لو سمحت.. الرجال:نعم؟ فهد:ممكن اتعرف على الاسم الكريم؟ الرجال:محمد.. فهد:محمد انت مواطن؟ الرجال(يبتسم):ليش يبين علي؟ فهد:شكلك يقول.. الرجال:اي نعم..ليش في شي؟ فهد:معليه اسمح لي بهالسؤال..ليش تشتغل هني؟ الرجال:الظروف.. فهد:انت دارس؟ الرجال:اي نعم دارس لين اعدادي..عن اذنك وراي شغل.. فهد:انا آسف لأني تتدخلت بشي مايخصني..بس(مد يده)..تقدر تزورني في الشركة بأي وقت تفضى فيه..انا ابي اشوفك.. الرجال:ليش؟؟ فهد:لجيت بتعرف.. عطاه راكان الحساب وراحوا...لكن تم الريال يفكر فهد ايش يبي فيه..ولما شاف بطاقة فهد ماصدق ان فهد التاجر العود يبي يشوفه.. الساعة 7ونص الصبح...يرن تليفون عبدالله..... عبدالله:السلام عليكم.. محمد:وعليكم السلام..قاعد ولا نايم؟ عبدالله:قاعد من نص ساعة..ايش عندك متصل من وهل؟ محمد:شسوي وصلت مرتي بيت ابوها وماقدرت اكمل رقادي..قلت اتصل فيكم.. عبدالله:حد يطلع من البيت الساعة 7 ونص؟ محمد:بيت اهلها عندهم عزيمة علشان جذي راحت من وهل..قولي ايش رايكم نطلع اليوم ونغير جو.. عبدالله:يوم زوجتك ماهي عندك جاي تقول خلنا نطلع.. محمد:بكرة لتزوجت بتحس فيني..قولي تييون؟ عبدالله:وين؟ محمد:الدنيا قاعدة تمطر خلنا نروح الشمال..أكيد الجو هناك أحلى.. عبدالله:خلني اشوف الوالدة اذا ماتبي شي بيي.. محمد:وتعتقد خالد بيي؟ عبدالله:جرب واتصل فيه..كلمت أحمد؟ محمد:اي كلمته..وقال بيي.. عبدالله:عيل اتصل في خالد..وعقب رد علي.. بعد ماتريقوا فهد وراكان..راحوا الشركة..وهم مستانسين بهالجو.... فهد(يكلم السكرتير):في حد سأل عني؟ علي:اي نعم طال عمرك..التاجر بوالهيثم.. فهد:بوالهيثم..وماقال ايش يبي؟(دخل مكتبه) علي(لحقاه):لا..بس قالي ليرد خله يتصل على المكتب.. فهد(يقعد):غيره؟ علي:الشركة اللي في الصين اتصلت علشان توقع العقد ويانا.. فهد:ومتى بييون؟ علي:قالوا الاسبوع الجاي يوم السبت.. فهد:اي زين..والبريد وينه؟ علي:تفضل طال عمرك.. فهد:اي صح نسيت اقولك..طرش عثمان يدفع فواتير التليفونات..واهم شي تليفوني.. علي:حاضر طال عمرك..تامرني بشي ثاني؟ فهد:لا..ايش صار على سفرة لندن؟ علي:توني الحين اتصلت بشركة الطيران..وحصلت لك مقعد على الدرجة الاولى يوم الاحد الساعة 6 الصبح.. فهد:ممتاز..توقيت مناسب..وين بوحسين؟ علي:راح يزهب لك القهوة.. فهد:خله يستعجل.. علي:تامرني بشي ثاني؟ فهد:لا.. الساعة ثمان وخمس ثلاثين دقيقة عبدالله يروح الصالة علشان يكلم امه يحصلها طايحة على الارض ومغمي عليها..عبدالله ماهو مصدق ان امه اللي طايحة على طول راح لها ومسكها وحاول يصحيها لكن ماهي راضية تقوم...صارخ بقو صرخة قوية هزت البيت...هزت بــ يمـــــــــــــــــــــــ ـــــــــــــه...قامت حسنة على صوت عبدالله قامت من على السرير وهي تركض وشافت امها طايحة وعبدالله دمعته على خده وهو يصارخ ويناديها.... حسنة(تبجي):يمه..امي اشفيها؟؟؟؟ عبدالله(بكل ضيقة):روحي جيبي ماي...بسرعة.. حسنة(واقفة من ذهول الموقف والصدمة) عبدالله:تحركي..بسرعة.. ركضت بكل ماعندها من قوة وجابت له الماي وحاول يصحيها للمرة المليون أبد ماكو استجابة.. عبدالله(متودده وماهو عارف شيسوي):خلج عندها وحاولي تصحينها باتصل في الاسعاف.. حسنة(راحت بحضنها):يمه..يمه تكفين ردي علي..يمه.. عبدالله:الاسعاف...الله يخليك الحق عليها قبل لتروح منا.. ماهي الا ربع ساعة والاسعاف يوصل ويحاول يسعفونها لكنها للأسف ماقامت والنبض ضعيف..عبدالله ماقدر يحبس دموعه يوم شاف امه بهالحال..وحسنة اللي كانت تصيح وهي بحضن اخوها.. عبدالله:روحي لبسي عباتج وتعالي.. ركضت وهي تصيح لبست عباتها وشيلتها وجات وركبت معاهم الاسعاف...ولما وصلوا الطواري تم عبدالله واقف برع وحسنة تصيح ومعورة قلبه..وقتها عبدالله تذكر اسامة..وماتمنى انه يصير مثل اسامة..نزلت دمعة حرقة قلبه.. عبدالله:يمه تكفين ردي لنا.. حسنة:عبدالله..انا خايفة.. عبدالله:ان شاء الله مو صاير الا كل خير..لازم اتصل في خلود..حسنة حبيبتي لاتصيحين..ادعي لها..هي محتاجة دعواتج..تعالي معاي اتصل في خلود ماجبت تليفوني.. وراح عبدالله علشان يتصل في خلود... عبدالله:ماترد..تهقين تكون طالعة من البيت؟ حسنة:ماادري.. عبدالله:انزين امشي نروح نشوف امي وعقب نجي نتصل فيها مرة ثانية.. راحوا...وانتظروا حد يطمنهم...تطلع الممرضة... عبدالله:لو سمحتي طمنينا.. الممرضة:ويت بابا شوي..(وراحت) عبدالله:امشي خلنا نتصل في خلود.. وراحوا... حسنة:عبدالله تهقى امي بتقوم؟ عبدالله(تألم):أكييد..ادعي لها..(يتصل)..........السلام عليكم..اشلونج خلود؟.......بخير وين عبدالعزيز؟....عطيني اياه.......آلو السلام عليكم....عبدالعزيز امي تعبت علينا واحنا بالطواري جيب خلود وتعالوا...ماادري ماادري..بس تعالوا بسرعة...مع السلامة..(انتبه تمسك حسنة فيه وهي تصيح وخايفة)..ياللا نروح.. ولما خبرها عبدالعزيز ماقدرت تتحمل الخبر خذاها وجاوا الطواري.... خلود:عبدالله..ايش صار على امي؟ عبدالله:ماادري..ادعي لها.. عبدالعزيز:محد خبركم عن حالتها؟ عبدالله(بكل ضيق):لا..(تسند على الطوفة وهو متكتف ومتضايق ويفكر في امه هل بتقوم بالسلامة ولا....) خلود لمت حسنة وهم يبجون....طلع الدكتور.... عبدالله:طمنا.. الدكتور:للأسف جلطة بالقلب.. الخبر صدم الكل..والكل تفاجأ جلطة!!..ليش؟؟؟...واشلون؟؟؟؟ عبدالله:امي انا فيها جلطة؟؟؟ الدكتور:ادعوا لها.. عبدالله:وهي اشلونها الحين؟ الدكتور:يبيلها 24 ساعة لين ماتستقر حالتها.. خلود:يمــــــــه..(تصيح) عبدالله:نقدر نشوفها؟ الدكتور:حاليا لا..اللحين بيودونها العناية..وعقب بنقرر اذا تقدرون تشوفونها..الشر مايجيكم.. عبدالله:يمه..يمه.. عبدالعزيز:قوي قلبك ياعبدالله..ان شاء الله مافيها الا كل خير..ادعي لها.. عبدالله:هذي امي ياعبدالعزيز..امي.. عبدالعزيز:خلك اقوى من خواتك..تراهم بحاجتك.. ياترى ايش بيصير في ام عبدالله؟؟؟ وعبدالله وحسنة وخلود؟؟ وعملية شيماء؟؟ بتسويها؟؟ ورحلة نجلاء وجبر للدوحة لوين بتوصل؟؟ تابعوني بأحداث مشوقة في فصل الـ14 | ||||||||
|
| |
|
11-12-13, 12:29 PM
| #29 | ||||||||
| مراقبة عامة ومشرفة منتدى الروايات المنقولة
| " فصل الـ14 " شمة وشيماء ينزلون تحت..... شمة:صباح الخير.. الجميع:صباح الخير.. يقعدون... راشد:ايش عندكم قاعدين روحوا تريقوا.. شمة:شوي بعد..فارس وشيخة متى بيردون؟ ام راشد:ردوا.. شمة:صج يمه؟؟ ام راشد:اي ردوا الفجر.. شيماء:غريبة على اساس بيردون الليلة؟ راشد:ماحصلوا حجز وجاوا الفجر..روحي ياشمة قعدي سلوى ومشاعل.. شمة:خلهم راقدين.. راشد:ماابي يتعودن على الرقاد..باجر بيقومون من وهل..روحي.. شمة(قامت):ان شاء الله..تعالي وياي شيوم.. شيماء(قامت) بعد مادخلوا ام عبدالله العناية المشددة..عبدالله وخواته واقفين برع...ينتظرون الدكتور يطلع....وعبدالعزيز واقف وياهم.... الدكتور(يطلع):ياجماعة قعدتكم مامنها فايدة..الوالدة حاليا نايمة وحالتها ماهي مستقرة وصعبة تشوفونها..روحوا ارتاحوا وتقدرون تييون العصر تطمنون عليها..واذا صار اي شي انا باتصل فيكم وبخبركم.. عبدالعزيز:كلام الدكتور صحيح..دام هي نايمة قعدتكم مامنها فايدة لأنكم ماتقدرون تشوفنها.. عبدالله:معليه خلنا قاعدين هني شوي.. الدكتور:على راحتكم..(راح) عبدالله:عبدالعزيز عطني تليفونك..انا ناسي تليفوني في البيت.. عبدالعزيز:تفضل.. عبدالله(دق الرقم بسرعة واتصل):.......آلو.....خالد انا عبدالله...اي هذا مو تليفوني..اسمعني..(والدمعة بعيونه)..خالد الوالدة بالعناية المشددة..ادعي لها..(والعبرة خانقته) خالد:اشلون؟(سمع صوت صياحه)...هونها وتهون ياعبدالله..ان شاء الله ماعليها شر.. عبدالله(راح بعيد):خالد هذي امي..تعرف يعني شنو امي؟؟..امي ياخالد.. خالد:والله اعرف..بس انت هدي..وادعي لها..من وياك؟ عبدالله:خواتي ونسيبي.. خالد:انزين انت وينك فيه بالضبط وانا بييك الحين.. عبدالله:ياليت لو اشوفك..انا حدي تعبان ومتضايق.. خالد:خلاص عطني ربع ساعة وبكون عندك..في امان الله.. غير ملابسه بشكل سريع...وخبر السايق يشغل السيارة واتصل في محمد....اللي كان قاعد في صالة بيته وهو يشرب النسكافيه ويطالع تليفزيون بملل.... محمد:هلا بووليد.. خالد:محمد والدة اخوك عبدالله بالعناية المشددة.. محمد(قام من مكانه):متى واشلون صار هالحجي..انا حاجيته من ساعة وماكان فيهم شي.. خالد:مو وقت هالحجي..عبدالله وايد تعبان ولازم نروح له المستشفى.. محمد:ياللا انا جاي..انت وين؟ خالد:في السيارة قاعد اروح له..وانت خذ احمد وتعالوا.. محمد:هم وين؟؟؟.....ياللا انا جاي مع السلامة.. ركض محمد على غرفته علشان يغير ملابسه واتصل في أحمد..اللي كان راقد...فز من مكانه وراحوا المستشفى.... خالد:عبدالله.. عبدالله(لف وراح بحضن خالد وماهو حاس بعمره) خالد:ربي يشفيها..هونها وتهون ياخوي....عبدالله..عبدالله علشان خواتك..لاتسوي في عمرك جذي..لاتضعف جدامهم.. عبدالله(يمسح دموعه):خالد ماابي يصير فيني مثل ماصار في اسامة.. خالد:بعيد الشر عنها..ان شاء الله مو صاير فيها شي..دعواتك لها..الدكتور ايش قالك؟ عبدالله:جلطة بالقلب.. خالد:اشلون؟؟ عبدالله:ماادري ياخالد..ماني عارف شي..ولا ابي اعرف شي الين اشوفها بخير.. خالد:شفتها؟ عبدالله:لا.. خالد:تعال اقعد هناك وخل خواتك يقعدون في الاستراحة مناك.. خالد راح بعيد علشان يتصل في فارس...... فارس قام من النوم...شاف الرقم وماهو مركز.... فارس:السلام عليكم.....خالد!!(شيخة قامت من سمعت اسم خالد)....ليش؟......من هي؟......وايش صار عليها؟؟(شيخة صارت تحاتي)....انزين...وانتوا وينكم فيه؟.....وماتعرف اسم الدكتور؟....لا لاتحاتي...ليش اوصي حد انا بييكم الحين...اي نعم انا رديت الدوحة..عطني مسافة الطريج وبكون عندكم...مع السلامة..(قام) شيخة:خالد ايش عنده..حد صاير فيه شي؟ فارس:واحد من ربعه امه تعبانة وبروح لهم..خلني اروح اخبر راشد يمكن يقدر يي وياي.. نزل تحت ببيجامته...حصلهم قاعدين.... فارس:السلام عليكم.. الجميع:وعليكم السلام.. فارس:راشد..تقدر تيي وياي المستشفى.. راشد:ليش؟ فارس:رفيج واحد من الشباب امه مريضة ومرقدة في العناية المشددة.. راشد:ياللا بروح البس..لاتأخر.. وراحوا المستشفى.... في الشركة.... فهد:علي..ابيك تتصل في الدكتور راشد وتخبره يجيني المكتب.. علي:ان شاء الله.. فهد:عطيته بطاقة الدعوة؟ علي:طرشنا له ببريد المستشفى.. فهد:اوكي لاتنسى تتصل فيه.. علي:ان شاء الله..تامرني بشي ثاني؟ فهد:لا.. وطلع..فهد قام من مكانه ووقفت جدام الدريشة وهو يتأمل الدنيا..يدخل عليه راكان.... راكان:ايش عندك واقف هناك؟ فهد:تصدق راكان..الريوق اليوم كان وايد لذيذ..شكلي بتريق هناك مرة ثانية.. راكان:استانست؟ فهد:وايد.. راكان:خلاص اوديك باجر.. فهد:لا..خلها عقب باجر..علشان ماتلوع جبدي من اكلهم.. راكان:انزين قولي ايش صار على مناقصة عبدالوهاب؟ راشد وفارس يدخلون المستشفى وقربوا صوب العناية المشددة..حصلوا عبدالله وعبدالعزيز وخالد ومحمد واحمد واقفين.... فارس:خير خبروني اشلونها؟ خالد:امه تعبانة وايد..والدكتور ماهو راضي يخليهم يشوفونها.. راشد:عبدالله!! عبدالله:دكتور راشد..تكفى شوف لي امي..ابي اتطمن عليها..تراني تعبان وماني قادر اتخيل انها بتروح مني.. راشد(تأثر بمنظر عبدالله وكلماته طبطب على كتفه):تطمن..انا الحين داخل وبشوف شالسالفة..خل املك بالله كبير.. فارس:انا بعد بادخل.. خالد لاحظ التوتر والخوف على عبدالله ودمعته اللي عمره ماشافها..ماهو قادر يقوله شي لأن هذي امه..اللي كان متعلق فيها... الكل واقف وهو ينتظر راشد وفارس... محمد:خواتك هني؟ عبدالله:اي.. محمد:عبدالله ترى قعدتهم مامنها فايدة..خلهم يردون البيت..هذا مو مكانهم.. عبدالله:مب راضيين.. محمد:لازم يردون البيت..لين ان شاء الله الوالدة تطلع بالسلامة من العناية.. أحمد:محمد معاه حق..خلهم يردون البيت.. عبدالله:عبدالعزيز اتصل في زوجتك ابي اكلمها.. عبدالعزيز:ان شاء الله.. عبدالله:خلود.. خلود(وهي تصيح):طمني عليها ياعبدالله.. عبدالله:امي ان شاء الله بتكون بخير..انتي تطمني..حسنة اشلونها؟ خلود:مثل ماهي.. عبدالله:ردوا البيت ياخلود..وان شاء الله لقامت بالسلامة تعالوا شوفوها.. خلود:لا ماني رادة البيت لين مااشوفها بخير.. عبدالله:علشاني ياخلود..ماكو مكان علشان تقعدون..وانت بروحج تعبانة..خذي وياج حسنة وردي بيتنا..وديري بالج عليها.. حسنة:عطيني اكلمه..عبدالله..تكفى ابي امي.. عبدالله(حس بضيقة وسكت لثواني الكل كانت عيونه عليه):امي ان شاء الله بخير..ردي البيت وياخلود.. حسنة:ماابي..ابي اشوف امي..تكفى ياعبدالله.. عبدالله:انت بالاول ردي البيت وانا بحاول اكلمهم علشان نشوفها..لصار بييبكم عندها..ديري بالج على خلود واهتمي فيها زين؟ حسنة:زين.. عبدالله:عطيني خلود....آلو خلود..الحين عبدالعزيز بييكم وبيوصلكم البيت..وان شاء الله اذا قامت بالسلامة باتصل فيكم..مع السلامة..عبدالعزيز وصلهم بيتنا.. عبدالعزيز:ماتبي شي اجيبه لك؟ عبدالله:لا..مشكور..بس خلك وياهم..أخاف عليهم بروحهم.. عبدالعزيز:لاتحاتي دام هم وياي..تليفونك ماتبيه؟ عبدالله:لا.. عبدالعزيز:انزين خذ تليفوني.. عبدالله:مشكور مايحتاي..الربع موجودين واذا بغيت باتصل فيك..انت الحين روح لهم.. عبدالعزيز:اذا صار شي بلغني.. عبدالله:ان شاء الله.. عبدالعزيز:مع السلامة.. الجميع:مع السلامة.. عقب ماراح عبدالعزيز...الكل تم على وقفته وهو ينتظر راشد وفارس.. ماهو الا شوي عبدالله يتكلم ويانفسه من غير مايحس هو ايش قاعد يقول.... عبدالله:يمه خلج قوية وردي لنا البيت..يمه..ترى الدنيا من غيرج ماتسوى..انت كل هلي..انت حياتي كلها.. محمد(قرب منها):الله يقومها لكم بالسلامة..دعواتك لها.. خالد:روح صل لك ركعتين وادعي لها.. عبدالله:بس يطلع الدكتور راشد.. طلع الدكتور راشد..... عبدالله يطالعه وهو ساكت..... خالد:طمنا دكتور.. راشد(يطالع سكوت عبدالله وهو متلهف على خبر يفرحه):هي بخير..بس حالتها ليحين مو مستقرة..لازم ننتظر شوي.. عبدالله(تسند على الطوفة ودمعته على خده ويتذكر اسامة) راشد(قرب منه):عبدالله..امك ان شاء الله بتكون بخير..هي صج جلطة في القلب..بس الحمدلله ماصار فيها شي أكبر من جذي.. عبدالله:............... فارس طلع...راح له خالد وتكلم معاه بصوت واطي... خالد:طمني يافارس.. فارس:وضعية حالة ام عبدالله احسن من حالات ثانية..بس المشكلة ان حالتها ماهي مستقرة..يعني ممكن تصير لها مضاعفات ويمكن تتحسن بسرعة وتستجيب للعلاج..وهذا بيد رب العالمين.. راشد:عبدالله..قول شي بس لاتسكت.. عبدالله(مسح دمعته):ابي اشوفها.. راشد:اللي تبيه..تعال معاي.. دخل عليها عبدالله وشافها بحال ثاني..ماكان وده يشوفها بهالمنظر يوم..قرب منها ومسك يدها الباردة اللي كانت دافية..مسح وجهه بيدها.. عبدالله:دكتور..لو كلمتها تسمعني؟ راشد:هي نايمة ياعبدالله.. عبدالله:بس انا بكلمها..يمكن تسمع صوتي وتقوم.. راشد طلع... عبدالله:يمه..يمه انا عبدالله ولدج..تكفين يمه فجي عيونج قولي لي شي..خليني ارتاح انج بخير..يمه انا وخلود وحسنة ننطرج تردين البيت وتقعدين بينا..يمه تكفين ردي لنا..لاتروحين عني..ترى والله الدنيا من غيرج مافيها حياة.. برع.... راشد:اشلون صار فيها جذي..سمعت خبر ولا شي؟ خالد:ماقال شي..واحنا ماندري شالسالفة..بس دوم يقول ماابي اصير مثل اسامة.. راشد:اسامة!!..(تذكر حاله)..الله يعين عبدالله.. راح له.. راشد:ياللا عبدالله..مش مسموح تقعد اكثر من جذي.. طلعوا...عبدالله الدنيا ضاقت فيه وماهو قادر يفكر بشي.... راشد:تعال وياي عبدالله بنروح نقعد شوي في مكتبي.. عبدالله:امي.. راشد:انا خبرتهم اذا صار شي يتصلون فيني..(يشوف الشباب)تعالوا حياكم.. دخلوا مكتب راشد...وفارس راح يشتري ماي وعصير.... فارس:تفضل عبدالله.. عبدالله:تسلم..ماابي.. فارس:لازم تشرب شي..على الاقل ماي.. عبدالله:ماابي.. راشد:عبدالله انت ريال وفاهم كل شي..وهالتصرف ماراح يغير شي.. عبدالله(يقوم) خالد:وين رايح؟ عبدالله:بروح اصلي ركعتين..ادعي للوالدة.. خالد:متوضي؟ عبدالله:بجدد وضوءي.. راشد:بتحصل حمام على ايدك اليسار بعد غرفتين.. خالد:امش انا بيي وياك.. راشد:واذا تبي تصلي تقدر تصلي هني في المكتب.. عبدالله:ان شاء الله.. بعد ماطلع عبدالله وخالد طلع راشد علشان يشوف الدكتور...قابله وهو راد.... الدكتور:اشلونك دكتور راشد؟ راشد:بخير.. الدكتور:بغيت أخبرك أني مسافر هالاسبوع ومب راد الا يوم الثلاثاء.. راشد:والعملية؟ الدكتور:بنأجلها ليوم الاربعاء من الاسبوع الجاي..بغيت اتصل فيك بس ماكان عندي رقمك..وزين اني شفتك..مع ان غريبة اليوم اجازة؟ راشد:واحد من الشباب امه مريضة وجاي اتطمن عليها..وانت شتسوي في يوم اجازة؟ الدكتور:كانت عندي عملية..عيل ان شاء الله نشوفها الاسبوع الجاي.. راشد:ان شاء الله.. دخل راشد المكتب حصل اللي يشرب ماي واللي قاعد يتكلم واللي يلعب بتليفونه.... راشد:وين عبدالله؟ فارس:يصلي.. راشد(يقعد):ماشاء الله عليكم..انتوا ربعه؟ محمد:احنا أكثر من ربعه..حنا اخوانه.. راشد:الله يخليكم لبعض..انت خالد؟ خالد:اي نعم.. راشد:ابوك دكتور مو جذي؟ خالد:اي نعم..تعرفه؟ راشد:تعاملت معاه كم مرة..واستانست انه حصل هالدورة..وين وصل فيها؟ خالد:خلصت الدورة والحين قاعدين يشتغلون عملي.. راشد:وايد زين..تراه راح يستفيد منهم وايد.. خالد:الحمدلله.. راشد:ومتى ان شاء الله راد؟ خالد:بقى له لين الربيع الجاي.. راشد:بقى وايد.. خالد:اي صار له الحين سنة هناك.. راشد:ومن سنة ماشفتوه؟ عبدالله يي وهو يطوي السجادة ويقعد على الكرسي وهو مهموم.... راشد:تقبل الله.. عبدالله:تسلم.. راشد:ماتشرب لك ماي ولاعصير؟ عبدالله:بشرب ماي..مشكور.. يرن تليفون مكتب راشد..... راشد:وعليكم السلام....تفضل انا معاك.....صحيح انا بعد اقول جذي....ان شاء الله مشكور دكتور تعبناك معانا....مع السلامة..عبدالله..الدكتور طمني على الوالدة ويقول مثل ماهي ماتغير شي.. عبدالله(حزن ونزل راسه) راشد:بس احمد ربك ان نبض القلب ماضعف خلال هالوقت وماصارت لها مضاعفات..وان شاء الله بيكون في تحسن في الساعات الجاية..انت ادعي لها وربي بيشافيها ان شاء الله.. عبدالله:ان شاء الله.. راشد:انت الحين رد البيت..واقعد وياخواتك..وطمنهم..وان شاء الله لين باجر بتكون في اخبار جديدة..وانا بنفسي بطمنك عليها..وبسال عنها وباتصل فيك.. عبدالله:مشكور دكتور راشد..ماقصرت رايتك بيضة.. راشد:دير بالك على نفسك ولاتفكر وايد.. عبدالله(يقوم):ياللا مع السلامة.. راشد+فارس:مع السلامة.. خالد:معاك السيارة؟ عبدالله:لا.. خالد:عيل امش اوصلك.. ورد خالد البيت...وكان في استقباله وديمة ونجلاء... وديمة:انت وينك فيه مت وانا اتصل فيك..ليش ماترد؟ خالد:كنت مشغول..ايش بغيتي؟ نجلاء:بغت تخبرك توصلني بيت اختي.. خالد:مب الحين..تغدي وعقب اوصلج.. وديمة:خالد اشفيك؟ خالد:مافيني شي..بروح ابدل ملابسي واغسل يدي.. وراح.... نجلاء:شو بلاه اخوج؟ وديمة:ماادري.. نجلاء:ودوم ابي ارد البيت..انا متأكدة ان جبر زعلان علي.. وديمة:بتحصلينه يلعب على اعصابج.. نجلاء:اخاف سافر.. وديمة:لا عاد عمي مايسويها..تعالي نقعد هناك.. نجلاء:عيل وين جدتج؟ وديمة:راحت بيت خالتي.. قعدوا... وديمة:ماقلتي لي عمووه أخبار عمي منصور؟ نجلاء:منو منو منو؟؟؟؟ وديمة:عمي منصور.. نجلاء(عصبت):عم الدببة..قالت شو عمي..الله والعم..مالت عليه من عم.. وديمة:ليش تقولين جذي هذا اخوج.. نجلاء(تقلدها):اخوج خوى جنبج..لاتجيبين طاريه اذا تبين تعيشين..مالت عليه من اخو..هذا ميت الاحساس.. وديمة:ليش؟؟ نجلاء:وبعد تقولين ليش تكفين وديمة سكي الموضوع.. وديمة:على راحتج.. نجلاء:ماقلتي لي شنو بنتغدى؟ وديمة:خلني اروح اشوف الخدامة شمسوية غداء؟ راحت المطبخ.... وديمة:وليش ماسويتي شي؟ الخدامة:بابا خالد قال لايسوي شي.. وديمة:غريبة.. نجلاء:ليكون اخوج بعد معاقبنا ومايبي يغدينا.. وديمة:لا خالد مايسويها..بروح اشوفه.. راحت وديمة غرفة خالد ودقت الباب.... خالد:منو؟ وديمة:انا وديمة.. خالد:دشي.. وديمة(دخلت):خالد انت قايل للخدامة ماتطبخ؟ خالد:اي.. وديمة:ليش؟ خالد:لأن جدتي راحت بيت خالتي وخالتي لزمت عليها تتغدى عندهم فقلت خلني اعطي الخدامة راحة وماتطبخ.. وديمة:واحنا ايش ناكل؟ خالد:بوديكم المطعم..واذا تبون نتغدى في البيت.. وديمة:لالا..دام انها جات منك خلاص نروح المطعم.. خالد:عيل وين نجلاء؟ وديمة:تحت..خالد انت فيك شي؟ خالد:لا..انا بخير..نزلي تحت.. وديمة:وانت؟ خالد:جوعانة؟ وديمة:بصراحة اي.. خالد:خلاص روحوا لبسوا علشان نروح المطعم.. نزلت وديمة عند نجلاء حصلتها تطالع مسلسل.... نجلاء:ودوم لايفوتج تعالي شوفي هالممثلة اشلون صايرة بعد عملية التجميل نافخة الخدود والشفايف صارت تلوع الجبد..شو ذي..ووع..الحمدلله على نعمة العقل.. وديمة:أقولج..تدرين ليش الخدامة ماطابخة؟ نجلاء(خافت):ليش ليكون حد صاير فيه شي؟..تحجي.. وديمة:ويي اشفيج عمووه..محد فيه شي..خالد عازمنا على الغداء.. نجلاء:لا لاتقولين..مااصدق..يحليله ولدنا.. خالد(ينزل يسمعها):نعم!!..ولدنا؟؟..هاااي تراني اكبر منج.. نجلاء:ويي تكفى خف علينا..المهم اني عمتك.. خالد:روحي روحي بدلي ملابسج لااغير رايي.. نجلاء:اصلا انا مااروم اسير معاكم.. خالد:يي لج الشرف تيين ويانا.. نجلاء:نعم شو؟..ايش تفضلت حضرتك؟؟..قصدك انتوا ييلكم الشرف تسيرون معاي.. وديمة:عمووه لاتضيعين وقت..خلنا نرووح نبدل.. نجلاء:بس انا من صجي..مااروم اسير.. وديمة:ليش؟؟ نجلاء:لازم استأذن من اخوي.. خالد:متهاوشة وياه وتبين تستأذنين منه..حلمي مابيحاجيج.. نجلاء:نعم!!..وانت ايش دراك؟ خالد:انا خالد حبيبتي..مافي شي ينخش عني.. نجلاء:لا صدق خالد..جبر كلماك؟ خالد:انا كلمته اني بوديج المطعم.. نجلاء:وشو قال؟ خالد:قال ودها وفكني منها.. نجلاء(تضايقت):جبر قال جذي؟ خالد:اي.. نجلاء:خلاص انا مابسير.. خالد:نجول قومي ترى مالي خلق افلام هندية قبل الغداء..ترى نفسيتي بتنسد.. وديمة:قومي.. في بيت بوراشد...الكل قاعد ويتغدى وكانت الساعة 1ونص.... فارس:راشد كلمك حد من المستشفى؟ راشد:من شوي اتصلت فيهم.. فارس:وايش قالوا لك؟ راشد:ليحين مثل ماهي.. شمة:مشمش متى بتخصلون باجر من المدرسة؟ مشاعل:ماادري..انتوا؟ شمة:احنا 1.. سلطان:عاد انا مرتاح برقد على كيفي.. راشد:وليش ان شاء الله؟ سلطان:لأن باجر اول يوم..واول يوم مايعطونا شي..واشله اروح..الرقاد احسن.. راشد:حتى لو باجر اول يوم..لازم تروح علشان تاخذ الكتب..تسلم يدكم على الغداء.. ام راشد:ماكلت شي يمه.. راشد:هذا صحني يمه ايش دعوة ماكلت..الحمدلله شبعت.. وشوي كل واحد فيهم يخلص غداه ويقعد...والفواكه على الطاولة.... فارس:شيخة تبين موز؟ شيخة:لا.. فارس:ولا عنب؟ شيخة:علشانك بذوق حب وحده.. تميم:ماقلت لنا ايش سويتوا في العمرة؟ فارس:ياسلام على الجو..مطرت علينا مطر عجييب..تمنيتكم هناك.. تميم:وكان زحمة؟ فارس:مب وايد..بس الجمعة والخميس لازم زحمة لأنه اجازة والكل يحب يصلي في الحرم..ترى جبت لكم ماي زمزم.. راشد:اي والله انا محتاج لماي زمزم..انا نصيبي حطوه في الثلاجة..شيماء..بغيت اقولج ان الدكتور أجل العملية للأسبوع الجاي.. شيماء:ليش؟؟ راشد:يقول انه مسافر.. شمياء:اووووف..يعني بانتظر كل هالفترة..حرام عليه.. راشد:معليه تحملي شوي بعد.. فارس:من اللي بيسوي لها العملية؟ راشد:دكتور سعد.. فارس:سعد ماغيره؟؟ راشد:اي.. فارس:ماشاء الله عليه خوش دكتور.. شيماء(ماعجبها):لكم انتوا.. شيخة وفارس راحوا الغرفة... شيخة(يرن تليفونها):هلا والله بالغلا كله..فديت هالصوت انا..حبيبتي..مشتاقة لج موووووت.. فارس(فاج عينه) نجلاء:عطيني فرصة اعبر..فديتج قلبج شيخوه..انت وينج فيه..ترى بسافر.. شيخة:لا خالتوو لاتسوينها..ترى قاعدة اعد الايام على جيتج حتى سألي امي..اخبارج؟ نجلاء:بخير..انت شخبارج؟ شيخة:طيبة..وينج فيه في بيت ابوي؟ نجلاء:لا..انا في المطعم وياخالد ووديمة.. شيخة:وانا؟؟ نجلاء:شسوي اللي تزوج هذا ضريبته.. شيخة(تشوف فارس):فديت ريلي..قعدته تسوى عندي الدنيا كلها.. نجلاء:استحي على وجهج لاتقولين هالرمسة جدامي ترى اموت قهر.. شيخة:فديتج والله..بسم الله عليج من القهر..ليش تقولين جذي؟ نجلاء:لأني مو معرسة لاترمسين هالرمسة.. شيخة(تضحك):حبيبتي خالتو..متى بتردين بيت ابوي؟ نجلاء:لين ماخالج يرضى علي.. شيخة:خالي!!..خالي جبر؟ نجلاء:اكو غيره؟ شيخة:حسبت خالي منصور.. نجلاء:مالت عليه من خال..كلاه الدود.. خالد ووديمة مستغربين من هالجملة..من هذا اللي كلاه الدود.. شيخة(ضحكت على تعليق نجلاء):حرام عليج تراج سبيتيه.. نجلاء:يولي..قولي لي متى بتيين بيت ابوج؟ شيخة:العصر ان شاء الله..وانت؟ نجلاء:بخليهم ينزلوني واحنا رادين.. شيخة:ممتاز علشان اشوفج واسولف وياج.. نجلاء:الاهم جبتي لي صوغة؟ شيخة:اكيد مايحتاي تقولين..صوغة العمرة وياي.. نجلاء:لاحبيبتي..انا ماارمس عن صوغة العمرة وبس..لا..انا ارمس عن صوغة ماليزيا شهر العسل..ليكون نسيتيني؟؟ شيخة:أفا عليج انا انسى غلاي..لا والله ماسويها..صوغتج في الحفظ والصون.. نجلاء:احسب..ياللا بسكر لأن خالد قاعد يقولي بطلعج من المطعم اذا ماسكرتي.. شيخة(تضحك):ليش؟؟ نجلاء:لأن صوتي شوي عالي.. خالد:شوي!!..الا قولي عالي بطيتي طبلة اذني.. نجلاء:سخيف..ياللا عمري مع السلامة.. شيخة:مع السلامة.. فارس:من هذي خالتج نجلاء؟ شيخة:اي فديتها..مشتاقة لها واايد.. فارس:وايش عندج تضحكين؟ شيخة:خالتي دوم تعليقاتها تضحك.. عبدالله قاعد بغرفته...وهو حزين ويفكر بأمه..هل بتقوم بالسلامة وترد البيت ويسمع حسها بالبيت..تخيل كل لحظة كانت وياه..وكل دعوة دعتها له...يندق الباب.... عبدالله:دخلي.. خلود وحسنة دشوا الغرفة... خلود:محد اتصل فيك؟ عبدالله:بلا..الدكتور قال مثل ماهي.. حسنة(صاحت وطاحت بحضن عبدالله) عبدالله(مسح على راسها وخلاها بحضنه لين ماهدت):حسنة يبه..لاتصيحين..ترى امي بخير..وان شاء الله بترد البيت..بس صبري عليها شوي.. حسنة:مااقدر اتخيل البيت هذا من غيرها ياعبدالله..ابي امي.. عبدالله(تأثر بكلامها وهو ماكان يبي يدمع جدام خواته):ان شاء الله بترد البيت..تطمني.. خلود:عبدالله..انت ماكلت شي..قوم كل شي..علشاني.. عبدالله:وانتوا كليتوا شي؟ خلود:لا.. عبدالله:ليش؟ خلود:حسنة ماهي راضية..وانا مااقدر آكل بروحي.. عبدالله:عبدالعزيز وينه؟ خلود:راح.. عبدالله:وليش ياحسنة ماتاكلين؟ حسنة:مااقدر آكل شي وامي ماهي بجنبي.. عبدالله:حسنة يبه ماابي اسمع هالكلام..امي ان شاء الله بترتاح جم يوم وبترد تاكل ويانا..قومي خلنا نروح ناكل.. في السيارة..... نجلاء:لا عاد خالد..انا من صجي وصلني بيت اختي.. خالد:زين زين..اشفيج انتي وايد حنانة اشلون متحملج عمي..اصلا احنا في طريج بيت اختج.. نجلاء:سوري..ترى وديمة بتنزل معاي.. خالد:نعم!! وديمة:تكفى خالد ابي اشوف شيخة.. خالد(مابغى يقولها لا لأنه تذكر عبدالله ولازم يروح له):زين.. دشت نجلاء البيت وياوديمة...سمعت حس اختها واخوها..يوم قربت..شافتهم قاعدين جنب بعض وهم يضحكون...اول ماشافها جبر سكت..... نجلاء:السلام عليكم.. ام فيصل:وعليكم السلام.. وديمة:السلام عليكم.. ام فيصل+جبر:وعليكم السلام.. جبر:هلا والله ببنت اخوي..حياج يبه قعدي..شو عندج واقفة.. وديمة(تقعد) نجلاء(تنتظر اخوها يرحب فيها لكن شافت لا ماعطيته وجه) جبر:شخبارج وديمة؟ وديمة:بخير.. نجلاء:وانا مالي لا سلام ولاكلام؟؟ جبر(يقوم):انا رايح انام شوي..لأذن العصر ياام فيصل قعديني.. ام فيصل:من عيوني.. نجلاء:جبر..انا قاعدة ارمسك.. جبر:بعدين بعدين.. نجلاء:ام فيصل ماتشوفينه.. ام فيصل:انا مايخصني في خلافاتكم..انت تعرفين اخوج مايحب حد يتدخل..انت وشطارتج.. نجلاء:ماابي..لو بيسوي فيني جذي ماني رادة وياه..بتم هني وياكم.. راحت وراه ودشت الغرفة.... جبر:نعم؟!! نجلاء(صاحت) جبر(انكسر خاطره عليها بس سكت وماقالها شي) نجلاء:دخيلك ياجبر سامحني..انا ادري ان لساني طويل ويبيله قص..بس شو اسوي.تحملني.. جبر:تراج عديتي حدودج.. نجلاء:أدري والله ادري..بس ترى مافيني على زعلك..والله يصير فيني شي..لو بتسوي فيني كذا ترى ماني رادة وياك..بتم هني.. جبر:لا عاد..انا مااقدر ارد البلاد من غيرج..من يتناجر وياي هناك؟؟..من من اسمع الحنة كل يوم؟؟ نجلاء(ابتسمت):يعني انت مو زعلان مني؟ جبر:كنت زعلان والحين رضيت.. نجلاء(حبت راسه):فديت عمرك ياخوي..عسى عمرك طويل.. جبر:بدت الجدة ترمس.. نجلاء:احسن من اني اكون مراهقة.. جبر:الله يزوجج وافتك من لسانج.. نجلاء:آآآآآمين.. جبر:والله ماادري من اللي بياخذج وبيبتلش بلسانج.. نجلاء:كل الشباب يتمنوني..بس أأشر اشوفهم واقفين في السيد.. جبر:ماتستحين تقولين هالرمسة جدامي..روحي من جدامي خليني انام.. في صالة البيت...عبدالله قاعد وياخواته....يرن تليفونه.....الكل عينه وكل حواسه على عبدالله.... عبدالله:السلام عليكم...بخير الله يسلمك...الحمدلله......لا والله الاخبار مثل ماهي.....الله يسمع منك.....اي تغديت......والله ودي اروح.....تهقى يدخلوني؟.......كنت باتصل فيه بس قلت يمكن راقد.......انا بعد قلت جذي بانتظر ساعة بعد وعقب باتصل فيه......ان شاء الله لاتحاتيني.....لا تسلم ماابي شي......ان شاء الله لين باجر يصير خير....فمان الله.. خلود:من؟ عبدالله:واحد من الربع.. وتمر الساعات.....وكل واحد مشغول بنفسه...شيخة ونجلاء ووديمة قاعدين بالغرفة سوالف وضحك وغشمرة...وعبدالله مازال يفكر ويحاتي امه وكان وده يروح لها لكن راشد ماخلاه وقاله ينتظر شوي....وشيماء وشمة قاعدين في الغرفة على النت....خالد قاعد في البيت وياجدته...والسكوت هو اللي كان بينهم....وأحمد كعادته ماكو حد في البيت يملي له وقته..طلع من البيت علشان يتمشى شوي بهالجو...ومحمد طلع وياامه وحاول يبر فيها قد مايقدر ولايضيع دقيقة من غيرها كل ماتذكر حال عبدالله....جبر يطلع من البيت علشان يخلص جم شغله... في شركة بوفهد...بعد ماضيفهم بوحسين طلع.... راشد:اعذرني لأني مارديت على اتصالكم لأن كانت عندنا حالة في المستشفى.. فهد:اليوم يوم اجازتك يادكتور.. راشد:والله واحد من الشباب امه اللي كانت مريضة فلزمت على روحي اروح واتطمن عليها واطمن عيالها.. فهد:فيك الخير يابوعيسى..المهم انا بغيت اكلمك شخصيا علشان ادعوك لحفل افتتاح المستشفى.. راشد:ماشاء الله..المستشفى زاهب؟ فهد:الحمدلله..هذا بفضل ربي وثم بفضلك.. راشد:انا ماسويت شي.. فهد:ماقلت بتيي؟ راشد:والله ياليت اتمنى..بس الظروف يافهد ماتساعد شوي..اذا قدرت وشفت ان عندي مجال للسفر راح اييكم وبحضر الافتتاح.. فهد:ترى احنا بعثنا لك بطاقة دعوة.. راشد:ليحين ماوصلتني..يمكن باجر يجيبونها..على العموم ماقصرت ودعوتك وصلتني..وانا مستانس وسعيد علشانك وان شاء الله هالمستشفى يكون باب خير عليك..وكل ماتساعد الناس اكثر كل ماتحصل اجر اكثر..ترى صدقني اذا المستشفيات انتبهت انك منزل اسعارك في المستشفى وجودة المستشفى بجميع اجهزتها ودكاترها عالية راح تخسر مرضى..يعني كل المرضى راح يجونكم..وممكن تحصل ناس يجونكم من برع البلاد علشان يتعالجون عندكم.. فهد:والله بتكون هذي اخبار تفرح.. لما صارت الساعة 10 و13 دقيقة....دش جبر غرفة شيخة..... شيخة:هلا والله بخالي..حياك.. جبر:هذي الناس اللي عندها ذوق.. نجلاء:شو تقصد؟ جبر:مااقصد شي..وديمة حبيبتي لبسي عباتج ونزلي تحت خالد برع يترياج.. نجلاء:لا..شو عنده جاي بدري.. جبر:بدري من عمرج..شوفي الساعة جم..باجر وراهم دوام مب انتي اللي شاردة من الجامعة.. شيخة:ودوم بتروحين باجر الجامعة؟ وديمة:اوامر.. نجلاء:الله يعينج على اللي يتدخلون بكل صغيرة وكبيرة.. جبر:شو تقصدين؟ نجلاء:مااقصد شي.. جبر:نجول يودي لسانج قبل لأسوي شي.. نجلاء:لالا..خلاص بسكت..(حطت يدها على فمها) شيخة(تشوف الساعة):ويي انا بعد تأخرت..عيب علي خليت فارس ينتظر كل هالوقت..حزة نومه الحين باجر بيروح الدوام من وهل.. نجلاء:لا والله..واتم بروحي بين الحيطان..اللي ماتروم تعصي اخوها واللي ماتبي تزعل ريلها.. جبر:وانت بعد لاتعصين اخوج ولاتزعلينه وقعدي عاقلة.. نجلاء:الله يسامحك.. شيخة ووديمة يضحكون.... عبدالله يطلع من الحمام وهو متوضي..وصلى له ركعتين قبل الفجر يدعي فيهم ربه يشافي امه وترد البيت وترد الحياة له ولخواته..قام من على السجادة وقعد على السرير ومسك تليفونه..حصل ثلاث مكالمات لم يرد عليها..متى واشلون ماسمع...تخيل وقعد يفكر من هو هالشخص اللي متصل هالحزة الساعة اربع ليحين مااذن الفجر...يوم شاف كان راشد...اتصل..... عبدالله:السلام عليكم...اعذرني التليفوني ماكان عندي.. راشد:لا عادي..لأنك حلفت علي اتصل فيك اي حزة علشان اطمنك على الوالدة فكنت حاب اقولك ان الوالدة الحمدلله هي بخير والخطر زال عنها..وحالتها مستقرة.. عبدالله(ماهو مصدق):جزاك ربي الجنة مثل ماتقول الوالدة..هذا احلى خبر سمعته..مشكور يادكتور راشد..أقدر اشوفها؟ راشد:تقدر ياعبدالله.. عبدالله:هي ليحين بالعناية؟ راشد:اي نعم.. عبدالله ماصدق..ياكثر وناسته بهالخبر....على طول راح غرفة خلود وحسنة كانت راقدة وياها بالغرفة...قعدهم من النوم وخبرهم بهالخبر السعيد وعلى طول كل واحد فيهم لبس ملابسه وركبوا السيارة متجهين للمستشفى... فارس يقعد شيخة للصلاة... شيخة:فارس.. فارس:عيون فارس..اشفيج ماتقومين..صار لي ايشقد واقف فوق راسج علشان اصحيج.. شيخة:ماادي احس ان فيني شي.. فارس(اخترع):بسم الله عليج..اشفيج؟ شيخة:ماادري..ماقدرت انام امس الليل..وطول الوقت احس بتعب وان فيني شي شنو مااعرف.. فارس(يمسك جبينها):مافيج حرارة..انزين خليني اوديج المستشفى.. شيخة:مايحتاي.. فارس:لايحتاي..قومي الحين صلي وان شاء الله لصار الصبح بوديج.. واول مابغت شيخة تقوم من على السرير اغمى عليها مسكها على طول فارس ورقدها على السرير وقعد يناديها.... فارس:شيخة..شيخة ردي علي.. شيخة(فتحت عيونها) فارس:انت بخير؟ شيخة:تطمن انا بخير..ماادري ايش هالدوخة اللي جاتني مرة وحده.. فارس:كلتي شي امس الليل؟ شيخة:اي.. فارس:اخاف الضغط نازل عندج ولاشي..خلني اقيس ضغطج.. في المستشفى..... خلود:ها عبدالله ايش قالك الدكتور؟ عبدالله:ماشفته..الدكتور ماجى.. خلود:وايش بنسوي؟ عبدالله:الممرضة تقول ممكن يي في اي لحظة.. حسنة:يعني امي بخير؟ عبدالله:الحمدلله مو انتي شفتيها؟ حسنة:بلا..بس انا ابيها ترد البيت.. عبدالله:ان شاء الله بترد البيت.. راشد(يي):السلام عليكم.. عبدالله:وعليكم السلام دكتور.. راشد:اشلونك عبدالله؟ عبدالله:بخير.. راشد:شفت الوالدة؟ عبدالله:اي شفتها.. راشد:واشلون كانت؟ عبدالله:ماادري..انتظر الدكتور وليحين ماجى.. راشد:خلك هني انا بادخل وباتطمن بنفسي.. عبدالله:مشكور.. خلود:عبدالله من هذا؟ عبدالله:لحسن حظي اني تعرفت على هالشخص.. خلود:من يكون؟ عبدالله:دكتور في المستشفى وتعرفت عليه بالصدفة.. خلود:مب رايح دوامك؟ عبدالله:لا طبعا..زين ذكرتيني باتصل في واحد من الربع علشان يخبرهم اني مب جاي.. في السيارة.... وديمة:حراام عليك جان خليتي انام.. خالد:ودوم سكتي..مالي حنة من الصبح..يعني اول يوم دوام ماودج تروحين الجامعة مااشتقتي لها؟ وديمة:لا..انت تدري ان اول يوم مايعطون شي.. خالد:انت روحي يمكن حد منهم شرح.. وديمة:ماكو فايدة..ماادري ليش تحب الدراسة.. خالد:نزلي..ولما تخلصين اتصلي..نزلي بتأخر.. وديمة:زين.. | ||||||||
|
| |
|
11-12-13, 12:34 PM
| #30 | ||||||||
| مراقبة عامة ومشرفة منتدى الروايات المنقولة
| متابعة فصل الـ14 في المستشفى.... عبدالله:آمين الله يسمع منك....ان شاء الله...مع السلامة... خلود:عبدالله الدكتور تأخر.. عبدالله:كاهو جى.. راشد(جى ووقف مع عبدالله شوي بعيد):امك الحمدلله هي بخير..وحالتها تدريجيا في تحسن..وانا متوقع ان شاء الله اليوم بتطلع من العناية.. عبدالله:اللهم لك الحمد والشكر.. راشد:حمدلله على سلامتها.. عبدالله:الله يسلمك.. راشد:قعدتكم مامنها فايدة..لأنها هي نايمة..انتوا ردوا البيت تريقوا ريحوا شوي..وزهبوا لها اغراضها للمستشفى..من ملابس والاشياء اللي تحتاجها..واول ماتصحى من النوم باتصل فيك على طول.. عبدالله:مشكور يادكتور راشد..ماادري من غيرك ايش كنت بسوي.. راشد(ابتسم له):ياللا عن اذنك.. عبدالله خذ خواته وردوا البيت....والبنات في المدرسة...ويوم صارت الساعة 9ونص كانت ام راشد قاعدة تسولف في التليفون مع وحده من الحريم...فارس يرد البيت مع شيخة.... ام راشد(شافت الساعة واستغربت ردتهم من بدري):ان شاء الله فديتج..تسلمين يوصل وانت بعد سلمي على البنات وباركي لبنتج وضحة على تخرج ولدها....ان شاء الله اكيد بنزوركم.....في حفظ الله مع السلامة...فارس.. فارس:لبيه يمه؟ ام راشد:ايش عندكم رادين هالحزة؟؟توها الساعة 9 وشوي.. فارس(شاف شيخة وابتسم وقعدوا):جايينج يايمه علشان نقولج شي.. ام راشد(خافت):تقولون لي شي؟!!..يارب خير..ايش صاير؟ فارس:كل خير ياالوالدة...شيخة حامل يايمه.. ام راشد(استانست):بالمبارك..مبر� �كين ويارب يتمم عليها هالحمال ويكون من الذرية الصالحة.. فارس:آآمين.. ام راشد:وانتوا طلعتوا من وهل علشان هالسالفة؟ فارس:اي..شيخة اليوم اغمى عليها بعد الصلاة..وخفت عليها وقلت لازم اوديها المستشفى واتطمن..(يشوفها مستحية)..والحمدلله اني اتطمنت عليها.. ام راشد:وايش قالت لج الدكتورة يايمه؟ شيخة:قالت لي ديري بالج على نفسج.. ام راشد:اي يمه لازم تهتمين بصحتج..وديري بالج لاتركبين الدري..عندج المصعد.. شيخة:ان شاء الله عمتي.. فارس(يقوم):عن اذنج يمه بوصلها للغرفة علشان ترتاح.. ام راشد:وانت مب رايح دوامك؟ فارس:اليوم انا ماخذ اجازة وابي اقعد ويازوجتي.. يدخلون الغرفة وهم يضحكون..... فارس:شيخة.. شيخة:لبيه.. فارس:أحبج.. شيخة(استحت) فارس:انا مستانس..واحس الدنيا ماتشيليني من الفرحة.. شيخة:الحمدلله.. فارس:سمعتي كلام الدكتورة..لازم اديرين بالج على روحج وعلى البيبي..وماكو حركات مثل اول.. شيخة:ان شاء الله..فارس.. فارس:آمري.. شيخة:بغيت أطلب منك شي.. فارس:آمري.. شيخة:ودي ابات في بيت ابوي ليلة وحده قبل لتسافر خالتي.. فارس(ماتوقع هالطلب):ليش؟ شيخة:اذا ماتبي خلاص ماني رايحة.. فارس:هي متى بتسافر؟ شيخة:باجر.. يرن تليفونها..... شيخة(ترد):آلو...هلا ودوم..بخير انتي اشلونج؟......لا ماجيت ليش؟.......انت من صجج!!..لالا مااصدق.......مايخصني تسجليني في هالمقرر......مايخصني دبر لي مقعد بأي طريقة.........الله يسامحج تسجلين حق روحج وماتسجلين لي؟.......خلاص انا بحاول.....في دكاترة حضروا؟......زين اني ماجيت......ليحين....ماادري ياللا عقب بحاجيج....اي....قلت لج بعدين....مع السلامة.. فارس:ايش صاير؟ شيخة:كانت في دكتورة بالجامعة عليها شرح يافارس..رهيبة بمعنى الكلمة....الكل يشكر فيها....حتى سمعت ان الشباب طلبوا كم مرة من الجامعة انها تدرسهم لكن رفضت..ماتصدق المجموعة فل في يوم واحد أول مادروا عنها البنات على طول سجلوا عندها...وايد يحبونها ومتعلقين فيها..مع ان امتحاناتها ماهي سهلة..لكن تعاملها عجيب تسحر الواحد بأخلاقها.. فارس:وليش ماتدرس الشباب؟ شيخة:يقولون ريلها رافض.. في بيت بوفيصل....ام فيصل قاعدة تزهب الغداء...ونجلاء قاعدة تسولف وياها.... ام فيصل:عيب يانجلاء..لاتقولين هالحجي مرة ثانية.. نجلاء:لاهو عيب ولاهو شي ثاني..انت يااختي ماتدرين شي ولاتعرفين هو شو سوي فينا..زوجته أحسن منه..ريال ايش كبره مايستحي على وجهه..يدري ان احنا اخوانه لايسأل ولاشي..حتى جبر مايقرب من صوبه ولايسلم عليه..ليش؟..لأن جبر طالب بحقه..يعني انت متسلف منه ويوم يجيك علشان ياخذ فلوسه ماتعطيه..ياليت لو راح جبر واشتكي عليه في المحكمة..ماتتخيلين ياام فيصل..هالوقح شو سوى في جبر..والله ان قلبي احترق عليه.. ام فيصل:ايش سوى؟ نجلاء:تخيلي في يوم عزيمة واحد من الشياب كان عازم خلق الله..من ناس كباريه وناس بسطاء..الله يسلمج جبر كان قاعد مع ولد الشايب لأنه رفيجه..جى اللي مايتسمى وسلم على الريال وماسلم على جبر..تخيلي والناس قاعدة تطالع اخو مايسلم على اخوه؟؟..والله انه قهرني لو انا منه جان سطرته جدام الناس.. ام فيصل:وانت ايش دراج باللي صار؟ نجلاء:وعليه عليك ياخوي..هو اللي قالي.. جبر(يدخل):وانت وحده ماينقالج شي.. نجلاء:شسوي..من حرة قلبي ياخوي..لايعة جبدي منه ومن سيرته.. جبر:هذا اخوج ولاترمسين عنه هالرمسة.. نجلاء:اخوي!..مالت على الاخوة اللي تجمعني فيه.. جبر:نجلاء بس عاد..ماابي اسمع هالرمسة.. ام فيصل:صج جبر اللي سمعته؟ جبر:اللي صار صار.. ام فيصل:وليش يسوي جذي؟ نجلاء:مريض نفسي وانا اختج.. جبر(عصب):بس يانجلاء.. نجلاء:لاتعصب وتحرق اعصابك على واحد تافه مايستاهل انه يكون اخوك.. ام فيصل:ماقلت لي ياجبر ليش يسوي جذي؟ جبر:ماادري..بس هو انسان غير طبيعي..عياله مو مثله..لما يشوفوني يسلمون علي ويسولفون بعد..لكن هذا لا..ماادري من اللي يطالب من الثاني.. ام فيصل:وايشقد اتطالبه؟ جبر:............... نجلاء:ليش سكت..ايش له ماتقولها؟..خايف؟؟ ام فيصل:شكلك معطيه وايد.. نجلاء:وايد بس..كل اللي جمعاه عطاه.. ام فيصل:اي عاد كم؟ جبر:نص مليون.. ام فيصل:يابويا نص مليون؟؟..وانت اشلون عطيته هالمبلغ..انت ماتعرف اخوك وحبه للفلوس..هذا ايش ماتعطيه مايملى عينه.. نجلاء:وانت صاجه..هاوشيه..رمسيه يمكن يسمع منج.. ام فيصل:انت صدمتني ياجبر..ليش سويت جذي.. جبر:كسر خاطري.. نجلاء:ياعل عاموده الفقري الكسر.. ام فيصل:لاتدعين عليه مب زين.. جبر:جاني وهو متضايق ومحتاج فلوس علشان يخلص من بناية البيت ويروح يسكن فيه لأنه ماعنده ايجار البيت اللي عايش فيه.. ام فيصل:بس اللي سمعته انه ماراح بيت جديد.. نجلاء:ماتعرفين شو مسوي هالنذل..قص عليه وخذ الفلوس ورفه عن نفسه..اشتري فيهم سيارة وعرس مرة ثانية..تخيلي!! ام فيصل:اشلون اشلون؟؟..جبر انت ياهل ينقص عليك؟؟ جبر:ماادري اشلون استغفلني.. نجلاء:طيبة قلبك ياجبر..ولا هذا حتى الصدقة حرام عليه.. جبر:طلع لاعنده بيت ولاارض يبنيها ولا حتى البيت اللي ساكن فيه ايجار..هذا بيته..تخيلي ياام فيصل قص علي وخذ الفلوس علشان يستانس..ياليته قال الصج..ياليت.. ام فيصل:لو قالك الصج ماكنت بتعطيه..ويوم رحت له ايش قالك؟ جبر:قالي مالك شي عندي..واذا تبي تشتكي في المحاكم اشتكي..ترى الامور بتطول..وانت الخسران.. ام فيصل:بس الحق معاك.. يرن تليفون نجلاء وتروح.... جبر:ياام فيصل..اخوج قالي..ياتنسى الفلوس اللي عندي..ياتشتكي وانا بشتكي عليك انك خذت نجلاء مني وانا ولي امرها لإني العود..تخيلي يبي ياخذها ويعيشها عنده علشان الفلوس اللي بينا..وانت تدرين ان نجلاء تكرهه..ولاتداني تشوفه.. ام فيصل:وهي تعرف بهالسالفة؟ جبر:تعرف..هو خبرها..ماقصر.. ام فيصل:مااصدق ان هذا اخونا..وزوجته أميرة اشلونها؟ جبر:ماتشوف منه الا الويل والمراكظة ورى الفلوس..الله يعينها..خليني ساكت احسن.. ام فيصل:يعني ايش بتسوي؟ جبر:ولاشي..يانجلاء يالفلوس..وبعدين انا متأكد حتى لو خذى نجلاء ماراح يرجع لي شي.. في الليل الكل يلتم بغرفة شيخة...الكل منسدح على السرير وهم يضحكون... نجلاء:ياللا ارمسي اشوف.. شيخة:انا..حامل.. نجلاء:جذابة.. شيخة:والله.. وديمة:مبرووووك.. نجلاء(باستها):مبروك حبيبتي..عيل جي مايصير ترقدين ويانا على الشبرية..مب زين عليج.. شيخة:لا عادي مافيها شي..خلنا نشغل السي دي..جاهزين؟ وديمة:جاهزين.. يندق الباب... شيخة:منو؟؟ جبر:انا جبر.. نجلاء:شالي جايبه هالحزة..تعال.. جبر(يدش):وانتي شو تبين فيني داش غرفة بنت اختي..صج لقافة.. نجلاء:انزين ماعليه..بسكت عنك.. جبر:يكون احسن..شاخباركم بنات؟ شيخة:بخير خالي..حياك اقعد ويانا.. نجلاء:لا لاتقعدينه..ترى هو مايداني الافلام..وان شافني اطالعهم يعصب علي.. شيخة:صج خالي ماتحب الافلام؟ جبر:لا..اذا عندج شي شعبي باقعد.. نجلاء:لا ماكو..سير نام احسن..علشان السفر.. جبر:ارمسي حق عمرج..انا باسير اذا وديمة قالت لي سير.. وديمة(استحت) نجلاء:ودوم ارمسي خله يسير.. وديمة:اذا تحب عمي تقعد اقعد.. جبر:فديت بنت اخوي وهي تنطق عمي..ياحلاتها وهي تقولها.. نجلاء(تفج عينها):طاع..قاعد يتغزل هيييه عيب..بعدين تعالي انت ايش له تقولين له اقعد.. شيخة:ايش تبين فيه خله قاعد ويانا يونسنا.. جبر:لا انا باسير..نعسان ابي انام.. نجلاء:ادري فيه..النوم عنده سلطان.. وطلع جبر من عندهم..وبدوا يشوفون الفيلم الكوميدي وهم ميتين من الضحك... نجلاء:قومي شيخوه جيبي لنا بعد مكسرات.. شيخة:ويي ماشاء الله عليكم مااسرع ماخلصتوا.. نجلاء:لاترمسين وايد قومي.. شيخة(وهي تقوم):بس وقفوا الفيلم.. وديمة:اوكي انا بوقفه لج..بس بسرعة.. وراحت شيخة تجيب لهم المكسرات والشيبس والعصاير والماي..ودشت الغرفة.... نجلاء:ياللا كاهي شرفت شغلي ودوم.. وكملوا السهرة بالضحك..وعقب ماخلص الفيلم.... نجلاء(انسدحت على السرير بتعب):خلالالاص تعبت..شيخوه سيري نامي بغرفة فيصل.. شيخة:وليش؟ نجلاء:انت حامل واخاف ودوم ترافسج وهي نايمة وعقب السيد فارس يودينا بستين داهيه.. وديمة(فاجه عينها):من اللي يرافس وهو نايم؟؟ نجلاء:انت؟؟ وديمة:انا عمووه؟؟..حرام عليج.. شيخة:ويي مسكينة وديمة يوم ترقد ماتحرك من مكانها..ثابته طول 24 ساعة اللي ترقد فيهم.. وديمة(على اساس عصبت):انا انام 24 ساعة؟!!..انزين ماعليه..انا الغلطانة اللي قاعدة وياكم..لو غرفة فيصل كانت غرفة اخوي جان رقدت فيها وارتحت من سوالفكم.. شيخة:نلعب وياااج..ياللا كلنا بنرقد.. نجلاء:ماافي..سيري نامي بغرفة اخوج.. شيخة:لا عاد خالتوو ماابي.. نجلاء:تبين غصب عنج..تبين باجر جبر يصلي علي..قومي..مو ناقصة يصير لج شي..سيري ياللا.. شيخة:انزين بروح..بس بالاول نسولف.. نجلاء:اوكي.. وديمة:عمووو شنو هالشي اللي تمنينه؟ نجلاء:آآآآآه ياودوم جيتي على الجرح.. شيخة:عندج جرح واحنا موجودين..أفاا بس.. نجلاء:اتمنى اعرس.. شيخة:من صجج خالتي؟ نجلاء:اي من صجي..عيل اتغشمر..من اللي ماتتمنى انها تعرس؟..اللي تقولج ماافكر بالزواج جذابه..هي بس تكابر..في خاطري اعرس وتستقر حياتي..ويكون لي بيت آمر وانهي فيه..اشتري اللي اباه..اتدلع عليه ويتدلع علي..نطلع جميع..نسوي كل شي جميع..هو يفضى لي وانا افضى له..هو يشكي لي وانا اشكي له..هو يحبني وانا احبه..ودي اكون كل شي بحياته وهو يكون كل شي بحياتي..ياااااااه ياحلاة الحب..ولا انت شو رايج ياشيخة؟ شيخة:مااقولج لا..بالعكس الحب والزواج حلو..وله طعم خاص..بس احنا دوم نفكر ونحلم بأشياء حلوة في الزواج..ويوم نتزوج وتصير لنا مشكلة بسيطة على طول نزعل ونتضايق ونكبر المشكلة اكبر مما هي فيه..لأن مافكرنا ان الزواج بتكون فيه مشاكل..لازم نفكر قبل لنتزوج بكل جوانب الحياة الزوجية من وناستها ومشاكلها.. وديمة:يعني تقصدين ان الحياة الزوجية لايمكن تكون سعيدة طول الدهر؟ شيخة:لا طبعا..كل بيت فيه مشاكل..اصلا شي طبيعي ان كل بيت يكون فيه مشكلة..والشي الاهم كيف احنا نتعامل مع هالمشاكل.. نجلاء:تبين تخبريني ان في مشاكل بحياتج؟ شيخة:لا الحمدلله..انا مستانسة وياريلي..بس مرات الوحده يوم ماتفهم على زوجها ايش يقصد تزعل وتتضايق..لكن لما تقوله يافلان مافهمت عليك..ايش تقصد..يوم يفهمها وااايد فرق بين يوم تسمع مرة وحده وتزعل وتكبر السالفة.. نجلاء:انزين انا بسألج سؤال..هل فارس رقم واحد بحياتج؟ شيخة:اشلون يعني؟ نجلاء:يعني سلم الحب لها درجات..وفارس رقم كم من هالسلم بحياتج؟ وتمر الايام...في يوم الجمعة...الساعة 3 ونص العصر...يرد فارس من الصلاة.... شيخة:فارس..تقدر توديني المكتبة؟ فارس:ايش عندج في المكتبة؟ شيخة:ابي اشتري لي شوية اغراض للجامعة.. فارس:خلاص بدلي ملابسج ونروح..الا ماقلتي لي..سجلتي المقرر اللي كنتي تبينه؟ شيخة:اي سجلته..ليش ماقلت لك؟ فارس:ماسمعتج تقولين لي هالسالفة.. شيخة:ماتتخيل يافارس ايشقد انا مستانسة اني سجلت عندها.. فارس:واشلون حصلتي عندها؟ شيخة:في وحده من البنات كانت مسجلتها حق رفيجتها..ورفجيتها جاها ظرف واعتذرت هالكورس..وصار مكانها من نصيبي.. فارس:زين والله.. شيخة:الحمدلله..عيل انا بقوم البس.. في المستشفى.... عبدالله:هاا يمه طمنيني عنج..اشلونج الحين؟ ام عبدالله:الحمدلله..انا بشوفتكم اكون بخير..الحمدلله ان الله عطاني عمر علشان اقدر اشوفكم بأحسن حال.. عبدالله:الحمدلله.. خلود:يمه غريبة اللي صار لج.. ام عبدالله(تذكرت السالفة) عبدالله:يمه اشلون انا ماحسيت عليج انج تعبانة؟ ام عبدالله:لأني ماكنت تعبانة يوم كنت قاعد وياي.. عبدالله:عيل شالي صار عليج؟ ام عبدالله:مو مهم..المهم اني قمت بالسلامة..واشوفكم حواليني.. حسنة:يمه متى بتردين البيت؟ ام عبدالله:ماادري..(تشوف عبدالله)..ماكلمت الدكتور؟ عبدالله:بلا..وقالي خلال هاليومين ان شاء الله.. ام عبدالله:اللهم لك الحمد والشكر.. فهد يلبس ملابس الرياضة وينزل تحت.... ام فهد:وين رايح؟ فهد:رايح اتمشى شوي وياغانم.. بوفهد:وين؟ فهد:قريب البحر..يقولون الجو حلو والمكان يساعد..فقلت نروح..ماتيي يبه؟ بوفهد:لايابوك وين لي شدة على المشي..الا اذا تبيني اقعد في البيت اسبوع يمكن.. فهد:لا يبه..خلك مرتاح..ياللا مع السلامة.. وديمة قاعدة بين اريع حيطان في غرفتها..ملت من المسن والنت..سكرت اللاب توب..وقعدت تطالع الغرفة وتفكر في شي يشغلها...تأففت وقامت تدوور في الغرفة..شيتسوي...لين مارن تليفونها.... وديمة:سلام حاااااااااار على الحبايب.. نجلاء:فديت هالصوت اللي يبرد الخاطر..كيف حالج؟ وديمة:يسرج..بس والله ملانة..قاعدة بروحي..ياليتج ماسافرتي.. نجلاء:شسوي اوامر عمج..وين خلود عنج؟ وديمة:خالد ماادري عنه..راقد ولا طالع.. نجلاء:صج هالاخو ماعنده دم..ليش مايطلعج في يوم اجازة؟ وديمة:لاتقولين عنه جذي..هو مايقصر..بس شيسوي علشان ريوله.. نجلاء:قولي لي اخبار شيخوه اتصل فيها ماترد.. وديمة:تحصلينها طالعة وياريلها..ولا قاعدة تسولف وياامها وتليفونها مقطوط مكان ثاني.. نجلاء:هي الخسرانة.. وديمة:رحتي الجامعة؟ نجلاء:هيه.. وديمة:واشلون؟ نجلاء:زي كل مرة يااختي..متى يي هاليوم واخلص من الدراسة.. يندق الباب... وديمة:منو؟ خالد:خالد.. وديمة:عموووه هذا خالد..حياك.. خالد(يدخل):السلام عليكم.. وديمة:وعليكم السلام.. خالد:تتكلمين في التليفون؟ وديمة:اي.. خالد:انزين..خلاص لخلصتي تعالي لي الغرفة.. وديمة:لحظة..هذي عمتي نجلاء.. خالد(دخل وقرب منها):لا نجول في التليفون.. نجلاء:قولي له نجول بعينه..خل يحترم نفسه..تراني عمته.. خالد:عطيني اياها..السلام عليكم.. نجلاء:وعليكم السلام..شنو نجول..شو شايفني خدامتك ولا اصغر عيالك؟ خالد:بل بل بل..كلتني بقشوري..ايش دعوة عاد سابج انا..نجلاء زين.. نجلاء:اي جي زين.. خالد:صج ماعندج سالفة..اخبار عمي جبر؟ نجلاء:عندك رقمه اتصل فيه وأسأل عنه.. خالد:انتي الواحد مايقدر يحاجيج..اشلون متحملينج؟ نجلاء:انت ماتعرف قيمتي..فديت اللي يعرفون قيمتي.. خالد:ماعندهم سالفة.. نجلاء:مع انك خسرتني..بس بقولك شي.. خالد:خير؟ نجلاء:يااخي انت ليش ماتطلع وديمة وتوديها مكان تغير جو..مسكينة هالبنت مالها حد..وانت بس تروح تستانس مع ربعك وهي شو تسوي بروحها؟ خالد:هي اشتكت لج؟ نجلاء:لا.. خالد:عيل مايخصج..انزين..انا مو محتاج نصيحة من حريم..سلمي على عمي.. نجلاء(عصبت):مابوصل سلامك زين.. خالد:هاج ..الحين دريت ليش عمي جبر كان متزاعل وياها..لاتطولين وياها في الهذرة..ابيج في شي.. وديمة:ان شاء الله..آلو.. نجلاء:هذا اخوج بط جبدي..عليه اسلوب اخس من جبر.. وديمة:حرام عليج..خالد طيب.. نجلاء:مالت عليه.. وديمة:لاعاد..لاتسبينه.. نجلاء:ياللا بسكر خسرتيني..ديري بالج على روحج حبيبتي.. وديمة:ان شاء الله..سلمي على عمي جبر.. نجلاء:يوصل فديتج..مع السلامة.. وديمة:مع السلامة.. راحت غرفة خالد... خالد:كنت بقولج اني بطلع ادفع فاتورة تليفوني..تيين وياي؟ وديمة(استانست):صج خالد؟؟ خالد(استغرب وناستها):اي صج..بتيين؟ وديمة:من غير ماتسألني..اكيد..قاعدة بروحي وملانه..ماصدقت انك بتوديني..على الاقل اشوف العالم بيوم الجمعة..متى بنروح؟ خالد:روحي لبسي.. وهم في المكتبة شيخة قاعدة تختار اي قلم تاخذ...وفارس واقف وياها...الا تيي وحده.... (___):مرحبا دكتور فارس.. فارس(لف صوبها):نعم؟ (__):انت مو الدكتور فارس؟ فارس:بلا.. (___):انا اللي سويت لي عملية الزايدة.. فارس:عذريني اختي مااتذكر.. شيخة(احترت على اسلوب البنت وشكلها وهي تكلم فارس هدت القلامه وقاعدة تطالعهم وتراقب فارس) (___):الظاهر انك نسيتني..انا اللي صادتني مضاعفات بعد العملية وتعبت.. فارس:المهم اختي..ليش في شي؟ (___):بغيت أسألك عن أختي..اختي تعبانة وهي..... شيخة(تضايقت ماقدرت تتحمل الموقف..هدت فارس والسلة ومشت عنه بعيد..راحت صوب المجلات والجرايد..وقعدت تدور على مجلة بس علشان تشغل نفسها بشي..انتظرت اكثر من خمس دقايق..لين ماجاها فارس.... فارس:انت وين رحتي..صار لي ساعة ادور عليج.. شيخة:......... فارس:خلصتي؟ شيخة(بعصبية):اي.. فارس:انزين خلاص نروح نحاسب.. شيخة:عطني سويج السيارة مااقدر اوقف في الزحمة.. وراحت قعدت بالسيارة تنتظر فارس...طلعت تليفونها..حصلت مكالمات لم يرد عليها...حصلت رقم نجلاء..اتصلت فيها.... شيخة:السلام عليكم.. نجلاء:وعليكم السلام..انت وينج فيه ليش ماتردين علي؟ شيخة(بضيقة):خالتووه انا وايد متضايقة.. نجلاء:بسم الله عليج من الضيقة..شو فيج؟ شيخة:مااقدر اقول شي الحين..بس تكفين ادعي لي.. نجلاء(خافت عليها):شيخوه خرعتيني..حد فيه شي؟ شيخة:لا الكل بخير.. نجلاء:انت فيج شي..تعبانة؟؟ البيبي بخير؟ شيخة:انا بخير.. نجلاء:حلفت عليج تقولين شو فيج.. شيخة:متزاعلة وياريلي.. نجلاء:خرعتيني..شو فيكم؟ شيخة:بعدين بقولج..كاهو ييه بسكر....ان شاء الله مع السلامة.. فارس(يقعد):كنتي بتشترين مجلات ليش ماشريتي؟ شيخة:بس جذي.. فارس:ايش عندج قعدتي في السيارة وماانتظرتي نروح جميع.. شيخة:جذي.. فارس(انتبه ان فيها شي..شغل السيارة):شيخة اشفيج؟ شيخة:مافيني شي..تحرك خلنا نرد البيت.. فارس(خذ رويس علشان يطلع من الموقف):شيخة..انت تعبانة؟ شيخة:لا.. فارس:عيل اشفيج..كنتي في المكتبة عادية.. شيخة:تغير مزاجي فجأة.. فارس:ايش دعوة حبيبتي..تخشين عني؟..مو انا زوجج..قولي لي اللي في خاطرج.. شيخة:ماعندي شي اقوله.. فارس:أخاف هذي هي بداية اثار الحمل عليج؟ شيخة(عصبت):لا..لاتحاتين زين.. فارس(استغرب):شيخة اشفيج معصبة؟ شيخة:ماابي..(بدت تصيح) فارس(اخترع عليها):بسم الله الرحمن الرحيم..حبيبتي اشفيج..تعبانة ولاشي اوديج المستشفى.. شيخة:لا ماني تعبانة.. فارس:عيل اشفيج؟(وقف على جنب)..شيخة قولي لي فيج شي؟ شيخة:لا..بس انا متضايقة.. فارس:متضايقة من شنو؟ شيخة:من اللي صار في المكتبة.. فارس(قعد يفكر باللي صار لين ماتذكر):وانا ايش سويت علشان تتضايقين؟ شيخة:اشلون تسمح لنفسك تتكلم وحده ماتعرفها جدام خلق الله.. فارس:مااعتقد اني رحبت فيها ولا قلت لها كلام حلو.. شيخة:ولو..ماكنت المفروض تعطيها مجال انها تكلمك..انت ماشفت شكلها وطريقة كلامها؟ فارس:هي قالت انها كانت مريضتي.. شيخة:مريضتك في المستشفى..مو في مكان عام..ولا بعد جدام زوجتك..لهالدرجة مالي مكانة عندك..على الاقل احترم وجودي معاك.. فارس(تضايق من كلامها):شيخة..مااعتقد ان اللي سويته جريمة..(كمل سواقته) شيخة:جريمة بحقي..انك قاعد تحاجي وحده جدامي.. فارس:شيخة اشفيج انت اليوم..انا اغلبية مرضاي حريم..يعني خلاص مااحاجيهم؟ شيخة:والله ياليت لو ماتعالج حريم..وتريحني..لكن مو معناته انك تعالجهم وتستقبلهم في يوم اجازتك ومعاي وبمكان جدام العالم.. فارس:لاحول ولاقوة الا بالله..شيخة استهدي بالله.. شيخة:انا تضايقت منك وايد..وماتوقعت هالحركة منك.. فارس(عصب):بس..شنو ماتوقعت هالحركة..ليش شافيتني اضحك معاها ولا قاعد اسولف معاها في خصوصياتي؟ شيخة(خافت من عصبيته) فارس:ماتحجين يامدام..رايحة جاية مكان جدام العالم..وحدة ماعندها حياء وكلمتني..اردها؟ شيخة:اي تردها ونص..وليش ماتردها..اذا هي ماتستحي انت ليش كملت معاها..جان هديتها ورحت عنها.. فارس:لا..انت شكلج اليوم وايد اعصابج تعبانة.. شيخة:انا؟!..الله يسامحك.. فارس:انت الحين تحطين عقلج بسالفة ماتستاهل.. شيخة:اي..انت زوجي وانا لازم احافظ عليك..انت كل يوم تطالع اشكال من الحريم..وانا ماادري عنهم..تبيني مااخاف عليك.. وتموا بهالنقاش الحاد..لين ماوصلوا البيت..وااول مافتح فارس باب البيت بالريموت...حس بألم فضيييع..ومسك جنبه بقو وهو متألم..ووقف السيارة وماقدر يدخلها... فارس:آآآآآآآآآآه..(رفع الهاند بريك) شيخة:فارس اشفيك؟؟ فارس:آآآي...شيخة لحقي علي.. شيخة(خافت عليه):فارس حبيبي اشفيك..قولي.. فارس:نادي لي راشد..بسرعة..نادي رااااشد.. شيخة(دموعها نزلت):الحين.. ركضت ونست ان الركض مب زين لها....دخلت الصالة وهي مخترعة على ريلها...حصلت الكل عيونهم عليها.... شيخة(تاخذ نفس بسرعة):راشد..راشد وين؟ الكل خاف من هالجملة.... راشد(قام):انا هني..ايش صاير؟ شيخة:الحق علي ياراشد..فارس تعبان.. راشد(اخترع):وينه؟ شيخة:بالسيارة..تكفى..(تصيح) راشد ركض وراح وراه تميم وعيسى وسلطان وطلعوه من السيارة...ودخلوه البيت... راشد:وين يعورك قولي.. فارس(بألم حاد):ماادري..يمكن كليتي..آآآآآآآآآآي.. راشد:لازم نوديك المستشفى.. فارس:ماابي..عطني اي شي..آآآآي.. راشد:مافي شي اسمه عطني شي..قوم تميم ساعدني خلنا نوديه المستشفى.. عيسى:يبه خلنا نتصل بالاسعاف احسن..عمي شكله وايد تعبان..واخاف نتأخر بهالزحمة.. راشد:خلاص اتصل بالاسعاف.. فارس:آآآي..لحقوا علي.. شيخة تأثرت بشكل فارس وهو متألم ودمعته نزلت من الالم..خافت عليه وصارت تصيح..جاتها الجوهرة... الجوهرة:تطمني ان شاء الله ماعليه شر.. شيخة(راحت بحضنها) وهم رادين البيت....في السيارة.......... وديمة:ذبحتني ريحة الفطاير..ولي سلمك خالد قوله يسرع.. خالد:علشان الاكل..ماني قايله..صبري شوي.. وديمة:انزين قبل لنرد خله يمر الدكان.. خالد:وايش تبين من الدكان؟ وديمة:ابي اشتري مشروب غازي.. خالد:غازي ولاشريف..ماعندي هالاشياء.. وديمة(ماعجبها الحجي):انزين عصير.. خالد:من المعصرة؟ وديمة:اي شي..المهم عصير.. خالد:ترى يمكن اللي بيعصر الفاكهة ماغسل يده يوم طلع من الحمام..ولا يمكن حاط ايده بخشمه وعقب عصر لج..ولا يمكن حك لحيته ولا راسه.... وديمة(تلاع جبدها):ووووع..الله يسامحك..لوعت جبدي..افف..كلام يسم البدن..حتى العشاء ماابيه..كل هالوصاخة هناك؟ خالد:أكثر..تبين اقول بعد؟ وديمة:لا تكفى لاتكمل..خلاص نشرب لبن ونتوكل على الله.. في المستشفى.... راشد:عيسى يبه روح خذ هالروشته وجيب الادوية.. عيسى:ان شاء الله يبه.. دخل راشد الغرفة.... الدكتور:ماعليك شر يادكتور فارس..أزمة وتعدي ان شاء الله..لازم تهتم بصحتك عدل من اليوم ورايح..وحاول تشرب وايد..يمكن يساعد هالشي على خروج الحصى من الكلية.. فارس(بتعب):بس يادكتور بتطول السالفة؟ الدكتور(ابتسم):يبيله صبر يادكتور..انت دكتور وأدرى بهالشغلات.. راشد:دكتور فارس قدها وبيتهم بصحته..وانا موجود معاه.. الدكتور:ياللا حمدلله على السلامة..وباجر تقدر ماتداوم خذ لك راحة..بعطيك ورقة اجازة مرضية..مع السلامة.. فارس:مع السلامة.. يرن تليفون راشد.... راشد:السلام عليكم.. ام راشد:وعليكم السلام..أخبار فارس؟ راشد:فارس بخير يمه.. ام راشد:ايش عنده ايش قاله الدكتور؟ راشد:مافيه الا العافية..بس كان عنده حصى بالكلى.. ام راشد:بسم الله على ولدي..وهو اشلونه الحين؟ راشد:بخير الحمدلله..والدكتور عطاه ادوية وان شاء الله نص ساعة ولا ساعة بالكثير ونكون عندكم.. شيخة(بدموعها):تكفين ياعمتي خليني اكلمه.. ام راشد:راشد يمه هذي شيخة تبي تكلمك.. شيخة:بوعيسى..اشلون فارس؟ راشد:فارس بخير الحمدلله..كاهو جدامي..مافيه الا العافية.. شيخة:اقدر اكلمه؟ راشد:أكيد..لحظة شوي..فارس.. فارس كان مشغول بالحجي وياابوه... فارس:نعم؟ راشد:هذي شيخة تبي تكلمك.. فارس:عطني اياها..آلو.. شيخة:فارس(تصيح) فارس:شيخة يبه لاتصيحين..انا بخير الحمدلله.....صدقيني انا بخير.....قالي عندك حصى في الكلية......تطمني....ان شاء الله شوي وبعد وبنرد البيت.....أكيد...ماابي ارد البيت واشوف دموعج..انت لازم تهتمين بصحتج....انزين..ياللا يبه مع السلامة.. واول ماوصلوا البيت..فصخت وديمة عباتها...وغسلت يدها وفتحت كيس الفطاير..وجابت اللبن والشطة..وقعدت.... خالد:على الاقل غيري ملابسج.. وديمة:مافيني..يوعانة..ياللا تعال ناكل بعدين غير ملابسك..حياج جدتي.. الجدة:مشكورة يمه..مااقدر آكل هالاكل هالحزة..عليكم بالعافية.. خالد(فصخ الغترة وغسل ايدينه وقعد معاها ياكل):وليش قاعدة على الارض؟ وديمة:جذي انا حرة ومرتاحة..خاطري اغير.. خالد:والله امرج غريب.. وديمة:ياسلام على الجبن..يتمدد..يممممي.. خالد:كلي وانت ساكتة..اول مرة تاكلين؟ وديمة:اقول جدتي..أخبار خالي..مو جنه طول.. الجدة:بلا يايمه.. خالد:ماقالج متى بيرد؟ الجدة:يقول يمكن يوم الاثنين يرد.. يدخلون البيت...والكل واقف ويكون في استقبالهم..وسلموا على فارس وتحمدوا له بالسلامة....وقعدوا.... فارس:عيل وين شيخة؟ شيماء:توها من شوي وديتها غرفتها.. فارس:ليش؟ شيماء:من الصبح هي قاعدة وتحاتي وشكلها تعبانة..فرحت وياها الغرفة علشان ترتاح.. فارس(قام):انا بروح داري.. راشد:بساعدك.. فارس:لا اقدر بروحي..(حس بدوخة) راشد(مسكاه):ماتقدر بروحك..الابر مدوختك.. ودق باب الغرفة..وقعد ينادي علشان شيخة تلبس شيلتها.. فتحت لهم الباب...ودخل فارس ورقداه راشد على السرير وطلع...راحت له شيخة.... شيخة:حمدلله على السلامة.. فارس:الله يسلمج..عيونج منتفخة.. شيخة:من خوفي عليك..اشلونك الحين؟ فارس:بخير.. شيخة:ايش قالك الدكتور؟ فارس:مثل ماقلت لج..حصى بالكلية.. شيخة:قول والله ان هذا اللي فيك.. فارس(شاف الدموع المتجمعة في عيونها انكسر خاطره):والله هذا اللي فيني.. شيخة:وشنو العلاج؟ فارس:عطاني ادوية..وموصيني على المشي..واشرب وايد.. شيخة:الادوية انا اللي بعطيك اياهم بنفسي..والمشي بمشي معاك وبرافجك..والشرب مقدور عليه..المهم ترد لصحتك وعافيتك.. فارس:المشي ماتقدرين عليه..مب زين انت باول الاشهر..بحاول ادور على حد يرافجني.. شيخة:تبي اجيب لك شي؟ فارس:اي..بغيت ماي.. شيخة:من عيوني.. فارس:وجيبي لي بيجامتي.. شيخة:ان شاء الله..(وهي رايحة تلف صوبه وهي منحرجة)...فارس.. فارس:عيوني.. شيخة:أنا آسفة على الكلام اللي قلته.. فارس:انسي الموضوع.. في يوم جديد..أول أيام الاسبوع للدوام...في برج كل من محمد وأحمد...محمد يطلع من مكتبه ومعاه ملف..دخل مكتب أحمد... محمد:السلام عليكم.. أحمد:وعليكم السلام..هلا والله بومحمد..حياك.. محمد(يقعد):اشلونك؟ احمد:طيب الله يعافيك..انت اشلونك؟ محمد:بخير..ممكن توقع لصاحب هالملف.. أحمد(شاف الملف):اوقع ليش لا..محمد.. محمد:نعم.. احمد:أبي اكلمك في موضوع.. محمد:قولي وكلي اذان صاغية.. احمد:لا مب هني..خلها برع الشغل.. محمد(حس ان احمد يبي يقول شي مهم وهالشي مب من عادته):وين؟ احمد:ايش رايك اعزمك على الغداء ونسولف.. محمد:السالفة فيها عزيمة..ماتتفوت..بس انا ماعدت عزابي.. احمد:مو زوجتك بالجامعة؟ محمد:بلا.. احمد:متى تخلص؟ محمد:3 ونص.. احمد:خلاص نطلع وحدة ونروح نتغدى بمطعم قريب الجامعة..وعقب خذ زوجتك..ايش قلت؟ محمد:صار..(يقوم) احمد:وين؟ محمد:وراي شغل.. احمد:أخبار رفيجك؟ محمد:من رفيجي؟ احمد:اللي معاك بالمكتب؟ محمد:هذا رفيجي..تراك اهنتني.. احمد:لهالدرجة.. محمد:روح يامعود..ماانت حاس فيني..خلها على الله..مع السلامة.. احمد:مع السلامة.. الحمدلله تطمنا على صحة ام عبدالله..بس اللي ماعرفناه شنو سبب طيحة ام عبدالله؟؟؟؟ وعلاقة شيخة وفارس هل بتتغير ولا بتم مثل ماهي؟؟؟ وعملية شيماء متى بنحضرها؟؟ وياترى أحمد ايش عنده شالي يبي يقوله؟؟ وشالجديد في حياة فهد؟؟ | ||||||||
|
| |
 |
| الكلمات الدلالية (Tags) |
| أميرة, ملونه, للكاتبة, مكتملة, النهج, حياة |
| أدوات الموضوع | |
| انواع عرض الموضوع | |
|
|
3Likes
.png)
العرض العادي
