14-12-13, 06:11 PM
| #1 | ||||||||||
| نجم روايتي ومشرفة سابقة وفراشة متالقة بعالم الازياء  
|  نهر حبك الكاتبة / نهر حبك / مكتمله [TABLE1="width:100%;background-color:skyblue;border:5px solid crimson;"]  الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته كيفكم اعضائنا وزوارنا الكرام نقدم لكم باقة من روايات بحرينيه بمناسبة اليوم الوطــنــي لدولة البحرين الشقيقه نتمنى لكم قراءة ممتعة ومسليه .gif "Eh S(7)")  [/TABLE1] | ||||||||||
|  |
|
14-12-13, 08:11 PM
| #2 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الأول نزلت الطيارة أرض البحرين و نزلت معاها دمعة من خد مريم تعبر عن كل الآلام و الأحزان التي تحملها مريم بقلبها .. وقفت مريم تنتظر أغراضها و شافت من بعيد خالها أحمد ياي و معاه هنادي بنته و رفيج مريم الروح بالروح .. هنادي و هي تحضن مريم: هلا و الله مريووم هلا حبيبتي و الله اشتقت لج .. البحرين كانت مظلمة بدونج أحمد: هلا بنتي مريم شلونج ؟ أذتنا هنادي يوم رحتي مريم: حتى آنا اشتقت لكم وااايد و اشتقت حق البحرين و أهلها أحمد: يالله سبقوني السيارة و آنا آييب الأغراض و ألحقكم مريم و هي تمشي مع هنادي برع المطار: شلون يدي و يدتي ولهت عليهم وايد؟ هنادي: و الله كلهم بخير مشتاقين لج و يسلموون عليج .. انتي شلونج ان شاءالله أحين أحسن مريم: و الله شاقولج يا هنادي خليها على الله آنا ما صدقت أيي هنيه شقد حسيت بالغربة هنادي: انسي اللي صار خلاص حاولي تبدين صفحة يديدة اللي صار صار و ما راح تفيدج الذكريات مريم: أحاول ان شاءالله ركبوا مريم و هنادي السيارة رايحين محرق صوب بيت يد مريم مريم ربت من و هي صغيرة ببيت يدها و يدتها من صوب أمها و تحبهم حب كبير .. و هناك تسكن مع يدها و يدتها و أمها. و بيت خالها أحمد يصيرون جيرانهم مرته منيرة طيبة و حبوبة و عندهم طلال و عمره 23 سنة متخرج من أمريكا و يشتغل ببتلكو ، هنادي و هي بعمر مريم 20 سنة و رفيجتها الروح بالروح. نزلت مريم من السيارة و راحت ركض في حضن يدها و يدتها تسلم عليهم مريم وايد متعلقة فيهم و بعادها عنهم ما كان شي سهل عليها .. اشتاقت لهم وااااااااااااااايد ، و عقبها سلمت على مرت خالها منيرة و طلال. تعشت مريم و قعدت مع أهلها شوي عقبها ردوا بيت خالها بيتهم و هي ركبت فوووق غرفتها .. بدلت ثيابها و سكرت اليت تحاول تنام .. نزلت دمعة من خدها .. غمضت عينها و قعدت تسترجع شريط ذكرياتها أمينة: مريم مريمي قومي يما قومي بسج رقاااااااد مريم: يمة خليني أرقد .. أمس راقدة متأخر أمينة: قومي يما يقولون أساميكم نزلت بالجراااايد .. قومي بسرعة خل نروح المنتزه نييب الملحق مريم و هي تفز من نومها: والله !!! زين يما ثواااني آغسل و آلبس دفتي و انا يايتج نزلت مريم ركض عالدري من عقب ما غسلت و لبست عباتها .. أمينة هي أم مريم ربتها مع يدها و يدتها من يوم هي صغيرة .. متعلقة بمريم وااااايد و مريم تمووت فيها .. و علاقتهم ببعض وايد قوية بو أحمد يد مريم: ها بنتي وين نازلة ركض من صباح الله خير حتى ما سلمتي علييي؟ مريم و هي تحب راس يدها: آسفة يدي بس مستعيلة تقول امي النتيايج طلعت و انا بروح معاها بسرعه ااييب الجريدة بو أحمد: يالله عيل بنتي روحي و بشرينا موفقة ان شاءالله ركضت مريم للسيارة وين ما أمها تنطرها و راحوا المنتزه و شروا الملحق مال أسامي الثانوية العامة و على طوووول مريم ادور اسمها مريم: باركيلي يما باركيلي يبت 94.4 الأم: مبرووك يما مبرووك و الله الفرحة مو شايلتني مريم و هي تحضن أمها: و لا آنا يما يالله نرووح البيت عشان آبشر يدي و يدتي .. و ي تعالي خل آشيك على هنووود الأم: جم يابت مريم: كاهي يابت 96 غلبتني وصلت مريم البيت و شافت هنادي فويها هنادي: مبروووك و أخيرا خلصنا و افتكينا .. احسه هم و انزاح مريم: ايه سكتي وين يدي و يدتي ببشرهم أم أحمد: مبروووك يما مريم قالت لنا هنوود عن نتايجكم و الله بيضتوا الويه مريم: الله يبارك فيج يدتي أبو أحمد: وينها الريم الغالية و الله رفعتي راسنا و مر اليوم سريع على بيت بو أحمد و أحمد ما بين التهاني و التبريكات و الكل كان مستانس حق مريم و هنادي النجاح الكبير اللي حققوه .. و خالهم أحمد وعدهم بهدية حلوة تستاهل النسبة اللي يابوها مريم كانت انسانة هادية و رقيقة .. جمالها هادي .. عيونها بنيات ناعسات و رموشها طوال .. لونها حنطي و تميزها حبة الخال "الشامة" اللي فوق شفاتها من جهة اليمين .. طولها متوسط و جسمها مناسب طولها بس متروس شوي .. شعرها بني قاصته مدرج ليج جتوفها هنادي كانت فيها شبه طفيف من مريم .. نفس لون العيون البنيات.. بس هنادي كانت اطول عن مريم و أضعف منها .................................................. ................................... في مكان ثاني مب بعيد وايد عن البحرين و بالتحديد في الامارات شمسة كانت قاعدة ببيتهم ملانة سرحانة و تلعب بشعرها و تطالع التلفزيون صار لها اسبوعين من خلصت الثانوية و طلعت النتايج و هي كله قاعدة ما عنده شي تسويه على الاقل قبل لاهية بالدراسة بس الحين تحس بالملل فزت شمسة من سرحانها على صوت التلفون و ركضت ترد عليه شمسة: ألو نورة: هلا و الله هلا بالقلب شمسة: ههههههههه الله يقطع سوالفج من بنت شحالج غناتي وينج ما تنشافين ؟ نورة: إلا يالسة فالبيت ملل من بدت الاجازة و انا كله قاعدة بالبيت و هالاخوان ما منهم فايدة خص خلفووه اسبوع صارلي احن عليه ابيه يوديني المول و هو كل يوم باجر و باجر شمسة فز قلبه من سمعت طاري خليفة و تمت ساكتة و قلبها ييدق نورة: حوووووو وينج اكلمج صارلي ساعه شمسة: ها شقلتي؟ نورة: مو منج من القلب شمسة: جب عاااد اونه القلب .. انزين شرايج تييين بيتنا .. ملييت و الله من مجابل الطوف نورة: و الله ما ادري بشوف امي جان بتخليني شمسة: خلاص عيل اترياج نورة: وداعة الله شمسة بنت عمرها 18 سنة حلوة بمعنى الكلمة بشرتها بيضة شعرها أسود صابغتنه بخصل حمرة يوصل لين آخر ظهرها طويلة و جسمها مرتب .. عيونها سود وسيعة .. عندها 3 اخوان محمد و عمره 24 متزوج و عايش مع مرته في دبي، فهد و عمره 21 يدرس في أمريكا، راشد و عمره 15 و هو و شمسة الوحيدين العايشين بالبيت مع امهم و ابوهم بحكم ان محمد بدبي و فهد بامريكا و ان رجع بالاجازة كله مع ربعه برع .. شمسة من يوم و هي صغيرة وعت و هي شبه محيرة حق ولد عمها خليفة .. و بحكم هالشي ربى حبها بقلبه و كانت تمووت فيه .. بس خليفة كان لاهي بعالم ثاني و لا داري عن هواها .. أو بالاحرى يدري بس مطنشنها و ما كان يحس بحب تجاهها نورة تصير بنت عم شمسة و ربيعتها الروح بالروح ما تفارقوا من يوم هم صغاار، نورة بنفس عمر شمسة، مرحة و حلوة، عندها من الاخوان خليفة و عمره 23 و يدرس بجامعة البحرين تخصص هندسة معمارية و باقي له سنة و يرجع سلطان و عمره 20 و يدرس مع فهد بأمريكا و بحكم انه اصغر من فهد فهو لاحقة بسنة بس يدرسون نفس التخصص كمبيوتر و سيف و عمره 16 بثاني ثانوي و فاطمة و عمرها 12 سنة. | |||||||||
|
| |
|
14-12-13, 08:12 PM
| #3 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثاني فجأة انفتح باب الغرفة بقوة و نقزت مريم من مكانها و لفت تطالع مريم: هنوود و ويعة , أحد يدش جذيه خرعتيني هنادي: هههه أفا عليج بنت العمة ما عاش من يخرعج بس جي حبيت اسوي حركة اتخيفف دمي مريم: زين يا خفيفة الدم شعندج اليوم ياية متاخرة ، نطرتج مساعه يووم ما ييتي قلت اروح فووق حتى اتصلت بس ما رديتي هنادي: لا بس عقب الغدا رحت اتمدد لقيت عمري راقدة .. أقولج البنات يقولون التسجيل حق الجامعة بدا .. لازم انروح انا و انتي بعد عشان انلحق نسجل بالتخصصات اللي نبيها مريم: انزين بنشوف احد يودينا باجر بس قوومي من وقت مو تنخمدين .. هنادي: لا بقوم ان شاءالله من وقت و اتصلي انتي بعد قعديني مريم: يصير خير .. خالي و امج يو هنادي: ايه كاهم قاعدين تحت مع عمتي و يدي و يدتي مريم: قومي خل نحول تحت نقعد معاهم نزلوا مريم و هنادي تحت و قعدوا يسمعون سوالفهم و يشاركون معاهم بالسوالف .................................................. ........ في بوظبي بالتحديد في حجرة خليفة نورة قاعدة اتزن عليه عشان يوديها بيت عمها بس خليفة ما كان متفيج لها خليفة: يا بنت الناس اذيتينا قلت لج اليوم مشغوول باجر ان شاءالله بوديج نورة: صار لك اسبوع كل يوم باجر و باجر .. و انا واعدة شموووس اروح لها من كم يووم .. و كل مرة يصير شي و ما أروح .. خليفة: شلي سيفوه و روحي مع الدريول نورة: الدريول امي شلته سارت كارفور .. يالله عاد الله يخليك بسوي لك اللي تبي .. بعدين لا تنسى بتشوووف ناس .. و غمزت له خليفة: قومي ذلفي .. قالت ناس .. مالت عليج انتي وياها زين نورة: حرام عليك و الله .. انت تدري شمووس شكثر تحبك خليفة: كا انتي قلتيها تحبك هي تحبني مو انا نورة: و شناقصها ان شاءالله عشان ما تبغيها ؟ و لا حاط عينك على وحدة من ربيعاتك مال التلفون؟ خليفة: لا حاط عيني و لا شي .. شمسة ما عليها قصووور حلوة و مؤدبة بس ما تناسبني .. انا ابي اتزوج وحدة على ذوقي .. بعدين احس شمووس مثل اختي .. ما اتخيلها زوجتي نورة: انت تدري انكم محيرين لبعض .. و هي بنت عمك و مالك غيرها خليفة: ذلفي من ويهي احسن نورة و هي تطلع من الغرفة: تدري اصلا شموس خسارة فيك .. ما تستاهلها عصب خليفة من كلام نورة بس بالاخير قال هذي وحدة هبلة .. قام يتسبح و يبدل ثيابه عسب يطلع مع ربعه ....... في بيت بو محمد التلفون يرن و يرن و البيت هدوء و محد طلع يرد عالتلفون .. رد التلفون يرن مرة ثانية و هالمرة طلع راشد و هو يتأفف: ألو نورة: هلا رشووود ش الاخبار؟ راشد: راشد لو سمحتي .. أًصغر عيالج انا ؟ نورة: لا أكبرهم روح ناد شمووس راشد: أوهو اتصلي فيها عالموبايل نورة: اختك يحليلها مبتدئة توها متعلمة عالموبايل الظاهر للحين ما تعودت عليه اتصل كله مغلق راشد: اوووف نورة: لا تتأفف روح نادها يالله ترك راشد سماعة التلفون و طنش نورة و راح يكمل لعب البلاي ستاشون و لا جنه نورة قاعدة تتريا نورة هاي اكيدة رشوود سواها كالعادة و طنشني معليه انا براويه السبال و توها بتسكر التلفون إلا و صوت شمسة: ألو نورة: تو الناس جان اتريتي بعد نص ساعة شمسة: بسم الله شفيج كلتيني .. آنا أصلا طالعة بالصدفة و شفت السماعة محذوفة رفعتها جان اسمع صوتج نورة: يعني السبال رشوود ما خبرج اني متصلة صار لي ساعة انتظر شمسة: لا و الله محد خبرني .. انزين خبريني شخبارج؟ نورة: و الله ملانة محد راضي ييبني عندج شمسة: أفا ليش عااد نورة: امي شلت الدريول كارفور و خلووف اون بيسير عند ربعه .. أقولج دقاقيق خليفة يناديني بشوفه و برد لج شمسة: فمان الله خليفة: نوروه و صمخ نورة: ها خير حشرتنا خليفة: يالله بدلي ثيابج بسرعه بوديج عند شمسة قبل لا اسير عند ربعي نورة: فديتك و الله أدري انك طيب فديتك و ما أهون عليك خليفة: خلي عنج هالرمسة و دهان السير مالج و سيري بدلي بسرعة بترياج في السيارة خمس دقايق ان تاخرتي انسي اوديج نورة و هي تركض: ياية ياية ضحك عليها خليفة و هو نازل الا و سيف بويهه سيف: شو بتطلع مع نوروه؟ خليفة: حشرتني بوديها بيت عمي سيف: خلاص بسير وياكم بدق لراشد بقوله بييه راحوا سيف و خليفة السيارة و عقب دقايق يتهم نورة و راحوا ثلاثتهم بيت عمهم ....... شمسة كانت قاعدة بالصالة تطالع مسلسل حكم البشر اللي كانوا يعيدونة بقناة دبي فجأة سمعت الباب يدق و راحت البشكارة تفجه نورة: السلام عليكم شسمة و هي تقوم من مكانها تسلم على بنت عمها: هييييه نوروه هلا و الله هلا ما بغيتي تييني نورة: هيه سكتي يوم سكرت عنج كان خليفة يزقرني عشان ايبني عندج شمسة: شفتي انه طيب و حنون نورة: فجي عني لاه اونه طيب و حنون انزين اقولج وين راشد اخوج سيف يترياه برع شمسة و هي تلبس شيلتها: روحي زقريه خل يركب لراشد غرفته دخل سيف و راح لراشد فوق غرفته كالعادة قعدوا يلعبون بلاي ستيشون عقبها راحوا يتمشون برع , و نورة و شمسة قعدوا فوووق يسولفون عقب ياتهم شيخة جيران بيت شمسة و كملوا سوالفهم معاها .................................................. ..... في محرق بالتحديد بيت مريم كلهم قاعدين تحت يشربون شاي و يسولفون هنادي: يبا بوطلال: خير بنتي شعندج ؟ هنادي: يبا بغينا حد يودينا الجامعة انا و مريوم باجر .. لازم نروح ناخذ أوراق التسجيل عشان نلحق نسجل بوطلال: خلاص بنتي باجر ان شاءالله استاذن من الدوام و اوديكم جم هنادي و مريم عندي انا مريم: تسلم خالي الله يخليك لنا ان شاءالله أمينة: شحقة أخوي تتعب عمرك خلك بالدوام انا فاضية باوديهم باجر بوطلال: الله يهديج وين تروحين لي لصخير بروحج أمينة: إلا حذفت حصاة بوطلال: لالا خلج مرتاحة انا بوديهم أو بشوف طلال .. أم أحمد: طلالوه ذي هاللي ما يستحي وينه من زمان ما يه يسلم عليي، و هاي و بيتكم مني الا يمنا عيل لو بعيد شسوى ؟؟ بو أحمد:شباب يا أم محمد شتبين فيه اكيد لاهي ويا ربعه بو طلال: و لا يهمج يمه اليوم انا احاجيه و اخليه ايي يسلم عليج بو أحمد: يالله يبا أحمد كا الاذان قوم خل نروح نصلي في المسيد و قاموا بو أحمد و أحمد المسيد يصلون و منيرة ردت بيتهم و ام أحمد و امينة دشوا حجرهم بينما هنادي و مريم راحوا فوق و في حجرة مريم عقب ما صلوا البنات هنادي: مريوم شالتخصصات اللي بتحطينهم غير الهندسة لازم تحطين ثلاث اختيارات مريم: ما ادري و الله بروحي اخافهم ما يقبلوني هندسة، بشوف يمكن احط بعد علوم كمبيوتر و إدارة هنادي: وع ادارة عاد؟ مريم: شسوي بحطه اختيار ثالث، و انتي شبتحطين؟ هنادي: انا بروحي محتارة بين ادب انجليزي و قانون، بصلي استخارة و اشوف شبيصير و بحط علم نفس اختيار ثالث مريم: انزين شرايج نروح محل الفيديو هنيه اللي يمنا خل نييب فيلم هيرتك روشن وايد حلو هنادي: أي واحد مريم: Main Prime Diwane Hoon يقولج ينن هنادي: انزين بنستاذنهم و بنروح عشان نشغله من وقت باجر و رانا قعده مريم: أوكيك يالله .. بس باتي عندنا اليوم هنادي: لالا بشوف الفيلم وياج عقب بارد بيتنا عشان اتلبس و جي الصبح مريم: انزين عذووور و فطووم تدرين شبيسجلون هنادي: لا و الله اكيد بنشوفهم باجر مريم: شاحساسج و انتي جريب بتدشين الجامعه , انا بصراحة خايفة حياة يديدة و جذي هنادي: بشتاق حق سوالف المدرسة و الله، انزين هدي عنج الهذرة و قومي ننزل تحت أكيد بيحطوون العشى أحين مريم: يالله | |||||||||
|
| |
|
14-12-13, 08:12 PM
| #4 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثالث اليوم الثاني الساعة سبع الصبح قامت مريم على صوت المنبه و هي ميتة رقاد بس مضطرة تقوم .. اتصلت في بنت خالها هنادي و حصلته مغلق مريم: أوووف هاذي ما بتهد عنها الربادة و الكسل ما ادري اروح اكفخها محذرتها أمس مليووون مرة قامت مريم بكسل غسلت و تسبحت و اتصلت فبيت خالها منيرة: هلا مريم: هلا خالتي صباح الخير .. شلونج منيرة: بخير حبيبتي و انتي شخبارج ؟ مريم: الحمدلله .. الا خالتي معليج امر بس معليه تنادين لي هنادي تلفوونها كله مغلق منيرة: هنادي توها طلعت يايتج مريم: و الله! ما شفتها .. خلاص عيل خالتي بشوفها انا سلمي على خالي منيرة: فمان الله نزلت مريم الصالة و ما لقت حد دخلت المطبخ الداخلي لقت يدتها قاعدة تسولف مع الخدامة و معاها هنادي متلبسة و متكشخة حق الجامعه هنادي: حلفي انتي قبل امس الف مرة قايله لي ابرز من وقت و انتي للحين ببجامتج؟؟! مريم: يالله صباح خير .. الناس تسلم شي و انتي موول سيدة قولي السلام عليكم صباح الخير دشت مريم و باست يدتها على راسها مريم: يدتي الا وين امي؟ أم أحمد: أمج يا بنيتي راحت مع يدج الدختر عنده فحوصات اليوم مريم: بس تو الناس يدتي توها 8 الا ربع أم أحمد: يدج تعرفينه حنان من قعد من صباح الله خير سندر راسنا يبي يروح .. هنادي: يحليله يدي صاج احسن يروح من الصبح لا يطوفه الموعد طلعت أم أحمد و راحت الصالة تقرى قرآن أما مريم و هنادي تموا يالسينت في المطبخ يتريقون مريم: انا قعدت الساعة 7 و اتصلت فيج كان مغلق . عبالي للحين راقدة هنادي: لا حبيبتي انا قاعدة من 6 اليوم بس موبايلي كان عالجارج توني من شوي فتحته مريم: يالله اناا بعد متسبحة بس ببدل دقايق و خلاص .. إلا من بيودينا هنادي: طلووول ابوي قاله يودينا .. قال الساعة 9 تقريبا بيستاذن و بيينا مريم: يالله عيل انا بروح فوق ببدل و باييج ننطره تحت ركبت مريم حجرتها و لبست تنورة وردية فاتحة مع بدي كت وردي و فوقه قميص واسع ابيض .. لبست شيلتها البيضة اللي فيهل تطريزات ورود خفيفة بالوردي .. و لبست نعالها و شنطتها البيض .. حطت مسكارا و قلووز و نزلت تنتظر طلال تحت مع هنادي .................................................. ......................... في العاصمة الحبيبة بوظبي خليفة كان قاعد ويا امه يسولف و يت نورة و انضمت لهم أم خليفة: ها ولدي شقلت ؟؟ بتودينا او نخلي الدريول يودينا نورة: وين؟ خليفة: أمج تبى تسير العين تبي تسير ععربها يومين و ترد نورة: و ليش ما تسيرين مع ابوي أم خليفة: أبوج سار ليوا اليوم .. و اليوم عرس بنت زبنة و عازمتنا و فشلة ما نسير خليفة: لا أمايا أنا بوديج وين تسيرون مع الدريول أم خليفة: خلاص فديتك عقب الغدا جي بنظهر .. خليفة: خلاص عيل انا اترخص امايا فمان الله أم خليفة: فمان الكريم .. نورة: أمايا متى بتردين؟ أم خليفة: اترخصت من ابوج ببات يومين ببيت خالتج من زمان ما شفناهم نورة: بسير معاج أم خليفة: وين تبين تروين بويهج عرس الناس .. استريحي مكانج نورة: و الله حرام امايا من بدت الاجازة ما ظهرنا مكان .. عنبوو سجن .. أم خليفة: ما شي قلت لج استريحي نورة: انزين امايا ما بروح العرس بسير بيت خالتي من زمان ما شفت فطووم .. فديتج امايا و الله مليت أم خليفة: خلاص هدي عنج الرمسة الزايدة بشاور أبوج بس خبري فاطمة بعد تيي ويانا محد بيتم فالبيت نورة: فديتج امايا ان شاءالله و فهوود أم خليفة: فهد سار بيت عمج من الصبح نورة: خلاص عيل أنا بروح أجهز ملابسي و أخبر فطوووم .................................................. ...................................... في جامعة البحرين مريم و هنادي كانوا يمشون باتجاه البوابة رايحين السيارة و كل وحدة شايلة بيدها أوراق عن التخصصات اللي بالجامعة و أشياءات تخص التسجيل عقب ما سجلت مريم هندسة اختيار اول و إدارة تخصص ثاني و علوم كمبيوتر تخصص ثالث .. أما هنادي فسجلت قانون اختيار أول .. أدب انجليزي تخصص ثاني .. و علم نفس تخصص ثالث في السيارة طلال: مريووم انتي علمي شلوون مسجلة ادارة تخصص ثاني مريم: تعرف عاد انته مو كل مرة يقبلون اول اختيار فحطيت ادارة عشان يختاروني سيدة هندسة لاني علمي هنادي: إيه عاد مريوم يازعم تتذيكى عليهم مريم: ها ها ها ما أقدر يالخفيفة طلال: بس عاد انطموا صكيتوا راسي ما يسوى عليي تقول بالعين ريديو مريم: هاي اختك الثورة سكتها هنادي: طلال حبيبي انته عاد الله يخليك لا تردنا البيت طلال: عفوا اخت هنادي وين تبين تروحين حبيبتي هنادي: أي مكان مالنا خاطر نرد البيت نبي نتغدى برع مريم: إيه و الله عفية عليك طلال انته خوش ولد خال ودنا أي مكان نتغدى طلال: الحين الساعة وحدة ولبي اوصلكم و برد الدوام هنادي: الله يخليك عاد عاد عاد ودنا السيف او الدانة طلال: انطمي و انثبري فمكانج مريم: انزين انت شخاس عليك قطنا المول بنقعد نتسوق و بننطرك لي خلصت تعال بنتغدى يميع طلال: و انا ما عندي شغلة غيركم مريم: يالله عاد طلول استو حليو و ودنا الله يخليك طلال: بس انطموا حشى وحدة تلحن و الثانية تطبل اتصصلوا بابووي اذا وافق بوديكم اتصلت هنادي بابوها و رضى انهم يروحون و وصاهم على أعمارهم وداهم طلال السيف عساس انهم يتمشون لين ما ييهم عقب ساعة تقريبا عشان الغدى راحوا هنادي و مريم يصلون عقبها نزلوا تحت يتسوقون .. اشترت مريم قميصين واحد منهم أزرق فاتح مع تنورة مقلمة بني و أزرق .. و قميص ثاني لونه أسود مورد بورود حمرة .. أما هنادي فاشترت عطر لانكوم اليديد عقبها ركبوا هنادي و مريم عند المطاعم عقب ما اتصل فيهم طلال و اتغدوا من مطعم الباستا عقبها ردوا البيت و رقدوا عقب تعب اليوم .................................................. ................................ في غرفة نورة فوق تلفونها يرن و محد يرد .. سكت و رد يرن مرة ثانية و هالمرة طلعت نورة من الحمام و ردت عليه شمسة: تو الناس نورة: الناس تسلم .. و عليكم السلام .. كنت بالحمام و توني طالعة .. شحالج؟؟ شمسة: و الله تمام .. شو بعدكم ما سرتوا العين؟ نورة: لا و الله امي قالت بنصلي و بنظهر شمسة: اها .. نورة: زين دبو بخليج احين بتلبس و بدق لج بالدرب ان شاءالله شمسة: خلاص عيل برايج فمان الله نورة: مع السلامة .................................................. ........... تحت في الصالة أم محمد و بو محمد قاعدين و معاهم بنتهم أمينة أم مريم و مرت خالهم منيرة بو محمد: قلت لج يا مرة حطي البحرين الاخبار شفيج ما تفهمين أم محمد: دش الحجرة طالع انا قاعدة انطر المسلسل بو محمد: و انتي جم مرة شايفته ذي اقولج فريه احسن لج منيرة: ههههههه عمي و عمتي ما يشبعون من المناقد أمينة: كل يوم هذاهم على هالحالة .. قومي معاي المطبخ أحسن خل نشوف العشى و عقب ما راحوا بو محمد: انتي ما تعيزين محد مخربج عليي الا هالمسلسلات اللي تطالعينهم أم محمد: وي الله يهديك هذي كله من الحياة صج بو محمد:صج انج عيوز مخرفة انتي من الصبح هذا حالج من مسلسل لي مسلسل و جان زين تطالعين خل يي نص المسلسل الا انتي راقدة أم محمد و هي تقوم: هاك الريموتات "الريموت" و فرة بروحك و قامت عنه دخلت غرفتها و تم بو محمد يحليله يعابل في الريموت و لا عرف له لين ما يت أمينة بنته و غيرت له القناة | |||||||||
|
| |
|
14-12-13, 08:13 PM
| #5 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الرابع الساعة ثمان بالليل في مدينة العين نورة قاعدة مع بنت خالتها فاطمة اللي أكبر منها بسنتين و تدرس في جامعة الامارات تخصص إقتصاد .. فاطمة: ووين ناوية تدرسين ان شاءالله نورة: انا و شمسوه حاطين التقنية اختيار اول و زايد اختيار ثاني فاطمة: و ليش ما تيين هنيه عندنا .. مجالات التخصص أوسع نورة: تعرفين هنيه سكن و حالة .. هناك اقرب و مع شمسووه فاطمة: مو شرط السكن تقدرين تسكنين عندنا نورة: تسلمين الغالية .. انزين الا مناية وينها فاطمة: اظني مع فطووم اختج تشوف وياها الرسوم .. نورة: هههههه بعدها عالرسوم هذي ما تكبر فاطمة: هذا سالفتها ما عندها الا تتهاوش مع سلوووم عالتلفزيوون نورة: اذن و لا بعده فاطمة: لا اذن يالله قومي نصلي ركبوا فوق صلوا و كلمت نورة شمسة تعشوا و عقبها قعدوا يرمسون شوي و رقدوا فاطمة تصير بنت خالة نورة عمرها 20 سنة عندها اختين منى و عمرها 17 سنة بثاني ثانوي .. سلامة و عمرها 14 سنة .. و عندها اخوين سعيد و عمره 26 متزوج و عنده بنتين شما و عايشة و اخوها الثاني مايد و عمره 23 يشتغل باتصالات العين .................................................. ........................ بعيد عن مدينة بوظبي و بالتحديد في المحرق الغالية الساعة سبع الصبح نزلت مريم الصالة و لقتها هدوء .. كانت اليوم تحس بنشاط و حيوية غير طبيعيين دقايق و انفتح باب غرفة يدتها مريم و هي تبوس راس يدتها: صباح الخير أمي العودة .. شلونج ؟؟ أم أحمد: هلا بنتي صباح النور .. الا شمقعدج من صباح الله خير ؟؟ تعبانة شي ؟ مريم: لا يدتي بس امس راقدة من وقت فشبعت رقاد و قمت أم أحمد: يالله عيل تعاي تريقي معاي دخوا مريم و اليدة يتريقوون عقبها انضم لهم بو أحمد و أمينة أم مريم و كالعادة لازم المناقد بين أم أحمد و أبو أحمد أم أحمد: بسك يا سالم ما تشبع من هالشكر .. بعدين اقعد تشكى الا السكر ارتفع و مني يعورني و مناك يعورني أبو أحمد: لي يييت لج سكري الباب فويهي و الله حلال عليها و حرام عليي أمينة: يبا أمي معاها حق الدكتور محذرك ما تكثر وايد من السكريات أبو أحمد: و آنا شسويت الا ثلاث قفاش شكر مريم: هههه بس يدي .. شوية أم أحمد: قولوله خو آنا ما يسمع مني حجوة أبو أحمد: خلاص حتى هالقطيرة ما آبي أشربها شبعت قهر مريم و هي تحب يدها: شدعوة يدي حبيبي احنا الا خايفين عليك .. جم سالم عندنا أبو أحمد: عاد انتي مريمي الغالية بنت الغالية مريم: يالله عاد عشان خاطري تريق ويانا و كاني بصب لك شاي بيدي و كملوا ريوقهم اللي كان ما يخلى من مناقد اليد و اليدة و مريم و أمها يضحكون عليهم قامت مريم و اتصلت بهنادي هنادي و صوتها كله رقاد: ألو مريم: صباح الخير لا تقولين لي للحين راقدة!! هنادي: إيه يالدبة راقدة و قعدت على صوت تلفونج مريم: صج انج متيح يالله قومي امس من امتى راقدين .. كل ذي و ما سبعتي !! هنادي: حرام عليج .. تعبانة و الله مريم: قومي عاد و الله ملانة .. تعالي و الا اقولج انا بييج الحين هنادي: انزين تعاي انطرج .. تالي بارد وياج لانه بنتغدى عندكم اليوم مريم: اها .. يالله فمان الله .................................................. ............................. في مدينة العين فاطمة و نورة كانوا متلبسين عساس بيسيرون المول مع منى و سلامة خوات فاطمة و هم نازلين عالدري وايهم سعيد .. و تغشت نورة على طوول مايد: وين سايرين؟ فاطمة: المول .. استاذنت من امايا مايد: و من بيسير معاكم؟؟ فاطمة: انا و نوير بنت خالوا و منوو و سلووم مايد: لا و الله .. ماشي سيرة بدون ريال .. ما شي شغلة تسيرون المول بروحكم فاطمة: شفيها .. احين الساعة 10 يعني الناس فالدوامات محد موجود مايد: انا قلت ماشي تبين العصر بوديكم .. احين انا مساذن ساعة و برد الدوام فاطمة: حرام عليك عاد .. شوي و بنرد سعيد: كلامي ما بعيده مرتين .. وين امايا عيل ؟؟ فاطمة و هي تاافف و تركب فوق: في المطبخ ركبيت فاطمة فوق و عقت عبانها نورة: الصراحة اخوج وغد حتى سلام ما سلم عليي و هو توه يشوفني فاطمة: مايد كله جي يستحي نورة: بس انا بنت خالته على الاقل يقول السلام عليكم فاطمة: خلج منه احين و قومي ننزل تحت .. تعكر مزاجي الصراحة .................................................. ............. في بيت بو أحمد في البحرين الكل كان مجتمع عقب الغدا بو طلال: يالله عاد جهزوا عمركم كلكم باجر بنروح مكان هنادي سيدة نطت: وين يبا بوطلال: بنروح كلنا حوار .. هدية نجاحج انتي و مريم مريم: مشكور خالي بوطلال: افا عليج عاد انتي الغالية .. تستاهلون انتي و هنادي .. بعدين من زمان ما غيرنا جو أم أحمد: إيه و الله من زمان و احنه هنيه في الحكرة بوأحمد: عاد انتي ما تيووزين تدورين من بيت لي بيت و كله ما رحتي مكان أم أحمد: الله و أكبر عليك يالظالم أحين آنا جذيه أمينة: يما ابوي يتغشمر معاج أم أحمد: آعرفه ذي أبوج ما بيرتاح الا لي كسرني مرة وحدة بينضلني الكل: ههههههههههههههههههه بوطلال: طلال يبا باجر استاذن من وقت او خذ اجازة عشان بنطلع عالعشر جذيه طلال: ان شاءالله يبا .................................................. ............................. في العين مول كانوا نورة و فاطمة يتمشون مع مايد و سلامة أما منى فما يت معاهم أونة تتابع كرتون هالوقت فسبيس تون فاطمة: دقايق بروح الحمام و بيي مايد خلاص نحن بنترياج فهالمحل بسرعة و تردين تمت نورة تحوط فمحل العطور مع سلامة و مايد معاهم .. ورى بعيد شوي عن نورة كان في 2 قاعدين يلحقونها بس هي ما كانت تدري عنهم لفت نورة صوب ثاني تشوف ماركة ثانية من العطور .. ياها واحد من الشباب و حط الرقم عدالها عالطاولة .. نورة خافت و انصدمت و تيبست مكانها ما عرفت شتسوي .. شوي سمعت صوت مايد يتضارب مع الشباب و تمت هي و سلامة واقفين بعيد شوي و هم خايفين الشباب شردوا من اييد مايد و طلعوا برع المول يا مايد صوبهم و هو معصب: يالله امشوا جدامي لا باركت فيكم انا الغلطان اللي يايبنكم هنيه سلامة: مايد شفيك؟ احنا ما يخصنا فيهم هم اللي ما يستحون مايد: هيه و انتوا بعد ما شاءالله تتفررون من مكان للثاني جنكم تسوون عرض نورة و هي منصدمة: احنا كنا نمشي باحترامنا و انت كنت واقف ورى .. و كون ان هم لحقوونا ما يعني الغلط منا مايد: مليون بنت فالمول و المحل شمعنى ما لحقوكم الا انتوا ؟؟ نورة انصدمت و ما عرفت شترد .. اول مرة تنحط بموقف مثل هذا .. عمر ما حد فاهلها شك فيها او كلمها بهالطريقة كل اللي سوتة انها انسحبت و طلعت من المحل و ركضت صوب البوابة و الدموع فعيونها و طلعت تلفونها سلامة و هي تلحقها: نوروه لحظة فمن بتتصلين؟ نورة: بتصل فأمايا بخليها تيي تشلني .. ما بروح معاه سلامة: نورة شفيج ينيتي .. محد يدري باللي صار غيرنا لا تكبرين السالفة .. لا تدخلينهم فيها سكتت نورة و دموعها عخدها و لقت ان كلام سلامة صح .. المفروض محد يدري باللي صار .. شوي يوو فاطمة و مايد في السيارة حست فاطمة ان الجو متوتر و ان في شي بس سكتت لي البيت و خبرتها سلامة بكل اللي صار اما نورة راحت فوق و تمت تصيح و ما رضت تنزل تتعشى عساس ان راسها يعورها حتى ما كلمت شمسة بنت عمها ! .................................................. ........................ | |||||||||
|
| |
|
14-12-13, 08:14 PM
| #6 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الخامس الساعة 2 بالليل الليت مسكر بس هو مو قادر ينام يتقلب مرة يمين و مرة يسار .. بس وين النوم !! مو قادر ينام مايد: يا ربي انا شسويت اليوم؟ معقولة نورة زعلت مني!! يا ربي انا بعد لما اعصب ما اشوف جدامي حطيت حرتي بالبنت.. يا رب بس ما تكون زعلت.. هي لو تدري بغلاتها عندي و شكثر غرت يوم شفتهم يغازلونها جان عذرتني.. بس احين اكيد بتكرهني عقب حركتي البايخة اليوم.. اه يا ربي شقايل اتصرف الحين.. احسن شي باجر اعتذر منها. سمعت امايا تقول انهم باجر بيردون لازم اعتذر لها لازم .................................................. .................................................. .... اليوم الثاني الصبح في البحرين الاستعدادات كانت على اكمل وجه .. الكل كان قاعد .. اللي يجهز ثيابه .. و اللي يجهز الاكل .. و غيره هنادي: أووف هذي طلالوه لازم ياخرنا .. خله اهوه يي عقب احنا بنروح الحين أم طلال: هنادي و ويعة .. شفيج ملقوفة جذيه .. يعني شفيها لو أخرنا الروحة لي الساعة 5 هنادي و هي مبرطمة: بيضيع العصر كله أم طلال: اقول انطمي و قومي حطي العصير في الثلاجة هنادي و هي تحط العصير في الثلاجة: انا بروح ارقد احسن لي أم طلال: انزين انا بروح بيت يدج هنادي: بروح معاج عيل أم طلال: توج يازعم بترقدين!!!! هنادي: هونت بروح عن مريوووم .. راحت هنادي مع امها بيت يدها سلمت على يدها و يدتها و عمتها و ركبت فوق حق مريم .. يوم دخلت لقت مريم ترتب أغراضها في الشنطة هنادي: السلام مريم: بل شفيج لايعة جبدج .. و عليكم .. السلام و الرحمة .. شفيج يا حظي هنادي و هي تقط عمرها على السرير: و لا شي بس كان خاطري نروح من وقت مريم: يالحنانة انتي .. الروحة ما بتطير مردنا ان شاءالله بنروح هنادي و هي تلعب بشعرها: عاد انتي يالباردة مريم: لا تحنين وايد الحنة مب زينة هنادي: انزين يالله خلصي بسرعه خل نحول نتريق .. ما تريقت للحين شنو ريوقكم ؟؟ مريم: أظن أمي مسوية عصيدة هنادي: اللاي يالله انا بسبقج .. و انتي لبقي براحتج مريم: رزالتج انزين نزلت هنادي تحت و لحقتها مريم و قعدوا يتريقون مع مرت خالهم و أمهم لأنه اليد و اليدة تريقوا من الصبح و طلعوا يسيرون على بيت ناس من معارفهم .................................................. ...................... في بيت بو محمد شمسة قاعدة تتصل في بنت عمها نورة بس محد يرد شمسة: غريبة شفيها ذي ما ترد و لا حتى اتصلت امس !! لا يكون لا قدر الله استوى بها شي ؟؟ بسم الله انا شفيني أفاول على البنت .. اكيد هم بخير بس الحمارة اكيد انشغلت و نستني معليه انا براويها و فجأة قطع عليها حبل افكارها صوت امها و هي تنادي عليها شمسة: هلا أماية خير شبغيتي؟ أم محمد: قومي فديتج عاونيني فالمطبخ بنسوي حلويات و فوالة شمسة: ليش منو بيينا اليوم أم محمد: محمد فديته بيظوي اليوم هو حرمته و عياله شمسة: فديته و الله .. ولهنا عليه من زمان ما يانا أم محمد: هيه فديته كلم ابوج اليوم و قال بيظوي شمسة: خلاص بس بغير ثيابي و بلحقج ....................................... في العين و في غرفة فاطمة بالتحديد فاطمة: صدقني نوروه مايد قلبه طيب بس هو عصبي شوي و لا هو مافي اطيب منه نورة: لا و الله اونه طيب .. عيل انا اسوي عرض ليش شو شايفني بنت شوارع و لا مغازلجية مثلا فاطمة: محشومة .. بس هو يمكن عصب من حركة الشباب .. بصراحة وقاحة فيه يحط الرقم عدالج نورة: فاطمة لا تدافعين عنه عشانه اخوج فاطمة: ما ادافع عنه .. خلج منه انتي الحين و نزلي كلي شي من امس و انتي على لحم بطنج نورة: ما ابي اكل شي فاطمة: حتى هلنا بيشكون عنبوه من امس و انتي حابسة عمرج نورة: ما ابي انزل و اشوفه فاطمة: هو فالدوام احين نورة: خلاص عيل قومي ننزل تحت نزلوا الصالة تحت و لقوا أم خليفة مع أم سعيد و معاهم ظبية حرمة سعيد نورة: السلام عليكم الكل: و عليكم السلام أم سعيد: وينج فديتج حتى امس ما نزلتي عالعشا نورة: كنت تعبانة خالتي من رديت من المول ضربني صداع ظبية: هيه و الله الواحد من حشرة المول لازم ما يرد الا بصداع أم خليفة: نورة فديتج ترى خليفة يالس في الميلس بنروح بعد شوي فاطمة: وين خالتي حرام ما يلستوا؟ أم خليفة: يا بنتي خليفة مشغول ما بيروم يي بعدين فاطمة: نحن بنوصلكم بعدين .. تغدوا عندنا على الاقل أم خليفة: لا فديتج ما نبي نعبل عليكم أم سعيد: لا عبالة و لا شي نورة: اماية سرتي عن يدووه أم خليفة: هيه أمس يت و زعلانة عليج عنبوو ما نزلتي تسلمين عليها نورة: غصب عني أمايه راسي كان مصدع أم خليفة: خلاص و نحن طالعين بخلي خليفة يخطف و سلموا عليها .. و سيري ازقري فطووم لا تاخرنا نورة و هي تقوم: ان شاءالله أمايا .................................................. .................................. الساعة ست المغرب بتوقيت البحرين بيت بو أحمد وصلوا جزيرة حوار عقب رحلة قصيرة قضوها بالقارب عشان ييون حوار الكل كان مستانس صح حر بس بعد المكان ينن و يشرح الصدر بيت بو أحمد كانوا حاجزين ثلاث غرف غرفة حق بو أحمد و أحمد و طلال .. و الثانية حق أم طلال و أمينة و اليدة أما الثالثة فكانت حق مريم و هنادي و فيها سريرين بس نزلت العايلة كلها كل حد دخل اغراضه في غرفته و مريم و هنادي صلوا المغرب و نزلوا تحت قعدوا في المظلات اللي عند المسبح يشوفون الناس و يسولفون و هم في نص سوالفهم ياهم طلال طلال: انتوا هنيه و انا ادوركم مريم: تعال اقعد معانا طلال: لا انتوا اللي قوموا .. بنتعشى هنادي: تو الناس توها 7 و نص طلال: تراهم يواعة يلا عاد هدوا عنكم الهذرة و قوموا قاعدين ينطرونكم قاموا ثلالثتهم و راحوا داخل عند مطعم الفندق طلبوا مشاوي و تعشوا كلهم بس اللي فاجأ مريم و هنادي عقب العشى ياب لهم الجرسون كيكة كبيرة مكتوب عليها مبروك النجاح كانت مفاجأة من بوطلال لهم .. استانسوا من الخاطر .. حتى أم مريم استانست و دمعت عيونها يوم شافت بنتها مستانسة .. فرحت لانه اخوها مو مقصر مع مريم بشي .. و قد ما يقدر يعوضها حنان الابو اللي انحرمت منه من و هي فبطن أمها ................................. في العين مايد انصدم يوم رد الظهر و اكتشف انه بيت خالته روحوا و هو ما شاف نورة و الاهم انه ما اعتذر منها أما نورة فمن أول ما رجعت تغدت و رقدت .. راسها كان يعورها من القهر و من صياح البارحة .. قعدت عالساعة 8 و نص قامت غسلت و توضت و صلت المغرب اللي فاتتها و العشا و اتصلت بموبايل شمسة بس محد كان يرد في بيت شمسة البيت كان محتشر بفرحتهم بيية محمد و مرته و ولده خلفان .. أم محمد: ليش يا بويه ما تيي تستقر هنيه .. على الاقل تكون تحت نظري محمد: و الله يا أماية تعرفين شغلي خلاص هناك و انا مستقر و مرتب اموري أم محمد: انتقل بوظبي .. الوظايف مو مقصرة هنيه شمسة: الله يهديج اماية بهالسهولة تبينه يغير مجرى حياتة .. خلاص هو تعود صار له 6 سنوات عايش هناك شوي و ان حادرة عليهم روضة مرت محمد و فيدها يوسف ولدهم الصغير .. روضة كانت من هل دبي و يوم تزوجت من محمد الله ما رزقهم بعيال .. لانه روضة عندها شوية مشاكل بالحمل .. بس عقب فترة الله رزقهم بيوسف أم محمد: هلا بالغالي شو وعى من النوم روضه: هيه توه أكلته و يبته بو محمد: هاتيه عندي و هم في نص سوالفهم رن تلفون الصالة و قامت شمسة ترد عليه نورة: الو .. السلام عليكم شمسة: نوروه .. تو الناس جان نطرتي بعد يومين .. و لا احين تفيجتي لي؟ نورة: بسم الله .. شوي شوي علي شحالج شمسة: هيه الحين تذكرتي !! يومين بكبرهم لا دقيتي و لا شي .. حتى موبايلج مغلق .. الحبيبة ما تبي ازعاج نورة: و الله لو تدرين باللي صار لي جان عذرتيني .. و خنقتها العبرة شمسة: بسم الله نوروه شفيج ؟؟ تدرين صبري بروح داخل هنيه ما اسمع من الحشرة و دخلت داخل و قالت لها نورة كل اللي صار لها من أول ما دخوا العين مول لين ما نازعها مايد شمسة: لا تقولين يعله الماحي .. ما عليج منه منقهر منج نورة: سكتي بغيت آموت .. عيل انا اسوي عرض !! شمسة: كلن يرى الناس بعين طبعه .. خله يولي عنج و الله طبيه .. الا تعالي .. فهود كان يسال عنج و يسلم عليج نورة: فديته و الله شحاله ؟؟ شمسة: بخير كله طالع ويا ربعه نورة: يحليله خل يستانس شمسة: زين أقولج أنا بسكر شكلهم بيحطون العشا .. ترى محمد و حرمته عندنا نورة: سلمي عليهم .. فمان الله شمسة: فمان الكريم .................................................. ......... تحت في اللوبي كانت عايلة بوطلال مجتمعين مع عايلة بو يعقوب .. بويعقوب من هل المنامة يعرف بوطلال عن طريق الشغل بالتجارة لأنه له تعاملات مع شركة بوطلال .. عنده من العيال يعقوب و عمره 26 يشتغل بشركة ابوه .. خالد و عمره 24 و يشتغل بعد بشركة ابوه .. و اصغرهم جواهر عمرها 21 تدرس سنة ثالثة طب بجامعة الخليج .. جواهر كانت بنت هادية و راقية بطبعها .. الله عطاها جمااال غير طبيعي تبهر من يشوفها .. جواهر: انتوا اول مرة تيوون هنيه؟ مريم: ايه .. انتي ييتي قبل؟ جواهر: ايه انا ييت قبل مرتين مع اهلي يوم يوو من الكويت .. بس هالمرة مليت شوي لانه يايين بروحنا هنادي: جم يوم صار لكم يايين؟ جواهر: أمس يينا و انتوا؟ هنادي: اليوم بس و خذتهم السوالف و الكل راح يرقد الا الشباب يعقوب و طلال و خالد كانوا يلعبون ورقة عالبحر .. و مريم و هنادي و جواهر خذتهم السوالف جواهر حبتهم و هم بعد ارتاحوا لها وايد جواهر: شرايكم لو باجر تقعدون من الصبح و نروح عالبحر نشوووف الشرووق؟ مريم: الله انا احب الشروق وايد هنادي: و الله متفرغين ثنتيناكم مريم: عاد انتي يالدفشة .. خليها عنج متى بتقومين؟ جواهر: خلاص بنصلي الصبح و بنقوم مريم: اوكي هنادي: انا بروح ارقد تصبحون على خير جواهر: يالله احنا بعد بنقوم الساعة صارت 2 قام الكل و راح يرقد و ثاني يوم من الصبح قاموا مريم و جواهر و قعدوا هنادي بس ما قامت تبي تكمل نومها راحوا عالبحر و شافوا الشروق و كان وايد حلوو عقبها راحوا تريقوا و كل وحدة راحت غرفتها عساس يكملون رقادهم و هم داخلين طلال كان طالع من الغرفة طلال: السلام عليكم مريم و جواهر: و عليكم السلام جواهر: يالله مريم انا بروح ارقد تصبحين على خير مريم: انزين جواهر لي قمتي اتصلي فيني باي طلال و هو منعجب فيها: اسمها جواهر و هي صج جواهر مريم: عفوا طلال: انطمي انتي و روحي انخمدي الا وين هنوود عنج مريم: راقدة طلال: و سوي خير و روحي رقدي انتي بعد مريم و هي تطالعه بنص عين: تصبح على خير .................................................. .................................... في الامارات نورة كانت قاعدة من الرقاد و تحن عليهم تبي تروح بيت عمها .. و طبعا هي تبي تروح لغرض في نفس يعقوب و هو ان فهد كان قاعد .. لانه خلال روحاتها القليلة ما كانت تشوفه .. يا طالع يا راقد نورة: اماية اخوهم محمد و حرمته هناك .. فشلة ما نروح نسلم أم خليفة: احد يسير الضحى ؟ عقب صلاة العصر بنسير نورة فخاطرها اووه عقب صلاة العصر اكيد بيطلع: اماية خل نسير احين ابي اشوف شموووس أم خليقة: توج من يومين شايفته قومي عني خل اسير اتصل بخالتج و قلت لج بنروح عقب العصر نورة و هي تتافف و تركب فوق: ان شاءالله ركبت و اتصلت بشمسة: الو شمسة: هلا ها شو بتيين؟ نورة: لا اماية ما طاعت قالت عقب العصر شمسة: يالله مو مشكله بيكون موجود ان شاءالله نورة: الله يسمع منج .. شو متى بيروحون قوم محمد اخوج؟ شمسة: جني سمعت امايا تقول باجر نورة: اها انزين بخليج احين و خلاف برمسج شمسة: اقول خليفة اخوج شخباره من زمان ما يا يسلم علينا؟ نورة: بخير هو اليوم بييبنا ان شاءالله .. طبيه عنج احسن لا تفكرين فيه هالكثر شمسة: لا و الله و شمعنه انتي و حبيب القلب فهود نورة: فديته احنه غير شمسة: لا و الله اقول ذلفي احسن نورة: هههههه يالله باي .................................................. .................... في حوار الجو كان من احلى ما يكون .. و عايلة بوطلال و بو يعقوب اغلب وقتهم كان مع بعض و و الكل مستانس بالضحك و السوالف تغدوا مع بعض عقب ما طلبوا ماكولات بحرية و مر الوقت سريع عليهم في الليل تموا العايلتين يشوون حق العشا اما الشباب فراحوا يلعبون بالدراجات و البنات يشوفونهم و يشجعونهم يعقوب كان وايد اوكيه و يسوق بركازة اما خالد و طلال فكانوا وايد يشاوحون و يخمسوون بالدراجات لين ما انقلبت دراجة طلال و لفت لفتين و طاح هو من على الدراجة الكل صرخ و خاف و راح يركض عند طلال يعقوب: فيك شي طلال؟ طلال: لالا ما فيني و هو يتالم من ريوله .. الم خفيف بس يعقوب: أي خفيف الله يهديك .. طالع ريولك قوم لازم تروح العيادة طلال: أي عيادة الله يهديك وين عيادة احين و احنه فحوار؟ يعقوب: هب مشكلة بنرجع طلال: وين نرجع .. ما فيني شي الم خفيف و بيخف يعقوب: خلاص قوم بنروح نقعد ريح احسن و قاموا يعقوب و خالد حملوا طلال طبعا امه و ابوه خافوا عليه بس طمنهم انه ما فيه شي تعشوا و عقب راحوا البنات يبدلون عساس بيردون ينزلون يكملون السهرة مريم: هنوود بصراحة ما تستحين .. عنبووه تخزين الريال خز هنادي: انا ما كنت اشوف حد كنت اطالع طلول اخوي مريم: قصي على هندي .. محد يعرفج كثري هنادي و هي مستحية و حاسة انها انكشفت خلاص: بصراحة هو جنتل وايد مريم و هي مبتسمة: لا و الله .. عاشوا هنوود تحب هنادي: أي يالخبلة أي حب .. هو اعجاب بس .. شفتيه يوم طاح طلال كان يبي يكنسل و نرجع عشان طلال بس مريم: انزين حتى خالد كان خايف عليه؟ هنادي: لا بس هو غير شفتيه شلون كان مريم: انزين قومي جواهر تنطرنه تحت .. و خفي من نظراتج لا حد ينتبه لج هنادي: انزين نزلوا تحت و كملوا سهرتهم كانوا الشباب يلعبون ورقة و شطرنج و البنات يشجعونهم و يشاركونهم ساعات مر اليوم سريع عليهم و ثاني يوم الصبح رجعوا العايلتين مع بعض بنفس القارب عقب ما قضوا مع بعض احلى رحلة .................................................. .............. مرت الايام سريعة في الامارات و البحرين بين الجامعة و التجهيزات و طلعت نتايج القبول .. قبلوا مريم بكلية الهندسة .. اما هنادي فقبلووها بكلية الادب .. و كانت التجهيزات على اتم الاستعداد .. مريم و هنادي حنوا على اهلهم عشان يروحون السعودية يشترون للجامعة .. بس الشي اللي زعلهم انه موادهم كانت تتطلب ان مريم تكون في فرع الصخير و هنادي في فرع مدينة عيسى .. يعني ما بيكونون مع بعض و في الامارات نورة و شمسة بعد انقبلوا بكلية التقنية .. و خليفة سافر البحرين حق التسجيل ............................... نهاية الجزء الخامس | |||||||||
|
| |
|
14-12-13, 08:15 PM
| #7 | |||||||||
| نجم روايتي ومشرفة سابقة وفراشة متالقة بعالم الازياء
| الجزء السادس الساعة كانت ترن و ترن و للحين هي ممتدة على فراشها بكسل ,, رد المنبه يرن رفعت التلفون و شافت الساعة 5 و نص قامت و قلبها يدق دق .. اليوم أول يوم بتداوم فيه بالجامعة .. عالم يديد .. ناس يداد مجتمع أول مرة تدخله .. و الادهى من ذي كله انها اول مرة بحياتها بتروح مكان من غير بنت خالها و توأم روحها تسبحت مريم و صلت الصبح .. وقفت فترة عند الكبت محتارة شتلبس .. بالاخير استقرت على البدلة الزرقة اللي شرتها من السيف لبست ملابسها و تشيلت و نزلت تحت .. سلمت على يدها و يدتها و شافت أمها طالعة من الحجرة أمينة: ها يما جهزتي مريم: هلا يما .. إيه جهزت أمينة: الريوق في المطبخ يما تريقي و عقب بنروح تو الناس توها 6 و نص مريم: ما اشتهي يما أم أحمد: على الاقل شربي عصير أو جاهي مريم: انزين .. و دخلت شربت لها عصير برتقال .. كانت خايفة وايد من الجامعة حتى مالها خلق تاكل .. شوي سمعت امها تناديها .. و كانت هنادي تبيها هنادي: هلا و الله مريم: هلا شلونج .. للحين ما رحتي؟ هنادي: لا انطر ابوي يخلص ريوقه و بنرووح مريم: حتى انا امي تنطرني .. ميتة خووووف جني برووح معركة هنادي: هههههههه ما يسوى عليج .. الا جامعة .. خلج واثقة من عمرج .. انتي شاطرة و بتمشين ان شاءالله مريم: الله كريم .. انزين ياللا ما عطلج .. امي تنطرني هنادي: فمان الله .. بتصل فيج عقب ما ارد من الجامعة .. راحت مريم و لقت امها و يدها ينطرونها .. يدها اصر انه يروح معاها لانه اول يوم جامعة فما حب يخليها بروحها .. كان قد ما يقدر يعوضها عن حنان ابوها .................. نزلت مريم الجامعة .. و كانت ميته خووف ما عندها رفيجات .. و عالم الجامعة عالم كبير .. كانت تشوف تجمعات بنات و صبيان و كلن لاهي بعمره .. اما هي فدخلت و مسكت ورقة الجدول .. و تمت تتلفت فالمباني تدور على اول محاظرة لها فاي مبنى .. تمت تلف و تلف لين ما حصلت المحاظرة .. دخلت و قعدت بروحها و قلبها يدق دق .. دخل الدكتور .. و كانت اول محاظرة رياضيات و المدرس عرفهم عن نفسه و المادة و المطلوب فيها و رخصهم .................................... أما هنادي فحالها كان احسن شوي من مريم .. كانت معاها رفيجتها عذاري من المدرسة بس عذاري كانت اداب عربي .. بس هاي ما منع انه عندهم محاظرات مشتركة .. غير ان اوقات بريكاتهم كانت مع بعض .................................................. ........................ خليفة كان قاعد مع رفيجه سلمان في الكافيتريا و يسولفون .. خليفة: شخبار لولوة؟ سلمان: و الله بخير من زمان ما شفتها .. كانت مسافرة .. و امس ردت بالليل خليفة: الله يوفقكم .. و متى الزواج ان شاءالله؟ سلمان: خل اخلص هالسنة و اشتغل على الاقل سنة و عقب الزواج ان شاءالله خليفة: يعني سنتين ملجة مو جنه وايد؟؟ سلمان: اهلها يدروون ان توني اكون نفسي .. و البنت تحبني و مستعدة تصبر خليفة: موفق ان شاءالله سلمان: يالله قوم المحاظرة بتبدي الحين .................................................. .................................................. ....... الساعة وحدة كانت ااخر محاظرة حق مريم و هي محاظرة العربي .. مشت مريم صوب المدرج و قعدت بكرسي بروحها .. عقب شوي يات بنت و قعدت يم مريم .. البنت: السلام عليكم .. حد يمج؟؟ مريم: هلا .. لا محد قاعد تفضلي البنت: انا اسمي لولوة .. و انتي شسمج ؟؟ مريم: هلا فيج انا اسمي مريم .. انتي معانا هندسة صح؟؟ لولوة: ايه انا هندسة كمبيوتر .. انتي من وين ؟؟ انا من المدينة مريم: حلو و الله على الاقل الجامعة جريب منكم .. لا انا من محرق لولوة: عيل محد من ربعج معاج مريم: لا اغلبهم فالصخير .. ما عندج محاظرات الصبح لولوة: عليي انجليزي قبل هالمحاظرة بس ما حظرت .. و عقب بيبقى عليي رياضيات مريم: حلو عيل انتي معاي بالانجليزي شوي و ان الدكتورة داخلة عليهم .. عطتهم محاظرة مع ان الكل كان متملل و اليوم اول يوم بس الدكتورة اصرت انها تشرح لهم لولوة كانت بنت حلوة من اهل مدينة عيسى .. خطيبة سلمان و توهم مالجين بالصيف .. كانت طيبة و حبوبة .. مريم ارتاحت لها وايد و هي بعد ارتاحت حق مريم .................................................. ................................... نرجع حق الامارات الحبيبة شمسة توها راده من الدوام دخلت البيت .. سلمت على امها و ابوها .. دخلت غرفتها و حطت راسها و رقدت نورة ردت من الكلية و راحت غرفتها طلعت صورة من درجها و قعدت تطالعها و تسرح فيها .. فديته يا ربي محلاه .. اليوم بشوفه .. السبال خلاص بيودرنا باجر و بيروح .. يالله يا ربي انه هالسنوات تعدي بسرعه و يرجع فهد و نعرس .. فديته يا ربي .. خل ارتاح شوي عشان اصلي و اتسبح .. اكيد بنروح لهم اليوم انسلم عليه .................................................. ........ في الكافيتيريا لولوة و مريم كانوا قاعدين .. الدكتورة طلعتهم قبل بنص ساعة فقعدت مريم تنطر امها و تمت لولوة معاها و من بعيد شافت مريم اثنينة يتقربون منهم واحد وقف ورى شوي اما الثاني فيا عندهم سلمان: السلام عليكم مريم كانت مستغربة فحتى ما ردت لولوة: هلا سلمان .. شلونك؟ سلمان: وينج يالدبة اليوم؟؟ ما شفتج لولوة: ما حظرت اول محاظرة توني هذي اول محاظرة اييها لولوة: مريم اعرفج سلمان خطيبي .. سلمان هذي مريم تعرفت عليها بمحاظرة العربي مستجدة معاي سلمان: هلا مريم شلونج ؟؟ مريم: الحمدلله بخير .. شلونك ؟؟ سلمان: الحمدلله .. شخباركم مع اول يوم دراسي لولوة: و الله العربي لوعة جبد .. الله يعيني الحين بعد على الرياضيات سلمان: انزين متى بتروحين؟ لولوة: اخلص الساعة ثلاث .. و انته متى تخلص؟ سلمان: 2 و نص بس بانطرج و بنروح مع بعض .. لولوة ذي خليفة رفيجي الاماراتي اللي قلت لج عنه لولوة: هلا .. شلونك؟ خليفة: يسرج الحال اختي .. شحالكم انتوا لولوة: الحمدلله سلمان: خلاص عيل اخليكم .. بينا اتصال لولوة: فمان الله .................................................. ..................................... قعدت نورة عالساعة 7 و نص المغرب و عيونها كلها نووم .. شهقت و قامت بسرعه .. يا ربي انا كيف نمت .. يا ويلي الساعة ثمان الا .. طافتني صلاة العصر .. قامت من سريرها بسرعه و ركضت صوب الحمام .. توضت و صلت العصر اللي طافتها و المغرب .. لبست كندورة و نزلت الصالة شافت امها قاعدة و جدامها فوالة و دلال الشاهي و القهوة نورة: حد كان عندج اماية؟ ام خليفة: هيه فهد ولد عمج فهد كان ياي يسلم علينا نورة و فاتحة عيونها من الصدمة: فهد كان هنيه !!!!؟؟ ام خليفة: هيه سلم على ابوج و توه من خمس دقايق ظهر و يا سلطان يتجهزون حق السفر نورة و هي كلها امل ان امها تقول هيه: يعني بيردون هنيه؟؟ ام خليفة: هم ظهروا يتشرون عقب بيسيرون بيت عمج عسب سلطان يسلم عليهم .. ما ظن بيردون .. فهد سلم و راح نورة: متى بيروحون باجر ام خليفة: الفير الله يوصلهم بالسلامة ان شاءالله ركبت نورة فووق و هي ميته من الغيض .. و الدموع متجمعة فعيونها .. شقايل فهد يي و انا نايمة !! شقايل انا نمت و ما حسيت بعمري جيه ؟؟ من زمان ما شافته و باجر بيسافر .. كان املها ان اليوم بيسرون بيت عمها يسلمون عليه .. بس هو سبقهم و يه .. و هي نايمة .. يا ربي فهد بيسافر و انا ما شفته .. و الله العالم متى بشوفه .. يبيلي على الاقل اربع شهور .. هذا اذا رجعوا .. يا رب ساعدني | |||||||||
|
| |
|
14-12-13, 08:15 PM
| #8 | |||||||||
| نجم روايتي ومشرفة سابقة وفراشة متالقة بعالم الازياء
| الجزء السابع مر اسبوع على دوامات البنات في الجامعه فهالفترة زادت علاقة مريم بلولوة لانه مريم ما كانت تعرف غيرها ولانه دوام لولوة ااخر من مريم كانت مريم تفضي البريك الاول بروحها فالكافتريا او المكتبة .. و طبعا بعد مريم عن هنادي ما غير علاقتهم ببعض مريم كانت كل يوم لازم تتصل بهنادي و تعطيها التقرير اليومي مالها بالجامعه و هنادي نفس الشي سلمان: يا خي جم مرة قايل لك لا تحط البنت ببالك لولوة قالة لي انها هادية و مو مالت هالسوالف خليفة: ادري عشان جي هي عايبتني سلمان: روح لا خل البنت فحالها احسن خليفة: شفيك انا ما قلت شي .. هي بس اثارت انتباهي .. مع ان البنت مو متحجبة حجاب كامل .. بس تلبس شيلة .. و حلوة .. بس ما يخصها بباقي البنات .. ما تشوفها تقعد مع شباب او جيه .. اذا خطيبتك مو وياها تقعد بروحها .. او تروح المكتبة سلمان: الحبيب بعد مراقب تحركاتها .. اقوول قوم احسن .. لا تطوفنا المحاضرة خليفة: ابي اكلمها سلمان: اااقولك .. شكلك بتييب مشاكل حق عمرك .. انا بروح احسن لي .. باي راح سلمان و تم خليفة واقف مكانه .. خاطرة يروح يكلمها .. ما يدري ليش خايف .. ياما كلم بنات بس هي غير .. ما يدري ليش هي من بين البنات لفتت انتباهه .. بنات اجمل منها و عندهم استعداد يكلمونه بس هي غير .. يمكن لانها دايما قاعدة بروحها .. و شخصيتها الهادية تميزها عن غيرها .. تم دقايق يتاملها .. لين ما شافها قامت و راحت المكتبة .. راح وراها و قعد على كرسي بعيد .. شافها ماخذة كتاب و تقرى فيه.. انزين ليش ما تقعد عالنت مثل باقي البنات .. هالبنت غير فيها شي بس شو ما ادري تقرب خليفة و خذ كتاب و قعد مجابل مريم .. مريم حتى ما فكرت ترفع عينها تطالع من .. كملت قرايتها بهدوء خليفة: السلام عليكم مريم و هي رافعة حاجب واحد: و عليكم السلام .. و ردت تقرى خليفة: انتي ربيعة لولوة خطيبة ربيعي صح؟ مريم حست بتفاهته و انه يحاول يفتح موضوع و السلام: ايه .. خير في شي خليفة: لا بس شفتج حبيت اسلم عليج مريم فخاطرها صج ما عندك سالفة و ردت تقرى فكتابها خليفة: انتي هندسة معانا؟ مريم اوووف يا هالبلشة: ايه .. عن اذنك محاضرتي بتبدأ قامت مريم و نزلت تحت كان باقي ربع ساعة عن محاضرتها بس هي حبت تقوم من عند خليفة .. ما تدري ليش بس ما حبت انها تتم معاه بمكان واحد .. حسته قاعد يتلصق .. و مريم ما تحب هالنوع من الشباب .. نزلت القاعة مالت المحاضرات عقب بخمس دقايق يات لولوة و وراها على طول دخل دكتور الانجليزي و بدأ بالشرح اما خليفة فنزل على طول و قعد بالكافتيريا ينتظر سلمان لانه هو ما راح المحاضرة و تم مع مريم: فديتها حتى صوتها حلو .. ما بخليها بكلمها يعني بكلمها .................................................. .................................................. . المغرب في بيت بو طلال .. طلال كان قاعد ويا ابوه فالمكتب يبي يكلمه بموضوع ضروري بوطلال: يالله يبا تحجى شعندك ؟؟ شفيك ساكت ؟؟ طلال: لا يبا سلامتك .. احم بس انا بغيت اكمل نص ديني بوطلال و هو يبتسم: الله يرضى عليك يا ولدي .. اكيد تبي مريم بنت عمتك طلال: مريم .. لا يبا مريم مو اكثر عن اختي .. تربيت معاها و غلاتها من غلاة هنوود بوطلال: عيل من تبي من بنات خالتك او من معارفنا؟؟ طلال: يبا انا ابي بنت عمي بويعقوب .. اللي كانوا ويانا بحوار بوطلال: و النعم و الله .. عرفت تختار .. خلاص طبعا لازم نقول لامك و يدك و يدتك .. و باكلم ابوها ان شاءالله .. و الله يعطيني العمر و ااشوف عيالك طلال و هو يبوس راس ابوه: مشكور يبا عن اذنك ................................................ فبيت بو احمد الكل كان فرحان و مستانس عن خبر خطوبة طلال خصوصا عقب ما كلم بو طلال بو يعقوب و عطاه موعد بالخميس عساس ييون يخطبون رسمي .................................................. ...................... في العين بالتحديد فغرفة فاطمة كانت قاعدة تسولف مع اخوها مايد مايد: فطوووم بسالج سؤال فاطمة: و انا بجاوبك جواب j مايد: كلمتي نورة قريب ؟؟ فاطمة: يعني يمكن من اسبوع مايد: احم انزين ما سولفتوا عني ؟؟ فاطمة: و ليش ان شاءالله نسولف عنك ؟؟؟؟؟؟؟ مايد: لا بس قصدي نورة ما تقول شي عن الموقف اللي صار قبل فاطمة: ما تكلمت عنها .. و السالفة اصلا صار لها اكثر من شهر و انت للحين تفكر فيها .. تلاقي البنت يمكن نست مايد: اتمنى انها تكون نست صج فاطمة: مايد .. انت ليش مهتم فيها هالكثر ؟؟ انت صح غلطت .. بس خلاص انسى مايد: انا مو مهمتم فيها و لا شي .. بس انتي تعرفيني ما احب اغلط على حد بس فاطمة: اتمنى و الله مايد: تتمنين شو؟ فاطمة: انه ما في شي بقلبك و انه بس احساس بالغلط مايد: خلاص انا بنام .. تصبحين على خير فاطمة: و انت من هله دخل مايد الغرفة و كالعادة تم يفكر بنورة و هو يتامل صورتها و هم صغار وقتها كاموا رايحين جبل حفيت و نورة كانت دلوعة وايد .. ساروا الشباب يتسلقون الجبل و نورة اصرت تروح معاهم .. الكل كان متغيظ منها .. الا هو كان فرحان و داير باله عليها لا تطيح عقب ما خلوها اخوانها تركب بروحها .. عسب تتادب و ما تيي مرة ثانية .. بس هو كان يمشي وراها مثل ظلها خايف لا تطيح .. كان يحبها من ذاك اليوم .. و قبله بعد .. هو نفسه ما يدري من متى يحبها .. سكر الليت و رقد عقب ما طغى عليه النوم .. و افكاره كلها مع نورة .................................................. .................................................. .... في غرفتها واقفة مجابلة المنظرة .. كانت تتامل فنفسها .. كانت كاشخة لابسة تنورة وردية فاتحة مع بودي وردي له يد و قميص ابيض حفرة فوق البودي .. مربوطه فيه شريطة وردية .. نسلت شعرها اللي طول لي تحت اذونها بشوي عقب ما كانت قاصته بوي .. حطت قلوس شفاف و ماسكارا .. جمالها كان طبيعي و ما يحتاج أي زيادة .. سبحان من خلقها !! و بالاخص اليوم كان لازم تكون بكامل طبيعتها .. اليوم هي على ويه مرحلة يديدة .. بتنزل تقعد مع ناس عقب جم شهر بيصيرون اهلها .. بتطلع من جو الدلع اللي اهلها عودوها عليه و بتدخل حق عالم يديد .. و ناس يديدة الله العالم بتتاقلم معاهم او لا .. بس شكلهم ناس طيبين صحت جواهر من أفكارها على صوت امها اللي كان يناديها عشان تنزل تحت تسلم على اهل بوطلال اللي كانوا يايين عشان يخطبونها لولدهم طلال .. نزلت بكل رقة و انوثة و سلمت على ام طلال و عمته امينة و اليدة ام احمد .. و تمت معاهم شوي .. عقبها انسحبت بكل خجل .. و صعدت دارها فوق .................................................. .................................................. ........... هنادي و مريم كانوا طالعين يتمشون بما ان اليوم الخميس .. و اهلهم كانوا طالعين حق الخطبة فطلعوا بروحهم بس عساس ما يتاخرون عقب التسع .. طبعا هنادي كانت تسوق لانها عقب المدرسة حنت على اهلها عشان تاخذ الليسن .. اما مريم فكانت تخاف من السواقة .. فما كانت تبي مع ان خالها قالها انه هو بنفسه بيشتري لها السيارة .. بس هي رفضت مريم: وعيه شهالفيلم بايخ حدة .. زين ما طلعت من نص الفيلم هنادي: مالت عليج حتي مالت عليج .. خوش فيلم ينن مريم: كله شلخ .. عيل ادمي يتحرك بالكمبيوتر ؟؟!! هنادي: اهيه الافلام الهندية احلى بس عللا الاقل قضينا وقت .. وين بنتعشى؟؟ مريم: توها 6 و ربع من الحين بتعشين خافي ربج !! هنادي: بعدين بيصير زحمة و انا ما اداني الزحمة بعدين ما نبي نتاخر مريم: انزبن قومي انروح المصلى تره اذن .. بنصلي و بنتسوق شوي ابي اشتري عطر اليزابث لي سبع و شي جذيه بنشتري عشى و بنرد ناكل فالبيت على راحتنا هنادي: خلاص شورج و هداية الله عقب ما صلوا البنات مشوا طالعين من المصلى رايحين صوب المحلات تحت و فجاة مريم: هنادي لفي مني بسرعه هنادي: ليش اكوا محل العطورات مناك شحقة نلف؟! مريم: انتي لفي بسرعه و بعدين باقولج و لفوا الصوب الثاني و كانت مريم تمشي بسرعه هنادي شفيج تمشين جنه لاحقينج قبيلة؟ مريم: شوفي ذاك اللي عليه غترة حمرة اللي يمشي مناك هنادي: أي واحد؟ اللي جنه اماراتي مريم: ايه هذا هو .. هاي الاماراتي الكريه اللي معانا فالجامعه هنادي: أي واحد؟؟ مريم: خليفة اللي قلت لج عنه صار له فترة يتلزق فيني .. امشي امشي بسرعه ما ابيه يشوفني هنادي: مريوم يالظالمة .. حرام عليج .. احين ذي كريه الا ينن ما شاءالله عليه مريم: كريه و لا حلو مو شغلنا .. امشي بسرعه نزلوا مريم و هنادي من الصوب الثاني بدون لا ينتبهون ان خليفة اصلا كان ياي عشان مريم .. عقب ما عرف من سلمان عن طريق لولوة انها ياية هنيه اليوم لكن ما شافهم عقثب ما غيروا طريجهم و تم يدور عليهم .. بس ما لقاهم اما مريم و هنادي فنزلوا تحت و شروا العطور اللي يبونها .. عقبها طلعوا من المول مروا جسميز عراد شروا لهم عشى .. عقبها ردوا محرق تعشوا .. و قعدوا يسولفون مع اهلهم عقب ما ردوا عن اللي صار اليوم فالخطبة .................................................. ....................... في سيارة طلال كانوا راجعين من بيت بويعقوب .. عقب ما خطبوا جواهر خطبة رسمية .. و اهل بوطلال كلهم ارتاحوا لجواهر و ادبها أم طلال: لكن شاقولك يا بوطلال .. البنت ما شاءالله عليها .. ادب و جمال ما عليها كلام حتى اهلها ناس سنعه أمينة: الله يجعلها من نصيبك يما طلال بوطلال: حتى ابوها و اخوانها و النعم فيهم .. الكل يشهد بهم ام طلال: ايه و الله .. الله وفقنا فيهم بو احمد: جانهم ناس سنعه شوفوا لي انا بعد مزيونة من عنهدم أم أحمد شعندك .. لا انت الظاهر خرفت على كبر بو احمد: الا ابي ارد شباب مع وحدة من هالمزايين .. جواهر ما عندها اخت ؟؟ الكل كان يضحك الا ام احمد اللي ميتة من القهر أم احمد: لا الريال استخف الحمدلله و الشكر بو احمد: تغارين؟؟ ام احمد: ويه من زينك عاد .. البنات ان شافوك تخرعوا و شردوا طلال: خلاص يدي نملج انا و انت بليلة وحدة ام احمد و هي تطق طلال على جتفه: ايا جليل الحيا و تعاونة بعد طلال: هههههههه افا يدتي يعني تغارين على يدي لا تكابرين بو احمد: طلالو يوز عن يدتك .. اصلا انا مابي حد و عندي شيخة الحريم ام احمد و هي مستانسة: ويه يعلني ما انحرم منك ان شاءالله الكل: ههههههههههههههههههه .................................................. ..... | |||||||||
|
| |
|
14-12-13, 08:16 PM
| #9 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثامن الله ما أكبر غلاك ينبض بحبك فؤادي من يشبهك يا ملاك من يشبهك يا ودادي انته بشر غير عادي فيك الجمال العجيب الفرحة كانت منتشرةفي بيت بو أحمد و الكل فرحان من كبير و صغير .. بيت بو يعقوب ردوا عليهم بالموافقة .. شرط ان جواهر تكمل تعليمها .. حددوا الملجة عقب اسبوعين قبل رمضان .. عساس تكوون ملجة عائلية فبيت بو يعقوب فغرفة مريم فووق هنادي كانت منسدحة على سرير مريم .. و مريم كانت توها طالعة من الحمام و قاعدة تتعطر هنادي: الله وناسة .. و اخيرا بيصير عندنا عرس مريم: ايه و الله .. الله يتمم عليهم بالخير ان شاءالله هنادي: مريووم ..هقوتج هالايام بشوف يعقوب وايد مريم و هي تقعد عالكرسي تنشف شعرها: هنوود هدي عنج الخبال احسن هنادي: مريووم شفيج انا اسال بس مريم: و ليش تسالين ان شاءالله؟! هنادي: مريووم انتي اقرب وحدة لي و ما عندي حد اسولف معاه غيرج افهميني عاد مريم: هنادي حبيبتي .. انتي تتوهمين واحد شفتيه مرة وحدة لا كلمتيه و لا كلمج .. و لا صار موقف بينج و بينه .. على أي اساس تفكرين فيه .. شيلي هالافكار من بالج .. انتي بس لانه اول واحد تشوفينه و شخصيته عجبتج فتتوهمين بالحب هنادي: انا ما قلت احبه مريم: ما قلتي بس تصرفاتج .. نظراتج له .. شكلج كل ما طروا اسمه .. نصيحتي لج و انتي تدرين شكثر احبج .. شيليه من بالج هنادي و هي تتنهد: احاول .. الا ما قلتي لي شخبار خليفة؟؟ و هي تغمز مريم: ملوع جبدي و الله هنادي: يحليله .. يمكن يحبج صج مريم: أي حب و أي خرابيط .. هنوود انتي تعرفيني مو مال هالسوالف .. بعدين وين مداه يحبني و ما صار لنا الا شهر و نص من داومنا!! هنادي: مادري و الله مريم: تصدقين السخيف اليوم و انا قاعدة بالمكتبة اقرى كتاب يا لين عندي يازعم يبي يسوي بحث و محتاج حق الكتاب اللي عندي!! هنادي: ههههه حركات و الله بعد .. و شسويتي مريم: حذفت الكتاب عالطاولة و قمت .. و اذا ما بطل حركاته انا براويه هنادي: شبتسوين.. مريم: اهوه خل يتساخف ازيد و انتي بتشوفين .. قومي ننزل يالله اليوم ما قعدت مع امي .. و لهت عليها .................................................. .................................................. في الامارات و بالتحديد في صالة بيت بو خليفة ام خليفة: و بتمين ويا منو ان شاءالله .. حتى سيف و فطووم بيوون وياي .. و ابوج فالعزبة نورة: اماية السبت عليي امتحان .. ما بروم ادرس ام خليفة: شلي كتابج وياج و ادرسي مع فطامي بنت خالتج نورة: ما بقدر ادرس هناك .. بسير عند قوم شمووس بنت عمي ام خليفة: بنسير اليوم و الجمعة بنرجع من وقت و لا تعوريلي راسي و قومي جهزي اغراضج احسن لج نورة و هي تتافف و تركب غرفتها : ان شاءالله ركبت نورة غرفتها و اتصلت بشمووس شمسة: هلا .. ها شسويتي؟؟ نورة و هي مبوزة: ما رضت امايا l شمسة: جان اقنعتيها .. قوليلها عليج بريزينتيش او أي شي نورة: قلت لها عليي امتحان بعد ما طاعت شمسة: نوار خلاص سلمي بالامر بالواقع و روحي شبيصير عليج يعني؟؟ نورة: ما ابي اشوفه فقدته .. ما ادانيه شمسة: لا تاجابلينه .. بتقعدين مع هلج .. بتسيرون بالويك اند اكيد طالع مع ربعه نورة: اوووف ان شاءالله ما اشوفه فقدته شمسة: حرام عليج لا تدعين على الريال نورة: خله يولي .. تعالي فهد ما دق شمسة: امبلة و سلم عليكم نورة: و ليش ما قام يتصل ببيتنا مثل اول؟ شمسة: الحين كبر و صار يستحي .. بس تدرين شكثر يحبج نورة: فديته و الله .. خلاص انا بسير ازهب اغراضي و برمسج خلاف شمسة: فمان الكريم .................................................. ......................................... خليفة و سلمان قاعدين بالكوفي شوب اللي بالسيف و قاعدين يسولفون عن "مريم" كالعادة سلمان: هههههههههههه و الله يا خوي ويهك بليته .. البنية حذفت الكتاب بويهك و قامت خلاص خلها فحالها .. مالك نصيب وياها خليفة: تحلم انت .. بصراحة انا بديت احبها سلمان: أي حب الله يهديك البنية مو مالت هالسوالف خليفة: عشان جي انا احبها و اباها سلمان: يمكن البنية مرتبطة بغيرك خليفة: لا تسكرها بويهي انت بنفسك قلت لولوة جست نبضها و عرفت انه ما بحياتها حد سلمان: و بعد كانت تتشكى منك يعني انت موول مو بحياتها و لا تفكر فيك خليفة: بصير كل حياتها و قلبها بعد سلمان: يقولون الاحلام ببلاش تحلم يبى شعليك خليفة: سلمانو بلاك جي غادي مثل ابليس لا تسكرها بويهي سلمان: ما اسكرها .. بس انته شفيك مستخف ياما حاجيت بنات و طلعت معاهم عمرك ما تعلقت باحد جذيه .. لا و يا صادقت احلى منها بعد خليفة: اه ما ادري شاقولك.. عقولتك ياما رمست بنات بس كانوا غير .. الحقها يوم و لا 2 و تدق بروحها .. و اللي تباني عشاني اماراتي و اللي عشان شكلي و اللي عشان فلوسي .. بس مريم غير .. قلت لك قبل يوم شفتها ما تلبس عباة تحريتها سهلة شرات غيرها .. بس هي قمة فالاحترام .. هادية زيادة عن اللزوم .. فنفس الوقت شخصيتها القوية و احترامها حلووها بعيني زوود سلمان: شاقولك ياخووي .. بس انا اخاف تقص على البنية خليفة: حرام عليك .. قلت لك احبها و تعرف اني بحياتي ما حبيت حد .. كل اللي تعرفت عليهم كاصدقاء و بس و هم يدروون بهالشي سلمان: ما اقدر اقوول غير الله يوفقك .. قوم خل نروح المصلى .. ترى اذن المغرب .................................................. ................................ في صالة بيت بو طلال الكل كان متجمع بالصالة لانهم كاننوا معزومين عالعشا أمينة: و متى حددتوا الملجة ان شاءالله؟؟ بوطلال: عقب اسبوعين عساس اتكون عائلية فالبيت بس و في نص السنة بيعرسوون عقب العيد ان شاءالله امينة: الله يتمم بخير و يهنيهم هنادي: ويه عقب اسبوعين .. يبيلنا نروح ندور ثياب هذه ولبنا مريم: ايه تعرفين ذاك المحل اللي فالدانة اللي مجابل المطاعم عنده ثياب حلوة و اسعارهم زينة هنادي: بنشوفه و بنشوف السيف بعد فيه محلات وايد مريم: خلاص شوفي متى تفضين و بنروح رن تلفون مريم و كانت لولوة اللي متصله فيها .. راحت الصالة الثانية عشان تعرف تحاجيها براحة عن الهيلة مريم: هلا و الله لولوة: بالطش و الرش و الماي ورد فالغرش مريم: ههههههههههههههه لولوة: شلونج؟؟ مريم: و الله الحمدلله بخير .. و انتي شخبارج .. من جم ساعة كنت معاج .. ما مداج تولهين عليي!! لولوة: صج انج دبة .. بس مو منج من اللي يتصل لج مريم: هههههههههههههههه .. تزمر بعد .. شلونج ؟؟ ما طلعتي اليوم؟؟ لولوة: امبلة انا فبيت يدتي تعرفين كل اربعا لازم نروح .. بس تمللت فاتصلت لج مريم: غريبة عيل وين حبيب القلب سلمان؟؟ لولوة: اتصلت فيه بس طالع ويا رفيجه مريم: اها .. زين عيل شالاخبار بعد لولوة: بخير .. تصدقين مريووم .. خليفة مسندر راس سلمان كل ما يشوفه يسولف عنج مريم و هي مصدومة: شنو !! لولوة: هو بصراحة دايما يسولف عنج .. و يسال عن احوالج مريم: و هو شيخصه فيني؟؟ لولوة: يقول يحبج مريم: !!!!!!!!!!!!!!!!!!!!!! لولوة: ترى لا هو و لا سمان يدروون اني انا اقولج هالكلام .. بس هو رفيج سلمان وااايد عشان جذيه قاله .. و سلمان ما يخش عني شي مريم: و سلمان هو اللي قالج تقولين لي ان خليفة يحبني ؟! لولوة: لا طبعا .. قلت لج لا سلمان و لا خليفة يدرون .. سلمان يقولي من باب السوالف بس .. لكنه ما طلب مني هالشي .. بس انا بروحي اسولف وياج مريم و هي مب عارفة شتقول من الصدمة: اقول لولوو ينادوني عشان العشا باتصل لج بعدين لولوة: اوكي حبيبتي .. بالعافية .. مع السلامة تمت مريم قاعدة مكانها مصدومة و قلبها يدق دق .. ابدا ما توقعت ان خليفة يحبها .. هو ليش يسولف عنها!! و ليش قال لسلمان انه يحبها!! معقولة يكون يحبني صج!! ضلت مريم حايرة بافكارها لين ما نادوها عالعشا تعشت و ردت بيتهم .. حتى هنادي حست ان فيها شي بس ما حبت تسالها جدام اهلها .. فقالت بتتصل لها باجر .. اما مريم فردت البيت و افكارها مو وياها .. عقلها كان بكلام لولوة .. راحت غرفتها تنام .. لنكها ضلت حايرة و تفكر ليما غلبها النوم .................................................. .......................................... فالعين و بالتحديد فغرفة فاطمة .. نورة و فاطمة كانوا قاعدين يسولفون عقب ما الكل يتعشى و راح غرفته ينام فاطمة: و شمسوية بدراستج؟؟ نورة: اوكيه .. شموووس معاي بكل كلاساتي فما احس بملل فاطمة: حلوو .. اذا حصلتي صعوبة و لا شي لا تستحين مني اتصلي فيني و بساعدج نورة: تسلمين حبيبتي .. اقول فطووم ما راويتيني صوركم مال عرس بيت عمج فاطمة: بغرفة سلامي .. بروح اييبهم و بايي راحت فاطمة تييب الصور من غرفة سلامة و خلت الباب مفتوح .. سمعت نورة صووت حد يركب فوق .. فلبست شيلتها بسرعه .. عساس اذا كان مايد او سعيد .. ركب مايد فووق و ما كان يدري ان بيت خالته بيوونهم اليوم .. شاف غرفة فاطمة مفتوحة فراح صوب اخته .. بس يوم دخل ما شاف فاطمة .. شاف نورة .. حس بقلبه يدق دق وقف ثواني يتاملها .. و هي كانت واقفة بس منزلة راسها .. مايد: شحالج نورة؟ نورة من دون نفس: الحمدلله مايد: بعدج زعلانة مني؟؟ نورة: و من انت عشان ازعل منك انت ما تهمني اصلا مايد و هو يتنهد عقب ما حس انه انجرح : نورة انا بس حبيت اعتذر منج عن هذاك اليوم .. انا ما كنت بوعيي .. انا طلعت عن طوري يوم شفت هالخياس يغازلونكم .. و لولا اني اخاف عليج و احبج ما كنت غرت عليج .. عموما يا بنت خالتي انا اسف السموحة منج طلع مايد من الغرفة و خلى نورة واقفة فحاله من الذهول .. طول عمرها تدري ان مايد يحبها .. فاطمة لمحت لها كذا مرة .. و هي حست من تصرفاته انه يحبها .. من يوم و هم صغار و هو دومه يدافع عنها .. بس اول مرة مايد يصرح لها بحبه .. بس هي ما تقدر تبادله نفس الشعور لانه قلبها وهبته حق فهد .. و لانها تحس ان مايد جرحها فيوم من الايام .. و للاسف قلبها مو قادر يفهم و ينسى و يسامح عقب دقايق دخلت عليها فاطمة و في يدها الالبوم .. فاطمة يوم شافت مايد عند نورة ما حبت تدخل عليهم .. خلتهم يتفاهمون براحتهم .. لانها تدري شكثر مايد يحب نورة و خاطره يعتذر منها اما مايد فراح غرفته و حس انه مجروح جرح كبير من اغلى انسانة بحياته .. معقوله نورة قلبها قاسي لهالدرجة و ما يقدر ينسى و يسامح .. و لا انا فعلا ما اهمها .. و لا اعني لها شي!! تنهد مايد و تم يتقلب يحاول ينام لكنه ما قدر .. قام تلبس و طلع من البيت ما يدري وين يروح بس مو قادر يتحمل يقعد فهالمكان اللي فيه نورة .. و اللي جرحته بقسوة نهاية الجزء الثامن | |||||||||
|
| |
|
14-12-13, 08:17 PM
| #10 | |||||||||
| نجم روايتي ومشرفة سابقة وفراشة متالقة بعالم الازياء
| الجزء التاسع في غرفتها كانت نايمة و غرقانة فالنوم بعد .. لانها امس فالليل ما رقدت اوكيه عقب كلام لولوة لها .. قعدت على صوت التلفون .. اللي سكت و رد يرن مرة ثانية .. رفعت و شافت انه هنادي المتصله .. ردت عليها مريم و كلها نوم: الو هنادي: هلا يالساحرة صباح الخير مريم: شتبين؟؟ هنادي: صج ما تستحين .. مو منج من اللي متصل لج مريم: هنوود فيني رقاد و الله أمس رقدت متأخر هنادي: و انتي شعندج اصلا سهرانة!! يلا عاد بلا بلادة قومي الساعة 11 مريم: بل 11 و انا راقدة اوووف صج راحت عليي رقدة هنادي: قومي يلا و انا باييج الحين مريم: انزين حياج .. انا باقوم اتسبح هنادي: تدرين باييج عقب ساعه جذيه باييج عشان تكونين برزتي مريم: صار يلا انطرج عيل قامت مريم تسبحت و نزلت تحت تسلم على امها مريم و هي تقعد يم امها و تحضنها: شلونج يما ولهت عليج الأم: الحمدلله اسال عنج .. الا تاخرتي اليوم مريم: ايه يما امس ما رقدت عدل عشان جذيه تاخرت اليوم الام: قومي يما تريقي .. اكو مسوية بلاليط اليوم مريم: مدام انتي مسويته اكيد حلو و باكله بس بانطر هنوود الام: بتيي الحين .. الا وين يدي و يدتي غريبة ما اسمع هواشهم الام: ما شفتيهم الصبح مريم: ههههههه اكيد الموال المعتاد الأم: اليوم يتهاوشون على الادوية يدج يقول كل و امي تقول انه ما كل و بدا موالهم اليومي مريم: هههههههههههههه الام: راحوا سوق الخضرة يتمشون مريم: هههههه خوش تمشية في سوق الخضرة شوي و الا هنادي داخلة عليهم و في يدها صحن فطاير هنادي: السلام عليكم أمينة: هلا و الله بنتي شلونج؟ و شلون ابوج و امج؟ ما حاجيت منيرة اليوم هنادي: بخير الحمدلله .. راحوا بيت عمي راشد أمينة: قومي تريقي مع هنادي .. يلا انا باخليكم باروحآسير على جيراننا مريم: سلمي عليهم .................................................. .................................................. في العين و بالتحديد في صالة بيت أم سعيد بالتحديد نورة و فاطمة و فاطمة و منى و سلامة متجمعين كلهم بالصالة و قاعدين يشوفون التلفزيون منى: متى بنسير بيت يدوه فاطمة: عقب صلاة العصر سمعت اماية تقول سلامة: اوهو خسارة كان خاطري نسير المبزرة مع قووم خالوه فاطمة: و منوه بيوديج ان شاءالله سلامة: عادي بنخلي سعيد يودينا فاطمة: سعيد سار ويا حرمته دبي سلامة: انزين مايد نورة فخاطرها وع مالقوا الا هذا اسير وياه .. يحلمون منى: مايد مو موجود فاطمة: ليش وين سار .. ما أحيده يطلع مع ربعه الصبح!! منى: هو أصلا ما بات فالبيت أمس .. فاطمة: غريبة مو من عوايده منى: ما ادري فاخواج عاد اماية قالت جيه نورة سكتت حز فخاطرها شوي و كسر خاطرها .. لكن كبريائها منعها و خلاها تقول احسن خله يتادب من قاله يغلط عليي .. بعدين هو ما يهمني .. انا اللي يهمني "فهد" و بس و قطع عليها سرحانها صوت منى: حوووو وينج صار لي ساعه اكلمج!! نورة: ها شو كنتي تقولين؟؟ سلامة: لا الحبيبة بالها مو معانا .. اللي ماخذ عقلج نورة: ما شي كنت افكر بشمووس ما كلمتها اليوم الا شو كنتوا تقولون سلامة: سلامتج قوموا بنصلي الاذان اذن قاموا البنات يصلون و عقبها كلمت نورة شمسة و قالت لها بكل اللي صار .. شمسة: حرام عليج و الله نورة: حرمت عليه عيشته ان شاءالله شمسة: ما ادري شاقولج و الله بس هو يكسر الخاطر نورة: شرايج تحبينه و تريحيني شمسة: ولي لا اونه احبه .. و خليفة فديته نورة: اقول ولي انتي و ياه .. انا بروح فشلة البنات تحت ينطروني شمسة: اوكيك حبوبة .. ديري بالج عنفسج نورة: ان شاءالله و انتي بعد فمان الله .................................................. ...................................... مايد عقب ما طلع من البيت البارحة راح بيت يدته و نام هناك .. عقبها طلع اليوم الصبح و نزل بوظبي عند ربيعه .. خلاص قرر يبعد عن نورة لين ما ترجع بوظبي .. مايد قرر يبعد عن نورة و ينساها .. لازم ينساها ,, بس هل بيقدر ينساها !!!!!! .................................................. ........................................ في البحرين في غرفة مريم عقب ما صلوا البنات هنادي و هي تقعد عالسرير: يلا قولي لي شسالفتج؟؟ مريم و هي تلعب بشعرها: أي سالفة؟؟ هنادي: مريوم انا خابزتج عدل .. انتي فيج شي .. من امس عقب ما حاجتج لولوة و انتي متغيرة مريم و هي تتنهد: خليفة هنادي: شفيه بعد؟؟ مريم: لولوة تقول انه يحبني هنادي و هي مبهته: كملي .. قولي السالفة كاملة مريم: لولوة اتصلت امس فيابت طاري خليفة .. و قالت لي انه دوم يسولف لسلمان عني .. و انه لا هو و لا سلمان يدرون انه اهيه قالت لي انه خليفة يحبني .. يعني باختصار اهو قايل حق سلمان عني و ما قاله يوصل لي هالكلام عن طريق لولوة .. لولوة بروحها قالت لي من سوالف سلمان هنادي: انزين يمكن يحبج صج مريم: أي حب انتي ما تسمعين السوالف اللي تصير من ورى الحب .. ما عاد في حب في هالزمن هنادي: مريوم انتي غلطانة .. انا معاج ان البنت لازم تحافظ على نفسها .. بس الحب موجود و اكبر مثال جدامج لولوة و سلمان مريم: لولوة و سلمان غير اهم جيران و يحبها من يوم و هم صغار.. و الكل يدري بحبهم .. يعني حبهم فالنور مثل ما يقولون و عمره ما غلط عليها هنادي: ما ادري شاقولج و الله مريم: لا تقولين شي .. بتروحين معاهم اليوم هنادي: لا شيوديني .. ما احب الرزة انا مريم: من بيروح؟ هنادي: طلول و جواهر و امها و يعقوب و قالتها و هي تبتسم مريم: الله يعطيج العقل .. انزين شرايج نخلي امي تودينا الدانة او السيف نشوف ثياب حق الملجة .. ما باقي شي هنادي: شورج و هداية الله .................................................. ................................................. العصر راح طلال بيت جواهر و راح معاها هي و امها و اخوها يشترون الشبكة عقب ما عطوهم المهر قبل يومين أما هنادي و مريم راحوا مع أمينة أم مريم يشترون ثياب حق الملجة اشترت مريم تنورة و قميص مشكوكين بسيطين و بنفس الوقت يناسبون حفلة بسيطة لونه أزرق .. أما هنادي فاشترت بنطلون و قميص فيهم شك بسيط لونهم بنفسجي .................................................. .................................................. .................. مر الويك اند سريع و كلن لاهي بشي .. هل البحرين لاهين بتحضيرات الملجة .. مايد بنورة .. و نورة بفهد .. و شمسة بخليفة .. و خليفة فكره كله عند مريم هالويك اند ما شافها لانه لولوة كانت مشغولة و ما قدرت تكلم سلمان وايد عشان يعرف من طريقها هي وين بتطلع .. تم على نار ينطر يوم السبت .. عشان يشوف مريم .. و هو مقرر انه يصرح لها بحبه .................................................. .................................................. ... الساعة 5 و نص الصبح منبه مريم كان يرن و قامت بكل تثاقل لانه اليوم السبت بداية الاسبوع .. فتحسه يوم ثقيل بعد وراها 6 ايام دوام .. تسبحت و صلت و تلبست كالعادة و راحت الجامعه .. حضرت المحاضرة الاولى و اللي هي طبعا من غير لولوة .. عقب ما خلصت المحاضرة راحت مريم الكافتيريا تشرب كوفي و كانت معصبة و مقهورة من المدرس لانه حاطلها في البروجكت 17 من 25 و هي حاله اوكيه .. طلعت و راحت المكتبة .. طبعا كالعادة خليفة كان يلاحقها .. خلصت مريم كتابها و نزلت تحت و شافت خليفة كالعادة موجود فنفس المكان اللي هي فيه .. انقهرت منه مريم و قالت لازم اوقفه عند حده كان المكان فاضي شوي لانه مكان محاضرات و اغلب الطلاب فمحاضراتهم و اللي عندهم بريكات لاهين اللي يسولف و غيره لفت مريم و راحت صوب خليفة وقفت جدامه .. أما هو فاستغرب تصرفها مريم: آقولك انت تستحي على ويهك!! خليفة: خير مريم فيج شي؟؟ مريم: لو سمحت بطل هالحركات السخيفة .. كل ما اروح مكان ملاحقني جنك ظلي .. حتى برع الجامعه اشوفك فكل مكان .. انت ما عندك خوات تخاف عليهم .. و لا على بالك انا من هالخايسات !! احترم نفسك احسن لك .. و لا تظن اني مثل باقي البنات ميتة عليك .. انا وحدة محترمة و خلك محترم احسن لك خليفة: خليني اشرح لج انزين لكن مريم ما عطته فرصة يتكلم و لفت عنه و كملت طريجها .. اما خليفة اتمنى ان الارض تنشق و تبلعه .. حس بالفشلة و المهانة .. مع انه اليوم كان ياي يصرح لها بحبه .. شل بعمره و طلع من الجامعه بكبرها .................................................. .................................................. ......... مريم كان جسمها كلها ينتفض اهي بروحها ما حست بعمرها .. شلون راحت له و صارخت عليه .. هو صح مصخها .. بس بعد في اسلوب احسن فالكلام .. بس شكل حركات خليفة و عصبيتها على دكتور الرياضيات هي اللي خلتها تتصرف جذيه .................................................. ............................................... في الكافتيريا هنادي كانت قاعدة مع رفيجتها عذاري فوقت البريك مالهم كانوا قاعدين يتريقون عذاري: انزين ما قلتي لي .. متى تسليم البروجكت مالكم هنادي: السبت الياي عذاري: لاتقولين للحين ما اشتغلتي عليه هنادي: امبلة .. بس قلت لج في ذاك الجزء ما فهمته عذاري: قايلة لج شوفي أي وقت فاضي و تعالي انا بفهمج هنادي: ما ابي اكلف عليج عذاري: لا كلافة و لا شي و قطع عليهم سوالفهم صوت التلفون و مريم هي اللي كانت متصلة بهنادي هنادي: هلا مريوم مريم: هلا .. اقول هنادي .. تقدرين تيين تاخذيني من الجامعه الحين هنادي: مريوم شفيج .. صوتج متغير مريم: بقولج بعدين .. بليز تعالي لي الحين هنادي: خلاص باييج الحين مريم حست بعمرها مو قادرة تركز بشي عشان جذيه اتصلت بهنادي و قالت لها تيي تاخذها من الجامعه .. لانها ما قدرت تتصل بامها و هي بهالحالة .................................................. ............................................. في الامارات و بالتحديد في بيت بو محمد .. شمسة كانت قاعده بالصالة مع امها .. ما راحت الجامعه اليوم لانه ما عندهم شي مهم ... شمسة: أماية أبي اسير السوق الأم: و شتبين به السوق؟؟ شمسة: امايا تعرفين ما باقي شي عن رمضان ابا اتشرى قطع و افصل كنادير الأم: خلاص تزهبي العصر بنسير مع الدريول شمسة: خلاص بتصل بنوروه تيي ويانا الام: هي بعد ما سارت اليوم؟؟ شمسة: لا ما سارت الأم: خلاص برايج عيل انا بسير ازهب الغدا مع الخدامات .................................................. .................................................. .... فسيارة هنادي مريم كانت قاعدة ساكتة و هنادي مو فاهمة منها شي و كانت خايفة عليها .. فنطرت لين ما راحوا البيت .. و حمدت ربها ان ام مريم و اليد و اليدة ما كانوا موجودين و لا جان سووا لهم تحقيق هنادي: مريوم قولي لي شفيج مريم فالبداية كانت ساكتة و ما تتكلم بس عقب تحجت و قالت لهنادي السالفة كلها هنادي: معقولة .. انتي مريوم الهادية تسوين جذيه!! مريم: خلاص عاد لا تزيديني انا اللي فيني مكفيني هنادي: اللي فيج يدل على انج متاكدة انج غلطانة .. و متحسفة بعد مريم: اهوه غلطان .. بس انا مو من عوايدي اتحجى جذيه مع أي حد .. ما أحب اجرح أي احد .. انا شلون سويت جذيه هنادي: و مو أي احد الانسان اللي يحبج مريم: و شاللي يخليج متاكدة؟؟!! هنادي: كل شي يدل كل مواقفه مريم: هنادي انا تعبانه .. هنادي: بخليج بروحج شوي .. إذا تبين شي اتصلي لي طلعت هنادي .. و خلت مريم سارحة بافكارها .. تفكر بكل مواقف خليفة معاها .. تذكرت الاسبوع اللي طاف يوم تاخرت عليها امها .. و الكل راح من الجامعه الا خليفة تم واقف بسيارته .. و لا راح الا يوم راحت هي .. ليش يسوي جذيه .. اكيد هو يحبني .. بس خليفة تصرف غلط .. اه يا ربي من الصح و من الغلط الحين .. يا رب ساعدني .. قامت مريم صلت الظهر و كانت لولوة تتصل فيها بس مريم مالها خلق تكلم حد .. اتصلت بهنادي و تمت تسولف معاها .. و يوم يت امها قالت لها انها تعبت شوي و انها الحين بخير .................................................. ............................................. في الامارات طلعوا شمة و نورة و امهاتهم و راحوا لاسوق اشتروا قطع و ودوهم الخياط يفصولنهم لرمضان .................................................. .................................................. ........... في غرفة جواهر كانت جواهر كانت قاعدة مع عذاري بنت خالتها و تراويها الشبكة مالتها عذاري: وايد حلوة ما شاءالله .. عليج بالعافية جواهر: عقبالج .. انش اءالله عذاري: الله يسمع منج جواهر: ههههههه حشى ما شفت حد بيموت على العرس كثرج عذاري: مو على العرس على المعرس و حياتج و تغمز لها جواهر: هههههههه تعالي براويج صورة المعرس عذاري: و الله .. من وين لج؟ جواهر: اخته عطتني اياها .. بصراحة اهله ناس وايد طيبين عذاري: الل يهنيج ان شاءالله .. خواته شكبر جواهر: عنده اخت وحدة بس اسمها هنادي .. معاج فالجامعه عذاري و هي تعقد حواجبها: لحظة لحظة ريلج اسمه طلال احمد ال..... جواهر و هي مستغربة: ايه .. شعرفج فيه؟؟! عذاري: ويه تصدقين ذي اخو رفيجتي هنوود اللي فالجامعه .. شوف الدنيا شلون صغيرة جواهر: لحظة هنادي اخته اهي هنوود على قولتج اللي تسولفين عنها دايما عذاري: ايه اللي بنت خالتها مريم جواهر: ايه هذه اهمه .. تعرفت عليهم بحوار وايد طيبين عذاري: انا مريم ما شفتها .. بس هنادي معاي وايد حليوة جواهر: حتى طلال شكله طيب عذاري و هي تغمز: اكيد تمدحينه جواهر: حرام عليج اصلا انا عمري ما قعدت معاه عذاري: عيل شلون وافقتي عليه؟؟ جواهر: اهله ناس طيبين و ارتحت لهم .. بعدين هو وسيم و سالنه عنه الكل يمدحه .. شابغي اكثر من جذيه عذاري: الله يهنيج .. خلاص انا بترخص عيل جواهر: وين تو الناس؟؟ عذاري: أي تو الناس اذن العشا خلاص باروح و ازورج مرة ثانية ان شاءالله جواهر: يالله بوصلج لي الباب .................................................. .................................................. .. الساعة كانت 11 و مريم تتقلب مو يايها نوم .. قامت من سريرها و نزلت تحت و طقت على امها الباب أمينة: من؟ مريم: يما هذي انا مريم أمينة: تعالي يما دشي دخلت مريم الغرفة و قطت عمرها فحظن امها أمينة: ها يما ما رقدتي؟ مريم: لا ما ياني رقاد أمينة: شفيج انتي اليوم مو طبيعية؟؟ مريم: ما فيني شي يما .. بس تعب الجامعه أمينة: لا ترهقين عمرج زيادة حبيبتي مريم: ان شاءالله سكتت مريم شوي عقب قالت يما أبس اقولج شي أمينة: قولي يما مريم: آنا احبج وايد أمينة: حتى انا يما مريم: يما انا اليوم غلطت على بنت فالجامعه امينة: ليش يما؟؟ مريم: كنت متضايقة من علامة الرياضيات و صرخت عليها أمينة: لا حبيبتي مهما كان المفروض تفصلين بين الدراسة و معاملتج للناس .. لا تجرحين حد ابدا مريم: ادري يما عشان جذيه انا متضايقة أمينة: خلاص روحي اعتذري لها باجر .. و ترى حطي ببالج الاعتذار ما يقلل من قيمتج .. دامج غلطتي ما فيها شي تعتذرين .. على الاقل تكونين راضية عن نفسج مريم عقب ما ارتاحت شوي: كلامج صح يما أمينة و باست بنتها على راسها: يلا حبيبتي رقدي .. باجر وراج دوام مريم: برقد عندج اليوم أمينة: انزين حبيبتي يلا تصبحين على خير حطت مريم راسها يم امها عقب ما ارتاحت شوي و رقدت و قررت انها تعتذر باجر من خليفة نهاية الجزء التاسع | |||||||||
|
| |
 |
| الكلمات الدلالية (Tags) |
| الكاتبة |
| أدوات الموضوع | |
| انواع عرض الموضوع | |
|
|
.png)
العرض العادي
