محطة الوفاء الكاتبة / أميرة الوهج

[اسطورة !]

**فصل التاسع عشر**

في غرفة جواهر...
قمر:جواهر بنشوفج عروس..
جواهر:ماني مصدقة..احس اني احلم..
قمر:من حقج ماتصدقين..والله انج تستاهلين..
جواهر:عقبالج..
قمر:ان شاء الله..متى يعدي هالشهرين..
جواهر:بيمرون بسرعة ان شاء الله..
قمر:ياليت ابوي يوافق وتكون ملجتنا مع بعض..
جواهر:انت ناسية ان ريلج ليحين بالجامعة..
قمر:ادري..بس اشفيها لو ملجنا الحين وعقب اربع شهور تزوجنا..
جواهر:ومن وين يصرف عليج؟
قمر:لاتلوميني..احبه وايد..ماعرف ليش..ولما دخل العرس الناس كلها تطالعه كان ودي اصارخ واقول تراه لي انا وبس..
جواهر:الله يجمعكم على خير ان شاء الله..
قمر:وايش بتلبسين يوم الملجة؟
جواهر:ماادري..بروح اشتري لي فستان جاهزة..ايش رايج باجر الصبح نروح السوق..
قمر:اوكي..بس من بيودينا؟
جواهر:نقول حق يوسف يهدنا ويروح يخلص اشغاله..
قمر:ماراح يوافق يخلينا بروحنا..
جواهر:من وين اشتري؟
قمر:خلينا نروح الستي يمكن حصلتي..
في الكوفي شوب...
تميم(يشرب):بسألك سؤال..
وليد:تفضل..
تميم:انت تعتقد اللي تسويه صح؟
وليد:شنو اللي قاعد اسويه؟
تميم:انك تعلق البنت وعقب مايكون بينكم نصيب..انت تعذبها ياوليد..
وليد(هد الكوب وسكت شوي وعقب):ايش تبيني اسوي..اقولهم خلاص ماابيها علشان بموت قريب..
تميم:وليد رجاءا بلا هالكلام اللي ماله معنى..
وليد:ايش تبيني اقول..انا ابي اعيش ياتميم ابي اعيش..(وقام)



تميم دفع الحساب وراح وراه لين ماطلعوا وركبوا السيارة....
تميم(شاف التعب على وليد):وليد انت تعبان؟
وليد:وقف مكان ننزل نشم هواء..
تميم نزل عند الكورنيش ..
وليد(يتمشى عند البحر)




وليد ظل يفكر وهو يتأمل بمنظر البحر وبهالجو..شريط ذكرياته قاعد يمر جدامه..دمعته على خده..تذكر كل الناس اللي كانوا حوله..كل واحد يعرف وليد..
تميم:وليد اذا تعبان اوديك المستشفى..
وليد:اخاف يرقدوني..وحزتها الكل بيلتم حولي وبيعرفون كل شي..
تميم:انزين انا اقولك شي..اتصل على امك وقولها انك بترقد معاي في الشاليهات..وانا بخبر امي بعد..علشان محد يعرف انك في المستشفى..
وبالفعل هذا اللي صار ..تميم خذاه المستشفى...وليد يقوم من السرير ويقعد والتعب باين عليه...
تميم:دكتور طمنا..
الدكتور:وليد لازم يدخل المستشفى..
وليد:ليش دكتور؟
الدكتور:انت تعبان ومحتاج راحة شوي..ولازم نسوي لك تخطيط قلب وبعض الفحوصات الضرورية..انا قاعد اكتب لك على ورقة دخول..وان شاء الله خير..
في بيت محمد...
مريم(تضيف امها وابوها):تفضل يبه..
بوعبدالعزيز:مشكورة..
مريم:تفضلي يمه..
ام عبدالعزيز:مشكورة حبيبتي..
مريم(تقعد):وين وليد؟
ام عبدالعزيز:قال بيروح الشاليهات مع تميم..
مريم:وعبدالعزيز؟
ام عبدالعزيز:عبدالعزيز قال بييكم مع اسماء يوم ثاني..
بوعبدالعزيز:لانطول ياام عبدالعزيز..
محمد:ليش عمي..تو الناس..استانسنا بييتكم..
ام عبدالعزيز:انتوا عرسان ولازم مانطول عندكم..(قامت)..ياللا يابوعبدالعزيز نمشي..
بوعبدالعزيز(قام)
مريم:سلمي عليهم..
ام عبدالعزيز:يوصل..
في المستشفى...يكون وليد راقد على السرير..وتيي الممرضة...
وليد:شنو ذي؟
الممرضة:دي ابرة مغذي..مافيش حاقه تانية..هات ايدك..
تميم قعد يفكر بوليد..اللي مايندرى حالته لوين بتوصل...وعقب ماراحت الممرضة...
وليد:تميم اخاف اموت ومااشوفهم..
تميم:وليد ترى اهدك..
وليد:خلني اقول اللي بخاطري..في اشياء وايدة ماسويتها..
تميم:ان شاء الله بتكون بخير..
وليد:انا ابي اعيش..ابي اعيش ياتميم..حرام علي اعذبها..
تميم:وليد بسألك سؤال وجاوب بصراحة..انت اللي رفضت تملج بقمر ولا ابوها؟
وليد(وهو يطالع السقف ومتألم على حاله):أنا..
تميم(تفاجأ):ليش؟
وليد:قلت عقب احسن..يمكن حالتي توضح اكثر اذا اقدر اعيش ولا لا..والحين اكتشفت اني مااقدر اعيش اكثر..وزين اني ماملجت..
تميم:بس هي بإسمك الحين..
وليد:ايش تبيني اسوي؟..اقولهم خلاص مااقدر اتزوجها..مااقدر ياتميم..الكل بيشك فيني..ليش غيرت رايي..وهي مو حرام عليها اخليها تعيش بصدمة..
تميم:مااعرف شاقولك..
وليد:خلينا على هالحالة..لأن مابقى شي يمكن شهر او اقل..
الصبح في بيت بوعبدالعزيز...



ام عبدالعزيز تتريق مع ريلها...
ام عبدالعزيز:قلبي مقبوض على وليد..ماادري ليش احاتيه..
بوعبدالعزيز:ولدج ريال..قومي اتصلي فيه وتطمني..
وتروح تتصل...
ام عبدالعزيز:السلام عليكم...هلا يمه اشلونك؟
وليد:بخير..انت اشلونج؟
ام عبدالعزيز:الحمدلله..شتسوون راقدين؟
وليد:أي يمه راقدين..
ام عبدالعزيز:عيل مااطول عليك بس كنت ابي اتطمن عليك..بغيت اقولك امس رحنا عند مريم وسلمت عليك..
وليد:الله يسلمها..وسلمي على ابوي...ان شاء الله..مع السلامة..
الممرض(يدخل):الدكتور جاي عقب شوية..
تميم:مشكور..
وليد:ماادري ليش احس ان امي حاسة ان في شي..
تميم:قلب الام..
الدكتور يدخل...
الدكتور:السلام عليكم..
الجميع:وعليكم السلام..
الدكتور(يفتح ملف وليد):اشلونك ياوليد؟
وليد:بخير..
الدكتور:تفاجأت لما خبروني ان رقدوك هني..
وليد(بضيق):دكتور..تكفى قولي ايشقد بعيش..
الدكتور(ناظر تميم وتألم على وليد):وليد الاعمار بيد الله..
وليد:يعني بالتقريب قلبي ايشقد بيعيش؟؟
الدكتور:خلني اكشف عليك وانسوي تخطيط قلب وعقب يصير خير..
في بيت محمد...
مريم:محمد حبيبي..اليوم ترى معزومين بيتكم..
محمد:ادري..
مريم:متى رايحين؟
محمد:عقب الصلاة ان شاء الله..
في بيت بوعلي..



كل عياله يلتمون علشان عزيمة العرسان..الحريم يقعدون بروحهم والرياييل بروحهم..
العنود:اقولج مريم..ليلة عرسكم تقولي رفيجتي مرت اخوج وايد حلوة..قلت لها اكيد..
مريم:تسلمين..عيل وين نورة؟
العنود:الحين بتنزل..
لطيفة:مب مسافرين؟
مريم:لا والله..ان شاء الله في الربيع..
لطيفة:ليش العلاج طول؟
مريم:لأن الطيحة كانت جايدة..بس الحمدلله الحين اشوه من قبل..
لطيفة:الحمدلله..انا استغربت يوم يقولي محمد ان مريم بتدخل جذي..قلت له اشلون تقدر تمشي..قالي مايخصني..هذا مو عذر انا تعبت من الانتظار..
مريم(استحت)
العنود:يحليله اخوي..
نورة(تنزل وتسلم على مريم):اخبارج؟
مريم:الحمدلله اخبارج انت؟
نورة:الحمدلله..تفضلي..وين خالتي؟
العنود:داخل في المطبخ..
نورة(قامت):ليش هادينها بروحها؟
لطيفة:تعالي امي ماقاعدة تسوي شي..
نورة:بشوفها وبيي..
راحت المطبخ..شافت خالتها مع محمد...
نورة:السلام عليكم..
محمد:وعليكم السلام..هلا نورة اشلونج؟
نورة:بخير انت شاخبارك؟..مبروك..
محمد:الله يبارك فيج..ياللا يمه انا داخل المجلس..
نورة:خالتي تبين اساعدج؟
ام علي:تسلمين حبيبتي..كل شي جاهز..
نورة:عيل تعالي نقعد عند العروس..
في المستشفى....



تميم(قام)
وليد:وين؟
تميم:بروح اشرب ماي وبرد..تبي شي؟
وليد(سكر عيونه):لا..
تميم طلع..وراح لعند الدكتور...دق الباب ودخل...
تميم:السلام عليكم..
الجميع:وعليكم السلام..
تميم:دكتور بغيت أسألك عن حالة وليد..
الدكتور:تفضل..
تميم(قعد)
الدكتور:انت ايش تقرب له؟
تميم:خاله..
الدكتور:اسمعني يا..
تميم:تميم..
الدكتور:اسمعني ياتميم..الحقيقة مرات تكون مرة..وانا بقولك الحقيقة..صحيح ان العملية اللي سواها وليد نجحت بس كانت مؤقته..يعني قلبه مايقدر يستمر في النبض اكثر من جذي..
تميم:يعني شنو؟
الدكتور:وليد مابقى له شي..القلب قاعد يضعف..وبيي يوم وهالقلب ماراح ينبض..
تميم(حس كالصاعقة في وجهه):يعني خلاص مافي امل؟؟
الدكتور:اذا حصل قلب وايد زين..
تميم:دكتور حالته تتحمل السفر؟
الدكتور:تبي توديه برع؟
تميم:أي دكتور..يمكن سبحان الله حصلنا نتيجة طيبة..
الدكتور:يقدر يسافر..بس خله يرتاح يومين هني وعقب تقدرون تسافرون..
تميم:دكتور ترى هله مايدرون شي عن حالته..
الدكتور:يكون احسن..
تميم(يقوم ويسلم عليه):مشكور دكتور..بس ايشقد بيتم هني؟
الدكتور:خليه لباجر ونشوف شيصير..
تميم:مع السلامة..
الجميع:مع السلامة..
وراح غرفة وليد..حصلاه راقد..قعد على الكرسي وطلع تليفونه...
وليد(وهو مسكر عينه):ايش قالك؟
تميم:انت قاعد؟
وليد(فتح عينه):ايش قالك الدكتور؟
تميم:ومن اللي قالك اني كنت عند الدكتور..انا قلت لك بروح اشرب ماي..
وليد(سكت)
تميم:وليد ابي اطلب منك طلب وماابيك ترفضه..
وليد(وهو مسكر عينه):شنو؟
تميم:بالاول توعدني ماترفضه..
وليد:ماراح ارفضه..قول..
تميم:ابيك تسافر معاي..
وليد(فتح عينه وقام قعد):وين؟
تميم:نسافر لندن..
وليد:ليش؟
تميم:علشان تتعالج..
وليد:ومن اللي قالك ان ابي اتعالج؟
تميم:وليد انت قلت ماراح ترفض طلبي..
وليد:تميم مااقدر اسافر..تبيني اموت وانا بعيد عنهم..
تميم:مابصير فيك شي..بنروح ونشوف شيقولون لك وعقب يصير خير..وليد ارجوك لاترفض..بس هالطلب..
وليد:وهلي؟
تميم:ماعليك انا برتب الامور كلها..وبنقولهم ان طالعين سياحة..ومحد راح يدري..وانت تظاهر انك بصحة زينة ومافيك شي علشان محد يشك..
في هالايام كانت جواهر مشغولة بمساعدة خواتها علشان ملجتها...ويوم ملجتها...في بيت محمد..كانت مريم تزهب عمرها....
محمد(قاعد على السرير ويطالعها):لاتطلعين كل جمالج..أخاف يحسدونج..
مريم(تبتسم له):فديت اللي يخاف علي..
محمد:زوجتي مب لازم اخاف عليج..من صجي مريم..
مريم:ان شاء الله تامر..بس اعدل نفسي شوي..رايحة ملجة بنت خالتي..
محمد:عيل في عرس وليد ايش بتسوين؟
مريم:اوه لذاك اليوم بتشوفني انسانة ثانية..
محمد:كل هذا علشان وليد؟
مريم:فديت اخوي يستاهل كل خير..(قعدت على الكرسي وتكلمه من المنظرة)..تصدق محمد يوم تعب وليد احس قلبي اللي تعب..لاتزعل لأني اقول هالكلام عن اخوي جدامك..بس احنا اخوان..
محمد:انا مب زعلان لأني متأكد من حبج لي..
مريم(تقوم وتكمل شغلها):ياسلام على الثقة..
محمد(يقرب منها وياخذ الكحل منها):ليش مب صج؟
مريم(تاخذ منه):يمكن..
محمد(خذ الكحل وحطاه على التسريحة ومسك كتوفها):نعم؟؟
مريم(تضحك):ألعب معاك..انا مالي الا قلب واحد وهو لك..
محمد:الحين كملي شغلج..
مريم(تكمل شغلها):مب جاي معاي؟
محمد:والله يوسف أكد علي..والظاهر اني رايح معاج..
في بيت بويوسف...جواهر كانت كاشخة باللون الذهبي..وكانت قاعدة في غرفتها...وفاطمة وقمر ومريم وموزة عندها....
مريم:عقبال ملجة اخوي..
قمر(استحت)
مريم:فديت المستحي..ياللا مابقى شي..كلها شهرين وتكونون لبعض..
امينة(تيي):ياللا جواهر نزلي..
جواهر:خايفة..
فاطمة:ترى اخوي مايخرع..(مسكت يدها)..تفضلي..
ونزلوا تحت...وراحوا قعدوا وين مالناس تنتظر..اليوم ملجة راشد على جواهر...راشد يدخل على الحريم...ويقعد عند جواهر..اللي كانت تتنفض من الخوف..راشد يوم شافها انصدم..
راشد(قال في نفسه:سبحان الله..كل هالجمال..انا محظوظ..ابتسم لها):ألف مبروك جواهر..
جواهر(مستحية):الله يبارك فيك..
راشد:ماشاء الله عليج جميلة..
جواهر(استحت ونزلت راسها)
فاطمة(قربت منهم):ألف مبروك..
راشد:الله يبارك فيج..عقبالج فطوم..
فاطمة:لاحق علي..(ماسكة الكاميرا)..جواهر رفعي راسج..
وقعدت تصورهم..وعقب لبسوا بعض الدبل..وعقب راشد لبسها الشبكة..وعقب قطعوا الكيكة..وعقب راحوا قعدوا في غرفة بروحهم...وجواهر كانت مستحية وايد..
قمر كانت تنتظر اليوم اللي تكون ملجتها هي ووليد..
وعقب اسبوع...في بيت محمد....
محمد قاعد يقرأ الجريدة..ومريم جاية معاها عصير وكيك....
مريم:تفضل..
محمد(يهد الجريدة):مشكورة..
مريم(تقعد وهي تشرب العصير):في اخبار حلوة؟
محمد:ماكو شي جديد..(ياكل الكيك)..
مريم:محمد..
محمد:لبيه..
مريم:احاتي وليد اخوي..
محمد:ليش؟
مريم:ماادري..صار له اسبوع مامبين ولااتصل ولاحتي زارني..كلهم زاروني ويوم الهدية شفتهم كلهم..وخوالي زاروني الا هو..
محمد:اتصلي فيه..
مريم:ماابي..
محمد:ليش؟
مريم:ماادري..
محمد:تركي الوسوسة عنج واتصلي فيه..وعزميه على العشاء..
وليد كان قاعد مع هله في البيت..يرن تليفونه.......
وليد:هلا بهالصوت..
مريم:انت وينك فيه الظاهر انك بايعني..
وليد:أفا ايش هالكلام..بس والله كنت مشغول هالجم يوم..
مريم:تنشغل عني؟..صرت احاتيك..انت الوحيد اللي مب مبين..ولا سائل عني..
وليد:السموحة..
مريم:اذا تبيني اسامحك تقبل عزيمتي..
وليد:يعني لازم؟
مريم:أي لازم..ومحمد يقولك غصب عنك..
وليد:انزين قبلنا ومتى؟
مريم:الليلة..
وليد:خلاص جاي..كل شي ولامريومه تزعل..ماراح انسى..مع السلامة..
ام عبدالعزيز:متى مسافر؟
وليد:باجر ان شاء الله..(شاف الحزن بعين امه قام وراح قعد عندها)..الغالية زعلانه؟
ام عبدالعزيز:ماني زعلانة..بس بشتاق لك..
وليد:حتى انا بشتاق لج..بس شسوي انت تعرفين اخوج لما يصر على شي..لزم علي السفر معاه..
ام عبدالعزيز:والجامعة؟
وليد:ماني مطول يوم السبت..بالكثير الاثنين برد ان شاء الله..
ام عبدالعزيز:ومايحسبون عليك الغياب؟
وليد:لاتخافين ولدج وليد عارف شيسوي..
ام عبدالعزيز:عاد يمه نبيك تشد حيلك بالدراسة علشان تتخرج وتتزوج..
وليد:ان شاء الله بتفرحين فيني..تسمحين لي اروح اجيب موزة من الجامعة؟
ام عبدالعزيز:روح..ودير بالك في الطريج..
وليد:ان شاء الله..مع السلامة..
ام عبدالعزيز:في حفظ الله ورعايته..
في بيت محمد...عقب العشاء.....
وليد:سفرة دايمة..تسلم ايدج..
مريم:ترى مو انا اللي طابخة..
وليد(يضحك):ادري..
مريم:والله؟
وليد:العب معاج..تسلم جيب ريلج..
محمد:في هذي معاك حق..
ويقعدون ...ومريم تجيب لهم حلو..وياكلون....
وليد:مريم بغيت اقولج اني باجر مسافر..
مريم(هدت الشوكة وفجت عينها):نعم؟
وليد:باجر مسافر..
مريم:ليش؟
وليد:شنو اللي ليش؟
مريم:ليش مسافر؟
وليد:دوارة..
مريم:والجامعة؟
وليد:ماني متأخر على الاحد او الاثنين بكون موجود..
مريم:وين بتروح؟
وليد:لندن..
مريم:لندن!!..وشموديك هناك؟
وليد:تميم..
مريم:بتروح وياه؟
وليد:أي هو عنده شغل فأصر يوديني معاه..
مريم:دير بالك وانت هناك..
وليد:ان شاء الله..ايش رايك يالنسيب انت ومريم تييون معانا..
محمد:ياريت..بس انتظر ريلها تتحسن..
ومع مرور ايام...
في بيت بويوسف....جواهر وقمر..يردون من الجامعة...
ام يوسف:اشلون دوامكم؟
قمر(تقعد):متعب كالعادة..ماادري متى اتخرج..
ام يوسف:متى بتخرجين؟
قمر:ان شاء الله الفصل الجاي..ادعي لي يمه..
ام يوسف:دوم ادعي لكم..وانت جواهر؟
جواهر:عقب سنة وصيفي ان شاء الله..
ام يوسف:عيل متى بتعرسين؟
جواهر:ماادري ليحين مااتفقت مع راشد..
ام يوسف:قمر تدرين ان وليد مسافر؟
قمر(استغربت):مسافر!!..وين؟
ام يوسف:راح لندن مع خالج تميم..
قمر:من متى؟
ام يوسف:من جم يوم..
قمر:وليش رايحين؟
ام يوسف:ماادري تقول خالتج تميم كان عنده شغل وخذاه معاه..
قمر:ومتى بيردون؟
ام يوسف:على الاسبوع الجاي..
جواهر:الله يردهم بالسلامة..
ام يوسف:تغديتوا؟
جواهر:انا ماتغديت..شنو غدانا؟
ام يوسف:مجبوس دجاج..
جواهر:ياسلام انا ميتة جوع..ثواني ببدل ونازلة..
ام يوسف:وانت قمر؟
قمر(بضيق):أنا تغديت..(قامت)..رايحة ابدل..
في لندن...



في المستشفى..عقب الفحوصات...تميم يدخل على وليد اللي كان يصلي...وعقب ماخلص شاف تميم قاعد يلعب في تليفونه...
وليد(يحط السيادة على الطاولة):ايش قالك الدكتور؟
تميم:ولاشي..
وليد(يقرب منه):سكر اللي في يدك وطالعني..
تميم(حط تليفونه في مخباته):نعم..
وليد:قولي الصج..ايش قالك الدكتور؟؟
تميم:يقول احتمال يسوون لك عمليه ثانية..
وليد(يقعد على السرير):عيل خلنا نرد البلاد..
تميم:ليش؟؟
وليد:وتسألني ليش؟..انت تعرف اني ماراح اوافق اني اسوي العملية..
تميم:وليش مب موافق..انت سويت الاولية..
وليد:اسمعني تميم..مب شرط اذا الاولية نجحت هذي بعد تنجح..بالعكس هالعملية نجاحها ضئيل وايد..لأن القلب تعبان اكثر من قبل..ومن قبل سويت عملية فاحتمال كبير القلب مايقدر يتحمل عملية ثانية..
تميم:ماشاء الله عليك عارف كل شي..وكأنك كنت واقف معانا..
وليد:شفت يعني كلامي نفس كلام الدكتور..علشان جذي خلني ارد البلاد واكون جنب هلي احسن لي..وماكو فرق بين علاج هني وعلاج هناك..قوم روح كلمهم وخلنا نطلع..
تميم:انتظر شوي..الدكتور قال بيشوف اذا حصلوا قلب..
وليد:عندك امل..
تميم:املي بالله..
وليد:ونعم بالله..
في بيت بويوسف..قمر قاعدة على سريرها وضامه نفسها وهي تفكر في وليد...
قمر:وليد..احس ان فيك شي..سفراتك هذي وراها شي..يارب تكون بخير..وترد بالسلامة..خايفة عليك وايد..
في بيت محمد...مريم قاعدة مع محمد يسولفون..
مريم:لاتنسى اليوم الخميس بنروح بيت ابوي..
محمد:وبيت ابوي؟
مريم:باجر ان شاء الله..
محمد:ان شاء الله..
اليوم الخميس اللمة في بيت بوعبدالعزيز...
عند الحريم....
مريم:ماعجبتكم الاناشيد اللي حطيتها في العرس؟
خولة:بالعكس كانت وايد زينة..
مريم:انا بصراحة ماقدرت اسوي شي من دون رضى محمد..دام هو اللي دافع وطالب مني هالشي مااقدر اسوي اللي ابيه..
ام عبدالعزيز:زين سويتي يمه..
ام سالم:أخبار وليد؟
ام عبدالعزيز:الحمدلله..اليوم كلمته..
مريم:قمر اشفيج؟
قمر:مافيني شي..
مريم(همست في اذنها):تعالي نروح فوق..
وراحوا غرفة مريم...وقعدوا.....
مريم:اشفيج؟؟




ياترى قمر بتتكلم عن اللي في خاطرها لمريم؟؟
وشنهي التطورات في حالة وليد؟؟

لاتباعدون..تابعونا.

[اسطورة !]

**فصل العشرون**

وراحوا غرفة مريم...وقعدوا.....
مريم:اشفيج؟؟
قمر:ماادري..حاسة بضيق..
مريم:ليش؟
قمر:شنو سبب سفرة وليد؟
مريم:مشتاقة له؟
قمر:السبب مو الشوق..وليد بخير؟
مريم(استغربت سؤالها):ايش قصدج؟
قمر:اشلون صحته؟
مريم:الحمدلله..ليش تسألين انت سامعة شي؟
قمر:لا..بس سفراته وراء بعض شككتني..
مريم(فكرت بالسالفة):لاتخافين..سفراته مافيها شي..لاتقلقين وايد..وان شاء الله بيرد بالسلامة..
يوم الاحد..الكل في الدوام...
في بيت بوسالم....ام سالم قاعدة تقرأ قرآن على الساعة 11 ونص..ومها في المطبخ مع الخدم..وسارة راقدة..تميم يدخل البيت...
تميم(يحب راس امها):اشلونج يالغالية؟
ام سالم:بخير..انت اشلونك؟
تميم:الحمدلله..اشتقت لج..
ام سالم:اشوف رديتوا بسرعة..
تميم:خلصنا شغل..
مها(تطلع من المطبخ):حمدلله على السلامة..
تميم:الله يسلمج ياام سارة..اشلونج واشلون سارة؟
مها:الحمدلله كلنا طيبين..
تميم:يمه انا رايح داري ابدل واتسبح وبروح المسجد..
في الجامعة...



مريم مع فاطمة يتمشون لين ماقعدوا في الكافتيريا يشربون عصير..
مريم:متى عرس اخوج؟
فاطمة:ماادري شكلهم ماقرروا..
مريم:مالي خلق احضر محاضرة الساعة 2..
فاطمة:بدى الكسل..كل هذا علشان تزوجتي..
مريم:ودي ارد البيت وازهب الغداء..وعليه محمد بيرد البيت ومابيحصل شي زاهب..
فاطمة:عادي..يروح بيت ابوه يتغدى..
مريم:عيل ليش متزوج هو؟؟..فديته والله..
فاطمة:الاخت عشقانه؟
مريم(تضحك):مالج خص..(طلع تليفونها)
فاطمة:شوفي هالبنت الله ياستر علينا..شمسويه بعمرها هذي..خلت مكياج بالسوق..كيس طحين على وجهها..وجفونها من كثر ماهي ملونه عيونها ماتبين..وشوي بتلبس فستان في الجامعة..
مريم:بسج اغتبتيها..
فاطمة:قاهرتني..شنو هذا..عاد من بيشوفج..
مريم:تقولج اسوي حق عمري..
فاطمة:عاد مو في الجامعة..الله ياستر علينا..
مريم(تتصل):هلا يمه..بخير انت اشلونج؟...الحمدلله...موزة بالجامعة؟...يحليلها..من؟؟..و� �لله..حمدلله على سلامته..ومتى رد؟...صج..في خاطري ايي اشوفه اشتقت له وايد...انا برد على الساعة 3ونص..بحاول..سلمي عليه..مع السلامة..
فاطمة:اخوج رد؟
مريم:أي..تصدقين فطوم شنو جى على بالي؟
فاطمة:شنو؟
مريم:تذكرين آيس كريم المانجا ماركة غدير؟
فاطمة:ايي..يوم كنا صغار كنا ناكله...لكن الحين وينه مافي..
مريم:أي والله..مشتهيته..
فاطمة(فجت عينها):مريوم ليكون انت....
مريم(عصبت):لاطبعا..
فاطمة:ليش لا طبعا؟؟
مريم:مو وقته..
فاطمة:انزين بنشوف..
مريم:انتي سكتي..ماعندج شي زين لاتقولينه..
فاطمة:الله يسامحج..
في مكتب محمد...وهو يشتغل...يسمع صوت المسج..يطلع تليفونه من مخباته ويفتحه...
قالوا اتمنى..
قلت اتمنى لروحي السعادة..
واتمنى انها ماتفارقني لأني بدون روحي مااعيش..
قالوا مافي حد يموت في نفسه هالكثر!!
قمت اضحك واقول...
ياناس أنا اقصد روحي اللي يقرا الرسالة..
المرسل:مريم..
محمد استانس وابتسم..
عيسى:عيش ياعم..احلى حياة هذي..
محمد:كمل شغلك..
في الجامعة مريم تسمع صوت المسج...
ان وصفتك كذبوني..وان مدحتك عاتبوني..يحسبون اني ابالغ..مادرو انك عيوني..
مريم تشققت من الوناسة..
فاطمة:شمطرش حبيب القلب..
مريم:تعالي انت مب وراج محاضرة؟
في بيت بوعبدالعزيز...



بوعبدالعزيز يرد من الدوام....
ام عبدالعزيز:ترى وليد رد من السفر..
بوعبدالعزيز:زين..وينه؟
ام عبدالعزيز:في غرفته..قال بينام..
بوعبدالعزيز:الغداء زاهب؟
ام عبدالعزيز:أي نعم زاهب..
بوعبدالعزيز(وهو يمشي وقف):وموزة ماردت؟
ام عبدالعزيز:لا..بترد العصر ان شاء الله..
راح بوعبدالعزيز واول مابغى يفتح باب غرفته قرر انه يروح عند وليد..دق الباب...
وليد:تفضل..
بوعبدالعزيز(فتح الباب حصل وليد منسدح على السرير):السلام عليكم..



وليد(قام وراح يحب راس ابوه)
بوعبدالعزيز:حمدلله على السلامة..
وليد:الله يسلمك يبه..حياك..
بوعبدالعزيز(قعد على الكرسي):اشلونك؟
وليد:بخير..
بوعبدالعزيز:ايش سويتوا في سفرتكم؟
وليد:ولاشي..تعبنا وقررنا نرد..
بوعبدالعزيز(وعينه بالارض):مارحت المستشفى؟
وليد(فج عينه وماتوقع هالسؤال)
بوعبدالعزيز:وليد يبه..انا ابوك..ادري اني بعيد عنكم بسبب شغلي لكن والله انتوا في قلبي والشغل هذا كله علشانكم..اعذرني..
وليد(يقرب من ابوه ويدنع):لاتقول جذي يايبه..احنا نقدر ظروف شغلك..وانت بعد في قلوبنا..
بوعبدالعزيز(ييود كتفه):الله يوفقكم..ماقلت لي رحت المستشفى؟
وليد(نزل عينه بالارض وعقب قام):رحت..
بوعبدالعزيز(قام):وايش قالولك؟
وليد:كل خير يبه..
بوعبدالعزيز:يعني حالتك تحسنت عقب العملية؟
وليد(ابتسم):الحمدلله..انت شتشوف..
بوعبدالعزيز(يبتسم له):اشوف ولدي وليد بصحته وعافيته..
وليد:الحمدلله..
بوعبدالعزيز:تغديت؟
وليد:لا..
بوعبدالعزيز:عيل انزل تغدى معانا وعقب نام..
وليد:ان شاء الله..
بوعبدالعزيز وهو يمشي...
وليد:يبه..
بوعبدالعزيز(وقف)
وليد:لاتخبر حد اني رحت المستشفى..
بوعبدالعزيز(استغرب منه):ان شاء الله..
في بيت محمد...مريم في المطبخ..يدخل محمد....
محمد:السلام عليكم..
مريم:وعليكم السلام..هلا والله..
محمد:شتسوين؟
مريم:اطبخ لك العشاء..
محمد:ريحة حلوة..
مريم:ان شاء الله تعجبك الاكلة..
محمد:بتعجبني دام انج مسويتها..مابتروحين عند اخوج؟
مريم:بلا بس اخلص ونتعشى ونروح..
محمد:عيل انا قاعد في الصالة..
في بيت بوسالم....تميم ينزل تحت...
سلطان:بتطلع؟
تميم:يقولون..عطني سارونه (يشيلها ويحبها)
ام سالم:توك راد اليوم..
تميم:بروح الشغل..(يعطي سارة سلطان)
سلطان:ومتى بترد؟
تميم:ماادري..ليش؟
سلطان:نسأل..
تميم:عيل وين ابوي؟
سلطان:عند بوسليمان..
تميم:ياللا مع السلامة..
الجميع:مع السلامة..
وعقب عشر دقايق...تيي الخدامة....
الخدامة:ماما بابا وليد برع..
ام سالم:قوم يمه دخله..
سلطان(قام):ان شاء الله..مها روحي فوق..
مها:ان شاء الله..
ودخل وليد وسلم عليهم وقعد....
ام سالم:اشلونك يمه؟
وليد:بخير..انت اشلونج مشتاقين لج..
ام سالم:اشتاقت لك الجنة..
وليد:عيل وين تميم؟
سلطان:توه من شوي طلع..استانستوا في السفرة؟
وليد:الحمدلله..تغيير جو..
سلطان:اخبار مريم؟
وليد:ماادري..من وقت ماسافرت ماكلمتها الا مرتين..وماشفتها اليوم..
سلطان:انا بعد من زمان ماكلمتها..واخبار موزة مع الجامعة؟
وليد:ماشيه..بس تدري الطب صعب..
سلطان:الله يوفقها..
في بيت محمد....وهم يتعشون....
مريم:ايش رايك؟
محمد:عجيب..ماشاء الله عليج فنانة بالطبخ..
مريم:توك ماجربت شي..
محمد:متى تعلمتي؟
مريم:من وقت ماتخرجت من الثانوية..وانا قاعدة عند امي اتعلم..
محمد:عيل هذا الطبخ من تعليم الوالدة..
مريم:شوي منها وشوي من الكتب..ان شاء الله بس أتخرج بتشوف الانواع الحلوة اللي بتعجبك..
محمد:ماشاء الله عليج..عيل انا محظوظ وايد..
مريم(تبتسم)
محمد:خلنا نخلص علشان نمشي..
مريم(وهي تاكل):سمعت من اختك انك ماتحب الروبيان..
محمد(وهو ياكل):أي نعم..مااحبه كلش..ويوم امي تطبخ لهم روبيان انا تسوي لي سمج..
مريم:بالعكس طعمه رهيب..لازم تجربه..
محمد:لا ولي سلمج كل شي ولا الروبيان..
مريم:ان شاء الله بخليك تغير رايك..وبتشوف..
محمد:مااعتقد..قعدت اختي لطيفة تقنع فيني بأي طريقة بس انا مااقتنعت..
مريم:ان شاء الله على يدي..
محمد:ايش تبين في الروبيان؟؟
مريم:جربه علشان تعرف شابي منه..وان شاء الله يوم السبت روح السوق علشان تشتري لنا روبيان..
محمد:لا ولي سلمج..
مريم:بس انا ابي..انا اموت في الروبيان..
محمد:بشوف..
في بيت بويوسف...قاعدين يسولفون..ينزل يوسف....
يوسف:يمه انا طالع تامريني بشي..
ام يوسف:وين؟
يوسف:بروح عند وليد..
قمر(عينها على اخوها بكل اهتمام)
ام يوسف:وليد رد؟
يوسف:أي يمه اليوم رد من السفر..ياللا انا رايح..
بويوسف:دير بالك في الطريق..في ناس ماترحم..
جواهر:عيل وين امينة؟
يوسف:الحين بتنزل..
في بيت محمد...واقف ينتظر مريم...مريم جات وقفت عنده..
مريم:آسفة تأخرت..
محمد:حلوة العباية..من وين؟
مريم:لما سافر عبدالعزيز مع زوجته دبي قبل عرسنا وصيتهم على جم عباية..
محمد:وايد حلوة..
مريم:صممتها بس عشانك تحب هالانواع..
محمد:شسوي مااحب الالون احسها تلفت الانظار..
مريم:اللي يامرني فيه زوجي انا حاضرة..
محمد:تسلمين حبيبتي..نمشي؟
مريم:نمشي..
في بيت بوعبدالعزيز...مريم قاعدة مع خواتها وامها...
مريم:قولي لي اشلونج مع الجامعة؟
موزة:اوكي..بس شوية صعبة الدراسة..
مريم:طبعا هذا طب مو أي شي..الله يوفقج..
هالة:وانت مريوم اشلون دراستج؟
مريم:توني بادية..
منيرة:شدي حيلج وتخرجي علشان تفتكين..
مريم:ان شاء الله..
خولة:بتشتغلين؟
مريم:شور..
خولة:وين؟
مريم:ماادري..خلني اتخرج بالاول وعقب يصير خير..
ام عبدالعزيز:قومي هالة شوفي اسماء ليش مانزلت..
هالة(قامت):ان شاء الله يمه..
مريم:عيل وينه وليد ليش مايي؟
ام عبدالعزيز:ولد خالتج عنده..
يندق الباب...
اسماء:منو؟
هالة:انا هالة..
اسماء(تمسح دموعها):حياج هالة..
هالة(تدخل وتشوف اسماء مو طبيعية):اسماء وينج ليش ماتنزلين؟
اسماء:الحين بنزل..
هالة:اسماء اشفيج؟
اسماء(دموعها تنزل)
هالة(تقرب منها):اسماء اشفيج تصيحين؟
اسماء:عمي ياهالة..
هالة:اشفيه؟
اسماء:تعبان وايد..وهو في العناية..(بدت تبجي)
هالة:ان شاء الله ماعليه شر..من خبراج؟
اسماء:اختي توها اتصلت فيني..وتقول بنات عمي وايد تعبانين ومتضايقين علشان ابوهم..
هالة:اشلون حالته؟
اسماء:وايد تعبان..(تمسح دموعها)..الله يشافيه..
هالة:آآآمين..عيل بخليج ترتاحين..
ونزلت تحت...
ام عبدالعزيز:وينهي مرت اخوج؟
هالة:يمه اسماء متضايقة وماتقدر تنزل..
ام عبدالعزيز(اخترعت):ليش؟؟
هالة:تقول عمها وايد تعبان..
ام عبدالعزيز(قامت):وعليه..انا بروح لها..
منيرة:اشفي عمها؟
هالة:ماادري تقول وايد تعبان..وبناته متضايقين علشانه وايد..
منيرة:الله يصبرهم..
مريم(قامت):انا بروح لها فوق..
وراحوا كلهم....الا هالة اللي تمت تخبر عبدالعزيز..عبدالعزيز طلع من المجلس....
عبدالعزيز:خير؟
هالة:روح عند مرتك..
عبدالعزيز(استغرب):ليش؟
هالة:متضايقة شوي..
عبدالعزيز:ايش صاير؟
هالة:عمها شوي تعبان..
عبدالعزيز:عمها!!..وينهي فوق؟
هالة:أي..
عبدالعزيز راح فوق..شاف اسماء تبجي وهي عند امه..وخواته كلهم حوله....
عبدالعزيز(وقف جدامها):اسماء ايش صاير؟
اسماء(بضيق):عمي عبدالله..وايد تعبان ياعبدالعزيز..وحالته صعبه..وهو في العناية الحين..
عبدالعزيز(تضايق):الله يشافيه..
اسماء(تبجي)
عبدالعزيز(دنع لها ومسح دموعها):اسماء ادعي له الله يشافيه..قومي نروح لهم..
اسماء:توديني؟
عبدالعزيز:قومي..
ويروحون المستشفى...ويوسف يطلع من بيت خالته...ويروح وليد يقعد عند خواته....
مريم:وين الصوغة؟
وليد:أي صوغة؟؟
مريم:لا والله..تروح لندن وتيي من غير صوغة؟
وليد:ليش انت تبين..على اساس انج كبرتي..صرتي مرة..
مريم:لاحبيبي انا ليحين صغيرة..
وليد:لاتخافين صوغتج فوق في الدار..
ام عبدالعزيز:محمد في المجلس؟
وليد:أي يمه..
مريم:وهاد ضيفك وياي تقعد..زعلت..
وليد:السموحة عمتي..
مريم(قامت)
وليد:وين؟
مريم:بروح دارك..بجيب الصوغة..
وليد:مب احسن لج..
مريم(راحت فوق)
منيرة:ليحين ماداومت؟
وليد:لا ليحين..باجر ان شاء الله..
خولة:وليد ايش رايك تملج بقمر الحين وعقب التخرج تزوجوا..
وليد:ومن وين اصرف عليها؟
منيرة:ليش انت ماتبي تشتغل؟
وليد:لين مانحصل وظيفة يصير خير..
هالة:عادي اشتغل مع تميم لين ماتخرج وتشتغل في مكان..الامور مسهلة جدامك..
وليد(قام):افكر..
موزة:وين؟
وليد:بروح اشوف مريوم شتسوي..
راح فوق شافها قاعدة على الكرسي اللي جدام الدريشة..
وليد:حلفي..
مريم:على ايش؟
وليد:وانا كل ماادخل غرفتي احصلج قاعدة مناك..
مريم(تبتسم):أحب هالمكان..ماادري ليش..
وليد(قعد على السرير ومجابلها):اشلونج؟
مريم:بخير..انت اشلونك؟
وليد:الحمدلله..
مريم:بكرة وراك دوام..
وليد:أي نعم..محمد يوصلج؟
مريم:yes ..
وليد:جيد..واشلون معاج الجامعة؟
مريم:توني..شد حيلك علشان نتخرج جميع..
وليد:اكيد علشان نسوي حفلة عودة..حفلة مختلطة..ايش رايج؟
مريم:اكيد..وانا لابسه الفستان وكاشخة وزوجتك بعد لازم تكشخ في يوم تخرجك..وياسلام على الحفلة..بتكون رهيبة..
وليد:وانت صدقتي ها..مجنون انا..
مريم:قولي ايش جبت معاك من لندن؟
وليد(قام وخذ الكيس اللي جنب الطاولة):تفضلي..
مريم:شنو ذي؟(تفتح الكيس)..واو..فديتك..كوافي..يا� �لام عليك..
وليد:هذي كوافي لندن..استمتعي وانت تاكلينهم..
مريم:اكيد..(قامت)..خلني انزل..
وليد:ليش؟
مريم:باجر محمد وراه دوام من الصبح..ولازم يرقد من وهل..
وليد:ياعيني على الزوجة..
مريم(استحت):وخر..
ونزلوا تحت...
مريم:ماكو اخبار عن عم اسماء؟
موزة:لا..
مريم:ياللا يمه احنا ماشيين..
ولما يردون...قاعدين على السرير...تاخذ مريم تليفونها وتتصل على عبدالعزيز.....
مريم:هلا عبدالعزيز...طمني على عمها....الله يشافيه ان شاء الله انتوا وين؟...دير بالك وانت راد الدنيا ليل...مع السلامة..
محمد:ايش قالج؟
مريم:يقول ليحين في العناية وحالته مو مستقرة..الله يشافيه..قطعت قلبي وهي تصيح..عمها هذا ماعنده صبيان..عنده ثلاث بنات وحدة منهم متزوجة..مساكين الله يعنيهم..
محمد:وين امهم؟
مريم:امهم متوفيه من زمان..
محمد:الله يصبرهم..
مريم:آآآمين..
عقب صلاة الفجر...عبدالعزيز يرد البيت..ويدخل غرفته يحصل اسماء قاعدة على السجادة وهي تبجي...راح وقعد عندها....
عبدالعزيز:اسماء حبيبتي لاتبجين..
اسماء:مااقدر ياعبدالعزيز..هذا عمي اللي كان مثل ابونا..اللي ماقصر علينا بشي من عقب وفاة ابوي الله يرحمه..كنا مثل عياله..الحين احنا ولاشي..بناته المساكين اشلون يقدرون يعيشون من غير ابوهم..وهم مالهم حد لا ام ولااخو..
عبدالعزيز:عمج ان شاء الله بيتشافى..وبتتحسن حالته..وبعدين ربج معاهم..ربج كريم ورحيم بعباده..ياللا قومي..اتصلي فيهم وشوفي اخبارهم..
اسماء طلعت يلالها وراحت تتصل في بنت عمها...
اسماء:السلام عليكم...اشلونج سلوى؟
سلوى(والتعب والضيق باين على صوتها):هلا اسماء..
اسماء:اخبار ابوج؟
سلوى(دموعها تسبق كلمتها):ابوي..الله يعينه..ليحين مثل امس..ماتغير شي..
اسماء:سلوى ادعي له الله يقومه بالسلامة..
سلوى:وانت بعد ادعي له يااسماء..احنا مالنا حد بهالدنيا غيره..
اسماء(بحزن):الله يشافيه ان شاء الله..انت وينج؟
سلوى:عنده بالمستشفى..
اسماء:من معاج؟
سلوى:معاي نورة(اختها)..
اسماء:اذا بغيتي شي اتصلي على طول..لاتستحين..انا على الصبح بييكم..
سلوى:تسلمين اسماء..
اسماء:سلمي على نورة..
سلوى:يوصل..مع السلامة..
اسماء:مع السلامة..
الصبح في بيت بويوسف...الساعة 7 قاعدين يتريقون...
يوسف(قام):مع السلامة..
ام يوسف:دير بالك وانت في الطريق..
قمر:يمه وين ابوي بنتأخر..
ام يوسف(قامت):بروح اشوفه..
جواهر:ساعة جم بتخلصين؟
قمر:2 وانت؟
جواهر:انا قاعدة لين اربعه..
قمر:ليش؟
جواهر(تشرب الشاي):عندي واجب وماني فاهمته فوحده من البنات بتقعد تشرح لي..
قمر:يعني بانتظرج؟
جواهر:شسوي؟
قمر:انا ابي ارد البيت ماابي اقعد في الجامعة..
جواهر:وانا شسوي لج؟
قمر:يبي لي آخذ ليسن..
ام يوسف:ياللا قوموا ابوكم جاي..
جواهر:مابيتريق؟
ام يوسف:لا ابوج صايم..اليوم الاثنين..
في بيت بوعبدالعزيز...اسماء تنزل....
اسماء:صباح الخير عمتي..
ام عبدالعزيز:صباح النور..هلا اسماء..اشلونج؟
اسماء:بخير..
ام عبدالعزيز:واخبار عمج؟
اسماء:مثل ماهو..وانا الحين رايحة له..
ام عبدالعزيز:تطمني ان شاء الله ماعليه شر..
اسماء:عمتي..مشعل راقد..والخدامة عنده..
ام عبدالعزيز:روحي يمه وتطمني..من بيوصلج؟
اسماء:عبدالعزيز راح يوصل الياهال وبيرد يوديني..
في الجامعة...مريم وهي تمشي تتكلم في التليفون....
مريم:انت وينج؟...وين مااشوفج؟....اي خلاص شفتج ياللا مع السلامة..
تروح تقعد عندها...
مريم:ايش عندج في الكافتيريا من الصبح؟
فاطمة:ماتشوفين قاعدة اتريق..
مريم:وليش ماتريقتي في البيت؟
فاطمة:مالحقت زين بس راشد قطني وراح دوامه..
مريم:اخبارج؟
فاطمة:بخير..وانت؟
مريم:بخير..
فاطمة:متى بتردين اليوم؟
مريم:مو على اساس بنخلص 2 ؟
فاطمة:لاحبيبتي انا اليوم بطلع على 11 ونص..
مريم:ايش عندج؟
فاطمة:موعد اسنان..
مريم:وانت ماخلصتي من التقويم؟
فاطمة:لا..
مريم:ومتى بتخلصين..انا لاعت جبدي انت مالاعت جبدج؟
فاطمة:خلاص تعودت عليه..
مريم:متى بتشيلينه؟
فاطمة:ماادري يمكن عقب جم شهر..
مريم:ومن بياخذج؟
فاطمة:راشد فديته..قالي بيستأذن من شغله..
مريم:يعني انا بتم بروحي؟
فاطمة:اشتغلي في المشروع..
مريم:وشسوي بالمشروع بروحي؟
فاطمة:يعني شوي تخففين عني الشغل..
مريم:لاحبيبتي..انا بعد برد البيت..بنخلص جميع انت تروحين موعدج وانا ارد البيت..
فاطمة:ومن بيمرج؟
مريم:بشوف وليد اخوي..ياللا خلصي علشان نخلص شغلنا..
في المستشفى...
اسماء:سلوى طمنيني على ابوج..



شنهي المستجدات في حالة عم أسماء؟؟
وحياة وليد..وحياة مريم ومحمد وجواهر وراشد..وغيرهم....

خلكم معانا..

[اسطورة !]

**فصل الحادي والعشرين**

في المستشفى...
اسماء:سلوى طمنيني على ابوج..
سلوى:ليحين الدكتور ماوصل..
اسماء:وين نورة؟
سلوى:راحت تشتري ماي..
اسماء:من كثر ماني قلقانة نسيت اييب لكم ريوق..
سلوى:مانبي شي..بس نبي ابوي..
اسماء:بيقوم بالسلامة ان شاء الله..
سلوى:ان شاء الله..الله يسمع منج..
الدكتور يوصل....
سلوى:دكتور الله يخليك طمنا عليه..
الدكتور:ان شاء الله..الحين بنشوفه..عن اذنكم..
نورة(تيي):السلام عليكم..
اسماء:وعليكم السلام..اشلونج نورة؟
نورة:بخير..هاج سلوى الماي..الدكتور دخل؟
سلوى:أي..
حمد اخو اسماء يوصل...
حمد:السلام عليكم..
الجميع:وعليكم السلام..
حمد:اشلونه عمي؟
اسماء:الدكتور عنده..
عقب عشر دقايق يطلع الدكتور...
نورة:دكتور طمنا عليه..
سلوى:دكتور الله يخليك ابوي اشلونه؟
الدكتور:حالته مثل ماهو ماتغير شي..
سلوى:دكتور معليه ندخل نشوفه؟
الدكتور:بس من غير انفعالات..عن اذنكم..
حمد راح وراء الدكتور...
حمد:دكتور..لو سمحت أبي أسألك عن عمي..
الدكتور:عمك والله حالته ماتسر..الجلطة جات بالمخ وكانت قوية..مماسببت له شلل كامل..ومااعتقد ان جسمه قادر يتحمل اكثر من جذي..لكن الاعمار بيد الله..
حمد:مشكور دكتور..
في الجامعة



عند الشباب...
وليد طلع من المحاضرة وهو يتكلم مع واحد من ربعه....
بدر:اشلونك الحين؟
وليد:الحمدلله..كم ساعة مسجل هالكورس؟
بدر:15 والله يقدرني..
وليد:ليش؟
بدر:ابي النجاح وافتك من الجامعة..
وليد:وايشقد بقى لك على التخرج؟
بدر:بقى لي بعد كورس..وانت؟
وليد:ان شاء الله هالكورس..
بدر:ياحظك..
يرن تليفون وليد...
وليد:وعليكم السلام...الحمدلله انتوا شاخباركم؟...اي في الجامعة...توني طالع من محاضرتي الاولى..اليوم عندي على الساعة 2 لين اربع..ليش؟...وايش عندكم؟...عيل محمد وينه؟...خلاص بشوف وبرد عليكم..مع السلامة..
بدر:هذا طلال قاعد يي انا بعد بروح عندي محاضرة..في امان الله..
وليد:في امان الله..
وصل رفيج وليد طلال...وسلموا على بعض...وبدر راح...
وليد:وينك ياريال صار لي من فترة ادورك مامحصلك اسأل الربع يقولون مسافر..ايش عندك؟
طلال:مشاغل..عندك شي الحين؟
وليد:لا..
طلال:عيل خوش امش خلنا نروح مكان حلو ونشرب شي حار..نمشي؟
وليد:نمشي..
في الكوفي شوب....
طلال:طمني عليك اخبارك؟
وليد:الحمدلله انا بخير..انت اشلونك وين هالغيبة؟
طلال:الله يسلمك تعرفت على اخو نسيبنا وكان بيسافر خمس دول في العالم في الصيف..وانا استغليت الفرصة ورحت وياه..شنو استمتعنا..يعني فاتك نص عمرك..
وليد:وين رحتوا؟
طلال:اول بلده رحنا لها كانت ايطاليا شنو فله..عجيبه روما..وعقب رحنا المغرب وشفنا العجب...وعقب رحنا تايلند..صدق تايلند شنو حلوة...وعقب رحنا ماليزيا..عاد ماليزيا ماعليها كلام..وآخر مكان رحناه صلاله..عاد صلاله رهيبة..
وليد:ماشاء الله عليكم نوعتوا في السفر..
طلال:أي..بس استانسنا..ياليتك كنت معانا..
وليد:في الربيع ان شاء الله..تيي؟
طلال:أي..وين تبينا نروح؟
وليد:خلني اخلص الجامعة لذيك الحزة يصير خير..
طلال:طمني على صحتك؟
وليد:بخير..مثل ماانت شايفني..
طلال:اتابع عند دكتور؟
وليد:أي اتابع..
طلال:دير بالك على صحتك عدل..
وليد:ان شاء الله..
طلال:ماتزوجت؟
وليد:خطبت..
طلال:والله؟
وليد:أي..
طلال:بالمبارك..
وليد:الله يبارك فيك..وانت؟
طلال:والله انا في خاطري في وحدة من الاهل..بس ماادري يمكن اغير رايي..مااستقريت على حد..
وليد:خلهم يختارون عنك..
طلال:لا حبيبي..زوجتي انا اختارها..انت من اختارها لك؟
وليد:انا مختارها..
طلال:من الاهل؟
وليد:أي..
طلال:شفت انت اخترتها..وانا بعد ابي اختار شريكة عمري..تصدق ذاك اليوم كنت طالع مع واحد من الربع رايحين اللاند مارك..وقاعدين ندور في هالمحلات..اشوفك لك بنت لابسه عباية عجيبة..يعني شي ماشفته من قبل..اقول حق رفيجي وين اللون الاسود..البنات ماخلوا الاسود بحاله الا ويترسونه بهالالوان..يعني البنت ايش حقى ملبسينها عبايه وشيله مو علشان تستر عمرها..وبنات هالزمن لا ماخذين هالعباة والشيله موضه..الله ياستر علينا..يااخي اشمئز منهم..واستغرب انهم يطلعون بهالمنظر أهاليهم مايشوفونهم..
وليد:الله ياستر علينا..كم مادة مسجل هالكورس؟
طلال:4 وتخرج ان شاء الله..انت بعد تخرج موجذي؟
وليد:أي معاك..
في بيت بوعبدالعزيز...تتصل ام عبدالعزيز في اسماء...
ام عبدالعزيز:طمنيني على عمج.......الحمدلله..الله يقومه بالسلامة..اخبار بنات عمج؟....سلمي عليهم..اذا بغيتوا شي اتصلي..مع السلامة..
موزة(تنزل):السلام عليكم..
ام عبدالعزيز:وعليكم السلام..وينج ليش مانزلتي؟
موزة:امس كنت سهرانة فبغيت انام شوي..
ام عبدالعزيز:مو على اساس بتروحين الساعة 10؟
موزة:المفروض..اتصلت علي وحده من البنات وقالت لي الدكتور اعتذر..فقلت بروح عقب..وليد ماوصل؟
ام عبدالعزيز:قالج انه بيمرج؟
موزة:أي اتصلت عليه من ساعة..
في السيارة...
وليد:ايش عندج طالعة من الجامعة؟
مريم:ودي اطبخ غداء حق محمد..
وليد:ياسلام عليج..وانا؟
مريم:حياك عندنا..
وليد:مااقدر وراي محاضرات..
مريم:لما اتصلت عليك كنت مع الشباب؟
وليد:أي..
مريم:اقول اشفيه وليد يكلمني بصيغة الجمع..بالعادة يكط كم كلمة..
وليد:ياللا مناك..شنو يكط كم كلمة..
مريم(تضحك):تصدق..
وليد:لا مااصدق..
مريم:لا ولي سلمك صدق..مشتاقة حق كرسي غرفتك..
وليد(يطالعها وهو يسوق):اختي صارت هبلة..الناس تشتاق حق اهلها حق اخوها..مو تشتاق حق كرسي..
مريم:شوف جدامك..اي والله في خاطري اقعد عليه وافكر..
وليد:وفي ايش تفكرين؟
مريم:في وايد اشياء..
وليد:عيل خلاص بعطيج الكرسي خذيه وحطيه في بيتج..
مريم:لا..انا احب اقعد على الكرسي وهو في غرفتك..
وليد(فكر في اخته المسكينة اللي بتفتقده)
مريم:اشفيك سكت؟
وليد:تذكرت شي في الجامعة..
مريم:شنو؟
وليد:بغيت آخذ المحاضرات اللي فاتنتي من عند واحد من الربع..
وصلوا....
مريم:انزل..
وليد:مااقدر..ابي اروح آخذ موزة واوصلها الجامعة..
مريم:دير بالك وانت بالطريق..وسلم عليها..
وليد:وماتبين اسلم على الكرسي؟
مريم(تضحك):تصير؟
وليد:نزلي ياللا تأخريني عليها..مالي خلقها يوم تعصب..
مريم(نزلت):مع السلامة..
دخلت البيت وبدلت ملابسها وصلت الظهر..ودخلت المطبخ وقعدت تطبخ....لين مادخل محمد......
محمد:السلام عليكم ورحمة الله وبركاته..
مريم:وعليكم السلام ورحمة الله وبركاته..حياالله من وصل..
محمد:ريحة حلوة..
مريم:روح بدل ملابسك وبيكون الاكل زاهب..
وهم ياكلون....
محمد:اخبار عم مرت اخوج؟
مريم:تصدق انشغلت ومااتصلت فيها..لخلصنا باتصل..
محمد:هالسلطة وايد لذيذة..
مريم:تعلمتها من كتاب..وكنت اسويها في البيت..وأبوي يموت فيها..
محمد:اشلون ريلج الحين؟
مريم:الحمدلله..احسن من قبل بوايد..
محمد:الحمدلله..والدراسة؟
مريم:الله يسهل..
في المستشفى....



سلوى:اسماء ردي بيتج..
اسماء:انا بتم عنده وانتوا ردوا..من امس وانتوا قاعدين..
نورة:معليه اسماء..انت وراج ريلج وعيالج..ردي والمغرب تعالي..
سلوى:وقولي حق اخوج بعد يرد البيت..شكله تعبان وبعد هو بروحه ماداوم اليوم..
اسماء:اذا بغيتوا شي ولاصار شي..اتصلوا على طول..مو تستحون..
نورة:تطمني..
اسماء:وبيكون بينا اتصال..مع السلامة..
وراحت عند اخوها...
اسماء:حمد..خلنا نرد البيت..
حمد:وبنات عمي؟
اسماء:مارضوا يهدون عمي..خلهم ياحمد..هذا ابوهم..
حمد:عيل انت اتصلي في عبدالعزيز خله يردج..وانا بتم..
اسماء:لا ياحمد..انت من الصبح قاعد هني..ريح لك شوي..وعقب تعال..او اتصل على مهنا خله يي..
حمد:عيل باتصل في مهنا..خلينا نمشي..
في بيت بوسالم...حزة العصر كالعادة قاعدة ام سالم تسولف مع بوسالم وهم يشربون الشاي والقهوة..تميم ينزل..ويقعد معاهم....
بوسالم:اشلونك يبه؟
تميم:الحمدلله..
بوسالم:واشلون الشغل ماشي؟
تميم:الحمدلله السوق ماشي..
بوسالم:الحمدلله..
تميم(يقوم يصب له قهوة ويقعد)
سلطان ينزل ويسلم ويقعد...
ام سالم:اصب لك شاي؟
سلطان:ياليت..
تميم:اشفيك؟
سلطان:مصدع حدي..
ام سالم:ليش يمه؟
سلطان:سارونه ماخلتني ارقد..راد من الدوام تعبان وهذي تصيح..
بوسالم(يضحك):ذكرتني يوم كنتوا صغار بكبر بنتك وانا مثلك ارد من الدوام تعبان اسمع صياحكم ومااقدر ارقد..
سلطان:وايش كنت تسوي؟
بوسالم:كنت احاول ارقد..
ام سالم:عيل وين مرتك؟
سلطان:قاعدة تسكتها..
في بيت بوعبدالعزيز....



في غرفة عبدالعزيز..يرن تليفون اسماء...
اسماء:اشفيج نورة؟
نورة(تصيح):ابوي وايد تعبان..حالته ساءت تعالي يااسماء..
اسماء:ياللا دقايق واكون عندكم..عبدالعزيز قوم..
عبدالعزيز:ايش صاير؟
اسماء:ماادري تقولي ان عمي وايد تعبان..امش ولي سلمك..
عبدالعزيز:ياللا نمشي..
اسماء:خلني اتصل في اخواني..
عبدالعزيز:مو على اساس مهنا موجود معاهم؟
اسماء:ماراح..ماادري يقول عنده شغل..
في بيت محمد...قاعدين ياكلون فواكه......
مريم:محمد..
محمد:لبيه..
مريم:ايش رايك نطلع عقب المغرب نتسوق شوي..
محمد:ماعندي مانع..ابي أسألج سؤال..
مريم:تفضل..
في المستشفى...كلهم متجمعين .....
نورة(كانت تبجي):لا لايايبه..يبه لاتهدنا..يبه مالنا غيرك..يبــــــــــــــــــ ـــــــــه..
أسماء(دموعها على خدها راحت عند نورة وتحضنها):ادعي له بالرحمة..
نورة:أسماء ابي ابوي...ماابي شي بهالدنيا غيره..ردوه لي..حرام عليكم..
سلوى(كانت تبجي وهي بحضن مرت عمها):ابوي راح عنا..يبه..يبه رد لنا..يبه شنسوي من غيرك..
ام حمد:استهدي بالله يابنيتي..
سلوى:مرت عمي..ابوي راح ومابيرد..مالنه غيره..وين نروح..اشلون نعيش..لا لا لا..
مهنا:حمد خلنا نطلع من هني..
حمد(بضيق):روح خبر امك واسماء..
في بيت بوعبدالعزيز....يرن تليفون البيت......
ام عبدالعزيز:لاحول ولاقوة الا بالله..الله يرحمه....يمه خلك معاهم يمكن يحتاجونك...ان شاء الله..تطمنوا عيالكم بخير..وبخليهم يذاكرون..مع السلامة..
خولة:ايش صاير يمه؟
ام عبدالعزيز:عم اسماء توفى..
خولة:الله يرحمه..الله يعين بناته..
ام عبدالعزيز:أي والله كاسرين خاطري..لا اخو ولاعم ولاسند بهالدنيا..الله يكون بعونهم..باجر العصر بنروح نعزيهم..خبري خواتج..
خولة:ان شاء الله..
ام عبدالعزيز:موزة يمه..اذا خلصتي مذاكرة..درسي عيال اخوج..
موزة(قامت):ان شاء الله..
في بيت محمد....
مريم(تضايقت):الله يرحمه..صدمتيني..وبناته اشلونهم؟..(محمد يدخل البيت)...اكيد بيي معاكم..(محمد يقعد عندها)..سلمي على امي وموزة مع السلامة..
محمد:السلام عليكم..
مريم:وعليكم السلام..
محمد:اشفيج؟
مريم:عم مرت اخوي توفى..
محمد:إنا لله وإنا إليه راجعون..الله يرحمه..
مريم:وايد صعبه عليهم يتقبلون هالخبر..
محمد:الله يكون بعونهم..
في بيت بوسالم...ام يوسف قاعدة مع امها تسولف..ومعاهم حصة تسكر من التليفون....
ام سالم:ايش قالت لج؟
حصة:يمه تقولج ماتقدر تيي اليوم ولا باجر..
ام سالم:ليش؟
حصة:تقول عم اسماء مرت عبدالعزيز توفى..
ام يوسف:صج؟...الله يرحمه..
ام سالم:من عمها عبدالله؟
حصة:أي يمه..
ام سالم:الله يرحمه..
وتمر ايام واسابيع ويخلص شهر رمضان على خير...وتكون الاجواء هادية..والحياة تستمر....
في بيت بوعبدالعزيز...على الساعة 7 من يوم الاربعاء..
قاعدين ياكلون الايس كريم...
موزة:تسلم ايدج وايد حلو..
مريم:بالعافية..
عبدالعزيز:دوم سوي هالشغلات..
مريم:ان شاء الله عمي..اقول وليد ايش رايك مرة تطبخ لنا..خاطري اجرب من يدك..
وليد:روحي عند محمد خله يطبخ لج..
مريم:بخليه..أفا عليك..بس انت لازم تتعلم بكرة بتتزوج..
وليد:لا والله ليكون انا اللي بطبخ حق زوجتي؟
مريم:لا طبعا..يعني يمكن مرة زوجتك تعبت..فتطبخ عنها..
وليد:ياللا مناك..هاي الناقص ادخل المطبخ واقطع بصل وعفيسه..لا حبيبتي..الله يخلي المطاعم..
مريم:ماقلت لي..ليحين اتطالع رسوم متحركة؟
وليد:هذا سؤال تسألينه الحين؟
مريم(تضحك):مستحي؟
وليد:ليش استحي..عادي..واشفيها يعني إذا اطالع رسوم متحركة..
عبدالعزيز:الله وكيلكم كل ماادخل عليه قاعد يطالع بهالرسوم المتحركة..شكيت انه وليد اللي عمره...(سكت)
وليد:واشفيه عمري جان كملت..
عبدالعزيز:قلت يمكن تستحي من عمرك..
وليد:لاوالله..شايفني مريوم..
مريم(فلعت المخدة عليه):ليش ان شاء الله ايش شايفني عجوز؟
وليد(يضحك):انت من زمان صايرة عجوز..
مريم:انا الحين صرت عجوز..صج سخيف..
أسماء(تقوم):عبدالعزيز انا بروح ابدل..
عبدالعزيز:ياللا انا بعد جاي معاج..يمه احنا رايحين بيت اهل اسماء..تامرين بشي؟
ام عبدالعزيز:لا يمه..سلمي على امج وخواتج يااسماء..
اسماء:ان شاء الله..
وليد:اقول يمه..
ام عبدالعزيز:عيوني..
وليد:تسلم لي عيونج يالغالية..ابي اقولج ان باجر عقب دوام الجامعة رايح المخيم مع الشباب....
ام عبدالعزيز:وين؟
وليد:السيلين..
موزة:ياسلام..ودني معاك..
وليد:انت ماتفهمين عربي..قاعد اقول مخيم مع الشباب..
موزة:يعني لازم شباب..واحنا المساكين شنسوي؟
وليد:قعدوا ذاكروا..
موزة:لاوالله..يمه احنا بعد خلنا نطلع..الجو يهبل..
ام عبدالعزيز:وين تبين تروحين؟
موزة:المزرعة اللي رحناها من قبل..
ام عبدالعزيز:ذيج مب مزرعتنا..مرزعة واحد من ربع ابوج..
موزة:انزين مو مشكلة يقوله ونروح..خلينا نغير جو شوي..تعبنا من القعدة في البيت والدراسة..
ام عبدالعزيز:ايشقد بتطولون؟
وليد:يعني على السبت ان شاء الله بنرد..
ام عبدالعزيز:على اساس عندك امتحان..
وليد:بدرس هناك..
موزة:اتحداك..
وليد:الزمينا بسكوتج..بدرس اليوم وشوي باجر في الجامعة..
ام عبدالعزيز:ابيك تشد حيلك بالدراسة..
وليد:أفا عليج..انا وليد..
موزة:اللي يرسب في المقررات..
وليد(يفلع عليها المخدة):احترمي نفسج..
موزة:احلف انك مارسبت في ولامقرر..
وليد:مالج خص..هايمه ايش قلتي؟
ام عبدالعزيز:كيفك يمه..اللي تبيه سوه..
موزة:واحنا؟؟
ام عبدالعزيز:شوفي ابوج..
وليد:عيل وين مريوم؟
ام عبدالعزيز:أي صح وينهي؟..من شوي كانت هني..
وليد:ماحسينا عليها..
ام عبدالعزيز:من هذرتكم انتوا الاثنين..يمكن راحت فوق..
وليد:بروح اشوفها..
راح غرفتها ماحصلها..قال في نفسه:اكيد في المطبخ..بروح غرفتي اغير ملابسي واطلع...
دخل غرفته شاف مريم قاعدة على الكرسي....
وليد:بسم الله الرحمن الرحيم..
مريم(تضحك):ايش شايف جني؟؟
وليد:الا ابو الجنانوة..عن ابو اختفيتي فجأة..واحصلج في غرفتي..انت ايش تبين؟؟(يقعد على السرير)
مريم:ماادري ليش احب هالمكان..
وليد:لأني صاحبه..
مريم:لما تتزوج روح بغرفة ثانية..
وليد:ياللا مناك..هذي الغرفة بتكون لي ولزوجتي..
مريم:بتطلع مع الشباب؟
وليد:أي..عندج مانع؟
مريم:لا..بالعكس انا احب طلعات الشباب..
وليد:نعم؟
مريم:احس طلعاتهم وناسة..ياليت لو اقدر ايي معاك..
وليد:باخذ معاي محمد..
مريم:خذه..ماعندي مانع..هو اصلا يحب هالطلعات..ويطلع مرات مع ربعه كشتات..
وليد:صج؟
مريم:أي..اذا تبي تروح وياه جرب..يوم يقعد يقولي شيسوون بطلعاتهم..اتمنى اني اصير ريال بس علشان اروح وياهم..
وليد:عيل خلاص اذا بغى يروح خبريني..والحين لو سمحتي طلعي من داري..
مريم:نعم..تطردني يااخي؟
وليد:نعم اطردك..اخرجي..
مريم:مالسبب؟
وليد:اريد ان اخرج عندي اشغال..
مريم(تضحك):ماتعرف حتى تتحجى..
وليد:خليناه لج..عيل شيقولون؟
مريم:يقولون أود الخروج لدي أعمال.. مب اللي قلته..
وليد:لو سمحتي انت مدرسة لغة عربية؟
مريم:أي..(قامت)..وين بتروح؟
وليد:طالع مع تميم..
مريم:بالرنج؟
وليد:يعني لو بالرنج بتيين؟
مريم:أي بيي..
وليد:بنروح طلعة رياييل..بتيين؟
مريم:لو بالرنج أي..
وليد:انزين استأذني من ريلج وتعالي..
مريم:عيل الظاهر عرفت ان ماني يايه..
يرن تليفونه...
مريم:لحظة لحظة لاترد..
وليد:ليش؟
مريم(تقرب منه):منو؟
وليد:تميم..
مريم:عطني انا بحاجيه..وعليكم السلام..حيالله هالصوت..منو معاي؟
تميم:معاج جميل الشباب..
مريم:صدقت..من صوتك اعرف انك جميل..
تميم:ايش هالغلطة الحلوة..
مريم:مافهمت..
تميم:متصل على واحد من الشباب طلعتي انت..حظي حلو ياحلو..
مريم:تسلم ياعمري..الاخ متزوج؟
تميم:أي متزوج..واربع حريم..
مريم:وتكلم بنات؟
تميم:شسوي فيني عرج حريم..
مريم:الا هالعرج مو موجود فيك خير شر..
تميم:ليش ان شاء الله؟
مريم:جان تزوجت من زمان..ماادري ليش كاره الزواج..
تميم:شاابي في الزواج وابو الزواج..خلينا لكم انتوا يالبنات..
مريم:والله ياخالي يي عليك زوج رومانسي..
تميم:انزين..عن الحجي الفاضي..اخبارج يالدبة؟
مريم:حرام عليك الحين انا صرت دبة؟
تميم(يضحك):نلعب معاج..اخبارج؟
مريم:بخير..انت اخبارك..مامبين..
تميم:انا مبين انت اللي خلاص رحتي بعيد وماتشوفيني..
مريم:مر صوبنا..
تميم:بشوف ان شاء الله..
مريم:عاد بالرنج..
تميم:عيل قولي انج تبين الرنج..خلاص زين قلتي..بييكم بال bm ..
مريم:مستغربة حد عنده رنج ومايحبه..بيعه لي..
تميم:كم تشترينه؟
مريم:كم تبيع؟
تميم:ابيعه لج بسعر خاص بس علشان انت بنت اختي..
مريم:يعني كم؟
تميم:ببيعه ب250 ألف ريال..
مريم:احلف..
تميم(يضحك)
مريم:باين غلاة اختك وبنتها عندك..
تميم:روحي زين..امج غلاتها بقلبي..
مريم:وبنتها؟
تميم:شاابي في بنتها..بعدين هذا رنج كامل الاوصاف..ماينباع برخيص..
مريم:أي والله في هذي صدقت الرنج كامل الاوصاف..وماادري ليش بعض الناس مايحبون كامل الاوصاف..
تميم:وين اخوج؟
مريم(قعدت ادور عليه حصلته يعدل غترته):قاعد يتعدل..رايحين عند حريم؟
تميم:تصدقين..قولي له خله ينزل تحت ويوقف عند الباب..
مريم:بالرنج رايحين؟
تميم:مريومو ترى ببيعه من كثر ماتجبين طاريه..
مريم:خلاص سكتنا..بالوانيت رايحين؟
تميم(على انه عصب):مريومو سكري احسن لج..مع السلامة..
مريم(تضحك):مع السلامة..يقولك انزل تحت ووقف عند الباب..يحليله خالي..

وليد ومريم علاقتهم قوية..فهل تعتقدون ان هالعلاقة بتضعف؟؟
أحداث كثيرة في انتظارنا..

أشوفكم على خير..

[اسطورة !]

**فصل الثاني والعشرين**



في بيت بويوسف...في غرفة جواهر...
جواهر:بخير..انت اشلونك؟
راشد:الحمدلله..تعبان من الدوام ومن هالدنيا..
جواهر:ليش؟..عسى ماشر؟
راشد:تعبت من الدوام..احاول اسوي المستحيل علشان يرقوني..لكن ابد ماكو شي..
جواهر:لاتحاتي..ان شاء الله بتترقى مع الايام..كل شي في وقته حلو..
راشد:جواهر خلينا نتزوج..خلاص بسنا انتظار..ولاانت ايش رايج؟
جواهر(استحت منه):كيفك..
راشد:ايش رايج بالربيع؟
جواهر:مو بدري؟
راشد:لا وين بدري..احنا ملجنا بالصيف..خليني اشوف حجوزات العرس..اذا تبين شي لاتستحين كل اللي في خاطرج قولي لي اياه..
قمر دخلت غرفتها شافت وجهها احمر عرفت انها تتكلم مع راشد..حز بخاطره..متى بيي هاليوم اللي تكون مع وليد..قالت في نفسها:ايش معنى جواهر اللي رضوا بملجتها وانا؟؟
نزلت تحت وقعدت تطالع التلفزيون مع امها..وكل ماامها تسألها شي تكون سرحانه..لين ماقررت تروح غرفتها..ووصل بويوسف...وقعدت معاه ام يوسف في الغرفة تسولف معاه...
ام يوسف:بويوسف..
بويوسف:خير؟
ام يوسف:ليش ماتخليهم يملجون الحين وعقب يصير خير..
بويوسف:ايشقد بقى على نهاية الفصل؟
ام يوسف:ماادري يمكن شهرين او اقل..
بويوسف:خلاص انا باكلم بووليد..مع ان المفروض هم اللي يجون ويطلبون..
ام يوسف:معليه..مااحنا غرب..احنا اهل..
بويوسف:يصير خير..قومي زهبي لنا العشاء..
ام يوسف:ان شاء الله..
في بيت بوعبدالعزيز...ام عبدالعزيز جالسة مع اسماء.....
ام عبدالعزيز:اخبار بنات عمج؟
اسماء:الحمدلله احسن من قبل..
ام عبدالعزيز:وين قاعدين الحين؟
اسماء:قاعدين في بيتهم..
ام عبدالعزيز:بروحهم؟
اسماء:لا..معاهم خدامتهم وامي تبات عندهم..
ام عبدالعزيز:الله يساعدهم..
اسماء:بغينا ناخذهم بيت ابوي بس ماوافقوا علشان اخواني موجودين..
ام عبدالعزيز:الله يرزقهم بالزوج الصالح ويريحهم..
اسماء:آآمين..
موزة تنزل وتقعد معاهم....
موزة:عيني عورتني من القراية..تعبت..
اسماء:لازم تشدين حليج انت طب..
موزة:هذا اللي مصبرني..
ام عبدالعزيز:ذاكري عدل..
موزة:الله يقدرني..
في بيت محمد...مريم قاعدة مع محمد....
محمد:بغيت اقولج يوم الخميس طالع مع الربع الكشتة..
مريم:الساعة جم؟
محمد:عقب الدوام..
مريم:وليد قالي اذا بغيت تروح الكشته مع ربعك خبره يمكن يي معاكم..
محمد:حياه..خلاص عقب الصلاة باتصله وبخبره..
مريم:وانا بروح بيت ابوي لين ماترد..بترد السبت؟
محمد:يمكن غيرت رايي ورديت الجمعة..(قام)..رايح الصلاة..تبين شي؟
مريم:سلامتك..
ومع مرور يومين..مريم تروح بيت ابوها..ومحمد ياخذ معاه وليد ويروحون الكشتة....
في بيت بوعبدالعزيز...في غرفة مريم...
موزة(تدخل وتقعد):مريوم ابيج بسالفة..
مريم:خير؟
موزة:مريوم ابي اطلع من الجامعة..
مريم(استغربت):ليش؟
موزة:بصراحة..
مريم:أي..
موزة:مااقدر ادرس مع الشباب في مكان واحد..
مريم:في حد اذاج؟
موزة:لا..
مريم:موزو قولي الصج..
موزة:والله محد سوى لي شي..
مريم:عيل ليش تبين تطلعين؟
موزة:ماادري..بس ماني مرتاحة..ومااحب اقعد مع الشباب في مكان واحد..مااخذ راحتي..واحس بخوف..
مريم:وبتيين عندنا؟
موزة:لا..
مريم:عيل بتقعدين في البيت؟؟
موزة:هم لا..
مريم:عيل..تحجي..
موزة:ابي ادرس برع..
مريم(بعصبية):نعم؟؟؟
موزة:ادرس بجامعة فيها بس بنات ولا ادرس بجامعة مختلطة..
مريم:بس انت تدرين ان هالفكرة مستحيلة..
موزة:ليش؟
مريم:شنو يعني ليش؟؟..انت تعرفين ان اخواني ماراح يخلونج..
موزة:بس انا ابي ادرس طب..
مريم:درسي هني..على الاقل بتكونين جدامنا..
موزة:مريم فهميني..ماابي ادرس في مكان مختلط..ماني متعودة كلش..ولاحاسة براحة..
مريم:انت قررتي ولا تفكرين؟
موزة:اشلون اقدر اقرر من غير مااعرف رايكم..
مريم:بصراحة موزو فكرتج وايد صعبة..مااعتقد ان اخواني بيوافقون..
موزة:وانت ايش رايج؟
مريم:انا....مااعرف شاقولج..بصراحة الغربة وايد صعبة..وعارفه انج ماتقدرين عليها..وبعدين وين بتسافرين؟
موزة:في الخليج..ماني رايحة بعيد..
مريم:ماادري شاقولج..
موزة:فكري شوي معاي..انا اواجه صعوبة بالدراسة في مكان مختلط..ومافيني اقول حق اخواني اخاف يحسبون ان صاير شي بيني وبين واحد من الشباب في الجامعة..
مريم:وان شاء الله تبيني ان اللي اقولهم؟
موزة:ياليت..مالي غيرج يساعدني..
مريم:بس موزو ماني مقتعنه بالفكرة كلش..اشلون تقدرين تعيشين بروحج؟
موزة:ادري انها صعبة..بدبر عمري..انت تدرين من زمان وان في خاطري طب..ماابي اهدم مستقبلي بهالسهولة..
في بيت بوسالم...
ام سالم تبخر البيت...ينزل سلطان.....
سلطان:قوة يالغالية..
ام سالم:الله يقويك..
سلطان:محد فيهم وصل؟
ام سالم:لا..
سلطان:عيل وين حصة عنج؟
ام سالم:ماادري عنها من العصر ماانزلت..روح شوفها..
سلطان:بروح اشوفها..
راح غرفتها...
سلطان:حصة اشفيج تصيحين؟
حصة(تسمح دموعها)
سلطان(يقعد عندها ويرفع راسها):حصة اشفيج؟؟
حصة:غانم..
سلطان:اشفيه؟
حصة:.....
سلطان:حصة تحجي..
حصة:قال لي كل واحد فينا يروح بطريج..
سلطان(انصدم وعصب):وايش قالج بعد؟
حصة:قال بيرد الديرة عقب جم يوم علشان.....(تبجي)
سلطان:انا اعرف شغلي معاه..بتشوفين ايش بسوي فيه..
كل عيال بوسالم يتجمعون...ويقعدون الحريم يسولفون....
قمر:مريوم ماكو اخبار؟
مريم:اخبار ايش؟؟
قمر(تبتسم لها بخبث):يعني ماانت....؟؟
مريم:جاب..ماعندكم الا هالسالفة..لا انزين..
قمر(تضحك):ليش من سألاج؟
مريم:وايد..بعدين ليحين بدري..
قمر:بدري من عمرج..
مريم:عيل متى عرسكم جواهر؟
جواهر:احتمال في الربيع..ان شاء الله..
مريم:ليش احتمال؟
جواهر:لأن يقولي راشد مافي حجوزات ووايد زحمة..
مريم:ايش دعوة..
قمر:ماشريتي قطعة حق عرسها؟
مريم:لا والله..بس احتمال كبير نروح انا ومحمد دبي نقعد ثلاثة ايام وبشوف يمكن حصلت فساتين حلوة..لأني سمعت من وحدة من ربعي تقولي في فساتين حلوة في دبي..باشتري ثلاثة وحدة حق خطوبة اخوي(تبتسم لها)..وحدة حق عرس جواهر ووحدة حق عرسكم ان شاء الله..
جواهر:تصدقين انا بعد في خاطري اتسوق ودي اروح الاحساء..بس يوسف مشغول..وابوي مافيه على الروحة..بس بوديهم..
اليوم هو يوم السبت...راحت مريم تقعد بدار وليد..وعلى كرسيها المفضل..
تحت امها قاعدة مع موزة وهالة....
هالة:وين مريوم؟
موزة:فوق على النت..
هالة:ريلها متى بيرد؟
ام عبدالعزيز:تقول اليوم..
هالة:ووليد وينه اكيد طلع مع تميم..
ام عبدالعزيز:لا راح مع محمد..
هالة:والله..
على الساعة 5 وليد يدخل البيت...ويسلم عليهم.....
وليد:اشلونكم؟
ام عبدالعزيز:بخير..شكلك مستانس..
وليد:أي يايمه..ماتدرين ايش حلاة كشتة ربع محمد..احلى من كشتة ربع تميم وربعي..
موزة:ايش عندهم؟
وليد:كل شي..عقب مااتسبح بقولكم..ياللا عن اذنكم..
ام عبدالعزيز:محمد ماجى معاك؟
وليد:لا..راح يوصل واحد من ربعه وعقب بيي..انا رايح..
وراح فوق فتح باب غرفته..حصل مريم قاعدة على الكرسي....
وليد:ان شاء الله كنت راقدة في غرفتي؟
مريم(تضحك):لا طبعا..الناس تسلم لما تدخل..
وليد:وانت تخلين الواحد يسلم..الظاهر اني بكتب في وصيتي ان هالغرفة تكون لج..
مريم:بعد عمر طويل..قولي استانستوا؟
وليد(قعد على الارض وجنبها):أي ..بصراحة احلى من الكشتات اللي رحتها..
مريم:قلت لك..ايش سويتوا؟
وليد(قام):وايد اشياء..خلي ريلج يقولج..
مريم:وينه جى معاك؟
وليد:لا..
مريم:ماقال متى بيي؟
وليد:بلى بيي عقب الصلاة..طلعي من غرفتي الحين لأن أبي اتسبح..بعدين تعالي توني انتبه..ماخذه لاب توبي اشوف..
مريم:انت غرفتك فيها واير لس..فقلت هم اقعد على الكرسي وادخل النت..
وليد:ياسلام على الجو..وليش تفتحين لاب توبي..
مريم:شفت اشياء غريبة في لاب توبك..
وليد(قرب منها وعلى انه معصب):ايش قلتي؟
مريم:اتغشمر..ماشفت شي..على طول دخلت النت..بعدين وخر ريحتك خايسة..
وليد(يقلدها):وخر ريحتك خايسة..عيل روحي قعدي عند ريلج وشوفي ايش بيصير فيج..
مريم:فديته ريلي ريحته مسك ودهن عود..
وليد:المسك ودهن العود مني حبيبتي..
مريم(تضحك):فديت اخوي وزوجي بعد..
وليد:انزين طلعي..
مريم(قامت وسكرت الاب توب):قبل لأطلع ابي اقولك شي..
وليد:خير؟
مريم:مب الحين..ابغيك بسالفة..
وليد:شنو؟
مريم:بعدين..وقت ثاني..باجر اشلون دوامك؟
وليد:عندي من الاولى لين 2..
مريم:مايناسب..
وليد:انزين الثلاثاء اوكي دوامي خفيف..
مريم:متى يعني؟
وليد:عندي الساعة3..
مريم:اوكي يناسبني انا بعد..بنتفق عقب متى نتلاقى..ياللا نعيما مقدما..مع السلامة..
تحت يرن تليفون مريم ويكون ريلها..تسلم عليهم وتطلع له وتركب السيارة...وتسلم على ريلها وتتفاجأ....
مريم(وهي خايفة):شنو هذا؟؟
محمد(يبتسم):ماكو..شي بسيط..
مريم:شنو شي بسيط..طايح؟
محمد:أي..
مريم:اشلون؟
محمد:كنا نلعب فطحت على راسي..
مريم:سلامتك ألف سلامة..لازم تروح المستشفى..
محمد:لاتخافين..واحد من الربع دكتور وعالجني..والحمدلله قالي الجرح بسيط..
مريم:الحمدلله..اذا ماتقدر تسوق اسوق عنك..
محمد:لاحبيبتي..انا اللي بسوق بحبيبتي وبوديها بيت السعادة..
مريم(تبتسم له)
في بيت بوعلي...سيف قاعد مع امه.....
سيف:يمه انا ابي اتزوج..
ام علي:زين تسوي يمه..
سيف:شوفي لي وحدة مطلقة ولا ارملة اتزوجها..
ام علي:خلاص انا بدور لك على وحدة تناسبك..وان شاء الله خير..
سيف:يمه البنت اللي بتزوجها باخذها وبسافر..
ام علي:ليش يمه؟
سيف:يمه علشان عيالي..مدارسهم هناك احسن لهم..تعودوا عليها..فخلهم يخلصون المدرسة وعقب بردهم..
ام علي:بس جذي انت بتطول وايد..
سيف:شسوي يايمه..بعدين لاتنسين شغلي..شغلي هناك ماشي..وان شاء الله في الاجازات راد لكم..
ام علي:اللي تشوفه يمه..
في بيت بوعبدالعزيز...ام عبدالعزيز تروح غرفة وليد...ادق عليه الباب...وتدخل......
ام عبدالعزيز:شتسوي؟
وليد:على النت..حياج يالغالية..
ام عبدالعزيز(قعدت عنده على السرير):اخبارك؟
وليد:بخير..
ام عبدالعزيز:مانزلت..
وليد:كان عندي شغل على النت قلت اخلصه وانزل..
ام عبدالعزيز:عيل مااعطلك..
وليد(سكر اللاب توب):لاعادي..انا خلصت شغلي..
ام عبدالعزيز:وليد يمه..ماتبي تملج ببنت خالتك؟
وليد(حس الدنيا تزلزل من تحته وفوقه بهالكلمة):بلا..ليش؟
ام عبدالعزيز:هذا انت مابقى لك الا شهرين على التخرج..ايش تنتظر؟
وليد:خالتي قالت لج شي؟
ام عبدالعزيز:لاياولدي..خالتك المسكينة ماقالت شي..انا اللي قلت هالكلام من نفسي..وان شاء الله عقب التخرج تزوجوا..
وليد:يصير خير..
ام عبدالعزيز:وليد اشفيك؟..ليكون غيرت رايك في البنت؟
وليد:لايايمه..انت تعرفين مكانة قمر بقلبي..
ام عبدالعزيز:عيل اشفيك..ليش احسك بارد..قبل كنت تحاول بأي طريقة علشان تشوفها..الحين بيدك..ايش عندك؟
وليد:ماكو شي..بس انشغلت بالدراسة والامتحانات..ان شاء الله خلال جم يوم برتب اموري ويصير خير..
ام عبدالعزيز:وليد..انت فيك شي..
وليد(ابتسم لها):تطمني يالغالية..ولدج مافيه شي..هذاني جدامج..ان شاء الله على الاسبوع الجاي بنحدد يوم الملجة..
ام عبدالعزيز:من صجك؟
وليد:من صجي..لين ماارتب اموري الاسبوع الجاي بييج وبقولج يمه كلميهم علشان نحدد يوم الملجة..
ام عبدالعزيز(ابتسمت):الله يعطيني عمر اشوفك متزوج واشوف عيالك..
وليد(قال في نفسه:انا اللي بروح قبلكم):ان شاء الله..
ام عبدالعزيز:مابتنزل؟
وليد:بلا..بنزل..
في بيت محمد....
مريم زهبت العشاء وقعدوا ياكلون.....
مريم:ولي متى بيظل هذا على راسك؟
محمد:عقب باجر بروح عند رفيجي علشان يشيله..ليش مب عاجبج شكلي؟
مريم(تبتسم):انت بكل الاشكال تعجبني..
محمد:ياعمري..اخوج وليد ماقالج شي عن الطلعة؟
مريم:الا قال..
محمد:ايش قالج؟
مريم:يقول احلى من كل الكشتات اللي راحها..
محمد:الحمدلله..
في بيت بوعبدالعزيز...وهم ياكلون فواكه.....
وليد:اول ماوصلنا..رتبنا امورنا وتعرفنا على بعض..وقعدنا نسولف..لين حزة الاذان..صلينا وعقب قعد واحد فيهم يحاضر فينا..وقال حجي واشياء عجيبة..وعقب قمنا طلعنا من الخيم نلعب..وعقب اللعب والوناسة والسوالف..في الليل...قاعدين نشرب شاي وكرك وقهوة واللي تبونه..وواحد فيهم دارس علم نفس..وقعد يتكلم اشلون تتعامل مع الناس..وقال اشياء فظيعة..استفدت وايد..
وضحكنا واستمتعنا..يعني في هالكشتة كان فيها اكل ولعب ووناسة وضحك وهم كانت فيها فايدة..يعني منوع..
بوعبدالعزيز:جان خذيت عبدالعزيز معاك..
عبدالعزيز:ماقالي..جان رحت معاهم..
وليد:ان شاء الله المرة الياية..
يوم الاثنين...على الساعة 4 العصر..البنات يردون من الجامعة...
ام يوسف(وهي مستانسة):قمر كلمتني خالتج ام عبدالعزيز..
قمر(قلبها فز)
جواهر:ايش قالت لج؟
ام يوسف:قالت لي ان وليد قالها الاسبوع الجاي ان شاء الله بيحدد موعد الملجة..
قمر(راح بالها بعيد وهي مستانسة من داخلها)
جواهر:وليش مب هالاسبوع؟
ام يوسف:تقول عنده شغل يبي يخلصه..
جواهر:واخيرا بيملجون..قمور..قمور..(صارخت).. قمر..
قمر:نعم..ايش تبين؟
جواهر:سرحانه في العسل..
قمر:عن اذنكم..
جواهر:انا بعد بروح ابدل..
ام يوسف:تغديتوا؟
جواهر:لاطبعا في حد يقدر يفوت اكل ام يوسف..
ام يوسف:بزهب لكم الغداء..
فوق في غرفة جواهر..تحط كتبها على المكتب..وتفصخ عبايتها وتعدل شعرها جدام المنظرة..يرن تليفونها...
جواهر(تقعد على كرسي التسريحة وتتكلم):السلام عليكم..
راشد:وعليكم السلام..اخبارج؟
جواهر:بخير..انت اشلونك؟
راشد:الحمدلله..ايش كنت تسوين؟
جواهر:ولاشي..توني رادة من الجامعة وفي غرفتي..
راشد:تغديتي؟
جواهر(استحت من سؤاله):لا..
راشد:خلاص عيل تغدي خفيف وانا عازمج على العشاء..
جواهر(ماكانت متوقعة هالشي):.....
راشد:اشفيج سكتي؟
جواهر:ولاشي..
راشد:بييب معاي اختي فاطمة وانت جيبي معاج اختج..علشان هم ينشغلون بعض واحنا ننشغل بعض..
جواهر(بكل هدوء وحياء):ان شاء الله..
قمر(تدخل غرفة جواهر وهي مستانسة شافتها تتكلم وجهها احمر بغت تطلع)
جواهر(اشرت لها ماتطلع فظلت واقفة):ان شاء الله..مع السلامة..
قمر:وانت كل ماتتكلمين مع ريلج لازم وجهج يتلون بالاحمر؟
جواهر:سكتي قلبي فز لما قالي عازمج على العشاء..
قمر:صج والله..يحليله راشد..
جواهر:بغيت اقوله لا..
قمر:شنو لا..
جواهر:وعازمينج انت بعد..
قمر:وليش انا؟
جواهر:اخته فاطمة بتيي وانت بعد..
قمر:ياسلام..انا وفاطمة نقعد نسولف وانتوا بروحكم..
جواهر:ياليت لو نقعد كلنا جميع..
قمر:لاحبيبتي..زين يسوي فيج راشد..علشان شوي يروح عنج الخجل..
جواهر:انا جذي..
قمر:بكرة بتتغيرين..متى الطلعة؟
جواهر:قالي عقب صلاة العشاء..
قمر:ياللا قومي بدلي علشان نتغدى..
في بيت محمد...محمد راح الصلاة...وكانت مريم مزهبة العشاء وراحت لبست ثوب عجيب...ورتبت مكان العشاء..وكانت قاعدة في الغرفة...لين ماسمعت صوت باب البيت...قامت...
محمد(استغرب شكل البيت وطاولة الاكل غير عن كل مرة مرة وحدة ينتبه ان مريم واقفه الصوب الثاني وهي لابسه فستان لونه وردي):أيبا على هالجمال..ايش هذا كله؟
مريم(بإبتسامة ونظرة حب):عاجبتك؟
محمد:رهيبة..ياعيني عليج..ماشاء الله عليج..الله يحفظج من كل عين..
مريم:هذا كله بس علشانك..
محمد(قرب منها):انا محظوظ..
مريم:طبخت لك العشاء..وكل المأكولات اللي تحبها..
محمد:فديتها زوجتي..اللي تفكر في بطني..
مريم(تضحك)
محمد:يارب هالضحكة دوم..
مريم:ان شاء الله..ياللا غسل يدك وحياك على العشاء..
في المطعم..كانوا كلهم قاعدين جنب بعض...لين....
فاطمة:ياللا بنخليكم بروحكم..
جواهر:وين؟
فاطمة(قامت):عندي سالفة مع قمر..ياللا قمر..
قمر(قامت):ياللا..
جواهر(تحت النقاب مستحية حيل لأنها بروحها مع راشد)
راشد:فصخي النقاب..المكان مسكر وماكو حد..
جواهر(هذا اللي ماكانت تبيه..فصخت نقابها وراشد يراقبها بكل تحركاتها)
راشد(يبتسم لها)
بكرة في الجامعة....
فاطمة:اخوج تأخر..
مريم:ماادري عنه..الظاهر واحد من ربعه عطلاه..
فاطمة:اقولج امس رحنا المطعم..انا واخوي راشد وجواهر وقمر..
مريم:يالخاينات وليش محد يخبرني؟
فاطمة:اصلا الطلعة علشان راشد وجواهر..واحنا رحنا مرافقين..قعدنا نسولف ونسولف..وقالت لي ان ملجتها قريبة..
مريم:المفروض..
فاطمة:وهذاني قلت مو ماتعزمين..
مريم:افا عليج..انت اولهم..(يرن تليفونها)..هذا وليد..آلو..وينك؟..خلاص ياللا جاية..باي..(قامت)..ياللا ان رايحة..تبين شي؟
فاطمة:سلامتج..مب رادة؟
مريم:بلا اشفيج عندي محاضرة على الساعة 2..ياللا مع السلامة..
فاطمة:مع السلامة..
في السيارة...
وليد:وين تبينا نروح نقعد؟
مريم:كيفك..وين ماتبي..المهم مكان مايكون زحمة..
وليد:لاتخافين هالحزة مب زحمة..
وراحوا قعدوا في مكان هادي...
وليد:وانا كل مااوديج مكان تطلبين شي بارد..
مريم:احب البارد..
وليد:انزين قولي سالفتج..
مريم:تعال اقولك..انت متى ملجتك؟
وليد:قلت حق امي الاسبوع الجاي بحدد ويابيت خالتي..
مريم:انزين اسمع..بقولك شي..بس خليك هادي..وافهم اللي بقوله..
وليد:خير..
مريم:خير ان شاء الله..(حطت العصير على الطاولة)..موزة تبي تطلع من الجامعة..
وليد(استغرب):ليش؟
مريم:تقول ماتبي علشان الجامعة مختلطة..
وليد:انا قلت لها من البداية..لكني هي اصرت علشان تبي طب..وشالي غير رايها؟
مريم:ولاشي..تقول تعبت..ماهي متعودة بمكان مختلط..
وليد:ليكون حد سوى فيها شي؟
مريم:لا طبعا..احنا وين قاعدين..بس هي ماتبي..
وليد:وايش بتسوي بتروح عندكم؟
مريم(تشرب العصير):لا..
وليد:بتقعد في البيت؟
مريم(طالعت الناس):لا..
وليد(حط الكوب على الطاولة):عيل؟
مريم:بتكمل دراستها؟
وليد:اشلون؟
مريم(تبلع ريقها):تسافر برع..
وليد(منصدم):نعم؟؟..ايش قلتي؟
مريم:تسافر برع..تكمل دراستها..بتقعد في جامعة فيها بس بنات..
وليد:هذا الناقص..
مريم:اشفيها؟
وليد:انت موافقة؟
مريم(شربت العصير)
وليد:مريم لاتناقضين نفسج..
مريم:بس هذا مستقبلها..
وليد:ولو..مب كل شي لازم الواحد يركض وراه..تبي طب تدرس هني..ماتبي..تدرس أي شي ثاني..
مريم:انت ترضاها انها تدرس مع شباب؟
وليد:طبعا لا..بس على الاقل هي موجودة بينا..
مريم:انا معاك..بعدين مب مخلينها بروحها..
وليد:لا..انا مستحيل اوافق..
مريم:ليش؟
وليد:مريم انت تعرفين..بعدين حتى لو انا وافقت وهذا في سابع المستحيلات..لكن نقول مثلا..ابوي ماراح يوافق ولاعبدالعزيز..حتى خوالج ماراح يرضون..
مريم:والبنت شتسوي؟
وليد:كيفها تدرس معاج بجامعة قطر..
مريم:أي بس مافيها طب..
وليد(عصب):دراسة برع لا..سكي الموضوع..لأنج نرفزتيني..
مريم:الله يسامحك..الحين انا نرزفتك(قامت)
وليد:وين رايحة؟
مريم:بروح اتمشى..اشم هواء شوي..
وليد ظل قاعد شوي..وعقب دفع الحساب وراح وراها...
وليد:خلينا نمشي..
مريم(باين عليها الزعل):يكون احسن..
وركبوا السيارة..وكان الهدوء عجيب بينهم...لين ماوصلها الجامعة وهو راح يتمشى قبل ليروح المحاضرة...



للأسف مريم ووليد تزاعلوا..هل علاقتهم بعض بترجع؟؟


أشوفكم على خير

[اسطورة !]

**فصل الثالث والعشرين**




في بيت بوعلي...كان محمد قاعد يشرح درس حق العنود...لين ماشاف الساعة...
محمد:ياللا انا ماشي..حلي المسائل اللي عطيتج اياهم..
العنود:وعقب اشلون بعرف اجاباتي؟
محمد:بييكم ان شاء الله اليوم مع مريم..درسي عدل..ولاتفتحين الكتاب..
العنود:ان شاء الله..مشكور..
محمد:ياللا يمه انا طالع..تبين شي؟
ام علي:سلامتك يمه..دير بالك وانت تسوق..
محمد:ان شاء الله..مع السلامة..
الجميع:مع السلامة..
ووصل الجامعة...واتصل على مريم وخبرها انه ينتظرها عند الباب...ودخلت مريم السيارة..وسلمت وقعد محمد يسألها عن الجامعة...وشاف ان فيها شي...
محمد:مريم اشفيج؟
مريم(بضيق):مافيني شي..
محمد:الا فيج..شكلج متضايقة..
مريم:ايش دراك..اشلون تشوفني ووجهي تحت النقاب..
محمد:اعرف من صوتج..اشفيج؟
مريم:خلنا نوصل البيت..بعدين..
في بيت بوعبدالعزيز....وليد يدخل البيت...ويسلم....
ام عبدالعزيز:تغديت يمه؟
موزة:اكيد رايح بهالمطاعم مع ربعه كالعادة..
وليد(بكل هدوء):انا رايح انام..قعدوني حق صلاة العشاء..
ام عبدالعزيز(استغربت من هدوءه)
في بيت محمد...محمد يرد من صلاة المغرب...ويحصل مريم في المطبخ تغسل الصحون وبالها مشغول..
محمد:مريم..
مريم(خافت فطاح الصحن من يدها وانكسر)
محمد(قرب منها):اشفيج؟
مريم:بس لما ناديتني اخترعت..
محمد:الظاهر بالج كان مشغول..
مريم(فصخت القفاز علشان تشيل الصحن المكسور)
محمد:خليه عنج انا بشيله..
مريم(كانت حاسة بتعب فهدت المطبخ وراحت تقعد بالصالة)
محمد(عقب ماخلص راح قعد عندها..وشافها تفكر):مريم لحد الحين ماقلتي شي..
مريم:ولاشي بس تزاعلنا اليوم انا ووليد..
محمد:ليش؟
مريم:بس قالي كلمة تضايقت..وعقبها ماتحجى وكان معصب..
محمد:ممكن اعرف ايش قالج؟
مريم:قالي نرفزتيني..
محمد:واشفيها الكلمة..يمكن قالها عن غشمرة..
مريم:لامب عن غشمرة..وليد كان معصب اليوم..ماعطاني فرصة حتى اقنعه..
محمد:تقنعينه بإيش؟
مريم:ولاشي سالفة تخص اختي موزة..فحاولت اكلمه عصب وقالي هالكلمة..ماادري اشفيه كلش مو طبيعي..من عقب مارد من سفرته مب عاجبني..كل مرة اقول بيي وبيتحجى..لكن ماجى..ماادري اشفيه..
محمد:مافيه شي..لاتقعدين توسوسين..
مريم:ماادري..وليد اعرفه زين..في شي قالقه..بس ماادري ايش..
محمد:ترى بنروح اليوم بيت ابوي..
مريم:اللي تشوفه..(قامت)..بروح اصلي وبتزهب..
عقب يوم...يوم الخميس...المغرب تكون مريم في بيت ابوها...سلطان يي يزورهم...ويقعدون في المجلس....
سلطان:وينج ماتبينين؟
مريم:انا موجودة..انت ماتسأل..ماادري هذي سارة ايش سوت فيك..
سلطان:سارة فديتها..ماتخليني انام..
مريم:احسن علشان مرة ثانية ماتنساني..
سلطان:عاد انا دوامي الصبح.. والعصر كل ماابي اتصل فيج اقول يمكن محمد عندج..مااتصل..
مريم:اشفيها يعني لو اتصلت..لاتقعد تتحجج..والله..
ام عبدالعزيز:ماعليك منها..تعال ابيك بسالفة..
وقربوا من بعض وقعدوا يتساسرون..وموزة هدتهم وراحت غرفتها..ومريم كانت قاعدة ووليد قاعد وساكتين..
مريم قامت وراحت تقعد بالصالة...كانت تطالع تلفزيون...وليد جى وقعد معاها بالصالة..مريم تضايقت هدت الريموت...وراحت غرفتها.......
وليد عرف ان مريم متضايقة..لكن هو بعد متضايق...راح غرفته قال يمكن مريم قاعدة كالعادة بغرفته..راح وماحصلها..دق باب غرفتها...
مريم:دخلي موزة..
وليد(فتح الباب حصلها ماسكة كتاب وواقفة صوب مكتبتها)
مريم(شافته سكتت وراحت تقعد على السرير وفتحت الكتاب علشان تقراه)
وليد(قرب وقعد عندها وكان ساكت لين.....):لاتزعلين..ماكنت اقصد باللي قلته..
مريم(هدت الكتاب وقامت علشان تطلع)
وليد:مريم..انا قاعد احاجيج..
مريم(فتحت الباب)
وليد:مريم اذا مت بتتحسفين انج مارديتي علي..
مريم(وقفت وصعقت من هالكلمة لفت صوبها):ايش قلت؟
وليد(بلع ريقه)
مريم(قربت منه ):وليد ايش قلت؟؟؟..تحجى..
وليد:الموت حق علينا..
مريم(مسكت يده):احلف انك بخير..
وليد(نزل راسه)
مريم:وليد..اذا تعبان قولي..(دموعها نزلت)..اكيد انا السبب..خليتك تعصب..
وليد(مسح دموعها):انا بخير يامريم..بعدين انا ماكنت معصب..بس السالفة ماعجبتني..
مريم:يعني صحتك زينة؟
وليد:هذاني جدامج..شوفيني..
في العيادة....تميم قاعد مع الدكتور.....
تميم:آخر أخباره؟
الدكتور:حالته قاعدة تسوء يوم وراء يوم..وهالشي باين عليه..
تميم:يعني لوين بتوصل حالته؟
الدكتور:....
تميم:دكتور ابيك تصارحني بكل شي..
الدكتور:بيي يوم والقلب بيوقف..
تميم:يعني ايشقد؟
الدكتور:ماادري..يمكن مايتحمل اكثر من اسبوع او اسبوعين..
تميم(كان هالخبر مثل الصاعقة):ووليد يعرف؟
الدكتور:أي نعم..يعرف بكل شي..
تميم(قال في نفسه:ويتظاهر انه مستانس)
في غرفة مريم....
وليد:ياللا عاد..ماابي اشوف دموعج..
مريم(مسحت دموعها):وليد انت تعرف معزتك وغلاتك عندي..مااقدر اتحمل الحياة من غيرك..
وليد:عيل وين محمد؟
مريم:محمد موجود..بس انت اخوي..
وليد:عبدالعزيز موجود..
مريم:عبدالعزيز سندي وعزوتي..وانت بعد..
وليد:وبدر موجود..
مريم:وليد ليش قاعد تقول هالكلام؟
وليد:اشفيج انت صرتي هبله..الواحد مايدري متى بيموت..
مريم:كلامك يخرع..
وليد:قومي غسلي وجهج..وخلنا نغير هالجو..خلتيني اعيش بكآبه..
مريم(قامت وغسلت وجهها وعقب حصلت اخوها يتكلم في التليفون وهو يضحك طلعت من الغرفة)
وليد(سكر تليفونه):هذي وين راحت؟
طلع من الغرفة...شاف موزة قاعدة على النت....
وليد:وين مريوم؟
موزة:ماادري دور عليها..
وليد:وانا فاضي ادور عليها..(دخل غرفته)..مريومو..بهالسرعة ماصدقتي اسولف في التليفون الا واحصلج قاعدة في غرفتي..
مريم:تعال اقعد سولف لي ايش بتسوي علشان يوم الملجة؟
وليد:وليش ماخلتينا نسولف في غرفتج؟
مريم:انت ماتدري ان هذا هو مكاني المفضل..
يوم السبت...في بيت بويوسف...في غرفة قمر...كانت قاعدة تدرس...تييها امها ومعاها كيك.....
ام يوسف:هذا الكيك سويته مخصوص لأنج تحبينه وباجر عندج امتحان..ذاكري عدل..
قمر:ان شاء الله يمه..دعواتج..
ام يوسف:الله يوفقج ويسهل لج الامتحان..
قمر:آمين..
ام يوسف:ان شاء الله ملجتكم بتكون يانهاية هالاسبوع او اللي بعده..
قمر(مستانسة)
ام يوسف(قامت):ياللا اخليج تذاكرين..
جواهر تدخل..وتقعد تسولف مع قمر...
جواهر:الحلو سرحان..يتهنى اللي سرحانة فيه..
قمر(ابتسمت)
جواهر:متى يي هاليوم اللي اشوفج واقفة مع وليد..
قمر:سكتي..انا مو مصدقة..
جواهر:معاج حق انتظرتي وايد..قولي لي ايش بتلبسين بيوم الملجة؟
في بيت بوعبدالعزيز..في غرفة وليد...كان قاعد على مكتبه ويكتب أشياء..اول مادخلت موزة غرفته وقف...
وليد:خير؟
موزة(تقرب منه ووليد يخش اللي بين ايدينه):شتسوي؟
وليد:وانت ايش دخلج؟..ايش تبين؟
موزة:خلنا نطلع..
وليد:وين تبين نطلع؟
موزة:ماادري أي مكان..مليت من البيت والدراسة..خلنا نطلع نغير جو..ونتغدى..
وليد:خلاص شوفي امي وابوي وعبدالعزيز ييون نروح جميع..
موزة:فكرة..بس أي مطعم نروح؟
وليد:أي مطعم بالاول خلهم يوافقون..
موزة(وهي تروح صوب الباب):خلاص انا بكلم عبدالعزيز وبيي اخبرك..
تحت...
عبدالعزيز:ايش رايج اسماء نروح؟
اسماء:نروح ليش لا..وناسة نغير جو..من زمان ماطلعنا جميع..
موزة:يمه انت عليج تقنعين ابوي..
بوعبدالعزيز(يوصل ويسلم):ليش تقنعني..انا موافق..
موزة(استانست):ياسلام..خوش عيل نصلي الظهر ونطلع..
عبدالعزيز:ايش عندج مستعجلة؟
موزة:جوعانة..
ام عبدالعزيز:ماتريقتي؟
موزة:بلا..بس تريقت مبجر..بروح اخبر وليد..
محمد يرد من الصلاة..ويدخل البيت...مايحصل مريم في المطبخ..ومايشم ريحة شي..استغرب..راح غرفتهم حصلها تستغفر وهي على السجادة...
محمد:تقبل الله..
مريم:منا ومنكم..
محمد:شنو اليوم ماكو غداء..
مريم(تبتسم):جوعان؟
محمد:بصراحة أي..ماطابخة؟
مريم:لا..اليوم يابعد عمري..انا عازمتك على الغداء..
محمد:شالمناسبة؟
مريم:مناسبة انك زوجي..وابي اعزمك..فيها شي؟
محمد:لا..عيل ياللا قومي بدلي..
في بيت بوسالم...
سلطان(يرن تليفونه):السلام عليكم...هلا غانم بخير..انت شاخبارك؟....وينك وصلت الدوحة؟...من متى؟...ابي اشوفك...اي برع البيت...اي مكان...خلاص عقب صلاة المغرب بشوفك...في امان الله..
مها:غانم ريل حصة؟
سلطان:أي..
مها:وليش ماجى ياخذ حصة؟
سلطان:توه امس راد..وبيرجع عقب يومين ماهو مطول..
تحت...بوسالم يستأذن ويروح ينام...
ام سالم:تميم..
تميم:لبيه يمه..
ام سالم:اشفيك؟..من امس وانت مو عاجبني..
تميم:انا مافيني شي..عادي..
ام سالم:قلت لك ادور لك على وحدة تتزوجها..ترى الريال مايقدر يعيش عزابي على طول..محتاج مرة تسانده وتوقف جنبه..
تميم:ان شاء الله..بس خليني افكر بالاول..
في بيت بوعبدالعزيز....



ردوا من المطعم وهم مستانسين....راحت موزة غرفتها وقطت نفسها على السرير..دق الباب...
موزة:منو؟
وليد:وليد..
موزة:ادخل..
وليد(حصلها طايحة على السرير):اشفيج بسم الله عليج..من زود الاكل..
موزة:كنت جوعانة..والحين خلاص احس بنفجر..
وليد:علشان مرة ثانية توبين وماتاكلين وايد..
موزة:اول مرة وآخر مرة..
وليد(قعد على كرسي التسريحة):ترى ماني موافق على سفرتج برع البلاد..درسي هني وكملي دراستج احسن لج..
موزة(بس سمعت كلامه قامت وقعدت)
وليد:لاتحسبين اني ابي اضيع مستقبلج..لا..بس السفر برع لا..
موزة:ليش؟
وليد:بس انا مااحب..
موزة:بس انا ماابي اكمل في جامعتي..
وليد:خلاص دخلي جامعة قطر..
موزة:والطب؟
وليد:استغني عنه..
موزة:بهالسهولة؟
وليد:ابي أسألج سؤال صاير لج شي في جامعتج خلاج تغيرين رايج؟
موزة:لا..
وليد:متأكدة؟
موزة:والله العظيم ماصار شي..الجامعة من احسن مايمكن..كل شي فيها اوكي..بس انا اللي مو متعودة على الاختلاط..
وليد:والدكتورة على بالج شغلها حريمي؟..لاطبعا..هم بيكون اختلاط..كله مع رياييل دكاترة ومرضى..
موزة:.....
وليد:موزة ماابيج تزعلين مني علشان رفضت الفكرة..لأن حتى لو قلتي حق عبدالعزيز ولاابوي راح يرفضون حتى خوالي هم راح يرفضون..فنصيحتي لج كملي بجامعتج..وربي بيحفظج ويوفقج..(قام)
موزة:مشكور وليد..
راح غرفته..قعد على سريره..ومرة وحده حس بألم في قلبه..راح يدور على حبوبه في الادرج لين ماحصلها في مخبة ثوبه المعلق وبلعها وفتح ثلاجته وشرب الماي..وقعد على الارض جنب الثلاجة من التعب..
في بيت محمد..على الساعة 4 ونص العصر...يرن تليفون مريم....
مريم:هلا والله..بخير انت شاخبارك؟....الحمدلله كاهو عندي ويسلم عليك...صج؟...متى؟...خلاص عيل احنا ننتظرك..تتعشى ويانا؟...لاحبيبي دام انك جاي بيت اختك لازم تتعشى عندها..لاتخاف ماراح اطلب من برع..انا بطبخ لك..مع السلامة..يسلم عليك..
محمد:الله يسلمه..شنو بتطبخين؟
مريم:ماادري بروح اشوف المطبخ وبقرر..
محمد:اذا تبين مساعدة احنا حاضرين..
مريم:تسلم حبيبي..مانبي نتعبك..زوجتك قدها..
في بيت فاطمة...في غرفة راشد.....
راشد:ايش رايج بالاغنية؟
جواهر:رووعة..
راشد:هذي اهداء مني لج..
جواهر(استحت كالعادة):مشكور..
راشد:اي صح قبل لأنسى حصلنا حجز في الفندق حق يوم 30\1 و14\2 أي تاريخ تبين؟
جواهر:ماادري..خلني بس اشوف تقويمي وارد عليك..
راشد:لاتأخرين بالرد علشان نحصل الحجز ومايروح عنا..
جواهر:ان شاء الله..
يندق الباب....
راشد:لحظة جواهر..منو؟
فاطمة:انا..
راشد:دشي..
فاطمة:تتكلم في التليفون..خلاص لخصلت تعال..امي تبيك..
راشد:انزين..اقول جواهر..
جواهر:نعم..
راشد:وين تبينا نقضي شهر العسل؟
جواهر(سكتت شوي من الحياء):ماادري..
راشد:جواهر عاد لاتستحين..خلاص انا الحين صرت خطيبج..وقريب زوجج..تحجى عادي..
جواهر(الوجه احمر):......
راشد:انزين انا بتحجى..ايش رايج نروح فرنسا؟
جواهر:فرنسا؟
راشد:أي..رحتيها من قبل؟
جواهر:لا..وانت؟
راشد:لا مارحتها..عيل خلاص نروح فرنسا..
جواهر:وهلك؟
راشد:اتفقت مع ولد اختي يتم جم يوم عندهم لين مانرد..
جواهر:على خير ان شاء الله..
راشد:ياللا اخليج الحين..بس لاتنسين تاريخ العرس..
جواهر:ان شاء الله..مع السلامة..
تدخل ام يوسف....
ام يوسف(تقعد):كنت تحاجين راشد؟
جواهر:أي يمه..
ام يوسف:اشلونه؟
جواهر:الحمدلله..
ام يوسف:ومتى العرس؟
جواهر:من شوي عطاني تاريخين وقالي اختاري..
ام يوسف:يعني بأي تاريخ؟
جواهر:قالي 30\1 و 14\2..
ام يوسف:عيل رتبي امورج وردي عليه..
جواهر:يمه انا خايفة..ومستحية منه..
ام يوسف(تبتسم لها):يحليلج..كل البنات يقولون هالكلام..الحمدلله ان الله رزقاج بواحد مثل راشد..تطمنت عليكم..
جواهر:الحمدلله..
ام يوسف:قمر لازم تتزهب الحين حق ملجتها..
جواهر:حددوا يوم الملجة؟
ام يوسف:لا بس بالكثير الاسبوع الجاي..
جواهر:لازم نزهب عمرنا..
برع في احدى محلات الكوفي شوب..قاعد سلطان ينتظر غانم...لين ماجى غانم وسلموا على بعض وقعدوا..وطلب له غانم قهوة...
سلطان:اشلون الشغل معاك؟
غانم:الحمدلله..
سلطان:ماغيرت رايك وترد هني؟
غانم:حاليا مااقدر..مرتاح هناك..ومتعود على شغلي..
سلطان:اشوفك مامريت صوبنا..مالك شي عندنا؟
غانم:مالحقت ايي صوبكم..ان شاء الله باجر..
سلطان:غانم..كأنك كنت قاسي عليها..
غانم:اشلون يعني قاسي؟
سلطان:قسيت عليها..
غانم:قسيت عليها؟!!..وهي تاركتني من شهرين..من اللي قاسي فينا؟؟
سلطان:اذا بتقول ان هذي قسوة..فأنا بقولك شي ثاني..اختي عايشة بعيده عنا وماشفناها من سنتين..قلنا معليه ظروف شغلك يحكمك على هالشي..بس اللي مااقدر اصدقه ان زوجتك تقعد بين اربع حيطان وماتطلع من البيت ولاتقعد معاك..صحيح انك مشغول..بس مايمنع انك تغير لها الجو..هي بعد محتاجة تطلع تشوف الناس..لاتنسى انها عايشة بروحها هناك..
غانم(فظل السكوت)
سلطان:ياغانم..اختي ماغلطت..صحيح انها لازم تكون جنب زوجها..لكن في نفس الوقت لازم تقدرها..هي تعبت من هالوضع..واللي المفروض يزعل هي مو انت..
غانم:هي قالت لك هالكلام؟
سلطان:انا اللي اصريت اني اعرف..لأن باين عليها ان في شي بحياتها..ياغانم احنا سلمناك امانة..وانت لازم تحافظ عليها..اذا ماانتوا قادرين على العيشة برع البلاد..رد الديرة وكمل شغلك هني..
غانم:مااقدر استقيل من شغلي..
سلطان:اوكي مو مشكلة بس عطها من وقتك..حزة الاجازات سافروا تعالوا زورونا..غيروا جو..لاتحكرها في البيت..
في بيت محمد...قاعدين يتعشون....
وليد:متى لحقتي تطبخين كل هذا؟
محمد:قول لااله الا الله..اخاف بكرة ارد من الدوام ماحصل اكل..
وليد(يضحك):لاتخاف هذي مفعول الحسد ماينفع معاها..
مريم:لاوالله..
وليد:بس صج الاكل لذيذ ماشاء الله عليج..محظوظ يامحمد..
مريم:اشوف قلبتوا السوالف على الاكل..تعال قولي متى ملجتك؟
وليد:ان شاء الله قريب..
مريم:أي متى؟
وليد:ان شاء الله الاسبوع الجاي..
مريم:اخيرا قررت..واي يوم؟
وليد:ماادري..بس اشوف جدولي للجامعة وبخبركم..
مريم:يحليلك ياوليد واخيرا بتتزوج..
محمد:وبتتخرج هالكورس؟
وليد:ان شاء الله..
عقب العشاء اللذيذ..قعدوا عند التلفزيون..وهم ياكلون سويت من صنع يد مريم...
وليد:تسلم الايادي اللي طبخت وسوت الحلو..
مريم:عليك بالعافية..
محمد(عقب ماكل السويت حب انه يخليهم شوي بروحهم فقام):عن اذنكم..
مريم:وين؟
محمد:رايح باتصل في اختي بغيت أسأل ايش سوت في امتحانها..باتصل وبرد..
وليد(استغل الفرصة حط الصحن على الطاولة):مريم..
مريم(بكل اهتمام):لبيه..
وليد(مد يده):تشوفين هالكيس؟
مريم:أي..ايش داخله؟
وليد:هذا الدفتر اللي قلت لج عنه..تذكرين؟
مريم:اللي اعطيه حق قمر؟
وليد:أي..عليج نور..
مريم:ومتى اعطيها اياه؟
وليد:مب الحين..الاسبوع الجاي عقب الملجة..حتى لو ماملجنا الاسبوع الجاي..عطيها اياه..
مريم:ايش معنى الاسبوع الجاي؟
وليد:جذي مزاج..
مريم:بس انا مستغربة ليش انت ماتعطيها؟
وليد:بتعطينها ولا لا؟
مريم:بعطيها..اشفيك..
وليد:لاتنسين..خشيه عندج امانه لين ماتوصلينه لها..
مريم:من عيوني..انت تامر..
وليد:خاطري اطلعج مثل اول..تذكرين؟
مريم:اشلون مااذكر..
وليد:ايش رايك نروح؟
مريم:وين؟
وليد:حديقة الحيوان..
مريم:أي والله ياليت..ونعيد ذكرياتنا..يوم ان موزة تقول لنا ايش كبركم تروحون حديقة الحيوان..
وليد:بس متى؟
مريم:باجر العصر ايش رايك؟
وليد:ومن بيي معانا؟
مريم:انا وانت ومحمد واذا حد من خواتي..
وليد:اوكي صار..
محمد(يي ويقعد)
مريم:محمد ايش رايك نروح حديقة الحيوان باجر..
محمد:باجر؟
مريم:أي..
محمد:بشوف..اذا ماقدرت انت روحي مع وليد..
وليد:الصراحة حديقة الحيوان يامحمد لنا فيها ذكريات..
محمد:نزلت صور الكشته؟
وليد:أي كلها في الاب توب..
محمد:مارويتنا..
وليد:نسيت اجيبه معاي..مرات جايه ان شاء الله..
محمد:تكلمتوا عن حديقة الحيوان ذكرتوني بأيام الطفولة..
وليد:أي والله كانت أيام..
محمد:تذكرت لما كنا صف رابع ودونا حق الاسنان..
وليد:طلع الاعترافات..
محمد(يضحك):هذا الله يسلمك كان عندنا أستاذ ضخم وطول يومه ماسك العصا وكل معصب ومكشر..وصادف يوم الروحة هو المشرف علينا..وانا كل شي ولا دكتور الاسنان..قالوا لنا عقب الحصة الثانية بنوديكم..أنا استأذنت من استاذ الرياضيات الحصة الاولى على اساس رايح الحمام..وانا رحت ورى المدرسة..
وليد:طلعت شيطان..
محمد:انت اسمع الباقي..فيوم جمعوا الطلاب في الساحة قعدوا ينادون بالاسامي وكل واحد يقول نعم الا انا..والكل يقول انه شافني الصبح..الحين انا مستانس ورى المدرسة الا شوي ويجي واحد من الاساتذه ويشوفني ويحسبني ضايع وخايف وهو مايدري شالسالفة..مسك يدي وهو يقولي شسمك؟..قلت له محمد..قالي انت مضيع صح..خلني اوديك الصف..
مريم:ايش هالحظ مايي الا هالحزة؟
محمد:اقولج..وعقب صرنا نمشي وانا ابي اشرد منه بس مااقدر ماسكني عدل..وصلنا للساحة وشافني الضخم وعصب وشوي كان بيضربني..الا الاستاذ قاله لاتضربه..مسكين كان مضيع ومايدري من وين يرجع..
وليد:عاد من كبر المدرسة..
محمد:على ان كنا صغار وماندري وين نروح..مايدرون ان احنا نعرف كل ركن بالمدرسة..
وليد:بس انقذاك الاستاذ..
محمد:أي والله..ولا جان رحت فيها من الضرب..
وليد:وعقب رحت وياهم؟
محمد:رحت وياهم وياليتني مارحت..مت من الصياح..الحين فضحنا عمرنا جدام المدام..
وليد:أي والله..مريم انت سمعتي شي؟
مريم:لا حبيبي ماسمعت شي ماعطتكم الاذن الصمخة..طبعا سمعت..يعني طلعت تخاف من دكتور الاسنان..
وليد:شيسكتها الحين؟
مريم:لا والله؟؟
محمد:لاتحاولين معاي..دكتور أسنان ماني رايح ايش ماصار..كفاية خليتني آكل الروبيان..
وليد:اقدرت عليك؟
محمد:شفت اشلون..
مريم(قامت):أنا الغلطانة اللي قاعدة معاكم..
محمد(مسك يدها):واحنا نقدر نقعد من غيرج؟
وليد:تعالي قعدي خلني اقول حق محمد بعض فضايحج..
مريم(تقعد):انا ماعندي فضايح..
محمد:ماعليك منها قول..



الفصل الجاي..مليء بالاحداث..وأحداث مهمة..

وعلشانكم بنزل فصلين وراء بعض..

والاهم نبي آرائكم ومتابعتكم..

[اسطورة !]

**فصل الرابع والعشرين**



عقب نص ساعة من السوالف...يرن جرس البيت..يروح محمد علشان يفتح الباب....
وليد:من جايكم هالحزة؟
مريم:ماادري والله..
محمد(يدخل):حياك تفضل..
تميم:السلام عليكم..
الجميع:وعليكم السلام..
مريم:حياالله من جانا..انا اقول فريجنا منور الليلة..
تميم:احم احم..أخجلتم تواضعنا..
وليد:تراها تطنز لاتستانس..
تميم:نعم؟
مريم:من وقت ماتزوجت وانت مازرتني..
تميم:شسوي مشاغل الدنيا..
محمد:حياك اقعد..
مريم:ايش تشرب..بارد حار؟
تميم:سوي لي كابتشينو..
مريم:من عيوني..وانت وليد تبي؟
وليد:مانقول لا..
مريم:وانت محمد؟
محمد:اللي تسوينه انا اشربه..
وليد:ياعيني..مانقدر عليكم..
مريم(استحت..قطت المخدة الصغيرة عليه):اقعد مكانك..
وليد(يضحك):انا قاعد..
وراحت مريم تسوي الكابتشينو..ولما جات شافتهم يضحكون....
مريم:ايش عندكم؟
محمد:تعالي سمعي سوالف خالج واخوج..
مريم(قعدت):خير..قولولي..خلون� � أضحك معاكم..
تميم:هذا الله يسلمج يوم كنا صغار انا واخوج عبدالعزيز شردنا من البيت ورحنا الدكان وشرينا اللي نبيه وقعدنا على الرصيف ناكل..وكان يومها في عز الصيف الدنيا حر..خلصنا من الاكل وقعدنا نطالع السيارات اللي رايحة واللي جايه..
مريم:شالي جابركم على القعدة في الحر؟
وليد:هذي بروحها سالفة..ماسمعتني يقولج شردنا..
مريم:ايش سويتوا؟؟
تميم:خلني اكمل هالسالفة بالاول..
مريم:انزين كمل..
تميم:الا شوي يمر واحد ويشوفنا على هالحال كسرنا خاطره..حسبنا عيال فقاره..عطى كل واحد فينا ريالين..عاد احنا تشققنا من الوناسة..الا اشوف واحد غيره عطانا خمس ريالات..انا وعبدالعزيز ماصدقنا عجبتنا شغلة الاطراروة..لين ماجمعنا المبلغ اللي احنا نبيه ورحنا نشتري لنا مسدس..تذكرينه؟



مريم:أي ذكرته..انزين وعقب؟
تميم:بس نقوم الا نشوف ابوي واقف جدامنا..سحبنا من أذانينا وركبنا سيارته وردنا البيت..وشرشحنا مسح فينا الارض..ماخلى بجسمنا مكان الا وعليه ختم الشرف عقب الضرب..
مريم(تضحك):يعني رحتوا فيها؟
وليد:وانا تميت اطالعم واتشمت فيهم علشان مارضوا يودوني معاهم..
مريم:صج ياهال..وعقب ايش صار فيكم؟
تميم:كل واحد فينا تم بهالكسور اسبوع ماشفنا الشوارع ولا المسدسات..
مريم:تستاهلون..شكلكم كنتوا مسويين شي جايد..
وليد:شي جايد؟..شي اكبر من الجايد..
محمد:طلعوا الفضايح المخشوشة..
وليد:أي صح طلعها..
تميم:انت اسكت مع وجهك..الواحد مايقولك شي..
وليد:ليش انت اللي قلت لي..انا كنت عليكم رادار..
تميم:الا قول فتان..
مريم ومحمد يضحكون..



مريم:يحليلكم تهاشوا بعد وانتوا بهالعمر..
باجر بالجامعة...



فاطمة:اشلونج قمر؟
قمر:بخير انت اخبارج؟
فاطمة:الحمدلله..ها متى الملجة؟
قمر:ليحين مامبين..بس قريب ان شاء الله..
فاطمة:الله يسعدكم يارب..
قمر:آمين..
فاطمة:عيل وين جواهر مااشوفها معاج..
قمر:عندها محاضرة وراحت..
فاطمة:حددت يوم العرس؟
قمر:قالت بتخبر راشد..بس ماادري اذا خبرته ولا لا..
مريم(تيي صوبهم):شتسوون؟
فاطمة:نسولف..
مريم(تقعد):اخباركم؟
قمر:بخير..
مريم:الساعة كم عندج؟
قمر(تشوف ساعتها):ثلاث..
مريم:وايد زين..(قامت)..ياللا انا ماشية..تبون شي..
فاطمة:وين؟
مريم:ريلي على وصول..
فاطمة:اشوفج اليوم مستانسة..
مريم:أي طالعة مع وليد ومحمد..
فاطمة:وين؟
مريم:رايحين حديقة الحيوان..
فاطمة(تضحك):انتي من صجج..بتروحون حديقة الحيوان؟؟
مريم:أي اشفيها؟
فاطمة:ياهل انت؟
مريم:ليش انت ماتعرفين اني احب حديقة الحيوان وايد..
فاطمة:بلى ادري..مسكين محمد..
مريم:الا محظوظ..ياللا انا رايحة..مع السلامة..
الجميع:مع السلامة..
فاطمة:انا ماادري اخوها ياخذها على قد عقلها يوديها هالاماكن ولامن صجه يحب يروح..
قمر:هو يحب يروح..وبعدين هو وايد ويامريم..وفي وايد اشياء يتفقون فيها مع بعض..
فاطمة:الله يخليهم حق بعض..
قمر(في قلبها:ويخليه لي)
في بيت بوعبدالعزيز...



وليد ينزل ويقعد عند امه...
ام عبدالعزيز:اخبارك واخبار دراستك؟
وليد:بخير..ماناقصنا الا دعواتج..
ام عبدالعزيز:الا ماقلت لي متى الملجة؟
وليد:ان شاء الله قريب..
ام عبدالعزيز:أي عاد متى؟
وليد:على نهاية الاسبوع الجاي..إذا الله اراد..
ام عبدالعزيز:أي يوم بالضبط؟
وليد:بشوف يالخميس او الجمعة..بس خليني اشيك على جدولي..
ام عبدالعزيز:جدول محاضراتك؟
وليد:جدول محاضراتي وجدول حياتي..
ام عبدالعزيز:انت الوحيد بين اخوانك منظم..وتخطط حق كل شي..
وليد:تعلمنا منج..(يرن تليفونه)...وعليكم السلام..هلا مريوم...ليش؟...مايخالف..ياللا انا جاي..خلج زاهبه..زين عيل..مع السلامة..
ام عبدالعزيز:متى بترجعون؟
وليد:على المغرب ان شاء الله..
وهم في حديقة الحيوان...



مريم:وليد شوف الزرافة قربت..
وليد:اشفيج خايفة..ماعندج شي ااكلها..
مريم:لا..
وليد:هذي رفيجتي..اشلونج؟
مريم:لا والله..الله يخليها لك..انا رايحة صوب الطيور..
وليد:بصدقج..
مريم:ليش ان شاء الله؟
وليد:محد يخاف من الطيور غيرج..
مريم:لازم تفضحني جدام الناس..
وليد:انت فاضحه عمرج..نسيتي يوم انج تصارخين وتيودين يدي وليد خلنا نمشي من هني..
مريم(كانت تصوره بكل حركاته حتى وهو يتكلم)
وليد:ليكون قاعدة تصورين فيديو؟
مريم(تضحك):أي..
وليد(راح صوبها ومريم تركض):مريومو وقفي فشلتينا جدام الناس..يحسبونج ياهل..
مريم(تضحك):ايش تبي؟
وليد:لاتصورين فيديو..
مريم:ليش؟
وليد:جذي..امشي خلنا نروح عند الاسد..
مريم:ماادري زوجته بتكون موجودة ولا لا..
وليد:ليش معزومة عندها؟(وقعد يضحك)
مريم(على انها عصبت):الا اذا أنت معزوم عند زوجها..
وليد:دمج ثقيل..
مريم:مب اثقل من دمك..
وليد:خليني ساكت احسن..
واستمتعوا بالحديقة والحيوانات..وقعدوا يتمشون لين ماوصلوا صوب الالعاب....
وليد:تبين تلعبين؟
مريم:احلف؟
وليد(يضحك)
مريم:تطنز..انزين..(راحت بعيد عنه..شافت الصندقة اللي يبيع الحلويات والشيبس)..عطني آيس كريم..
الريال:فانيليا؟
مريم:أي فانيليا وكاكاو..
وليد(يي):وواحد فانيليا مع فراولة..
مريم(تلتف صوبه):نعم ليش تطالعني جذي؟
وليد:اختي في حد كلماج؟
الريال استغرب...
مريم(بغت اطلع فلوسها لكن وليد ماخلاها):ليش؟
وليد:جذي..
مريم راحت بعيد وهي تمشى تاكل الايس كريم..وليد وصل لها...
وليد:حلو طعمه..
مريم:مسكين الريال تحصله الحين يحسب ان مانصير حق بعض..
وليد:ايش علينا منه..(قعد على الحشيش)
مريم:بتوصخ ثوبك..
وليد:ليش احنا وين رايحين؟
مريم:انت راكب رنج..بتوصخ سيارة خالي..
وليد(قام):نسيت..بسبتج انا جايب الرنج..
مريم:مايندرى بكرة لتزوجت بتذكرني بهالطلعات؟
وليد:ليش لا..متى انا نسيتج؟
مريم:بنشوف الايام جايه..
وليد:تشكين؟
مريم:اتغشمر..على فكرة..انا عازمتك على العشاء وبأي مطعم تبيه..
وليد:وريلج؟
مريم:استأذنت منه..
وليد:ليش هو مب ياي؟
مريم:لا..لأن اخته ثانوية عامة وقاعد يشرح لها..فبيطول..فأنا قلت بعشيك..
وليد:جان قلتي له يي يتعشى معانا..
مريم:قلت له..قالي مايقدر..بيروح عند أخته وعقب بيطلع مع واحد من ربعه مواعده على الساعة 9..اي مطعم نروح؟
في بوسالم....



سلطان يدخل الصالة....
ام سالم:يمه من في المجلس؟
سلطان:هذا غانم ريل حصة..
حصة(خافت من اسمعت اسمه)
ام سالم:ابوك داخل؟
سلطان:أي داخل..حصة ماتبين تسلمين عليه؟
حصة(بتردد):بلا..
سلطان:يمه ماتيين؟
ام سالم(قامت):جايه..
ودخلوا جميع المجلس....
غانم:اخبارج حصة؟
حصة:بخير..
بوسالم:ايشقد بتم ياولدي؟
غانم:باجر مسافر..
ام سالم:مستعجل..ماشفناك..
غانم:شسوي ياعمتي مشغول..جيت(حط عينه بعين حصة)اخلص شغله وراد..
حصة(زاد خوفها)
غانم:اشفيج حصة ساكتة؟
حصة:ماكو..
غانم:عمي تسمح لي آخذ حصة ونرد..
حصة(استغربت)
بوسالم:والله يابوك احنا ماشبعنا منها..لكن هذي الدنيا..هي عندك..
غانم(يبتسم لها):ها حصة..ايش رايج نرجع؟
سلطان:اكيد بترجع..الاخت مشتاقة حق بيتها..
حصة(ماهي عارفه شي):نرجع..
في المطعم...
وليد:شتصورين؟
مريم:اصورك بكل حركاتك وانت تاكل وانت تعطس..وانت تشرب وانت تسولف..
وليد:صج فاضية..
مريم:فاضية..اخوي ماتبيني اصوره؟
وليد:عيل ريلج شتسوين له؟
مريم:هذي اسرار..
وليد:انزين خلصي اكلج علشان نمشي..
مريم:ليش؟
وليد:بروح عند تميم..يبيني بشغله..
مريم:خذني معاك..
وليد:مريومو انت صج متزوجة..حركاتج مثل الياهلو..
مريم:مو على اساس اليوم بنسترجع ذكريات الطفولة..خلاص..
وليد:عاد انت زوتيها..(يرن تليفونه)..هذا خالج..
مريم:عطني اياه..السلام عليكم..
تميم:وعليكم السلام..من مريوم؟
مريم:بالعادة تسولف بالاول..اشفيك؟
تميم:مافيني..وين اخوج؟
مريم:شكلك معصب..اذا معصب ماابي احاجيك..
تميم:عطيني اخوج..
مريم:ان شاء الله..يبيك..
وليد:آلو..ياللا شوي بعد وجايك..انت وين؟...خلاص نص ساعة واكون عندك..مع السلامة..ياللا نمشي..
مريم:صبر علي خلني أخلص..دافعه فلوس..
وليد:تبين برجع لج اياهم..
مريم:يااخي اتغشمر معاك..بس الاكل عجبني خلني اكمله..ماقلت لي خالي تميم ايش يبي؟
وليد:ماادري..
مريم:من صوته معصب..
وليد:الظاهر..
في بيت بويوسف...في غرفة جواهر...
جواهر:هلا راشد..اتصلت فيك مارديت..
راشد:كنت راقد..انا بعد اتصلت فيج ومارديتي..
جواهر:كنت تحت قاعدة مع الوالدة وناسية الجوال في الغرفة..
راشد:ايش صار على التاريخ؟
جواهر:ان شاء الله على 14\2..
راشد:خير ان شاء الله..عيل خلني اتصل في الريال يحجز لي من الحين..
في محل تميم...وليد يدخل ويسلم ويقعد....
وليد:اشفيك؟..صاير شي؟
تميم:وليد..
وليد:خير؟
تميم:متى آخر مرة راجعت الدكتور؟
وليد:من جم يوم..ليش؟
تميم:ليش ماقلت لي الكلام اللي قالك اياه؟
وليد:ايش تبيني اقولك..خلها على الله..
تميم:امس شفتك في بيت مريم وماصدقت انك انت اللي قاعد تضحك وتسولف..ومابغيت اخرب مزاجك فمشيت معاكم بالسوالف..
وليد:خلني استانس واضحك معاهم..مابقى لي شي..
تميم:حاس بشي؟
وليد:اجذب عليك اذا قلت لك لا..
تميم:بإيش حاس؟
وليد:بيني وبينك..صارت تجيني الالام وماتروح الا بالمسكنات..
تميم:وغيره..
وليد:احس ان يومي قرب..بس متى ماادري..
تميم:اذا تعبان اوديك المستشفى..
وليد:ماابي اروح مكان..خلني هني احسن..خلاص مافي امل اني اعيش اكثر..
تميم:دير بالك على نفسك..
وليد(مد يده):خذ هذا سويج سيارتك..
تميم:خله عندك..
وليد:ماابي..بس وصلني البيت..
في بيت بوعبدالعزيز..قاعدين...
بوعبدالعزيز:وين وليد مارد؟
ام عبدالعزيز:لا..ماادري ليش تأخر..
عقب سبع دقايق يوصل وليد..يسلم ويقعد جنب عبدالعزيز...
عبدالعزيز:اخبارك مامبين..
وليد:حتى انت..
عبدالعزيز:اخبار الجامعة معاك؟
وليد:زين..
بوعبدالعزيز(يقوم):تصبحون على خير..
الجميع:وانت من هله..
ام عبدالعزيز:ايش سويتوا برع..
وليد:بنتج هذي مو طبيعية..قعدت تصورني بكل حركاتي..
عبدالعزيز:كان خاطري ايي معاكم..بس انشغلت شوي..
وليد:مرات جايه..احنا عادي عندنا نروح مرة ثانية..
عبدالعزيز(قام):ياللا انا بعد رايح انام..تصبحون على خير..
الجميع:وانت من هله..
وليد:يمه نعسانة..
ام عبدالعزيز:لا..ليش تسأل؟
وليد:ابي أسولف معاج..
ام عبدالعزيز:نسولف..غير ملابسك وانا بيي وراك..
وقعدو يسولفون..لين الساعة 12..قامت ام عبدالعزيز......
وليد:يمه خذتي الصندوق؟
ام عبدالعزيز:أي يمه..خليت الخدامة تشيله وحطيته بغرفتي..
وليد:آسف يمه خليتج تسهرين..
ام عبدالعزيز:لاعادي فديتك..تصبح على خير..
وليد:وانت من هله..
والكل رقد..الصبح بعد صلاة الفجر..يرجع محمد البيت...يحصل مريم قاعدة على السرير....
محمد:صباح الخير..
مريم:هلا محمد..
محمد:مريم اشفيج؟
مريم:ماادري..حلمانة حلم..وخايفة وايد..
محمد:ايش حلمانة؟
مريم:مااقدر اقول..
محمد:انزين حلمانة في من؟
مريم:في وليد..خايفة وايد..
محمد:هذا حلم..ليش خايفة؟
مريم:ماادري..بالي مو مرتاح..
محمد:تعوذي من الشيطان وسمي بالرحمن..
في بيت بوعبدالعزيز...



قاعدين يتريقون....
عبدالعزيز:الا وين وليد؟
ام عبدالعزيز:قالي مااصحيه اليوم..
عبدالعزيز:ليش؟
ام عبدالعزيز:يقول دكتورهم اعتذر اليوم عن المحاضرة..
موزة:جان زين لو دكتورنا..
بوعبدالعزيز:ياللا موزة..
موزة(قامت):ياللا..ثواني بس اجيب عبايتي..
في الجامعة...



مريم قاعدة وهي تفكر...جاتها فاطمة ومعاها عصير...
فاطمة:هاج..شربي العصير..ولاتخلين الشيطان يوسوس في قلبج..
مريم:ان شاء الله خير..
فاطمة:جان اتصلتي فيه..
مريم:اتصلت كم مرة مايرد..
فاطمة:مو انت تقولين ان عنده محاضرة الحين..اكيد في المحاضرة..اشلون بيرد عليج..شربي العصير..
مريم(تشرب واتطلع تليفونها):خلني اتصل في امي......السلام عليكم...بخير يمه..انت اشلونج؟...الحمدلله احنا بخير..شتسوين؟...فديتج يايمه..انا قاعدة مع فاطمة..لا اليوم عندنا اجتماع مع البنات والدكتور علشان المشروع...اقول يمه..
ام عبدالعزيز:خير يمه..
مريم:وليد بالجامعة؟
ام عبدالعزيز:لا..اليوم ماراح..
مريم:ليش؟
ام عبدالعزيز:يقول دكتورهم اعتذر عن المحاضرة..
مريم:يمه بقولج شي..
ام عبدالعزيز:خير؟
مريم:يمه انا حلمانة في وليد..حلم موزين..ووايد خايفة ماعرف ليش..
ام عبدالعزيز:تبين الصج..انا بعد حلمانة..وقلبي مقبوض..
مريم:حتى انت..
ام عبدالعزيز:جان كلمتيه..
مريم:كلمته..مايرد..
ام عبدالعزيز:عادي من الرقاد تحصلينه ماسمع صوت التليفون..انا الحين بروح اصحيه..لأنه بيروح الجامعة على الساعة 10..
مريم:انزين يمه..ان شاء الله..مع السلامة..تسلم عليج..
فاطمة:الله يسلمها..
مريم:تصدقين فطوم امي تقول هي بعد حلمت في وليد..
فاطمة:اشفيكم..ان شاء الله ماعليه شر..
في بيت بوعبدالعزيز...ام عبدالعزيز قامت..سمعت صوت باب البيت..شافت عبدالعزيز...
عبدالعزيز:السلام عليكم..
ام عبدالعزيز:وعليكم السلام..ليش رديت؟
عبدالعزيز:نسيت اوراق فوق..
ام عبدالعزيز:انا بعد بروح انادي وليد..
راحت ام عبدالعزيز وفتحت باب غرفته..وفتحت الستاير..وقعدت جنبه..ومسحت على راسه..حصلته حار..ومعرق..
ام عبدالعزيز:وليد..وليد يمه..وليد..(مسكت يده الا ايده تطيح من يدها ام عبدالعزيز خافت وصارت تصارخ)..وليد..وليد يمه رد علي..وليييييييييييد..عبدالع زيز عبدالعزيز..ياعبدالعزيز...
عبدالعزيز(يسمع صوت صراخ امه ويركض له):خير يمه..
ام عبدالعزيز(دموعها على خدها):وليد مايرد علي..تعال شوفه بسرعة ياعبدالعزيز..
عبدالعزيز(قرب منه ومسك يده ويحاول يسمع نبضه):وليد..ياوليد رد علي..
اتصل فورا بالاسعاف وخذوه..وام عبدالعزيز واسماء لبسوا عبيهم وراحوا مع عبدالعزيز المستشفى..عبدالعزيز عدى كل الاشارات الحمراء وزاد بسرعته الى حد الجنون لين ماوصل عند باب الطواري..وقف سيارته عند الباب..وحصل الامن..قاله...
عبدالعزيز:الله يخليك صف السيارة وعقب عطني السويج..عندنا حالة مستعجلة..(ولااراديا نزلت دمعة من عينه)
ودخلوا داخل...وكانوا واقفين برع....
ام عبدالعزيز(مع الصياح):عبدالعزيز..اتصل في ابوك وخبر بدر واخواني وخبر خواتك..
عبدالعزيز:ان شاء الله يمه..
في بيت بوسالم...تميم ينزل بسرعة والتوتر والخوف باين عليه...
ام سالم:تميم صاير شي؟
تميم(بضيق):يمه وليد تعبان وفي المستشفى..
ام سالم:لاحول ولاقوة الا بالله..خذني معاك يايمه..
في المستشفى...كلهم تجمعوا..بوعبدالعزيز وتميم وام سالم وبدر..وبنات عبدالعزيز..الا موزة اللي كانت بالجامعة ومريم...
منيرة:بدر روح جيب موزة من الجامعة..
بدر:ان شاء الله..
منيرة:ومريم ليش محد خبرها؟
عبدالعزيز:اتصلت فيها ماترد..
سلطان:انا باتصل في محمد..
في مكتب محمد..يرن تليفونه....
محمد:السلام عليكم ورحمة الله وبركاته..الحمدلله انت شاخبارك؟...صاير شي؟....صج؟...لاحول ولاقوة الا بالله(عيسى ينتبه له)..خلاص خلي الموضوع علي..في امان الله..
في الجامعة...كانت مريم في الاجتماع..شافت تليفونها يرن بس ماردت..لين ماقرت المسج اللي طرش لها اياه محمد..واستأذنت من الدكتور وطلعت..واتصلت فيه..
مريم:هلا محمد..كنت بالاجتماع ماقدرت ارد عليك بس شفت المسج استأذنت..ايش صاير؟
محمد:انا عند باب الجامعة..تعالي..
مريم:أي بس انا ماخلصت شغلي..وبعدين شالي مطلعك من الدوام؟
محمد:عندنا شغل وايد مهم وابيج تيين..
مريم:خير ان شاء الله؟
محمد:خير..انت تعالي انا واقف عند كلية العلوم..مع السلامة..
تركب السيارة...
مريم:محمد ايش صاير؟
محمد(وهو يسوق):اخوج شوي تعبان ودوه المستشفى..
مريم(خافت):اخوي!!..من فيهم؟؟
محمد:وليد..
مريم:لا..انا ماقلت لك يامحمد..(بدت تبجي)
في المستشفى...



طلع الدكتور...والكل التم حوله...
بوعبدالعزيز:دكتور طمنا..
الدكتور(بحزن):حالته وايد صعبه..ادعوا له..
بوعبدالعزيز:دكتور ولدي اشلون حالته؟
الدكتور:مثل ماقلت لك حالته غير مستقرة..لازم ننتظر ونشوف أيش بيصير..
عبدالعزيز:دكتور اذا محتاج علاج بنسفره برع..
الدكتور:حالته ماتتحمل ولاشي..وليد محتاج دعواتكم..عن اذنكم..
محد مستوعب كلمات الدكتور..تميم كان واقف بعيد وهو يتألم لأنه عارف ان هذي هي نهاية وليد..الحريم دموعهم ماكانت توقف..وام عبدالعزيز اللي كانت تصيح وهي بحضن امها...مريم توصل....وتشوف الكل واقف..تروح بحضن ابوها وهي تبجي...
ام عبدالعزيز:بس يايبه..ان شاء الله اخوج بتتحسن حالته..
محمد:ياجماعة الدموع ماتسوي شي..وليد محتاج انكم تدعون له..
في بيت بوسالم...بوسالم يدخل البيت....
بوسالم:عيل وين عمتج؟
مها(بحزن):عمي وليد تعبان وودوه المستشفى عمتي وتميم راحوا له..
بوسالم:انا بعد بروح..مع السلامة..
وتموا على هذي الحالة لمدة اربع ساعات.....
سلطان:بوعبدالعزيز..قعدتكم مامنها فايدة..خلوا الحريم يردون البيت...هني ماكو مكان علشان يقعدون..والعناية المركزة ممنوع الدخول..
بوعبدالعزيز:بكلم فوزية..
حاول يقنعها لين...
ام عبدالعزيز:بس ابي اشوفه..دخيلكم بس اشوفه..
دخلوها..وشافته تحت الاجهزة وشكله غير عن كل مرة..مسحت بيدها على راسها وشعره الناعم..وتذكرت آخر جلسة جلست معاه..وطلعوها..ودخلوا وحدة وحدة لين ماردوا كلهم...
محمد:ياللا مريم نمشي..
مريم:ماابي..ابي اتم عند وليد..
محمد:مريم وليد الحين نايم..ولتحسنت حالته بنيي..
عبدالعزيز:مريم ردي بيتج..
مريم:انزين بس اشوفه قبل لأروح..
راحت تشوفه..دمعت عينها بزود..تذكرت حياتها كلها مع وليد..مسكها محمد من يدها وطلعها...
محمد:عبدالعزيز ان شاء الله بيكون بينا اتصال..علشان نتطمن على صحته..
مريم:خالي..عبدالعزيز ديروا بالكم عليه..
والكل رد بيته..واللي تم عند وليد عبدالعزيز وسلطان وتميم...الدكتور طلع من عند وليد...
عبدالعزيز:دكتور بشر..
الدكتور:مثل ماهو..
تميم:دكتور يعني ايش؟
الدكتور:مثل ماقلت لك..الامل ضعيف..
كانت هالكلمة صدمة بل صاعقة على عبدالعزيز اللي تسند على طول على الطوفة ودمعته على خده..وتذكر متى آخر شاف وليد او شنهي آخر كلمة سمعها منه..ماهو قادر يتصور ان وليد بيروح وماهو شايفه مرة ثانية..هذا اخوه ورفيجه..
في الاثناء بدر وصل...
عبدالعزيز(ياخذ نفس عميق):تميم انت كنت تدري بشي؟
تميم(نزل عينه بالارض وعقب هز راسه بنعم)
عبدالعزيز:وشالي تعرفه؟؟..قولي ولي سلمك..
تميم:وليد قلبه كان يضعف يوم وراء يوم..قالي تميم خلنا نعتمر واعتمرنا..وعقب تعب جم يوم وديته المستشفى ورقدوه وكنا على اساس في الشاليهات علشان محد يدري..هذي كانت رغبته..ماكان يبي حد يدري بتعبه..وعقب ترجيته علشان نسافر واعالجه برع..ورحنا..(هني بوعبدالعزيز وصل)..
بوعبدالعزيز:طمنوني..
سلطان:ليحين مثل ماهو..
عبدالعزيز:كمل ياتميم..



تعتقدون وليد بيعيش وبينقذونه في آخر لحظة مثل ذيج المرة؟؟

تابعوا الفصل اللي بعده..

[اسطورة !]

**فصل الخامس والعشرين**




في هالاثناء بدر وصل...
عبدالعزيز(ياخذ نفس عميق):تميم انت كنت تدري بشي؟
تميم(نزل عينه بالارض وعقب هز راسه بنعم)
عبدالعزيز:وشالي تعرفه؟؟..قولي ولي سلمك..
تميم:وليد قلبه كان يضعف يوم وراء يوم..قالي تميم خلنا نعتمر واعتمرنا..وعقب تعب جم يوم وديته المستشفى ورقدوه وكنا على اساس في الشاليهات علشان محد يدري..هذي كانت رغبته..ماكان يبي حد يدري بتعبه..وعقب ترجيته علشان نسافر ويتعالج برع..ورحنا..(هني بوعبدالعزيز وصل)..
بوعبدالعزيز:طمنوني..
سلطان:ليحين مثل ماهو..
عبدالعزيز:كمل ياتميم..
تميم:ولما سافرنا..سووا له فحوصات والدكتور قاله نفس الكلام القلب قاعد يضعف..والحل الوحيد قلب بديل..دورنا ماحصلنا..وليد اصر ان نرد البلاد بسرعة..كان خايف يصير فيه شي وهو بعيد عنكم..قالي ماابي شي الا اني اكون وسط هلي..
بوعبدالعزيز(دمعت عينه)
بدر..دمعت عينه..تميم سلطان..عندما تدمع عيون الرجال..
وعقب دقايق...يدخل بوعبدالعزيز علشان يشوف وليد..ماهي الا ثواني..الا ينسمع صوت توقف نبض القلب..الممرضات يتجمعون..وبوعبدالعزيز ماهو مصدق..يمسك يده باردة..وليد..ياوليد قوم انا ابوك ياوليد..الكل يدخل..والدكاترة يتجمعون حوله..والممرضات يطلعونهم برع....
عقب شوي...طلع الدكتور...والحزن في وجهه...
الدكتور:الله يرحمه..
هني كان الخبر صدمة بالنسبة لهم..ماتوقعوا ان فعلا وليد بيروح عنهم..عبدالعزيز ماتحمل..دخل..شافهم يشيلون عنه الاجهزة ويغطون راسه..ماتحمل بدى يبجي..ويبجي..
عبدالعزيز:وليد قوم..وليد..وليد تكفى لاتروح عنا..وليد..مااقدر اقولهم انك مت..مااقدر..قوم..
راح سلطان عنده ومسكاه..
سلطان:امش ياعبدالعزيز..
عبدالعزيز:وليد ياسلطان..وليد..
سلطان:ترحم عليه ياريال..امش..
بوعبدالعزيز راح بحضن بدر..اللي كانوا يبجون..من الصدمة...الناس اللي كانت موجودة كانت تطالعهم بنظرات غريبة..وكان فيهم رياييل راحوا لهم وحاولوا يذكرونهم بالله..وان يترحمون عليه..
التليفونات ترن..ومحد قادر يرد..أسماء اتصلت في عبدالعزيز كم مرة..لين مارد وهو يبجي..
عبدالعزيز:اسماء وليد راح..راح عنا يااسماء..
اسماء(قامت وراحت بعيد علشان محد يحس عليها ودمعت عيونها من سمعت صوت عبدالعزيز):الله يرحمه..هدي ياعبدالعزيز..
عبدالعزيز:مااقدر يااسماء ماأقدر..هذا وليد..انت اكثر وحدة تعرفين ايش يعني لي..
بوعبدالعزيز(بضيق وحزن):انا مااقدر اقولهم شي..
سلطان:انا بروح اخبرهم..
وفعلا سلطان راح بيت اخته..دق الجرس..ودخل...
ام عبدالعزيز(من شافت سلطان خافت قامت):وين وليد؟
سلطان(قرب منها):قولي إنا لله وإنا إليه راجعون..
ام عبدالعزيز(بصرخة قوية):لالالالالالالالالالا لالالا...
سلطان(مسكها وقعدها)
وطبعا الكل تفاجأ بالخبر..وقعدوا يبجون...موزة ماتحملت الخبر..راحت فوق دخلت غرفتها وقعدت تبجي..
في بيت محمد..محمد يدخل البيت يحصل مريم لابسه وقربت صوب الباب..
مريم:ياللا محمد نمشي..ابي اروح اشوف وليد..
محمد(حده متضايق من الخبر مسك يدها):خلينا نقعد شوي..
مريم:ماكو وقت..ابي اروح اشوفه..
محمد:معليه بس نقعد شوي..
عقب ماقعدوا..
محمد:مريم احنا مسلمين ولازم نؤمن بقضاء الله وقدره..
مريم(وتبي تسمع الباقي):وبعدين؟
محمد:إنا لله وإنا إليه راجعون..وليد في ذمة الله..
مريم(ماصدقت..قعدت تناظر محمد خمس دقايق وهي تتذكر شريط ذكرياتها مع وليد فجأة قعدت تبجي)
محمد(خذاها بحضنه)
في بيت بوعبدالعزيز...
عبدالعزيز وتميم وبدر وبوعبدالعزيز يدخلون البيت وحالهم مايعلم به الا رب العالمين...والكل يقوم...بالدموع والصياح...
ام عبدالعزيز(رفعت راسها وشافت ريلها):وليد ياسعود..وليد..ولدي..حشاشة يوفي راح عني..
بوعبدالعزيز(قرب منها ودمعته على خده وقعد عندها):ترحمي عليه..مثواه الجنة ان شاء الله..
ام عبدالعزيز:وليد..وليد ماشبعت منك يايمه..ليش هديتني ورحت..تكفى ارجع لي..
سلطان:الله يرحمه..وادعي له..هو محتاج دعواتكم..
مريم دخلت البيت...وهي تبجي..وصرخت:وليييييييييييي� �ييييييييييييييييييييد.. (قعدت على الارض وهي تبجي)..
راح لها تميم..وحضنها...ماقدرت تتحمل اكثر..وماهي مصدقة...هدت تميم وركضت بشكل ملحوظ والكل كان عينه على مريم..ركضت لين ماوصلت غرفته..
فتحت الباب وماحصلته..قعدت تصارخ من الالم والحزن على فراقه..
لحقها تميم..ومريم كانت في حالة غريبة..
مريم(تصارخ وتنادي بإسمه)



تميم(يمسكها علشان يطلعها من هالمكان لكن...)
مريم:هدوني..ابي اخوي..وينك ياولييييييد...
تميم(دموعه نزلت من شاف حال مريم وحاول ييودها علشان ماتدخل اكثر):امشي يامريم..
مريم:ماابي..(صرخت بصوت عالي)..وليييييييييييد..
تميم(قعد يقرأ في أذنها آية الكرسي وسور القصار لين ماهدت شوي وعقب حضنها وبجى معاها)
في بيت بويوسف...يوسف ينزل تحت..ويقعد مع هله..ومن حسن حضنه ان الكل قاعد..والحزن والضيق بوجهه..
ام يوسف:يمه اشفيك؟
يوسف:البقى براسكم..
الكل اندهش بكلمة يوسف..
بويوسف:في من؟؟
يوسف(رفع راسه وشافهم كلهم عيونهم عليه ينتظرون يسمعون الاسم):وليد ولد خالتي..
هني الصدمة كانت غير متوقعة..قمر بس سمعت الاسم حست انها جذبه..قامت وراحت غرفتها..ام يوسف دمعت عينها...
بويوسف:متى صار هالحجي؟
يوسف:من شوي..كان تعبان في المستشفى..وعقب توفى الله يرحمه..
بويوسف:قوم عيل خلنا نروح..
ام يوسف:وصلنا احنا بعد بيت اختي..
جواهر دخلت على قمر..كانت تصيح وهي على سريرها..قعدت جنبها وهي تمسح على شعرها وتبجي على ولد خالتها وعلى اختها....
قمر(ارفعت راسها):جواهر قولي لي ان الخبر جذب..قولي لي ان وليد حي مامات..تكفييييين..
جواهر(حضنتها وماهي قادرة تتكلم)
قمر:ليش هداني وراح..ليش؟؟؟؟؟
جواهر:قمر..قومي لبسي عباتج وخلنا نروح بيت خالتي..
قمر:ماابي..ماني رايحة مكان..




الرياييل يروحون علشان يغسلون الميت ويكفنونه...وعقب كل هذا..ودوا الميت فريجهم علشان يصلون عليه في المسجد..والناس لما سمعت بالخبر تجمعوا في هالمسجد علشان يصلون عليه..عقب ماصلوا عليه..ودوه بيتهم علشان يبون يشوفونه قبل دفنه..دخلوا الميت في المجلس..ودخلت ام عبدالعزيز علشان تشوف ولدها..قربت منه وايدها ترتجف لين ماشالت عن وجهه الكفن..وشافت شكله..دمعت عينها..وقعدت تدعي له بقلبها..وقربوا خواته وهم يبجون..جات مريم ولما شافته ماصدقت..قعدت تبجي..اسماء راحت فوق تنادي موزة...
اسماء:قومي ياموزة..روحي شوفيه قبل ليودونه..
موزة(وهي تبجي):ماابي..ماابي اشوفه..حرام عليه ليش هدانا ورااااح..
اسماء:استغفري ربج..هذا قضاء وقدر..قومي ياموزة..(ساعدتها ونزلتها تحت)
خذوه من البيت وودوه المقبره..كان القبر جاهز...نزلوه واللي كان يدفنه تميم وعبدالعزيز...وعقب ماخلصوا..قعدوا يدعون له..والناس كانت موجودة حولهم...خلاص وليد راح تحت التراب..وماعاد في شي يخليه يرجع..هذا هو حال الجميع..بقى بروحه بين الحساب والجزاء..
قرب منهم محمد اللي شاف الدموع بعيونهم..
محمد:ادعوا له..تراه قاعد يحاسب..
وفتحوا ابواب بيت بوسالم لعزاء الرجال..وبيت بوعبدالعزيز لعزاء الحريم...
مريم راحت غرفة وليد..شافت ثوبه اللي معلق خذته وتشم ريحته هذا دهن العود اللي يحبه وليد.. وراحت تقعد على الكرسي وهي تبجي..وتتذكر آخر مرة شافته وكلمته..وليش اصر وليد انه يي يزورني ويعطيني دفتره ويوديني حديقة الحيوان..يعني هو كان يدري انه....(زاد البجي)
وموزة...جواهر كانت عندها..
في بيت راشد...راشد يدخل البيت..ويحصل امه وفاطمة قاعدين يسولفون ويضحكون....
راشد(يقعد)
ام راشد:وين كنت يمه؟
راشد:واحد من الجماعة توفى الله يرحمه..ورحنا نصلي عليه..ورحنا المقبره..
ام راشد:من من الجماعة؟
راشد:ولد خالة جواهر..
فاطمة(خافت):من فيهم؟
راشد:وليد..
فاطمة(انصدمت):الله يرحمه..مسكينة مريم..اشلون حالها الحين..راشد تكفى ودني لهم..
ام راشد:قوم يمه وصلنا لهم..هذولا نسايبنا..ولازم نروح لهم..
راشد:عيل تزهبوا..
وراحت فاطمة تدور على مريم..وماتدري وين غرفتها..راحت سألت أسماء..راحت اسماء معاها..وفتحوا غرفتها ماحصلوها..اسماء عرفت وين مريم..وماحبت تدخل غرفة وليد...
اسماء(اشرت لها):تشوفين هالغرفة؟
فاطمة:أي..
اسماء:بتحصلينها داخل..
فاطمة:مشكورة..
ودخلت..شافتها قاعدة عند الدريشة وثوب اخوها بحضنها وحالها يعور القلب..ومنزله راسها وهي تبجي..سكرت الباب فاطمة وراحت عندها..ونزلت لها.....
مريم(ارفعت راسها):فاطمة..(طاحت بحضنها)
فاطمة(قعدت تمسح على ظهرها وشعرها ودموع فاطمة على خدها):ترحمي عليه..هو الحين بحاجة لدعواتكم..
مريم(هدت فاطمة):فاطمة وليد راح عنا..وماراح يرد..
فاطمة:مريم هدي شوي..هم السابقون..ونحن بهم اللاحقون..الموت حق علينا كلنا..
مريم:هو كان يدري انه بيموت ليش ماقالي..ليش؟؟؟
فاطمة:ايش تبين يقولج..وبعدين من يدري انه متى بيموت..هذا في علم الغيب..استغفري ربج..
الصبح...الساعة 8..تروح منيرة تقعد مريم وموزة...
منيرة:مريم قومي غسلي وجهج ونزلي تحت..محمد يبيج..
مريم(قامت وقعدت وراحت منيرة..تذكرت ليش هي هني):الله يرحمك ياخوي..
تحت...ام عبدالعزيز قاعدة بالصالة مع خواتها وامها..واسماء وبناتها...تنزل مريم..وتسلم...
منيرة:روحي المجلس محمد ينتظرج..
مريم(راحت المجلس حصلته قاعد اول ماشافها وقف)
محمد:عظم الله اجركم..
مريم(دمعتها سبقت كلمتها):اجرنا واجرك..(وقعدت)
محمد:مريم حبيبتي..وليد الحين ماهو بحاجة لدموعكم..دموعكم مابتسوي له شي..ادعي له..ادعي له يامريم..
بعد يومين من العزاء..تنزل جواهر من فوق في بيت خالتها...
جواهر:يمه انا رايحة مع يوسف البيت.بشوف قمر اذا تبي شي..
ام يوسف:روحي يمه..وخليها تاكل..
جواهر:ان شاء الله..مع السلامة..
اسماء(جات ومعاها عصير ليمون نزلت عند ام عبدالعزيز):عمتي شربي العصير..
ام عبدالعزيز(بتعب وضيقة):ماابي..ماابي يااسماء..
ام سالم:مو على كيفج..لازم تشربين وتاكلين..تبين تذبحين عمرج؟
ام عبدالعزيز:ماابي شي..(دمعت عينها وقامت)..ماابي شي..(وراحت غرفة وليد فتحت الباب..حصلت مريم قاعد)
مريم(قامت لما شافت امها)





ام عبدالعزيز(صارت تبجي لما شافت غرفته واغراضه مسكت السرير وهي تتألم من داخلها على فراق ولدها)
يدخل بوعبدالعزيز مع عبدالعزيز...عبدالعزيز يأشر على مريم انها تطلع...وطلعوا....
بوعبدالعزيز(قرب منها):فوزية..
ام عبدالعزيز:سعود..ماني قادرة اصدق ان وليد ولدي راح بيوم وليلة..مااقدر..(تاخذ الفاين وتمسح دموعها)..
بوعبدالعزيز:الله يرحمه..الله يرحمه..فوزية..مايصير تسوين بعمرج جذي..انتي من امس ماكلتي شي..ولاشربتي شي..مب زين..حرام اللي تسوينه بعمرج..
ام عبدالعزيز:مااشتهي ياسعود..مااشتهي شي من عقبه..
بوعبدالعزيز:من له نفس ياكل..لكن شنسوي..تبين نذبح عمرنا..فوزية..ولدج الحين محتاج دعواتج..
ام عبدالعزيز:انا شكيت فيه من فترة..كان يتكلم معاي وكأنه كان بيموت قريب..حتى الصندوق عطاني اياه علشان اعطي قمر..الظاهر انه كان يدري..آآآه..
الساعة 12 بالليل..يدخل عبدالعزيز غرفته...ويحصل اسماء ترقد مشعل...بدل ملابسه وقعد على السرير...
اسماء:يعطيك العافية..
عبدالعزيز:الله يعافيج..
اسماء:اشلونك؟
عبدالعزيز(بكل ضيق):وبقى فيني لون..
اسماء:عبدالعزيز..انت ريال ومؤمن بقضاء الله وقدره..خليك اقوى من جذي..خلك واقف جنب امك وابوك وخواتك بهالمحنة..
عبدالعزيز(ودمعته):وانا؟؟..م� � يوقف بمحنتي؟..ليش انا اللي اكون اقوى..
اسماء(قربت منه):انا كلي لك..اللي بخاطرك قوله لي..احنا لبعض..
في بيت بويوسف....في غرفة قمر..كانت جواهر تحاول تأكلها...دخل يوسف....
يوسف:ماكلت؟
جواهر:لا..
يوسف:جواهر خلينا شوي..
جواهر(قامت):حاضر..عن اذنكم..
وراحت غرفتها....شافت تليفونها 6 مكالمات لم يرد عليها ..حطت التليفون على السرير وراحت ترتب شعرها..وقعدت على السرير وهي تفكر باللي صار..رن تليفونها...
جواهر:هلا راشد..
راشد:صوتج وايد متغير..يبين انج تعبانة..
جواهر:أي والله تعبانة..كنت قاعدة عند بنت خالتي..عورت قلبي وهي تبجي وتشوف بصوره..وماهي مصدقة..وارد البيت احصل اختي..(دمعت عينها وسكتت)
راشد:الله يكون بعونها..خلج عندها..هي محتاجتج..
جواهر:انت اخبارك؟
راشد:الحمدلله..
بغرفة قمر...
يوسف:قمر..انا من ساعة قاعد اكلمج..ردي علي..
قمر(ترفع راسها):ايش تبي اقولك؟
يوسف:حسسيني انج موجودة..
قمر:هذاني موجودة..(دموعها نزلت)..ايش تبون فيني خلوني اموت..
يوسف(عصب):ايش هالحجي..قمر..
قمر(علت صوتها):ياعل قمر الموت..
يوسف:قمر..اشفيج انت..الريال مات والله يرحمه..تبين تذبحين عمرج؟
قمر:اذا يصير ليش لا..
يوسف:لهالدرجة استسلمتي وخليتي الشيطان يلعب براسج علشان تموتين..وايمانج ضعيف؟؟
قمر:يوسف..ماانت حاسس باللي في داخلي..اللي مات كان يعني لي الكثير..اللي مات ماكان شوية بحياتي..(مسكت ثوبه وهي تبجي)..تقدر ترده لي؟؟..قول..
يوسف(مسكها وقعدها على السرير وظل ساكت)
بكرة الصبح..على الساعة 7 ونص...تكون ام عبدالعزيز قاعدة في الصالة مع عيالها..بوعبدالعزيز يي ويقرب من ام عبدالعزيز..يقعد عندها ويمد يده...
بوعبدالعزيز:هاج يافوزية..كلي لج شوي وشربي هالحليب..ولاتقولين ماابي..غصب بتاكلين..
ام عبدالعزيز(خذت منه وحاولت تاكل شوي):سمعوني يابنات..ابيكم تروحون عقب شوي عند قمر..لازم تروحون لها..
هالة:ان شاء الله يمه..اكيد بنروح لها..
بوعبدالعزيز:وين مريم؟
خولة:ماادري..موزة انت ماقعدتيها؟
موزة:ماحصلتها بغرفتها..
عبدالعزيز(قام):انا بروح اشوفها..
عرف مريم وين بتكون..دخل غرفة وليد..وشافها قاعدة على مكتبه وفاتحه لاب توبه وتشوف صوره لما راح الكشتة ولما سافر مع تميم..ودمعت عينها..قرب منها عبدالعزيز ومسح على شعرها....
عبدالعزيز(تألم لما شاف صور وليد):مريم قومي..قومي خلنا ننزل تحت..
مريم(لفت صوبه ودموعها على خده):عبدالعزيز..يعني وليد ماهو راد؟
عبدالعزيز(قال في نفسه:تكفين يامريم كافي..مااقدر اتحمل):قومي يامريم..ادعي له بالجنة..
مريم:وليد..
عبدالعزيز(ييودها وقومها من الكرسي):ياللا نمشي..كلهم قاعدين تحت..وعقب شوي البنات رايحين عند قمر..
مريم:لا..ماابي اروح لها..هي من ريحة الغالي..وليد كان يحبها وايد..اذا شفتها بموت..
عبدالعزيز:بسم الله عليج..مو مشكلة لاتروحين..بس نزلي تحت..ومسحي دموعج..
نزلوا تحت...
بوعبدالعزيز:تعالي يامريم..تعالي قعدي عندي..
مريم(قعدت عنده وابوها لمها ماقدرت تخفي دموعها وقعدت تصيح)
خلت الكل يسترجع الحزن..وام عبدالعزيز اللي قعدت تصيح...
مريم:يبه..يبه..(تسكت)
بوعبدالعزيز:عيوني..آمري..
مريم:يبه ابي وليد..(وراحت في صياح قوي لين ماقام عبدالعزيز ومعاه اسماء خذوها وودها الصوب الثاني)
اسماء(خذت فاين ومسحت دموعها):بس يامريم..خلاص..انت قاعدة تعذبينه وهو في قبره..
عبدالعزيز:اسماء..جيبي لها شي تاكله..
اسماء(قامت):ان شاء الله..
عبدالعزيز:مريم حبيبتي..مانبي نزيد هم امي..احنا ماصدقنا هدت شوي وكلت..خليتيها تصيح مرة ثانية..
مريم:مب بيدي..غصب عني..كل ركن في هالبيت يذكرني فيه..عبدالعزيز..هذا اخوي..اللي هو اخوك..فراقه صعب علينا..ومااقدر ايود دموعي على فراقه..مااقدر..
اسماء(جات ومعاها ساندويش ولبن):ياللا مريم..كلي..
مريم:ماابي..
عبدالعزيز:مريم..انت لازم تاكلين..علشان امي..
مريم:مااشتهي..حلمت فيه قبل ليموت..وقلت حق امي قالت لي هي بعد حلمت..واكتشفنا انه مات وراح عنا..
ام عبدالعزيز(جات وشافت دموع بنتها قعدت عندها وضمتها وقعدوا يصيحون):بس يايمه..بس..الله يرحمه..ويرزقه الفردوس..(مسحت دموعها)..مريم حبيبتي..كلي..كلي شي..علشاني..
مريم(تسمح دموعها):ان شاء الله..
في بيت بويوسف...تروح مها مع جواهر عند قمر...
مها:قمر حبيبتي..قومي نزلي معانا تحت..في ضيوف جايين يشوفونج..
قمر:ماابي اشوف حد..
جواهر:قمر..نزلي شوي..بس سلمي عليهم وتعالي فوق..جايين بس علشان يشوفونج..
مها:ياللا ..
ونزلت معاهم..
في عزاء الحريم...كانت ام عبدالعزيز قاعدة وتستقبل المعزين..ودموعها على خدها..وصارت تدعي له بقلبها..
اليوم هو آخر يوم في عزاء وليد الله يرحمه...في بيت بوعبدالعزيز على الساعة 11 بالليل...
ام عبدالعزيز:قوموا يابنات كل وحدة ترد بيتها..
خولة:وانت يمه؟
ام عبدالعزيز:اشفيني؟..انا بخير..انتوا هادين عيالكم وابو عيالكم..ردوا بيوتكم..وباجر تعالوا..ياللا محد يقعد..
بوعبدالعزيز:امكم معاها حق..كل وحدة ترد بيتها..
ام عبدالعزيز:وين مريم؟
منيرة:فوق يمه بغرفتها..
ام عبدالعزيز:قولي لها خلها ترد بيتها..
منيرة:ان شاء الله يمه..(قامت وراحت لها)
مريم:منو؟
منيرة:منيرة..
مريم:دخلي..
منيرة(دخلت وشافتها ضامة عمرها):مريم امي تقولج ردي بيتج..
مريم:نعم؟
منيرة:كلنا بنرد بيوتنا..وانت بعد..
مريم:ماني طالعة من هني..
منيرة:وريلج؟
مريم:ماابي اطلع من هني..
منيرة:خلاص بس لاتبجين..
نزلت تحت...
ام عبدالعزيز:وينهي؟
منيرة:يمه رفضت..وقالت ماابي ارد..
ام عبدالعزيز(قامت)
عبدالعزيز(قام):خلج يمه..انا بروح لها..
ام عبدالعزيز:معليه انا ابي اكلمها شوي..
عبدالعزيز راح معاها..ودخلوا غرفتها..ام عبدالعزيز قعدت عندها...
ام عبدالعزيز:مريم محمد تحت وخله يردج البيت..
مريم:ماابي اروح..
ام عبدالعزيز:مريم يمه..ردي بيتج..
مريم:وانت؟..اهدج لا..
ام عبدالعزيز:ياعمري يامريم..انا بخير..تطمني..وبعدين ماني بروحي..ابوج واخوج وزوجته وموزة عندي..وبعدين باجر تعالي..ولاتنسين انج تخرج هالفصل..ولازم ترجعين الجامعة علشان تدرسين وتتخرجين..لاتخلين الحزن يخرب حياتج..الواحد تصيده مشاكل في حياته وتمر به احزان..بس الحياة ماوقفت..سمعتيني يامريم؟
مريم:سمعتج يمه..
ام عبدالعزيز:ياللا قومي..نزلي تحت..وردي بيتج..
مريم:ان شاء الله..
ام عبدالعزيز:باجر الصبح روحي الجامعة وعقب اذا بغيتي تيين تعالي..
ومع مرور عشرة ايام من وفاة وليد الله يرحمه..يوم السبت...في بيت بوعبدالعزيز...الصبح..على الساعة 10..تنادي ام عبدالعزيز الخدامة..
الخدامة:نعم ماما؟
ام عبدالعزيز:خذي هالصندوق ووديه تحت..
ولبست عبايتها ونزلت..
عبدالعزيز:وين يمه؟
ام عبدالعزيز:بروح عند قمر..ماني مطولة..توصلني..
عبدالعزيز:من عيوني..بس اجيب سويج السيارة..
في شغل بوعبدالعزيز..يزوره رفيجه بواحمد...
بواحمد:هونها وتهون وانا اخوك..
بوعبدالعزيز:اهدي بال الكل..الا بالي..وليد الله يرحمه من وهو كان عمره 10 سنوات وانا كنت اسافر برع..كنت بعيد عنه..لين ماصار عمره 16 سنة..تركت السفر وتميت بالبلاد..ووليد كانت علاقته بأمه قوية..اكثر مني..لأني كنت بعيد عنه..بس لما كبر تغير وصار يحب يي صوبي..ويتكلم..مع اني ماعطيته حقه يابواحمد..هذا ولدي..
ام احمد:مثواه الجنة ان شاء الله..الله يرحمه..
في بيت بويوسف....
ام عبدالعزيز(قامت):خلج ياعائشة انا بروح لها فوق..بس خلي الخدامة تودي الصندوق فوق..
ام يوسف:ان شاء الله..
وراحت فوق..فتحت غرفتها حصلتها قاعدة ودموعها على خدها...قمر شافت خالتها بغت تبجي لكن ...
ام عبدالعزيز:تعالي ياقمر..
وراحت بحضن خالتها..ام يوسف وجواهر كانوا واقفين...
ام عبدالعزيز(مسحت دموعها):الله يشهد ان وليد الله يرحمه ايشقد كان يحبج..لكن الله ماكتب..ومالج الا تدعين له..وهذا الصندوق..عطاني اياه وليد..وقالي اعطيه اياج..وماادري شالي بداخله..قمر حبيبتي..انت وراج جامعة ودراسة..كملي دراستج..ولاتغيبين اكثر من جذي..والله يعوضج..
وراحت عنها..
قمر ماتصورت ان وليد تذكرها قبل ليموت..فتحت الصندوق..وشافت هدايا..استغربت..حصلت عطر..مكتوب عليه..إهداء الى قمر..وشافت بلايز اكسسورات وانواع ثانية..اكتشفت ان كل هدية وراها مناسبة كان يتخيلها وليد..ماتحملت قمر قعدت تصيح وهي تحضن الهدايا..
وشوي دخلت عليها جواهر...
قمر:جواهر أبي وليد..حرام عليكم لاتمنعوني عنه..
جواهر(تضايقت على حال أختها راحت وحضنتها):بس ياقمر..
قمر:جواهر تكفين أبي اشوفه بس شوي..ليش راح وهداني بروحي..



ياترى قمر ومريم بيعدون هالمحنة؟؟...وياترى في خبر ممكن يغير أجواء الحزن؟؟

تابعونا ولاتقاطعونا..

[اسطورة !]

**فصل السادس والعشرين**



ومع مرور الايام...في الجامعة..فاطمة قاعدة مع جواهر.....
فاطمة:مريم وايد تغيرت..مو مريم اللي اعرفها..لاتتكلم ولاتتصل..ولاتضحك..
جواهر:عذريها يافاطمة..هذا اخوها اللي مات..ومريم كانت دايما وياه..ماتنلام..اختي قمر اللي ماكانت زوجته متضايقة..وتبين مريم اللي هي اخته وكانت بينهم ذكريات تنساه..مستحيل تتقبل الموضوع بهالسهولة..يبيلها وقت لين ماتتغير نفسيتها..
فاطمة(طلعت تليفونها):خلني اتصل فيها اشوف وينهي..آلو..
مريم:هلا فاطمة..
فاطمة:وينج؟
مريم:ويني؟..(تشوف حولها)..ماادري..بلا انا في الطريق رايحة المكتبة..
فاطمة:ايش عندج في المكتبة؟
مريم:ايش عندي؟..اي صح..بروح آخذ الكتاب اللي قالنا عنه الدكتور..
فاطمة:لاتروحين انا جبته..تعالي عندنا..
مريم:انت وين؟
فاطمة:انا بالنشاط..
مريم:ماني جايه النشاط..انا بروح كلية العلوم..تبين تيين تعالي..مع السلامة..
فاطمة:ماقلت لج..الله يعينها..
حزة الغداء...في بيت بوعبدالعزيز..كلهم قاعدين يتغدون....يرن تليفون البيت..يروح سعود يرد...
سعود:السلام عليكم..
موزة:وعليكم السلام..سعود حبيبي عطني ابوك..
سعود:يبه عمتي موزة..
عبدالعزيز(يقوم):السلام عليكم ..
موزة:وعليكم السلام..عبدالعزيز انا بخلص على الساعة 3 ونص من بيمرني؟
عبدالعزيز:انا بمرج..مع السلامة..
محمد يروح ياخذ مريم من الجامعة....وهم في السيارة......
مريم:محمد..معليه توديني المستشفى..
محمد:ليش؟
مريم:ماادري تعبانة شوي..
محمد:ايش حاسة؟
مريم:ماادري..
محمد:الحين بنروح..
وراحوا الطواري...محمد نطرها برع...لين ماطلعت...
محمد(قام وراح لها):ايش قالوا لج؟
مريم:ماادري..قالوا لي لازم تسوين تحاليل وماادري وشو..بروح وبرد..
محمد:تبين أي معاج؟
مريم:لا خلك هني..ماني مطولة..
على الساعة 4 وربع..تروح ام يوسف عند اختها ام عبدالعزيز...
ام عبدالعزيز:عائشة..لاتفكرون تأجلون عرس جواهر علشانا..
ام يوسف:من له خلق للعرس..
ام عبدالعزيز:لا ياعائشة..الريال ماله ذنب ينتظر..زوجوهم..ولاتحاتينا..ع يالي كلهم بيحضرون عرس جواهر..
ام يوسف:وانت؟..اذا ماانت حاضرة ماني مسوية العرس..
ام عبدالعزيز:بحضر ان شاء الله..
في المستشفى...مريم تيي....
مريم:محمد..
محمد(رفع راسه وشافها وقام):ها ايش قالوا لج؟
مريم:بقولك في السيارة..خلنا نمشي..
وراحوا السيارة...
محمد:ياللا قولي..شغلتي بالي..
مريم(ابتسمت):انا حامل..
محمد(ماصدق):والله؟
مريم:أي..التحاليل كلها تأكد اني حامل..
محمد:وايشقد صار لج؟
مريم:تقولي الدكتورة انت في الاسبوع الثالث..
محمد:اللهم لك الحمد والشكر..فرحتيني..
مريم:نبي حلاوة البشارة..
محمد(يشغل السيارة ويسوق):من عيوني..انت تامرين..مريم..
مريم:لبيه..
محمد:ايش رايج تروحين عند امج وتبشرينها بهالخبر..
مريم:مااقدر يامحمد..امي متضايقة..
محمد:بالعكس..هالخبر بيغير من نفسيتها..انا الحين بوديج لها..
في بيت بوسالم...
ام سالم:مها وين ريلج؟
مها:الحين نازل..
سلطان(نزل):السلام عليكم..
ام سالم:وعليكم السلام..ياللا يمه نمشي..
في بيت بوعبدالعزيز...



مريم تدخل البيت وتحصل خواتها قاعدين وخالتها...
في الطابق الثاني...عبدالعزيز حس بضيقة..ودخل غرفة وليد...هدوء عجيب..





وقعد يتذكر كل حياته مع وليد..تذكر ضحكته سوالفه غشمرته..وقف عند الدريشة..ويطالع الدنيا منها...وكمل ذكرياته مع وليد...لما كانوا يروحون المدرسة مع بعض..أيام الدراسة واللعب والهياته..أيام النجاح وفرحتها وتقطيع الكيك والاحتفالات اللي كانت تصير في البيت..طلعات البر والبحر والسباحة مع بعض...لحظات السفر والعمرة واليد باليد بالطاعة والاستغفار...تذكر يوم عرسه لما وليد رقص جدام الناس وهو مستانس وزفه لين باب الفندق..تذكر لما رب العالمين رزقاه بسعود..وليد طار من الفرحة وماخلى حد الا وقاله..وعزم العيلة على حسابه من وناسته...
عبدالعزيز:ليش ياوليد..ليش رحت عني بهالسرعة..كنت مستانس معاك..وفرحان بوجودك بحياتنا..انت كنت الابتسامة في هالبيت..رحت بغمضة عين..الدنيا قست علينا بفراقك........
تحت بالصالة....
عقب هدوء تم عشر دقايق...
مريم:يمه..
ام عبدالعزيز(ترفع راسها):خير يمه..
مريم(تبلع ريقها):أنا...أنا حامل..
ام عبدالعزيز(ابتسمت لها واشرت لها بيدينها):تعالي عندي..
مريم(راحت لها وحضنتها وحبتها)
ام عبدالعزيز:ألف مبروك يابعد عمري..
مريم:الله يبارك فيج..
والكل يبارك لها...
ام عبدالعزيز:متى رحتي المستشفى؟
مريم:من شوي..حسيت بتعب ومحمد وداني..
ام عبدالعزيز:وايشقد صار لج؟
مريم:هذا ثالث اسبوع لي..
ام عبدالعزيز:الحمدلله..وماقال� � شي؟
مريم:بلا..قالت لي لازم اهتم بصحتي وآكل عدل..يعني من هالحجي..
ام عبدالعزيز:لازم تسمعين كلام الدكتورة..علشان ماتتعبين..
مريم:ان شاء الله..
ام عبدالعزيز:توج رادة من الجامعة؟
مريم:أي يمه..طلعت من الجامعة ورحت المستشفى..
ام عبدالعزيز:قومي هالة عطيها شي تاكله..
مريم:ماابي يمه..
ام عبدالعزيز:لازم تاكلين..قومي هالة..
هالة:ان شاء الله يمه..
وتيي ام سالم وسلطان يدخل..ويقعدون....
ام يوسف:يمه مريم حامل..
ام سالم(استانست):ألف مبروك يامريم..هذي الاخبار اللي تفرح..
مريم:الله يبارك فيج يدتي..
سلطان:مبروك..
مريم:الله يبارك فيك..
هالة:مريم تعالي..
سلطان:عيل وين موزة؟
منيرة:راقدة..ردت من الجامعة تعبانة ونامت..
في بيت راشد...



يرن تليفون فاطمة بالمسج...
فاطمة(تفتح المسج وتفج عينها وماتصدق على طول تتصل):ألف مبروووووووووك..
مريم:الله يبارك فيج..
فاطمة:من متى؟
مريم:توني اليوم رحت المستشفى وخبروني..
فاطمة:واخيرا بيوصل ولي العهد..
مريم:الحمدلله..
فاطمة:مريومو بتصيرين ام..وانا خالته..
مريم(تبتسم):ليش لا..
فاطمة:اذا جبتي ولد ايش بتسمينه؟
مريم:في خاطري وليد..
فاطمة:واذا بنت؟
مريم:يمكن الريم..
فاطمة:ديري بالج على نفسج عدل..
مريم:ان شاء الله..ياللا فطوم بسكر ريلي جى..
فاطمة:سلمي عليه..
مريم:سكتي..مع السلامة..
محمد(يقعد عندها):عساني ماانحرم من هالابتسامة..
مريم:تسلم..
محمد:قومي بدلي علشان نروح نتعشى برع بمناسبة هالخبر..
مريم:ان شاء الله..
الاشهر تمر بسرعة بعد أحداث حزينة..تتغير وايد اشياء....جواهر تعرس وتروح بيت ريلها...مريم تتخرج من الجامعة ويوصل حمالها في الشهر الخامس..وفاطمة تتخرج من الجامعة وتتوظف في مدرسة..وموزة تستمر بدراستها في جامعتها....
في بيت راشد...وتحديدا في غرفة راشد..جواهر كانت قاعدة تمشط شعرها الطويل الاسود الناعم..دخل راشد...ولما شافها..
راشد:فديت هالجمال..عيني عليج باردة..تدرين انا لازم اكافئ فطوم اختي..
جواهر:ليش؟
راشد:لأنها اختارتج لي..
جواهر(وجهها صار احمر وربطت شعرها وتعطرت وراحت صوب الباب)
راشد(وقف عند الباب ومنعها):وين؟
جواهر(تبي تشرد منه):بروح عند امك..
راشد:لا..الحين انا جاي من الصلاة ابي اقعد معاج..تبين تهديني وتروحين؟
جواهر(نزلت راسها)
راشد(رفع راسها وعطاها نظرة حب):أحبج..تعرفين يعني شنو احبج..(مسك يدها وقعدها على الكرسي)..تصدقين جواهر..ماكنت متوقع اني لما اتزوج بحب زوجتي بجنون..والله اني محظوظ فيج..
في بيت بويوسف....
بويوسف:ايش قالت لج؟
ام يوسف:تقول ماابي اتزوج لين مااتخرج..
بويوسف:هذا مو حجي..هذا ثاني واحد ييها وماتبيه..
ام يوسف:شسوي فيها..
بويوسف:انا بروح اكلمها..
في بيت بوعبدالعزيز...
موزة:مريم ايش بتسمين ولدج؟
مريم:وايش دراج انه ولد؟
موزة:لاحقين على البنت انت قولي..
مريم:في خاطري اسميه وليد..
ام عبدالعزيز:لا..
استغربوا..
ام عبدالعزيز:محد يسمي ولده وليد..
مريم:ليش يمه؟
ام عبدالعزيز:بس..ماابي حد يسمي عياله بإسم وليد..
مريم:ان شاء الله..
منيرة(تبي تغير لهم الجو):واذا بنت؟
مريم:بنت بسميها الريم..
موزة:حلو الاسم..
عقب يومين...في بيت راشد..راشد يكون تعبان..مسخن ومتزكم وحالته حاله...
جواهر تقرب منه وتحط على راسه كمادات..هدته وراحت تسوي له شوربة..وردت الغرفة..قعدت عنده وهي تمسح على رقبته فيكس..راشد يقوم...
راشد(يبتسم وهو تعبان):تعبتج معاي..
جواهر:تعبك راحة..اهم شي ترتاح..دام انك قمت..قوم اقعد علشان تشرب الشوربة..وايد زينة لك..
راشد(قام وقعد):بس انت شربيني..
جواهر:من عيوني..
راشد(وهو يشرب):جان زين كل يوم مريض علشان ادلعيني..
جواهر(ابتسمت له):بسم الله عليك..إن شاء الله هذي آخر مرة..
راشد:بعد مادلعيني..
جواهر:لاتخاف بدلعك..كم راشد عندي..
راشد(يفرك عينه)
جواهر:اشفيك؟
راشد:ماني مصدق ان اللي جدامي جواهر..
جواهر(تضحك):ليش؟
راشد:واخيرا سمعت منج هالكلام..
جواهر(وجهها صار احمر)
راشد:خلاص..بنسكت بس شربيني..
ومع مرور ايام...في بيت محمد...
محمد:مريم الدكتورة ماقالت لج بنت ولا ولد..
مريم:لا..تقولي مايبين..
محمد:اللي يي من رب العالمين حلو..
مريم:اذا كان ولد ايش بتسميه؟
محمد:ابي اسميه على اسم الوالد..
مريم:جاسم؟
محمد:أي..
مريم:حلو..(قامت)
محمد:وين؟
مريم:بروح ازهب الكيكة علشان نروح بيت ابوك..
في بيت بوسالم...تميم ينزل....
تميم:وين امي؟
سلطان:بغرفتها تصلي..
تميم:ايشقد صار لها؟
سلطان:من ربع ساعة..
راح غرفتها..حصلها على السجادة تدعي..تميم يروح ويتربع عندها....
تميم:ادعي لي..
ام سالم:يالله ياكريم..توفق ولدي تميم وتوفقه دنيا وآخرة وترزقه بالزوجة الصالحة التي تسعده..
تميم:آمين..
ام سالم:بغيت شي؟
تميم:ابيج انت يايمه..
ام سالم:خير فديتك..صاير شي؟
تميم:متضايق..
ام سالم:اشفيك متضايق؟
تميم:حاس بفراغ عقب وليد الله يرحمه..
ام سالم:تزوج يايمه..لتزوجت ماراح تحس بالوحدة..
تميم:اتزوج؟!!
ام سالم:أي تزوج واشفيها..اذا تبي ادور لك على وحدة أنا حاضرة..
تميم:خليني افكر..
ام سالم:من متى وانت تقولي خليني افكر..
تميم:عطيني يومين وبقرر..
في بيت بوعبدالعزيز...موزة بالجامعة واسماء وعبدالعزيز بدارهم..وبوعبدالعزيز في الشغل...
ام عبدالعزيز مشت لين ماريلها وصلتها لغرفة وليد...فتحت الباب....
حست بهدوء وحزن بداخلها انها خلاص ماراح تشوفه..قربت من كبته فتحته حصلت ملابسه..من كل الانواع وهذي الثياب اللي مخيطها جديدة حق الشتاء..آآآآآآه ياوليد..(دمعت عينها)..رحت عني..(فتحت الدرج حصلت صوره وهو صغير)..وليد..وليد..(مشت ومشت لين ماحصلت صورته على التسريحة خذت البرواز وضمته وهي تبجي)..وليد يمه..ابي اشوفك..ابي اقعد معاك ليش رحت عني ياقلبي..يمه ياوليد..رد علي..(وصارت تبجي بصوت عالي..عبدالعزيز واسماء سمعوها وجاوا على طول)
عبدالعزيز(مسكها):يمه شالي يابج هني؟
ام عبدالعزيز:روحي جابتني هني..عند وليد..
عبدالعزيز(تضايق على امه ساعدها وقعدها على الكرسي):اسماء جيبي لها ماي..
اسماء:ان شاء الله..
يوم الجمعة....بالليل تروح جواهر بيت ابوها..وتدخل غرفة قمر...
جواهر:اخبارج؟
قمر:بخير..
جواهر:سمعي عندي لج خبر بيفرحج..
قمر:شنو؟
في بيت بوعبدالعزيز...
سلطان:أخاف يطلع يشبهني..وعقب توهقين..
مريم:أي والله اخاف اتوهق من بيتزوجه..واذا بنت لا بالله عنست اذا تشابهك..
سلطان(على انه عصب):ييلج الشرف عيالج يشبهوني..
مريم(تضحك):اكيد..
سلطان:وين الكوكتيل اللي سويتيه؟
مريم(قامت):الحين بجيبه..ثواني..
على الساعة 11 بالليل في بيت راشد...وبغرفة راشد..كانت جواهر تمسح مكياجها وتعدل شعرها...وراشد قاعد يلعب بتليفونه على السرير...
جواهر(وهي مترددة ومستحية):راشد..
راشد:عيون راشد..
جواهر:ترى انت قريب بتصير ابو..
راشد(مااستوعب اللي سمعاه هد التليفون وراح لها):شنو قلتي؟
جواهر:قلت بتصير ابو..
راشد(فاج عينه):حامل؟؟
جواهر(استحت وراحت عنه)
راشد(استانس):فديت المستحي..جواهر انت حامل؟..ياسلالالالالالام..لا صدق انا باين..
جواهر:بسم الله عليك..
راشد(قرب منها ومسك يدها وحطاه على قلبه):سمعي..سمعي ايش تسمعين صج حمدلله والشكر من الوناسة ماني مركز..حسي بدقات قلبي..كلها حب لج..ألف مبروك ياقلبي..
جواهر:الله يبارك فيك..
راشد:وايش بنسميه المحروس؟
جواهر:انت ايش تبي؟
راشد:انا؟..محمد طبعا..على اسم الوالد الله يرحمه..
جواهر:الله يرحمه..واذا جاتك بنت؟
راشد:والله اذا بنت أخاف صج أجن..بتطلع عليج..
ومع مرور الشهور والاسابيع والايام...مريم ولدت وجابت بنت..وسموها الريم..وقمر تخرجت من الجامعة واشتغلت بوزارة..والعنود ونورة تخرجوا من الثانوية..ودخلوا الجامعة علشان يكملون مسيرة التعليم...وجواهر يوصل حمالها بالشهر الرابع..
في بيت محمد...مريم بالمطبخ تزهب الغداء...ورتبت طاولة الاكل..وراحت تبدل ملابسها وتصلي..وكانت الريم راقدة وهذا من حسن حظ مريم..وعقب محمد يدخل البيت ومعاه اغراض البيت...تطلع مريم من غرفة النوم...
مريم:يعطيك العافية حبي..
محمد:الله يعافيج..ريحة الاكل ذبحتني..ميت من الجوع..
مريم:ثواني وبتتغدى..بس بدل..
محمد:عيل وين الريم؟
مريم:راقدة..وقت مناسب..خلنا نتغدى قبل لتقوم..
محمد:ياللا..ترى الاغراض اللي بغيتيها جبتها..
مريم:تسلم يالغالي..عساك دايم لنا..
بالجامعة...جواهر تمشي لين ماتوصل السيارة..وتركب...
جواهر:السلام عليكم..
راشد:وعليكم السلام..أخبارج؟
جواهر:بخير..تعبت من الجامعة..متى اتخرج..
راشد:ياللا مابقى شي..أخبار المحروس؟
جواهر(تبي تغير الموضوع):اقول راشد..قبل لنرد البيت..ابيك توديني الجمعية أبي اشتري جم غرض..
راشد:من عيوني كم ام محمد عندي انا..
في بيت بوعبدالعزيز...



اسماء:أصب لج شاي عمتي؟
ام عبدالعزيز:ياليت..عبدالعزيز راح يجيب موزة؟
اسماء(تمد لها):أي..(قعدت)
ام عبدالعزيز:الدانة يمه عطيني التليفون..
الدانة:ان شاء الله..
ام عبدالعزيز(تتصل):السلام عليكم....اشلونج حبيبتي؟...الحمدلله كلنا بخير...اشتقنا حق الريم وينهي؟
مريم:الريم فديتها تلعوزني في الليل ومن الصبح قاعدة..
ام عبدالعزيز(تبتسم):فديتها..جي� �يها عندي..
مريم:ان شاء الله..تامرين يالغالية....مع السلامة..من كان؟
محمد:هذي العنود خلصت من الجامعة وتقول تعال خذنا..
مريم:اقول محمد..
محمد:خير..
مريم:اخوك سيف ماهو راد؟
محمد:بيي بعيد الاضحى ان شاء الله..ياللا انا رايح البس..
مريم:انزين اصبر وصلني بيت ابوي..
في سيارة عبدالعزيز...
عبدالعزيز:اشلون الدراسة معاج؟
موزة:زينة..بس اتعب وايد..
عبدالعزيز:انت قدها..
موزة:باقي وايد على التخرج..
عبدالعزيز:بتمر الايام بسرعة ومابتحسين..
موزة:ياليت والله..شنو الغداء؟
عبدالعزيز:sea food ..
موزة:ياسلام..من اللي طابخ؟
عبدالعزيز:امي ومرتي..
موزة:جوعتني بزيادة..
وفي يوم من الايام...في بيت بوسالم...يرن تليفون البيت.....
ام سالم:السلام عليكم....هلا ببنيتي...احنا بخير والحمدلله..طمنيني عنج انت وريلج؟...ماشاء الله هذي الاخبار اللي تفرح..بالمبارك يمه...اكيد بيي عندج..بس انت خبريني قبل...ان شاء الله يوصل...سلمي على غانم..مع السلامة..
بوسالم:هذي حصة؟
ام سالم:أي..وسلمت عليك..
بوسالم:الله يسلمها..اخبارها؟
ام سالم:الحمدلله..وبشرتني انها حامل..
بوسالم:الحمدلله..
ام سالم:وتقول لازم تيين حزة الولادة..
بوسالم:ليش مايجون هني؟
ام سالم:علشان شغل غانم..
سلطان(ينزل ويسلم)
ام سالم:وين بتروح يمه؟
سلطان:بروح اجيب سيارتي من الوكالة..تبون شي؟
بوسالم:سلامتك..من بيوديك؟
سلطان:تميم..مع السلامة..
في بيت بويوسف...
كانت ام يوسف قاعدة مع جواهر وقمر بالصالة يسولفون..ومرة وحدة....
جواهر(تحس بألالام):يمه..لحقي علي..
ام يوسف:اشفيج؟؟
جواهر:ماادري حاسة بألالام..
ام يوسف:قومي قمر نادي يوسف..
في بيت راشد...تروح فاطمة عند راشد..وتصحيه...
فاطمة:رشود قوم..
راشد(قام وهو معصب):رشود بعينج..
فاطمة:بعيني؟!!..معليه..مايخا� �ف قوم..زوجتك تعبانة وهي في المستشفى...
راشد(فز من مكانه):ايش؟؟..من خبراج؟
فاطمة:قمر اتصلت علي علشان اخبرك..تقول يوسف اتصل عليك وايد وانت ماترد..قوم..
راشد(من غير مايغسل وجهه لبس ملابسه وطار)
ام يوسف:راشد يمه دير بالك وانت تسوق..
في بيت محمد...يرن جرس البيت...يدخل محمد ومعاه الاكياس...
محمد:ياللا حبيبتي..قومي غسلي ايدينج علشان نتعشى..
مريم:ريحة الاكل تشهي..
محمد(وهو يفتح الاكياس):أي..بسرعة..
مريم:ان شاء الله..
في المستشفى...عند الطواري...
راشد(يركض لين ماوصل لهم):طمني يوسف..ايش صار على جواهر؟



بدري على ولادة جواهر..شالي صاير مع جواهر؟؟...وفي أحداث مهمة في انتظاركم..

ماعليكم الا انكم تابعونا..

أشوفكم على خير..

[اسطورة !]

**فصل السابع والعشرين**




في المستشفى...عند الطواري...
راشد(يركض لين ماوصل لهم):طمني يوسف..ايش صار على جواهر؟
يوسف:ولاشي يبون يسوون لها عملية قيصرية..
راشد:ايش له..وبعدين توها على الولادة..بقى لها شهر..
يوسف:ماادري الدكتورة جات وخبرتنا..تعال معاي نروح للدكتورة..
وراحوا لها...
الدكتورة:لو سمحت لازم توقع على العملية..
راشد:دكتورة بدري عليها..
الدكتورة:الجنين تعبان ولازم ينولد..لو سمحت تفضل معاي علشان توقع ورقة العملية..
في بيت بوعبدالعزيز..



يرن تليفون البيت...ترد اسماء...
اسماء:السلام عليكم..
قمر:وعليكم السلام..أخبارج أسماء؟
اسماء:الحمدلله..انت اخبارج قمر؟
قمر:بخير..خالتي موجودة؟
اسماء:أي نعم موجودة ..تبين أناديها..
قمر:لا..بس أبيج تخبرينها إن جواهر ربت وجابت محمد..
اسماء:بالمبارك..
قمر:الله يبارك فيج..
اسماء:ان شاء الله بخبرها..مع السلامة..
ام عبدالعزيز(تيي وتقعد):من كنت تحاجين؟
اسماء:هذي قمر..تقول إن جواهر ربت وجاها محمد..
ام عبدالعزيز:توها مبجر على الولادة..
اسماء:ماادري ياعمتي..
ام عبدالعزيز:عطيني التليفون خلني اتصل فيهم..
في بيت مريم...يرن تليفون البيت...
مريم:السلام عليكم..
اسماء:وعليكم السلام..أخبارج ياأم الريم؟
مريم:الحمدلله..انتوا اخباركم؟
اسماء:الحمدلله..كلنا بخير..طمنيني على البنوتة..
مريم:تسلم عليكم..
اسماء:اقول مريم بغيت اخبرج عن جواهر..تراها ربت وجاها محمد..
مريم:ماشاء الله..محمد بعد..فديت محمدي..
اسماء(تضحك):الله يخليه لج..
مريم:آمين..تسلمين ياام سعود...سلمي عليهم..مع السلامة..
محمد:ايش عندكم..جايبين طاريي؟
مريم:جواهر بنت خالتي جاها ولد سموه محمد..
محمد:ياسلام..وايش معنى محمد؟..لهالدرجة يحبون اسمي؟
مريم:وايد لأنك ريلي..علشان ابو ريلها..
محمد:أي..انزين تعالي خذي الريم..نايمة..
مريم(قامت):فديتها والله..
وتمر السنين على خير..وتصير تغييرات كثيرة في حياتهم..
محمد ومريم ينرزقون بجاسم..وريم تكبر ويصير عمرها 15 سنة..وجاسم 12 سنة..وموزة تتخرج من الجامعة وتشتغل في المستشفى دكتورة طب عام..
وعبدالعزيز عياله يكبرون وينرزقون بتوم بنت وولد..سموهم خالد والهنوف..
وسلطان الله يرزقه بهند والريم..وجواهر تنرزق بولد سموه جبر وبنت اسمها رغد..وقمر تتزوج وتنرزق بولد سموه بدر..
والعنود أخت محمد تتزوج ونورة بنت خالتهم تتزوج..
وتمر الايام على خير..والكل مشغول بحياته...
في بيت راشد...
كلهم متجمعين على الفطور..وناطرين يأذن أذان المغرب..
راشد(يقوم):ياللا جبر..علشان نلحق على الصلاة..
جبر(وهو ياكل):انطر بعد شوي..أنا ميت من الجوع..
راشد:واحنا هاذي حالتنا معاك كل يوم..قوم..
جبر(قام وهو ياكل)
راشد:بنرجع البيت..ماشايف أكل بعمرك..
جواهر:ياللا جبر بسك..
في بيت بوعبدالعزيز...الرياييل يدخلون البيت..يحصلون الحريم يزهبون طاولة الاكل..
سعود(يقعد):ياللا عجلوا..وراي امتحان ومذاكرة..
اسماء:ثواني..خلي جدك وابوك ييون..وين مشعل؟
سعود:راح يلبس بيجامته..
اسماء:وانت ايش عندك قاعد بثوبك؟
سعود:مالي خلق اروح وارد..
ويقعدون كلهم ويفطرون...
بوعبدالعزيز:عبدالعزيز متى اجازة الخمس الاواخر؟
عبدالعزيز:عقب باجر ان شاء الله..
سعود:لولا رمضان جان دعيت على دكاترتنا بالجامعة..يعني ماتحلالهم الامتحانات الا عقب رمضان..
مشعل:أي والله..يعني الواحد اشلون يتونس بالعيد..
بوعبدالعزيز:ام عبدالعزيز موزة ماردت من المستشفى؟
ام عبدالعزيز:لا والله..قالت بترد على الساعة 10..لأن اليوم عندها مناوبة..
في بيت محمد...قاعدين في الصالة..
محمد:الريم متى امتحانج؟
الريم:بعد العيد..
محمد:وانت جاسم؟
جاسم:بعد العيد..
مريم:دوم جذي يسوون في الطلبة..
محمد:شدوا حيلكم بالدراسة..
جاسم:انا مب رايح باجر المدرسة..
مريم:ليش ان شاء الله؟
جاسم:لإن عقب باجر اجازة..
محمد:ويعني..ماكو غياب باجر..(قام)..أنا بروح أتزهب للصلاة..انت بعد قوم تزهب..
في المستشفى...موزة كانت بغرفة مريضة...
موزة:اشلونج يمه؟
المريضة:الحمدلله على كل حال..متى بترخصوني يابنيتي؟
موزة:قريب ان شاء الله..بس بالاول نتطمن عليج..
ولد المريضة:دكتورة اخبار امي؟
موزة:الحمدلله الوالدة في تحسن..والكوليسترول نزل عن قبل..بس عندها الضغط مازال مرتفع..بس مع العلاج راح تتحسن ان شاء الله..(قعدت تكتب في ملفها وعقب)..سلامتج يمه..ماتشوفين شر..عن اذنكم..
وعقب ماطلعت من الغرفة...
الممرضة:هذا ملف المريضة اللي كانت مسوية عملية الزايدة..بتشوفينها؟
موزة:ليش وين الدكتور عبدالله؟
الممرضة:راح عند مرضى الرجال..
موزة:وين ملف المريضة؟
الممرضة(تمد يدها):تفضلي..
موزة(قعدت تقرأ لين ماعطتها):شوفي اذا في حد عندها..علشان ادخل اشوفها..
وعقب دقايق تدخل موزة...
موزة:اشلونج عبير؟
عبير:الحمدلله..متى بطلع دكتورة؟
موزة(تبتسم):كل ماادخل على مريضة تقولي هالجملة..
الام:ليش يادكتورة من يحب قعدة المستشفى..
موزة:معاج حق..(تكلم الممرضة)..في حد شافها اليوم؟
الممرضة:لا..بس مر عليها الدكتور حسين..
موزة:شاف الجرح؟
الممرضة:لا..
موزة:لو سمحتي ممكن شوي..
الام:بس انا امها لازم اطلع؟
موزة:ياليت..
الام(قامت):حاضر..
في بيت بوسالم...
عقب صلاة التراويح..يتجمعون كلهم يشربون شاي وقهوة والحلو...
تميم:تسلم ايدج حصة على الحلو..وايد حلو..
حصة:عليك بالعافية..
سلطان:غانم متى راد؟
حصة:قبل العيد بيوم..
سلطان:وايشقد اجازته؟
حصة:اربعة ايام..
ام سالم:روحي حصة شوفي بنتج قاعدة تصيح..
حصة(قامت):ان شاء الله يمه..
ام سالم:أخبار زوجتك الحين؟
تميم:الحمدلله..(يرن تليفونه يطلع بالحوش)..آلو...نعم...انا في بيت ابوي تبين شي؟...ماادري..متى ماجيت جيت..مع السلامة..
فاطمة:مع السلامة..(حست بضيق ودمعت عينها)..
رن تليفونها...
فاطمة:هلا مريم..
مريم:اشلونج فطوم..
فاطمة:بخير..انت شاخبارج؟
مريم:الحمدلله..سمعي بقولج شي..باجر على الفطور عازمتكم..اوكي..
فاطمة:لا مريوم..
مريم:مافي شي اسمه لا مريوم..انا عزمت وخلاص..
فاطمة:كلمتي خالج؟
مريم:الحين باتصله..ياللا مع السلامة..تصدق محمد احس من صوتها انها متضايقة وايد..
محمد:اكيد ولدهم مات وشي طبيعي بيحسون بالضيقة..
مريم(تتصل في خالها):السلام عليكم..هلا بالخال..اشلونك؟
تميم:بخير انت شاخبارج؟
مريم:الحمدلله....كلهم بخير..اسمع خالي..
في بيت بوعلي...نورة تزور خالتها..ومحد يكون بالصالة...
نورة:خالتي..
ام علي:نعم..
نورة(بخوف):خالتي أنا ابي اتطلق من ريلي..
ام علي(فجت عينها واستغربت):ليش يابنيتي؟
نورة(قعدت تصيح وحضنتها خالتها)
ام علي:خير يايمه ايش صاير؟
نورة(تمسح دموعها):خالتي..ريلي متزوجني علشان فلوسي مو علشان شي ثاني..كل يوم يطلب مني مبلغ ويقولي انا بحاجته..مااقدر اقوله لا..يمكن صج محتاج..اعطيه وبالاخر اكتشفت ان الفلوس ماخذها وخاشه عنده في البنك..
ام علي:ومن اللي قالج انه يخش الفلوس؟
نورة:سمعته يقول حق واحد من ربعه..إنه متزوجني علشان فلوسي وهو متزوج علي..(قعدت تصيح)
ام علي(انصدمت وماقدرت تقولها ولاشي خذت التليفون واتصلت على ريلها)
نورة(قامت):خالتي ماني رادة البيت..بروح داري..
ام علي:روحي يمه ارتاحي..
ام علي(اتصلت في العنود):العنود يمه..تعالي عند نورة..اي هي عندنا..عندها مشكلة عودة...ريلها..انت تعالي وعقب بتعرفين السالفة كلها..مع السلامة..
في محمد..يرن تليفون البيت...
مريم:السلام عليكم...هلا عمتي..بخير انت شاخبارج؟..الحمدلله كلهم بخير..محمد؟..اي نعم موجود..لحظة..محمد..امك بالتليفون..
محمد(يروح عند التليفون):السلام عليكم..
مريم:ريم يمه تعالي معاي المطبخ خلني ازهب السحور من الحين..
ريم:ان شاء الله..
جاسم:يمه انا جعت..
مريم:تعال المطبخ..
وعقب خمس دقايق...
محمد:اقول مريم..
مريم:عيوني..
محمد:انا بروح بيت ابوي..
مريم(شافته متضايق):صاير شي؟
محمد:أي..
مريم:خير؟
محمد:في مشكلة..انا بروح اشوفهم وراد..بروح ابدل..
مريم:ريم يمه ديري بالج وانت تقشرين البطاطا..بروح عند ابوكم وبرد..
في الغرفة..
مريم:محمد ايش صاير؟
محمد(وهو يلبس):نورة..
مريم:اشفيها؟
محمد:ريلها متزوج عليها وقاعد يلهف فلوسها..
مريم:لاحول ولاقوة الا بالله..
محمد:انا اوريه..ياخذ من بناتنا ويسوي فيها جذي..صج مو ريال..يراكض وراء فلوس زوجته..صج مايستحي..
مريم:لاتنسى ان احنا برمضان..
محمد:استغفر الله..انا رايح..مع السلامة..
مريم:في حفظ الله..
في بيت بوعلي..في غرفة نورة...
العنود:ايش صار بالضبط؟
نورة:اول مرة طلب مني مبلغ 20 ألف ريال..وقالي انه محتاج علشان قسط البيت اللي شاريه..وانا صدقته وعطيته..وعقب طلب مني مبلغ 8000 ريال..قلت له ماعندي حاليا انتظر شوي..جاني عقبه بإسبوع وقالي ابي 12000..شكيت..قلت معقولة هو ماعنده فلوس..عطيته خمسة مع ان عندي بس ماعطيته..حاولت اكون اذكى منه..لين قبل جم يوم طلب مني مبلغ بخمسين ألف..وصدفة سمعته يتكلم في التليفون مع رفيجه ويقوله..لاتخاف باخذ كل فلوسها بس اصبر علي شوي..علشان ماتحس اني متزوجها علشان فلوسها..وسمعته مرة يتكلم مع وحدة ويتغزل فيها..ويقولها اليوم كله عندج..وهذي اللي عندي بطلقها بس عقب مااقطها بالشارع..(قعدت تصيح)
العنود(ضمتها):بس ياحبيبتي..قطعتي قلبي..الحين بتشوفين ابوي واخواني ايش بيسوون فيه..
العنود:ماابي شي منه بس ابيه يطلقني ويرجع لي فلوسي..
وصارت الساعة 11..جى ريلها سلمان..بس دخلوه المجلس واستلموه..وكان عصبي بردوده..
سلمان:لو سمحتوا نادوها لي..ابي اشوفها..
وجات نورة..ودخلت المجلس بوجود ريل خالتها ومحمد وعلي..
سلمان:ليش ماتغطين عن الرياييل؟
نورة:هالشي يخصني..وبعدين هم هلي قبل لتدخل حياتي..
سلمان(انقهر):ياللا نمشي البيت..
نورة:آسفه..ماني رايحة معاك..هذا بيتي..واللي عليك انك تطرش لي ورقة طلاقي..وتنسى اني كنت زوجتك يوم من الايام..
سلمان(حاول انه يكون لطيف معاها):نورة ايش هالكلام..خلينا نرد البيت ونتفاهم..
نورة(مسكت اعصابها):اسمع ياسلمان..ردة البيت انساها..وورقة طلاقي بتوصلني باجر..وعلى فكرة الفلوس اللي خذتها مني كلها ترجعها لي..ريال ينطح ريال..
سلمان(عصب):نعم؟؟..اي فلوس ان شاء الله..ليكون على بالج اني فقير وماعندي فلوس؟
نورة:أي هذا اللي عرفته عنك..اعتقد سمعتني فلوسي ترجعها..
سلمان:ماعندج اثبات اني خذت فلوسج..لاتتهمين الناس..
نورة(ابتسمت بخبث):لاتخاف عندي دليل كبير انك خذت فلوسي وراح اسلمه للشرطة اذا ماوصلت فلوسي خلال اسبوع..عن اذنك..
وراحت..سلمان انصدم وهو واقف مكانه..ريل خالتها وعيال خالتها اندهشوا بقوة شخصيتها وذكائها..
وعقب ماراح سلمان..كلهم قعدوا بالصالة..
علي:نورة شنو دليلج؟
نورة:مسجلة صوته وهو يقولي اني راح ارد لج الفلوس على نهاية الشهر..وكم مبلغ ماخذ مني..
بوعلي:ماشاء الله عليج يانورة..ماينخاف عليج..
نورة:مثل ماهو ذكي انا أذكى منه..
باجر في بيت بوعبدالعزيز...



موزة قاعدة مع امها في الصالة...
ام عبدالعزيز:يمه موزة ماانت رايحة الدوام اليوم؟
موزة:بلا بس عقب الفطور ان شاء الله..
ام عبدالعزيز:وبتمين لين الصبح؟
موزة:أي يمه..
ام عبدالعزيز:تعب عليج..
موزة:شسوي هذا شغلي..
ام عبدالعزيز:انزين عيل قومي ريحي..
موزة:عقب صلاة العصر بريح شوي..مابقى شي على الاذان..
في بيت محمد..يجون الضيوف ويفطرون...وتقعد مريم تسولف مع فاطمة..
فاطمة:يامريم..خالج يحملني مسؤولية وفاة ولدنا..
مريم:فاطمة حبيبتي..هذا قضاء وقدر..
فاطمة:قلت له..ماكو فايدة..تغير علي..ماعاد تميم اللي اعرفه..صار جاف المشاعر..ومايقعد عندي..وعقب صلاة التراويح يا عند هله يا عند ربعه..زين بس يي حزة الفطور..والايام العادية كان يتغدى بس لا يتريق ولايتعشى..كأنه يعاقبني..مثل ماهو ولده هو ولدي انا بعد..
مريم:فاطمة بسألج سؤال..اشلون مات ولدكم؟؟..محد قدر يفهمنا شالي صار معاكم بالضبط..
فاطمة:انا كنت بالمطبخ وكان عيسى يلعب بالالعاب في الصالة..حطيت السمج بالفرن ورحت اشوفه..ويوم رحت حصلته طايح على الالعاب رحت اشوفه حسبته رقد..بس يوم مسكته حسيت ان فيه شي مو طبيعي..وصرت اناديه مايرد علي..صرت اصارخ وسمعني تميم ونزل وشافه بيدي وانا اصارخ خذناه المستشفى بسرعة جنونية وقعدنا برع ننتظر الدكتور..ويوم طلع خبرنا بهالشي..
مريم:الدكتور ايش قالكم؟
فاطمة:قالنا قضاء وقدر..
مريم:الله يرزقكم واحد غيره..ويعوضكم خير..
فاطمة:آمين..
وتمر الايام ويخلص رمضان والكل يحتفل بالعيد..الا نورة لأنها تطلقت من سلمان..وافتكت من شره..
وثالث يوم العيد...دخل تميم البيت..شاف فاطمة قاعدة وهي متضايقة تطالع تلفزيون..قعد عندها..وظل ساكت....
تميم:فاطمة..
فاطمة:لبيه..
تميم:قومي لبسي خلنا نتغدى برع..
فاطمة(مااستوعبت اللي قاله لكن راحت تلبس)
وهم بالمطعم..كان السكوت هو جليسهم..
فاطمة:تميم..سامحني..وصدقني ربك كريم وبيرزقنا بواحد غيره..
تميم(ابتسم لها):انسي الموضوع يافاطمة..أنا جاي هني علشان نفتح صفحة جديدة بينا..واللي صار كان قضاء وقدر..ولااعتراض..صحيح اني تغيرت عليج كأني عاقبتج..بس سامحيني..غصب عني..انت تدرين اني كنت احبه وايد..وهذا ثاني شخص حبيته وراح عني..
فاطمة(تضايقت على حال زوجها مسكت يده):الله يخليك لي ولايحرمني منك يوم..أنا أحبك وايد ياتميم..وان شاء الله ربي بيعوضنا..
في بيت بوعبدالعزيز..كلهم قاعدين حول امهم وابوهم...
مريم:ماشاء الله على خالد والهنوف مايشبهون بعض..
عبدالعزيز:الا يشبهون..
مريم:ماادري ليش أحسهم مايشبهون بعض..
منيرة:الهنوف تشبه ابوها..وخالد يشبه امه..
اسماء:حتى هلي يقولون جذي..
سعود(يدخل البيت ويقعد معاهم)
خولة:أخبارك ياسعود؟
سعود:الحمدلله..
هالة:اسماء ماناويين تزوجونه؟
اسماء:خله يتخرج..
هالة:ومتى تخرجه؟
سعود:عقب سنة ونص..
مريم:انت ليش جذي بطيء؟
سعود:يبه انا قاعد ادرس هندسة كميائية..مو ايشي عادي..
موزة:لاحبيبي مو مثل الطب..
سعود:هالتخصص مانقدر عليه..
مريم:عيل لتخرجت ان شاء الله وين بتشتغل؟
سعود:ماادري..
ومع أيام....
في بيت بوعلي...



العنود تدخل البيت وتروح تقعد مع نورة...
العنود:اشلونج؟
نورة:بخير..انت اخبارج؟
العنود:الحمدلله..قولي لي مبروك..
نورة:أكيد حامل..
العنود:أي..
نورة(حبتها):ألف مبروك..وبأي شهر؟
العنود:توني بالاول..
نورة:ديري بالج على صحتج..
العنود:ايش رايج نطلع اليوم..
نورة:سمحيلي مااقدر..
العنود:العدة وخلصتيها..ايش له تقعدين بالبيت؟
نورة:مالي خلق..
العنود:ليكون حنيتي له؟
نورة:لاحبيبتي..بس صج مالي خلق..
العنود:ولي سلمج خلنا نطلع..ونتعشى ونرد..
نورة:وين ريلج عنج؟
العنود:طلع مع ربعه..ها ايش قلتي؟
نورة:امري لله..
العنود:فديت نورة انا..
تحت...
ام علي(تتصل):السلام عليكم...هلا يمه محمد اشلونك؟...الحمدلله كلنا بخير...اخبار مرتك وعيالك؟...اقول محمد تقدر تمرنا عقب الصلاة؟...اي صلاة العشاء...انا وابوك نبيك بسالفة..
محمد:خير يمه؟
ام علي:خير ان شاء الله..لييت بتعرف..
محمد:خلاص عقب الصلاة بمركم..مع السلامة..
مريم:جاسم ناد ريم ابيها تساعدني في المطبخ..
جاسم:ريم..ريمو..
ريم:ايش تبي؟
جاسم:امي تبيج في المطبخ..
ريم:الحين بروح..
محمد(يروح المطبخ):اقول يالغالية..
مريم:خير حبيبي..
محمد:عقب صلاة العشاء رايح بيت ابوي..متصلين فيني ويبوني..
مريم:خير ان شاء الله..
محمد:ماادري شالسالفة..انا الحين طالع علشان مواعد واحد من الربع عند المسجد..تامريني بشي؟
مريم:بتتعشى معانا؟
محمد:انتوا سبقوني..تبين شي؟
مريم:سلامتك..دير بالك وانت تسوق..
في بيت بوعبدالعزيز...عبدالعزيز يدخل البيت مع زوجته...
ام عبدالعزيز:هلا وعليكم السلام..
يقعدون...
عبدالعزيز:موزة ردت؟
ام عبدالعزيز:أي يمه ردت من شوي..
عبدالعزيز(قام):عن اذنكم شوي..
وراح غرفتها..دق الباب..
موزة:من؟
عبدالعزيز:عبدالعزيز..
موزة(فتحت الباب):حياك عبدالعزيز..
عبدالعزيز(دخل):اشلونج؟
موزة:الحمدلله..من زمان ماشايفك..
عبدالعزيز:حتى احنا..
موزة:شسوي مشاغل المستشفى..
عبدالعزيز(قعد):قعدي..ابيج بسالفة..
موزة(قعدت):خير؟
عبدالعزيز:موزة انا بدخل في الموضوع على طول من غير مقدمات..في واحد متقدم لج..
موزة:من؟
عبدالعزيز:واحد عنده شركته الخاصة..ووضعه ممتاز..
موزة:تعتقد اني بوافق؟
عبدالعزيز:ليش لا..ريال مافيه الا كل خير..
موزة:عبدالعزيز انا لايمكن اوافق على الزواج..دام اني صرت دكتورة..شغلي يحكم علي اني اتبعه بكل احواله..وانا اذا تزوجت زوجي لما يرد البيت لازم يحصل الاكل زاهب ويبيني في البيت ونطلع ويعني من هالقبيل وانا مااقدر..عندي ثلاثة ايام منوابة في الاسبوع..وين يقدر الريال يتحمل هالشي؟
عبدالعزيز:بس الريال يدري انج دكتورة وعارف شغلج..
موزة:يقول..بكرة عقب الزواج كل شي يتغير..ويمكن يفرض علي رايه ويخليني اقدم استقالتي..
عبدالعزيز:هذا رايج الاخير؟
موزة:أي نعم..هذا رايي الاخير..
عبدالعزيز(قام):على راحتج..هذي حياتج وانت ادري فيها..بتنزلين؟
موزة:أي نازلة اتعشى..
في بيت بوعلي..قاعد محمد مع امه وابوه وهم يشربون شاي...
محمد:خير يبه بغيتوني بسالفة؟
بوعلي(يناظر ام علي):أي يبه..
محمد:خير..



الظاهر ام علي وبوعلي عندهم سالفة مهمة..بس شنهي؟؟

أشوفكم على خير..

[اسطورة !]

**فصل الثامن والعشرين**

في بيت بوعلي..قاعد محمد مع امه وابوه وهم يشربون شاي...
محمد:خير يبه بغيتوني بسالفة؟
بوعلي(يناظر ام علي):أي يبه..
محمد:خير..
بوعلي:الخير بوجهك..اقول يبه محمد..انا وامك نفكر بنورة بنت خالتك..
محمد:اشفيها نورة؟
ام علي:يايمه البنت وحيدة مالها بهالدنيا الا احنا..والبنت مطلقة..واحنا ماتامين لها..فنبي نستر على البنية قبل للأمانة تروح لعند ربك..
محمد:بعد عمر طويل..ليش من متقدم لها؟
بوعلي:محد..
محمد(استغرب):عيل اشلون..ماني فاهم..
ام علي(تناظر بوعلي وهي خايفة من ردة فعل ولدها):احنا قلنا..ان نزوجها..
محمد:تزوجونها!!..لمن؟
بوعلي:لك انت..
محمد(مااستوعب اللي سمعاه):نعم؟!!..ايش قلت يبه؟
بوعلي:يابوك مانحصل احسن منك يستر على البنية..
محمد:بس يايبه انا متزوج وعندي عيال..
ام علي:مايخالف يمه..الشرع حلل اربع..وبعدين ظروف بنت خالتك هي اللي تحدك على الزواج الثاني..
محمد(عصب):شنو الظروف تحدني!!..انا متزوج ولايمكن اتزوج على زوجتي..
بوعلي:محمد..اشفيك معصب؟
محمد:السموحة..بس الكلام اللي تقولونه مو معقول..
ام علي:ليش مو معقول..مافيها شي اذا تستر على البنية..
محمد:يايمه انا ريال متزوج وعندي عيال وعيالي ماهم صغار..يعني حرام اهدم بيتي على حساب غيري..
ام علي:ماتحجى يابوعلي..
بوعلي:محمد يبه..صحيح انت متزوج وعندك عيال..بس بيتك ان شاء الله ماراح ينهدم..
محمد:يبه انا احب زوجتي وايد واحب عيالي ولايمكن افكر يوم اني اخرب سعادتهم..
بوعلي:لاتخاف..زوجتك ماراح تسوي شي اذا تفهمت الوضع..
محمد:يبه يمه..اشفيكم علي؟..ايش معنى انا اللي مختاريني..وين اخواني؟؟
ام علي:اخوك علي متزوج ثنتين..واخوك سيف متزوج وحده مطلقة ورايح بعيد عنا مع عياله..وماهو راد..وحمد مسافر مع زوجته وعياله من سنة علشان يكمل دراسته..ومايندرى متى بيرد..وانت انسب واحد لها..على الاقل اتطمن عليها..
محمد:انتظروا عليها يمكن ييها واحد يتقدم لها..
بوعلي:أي حد بيتقدم لها بيكون طمعان بفلوسها..
محمد:وانا شسوي لها..لايمكن اقدر اوافق..
ام علي:ليش؟
محمد:يايمه افهميني..انا ابي زوجتي..ومااقدر اضايقها..انت تعرفين اذا درت ايش بيصير فيها..
ام علي:كلها يومين تزعل وترد لك..
محمد:يمه مريم ايش سوت لكم؟
ام علي:زوجتك ماسوت شي..بالعكس انا احبها وايد وهي مثل وحده من بناتي..علشان جذي اخترت الضرة الزينة اللي ماتخرب حياتك انت وبنت خالتك..
محمد(مستغرب من افكارهم):وليش ماتعيش بروحها..هي قد هالشي..
بوعلي:اشلون ترضى ان بنت خالتك تعيش بروحها من غير ريال؟؟
محمد:وانا ماارضى اخرب بيتي..انا ادري اذا مريم درت ايش بتسوي..
ام علي:بتزعل شوي وعقب بترضى بالامر الواقع..محمد يمه لاتزعلني..
بوعلي:فكر بالموضوع وعقب قرر..ترى انت احسن واحد يناسبها..
مرة وحدة تدخل العنود مع نورة..ويسلمون.....
نورة:محمد اشلونك؟
محمد(مصدوم من كلامهم وقف):هلا نورة..ياللا عن اذنكم..مع السلامة..
الجميع:مع السلامة..
العنود:يمه اشفيه محمد؟
ام علي:مافيه شي..شنو شاريين؟
في بيت محمد..مريم قاعدة تطالع تلفزيون مع عيالها...يدخل محمد فجأة عليهم..ويشوفهم قاعدين يطالعون تلفزيون ويكسرون حب..قال في نفسه...
محمد:اشلون قلبي يطاوعني اهدم هالبيت المعمور..واخرب سعادتهم على حساب غيري..حرام..مااقدر..
مريم وعيالها انتبهوا وقوف محمد وهو يطالعهم...راح عنهم غرفته...
مريم(قامت):لخلصتوا سكروا التلفزيون..
وراحت الغرفة..حصلت محمد فاصخ الغترة وحاطها على السرير وفاتح ازرته وهو سرحان..خذت الغترة وحطت مكانها..وقربت منه..ومسكت يده وفصخت ساعته..وحطته في الدرج..وقعدت عنده وهي مبتسمة...
مريم:في ايش سرحان؟
محمد:فيج يامريم..
مريم(استغربت نظرة محمد لها):لهالدرجة تحبني؟
محمد(مسك ايدينها):مو بس احبج..اموت فيج..ولايمكن استغنى عنج ايش ماصار..
مريم(ماهي عارفة شنو سبب هالكلام والنظرات):محمد ايش رايك تغير ملابسك..
محمد:الحين..
مريم(قامت):بروح اشوف العيال وجايه..
في بيت راشد...جواهر قاعدة تسكت بنتهم الصغيرة رغد..
راشد(فتح عينه):جواهر سكتيها..
جواهر:شسوي فيها ماتسكت..انطر شوي علي..خلني اسوي لها حليب..
راشد(عصب):قلت لج سكتيها..وراي دوام من الصبح..
جواهر:تحمل شوي..
راشد(قام وهو معصب):يوووووه..أف..
وطلع من الغرفة وسكر الباب..
الصبح على الساعة 7 تكون ام عبدالعزيز قاعدة تتريق مع بوعبدالعزيز تنزل موزة وهي لابسه...
موزة:صباح الخير..
الجميع:صباح النور..
موزة تقعد معاهم...
ام عبدالعزيز:على وين؟
موزة:رايحة المستشفى..
ام عبدالعزيز:مو على اساس ان اليوم اجازة..
موزة(وهي تتريق):اتصلوا فيني وقالوا لي ان الدكتورة اعتذرت لأن عندها ظروف فبروح بدالها..
ام عبدالعزيز:ومتى بتردين؟
موزة:ماادري..ليش طالعين؟
ام عبدالعزيز:أي رايحين بيت ابوي..
موزة:خلاص اذا خلصت بمركم هناك..(قامت)..ياللا مع السلامة..
بوعبدالعزيز:ديري بالج وانت تسوقين..
موزة:ان شاء الله..
بوعبدالعزيز:عيالنا كبروا..
ام عبدالعزيز:أي والله..كل وحدة انشغلت بحياتها وعيالها..الله يوفقهم وين مايكونون..
في بيت محمد...مريم راحت المطبخ اطلع اللحم من الفريزر..وسمعت صوت الباب..استغربت راحت تشوف...
مريم:ليش رجعت؟
محمد:تعبان شوي وابي انام..
مريم(استغربت):تعبان اشفيك؟
محمد:ولاشي..مارقدت عدل..
مريم:والشغل؟
محمد:ماخذ اجازة..(وراح الغرفة)
مريم(استغربت تصرف محمد..من امس وهو غريب)
في غرفتهم..بدل محمد ملابسه وقعد على السرير يفكر..
محمد:اشلون اقدر اتزوج على مريم..صعب علي اسويها..وعيالي شاقولهم؟..وليش انا بالذات من اخواني..بكسر قلب مريم..وانا مااقدر افارقها..وعيالي ايش بتكون نظرتهم لي..وامي وابوي اللي مصريين على الزواج..ونورة هم مسكينة..لكن مااقدر اتخيلها زوجه لي..هي كانت مثل العنود..ياربي شسوي..انا محتار..
اذا وافقت بهدم بيتي..واذا رفضت بخسر امي وابوي..شسوي؟؟؟
مريم(تدق الباب وتدخل شافته قاعد يفكر):محمد..
محمد(انتبه لها):عيون محمد..
مريم(قعدت عنده وعيونها عليه):صاير شي؟
محمد:شي مثل شنو؟
مريم:ماادري احسك متضايق..
محمد:ماني متضايق..ارتاحي..
مريم:عيل شاتفكر فيه؟
محمد:في الدنيا..
مريم:اشفيها الدنيا؟
محمد:صارت لي مشكلة شوي مع الاهل..لاتقلقين علي..
مريم:خير ان شاء الله..لاتحاتي..ربك كريم وبيسهل امورك..
محمد:ان شاء الله..
على الساعة 2 ونص قاعدين كلهم على طاولة الغداء..
ام راشد:جواهر يمه وين ريلج؟
جواهر(قامت):بروح اشوفه..
راحت فوق..فتحت الباب حصلته قاعد على السرير ويلعب بتليفونه..
جواهر:الغداء زاهب..(وبغت تسكر الباب)
راشد:جواهر..
جواهر:نعم؟
راشد:تعالي شوي..
جواهر:ايش تبي؟
راشد:تعالي شوي عندي..
جواهر:انا مرتاحة هني..قول ايش تبي..امك تنتظرنا..
راشد:لهالدرجة ماتبين تشوفيني..عيونج بعيدة عني..
جواهر:انا نازلة..(وسكرت الباب)
راشد(قام ولحقها ومسك يدها بقو):تسكرين الباب بوجهي؟؟
جواهر:هد يدي عورتني..(راشد هدها)..انا ماسكرت في وجهك..بس عيب عليك امك تنتظرنا..
راشد:حسابي معاج بعدين..
جواهر:مشكور..
راشد(استغرب)
ونزلوا يتغدون...
ام راشد:وينكم تأخرتوا..
راشد:السموحة يمه..
العصر في بيت بوعلي..



العنود قاعدة مع امها يسولفون...
العنود(انصدمت):يمه ايش هالحجي؟؟
ام علي:اشفيج فاجه عينج ومستغربة؟
العنود:يمه انت من صجج تبين تزوجين محمد اخوي حق نورة؟
ام علي:قصري حسج..اشفيها..اخوج محمد اولى من الغريب..
العنود:يمه شنو اولى من الغريب..انت ناسية ان محمد متزوج وعنده عيال وهو عايش مستانس معاهم..
ام علي:ادري..بس انا ابي استر على بنت خالتج..ماتدرين الاعمار بيد الله..وبكرة بيي واحد ويقص عليها بجم كلمة ويتزوجها وياخذ كل فلوسها..على الاقل محمد بيحافظ عليها وعلى حلالها..
العنود:يمه صح اللي تقولينه..بس مريم ايش بيصير فيها لدرت..
ام علي:مريم ماراح تدري..واذا درت مو مشكلة تزعل لها يومين وعقب ترضى..
العنود:اشوفج يمه صرتي ماتحبينها..
ام علي:بالعكس يايمه انا احبها واعتبرها مثل بنتي..علشان جذي بضمن ان لها ضرة زينة..
العنود:وشنو اللي يدريج انها بتكون معاها زينة..في زوجه ترضى ريلها يتزوج عليها..وتكون زينة مع ضرتها هذي مستحيلة..
ام علي:عادي انت ناسية ام مبارك ريلها تزوج عليها بنت جيرانهم وهي كبر بنته والبنية علاقتها وايد زينة مع ضرتها..
العنود:يمه مو كل الناس تتشابه..
ام علي:المهم احنا كلمناه وهو اللحين يفكر..وان شاء الله بيوافق..
العنود:كلمتوه؟؟
ام علي:أي..
العنود:الله ياستر من اللي جاي..
ام علي:ماصاير شي ان شاء الله..
في بيت محمد..على الساعة 6..يطلع...
مريم:وين؟
محمد:رايح اشوف المقاول..علشان بيتنا..
مريم:ومتى راد؟
محمد:عقب ساعة ان شاء الله..
مريم:لاتأخر علينا..علشان توصلنا بيت جدي..
محمد:ان شاء الله..
في بيت راشد..يدخل راشد البيت..وينادي عياله محد يرد..تيي امه من غرفتها..وهي ماسكه المسبحة..
راشد:يمه وين جواهر والعيال؟
ام راشد(تقعد):بدورهم..
راشد:اناديهم محد يرد..
ام راشد:انت ناديت عيالك ماناديت زوجتك..جان ردت عليك..يمه راشد ليكون مزعلها بشي..
راشد:ليش هي اشتكت لج؟
ام راشد:لا..ماقالت شي..بس انت اللي فاضح عمرك..
راشد(قام):مافينا شي..انا رايح غرفتنا..عن اذنج يمه..
دق الباب ودخل وشافها قاعدة على الكرسي وشعرها الناعم لافته وحاطه يدها على بطنها...راشد اخترع..قرب منها...
راشد:جواهر اشفيج؟
جواهر:مافيني شي..انت رديت..(حاولت تغير قعدتها)
راشد:جواهر انت تعبانة..خلني اوديج المستشفى..
جواهر:ماله داعي..انا بخير..
راشد:وين حاسة بألم؟
جواهر(حاولت تقوم راشد ماخلاها):صدقني ماكو شي..
راشد(عصب):جواهر..انا أسألج وين يعورج؟
جواهر(خافت منه):بطني..
راشد:قومي خلني اوديج المستشفى..
جواهر:ماله داعي..الحين بصير بخير..
راشد(قومها):لبسي عباتج وخلني اوديج..
جواهر:راشد ماله لزمة..
راشد:اللي قلته يمشي..
واضطرت تلبس ونزلت معاه تحت...
راشد:يمه احنا طالعين رايحين المستشفى خلي الخدامة دير بالها على رغد..
ام راشد:خير يمه؟
راشد:جواهر شوي تعبانة..
ام راشد:خير جواهر يابنيتي..
جواهر:بطني يعورني ياعمتي..
ام راشد:روح يمه ودها..وطمني عليها..
في بيت بوسالم....
ام يوسف:اخبارج يافوزية..من زمان ماشفناج..
ام عبدالعزيز:انا كل يومين في بيت ابوي انت اللي ماتيين..
ام يوسف:شاسوي انشغلت بأحفادي..اخبار مريم وعيالها؟
ام عبدالعزيز:الحمدلله..هي جايه الحين..
حصة:عيل وين جواهر ياعائشة؟
ام يوسف:قالت بتيي..
في العيادة..عقب الفحص...
راشد:خير دكتور؟
الدكتور:لازم نسوي لها تصوير تلفزيوني..وعقب ببين كل شي..
راشد:ومتى التصوير؟
الدكتور:تعالوا باجر على الساعة 4..
راشد:ليش مب الحين؟
الدكتور:لأن قسم التصوير عندنا يسكر على الساعة 7..ماراح اكتب على ادوه..لين مانشوف نتيجة التصوير..بس اذا ماتحملتي الالام خذي لج بندول..وبكرة ان شاء الله ببين كل شي..
راشد(قام):مشكور دكتور..
طلعوا من العيادة..وركبوا السيارة....وظلوا ساكتين....
راشد:جواهر حبيبتي..أنا آسف غلطت عليج اليوم..
جواهر(سكتت وقعدت تطالع الدنيا من الدريشة)
راشد:جواهر..تسمعيني؟
جواهر:راشد لو سمحت معليه توصلني بيت جدي..لأنهم ينتظروني..
راشد:بس انا قاعد احاجيج..
جواهر:إنأجل حجينا لردينا البيت..
في بيت بوسالم...قاعدين مستانسين يسولفون ويضحكون...
مريم تروح الصالة مع قمر وجواهر..يطلع لهم سلطان...
سلطان(يقعد):ايش عندكم قاعدين هني؟
قمر:نسولف..انت ليش هديت الرياييل..
سلطان:جاي اسلم عليكم..
مريم:فديت خالي..اخبارك؟
سلطان:بخير..انتوا اخباركم؟
جواهر:احنا بخير..مقاطعنا..ماادري اذا سوينا فيك شي..
سلطان:تدرون مشاغل الدنيا..
مريم:في هذي معاك حق..
سلطان:عيل وين الدكتورة؟
مريم:داخل تسولف مع الحريم عن المستشفى والامراض..غثوني..قلت خلني اطلع أحسن لي..
سلطان:الله يبعدنا شر المرض..
الجميع:آآمين..
على الساعة 11 وربع في بيت راشد..تروح جواهر غرفتها..وتفصخ عبايتها..وتقعد ترتب شعرها وعقب تروح علشان تبدل ملابسها..راشد يروح غرفة عياله..يحصلهم قاعدين يسولفون...
راشد:ايش عندكم قاعدين؟
محمد:ولاشي يبه..نسولف..
راشد:بكرة وراكم دوام..لاتسهرون..تصبحون على خير..
الجميع:وانت من هله..
وراح غرفته...حصل جواهر ترقد رغد...
راشد(قرب منها وظل ساكت وعقب):اشلونج الحين؟
جواهر:بخير..
راشد:احسن من العصر؟
جواهر(تقعد):الحمدلله..
راشد(يقعد جنبها):زعلانة؟
جواهر:أي زعلانة..
راشد:آسف ياعمري..ادري اني غلطت عليج..بس الظاهر ماكنت بوعيي..
جواهر:معليه..حصل خير..قوم روح بدل ملابسك..
راشد:مسامحتني؟
جواهر(ابتسمت):مسامحتك..
راشد(حب راسها):الله يخليج لي..
على الساعة 4 ونص الفجر..تقوم مريم من النوم ماتحصل محمد في الغرفة..طلعت من الغرفة..حصلت محمد قاعد في الصالة ويفكر..قربت منه...
مريم:محمد ايش عندك قاعد هني؟
محمد:ماجاني نوم..
مريم:انزين قاعد يأذن..
محمد(قام):ياللا انا رايح المسجد..قعدي جاسم..
مريم:ان شاء الله..
مريم قعدت تفكر بمحمد..اشفيه صار له هالجم وايد يفكر..ليكون صاير شي جايد في بيت ابوه..صرت خايفة عليه..
في بيت بوعبدالعزيز...



ام عبدالعزيز قاعدة مع اسماء....
ام عبدالعزيز:اخبار بنات عمج؟
اسماء:الحمدلله..
ام عبدالعزيز:افكر بموزة..
اسماء:اشفيها موزة عمتي؟
ام عبدالعزيز:هذا ثاني واحد يتقدم لها وترفض..
اسماء:تعلقها بشغلها يمنعها من التفكير بالزواج..
ام عبدالعزيز:ودي افرح فيها..بس هي معنده..
اسماء:ياعمتي..تبين الصج..موزة معاها حق ترفض..الريال يحسب انه يقدر يعيش مع دكتورة..لكن مايقدر..بكرة بيحس انها تطلع وايد ويمكن تصير مشاكل بينهم..وهي ماتبي حياتها تخترب من اولها..
ام عبدالعزيز:تبين تقنعيني ان كل دكاترة الحريم مو متزوجين؟؟
اسماء:لاطبعا..
ام عبدالعزيز:عيل اشلون هم عايشين..لو الوحدة ترتب وتنظم حياتها مابتحصل مشاكل..بس هي اللي تحب شغلها..
اسماء:معاج حق ياعمتي..
عقب الغداء..تروح مريم غرفتها تحصل محمد قاعد على النت...
مريم(تقعد على السرير):محمد في شي شاغل بالك؟
محمد(يلتفت لها):شي مثل شنو؟
مريم:ماادري..انت من جم يوم مو طبيعي وصرت تفكر وايد..كل ماابي أسألك احسك تهرب مني..اقول يمكن في شي يخص هله ومو من حقي اعرف..لكن يي انك ماتنام الليل وتقعد تفكر هالشي مااقدر اسكت عليه..صرت احاتيك يامحمد..انت غالي علي..ومافيني اشوفك متضايق..
محمد(قام وقعد جنبها):يابعد عمري يامريم..أنا بخير..لاتقلقين علي..
مريم:اشلون مااقلق عليك واشوفك سرحان وتفكر..شاركني تفكيرك..
محمد(حس بضيق):صدقيني يامريم لو عندي شي راح اقولج..انت تعرفين اسراري كلها عندج..
في العيادة..عقب التصوير....
الدكتور:اليوم حسيتي بالالام؟
جواهر:أي دكتور..
راشد:خير دكتور شنهي نتيجة التصوير؟
الدكتور:والله التصوير نتيجته اوكي..بس نبي نسوي لها منظار للمعدة والقولون..
راشد:ليش دكتور؟
الدكتور:نبي نتأكد من سلامتهم..
جواهر:دكتور يعني لازم اسوي المنظار؟
الدكتور:المفروض نسويه علشان نعرف المشكلة..
راشد:واشلون بتسوون لها اياه؟
الدكتور:لازم نسوي لها في مستشفى حمد..
راشد:متى؟
الدكتور:لازم تاخذون موعد..وانا راح ارتب معاهم..
في السيارة....
جواهر(بخوف):راشد..أنا ماابي اسوي المنظار..
راشد:ليش؟
جواهر:ماابي..
راشد:خايفة؟
جواهر:أي خايفة..وماابي اسوي..ماني مضطرة..
راشد:ليش مو مضطرة..انت تعبانة..
جواهر:ولو..الامي ماهي حادة..
راشد:وتنتظرين تتعبين بزيادة..لا ياجواهر..
جواهر:راشد تكفى لاتجبرني..ماابي اسوي..
راشد:انا ابي اتطمن عليج..والمنظار مايخوف..الدكتور قالج بنج موضعي..
جواهر:ماابي..
راشد:جواهر صغيرة انت علشان تخافين؟
جواهر:أي صغيرة..بس ماني مسويته..
في بيت بوعلي....



بوعلي:اتصلتي فيه؟
ام علي:أي..وقال بالطريق..
العنود تدخل..وتسلم عليهم....
العنود(تقعد):وين نورة؟
ام علي:طلعت تشتري لها جم غرض..
العنود:من متى؟
ام علي:من ربع ساعة..
العنود:راحت مع دريولها؟
ام علي:أي..
وعقب عشر دقايق يدخل محمد..ويسلم ويقعد وهو متوتر...
بوعلي:فكرت؟
العنود(خايفة)
ام علي:احنا نبي مصلحتها..ومصلحتها معاك..اتمنى انك فكرت عدل وتخلينا راضيين عليك..
محمد(رفع راسه):وزوجتي وعيالي شاقولهم؟
ام علي:حاليا لاتقولهم شي..خلي الموضوع هادي..وكل شي بوقته حلو..
محمد:بس انا قاعد اخونها..
ام علي:ليش تخونها..انت بتتزوج بالحلال..وبموافقة هلك بعد..
بوعلي:ادري يامحمد انها صعبه عليك..بس احنا نبي نستر عليها..وقد ماراح من العمر مابقى..
ام علي:ايش قلت يايمه..وافق وريحني..
محمد(بكل تردد):موافق..
العنود(انصدمت):موافق!!!..اشلو ن يامحمد؟؟...ومريم اللي كنت تحبها وعيالك اللي متعلق فيهم؟؟..هذا كله وين راح؟؟
بوعلي(عصب):العنود..قعدي وانت ساكته..
العنود:يبه حرام عليكم..الريال متزوج..وبتخربون بيته..
ام علي:عن الحجي اللي ماله معنى..مابنخرب بيته ولاشي..
نورة(توصل):السلام عليكم..
الجميع:وعليكم السلام..
بوعلي:زين انج ييتي..
نورة:خير..
بوعلي:قعدي يابنيتي..
نورة(قعدت وهي تشوف عيون العنود)
بوعلي:سمعي يانورة..محمد ولدي بيتزوجج..
نورة(الصدمة كانت قوية وماهي مستوعبة):شنو ياعمي؟
ام علي:نورة يمه..احنا نبي لج الراحة والستر..فمحمد بيستر عليج وبيتزوجج..
نورة(ماهي مصدقة):بس محمد متزوج..
بوعلي:مايخالف..ويعني متزوج..
نورة:زوجته وعياله؟؟؟
ام علي:ماعنده مشكلة..
نورة:لاياخالتي..انا ماارضى اخرب بيت..
بوعلي:نورة..انت لازم تتزوجين ولد خالتج..
نورة(قامت والدموع بعيونها):ليش لازم؟؟..مجبورة؟؟
بوعلي:أي مجبورة..
نورة:ليش انا عالة عليكم؟؟
ام علي:ايش هالحجي..يابنيتي احنا كبرنا..ويومنا قرب..نبي نتطمن عليج..
نورة(دمعتها نزلت):أنا آسفة ياخالتي..مستحيل ادخل ضرة واخرب بيت..ولابعد أكون ضرة على من؟..على مريم لاياخالتي..سمحولي..(وراحت غرفتها حتى اغراضها هدتهم بالصالة)
بوعلي:وانت ليش ساكت؟
محمد:ايش تبوني اقول؟؟
ام علي:قولها كلمتين حلوين..على الاقل تقتنع..
العنود(قامت):بروح اشوفها..
ام علي:مو تغسلين مخها..
راحت غرفة نورة..وبغت تفتحها شافته مقفول..
العنود:نورة فتحي الباب انا العنود..
نورة:خلوني بروحي..
العنود:نورة فديتج فجي الباب..
نورة(فتحت الباب وراحت تقعد على الكرسي)
العنود(سكرت الباب وقعدت عندها):نورة..بلاها الدموع..
نورة:عنود امج وابوج يبون يزوجوني غصب..محمد اخوج مثل اخوي اشلون تبوني اتزوجه..
العنود:نورة حبيبتي..ادري الموضوع مضايقج..بس ما بالبيد حيله..امي وابوي مُصريين..
نورة:ومريم وعيالها..اشلون احط عيني بعينهم؟؟
العنود:مااعرف شاقولج..
نورة:يعني ماانت راضية..
العنود:لاطبعا..لااراضها لج ولااراضها لخوي..
نورة:شفتي ياالعنود لو امي ولا ابوي عندي جان ماجبروني على الزواج..
العنود:لاتلومينهم يانورة..امي وابوي كبروا في السن..وهم خايفين عليج لياخذج واحد ثاني ويقص عليج..وهم متأكدين ان محمد هو الشخص الوحيد اللي يناسبج..
نورة:بس محمد مثل اخوي..وياليته مو متزوج..مااقدر..مااقدر..
في بيت بوسالم...في المرسم...



مريم:خالي..خايفة على محمد..
سلطان:ليش اشفيه محمد؟
مريم:ماادري والله..كل ماأسأله يقولي شوية مشاكل في بيت ابوي..وكل سرحان ويفكر..صرت قلقانة عليه..
سلطان:يمكن صج في مشاكل في بيت ابوه..
مريم:ادري ان مو من حقي اتدخل..بس ماادري احس فيه شي مو طبيعي..
سلطان:لاتفكرين وايد..ان شاء الله تنحل مشاكلهم..
مريم:آآمين..
في بيت بوعلي...في غرفة نورة...
ام علي:نورة اللي سويناه علشان مصلحتج..
نورة:فهميني ياخالتي..فهموني..مااقدر ادخل بحياة حد ثاني..تعتقدين ايش بيكون شعور مريم لما تدري؟؟..عيالها شنو بتكون ردة فعلهم؟؟..مااقدر اتحمل..لا..
ام علي:فاهمتج يابنيتي..بس هذا كله علشانج..
نورة:خالتي انا راضية اني اعيش بروحي..ماني اول وحدة تعيش بروحها..
ام علي:ايش هالحجي؟؟..واذا احتجتي شي؟؟
نورة:انتوا موجودين بناتج موجودين..
في بيت محمد...مريم ترد البيت...وتروح تسوي عشاء..وعقب مايتعشون عيالها..يقعدون يطالعون تلفزيون...يدخل محمد البيت وحالته حاله..يفتح ازرة ثوبه..مريم تفز من مكانها وتروح له...
مريم(بخوف):محمد اشفيك؟؟
محمد(ياخذ نفس):وديني الغرفة..
مريم:ان شاء الله..جاسم ساعدني..
جاسم:ان شاء الله يمه..
دخلوا الغرفة..والريم خذت غترة وعقال ابوها ورقدوه على السرير..
مريم:ريم يمه روحي جيبي ماي حق ابوج..
الريم:ان شاء الله يمه...
جاسم:يبه خلنا نوديك المستشفى..
مريم:أي محمد تكفى خلنا نوديك..
محمد:انا بخير..ماني رايح مكان..بشوفتكم ارتاح..
الريم(جات وعطت الماي حق ابوها وشرب)
محمد:ياعيال خلوني بروحي مع امكم..
وطلعوا...
محمد:مريم قربي شوي..
مريم(قربت)
محمد:عطيني ايدينج..
مريم(مدت ايدينها)
محمد:احبج يامريم..احبج..
مريم(استغربت تصرف محمد وخافت عليه ودمعت عينها):وانا بعد احبك..محمد انت تعبان خلني اوديك المستشفى..
محمد(مسح دمعتها):انا بخير..
مريم:لا يامحمد..انت فيك شي..وشي جايد بعد..تكفى قولي..شالي فيك؟؟
محمد:مريم انا بخير تطمني..خلاص مشكلة هلي انحلت..وانا شوي تعبان لأني كنت مصدع..
مريم:أمانة يامحمد انت بخير؟
محمد(يبتسم):بخير..والحين ارتحت الحمدلله..بس ماعليج امر معليه اشرب من ايدينج عصير ليمون؟
مريم:من عيوني..دقايق ويكون زاهب..ماتبي شي ثاني؟
محمد:سلامتج..
مريم:بس انت ماتعشيت..
محمد:خلاص بتعشى معاج..
مريم(ابتسمت):فديت ريلي..تقدر تبدل ملابسك؟
محمد:بقدر ان شاء الله..انت روحي زهبي العشاء والعصير وانا ببدل..
مريم:اذا تبي انادي جاسم..
محمد:لا اقدر بروحي..
وعقب ماطلعت مريم..تم محمد بروحه يفكر....اشلون اقدر اكسر قلبج يامريم..اشلون..مافيني على فرقاج..بس انا استخرت وربي يسر لي الزواج..آآآآآه يازمن..
ومع مرور ثلاثة ايام....في بيت بوعبدالعزيز....
ام عبدالعزيز(تشرب الشاي):اقول منيرة..
منيرة:خير يمه..
ام عبدالعزيز:اخبار اختج خولة..صار لها يومين مامبينة..
منيرة:ريلها مسافر..ومتوهقة بعيالها ودراستهم..
ام عبدالعزيز:احاول اتصل فيها محد يرد..
منيرة:انا بعد اتصل فيها ماترد..مرة بنتها ردت علي وقالت امي مشغولة..
فوق في غرفة سعود..كان راقد..يرن تليفونه....
سعود(يرد وهو راقد):آلو..
خالد(رفيجه):انت ليحين راقد؟
سعود:شتشوف؟
خالد:مااشوف شي..انزين قوم ياللا علشان نلحق على المحاضرة..
سعود:مافيني على السواقة..نعسان حدي..امس كنت سهران مع اخوي..
خالد:وانا بعد مافيني على السواقة..كنت سهران على النت لين الفجر..وانا معتمد عليك..قوم..
سعود:قوم انت..انا مااقدر..
خالد:ياسلام..واشلون بتروح الجامعة؟
سعود:انت رفيجي وخوي وبتمر تاخذني..
خالد:لا والله..انا ابيك انت اللي تسوق..
سعود:ليش تبي يصير فيك شي اليوم..ياللا قوم..
خالد:صج كسول..
سعود:ماشاء الله عليك انت..اذا نعسان لاتسوق ونروح فيها..خلك نايم احسن..
اسماء(تدخل وتفتح الليتات):صباح الخير..
سعود(يفتح عينه):مع السلامة..صباح النور..
اسماء:كنت تحاجي من؟
سعود:هذا خالد..اقوله تعال مرني..يقولي مااقدر اسوق..
اسماء:وانت ليش ماتسوق؟
سعود:نعسان حدي مافيني على السواقة..
اسماء:ياللا قوم..مسوية لك ريوق..وبتنشط شوي وبتقدر تسوق..
سعود:فديت الغالية اللي تهتم فيني..
اسماء:قوم..لاتأخر..
سعود:ان شاء الله..
في شغل محمد...يرن تليفونه....
محمد:وعليكم السلام...الحمدلله بخير..انت اشلونك؟....ليش؟....اليوم!!!...به السرعة؟...(حس بضيقة)..إن شاء الله..انت تامر..مع السلامة..
عيسى:محمد اشفيك؟
محمد:هذا ابوي..
عيسى:خير؟
محمد:يخبرني ان الملجة اليوم..
عيسى:بتسويها يامحمد؟
محمد:ماادري ياعيسى..انا استخرت ووافقت على الاستخارة..بس قلبي معورني على زوجتي..ماادري لدرت ايش بيصير فيها..
عيسى:محمد لازم تفكر عدل قبل لتخطي خطوة..ولازم تعرف ان الزوجة الاولى لايمكن تقبل بهالشي..ويمكن تبتعد عنك..ويمكن بعد تطلب الطلاق..
محمد(انصدم):مستحيل..
عيسى:مافي شي مستحيل..هذا من حقها..هي بتقولك انا ماقصرت بحقك..وحبيتك ليش دخلت علي ضرة..ممكن يامحمد تسمع كلام مايعجبك منها..هذا كله من حقها..
محمد(تضايق بزود):يعني شسوي؟؟
عيسى:ماادري..هذي حياتك وقرارك..انا علي النصيحة..والباقي عليك..
محمد:وامي وابوي ورضاهم علي؟
عيسى:ادري ان الموضوع صعب عليك..وصرت محتار تختار من فيهم..لكن لازم تفكر بعمق اكثر..وبنت خالتك موافقة؟
محمد:لا..
عيسى:لا!!
محمد:ماهي موافقة..ومجبورة توافق علشان امي وابوي..
عيسى:موضوعك صعب..الله يعينكم..


تعتقدون محمد بيتزوج نورة؟؟...وياترى مريم اشلون بتعرف بالسالفة؟؟ وايش بيصير فيها؟؟

هذي كلها تساؤلات وجوابها في فصل 29

انتظروني..