06-03-14, 04:36 AM
| #21 | |||||||||
| نجم روايتي ومشرفة سابقة وفراشة متالقة بعالم الازياء  
|  الـجزء الـسـابـعـ تـوتـر عـلاقـة لـمـ يـسـعـفـهـا إلا رسـائـل ما مر كتير من يوم ما اكتشف عمو إني عرفت،يومين تقريباً بس..و لإني متعودة على الصدمات و الظروف الصعبة قدرت أهدى و أستعيد توازني و أفكر بعقلانية و قررت قرارات جديدة و قطعت على نفسي عهد بإني ما أرتاح إلا لمن يسير إلي في راسي...! و على فكرة ترانا في بيت أهل علي،قاعدين أنا و عمتي و البنات أخوات علي و زوجة أحمد نتكلم عن الزواج و تبعاتو..تعرفوا جلسات الحريم...! و بالضبط دحين كنا نتناقش عن الأشياء إلي ما تخلي الشباب يتزوجوا..قالت ليلى أخت علي الكبيرة:هيا بالله شوفو أخو زوجي..قلك ايه..ماني موظف كيف أفتح بيت..القهر إنو هو إلي ما يبغا يتوظف..تخيلو..ولد عمه لقاله وظيفة بتسعة آلاف و يقول لا لا مي من تخصصي..حاولو أهله يقنعوه بإن صعبة يلاقي وظيفة ثانية تبدأ بتسعة آلاف مو راضي...! قلت:والله هذا دلع..ليه..وظيفة بتسعة آلاف يرفضها..غيرو بألف و ألفين متزوجين و مخلفين...! زوجة أحمد:بس يختي الألف و الألفين معد تكفي...! -مو هدا إلي أقولو..يعني هوا ما عندو عذر...! صفاء:بس ساعات يكون السبب خارج عن الإرادة زي لو كان الواحد بشع و مو حلو...! أحلام:مو حلو يحاول يرتب نفسو،أما إنه يحط يدو على خدو:"أنا معفن و لا وحدة حتقبل بي"،هذا غباء و الرجال مو مرة الناس تهتم بجمالهم..أهم شي النظافة و الترتيب...! في دي اللحظة ألهمني ربي بشي فقلت:طب لمن واحد يكون كامل و مكمل،أخلاق و شغل و شكل حلو بس مشكلتو مثلاً..مممم..ما يخلف..ايش يسوي؟!،هدولا من جد يحزنوني...! أحلام:في دحين طرق كتيرة عشان الناس تخلف،يعني عادي...! قلت:كلنا نقول كده بس في الواقع مستحيل وحدة تضحي...! أحلام:يا شيخة..دحين بالغصبة تلاقي واحد مقبول..مو كويس مقبوووول..و إذا على قولتك كامل و مكمل ليش لأ و بعدين الله يخلي المياتم و كافل اليتيم كهاتين...! و لصقت وسطاها و سبابتها في بعض...! أم علي:الله يغنيكي يا بنتي...! أمنا على دعاء عمتي و أمنت أنا و أنا أحس إني طايرة...! بعد دا الحوار ما قدرت أركز معاهم و حتى لمن رجعت البيت سألني علي:"ايشبك؟!"،فقلت ولا شي..و طول الليل و الأفكار تجي و تروح في راسي لين ما رسيت على خطة محكمة جداً..طبعاً كلو من إلهام ربنا..الشي إلي خلاني أقوم أوتر و أنا للمعلومية كنت محافظة عالوتر قبل ما أتزوج بس دحين..استغفر الله..الله يهدينا و يصلحنا و يثبتنا...! ********************************** كنت في بيت جدة أنا و سعود..علي مو موجود..مواعد هدولا إلي أنقذونا في الحادث و مرة متحمس..إن شاء الله ينبسط...! دق الجرس،قمت و فتحت،كان عمو،سلمت عليه،بعدها قلت:عمو وين كنت؟! رفع الأكياس إلي في يدِّو:منتي شايفة الأكياس...؟! و على فكرة ترى عمو من داك اليوم متغير معايا،قلت:آآآآ..طب كويس إنك جيت عشان بكلمك في موضوع...! طنشني عمو و راح للمطبخ و حط الأكياس،قلت:عمو... قاطعني:لو فتحتي دا الموضوع مرة ثانية ما حيسير لك طيب...! -عمو اسمعني على الأقل...! صرخ:مابغا...! و راح لغرفتو..أوكي أعترف..أنا مغشوشة بعمو..اتوقعت حيقبل يناقشني أو يسمعني عالقليلة لكن..أففف...!،بس يمكن عمو مرة متأثر من الموضوع فاتخلى عن كل قيم الحوار إلي زرعها فيا...! خرج عمو من الغرفة و هوا لابس البيجامة،جلس بقوة عالكنبة و مسك الريموت و ركز عينو عالتلفزيون،تعرفوا كيف لمن الواحد يبغى يسوي نفسو مو مهتم...؟! جا سعود بحماس و سلم على عمو و كعادتو قعد يوريه ايش إلي ساير في اللعبة إلي يلعبها عالجيم بوي،قلت:سعود حبيبي خلي عمو يرتاح..هوا تعبان شوية...! سعود:عمو إنتا تبعان...؟! طالع عمو فيا بعدها ابتسم لسعود:لا حبيبي مني تعبان..اقعد اقعد...! طالع سعود بعد ثواني فيا فرسلتلو نظرة الأمهات المرعبة فخاف و قام...! قلت:عـ... صرخ عمو:جود..تبغي تتكلمي في شي ثاني حياكي الله غير كذة لعد تجين...! انصدمت،قال عمو بعصبية و توتر:ما أقصُد البيت..قصدي.."تابع بسرعة"..لا تكلميني لو بتكلميني في دا الموضوع...! -عمو إنتا حتى ما عرفت ايش هوا الموضوع...! صرخ بصوت أعلى:لأ عارف..يا جووود أمي إلي ما تدري عن شي سكتت عني..إنتي إلي عارفة كل شي ما قَدَّرتي...! قلت و أنا أشير على نفسي:يا عمو أنا أحبك..اسمعني..كل إلي أبغاه سعادتك...! -مابغا أكون سعيد..ايش رايك...؟! بكيت:يا عمو اسمعني..اسمعني بس...! ضرب عمو فخدو بقهر بسبب بكايا:دحين الغلط سار غلطي و الحق معاكي...! -عمو كل إلي حسويه في مصلحتك...! -مصلحتي و عارفها..قفلي الموضوع...! -عـ... -جود..قفلي الموضوع...! نزلت راسي و سكت...!،الموضوع أصعب مما اتصورت لكن والله ما أسيبو إلين ما أسوي إلي فراسي..والله...! طول مدة الزيارة كنا نتفرج عالتلفزيون أو أنا أكلم جدة أو عمو يكلمها..يعني لساني ما جا على لسانو...! لمن رجعت البيت رسلت لعمو: "صعب لمن إلي تحبهم و تبغى مصلحتهم ما يفهموك" و المفاجأة كانت رسالة وصلتني منو بعد دقائق: "و أصعب لمن أولادك ما يقدروا إنك إنسان و لك نقاط ضعف و مواضيع تكره إنها تنفتح" رسلت: "أكره المواضيع الحساسة><" فرسلي: "أجل اخرجي منها"...! رسلت و في داخلي إصرار يكبر: "لأ..ما رح أخرج منها و رح تعرف يا عمو قد ايش كيدهن عظيم"،بعدها قفلت الجوال ونمت...! ********************************** تعرفو إنتو نظامنا..يوم الأربعاء عند أهل علي و يوم الخميس عند أهلي و أنا متعودة أكلم جدة و عمو كل يوم بس دحين بيني و بين عمو (تتش) فكيف أكلمو...؟!،و كمان مو معقولة ما أكلمو و لا أسلم عليه إلا يوم الخميس الجاي...! قعدت يوم الجمعة في حيرتي لساعات لكن بعدها قررت قرار..جدة و حكلمها عادي بس عمو..أنا أوريكم فيه...! إلي سار يا حبايبي إني أنا و عمو سوينا تشاتنق بالجوال؛أرسلو رسالة فيرد عليا برسالة و رح تشوفو تطور الأحداث لو قرأتو الرسايل...! رسلت: "جمعة مباركة يا أحلى عمو..ما غيرت رأيك...؟!،لسه ما تبغى تسمعني...؟!" رسل: "لأ" انقهرت من الرسالة القصيرة دي..فرسلت: "لأ...؟!،ما فهمت..قصدك لأ غيرت رأيي و أبغا أسمعك و لا ايش...؟!" رسل: "جود و رب الكعبة رسالة تانية اليوم ما يسير لك طيب" رسلت: "طيب معد حرسل بس علبال ما يخلص اليوم اتذكر إني أحبك" كانت هادي هيا الرسايل ليوم الجمعة...! يوم السبت و من صباح الله خير رسلت: "صباحك خير يا وجه الخير..يُقال بأن من الحب ما قتل و أنا أقول بأن من الحب ما ألَّف و رسل..ايش رايك في السَجْع...؟!،المهم..كيفك اليوم؟!،هاااا..ما تبغى تسمعني...؟!" رسلي: "جوووووووووود..ما حتبطلي؟!،ترى بدأت أفقد أعصابي...!" رسلت: "عادي افقد أعصابك..أهم شي أشوفك مبسوط حتى لو من بعد ما توريني شغلي...!" رسل: "أففففففف..أنا مابغا أكون مبسوط..هدي حياتي و أنا حر" يستعبط دا...؟!،قال حر قال..و الله مسخرة...! رسلت: "آآآآسفة..بعد ما اتزوجت جاي تقولي دا الكلام..أنا يا عمو بعد ما اتزوجت عرفت ليه جدة تزن عليك عشان تتزوج..لو قلتلي حياتي و حر قبل كده كان بكل غباء سكت على أساس "حرية شخصية" بس دحين لا و ألف لا و ما رح أخليك إلا لمن أسوي إلي في بالي" رسلي: "كل إلي قاعدة تسويه إنك تضيعي وقتك..لو تنتبهي لبيتك و زوجك يكون أحسن" مادري ليه حسيت بفرق..دي الرسالة حسيتها غير..حسيت عمو فيها غير..لكني اتجاهلت دا الشعور و رسلت رسالة فيها شوية عاطفة عشان عمو يلين شوية،رسلت: "أضيع وقتي...؟!،والله حرام عليك..بسألك عمو..ضيعت وقتك لمن ربيتني..ضيعت وقتك لمن دافعت عني في مواقف كتيرة...؟!،نفس الشي بيسير..أنا مني قاعدة أضيع وقتي لمن أحاول أحللك مشاكلك" رسل: "ما طلبت منك تحليها" رسلت: "مو لازم تطلب" و بكده انتهت الرسايل يوم السبت...! يوم الأحد و أنا في الجامعة في واحد من البريكات فتحت جوالي و لقيت رسالة من عمو،فتحتها و كانت: "جود..إنتي غير..إنتي بنت..أكيد تحتاجي من يحميكي و يحللك مشاكلك لإنو واثق منك..أنا رجال و أقدر أحل مشاكلي بنفسي..ما أحتاجك تزني فوق راسي و لو أبغا شي بقولك..عشان كده قفلي الموضوع و انتبهي لنفسك و للبيبي إلي في بطنك" رسلت: "البيبي إلي في بطني يسلم عليك و يقولك اسمع كلام ماما تراها صح" رسل: "الله يسلمك و يسلمو..و قوليلو يبطل يتدخل في إلي مالو فيه" طبعاً تقدروا تفهمو الكلام ليا مو للبيبي...! رسلت: "البيبي قاعد يبكي؛يقول:"ليه يا ماما أبوكي مو راضي يسمع الكلام و هوا عارف إنك تحبيه و إنو كل إلي حتسويه في مصلحتو" رسل: "قوليلو لإنو بابا عارف مصلحتو و مهو صغير..جود..الله يخليكي..سيبيني في حالي و انسي الموضوع" لمن التمست الرجاء في رسالة عمو رسلت: "تتوقع أقدر أسيبك في حالك...؟!،تتوقع أقدر أنسى...؟!،لو خطر على بالك إني أقدر فحقولك هيا من دحين..ما حقدر..فديت قلبك يا عمو...!" إلي سار إنو عمو ما رد على رسالتي طول اليوم،يمكن لإنو الرسالة كانت عاطفية..مادري لكنو ما رسل...! أما عن يوم الاتنين فرسلت: "ها عمو حبيبي..حتسمعني...؟!" المفاجأة كانت الرسالة إلي رسلها ليا عمو في ليل الاتنين..كنت طول اليوم مستنية رد و لمن جاني انصدمت...! كان محتوى الرسالة: "لكي حياتك و ليا حياتي و زي ما أنا ما أتدخل فيكي و في أسرتك لا تتدخلي فيا إنتي كمان و زي ما أنا محترم خصوصياتك احترمي خصوصياتي إنتي كمان..مو معقول منتي قادرة تفهمي إني رجال كبير أقدر أتحمل تبعات قراراتي..تقوليلي أبغا سعادتك أقولك سعادتي أعرف وينها و أرجوكي لعد تتدخلي..أنا بدأت أتعب من التدخل هذا..مو بدأت إلا خلاص تعبت..الخلاصة..حياتي و أنا حر فيها..و لمن أبغا شي صدقيني حقدر ألاقيه بنفسي" جود:!!!!!!!!!!!!!!!!!!!!!!!!!!!!!!!! ^^^^^^^^^^^^^^^^^^^^^^ اليوم هوا الأربعاء..كنت في البيت لحالي،علي و سعود راحو عند أهلو،أنا ما رحت معاهم لإنو من جد مالي مزاج أقابل أحد،طبعاً علي ما وافق يخليني ما أروح إلا بعد جدل و بكا مني..يا الله قد ايش نرفزني،قلتلو:"عادي ما فيها شي قولهم تعبانة شوية"،قام صرخ عليا:"إنتي أصلاً مو عاجبك إننا نروح عند أهلي كل أسبوع..كل ساعة و الثانية قولهم تعبانة قولهم تعبانة"،يااااااااااااه قهرني..هادي بس تاني مرة أسويها،أول مرة لمن كنت حامل بسعود و كنت من جد تعبانة حتى علي رجع ليا و قالي إنو عمتي الله يسعدها هزأتو و خلتو يرجع لإنها عرفت إني تعبانة من صوتي في التلفون..و بعدين هوا يعرف قد ايش أحب أهلو و أعزهم...! أوه..نسيت أقولكم ليش مزاجي خربان..مزاجي خربان و معفن من الرسالة إلي رسلها عمو..مرة أثرت فيا و كل ما أقرأها أحس كأنو أحد يطعني و بسببها خلقي ضاق بالتالي الوضع بيني و بين علي..خليني ساكتة أحسن...! لا تقولو مالو ذنب..علي الله يهديه ما يقدر لمن أحد يكون معصب أو متضايق و لمن هوا يكون طفشان بس طفشان ما يبغا أحد يكلمو...! اتنهدت و أنا أقوم من على الكنبة و أتجه للتلفون..لازم أكلم جدة...! يوم التلوت حالفني الحظ و ردت منورة..اليوم كمان يا رب ترد منورة؛لإني بيني و بينكم مابغا أكلم عمو..مرة مابغا أكلمو..و لا ديكَ رسالة يرسلها ليا...! قعدت أسمع "التووووووت" بملل:"أفففففف ليه ما يردوا؟!"،بعد شوية انرفعت السماعة:ألو...! يووووووه هدا صوت عمو..مشكلة تلفون بيت جدة مافيه كاشف و لا كان ما رد عليا...! قال بشدة:ألوووو..مين...؟! اتحمحمت:السلام عليكم...! قال عمو بدون أي مشاعر واضحة في صوتو:و عليكم السلام..هلا..كيفك...؟! قلت بزعل اتعمدت يكون واضح:من ربنا بخير..أعطيني جدة...! -مممممم..من ربنا بخير ها...؟! سكت،قال عمو:لحظة...! بعد شوية جاتني جدة و كلمتها،سألتني عن سعود و علي قلتلها عند أهل علي و لمن على أساس ننهي المكالمة قالت:عمك يبغاك...! وصلني صوت عمو:حتجي بكرة...؟! قلت بطفش مدلع:إنتا تعرف إنو أنا أجي كل خميس...! -ايوة..علبالي...! و سكتنا احنا الاتنين،ما أقدر أفصل في وجهو كمان مني قادرة أقولو مع السلامة..أحس نفسي أقولو حاجة في نفس الوقت زعلانة منو و ما أبغا أكلمو...! قال عمو بصدق:جود أنا مابغا أزعلك مني...! نزلت دموعي..كنت عالحفة..أستنى الهمسة عشان أبكي،قلت ببكا:عمو إنتا حتى ما سمعتني..إنتا منتا عارف ايش أبغا أقولك...! قال بتعب:لا عارف يا جود عارف..إنتي تبغي تقوليلي أدور علاج و أتزوج و أعيش حياتي عادي بس أنا مابغا..مابغا...! صرخت بقهر و استعجال:فيه خمسمية وحدة ما تخلف نفسها تتجوز...! صرخ عمو كمان:مابغا...! تابع بهدوء:مابغا..إنتي تجبريني أرجع أقولك بكل وقاحة مالك دخل بيا...! حزت كلماتو في نفسي..اتوجعت و حسيت إني معد حقدر أتكلم،قلت:"باي"،و فصلت من غير ما أسمع الرد...! ليش..ليش عمو مصر على رأيو...؟!،اتوقعت يلين...! كل خططي خربت..كل خططي..آه يا قهري آه..يا ربي ساعدني..تعبت..تعبت...! فجأة حسيت بإني لازم أكون أقوى..أوكي زعلانة من عمو لكني حظل أحاول و أحاول..و قِدو هزأني و صرخ فيا و قلي كلام جارح فمعد فيه شي أخاف منو...!>>>قصدي..إني جربت عصبية عمو و غضبو فمناعتي أكيد قويت..أكيد...! ********************************** يوم الخميس في بيتنا،كنا قاعدين أنا و علي و سعود إلي ينقز يمين و شمال و يتنقل من شي للتاني و جدة إلي تتكلم معانا و شوية تنشغل بسعود..بالعادة أنا أندمج مع عمو لكنو سلم علينا و دخل على أساس مصدع...! أفففففف..الرجال أغبياء..عمو بس لو يخليني أتصرف..لو يثق بيا..أخ بس أخ..والله أحس بنار جوتي..نار ما تنطفي إلا لمن أسوي إلي فراسي...! فجأة و صلتنا صرخة عمو:"جووووووود..جود تعالي"،صرخ علي:"طفشتنا إنتا..تعال هنا و اقعد معانا"...! قالت جدة:قومي شوفي عمك...! وقفت و اتجهت لغرفة عمو و قبل ما أدق الباب خليت ملامحي زعلانة و أنا بالفعل زعلانة منو...! دخلت لغرفتو و لقيتو جالس عالسرير،قلت:نعم..ايش تبغى...؟! قال بصرامة:تعالي هنا...! اتأففت و رحت جلست جمبو،كان حيتكلم لكني قلت بزعل:لو حتقولي لا تتدخلي في حياتي حقولك مالو داعي لإنك كررت دي الجملة عليا كتير...! كنت بالضبط قاعدة أستغل غلاتي عند عمو و حبو ليا..لازم أستغل لازم..لازم عشان يلين...! اتنهد عمو و قال باستجداء خفيف:يا جود يا بنتي افهميني..أنا والله مابغا أزعلك لكني.."اتنهد عمو للمرة التانية"..يا جود أنا في هذا الموضوع أفقد أعصابي و ما أنتبه للي أقولو..والله ما كنت أقصُد الكلام إلي رسلتو لكي..أنا بس... سكت عمو..حسيت إنو مو قادر يكمل و يعبر،قلت:عمو إنتا حتى ما سمعتني..أنا قضيتي مو إني أزوجك..أنا إلي يهمني سعادتك..مو ممكن جداً تتزوج و تدخل في مشاكل و يزيد همك..أنا يا عمو عرفت إنو عندك مشكلة و أحس إنو من واجبي أساعدك زي ما قد ساعدتني كتير..إنتا بس ثق بيا..ثق بيا و شوف ايش حيسير...! -يا جود إنتي منتي فاهمة..صدقيني منتي فاهمة و واعية للوضع..إنتي يا جـ... قاطعت عمو بقهر و أنا أرفع سبابتي:أُص و لا كلمة..ايش إلي مني فاهمة...؟!،إنتا على بالك أنا جود الصغيرة إلي ربيتها..أنا إنسانة متزوجة و مخلفة و ليا تجربة و أفهم في دي المواضيع أكتر منك..لا تقول منتي فاهمة...! نظرة عمو المصدومة خلتني أنتبه إني رفعت صوتي و اتكلمت بطريقة غير لائقة من بنت لأبوها،قلت:عمو سامحني إني رفعت صوتي عليك و كلمتك بدا الأسلوب..أنا يا عمو.."بلعت ريقي و دمعت عالخفيف"..أحبك يا عمو و أبغا راحتك..اسمعني..مو عشانِّي صغيرة تقوم تحسب إني مني فاهمة..أنا يمكن أكون صغيرة في نظرك لكني كبيرة كفاية عشان تناقشني و تفهم مني و أفهم منك مو تصرخ و تهزئ و تسكتني قبل حتى ما تسمعني...! رفع عمو يدِّو لوجهي و قال و هوا يحرك إبهامو على وجهي عشان يمسح دموعي:و أنا أحبك يا جود..و لإني أحبك ما أبغاكي تفتحي دا الموضوع مرة ثانية...! قلت و دموعي تزيد:طب ليه ما تثق بيا...؟!،ليه ما تثق بيا زي ما كنت أثق بِيك و أنام مرتاحة بس عشانك معايا و مصدقني...؟!،زمان يا عمو كان دورك إنك تتصرف و أنا أثق..دحين سار دوري أنا عشان أتصرف و إنتا عشان تثق...! كان عمو حيتكلم لولا الباب إلي اندق،مسح عمو دموعي بسرعة قبل ما يفتح علي الباب،طالعنا فيه و أجبرنا نفسنا على الابتسام،قال علي:لا والله...!،قلك يعني مافي شي و يا ناسو عليكم تبتسموا مع بعض..من يوم ما هيا مرابطة عند الجوال و إنتا أول ما شفتها قلت راسي مصدع عرفنا إن مافي شي..مافي شي بالمرة...! ضحكت و أنا أوقف:طيب ليش حاقد...؟!،العشا جهز...؟! -ايوة...! قلت و كأني أكلم طفل:حبيبي والله لا تزعل..خلاص لمن نروح البيت أقولك سر...! دفني علي بعفاشة:امشي..امشي و إنتي ساكتة...! مسكت كتفي و قلت و أنا أتوجه للصالة:آآآآآي..ياخي اتقي الله فيا و في إلي في بطني...! حسبي الله على ابليسك يا علي..ما قدرت أسمع رد عمو بسببك...!،بس يا ربي يكون لان..يا رب...! ********************************** كنا قاعدين أنا و علي في الصالة و سعود يتفرج على قناة براعم..والله قناة حلوة..آمنة و ما أخاف يجي فيها شي مُخل أو خيالي زيادة عن اللزوم...! كنا أنا و علي نتكلم عن الحمل و الأشياء دي الشي إلي خلاني أتذكر إني ما قد كلمت عمتي أم علي على إني حامل،قلت:علي..تصدق إلى الآن ما كلمت عمتي عن حملي...! ضحك علي:حليلك من عوزُه..أمي دريت من قبل ما أهلك يدرون بس قالت لي ما أقلك عشان ما أخرب عليكي لو تبغين تفاجئينها و عادت علَي الأسطوانة يوم حمل سعود...! "حِلِيلِك مِن عَوَزُهْـ..جملة مركبة تخص أهل جنوب السعودية معناها..حليلك أي:يا عمري أو يا روحي عليك..العوز و هو الحاجة..الضمير عائد على العقل و مختصرها يا عمري عليكي من حاجتك للعقل...! هيا قوية شوية لكن..صغار السن و الشباب يستخدموها للمزح و أغلبهم لا يعرفون معناها فقط يجيدون استخدامها في الوقت المناسب بغرض المزاح و التنكيت و هذا يفسر استخدام علي لها ببساطة و عدم غصب جود منها" ابتسمت،عمتي رهيبة..أنا مرة معجبة بها ما شاء الله...! بعد شوية جا سعود إلي كان سادح قدام التلفزيون و وقف قدامي،رفع بلوزتو و مسك بنطلون البيجامة:ماما فكيلي...! طالعت فيه مستغربة:ليه حبيبي تبغى الحمام...؟! هز راسو بلأ:أبغى أوليكي سي (أوريكي شي)...! -ايش توريني...؟! -أوريكي..فكيييييييييييييي...! ابتسم علي:نطق الراء...! قلت و أنا أفتح لسعود البنطلون:ساعات من غير ما يحس ينطق صح...! جلَّست سعود فوقي و قلت و أنا أمسح على فخدو الصغير العاري عشان ما يبرد:ايش تبغى توريني...؟! كنا أنا و علي نبغا نعرف ايش الشي دا..رفع سعود وحدة من رجولو:سوفي..عندي صعل زي بابا...! علي:عندك ايه ياخي...؟! قال سعود باستغراب من عدم فهم علي:صعل...! قلت:يعني شعر...! علي:ما شاء الله..الشين صارت تنقلب لصاد ذحين...! غريبة..سعود ينطق الشين سين..و أحياناً من غير ما يحس ينطقها عادي..ليه دحين قلبها صاد...؟! حضنتو:ما شاء الله ولدي سار رجال..إنتا عارف ليه سرت رجال و كبرت...؟! رفع سعود نظرو ليا فقلت:عشان لمن تجي أختك تكون إنتا كبير و هيا ما تعرف شي و إنتا تعلمها و تدلعها و هيا تسمع كلامك و تحترمك و تحبك...! بعد سعود عني و حط يدو على بطني:نونو بنت...؟! التفت لعلي إلي قال:إنتي شاكة إنها بنت...؟! قلت و أنا أرفع أكتافي:أنا نفسي في بنت بس مادري لو بنت ولا ولد...! قال علي:أقول سعود..ما كان يمديك ترفع البنطلون و تورينا..ليش لازم تفصخ...؟! -تفسني..تفسني مللللللللللة...(طفشني..طفشني مررررررة)...! و رفع سعود رجلينو و اتكور على نفسو و حط راسو على صدري،حضنت سعود و حطيت وجهي في رقبتو و أنا أسمع علي يقول:ما شاء الله شيخ سعود..كم عمرك عشان تقولي البنطلون يطفش...؟! رفعت راسي عن سعود:تسكت ساكت...! رفع علي حاجبو،قلت:ايييييوة تسكت ساكت..أحد قلك تتكلم قدام الولد و تقول إنك ما ترتاح إلا بالشورت و إنو البنطلون يطفشك..الولد ما حيجيب دا الكلام من بعيد...! -أفففففف يعني حتى في بيتنا بنحاسب على كلامنا...؟! -ايوة بنحاسب..ما دام عندنا أطفال لازم نحاسب...! ********************************** كنا في بيتنا _بيت جدة_ قاعدين في الصالة أنا و علي و عمو نتكلم و نتقهوى وناكل مكسرات و حلا و الأشياء دي...! جدة كانت جوة في غرفتها تصلي و سعود كان قاعد يشخبط و يرسم على دفتر أخدو من عمو...! و على سيرة عمو تراه قاعد يتكلم و ينكت و لا كأنو شي و أنا دحين محتارة مني عارفة ايش أسوي،مني قادرة أفتح الموضوع مرة تانية،ردة فعل عمو مرة غريبة..من كتر ما هوا يتصرف ولا كأنو فيه شي مني قادرة أكلمو...! المشكلة الأكبر إنو عمو لو حس مجرد إحساس إني حفتح الموضوع يتكلم و يقول أي شي..و لاحظت إنو يتجنب ننفرد أنا و هوا في مكان لحالنا...! أوففففف من جد بدأت أتعب...! التفت لسعود _إلي قطع حبل أفكاري_ مفجوعة لإنو صرخ فجأة:مااااااماااااا..أعتين� � دلازة (دراجة)...! احتجت مدة عشان أستوعب إلي قالو سعود و لمن استوعبت قلت بخصام:طب ليش تصرخ...؟!،إلي يسمعك يقول لك سنين تطلبنا دراجة و ما جبنالك...! علي:لا و أعطيني..يعني كأن الدراجة في شنطتك ذحين...! قلت:استغفر الله يا ربي..ليش تصرخ أبغا أفهم...؟! برطم سعود و طالع فينا و هوا على وشك يبكي..قال عمو بقهر عليه:جيبولو دراجة..ليش تصرخوا عليه المسكين...؟! التفت لعمو:لو كان يطلب من مدة و قلنالو لأ فانفعل و صرخ معليه..لكن دي أول مرة يطلب..ما قد نطق...! سعود كان مبرررررطم و زعلان بقوة،قال عمو:تعال..تعال حبيبي...! راح سعود لعمو و جلس فوقو:ما عليك منهم ماما و بابا الشريرين..أنا حجيبلك دراجة.."التفت لنا"..انقلعو أنا حجيبلو دراجة...! أسند علي ظهرو على الكنبة:فكة برضو...! طالعت في سعود الزعلان،شبكت يدِّيني في بعض و رمشت بعيوني:سَعُّودي حبيبي...! قال و هوا يميل على عمو يحتمي بو:مابغا..لا تسلخي(تصرخي) فيا...! رحت و جلست جمب عمو و قلت و أنا حاطة يدِّي على خد سعود:سعود حبيبي أنا عشان خفت عليك..أنا أحبك عشان كده صرخت فيك...! غطى سعود وجهو بيدِّينو و بكي:إنتي ما تحبيني..إنتي ما تبغي تعتيني(تعطيني)...! -يووووووه سعود لا تقعد تبكي..أنا والله أحبك..ايش إلي ما أحبك...؟! و شلت سعود و حطيتو فوقي:خلاص حبيبي خلاص..والله أنا أجيبلك أحلى دراجة...! هز سعود راسو:مابغا..عمو يزيبلي..إنتي ما تبغي تزيبيلي...! حضنتو أكتر:خلاص عمو يجيبلك بس المهم إنتا ما تزعل مني...! لمن شفت سعود مستمر بالبكا قلت بصوت باكي:دحين أنا ايش أسوي يا سعود و إنتا زعلان مني..أنا أتعب لمن أزعل و كمان النونو يزعل...! سعود رفع راسو و دموعو كانت جفت،قال:ماما خلاس لا تبكي..أنا أحبك...! ابتسمت و حضنتو:والله...؟!،أصلاً أنا ما أقدر أزعل منك...!،فيه وحدة تزعل من حبيبها...؟!،فيه وحدة تزعل من روحها و حياتها و عمرها...؟! و بستو،قال علي:خلصتو...؟! عمو:ايشبك حاقد...؟! علي:تخيل..تخيل أنا أعيش المجاغة و الدلع ذا كل يوم..أفففففف...! انقهرت أنا:ايش إلي مجاغة و دلع..تبغى الولد يطلع ناقص حنان...؟! نزلت سعود من عليا و أول ما عدَّى من عند علي مسكو و حط ظهرو على صدرو و انحنى عليه و قال بتهديد:أحبك و لا ما أحبك...؟! قال سعود بعناد طفولي:لأ...! دغدغو علي و سعود مصر على "لأ"،كان نفسي أطالع في عمو أشوف نظرتو لكن قوية شوية...! نزل علي سعود و هوا يقول:حسبي الله على ابليسك..تعبت و إنتا لسه لأ...! ضحك سعود و راح يكمل شخبطة و رسم...! وقفت أنا بعد شوية و اتجهت للمطبخ عشان أشوف العشا و أنا أدعي ربي ييسر لي أمري و يلهمني بالصح تجاه ردة فعل عمو إلي منعتني من فتح أي موضوع...! ********************************** رن جوالي و أنا في واحد من الكلاسات،قفلتو بسرعة و أنا أحس بنظرة الأستاذة الناقمة..طنشتها و أنا أفكر باللي ممكن يتصل عليا في دا الوقت..يووووه أنا غبية ليه ما شفت مين...؟! بعد ما خلصت المحاضرة رحت و جلست في الكافتيريا..أشوف المكالمة من مين و بعدين حروح لسعود...! شغلت الجوال و كانت المكالمة و للمفاجأة من بابا..احترت أرجع أتصل و لا لأ لكن و على أي حال بابا رجع اتصل...! بعد كم رنة رديت بتوتر حاولت أخفيه ورا الجمود:نعم...! -السلام عليكم...! -وعليكم السلام...! -كيفك يا بنتي و كيف ولدك و زوجك...؟! بنتي...؟!،يااااا الله يا دي الكلمة..من بعد ما كانت حلمي و شي أطلبو من ربنا سارت ولا شي..طبعاً من بابا بس...!،و أصلاً ما كنت محرومة كلياً منها..عمو و جدة ما كانو مقصرين...! قلت:الحمدلله..إنتا كيفك...؟! و زي ما كان يسألني "كيفك" زمان لمجرد السؤال سألتو أنا دحين "كيفك" لمجرد السؤال...! -الحمدلله بخير دام إنتي بخير...! سكتنا و لمن حسيت إننا طولنا قلت:بـ.. لكنو قاطعني بنبرة غريبة:بسألك يا جود..سامحتيني...؟! -ها...؟! -من قال ها سمع...! -ايش..ايش دا السؤال بعدين أنا قد قلتلك من قبل إني مسامحتك فليش دحين تسأل...؟! -مسامحتني...؟!،كيف مسامحتني و إنتي ما تتصلي تسألي عني..ما تزوريني..ما تراسليني حتى..يا بنتي أنا أبوكي و خلاص رضيت عنك..لازم تحاولي تتقربي مني..أنا أبوكي ما يسير العلاقة تم بيننا كذة...! كان يتكلم و كأنو الحق معاه و أنا الغلطانة قليلة الأدب إلي ما أستحي على وجهي...! قلت بصدمة: ..إنتا..إنتا فظيع..أنا مني عارفة إنتا كيف تفكر...! تابعت و أنا أصر:إنتا الغلطان..إنتا تحاول تتقرب مني و تراضيني مو أنا...! قال بابا ببديهية:لأ..إنتي من زمان تدورين رضايا صح...؟!،خلاص رضيت عليكي ذحين..المفروض نعيش مع بعض كأب و بنتو و لا كأن بيننا أي شي...! حسيت بنفسي انسدت و يومي خرب و مزاجي سار زفت،قلت بقرف حاولت أخفيه:طيب..أنا دحين لازم أروح أشوف سعود..باي...! -بتسوي إلي قلتلك عليه...؟! -مع السلامة...! قال بتعقل في غير مكانو:الله يصلحك يا بنتي..يلا مع السلامة...! و انتهت المكالمة على كده...! يا عالم..يا ناس..أنا أبالغ و لا بابا عجيب...؟!،لكن ما أقول إلا حسبي الله و نعم الوكيل..حسبي الله..يا رب..يا ربي يا حبيبي أغنيني بفضلك عنو و لا تحوجني له أبداً أبداً أبداً...! و دحين أقوم أشوف سعود أصرف لي...! ********************************** بعد ما خلصت صلاة العصر اندق الجرس،أكيد عمو،ابتسمت و قمت عن السجادة من غير ما أفسخ شرشف صلاتي..اتعطرت شوية و رحت للباب و كان بالفعل عمو...! فتحت الباب:هلا والله...! سلم عليا عمو و قال بصوت عالي عشان يسمعو سعود:وين سميي..وين متخبي...؟! طلع سعود من ورا الباب و نط على عمو و هوا يضحك...! و "سميي" يعني الإنسان إلي اسمو على اسمي...! قفل عمو الباب و نزل سعود و هوا يقول:وين علي...؟! -في الصلاة..أكيد حيجي دحين...! فجأة عمو سوى نفسو مدهوش:وي..سعود نسيت حاجة جبتها عند الباب..ايش أسوي دحييييييين...؟! قال سعود ببساطة:افتح الباب و زيبها.."التفت ليا"..ماما عادي نفتح الباب...؟! قطبت حواجبي:ايش فيييييه...؟! رجع عمو فتح الباب و قال بخوف مصطنع:سعود شوف الحاجة لا يكون الحرامي سرقها...! خرج سعود بفضول طفولي و شهق قبل ما يصرخ:دلاااااازة..(دراجة)...! فطس عمو ضحك على ردة فعل سعود إلي صرخ للمرة التانية ببكى:ماما..أنا أبغى دلازة...! خرجت راسي من الباب:اللاااااااااااااااه. .ايش دي الدراجة...؟! ضحك عمو:يحسبها مو لو...؟! و خرج و شال الدراجة الصغيرة بيد و سعود باليد التانية:هيا حقتك الدلازة...! قال سعود و دموعو على خدو:حقتي الدلازة...؟! هز عمو راسو و هوا يضحك:ايييييوة...! و حط الدراجة عالأرض و قعد يمسح دموع سعود،قلت:حسبي الله على ابليسك يا سعود..ليش مفجوع...؟!،مطلعنا أنا و أبوك الأشرار إلي حارمينك...! قال عمو:ايوة الله حارمينو..ليه ما تجيبولو دراجة...؟! قلت بقهر:عمرو ما اتكلم و من داك اليوم إلي قلت فيه إنك إنتا حتجيب ما فتح فمو بكلمة لدرجة نسينا الموضوع...! نزل عمو سعود و هوا يطالع فيا و يهز راسو يعني:"أطفال ما عليكي"،ابتسمت:طب سعود قول لعمو شكراً...! راح سعود لعمو و رفع يدِّينو،شالو عمو...سعود باس عمو و حضنو:سُكلاً عالدلازة الحولة..(شكراً عالدراجة الحلوة)...! عمو راح فيها،قال:فديتك إنتا الحول إلي تجنن...! قلت:اسم الله على ولدي حول في عينك...! أداني عمو نظرة،قلت:قصدي يعني ما ينفع تنطق زيو في دي الحالة...! نزل عمو سعود و قال بصدق:طب أنا حرااااان و جيعان..ما اتغديت و أنا ألفلف في محلات الدراجات عشان ألاقي دراجة أحمرة و حولة...! قلت:حبيبي إنتا..دحين أحطلك شي تاكلو...! قلت و أنا أتوجه للمطبخ:بس ليش ما جبت معاك جدة...؟! قال بصوت عالي لإنو في الصالة:حاولت فيها بس أمي الله يهديها دي الأيام معد ترضى تخرج...! خرجت من المطبخ بعد ما حطيت الباقي من الغدا عالنار و جلست جمب عمو في الصالة:الله يصلحها كده مرة كلمتها..تقولي السكر و الحمام و الدوخة..يعني عند الناس و فهمت بس عاد عندي أنا..مني غريبة...! اتنهد عمو:أهم شي حاولي تكثري من زياراتك ترى معد هيا زي أول تتحمل بس تشوفك كل أسبوع...! اتنهدت:يا ليت لو أقدر...! -والله بدأت تحس بفراغ..و أنا مهما أقعد معاها أحس إني ما أكفيها...! قلت و أنا أتجه لسعود عشان أساعدو يركب الدراجة و يتوازن فيها:هيا تبغى حرمة و أطفال...! ابتسم:البركة فيكي..اولدي بسرعة...! ابتسمت أنا كمان:فيا و فيك إن شاء الله...! قال عمو بحماس عشان يغير الموضوع:يلا سعود يلا..عشان أصورك...! ما قلتلكم يقول أي شي المهم ما يعطيني فرصة أتكلم..أففففف...! جا علي بعد شوية،سلم على عمو بعدها راح و وقف فوق راس سعود:سعووووووووووود..ممكن ألعب بالدراجة شوية...! قال سعود بخوف:لأ لأ...! قال علي برجاء و مسكنة مرررررررعبة:الله يخليييييييييييييييييييييي يك...! جري ليا سعود و هوا يبكي،دفن راسو فيا و قال وسط دموعو:بابا ما يلعب..ما يلعب...! صرخ علي:سعود إنتا و وجهك ليش تبكي...؟! -إنتا تكسل..(تكسر)..الدلازة..إنتا كبيل..(كبير)..ما تلعب...! ضحك عمو و قال بشدة مصطنعة:علي..ما تقرب من دراجة سعود فاهم...! علي مسك الدراجة و قعد يمشيها من غير ما يركب فيها و هوا يقول:اللاااااه حلوة ذي الدراجة..حكسرها...! و كان يبتسم بلؤم،سعود ما كان يشوف لإنو دافن وجهو فيا بالتالي قعد يبكي بحزن:ماما..ماما..ماما... و علي مبسوووووط و متلذذ..هتفت باستنكار:علي...! قال عمو:حبيبي سعود طالع بابا ما ركبها..يمزح معاك..شوف...! لكن سعود مازال يبكي:ماما..ماما.. قلت بقهر:سعود طالع..بابا مبسوط عشانك صدقتو..طالع بابا قاعد يكد..يمزح معاك...! ترك علي الدراجة و جا و جلس جمبي:تعجبيني لمن تسوي فيها تربوية...! قلت:أجل..تبغاني أقولو يكدب عليك عشان معد يصدقك...! قال عمو باستغراب:كيف فهمتي قصدو..أنا ما فهمت...! عمو استغرب كيف فهمت إنو علي يقصد إني قلت تمزح بدل تكدب و يحقلو و يحقلي أنا كمان أستغغل دي النقطة و أقول:"هما كده المتزوجين يفهموا بعض من غير شرح"...! ابتسمت و كنت حجاوب على عمو بس علي شال مني سعود بالغصبة و حطو فوقو،سعود كان مو راضي يرفع راسو و يبكي و علي يحاول يرفع راسو و هوا يقول:وي سعود..تبكي عشان دراجة..بعدين أنا ما ركبتها و حط ذا كله على جمب..أبوك نحيف و رشيق ما يكسر شي...! -مابغا..إنتا تبغى تكسل دلازتي...! حضنو علي و قال:حبيبي إنتا حبيبي...! قال عمو و هوا يهز راسو:حسبي الله على ابليسك نكدت عالولد...! قلت:ايش فهمك إنتا...؟!،لازم دي اللمسة الحلوة في كل شي و لا كيف يسير علي علي...؟! طالع فيا علي:أقول لا أحط لمستي الحلوة ذي عليكي ذحين..قومي يلا قومي..قومي..ما عندنا حريم يتكلمون و يعطو آرائهم...! انفعلت فجأة و هبيت فوق علي:وجع إن شاء الله..إذا كانت أم سلمة _رضي الله عنها_ أدلت بفكرة على الرسول و أصحابو تجي حضرتك إنتا ما تبغا تسمع لزوجتك..ليه..و بأي حق...؟!،و إذا كان الرسول سيد بني البشر و أحسنهم خلقاً لمن جالو الوحي لجأ لزوجتو تقوم تسفه مني قدام ولدي..والله ما أقول إلا حسبي الله عليكم يا الرجال..والله إننا أعقل منكم بخمسمية ألف مرة..بس فالحين ترددوا ناقصات عقل و دين..بس..غير كده ما عندكم هرجة...! وقمت و رحت للمطبخ أشوف الغدا إلي كان يتسخن من غير ما أسمع أي كلمة زيادة و من غير ما أرد على علي إلي قال:"جود لمن تعصب..أعوووذ بالله"...! كان نفسي أقول من الشيطان الرجيم لكن احترمت نفسي و سكت...! ********************************** أففففف..مقهورة من عمو..يتصرف و لا كأني لسه مكتشفة شي مصيري عنو..مسترخي و لا على بالو لدرجة سرت أنا أحس إنو عادي ما فيها شي..الحسنة الوحيدة من ردة فعلو العجيبة دي هيا إني هديت غصباً عني و ما سرت أفكر بعواطفي بس...! بس بيني و بينكم عمو يكابر؛يعني حتى لو ما بين الحزن و الضيقة أكيد موجودين...! رفعت نظري لسعود إلي يروح و يجي بالدراجة و رامي الجيم بوي...! لاحظت عليه إنو لمن يتعلق بشي ممكن بسهولة يتخلى عن باقي الأشياء..تعرفو ألعابو تنعد..لإنو يعلق عاللعبة بالشهور بعدين يطلب شي جديد بس تصدقوا...؟!،ألعابو إلي هوا اختارها تنعد لإنو فيه ألعاب تعجبني أو تعجب علي نقوم نشتريها على أساس لسعود..و بعدين نقعد زي الهبل نلعب بها و هوا يقعد زعلان لإنو اشترينا لو دي اللعبة و خلينا ديك...! قلت:سعود..ليش رامي الجيم بوي..مو حبوه...؟! طالع سعود في الجيم بوي:ماما هوا يبغى ينام..سيبيه لَحَالو...! -آآآآآآآه يبغى ينام...! الله المستعان..الولد دا عليه تصريفات زي وجهو..قال يبغى ينام قال...! قمت و شغلت الجيم بوي و لقيت اللمبة حمرا فقلت:سعود حبيبي فين الشاحن...! -في غلفتي..(غرفتي)...! رحت لغرفة سعود و شبكت الجيم بوي في الشاحن...! جلت بعيني عالغرفة،ابتسمت؛كل شي صغير،و لاحظت إنو ترتيبها نفس ترتيب غرفتي زمان،يمكن من غير ما أحس رتبتها بدي الطريقة...! انسدحت على السرير الصغير..يا الله كيف حالي اتغيرت؛همي الوحيد كان بابا بس دحين سار آخر آخر شي أفكر فيه،دحين سرت متزوجة و عندي زوج لازم أداريه و أسعدو و ولد لازم أربيه و مستنية بنت...! قمت من على السرير و أنا أقول:"بسم الله"،حطيت يدِّي على بطني:"أبغى بنت"،ابتسمت و أنا أمسح على بطني،رفعت نظري لفوق،قلت:"شكراً"،بعدها سحبت نفس عمييييييق و خرجت من غرفة سعود للصالة و لقيت سعود ينطنط فوق الكنب،بس لمن شافني هجد وجلس بأدب،ضحكت و رحت جلست جمبو،شلتو و حطيتو فوقي،حضنتو و قعدت أبوسو و أمسح عليه...!،أتذكر عمو كده كان يسويلي،فجأة و من أغير ما أدري يحضني و يبوسني و يقعد مدة بعدين يسيبني،قد ايش كنت أحس بالأمان و الحنان،طالعت في ملامح سعود إلي طالع فيا و قال:ماما... -عيونها... -ماما إنتي تحبيني...؟! ابتسمت و أنا أهز راسي:ما حجاوب...! -ليس... قاطعتو بإني بستو و استنشقت ريحتو:في وحدة يكون عندها عسل و ما تحبو...؟! ضحك سعود بسعادة و حرج و من الخجل دفن وجهو في صدري و هوا يضحك و أنا أضحك...! اندق الجرس بعد مدة..إن شاء الله علي؛متحمسة أقولو إني حامل ببنت..أنا من قبل كنت حاسة و رحت من ورا علي مع عمتي إلي قالت بإنها تبغى تاخد رأيي في مجلس و مسكت السواق و رحنا على المستشفى..إلي سار إني قلت لعلي قبل صلاة العشا و قبل ما أقفل الباب:تراني عرفت جنس البيبي...! و قفلت الباب بعد ما قلتلتو:"الصلاة حتفوتك"،لإنو كان يزن يبغى يعرف..وي لا أكون أخدت ذنبو..أقوووووول خليني أروح أفتح الباب...و رحت عشان أفتح الباب و لمن فتحتو قال:سنة...! -كان فتحت بنفسك...! -مزرفن...! -طيب لا تعصب..دحين حزر..بنت و لا ولد...؟! قال علي:مممممم..ولد أكيد لإني أبغى بنت...! التفت لسعود:سعود تتوقع النونو بنت و لا ولد...؟! قال سعود:بنت...! قلت:لأ... علي:ولد...؟! -لأ... -أجل جنس ثالث...! قلت باستنكار:لاااااااااء...! ضرب سعود الأرض برجلو و قال بإصرار:واللللللللللللله بنت...! علي:لا تحلف و إنتا مو متأكد...! ابتسمت:كلامو صح..بنت...! قال علي بفرح:من جد...؟! شلت سعود و حضنتو:حبيب ماما إنتا..كيف عرفت...؟! قال سعود:أنا أعلف (أعرف)،أنا كبيل (كبير) هيا نونو سَعيييييييلة (صغيرة)...! ضحكت:فديت ولدي الكبير أنا...! علي:و كالعادة يتم تسفيه علي...! نزلت سعود:تبغى أشيلك إنتا كمان...؟! مد علي يدِّينو و هوا يرمش بعيونو ببراءة مرعبة:،قلت:الله يرفع بالبراءة عنك بعدين إنتا إلي المفروض تشيلني مو أنا...! التفت علي لسعود:سعود أشيل ماما...؟! هز سعود راسو بايوة و هوا زام شفايفو،اتقدم مني علي،رجعت على ورا:لا علي أنا سايرة تقيلة حتطيحني بعدين ما ينفع... قطع كلامي و هوا يشيلني:سعود يلا الحقني عشان نحط أمك و أختك على أكف الراحة...! طالع فيا و هوا يمشي بيا و همس:قدرت عليكي في السابع ما بقدر عليكي و إنتي في بدايات الخامس...؟! قلت بخجل:بس سعود...! لفت علي لسعود إلي كان مو معطينا أي اهتمام،حطني عالسرير و هوا يضحك:ولا جاب خبرنا...! رجع علي يطالع في سعود:ها سعود..شفتني و أنا أشيل ماما...؟! -ايوة...! هز علي راسو:مو حلو...؟! قال سعود و هوا يرفع أكتافو:إنتا أول ما سلت ماما كده...؟! قال علي بحذر:ليش إنتا متى شفتني أشيل ماما...؟! كان سعود قاعد يحاول يتذكر أما أنا فحطيت يدِّي على خدي:يا حسرة على ولدي ياااااا حسرة.."تابعت بقهر"..عشان لمن أقولك يااااا سيد علي بطل تستعبط برة الغرفة تبطل..مو تقولي عادي نايم،نايم في عينك..بلى في وجه العدو إن شاء الله...! طالع فيا علي:ايش فيكي إنتي..يعني ايش حيكون شاف...؟! كنت حرد لكن سعود قال:اِتْزَكَرْتَا...! و كان حيكمل لكن علي قال:أوووص..روح على غرفتك يلا...! لوَّى سعود فمو بعدين راح،قلت:ما شاء الله..حضرتك بس فالح تسكت الولد...! قفل علي الباب و جا و جلس قدامي و قال بابتسامة:من المتوقع إنو بعد ما عرفنا إنو إلي في بطنك بنت نعيش لحظات رومنسية...! -ها...؟! -ها...؟!،بدل ما تقولين لي كلمة حلوة تقولين ها...! قلت و أنا أحرك يدِّي:بعد عني..عيب..أصلاً..أصلاً إنتا قليل أدب...! قرب مني:أنا إلي قليل أدب و لا إنتي إلي ما فيكي رومنسية...؟! قلت و أنا أرجع شعري على ورا:أصلاً مُنـ قاطعني:لا تقوليها..اسكتي أحسن...! قلت و أنا أأشر على حلقي:عالقة..عالقة هنا...! رفع علي دقني:وين وين..وريني وين عالقة...؟! كملت في نفسي الكلمة:"ـحرف"...! ********************************** خرجت المكرونة الباشميل من الفرن و حطيتها على جمب،فتحت قدر الرز بعدها خفضت النار عليه...! سحبت نفس و أنا أفكر بإني بكرة ما حأطبخ غدا و حناكل من باقي عشا اليوم..أكيد حيزيد...! طبعاً أكيد تسألو ليش كل دا..أقولكم علي عازم أصحابو الجُداد حتى قلي على أسماءهم و حفظني هيا،سرت أحس نفسي أعرفهم من كتر ما يكلمني عنهم...! أول شي "محمد"،يقول علي إنو ضخم و صوتو قوي ما شاء الله و إنو مررررررة محترم و مثالي على عكس "عبدالرب"،الطفشان من كل شي و في نفس الوقت قليل أدب شوية و ما عليه من أحد..و يقول علي إنو ما يحب اسمو..يقول إنو طويل و مسوي زحمة..الله يصلحوا سمو مافي شي..و عشان كده الكل يناديه عبود و مع بركات باب الحارة سارو ينادوه "عبدووو"..أما عن يوسف فيقول علي إنو حبوب و صوتو يجنن ما شاء الله و قد سمعني مقطع لو في جوالو و من جد حلو..و مين كمان يا ربي...؟!،ايوة اتذكرت فيه واحد اسمو عمر و علي يقول إنو مرة خجول و يستحي من خيالو..و لمن يحكيني عنو أفطس ضحك..أحب الأولاد و الرجال الخجولين و فيه كمان واحد اسمو أحمد يقول علي إنو حبوب و خفيف دم و يقولولو حمادة...! طبعاً أنا أموت و أعرف مين إلي شالني بس أخاف أسأل علي..حيحقد و يهزأني...! و ساعات أقول:"لو كنت مو متزوجة كان سارت علاقة حلوة بيني و بين إلي شالني و كان سارت لي حركاااااات زي في قصص الحب"،بس لا تقولو لعلي إني قلت كده..والله ليذبحني بدم بارد...! بعدت الرز و حطيتو على عين مي مولعة،غطيت المكرونة عشان ما تبرد و خرجت من المطبخ من غير ما أنزل أكمامي المشمرة و بنطلون بيجامتي المطوي،و لمن خرجت من المطبخ لقيت علي منحني يحط صحون الكباب على الأرض،قعدت أطالع فيه و أتأمل...! و لمن اعتدل علي و جات عينو عليا حسيتو وقف يتنفس لثواني قبل ما يقول بعمق:جود...! هزيت راسي أنفض منو كل الذكريات إلي مرت عليا،قلت بابتسامة:نعم...! قال بنظرة تايهة و هوا يتقدم مني:نفس الشي..نفس الشي بس..بس إنتي ذحين حامل..حامل مني أنا و من قبل جايبتلي ولد...! قرب مني أكتر و مسك أكتافي و هزني بشويش:ذيك اللحظة ما كنت متخيل إني ممكن أكون معاكي تحت سقف واحد و عندي منك أولاد...! ضحكت ضحكة قصيرة خفيفة،قال علي:جوووووود...! قلت و أنا أنزل أكمامي:ولا أنا ما كنت متخيلة إنو ديك الصدفة ممكن تتعدى حدود موقف محرج...! ابتسم:لكنها اتعدت...! -اتعدت و بس....؟!،.."تابعت برجاء"..جيب صحون الكباب بليز...! ابتسم علي و هوا يرجع يجيب الصحون و ابتسمت و أنا أردد:"سبحان علام الغيوب..مين كان يتخيل؟!"...! ^^^^^^^^^^^^^^^ كنا قاعدين أنا و علي عالسرير..أصحابو راحوا..بس كعادتو يجي يحكيني عن إلي سار و لو فيه شي مو عاجبو يحط حرتو فيا...! ابتسمت و أنا أسمعو يتكلم:و أهم شي في الموضوع كله عمر..تخيلي ما جا...! -ليش ما جا...؟! -ها...؟!،يقول يستحي يدخل بيتي و يخاف يضايقني..الآدمي ذا يستحي من خياله...! -يا نااااااااسو..تعرف مرة أحب الأولاد لمن يكونو يستحو..يعجبوني دولا إلي يستحو من خيالهم...! -هييييي إنتي...! -ايييييش..ايشبك قلبت فجأة...؟! -لا تتكلمين عن عمر...! قلت بسخرية:لييييييش..تغار عليه...؟! رماني علي بوحدة من المخدات و قال بانفعال:عليكي يا غبية...! مسكت المخدة و حطيتها على جمب:وي..و ليش عمر بالذات...؟! قال بتوتر:عـ..عشان هوا يستحي و إنتي يعجبوكي إلي يستحون و.."تابع بنرفزة مفاجئة"..و بعدين لعد تنطقين اسمه...! قلت بلا مبالاة:عدم نطقي لاسمو ما حيأثر و لا على شعرة مني و لو إنو غريب إنك عصبت فجأة...! حاول علي يغير الموضوع في الوقت إلي كنت قاعدة أتساءل فيه عن سبب عصبية علي...! ********************************** اليوم ما عندي دوام بالتالي قاعدة في البيت مع سعود إلي يتفرج على التلفزيون و ياكل كورن فليكس...! وقفت و مسكت الريموتات و رفعتها فوق دولاب التلفزيون عشان سعود لا يقعد يقلب و يخبص ترتيب القنوات...! و رحت لغرفتو و اتفاجأت بكل الألعاب مِرَمَية و السرير محووس و الدراجة طايحة على الأرض...! ناديت:سعووووووووووووود...! و جا سعود،قلت و أنا أأشر عالغرفة:ايش دا...؟! -غلفة..(غرفة)...! -لا يا شيخ..غرفة...؟! بعد شوية قلت:كملت فطورك...؟! -بقي سوية...! -طيب خلص هدي الشوية و بعدين الغرفة دي تترتب و كل شي يرجع مكانو و الدراجة يا ويلك لو شفتها مقلوبة كده مرة تانية..سامع...؟! قال سعود و هوا مبرطم:ماما... -ما تكلمني قبل ما ترتب الغرفة...! سعود فِضِل مبرطم،قلت:يلا عشان لو رتبتها حعملك مفاجأة...! و خرجت من الغرفة و رحت لغرفتي وين ما جوالي يرن،مشيت للكوميدينة و أنا أفكر في مفاجأة لسعود عشان ما أطلع كدابة قدامو و...ايييييييييييييييش دا...؟!،بابا هوا المتصل...!،ايش يبغى مني في دا الوقت...؟! طالعت في الساعة،كانت 11 الظهر..ايش يغى...؟! رديت بتحفظ و جمود كعادتي:نعم...! -أيوة السلام عليكم...! -وعليكم السلام...! -كيف حالك و كيف أهلك...؟ -الحمدلله بخير..إنتا كيفك...؟! -الحمدلله..آآآ جود بغيت أسألك..أبو سعود موجود...؟! قلت و أنا أعلق على اللام:لللللللأ..ليش تسأل...؟! -لا بس أنا قريب من عمارتكم و أبغى أكلمك في موضوع بيني و بينك فما حبيت أضايق أبو سعود...! -دحين...؟! -ايوة لو كنتي فاضية...! فاجأني لكن و للواجب و الاحترام _فقط_ رحبت فيه و حصل و جا بابا و بطريقةٍ ما صرفت سعود و أقنعتو ما يجينا..بعدها قعدنا أنا و بابا في الصالة لوحدنا بعد ما رفض أي شي إلا كاسة موية...! قال بعد صمت دقيقة كاملة:كيفك و كيف الدراسة و الجامعة معاكي...؟! -الحمدلله...! -فرنسي إنتي صح...؟! -ايوة...! ابتسم:تعرفي فرنسي...؟! طالعت فيه..ايش السؤال الغبي دا...؟!،و إنتو كمان ليش تطالعو فيا كده..ايوة أعرف و فنانة بس البركة في الناس إلي ما تعرف..خليني ساكتة بس...! و جاوبت على أي حال:ايوة...! و سكتنا..يا ترى ايش الموضوع...؟!،أياً كان الموضوع حكون جامدة و هادئة و ما حسمح لعواطفي تظهر لإنو مو أي شخص يكون قد إنك تعبر عن مشاعرك قدامو و توريه... "جود إنتي ما قد شفتي بيتي...؟!"،انقطع حبل أفكاري و رفعت راسي لبابا و أنا أسمع سؤالو السابق و أقول بحواجب مقطبة:نعم...؟! -آآآآ..إنتي ما قد جيتي بيتي إلي هوا بيتك و بيت أخوانك و أخواتك...! هزيت راسي:يعني...؟! قال من غير ما يجاوب على سؤالي:مها بنتي ملكتها الأسبوع الجاي...! ما اتحمست أو فرحت و افترضت إنو يبغى يغير الموضوع،قلت بصدق:أوه الله يباركلها...! -و أنا جاي أعزمك...! قعدت أفكر و بشكل سريع عرفت إنو عيب أرفض و إنو مها مالها ذنب بمشاكلي مع أبوها،قلت:مين إلي حيتزوجها...؟! -ولد بيت الـ*****...! -آآه ايوة ايوة..الله يتمم لهم على خير..إنتا ممكن تتصل على علي توصفلو مكان القاعة...! -لا الملكة في بيتي..هيا عائلية...! قلت بصدمة:نعم...؟! اتوتر بابا:أنا يا جود..يعني إنتي من الأهل و..يعني..يعني أختك و.. قاطعت بابا:آسفة ما أقدر أجي..بس وصل لها سلامي و مباركتي...! قال بابا:دوبك كنتي موافقة و لا عشان في بيتي...؟؟؟!!! قلت بنرفزة و توتر:ما أقدر..ما أقدر و خلاص...! طالع فيا بابا برجاء:يا بنتي انسي إلي كان و تعالي..أختك بنفسها مصرة تجين..تعالي..تعالي و خلي الموية ترجع لمجاريها...! بابا كان يتكلم و كأنو مالي حق أرفض أو أزعل،اتكتفت و حطيت رجل على رجل:و من متى كان فيه مجاري أصلاً...؟! بابا صدمو سؤالي،تابعت من غير ما أسمع إجابة:أنا أعتذر ما أقدر أجي..من جد ما أقدر..لو أقدر كان جيت...! وقف بابا و اتفاجأت بو يجلس جمبي و يمسك يدِّي و يقول:جود..جود خلاص انسي..أنا أبغا أصلح كل أغلاطي و أبغاكي تساعديني...! سحبت يدِّي من بابا و بعدت عنو جسداً و نظراً:مابغا..ما أقدر أدخل بيتك...! -مو سامحتيني..خلاااااص...! بابا شبه مو فاهم و واعي لأثر إلي سواه في نفسي الشي إلي ما خلاني أبكي أو أصرخ بانفعال..الشي إلي أجبرني أفهمو بالهداوة و أوضح لو أفكاري و أنا أحاول ما أجرح مشاعرو أو أقل أدبي...! قلت:بابا..سامحتك ما يعني إنو بين عشية و ضحاها علاقتي بك تسير بيرفكت..عارف..عارف لو جيتني قبل ما أتزوج كان ممكن أتبكبك و أولول و تقعد إنتا تحاول فيا مدة بعدين أرضى و أتعلق فيك و أحبك لكن دحين غير..أنا زمان كنت أحس إنو عمو مو مجبر يهتم بيا،كنت أتمنى لو تجي و تضمني لك و... قاطعني بانفعال:أنا أبغى أضمك ذحين...! قلت و أنا أغمض عيني أداري عبرة:أرجوك لا تقاطعني...! تابعت بألم و أنا أتذكر مخاوفي:كنت خايفة من اللحظة إلي يقرر فيها عمو يتزوج و يحس إني أنا رادع أو تُقل عليه عشان كده كنت أطلب من ربي إنك في يوم تجي و تؤويني بس دحين أنا في بيتي مع زوجي و ولدي مني تقل على أحد..و اسمحلي أقولها..ما سار لك أي أهمية في حياتي..و ربي الحمدلله ما تركني..عوضني عن كل شي كان ناقصني..و كل ما جيت إنتا تسوي شي المفروض إنو يدمر حياتي يزبطها على عكس المتوقع.."ابتسمت و أنا أهز راسي"..من يوم ما انولدت إلمن يومك دا و ربي كافيني الشر و يرعاني..لمن رميتني على عمو اتزبطت ظروفو و سارتلو أشياء كتير بس..عشان يتعلق فيا و يسير يحبني زي بنتو..لمن زوجتني علي من غير ما تسأل عنو و عن إلي سواه فيا اتغير فجأة و اتغيرت شخصيتو و سار رَجُل محترم..و محد قادر يصدقني قد ايش علي اتغير و بشكل غير طبيعي..كأنها معجزة..أما عن سعود و ولادتي القاصرة الصعبة له بعد دعوتك طلع ما فيه شي و ربي ستر..و الحادث..الحادث إلي سلمنا منو كلنا و فوق دا الناس إلي أنقذتنا سارو أصحاب علي و بقوة و يحبوه و يحبهم...! اتبادلنا أنا و بابا النظرات لثواني بعدها قلت:أقولك كل دا عشان تفهم إنو كل شي سيء كنت تحاول تسويه ليا ربي يردو في نحرك..أنا يا بابا معد أحتاجك و لمن سامحتك سامحتك عشان ما عندي وقت أحقد على أحد، بيتي و دراستي ماخدين كل وقتي...! و سكت لثواني بعدها قلت:و بيتك ما أقدر أدخلو..أعتذر...! -لييييه..ليه...؟! قلت بسخرية حزينة:كيف تخلي الحشرة و القذارة تدخل بيتك...؟! انفعل بابا و قال باستغراب:ليه تقولي عن نفسك كده...؟! -مو أنا إلي قلت...! -مين إلي قال...؟! اتنهدت بألم:هيا كلمة قلتها عمري ما حنساها.."طالعت فيه بألم"..بس عمرك ما حتتذكرها...! أشحت بوجهي و أطبقت شفايفي على بعض و أنا أداري دموعي...! أجبرني بابا أطالع فيه لمن مسك وجهي و لفو عليه و قال بعمق:ايش قلت...؟! بعدت يدُّو و لفيت وجهي:مالو داعي.."وقفت"..اعتبر البيت بيتك...! و كنت حدخل و أخليه لكنو قال بحزن:تبغيني أخرج صح...؟! -مو عن كده بس أنا كنت واضحة و صريحة معاك و هدا شي أُشكر عليه.."ابتسمت بشجن"..يعني..أحسن من إني أسلم على يدَّك و راسك و أنا من جوة كارهتك و حاقدة عليك.."حطيت يدِّي على قلبي"..هدا أبيض تجاهك بابا..أبيض...! وقف بابا و خرج من الشقة حزين زعلان...! ارتميت على الكنبة...! ليش..ليش شايف إنو المفروض ما أكون زعلانة..ليش...؟!،ليش بابا يعتقد إنو ما دام رضي عني خلاص كل شي يتصلح...؟!،ليش معتبر إن معاه كل الحق لمن يطلب مني أعاملو كأب و ايش الفايدة _أصلاً_ من محاولتو تصحيح أغلاطو و هوا لسه غير آبه لمشاعري...؟!،مادري لو ملاحظين لكن بابا ما يبغاني أعاملو كأب عشاني..بابا يبغى كده عشان هوا يرتاح و يحس بالرضا عن نفسو...!،ليش بابا كده..لييييش...؟! و السؤال الأهم إلي أبغالو إجابة دحين..ليش أنا لازم أضغط على نفسي و أتحمل كل دا...؟! ********************************** | |||||||||
|  |
|
06-03-14, 04:43 AM
| #22 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثامن "الهدوء الذي يسبق العاصفة" سعود سيروي،،، كنت قاعد مع أمي نتفرج عالتلفزيون و نتقهوى،قالت أمي بعد تنهيدة:يا ولدي وين جود ما تكلمني...؟! -الله يا أمي..لسه دوبك مقفلة منها...! كانت جود لسه دوبها مكلمتني و مكلمة أمي...! قالت أمي و هيا تهز راسها:والله إن البيت ماش من بعدها...! ضحكت:ماش...؟!،هذا و إنتي كل ما جات صرختي عليها،أجل لو ما تحبينها ايش بتسوي...؟! أمي رغم حبها الكبير لجود إلا إنها كل ما تجي لازم تهزأها و أمي أصلاً كل ما زادت غلاة أحد عندها كل ما زاد خصامها له..و كدليل ما كانت تخاصم علي في بدايات زواج جود رغم إنها اندمجت معاه لكنها كانت مسالمة بس دحين الله لا يوريكم لا تهزيئة أول ما يدخل و قبل ما يخرج...! رن جوالي و كان سعيد و على سيرة سعيد ترى بنتو مها بتملك الأسبوع الجاي..كان الموضوع بالسُكيتي و محد عرف إلا لمن عزمنا سعيد على الملكة..الله يوفقهم..طبعاً سعيد قالي إنو يبغى جود تجي و أنا اقترحت عليه يروح لها عشان تحس إنو من جد مهتم بها و يبغاها تجي و أصلاً لازم يروحلها كل فترة و التانية و يسأل عنها عشان تحس إنو صادق و يبغى رضاها...! رديت و أنا متحمس أعرف ايش سار لكن صوت سعيد المكتئب و هوا يرد على سلامي خلاني أقوم أدخل غرفتي و أقول بقلق:سعيد ايش فيك...؟! قال سعيد بيأس:خسرتها..خسرتها يا سعود خسرتها...! -مين...؟! -جود..جود معد تبغاني..أنا لازم أنسى إن عندي بنت اسمها جود..لازم أنسى..لازم...! سعيد كان صوتو تعبان و الحزن باين عليه،قلت:سعيد ايش فيييييه..أقلقتني...! قال سعيد بصوت متحشرج:تقول معد تحتاجني..استغنت عني بعد ما اتزوجت..تقول بيتها و دراستها أهم مني و يوم اتصلت عليها قالت.."سكت و كأنو مو قادر يكمل لكنو تابع بعد ثواني بتعب واضح"..سعود أنا مني قادر أتحمل..البنت كرهتني و معد هيا زي أول..تقول إنتا تعال حاول تكسب رضايا أنا تعبت منك و معد حفكر فيك و تقول ما حتدخل بيتي..يا سعود تقول كرامتها ما تسمح لها و ما تنزل نفسها لِي..البنت ذي اتغيرت..اتغيرت.."برجاء"..أبغا ك تصلح بينا يا سعود..ما أبغا أقابل ربي بذنبي ما بغا...! كنت مصدوم من الكلام إلي قاعد أسمعو...!،قلت و أنا مو هنا:جود قالت دا الكلام...؟! -سعود أنا حاس إني مخنوق..مخنوق و مو قادر أكتم..أرجوك يا سعود تصلح بينا أرجوك...! -ما عليك يا سعيد ما عليك..اترك الموضوع ليا...! فصلت و أنا أسمع ترجيات سعيد و تشكيه من جهة و من جهة تانية كلام جود الفظيع يزن و بشكل أقوى...! لبست ثوبي المعلق و مسكت جوالي و مفتاح سيارتي و خرجت و عند الباب قالت أمي:سعود..وين مروح...؟! -ها..لا بس صاحبي طاح بروح أطمن عليه...! قالت أمي بتعاطف:يا عمري..هيا لا وصلت طمني...! -إن شاء الله إن شاء الله...! و خرجت بسرعة و أنا أسمع دعاوي أمي ليا...! في السيارة كنت قاعد أحاول أهدي نفسي لإني كنت مطنقر؛كيف تتجرأ تقول لأبوها كده...؟!،أوكي غلط معاها لكن إنها تقولو معد أحتاجك و دراستي أهم منك و فوق هذا بكل قلة أدب و وقاحة تقولو إنتا تجيني مو أنا أجيك...! والله والله لو مو حامل كان ضربتها..أياً كان إلي سواه هذا أبوها و هيا إلي كانت زمان مصرة على كده ليش دحين غيرت رأيها...؟!،و بعدين كيف هذا الكلام يطلع منها..كيف...؟!،جود مهما كان مستحيل تجرح أحد أو تتطاول عليه فكيف لمن أبوها...؟! اتنهدت..الكلام طلع من جود طلع و من واجبي أوريها قيمة كلامها و أفهمها إنو هذا أبوها و إنها غصباً عنها رح تدخل هذا البيت إلي..مو من مستواها...! ^^^^^^^^^^^^^^^^^^^^^^^^ جود،،، كنا قاعدين في الصالة نتفرج على التلفزيون في الوقت إلي رن فيه الجرس..سعود جري للباب و قعد ينطنط بحماس:"مين..مين"...! علي:قومي شوفي...! قمت و أنا أقول:ما شاء الله عليك..هدي آخر مرة أشوف مين على الباب...! و إلي كان على الباب عمو...! ابتسمت و أنا أفتح الباب:أهلاااااااااان..ايش المفاجأة الحلوة دي...؟! اختفت ابتسامتي و أنا أسمع عمو يقول و هوا يمسك يدِّي:السلام عليكم..جود تعالي أبغاكي...! و سحبني معاه لمجلسنا تحت نظر علي المستغرب...! جلسني و جلس على كنبة بعيدة قدامي،سكت لثانية قبل ما يتنهد بقهر و هوا يضرب فخدو،قلت بقلق:عمو حبيبي ايشبك...؟! طالع عمو فيا بنظرة مرعبة و قال بنبرة غريبة:قليلة أدب...! -نعم...؟! قال عمو بهمس غاضب:تعرفي لو مو إلي برة و لو مو بطنك قدامك كان قمت عليكي ضرب...! صدمتني كلمات عمو..قلت و أنا على وشك أبكي:عمو ايشبك...؟! -ايشبي...؟!،ولا شي..بس طار عقلي من كلامك الوقح لأبوكي...! إشارات حمرا ولعت في عقلي..بابا في الموضوع...! قلت بتساؤل:ليش أنا ايش قلت لبابا...؟! وقف عمو و هوا يقول:"ولا شي"،اتقدم مني و قال بسخرية مؤلمة:والبيت إلي حضرة كرامتك مي مخليتك تتنازلي و تروحيلو حتروحيه غصباً عنك و رجلك فوق رقبتك...! طالع فيا لثواني قبل ما يقول بعمق:لو الأولاد كذة فربي مو حارمني...! و خرج من المجلس و خرج من الشقة من غير ما يرد على علي إلي قعد يسأل...! رجع علي دخل المجلس وقال:جود ايشبكم...؟! رفعت نظري لعلي و رفعت أكتافي:مادري...! اتغيرت ملامح علي و هوا يشوف دموعي الطارفة،جلس جمبي،قلت و دموعي مملية عيني:بس بابا في الموضوع..أكيد قال شي لعمو بس أنا ما قلتلو ولا شي..هوا جا هنا و كلمني بس أنا رديت عليه بأدب و ما اتكلمت بوقاحة...! قال علي باستنكار:متى جا و كيف ما تقولين لي...؟! -قبل أمس و إنتا في الدوام جا و قلي أروح عندو عشان ملكة بنتو و قلتلو مابغا أجي و فهمتو ليش رافضة بس هوا ما فهم أنا ايش ذنبي...؟!.."غطيت وجهي و قلت بصوت مو واضح من البكا"..ليش هوا مو عادي يزعل و أنا عادي...؟!،ليش لمن يزعلني و يضايقني محد يقولو شي بس لمن هوا يزعل... بكيت و ما قدرت أكمل...!،حسيت بالظلم..ليش يتبلى عليا..ليش يقولني كلام ما قلتو...؟!،قهر..قهر..قهر...! حط علي يدُّو على ظهري:جود خلاص لا تعبين نفسك عشانه...! رفعت راسي و قلت بقهر:كيف خلاص كيف...؟!،كيف و أنا دحين حروح غصباً عني بيتو..أكرهو و أكره بيتو..أكررررره بيتو..مابغا أروح هناك.."ضربت بقبضتي على فخدي بشكل متوالي و قلت و أنا أصر"..مابغا مابغا مابغا... مسك علي يدِّي و قال بشدة:جود بس...! طالعت في علي:أكرهو..علي..أنا أكره..بَا... سكت و أنا أنتبه لسعود الواقف عند الباب و يطالع فينا بحيرة و تساؤل..مسحت دموعي،قال علي و هوا يمد يدُّو:تعال بابا تعال...! جا سعود و جلس فوق علي وقال بتردد:ماما إنتي ايس بيكي..(ايشبك)...؟! قلت و أنا أقوم:ولا شي...! و رحت لغرفتي و أنا أتمنى من علي يمسك سعود لا يلحقني و يزن على راسي...! ********************************************** مقهورة من عمو و دمي فاير و كارهة بابا و مني طابقة أسمع صوتو..لا و متصل يأكد عليا أجي الخميس عندو عشان ملكة هانم مها..يووووه و هيا مالها مسكينة..ما سوت لي شي...! يا الله..حلم حياتي كان إني أدخل داك البيت بس دحين...! تعرفوا..أحس بشي جوتي..شي يخليني أكره نفسي و ما أطيق ولا أحد..حتى عمو مُستفزة منو و..زعلانة..كيف يصدق بابا...؟!،اتنهدت و أنا أفكر إنو محد فاهمني..الكل يبغى مني أرتمي في أحضان بابا بس أنا ما أقدر..يا ليت والله لو أقدر...!،تعرفوا كيف لمن يستخدمو تعبير:"طابت النفس"...؟!،أنا طابت نفسي من بابا..صح أقول أكرهو و مقهورة منو و ساعات أسبو و أشتمو لكن من جوتي كل إلي أبغاه منو إنو يسيبني في حالي و يبعد عن حياتي..ما أتمنالو الشر بس أبغاه ينساني و ينسى وجودي..زي..زمان...!،ايييييييو ة زي زمان..صح كنت أتألم لأنو ما يهتم بيا لكن بشكل عام كنت مرتاحة...! خرجت من أفكاري و أنا أسمع صوت شي يطيح،طالعت في أرض دولابي إلي واقفة قدامو و كان واحد من فساتيني طايح...! قفلت الدولاب و التفت لعلي إلي كان جالس على السرير و فوقو لابتوبي إلي شابك فيه اليو ا سبي حقو..قصدي حقي بس هوا استحلو و كان يكتب شي...! قلت:علي...! من غير ما يطالع فيا:نعم...! -علي بعد بكرة ملكة أختي و... صرخ علي:لاااااااء...! و قفل اللاب توب و حطو في نص السرير و انسدح و غطى نفسو لين راسو:تصبحين على خير...! ضربت الأرض برجلي:علييييييييييي...! قال من تحت الغطا:لأ...! -علي بليز ما عندي شي ألبسو...! طلع راسو:كل ذي الفساتين و ما عندك شي...! -علي أنا حامل...! -يعني أيام سعود ما اشتريتي...! -إلا بس ما كان فيه مناسبة فما اشتريت فستان...! -جود حبيبتي إنتي حلوة أي شي تلبسينه يطلع حلو...! قلت بزعل:شكراً مابغا منك شي...! و رحت و بعدت اللاب توب و انسدحت على ظهري،بعد شوية حسيت بيد علي،قلت بزعل:بعِّد يدك..إنتا أصلاً ما تعرفني إلا دحين...! قال بطفش و هوا يزبط البطانية:بعدِّل البطانية...! و بعد خمسة دقايق من التقلب قام علي و هوا يبعد البطانية عنو:أفففففف متى حتولدي...؟! -إنتا تعرف متى حولد...! -جود مو معقول..يعني حنقعد أربعة شهور على ذي الحالة..جود أنا كل يوم أقوم الليل بردان...! علي الفترة الأخيرة ساير يشتكي من بطني..يقول إنو بطني كبرت و سارت تاخد جزء من البطانية..أوكي كلامو صح لكنو سار يبالغ...! قلت بطفش:قلتلك خليك قريب مني عشان تكفي البطانية...! -بطنك تضايقني...! قلت بقهر:و قلتلك كمان نشتري بطانيتين صغار منتا راضي ليش عزاب على غفلة...؟! -أجل خلاص اسكت و اتحمل...! -أتحمل...؟!،أتحمل إني كل يوم أقوم مزكم و حالتي حالة..أربعة شهور هذي مو كم أسبوع...! قمت من السرير و خرجت من الغرفة و علي يقول:تعالي هنا..خلاص آسف كنت أمزح...! طنشتو و رحت لغرفة سعود و انسدحت جمبو،خليت راسو تحت يدِّي و كعادتو ما قصر و بشكل أتوماتيكي دفن وجهو في صدري...! بعد شوية دخل علي الغرفة و وقف جمب السرير متكتف:قومي...! حطيت راسي على المخدة و غمضت عيني على أساس أنام لكني ما حسيت إلا بيدِّين علي رافعتني،شهقت و قلت بهمس:نزلني...! -أششششش لا تصحين الولد...! و في غرفتنا جلسني على السرير و بعدها اتمغط:يدِّيييييييي...! -ما قلتلك تشيلني.."رفعت سبابتي"..و بعدين ما تقرب مني سامع...؟! جلس جمبي:أفااااااا..هذا و أنا متعني و شايلك من هناك...! -مو حضرتك مو عاجبتك النومة معايا..كان خليتني عند ولدي...! -ما أقدر..تتوقعين أقدر أنام و إنتي زعلانة مني..تتوقعي أقدر...؟! -ايوة ليش لأ..مو إنتا شغَّال طول اليوم منتا راضي تسويلي شي..أصلاً إنتا بس فالح تكسر لي خاطري...! قال علي و هوا يلعب بشعري:فديت خاطرك أنا..قوليلي ايش تبغي...؟! اتكتفت و لفيت وجهي بدلع:مابغا أروح عندهم إلا و أنا لابسة أحسن لبس...! لا تقولو سخيفة...!،حُطوا نفسكم مكاني..ناس أول مرة تدخلو بيتهم و كمان منتو عاجبينهم و شايفينكم "اِيوووووه"...! علي:بس مافي وقت يا جود بعد بكرة الملكة...! طالعت في علي و رجعت لفيت وجهي:مالي دخل..لو نقعد من الفجر لين آخر الليل في السوق..أهم شي ما أروح عندهم مقربعة...! استنكر علي:مقربعة...؟!،عمرك ما كنتي مقربعة..طول عمرك قمر و تجننين..بعدين أنا ما قلتلك إنك الحلى كله فمافي شي يطلع عليكي مو حلو...! قلت بصوت باكي:قلتلي عشان تبغى تنفك مني...! -أنفك منك...؟!،ليش مجنون..مين يدلع عليا و يرجني بعدين...؟! -مدري عنك..اسأل نفسك...! ابتسم:طب..أشوف ابتسامة...! قلت بدلع:لأ مابغا...! -لييييييش..ايش فيه كمان...؟! قلت بزعل:فيه إنك بعد شوية حتقعد تقولي متى حتولدي و متى حننفك من دي الحالة...؟! -شفتي هذا اللسان...؟! طالعت في علي،كان لامس طرف لسانو بطرف أصباعو،قال و هوا يغمض عينو ويفتحها:عساه القطع لو قال شي يضايقك مرة ثانية...! قطبت حواجبي:هيييييي..لا تدعي على نفسك...! ابتسم:تخافين علي جود...؟! ابتسمت و هزيت راسي:لأ...! -قولي جود قولي..قولي أخاف عليك...! رفعت بصري فوق:أفففففف يعني أبغا أفهم يعني..لو ما حخاف على أبو أولادي أخاف على مين...؟! -لااااااااا أنا كذة قلبي ما يتحمل..تبغيني أموت إنتي...! -الله يرحمك...! ضربني علي بقوة ورا كتفي،قلت بألم:آآآآآآي علي..حرام عليك حامل أنا...! -مو حرام عليكي أنا...؟! -هوا الرحمة بس للميتين..الله يرحمنا كلنا...! اتكتف علي و لف وجهو و قلد لهجتي:لأَّ أنا زعلااان...! قلت بحماس:علي يا حيوان زبطتني...! طالع فيا:حطي حيوان على جمب بعدين بحاسبك عليها بس ايش قصدك بزبطتني...؟! -لا بعدين تحاسبني على حيوان...! -غبية تستاهلين..كانت الكفة في صالحك بس قلبتيها و ذحين حوريكي مين علي من جد...! ابتسمت و قلت بثقة:أصلاً ما أهون عليك...! ********************************************** كنا أنا و علي في السوق و سعود حطيناه بيت أهل علي...! قلت:علي شوف داك المحل..أول دخلتو كان فيه ملابس حوامل حلوة...! -أففف جود..كبير مرة...! -يعني يا علي و إذا كبير..يلا عشان نخلص حتى أنا والله تعبانة...! -ايوة تعبانة...! علي مو مصدق إني تعبانة،يقول:"إنتي أصلاً مبسوطة باللفلفة"،يعني صح أحب اللفلفة في الأسواق لكني دحين تعبانة..والله تعبانة...! المهم..دخلنا المحل و كان في وجهنا شاب لابس يوني فورم المحل،كان صغير مرة..يجي حق 18 سنة و بااااااين إنو سعودي،قال علي:لو سمحت فين قسم الحوامل عندكم...؟! قال الشاب بفجعة استغربناها أناو علي:قسم مين...؟! قال علي بملل:حوامل...! حاول الشاب يتدارك نفسو و قال و هوا مسوي فيها رسمي:للمدام...؟! علي:لا لي أنا..مقاسي اكس اكس لارج..عندكم...؟! كتمت ضحكتي،والله يحزن دا الولد..مفجوع و مو عارف يتصرف...! قال الشاب بتوتر و تأتأة:إِ..إذا كنت حامـ ..قصدي لو يعني..احم احم..احنا..احنا عندنا كل المقاسات يعني حتى لو الوحدة كانت حامل مرة..يعني مرة حامل... قطعو علي بطفش:وين القسم...؟! -ها..ايوة هواااااا..هناك هناك...! رحنا وين ما أشر لنا الشاب و لمن مشينا قلت:علي ليه كده..حرام فجعتو...! -حرام عليه هوا طفشني..يقولي إذا كنت حامل و آخرتها يقول حامل مرة..أبغا أفهم ايش يعني حامل مرة...! ما رديت على علي و أنا أتفحص الملابس و أتفحص أسعارها...! مسكت واحد عجبني،كان بسيط و لطيف كده بس غالي مرة،رفعت راسي و شفت مكتوب "new arrival"،قلت خليهم ينقلعو..و يعني ايه نيو آرافيل..أروح أشوف شي تاني...! اتجهت لفستان أبيض سادة قماشو ناااااااااااعم،فيه شريطة ذهبية من تحت الصدر تنربط من ورا،لفيتو أشوف و اتفاجأت برسمة كانت بالذهبي و الخطوط متقطعة ورفيييعة..لمن دققت في الرسمة كانت لوحدة حاطة يدها على بطنها وتبتسم ابتسمت حسيتها أنا كانت الرسمة مرة كيوت..أكيد تعرفو الرسم البسيط وإلي الملامح تكون مي واضحة...! ناديت علي و قلت:علي شووووووف...! مسك علي الفستان و قال بسخرية:ايش هذا..ثوب و لا غترة...؟! -علييييييييي...! -و أنا أدري..قُماشة بيضا..ايش تبغي فيها...؟! لفيت الفستان:شوف الرسمة..علي أنا أبغاه..مرة كيوت...! -لأ...! -ليش الغلاسة...؟! -مو عاجبني...! -علي بليز أبغاه..نفسي... قطع كلامي يد انمدت من ورايا و مسكت الفستان و:لو سمحت هذا بكم...؟! التفت أنا للبنت الطويلة إلي كانت حاطة فول ميك أب و تتكلم بثقة،قلت:بس أنا أبغااااااااه.."التفت لعلي"..علي أنا أبغا دا الفستان...! سحب علي الفستان من يد البنت:لو سمحتي زوجتي مسكت الفستان قبل...! ابتسمت البنت بشكل استفزني و قالت:عشان خاطري..علي...! شهقت و أنا أسمعها تنطق اسمو بدلع لكن علي ما سمحلي بإظهار أي ردة فعل لمن سحب الفستان بعفاشة و مسك يدِّي و مشاني معاه للكاشير:تعالي يا روحي بلاش نقعد وسط زبايل...! وصلني صوت البنت و هيا تشتم لكني كنت أفكر بشي تاني...! علي مستحيل يمسك يدِّي في مكان عام أو يقولي كلمة حلوة قدام الناس لكنو كسر القاعدة إلي حطها لنفسو قبل شوية بس عشاني..بس عشان يرضيني...! ابتسمت و احنا نخرج من المحل..ابتسمت رغم كلام علي الغاضب و بربرتو..ابتسمت رغم شتائم البنت إلي انهالت على مسامعنا..ابتسمت و أنا أحط رجلي برة المحل و أسمع:"إنتو الزبايل"...! تعرفو..في ناس تستاهل إني أدور رضاها و في ناس ما تستاهل حتى إني أعترف بوجودها...! ^^^^^^^^^^^^^^^^^^^^ و في السيارة عند بيت أهل علي _عشان ناخد سعود_ نزل علي الجوال و قال:أمي تقول ننزل نتعشى معاهم...! قلت بتعب:ما فيا حيل...! -ايش إلي ما فيكي حيل..انزلي يلا...! نزلت و أنا أتأفف و عند الباب اتعطرت،مديت لعلي:تبغى...؟! -لا يا شيخة...! رجعت العطر للشنطة و أنا أقول بطفش:يعني ايش فيها...؟! قال و هوا يدق الجرس:فيها إنه عطر نسائي...! فتحت أحلام الباب،سلمنا عليها و دخلنا،و من بعيد جا سعود يجري..وقف قدامي:ماما...! ابتسمت و أنا أشيلو:نعم...! مشيت و جلست على كنبة من كنبات الصالة و جلست سعود فوقي و أنا أسمعو يقول:وين لحتي..(رحتي)...؟! -رحت السوق...! -لييييييييييس...؟! ضحكت بسبب طريقة سؤال سعود..سألني بتذاكي و كأنو مكتشف شي،كنت حجاوب لكن لينا جات،سلمت عليها و أنا أسمعها تتشكوى:جود سعود ما يخليني ألعب بالجيم بوي...! -واااا..ليه يا سعود ما تخليها تلعب معاك...؟! -ماما هيا دلبتني...! -ليش ضربتيه يا لينا...؟! -عشان..طب ما... قاطعتها:أول شي الضرب غلط ما ينفع نضرب،تاني شي يا سيد سعود لمن أحد يغلط عليك خليك أحسن منو و لا تفتري بجيم بويك و دحين قومو عني الاتنين لإني تعبانة و مني فايقتلكم...! بعدو عني و هما يتناقشو و بعد مدة جات عمتي،سلمنا عليها أنا و علي،قالت و هيا تجلس:أشوة إنك جيتي كنت بسألك...! ابتسمت و كنت حقول:"في ايش" لكن علي قال بعنطزة:غصباً عنها تجي...! طالعت في علي مستغربة أما عمتي فقالت باستنكار:لا مو غصب..لو تعبانة و لا عندها شي محد بيغصبها...! رددت ورا عمتي زي الهبلة:صح صح محد بيغصبني "تابعت" بعدين إنتا ليش مصر إني شريرة...؟! -لإنك منتي طيبة...! طنشت علي و قلت لعمتي:ايوة عمة..عن ايش كنتي بتسألي...؟! -كنت بأسألك عن طبيعة الملكة بكرة...! يووووووه هيا بالله دحين بايش أجاوبها...؟! قلت:والله مدري بس هيا عائلية...!،بس مين حيجي معاكي...؟! -أنا بس...! -ليش...؟! -ولا وحدة فيهم راضية تجي و أصلاً أنا ما بطول بس بسوي الواجب و أمشي و لو عليا ما بروح...تعبانة و مني عارفة حتى ايش ألبس...! اتكيت على ظهر الكنبة:أصلاً أنا نفسي بابا ما قلي إلا بداية دا الأسبوع و سارت لخبطة و مني عارفة ايه و اليوم لفلفت و بطلعة الروح لقيت شي عدل..السوق يا عمة شي قرف..مافي ولا حاجة..مدري يعني أذواق الناس اتغيرت و لا ايه..و فوق دا مرة غليت الأشياء...! -من جد غليت و على ولا شي..والله رحت قبل كم يوم و سألت عن سعر بلوزة..قلي 500 قلت ليش مرة كذة غالي قال لاااااا هذي حرير أصلي..اتحسستها قماشها حار..قمت مشيت إلا حضرته يناديني:تعالي تعالي عشانك بـ400..طنشته..أنا أعرف الحرير..كذاب واحد...! -أنا سمعت إنهم يشتروها بقروش و يزودو أصفار عاليمين..يعني لو كانت البلوزة بـ25 قرش..يزودو صفرين تسير بألفين و خمسمية أو صفر فتسير بميتين و خمسين...! -والله يا حبيبتي مي بعيدة..لإني من جد أشوف أشياء بألف و حقها مية...! قلت بقهر:والله أنا كمان أول اشتريت جينز بميتين تقريباً و كنت فرحااااااانة فيه و عمو يا بنتي غالي ما يستاهل بس أنا سويت حفلة و هليلة لين ما اشترالي و بعدها رحت الهرم و لقيتو بـ60..بغيت أنجن..بس مسكت نفسي و قلت للرجال:ليش دا بستين أنا متعودة أشتري من عندك بتلاتين قام قلي... قاطعني علي:و ليييييييييييييش تكلمين الرجال...؟! طالعت في علي بطفش:قبل ما أتزوجك..قبل ما أعرف إنو في أحد في الوجود اسمو علي حيتزوجني...! صرخ علي:ولو..سعود كيف يخليكي لحالك..و بعدين تناقشين الرجال ليش...؟! دخل عمي الصالة و قال بغضب:يعني الواحد ما يعرف يروق في بيته...؟!،و بعدين هذا حالكم بعد كم سنة زواج..وش بتسوون بعد عشرين..خمس و عشرين سنة...؟! سكتنا أنا و علي متفشلين..عمو دايماً يهزأنا..دايماً...! قالت عمتي بابتسامة رزينة:ايييييوة يا جود كملي...! ابتسمت بحرج:ما..ما..خلاص اتفشلت..أحس مال أمي داعي لو اتكلمت...! ابتسم عمو:لا لِك داعي بس تعالي سلمي...! رحت و سلمت على عمو و بست راسو،قال علي:أبوية...! -نعم...! -لييييش أحس إنك تحب جود...؟! شهقت و اتخصرت:وليش ما يحبني إن شاء الله...؟! طالع عمو فيا بانزعاج من صراخي،ابتسمت بهبالة:هيهيهيييييييي...! رجع عمو يبتسم:أحد يكون عنده جود و ما يحبها...؟! قلت بفرح:وي عمو حبيبي..فديتك...! علي بقهر:ايوة طبعاً..مو حضرتها ملاك يمشي على الأرض قدامكم بسس نرجع البيت كوووول البلاوي تطلع...! اتخصرت:وليش معترض يا روح أمك..متزوجتك عالفاضي أنا...؟!،تبغاني أخرب برستيجي و أطلع بلاويِّا قدام الخلق...؟!،لا لو سمحت أنا إنسانة هبلي و تخلفي لا يتعدى حدود بَيتي...! و رجعت أجلس مكاني وسط ضحكة عمو و اعتراضات علي و أنا مبتسمة...! حلو..حلو الجو هنا..أم و أبو و أخوان..الجو هنا في بيتهم حلو..حلو بالمرة...! ********************************************** كنت لابسة الفستان و قاعدة قدام التسريحة أتمكيج،و بعد ما خلصت لبست طقم دهب ناعم عندي،حلق و سلسلة و اسورة،الحلق كان شكلو كده خط..خط واحد و السلسلة كمان و الاسورة عادية ما فيها شي،في يدِّي اليسار لبست ساعة ذهبية بس للأسف ما كانت تلمع زي الطقم لإنها مي دهب من جد..هيا من سواتش..و لبست كمانت صندل دهبي و طوق دهبي سويتبو "بف" و نزلت قصة..و كان شكلي..حلو...! طالعت في علي إلي خرج من الحمام،قلت:خلاص أنا جاهزة..توبك هناك معلق...! ابتسم علي و هوا ينشف يدِّينو في بلوزتو:أنا يا جود..ايش هذا الجمال...؟! ابتسمت:الجميلات للجميلين...! -أقول... -قول... غمزلي:نطنش الملكة...؟! ابتسمت و قلت و أنا أرفع أكتافي:والله على قلبي زي العسل بس عمو بالغصيبة رضي أروح بعد العصر بغاني أروح بعد الظهر كمان...! -بأقوله داخت و أتحداه يفتح فمه بكلمة...! قطبت حواجبي:لا تتكلم عن عمو كده...! قال علي ببساطة:آسف..حسبتك زعلانة منه فأخذت راحتي...! قلت و أنا أروق التسريحة:زعلانة منو مو حاقدة عليه...! في شي لازم كلكم تفهموه..أنا صح زعلانة من عمو..زعلانة و بقوة بس هدا ما يعني إني ممكن أسمح لأحد يتكلم عنو بطريقة وحشة..عمو هوا عمو..زعلانة منو أو راضية عنو أحبو...! قرب علي مني و قال برجاء:جود الله يسعدك و الله من زمان عنك متشيكة...! اتخصرت:ايش قصدك يعني...؟! ابتسم:لا بس إنتي ذي الفترة مشغولة بأبوكي و عمك فمطنشتني شوية..بعدين أنا ما بسوي شي بس..بطالع فيكي...! -لا صدقتك بس بتطالع فيا...! -جود بلا بلاهة...! ابتسمت:طيب من عيوني بس على شرط..بعد المغرب نمشي على طول...! هز راسو:حااااااااااااااااضر... ! بالله عليكم أروح من العصر و أقعد هناك طفشانة ولا أقعد مع زوجي وأبسطو..بالله عليكم ايش أحسن...؟! ابتسمت:طب ممكن طلب...؟! -إأْمري لا تطلبي...! -ممكن أروح أنبه سعود لا يعدم نفسو و أقولو إننا حنمشي بعد المغرب...؟! انحنى و مد يدُّو للباب:تَفضلي...! ابتسمت و مسكت فستاني بيدِّيني و سويت زي ديك الحركة في الأفلام..لمن البنت تحي أحد و قلت بلطف:شكراً...! و اتجهت للباب بابتسامة..بلا بابا بلا نيلة...! ************************* | |||||||||
|
| |
|
06-03-14, 04:52 AM
| #23 | |||||||||
| نجم روايتي ومشرفة سابقة وفراشة متالقة بعالم الازياء
| الجزء التاسع (أنانيةُ مُخطئ و غيظُ مظلوم) في السيارة،،، عند باب بيت بابا وقف علي السيارة و أول ما وقفها حسيت إنو غباء مني إني سمعت لعمو و جيت،قعدت أشتم نفسي...! قال علي:يلا جود ننزل...؟! طالعت في علي بعدين طالعت في البيت من الشباك..كان فيلا...! هدا البيت إلي كان المفروض أعيش فيه 20 سنة،هزيت راسي أبغى أنفض كل الأفكار إلي جاتني،قال علي:جود.. التفت لو و قلت بهدوء:نعم...! -إنتي..ما قد جيتي هنا ولا...؟! -لأ ما قد جيت...! -طب..ننزل...؟! قلت و أنا أفرك يدِّيني:ما..مدري...! مسك علي يديني و شد عليها،التفت لو،كنت كاشفة وجهي لإننا خلاص قدام البيت و مافي في الشارع أحد الشي إلي خلَّى ملامحي تبان لعلي إلي ابتسم و قال بنبرة مطمئنة:عمك ما حدد الوقت..مو لازم تطولين...! و مد يدو و حطها تحت عيني اليسار:و مو لازم تخربين مكياجك...! بحرص شديد وقفت دموعي إلي كانت تهدد بالنزول..ما حسيتَ بَّها...! قلت برجاء:علي ممكن ما تسيبني إلمن ما يجو الرجال...؟! ابتسم و همس:و أنا أقدر أسيبك...؟! فجأة نط علينا سعود:ماما هدا بيتهم...؟! -ايوة حبيبي...! قال علي بغيض من ورا أسنانو:ولدك هذا عنده هواية يخرب علينا...! ابتسمت و أنا ألتفت لسعود:زي ما فهمتك بابا خليك هادي و عاقل..طيب...؟! -تِيب...! نزلنا من السيارة،مسك فيا سعود:ماما سيليني...! -ما أقدر حبيبي..تعبانة دحين...! -لا مو تبعانة...! علي:سعود ماما ما تقدر تشيلك كل شوية..تتعب بعدين...! -تب..(طب)..إنتا سيلني...! -ليش نونو إنتا..ما تقدر تمشي...؟! قال سعود برجاء:بااابااااااااا...! شال علي سعود و قال و هوا يحك خشمو بخشم سعود بمداعبة:إنتا ما تبغى تطلع رجال يعني..ما تبغى...؟! ضحك سعود و ضحكت أنا..ضحكة سعود كانت تجبرني أضحك...! اتعطرت و عطرت سعود إلي كان علي قاعد يزبطلو الشماغ الصغير على راسو...! قال علي و هوا يمد يدُّو للجرس:ادخلي برجلك اليسار و قولي اللهم إني أعوذ بك من الخبث و الخبائث...! ضحكت:يا لئيم...! انفتح الباب..إلي فتحو كان عبدالإله..وسع فتحة الباب و هوا يقول ببرود:أهلاً..اتفضلو...! دخلنا و قلبي كان يدق دق مو طبيعي و أنفاسي اتسارعت و كنت مانعة عيني من إنها تجول عالمكان و كنت مانعتها كمان من إنها تدمع لإني كنت حاسة بالخنقة و الضيقة...! قال عبدالإله:تعالو...! و مشينا ورا عبدالإله إلي ودانا لصالة فيها بابا و عبد الرحمن و..عمو..عمو إلي وقف و قال بابتسامة:أهلااااااان..ما بغيتو تجو...! و سلم عليا و أقول سلم لإنو أنا ما بستو و لا حتى اتحركت من مكاني..هوا إلي جا و حضني و باسني،بعدها اتخصر و قال بمزاح ما بلعتو:إنتي قلتي حتجي بعد العصر..ايش إلي جابك بعد المغرب...؟! طالعت في عمو لثواني بعدها أخفضت بصري و أنا أفك طقاطق العباية إلي مديتها لعمو بصمت...! قطب عمو حواجبو،قلت:علقها لو سمحت لأنو ما أعرف وين مكان العلاقة...! مسك عمو العباية:أووه طيب.."مدها لعبدالإله"..عبدالإله مكن تقوم تعلقها...؟! عبدالإله بطفش:أففففف يعني ما تعرفي تلفيها و تحطيها جمبك...؟! طالعت في عبدالإله..ناقصة أنا...؟!،لكني أخدت العباية من عمو و لفيتها و قعدت على كنبة و حطيتها جمبي...! اعترض الكل فقام عبدالإله بتأفف و سحب العباية من جمبي و راح يعلقها...! عمو:وي..قومو سلمو...! اتحرك علي إلي ماسك سعود في يدُّو و سلمو الاتنين على الموجودين أما أنا فما اتحركت من مكاني الشي إلي خلى عمو يطالع فيا بنظرة غريبة...! أخفضت بصري و عطلت أذني..مابغا أشوف و مابغا أسمع...! بابا:الله يا جود..أبوكي مالو بوسة...؟! مادري هل أنا حساسة و لا صوت بابا مستفز...؟!؛لإني أحس بنار جوتي...! جلس علي جمبي و حمبو سعود،حط علي يدُّو على الكنبة ورا أكتافي و قال:والله جود تعبانة ما تقدر تقوم...! طالعت في علي مستغربة،ابتسم لي و رجع يطالع فيهم و في عمو بالتحديد:هيا كانت جاهزة من العصر بس أنا منعتها لإنها كانت تعبانة...؟! عمو بقلق:ليش جود ايشبك...؟! عشان أكون صريحة معاكم حقولكم إنو نبرة عمو القلقة أسعدتني و طمنتني إنو عمو ما قلب عليا كليا...! طالعت في عمو و أنا أسمع علي يقول:ولا شي..خرابيط حمل...! جا عمو و جلس جمبي و قال و هوا يمسح على ظهري:والله معليه حبيبي..علبالي إنتي متعمدة تتأخري..بس المهم إنك دحين أحسن..صح...؟! سكت و ما قلت شي...! يا الله ليه مني عارفة أتكلم...؟!ليه أحس إنو دموعي طارفة و إنو أي أحد بسهولة ممكن يبكيني...؟!،و بعدين حلقي يعورني و... قطع حبل أفكاري يدِّين على أكتافي و بوستين على خدِّي و:سلامات والله..والله من جد حملتهُ كرها..أنا أحمد ربي إني رجال عشان دا الموضوع...! رفعت راسي..كان عبدالرحمن و كان كالعادة مبتسم..بعدها قام بابا و سوا نفس إلي سواه عبدالرحمن و قال:سلامات يا بنتي..ليه ما كلمتيني و قلتيلي إنك تعبانة...؟! ما عرفت بايش أرد لكن علي ما قصر لمن قال:والله يا عمي ما كلمت حتى سعود تبغاها تكلمك إنتا...؟!،بعدين ايش كان ممكن تسوي..تأجل الملكة و لا تعفيها من إنها تجي...؟! بابا انصدم لكن عبدالرحمن قال بمرح:لا طبعاً نأجل الملكة لإنو ملكة من غير جود ما تسوى شي...! علي:لااااا صدقني أحسن لو يعفيها لإنو جود ما تحب المناسبات..صح جودي...؟! التفت لعلي إلي كان مبتسم ليا و مسترخي عالآخر...! ما رديت و اكتفيت بإني أخفض بصري..الله يستر..علي ناوي يطلع لهم قرون اليوم و لا من متى علي يدلعني و يجلس قريب مني و يعاملني بلطف قدام الناس...؟!؛علي بالعادة يعاملني كأني أختو و لا صحبتو قدام الناس...! رجعو بابا و عبدالرحمن جلسوا،قال عبدالرحمن:إلا جود..إنتي في الشهر الكم...؟! رفعت راسي و أنا أفكر إنو سؤال زي دا على ما حيقدر يجاوب عليه،قلت بصوت منخفض هادي:نص الخامس...! -ايش...؟! عمو بضحكة:وي جود..بالعادة تلعلعي..ايشبك...؟! عليت صوتي:نص..الخاااامس...! عمو:اييييوة..هاذي جودة إلي أعرفها...! سحبت نفس..ايش هدا..مني عارفة أضحك و لا حتى أبتسم..يا عالم البيت دا خانقني و كاتم على نَفَسي...! بابا:يلا..تقومي بالسلامة إن شاء الله...! يا نااااس..يا عااااالم..سكتووووه..قولو لو يسكت..صوتو يستفزني...! حط عمو يدُّو على خدي و قال بقلق هادئ:جودة حبيبي فيكي شي...؟! طالعت في عمو و أنا أقول في نفسي:"زي ما أجبرتني أجي هنا طلعني،أنا مخنوقة ليش منتا حاسس بيا..ليش معد إنتا فاهمني زي زمان..ليش..ليش...؟!"...! قال عمو:جود إنتي حارة.. حط علي يدُّو بسرعة على جبهتي..قال بعدها:مي حارة ولا شي..الله يهديك يا سعود فجعتني...! ابتسم عمو:كنت حقول شوية بس إنتا ما خليتني أكمل...! عبدالرحمن:ما شاء الله جود..إنتي محاطة برجال يحبوكي من كل جانب...! طالعت في عبدالرحمن مستغربة،قال بابا:ولد..استحي على وجهك...! بعدها طالع فيا و ابتسم:جود تعالي أوريكي البيت...! ركزت نظري على بابا و قلت بسرعة:لأ مابغا...! -ليش...؟! -ما..ما..ما أقدر أطلع درج...! ابتسم بابا:طب بس الدور الأرضي...! يا ربي رحمتك و لطفك..يا رب..ما حقدر..ما ما حقدر...! بابا:و لا أقولك خلاص بس تعالي عشان تسلمي على أم عبدالرحمن...! لاااااااااااااااا..كمان أسلم عليها..ما حقدر..من جد ما حأقدر...! كنت حقول أي شي عشان أتهرب لكن منعني سعود _الجالس جمب علي_ من الكلام لمن وقف و اتجه ليا،قال و هوا حاط يدو على راسو:ماما سيليه...! سعود كان مبرطم و هادي بغرابة لفيت يديني حولو و قربتو مني:ليه أبوية الشماغ حلو عليك...! ققال و هوا على وشك يبكي:ما أبغاه...! علي:ليش ما تبغاه...؟!،حلو عليك...! شوية ما أدري إلا بسعود يبكي و يشهق شهقات صغيرة متقطعة:ما..ما..ماما... انفجعت أنا و علطول شلت سعود و حطيتو فوقي و خليت راسو على صدري،بعدت الشماغ عنو و حطيتو على فخود علي إلي انحنى بقلق:سعود بابا ايشبك...؟! الكل سأل عن السب..أفففففففففف..بجد مني فايقتلهم...! لفيت يديني حول سعود و دنقت راسي عليه و قلت بهمس و أنا أبوسو:ليه حبيبي ليه تبكي...؟! رجع علي شعري من جهتو ورا أدني عشان يقدر يشوف سعود،حط علي يدُّو على جبهة سعود و قال بقلق:كأنه مسخن...! قال عمو بقلق و هوا يحط يدو على رقبة سعود:ايوة الله مسخن...! بابا:نجيبله فيفادول...؟! رفعت راسي:لأ..هوا بس..بس مستنكر المكان و زعلان..لو نام حيصحى كويس إن شاء الله...! عمو:و ليش زعلان...؟! طالعت في عمو..وجهي كان قريب من وجهو..أخفضت بصري..مادري ليه ليش ما قدرت أطول أطالع فيه..قلت:عادي..مستنكر المكان و متضايق...! انحنى عمو عليا على أساس بيفحص سعود لكنو همس لي من غير محد يحس:"طيب حبيبي لا تقولي كده عشان أبوكي لا يتحسس"...! بابا لا يتحسس..بابا لا يتضايق..بابا لا يزعل..بس جود تاكل تتتبن في وجهها عادي...!!!! و أعتقد إنو عمو استغرب احمرار وجهي المفاجئ...! عبدالرحمن:تبغي أطلعو فوق ينام...؟! وقف عبدالرحمن و جاني،مد يدُّو عشان يشيل سعود،فقال سعود بانزعاج طفولي و هوا شبه نايم:لُوح (روح) إنتا..أبا مامي...! شديت يدي على سعود:خلاص حبيبي خلاص...! طالعت في عبدالرحمن و أجبرت نفسي على الابتسام:ما حيرضى يجي...! عمو:جود والله شكلو تعبان...! بابا:ايوة الله يا بنتي..أعطيه مسكن عالأقل...! قلت بقهر:ولدي و أعرفو..في حالة زي كده ينام و يصحى يسير كويس...! سكت عمو بس بابا طالع فيا بنظرة كأني أنا الهبلة إلي مني فاهمة...! قعدت أمسح على سعود عشان يهدى و يرجع ينام...! محد كسر الصمت إلا عبدالرحمن إلي قال:ساعات بناتي كذة يسيرلهم..يزعلو فيسخنو..ينامو و يصحو كويسين يعني صح كلامك يا جود ما يحتاج خافض حرارة...! قال عمو بابتسامة حلوة:صح..حتى إنتي يا جود كنتي كذة تسوي...! حسيت بالألم لإني اتذكرت كيف كانت طبيعة علاقتي بعمو قبل و قارنت بين أول و دحين...!،من يوم ما بابا دخل حياتي و على أساس رضي عني علاقتي بعمو ساءت...! قهر..قهر لمن يجي واحد و ببساطة يخسرك أعز إنسان عندك و إلي يقهر أكتر إنو يشوف إنو ما سوى أي شي...! طالع بابا في ساعتو بعدها وقف:نصلي العشا جماعة هنا عشان نبدأ نستقبل الناس...؟! وقف عمو:ايوة صح..أكيد الناس بعد العشا حتبدأ تجي...! عبدالرحمن:احمد ربك ما جُوك من المغرب...! وقف علي:طيب جود أنا بروح أصلي..طمنيني على سعود...! عمو و هوا مقطب حواجبو:بتصلي معانا ولا...؟! علي:لا بصلي في المسجد القريب...! عمو:لا معانا عشان تستقبل الناس...! -و أنا مالي فيكم...؟! أعطى عمو علي نظرة فسكت الأخير بانزعاج...! خرجوا الرجال من الصالة و قعدت أنا لوحدي مع سعود النايم في حضني و الزعل باين على ملامحو...! سعود اسم الله عليه نبيه و حساس..لو حس إنو الجو متوتر يتضايق و ترتفع درجة حرارتو..زي دحين يعني...! إن شاء الله ينام و يرتاح...! ^^^^^^^^^^^^^^^^^^^^^ طبعاً أكيد تعرفوا إنو الرجال دايماً يجو قبل الحريم..فبالتالي علي راح يقعد مع الرجال إلي جو و على كل حال ما جو إلا المقربين و على فكرة ترى جو حريم..أعتقد يسيرو خالاتهم و عماتي كمان جو..و إلي يقهر إنهم اتوزعوا على البيت و بدأو يساعدو على أساس إنهم قريبين..أوكي صح لازم يساعدو بس مو يتركوني لحالي..حاسة نفسي غلط..أفففففففففففففف...! كنت قاعدة أحاول أشغل نفسي بسعود النايم،كنت مدنقة راسي عليه أبوسو و أشم ريحتو..لكني رفعت راسي على:جووووود...! كانت سارة،قالت:والله دوبهم قالولي إنو علي زوجك راح..سوري سبتك...! و جات و سلمت عليا من غير ما أقوم بسبب سعود النايم في حضني،جلست جمبي و قالت بهمس:ترى بالغصبة قدرت أشرد من ماما..من شغلة ورا الثانية..من جد تعبت...! ابتسمت:مع إنكم مو متكلفين...! -احنا مو بس مو متكلفين..على فكرة تراه بس عشا و إلي عزمناهم يتعدوا....! -أريح لكم...! -بس مادري كيف الناس ساروا كثيرين و فجأة لقينا نفسنا آآآآخر شياكة..كنا على أساس حتخلي الملكة بسيطة بس فجأة قلبت ملكة و معازيم و فساتين...! -احنا كده ما نقاوم نقعد من غير بهرجة و فشخرة...! -من جد..! بعدها قالت بحماس:جوووود..إنتي في بيتنا.. قصدي في بيتك و بيتنا...! متحمسة...؟!،والله من جوتي يا سارة مخنوقة...! ابتسمت مجاملة،قالت و هيا تمسك يدّي:تطلعي تسلمي على مها...؟! -لالا...! قالت بخيبة أمل:لييييييييش...؟! -حبيبي ما أقدر أطلع درج...! -طب..أنادي أخواتي يجو يسلمو عليكي...؟! -لا خليهم يمكن أمك تحتاجهم...! -عادي يقولولها نبغى نسلم على جود و يجو يسلمو و بعدين يرجعولها...! -لا حبيبي خلاص مالو داعي...! اتنهدت سارة بعدها قالت بهدوء:جود ترى ماما ما حتتضايق لو جو سلمو عليكي...! اتنهدت:الشغلة مو شغلة تتضايق..أنا حطيت نفسي مكانها و اتخيلت علي يجيني ببنتو و أنا مني مقصرة معاه في شي..شي يقهر...! -طيب إنتي حطيتي نفسك مكانها و هذا شي كويس..لكن ما سألتي نفسك:ممكن تحرمي وحدة من إنها تحضر ملكة أختها بس..عشانها تذكرك بإنو زوجك خانك أو ظلمك أو غلط عليكي...؟! سكت و ما عرفت بايش أرد عليها و انتبهت إني ما أعرف سارة إلا كبنت كتكوتة تحاول تتقرب مني...! قلت:سارة إنتي كم عمرك...؟! ابتسمت:أنا قدك ناقص اتنين...! -ليش ما تقولي يعني...؟! -عشان للجدران آذان و أنا ما أحب أحد يعرف عمري...! ابتسمت:محد يلومك..مو هُمَّا الناس يا يصغروكي و يطقوكي عين عشان مو باين عليكي كبرك..يا يقولو شكلك أكبر و هدا شي يقهر...! هزت راسها:عشان كذة ما أقول...! بعدها قامت:بروح أشوف ماما شكلها تنادي...! و راحت سارة و بعد شوية مادري إلا بسارة و أختينها إلي أكبر منها و أمها،اتفاجأت و اتوترت،حطيت سعود النايم على الكنبة و وقفت..قالت أم سارة:أوه جود..أهلاً...! ما قدرت أقرأ أي مشاعر على وجهها..طيب على الأقل أحسن من إني أشوف حقد أو كره...! و اتقدمت أم سارة و سلمت عليا..و الغريب..الغريب إني لقيت نفسي أهمس لها من غير ما أحس:"آسفة لو كان وجودي ضايقك بس أنا ما جيت بإرادتي"...! ابتعدت عني مصدومة و مستغربة..هزت راسها و كأنها تنفض شي بعدها قالت:تبغي تطلعي تسلمي على أختك فوق...؟! هزيت راسي بلأ،طالعت في سعود:سعود...؟! طالعت في سعود النايم:ايوة...! -كبر ما شاء الله...! حاولت أبتسم..يا ربي ايش دا التوتر و الخوف و ليش قلت إلي قلتو...؟!،طب لو ما كانت متضايقة و أنا قلتلها إني جيت مو بكيفي...؟!،لالالا أكيد متضايقة..بس لو ما كانت...! -جووووووووووووووووود...! رفعت راسي،كانت أختي الكبيرة المتزوجة،قالت:ليا ساعة أنادي..وين وصلتي...؟! كانت مبتسمة،قلت:ها..لا بس كنت قاعدة أحاول أتذكر اسمك...! يووووووووووووه..يلعن أبو التصريفة..غبية يا جود غبية..ايش إلي أحاول أتذكر اسمك...؟! ابتسمت:خلود يختي..اسمي خلود...! قالت التانية:و أنا منى لو منتي فاكرة كمان...! و جات خلود و سلمت عليا و بعدها منى...! قالت أمهم:تبغي تطلعي سعود ينام فوق...؟! -لا ما... قاطعتني:ترى ما فيها شي و بعدين الناس بتبدأ تجي ما يسير ينام هنا...! قلت و أنا أتظاهر بالهدوء و عدم التوتر:لو مضايقك أصحيه...! نطت سارة:مو عن كده..ماما قصدها الناس حتضايقو بصوتها...! ابتسمت لـ"سارة":أحسن برضو..عشان ما يتعبني في الليل...! اقتربت سارة من سعود،قلت بسرعة:لا الله يسعدك...! طالعت فيا مستغربة فقلت:حيخاف..لازم أنا أقومو...! قالت برجاء:طب قوميه..والله اشتقتلو...! رحت و جلست و شلت سعود و جلستو فوقي:يلا حبيبي تقوم...؟! لف يدّو حول رقبتي و أستد راسو على كتفي وقال من غير ما يفتح عيونو:مااااامي...! قلت و أنا أمسح على ظهرو:يا عيون مامي..يلا قوم..شوف سارة من أول تبغاك تقوم...! قال بدلع:مابغا..ما أحبها...! سعود كان شبه صاحي عشان كده كان يرد عليا،شهقت سارة:ما تحبني يا سعود...؟! قال سعود بزعل و هوا دافن وجهو فيا:ماما غسلي وزهي..حتيلي عتل (وجهي..حطيلي عطر)...! ضحكت:طيب بس قوم...! -ما يسوفوني...؟! -وي سعود..يعني أقولهم روحو عشان سعود...؟! سارة:ايوة عادي نروح عشان ما نشوف حضرة سعود...! قالت أمهم:يلا بنات ورانا شغل.."بلهجة آمرة"..سارة..إنتي اقعدي هنا...! و راحت و وراها خلود و منى و جلست سارة جمبي،بعدت سعود عني و وقفتو قدامي،كان يطالع في سارة المبتسمة لو،كانت نظرتو تضحك و مع عينو المنفخة سار تحفة...! طلعت من شنطتي قارورة موية و حطيت في يدّي شوية و شطفت بها وجه سعود..طلعت حبة بولو و حطيتها في فم سعود إلي قعد يمصها و هوا يطالع في سارة بنظرة طفولية مثيرة للضحك..طلعت عطر و عطرتو...! قلت:خلاص يا سعود رضيت...؟!،غسلتلك وجهك و حطيتلك عطر...! سعود بدأ يقطم البولو و هوا يطالع فيا،بلعو وقال:ماما..سِماغي...؟! اتلفت حولي أدور على شماغو،قلت:سارة شوفي حوالينك في شماغ...؟! اتلفتت سارة:أممممم..أهوه...! و مدت ليا الشماغ،قلت و أنا ألبس سعود القَبَعَة:بس مو تجيني بعد شوية تقولي شيليها...! سعود بتساؤل:للأبد...؟! ضحكت:لا وي..بس لمن تجي تبغى تنام شيلها...! قالت سارة:ايس الزمال هدا يا سعود..أنا ما أتحمل كده...! تابعت بصوتها العادي:أنا لازم أصورك الصراحة...! و مسكت جوالها و قالت:جود عادي...؟! ابتسمت و هزيت راسي فقالت:يلا سعود ابتسم...! سعود ما أبدى أي ردة فعل،قلت:وريها كيف بابا يسوي في الصور...؟! قال سعود:أوليها...؟! ابتسمت:ايوة وريها...! اتكتف سعود و رفع راسو و ابتسم ابتسامة جانبية و هوا رافع حاجبو...! ضحكت سارة و صورتو..ورتني الصورة بعدها أعطت سعود الجوال عشان يشوف صورتو،قالت:يجنن اسم الله عليه...! قلت:سوسة دا الولد..ما عندو حركات أطفال و تريقة و تقليد لكن بس يشوف صورنا أنا و أبوه يقعد يقلدنا...! ابتسمت سارة:بس شخصيتو حلوة ما شاء الله..أحسو يسوي كل إلي في راسو من غير إعلانات...! -يووووه على سيرة الإعلانات..تعرفي كل ما أنظف غرفتو ألاقيه مسويلي بدعة جديدة..مرة ألاقيه مشخبط على ملابسو الداخلية و مرة على الجدر ورا الستارة و مرة بألوان الفلوماستر على المراية و قبل كم يوم لقيتو راسم رجلو على وحدة من كتبي...! ضحكت سارة:قوية راسم رجلو..أعرف كنا نرسم يدّنا بس رجلنا...! ابتسمت،و بعد كده قالت سارة:جود امشي ندخل المجلس إلي جوا..أحسن بدل ما يشوفنا الرايح و الجاي...! وقفت و أنا أسمي بالله،قلت:سعود حبيبي تعال ندخل جوة...! قام سعود و هوا ما زال يطالع في الجوال و مشينا أنا و سارة و مشي ورانا،التفت لسعود:يووووه نسيت شنطتي..روح جيبها...! -يوووووه يا ماما..إنتي ليه بس تنسي تنسي...؟! طالعت فيه:لا يا شيخ..روح..روح جيبها يلا...! راح سعود بتأفف و جاب الشنطة و رجع يمشي ورانا و عينو عالجوال...! دخلنا مجلس صغير و قعدنا فيه،قلت:سارة أبغى أصلي...! -هممممم الحمام أهو هناك و أنا بروح أجيبلك شرشف و سجادة...! -لالا متوضية بس أبغى سجادة...! قالت و هيا تقوم:و شرشف...! -لالا مالو داعي..حصلي بعبايتي، جيبيلي هيا الله يسعدك...! -جود بلا هبل..خلاص حجيبلك شرشف ما فيها شي...! و راحت و رجعت بعد شوية،فرشت السجادة في زاوية من الغرفة و مدتلي الشرشف...! مسكت الشرشف و لبستو،قلت بعدها بحرج:ما أقدر أصلي واقفة لازم أجلس...! ابتسمت و شالت السجادة و فرشتها قدام وحدة من الكنبات المواجهة للقبلة و قالت:يلا يختي..اجلسي و صلي...! حطيت شنطتي قدام السجادة و كبرت و صليت و في صلاتي دعيت عالسريع بإنو الليلة دي تعدي على خير لإني طفشت و أبغى أرجع لبيتي...! خلصت صلاة و سلمت بعدها فكيت الشرشف..سارة اتناولت مني الشرشف و لفتو مع السجادة و حطتهم على جمب،بعدها جلست جمبي،قالت:جود فستانك ما شاء الله مرة حلو...! ابتسمت:عيونك الحلوة...! ابتسمت و شبكت يدّينها مع بعض:مرة كيوت و إنتي حامل...! -يعني عشني دبدوبة...؟! ضحكت:ايوة..شكلك مرة فلة..كيوت و مربربة...! اتنهدت:والله لازم أنحف بعد ما أولد..أنا أصلاً من بعد ما جبت سعود تخنت،صح نقص وزني مع الرضاعة بس برضو و دحين كمان حولد و يا سلام عالكم كيلو إلي حزيدها...! سارة:إنتي منتي مرة دبة..يعني جسمك جسم حرمة,,لا إنتي نحيفة و لا إنتي دبة...! قلت:لا والله مو حلو..و إن شاء الله حنحف...! "لييييييييييه؟!"،التفتنا..ك� �ن عبدالرحمن و في يدّو تيبسي حطو على طاولة متوسطة الحجم..شال الطاولة و حطها قدامي و جلس جمبي:هذا ما استطعت سرقته...! "التيبسي صحن مسطح واسع تُوضع عليه صحون أخرى أصغر حجماً" تابع عبدالرحمن:لا تنحفي..شكلك مرة حلو..كده من كل محل فيكي لحم...! قلت:يا هنايا...! ضحك:والله دحين متضارب مع حليمة عشان الرجيم إلي تسويه...! قلت:لا تقول...! سارة:صح لا تقول..يمكن ما تبغى أحد يعرف...! -والله إنتو الحريم عقد..عادي ما فيها شي...! قال بعدها:جود يلا كلي..عارف إنك ما حتتعشي بعدين معاهم...! طالعت قدامي..كان فيه ورق عنب و سمبوسة و أشياءات حلوة،قلت:إنتا بتضرب عالوتر الحساس..أنا نقطة ضعفي الأشياء دي...! عبدالرحمن:كووووولي كلي حبيبتي..والله إنك قاعدة تغذي اتنين مو واحد...! ابتسمت:طيب كلوا معايا..ما أحب آكل لوحدي...! بعدها قلت:سعود حبيبي تعال...! جا سعود و جلس فوقي بعد ما أعطى الجوال لسارة و قعدت أنا آكُل و أأكل سعود معايا و أنا أسمع لكلامهم...! قال عبدالرحمن بمتعة:جووووووود..تعرفي إنو زوجك _روميو السعودية_ ضرب عبدالإله في هدا المجلس...! لفيت وجهي لعبدالرحمن بسرعة و أنا أسمع سارة تقول باستنكار:عبدالرحمن !!! كان عبدالرحمن حيقول شي لكني قلت بهدوء و تساؤل:عبدالإله أخوك...؟! -هممممم..شوفي هوا أخوية لكنو اتطاول و علي حار علطول يتنرفز فسارت مضاربة..وأنا مني مع أحد ضد أحد..أنا أحب أخوية و متعاطف معاه في نفس الوقت ما أكره زوجك.."تابع بسرعة"..بما إني ما أعرفو ما أحبو...! درت بعيني عالمجلس الداخلي الصغير..قلت:بس علي ما يعرف إني أعرف و ما يعرف إنو عمو يعرف...! عبدالرحمن:الصراحة شي بديهي إنو موضوع زي كذة ما حينسكت عنو...! قال بعدها:جود إنتي ايش رايك في إلي سار...؟! وترني سؤالو..ما اتوقعت يسألني سؤال زي كده..قعدت ألعب في سلسلتي لثواني قبل ما أطالع في عبدالرحمن مباشرة:رح أقول...! ابتسم:قولي...! سحبت نفس:أنا مني مثالية..الصراحة زوجي برد لي قلبي و بعدين هدي مو أول مرة عبدالإله يسيء فيها ليا...! سارة:بس يا جود ترى عبدالإله طيب...! التفت لسارة:مو لازم ما تحبوه زيي..إنتو أصلاً ما عندكم سبب مقنع عشان تكرهوه وبعدين شغلة طيب و مو شرير و شغلة عبط شباب ما تعجبني..و مو لازم نلتمس لكل الناس أعذار على كل أخطائهم...! تابعت بعد صمت ثواني:و على كل حال أنا ما شفت من عبدالإله كل شي و أعتقد عبدالإله نسخة مصغرة من أبوكم..معاكم طيب و مثالي و مع أشخاص معينين قمة قلة الأدب و البشاعة..و اسمحولي لكن إنتو فتحتو الموضوع و خليتوني أتكلم...! عبدالرحمن:احنا كمان محنا مثاليين..شي طبيعي اتعاطفنا مع عبدالإله حتى لو كان هوا إلي بدأ...! التفت لعبدالرحمن،كان يتكلم بصراحة لطيفة و هوا مبتسم..ما حسيتو حاقد أو شي..حسيتو بس بيقولي عالواقع...! ابتسمت:و أنا مع زوجي و..اقفل الموضوع...! عبدالرحمن:أصلاً أنا قلت من البداية مالي دخل فيكم..أنا أحب أهلي و أحبك و مابغا أزعل و لا واحد فيكم و مني مستعد أخسر علاقتي بكي عشان مشكلة أنا مالي ذنب فيها...! خطر على بالي فجأة سؤال،قلت:بس مو إنتا مستقل و مالك دخل بمشاكلنا..ليش ما حاولت تتقرب مني من البداية...؟! ابتسم عبدالرحمن ابتسامة حزينة هادية:أبوية كان يعصب و إذا ما عرف أمي تخاصمنا لإنها تخاف علينا يعصب...! اتغيرت ملامح وجهو و رجع لمرحو و هوا يقول:يا دوووووبا..خلصتي ورق العنب...! طالعت في آخر حبة من ورق العنب..أخدتها و أكلتها لسعود و أنا أقول:مو جبت الأكل ليا...؟! قال بغيظ:لكي مو لولدك...! فجأة سعود شرق،بعدت ورقة العنب عنو و دقيتو على ظهرو بالخفيف و أنا أسمي عليه..و الحمدلله راحت الشرقة و شربتو موية...! التفت بغضب لعبدالرحمن:سمي بالله على ولدي...! ضحك عبدالرحمن:والله و طلعت عيني حارة...! نزلت سعود من فوقي و أنا أقول:حبيبي روح غسل فمك هناك...! كان فيه مغاسل داخلية في المجلس..راح سعود و رجع بعد شوية..نشفتلو وجهو و عطرتو و عدلتو بعدها قال:ماما أعتيني بولو...! اتنهدت و أنا أطلع بولو و أعطيه،سعود زي كوووول الأطفال ياخد البولو كأنو حلاوة...! بعد ما أكلتو البولو بستو و أعطيتو الجيم بوي عشان ينشغل...! قام عبدالرحمن:أنا كذة شردت من الشغل بما فيه الكفاية..لازم أروح لهم...! سارة:صح..بابا حيعصب...! -والله احنا قلنا عائلية و أبوكي عزم كل معارفو..يتحملهم عاد...! سارة بعتاب:عبدالرحمن...! -والله لو تشوفيهم تنفجعي..أصلاً أشك العشا بيكفيهم...! سارة بقهر:ليه هما جايين يباركو و لا يطفحوا...؟! عبدالرحمن:جود لا يفوتك وجه سارة و هيا حاقدة...! التفت لسارة وقلت:أحلى وجه حاقد في الدنيا كلها...! مدت سارة لسانها لعبدالرحمن إلي قال:شايفة..دايماً تسويلي حركات البزورة دي...! قلت:والله..أصلاً إلي ما تسوي حركات بزورة ما يمشي سوقها...! قال عبدالرحمن و هوا يكابح ضحكتو و يهز سبابتو المشيرة ليا:إنتي حيوانة...! التفت لسارة و راح عبدالرحمن و حاولت أنا قد ما أقدر أركز على كلامي مع سارة و أصرف تفكيري عن وجودي في دا المكان و كنت أطلب من ربي يعديلي دي الليلة على خير و ما يخلي فيها أي احتكاك ببابا...! ^^^^^^^^^^^^^^^^^^^^^ بعد مدة وقفت سارة و قالت بحرج:جود أنا لازم أروح...! كنت عارفة إنو مو وضع عادي إنها تترك الكل في ملكة أختها و تقعد معايا و كنت من جوتي شاكرتها على دا الشي...! قلت:طب هما الحريم حيدخلو هنا...؟! هزت راسها:ما أستبعد...! -طيب... قاطعتني:جود اخرجي و اقعدي زي أي حرمة..مو لازم تتحركي..بس اجلسي و اهرجي مع الحريم...! قلت و أنا أقوم:طب سعود...؟! -سعود شكلو كابس عليه النوم..أوديه يلعب مع الأطفال و إذا نام أنقلو لأي غرفة...! -لا لا إذا نام جيبيه عندي...! ابتسمت سارة بتفهم:إذا نام حأحطو في غرفتي في سريري...! شلت شنطتي و ناديت سعود و شلت منو الجيم بوي،قال:ليس مامي..أنا أبغا ألعب...! -حبيبي عشان دحين توديك سارة عند الأولاد تلعب معاهم...! -ماما أنا مابغا ألوح (أروح) عندهم...! و جا و لف يدّينو حوالين رجلي،حطيت يدّي على راسو:"ليش حبيبي؟!"،التفت لسارة:كيف بزورتكم..أشرار...؟! -والله أولاد خلود و عبدالرحمن حبوبين فاطمني...! قلت و أنا أتذكر:صح سعود..رغد فيه...! رفع سعود راسو،قالت سارة:صح والله هيا تستناك من أول...! قلت:من جد...؟! سارة:ايوة الله..من يوم ما جيناكم و هيا راجتنا بو...! ابتسمت:نفس الوضع عندي...! طالعت في سعود:ها حبيبي تروح...؟! -لأ...! اتنهدت..رحت و جلست و جلّست سعود فوقي،همست:سعود حبيبي ما يسير تجي معايا..أنا حروح عند حريم كبار...! -ماما..أنا ما أسوي شي بس أقعد..بس أقعد...! -حبيبي ما ينفع..الله يسعدك خليك شاطر و اسمع كلامي...! -ماما طب أنا ما أحبهم..ما أعلفهم (أعرفهم) ...! سارة:طب إنتا روح و جربهم و العب معاهم..لو ما عجبوك ناديني و أنا أجيبك عند ماما...! قلت و أنا أدقو بالخفيف على ظهرو عشان ينزل عني:يلا حبيبي روح مع سارة و لو ما ارتحت ناديني...! قام سعود من فوقي و شكلو ما اقتنع تماماً بس الصراحة أنا ما فيا حيل أداري فيه و بعدين سعود لو أحد قال شي ما عجبو ممكن جداً يخاصم و يهزئ و أنا مني مستعدة أنحط في موقف محرج مع ناس وضعي حساس معاهم...! وقفت،و مسكت سارة في يد سعود و قالت:يلا أنا حدخل معاكي و أرجع لماما أساعدها...! صرخت بعد كده:رغد..رغد تعالي...! جات رغد بعد مدة و طالعت في سعود و قالت بفرح:إنتا زيت...؟! طالعت في سعود إلي ابتسم بلطف و جنتلة:ايوة...! و ساب يد سارة و راح مسك يد رغد و خرجوا...! طالعت في سارة بصدمة:وي..سرقت قلب ولدي...! ضحكت سارة:أطفال آخر زمن...! شلت شنطتي و مشيت مع سارة و دخلنا الصالة و أول ما دخلنا ارتفع معدل نبضات قلبي...! كان فيه حريم،بعضهم كانو عماتي و جدة..جدة كانت فيه..رحت لها و سلمت عليها..رحبت بيا:فديييييت من رِيت (رأيت)..هلا والله بجود..هلا ببنتي هلا...! و جلستني جمبها:وينك عني..ما تِجنِّي من أول...؟! قلت بصوت واطي:ما كنت أعرف وينك..أول ما جيت دخلوني جوة...! رفعت راسي على:"جود إنتي حامل...؟!"،كانت عمة صفية "أم عبدالله"..قلت:ايوة...! -ما شاء الله..في الشهر الكم...؟! -نص الخامس...! -ايييييييييييييييييييييييي يييه..ما شاء الله..طب دريتي إن ولدي بيتزوج...؟! ما استنتجت إنها تحاول تستفزني أو تدقني إلا لمن قالت:خطبنالُه بنت الحلال إلي بتصونو و تسعدو..الحمدلله يارب...! بنت الحلال...؟!،حسيت بالكلمة كأنها خنجر و طعني..هيا صح تقصد ببنت الحلال وحدة طيبة لكن بالنسبة ليا كان معناها شي تاااااااني...! قلت:الله يوفقو...! قالت بتشكك:تقوليها من قلب...؟! جدة:الله يا صفية..خلي البنت...! -يا أمي بطمن على ولدي...! غمضت عيني و رجعت أفتحها في محاولة لتهدئة نفسي...! جدة باستغراب:من ايش...؟! المجلس كان كلو ساكت..الحوار بالنسبة لهم كان مثير لدرجة و لا وحدة فيهم حاولت تسكت صغيرة العقل دي...! عمة صفية:سمعت إن مو كويس الواحد يتزوج و وحدة تفكر فيه...! رفعت بصري مصدومة..كنت مفحمة منها...! قلت و أنا أحس بخنقتي ترجعلي:أنا ما أفكر في ولدك..بعدين أنا متزوجة و مخلفة ومرتاحة الحمدلله...! التفت لجدة إلي قالت:الله وكبر "أكبر" عليك يا صفية إن كان بتحرقين لي دم بنتي...! عمة صفية باستنكار:ذحين يا أمي تدعين عليا عشان بطمن على ولدي...! -ايوة بدعي و أتحسب عليك..جود حامل يا صفية..الأول ولدته قاصر و الثاني طاح..عاد أنا أبغى الثالث يثبت...! أصوات الحريم عليت و هما يسألو عن إلي راح..سكت و نزلت راسي:"وين بابا..جابني هنا و لعد سأل عني..جابني هنا بس عشان يرضي نفسو..لو كان من جد يبغاني عشاني كان سأل..اتصل..مرتاحة ولا لأ..ولا عمو..هزئ وخاصم بعدها تركني بعد ما حقق لبابا رغبتو..دايماً بابا..دايماً بابا هوا المهم رغم إنو ما يستحق أي اهتمام..دايماً"...! بعد شوية رن جوالي،كان علي،قمت و أنا أقول لجدة:"علي متصل"،و خرجت برة الصالة و وقفت عند بابها،رديت:ألو...! -ايوة هلا...! -أهلين...! -أمي وصلت...! -طيييييييييييب...؟! -شوفيها..استقبليها يعني...! -والله يا علي أنا يبغالي من يستقبلني..خليها تدق الجرس و... قطعت كلامي و أنا أسمع صوت الجرس و بعدو صوت عمتي أم علي و هيا ترد على "الكيف حالكم و الايش أخباركم"...! قلت:أهوه قاعدة أسمع صوتها...! -طيب كويس..إلا..كيف سعود...؟! -ما فيه شي..تعرفو..مرض الدلع حقو..قام و أكلتو و انشغل بالجيم بوي بعدين راح مع الأطفال و مافيه شي الحمدلله...! -كويس كويس..و أمه كيفها...؟! اتنهدت و كنت حتكلم لكنو قال:خلاص خلاص عرفت..بس لو تبغي أوديكي البيت تراني حاضر...! -ليتك ما جبتني من الأساس...! حسيت الأصوات عند علي تخفت،و وصلني صوت علي هادي:كنت مستعد ما أجيبك و أوقف ضد الكل معاكي لكنك كنتي مصرة...! -أنا ما كنت مصرة..كنت مستسلمة و مغلوبة على أمري...! -لا جود..بدليل إنك أصريتي أوديكي السوق عشان تشتري فستان...! سكت لثواني بعدها قلت:معليش علي اتحملني..بس مافي غيرك ألومو..بابا و مني طايقتو و عمو و عارف وضعي الحالي معاه..و أنا نفسيتي زفت..لازم ألاقي أحد أحط الغلط عليه...! -طيب حطي الغلط عليا بس مابغا لا صراخ و لا تطويل لسان...! ضحكت غصباً عني:ما حصرخ و لا أطول لساني...! -أصلاً أنا مين عندي غير جودي حبيبتي أتحملها...؟! ابتسمت:ولا أحد...! رفعت راسي على صوت عمتي تناديني،قلت:علي أمك قدامي...! -والله...؟!،أجل اقلبي وجهك و خليني أرجع للرجال..قمت من عندهم عشانك..إلي يشوفني يقول دوبي خاطب...! -طب ياخي باي...! -باي...! و أنهينا المكالمة،ابتسمت لعمة و سلمت عليها و هيا كعادتها حضنتني و سألتني عن حالي و مادري ليه شفت في وجهها علي الشي إلي خلاني أردد بداخلي:"بلا صفية بلا عبدالله"،لا و الأخ بيتزوج..مو كأنو قال ما حينساني...؟! فجأة اتذكرت رسالتو..اتذكرتها بالنص و اتذكرت:"ستظلين فراشة أحلامي"،قال فراشة أحلام قال..الله العالم حتى اسمي مو فاكرو دخلنا أنا و عمتي الصالة..سلمت عمة عالحريم..الحريم وقفولها..ليش ما وقفولي أنا...؟!،دايماً كنت معجبة بعمة..لها رزة و أول ما تدخل مجلس تعمل جو..ما شاء الله عليها..و ابتسامتها حلوة..و أعتقد هدا أهم شي..يعني غير فارق السن بيني و بينها فيه قدرتها عالابتسام في وجه ألد أعداءها أما أنا فلا..و أعتبر دا الشي نقطة ضعف...! جلست عمة على طرف المجلس و نادتني،رحت لها و جلست جمبها وين ما تأشر...! حطت عمة يدها على ظهري:كيف حملك ذي المرة...؟! ابتسمت بهدوء:الحمدلله..أحسن من أول...! -طبيعي أول مرة دايماً متعبة...! التفتنا أنا و عمتي لحرمة قالت:ما شاء الله يا أم أحمد..معروف عنك..حريم أولادك كنهم بناتك...! الحرمة مو من عماتي بالتالي أكيد وحدة من خالات أخواتي أوووو..يمكن وحدة من معارفهم...! قالت عمة:والله زي ما أبغى بناتي يتعاملو..أعامل أنا حريم أولادي...! أوه هوا دا المشهور عن عمة...! و الحقيقة هدا شي حقيقي لأنو أنا و زوجة أحمد عند عمتي كأننا أحلام و صفاء و الله لا يغير علينا...! قالت وحدة تانية:ايوة الله معاكي حق..والله كل إلي تعبانين مع أمهات أزواجهم يكونوا لا هما و لا أمهاتهم عاملوا حريم أخوانهم عِدل...! عمتي أم علي:الجزاء من جنس العمل...! قالت عمة صفية:إلا يا أم أحمد..إنتي من وين عرفتي عايلتنا و خطبتي منها...؟! حقدت على عمة صفية..طالعت في عمتي إلي قالت بهدوء:ولدي أحمد صاحب أخوكم...! عمة ما تحب تتكلم في دي المواضيع و عمة صفية ثرثارة و تحب دا الكلام...! و شكلو ما عجبتها إجابة عمتي المتحفظة فقالت:طب و ليش اخترتي جود بالذات...؟! عمة:نصيب..ربي كان كاتب إن علي لجود و جود لعلي...! عمة صفية:آه يعني ولدك ما شافها و عجبتو...؟! عمة:لأ..لا شافها و لا شافته...! عمة صفية ما كانت _حالياً_ بتسأل بلؤم..لكن سبحان الله فيها طبع مو حلو..هذرة و ما تعرف ايش إلي ينفع و إلي ما ينفع ينقال...! طالعت في عمة..صح..عمة ما تدري عن إلي سواه علي..تتوقعوا ايش حتكون ردة فعلها لو عرفت...؟!،علي قالي لو أهلو عرفو حيدبحوه..معقوووووووووووووو ووول...؟! عمة صفية:بس سمعنا إنو شافها...! عمتي:طيب شافها لكن بعد ما اتكلموا الرجال و اتفقنا على كل شي...! الصراحة كلام عمتي مو حقيقة؛احنا كنا لسه ما حددنا حتى متى العقد..بس المسكينة تبغى تسكت صفية و معاها حق..يعني لو عمة قالت شوفة شرعية كان راحو قالو كلمها و كلمتو..و خرجت معاه و عملو و ما عملو..و كان خلونا لبانة في فم الناس...! آه من الناس و آه من طبايعهم...! ^^^^^^^^^^^^^^^^^^^^^ حالياً أنا لابسة عبايتي و فرحااااااااااااااااااانة عشاني أخيراً حخرج من دا البيت إلي خانقني...! كنا قاعدين في الصالة أنا و علي و سعود و عمو و بابا و أخواني...! و أعترف..كنت مقهورة من بابا لإنو هوا إلي أصر أجي و بسببو عمو هزأني و آخرتها ما أظهر حتى فرحتو بوجودي..يعني..المتوقع بعد كل داك الإصرار على مجيئي إنو يكون فرحان إني جيت لكني و كما أسلفت بابا بس قاعد يرضي نفسو..ما أقول إنو ما ندم..لأ هوا ندم لكنو ما حبني..هوا بس حس بالذنب و حس إنو غِلِط فقاعد يحاول يصحح غلطو بإرضاء نفسو و هوا قاعد يرضي نفسو بتقمص دور الأب الطيب إلي بنتو تصدو و ما تقبل منو أي شي...! اتنهدت من جوتي..يااااا رب فرج عني..من جد وضع متعب و رغم إني مضايقة من حركات بابا إلا إني مستسلمة لدا الواقع و متهيأة نفسياً لأي شي غبي تاني ممكن يسويه أما عن دحين فمو شاغل بالي إلا الخروج من هنا...! وقف علي:جود يلا...؟! وقفت و أنا أحاول أخفي ابتسامة السعادة..ياااااااااااااي حخرج و أخييييييييييييييييراً...! قال عمو:لسه بدري..خلوكم شوية...! لألأ..مستحيل أقعد أكتر...! قلت بسرعة:لأ ما ينفع نقعد أكتر..سعود لازم ينام و بكرة ورانا جمعة...! و على سيرة الجمعة..ترى عمة راحت من بدري و قالتلي نروحلها بكرة بعد صلاة الجمعة نفطر معاهم...! علي:و اليوم خميس و الطرق زحمة..لازم نمشي بدري...! رددت أنا:صح الطرق زحمة و البيت بعيد...! وصلني بعدها صوت عبدالإله ساخر:إلا ما قلتيلنا..ايش رايك في بيتنا...؟! طالعت في عبدالإله بقرف حل عليا فجأة و قلت:يجنن زي أصحابو...! التفت لسعود و مديتلو يدّي فقام و مسك في يدّي و أخيراً اتحرك علي و مشي و مشينا وراه و المزعج إنهم كلهم قامو معانا..مدري يعني يخافو علينا نضيع و لا ايش...؟! المهم إنهم جو و حصل و كنا واقفين عند الباب إلي فتحو علي و كنا حنخرج لكن بابا وقفنا لمن قال:جود ايش رايك تباتي هنا اليوم...؟! التفت بسرعة:هاااا!!!!!!!!!!!!!!!!!!! ابتسم بابا:باتي عندنا اليوم...! عبدالرحمن:الله مرة فلة..لو بتي حدشر معاكي بكرة...! احتجت وقت عشان ترجعلي القدرة على الاستيعاب و لمن رجعتلي قلت و أنا خافضة راسي و أهزو:ما..ما أقدر...! عمو:و ليش ما تقدري يعني...؟! -عشـ..عشان ما..ما أقدر أترك علي و سعود و.."بلعت ريقي"..وكمان ما... قاطعني عمو:علي..عادي تبات جود هنا...؟! علي:واللهِ براحتها..تبغى تقعد تقعد ما تبغى محد يجبرها...! عمو:شفتي..علي موافق..باتي...! قال بابا بابتسامة:أنا كنت خايف علي يرفض..أشوة...! عمو بابتسامة حلوة:لا علي مو غلس..كنت متأكد حيوافق...! قلت بقهر:علي وافق بس أنا مابغا...! طالعو فيا مصدومين،اتوترت و سارت أنفاسي مسموعة...! قال علي:أنا قلت براحتها...! حسيت علي ما يبغا يدخل بس أنا أبغاه يدخل...! عمو:و ليش إن شاء الله ما تبغي تباتي...؟! طالعت في عمو و حسيت قلبي ينعصر من الألم،قلت بصوت باكي و أنا أطالع في الأرض و أهز راسي بلا:ما..مابغا..أنا..مابغا أبات..أنا أبغى أروح البيت...! بابا:ليه يا بنتي والله ما فيها شي..أنا أبغاكي تنامي و تصحي و تفطري معانا..و بعدين لاحظي إنك ما قد نمتي هنا و لا مرة...! عبدالرحمن و عمو قعدوا يقولوا:"صح جود..باتي باتي"،و قعدوا يكرروا و يأكدوا على كلام بابا الشي إلي خلاني أنفجر:و مابغا أنام ولا مرة هنا...! عمو بشدة:جود...! شدة صوت عمو خلتني أفز،قال بعدها و هوا يصر:أبوكي لا ترفعي صوتك عليه...! طالعت في عمو و لقيت في عينو نظرة غاضبة أرعبتني خلتني أبكي و أضرب الأرض برجلي و أقول بصوت عالي بلا وعي:عمو لا تتكلم..إنتا آخر واحد أبغى أسمع صوتو...! -لااااا و ترفعي صوتك عليا كمان.."عِلِي صوت عمو"..جود حالك زايد منتي ملاحظة...؟! طالعت في بابا..كان ساكت..ولع النار و ما حاول يطفيها...! قلت بصوت مخنوق:إنتا ساكت ليه...؟! عمو:جود كلامك هنا معايا...! علي:يا سعُو.. عمو بانفعال و شدة:علي لا تتدخل..بنت..كلميني هنا مالك شغل في أبوكي...! طالعت في عمو و شفايفي ترتجف،قال:إنتي لو كنتي جيتيني و كلمتيني كان ممكن أتعاطف معاكي..لكنك اتطاولتي على أبوكي و سرتي إنتي الغلطانة..لازم تتحملي نتيجة غلطك...! طالعت في عمو..أنا ليش ساكتة..ليش ما أتكلم لييييييييييييييييش...؟!،و علي..علي ليش ما يدافع عني...؟! بعد صمت ثواني قال عمو بلهجة آمرة:خلاص جود..نامي اليوم هنا و بكرة من بدري أنا بجي و برجعك لبيتك...! التفت لعلي إلي اتكلم أخيراً و قال ببرود و ثقة:جود ما رح تسوي شي غصباً عنها...! عمو بنرفزة:علي إنتا فاهم الوضع كويس...! انقهرت..ليش..ليش لمن حسيت إنو علي حيفكني جا عمو ببساطة يسكتو و يكلمو كأنو الغلطان...؟! التفت لعمو بقهر:لأ مو فاهم الوضع و محد فاهم و إنتا بنفسك ما تدري عن أي شي...! قال عمو من ورا أسنانو:جود لا تخليني أسوي شي يزعلك و يزعلني...! اتنرفزت..اتنرفزت و حسيت ببركان يتفجر جوتي..قلت بصوت عالي..صوت عالي أجبر الكل عالسكوت:ليش هيا بقي فيها زعل و رضى..أ... سكت و أنا أتذكر جيت عمو لبيتي زعلان و خروجو منو زعلان..بكيت..بكيت و قلت و أنا أحس بظلم بابا و تبليه عليا:يا عمو..يا عمو بابا قلك إني قلت و قلت وقلت..بس ما قلك إلي هوا قالو و ياااا ليتها جت على كده..عمو أنا ما قلت لبابا شي والله ما قلتلو شي "زادت دموعي"..هوا إلي قال كلام مو معقول..هوا إلي اتصل عليا و أنا في الجامعة و قلي..قلي... سكت..ما قدرت أكمل..غطيت وجهي بيدّيني و قعدت أبكي،علي علطول حط أياديه على أكتافي:جود خلاص..محد يقدر يغصبك على شي و أنا موجود..جوووووود...! رفعت راسي و أنا أحس بنار جوتي..بابا طول عمرو يتكلم و يقول ليش أنا ما أتكلم..ليش دايماً أكبر عقلي..رح أتكلم رح أتكلم...! قلت بقهر و الحقد باين في صوتي:بابا كدب.."طالعت في عمو"..أنا اعتذرت ما قليت أدبي..أنا شرحتلو ليه ما أقدر أجي..بابا إنتا جبتني هنا غصباً عني.."اختنق صوتي"..و..و معد سألت عني..تركتني لنظرات حريم بعقول أطفال..تركتني لتعليقات عمة صفية..تقولي ولدي عبدالله حيتزوج..حيتزوج بنت الحلال إلي حتسعدو و كأني افتكرت في ولدها..و فوق دا جاي تطلب مني أبات..أنا هنا مخنوووقة..أنا أبغى أخرج من هنا..أنا أبغى أخرج..خلاص ما أبغا أقعد..خلااااص ما أبغى... رجع علي يحط يدّو على أكتافي:جود حبيبي خلاص اهدي..قلتلك محد حيغصبك على شي...! الكل كان ساكت و مصدوم مني و من إنفعالي بس أنا كنت منهارة..تابعت و أنا مني واعية لأي شي غير إحساسي بالوجع و الأم:و ما اكتفيت بس بكده إنتا جمعت كل الناس حولك ضدي و هدا كلو كان ممكن أتجاهلو..أنا عادي عندي..متعودة على بغض الناس بس إنتا إنتا يا بابا أخدت مني بابتي الحقيقي..إنتا خليتو يدخل بيتي زعلان و يخرج زعلان..إنتا أخدت مني أشياء كتيرة حلوة بس دحين إنتا أخدت مني سبب سعادتي حرام عليك كده أنا ما عملتلك شي ليش تحرمني من عمو ليش تتبلى عليا و تقولني كلام أنا ما قلتو ليش ؟! بابا:ما اتوقعت إن الأمور توصل لكذة..كل ما في الموضوع إني كنت متأثر من كلامك و لمن كلمت عمك كنت منفعل..ما كان قصدي أتبلى عليكي زي ما تقولين ونيتي ما اتعدت حدود إني أفضفض..و بعدين إنتي مكبرة الموضوع..كلامك إلي قلتيه ما كان لو أي داعي...! قلت بانفعال:تفضفض على حسابي...؟!،تفضفض تقوم تقول كلام أنا ما قلتو...؟! قال بابا في مدافعة عن نفسو:أنا قلت إلي فهمتو من كلامك و.. قاطعتو:و مين قال فهمك لازم يكون صح...؟!،إنتا طول عمرك ما كان عندك ذرة مفهومية و ما كنت تعرف تتصرف مع أي شي و إلي عايش مشكلتي معاك ما يقدر ينكر دا الشي...!!! عمو بصوت عالي:لحظة لحظة لحظة..جود ايش معنى كلامك هذا...؟! التفت لعمو بإصرار:معناتو أخوك كداب...! سحب عمو نفس و قال من ورا أسنانو:لا تتكلمي عن أبوكي بهذا الأسلوب...! سكت لثواني بعدها رفعت راسي،قلت و أنا أحس بإنو مافي ولا واحد من إلي حولو يستاهل أي شي و بالأخص بابا...! قلت:عمو تبغاني أقولك ايش قال...؟! عمو ما رد و هوا يستناني أتكلم،قلت:كتير أشياء ممكن أقولها تخليك تكره أخوك و كتير أشياء ممكن أقولها تخليك.."أشرت على أخواني"..إنتا و هوا تكرهوا أبوكم..لكني ما رح أقول..عارفين ليه...؟!،عشان بس أنا أحس إنو أنا المفروض أكون أحسن منو و ما أكرر الكلام السخيف إلي قالو... صوتي كان تدريجياً وضوحو يقل...! قال عمو:جود أياً كان إلي قالو لا تتكلمي عن أبوكي كدة..جود إنتي إلي كنتي دايماً صابرة و متحملة عشنو أبوكي..دحين لمن سار ما يسوي أي شي إلا إنو يدور رضاكي سرتي تحاسبيه عالزلة...؟! قلبي كان يعورني..كان من جد يعورني..حسو فيا..واقفة و الكل يطالع فيا بعين الاتهام..واقفة أجادل عمو قدام زوجي و ولدي..ليش يحطوني في موقف زي كده..ليييييييش...؟! و زي أي امرأة تُظلم بكيت،قلت و دموعي تنزل:ما رح تقتنع يا عمو أنا عارفة و ما رح تصدقني و بابا رح يظل الإنسان الكويس الصالح إلي صابر على أذى بنتو..كل إلي أبغى أعرفو هوا كيف قدر يسحبك لصفو..أنا نفسي أعرف الكلام إلي قالو بالضبط..أبغى أعرف ايش الكلام السيء إلي نقلو بابا عشان تطالع فيا بالنظرة البشعة هذي..عشان تطالع فيا باحتقار و تعاملني كأني..كأني... قطعت كلامي و أنا أنتبه لشي،قلت:إنتا..إنتا يا عمو دايماً كنت.."ازدادت دموعي و قلت من قلب و أنا أطالع في بابا"..أصلاً أكرهك..دايماً كلمة وحدة منك تكفي عشان الكل يلتف حولك.."التفت لعمو"..و دي ما كانت أول مرة تشك فيا..و في كل المرات كان بابا أو أحد من الأهل لهم دخل..أنا حتى لمن كنت أبغى مصلحتك ما وثقت فيا..عمو ايش سار فيك..ليش منتا مصدقني..أنا ما أكدب..والله ما أكدب.."التفت لبابا"..قولو إنو أنا ما قلتلك شي..هوا يصدقك إنتا..ليش ما تقولو إنو أنا اعتذرت منك و فهمتك ليش ما أقدر أجي..إنتا ليش قلتلو إنو كرامتي ما تسمح لي أجي..أنا ما فكرت في الكرامة..أنا كنت بالفعل ما أقدر أجي..أنا والله ما فكرت لا في كرامتي و لا في إنو جيتي لهنا فيها إهانة..والله أنا ما فكرت كده..أنا قلتلك لو أقدر أجي كان والله جيت بس أنا ما أقدر..ما أقدر لِـ ..أنا..أنا.. نزلت راسي لإني ما كنت أقدر أطالع فيهم أكتر،قلت و أهز راسي:أنا كنت مستعدة أحبكم كلكم حتى عبدالإله بكل العبط إلي سواه معايا بس إنتو رفضتو..إنتو إلي صديتوني لمن أجبرتوني على أشياء أنا مالي طاقة عليها..إنتو تعاملوني كأني إنسانة ممكن أرتكب ذنب عظيم في أي لحظة..يمكن عشان تاريخ أسود عرفتوه لماما بس أنا ما اخترتها أم ليا..أنا ما اخترت أكون أشبها..ربنا إلي كتب كل شي بس ربنا ما كتب إني أنظلم..ربي ما كتب إنكم تعاملوني باحتقار و دونية بس عشانو قدر إنو ماما السيئة تكن ماما..إنتو إلي ظلمتوني..ربنا ما يرضى بالظلم عشان كده أنا ما أقول إنو هدا مقدر و مكتوب لإني كل ما تظلموني كنت أحس ربي معايا يبرئني..كنت أنام و أصحى و ألاقي كل شي تمام.."سكت و تابعت بعد ما رجعت رفعت راسي"..إنتو إلي منتو رجال..إنتو إلي استخدمتو سلطتكم و قوتكم عشان تظلموني..بابا استغل مكانتو الدينية كأب رغم إنو ما كان أب..بابا كل إلي سواه هوا إنو كوني..شارك في تكويني..جوتي فيه كم جينة منو..عمو أو خليني أقول باباتي..استخدم سلطتو و معاه حق..هوا رباني و علمني و سوالي كل شي بس للأسف لمن جيت أحاول أردلو شوية من إلي سواه منعني..ليش ما أدري..يمكن شابفني أصغر و أغبى من إني أتصرف في مواضيع زي كده..لكن بعدين صدمني.."التفت لعمو و قلت"..صدمتني يا عمو لمن قلت إنك ما تبغى أولاد بسببي..لمن قلت إنو رحمة من ربي إنو ما عندك أولاد على أساس إني المثل السيء للبنت العاقة رغم إنو ما مرت مدة من لمن قلتلي إنو أنا أحسن من مليون بنت كان ممكن تجيبها لو اتزوجت..إنتا يمكن حاسس إنو أنا شخص مختلف بس أنا هيا جود إلي عرفتها و من هيا في الكوفلة..أنا ما جيت هنا عشان بابا..أنا علي عرض عليا ما أجي و يوقف معايا ضدكم بس أنا رفضت و أصريت أجي عشانك إنتا لإني كنت عارفة إنك حتزعل و أنا ما أبغاك تزعل لكن الظاهر إنتا منتا مهتم برضايا..بابا هوا الأهم..بابا لازم ما يزعل..بابا لازم يكون مرتاح..بابا لازم ما يحس بالذنب رغم إنو لازم يحس بالذنب..ليش تداروه و تدورو راحتو على حسابي ليش...؟! كان عمو حيتكلم لكني منعتو:لا تقول شي..أنا أبغى أرجع أقولكم إنكم منتو رجال..منتو رجال لمن ما قدرتو تمنعوا ظلم بابا عني..منتو رجال ما قدرتو توقفو عبدالإله من مضايقتي..منتو رجال لمن رضيتو إني أعزل نفسي في غرفتي..منتو رجال لمن تركتوني أتزوج من غير وحدة فاهمة تعلمني كيف لازم أتعامل مع زوجي و كيف لازم أتصرف في حالات معينة..منتو رجال لمن اضطريتوني ألجأ لأم زوجي عشان أسألها عن الصح و الغلط..أنا في كل شي كنت ماشية بالبركة..ربي كان ساتر عليا و راحمني لا أكتر و لا أقل..أنا والله قلبي يعورني و أنا أقولها لكم لكن إنتو..إنتو.. سكت..فيه شي غريب جوتي سار خلاني أسكت..شي خلاني أهدى و كأنو ربنا أنزل سكينة عليا..سكينة خلتني أسكت و ما أحس إلا بكل إلي حولي يسيروا غبش بالتدريج...! بعد كده لفني الهدوووووووووووووووووووء.. .! **************************** | |||||||||
|
| |
|
06-03-14, 05:00 AM
| #24 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الحادي عشر (و عقدت مشاعري فعادت قوتي) سعود،،، "أففففففف" رميت الجوال و أنا أتأفف...! جود مي راضية ترد..اليوم اثنين و جود برضو مي راضية ترد..إلي يقهر إنها 24 ساعة قافلة جوالها و لو مو قافلتو ما تطنش..لااااا..تسوي بِزي..جود تبغى تقولي أنا مابغا أكلمك إنتا شخصياً لإنها لمن تتصل أمي عليها بالتلفون ترد عادي و تكلمها و أمي تقول إنها كويسة و من صوتها شكلها أحسن بس أنا أبغى أطّمن بنفسي...! لمعت في راسي فكرة..ليش ما أتصل على جود من تلفون البيت عشان ترد و أكلمها...؟! لكني فكرت إني كذة رح أضايقها و أنا هدفي أرضيها مو أضايقها...! خلاص..لين ما تجي حستمر أدق عليها و سواءً ردت أو لأ أهم شي رغبتي في سماع صوتها توصلها...! بس أنا لازم أكلم أحد فيهم..لازم...! اتصلت على علي و حسيت نفسي حطيييييير لمن وصلني صوتو:نعم...؟! -علي...؟! -أيوة...! -علي...؟! علي بطفش:ياخي ايوة علي...! -علي... كنت مني عارف ايش أقول و علي ما يرحم...! قال:سعود..تراني راد عليك قلت يمكن شي مهم أثاريك بتجرب اسمي...! ملّيت صدري هوا و فضيتو،بعدها قلت:كيفك...؟! -بخير..أي خدمة...؟! الظاهر من صوت علي إنو ما حيكون كريم مرة معايا في الكلام عشان كذة جبتها من آخرها و قلت:علي متى جايين...؟! -ماااااااااااااااااالك دخل...! -علي قولي متى جايين...؟! -طب..لحظة بأستأذن من جود أقولك...! -علي بلا سخافة..متى جايين...؟! علي كان قاعد يستعبط و يتسلى أما أنا فكنت متنرفز حدي...! قال:الصراحة يا سعود مادري..جود ذحين تروش سعود..سعود ولدي مو إنتا..إنتبه لا تلخبط ترى ولدي ها...؟!،المهم جود قاعدة تروش سعود ولدي إلي هوا مو إنتا و ما رح ترد عليا إلا لمن تخلص..مستعد تستنى...؟! -علي...! قلتها بنرفزة و قهر..وقتو دا يستهبل..لا وضعي ولا وضع زوجتو يساعد...! -لا تصرخ بعدين بصراحة أنا رديت خوفاً من إنو يكون فيه شي مهم لكن ما طلع فيه أي شي..يلا باي...! قلت بصوت عالي:علي...! علي:شوف سعود..أنا ما تركت شغلي و أهلي عشان ولا شي..أنا تركتهم لإن جود تعبانة مي ناقصتكم..جود ما ترد لإنها عارفة إنكم حتسدوا نفسها و هيا قاعدة تضغط على نفسها عشاني و عشان سعود...! -نسد نفسها...؟!،محد بيسد نفسها..كل إلي نبغاه إننا نطمن عليها...! -تطمنوا...؟!،أنا متأكد مليون بالمية إنكم حتكلموها عنكم و عن زعلها منكم وعن أبوها إلي لازم تصبر عليه..و أكيد طبعاً ما حتقدروا إنها تعبانة وحامل...!،سعود أنا جيت هنا بطلب من جود لإنها مي مستعدة تشوف خلقة واحد فيكم..يا سعود جود قعدت تترجاني لين ما رضيت نروح المدينة...! -عارف..عارف إنها هيا إلي ما تبغانا عشان كذة قاعد أسألك متى جايين عشان أقدر أجيها...! علي قعد يقول كلام غيض مو مفهوم..قلت:علي خلينا نتكلم بالهداوة عشان تفهمني وأفهمك...! -طيب اسمع..جود مي قاعدة تتدلع..جود زعلانة..من جد زعلانة منكم كلكم و لمن قاطعتكم ما كانت "تـتـ..ـغلى"..قاطعتكم لإنها مي قادرة تشوف وجه ولا واحد فيكم..عشان كذة أقولك جود مو مستعدة تكلمك ذحين...! -طب لو مو ذحين..متى..لمن يبرد كل شي و معد يسير فيه أي داعي نتكلم في الموضوع...؟! علي كان حيرد لكني قلت:أنا مابغا يعدي الموضوع كذة..أنا أخاف تسامحنا بالظاهر لكن الزعل يقعد جوتها..أنا مابغا علاقتي معاها تسير زي علاقتها بأبوها...! -ليش هوا أصلاً فيه علاقة بينها و بينه...؟! -فيه..جود تأدي الواجب تجاهو لكن ما تحبو و ما يهمها و أنا ما رح أرضى إنو حالتي معاها تسير نفس حالتها مع سعيد...! اتنهد علي:شوف سعود...إن جينا للقوة فجود أقوى مني و منك..حسب ما أنا فاهم جود متحملة طول عمرها و هاذي أول مرة تنفعل و تصرخ..تخيل...؟!،كم عمر جود ذحين..فوق العشرين سنة متحملة و إنتو ولا يوم واحد منتو قادرين تصبروا..الصراحة شي يضحك...! سكت..كلام علي صحيح..فوق الثلاثة و العشرين سنة و جود ساكتة و احنا ساكتين عن سعيد و الكل ساكت و ما يفكر إلا في نفسو و لمن جات جود تدافع عن نفسها كلنا هبينا فوقها و لمُناها...! قلت:طب علي متى ينفع أشوفها أو حتى أكلمها...؟! -جود ذحين أحسن و تضحك معانا و كلو عادي لكن لو جات سيرتكم أحسها تتضايق..أفضل تتركوها على راحتها..متى ما بغت تكلمكم تكلمكم...! سكت..مستحيل علي يفهم..مو عشان شي بس لإني أنا مستحيل أقعد أتبكبك و أترجى عشان يصدق إني متأزم من زعل جود مني رغم إني و أنا أدعي ربي و ألجألو أبكي..يعني..تعرفو كيف الواحد ينسى كل القوة قدام ربو و يظهر ضعفو...؟! أيقظني من أفكاري صوت علي و هوا ينادي باسمي...! -ها ها..معاك...! -ايش قلت...؟! -في ايش...؟! مادري هل أصابني قدر من التناحة ولا ايش المشكلة...؟! اتنهد علي كمان و قال:اسمع..أنا ما بكلم جود ولا حفتح معاها الموضوع لكن بذكرك بإن جود تحبك و تحب جدة و تحب عبدالرحمن و سارة أختها دايماً تتكلم عنها..و مهما حصل جود مستحيل تفرط فيك إنتا بالذات..هيا بس ذحين تعبانة و مع الحمل زاد انفعالها و تأثرها ولا ما كان سار إلي سار..جود طول عمرها تحكم عقلها ولا أنا غلطان...؟! اتنهدت:لاوالله يا علي منتا غلطان...! -يعني...؟! اتنهدت للمرة المادري كم و قلت:خلاص أنا بستنى و بخليها على راحتها بس إنتا سلملي على سعود و بوسو ليا...! ضحك علي:تصدق كأنك أمي..لسه مكلمها و تقولي بوس لي سعود...! شوية إلا قال علي:أهوه سعوووود..تعال تعال..تعال كلم عمو...! و وصلني صوت علي بعدها و هوا يقول:هنا بابا هنا..هوووبَّا..يلا كلم عمو...! بعد كده وصلني صوت سعود و هوا يكلمني بحماس..فديت قلبو..لو مو عشان جود و عشاني عشانو هوا...! الله لا يحرمني من جود و ذريتها...! ^^^^^^^^^^^^^^^^^^^^^^^^^^^ جود،،، طالعت في الساعة..كانت 4 العصر...! خرجت من الغرفة للصالة الصغيرة جداً وين ما كان علي و سعود قاعدين...! جلست جمب علي و شلت سعود من عليه و حطيتو فوقي و حضنتو و بستو...! قال و أنا أبوسو:ماما كلمت عمو...! رفعت راسي ببطئ عن سعود و طالعت في علي إلي قال:قبل شوية اتصل و طلب يكلم سعود...! -آآه...! "آآه"،تظهر لا مبالاة..عارفة لكن والله حسيت بقلبي و هوا ينعصر...! قال علي:طلب يكلمك...! مادري علي مو حاسس بيا ولا متعمد يقول كده عشان أحن لعمو...! ما قلت شي فقال:سألني متى حتجو قلتلو مادري بس صح جود..ترى بكرة الفجر حنحرك فجهزي الشنط...! التفت لعلي:عارفة إنو بكرة حنروح بس أنا عندي رأي تاني...! -خير...؟! -مادري لو عادي نمشي دحين...؟! -ذحين...؟! علي كان مستنكر و متفاجئ،قلت:عشان نوصل جدة عالليل و نرتاح و تداوم إنتا بكرة و أنا كمان...! -دوبك تتكلمي...؟!،كان من أول..أنا لاني مستعد ولا نايم بدري أمس...! -أنا بس عشان لا ينحسبلك بكرة غياب كمان بعدين أمس ما جات عشرة إلا و احنا نايمين...! -صح..لكني أمس ما نمت على أساس بكرة حنحرك...! اتنهدت:طيب براحتك..سعود قوم عني...! و قام سعود من فوقي و قمت أنا،قال علي:وين رايحة...؟! -أبغى ألم الأشياء و أخلي إلي نحتاجو عشان بكرة بعد الفجر نمشي علطول...! -يا أمي ارتاحي ذحين..لسه عصر...! -لااا..أصلاً كل إلي جبناهم كم هِدمة و ملاعق و سكينتين...! ابتسم علي:و ثلاث شُوك...! سُعود:و جُوم بويي ماما...! ابتسمت:و جيم بويك كمان...! -ماما لا تشيليه علشان ألعب...! -ما حشيلو بس حألمو مع الأشرطة في الشنطة حقتو...! -لا ماما..أنا أعرَف..كمان أبَا ألعب...! -يا تلعب دحين ولا حشيلو..أنا مني ناقصة حُوسة...! و رحت لغرفة النوم و بدأت أرتب و على كل حال الأغراض ما كانت كتيرة...! طالعت في الساعة بعد ما خلصت و ما كان باقي شي عالمغرب...! رفعت راسي لعلي إلي دخل الغرفة و هوا يقول باستغراب:ما جهزتي...؟! عرفت إنو يُقصد الصلاة،قلت:ما فيا حيل..استغفر الله..أحس مالي مزاج أخرج...! -ايش إلي مالك مزاج...؟!،جود بكرة مسافرين..خلينا نروح نصلي المغرب و بعدين نقعد في التوسعة لين العِشا ناكل اسكريم...! ابتسمت و أنا أحس بالحماس للفكرة:يووووه..زمان كنا أنا و جدة و عمو و مُنورة نسوي كده..بس كنا نقعد من العصر...! ابتسم علي:و إن شاء الله تسووها قريب..يلا اتوضي و البسي عبايتك عشان نمشي...! -آآآه طب الله يسعدك روح لبس سعود...! -أنا بأتوضى...! -طب..اتوضى و لبسو..ممكن...؟! قال علي و هوا يتوجه للحمام:لَك تكرمي...! ابتسمت:لَك الله يسعدك...! قال علي من جوة الحمام:تصدقي جود..أحس دعواتك مستجابة...! رحت وقفت عند باب الحمام:و أنا أحس... وقفت كلام وأنا أطالع في علي إلي وقف وضوء و قعد يطالع فيا،قلت:كمل وضوءك...! -تحسي بايش...؟! ابتسمت:كمل وضوء قبل ما ينشف آخر عُضو وضيتو...! كمل وضوء و هوا يقول:بايش تحسي...؟! -أنا ما أحس..أنا متأكدة إنو I loik you قال علي و هوا ينثر الموية من يدّو:لويك...؟! قلت و أنا أدخل الحمام و أبدأ أتوضى:يقولك..زمان في بريطانيا كانو في القرى ينطقوا like لويك...! -أووووه...! بعدها قال بانفعال:ليش لويك..ليش مو لويف...؟! -ها...؟! -لويف يعني لوف بس على وزن لويك...! ضحكت و أنا أنشف يدّي و أخرج:تعجبني يعني أحبك..بعدين أنا من يوم ما عرفتك وأنا أحبك...! -شوف الكدابة...! قلت ببطئ:تعجبني يا علي اللهجة الحجازية منك...! -إنا لله... كملت:وإنا إليه راجعون..ليش معصب..إنتا كل شي منك حلو..حجازي بدوي كلو واحد...! -لا مو كلو واحد..إنتي عديتيني...! ضحكت:عديتك...؟!،ليه هوا مرض...؟!،بعدين يلا خلينا نروح عشان ما نتأخر...! -و سعود يختي...؟! قلت بدلع:إنتا قلت حتلبسو...! -مابغا دحين..زعلان...! ابتسمت و قلت:لو مو حامل كان بستك بس صعب عليا أرفع نفسي...! اتجه علي ليا و انحنى:نزلتلك...! بستو على خدّو فلف وجهو عشان خدّو التاني فبستو كمان...! شوية إلا هوا مدنق عشان أبوس راسو،قلت:لا يا شيخ..مسختها...! ما اتحرك علي فبستو على راسو و أنا أحسب إنو بيردلي هيا زي دايماً لكنو اعتدل في وقفتو و مد يدّو من فوق بتعالي...! انقهرت..أنا متعودة يردلي بوسة الراس دايماً...! ضربتو على يدّو و مشيت عشان ألبس سعود...! لكنو ضحك و وقفني:تعالي تعالي...! وقفت مشي و اتكتفت و أنا معطيتو ظهري...! جا من ورا يا و باسني على خدّيني الاتنين و على راسي بعدين ضربني على كتفي من ورا:روحي يا مدلعة...! قلت و أنا أحرك كتفي إلي ضربو:مابغا..مو إنتا قلت إنتا حتلبسو..بعدين أنا لسه ما لبست و إنتا تعرف أنا قد ايش أحوس مع بطني لمن ألبس العباية...! قال علي بابتسامة:أقول جود..روحي لبسي سعود و مالو داعي تغيري لبسك ما فيه شي و إذا عن العباية أنا بساعدك فيها زي دايماً...! كان فيه شدة خفيييييييفة في صوت علي،قلت بدلع عشان يخف شوية:طب..طب إنتا قلتلي إنك حتلبسوا...! علي كان يطالع فيا و أنا أتكلم..حسسني إني بيبي بابتسامتو..قلت:ليه تطالع فيا كده...؟! ابتسم و حط يدّو على أكتافي و قال بصوت واطي:تضحكيني لمن تسيري عبيطة زي الأطفال...! وسعت عيني ببراءة:أنا...؟! -لا والله...؟! بعدت عنو:خلاص حلبس سعود...! ضحك:و أنا حجهزلك عبايتك...! رحت لسعود و أنا أفكر إنو بيني و بين علي مافي أي حواجز..و معد أخجل منو زي في بدايات زواجنا..لكن لمن يعاملني كأني بيبي و يحسسني إني عبيطة زي ما يقول أحس بتوتر...! مالت عليا..كم لنا مع بعض و ما أعرف أرد عليه لمن يعاملني كأني طفلة بس على كل حال هوا قد قلي إنو ينبسط مني لمن أتصرف بديك الطريقة...! لبست سعود و لبست أنا عبايتي و ترى علي ساعدني من جد..ساعدني عشان يسكتني لإنو لو ما ساعدني كان فتنتو...! و رحنا و صلينا و اشترينا اسكريم و قعدنا ناكلو...! أنا علي كان جالس جمبي و سعود قدامنا...! علي:والله يا شيخة الاسكريم هذا فن...! )الاسكريم الفن هدا اسكريم ينباع في التوسعة (الساحة) حقت الحرم..يكون ملون..شكلو زي حق البحر لكن ملون فيه كوووول النكهات إلي ممكن تتخيلوها و طعمو..ِشي مو طبيعي..مو حلو بس يضحك و يخليك مبسوط..شي غريب!!! يا رب تيسر لعبادك زيارة الحرمين..و نصيحة مني..لمن تروحوا أول شي تفكروا تعملوه هوا إنكم تصلوا العصر بعدين تخرجوا التوسعة و هناك اقعدوا لييييين صلاة العِشا و ادعولي ^__*( قلت:ايوة الله..بس تصدق كان بريال سار بتلاتة دحين...! -لااا..أول أول كان بريال..السنة إلي راحت كان بريالين..دحين بس سار بثلاثة...! -حرمية...! -لا حرام مساكين..أتذكر مرة سألتهم ليش رفعتوا السعر قلي واحد من الرجال إنو سعر النكهات و البسكوت ارتفع فاضطروا يرفعو...! فجأة سمعت كلام فرنسي..رفعت راسي بحماس و طالعت في العائلة الفرنسية،قلت:علي علي..شوف فرنسيين...! طالع علي فيهم:طيب...؟! قلت:ايش رايك أروح أنبرش عليهم...؟! -أقول اقظبي أرظك...! (اقضبي أرضك) قلت:يا ماما..العرق طلع...! -ما أحلاكي والله رايحتلهم..منتي شايفة ولدهم ايش طوله...! -حبيبي دولا الأجانب ضُخام..هدا تلاقيه 15 سنة...! -15 سنة ايه..أطول مني بسم الله علينا...! -هما كده ضُخام...! -ما علينا..اسمعي ذي النكتة...! -ها... -يقولك محشش معصب جا عند زوجتو قلها:أقولك اليوم حصلتلي قصة غريبة من كُثر ما هيا غريبة ما حتصدقيني و حتقوليلي كذاب لكن إنتي الكذابة يا قليلة الأدب إنتي و أهلك..اطلعي برة إنتي طالق...! طالعت لعلي لثواني قبل ما أفكها ضحكة...! مسكت على بطني و أنا أحاول أكتم ضحكتي:آآه آه..حسبي الله على ابليسك يا علي..بطني...! و كملت ضحك...! قال علي بابتسامة واسعة:طب عندي وحدة ثانية..عندي وحدة ثانية...! -لاااء..خلاص ما حتحمل..تبغى تولدني إنتا...! -الله يخليكي الله يخليكي...! ضحكت على أسلوب علي و هوا يترجى..قلت:لا خلاص الله يسعدك..والله حروح فيها...! سكت علي لثواني قبل ما يقول:أصلاً ما حتنفع...! طالعت في علي من جانب عيني:من إياها...؟! -خخخخخخ...! حاولت أكتم ابتسامتي:هيا بس...! و قعدنا على دي الحالة..مبسوطين و مرتاحين..و أغلب الوقت قضينا و احنا نسمع هَروج سعود مادري لو تعرفوا لكن أحلى شي عند الأم و الأب إنهم يسمعوا كلام أولادهم لإنو من كلام أولادهم ينتبهوا إنهم هما و أولادهم كبروا أو بدأوا يكبروا...! ************************************** رجعنا الفندق بعد ما اشترينا من محل على الشارع مادري ايش اسمو بُرجرز و رحنا عالفندق و أكلنا..أنا حرصت إني ما أشرب بيبسي عشان ما ينفع حامل و برجر و بيبسي..قمة الضرر...! بعد ما أكلنا و احنا نتفرج على "نظرة على" في الجزيرة للأطفال _و على فكرة تراه برنامج مرررة حلو_ رحنا ننام و كنا مرهقين جداً...! حتى سعود ما قدرت أفرشلو طُراحة زي أمس..نام وسطنا أنا و علي بما إننا حاجزين غرفة زوجين بس..يعني ما فيها إلا سرير مزدوج...! سعود و هوا نايم كان يتحرك و يتقلب لين وصل عندي..تخيلوا ايش سوى...؟! حضن يدّي و شمني كأنو يتأكد إنو أنا أمو أو شي...! ابتسمت و أنا شبه نايمة و مديت يدّي التانية و حطيتها على شعرو..حبيبي هوا..من يوم ما حملت و هوا معد يتحضن فيا و ينام عندي كتير زي أول..سار يحس إنو يتعبني و كمان سار يحس إنو كبير...! و السبب الأكبر في كده هوا الناس..دحين يجيلك أخ و تسير إنتا رجال و مدري ايش...! الله يعينو..الولد الأكبر دايماً يكبر بسرعة...! و كنت حدخل في النومة لكن علي قرب مني و قال:جود...! رفعت راسي و قلت بنعاس:همممم... علي كان فاتح عينو و مركز على شي معين فيا...! قال:السلسلة...! طالعت في السلسلة إلي لابستها..كانت هيا ديك إلي جبلي هيا بعد شهر العسل حقنا..السلسلة إلي فيها اسمو...! قلت و أنا أجلس:كويس فكرتني...! و جيت بفسخها لكن علي قال:"لاااااا"،طالعت فيه مستغربة:عشان ما يسير لها شي و أنا نايمة..أخاف تنقطع...! قال بصوت واطي:جود أنا فرحت عشان شفتها عليكي..لا تشيليها...! فكيت السلسلة و رجعت انسدحت و طالعت في علي:الصراحة أنا أحرك يدي كتير و أنا نايمة و سعود نايم جمبي و السلسلة دي أغلى عندي من إني أفرط فيها و أنام بها.."ابتسمت و غمضت عيني"..و تراها الشي الوحيد إلي يذكرني بإني ما كنت مقدرة الكنز إلي عندي...! ما شفت تعبير وجه علي لإني كنت مغمضة و ما فتحت لكني حسيت بيد فوقي و فوق ولدي..كانت يد..أبونا و حبيبنا و حامينا..كانت يد..رَجُلي..إلي لو ألف الدنيا كلها ما ألاقي أحد يحبني زيو...! ************************************** | |||||||||
|
| |
|
06-03-14, 05:05 AM
| #25 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثاني عشر (ما قبل عصف العواطف) خرجت من مكتب أستاذتي و أنا مصدومة...! معقوووووووووووووول...؟! يا الله..أبغى أروح البيت و أقول لعلي بسرعة..لالا..حقولو في السيارة ما حستنى...! رحت جبت سعود من الحضانة و قعدت في الكافتيريا...! طالعت في ساعتي..كانت وحدة..بعد ساعة علي حيجي و أنا خلصت محاضراتي...! قعدت أفطر مع سعود و أنا أفكر باللي قالتو ليا الأستاذة...! أوكي..هدا آخر ترم ليا و أنا كنت مخططة ما أكمل عشان أفضى لسعود بما إنو بدأ يكبر و يفتح عالدنيا..كمان أبغى أبدأ أعلمو الحروف و أبغى أغرس فيه حب القراءة..لكن كلام الأستاذة خلاني أفكر شوية...! الأستاذة عرضت عليا أسير مُعيدة و أكيد تعرفوا إنو المعيدة لازم تكمل ما جستير في مدة معينة و أنا عارفة و متأكدة إنو علي ما حيوافق سواءً لازم أكمل دراستي ولا لأ..علي ما صدق على الله أخلص البكالوريوس..مستحيل يرضالي...! رفعت راسي لسعود إلي خلص فطور و طلبني الجيم بوي،قلتلو:ما جبتو...! -ليش...؟! -مافي شحن..أمس طول الليل قعدت تلعبو و ما سمعت الكلام و ما خليتو يشحن...! قال باعتراض:أنا لعبت يوم الجمعة كده...! -لأ..يوم السبت..أمس منتا فاكر...؟! -ماما مو أمس...! طالعت في سعود بعتاب:دحين أنا مو ماما...؟!،كيف ترفع صوتك عليا...؟! سعود قعد مبرطم و منزل راسو لدقيقة قبل ما يجي و يحضني...! حضنتو و بستو و قعدت أهديه..أشياء كتيرة اتغيرت في سعود في الفترة الأخيرة و أوضح شي تعبيرو عن النعاس..قبل كان يبكي لمن يبغى ينام..دحين سار يعابط و يعاند...! همستلو:يلا حبيبي تقوم عشان أعطيك جوالي تلعب...؟! رفع سعود نفسو و باسني و أخد الجوال و جلس في الكرسي إلي جمبي و قعد يلعب و أنا رجعت لتفكيري..و وسط ما أنا أفكر رن جوالي...! أخدتو من سعود و انصدمت باسم عمو...! جيت برجع الجوال لسعود بس بالغلط ضغطت عل زر الرد...! لااااااء..قعدت أردد لألأ و أنا أحط الجوال على أدني...! وصلني صوت عمو حااار عالي:جود..جود حبيبتي جود...! الجوال كان حينكسر من شدة ضغطي عليه...! عمو بسرعة:جود أنا مني عارف كيف رديتي بس فيه موضوع ضروري أبغى أكلمك فيه و أنا كلمت علي و وافق إني أمرك و آخذك إنتي و سعود من الجامعة...! كلام عمو نطقني:كيف...؟! سحب عمو نفس من كلامو الطويل المتواصل و قال:شوفي جود..دوبي مكلم علي و طلبتو و وافق..و أنا دحين قربت من الجامعة..اجهزي و تعالي معايا إنتي و سعود نروح عند أمي..أمي يا جود ميتة و تشوفك..مرة مشتاقتلك و الدمعة تطيح من عينها كل ما جات سيرتك...! انقهرت..دحين علي وافق و خطط مع عمو و بعدين خلاني قدام الأمر الواقع...! قلت بغيض:و متى كلمت علي و كيف وافق من غير ما يسألني...؟! -جود حبيبي..أنا طلبتو و وافق لكن قلي أتصل أسألك...! -تتصل تسألني...؟!،كيف و إنتا دوبك تقول إنك قريب...؟! -خلاص إنتي ما بيضرك شي..تعالي و..علي بعدين بيجي ياخذك...! قلت بقهر و أنا أوقف:بس عشان جدة و عشان علي ما يطق مشوار من البيت للجامعة و لا كان ما جيت و لا حتى فكرت...! قال عمو و كأنو يسكتني و ياخدني على قد عقلي:عارف حبيبي..والله عارف..أصلاً أنا معد يهمني إلا جدة...! اتنهدت:طب دحين إنتا برة...؟! -ايوة اطلعي و حتلاقيني...! فصلت من غير ما أقول مع السلامة...! طيب يا علي طيب..هوا عارف إني ما أحب الهبل و الحركات دي..والله بس ما أبغى أكسر كلمتو و أزعلو و لا كان سويت فضيحة و ما ركبت سيارة عمو...! لميت أشيائي و لبست العباية و خرجت من الكافتيريا و أنا ماسكة سعود بيد و باليد التانية ماسكة الجوال أتصل على علي...! كنت أمشي متجهة للمخرج لمن علي رد:ألو...! -علي..من جد موافق أروح مع عمو...؟! -بسم الله علينا..سلمي أول...! -علي بجد مني فايقتلك و زعلانة منك..كيف توافق و تتصرف من غيري...؟! -أول شي أنا مني بزر عشان أقولك و أستشيرك عالرايحة و الجاية..ثاني شي أنا ما وافقت إلا و أنا حاس إنو هذا الشي في مصلحتك..اتعوذي من ابليس و روحي..ولا عاجبتك حالتك مع عمك...؟! سكت..ما لقيت شي أقولو...! قال:تبغين شي...؟! قلت بهمس معاتب:شُكراً..علي...! و فصلت..لكن هين..والله لوريهم الاتنين...! خرجت من الجامعة و قلبي حسيتبو بيخرج من أضلاعي...! أول ما شفت سيارة عمو و عمو فيها جسمي قشعر و ما قدرت أرد على سعود إلي يسأل عن سبب وجود عمو و عدم وجود علي...! كنت مستمرة في المشي بس من جوتي التوتر و الخوف كانوا بيدفعوني لورا...! كنت خايفة من مواجهة محتومة بيني و بين عمو رغم إنو الحق..كل الحق معايا...! قلت لسعود يركب ورا و أنا فتحت باب المقعد الأمامي بيد مرتجفة...! جلست و قفلت الباب...! قلبي كان يدق و أعصابي مشدودة و كنت أحس كأنو أحد حاط حمل تقيل على راسي و عمو ما كان وضعو أحسن؛ صوتو و هوا يرد على تساؤلات سعود وضحلي قد ايش هوا مرتبك...! حرك عمو و لمن خرجنا من المواقف قال و عينو مركزة عالطريق:كيفك جود...؟! -كويسة...! **دقيقة من الصمت** قال بنبرة غريبة:كنت متوقع تسأليني كيفك...؟! اتنهدت بدون صوت و أنا أداري دمعتي..شوفتي لعمو حركت كل مشاعري النبيلة تجاه هدا الإنسان و حسيت قد ايش أنا مشتاقتلو و قد ايش أحبو...! عضيت على شفتي السفلى لمن حسيت بدموعي تتسلل لخارج عيوني...! سكتنا لين وصلنا و نزلت رغم إحساسي بإني المفروض ما أنزل لكن عشان جدة..عمو قال إنها تبكيني...! وقدام درج بوابة العمارة حسيت بصعوبة..بالعادة علي يساعدني بس دحين.. عمو ما حيقصر بس يمكن مكسوف و مو متجرء..انقطع حبل أفكاري لمن مسك عمو شنطتي:سعود تعال شيل شنطة ماما...! و جا سعود و أعطاه عمو الشنطة و قلو يسبقنا و يطلب المصعد أما عننا فعمو مسكني و قال:يلا بسم الله...! سميت و طلعت..ما كان بيدي حيلة..أنا أخاف أطلع درج لحالي و أنا حامل...! و طلعنا بالمصعد و أول ما دخلت الشقة إلي اشتقتلها موت و شفت جدة في الصالة،تركت كل شي و مشيت بسرعة _أرهقتني_ لجدة،جلست جمبها و حضنتها و بكيت..بكيت زي الأطفال لمن يكتموا و يكتموا و يكتموا لكن أول ما يشوفوا أمهم يفرغوا كل شي...! عمو أخد سعود و دخل خاصة بعد ما شاركتني جدة البكاء...! اضطريت أوقف بُكا..رغم إني اتمنيت لو أبكي في حضن جدة لين الصبح بس خوفي عليها كان أكبر بكتيييير و أقوى من رغبتي في البُكا و التفريغ...! توقف بُكايا ما منعني من إني أتشبث في جدة و ألصق راسي في صدرها..اشتقتلها..اشتقتلها..ا شتقتلها...! بعدتني عنها بعد مدة..الشي..إلي خلاني أشوف ملامح وجهها الحزينة...! قالت:وينك عني...؟!،سافرتي و معد سألتي عني...؟!،أنا يا بنتي تدرين مالي غيرك يداريني..ليش خليتنِّي...؟! مسكت يد جدة و بستها:جدة أنا ما جيت هنا إلا عشانك و لا أنا قلبي معورني من عمو و زعلانة منو...! انفعلت جدة:و أنا ضربتُه..والله إني ضربتُه و قلتلُه إن كان جود ما رضيت أنا ما أرضى...! جفت دموعي و أنا أقول بعدم تصديق:ضربتييييه...؟! -أي والله يا بنتي ضربتُه و إن شاء الله ما بتطلعين إلا راضية...! اتنهدت و أنا أقول لنفسي إني تعبت من كل شي..اتنهدت و أنا أتمنى لو كانت الأمور أبسط من كده...! أبسط...؟!..البساطة و التعقيد..أغلب مشاكلنا كانت من التعقيد و أغلب حلولها كانت من التبسيط..ياااااه..من جد الدنيا تضحك...! تضحك كيف إنها تغلطنا لمن نكون صح و تحسسنا إننا سوينا مصيبة و احنا ما نكون إلا ارتكبنا شي بسيييييييط و تاااافه...تضحك كيف إنها تحسس المجرم و العاصي و المفسد إنو ما يسوي شي في الوقت إلي يكون فيه يدمر حياة فرد أو أسرة أو مجتمع بكاملو...! رفعت راسي لسعود إلي دخل الصالة و قال بشكك:ماما...! -ها حبيبي...؟! قرب مني و قال:ماما بابا يقول لو إنتي تبكي النونو تبكي زي لمن أنا كنت نونو أبكي..بعدين..بعدين إنتو كوووللللكم تسيروا تبكوا بعدين تزعلوا..مو كويس كده ماما...! ابتسمت لسعود و سحبتو لحضني:حبيب ماما إنتا..أنا بس زعلت شوييييية بس أنا دحين خلاص كويسة...! -ماما إنتي زعلانة..أنا أعرف..إنتي أول زعلانة من الزامعة..(الجامعة)..ماما إنتي الجامعة زعلتك...؟! ضحكت عشانو نطق الجامعة صح و غلط في نفس الجملة،قلت:حبيبي الجامعة ما تزعل أحد...أنا كنت متضايقة و لمن شفت جدة بكيت..هدا كل ما في الموضوع..إنتا دحين اقعد مع جدة..أنا بدخل أكلم عمو شوية...! و بعدت سعود عني...! حروح لو..ايوة حروح لو و أوريه إنو الله حق بسسس..على طريقتني الخاصة...! أعتقد إنكم طفشتو من شغلة الإصرار و العزيمة إلي تجيني فجأة و تروح فجأة لكني مضطرة أقولكم إنو إصرار غريب خلاني أقوم...! كنت متجهة لغرفة عمو و لمن جيت بدق الباب انفتح...! انفجعت و رجعت براسي على ورا...! قال عمو:كنت..جايك...! ما رديت فوسع فتحة الباب:تعالي...! دخلت و قفل عمو الباب و جلسنا عالسرير كعادتنا..دايماً...! جلسنا ساكتين مدة قبل ما يفاجئني عمو بإمساكو أكتافي و تقبيلو راسي و هوا يقول:أنا آسف..ما رح أفسر أو أعطي أعذار..أنا غلطت بغض النظر عن الظروف و عن الأسباب و عن ردود الفعل إلي طلعت مني و منك..أنا آسـ..ـف...! رفعت راسي ببطئ وحطيت عيني الدامعة في عين عمو و قلت بصعوبة:أنا..أنا حسيت..حسيت إني خسرتك...! قلت و دموعي تزيد:أنا عماتي يكرهوني..أنا مالي من عائلتي إلا إنتا و جدة كنت حنجن لمن شفت بابا يضمك لصفو.."عليت نبرتي"..حسيت بالخطر..حسيت إني حخسرك...كمان خفت من بابا يقول شي يخسرني علي بالتالي سعود ولدي.."أشرت على نفسي و بُكايا يزيد و يعلى على صوتي" أنا بس خُفت عشان كده اتوحشت..بس والله ما كان قصدي.."بدأت أشهق شهقات متقطعة"..والله مَـ..ما.. .. ما كان قصدي أعلي صوتي عليكم أو.. .. .. حضني عمو عشان يهديني:عارف..والله عارف إنك ما قصدتي ولا أنا ما قصدت...! قلت و أنا مستمرة بالبُكا إلي زاد في حضن عمو:عمو إنتا ما تعرف بابا..بابا والله يخوف..أحسو بس يبغى يخرب حياتي..عمو فيه أشياء كتير إنتا ما تعرفها..بابا في بداية زواجنا كان يقول لعلي الحمدلله رضيت تتزوجها..بابا كان بيفتري فيا قدام كل الأطفال لمن ما تكون موجود..أنا انقهرت عشان الكل يصدقو..بابا كان يسوي أشياء كتير فيا من وراك.."طالعت في عمو" إنتا ما تصدقني صح ؟! عمو أنا والله ما أكذب..عمو إنتا تعرفني أنا ما أكذب...أنا ما أكذب...! شدد عمو احتضانو ليا:لا والله مصدقك يا جود لكن خلاص..الله يخليكي خلاص..لا تبكي كذة..لا تعوريلي قلبي...! قعدت أبكي في حضن عمو و هوا كان يمسح عليا و يهديني و يذكرني بحملي...! عمو و يدو تطلع و تنزل على ظهري:بس حبيبي بس..بس يا حبيبة أبوكي إنتي..والله يا جود ما تدري قد ايش دموعك غالية عندي..ما تدري قد ايش اشتقت لكي في حضني..اشتقت لصوتك و لكلامك..جود أنا لو غلطت عليكي في يوم هذا ما يعني إنك معد سرتي مهمة بالنسبة ليا..لأ..جود أنا أدين لكي بأشياء كثييييرة..أولها و أبسطها إنو بسبب وجودك إنتي نضجت أنا و سار عندي عقل و سرت رجال..هذا أبسط شي..غير الحب و الرضا إلي وجودك سببو ليا..إنتي لو مو موجودة في حياتي كان مداني إنسان تافه من بنت لبنت و من استراحة للتانية...! كنت تدريجياً قاعدة أهدى..لييييين ما بعدت عن عمو و قلت و أنا أمسح دموعي:آسفة عشان رفعت صوتي عليك...! قال عمو و هوا يمسح على وجهي:لا حبيبي..أنا إلي آسف إني ما وثقت فيكي و أياً كان إلي سويته شوية قدام إلي سواه سعيد طول عمرو معاكي بعدين حتى لو..أنا أعرف قد ايش إنتي متأذية منو...! -الناس طاقات و قدرات و أنا صبري خَلَّص و معد فيا ديك القوة و الصبر إلي كانو فيا و أنا بنت...! تابعت:كمان أنا انقهرت..حسيت إنو حتى لو قلت الكلام إلي قالو بابا أنا أظل حرمة كبيرة..أنا مني طفلة عشان تحاسبوني على أغلاطي و تعاقبوني عليها..أنا كبيرة و متزوجة و إذا ما كان ليا احترامي و استقلاليتي دحين فمتى...؟!،أنا لو حسيت إني غلطانة أروح بنفسي و أصحح غلطي..مو تجي إنتا أو أي أحد تاني و يجبرني أسوي إلي هوا يشوفو صح...! أنا أعترف إنو أنا سمعت كلامك بمحض إرادتي رغم إنو علي عرض عليا ما أروح و يوقف معايا في وجهكم كلكم لكني أنا رفضت و أجبرت نفسي أروح رغم إني كنت كارهة البيت و أهلو و كارهة فكرة وجودي هناك بس سمعت كلامك عشان.."اتوقفت عن الكلام و طلعت هوا"..أنا بس كنت مابغا أكسر كلمتك كمان قعدت أفكر..كيف حتسير علاقتي معاك لو ما سمعت كلامك...؟!،خيالات كتيرة جاتني خوفتني و.. ابتسمت و أنا أهز راسي:ما..ما أعرف كيف أقولك بسسس... نزلت راسي لثواني بعدها رفعتو:أنا انفعلت..أنا أحس إني ما كنت أنا..أنا حتى أحس مني قادرة أناقش أحد في الموضوع و في الكلام إلي قلتو عشان كده أبغى الموضوع دا يتقفل نهائياً و كل إلي يهمني إنتا..أنا بابا معد بيني و بينو شي..و أنا أصلاً مابغا يكون بيني و بينو شي..أخواتي..عارفة خسرتهم بعد ما كنت على وشك أكسبهم و عبدالرحمن مليون بالمية سحب نفسو و خرج منها و عبدالإله تلاقيه أعطاني كل حسناتو من السب و الشتم و الحش فيا...! أنا كل دا ممكن أتجاوزو لكن إنتا مستحيل..أنا مستحيل أستغني عنك أو أسمح لأي واحد ياخدك مني..إنتا أبوية أنا و أنا بنتك غصباً عني و عنك و عن الناس و عن بابا و عن مجموعة الأوراق الغبية إلي تدرجني تحتو و تحت زوجتو...! عمو جفنو كان يرتجف،قال بصوت مكتوم:أحياناً أتمنى أكون بنت..أبكي من غير أي إحساس بالنقص...! -ابكي..عمرها الدموع ما ارتبطت بالضعف أو نقص الرجولة..الرسول بكي...! -_عليه الصلاة و السلام_،بس يا جود احنا اتربينا على دي الفكرة..كل إلي تقوليه صح لكن ما عرفناه إلا نظري...! -نظري...؟!،كل الأشياء الحلوة في الحياة نظري،العقلانية و المثالية و المنطقية..كلها أشياء نظرية أو سارت نظرية في عصرنا دا...! ابتسم عمو:منطقية...؟! قال بعد مدة:تصدقي في الفترة الأخيرة سرت أكرر nonsense , nonsense , nonsense...! -nonsense...؟!،حلوة الكلمة دي..أحسها معبرة...! -أحس حياتك على أساس حقيقتك و كل الأحداث إلي سارتلك و سارتلي..أحسها كلهاnonsense...! ابتسمت:أحس قرفت من الكلمة..كررناها كتير...! ابتسم عمو ابتسامة صغيرة...! قلت:بس ايش قصدك بالأحداث إلي سارتلي...؟! -عندك زواجك إلي كرهتيه في البداية و دحين متعلقة فيه زي الـ...كيف أقولها ذي...؟!،إنو..إنو مرة متعلقة فيه..مرة...إلا جود..إنتي لدي الدرجة مرتاحة مع علي...؟! أخفضت بصري:علي...؟! طالعت في عمو و ابتسمت:علي عفش و عصبي و غيور مرة و أحياناً..قروي.."ضحكت بخفة"..بسسسس أحبو..كفاية إنو محسسني إني ملكة و مافي مني اتنين و ما أأشر على شي إلا و يجيبو..ما أقول إلا و يسمع..علي يحبني أكتر مما أنا أحبو..علي.."طالعت في عمو"..ما حوقف لو بدأت..المهم إني مرتاحة معاه و أبغاك إنتا كمان ترتاح مع محروسة حتتزوجها...! وجه عمو اتقلب...! قلت بسرعة:عمو أوعدك ما حتحس بشي..و ما حيسير إلا واحد من اتنين..يا حالك تتحسن يا تقعد زي ما إنتا..عمو الله يخليك اسمح لي أبدأ أتصرف..و لو كلمتك في الموضوع تاني فحيكون بخير و لو ما كلمتك فاعرف إنو مافي نصيب...! قال عمو بشدة:جود أنا مني مستعد أقعد مع وحدة تحسسني بالنقص...! -هدي كل مشكلتك...؟! -لأ..كمان مابغا أحرم وحدة و أعيشها معايا عذاب...! -عمو..البنات دحين عاقلات..الوحدة سارت بس تبغى واحد كويس يضمها و يستر عليها و بعدين أنا مستحيل أورطك..لمن أفكر في وحدة مجرد تفكير حكون واثقة منها و من عقلها...! -ليه..فيه وحدة محددة...؟! -فيه كده وحدة...! -جود أنا هاذي السخافات ما تعجبني...! -مو سخافات..إنتا بس قول موافق...! -لأ مني موافق..جود أنا ما حتزوج لعبة عشان تقوليلي فيه كده وحدة...! -طيب آسفة إني استخدمت هدا التعبير..أنا فيه كم وحدة أعرفهم و واثقة منهم...! بيني و بينكم..هيا وحدة لكني مابغا عمو يشك...! وقف عمو و قال و هوا معطيني ظهرو بلا اهتمام غريب في غير محلو:سوي إلي تبغيه و أنا مالي دخل...! -يعني موافق...؟! التفت:جود..تعرفي لو مو مزعلك و أبغى رضاكي كان قلت لأ..لكني مضطر أقولك موافق..بس..حطي في بالك إنك ممكن تتعرضي لموقف محرج بسببي...! قطبت حواجبي:كيف يعني...؟! قال و هوا يرفع أكتافو:عادي..يعني ممكن فجأة أفركش كل شي بدون أي حساب أو حشمة لأحد..و شوفيني قلتلك عشان ما تزعلي مني...! و جا بيخرج لكني وقفتو و أنا أقول بدلع مُنهي للموضوع:عمو..مو دوبنا اتراضينا..مافي hug عالطاير كده...؟! التفت لي عمو و ابتسم..حضني و قال بحلاوة:آسف..نسيتيني بكلامك في موضوعي...! -عارفة..مو بنتك و إنتا أبوية...! بعدها باسني و همسلي بلطف:بس المرة الجاية أبغاكي ألين من كده...! طالعت في عمو مستغربة فغمزلي و خرج من الغرفة و أنا مشيت وراه...! رحنا و قعدنا في الصالة عند جدة و سعود و منورة إلي قامت للمطبخ عشان عمو...! قال عمو بمرح:ها يا ماما..جودة و رضيت و إنتيييييييييي...؟! طالعت جدة في عمو باحتقار:أوووووه..خيابة..وال� �ه إن ما معك إلا الخيابة...ماما..قال ماما...! عمو اتكسح و أنا ضحكت...! مسكين عمو..يعني هوا وين و وين لمن يستعبط...! دق جوالي برنة وحدة..رفعتو و كان علي..الظاهر إنو خايف أكون في نص نقاش يقوم باتصالو يقاطعني...! كنت حرجع أتصل لكن خليه يولي..أنا زعلانة منو..صح إني شايلتلو شكراً حلوة جوتي عشاني اتصالحت مع عمو لكن برضو زعلانة منو لإنو خطط مع عمو عليا من غير ما يقولي...! رفعت راسي لعمو إلي ينادي..قلت:هلا...! -ايشبك...؟!،مسكتي الجوال و سرحتي..مين...؟! -ها..علي...! -طب ارجعي دقي..خليه يجي...! -طيب...! تصدقوا لازم أدق...! بكرة دوامات ولازم أرجع البيت عشان علي بكرة مداوم...! رجعت دقيت زي الكلبة...آخخخ..والله كنت أبغى أستغل الوضع و أزعل بس للأسف...! وصلني صوت علي ساخر:أشوفك دقيتي..مو كنك كنتي زعلانة.."قال يقلدني"..شكرا علي...! انقهرت..علي الحيوان..لسه دوبي أمدح فيه..شكلي حسدت نفسي...! فجأة إلا عمو نط و أخد الجوال:علي علي...! و كان دا إلي سمعتو: (-ايش...؟! ضحك عمو بقوة:أقول تعال تعال..تعااااال اليوم العشا على حسابي...! -كبسة من يد منورة تاكل أصابعك وراها...! -ليش ايش فيها الكبسة...؟! -إلا على حسابي..أنا مشتري كل شي...! -تعال تعال...! -لا حتتعشى إن شاء الله...! ضحك:طيب حتتغدى...! ضحك مرة تانية:علي بلا غلاسة..خلاص فطور...! -يا أهبل فطور رمضان قصدي...! -هيا خذها...!) أعطاني عمو الجوال و حطيتو على أدني...! قال علي:جود...؟! -ايوة... -تبغينا نتعشى عند عمك ولا لأ...؟! حسيت علي كأنو يبغى يقولي:"أنا لسه بأستشيرك و أحترمك"...! قلت:براحتك...! -أنا قلت تبغينا..يعني إنتي ايش تبغي...؟! -إنتا ايش يناسبك...؟! -إلي يناسبك...! -أنا أبغى إنك تجي و نقعد معاهم و نتعشى بعدين نروح البيت...! -خلاص سار...! ابتسمت:شكراً..يلا تعال دحين...! -طيب بس وين بلوزتي الكروهات...؟! -ممممم..في الغسيل...! -يا ربييييه..ايش ألبس أنا...؟! -البس أي شي...! -ما فيا حيل أفكر...! -البس جينزك العادي و البس التي شيرت السودا إلي مكتوب عليها بالدهبي...! -طيب طيب..يلا مع السلامة...! -مع السلامة...! -تبغو شي و أنا جاي...؟! قلت بصوت عالي:منورة ناقص شي...؟! -مافي لبن..فلفل أسود...! قلت لعلي:لبن و فلفل أسود و..شبس...! -شبس ايش...؟! -آآآه تسالي كاتشب و...ليز حار الله يخليك...! -ليش اثنين..ليش الفقعة...؟! -آآآ عشان الحار ليا و الكاتشب للبيبي...! -حجيب حار بشرط يكون فيه جبنة سايلة و عيش عشان أسوي سندوتش...! ضحكت:فيه فيه...! ضحك:هَيْ يلا مع السلامة...! -الله يسلمك...! و قفلت...! قال سعود:ماما أنا أبغى ليز بالبُجنة...! -مو حلوة كثرتو..يجيب السومة...! -إلا ماما..أبغاااااا...! مديتلو الجوال:خد اتصل على أبوك...! قال عمو:جود دحين إنتي من جدك..لبن و فلفل أسود...؟! طالعت في عمو:وي عمو..لا تزعلني منك..ما فيها شي...! -عارف بس أحس غباء..لبن..و فلفل أسود...!!! -و شبس كمان...! ابتسم عمو فرديتلو ابتسامتو و بعد كده دخلنا في جونا المعتاد من الكلام و الفُرجة عالتلفزيون...! ^^^^^^^^^^^^^^^^^^^^^^^ ارتمى علي عالسرير:منورة هذي..شي خطير..أحبها..تصدقي...؟! طالعت فيه و أنا أغير و أعلق ملابسي:لا يا شيخ..كل دا عشان الكبسة...؟!،أنا أسوي زيها..أصلاً هيا إلي علمتني...! -طالع فيا:كم لك ما سويتي كبسة لحم..والله إني اشتقت لها..ترى حلمت بها و احنا في المدينة...! -يا سلام..جيب لحم و حسويلك كبسة...! -مو إنتي حالفة عليا ما أدخل ذبيحة البيت قبل ما تولدي...! قلت و أنا أتوجه للسرير و أنسدح:والله..ما فيا حيل أنا..أقطع و أنظف ومدري ايش هوا..بعدين تعال هنا..ليش ما جبتلي صدور الدجاج إلي طلبتها منّك...؟! ضرب جبهتو:يااااااا الله..أنا حمار فتحت الموضوع ليه...! -وي علي..ايش حيسير فيك يعني لو جبتلي إلي طلبتو منّك...؟!،ما تبغى تريحني يعني...؟! طالع فيا:أنا نسيت و كنت مبسووووووط لإنك نسيتي الموضوع لكن دحين فكرتك...! ابتسمت ابتسامة غريضة فقال:بس خلاص طفشتيني..قلت دحين..عارف قلت دحين...! قلت و أنا ما زلت محافظة على ابتسامتي:و كمان قلت فكرتك...! -بس عاد جود..مصختيها..طفشو الناس من تعليقاتك...! قلت بطفولية:حتى إنتا ما يحبو تعليقاتك...! سكت لثواني و هوا يطالع فيا بتأمل بعدين ابتسم و قال ببساطة:وجهك منور...! -ها...؟! -وجهك..منوووور...! حطيت يدّي على خدّي:من..من جد...؟!،ليه...؟! ابتسم:منتي عارفة ليه...؟! طالعت في علي باستغراب،فقال و هوا يحط يدّو على خدّي:عشان كذة كنت أدعي ربي يفرجها بينك و بين عمك..كنت عارف إنكم لو اتصالحتو نفسيتك حتتحسن...! ابتسمت و أخفضت بصري،قلت بصوت منخفض:ليه كنت وحشة...؟! ضحك:لا اسم الله عليكي ماكنتي وحشة..بس ذحين فيكي شي غير.."تابع و هوا يأشر على قلبي"..أحس هذا مرتاح...! ابتسمت:لو مو إنتا حولي ما كان حيرتاح..سواءً عمو صالحني ولا لأ...! ابتسم فاتحمحمت...! فطس علي ضحك:من جدك إنتي...؟! -اييييش...؟! -ايش ذا..قلك تستحي يعني...؟! صرخت بقهر:هيي..بس كده..يعني حمحمة حقت البرستيج...! -برستيج...؟!،الله يخلف البرستيج ضايع بينا..والله ما أحس بهبالتي إلا معاكي...! ابتسمت:و أنا ما أحس بسخافتي إلا معاك...! -و هبالتِك...!؟ قلت و أنا أحط يدّي على خصري:و سخافتَك إنتا كمان...! -أنا ما عندي سخافة...! -و أنا ما عندي هبالة...! -لا عندك هبالة بدليل ذاك اليوم لمن كثرتي ملح في الغدا عشاني خاصمتك على ملحك القليل في الغدا إلي قبلو...! -حتى إنتا عندك سخافة بدليل إنك خاصمتني على الملح القليل بدل ما تطلبني ملاحة و تزود الملح قد ما تبغى...! -طب شسوي قهرتيني...؟! -حتى إنتا قهرتني...؟! سكتنا أنا و علي لثواني و احنا نطالع في بعض قبل ما نفكها ضحكة...! قلت:كل واحد فينا أهبل من التاني...! قال:و كل واحد فينا أسخف من الثاني...! -لاااااء لو سمحت أنا سخافتي لا يضاهيني فيها أحد...! -و أنا هبالتي و عكاستي لا تقاوم...! سألت و أنا أعطيه نظرة:من جد...؟! قال و هوا يرفع حواجبو و ينزلها بسرعة:ايوة ولا ايش مطيح بنات العائلة فيا غير عنادي...! -لا والله...؟!،أصلاً وين بنات العيلة..كلهم في ديرتك...! -اللللللمهم فيه بنات عيلة و كلهم يحبوني...! قلت بحقد و غيرة:لأ مو كلهم يحبوك..أصلاً لمن رحت الديرة أول كلللللهم كان عندهم ذكريات مو حلوة معاك و كل شوية وحدة تجي تسألني.."قلت أقلد أصواتهم"..جود لسه علي مدري ايش..لسه يحب مدري ايش يسوي...و بلاوي تانية كتير...! -طيب يختي ايش فيكي حقدتي..وجع..أعوذ بالله ما ينمزح معاكي...! قلت:علي أنا لسه قاعدة أمزح...! -لا بالله...؟! -ايوة...! -بغت عيونك تذبحني و تمزح أجل لو ما تمزحي...؟! و على كده...استمر أحلى وأسخف حوار ممكن يدور بين اتنين...! ********************************* سعود،،، سحبت نفس و أنا أسمع "التووووووت" و أستنى سعيد يرد...! يا رب افرجها من عندك...! سعيد:ألووووو... -ألو..ايوة هلا سعيد..كيفك...؟! -الحمدلله بخير..إنتا كيفك...؟! قلت و أنا أهز راسي لسبب ما أعرفو:كويس..كيف الأولاد و كيف أهلك و كيف مها..إن شاء الله مرتاحة...؟! ضحك سعيد:لا مرتاحة و مبسوطة مرة...! ابتسمت:الله يوفقها...! سكتنا لثواني قبل ما يقول سعيد:إلا وينك عنا..من يوم الملكة ما شفناك...؟! اعتدلت في جلستي و أنا أقول:مشاغل و ظروف و لخبطة نوم..عارف إنتا الوضع...! قال بقلق:ليه سعود..عندك شي شاغلك...؟! شخصياً ما عندي لكني استغليتها فرصة و قلت و أنا أتنهد:كثير أشياء شاغلتني يا سعيد...! -خير سعود..ايش فيه...؟! -جود يا سعيد..جود...! -جود...؟!،ليش ايش عندها كمان...؟! ما عجبتني نبرة سعيد أبداً لكني ما أعتقد إنو وقتو أحاسبو على نبرتو دحين...! قلت:أنا و جود اتراضينا و كل شي سار تمام الحمدلله و انزاح الهم عني...! -طيب...؟! -سعيد رفعت سماعة على جود من يوم الخميس...؟! -سعود أرجوك لا تكلمني في هذا الموضوع و اسألها هيا ذا السؤال..راحت المدينة بلا حشمة لأي أحد..سوت إلي سوته و خربت على بنتي ملكتها و فرحتها إلي ما تتكرر و خرجت...! كان نفسي أقول:"إنتا خربت على بنتك"،لكني كنت أبغى أقنعو مو أتمشكل معاه...! قلت:سعيد جود تعبانة و بعدين هذي أول مرة ترفع فيها صوتها...! -أول مرة أو آخر مرة ما يهمني..أبوها و عيب عليها إلي سوتُه...! "و هيا بنتك و أحسن منك"،برضو شي كان نفسي أقولو...! قلت بهدوء عشان يسمع لي:سعيد المفروض تكون حاسس بها..إنتا لمن غلطت كنت تبغى من يسامحك و لقيت..كمان هيا ذحين تبغى من يسامحها...! -بس أنا عانيت لين ما لقيت من يسامحني..لازم تعاني زي ما عانيت عشان تحس بغلطها...! -عانيت...؟!،عانيت كم...؟!ما مر شهر إلا و جود عندنا و إنتا معانا عادي..لا و تطلبنا بكل ثقة ندخلها جوة عشان ما تشوفها...! **كان سعيد بعد ارتكاب جرمه يطلب من أخيه الصغير بأن يدخل ابنته الرضيعة (جود) لإحدى الغرف الداخلية لأنه يكره رؤيتها...! قال سعيد بنرفزة:طيب شهر..خليها تستنى شهر و بعدين يسير خير...! سخافة !! ، الشي الوحيد إلي جا على بالي هوا إنو سعيد إنسان سخيف...! -طيب ليه ما تكون أحسن منها و تروحلها و صدقني الكل حيشهد إنك الكويس و الصالح إلي تعفو عن أخطاء الناس..والله الكل حيشهد لك بكذة...! سكت سعيد..شكلو قاعد يفكر...! ابتسمت بسخرية..هذا إلي هام سعيد..الناس و نظرتهم..الشغلة عندو مو شغلة دين و عدل و حق..الشغلة عندو شغلة ناس و كلام و سمعة...! قال:خلاص يا سعود..بكرة و أنا عندها و إن شاء الله إنها بتحفظ لي هذا الشي...! قهرتني الجملة الأخيرة لكني كالعادة ما قدرت أقول لسعيد الصراحة في وجهو...! -إن شاء الله ربي يفتح عليكم و يجمع بينكم بالخير...! -آمين..هيا أبوية تبغى شي...؟! -لا سلامتك...! -الله يسلمك..مع السلامة...! همست:"مع السلامة" و حطيت الجوال جمبي عالسرير...! يااااااااااا الله..كلمة "أبوية" ذكرتني بإنو سعيد عمرو ما قصر معايا في شي..و كان بالفعل في أيام كثيرة زي أبوية لكن... اتنهدت..سعيد غريب..غريب كيف إنو يقدر يكون مثال الرجل الصالح عند ناس و مع ناس ثانيين يكون مثال الرجل "الفحل". انقطع تفكيري عن سعيد و اتجه ليا..ايش دوري...؟!،كيف لازم أساهم في هذي المشكلة...؟! يا رب..مني عارف كيف لازم أتعامل أو _بالأصح_ أرشد جود للطريقة الصح إلي لازم تتعامل بها مع أبوها...! أوكي..أكيد ما حغصبها تحبو أو تهتم فيه لكنها لازم تكون موجودة حوالينو...! يعني..مثلاً تتصل عليه زي ما تتصل عليا..لا لا ما تتصل عليه زي ما تتصل عليا..بس على الأقل توريه إنها مهتمة أو تتظاهر بالاهتمام..تحسسو إنو أبوها..بكده سعيد يهجد عنها..ترى سعيد إنسان عاطفي؛بسهولة يحس إنو ضحية و بسهولة يحس إنو مذنب،رغم إنو إحساسو بإنو ضحية أكبر و المشكلة إنو لمن يحس إنو ضحية ممكن يبدأ يسوي أشياء شيطانية بس عشان يتخلص من هذا الإحساس..فعلاً شي عجيب...! فجأة اتجه تفكيري لجود..جود مشكلتها إنها مهتمة كتير بعائلتها..أحسها تتوحش أول ما أحد يهوب ناحية علي و سعود...! اتنهدت..أنا زمان كنت كده مع جود..بس دحين خفيت..يمكن عشني سرت أحس إنو وراها أحد غيري..رغم إنها ما تحسسني بكده..جود كل ما يسير لها شي تقولي..و بصراحة هذا شي يفرحني..جود تحسسني إني لسه مسؤول عنها..ما زالت تاخذ رأيي في أشياء حتسويها و إن كان علي وافق و كلو تمام...! أحياناً أحاول أتخيل نفسي لو اتزوجت..هل حأحسس جود بنفس دا الإحساس ولا علاقتي بها حتسير سطحية..آه..أصلاً ما حتزوج..ليش أتعب نفسي بالخيال...؟! إلا صح..جود اتحركت...؟!،سوت شي...؟!،أنا أعطيتها الإذن و قلتلها سوي إلي تبغيه..يا ترى ايش سوت و لو ما سوت ايش حتسوي...؟! أنا مني مستعد..هيا كلمة رميتها بلا اهتمام بس عشان أرضي جود..لاء..لاء..مابغا أرتبط..أنا راضي بقدري و مابغا أي شي يتغير..حالتي عاجبتني..يا ليت لو جود تفهم..لكنها ما حتفهم..لإنها,, ما تبغى تفهم...! ********************* | |||||||||
|
| |
|
06-03-14, 05:10 AM
| #26 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الثالث عشر (عصفُ العواطف) جود،،، كنا أنا و سعود قاعدين نتفرج أنا و أخي على سبيس توون..دوبنا خلصنا فطور وقاعدة أتفرج معاه...! سعود كان جالس جمبي و حاط راسو على بطني و يقول:ماما بعدين أنا أسير سامي والنونو وسيم...؟! ضحكت:طب ممكن النونو بنت...! -عايدي..خلي اسمو وسيمة...! قلت بعجب:ما شاء الله سعود..عرفت كيف تخليها مؤنث...! طالع سعود فيا باستغراب فقلت و أنا أمسح على شعرو:يبعدين تدخل المدرسة ويعلموك اللغة العربية...! تصدقوا أطفالنا أذكى أطفال...؟!..هيا بالله ايش عرفوا بالتأنيث..شوفوا هوا عرف يأنث رغم إنو مو فاهم فكرة التأنيث...! أتذكر مرة سمعت دكتور طارق السويدان يقول:"الطفل العربي عبقري و مبدع لين 7 سنين و 7 سنين عندنا سن مدرسة" و كان يقصد إنو مدارسنا بتدمر الأطفال و تخرب أفكارهم و تشغلهم بأشياء المفروض ما يعرفوها باسم الدين..زي عذاب جهنم و القبر..أطفال ما اتعدوا السبعة سنين يكلموهم في أشياء زي..لا الله ولا رسولو بيرضو بكده...! من جد عندنا بيكبتوهم و يدمروا مواهبهم...! قلت و أنا أربت على ظهر سعود عشان يقوم:سعود جيبلي جوالي...! قام سعود و جاب الجوال و طالعت أنا في الساعة..كانت 11 قبل الظهر..يا رب يكون أحد راسل لي رسالة..طفشانة...! اتذكرت فجأة موضوع الإعادة..ما كلمت علي أمس بسبب الروحة لجدة و عمو..بس يلا..أهو اتصالحت مع عمو...! مدلي سعود الجوال و راح لعند التحفة إلي في دولاب التلفزيون..مادري ايش يسوي بالضبط بس كان قاعد يتفحصها و يقلبها في يدّو و ينقل بصرو بينها و بين التلفزيون...! طالعت في الجوال..ولا مسج واحد حتى...! تصدقوا..كنت متوقعة مسج كده حلو من عمو لكن خابت توقعاتي..بس خليني أكون صريحة..هوا أمس بحركاتو و نظراتو ليا وراني الاعتذار في أقوى حالاتو..يعني المسج ما كان حيفرق معايا مرة...! و بما إني طفشانة ألفت مسج كتكوت و خفيف كده و رسلتو لعلي..عل و عسى يرد...! جاني سعود بالتحفة إلي كانت على شكل سفينة و قال:ماما..وين السواق...؟! -مافي حبيبي سواق..هدي زي اللعبة...! قعد سعود يمشي السفينة عالكنبة جمبي بعدين طالع فيا و قال بسعادة:أنا السواااااق...!ابتسمت و ناديتو و جلس جمبي..لفيت يدّي حولو و نزلت راسي لو:إنتا تبغى تسير سواق...؟! -مممممم..بس على شرط...؟! -ايش...؟! -مابغا زي رشيد أنام في البرة..أبغى أنام معاكي...! ضحكت..سعود قصدو برشيد سواق أهل علي...! حضنتو:اسم الله على حبيبي..إن شاء الله أشوفك دكتور في الـ..سعود إنتا ايش تبغى تسير...؟! قال بتفكير:أنا أبغى أسيييييييير دكتور في الجوم بوي...! -وي سعود..كيف دكتور في الجيم بوي...؟! -يعني عادي..أسير دكتور الجوم بوي...! -كيف يعني دكتور الجوم بوي..يعني لمن يخرب الجيم بوي تصلحو...؟! -أممممم..ممكن بس أكتر أكتر دكتور في إلي يلعب كل الألعاب من غير ما..الماما حقتو تقولو لأ و كمان هوا يعرف كللللل الألعاب و كل شي جوة اللعبة الناس ما تعرف إنو في اللعبة الشي إلي ما يعرف و كمان محد يعرف السر..هوا سر محد يعرف السر دا إلا دكتور الجوم بوي...! طالعت في سعود بابتسامة..سعود سار ينطق كلو صح لكن يمطمط في الكلام و يقولك بدل الجملة تلاتة...! حضنتو و بستو:يا ربي أشوفك يوم مهندس أجهزة ألعاب...! -ايش يعني...؟! -يعني تشتغل مع سوني ولا تبغى مع نيتندو...؟! طالع فيا بحواجب مقطبة:أبغى مع الجوم بوي...! -يعني مع نيتندو...! -ايوة خلاص مع نيدينتو...! ابتسمت و أنا أحاول أكرر الكلمة عشان ينطقها صح:تبغى تشتغل مع نيتيندو..إنت تبغى تشتغل مع نيتيندو عشان نيتبندو هما إلي عملوا الجيم بوي...! -ايوة..نيـ..تييييـ..ندو..نيتين ننـ..دو...! ابتسمت و هزيت راسي...! أما سعود فاتذكر جيم بويو وراح جري يجيبو و قعد يلعب في السيب..سعود يحب يقعد في أماكن غريبة..في السيب في نص المطبخ..عادي في أي مكان عجيب تلاقيه...! رن جوالي بنغمة رسالة..يا رب يكون علي رادد عليا...! و بالفعل كانت من علي بس محتواها كان: "في اختراع اسمه تستنيني لين أجي البيت و تقولي لي ذا الكلام في وجهي أما و أنا في الشغل...!" رسلت و أنا أحس بقهر: "كلك ذوق حبيبي" رجع رسلي بعد دقايق: "هههه..لا تزعلي..أنا انقهرت عشان قرأت الرسالة وروقت لكن بعدها المسؤول عني ناداني يبغاني في شغل..كان يكلمني و أنا مني معاه و آخر شي قلي:"التناحة ذي ما أبغاها هنا"..وجع يقهر..أقلدلك هوا بعدين..أحبك..بس لا تقولي لأحد *_^" ابتسمت و حطيت الجوال على جمب و قعدت أتفرج عالتلفزيون و أنا مبتسمة...! رن جوالي فرفعتو و اختفت ابتسامتي علطول...! قعد يرن مدة بعدين وقف لثواني و رجع يرن...! سحبت نفس و رديت:نعم...؟! -السلام عليكم...! -وعليكم السلام....! -كيفك...؟! -الحمدلله...! سكت بابا لثواني بعدين قال:ما أشوفك سألتيني عن حالي...! قلت بدون مشاعر:كييف حالك...؟! -بخير...! قالها بدون نفس..انقهرت..كيف يتكلم معايا بدي الطريقة..و كأنو متفضل عليا رد على سؤالي...! كنت ساكتة و أستناه يتكلم..ما كان عندي أي استعداد علشان أبدأ الكلام...! -أشوفك ساكتة...! ايش يتوقع مني..أشكرو على اتصالو مثلاً...! -جود رُدّي...! قالها بابا بشدة استفزتني...! كنت قاعدة أفكر في شي قوي..الكلام إلي حقولو لازم ما يكون شي عادي..لازم كلماتي تكون ما تنسي...! بابا باستنكار:جود!!! قلت ببطئ شديد:بابا..أحبك...! -ها...؟! ضحكت:اييييييييوة..ايوة أحبك..أحبك قد السما و قد البحر..أحبك حب مو طبيعي..شي فظيييييييع...! -جُـ..جود إنتي... بابا كان متلعثم و حالتو حالة،قلت بتعداد:أول شي نبذتني و رميتني على عمو وجدة وهناك اتربيت أحسن تربية..أنا ما أقول إنك ما كنت حتربيني لكن ما كنت حتربى بنفس قيمة الحب إلي اتربيت بها..جمعتني مع علي غصباً عني..و دحين عارفة محد حيريحني غيرو.. و بدعوتك خليتني أسقط في وقت ما كنت مستعدة فيه للأولاد..بتسببك بمشكلة بيني و بين عمو خليتو يراضيني وأجبرتو..يسمحلي أسوي إلي أبغاه..إنسان سوا كل إلي سويتو حرام ينكره..حرام ما ينحب..ولا إنتا شايف غير كده...؟! قال بابا بتنهيدة:ما أدري يا بنتي أصدقك ولا لأ...! أكره نبرة بابا دي..تحسس سامعها بإنو حقيييير و مو متقي الله فيه..على عكس الواقع...! اتنهدت:إلا ما قلتلي..ليش اتصلت...؟! -و هذا سؤال تسألينُه أبوكي...؟! -لا بس قلقت..يعني مو متصل في دا الوقت إلا و في شي...! -إنتي شكلك تبغي الدُغري...شوفي جود..أنا جايك ذحين...! -نعم...؟! -يا بنتي ما يسير..شوفي أنا بقدر ظروفك و أتجاوز و أقولك ما يسير..المفروض إنك ترحبين فيا...! -ما يحتاج تقولي أنا أعرف الواجب لكن استغربت..إنتا فاجئتني...! -خلاص طيب أنا جايك ذحين...! قلت بأسلوب حاولت يكون لطيف:طب..يعني بس حتمر..لإنو أنا مني جاهزة و علي يرجع تعبان ما يقدر يشوف أحد...! -و إن كان..في شي اسمه أسلوب...! -آسفة..إنتا فاجئتني..كمان..علاقتي بك ما تخليني أو تخليك ترحب بيا في أي وقت...! -قصدك نظرتك لي...! عضيت على شفتي السفلى..كنت عارفة بابا ما حيفهم كلامي لكن ليش قلتلو..مادري...! -طيب ما رديت عليا دحين..إنتا بغيتني في موضوع...؟! -ايوة بكلمك في شي و بمشي...! ابتسمت:أجل حياك الله...! -بدري!! و قفل،حطيت الجوال جمبي و قمت رحت لسعود إلي ما زال يلعب في السيب...! قلت:سعود...! -نعم...؟! -حبيبي قوم ادخل غرفتك..جدو ذحين جاي و أبغاك تقعد في غرفتك و ما تخرج هوا يبغاني في موضوع...! قال بملل:جدو أبوكي...؟! -ايوة...! وقف و قعد يبربر "يتحلطم" و هوا يدخل الغرفة:كل ما يجي إدخل الغرفة إدخل الغرفة..ليش هوا مو إدخل الغرفة؟!" صادق سعود..بابا عمرو ما جا كزيارة اب عادية لبنتو...! روقت الصالة و جهزت شاهي في طقم مرتب و قعدت أستنى...! ما استنيت وقت طويل لين ما دق الجرس و قمت و قلبي يدق بقوة...! حسيت بالغيض من نفسي..ليش أتوتر..ليش مني قوية و جامدة..ليش دقات قلبي و حرارة جسمي يخونوني في المواقف دي..ليش...؟! فتحت الباب بعد ما اتأكدت إنو بابا و بكل غباء أخفضت بصري و أنا أقول:اتفضل...! دخل بابا:زاد فضلك...! قفلت الباب و أنا أسحب نفس أما بابا فجلس في الصالة قبل ما أقول _كعادتو_...! كنت حتجه للمطبخ أجيب الشاهي و بقية الأشياء لكن بابا وقفني:جود..تعالي اجلسي...! -الشاهي جاهز...! -ما رح أشرب شي عندك...! مادري هل قصد بابا يهينني أو يجرحني بجملتو دي...؟! جلست في نفس الكنبة إلي بابا كان جالس عليها..كانت طويلة كفاية عشان يكون بيني و بينو فراغ معقول و مُريح ليا...! إلي قطع الصمت كان أنا،قلت:ايش الموضوع إلي بغيتني فيه...؟! طالع بابا فيا بابتسامة:ايش هذا..لا سلام ولا كلام...! طالعت في بابا لثواني قبل ما أقول:كيفك...؟! -بخير ما دام إنتي بخير...! يا الله قد ايش أحب دي الجملة من علي و عمو و جدة..أحسها طالعة من قلب..أحس إني لو قلتلهم إني كويسة حيرتاحو و يسيروا من جد بخير...! -بابا ايش الموضوع إلي بغيتني فيه...؟! قطب حواجبو:يا بنتي إنتي ليه كذة..فيكي عجلة و قلق و علطول مربوشة...! قلت بقهر:طبيعي بقلق..إنتا من يوم الخميس ما سألت عني..رحت المدينة و رجعت ولا كأنو شي..دحين..تتصل عليا في الصباح و تقولي ابغاكي في موضوع و ما تباني اقلق...! -احترمي نفسك و لا ترفعي صوتك..و إنتي إلي ما اتصلتي و بعدين لا تلعبيلي دور الخايفة المفزوعة..خلاص بقولك..أنا جاي هنا أبغى أتكلم معاكي في وضعنا...! تصدقوا ارتحت...؟! أنا من يوم ما قلي:"أبغاكي في موضوع" و الدراما عندي شغالة..اتخيلت أحداث و أشياء زادتني قلق..لكن ما دام قال وضعنا فألف حمد و شكر...! -شوفي جود..أنا بأتكلم و أقول لكن بشرط تسمعيني و ما تقاطعيني...! قلت و أنا أتنهد:اتفضل...! -أنا يا جود كنت ناوي أناقشك في فعلتك يوم الخميس لكن عمك رجاني ما أتكلم و لا أنا شايف إننا لازم نوعيكي لغلطك...! طالعت في بابا و أطلت النظر لحد ما قال:ليش تطالعي فيا كذة..كلمة الحق ما ينزعل منها ولا إنتي شايفة غير كذة...؟! -لا ما ينزعل منّها بس للأسف ما نقدر نقولها دايماً...! -في هذي صادقة و معاكي حق...! لا تتوقعو أناقشو في كلامو و أقولو نفس إلي قلتو لعمو..إلي قدامي إنسان ما يفهم..لو قلت إلي قلتو لعمو حيفتح معايا نقاش سخيف أترفع أنا عنو...! بابا:أنا يا بنتي جايك اليوم بنفسي عشان أقولك إن إلي قاعد يسير غلط..ما ينفع أنا و إنتي نستمر كذة..الناس بدأت تتكلم و أنا مني خايف على نفسي قد مني خايف عليكي..أنا مني أناني زي ما تقولين..أنا خايف على أولادك و بيتك..أنا يا بنتي... وقف بابا كلام و كأنو مو قادر يكمل...! منظر بابا و نبرتو كانت مثيرة للشفقة..كنت على وشك أتعاطف معاه لكن صوت بداخِلي دوى:"كدااااااااب"...! حاولت أتجاهل الصوت لكن ما قدرت..ما قدرت أتعاطف..ما قدرت أبدي أي ردة فعل..لكن قدرت..بس قدرت _بعد ما دققت النظر في عين بابا_ أشوف قد ايش الصدق أبعد ما يكون عن كلامو...! شفت أشياء كتيرة وحشة في عين بابا..أشياء من زمان عارفتها و شايفتها لكن دي المرة غير..دي المرة شفتها كلها مرة وحدة الشي إلي خلاني أقول بكل ثقة و حزم:أوكي بابا..أنا ممكن أبدأ معاك صفحة جديدة لكن بشرط... طالع فيا بابا بحواجب مقطبة،قلت:أبغى أعرف كل شي من يوم ما غلطت لحد ما حطيتني عند جدة و عمو...! بابا انصدم و سار يتنفس بصوت مسموع...! أما عني فما بعدت عيني عنو و أنا أستنى...! شفايف بابا..بدأت ترتجف..وبدأ يطلع أصوات قصيرة متكرررة كأنو يبغى يقول كلمة معينة بس مو قادر...! شوية شوية حسيت بوجه بابا يحمر..خُفت..مابغا يسير لو شي عندي و بسببي...! قمت بسرعة و جلست جمبو..حطيت يدّي على صدرو و اليد التانية لفيتها على أكتافو و قعدت أسمي و أقرأ عليه و أهديه...! و الحمدلله بعد مدة هدي بابا و رجع وجهو طبيعي و عضلاتو ارتخت..اتنهدت أنا براحة..لالا..لا تحسبو حب أو اهتمام..أنا في دي المواقف أحكّم إنسانيتي لا أكتر و لا أقل...! قلت:أجيبلك شي...؟! -موية...! جبت لبابا موية..شربها مرة وحدة و حط الكاسة عالطاولة إلي قريبة منو...! قلت:أحسن دحين...؟! طالع بابا فيا بعتاب فقلت:هدا شرطي و طلبي..أنا من حقي أعرف كل شي...! قال بابا بانفعال:ايش تبغي تعرفي أكثر من إنك بنت حرام...؟! حسيت بدمي يفور..قلت:أول شي وطي صوتك سعود لا يسمع و يروح ينطقلي الكلمة في كل مكان..تاني شي في أشياء كتير مي واضحة لازم أفهمها...! همس بقهر:ايش..ايش...؟! -أمي..اسمها و أصلها و كل شي عنّها...! -تسألي عن وحدة حقيرة ليه...؟! -أبغى أعرف..أبغى أعرف حقيقة هدي الإنسانة إلي قلتو إني على خطاها..أبغى أعرفها أو على الأقل اسمها...! قال بابا و هوا يتجنب يطالع فيا:أنا جاي هنا عشانك و عشاني..مو عشانها أو عشان حكايتك...! -حكايتي هيا حكايتك هيا حكايتها...! -لأ...! مسكت يد بابا و قلت برجاء مستميت:بابا الله يخليك..الله يخليك قُلي..أنا مابغا منك شي غير إنك تقولي..الله يخليك...! سحب بابا يدّو:حيفرق معاكي شي...؟! قلت و دموعي كانت قريبة:بابا الله يخليك..الله يخليك قولي..أبغى أعرف...! قال بشدة:جود خلاص..قلت لأ يعني لأ...! بكيت من شدة بابا:أبغى أعرف..إذا كانت حقيرة و كلبة و بنت شوارع زي ما تقولو كيف جيت..كيف حملت بي...؟! بابا بانفعال:اتقي الله..هذا مقدر..حتعترضي على ما كتب الله...؟! -أنا ما أعترض..أنا أبغى أعرف..بس أبغى أعرف...! بابا بنفاد صبر:تعرفي ايه...؟! -أبغى أعرف كل إلي سار..حكيني الحكاية...! -و مين إنتي عشان أكلمك في موضوع زي هذا...؟! طالعت في بابا و قلت بحزن باكي:أنا الموضوع كلو..بابا ارحمني و ارحم حالي..قُلي..أنا تعبت..أنا أحس إنو كل إلي أعرفو غلط بِـ غلط..أحس إنو في شي ناقص و أبغى أعرفو..من حقي أعرفو...! قال بابا بتنهيدة:أستغفرك ربي و أتوب إليك...! طالع فيا:قد ما تبغي تعرفي قد ما أنا مابغا أقول..يا بنتي أنا أتألم لمن أتذكر..صعب عليا أتكلم..صعب...! -أنا أواجه نفس الصعوبة..بابا إنتا لازم تتكلم..لازم تجبر نفسك تتكلم زي ما أنا جبرت نفسي من قبل على أشياء كتيرة أكره أسويها عشانك و عشان عمو...! سحب بابا نفس و قال:حتكلم..لكن فيه تفاصيل أعتذر عن إني أقولها...! -براحتك..المهم أفهم و يسير في شي ممكن الواحد يصدقو...! -كان عندي شغل..المدير طلب مني أرتب ملفات ما يستأمن عليها أي أحد و أنا ما حبيت أوقف و أكمل شغل بكرة...! كنت مسلمة كل حواسي لبابا..سمعي و بصري و فؤادي...! -كان الوقت ليل لمن خلصت و كنت حركب سيارتي لكن... عض بابا شفايفو و نزل راسو لتحت:وقفتني "لمى" لمن قالتلي بإنها تخاف تركب تاكسي لحالها في ذا الوقت و رجتني أوصلها...! صدري سار يهبط و يطلع،قلت:لمى أمي...؟! غمض بابا عينو و فتحها و هوا يهز راسو بايوة...! قلت بتساؤل لنفسي:لمى...؟! و كأني بحاول أثبِّت الاسم..أمي أنا..اسمها لمى...! -ايوة لمى..لمى أو خديجة...! طالعت في بابا باستغراب فقال:اسمها خديجة لكننا كنا نناديها لمى...! قطبت حواجبي:ليش كانت لكم معرفة قوية بها..و مين كنا..مين تقصد...؟! -الشركة..الكل يناديها لمى..كانت في الورق بس خديجة...! طالعت في بابا و قلت و أنا أرجع قصتي ورا أدني:و بعدين..وصلتها و بعدين...؟! سحب بابا نفس و قال و هوا لا زال يطالع تحت:وصلتها لشقتها و... قاطعت بابا:شقتها...؟!،ليش مالها أهل و كيف شقتها..احنا هنا لازم محرم...! قال بحقد:هذي وراها ناس..تسوي إلي في راسها و تضرب بالقوانين عرض الحايط...! -طيب وراها ناس و جنية و تسوي إلي في راسها..لكن مين هذا إلي يسكن وحدة زيها في عمارتو...؟! -لا تسأليني عن أي شي..أنا مادري..هيا دلتني على عمارة و وصلتها لها و بعدين طلبت مني.. قاطعتو:معليش..لحظة لحظة..العمارة..كانت عادية ولا...؟! طالع بابا فيا بغضب:ايش قصدك يعني...؟! قلت و أنا أرفع أكتافي:ما قصدي شي..بس أبغى أعرف...! -جننتيني أبغى أعرف أبغى أعرف..العمارة ما كان فيها شي يشكك..كانت عمارة زي هذي إلي إنتي ساكنة فيها...! بعد صمت ثواني قلت:ايوة و ايش طلبت منك...؟! -طلبت مني أوصلها لشقتها و... قاطعتو بهمس مصدوم:و توصلها لشقتها ليه...؟! -قالتلي خايفة و... -تاكل تبن خايفة..أحد قلها تتأخر عن بيتها..ايش الـ... بابا ما صدق أوقف في صفو:فعلاً كانت حقيرة و كلبة و ماكرة و... قلت:و بعدين..ايش سار...؟! قال بنرفزة:سار إلي سار...! قلت بغيض:يعني ايه سار إلي سار..يعني ايه...؟! -إنتي غيبة..ما تفهمي...؟! -أنا مني غبية..أبغى أعرف كيف...؟! قال بعين اتوسعت بشكل مرعب:كيف ايش...؟! قلت بصوت مرتجف:أوكي أنا غبية..أنا مني فاهمة..فهمني...! أعاد التساؤل:إنتي غبية...؟! -ايوة غبية..يلا فهمني...! قال و هوا يحرك يدّو:طلعتها للشقة و حلفت عليا أشرب شي عشان تعب الطريق و..و.. طالعت في بابا و أنا أحس بالحزن يسيطر عليا:خلعت عبايتها...؟! طالع بابا فيا بصدمة،قلت بصوت باكي:فتحت شعرها...؟!،اتمايلت قدامك زي الـ... بدأت أبكي..غطيت وجهي بيدّي و قعدت أبكي...! بابا خاف:جود بس..بس خلاص..جود اذكري ربك...! قلت و أنا مغطية وجهي:ليه..ليه كده تسوي فيا..أنا ما سويتلك شي..ايش كان حاوجك..زوجتك ايش كان ناقصها..جمال و لا حُب ولا أخلاق...؟!،إنتا ليه كده سويت فيا..أنا..أنا ما سويتلك ولا حاجة..أنا..أنا ما..أنا... بابا حضني فازداد بكايا...! ما أبغاه يحضني..ما أبغاه يكون أبويا..ما أبغاه هوا..أنا أبغى عمو..أنا ما أحبو..مابغا أبوية يكون كده..مابغا هدا يكون جد أولادي..ما أبغاه يكون نسيب زوجي..ما أبغاه..أنا أبغى واحد تاني..أبغى رجال..أبغى اسمي يكون تحت اسم رجال..أبغى أحط عيني في عين كل الناس و أقول:"هدا بابا"،بكل فخر أقولها زيي زي أي وحدة شايفة في أبوها الرجل المثالي...! تركني بابا بعد ما خف بكايا،قال:عشان كذة ما بغيت أقولك...! مسحت دموعي و اتظاهرت بالقوة لإنو جا على بالي سؤال يحتاج قوة...! قلت:أنا..أنا بقي عندي كم سؤال يحتاجو إجابة...! -اسألي..معد بقي شي يتخبى...! -آآ..هل..كنت إنتا..يعني..أبغى أعرف لو..إنتا..أول أحد..قصدي..يعني..ماما..يعني إنتا..إنتا أول شخص لها ولا... -نعم...؟! طالع فيا بصدمة مخلوطة بغضب و خوف:إنتي..إنتي كيف تتجرأي و تسأليني هذا السؤال..كيف...؟!..لا..لا إنتي..إنتي شي ثاني..إنتي شي مو طبيعي...! -جاوبني..ايوة ولا لأ...! بصراحة..ما سرت حاسة بأي شي..كنت بس أبغى أعرف و أعرف..تماماً زي المدمن..بس يبغى المخدرات من غير لا يفكر بالطريقة و الوسيلة...! قال بابا بانفعال:مو من حقك تسأليني ذا السؤال...! -بابا إنتا لو جاوبتني حرتاح و حفهم أشياء كتيرة أنا مني فاهمتها...! -إنتي ايش تبغي و ايش تقصدي بالضبط...؟! -بابا إنتا عارف كويس أنا ايش أقصد..أنا عارفة مو مفروض أحط عيني في عينك و أسألك في شي زي كده لكن وضعي و وضعك غير..بابا أرجوك جاوبني...! -يا بنت استحي..إذا منتي محترمتني كأبوكي احترمي سني..احترمي شيبتي..احترمي ولدك إلي جوة..احترمي إلي في بطنك..احترمي نفسك وذاتك...! -ذاتي...؟!،ذاتي تعبت من كُتر الاحترام..ذاتي تبغى تعرف ما تبغى تضايقك والسلام..ذاتي ما طلبت منّك تقول إلا..ايوة أو..لأ...! -إنتي سألتيني و أنا من حقي أجاوبك أو ما أجاوبك...! -طب بس هُز راسك..بس...! -يا بنت ايش في راسك إنتي..قاعد أقولك لأ ما رح أجاوب...! -بابا..أنا من حقي أعرف تفاصيل قصتي كاملة..جاوبني..جاوبني إنتا كده تاخد ذنبي.."تابعت بطفولية"..بابا أنا ما رح أسامحك..لو ما جاوبتني ما رح أسامحك و حيقعد دا السؤال في نفسي ليييييييين... قاطعني بصرخة:"لأ" فزيت من الصرخة المفاجئة فقال بابا:لأ..ارتحتي..خلاص أخذتي المعلومة إلي تبغيها ولا لسه عندك أسئلة قذرة ثانية...؟! سكت..كنت أبغى أضيف دي المعلومة للي عندي..رغم إني كنت متوقعة الإجابة لكن لمن انقالت في وجهي و صاحبها إلي متأكد منّها صرح بها ليا حسيت بشي تاني..حسيت بها أقوى و أوسخ و أبشع...! شي..يعور القلب...! اتنهدت بهدوء و بطئ لكني رفعت راسي بعد ثواني و أنا أحس الإستماتة في إني أعرف ترجعلي...! قلت بصوت واطي:طب بابا..لمن ماما حقيرة و بياعة هوى كيف جابتني..معقول ما كانت تاخد أي موانع...؟! أخفض بابا راسو:مو هنا العجيب.."رفع راسو و صوتو"..مو هنا إلي مني قادر أصدقو..أمك في حياتها ما حملت..أمك كانت تاخذ موانع..طول عمرها..من يوم ما صاعت..المفروض تأثر عليها حتى لو وقفتها..لكنها حملت..حملت فيكي رغم كل الموانع إلي أخذتها...! طالعت في بابا بعجب:حملت بي و هيا مداومة على حبوب تمنع الحمل...؟! طالع بابا فيا باستغراب لمن قلت و أنا أحاول أحشرو:طب مو هيا كلبة و حقيرة..ليش ما حاولت تنزلني...؟! -إنتي ما عندك إحساس..أنا أكره أتكلم في ذا الموضوع..أتألم و ما أحب أنسأل في ذي التفاصيل...! -إذا كنت تتألم فأنا أتألم أكتر منّك..بابا أنا و إنتا في دا الموضوع مافي بينا خصوصية أو حساسية..جاوبني بابا جاوبني..ولا أقولك..قولي القصة كلها...! -أقولك عن ايه؟؟!!،عن وحدة من عجايب الدنيا ولا أقولك عن عقاب ربي ليا..أقولك عن ايه ولا ايه...؟! -قولي عن كل شي..و زي ما اعتبرتني عقاب..اعتبرني رحمة..ربي عجلك عقابك في الدنيا..ربي يبغى يطهرك من ذنبك و إنتا زعلان...؟! كلامي كان زي البلسم بالنسبة لبابا..حسيتو لان و هدي و حيقولي على كل شي..أنا ما قلت إلي قلتو تخفيفاً عن بابا..أنا قلت إلي قلتو عشان أبغى أعرف..كوسيلة لإقناع بابا إنو يتكلم..و سواءً كان في كلامي شي من الصحة أو لأ فأنا ما يهمني..أنا بس أبغى أعرف..بس...! طالع بابا فيا بتأثر..بابا شخصية غريبة..غير متزنة؛دحين متأثر و ممكن يقلب معايا 180 درجة للأحسن لكن بحلول الصباح يرجع يكرهني..عادي..عادي جداً...! ابتسمت:يلا بابا حكّيني الحكاية...! اتنهد:حملت بك... قاطعتو:لحظة لحظة..إنت ما كنت خايف تعلم...؟! -لأ..كانت معروفة فاجرة..و معروف عنها ما تتكلم و تتبلى إلا على إلي يصدها..أذكر مرة اتبلت على واحد و في الأخير طلع مطنشها لأنها أكبر منُّه و كمان كان متربي فما أعطاها وجه..حقدت فاتبلت..غير كذة ما تنطق بحرف...! في نفسي..حبيت دا الشاب و بقوة..لو بابا كان زيو!!! قلت:المهم إنتا..بعد ما غلطتوا و حملت..ليش قالت لك..المفروض تنزلني سُكّيتي و ما توجع راسها...! قال بقرف مقهور:مو ما كانت تبغى تخسر فلوس...! -و طبعاً إنتا أعطيتها عشان تسكتها...! قال و هوا يهز راسو:نعم..أعطيتها لكن يوم موعد العملية انسرقت شنطتها و معاها الفلوس...! -oh my god..و بعديييين...؟! تعرفوا..مني حاسة بإنو دي القصة قصتي قد مني حاسة إنها قصة مثيرة تستحق الاستماع و الإنصات...! بابا استغرب حماسي إلي في غير وقتو لكنو قال:انسرقت الفلوس فرجعت لي و طلبتني فأعطيتها...! -أعطيتها مرة تانية...؟!،طب..بعدين..بعدين ايش سار...؟! اتنهد:"وصلني" طالع فيا:قالت لي أوصلها لإن السواق إلي تثق إنو ما يعلم سافر و سواق أهلها ما يرضى يوديها مكان إلا بإذن من أهلها...! قلت باستغراب:لها أهل...؟! -أجل...؟! -و وينهم عنّها...؟! -ما أعرف..كل إلي أعرفُه إنها كانت تروح مشاويرها "الوصخة" من الشغل..السواق إلي متفقة معاه يوديها من الشركة و يرجعها لها و بعدين يجي سواق أهلها و ياخذها من الشركة لبيتها...! طالعت في بابا:هذي ما فقلبها خوف...؟! -أمك ما في قلبها شي غير الصياعة و الشباب الصغار...! -رجاءً لا تنسبها ليا..أنا أمي جدتي إلي ربتني..مو دي إلي ما عرفت اسمها إلا و ولدي عمرو أربعة سنين...! كملت و أنا أنتبه لشي:بس لحظة..ما كانت تواجه مشاكل..متى كان يمديها تسوي شغلها و تروح مع داك السواق و ترجع بعدين يجيها سواق أهلها..كيف كده...؟! سحب بابا نفس:كانت مفهمة أهلها إن شغلها يستمر لين آخر الليل...! -و أهلها بُله..ما يفهموا...؟! -ما أدري يا بنتي..أنا علاقتي فيها ما كانت قوية لحد إني أعرف ظروفها..لا تسأليني...! قلت باستغراب:و إنتا كنت ماشي معاها في علاقة و إنتا ما تعرف ظروفها...؟! -أنا بس.."انفعل"..أنا قلتلك إني غلطت مو بإرادتي..شي قدامي و... ما اقتنعت بفكرة "مو بإرادتي" لكني اتنهدت و قلت:طيب و بعدين..وديتها ولا لأ...؟! -وديتها..ما كان بيدي حيلة..دخلت الحارة القديمة و هناك عند العمارة إلي حتم فيها العملية اتفاجأنا بسيارات الهيئة و الشرطة و بالدكتور إلي أخذت الموعد عندُه نازل بين أيادي الشرطة..سحبت نفسي من المكان و كان كل همي أتخلص منك....! زودت إنصاتي و قلت و في خيالي كتير احتمالات:ايوة... سحب بابا نفس:دورت على كذة طبيب..و في كل مرة كان يطلع مانع..مرة الدكتور مسافر..مرة مريض..مرة انمسك و غيرُه كثير.."بلع ريقو و انبح صوتو"..تخيلي..تخيلي تسسسعة شهور نحاول ننزلك..نحاول..نحاول مافي فايدة.."اتوسعت عينو و بدأ يحرك يدو و هوا يتكلم"..كل مرة كان يطلع شي..تسعة شهور..تسعة شهور و احنا في دوامة محاولات فاشلة...! قلت بعجب و عدم تصديق:تسعة شهووورر!!!؟؟؟ طالع فيا و قال بطريقة تأكيدية:تسسسعة شهور.. تابع:و حتى بعد ما ولدتك..جات لتحت بيتي و اتصلت عليا..نزلت و ما دريتبها إلا راميتك عليا..أخذتك و أخذتها و رحت لشقتها و هناك صرخت بأعلى صوتها بإنك شيطان..شيطان ما قدرت تتخلص منو لمدة تسعة شهور رغم إنها آذت نفسها بالضرب و حاولت تطيح لكن ما كانت تزبط أي حركة.."ضحك ضحكة صغيرة ساخرة"..و رغم تعب الولادة إلا إنها هددتني بتدمير حياتي..أنا خفت..كانت قد إنها تسويها،عشان كذة أخذتك و حاولت أتخلص منّك..عند البحر،عند المسجد،عند ملجأ..ما قدرت؛الناس كانو دايماً حولي،تخيلي..يوم أحد الساعة ثلاثة الليل و الناس في البحر..و إذا ما كان حولي أحد تبكين بكى عالي مو طبيعي يلم الناس من بيتها..كُنتي كنك فاهمة..كُنتي..كُنتي فعلاً شيطان صغير زي ما أمك قالت...! كدب..مو معقول..ايش إلي قاعدة أسمعو..محاولات فاشلة لإسقاط جنين تستمر تسعة أشهر و ناس في البحر يوم الأحد الساعة تلاتة الليل!!! طالعت في بابا:و بعدين..ايش سار..كيف وصلتني لعمو و جدة..كيف قلت لأهلك دا الخبر..و كيف أنا كبرت بعدها و كيف..قُلي..كمل القصة...! سحب بابا نفس و نفثو و كأنو يستنى ردة فعل لكنو ما لقى إلا نظرات الإثارة و التحمس و..الفضول! قال:ما كنت بعقلي..أخذتك و رحت لبيتي،هناك لقيت مرتي صاحية في انتظاري..هيا صحيت من يوم ما خرجت فجأة و قعدت تستناني إلين ما جيتها و إنتي في يدّي...! مع كل كلمة تخرج من بابا كان قلبي يسرع في النبض..كنت..مسلوبة التركيز و السمع و كل شي...! قلت:ايش سوت..كيف رحتلّها بيا..كيف اتجرأت تواجهها...؟! -قلبت الدنيا عليا..صرخت و صحت الأولاد من صراخها و طردتني من البيت...! -طردتك...؟! -آآآه لأ..أنا إلي خرجت..آآ المهم المهم..أنا خرجت و منظر أولادي ما أنساه..نظراتهم كانت تذبحني و لحد الآن كل ما أطالع فيهم أشوفها..عشان كذة أنا... قاطعت بابا لإني ما كنت أبداً مستعدة أسمع أعذار سخيفة تانية...! قلت:بس وقتها سارة ما كانت فيه..صح...؟! -لأ..إنتي أكبر...؟! -ايوة أنا أكبر..المهم..و بعدين..رحت لجدة...! -ايوة..ما كان قدامي غيرها..لقيت نفسي من غير ما أحس برة البيت..راميكي على الكرسي إلي ورا و ماشي بالسيارة لبيت أمي...! قلت و أنا أحس بالخوف على نفسي:حاطني ورا..بيبي مولودة حاطني ورا لحالي...! أخفض راسو:كنت أبغاكي تطيحي.."رفع راسو و قال بصوت عالي"..بس ما طحتي..قعدتي حية..ما صابك ولا جرح ولا خدش..شيطان..فعلاً شيطان...! طالعت في بابا مصدومة،قلت بقهر:مو شيطان..إلي سلمني تسعة شهور سلمني مشوار النص ساعة...! قال بابا من غير ما يعلق على كلامي:هناك أمي هزأتني و سخطت عليا و طردتني...! -طب ليش اتكلمت..ليش لمن رحت لجدة قلت إني بحرام..ليش ما فهمتها إني بزواج...؟! -مادري..أنا رحت لها من غير ما أحس..و اتكلمت بلا حساب...! -طب ليش قلت لجدة..ليش ما اتكلمت قدام زوجتك بلا حساب...؟! -ما أعطتني فرصة..دخلت بك و علطول صرخت و هاجت و ما جا الصباح إلا و هيا خارجة لبيت أهلها...! -أوفف..خرجت...؟! -طبعاً..و ربي ستر ما دريت إنُه بحرام و لا ما كان رجعت لي...! بصراحة كبرت في عيني..فوق ما عندها مبدأ و كانت ما حترجع لو بحرام كمان يحبها..باين إنو يحبها..ولا ما كان اتكلم كده بعيون واسعة و صوت حار متحمس...! بس كده معناتو خرجت لأهلها و سارت مشاكل أكبر مما أتصور..أجل عشان كده الناس اتكلمت و تَبَّلت ما شاء الله..و أنا كنت مستغربة؛أحسبهم اتكتموا عالموضوع..والله لو كده يحقلهم يكرهوني..قصدي مرة بابا و أخواني..أكيد حسوا إنو وجودي كان سبب لمشاكل بين أبوهم و أمهم و كان سبب لتوتر عائلة بكاملها..من جدة لأولادها لأولادهم...! سحب بابا نفس:و هذا إلي صار..عمك هوا إلي أخذك..كان صغير و كنتي أصغر..و من يومها عاد و هوا مصدق إنُه أبوكي و إنتي بنتُه...! -قصدك سار بابا و سرت بنتو..عمو عُمرُو ما كدب كدبة عشان يصدقها..هوا لقاني قُدامو،وحدة شبه يتيمة..شي طبيعي حيحس بالأبوة تجاهي...! طالع بابا فيا بعتاب:أنا مني جايك عشان تزيدي حسرتي و إحساسي بالذنب...! -لأ..لا تتحسر..صدقني..لو عشت معاك..في بيتك وسط أولادك ما كنت حتربى زي ما اتربيت عند عمي و جدتي..مو عشان شي فيك..أولادك متربين أحسن تربية..إنتا و زوجتك إلي أتوقع إنها ما كانت حتأذيني ربيتوهم..بس أنا ما كنت حتربى زيهم..زوجتك غصباً عنها ما حتقدر..حتشوف خيانتك لها فيّا..إنتا نفسك ما حتقدر..إنتا و أنا بعيدة عنك ما تطيقني كيف و أنا في بيتك...؟! -لالا..أنا ما أكرهك...! قلت و أنا أتنهد:ما علينا..المهم..ايش عملت بعد كده...؟!،وين رحت...؟! -أخذوكي جدتك و عمك من هنا و أنا بدأت أصالح مرتي من هنا...! -طب كيف كان الوضع..أنا نفسي أعرف الوضع فترة ما كنت بيبي..كيف كنتو عايشين كعائلة..كنتو عادي تتزاوروا و الحياة ماشية ولا كنتو شبه متقاطعين...؟! -كلهم كانو عادي إلا أنا و أولادي...! -بس كانو صُغار...! لمن شفت نظرة بابا المستفسرة:أولادك كانو صُغار لسه...! قال بحزن:ايوة كانو صغار و وجودك سبب لهم مشاكل أكبر منّهم بكثير...! وجودي...؟!،ليش ما يقول فعلتو...؟! سحبت نفس و سحب بابا كمان...! قلت:طب بابا..تقدر توصلها...؟! -ايش...؟! قالها بابا باستنكار،فقلت:بابا أبغى أعرف..تقدر توصل لماما ولا لأ...؟! وقف بابا:أنا عمري ما شفت وحدة بجراءتك..ما كفاية الأسئلة القذرة إلي أجبرتيني أجاوبك عليها..لسه كمان تبغيني أوصلها!!! ما كنت أبغى بابا يزعل..مو حُباً فيه بس طفشت..طفشت من إنو بيني و بينو حساسية..خلاص تعبت و قرفت...! مسكت يدُّو و أنا جالسة و قلت:بابا لو أقدر أقوم و أبوس راسك كان قمت لكن ما أقدر و ما فيا شدة..بابا لا تزعل..أنا ما كان قصدي أضايقك أو أزعلك منّي..بابا بليز لا تزعل و تخرج من بيتي زعلان...! طالع بابا فيا لثواني بعدين انحنى:نزلتلك...! انفجعت..أنا كنت بتكلم بس..ما عنيت ولا كلمة وحدة من إلي قلتها...! لازم أتخذ قرار..لحد يستهين..التصرف إلي حسويه دحين حيحدد مصير علاقتنا...! كرامتي و مشاعري ما كانو سامحين لي بسسس... نزلت دمعة من عيني و أنا أبعد بشفاهي عن راس بابا...! حسيت بإني سويت شي المفروض إني ما أسويه رغم إني كنت حاسة إني لازم أقبل راس بابا...! أنا من جوتي أحس إنو ما يستاهل..أنا من جوتي أحس بحرارة..أحس بقلبي يزيد نبضو..و أحس إنو جسمي ولع..أحس كل خلية جوتي ثارت..كأنو جسمي و عقلي و عواطفي رافضين إلي سويتو بس أنا حاسة رغم صعوبتو إنو الصح..إنو... رفعت راسي مصدومة..مسكت جبهتي و طالعت في بابا بصدمة...! قلت بشفايف مرتجفة:بَـ .. بَـ ... قال بشفاه مهتزة:كنت مقرر..كنت قاعد أقول..لو ما باست راسي تنسى إنها بنتي..كنت أتمنى ما تقبلي راسي..لإني.."دمعت عينو"..كل ما أشوفك أتألم..كنت أبغى عذر عشان أقاطعك بس إنتي في حياتك ما أعطيتي فرصة..أو سويتي شي ممكن آخذُه كعذر أو عيب فيكي و لمن حاولت أطلع عيب فيكي طلعت أنا الغلطان..لثواني الناس وقفت معايا لكن فجأة أمي و أخواني الاثنين وأولادي و حتى زوجتي..زوجتي إلي هيا زوجتي قالتلي:"كانت حامل..ليش خليتها تنفعل؟!"،رغم إن وجودك يضايقها إلا إنها عاتبتني...! نزل راسو و رفعو:قبل كنت أكرهك عشانك تذكريني بماضي أسود ذحين سرت أكرهك لإنك عمرك ما غلطتي عليا و سمحتيلي ألاقي فيكي عيب...! تابع و هوا يحرك يدّو و يتجنب يطالع فيا:دايماً كان..كان ربي معاكي ضدي...! طالعت في بابا مستغربة و مفجوعة..ايش دا الكلام...؟! قلت بانفعال:بابا..ربي أرحم بعبيدو من نفسهم..كيف تتكلم كده...؟!،كيف تتجرأ...؟!،هذا ربي..في كل شي لُه حكمة..اختار لي و اختار لك هدي الحياة..هذا اختيار ربي..مو اختياري أو حتى اختيارك...! إنتا..إنتا كيف تسمح للشيطان يلعب براسك..ربي حطك في اختبار لمن مشيت أمي بمفاتنها ظاهرة..صح فشلت في الاختبار و استسلمت لهواك لكن إلي إنتا فيه دحين اختبار تاني و أنا..أطلب منك تعديه..عشان لو ما عديتو أنا حتأثر..إنتا قدامك دحين ولدي..و زوجي...زوجي حسسو إني غالية عندك حتى لو ما كنت كده في الحقيقة لإنك بكده تفيدني؛احترامو ليا حيزيد..ولدي..ولدي لو حبك أنا حعشقك..لو عشقك أنا حموت عليك..إنتا..إنتا لو بس توسع أفق عقلك شوية حتلاقي إنو كل إلي حولك يساعدك..سمعتك..أولادك..زوجتك إلي تحبك..أخوك إلي عقلو يوزن بلد..أمك إلي مهما سويت تسامحك..كل دا و منتا قادر تستقر..منتا قادر تحس بالراحة..بابا و إن كنت في أيام قاسية عليك و تجاهك و أتكلم كلام جارح أنا محتاجتك..أنا أبغى يكون عندي أم و أب..أعرف أمي فاجرة ما تشرف بس..بس أبغاها..نفسي أشوفها عشان كده سألتك لو تقدر توصلها ولا لأ..نفسي لو بس ألمحها.."دمعت عيني"..أنا..أنا ما..يعني..يعني..أمي فاجرة و توطي الراس و أبوية ما يحبني..أنا حياتي صعبة..صح أقول دايما لنفسي و للناس إني مستقرة مع عائلتي الصغيرة و مبسوطة و مني محتاجة أحد بس..بس أنا كدابة..ايوة أنا كدابة..أنا أحياناً أغار من علي..لمن يحكيني أو يحكي سعود عن هبلو أو ذكرياتو مع أمو و أبوه و مع أخوانو و أخواتو..أحس في دي الظروف ما ألاقي شي أقولو..أحس إني أبغى أتكلم بس مافي شي ينقال..ذكرياتي مع عمو ما فيها قلة أدب أو هبل..عمو كان مُربّي و مُؤدِّب..ما كان صاحب عشان يشاركني في الأشياء إلي نسويها بالدسة من ورا أهالينا...بابا أنا والله أحتاجك..حتى لو سمعت أو حسيت بالعكس..اتأكد إني..إني لسه أبغى أب و إن كان حولي رجال كثير يحسسوني إنهم آباء بس أبغى الإنسان إلي أنا قطعة منو..أبغى سعود.."بكيت"..أبغى سعود يشوفني معاك زي ما يشوف علي مع عمو سلطان..أبغاه يشوفني معاك إنتا لإنو عارف إنو إنتا أبوية الحقيقي..هوا..هوا دايماً يقولي:"عمو سعود أبوكي الكذبي و جدو إلي ما أحبو أبوكي الحقيقي"..أنا ما أبغاه يقول كده..أنا أحب عمو و هوا بابا و هوا كل شي بس..بس كمان إنتا..خلاص..خلاص لا تسير بابا..خليك عمو و خلي عمو بابا..ما عندي مشكلة بس..طفشت..خلاص طفشت..سعود كِبر و بدأ يفهم و أنا..حامل..لازم نشوفلنا صِرفة..لازم..أوكي حتى لو تكرهني..الله يخليك مثل قدام علي و سعود إنك تحبني..الله يخليك...! غطيت وجهي بيدّيني و قعدت أبكي...! كرهت نفسي و أنا قاعدة أترجاه..لأ أنا مو كده..مو هادي مشاعري أو يمكن ما أبغى هادي تكون مشاعري.....! طول عمري و أنا مستقلة..طول عمري و أنا أقول إني ما أحتاج بابا لإنو عمو مكفيني و زيادة..طب ليه قاعدة دحين أترجاه..أنا حُمارة أصلاً..أترجاه ليه..أنا قوية و ما أحتاجو..أنا... وصلني صوت بابا هادي يخفي وراه أشياء ما أعرفها:جود..جود خلاص..خلاص لا تبكي..أنا..أنا و إنتي حنبدأ صفحة جديدة مع بعض..حنسى كل إلي سويتيه ليا و حبدأ معاكي صفحة جديدة...! رفعت راسي:و إلي سويتو إنتا...؟! -ها...؟!،أنا....؟! ما حعطي بابا فرصة ينكر أو شي،قلت:أنا كمان حنسى كل إلي سويتو ليا و حبدأ معاك صفحة جديدة...! ابتسم:أجل خلاص...! اتقدم مني و جلس جمبي:أنا حكلم عمك و حقولو على إلي سار و أنا حأوضح للكل إنو كل إلي بيني و بينك انتهى و إنو أنا و إنتي ما بينا أي شي سيء...! هزيت راسي:لاء..لا تتحمس..خلينا واقعيين..من ثانية حتحبني و أحبك..لا طبعاً..احنا محنا بزورة أو زعلنا استمر ليوم أو يومين..بابا هذي سنين..هذي 24 سنة..لا تستهين..بابا مو مهم نحب بعض قد ماهو مهم تصفى نفوسنا..لا تتكلم أو تقول أي شي..خل يربي ييسر كل شي..أنا.."ضحكت بخفة"..أنا ربي واقف معايا عشان كده ما أبغى أي أحد يدخل أو يتصرف...! نزل بابا راسو و قعد يستغفر على الكلام إلي قالو...! رفع راسو:حتسيري تجي بيتي و تتكلمي عني عادي قدام الناس...؟! قلت و أنا مقطبة حواجبي:أنا أصلاً ما أتكلم عنك قدام الناس...! -ايوة..إنتي يا ما تتكلمي يا تقولي كلام مو كويس...! -لا والله..يشهد ربي عليا إني ما أنطق بحرف و إذا اتكلمت ما أقول إلا كل خير..أصلاً أنا ما أعطي فرصة لأحد إنو يكلمني عنك..أو يسألني عن ماضيا...! -المهم إن الكل يحسب إن علاقتي بكي سيئة أنا أبغى الناس ذحين تعرف إنها سارت كويسة...! -بابا..على فكرة لسه قبل أسبوع كانت النار والعة بينا..ما يسير كده..الناس مو مهمة..في ايش حيفيدوك..كلمة كلمتين حيقولوها و ينسوا..بعدين نبقى أنا و إنتا محتارين ما بين إتباع إلي اتظاهرنا بيه و ما بين إتباع مشاعرنا و أحاسيسنا...! -طيب..المفروض أحاسيسك تكون كلها حب و احترام ليا...! -أوكي..حتسير لكن شوية شوية..مو كده فجأة من قعدة وحدة..الاحترام موجود موجود سواءً حبينا بعض أو كرهنا بعض..يعني..المفروض يكون موجود..لكن الحب مو علطول..العجلة مي حلوة..أوكي اتصالحنا و اتصارحنا و أنا شاكرة لك إجابتك على أسئلتي لكن هذا ما يعني إنو علاقتنا تسير وردية..كده..out of the blue..نسير مثال لعلاقة بيرفكت بين أب و بنتو...! وقف بابا و قال بحكمة مادري من وين طالعة:الظاهر إنو مافي أمل...! طالع فيا:أنا خارج..تبغي شي...؟! قلت باستغراب ممزوج بصدمة:بابا!!! -خلاص..أنا اتأكدت من شي ذحين...! -بابا أ... قاطعني:إنتي أضعف من إنك تنسي إلي سويتو...! قلت بنرفزة من أسلوب بابا:الحمدلله إنك عارف إنك سويت شي...! وسع بابا عينو بصدمة من جملتي،قال:شفتي..إنتي الحقد و الكره كبر فيكي و الظاهر إنك حتنقليه لولدك..عشان كذة أعتذر عن التقرب منُه..علاقتي بك يا جود ما رح تتعدى حدود الواجب...! كانت صرخة على طرف لساني:"أحسن" صرخة اندفنت بداخلي..لإنها أدركت إنها لو طلعت حتسبب إلي ما يحمد عقباه...! وقفت و أنا أسمي...! قلت بطريقة إنهاء حوار:إلي يريحك أنا مستعدة أسويه..المهم تكون راضي عني..إنتا والد..و رضا الوالد من رضا الله...! اتنهد:أشوفك على خير...! و خرج...! جلست على الكنبة و ما كانت إلا ثواني قبل ما بكيت بصمت..مجرد دموع بدأت تتوالى على خدّي...! مشاعري..هدرتها..بكيت و أظهرت لبابا ضعفي..اعترفتلو بحاجتي لو قبل ما أعترف لعمو و لكم و لنفسي حتى...! آخرتها يطلعني غلطانة..حقودية و أضعف من إني أسامح..أنا لو زي ما يقول ما كان فتحتلو الباب..أنا أنقل الكره لسعود..والله العظيم أحاول قد ما أقدر ما أحسسو بشي..أشجعو لمن يحكيني عن رغد و عن بقية أولاد أختي خلود و عن تجاربو المعدودة معاهم...! أنا ما بزرع الكره في أحد..ولا أقول لأحد عن شنايع بابا..ما حقدت لا على أخواتي و لا على بنات عماتي و لا وطيت راسهم في التراب..أنا مادري..مادري ليه محد يقدر..هل لازم أصرخ و أندب و أشقق ملابسي عشان يحسوا بألمي..يحسوا قد ايش أنا عانيت...؟! ايش العالم دا...؟!،ايش الناس دولا...؟! "ماما.." رفعت راسي لسعود إلي قالها بتفحص،قرب مني:تبكي...؟! مسحت دموعي:لا حبيبي...! قرب مني أكتر فمديت يدّي عشان يجلس في حضني و جلس...! حط راسو على صدري و قال و هوا ينعم بالدفا:مامي ايشبك...؟! -ما فيا شي حبيبي..ما فيا شي...! -ماما هوا هدا أبوكي كل شوية يجي إنتي تبكي..إنتي تبكي..ليش كده...؟! حضنتو أكتر و دفنت راسي في رقبتو و قلت بصوت مخنوق:أنا بس متضايقة..هوا مالو دخل...! رفع سعود راسو و قال بإصرار:لأ..أنا ما أحبو..شرير..بس يخامصك و يقولك أشياء وحشة..هوا زي النونو ما يعرف عيب..هوا مامتو ما تقولو عيب...! شديت على سعود:خلص حبيبي خلص..هوا حُر..احنا مالنا دخل...! رفع سعود نفسو و لف يدّو على رقبتي و قال و هوا يبوسني:طب لا تبكي..أنا أزعل لمن تبكي..لا تبكي علشان الأغبياء...! كلام سعود غصبني أبتسم،قلت:عيب تقول كده سعود...! -طيب خلاص لا تبكي...! ابتسمت..سعود قال جملتو الأخيرة بنفس أسلوب علي لمن يبغى يسكتني و يبغاني أسوي إلي يبغاه...! رفعت راسي للباب إلي انفتح فجأة..و كان..علي...! طالعنا أنا و سعود باستغراب،قلت:وي..ايش جابك دحين...؟! قال و هوا يقفل الباب:مافي شغل و طفشان...! -و إنتو عادي كده سايبين...؟! ابتسم:مو سايبين بس مافي شغل و المدير رايق فاستأذنت..قلت ما دام إنك في البيت ليش أقعد...؟! أجبرت نفسي على الابتسام و أنا أشوف علي متجه لينا،جلس جمبي و فجأة اتغيرت ملامحو..قرب وجهو من وجهي و قال بحواجب مقطبة:جود ايشبك...؟! رجعت براسي على ورا:ايشبي..ما بيا شي...! -جود...؟! -علي ما فيا شي...! طالع في سعود:سعود أمك ايشبها...؟! قال سعود ببساطة:عشان هدا أبوها خاصمها...! نعم...؟! صرخة علي خلتني أفز،التفت لو و قلت بسرعة:بابا كعادتو قلي كلام بايخ فاتضايقت و سعود كان قاعد معايا...! -وتردي عليه ليه...؟! -هوا جا ما اتصل..إلا اتصل بس قلي... قاطعني علي بعصبية:جا البيت...؟! -ايوة جا البيت...! -جا البيت...؟! -ايوة...! -جا البيت...؟! -علي ايوة ايشبك..جا البيت...! -جا البيت..كذة ببساطة..جا البيت...! -و يعني جا البيت..ايش فيها...؟! -فيها إنُه دخل بيتي و طلع و أنا مالي علم...! -ايش يعني..تبغاني أتصل عليك و أقولك إنو بابا جا...! -ايوة تتصلي عليا و تعطيني خبر..مو أقعد زي الأهبل..الناس داخلة و خارجة على بيتي و أنا مادري...! -لا من جد علي..بابا كان عند العمارة و... قاطعني:لو عند الباب..تعطيني خبر تحترمي رجال البيت الموجود.. قاطعتو بقهر:أنا محترمة بس هادا بابا لازم.. قال بشدة:لمن يكون أبوكي رجال أستأمنُه على أهلي يسير خير..هذا شي..الشي الثاني لمن أكلمك ما تقاطعيني و عدلي طريقة كلامك معايا لا تشوفي شي ما يسرك و قومي حطيلي شي آكلُه لإني جاي تعبان و طفشان و قرفان و قرفتيني إنتي زيادة...! و قام راح للغرفة...! أخفضت راسي..ليش أنا ناقصة..ناقصتك يا علي تخاصمني...؟! قال سعود الصامت من يوم ما جا علي:ماما...؟! رفعت راسي و قمت:"تعال ساعدني"،و رحت للمطبخ...! و طول ما أنا أرتب الغدا وأسخنو كنت أستنى علي يجي يساعدني _في الفترة الأخيرة سار علي يساعدني بما إني تقلت_ لكنو ما جا،حزت في نفسي...ليش ما جا...؟! حطيت الغدا و رسلت سعود ينادي أبوه...! جلسنا عالسفرة ساكتين،علي شغل التلفزيون وقعد ياكل و هوا يتفرج..أنا..كنت آكل و عيني على لُقمتي،و سعود ينقل بصرو ما بينا...! خلصنا أكل و وقف علي:أنا داخل أنام...! قال سعود إلي متعود يسمعو مني:تمسي على خير...! قال علي بدون أي مشاعر واضحة:جود ما بتنامي...؟! قلت و أنا أروق السفرة:برفع...! -رفعي و تعالي...! قلت من غير ما أرفع عيني:شُغل البيت متلتل و أنا ما عندي نوم...! حسيت بنظرات علي الحاقدة قبل ما يروح للغرفة...! بعد ما راح قال سعود:ماما ايشبو بابا...؟! قلت و أنا أعطيه صحن خفيف عشان يوديه للمطبخ:ايشبو بابا...؟! و وقفت و مشيت وللمطبخ ورا سعود إلي قال:إنتي زعلانة و هوا سواكي زعلانة..ما ينفع كده اتنين زعلانة...! ابتسمت..حضنت سعود و بستو..حبيبي هوا..متعاطف معايا مرة...! بعدتو عني:معليه حبيبي..بابا زعل لإنو بابا..بابتي أنا زعلني..هوا زعل عليا..عشاني مو مني...! -طب ليه يخامصك..إنتي مالك شُغل.."صرخ"..هوا جا مو إنتي...! انفجعت..في صوت سعود كان فيه قهر..شي غريب أول مرة أشوفو عليه...! شوية إلا سعود يبكي و يحضن رجليني و يقول بقهر و صوتو مختلط بدموعو و مو واضح:كل شوية يجي تبكي بعدين بابا يزعل..يـ..يزعل و..ويخاااامصك..أنا ما أحبووو..بس أبوية و عمو..هوا أسلاً (أصلاً) غبي..أنا ما أحبو بس يقعد يطفشنا و يخليني زعلااااان...! انصدمت..هدي مشاعر سعود تجاه بابا...؟!،سبحان الله كيف الطفل يحس..حسيت..حسيت إني..إني قاعدة أشوف نفسي زمان..كنت كده أحس..أحس إنو لمن يجوا عماتي و بابا و البقية أتضايق و أسير زعلانة...! انقهرت..انقهرت على ولدي..أنا ما كنت أبغى سعود يعيش نفس الأحاسيس إلي أنا عشتها..ما كنت أبغاه يحس بأي توتر في أي علاقة كانت...! سحبت نفس أحاول أهدّي فيه نفسي..ما ينفع أبكي..كفاية سعود..أنا لازم أكون أقوى..ما ينفع كلنا ضعيفين..ما ينفع...! -تعال سعود...! و رحنا للصالة..جلس و جلست جمبو...! قعدت ساكتة لثواني قبل ما أقول:سعود..بابا قد قلك شي...؟! هز راسو بلأ...! -أبوية أنا يا سعود..أبوية أنا..إلي جا اليوم...! هز راسو:لااااء...! -أجل خلاص..احنا مالنا دخل..هوا يسوي إلي يبغاه و يقول إلي يبغاه..و بعدين إنتا ليه مزعل نفسك..هوا حُر..و أصلاً ما يقدر يسويلنا شي..قول ليه...؟! ابتسمت لنظرات سعود المتسائلة و قلت:بابا معانا..هوا يعرف كل شي..احنا مالنا دخل..هوا إلي يتصرف..و إذا هذا أو غيرو عملولنا شي نقول لبابا و هوا يتصرف..بابا يعرف...! اتنهد سعود:بس بابا يخاصم...! -بابا يخاصم لإنو عصبي شوية و يتنرفز بسرعة بس هوا من جوتو يخاف علينا و ما يحب إنو أحد يضايقنا...! -طـ..وي..بابا...! التفت و لقيت علي ماشي لنا و عينو مثبتة لقدام و لمن وصلنا شال سعود و قعد مكانو و هوا يحطو فوقو..حضنو بيد و باليد التانية جذبني لصدرو...! غمضت عيني و فتحتها و أنا أحس براحة تتسلل ليا...! قلت بهدوء:ليه ما نمت...؟! قال بهمس:ليه و من متى أنا أنام و أنا مزعلكم..و إنتا يا مفعوص..حسابك بعدين..آخرتها طلعت أنا إلي أزود على أمك همها...! سعود:ايش يعني همها...؟! -علي:اشششششششششش..لا تخرب اللحظة...! ********************************* جرة،،، أسند رأسه على مقود سيارته..لمَ..لمَ دائماً هكذا...؟!،لمَ لَم يرى يوماً عطفها و نضجها و جمالها الذي يتحدث عنه الجميع...؟! "جميلة روح و شكل"،"أميرة" و غيرها الكثير الكثير من الأوصاف التي سمعها عنها..لم لا يرى هذا الجانب منها...؟!،لم تظهر الجانب الجميل منها للناس أما لأبيها لا تظهر إلا القسوة و التبلد...؟!،لم لا تفهمه...؟!،لم هي عديمة الإحساس..بل لم هي جريئة منزوعة الحياء...أي امرأةٍ هي هذه...؟! هكذا سعيد كان يفكر...! تركته يهيم في أفكاره بينما تسللت من الحاضر للماضي عن طريق ذكريات حُفرت داخل سعيد و سعود و الجدة و الجميع...! ذكريات تظهر ما كان يحدث حول جود و هي محاطة بغطاءٍ أبيضٍ فوقه التفت يد عمها المراهقة...! سأبعد التراب عن ذكرياتهم المدفونة..ذكرياتهم التي لن يعرفها أحدٌ حتى جود..فقط أنا و أنتم و أصحابها...! (دخل سعود الذي لم يكن يتجاوز عمره الخامسة عشرة لغرفة أمه..كان يحمل الرضيعة التي لم ترضع و لن ترضع من أمها..كانت هادئة و مستكينة..تماماً كما مظهر أمه التي وضعت رأسها بين يديها صامتة...! قال بتردد:"أمي..الجيران سألوني بنت مين إلي عندكم..ايش أقولهم؟!" رفعت أمه رأسها فأصابه الفزع..عيناها كانتا محمرتين و ملامحها غاضبة..قالت:بقوةٍ مرعبة:"بنت سعيد..قول هذي بنت سعيد..اتزوج من ورانا و جابها..قول كذة.. "صرخت"..هذي بنت سعيد" صرختها أيقظت الرضيعة فبكت..قالت:"خذها..خذها داخل" سحبت سماعة الهاتف التي أمامها..اتصلت بابنها و بدون مقدمات أمرته أن يأتي و أردفت أمرها بدعوةٍ فظيعة دب الرعب بسببها في كل خلية من خلايا سعيد الذي ذهب لأمه خاضع الرأس كسير النفس...! قالت:البنت هذي بنتك..سامع..بنتك و بنت مرتك إلي شردت لبيت أهلها و والله يا سعيد..والله لو ما تسجلها باسمك لتشوف شيٍ ما شفتُه..سامع...؟! رفع سعيد رأسه..لا..لا يريدها..إنها قذرة..إنها نجسة..إنها.. قال:"أمي هذي مي بنتي" "مي بنتك..أجل جايبها لي ليه..هذي بنتك و أكيد عارف" قال بصوتٍ عالٍ يائس:"يا أمي..يا أمي تراها بنت شوارع..هذي ممكن ما تكون بنتي..أنا مع الخوف أخذتها من غير ما أعترض..يا أمي لا تورطيني..لا تخربون لي بيتي..هذي مي بنتي" نظرت إليه بغضب..كيف لا و قلبها كان قد أخبرها بأن تلك الرضيعة هي ابنة سعيد..هكذا..شعرت بأنها منها و من صلب زوجها المُتوفّى...! قالت بإصرار:"لا بنتك..بنتك..و حتربيها و حتضمها لكرتك..رضيت و لا ما رضيت" قال بغضب:"اثبتيلي..طب اثبتيلي إنها بنتي و إذا أثبتيلي يسير خير" ورقة سعيد الأخيرة الرابحة كانت جهل أمه..هو يطالبها بإثبات و هي لا تملك إلا مشاعرها..و أيُّ إثباتٍ هو هذا...؟! ما لم يكن بحسبان الجميع هو سعود المواهق الناضج..المراهق الواعي الذي وقف جوار الباب و همس:"تحليل الـDNA" أمهما نظرت باستغراب أما سعيد فنظر لأخيه الصغير بغضب:"إنتا ادخل جوة و مالك شغل" حاول سعود أن يركز ناظريه على أمه:"أمي ممكن نتأكد بتحليل في المستشفى" صرخ سعيد:"سعود يا حيوان ادخل جوة" كرامة سعود صاحت:"مني حيوان..أمي ممكن نتأكد..ممكن" اتجه سعيد غاضباً لسعود..أمسكه من قميصه و دفعه للخلف بقوة:"قلت لا تتدخل" سقط سعود أرضاً و كان سعيد على وشك إفراغ غضبه به لولا صيحة أمه:"سعيد" لسع أخاه الصغير بنظرة شذرة:"حرجعلك يا كلب" عاد لأمه التي قالت:"كلام أخوك حيمشي..بكرة أنا و إنتا في المستشفى و لو ما جيت فانسى إني أمك و انسى هذا البيت و نصيبك منُه و انسانا كلنا و ارجع لبنات الشوارع يا ولد الشوارع..تفو عليك..يا خسارة التربية" نظر لأمه مطولاً بغضب و حقد ثم خرج من الغرفة،و في الممر..حيث رأى سعود على وضعه لم يتغير رفعه من قميصه،قرب وجهه من وجهه و كاد أن يقول شيئاً لكنه صمت و اكتفى برميه بوحشية و خرج من المنزل...! سعود احتضنه الجدر..ظهره آلمه لكن ليس بشدة إيلام قلبه و قلب أمه..ليس بشدة إيلام صوت بكاء الرضيعة التي لم ترضع من صدر أمها و لن ترضع...! وقف و اتجه لغرفته حيث الرضيعة..حملها و اتجه لأمه التي احتضنته و احتضنتها باكية...! و في الصباح كانوا في المشفى..أصر سعود على المجيء بغية حماية أمه رغم ضعفه..رغم خوفه ممن أوصلهم للمشفى..رغم خوفه من أخيه الذي رأى الوحش في عينه...! و هكذا أصبحت جود ابنةً لسعيد و زوجته...! هكذا أصبحت جود بالحبر ابنة سعيد و بالقلب ابنة سعود..حرفُ علةٍ كان الفرق..ربما..أخطأ الكاتب!!! **************************** | |||||||||
|
| |
|
06-03-14, 05:15 AM
| #27 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الرابع عشر (سأسعى لرد الجميل) سلمت و قعدت أستغفر و بعدين مسحت على وجهي...! علي:ايش تسوي من أول..ساعة تستخيري !!،بعدين في ايش..ليش رافضة تقولين لي...؟! التفت لعلي،بصراحة استخرت في موضوع عمو و في موضوع الإعادة حقي...! قلت:استخرت لنا...! -في ايش...؟! -في كل شي...! -ايش إلي في كل شي..استخارة هذي مو دعاء...! -يوووه علي..خليني أنا و ربي...! علي قعد يطاااااالع فيا..قلت:اييييييش؟! -قاهرتني...! -يا الله..ايش سويت دحين...؟! -تقهري..دايماً لمن تكوني داسة شي أحس لكن لو أمووووت ما أعرف ايش هوا إلا لمن تبغيني أعرف...! ابتسمت..قمت و أنا ألم السجادة و أسمي بالله عشان يعيني في حركتي...! حطيتها على جمب و نزلت الشرشف على أكتافي و رحت جلست عالسرير...! قلت:اطمنت على سعود إنو نايم...! -ايوة..طول اليوم كان مهلوك و تعبان...! -ايوة الله يصلحو..تعبني ما نام أمس إلا متأخر و صحي بدري اليوم...! هز راسو و حاولت أنا أشغلو بأشياء تانية..أعرف علي..لو حط في بالو يعرف حيعرف و لو اتبع أسلوب معين أنا حستسلم و أقول..و أنا ما ينفع أقول..خططي كلها حتخرب و دي..حتبقى مصيبة...! ********************************* سحبت نفس..لازم أكلم عمو و آخد موافقتو..أوكي هوا وافق..لكنو وافق عالفكرة بشكل عام و أنا لازم آخد موافقتو عالشخص...! بصراحة خايفة و حاسة بصعوبة..عمو لو أقولو مين في بالي حيثور أكتر و حنسى أنا نهائياً إني أفاتحو في الموضوع مرة تانية...! بس أنا لازم أتشجع..أنا أبغى الموضوع يخلص قبل ما أولد..لازم أتحرك..أوكي عمو حيرفض..أوكي ممكن يعصب و يخاصم بس أنا لازم أحاول..لو ما حاولت حكره نفسي بعد كم سنة و حلومها في اليوم مية مرة...! بس متى أكلمو..الجوال ما ينفع..و لمن نروح علي معانا..كيف..متى يمديني أكلمو...؟! اتنهدت..مافي إلا إني أبات عند جدة بكرة و يوم الخميس الصباح لمن الكل نايم أكلمو...! بس علي ما حيرضى..حيقولي:"خلاص حتروحيلهم يوم الخميس..ايش لو داعي؟!" أفففف..كل ما شي يتعدل يخرب التاني..و كل الموانع تكون حاجات سخيفة زي دي...! لكن ايش حسوي..أكلمو و أمري لله...! و في الليل..في الوقت إلي علي يكون فيه رايق..قلت:أمممم..علي..حبيبي... ! قال بنفس طريقتي:نعم..يا عيوني...! اعتدلت في جلستي و قلت و أنا ألعب بشعري:آآآه..علي أنا أبى أطلب منك شي...! -أنا أبغى أنام...! -ايوة حبيبي..حتنام و أنا حنام و كلنا حنام و سعود حينام و احنا حنام و... -ايوة ايوة و بعد النوم...؟! -آآم..علي أنا أبغى توديني عند جدة عشانننن أنام عندها...! قلت قبل ما يعلق:الله يخليك علي..الله يخليك لا تقول لأ...! كان حيتكلم لكني قلت:بليييييييز..الله يخليك..علي حبيبي إنتا لا تردني..قُلي طيب..قلي طيب...! طالع فيا مدة قبل ما يقول:لأ... -لاااااااااااااااااا... -قلت لأ يعني لأ..لو كان فيه سبب مقنع أوكيييي لكن بس كذة..طقت في راسك و بتروحي..آسف ما رح أخليكي...! قلت بدفاع:فيه سبب..جدة..جدة أحسها مرة محتاجتني و فاقدتني و عمو أحسو يبغى يكلمني في أشياء كتيرة بس مو لاقي وقت و... طالع فيا بنظرة:ما تبغيني أقعد معاكم يعني..أوكي أنا ممكن أحطك يوم الخميس..أسلم و أمشي !! -لا علي مو عن كذااااا..بس.. -واحشتك القعدة عندهم يعني...؟! -يعني..يعني ايوة و كده أبغى أقعد معاهم و... سكت فقال علي:كلنا نشتاق لقعدة أهالينا و أيام زمان لكن ايش نسوي..لو إجازة قولي ها ممكن لكن احنا ورانا دوامات..أحطك يوم الخميس و أجيكي الجمعة و السبت أدوام..ما حرتاح كذة...! -لالا..أنا عندي خطة أحلى..بكرة بعد العصر علطول نروح عند أهلك و بعد العِشا نمشي..تحطني عند جدة وتروح على البيت..و يوم الخميس تجوا إنتا و سعود على بيت جدة...! -اممممممم..ما شاء الله..و لين يجي الخميس ايش نسوي أنا و سعود لحالنا...؟! -عادي..تقعد عند أهلك..حتنبسط و ينبسطوا...! -بصراحة إنتي وضعك موعاجبني..يا تقولين لي ايش عندك و تتيسري عند أهلك يا نامي و انسي الموضوع..ولااا تزني لا أبطل روحة الخميس بالمرة..تصبحي على خير...! همست:و إنتا من أهلو...! و أعطيت علي ظهري..حتسألو..ايشبو قالب؟!،أقولكم:علي حاسس إني مخبية عليه شي..أنا صح مخبية بس مو هبل..أنا فعلاً ما أقدر أقول لعلي أي شي دحين..ما أقدر..ما ينفع...! بكيت..من غير دموع..اللهم خشمي حمر و قلبي انقبض...! مديت يدّي..سحيت منديلة من الكوميدينة و مسحت بها خشمي..و احتفظت بها تحت البطانية بين يدّيني عند قلبي...! حسيت بيد عند عضدي و وصلني صوت هامس:جود إنتي ليه تبغي تروحي...؟! غمضت عيني قلك نايمة:خلاص مو لازم...! ببطئ:ليه..تبغي..تروحي...؟! قلت و أنا خافضة بصري:أبغى أروح...! اتنهد:طب..نامي ذحين و و بكرة حنشوف...! قلت:إنتا زعلان..ما حروح و إنتا مو راضي...! لف يدّو عليا و حط راسو على مخدتي:لأ مني زعلان..نامي و الصباح رباح...! يا رب يرضى..يا رب لمن بكرة تهديه و يرضى..يا رب...! ********************************* كنا قاعدين في بيت أهل علي قعدة حلوة..هروج و حكايات و تريقة..أنا و عمتي و بناتها و علي أما سعود و لينا فقاعدين بعيد عننا شوية مادري في ايش يتناقشوا...! صفاء:بس والله..أحسك ذحين غير..وجع..في زواج أحمد كنتي شايفة حالك..باين عليكي طيبة بس فيكي عنطزة...! شهقت:أناااااا...؟! قبل ما ترد قال علي:ايوة إنتي و لمنننن ذحين فيكي عنطزة بس كنك أخف لكن أول ما أخذتك..الله لا يبلانا..أعووووذ بالله..شايفة حالك على مادري ايش...! أحلام:امممم..كنت أحسك لسه صغيرة و كنت أقول:حتكبر...! التفت لعمة و أنا متوقعة إنها حتكمل سلسلة المصارحات دي...! لكنها ابتسمت ببساطة،قلت:ايوة عمة كملي...! علي فجأة بصوت عالي:و حتى مع أهلي كنتي ساكتة و ما تتكلمي..مسويتلي فيها الهادية..لكن في البييييت..تعالو شوفوها..وحش..مجرمة..أعوذ بالله...! طالعت في علي:لا يا شيخ...؟! -ايوة الله..كنتي شايفة حالك..شي لا يُطاق...! -عمممممة..شوفي ولدك!!! ابتسمت عمة برزانة و قالت:سيبيكي منهم..أخوان و اتجمعوا على أحد..إنتي ما كنتي مغرورة..كنتي تبغي تسمعينا و بعدين تتكلمي و اسم الله عليك ما مر شهر إلا و إنتي معانا عادي...! حطيت يدّي على بطني:والله صادقة فيا يا عمة..هدا الكلام إلي يريح..أنا حامل...! علي و هوا يدَّعي الدهشة:بالله..حامل...؟! طالعت في علي بعدين في صفاء إلي قالت:هوا شوفي أنا انقهرت..يعني أعطيتك ايميلي و جوالي و ما اتصلتي ولا حتى أضفتيني..انقهرت منك..حيوانة وحدة...! علي:بأي حق ما تضيفي أختي...؟! سكت..اتذكرت كيف إني بعد زواج أحمد انشغلت بأشياء كتيييييرة...! علي:جوووووووووود...! -ها...؟! ابتسم:وين وصلتي...؟! -ولا محل...! صفاء:وجع..ما لقيتي تتنحي إلا لمن اتكلمت...! -ما تنحت !! عمة:بنت..ايش ذا اللسان على مرة أخوكي...؟! صفاء..اتفشلت أما أنا فضحكت:ايوة صح أنا مرة أخوكي..احترميني...! علي:المهم..ايش كنا نقول..ايوة..ليش يا هانم جود ما تضيفي أختي...؟! -ماااا..نسيت...! -ليش نسيتي...؟! -امممم..انشغلت...! -بميييين..بيا...؟! أديت علي _إلي الظاهر إنو فهم سبب سرحاني_ نظرة:و أنا ايش عرفني بك وقتها عشان أنشغل بك...؟! صفاء نطت و كأنها تبغى تغير الموضوع:هي..آآآ..جود شفتي إلي رسلتلك هوا...؟! قطبت حواجبي مستغربة من دخلتها الغلط:ايش...؟! -رسلتلك رابط قصة...! قطبت حواجبي أكتر:لا ما جاني شي..ليا مدة ما دخلت...! -ليييييييييش...؟! -البركة في أخوكي و ولدو...! علي:ولدو مو ولدك...؟! -إلا..بس صفاء تعالي هنا..أنا ما قلتلك ما تقري شي إلا لمن تقوليلي...؟! -لالا هذي حلوة أنا متأكدة منها..إلي كتبتها عندها مدونة تنزل فيها مقالات و أشياء حلوة...! -طب لو كده ارسليلي لنك بلوجّها (رابط مدونتها) ...! -أوكي...! علي:هانم صفاء..ما كنك قاطعتيني...؟! كان معصب الشي إلي خلاني أضحك:دوبك تنتبه...؟! قال و هوا يحك راسو:ما..مادري طفشان...! و وقف و راح لسعود و لينا و قعد معاهم..قالت عمتي بهمس:ايشبه...؟! قلت و أنا أرفع أكتافي:مادري له كم يوم طفشان و نومو ملخبط و كده...! صفاء:مني...؟! ابتسمت:لا حبيبي مو منك..أخوكي أحياناً عليه طلعات طفش غريبة...! صفاء:إلا أقولك..لمن تدخلي مدونتها.. -لحظة لحظة ايش اسمها هيا...؟! -مادري نسيت..المهم ادخلي و اقرأي المقال إلي كاتبتو عن الزواج..مرررررررة حلو..اتكلمت فيه عن فكرة إنُو بعد السنين الأولى يخلص الحب...! -آآه..ترا عبط..الناس الطبيعين يكونوا دايماً العكس..السنين الأولى مليانة مشاكل..الزوج يكون عصبي و يتنرفز بسرعة و الزوجة مدلعة و ما تتحمل كلمة..هيا لو عدت كلو يهون...! عمة:لا مو لذي الدرجة يا جود..هما بس يكونو دوبهم بادئين حياتهم و مو متعودين..هما يقولو إنها حلوة و ما تتعوض لإن المشاعر فيها تكون قوية و سبحان الله بكذة يسير توازن..يعني يكونون مو متعودين و مو ناضجين لكن مشاعرهم حارة و قوية فيقدرون بكم كلمة حلوة و كم وردة يتراضو...! أحلام:و بعدين مو الحب إلي يخلص..الانـــبهااااار..يكون كل واحد طاير في الثاني..بعد كم سنة يتعودوا على بعض و يسيروا عاقلين..مو كلمة توديهم و كلمة تجيبهم...! صفاء بسخرية و قهر:بس البنات دايماً يقولو إنو الخمسة سنين الأولى و بعدها خلاص معد يحتفلو بعيد زواجهم و لا يحبوا بعض بقوة...! قلت:عبط زايد...! علي من بعيد:يوووووووووه..يعني ما بقي لنا إلا شوية...! التفت:وي..اسم الله علينا...! عمة بغضب:علي..كم مرة أقولك ما تقول إلا الطيب...؟! علي و هوا يسوي شي لسعود و لينا:آآآآآسف...! قال بعد مدة:إلا ايش رايكم توقفوا ذا النقاش الهادف..طفشتوني ترا...؟! كملنا كلام و لا كأنو قال شي فاتأفف بطفش..حبيبي هوا..الطفش باين عليه..مادري ايشبو..يبغالي أشوفو بعدين...! قالت أحلام:بس أحس إنو الخلفة في البداية مي حلوة...! ابتسمت:صح..مرة سمعت واحد يقول إنو مالو داعي لو ما يعرفوا بعض...! صفاء:بس الخلفة هيا إلي تبين لو الآدمي كويس و لا لأ...! عمة:إنتوا لا تشغلوا نفسكم بذي الأفكار..الطيب طيب من البداية و السيء سيء من البداية..ترى يبان من البداية..لو الوحدة ذكية تكتشف...! أحلام:مو هذي المشكلة..هما ما يقدروا يكونوا أذكياء..الناس تسوي الملكة عشان يتعرفوا على بعض احنا نسويها عشان ننبسط كم شهر و يطلع كل واحد قدام الثاني بيرفكت...! عمتي:إلا على سيرة الخلفة..كم باقيلك و تولدي...؟! -أممم..شهرين و نص بالكثير...! عمة بثقة:لا يا حبيبتي لأ..قولي شهرين و نص بالقليل...! ابتسمت باستغراب:والله آخر مرة حسبت طلعت معايا كده...! عمة:لالا... صفاء:استحي على وجهك..أمي حاسبتلك أحسن منك...! -عشان ولدها بعدين مو هيا إلي حتولد..يحقلها تستعجل..أنا أبغى أطول المدة...! أحلام بضحكة:مو أول مرة تولدي !! -مو يا حبيبتي لإني مو أول مرة أولد خايفة..لإني عارفة ايش حعيش..قبل..في سعود كنت عايشة جو مع كلام العقاد..يقول إنو المرأة تحس بمتعة لمن تولد..تستمتع بالألم يعني..و كنت مطمنة عالآآآآآخر..لين ما أكلت على راسي...! قربت مني عمة و قالت بصوت هامس:طب كده بينك و بين نفسك..ما كنتي حاسة بمتعة..ما كنتي حاسة بأي سعادة...؟! قلت بضحكة خافتة:إلا إلا..بس والله تعبت...! -ايوة هوا كذة أول ولادة..صدقيني ذي المرة إن شاء الله أهون...! صفاء:يعني يعني... أحلام:مال أبو أمنا داعي...! طالعت عمة في أحلام:أبو أمك الله يرحمه..بس خلاص..جود..يلا اسكتي...! طالعت في عمة:والله أنا شُجعت على الكلام ولا ما كان اتكلمت...! وقف علي من عند البزورة و هوا يقول:أحلى شي عندي لما جود تتهزئ...! طالعت فيه بقهر:ما اتهزأت...! عمة:تعال اقعد إنتا..ناقصتك و عبطك...! جلس علي جمب عمة من الجهة التانية:الله لنا يا أم علي..كل ذا عشان ما قلتلك من بدري...؟! قلت:ايش هوا...؟! مدلي علي لسانو:اييييييييييييه..مالك دخل..سر بيني و بين مامي...! مامي طلعت من علي تجيب الـ.. والله زوجي ما ينفع لو الدلع..بس فديتو كل شي منو حلو !! عمة:مامي..مامي وقت الراحة لكن في الجد.."قلدت صوت علي"..أمي..كنك شوية و تصفقني كف...! و قامت متوجهة للمطبخ...! قلت باستغراب:علي ايشبها...؟! قال بلا اهتمام:آآآ..واحد من "أصدقائي القُدامى" اتصل عالبيت و أمي ردت فقال إني ما أرد على جوالي من مدة طويييييييييلة و عاد أمي سألتني لإنها تعرف صوته صاحبي من زمان فقلتلها فزعلت ليش ما اتكلمت من أول...! -لا يكون هذا نفسو إلي اتصل آخر الليل...؟! قال بقرف:مادري..كيفهم..الله لا يردهم على قولك...! قلت:بعدين منتا في مدرسة أو جامعة عشان يكون فيه مكان يجمعكم غصباً عنك..كل شي بيدك..خليهم يولو...! -يااااا شيييخة...! قلت:و عمة أكيد فيه شي تاني مزعلها..هيا ما تزعل من دي الأشياء...! -بس أنا ما سويت شي...! -مو لازم إنتا..ممكن أي شي أو حتى ممكن أشغال اتجمعت مع بعض فسارت طفشانة..عادي مو شرط تكون إنتا...! اتنهد علي:طيب خلاص... طالع في أخواتو:طالعي كيف يطالعو فينا...! طالعت في صفاء و أحلام..كان باين عليهم الطفش...! ضحكت:علي شكلنا مطفشين أمك و أخواتك...! صفاء:ايوة..بصراحة اليوم مملين...! أحلام:لا علي و جود من جد إنتو ما عندكم نص و نص..يا تسو لنا جو مو طبيعي يا تجيبولنا البلى..يعني معليش بس بصراحة سايرين مملين الفترة ذي...! قلت:سويتي احنا ما سار عندنا شي إلا انتظار البيبي..يعني هوا الشي الحماسي القادم..غير كده غرقانين في روتين قاتل..يعني المفروض نجي و إنتوا تحمسونا..مو احنا...! صفاء:مو احنا نفس الحالة..أنا كنت أدور على شي أستناه ما لقيت إلا البيبي حقك ذا...! قلت و أنا أغمض عيني بفلسفة:العوائل المحترمة دايماً تمر بحالات زي كده...! علي:ارحمييييييييييني...! -طيب... طالع علي فيا باستغراب فقلت:حرحمك...! -آآآآه... و على كده لين ما اتعشينا و حركنا..أنا في السيارة كنت تعبانة..أسندت اسي على ورا و أنا أحس بنفسي مكتومة..يا رب تيسر الولادة ليا يااااااااا رب...! لفيت راسي و أنا أنادي سعود إلي كان سادح و مغمض عينو..فتحها على طول..قلت:نمت حبيبي...؟! قال بتعب هوا كمان:شوية... ابتسمت:هيا سمي بالرحمن بابا و نام...! رجع سعود يغمض عينو و أنا أسندت راسي و غمضت عيني...! علي:تدري لو سامحين للمرأة بالقيادة كان خليتك تسوقي و قسمت المشاوير بينا...! قلت و أنا مغمضة عيني و مسترخية:لو سمحوا للحريم يسوقوا حجيب سواقة تكون كوفيرة و ماخدة الحزام الأسود في الكراتيه...! -و كم حتعطيها إن شاء الله..3 آلاف ولا أربعة...؟! -والله أي شي..لو حتريحني أديها أي شي...! -و من وين إن شاء الله..اتوظفي و ادفعي من راتبك...! عقلي صحصح لكن صوتي لأ... قلت:إن شاء الله لمن أتوظف...! ضحك بسخرية و هوا يلف:تخيليكي موظفة...! رجعت أغمض عيني من غير ما أرد..عندي إحساس قوي يقولي إني حكون امرأة عاملة..مع إنو مرة حلو الوحدة تقعد في بيتها و ترتاح..لكن عندي إحساس قوي ينفي دا الشي...! بعد مدة مادري كم هيا اكتشفت إني غفيت لمن فقت على صوت علي...! -جود..جود..جود يلا... قلت بنوم:هااااا...؟! -ايش إلي ها..قومي...؟! قلت و أنا أقوم:ايش..وصلنا...؟! طالعت باستغراب في المكان إلي موقف فيه علي...! علي:نمتي...؟! التفت لعلي و أنا مقطبة حواجبي...! ابتسم بحلاوة:انزلي و ادعيلي...! قلت:علي من جدك...؟! -يعني بوصلك لين هنا عشان أستفزك مثلاً...؟! -بس إنتا كنت زعلان و متنرفز طول اليوم عشان كده و دحين... قاطعني:خلاص انزلي إنتي ذحين...! -علي كيف أتركك لحالك...؟! -منتي كنتي ناوية تتركيني لحالي أمس...؟! -بس... -جود..لو مانزلتي حمشي و تحلمي أرجعك...! قلت بحرج من نفسي:بس إنتا ما كنت راضي...! قال بنفس أسلوبي:و دحين راضي..ممكن تنزلي...! قلت بسعادة:شكراً علي...! ابتسم:شوفي لا تبيني سعادتك و تستميتي في الامتنان..سوي نفسك منتي مبسوطة لإني عالتكة حتنرفز...! قلت و أنا على وشك أبكي:Ali gimme a hug -مع نفسك ذحين..يلا انزلي...! -عليييييي... اتلفت يمين و شمال كأنو حرامي و هوا يتأفف و بعدين حضني...! بعد عني و قعد يتحمحم..قلت:ايش حتسوي بكرة...؟! -أسوي أي شي..طبعاً إنتي ما تبغي سعود معاكي..صح...؟! -آآه..خلاص اخرج إنتا و هوا كده عالظهر و مروا في الليل نتعشى مع عمو و جدة...! اتنهد:طيب يسير خير..يلا انزلي...! -اتصل عليا أول ما توصل و خلي سعود ينام معاك لا تنام لحالك...! -ما أنام لحالي عشاني ولا عشان سعود...؟! -آآآ..عشان سعود...! -لا يا شيخة...! ضحكت:خلاص ما دام مني موجودة خليه ينام معاك...! ضحك:أقول انزلي انزلي...! ابتسمت:لا من جد حبيبي..لا تخليني كده..أخاف عليكم...! ضرب على صدرو:أنا و ولدك رجال...! ابتسمت:مو أنا ليش أحبك إنتا و لدك إلا لإنكم رجال...! ابتسم فقلت:طب علي تنزل معايا عشان أخاف أطلع لحالي...! قالو هوا يوقف السيارة:طيب...! طالع لورا:بس سعود نايم..خلاص جود اطلعي و ما عليكي خلاف إن شاء الله...آآ..أقولك بطلعك عند درج المدخل بعدين استخدمي المصعد و إذا دخلتي طمنيني...! قلت و أنا أنزل:طيب..! و نزلت من السيارة و استنيت علي لين ما جا و طلعني..شافني دخلت المصعد بعدين راح للسيارة..أول ما وصلت خرجت من المصعد و أنا أسمي..دقيت الجرس..وصلني صوت منورة فقلت:"جود"..دخلت وسط نظرات عمو المستغربة..ابتسمت و أنا أتصل على علي...! قلت:دقيقة بس بطمن علـ..ايوة هلا..خلاص وصلت..طيب..أول ما توصل طمني...! و قفلت..طالعت في عمو بابتسامة و أنا أمشيلو..سلمت فقال:ايش جابك...؟! جلست:ايش الترحيب دا...؟! -لا بس مو من عوايدك تجي الربوع...! ابتسمت:جا على بالي أبات عندكم فجيت..و كمان أبغاك في موضوع...! تابعت:آآ..اتعشيت...؟! -محنا مسوين عشا اليوم..جيعانة ادخلي شوفيلك أي شي...! طالعت في عمو مستغربة و أنا أفسخ عبايتي في مكاني:ايش الأخلاق هذي..وي!! ضحك:لاااا..بس يا شيخة ما نمت الظهر مادري ليش و أحس نفسي مهدود..و يا ليت سويت شي..لا بس كذة لااااابد...! ابتسمت و أنا أتذكر:بس إنت خِلقة أخلاقك يوم الربوع زفت...! -يا شيخة..إلا في ايش كنتي تبغيني...؟! -ممم..شوية مو دحين..جدة وين...؟ -جدتك تصلي و بتنام أكيد بعد ما تصلي..إلا أقولك..كويس إنك جيتي..تراها سايرة روحها في خشمها و طفشااااانة..و أنا ما أعرف ايش أسوي معاها..أحسها..أحسها ما تبغاني..يعني مو تكرهني بس تحسيها ما تحب تقعد و تهرج معايا..كذة..ما..مادري كيف...! -طب ما تحاول تخرجها...؟! -واللهِ أتمنى..أترجاها دايماً بس ما ترضى..كل ما أحاول أكلمها تقولي سكر وكل شوية أحتاج الحمام و معد فيني شدة..أصلاً هيا من يوم ما بطلت تخرج معايا وسارت ما تجيب أشياءها بنفسها ساءت نفسيتها...! ابتسمت و أنا أمسح على كتف عمو:خلاص حبيبي..هدّي..لا تحرق أعصابك..إن شاء الله أنا دحين حولد و إنتا حتتزوج..يعني..تسير حركة شوية في العيلة..و إن شاء الله تفك و تتحمس..تعرف ايش..إن شاء الله لمن أجي أشتري أشياء البيبي أقولها تجي معايا و لمن إنتا تجي تشتري الدبل و زي كده نصر عليها تجي تختار...! قال بطفش:دبل ايه يا أمي فكيني...؟! كان نفسي أقول لعمو حتى إنتا أخلاقك سايرة زفت عشان قعدتك في البيت..لا إنتا إلي سويت عيلة و لا إنتا إلي صايع في الشوارع تسوي حركات شباب و تغير جو لكن و لإني أبغى أكسبو ما حقلو كلام زي كده...! قلت:إلا إن شاء الله..اسمع أنا بروح أشوف جدة و أسلم عليها و أشوف لو تحتاج شي و بعدين بجي و أناقشك في دا الموضوع...؟! قال عمو بضيقة أطفال:جود تناقشيني في ايه..منتي ناقشتيني و خلصتي...؟! ابتسمت و أنا أوقف:ناقشتك في الموضوع مو في ذات الشخص...! -يعني إنتي محددة خلاص...؟! -والله تقدر تقول أبغى آخد موافقتك عليها بعدين آخد موافقتها عليك...! -و مين هيا دي...؟! قلت بدون اهتمام و أنا أعطيه ظهري:أحلااام..شوية أروح أشوف جدة و أجيك...! و رحت بسرعة عند جدة و قلبي يضرب ضرب مو طبيعي...! آخر شي أتذكرو كانت دهشة عمو و نظرة الصدمة المرعبة...! خلصت جدة صلاة و قالت على طول:جود... ابتسمت:ايوة جدة... و رحت و سلمت عليها..جلست جمبها و جيت بتكلم لكن صوت صفقة الباب القوية ألجمتني...! جدة:الله وكبر "الله أكبر" ايش فيه هالولد...؟! قلت و أنا أحاول أرقع:آآآه خسر فريقو حق الكورة... -الله يا خسر فريقُه..عمك من متى يشجع...؟! عضيت شفتي السفلى..أنا حمارة؛أعرف إنو جدة ما يمشي معاها الترقيع..أذكى مني ومن عمو و منكم !!! قلت و أنا أبتسم:أجل تلاقيه شاف شي نرفزو..إلا قوليلي إنتي..كيفك و ايش مسوية...! -الحمدلله..إنتي كيف جيتي و متى و ليش ما تقولينْلي...؟! -والله يا جدة حسيت إني مشتاقتلك و مشتاقة لعمو..كلمت علي و طلبتو و الحمدلله وافق و جابني..بكرة بيجي هوا و سعود و يتعشوا معانا...! اتنهدت:خير..خير إن شاء الله...! ابتسمت و أنا أحط يدي على فخدها:إلا إنتي ايشبك يا جدة..أحسك..كده تعبانة و طفشانة..ليه..ايشبك...؟! قالت بهم بدون تردد:والله يا بنتي إني شايلة هم ذا الولد..إنتي و ربي سترها معاكي لكن سعود..والله إني ما أكلمو في زواجُه..أدري بيظيق (يزعل) عليا..لكن معد فيا صبر..أبغى أشوف ذُريتُه قبل ما أموت...! قلت بانفعال:اسم الله عليكي جدة لا تقولين كذة..والله أزعل منك..لا تفاولي على نفسك...! -أنا أدري..والله إني أدري إن إلي فيه وِحدة..الواحد لا كبر و ما اتزوج يعجز..عشان القلب..القلب يا بنتي إذا ما لقى الزوج يعجز و إذا عجز عِجزنا احنا اتنهدت:أعرف جدة أعرف..كلامك والله صح..إنتي ادعي..ادعي بس و أنا بحاول أقنعو..والله إني إذا كلمتو يظيق كمان لكن ايش نسوي..لازم..و الحمدلله مافي أي مانع..السكن متوفر..يفضي وحدة من الشقق و خلاص و الراتب الحمدلله راتب عمي يكفي و يوفي..مافيه أي مانع...! -صادقة والله..لكن ذحين ليش ظاق..كلمتيه إنتي...؟! -ها..آآه ايوة حاولت أفتح معاه الموضوع..هوا..هوا وعدني حيفكر لكن مع التوتر تلقيه اتنرفز و قفل الباب بقوة و عصبية...! -يا بنتي إنتي ليه ما تشوفين وحدة من أخوات علي..إلا كم عمرها ذيك إلي باقي ما اتزوجت..طيبة هيا..فيها خير..عمك ضعيف ما يقدر في الحريم...؟! ما كنت أبغى أدخل الفكرة في راس جدة..أخاف تتكلم و لا تقول شي رغم إنو الكل متوقع إنها الأنسب لعمو...! قلت:مادري..الله يكتب إلي فيه الخير..هيا جدة تبغين شي...؟! -إن كان شي موز هبيلي...! -إن شااااء الله...! وقفت فقالت:و الموية..عبيلي كاستي...! قلت و أنا أشيل كاسة جدة الخاصة إلي تتغطى:إن شاء الله...! و رحت للمطبخ..عبيت الكاسة بموية باردة و أخدت كم حبة موز و أنا أقول:منورة كلمي عمو ينتبه للموز..شوفي الخربان كتير..حرام هذا كرتون كامل...! -أنا قلت..لكن بابا سؤود مافي ينتبه..هدا رجال حرامي..أنا أول أروح..حيوانة..فوق كويس تحت خربان..بابا سؤود ما يفتح كرتون عشان شوف بعيونو يقول احنا مسلمين لازم أمانة..ثقة...! -عارفة الله يصلحو عمي..يحسب كل الناس زيو...! -أنا أقول لكن بابا ما يسمع...! -والله ما شفتي علي..يروح يضارب على حبة الطماطم لو فيها قاااااد كده سواد يروح يضارب...! -أحسن بنغالي كده ينفع..ناس طيبين ما ينفع...! -صادقة و الله..هيا يلا تصبحي على خير...! -و إنتي من أهلو..! و رحت لجدة..قعدت معاها شوية..أكلت و أكلت معاها موز..هرجنا كده يجي حق ساعة إلا بعدين نامت و اتوكلت أنا على غرفتي و هناك أديت علي رنة..عشان لو نايم خلاص..لو صاحي يرجع يتصل و رجع اتصل...! رديت بهدوء:ايوة... -أهلاً..ما نمتي...؟! كنت قدني سادحة عالسرير و مغيرة:لاااء..دوبها جدة نامت و أنا.."اتثاوبت"..أنا دوبي دخلت الغرفة..إنتا ايشبك ما نمت...؟! -و أنا أقدر أنام من غيرك...؟! -و إنتا راضي لأ...! ضحك:قصدي يهمني تكوني في البيت..حتى لو منتي معايا...! -ايوة..شغل استبداد هذا...! -هذا اسمو حب..حب يااا جاهلة..يا عديمة الغومنصية...! -غومنصية...؟!،ايش دا..فرنسي على بدوي..ايش يطلع هذا...؟! -هذا اسمهُ لغة الانترنت و المنتديات..بس إنتي مالك فيها...! -لا صدقني ليا فيها و بقوة...! -ايوة زمان كان لكي فيها ذحين خلاص...! -كلو منك...! -والله..ما أحلاكي تفتحي مواضيع و تتناقشي بكل رُقي مع الأعضاء..مصصصصخرة...! -أصلاً مو من حبي فيها..أحسها كلها نفاق..الناس الراقيين إلي فيها و أصحاب المبادئ مهم موجودين..على الواقع يختفوا مدري كيف...! -أصلاً أحسها دقة قدييييمة..منتدى و ناس أتناقش معاهم و قوانين ألتزم فيها..يييييه..شي يجيب الطفش...! -لا هوا حلو يكون عند الواحد منتدى يطلع فيه كل مواهبو و إبداعاتو..بعدين بصراحة فيه منتديات أنا أدخلها و أشارك فيها عشان أحمل.."بسخرية"..ضع رداً لائقاً ليظهر المحتوى...! ضحك:طيب يختي سيبينا ذحين من المنتديات..إنتي بتنامي...؟! -إن شاء الله..و إنتا...؟! -بقفل منك و أنام...! -سعود وين...؟! -سعود يا ستي جمبي أهو..سادح و في سابع نومة...! -حبيبي هوا..بوسلي إياه...! -طيب... -بوسو !! -طيب!! -دحين يلا... -استغفر الله..لازم تسمعي الصوت يعني...؟! -ايوة ايش حيضرك يعني لو بستو...؟! -طيب طيب.. و ما سكت إلا لمن سمعت صوت بوسة...! انشكحت...! قال:ارتحتي يختي..شوفيني خليتيني أضعف و أحضنو..مني قادر أسيبو...! -و فيها ايه يعني لمن تنام حاضن ولدك...؟! -ما فيها شي..تبغي شي...! -لا سلامتك..بس انتبه ترا إلي جمبك سعود مو أنا...! بانفعال:يا حيوانة يا قليلة الأدب.."وطى صوتو"..والله بس ما أبغى سعود يصحى..لكن تعالي..تعالي و أنا أوريكي..قليلة أدب وحدة...! ضحكت:هدّي هدّي ايش فيك..مزحة و طلعت...؟! -أنا أمزح قلة أدب عادي..إنتي لأ...! -استبدااااد...أقولك مستبد بس ما تسمع...! -إنتي كذة تخربي صورة الطهر و الأخلاق و الحياء حقتك في عيني...! -أوووووه..كيوت علي..كيوت..يعني أنا لسه عندي حياء قدامك..حسبت إني فاصخة الحيا أنا...؟! -كذابة..والله لو قدامي ذحين ما نطقتي بكلمة..قلك ما أعرفك يعني...! قلت و أنا أبغى أوقف النقاش:طيب خلاص..يلا روح نام..مع السلامة...! قال بصوت واطي:ايييييوة..اطلعي على حقيقتك..أتحداكي ذحين تكملي النقاش..شوفي أنا رحمةً بك و رأفة..و مراعاةً للأدب العام ولا كان قليت أدبي و نزعت قناع المروءة و الشرف..يلا..يلا روحي نامي و خليكي قد مزحاتك مرة ثانية...! -آآه..تقصد بأن هذا هو درس اليوم...! -نعم نعم هوكذلك...! ضحكت:تبغى شي...؟! -لأ..تصبحي على خير...! -و إنتا من أهلو..اتغطى كويس...! -طااااااييييييب...! -يلا باي...! -سلام...! و قفلنا...! حطيت الجوال على الكوميدينة و أنا أبتسم بسعادة لكن سرعان ما اختفت ابتسامتي... عمو..أسلوبي كان غلط..أنا أصلاً ما كنت ناوية أكلمو كده..لكن لمن سألني لقيت نفسي أتكلم من غير ما أحس..أنا لا اهتمامي ما كان مفتعل..حتى بسرعة رجعت اتوترت..أسلوبي كان غلط..كان المفروض أكون معاه أكلمو بهدوء و صراحة و أحاول أمتص أغضبو..كيف أرتكب دي الغلطة و أنا أكتر وحدة أعرف إنو عمو لو أحد كلمو بأدب مستحيل ما يناقشو و يتكلم معاه..أنا غبية..كيف كده أسوي..دحين الموضوع حينقفل نهائياً و ما حقدر حتى أفتح فمي...! يا ربي..ايش دا...؟!،يا ربي لو لك حكمة وريني هيا..أنا عارفة عموحيعصب من قبل لكن قلت أحاول و طلعت كده من غير ما أحس...! يا ربي..يا ربي لا تكلني إلى نفسي طرفة عين..يا ربي إنتا أعلم بتعبي و بالهم إلي في قلبي..يا ربي لا تخليني لوحدي..يا ربي هدئ سر عمي..كل إلي أبغاه هوا إني أرد لو الجميل..يا ربي إنتا أعلم بالتعب إلي تعبو معايا..رباني و كبرني و حبني !!! يا رب..ياااااا رب ********************************* "آآآآآه..ظهري..سار لي كم يوم و أنا حاسة بالألم يزيد عليا..استغفر الله يا ربي..ايش دا..يلا هانت..راح الكتير و بقي القليل..كلها ثلاثة شهور إلا و أولد..." طالعت في الساعة..كانت ثمانية..مع إني حاسة بتعب لكن ما فيا نوم..قمت بصعوبة و أنا حاسة نفسي مكتومة..شي جديد دا..لسه بس أمس بدأت أحس بالكتمة..مادري ليه أحس حملي في سعود كان أسهل و أهون مع إنو الكل يقول إنو أول حمل هوا أصعب حمل...! خرجت من الغرفة للحمام..يوووووه..اتذكرت إنو ما معايا فرشتي..ما كنت جاهزة للمبيت..الله يصلحو علي لو قلي من أول..على كل حال أحمد ربي..واحد تاني كان رمى بخاطري عرض الحايط...! فجأة جا على بالي عبدالله..لو رضيت بو كان حيسوي معايا كده...؟!،مادري ليه أحس إنو لأ..يمكن لإني حابة علي مرة و مرتاحة معاه الحمدلله..بس من جد..أحس لو رضيت بعبدالله كان قعدت في مشاكل مع أهلو حتى لو هوا يحبني و أفترض أنا إني ححبو...! يووووووه..أنا كمان..ايش التفكير دا..خلاص بيتزوج الرجال و يفكني من إحساس الذنب و لو إني حسب حكاوي عماتي لمن يجوا و أقعد معاهم و أسمع أحسو..يعني أمو و أخواتو لمن يقعدوا يتكلموا عنو..أحسو عايش طبيعي..مالت عليه رغم إني ناسيتو و مني مهتمة لكن كنت أحس نفسي كلبة بسببو..وجع..حسيت بالذنب عالفاضي عشان واحد كان مصاب بمراهقة متأخرة..بس بالله "وش يحس فيه" لمن يتذكر...؟! "وش يحس فيه"..أنا صح مني متعودة على دا الكلام لكن دي الجملة بالذات أحسها أحياناً معبرة و لو إني ما أزبطها لمن أقولها..هيا مي حلوة إلا من أهلها...! أوه لحظة..ايش كل إلي فوق دا...؟! أنا قاعدة أتهرب من التفكير في عمو و في إلي سار أمس..أو خليني أقول التخلف إلي سويتو أمس...! اتنهدت و أنا أبدأ صلاتي على كرسي التسريحة الموجودة في غرفتي...! قعدت أقول الأذكار و أنا في نفسي أتمنى لو إني صحيت و صليت الفجر في وقتها..كان قعدت أدعي لين الشروق..كان اتواصلت مع ربي زي العالم و الناس..كان..استغفر الله..خلاص..رحمة ربي و لطفو مو مرتبطين بقعدتي لين الشروق...! اتنهدت و أنا أحاول أذكر نفسي بكل الأشياء إلي ربي ما خذلني فيها..طبعاً ربي ما قد خذلني..أنا قصدي في الأشياء إلي أتذكرها و يا قلها قدام إلي ما أتذكرها...! قمت و أنا أفكر إني حسوي فطور لمن يصحو..طالعت في الساعة..جدة هادا وقتها بس عمو..عمو على حسب ما كان ينام دا الأسبوع و طول الأسبوع كان يقولي إنو ما كان يخرج من الشغل للمسجد للبيت..معناتو أكيد كان ينام كويس معناتو أكيد حيصحى اليوم بدري...! سمعت صوت كحكحة قوية طالعة من جهة الحمام..أكيد هدا عمو..تعرفوا كيف الرجال في الحمام يكحوا و يتمضمضوا بقوة أول ما يصحوا...! قمت من الكرسي و خرجت من الغرفة من غير ما أفك الشرشف..أحس شكل الوحدة بالشرشف يغصب الرجال إلي قدامها إنو يهدى...! جلست على وحدة من كنبات الصالة إلي تقابل التلفزيون...! دخل عمو بعد ثواني و طالع فيا بنظرة لاسعة سرعان ما اتحولت لطبيعية و هوا يقول:صباح الخير...! و ارتمى عالكنبة و سحب كل الريموتات عندو...! قلت و أنا أشوفو يشغل التلفزيون و يقلب لين ما يوصل للجزيرة الوثائقية:صباح النور...! قلت عشان أكسر الصمت:كيفك عمو..نمت كويس أمس...؟! -نمت... -ارتحت... ببساطة:لأ لكن نمت..اليوم حنام كويس...! طنشت و ما حاولت أفكر في إلي يقصدو و أنا أقول:كنت أبغى أسألك عن.. لمن شفت نظرتو الغريبة قلت:..الللفطووور..نستنى منورة تقوم تسويه و لا تبغى أسويلك دحين...؟! -لا ارتاحي إنتي شكلك تعبانة...! -ايوة صح والله..بس عادي ممكن أسويلك...! قال بصدق:لا حبيبي ارتاحي..إنتي جيعانة يعني مرة...؟! -لا بس قلت لو إنتا تبغى...! -أنا ما أبغى...! قلت بتفكير:بس أصلاً أنا أبغى أتحرك..عارف..أحس نفسي مرة تقيلة و مكسلة..والله أحس حملي في سعود كان أسهل...! قال بابتسامة:لإنو سميي..شي طبيعي يكون حملك فيه سهل و هين...! -لا ياشيخ... -إلا ايش ناوية تسمي البنوتة....؟! -والله ما ححاول أفكر دحين..جدة تقول إنو الدكاترة كدابين و إنو محد يعلم الغيب..قصدها ممكن يكون ولد...! -بس سعود اتوقعوا صح...! -ايوة بس أنا ما حشغل نفسي دحين..كل شي من ربنا حلو..عارف أنا خايفة من ايه..خايفة من علي..علي يحب الأسماء الخفيفة حقت البنات إلي دحين و أنا ما أطيقها..أنا ما أحب إلا أسماء زمان..فاطمة رقية عائشة..إذا مرة مرة جديدة جمان شيماء أحلاااام...! -جمان...؟! -ايوة..مو حلو...؟! -إلا بس أحس جمانة ألطف..هيا جمان جمع..صح...؟! -ايوة...! -و علي في ايش يفكر...؟! -علي يقولك ليان لينة تالة...! -طيب كلها حلوة دي...! -عارفة بس فيها شي يقهر..الناس تقلبها أجنبي..عندك لينة يكتبوه بالألف و تالة و نورة و سارة...! -طيب إنتي ايش دخلك في الناس..أهم شي بنتك تكبر و هيا عارفة و متأكدة إنو اسمها عربي و خلاص...! -بس أحس أسماء زمان غير..تحس البنت تكبر باسم..كده ناضج و ثقيل لو معنى...! -شوفي جود كلو يهون قدام وله و دلع و غرام...! -ايوة الله شي يفقع القلب..بنات عندي في الجامعة مساكين مظلومين..والله وحدة معايا في كلاس مسكينة اسمها دلع و هيا بعيدة كل البعد عن الدلع..ضخخخخخمة و عفشة..و البنات قليلات أدب ماخدينها مسخرة..و هيا ضعيفة..عفشة و تهبش صح..لكنها ما تتحمل..يعني مي قوية بس فيها دفاشة...! ضحك:أنا أعرف إنو لكل واحد نصيب من اسمو...! -هيا تلاقيها دلعها في مشاعرها مو في تصرفاتها أو شكلها...! -غلطة أهلها مو غلطة الناس..هما إلي أعطوا إلي حولها مجال عشان يتريقوا عليها...! قلت بابتسامة:طب ايش في أحلام...؟! لعمو مطلق الحرية إنو يفهم السؤال زي ما يبغى !!! -اسمممم جميل و أصحابو أجمل لكن ما أحس إنو يناسبني ولا يناسبك...! -هوا أنا ما أتخيل وحدة من بناتي أو بناتك يكون اسمها أحلام بس ليش ما يناسبك..ولا يناسبني كمان...؟! سكت عمو لثواني و هوا منزل راسو بعدين رفعو و قال:كان بإمكاني أصرخ عليكي و أقفل الموضوع لكن ما أبغاكي تطلعي من هنا منتي راضية...! جود أنا حتكلم و مأبغاكي تقاطعيني ولا..تبدي رأيك...! سكت لثواني و هوا يطالع فيا بنظرة مؤلمة بعدين أخفض راسو و قال بحزن: أحلام ذي أخت أحمد..أحمد صاحبي من المتوسط..تهمني راحة أخواتو و أنا ما أرضى لأحلام بواحد زيي..أبداً..مهما كانت ظروفها و مهما اتأخر سنها في الزواج..لإنها تستاهل تجيب أولاد..هيا و إلي زيها لازم يربوا لأنهم حيربوا صح لو ربوا..حرام..حرام عليا لو اتزوجتها...! و وقف و عمو و خرج من الصالة و أنا كنت shocked و بس ... ^^^^^^^^^^^^^^^^^^^^^^^ | |||||||||
|
| |
|
06-03-14, 05:18 AM
| #28 | |||||||||
| نجم روايتي ومشرفة سابقة وفراشة متالقة بعالم الازياء
| الجزء الخامس عشر (أنا و أبي و أصدقاؤه) علي،،، قفلت من جود بعد ما قلتلها إني أنا و سعود بنخرج أي مكان..حسيتها من صوتها شوية متضايقة لكنها ما أعطتني فرصة حتى أسأل ليه..عالعموم أنا ما حصر..جود لها مدة داسة عني شي..و ما دام ما تبغى تقول أحسن لها إنها ما تتوقع مني أساعدها..لإنها من البداية ما دخلتني في ذا الموضوع الخطير إلي متكتمة عليه...! طالعت في سعود إلي أصر على اختيار ملابسه..ما كان شكلُه زي لمن جود تلبسُه..اتذكرت سيل تحذيرات جود من إنو سعود يخرج من البيت بشكل مو مرتب...! قلت:كذة عاجبك...؟! طاااااالع فيا سعود لمدة قبل ما يقول بنفس أسلوبي المستفز:جددددداً... -طيب ماما قالت لازم تخرج مرتب...! -طب أنا كده مرتب...! -لأ منتا مرتب..حلبسك من الأشياء إلي أمك تجمعهم مع بعض...! و مشيت متجه لغرفتو و في طريقي مسكت يده و مشيتو معايا...! كان لين ما وصلنا لغرفتو يتكلم و يقول إنو يبغى يلبس على كيفُه...! وقفنا قدام الدولاب يمكن فوق العشرة دقايق آخر شي اتصلت على جود تتصرف معاه..أنا ما أحب سعود لمن يتكلم و يبدي رأيه..ما عندي صبر أنا للبزورة إلي يتكلموا..أحب سعود بعد ما جود تزبطوا...! و كان هذا إلي قالو سعود: (-كويس.. -ايوة..إنتي رحتي و تخليني..ماما..أنا بابا ما يعرف شي في الملابس..بس يخلي شكلي مو حلو... "أنا هنا صرخت لكن سعود أعطاني نظرة قلك يسكتني" -ايوة ماما ايوة.. -البلوزة الحمرا مع البنطلون الأزرق... -طب ماما أنا أبغى ألبس كده..ليش تقولي لأ...؟! قال و هوا على وشك يبكي:طيب في البلوزة فيه في الجوة البلوزة ورقة زرقا..عادي ينفع...! -خلاص طيب... بزعل:أبى البنتلوووون... -البيضا الصفرا مو حلوة... -طيب.. باس السماعة بعدين حطها على أذنه لكن رجع و باسها بأقوى...و أنا كل إلي قدرت أسويه هوا إني أتحسر على جوالي...! -حتى أنا أحبك.. -لا عادي البلوزة البيضا حلوة..حلوة زيك.. بخجل:ايوة يلا باي...) و مدلي الجوال..أخذتو منه و قلت:ايوة سيد سعود..ايش قررت...؟! -قررت..أنا إلي قررت ترا مو ماما..ماما سمعت كلامي أصلاً..أنا قلتلها أبغى البيضا..هيا قالت حاضر..ماما تسمع الكلام شاطرة...! -و أنا...؟! -إنتا أبداً مو شاطر...! -سعودوه فكني من شرك و وريني وين البلوزة البيضا ذي...! طالع فيا ببراءة و ابتسم و هوا يمد أياديه:ما أوصل..شيلني...! حسبي الله و نعم الوكيل..أنا ما أتحمل النظرة البريئة حقت ذا الولد...! شلتو و لمن شلتو ما قدرت..بستو و قلت و أنا أرفعو:أصلاً ولد سوسة حق مشاكل...! -ماما تقول أنا زيك بس أعقل...! -أمك..أمك هذي يبغالها تصفيق مجننتني..يلا جيب البلوزة..يلا...! جاب سعود بعد عناء البلوزة و إلي طلعت في النهاية سكرية مو بيضا...! وي..ايشبي غلس...؟! مدلي سعود يدو:بابا لبسني...! -البس بنفسك...! قال بدلع:ما أعرَف...! -لا يا شيخ..و الهبل إلي لبستو قبل شوية...؟! قال و هوا يرفع أكتافو:نسيت كيف...! طبعا اضطريت ألبسو..آآآه يا ذا الولد هوا و دلعه..أنا لازم أخليه رجال و عفش..والله أشوف أولاد زملائي إلي في الشغل..من سن سعود..يجوا بملابس رياضية..أقولهم كيفك أحسهم بيعطوني كف..أما ولدي..يا حليلُه..ما يطالع فيه واحد إلا و يبتسم..كلو من تربية جود..معلمتو عالأدب..الله يصلحها بس...! حطيت يدي في يدو و قلت:نمشي...؟! -عند فين نروح...؟! ما كنت عارف وين أوديه بس لازم أخرجو و لازم أخرج أنا كمان..بصراحة البيت من غير جود ما فيه حياة..صح أنا ممكن أقعد عالنت أو أتفرج أي فلم لكن سعود...! -وين تبغى تروح...؟! -أمممم..أبغى أروح في الملاهي...! طالعت في ساعتي..كانت لسه وحدة و نص..قلت:طيب بس مول مو ملاهي ملاهي...! قال ببساطة:طيب...! -وين تبغى تروح..شوف احنا أول شي نتغدى بعدين نلعب لإننا من فطرنا ما أكلنا...! قال و احنا نخرج و نركب المصعد:لا بابا..مابغا..أول شي ألعب بعدين ناكل... -طيب أنا جيعان...؟! -إنتا العب معايا مو بس لحالي زي كأني لحالي ألعب...! -على حسب..لو ما كان زحمة ممكن ألعب معاك..طب إنتا ما قلتلي ذحين..وين تبغى تروح بالضبط...؟! -آآآ..نرووووح مول أوف أرابيا...! -نعم يا أخوية...؟! قالها بطريقة..والله ما كأنو سعودي...! -لينا قالتلي كده...! -و من علم لينا...؟! -مادري...! قلت و أنا أركبو السيارة و أربط حزامو:اسمو مجمع العرب...! إلا تعالو..من سماه كذة...؟!،واللهِ هوا مول جيد و أهل جدة طالعين فيه..بس مين سماه...؟! شغلت السيارة و جيت بمشي لكن سعود وقفني:بابا غلط... التفت مستغرب فقال:أول شي تقوووول:سبحان الذي... قال بعد مدة:قووووول... -ايشبك...؟! -قول ورايا... -ايش أقول...؟! -قول سبحان الذي... -سبحان الذي.. -سخر لنا هذا و ما كُـ ـ ـ ـنا لهوووو مقـ ..مقرنين.. كملت عنو:و إنا إلى ربنا لمنقلبون... -ايوة.. -طيب كان قلت لي تبغى تقول الدعاء... ما رد عليا سعود لكنو اكتفى بإنو يلف وجهو و يطالع للشباك..آآخ من حركات البنات هذي..كأنو جود لمن تقعد تتدلع عليا!! وصلنا لمجمع العرب و رحت لجهة الألعاب و قعدت أطالع في العروض..ما كنا حنحتاج شحن كثير..عبيت بمية و قلت إنها إن شاء الله بتكفي سعود...! و بدأنا نلف..أغلب الألعاب كانت مقفلة..أوفففف..ايش المصخرة هذي..من يوم ما أعرف نفسي و ألعاب الأطفال تفتح من بدري..القطارات و الأشياء إلي تفجع هيا إلي تفتح خمسة...! عالعموم هوا قلي إنهم شوية و يفتحوها بس يبغوا يسووا صيانة و شوية تعديلات...! قلت:هيا سعود سمعت بنفسك..خلاص نروح ناكل أي شي و بعدين نجي نلعب...! برطم سعود فقلت:تبغى ذرة ولا بطاطس و لا اسكـ... سكت..لإني كنت أبغاه ياكل شي عدل..مو حلى...! لكنو قال:اسكريم... قلت:طيب حبيبي شوف أنا حشتري بطاطس و حشتريلك اسكريم..تاكل شوية معايا بعدين تاكل الاسكريم عشان إنتا حتلعب لازم تكون قَوي...! -طيب بس أبغى اسكريم...! و رحت و اشتريت من هوت آند كريسبي الحجم الكبير..لإني جيعان مرة و أبغى سعود ياكل معايا..اشتريت كمان هذا الـ الاسكريم على شكل دوائر صغيرة..سعود يحبو..يحب يقعد يحاول ياكلو دائرة دائرة...! جلسنا على طاولة و كان سعود ياكل لقمة معايا و لقمتين من الاسكريم...! قلت و أنا أرفع حبة بطاطس ملفوفة كده بيدي:شوف سعود شوف..مليانة كاتشب...! -فيها شطة...! -لا ما فيها..أنا قلت للرجال ما يحط عشانك..كلها..ترى أنا معد قادر أتحمل..مررررة أبغاها...! قال بلا اهتمام:كلها... قلت عشان أنرفزو و أخليه ياكل:لإنك أصلاً ما تقدر تاكلها..خايف يكون فيها شطة... طالع فيا:إلا إلا أقدر.."فتح فمو"..أكلني... ضحكت و أنا أدخلها في فمو بشويش عشان لا يشرق...! بعد ما خلصنا أكل _و على فكرة أكلت معاه من الاسكريم_ قال سعود:بابا أبغى موية بعدين أبغى الحمام...! طالعت فيه..يعجبني لمن يكون واضح و يقول إلي يبغاه بطريقة التعداد...! قلت:"طيب نروح الحمام أول عشان نغسل"،و رحنا بالفعل عالحمام و هناك رفض سعود مساعدتي..ابتسمت و أنا أستناه عند الباب المردود..طريقته و هوا يرفض..مادري حسيتو كأنه حس إني اتعديت على خصوصياته أو شي...! خرج و شلتو علطول عشان يوصل للمغسلة و يغسل لنفسو..طبعا ساعدتو في ذي بعد ما رفعتو للمغسلة و نشفتلو و خرجنا و اشترينا الموية و بعدها انطلقنا نلعب...! أشرت لسعود بباي و ابتسمت لمن انتبهت إنو يناديني من أول و حاولت أركز معاه في كل مرة كان يختفي فيها و يرجع يبان لمن تنعاد اللفة من جديد..السؤال..ايش الممتع في ذي الألعاب؟!،يعني ايه يقعد يلف و يدور و يلف و يدور...؟! كنت حاس بالطفش..و عارف نفسي لازم ألاقي شي أسويه ولا حنكد على سعود الضعيف..مو ايش أسويله..يعني لو يقعد معايا و يكلمني والله أنبسط معاه لكن لمن من لعبة للثانية أقعد أستناه...! لو هانم جود ما راحت ما كنت حكون طفشان..والله إني غبي..لمن تكون معايا أحياناً أحس بالطفش ..مو منها..بس كذة..أحياناً أتمنى جود و سعود يبعدون عني شوية..لكن بس يبعدو أحس نفسي محتاجهم..أستوحش..من جد سخيف و مادري ايش أبغى؟! إلا لحظة..أنا كم لي من أصحابي..يعني..حمادة و ذولا...؟! فجأة رن جوالي..رفعتو و:"أوف..شكلي جذبتهم" رديت:ألو... حمادة:السلاااااااااااااام عليكوووووووووووووم ابتسمت:و عليكم السلام..هلا..كيفك؟! -طيب..إنتا كيفك و كيف أهلك؟ -بخير... -آآه علي وينك..شكلك برة ! -ايوة برة... -طب..آآه..يعني معاك أحد؟! -كيف؟! فجأة يطلع صوت: (أقول بلا أدب زايد..هات.. حمادة بغضب:ياخي يمكن معاه أحد...) قلت و أنا أأشر لسعود:أحمد ايشبك؟! فجأة يطلع لي صوت عبود:علي..إنتا برة..طيب عرفنا..معاك حرمتك ولا لأ..نبغى نشوفك..يمدينا نجيك؟! اتنرفزت من الأسلوب لكن سكت..أوكي..هذا الآدمي همجي خلقة و ما عندو ذوق..لكن طيب و هذا الشي إلي مصبرني...! قلت:لأ..ما معايا إلا سعود... قال بأدب مدري من وين جاي:طيب وينك...ممكن نجيك..عادي ما بنضايقك؟! حسبتها خلال ثواني و قلت:أنا في مجمع العرب... قال بصوت مضخم:حيثُ يتكدسُ أهلُ جدةـااااا. ضحكت:لا مو لذي الدرجة زحمة...! -المهم المهم..نبغى نجيك ذحين..و قول لسعود الغضب الساطع آآآآآتٍ... -الساطع...؟!،امشي امشي بس الله معاك... و فصل..و رحت أنا عند سعود..مسكتو من يده و قلت:سعود فاكر أصحابي إلي أول جو البيت؟! -و جابولي جوم بوي أحمرة...؟! ضحكت على الجيم بوي إلي مو راضي ينَّطق صح:ايييييوة..بيجون...! -وين؟! -هنا... -هنا معانا...؟! -ايوة... -بس بابا إنتا تقعد معاهم بعدين أنا مين يلعب معايا...؟! انتبهت لذي النقطة:آآآه إنتا حبيبي ما شبعت لعب...؟! برطم سعود فقلت:طب يا سعود أنا كمان طفشان...! سكت سعود لثواني قبل ما يقول:طب..أنا جبت الجوم بوي بس ما جبت شريط...تشتريلي؟! طبعاً مضطر أشتريلو..آآه منو..أكره سعود لمن يبان فيه المكر و شقاوة الأطفال..طبعا مو أكرهه أكرهه بس يعني...! قلت:و أنا أقدر أقول لأ؟! و رحنا لمحل كذة لا هو كشك و لا هو محل..كان يبيع الكترونيات و أشياء زي كذة،أول ما دخلت قلت:عندك أشرطة جيم بوي؟! طالع فيا الرجال لثواني بعدين قال:عندي مجموعة بسيطة؟! -ورينا... و رفعت سعود و جلستو على القزاز (زجاج)..طلع الرجال كذة شريط..شكلهم ما كان يحمس..يمكن مي ماشية..قلت:طب ليه كذة مغبرة و شكلها قديم؟! -احنا معد نبيع..هذي بضاعة من زمان عندي و ما دامك تبغى اشتري..نفس الشريط مافي شي..ما رح تلاقي هنا في محل ثاني...؟! -طيب..وريني شي كذة يناسب لولد صغير...! سعود سحب وحدة من العلب قال:بابا هدا... مسكت العلبة و قلبتها بيدي..كان عليها قرود شكلهم يضحك و موز في كل مكان...! قلت:طيب..ايش فيها ذي...؟! قال الرجال:ما فيها ولا شي..بس قرود ينقزوا و ياكلو موز..بس حلوة..حتى إنتا يمديك تلعبها..تضحك و تسلي...! -ايوة..و بكم...؟! -عشانك و عشان ولدك بمية و لا ترى والله هذا مو سعرو...! -بس شريطك مغبر و باين عليه قديم..المفروض إنتا تبغى تتخلص منه...! مسح الرجال العلبة و قال:أهوه..معد هوا مغبر...! سعود بثقة:إلا..شكلو قديم..هدا مو بمية...! طالع الرجال فيه و قال بابتسامة:ليش مو بمية...؟! -علشااان هوا مو زي إلي أول جبناه...! -كيف كان إلي جبتوه...؟! -كان جديد..خلاص بتمانين...! الرجال برجاء و هوا مبتسم:تسعين...؟! -لللللللأ... -خمسة و تمانين...؟! سعود و هوا طفشان من زن الرجال:خلاص أقولك تمانين !! ضحك:خلاص ولا تزعل..ثمانين ثمانين...! طالع فيا:سمي على ولدك و حصنو..ما شاء الله حليوة و واثق...! ابتسمت و أنا أحس بالفخر بسعود:يعني خلاص من جد ثمانين...؟! ببساطة:ايوة.. حاسبت الرجال و طلعت..جلسنا على طاولة بعد ما اشتريت عصير منجا..جلست سعود فوقي و قعد يلعب..كنت أتفرج عليه و هوا يلعب و هوا كان يوريني و يشرحلي..اسم الله عليه..في الألعاب رهيب..حركتو سريعة و ما يحتاج وقت عشان يستنتج...! كنت أخليه يشرب معايا..ما كان حاسس بأي شي..مشتغل عالأتوماتيك على قول جود..أقرب المصاصة منو فيشرب و عينه معلقة عالجيم بوي...! شوية إلا رن جوالي..حطيت العصير عالطاولة و خرجت الجوال من جيبي و كان أحمد..رديت:ألو... -أين أنت يا أخ العرب...؟! -أنا في السوقِ...! -السوقِ..لا إله إلا الله اسمهو المجمعوووو...! -و إنتم وينكم...؟! -احنا تحت...! -كيف دخلتو...؟! -كلمنا بنات كانوا داخلين و قالوا أوكي...! -تستهبل إنتا و هوا...؟! -يا سلام و إنتا كيف دخلت...؟! -عادي أنا معايا أطفال...! -ارحمني..حتى ما يخلوا..بس يمكن لإنك جيت بدري فمشوك..و لا تبدأ محاضرات..محمد مكفينا و عمر وجهو قالب طماطم..تقول أحد خطبوا...! فجأة طلع صوت:"اسكت يا قليل الأدب" أحمد:شايف شايف..قال ايش..حياوي..وجع..صوتو أعلى منو...! ابتسمت:هوا حياوي حياوي..بس معاكم يعبر معايا ينكتم مدري ليه...! ضحك أحمد:طيب وينك بالضبط...؟! -أنا عند الألعاب..في الطاولات..المحل فاضي حتلاقوني علطول...! -أوكي..ببايو إلى أن نصل إليك...! -ههه..طيب يلا باي...! بعد مدة سمعت اسمي..التفت:كان حمادة ينقز و ينادي و وراه البقية..ابتسمت و قلت لسعود:أهم جو...! اتأفف سعود فقلت:بابا سعود..خليك عاقل..خلاص كمل لعب و ما بتطفش...! أعرف إنها صعبة بالنسبة لطفل إنو يقعد و يشوف الألعاب و يتركها..لكن ايش أسوي..خلاص قاعد ألعبو من أول..خليني أنا أنبسط كمان !! جو لين عندي فشلت سعود عني و جلستو على الكرسي و هوا ما زال يلعب..وقفت و أنا مبتسم..سلمت عليهم..بعدين جلسنا عالطاولة...! كلهم قعدوا يطالعوا في سعود إلي مطنش أهاليهم..قلت:سعود حبيبي..قوم سلم...! طالع فيا:بابا أبغى موية...! شربتو موية و أنا في نفسي أتوعدوا..يلعن أبو التطنيش إلي مطنشهم هوا...! بعد الموية عن فمو و قال و هوا يطالع فيهم:سلاكم عليكم...! رد عبد الرب و أحمد و يوسف في نفس الوقت:و عليكم السلاكم...! طنشهم سعود و كمل لعب..محمد ضحك أما عمر فاكتفى بابتسامة...! قلت باستنكار:سعود..ليش ما تسلم...؟! وقف سعود اللعبة و مدلي الجيم بوي و هوا يقول بحيرة:أبوسهم ولا بس بيدي...؟! اتنهدت و قعدت أطالع فيه..قال:بااااابا..ايشبك...؟! مد يوسف يدو و رفعو من فوق الطاولة بشوية صعوبة..باسو و حطوا فوقو..أخد الجيم بوي مني و قعد يلعب معاه...! عبد الرب:هييي سعود..و احنا مالنا رب...؟! طالع فيه سعود و قال بطفش:شوفو فوق...! على فكرة:"سعود يكره عبود" أحمد:يوسف والله إنتا لازم تتزوج..كنك حرمة..إحساس الأمومة عندك متفجر...! يوسف بحقد:بلى قالولك لغم أتفجر..بعدين ايش إلي حرمة..هذا اسمو أبوبة...! محمد:أبوبة؟!،اسكت إنتا و هوا..اسكت...! سعود و هوا يهز يوسف من كتفو:شوف شوف.. طالع يوسف في شاشة الجيم بوي:أما..جبت حياة جديدة؟! -ايوة علشان كملت مية موزة...! -آآآه من قلك إنو كذة...؟! -أنا قلتلي...! ضحك يوسف و هوا يلف يدو حولين بطن سعود..أحسو متعلق فيه بشكل غريب...! قال عبود:متى نتغدى...؟! حمادة:أول نلعب بعدين نتغدى...! محمد:تستهبل..جايبني من بيتي في عز الظهر عشان نلعب...؟! -أجل ايش جاي تسوي...؟! عبود بتهديد:محمد..تبغى تناقش قضايا الأمة بعيد عنا الله يخليك..أنا جاي أبغى أنبسط...! أحمد:بعدين واحد جاي السوق لحالو مع ولدو..ايش يبغى يسوي غير إنو يلعبو...؟! قلت:ترى عادي..مو لازم تلعبوا...! حمادة:اسكت يا شيخ..وجع..آباء ثقيلين دم..إلا نبغى نلعب..أنا و عبود نبغى نلعب..يوسف...! يوسف و هوا مشغول مع سعود:هااا... -تبغى تلعب...؟! -إذا لعبتو بلعب عادي...! عبود:سعودوه... -نعم... -تبغى تلعب...؟! سعود بلا اهتمام:اسأل بابا...! عبود:بابا.. طالعت فيهم:براحتكم..تبغوا تلعبو قومو العبو...! رفع يوسف راسو:عادي آخذ سعود...؟! -حجي معاكم...! حمادة بحماس:حتلعب...؟! -لأ..بس حجي...! -طيب وين الكرت...؟! قطبت حواجبي فقال:عشان نزود عليه...! تابع:احنا كذة دايماً..نشحن مع بعض..كل واحد يدفع خمسين...! قلت:مالو داعي..فيه أعتقد...! حمادة:يعني كم حيكون فيه إذا كنت إنتا من قبل قاعد تلعب سعود..يلا طلعو و كل واحد يطلع إلي عندو...! محمد:ما رح أدفع شي..لإني ما حلعب...! -مالت عليك إنتا..خذ عمر و فكونا...! وقف محمد:عمر امشي نروح أي كوفي شوب...! طلع عمر محفظتو و حط عالطاولة خمسين فقال محمد:بتلعب...؟! -لأ... -وليش تدفع...؟! -حرام ما حيطلع شي لو كل واحد دفع خمسين...! قلت:تعالو نروح معاهم..عشان بقعد مع سعود...! ابتسم محمد:ما عليه خلاف..خليه يروح معاهم و تعال إنتا...! حمادة بابتسامة:علي من قلك إنك ما حتلعب...؟! عبود بابتسامة أوسع:من الحمار إلي أعطاك الإذن...؟! طالعت فيهم فقال يوسف:إنتا و هوا بلا سماجة..سعود أبوية قوم عني عشان بنمشي نروح نلعب...! و نزلو منو..جاني سعود و وقف عندي و شدني من كمي..دنقت فهمس في أذني:بابا يسير ألعب معاهم تاني...؟! حمادة و عبود:ايوة يسير...! التفت متفاجأ فلقيتهم واقفين ورايا و مبتسمين ابتسامة عرييييييييييضة..ضربهم محمد على أكتافهم بالخفيف:إنتا وهوا بلا جْنَان...! وقفت و طلعت خمسين و حطيتها عالطاولة..التفت لسعود:خلاص تقفل الجيم بوي...؟! -بس أكمل المرحلة...! -اضغط ستارت و قفل الجيم بوي...! سوى سعود إلي قلتلو عليه و مدلي هوا فقال أحمد:لا حنلعب أدفانتشر كامب..ما ينفع تشيلوا في جيوبكم أشياء...! محمد:و طبعا ما في غير محمد حمالكم...؟! عمر:مو مشكلة بشيل أنا معاك...! سحب حمادة الخمسينتين إلي عالطاولة و قال و هوا يطلع خمسينة من عندو:يلا..يوسف عبود يلا...! طلعوا الاثنين و اتوجهنا لمحل الشحن..شحن حمادة و جانا..و بسرعة عالية مشيوا زي المجانين و لمن وصلنا للعبة إلي يقولوا عليها لقيت إنها نفس اللعبة إلي مانعت إنو سعود يدخلها...! قلت:هييي إنتا و هوا..ايش يدخلكم هناك...؟! كانت لعبة كبيييييييييييييرة و فيها زحليقة سماوية عاااااالية و فيها طلعات و نزلات و حاجات غريبة...! عبود:والله صادق فيه..ثقالة دم آباء...! مسك يوسف يد سعود و حمادة مسك يدي،قال عبود:يلا حبايبي لا تخافوا..مافي شي يخوف...! فلت يدي من حمادة:أقولك إنتا و هوا..خلونا في ساعة طيبة..ولدي ما بيدخل شي زي كذة...! محمد بتعقل:علي الله يهديك ما فيها شي..دايما إلي أصغر من سعود يدخلوا..ما عليه خلاف إن شاء الله...! تابع:يلا هاتو عفشكم...! طلعوا كلهم محافظهم و جوالاتهم..قلت:عادي كذة أشياءكم تتلخبط...؟! عمر:تبغى أشيل بس أشياءك...؟! قلت:أخاف أحد من أهلي يتصل عليا...؟! عبود بصدق:عادي إذا أهلتك اتصلت محمد بعدين يقولك...! ضحك محمد:خلاص اطمنت..لو أهلتك اتصلت أنا حقولك..ولا يهمك...! ابتسمت:"أهلتي؟!،والله لو جود تسمعني ولا تسمعهم..كان تكردفنا و تصرخ:"أنا ماليا اسم يعني..مرة مرة ما تبغوا تنادوني قولو أم سعود"،تماما زي ما سوت مع جدي..يعني..على حسب كلامها...! قلت:أنا ما أقدر على ذي الألعاب..سعود أبوية عادي تدخل لحالك...؟! سعود و هوا يلصق في يوسف:ايوة عادي..يوسف فيه...؟! يوسف بعبط:أخ بس..ولدك دايماً جُملو في الصميم...! قلت:طيب حبيبي انتبه لنفسك..و إياك تتزحلق على ذاك الشي...! كانت الزحليقة مرعبة..أتخيل سعود ينزل منها...! عبد الرب:سعود..لا تسمع كلام أبوك..يلا...! حمادة:والله هيا أحلى شي...! يوسف:بسرعة عشان يدخلنا...! و راحوا..قلت باستغراب:ايوة الله..كيف بيدخلو..طول بعرض كل واحد فيهم ما شاء الله...! محمد:يرشوا الرجال...! عمر:محمد لا تقول يرشوا...! محمد:أجل ايش هيا..يعطوه فلوس عشان يدخلهم..عشان كذة ما أرضى أدخل معاهم...! جلسنا عالكرسي إلي قريب من اللعبة،قلت:بس طالع كيف الأهالي يطالعو..حاقدين عليهم...! عمر:غريبة ما يشتكوا...؟! محمد:كل إلي يجوا في ذا الوقت ناس تبغى الهدوء و ما تبغى مشاكل..و أغلبهم حريم و بنات يبغوا يجوا ينبسطوا و يتمشوا..مو زي حقون الليل...! عمر:أنا أخواتي يجوا في زي ذا الوقت مع بنات خالاتي و زي كذة...! -والله أنا ما سرت أجي عالظهر إلا بعد ما اتزوجت..يا شيخ قرفوا أبو أهلي..أجي أبغى ألعب ولدي..أبغى أروق مع أهلي..مافي..تحس الكل يطالع فيك...! محمد:تحس ما عندنا فكرة إنو واحد يجي مع أهلو..يا هيا مع صحباتها و أهلها..يا هوا مع شباب يضطروا نفسهم لبنات الناس عشان يدخلوهم...! عمر:بس احنا ذي المرة جينا شوية متأخر و لا كان دخلونا عادي...! محمد:ايوة في الصباح عادي يدخلو...! قلت:والله إنهم بقر..بدل ما ينشروهم برة يمنعونا يحطوهم جوة يمسكوا قليلين الأدب...! محمد:والله صادق.. عمر:حتى الحريم سار عندهم عادي... محمد:ايوة..أصلاً ترى الحرمة إلي كانت مع البنات هيا إلي عرضت علينا تدخلنا...! -بالله...؟! محمد:ايوة الله..جاتنا و قالت:تبغوا تدخلو؟!،قلنا ايوة فقالت:والله شكلكم طيبين بس اوعدوني ما تأذوا بنات الناس..عاد حمادة و عبود اتحمسوا و قعدوا يحلفوا و يوعدوا..نادت بناتها و دخلنا معاهم...! عمر:المشكلة السكيورتي شافنا نكلمهم و خلانا ندخل عادي...! رفعت راسي و أنا أسمع صوت سعود..لقيتو يأشر من ورا شبك من فوق و جمبو يوسف..ضحكت و سويتلو باي..فجأة جات كورة كبيرة على راس سعود..خفت عليه..ابتسم محمد:عادي الكورة لينة...! التفت سعود وجري على أحد في الوقت إلي سمعنا فيه ضحكة عااااالية،قال عمر:هذا عبود...! قلت بغيض:هذا عبود حيوان...! محمد:ايشبك إنتا..ما تبغى أحد يقرب ولدك؟!،ايش بتسوي إذا دخل المدرسة..ترى الأولاد كلهم كذة عفشين..ترى سعود حالة شاذة...! -لا تقولي..قول لأهلتي...! ضحك محمد:ترى ما كان قصده..هوا كذة عبيط...! ضحكت:والله صادق فيا..أنا ما عندي إلا سعود و هيا...! عمر:بس ليش احنا كذة..ايش فيها لو قلنا أسماء حريمنا...؟! علي:أنا عارف إني لمن أتكلم بالنكرة عن أخواتي و أمي و زوجتي غلط لكن أنا عارف و متأكد إني حلاقي تريقة و سخافة من إلي حولي..و ما حينادوني إلا بأسماءهم...! محمد:صح كلامك..بس الواحد يبدأ بنفسو..مثلاً بتكلم أحد من أهلك في الجوال قدام رجال عادي ناديهم باسمهم..يعني شوية شوية لين ما السخيفين يحسوا بسخافتهم...! قلت بصراحة:بس أنا بدوي و ما أتحمل..عارف نفسي و إلي حولي في الشغل و الشباب إلي يقربولي ممكن ما ينادوني إلا:يا زوج جووود يا زوج جوووود...! ابتسم محمد:شاطر..تنفذ الكلام بسرعة...! ضحكت بحرج:اسكت خلاص..ما انتبهت...! قال بابتسامة:هذي آخرة الحماس في النقاش في ذي المواضيع...! وقف عمر فجأة:أنا بقوم أشوفهم...! و راح وقف عند سور اللعبة..قال محمد:إنا لله..أنا ما أعرف متى ذا الولد يبطل...! -ايش فيه...؟! -ترى قام مستحي منك...! قلت بطفش:ييييييييييه هوا لسه..أنا المتخلف نسيت الموضوع...! -المشكلة لو تشوف أولاد أعمامو..تعرف كيف لمن يجوك الشباب معفنين ما فيهم أخلاق و لا حيا؟!،هما كذة..مادري كيف طالع من بينهم..أصلاً حتى لمن يتعاملو معاه..كأنه بنت..الله يعينو على نفسه...! -الحياء حلو بس هوا مرة...! -بعدين هوا مو حياوي..هوا خجول..يعني ما يتكلم قدام الناس..أنا متفاجئ إنو اليوم اتكلم و إنتا موجود..تصدق قعد سنتين معانا ولا كأنو يعرفنا..بعدين فك معانا و سار يتكلم...! قلت:إلا إنتوا كيف اتلاقيتو...؟! -آآآآ..تقدر تقول إلي جمعنا حمادة و عبود...! -آآ..يعني هما أصحاب من زمان...؟! -من أيام الجامعة...! -ايوة صح..إنتوا كلكم موظفين...؟! ابتسم:دقيقة خليني أكمل..حمادة و عبود كانو أصحاب في الجامعة..حمادة أول ما اتوظف اتعرف على يوسف إلي جا يتدرب في نفس المكان إلي اتوظف فيه حمادة..اتصاحبوا الثلاثة بقوة و أنا كانت ليا معرفة بيوسف..كان هوا و أهلو جيرانا زمان..كنت تقريباً في السنة مرة أقابلو..كذة كل بداية إجازة صيف..تعرفني لئيم و ما أحب حركات الشباب و الـhanging out و زي كذة..لكن هوا دخلني فيهم..مرة أصر عليا أجي و هما موجودين..و شوية شوية صاحبتهم..بعد سنة تقريباً سرت مرة معاهم...! -آآآآه..طب و عمر...؟! -عمر عاد صاحبي أنا..درس معايا الابتدائي و بعدين اتفرقنا..إلي جمعنا بو كان ورطة بصراحة فكنا منها..مرة ورطنا في الحساب..كنا خارجين أنا و أخواتي و اتحممممسنا في الأكل..جينا بنحاسب..نقص يمكن خمسين ريال..جا هوا و بكل خجل مدلي خمسين..أنا انفجعت..وجهو كان مرة مألوف..نسيت موضوع الفلوس و قلتلو:أعرفك..تعرفني..طبعاً هوا مسكين حسب إني أهزأو ليش بيساعدني عشان كذة اضطريت آخذ منو الفلوس و قلتلوا برة بسحب و أرجعلك...! -و إنتا ليه ما رحت سحبت و رجعت دفعت...؟! -يا شيخ الفلبيني ذاك حيوان..فضحني؛ما تروح تسحب و مو راضي يخليني أسدد بالبطاقة..يقول ممنوع صاحب المحل منع...! -وجع..المهم..و بعدين عرفت إنه صاحبك من الابتدائي...! -ايوة..لمن رحنا عالبنك و شافني أدخل بطاقتي سألني لو كنت أدرس في المدرسة إلي كنا ندرس فيها..قلتلو ايوة قلي أنا عمر كنت صاحبك و مدري ايش..طبعاً هذا كلو و راسو في الأرض..مستحي مني و من أخواتي...! -أووه..بس حلو ما شاء الله..يعني واحد من أيام المدرسة و محترم..أنا ما أطيق أصحابي إلي كانوا في المدرسة...! ابتسم:و أنا زيك..لكن عمر غير..أنا نفسي بس أفكو شوية عالناس..ما شاء الله عليه تراه مثقف و أخلاقو حلوة..بس يبان دايماً غبي من خجلو...! ضحكت:يا ليت عبد الرب يعطيه شوية...! ابتسم و قال بصوت واطي:أقولك شي بيني و بينك..أنا و عبود ما نتفق أبداً..أوكي حبيبي و صاحبي لكن أبداً ما أتحملو و هوا يتضايق مني..يقول إني ثقيل دم...! ابتسمت:هوا بصراحة إنتا محترم بزيادة...! ابتسم:ايوة..شوف احنا خمسة مع بعض بس كل واحد مع أحد..عندك حمادة و عبودة مرررة أصحاب..أنا و عمر نليق لبعض..أنا ما أتحمل قلة الأدب و السماجة و عمر ما يتحمل العفاشة..فلايقين لبعض... -ويوسف؟! ابتسم:يوسف معانا كلنا..يوسف شخصيتو حلوة..يمشي معانا و مع المصافيق إلي قاعدين يلعبو..ينفع في الفلة و ينفع في الأدب و العلوم و الأخلاق...! ابتسمت:ايوة بس مين صاحبو مرة...؟! -هوا يميل لعبود و حمادة بس تقدر تدخل فيه..تراه بيموت على ولدك..حاط صورتو وول بيبر في الجوال حقو...! -من وين له صورة ولدي...؟! -مادري عنو..صورو زمان في المستشفى قبل ما تقوم إنتا..صورو في بيتك أول..كنت إنتا مشغول عنو..خاف تقول لأ فما قلك...! ابتسمت باستغراب:ما كنت حقول لأ..بس هوا ليش متعلق مرة في سعود..أحس غريبة..دايماً الشباب يا ما يهتموا بالأطفال يا يكرهوهم...! ابتسم بحزن:يوسف أصغر أخوانو..كلهم حريم و رجال كبار..أصغر أخواتو لمن اتزوجت و جابت ولد اتعلق فيه بقوة...كان هوا كمان مو كبير بس الولد سار لو حادث و هوا تقريباً بعمر سعود يوم الحادث..يومها كان تقريباً مر على موت ولد أختو سنة..أصلاً إلي انتبه للحادث عمر..لمن نزلنا كلنا شاف سعود طايح عالأرض علطول شالو و اتمسك فيه..فوق هذا.. يوسف مرة حساس..تحسوا جاي غير..عارف اتربى لوحدو..أمو و أبوه عجااايز و كبار..أخواتو إلي ربوه فجاي رهيف مرة..تحس ما كان فيه رجال في حياتو...! -بس ما أحسه مرة غير..أحسو عادي رجال ما شاء الله و طيب..صالح يعني...! -هوا حبيب بس مرة رهيف..مرة..تحسوا مو سعودي...! -بالله عليك..السعوديين كلهم كذة..ما تشوف أبوك كيف يعامل أخواتك..يييه على أبوية..كان شديد معايا أنا و أحمد أخوية شدة..بس شوفوا مع أخواتي..ايش لطف و رقة..هههه..يعني والله قاعد أقول ايش هذا..كل قوتو تروح قدام أخواتي إذا اتكلموا...! ابتسم محمد:هذا الطبيعي..أنا أحس نفسي مابغا أولاد كثير..واحد اثنين بس و الباقي بنات...! -تفكر تتزوج...؟! -طبعاً... -متى...؟! استغرب محمد أسلوبي فقلت:محد منكم متزوج إلا أنا...! ابتسم:عندك عمر حقتو جاهزة..بس والله خايف عليه..حريم عيلتهم قوايا و هوا يا قلبي ضعيييييف..بس من كلامو الظاهر إنها تحبو..مع إنها عفشة و تردح...! ضحكت و أنا أتذكر الحكايا إلي تحكيني هيا جود من الكتب إلي تقرأها..حكايات الحب إلي تكون فيها البنت قوية و الولد ضعيف و خواف...! فجأة سمعت صوت بكى..التفت و كان سعود شايلو يوسف يحاول يهديه..وقفت و رحت بسرعة فقال يوسف:ما فيه شي ما فيه شي بس انفجع...! مديت يدي و شلتو من فوق سور اللعبة:انفجع من ايه...؟! قال سعود وسط بكاه:ولد..ولد جوة كعشني...! -نعم...؟! مسح محمد على راسه:كعشك ليش ايش سويتلو...؟! -مادري..ولا شي...! عبد الرب ملامحه فجأة اتغيرت..قال حمادة:الولد شعره خشن و منكوش و ولدك ما شاء الله شعرو حلو فكعشو...! -يا سلام..عشانه قرد يضرب ولدي...! يوسف:خلاص علي احنا خاصمنا الولد...! عبد الرب قرب من سعود و مد يده لراسه و قال بتأثر:خلاص سعود..آسف... طالعت فيه:ليش تتأسف إنتا...؟! حمادة بسرعة:لإنو سعود من أول كان خايف من الولد و ما يبغى يلعب في نفس الجهة بس عبود قلو ما عليك و مشاه معاه بس فجأة الولد نط من وراه و كعش سعود...! قلت بغضب:وينو ذا الحمار...؟! يوسف:مادري..كعش ولدك و فجأة اختفى..بس ترى عبود ما قصر فيه دفو بقوة...! قعدت أضغط على راس سعود بأطراف أصابعي:من وين شدلك شعرك...؟! -من كل محل...! و دفن وجهو في صدري...! قلت و أنا أمسح على راسو:خلاص إنتو كملو لعب و أنا بهديه...! طالع فيا سعود:لا بابا..تعال العب معايا...! -سعود تبغى تكمل لعب و إنتا كذة...؟! محمد:سعود راسك يعورك لمن ذحين...؟! -لااا..بس أنا..انا انفجعت...! ابتسم محمد:خلاص علي ادخل معاهم...! -ايش إلي أدخل معاهم..أنا من زمان ما لعبت ذي الألعاب..ما أقدر أنطنط و أتسلق...! حمادة:والله حماس..تعال معانا...! سعود:بابا أبغى معاهم بس إنتا تجي...! يوسف:تعال..إذا ما تبغى تتسلق فيه جوة مسدسات تتطلق كور..ممكن نسوي حرب الكور...! عبدالرب:ارحمني..ولا شريط سوني...! سعود و هوا يمسك وجهي بيدينو:بابا والله أبغى أوريلك شي...! بعدت يدو عن وجهي و بستها و همست:سعود بس الولد كعشك...؟! ابتسم و هوا يمسح وجهو:ايوة... قلت و أنا أنزلو عالأرض:محمد الله يخليك جيب الموية...! راح محمد للكرسي إلي قاعدين عليه و جاب الموية..شربت سعود و مسحت وجهو و رقبتو بالمنديل زي ما جود تسوي معاه بعد كل لعبة كان يلعبها...! طلبني سعود موية فرجعت شربتو عشان ما أبغاه يكبكب..بعدها و هوا يقول:بابا تجي معايا...؟! حسيت إني أبغى أدخل معاه مادري ليه..قلت و أنا أمسح شنب الموية إلي فوق شفايفو:طيب...! انبسط سعود و قعد ينطنط..محمد كان ماسك البطاقة طلعها و رحت للرجال المسؤول عن اللعبة بعد ما دخلت سعود من فوق السور..طبعاً الرجال في البداية رفض بس عبود قال:عادي زي ما دخلتنا دخله...! قال:كل شوية دخل دخل..أنا بعدين في مشكلة...! قلت:أنا ما حطلع فوق بس تحت عند اللللـ... يوسف:عند مسدسات الكور...! الرجال كان طيب والله لإنو في النهاية استسلم و خلاني أدخل...! دخلت اللعبة بعد ما أعطيت البطاقة لمحمد إلي راح مع عمر و جلسوا عالكرسي إلي كنا جالسين عليه..أعطيتهم طبعاً جوالي و أشيائي..حطيتها في يد عمر لحالو...! دخلت مع سعود أول شي لمحل المسدسات..علمني سعود كيف..و بصراحة انبسطت و أنا ألعب معاهم حرب الكور على قولهم..نعبي في المسدسات الكبيرة كور..تقريباً تشيل ثلاثة أربعة كور و نبدأ نطلقها..كان حمااااس محترم..كنت مطنشهم و قاعد أطلق لسعود..كنت أحاول قد ما أقدر ما أجيب الكور عليه..على عكسه..كان يحاول يسددها و يجيبها صح في الأغلب و كان ينبسط لمن أسوي نفسي اتعورت...! قعدنا زي المجانين نلعب و باقي الأطفال يطالعو فينا بحقد...! قلت:سعووود..لعد تطلق عليا...! سعود قعد يضحك و استمر يطلق عليا...! قعدنا نلعب ليييييين أذان العصر..ما كنا حنطلع لولا الرجال إلي قعد يزن و محمد إلي هزأنا و أجبرنا نطلع...! خرجت و أنا أحس بالتعب..يييييه..ايش كنت حسوي لو طلعت فوق و قعدت أتسلق و أنطنط...! طلعت آه تعب و حر قوية...! حمادة بفجعة:بشويش لا تطلع روحك...! -اسكت كلو منك..حماس و حماس...! عبود:من إلي كان يصرخ و يضحك جوة...؟! قلت و أنا أفتح الموية:اسكت مالك شغل...! لكن الموية كانت مخلصة..قلت:يووووه..أحد يروح يشتري موية...! يوسف:أنا بروح..سعود تجي معايا...! قلت و أنا آخذ أشيائي من عمر:سعود لا تاخذ موية باردة ...! هز سعود راسو بعد ما مسك في يد يوسف و راح معاه..قلت بصوت عالي:يوسف انتبه لا يفلت من يدك...! حمادة بصوت واحد مو شايف خير:علي..إنتا تخاف على ولدك...؟! طااااااااالعت فيه لين ما قال عبود:سؤال سخيف...! حمادة:لا بس ما أحس إنك من النوع إلي يخاف...! قلت و أنا أتذكر جملة من جمل جود:الخوف ذكاء...! محمد:هذا بالنسبة للأطفال..بس الكبار !! قلت و أنا أرفع أكتافي:عادي..أنا لين قبل ما أتزوج ما كنت أخاف..والله كان عقلي ترللي...! ترللي كناية عن العقل إلي مو في مكانه...! ضحكوا على الكلمة و اكتفيت أنا بابتسامة و أنا أشوف يوسف و سعود جايين:والله من جد...! مدلي يوسف موية قبل ما يبدأ هوا و البقية يتبادلوا المويتين..فتحتها و قربتها من فم سعود:بسم الله... أحسكم مستغربين ليش أشربو و هوا يمكن موصل خمسة سنين بس أقولكم..سعود حجمو صغير..طبيعة جسمه زي جود و سعود عمها..ما فيهم جسم..أنا ما شاء الله أخواتي مو زي جود..لينا اسم الله عليها توصل لفخذها...! بعدت الموية عن فمو و شربت و أنا أمسح فمو بأطراف أصابعي اليسار...! قلت:أحد يبغى موية...؟! عبود:يلا أكل...؟! حمادة:بصراحة أنا واحد أبغى آآآآآآكل...! محمد:اذكروا الله..خلونا نروح الفود كورت و نتغدى..بلا فجعنة...! همست:لا إله إلا الله...! طالع فيا محمد:تتريق...؟! -نعم...؟! استنتجت فابتسمت:لا من جد أذكر ربي...! قال و هوا يرجع شعره على ورا:طيب يلا عشان أنا بدأت أتنرفز...! -ليه...؟! و مشيو و مشيت وراهم و أنا ماسك يد سعود إلي سأل:بابا متى نروح ماما...؟! -نتغدى و بعدين نروح عند جدة..ولا أقولك..أمك قالت عشا..أريح نرجع البيت نرتاح بعدين نروح لجدة...! -طب ما ينفع ماما تيجي معانا في الفود كورت و تاكل...؟! ضحكت كيف إنو لقط الكلمة و علطول بدأ يستخدمها..قلت:ما ينفع حبيبي..منتا شايف أصحابي..كيف ماما تجي...؟! -طيب..كلهم هنا رجال..هدولا كلهم عادي ماما تيجي و تقعد معاهم بس أصحابك لأ ما عرفت بايش أرد عليه و فاجئني حمادة لمن رجع على ورا و حط يده على راس سعود:welcome to Saudi Arabia عبود:الولد ذا خطير..ممكن يفضحك...! محمد:إلا ضعيف شايف شي عجب..شي مخالف للمنطق...! يوسف:يا شيخ..زوج أختي..هزأها في بريطانيا ليش ما تغطي..عشان كانو قاعدين حريم مع رجَّال و كانوا منقبات...! محمد:أية..عديم المبدأ...؟! هز يوسف راسو...! عبود:وجع..فاكر لمن قابلته...! يوسف:بس خلاص..سلكتو الرجال...! جلسنا على طاولة و بدأ كل واحد يقرر من وين يبغى..أنا و سعود كنا جالسين عالطرف..التفت لو:ايش تبغى...؟! -مممم..أبغى هاااارموونجر...! كنت عارف إن سعود يبغى من مقدونلز (ماكدونالدز)...! ثواني إلا و الطاولة كلها تفطس ضحك و بدأوا يكرروا..هارمونجر..هارمونجر.. .! طالعت فيهم:هييييييي..إنتا و هوا..ولدي !! بعد ما هديوا طالعوا في سعود إلي كان يطالع فيهم بدونية فظيعة..قال بلكنة مزبوطة:burger حمادة:ايييييييييييوة..كده تعجبني...! سعود:أنا حر..أنا بالكيفي..أبغى أقول كده..بابا شوفهم...! قلت و أنا أمسح على ظهره:خلاص حبيبي خلاص...! عبود:وااااااااا..من جد أبو..طالع كيف وجهه قلب...! طالعت فيه:لا يا شيخ...؟! يوسف:مالت عليك إنتا و هوا و هوا..سعود حبيبي قول ايش تبغى..من وين هامبرجرك...؟! اتكتف سعود و قال:من ماكدونالدز...! محمد:علي..انتبه لولدك..و خليه يتابع ناس تتكلم انجليزي كويس..تراه يلقط بسرعة...! قال سعود بثقة:أول شي عربي..لغتنا أهم...! حمادة و عبود هزوا روسهم بإعجاب...! محمد:يا شيخ...! سعود ببديهية:ماما تقول...! قلت من ورا أسناني بغيظ:خلي..أمك..في..حالها...! حمادة:بدوي بدوي...! عبود:أقولك يا أبو هارمونجر..أبغى ماك عريبيا...! طالعت فيه مستغرب:ها...؟! محمد:ماك عربي...! ضحكت:ايش هذا...ماك عريبيا...؟! عبود:يلا مين بيقوم...؟! قلت و أنا أوقف:أنا بروح..مين يبغى من مقدونلز كمان...؟! يوسف:خذني معاك...! عبود:يوسف جيبلي ماك عريبيا...! علي:أحد ثاني...؟! هزو راسهم بلأ فرحنا لجهة مقدونلز و اشترينا...! رجعنا للطاولة و لقيناهم بدأوا ياكلو..عبود:سنة إنتا و هوا...! سعود بقهر:زحححححمة..زحمة...! التفت لسعود و طالعت فيه باستغراب فقال عبود:إنتا..كل ذا عشان زحـ..زعلتك و خليتك تمر من عند الولد..حقودي واحد...! قال يوسف:بس إنتا..محسسني إنتا البزر و هوا الكبير...! جلسنا و مدينا لعبود وجبتو..أكلنا و كنت أنا ما بين نفسي و ما بين سعود إلي يقتنص أي فرصة عشان يوقف أكل...! زبطنا موضوع الفلوس _بما إن كل واحد يدفع لنفسه_ ...! عبود:هيا سعودوه..المرة الجاية تجرب الزحليقة...؟! سعود:يعني و بعدين معاك..إنتا ليش كده تطفشني...؟! قرب عبود من سعود و نزلو و همس في إذنو بشي فهمس سعود لعبود بشي خلاه يصرخ:والله لوريك شغلك..جرب تسويها بس...! قلت بحواجب مقطبة:ايش فيه...؟! عبود:مالك شغل..سر بيني و بين ولدك.. و مد لسانو بطفولية...! ودعنا بعض و بعدها كل واحد اتيسر في طريقه...! يا ترى ايش قال عبدالرب لسعود...؟! آآه..أكيد شي سخيف أو تعليق غبي من تعليقات عبود...! أول ماوصلت البيت حسيت بتعب فظيع و قررت إني لازم أنام...! فصخت لبسي و ارتميت عالسرير و أنا أفكر بسعود إلي دخل الحمام إلي في غرفتنا..آآ..ايش هذا..بدأت أخرف..عقلي فجأة بدأ ينطط لأحداث اليوم...! خرج سعود و طالع فيا:بابا..نروح ماما...؟! قلت و أنا ألتفت:تعال نام معايا ذحين و بعدين نروح لماما...! طالعت في الساعة و أنا أفكر إن باقي ساعة عالمغرب...! قلت و أنا أضبط منبه جوالي عشان الصلاة:يلا سعود..غير ملابسك و تعال...! طالع فيا باستغراب:بابا كده تنام...؟! طالعت في الشورت و الفلينة إلي ما لبست عليهم شي:ايوة و إنتا كمان...! اتخصر:لأ..عيب و مو مرتب... و خرج من الغرفة بعناد..طنشته و غمضت عيني لكن بعد حوال الخمس دقايق حسيت بشي صغير ينط من فوقي و بطانية تغطيني ببطء أظهر ضعف إلي يشدها...! ابتسمت و لفيت يدي على سعود..الولد ذا ماخذ من أمه كل شي حلو...! ******************************* | |||||||||
|
| |
|
06-03-14, 05:21 AM
| #29 | |||||||||
| نجم روايتي ومشرفة سابقة وفراشة متالقة بعالم الازياء
| الجزء السادس عشر (أنا و أبي..قرار مؤجل) فتحت الباب و أنا مبتسمة لسعود و علي..حضني سعود بسرعة أول ما فتحت الباب:هاه حبيب ماما...؟! قفل علي الباب و دخل:وين جدة...؟! -و أنا ليا الله...؟! -والله إلي ما يبغاني ما أبغاه...! طالعت فيه بنظرة:طيب.. ضحك و هوا يرتمي عالكنبة..جلست حمبو و قلت و أنا أحط يدي على فخدو:وين رحتوا...؟! -مجمع العرب...! -طب ليه شكلك تعبان...؟! اعتدل في جلستو و قال بهمس:اسكتي..لعبت... ابتسمت بسعادة:بالله..ايش...؟! -أصحابي غصبوني و سعود رجني..بس والله انبسطت...! -أصحابك..ليه إنتا قابلت أحد...؟! -واللهِ من غير ما أرتب..اتصل عليا أحمد و قلي إنتا برة..سألني ويني و قلي بيجوا...! -آه..و انبسطتوا...؟! -الحمدلله...! قلت برجاء:حكييييني...! ابتسم:ما فيا حيل ذحين..بعدييين...! لويت فمي:مااااالت... طالع فيا فقلت بسرعة و خوف:أمزح أمزح... قال بأمر:سعود..روح نادي عمك و جدتك...! قلت:جدة أكيد تصلي السنة و تقول الأذكار دحين...! -طب سعود وين...؟! -في غرفتو..مادري ايش عندو...؟! -إنتي مو جاية تقعدي معاهم...؟! قلت:سعود حبيبي روح اقعد عند جدة لين ما تخلص صلاة...! اتكتف:أقعد أستناها يعني...؟! ابتسمت:ايوة..هيا تحب تصلي و أحد يستناها...! راح سعود بتأفف..ههه..عرف إني أصرفو...! قلت بصوت واطي:جدة مرة متضايقة عشان عمو ما اتزوج..تكلمني و هيا شوية و تبكي..حزنتني..و كلمت عمو ما أعطاني وجه...! قال بنرفزة:و عمك ايشبُه..تراه كبير...! قلت:وطي صوتك لا يسمع و يزعل..كلمتو و تخيل..ولا كأني فتحت معاه الموضوع..و لو حاولت ألمح يغير السيرة و يتكلم عن شي بعييييييييييد....! أوكي..اتكلمت عشان أبغى أحسس علي إنو معايا في الموضوع و أهيئو نفسياً لو سار نصيب و في نفس الوقت ما كدبت..هدي كانت ردة فعل عمو..ولا كأني قلت شي...! شي مستفز !!! عمو ليه كده..ليه لمن ما يعجبوا الشي يطنش..يحسس إلي قدامو إنو سخيف...! علي:والله عاد عمك مو صغير عشان أحد يحزن عليه و يقرر عنه و مو صغير عشان يقعد لين ذحين مو متزوج..طق الثلاثين و هوا لسه..شوفيني ما كملتها و عندي ولد بسم الله عليه عمره خمسة سنين...! قلت بعتاب:علي..اذكر الله و احمد ربك عالنعمة..يمكن عمو نصيبو لسه مو دحين...! استغفر علي و قال:عارف بس والله مقهور..عمك ما شاء الله رجال أخلاق و متوظف أحسن وظيفة و مو متزوج..زيه زي أحلام..كل إلي جوها زبالة مع إنها بنت حلوة و محترمة و متعلمة..وين عمك و إلي زيه عنها...؟! قلبي دق..آه..علي ايش قاعد يقول...! تابع:مو قصدي شي..بس وين الآوادم يختفوووون..وين..هذولا المحترمين وينهم..يا الله يا جود..كل ما أروح معاكي جرير و أشوف المثقفين يقروا..أقول يا ربييي.ذولا في الحياة وينهم..ليش ما نشوفهم..ليش ما يطلعوا...؟! حطيت يدي على كتف علي المتنرفز و قلت:بس حبيبي..هدّي..ايشبك...؟! -أفففففف..انقهرت...! -طيب حبيبي..أحلام و عمو مافي زيهم..أنا متأكدة ربي حيكتبلهم الخير..الناس الفنانة و المحترمة دايماً نهاياتهم حلوة...! -هذا لإنك تحبي الـ "يتريق عليا" happy endings -ايوة أحبها و مؤمنة بها و مقتنعة لإنو مافي نهاية وحشة لإنسان طيب..حتى حتى لو ما لو حظ في الدنيا تشوف خاتمتو..شي يقول عالجنة علطول..هذا إذا مرررة مرة يعني حظو ما كان صاحي...! ابتسم علي:كنك..كنك قلبتي على بدوي...! ابتسمت و قلت و أنا أحك شعري:أحس و أنا حامل أسير عفشة...! -و متوحشة...! -يا سلاااااااااام !! -و أنا صادق..يا ربي بس تولدي بالسلامة...! -آمين بس مو عشانك..و مديت لساني...! طالع فيا باستغراب فضحكت:كان قصدي أقول للقراء مديت لساني لك...! قال بغضب:و إنتي تقوليلهم عن قلة أدبك معايا..ذحين يقولو ما عندُه شخصية...! كنت حرد لكن عمو دخل الصالة بابتسامة و هوا يرحب بعلي...! وقف علي و سلم عليه:لا كان أحسن ما خرجت..ساعات تحسسني كنك سندريلا..تجي في الوقت بدل الضايع...! قلت بقهر:سندريلا ما جات في الوقت بدل الضايع..مداها تتكلم و ترقص مع الأمير...! طالعو فيا الاتنين بعدين كملوا كلام بعد ما رد عمو على علي...! قمت و أنا أقول:ايوة ايوة طنشوني..أصلاً من حلاتكم يعني..مالت عليكم سخيفين تافهين...! رجعت التفت و قلت:عمو..ولدي وين...؟! -آآ..وريتو لعبة جديدة نزلتها على جوالي و قاعد يلعب...! قلت و أنا أتابع طريقي:و أنا أقووول مالو صوت...! رحت لغرفة عمو و بالفعل لقيت سعود..قلت:وي سعود..ايش تسوي...؟! جا لين عندي و وراني اللعبة..قلت:آآه ايوة حلوة..بس ممكن تقفلها عشانك واحش ماما مرة...! قال بنفس دلعي:طب ممكن بس شوية أخلص المرحلة...؟! برطمت:بس سعود أنا أبغى أقعد معاك و أكلمك...! -طيب..طيب خلاص لا تزعلي..دحين رح أقفلها...! ابتسمت:يلا... و مشي خارج من الغرفة و مشيت وراه..وصل لين عند عمو و قال:عمو خلي بابا يحطها في جوالو...! عمو:طيب حبيبي...! علي و هوا يسحب الجوال:ايش هيا...؟! جاني سعود و حط يدو في يدي..جلست على وحدة من كنبات الصالة البعيدة عن عمو و علي و جلس سعود جمبي..حط راسو على صدري و لف يدو حواليا...! قلت:ايوة سعود..قولي..ايش عملت...؟! قال علي بيأس:لااااااااا..سعود..سعود الله يخليك..من يوم ما اتكملت بذا الأسلوب يعني بتبدأ شغل المجاغة حقها..سعود الله يخليك خليهم يوقفوا...! ضحك عمو:و إنتا ايش عليك منهم..خليهم..أم و ولدها..ما حتقدر تدخل بينهم...! قلت و أنا أمسح على شعر سعود:وي..ايش حارق رزك...؟! علي بغيض:أصلاً ما عندي رز من الأساس...! قال سعود بهدوء و هوا يغمض عينو:ماما في سر حقوووولك عليه بعدين...! -طيب حبيبي...! فز علي:لا يكون إلي عبود قالو لك و تكذب عليا من أول ما تبغى تقول لي...! قطبت حواجبي فقال:يختي هذا عبد الرب قال شي في أذن سعود نرفزه و مو راضي يقولو...! قلت و أنا أمسح على شعر سعود:ايش قلك حبيبي...؟! قال بطفش:يا ماما هدا واحد.."سكت لثواني"..ماما دا عبودي..ايش أقووووولك..ماما..تعرفي زي مين..زي داكا عبدالإله أخوكي بس دا عبودي يحبنا...! ابتسمت بهداوة و أنا أخلل يدي في شعر سعود و أكمل لعب بيه...! قال عمو:طيب علي..أنا بطلب إذنك في شي...! طالع فيا:طبعاً جود أنا حستخدم سلطتي عليكي كأب و ما حستنى رأيك...! رجع يطالع في علي:علي..عارف تعبان..باين عليك..بس أبغاك تقعد إنتا و زوجتك و ولدك عشان سعيد كلمني و قلي بيجي يتعشى هوا و أولاده بما إنو البنات و أمهم رايحين زواج...! قلت و أنا أحاول ألتهي:زواج مين...؟! -مادري..صحبة خلود يعرفوها و يعرفوا أهلها فحيروحوا كلهم..يعني..شي زي كذة..المهم ذحين..علي ايش قلت...؟! علي و هوا يسند راسو عالكنبة:بكيفكم أنا مالي شغل...! عمو:علي... علي:إنتو أحرااااااااااااار...! عمو و هوا يطالع فيا:جود..طبعاً حتقولي لأ...! أخفضت بصري و قلت و أنا أزبط لسعود لبسو:براحتك...! -لا تقوليلي براحتك..إنتي إلي تقرري...! قلت بهدوء و أنا أتجنب أطالع فيه:لأ مو أنا..بعدين هدا مو بيتي عشان أقرر مين يجي و مين ما يجي...! -أنا ما فتحت هذا الموضوع..أنا قلت تقعدي معاهم و تتعشي لإني عارف إنك متى ما طقت في راسك بتخرجي لبيتك و علي ما شاء الله بس في دا الموضوع ديموقراطي...! علي:كنك..كنك دخلتني في الموضوع...! عمو:ليه و مين قال إنو مالك دخل...؟! -عشاني ديموغراااااطي...! -ديموغراطي..والله إنك..علي..كنت أبغاك تساعدني...! -الله لا يبلانا..تقول بزرة قدامك ما تفهم..ياخي أهي عندك..تتكلم عنها..كلمها !! قلت بابتسامة واثقة:عمو إنتا ليه افترضت إني حرفض..عادي..حياهم الله...! ابتسم عمو:ايييييوة لإني عارف إنك تعتبري دا البيت بيتك..عشان كذة أخدت إذنك...! قلت بسخرية و أنا أدعي العجب:بالله...؟! اتكتف و قال بابتسامة حلوة:بالله...؟! لفيت وجهي بدلع و ما كانت إلا ثواني و عمو جمبي لاف يدو حول أكتافي و باليد الثانية يداعب سعود...! علي بصراخ:هييييييييييي..قووووو� �..ايش تسوي عند زوجتي..قووووووم...! جدة إلي دوبها دخلت الصالة:ولد..ليش صوتك طالع...؟! علي:شوفي..شوفي يا جدة كيف اتجمعوا في جهة و طنشوني..ولا كأني زوجها..و لا كأن إلي في حضنهم ولدي...! جدة بطفش و هيا تتوجه لعلي:يا الله سترك... جلست جمب علي:هب لي مخدة لظهري...! حط علي مخدة ورا ظهر جدة و هوا مبتسم...! جدة بعد ما ارتاحت في جلستها:هيا تعال... حط علي راسو على صدر جدة بس طبعاً بالخفيف عشان لا يضغط على صدرها..و مد لسانو بطفولية...! اعتدل عمو في جلستو:علي يا أهبل..هييي..قوم عن أمي لا تكتمها...! اعتدل علي في جلستو كمان و قال:والله يا سعود إننا أهبل رجالين..مسوين أقويا ليييين عند الحريم نضعف...! طالعت في علي بدهشة و هوا يتابع:والله..يا الله على أصحابي إلي في الشغل..زوجاتهم و أمهاتهم كنهم ولا شي و علطول يشتكون منهم...! قلت:علي لا يكون تقلهم إنك ما تستبد و تفتري..تراهم مو طبيعيين و الرجال دحين زي الحريم..ينقلوا الكلام بطريقة وحشة...! -أنا ما أقول شي..أصلاً ما أعرف كيف كل واحد يتكلم عن الشر إلي يسويه في زوجته...! عمو:يمكن على أساس رجولة و قوة...! ضحك علي:رجولة ايه..يا شيخ والله على الحكاوي إلي أسمعها..حريمهم مو بس مكردفينهم..إلا ماسكينهم من رقابهم...! ابتسم عمو:عشان ربي قال سَكن مو افترى و سيطرة و محاولة إثبات قوة...! جدة:علي قوم عني...! شهق علي قلك انصدم..فقلت:جدة الدلع عندها مؤقت..قوم...! قام علي عن جدة و هوا يتأفف:وجع..محد يبغاني في ذا البيت...! حزنت عليه:تعال علي حبيبي تعال... وقف عمو و هوا يقول بطفش و قرف:والله إنكم ما تنعطوا وجه..خلاص قايم..لا تروحيلو و لا تروحلها...! ضحك علي:سعودي حبيبي تستحييييييييي...؟! طالع عمو فيه بنظرة و هوا يجلس و يمسك الريموت...! قلت و أنا أقوم:جدة قلتي لمنورة تسوي شي...؟! عمو:يووووووه سعيد قال نقولو ايش يجيب عشا...! قلت:ليش يجيب..خلاص أنا أسوي..بس واحد منكم حيروح و يجيب لو فيه شي ناقص...! اتأفف علي و قال عمو:لا تطالعي فيا...! قلت بثقة:مو شغلي لو فيه شي ناقص واحد منكم حيتلحلح...! و دخلت المطبخ..خليني أشوف ايش ممكن أسوي...! فتحت التلاجة و أنا أسمع:"ما قلت إنها تحس إنو هذا بيتها..دحين لا يمكن توافق سعيد يجيب شي..معتبرتهم ضيوف عندها" ابتسمت..هدا عمو..مشكلة عمو إنو ما يعرف إنو همسو أعلى من صوتو العادي...! عمو من الناس الفاشلين في الهمس...! قلت:منورة... قالت:مافي صلصة...! -طب طماطم...؟! -فيه شوية... طالعت في البصل إلي في السبت:ممم كويس فيه بصل..هيا الله يسعدك قطعي 3 بصلات كبار صغير صغير...! -بابا سئيد يجي...؟! -ايوة... -بس دجاجة وحدة فيه...! -مو مشكلة..مو بقي من شوربة الحب إلي في المغرب...؟! هزت راسها بايوة فقلت:خلاص نحميها و إن شاء الله يكفي..بس بابا و أخواني حيجوا على ما أعرف...! سمعنا صوت جدة تنادي منورة..رحت لها أنا:هااااا... جدة بلهجة آمرة:اخبزي الخميرة...! قلت بتكاسل:جدة بقي من حقت المغرب...! -و إن كان..اخبزي..والله إني خبزت لجدك ذيك الخميرة قبل ما أولد عمك بكم ساعة...! قلت في نفسي:"ايش دخل الولادة في الموضوع؟!" -مين..عمو سعود...؟! -ايوة... -هدا إنتي يا جدة مو أنا..بعدين أنا تعبانة و ما فيا حيل و أصلاً أصلاً ما أعرف أسوي الخميرة...! -تعلمي..مين بيسويها لسعود لا مُت..والله إن ولدك يحبها...! قلت باستنكار غاضب:جدة..لا تفاولي على نفسك خلاص حتعلم أسويها...! عمو:الله يهديكي يا أمي ايش ذا الكلام..قولي خير...! رحت المطبخ من غير ما أرد..بس فعلاً لازم أتعلم أسويها..هدا تراثنا و إن كنت منفصلة عن تراثنا و ما أعرف فيه شي..لكن زي الخميرة و العصيدة و شوربة الحب و الدكيك..هدي كلها أشياء حلوة..أشتاقلها بين فترة و التانية و سعود حبيبي يحبها و أنا ما أعرف أسويها..حتى علي والله يحبها...! مسكت أنا العشا و خليت منورة تتولى الخميرة..بس أنا لازم أتعلم..إن شاء الله بعد ما أولد أتفرغ لتعلمها...! خلصت من شغل العشا و خرجت من المطبخ بعد ما زبطت النار...! قلت:عمو بابا متى حيجي...؟! -والله قلي إنو قريب..خليه..ايش عليكي إنتي...؟! قلت و أنا أجلس:عليا إنو العشا ما بقيلو شي و يجهز...! علي بشك:مو كأنه ينفع تخليه على نار هادية و ما يسير فيه شي...؟! اتنهدت و أنا أحط مخدة ورا ظهري:إلا.. قلت و أنا أطالع في سعود إلي كان يلعب بعيد بالجيم بوي:سعود تعال هنا...! جا سعود و جلس جمبي:ماما شوفي..أنا ما وريتك...! قلت و أنا أطالع في القرد إلي قاعد يتزحلق على غصن:ايوااا..ايش دا..اليوم اشتريتو...؟! -ايوة..عشان أصحاب بابا جو..بعدين أنا مابغا أقعد طفشان..بعدين بابا جبلي...! -آآآه..ايوة و بكم اشتريتوه..شكلو قرمبع...! طالع علي فيا:لا تتفلسفي..ما لقيت إلا هوا..و ولدك إلا يبغاه...! -طيب أنا ما قلت شي..بس لإنهم في المحلات دي يا تعطيهم في وجههم يا ياكلوك...! مسك عمو كرتونة اللعبة:واللهِ واضح إنو مو أصلي..غشاشين..بكم اشتريتو...؟! علي:طلب مية بس سعود قعد يزن عليه..تخيلوا هوا إلي كاسر مو أنا...! التفت لسعود بابتسامة:من جد سعود..ايش قلتلو...؟! سعود:قلتلوووو حقك مو زي حقي إلي أول..شوفي ماما العلبة حقتو..كأنها مو من جد..بعدين قلتلو بتمانين..قلي خلاص طيب...! عمو:بداية طيبة والله..قدر ينزل عشرين ريال...! علي:والله أنا ما لي في الألعاب و الأشياء ذي.."طالع فيا"..أحسن عشان مرة ثانية تجي...! -لا أنا أثق في سعود..هوا يعرف و يقدر يفرق لو أصلي ولا مو أصلي..بعدين كويس إني ما جيت..أقلها الولد سار يعرف يكاسر...! اندق الجرس و مادري ليه لكن اتوترت...! وقف عمو و كان حيروح لكن علي قال بلا اهتمام:خلي سعود يفتح الباب...! طالعت في علي بعدين في عمو إلي قال:سعود حبيبي تعال...! قام سعود و هوا ماسك جيم بويو و مسك في يد عمو و عينو على الشاشة...! فتح عمو الباب و دخلو تلاتة رجال..بابا و أولادو..وقف علي و وقفت أنا..سلم عمو و قفل الباب بعد ما دخلو و سلمو على علي بعدين وصلولي و سلمو عليا..كل دا سار أتوماتيك...! جلسو و بالصدفة كان عبدالإله جالس قريب مني..ما يفصل بيني و بينو إلا مكان شخص واحد...! التفت لي و قال:كيفك؟! كأنو في أحد صفقني بكتاب !!! هزيت راسي:الحمـ..الحمدلله..إنتا كيفك...؟! -بخير..كويس الحمدلله. و أداني ظهرو... وي..ايش يبغى في حياتو دا...؟! فجأة كده نط عبدالرحمن في الموضوع:جود متى حتولدي...؟! تابع بعد ثانيتين:طفشان أبغى بيبي و مالي مزاج في بيبي حقي فلازم أحد ثاني يجيبلي بيبي...! احتجت وقت عشان أستوعب الكلام إلي انرمى عليا بسرعة غريبة...! قلت:ما..إن شاء الله قريب..كم شهر كده و أولد...! بابا:كم شهر يعني كم...؟! قلت:مادري..ما أحب أفكر..يمكن شهرين تلاتة مادري...! أنا أعرف بالضبط كم بقي بس دحين ما أعرف..أففف متوترة و مربوكة..أنا ليه متوترة..ايوة عرفت عشان أسلوب بابا الغبي في الكلام...لأ..أسلوب بابا كان عادي..يا ربييييييييي..أنا ايشبي...؟! عمو:وي سعود حبيبي..ليه ما تسلم على جدك...؟! عبدالرحمن بمزاح عبيط:عندو إلي يشغلو..سعودوه..سلم على جدك و أخوالك...! قال سعود و هوا يتوجه ليا عشان يعطيني الجيم بوي:حسبتكم سلمتو عليا...! أخدت الجيم بوي منو و أنا أسمع عبدالرحمن يقول:كيف يعني سلمنا عليك و إنتا مو حاس..أبغى أفهم يعني يعني أبغى أفهم أنا...! التفت سعود لعبدالرحمن:عشان إنتو بس تبوسوا تبوسوا تبوسوا..تعوروا خدي..أصلاً إنتوا تبوسوا الهوا..بس ماما تبوسني من جد..كمان بابا و عمو و أبوية و أمي و إنتوا ما تعرفوا..أنا حسبتكم سلمتوا... و قال سعود شي بصوت واطي...! قال عبدالرحمن:شوف الولد..أنا خالك ترفع صوتك عليا ليه...؟! عبدالرحمن كان مستمتع و الكل عارف إنو يبغى يستفز سعود عشان كده محد اعترض على كلام سعود...! سعود إلي كبر راسو و راح سلم على راس بابا و بعدين مشي لعبدالإله و مد يدو فصافحو الأخير و اكتفوا بالمصافحة...! عبدالإله قال بابتسامة أول مرة في حياتي أشوفها:تستاهل..علبالك كل الأولاد أولاد أختك...! أوكي سعود ولد أختو..يمكن يقصد خلود..مادري... عبدالرحمن بقهر:والله هذا سعود الطفل الوحيد إلي ما عرفت أبكيه...! عمو:و ليش الأذية..مرة ياخي مستميت على أذى الأطفال روح بكي بناتك...! عبدالرحمن:ما أقدر أقرب من بناتي أنا..ايشبكم إنتوا...؟! عبدالإله و هوا يضحك:أبله..اسكت..إلا توري الخلق إنك خواف...! -مني خواف..بس الأم تتوحش لمن أحد يقرب على أولادها..شوف جود شوية و تاكلني...! عمو:لا جود تحب تترك الحرية لسعود إنو يتصرف. و قام عمو و شال سعود و جلس جمبي و حط سعود فوقو...! حط عمو يدو ورا أكتافي و هوا يقول:سعود تحب خالو عبدالرحمن...؟! سعود التفت لعمو و سار وجهو قريب من وجه عمو:ايوة عادي..بس خليه يسكت...! علي:اسكت... التفت عبدالرحمن لعلي بابتسامة عريييييييييضة:هلا و الله بالنسيب..ليه صوتك مو طالع اليوم...؟! ما رد علي عليه فبوز عبدالرحمن بقهر..غصبني أبتسم..ملامح وجهو و هوا مقهور تضحك...! قال فجأة:ايش رايكم نلعب أونو...! بابا:عبدالرحمن..اعقل... عبدالرحمن:إنا للاااااااااااااااه... عبدالإله:أصلاً فيه أونو...؟! بابا:فيه ولا مافي..عيب إنتا رجال..لازم تبطل لعب...! اتنرفزت... قلت بنبرة بريئة:هيا الرجولة تتحدد بورق ملون عليه أرقام...؟! التفت لي بابا:لا طبعاً بالأفعال لكن اللعب للأطفال...! قلت بصوتي العادي:الرسول كان يلعب..كان لمن يزعل أو يتضايق يروح و يلعب مع عائشة رضي الله عنها و كان يحب يشوفها تلعب...! صلى الكل على النبي و قال عبدالرحمن:فديتش و فديت طوايفش يا جود..يلا نلعب أونو !!.. عمو:معاك...؟! عبدالرحمن بضحكة:لأ..هيهي... ابتسم عمو:واللهِ في مكانٍ ما في الغرفة عندي بس مي كاملة.."التفت لي"..جود عندك؟! -في البيت..ايوة...! علي:أونو أصلية من أيام زمان... عبدالإله بغلاسة طفولية فظيعة:طب احنا عندنا مونوبولي أصلية من أيام زمان..الحديدية ذيك...! علي:مافي مونوبولي حديدية..هيا ورق...! عبدالرحمن:لاااا قصدو الأشياء إلي نحركها..المكوة و الجزمة و... عمو استغل انشالغهم بالنقاش التافه و ميل راسو و همس لي:حبيبي خفي شوية على بابا و حاولي تفتحي أي نقاش معاه...! التفت لعمو فسار وجهي قريب من وجهو:نعم؟! -ها..ولا شي..كم الساعة دحين...؟! و طالع في ساعتو.. وي ايشبو عمو...؟! أنا سمعت إلي قالو عمو كويس..كنت بس أبغى أتأكد من إنو قال إلي سمعتو..بس ليش هوا غير رأيو في اللحظة الأخيرة..لو كان عاد الجملة كان قلت:إن شاء الله طيب...! قال عبدالرحمن بأسلوب لطيف:ايش حنتعشى اليوووووووووم...؟! قلت:كبسة... -لااااا..خلينا نطلب أي شي..مافي حرمة هنا تبغى تطبخ...! -أنا طبخت... طالع فيا بصدمة:إنتي سرتي من إياهنُّ..جوووود كنت أحسبك فلة...! طالعت فيه:فلة يعني نطلب و فيه أحد ممكن يطبخ..بعدين على فكرة..كبستي أنا لا تقاوم..حتى اسأل علي...! التفت عبدالرحمن لعلي بجدية و كان حيتأكد من المعلومة لولا عبدالإله إلي قال:طبعاً..القرد في عين أمو غزال...! و لف وجهو اتنرفزت و في لحظة حسيت إنو إلي قدامي بزر...! و ما لقيت نفسي إلا أطلع لساني لعبدالإله إلي معطيني ظهرو...! عمو ابتسم و عبدالرحمن ضحك أما بابا فطالع فيا مستغرب:وي بنت..ايش هذي الحركات...؟! التفت عبدالإله:هيييييييي..ايش سوت...؟! قلت و أنا أحس فجأة بالذنب:والله ولا شي بس مديت لساني...! عبدالإله بتريقة عليا:بس مديت لساني... التفت لعمو:عمو شوفو !! عمو:طنشيه... كنت حعترض على اقتراح عمو التطنيش لكن عبدالإله فجأة ابتسم:كنت أمزح... -ها... علي بسخرية على مادري مين: مين قال ها سمع... -إووووو علي..لا تستخدم دا المثل..مرة أكرهو...! عبدالإله:ايوة علي..كيفك...؟! طالع علي في عبدالإله:الحمدلله..إنتا كيفك...؟! -بخير... التفت لعمو و قلت بصوت واطي:يعني ايش نفهم من دا الحوار...؟! التفت لي عبدالإله واهوا رافع حاجب واحد و بتهديد:لا تحشي..تراني قاعد أحاول أحبك ها... بسم الله..ايشبو فجأة كده انقلب.. " أحاول أحبك " ؟! ... والله ساعات الناس دولا يخوفوا..فجأة تتقلب مشاعرهم و أفكارهم...! قلت بطاعة زي لمن أبغى أرضي سعود:طيب حبيبي ما رح أحش..أصلاً أنا ما كنت أحش...! و وقفت و أنا أسمي ربي و رحت للمطبخ..أففففف..كأنو الجو حار..يمكن مع حرارة الفرن !! طفيت النار على العشا و قلت لمنورة تعبي السلطات في صحون صغيرة و تبقيلها...! حطيت الرز و الدجاج في الصحن الكبير المدور و حطيت في صحن صغير لمنورة بعدها رحت لباب المطبخ و قلت:عمو تعال جيب صحن الرز..ما أقدر أشيلو...! وقف عمو و جا لين عندي و عداني لجوة المطبخ و علي يقول:جود..تحتاجون مساعدة...؟! -ها..لا حبيبي ارتاح بس الصحن ما أقدر أجيبو...! جدة:الله يا جود إن كانك بتولدين علينا...! -ما بقي شي خلاص بس صحون صغيرة..أصلاً الحركة أحسن..بعدين أنا ما بتعب نفسي...! -إلا تتعبين..شوفي وجهك غدا مظلم...! -عادي..لازم الحمل كده...! عمو و هوا خارج بالصحن:خلاص جود اقعدي...! جيت بدخل المطبخ مطنشتهم لكن جدة نهرتني:إنك اقعديّ...! قلت بزعل:جداااااااهـ.... وقف علي لكن جدة قالت:مو إنت إلي تقوم..عبد الإله..قوم..قوم لا أقوم عليك...! عبدالإله بطفش:ايش فييييييييييييييه...؟! جدة:قوم اخدم أختك في حملها و اكرمها..الله وكبر عليكم إن كان بتهلكونها كذة كل ما حملت...! عبدالإله لجدة:إنا لله عالحب المفاجئ إلي يطلعلك فجأة...! ابتسمت و جلست..عبدالإله قام متنرفز..كان ممكن يقوم عادي لكن جدة استخدمت لفظة غلط..استخدمت كلمة "اخدم"،الشي إلي طلع قرون لعبدالإله...! بابا:هيا..ولدي يتهزأ عشانك...! ما قالها بحقد أوغيض..لا بالعكس قالها ممازح...! و كان أنا قدامي خيارين..يا أستجيب للمزحة دي و أكسر عدد بسيط من الحواجز أو ما أستجيب و ينعاد موال السنين...! و خلال ثواني فكرت و قلبت الخيارين و اخترت إني أبتسم...! -و هوا أنا أحمل كل شوية...؟! علي:بس والله جدة رهيبة لمن تحب أحد...! قلت:طبعاً..أم سعود مو أي شي...! بابا:أم سعد... -مالي شغل أبغاها أم سعود زيي...! جدة:إلا يا بنتي..إني أبغاني أم سعود...! ابتسم عمو و قال بابا:هيا خلي سعد يسمعك...! جدة:سامعني و داري..و إن كان الوحدة ما بتختار كنيتها لولدها ايش بتختار...؟! قلت:صح..ما شاء الله..محلايا والله أتكنى لولد من أولادي و أنا ما أحبو...! عبدالرحمن:مافي أم حتكره واحد من أولادها...! -لا مو عن تكرهو..بس مثلاً لو في وحدة واحد من أولادها قليل أدب ولا قليل خاتمة..بأي حق تتكنى بيه..كل ذنبها إنو الكبير يعني...! بابا:فيه قصة مشهورة للنبي مع رجال تظهر إن الوالدين يتكنوا لأكبر ولد احتراما له...! -عليه الصلاة و السلام..عارفتها القصة لكن أحياناً ما يستحق الاحترام و أنا كأم مابغا أتكنى لواحد موطي راسي مثلاً..أنا بتكلم عن الأشياء الكبيرة مو عن كسل في المدرسة ولا قلة ترتيب في البيت...! عبدالرحمن بتفكير:يمكن كلامك صح بس في النهاية هذا الولد ما طلع إلا من تربية أمو و أبوه...! -كنت أقول كده بس دحين عرفت إنو الأم و الأب مو هما إلي يربوا قد ما التلفزيون و الأصحاب يربوا و يأثروا..كتير أشياء ما تعجبني في طفلي..لا أنا أسويها ولا أبوه...! قبل ما أحد يعلق رفع سعود راسو عن الجيم بوي و قلي:طفلي يعني أنا...؟! -ها..لا حبيبي أنا بتكلم بشكل عام...! اتنهد سعود بطفش و رجع لشاشة الجيم بوي...! عبدالرحمن:على مين..قال طفلي قال...! و ضحك..انقهرت:دحين ايش إلي يضحك...؟! عبدالرحمن:سعود... من غير ما يرفع عينو:نعم... عبدالرحمن:نعامة ترفسك...! طالع سعود في عبدالرحمن بحدة و رجع بعد كده لجيم بويو...! علي بابتسامة:ولدي..هذا ولدي... ابتسمت و أنا أقوم:عشان مرة تانية لا تتعرض لولدي...! تابعت:سعود حبيبي يلا عشان نغسل يدنا...! قام سعود و هوا ينهي إلي كان في يدو..ضغط على ستارت و جاني...! الكل غسل يدو بعدها جلسنا عالسفرة..عبدالإله و هوا يرتمي عالأرض:ما بغيتو تجلسوا...! عمو:دحين إنتا ما تعرف تكمل جميلك..لازم تحطلك لمسة في النهاية...! عبدالإله:هذا مو جميلي..أنا أُجبرت على هذا الجميل...! قلت و أنا أغرف لسعود:ما دام الشغل فيك فيك اتظاهر بإنك إنتا اتبرعت...! -اسكتي إنتي كلو من تحت راسك...! جدة:والله يا عبود..تسكت أختك هاااا... التفت عبدالإله لجدة:أبغى أفهم..ليش في صفها...؟! -لإنها حامل... قلت و أنا أشوف جدة تاكل أول لقمة:جدة الملح كويس...؟! هزت راسها بايوة و جلست أنا أأكل سعود..مو أأكلو أأكلو بس أساعدو عشان لا يعدم لبسو..مافيا حيل أغسل..لسه قبل أمس مخلصة كل الغسيل...! و بعد ما خلصنا العشا اعتذرت بإني ما أقدر أرفع..بصراحة تعبانة..رحت لغرفتي و اتمددت..يا ربي..مستغربة..ليش تعبانة مرة..والله في سعود ما تعبت دا التعب...! تعرفوا ايه..قاعدة أفكر في شي..قاعدة أقول يمكن التعب إلي فيا مو من الحمل قد ما هوا من أشياء تانية...! ياااا الله قد ايش اليوم انحرق دمي..في حياتي ما اتوقعت إنو عمو ممكن يكون بدي الصعوبة..عمرو ما أعطاني إحساس بإنو عنيد أو غلس إلا في موضوع ودا..أوكي أعرف..الرجال مرة حساسين و مستحيل يكلموا أحد في شي زي كده بس خلاص..أنا عرفت..ليه ما يتعاون و يتجاوب معايا...؟! اليوم ولا كأني اتكلمت..من بعد ما قلي إنو مستحيل يرضى لأحلام بنفسو و دخل غرفتو معد كلمني..خرج للصلاة و رجع و من بعدها قعد معايا عاااااادي..شي من جد يقهر..لا و كان يكلمني في أشياء عجيبة .. تخيلوا بالله .. يناقشني في "أفاتار" و قد ايش حلو الفلم و قد ايش نجح ..! حسيت نفسي حنجن..كيف يكلمني في فلم وأنا لسه قبل شوية بأترجاه يوافق على شي في مصلحتو...! فجأة اندق الباب فانقطع حبل أفكاري...اعتدلت في جلستي و أنا أقول:اتفضل... انفتح الباب و كان عبدالرحمن مبتسم..قال:منتي نايمة..صح...؟! ابتسمت و أنا أهز راسي بلأ..اتقدم مني و هوا يطلع جوالو:أقولك فيه أغنية فرنسية أحبها أبغاكي تترجميلي هيا...! ابتسمت:ايش اسمها...؟! ضحك بهبل:ما أعرف.. قلت:ما أقدر دحين والله تعبانة..ارسلي هيا و أنا أرسلك ترجمتها بعدين...! بوز بعدين قال:كده خربتي الموضوع إلي كان حينفتح...! -هااا... ابتسم و قال ببساطة:كنت أبغى أفتح حوار معاكي بس بتعبك قفلتيه...! ابتسمت:سعود فين...؟! -مادري في الصالة..بس ترى أنا معجب بولدك..ترا هوا حق بنتي ماليا شغل...! ابتسمت:كيفهم بناتك و حليمة كيفها...؟! -الحمدلله كويسين..صح حليمة تسلم عليكي...! -الله يسلمها...! قال و هوا يحك راسو:آآه جود..كنت أبغى أسألك في شي...! -ايش...؟! -هواااا..جود أبغى أسأل..هل أنا أهبل لدرجة إن الواحد ما يعتمد عليا...؟! أول إحساس جاني بعد سؤال عبدالرحمن كان إنو عبدالرحمن يلف و يدور...! قلت:واللهِ مادري..أنا ما قد اتعاملت معاك لكن الظاهر ليا إنك تستهبل منتا أهبل...! -يا شيخة الشباب حولي طفشوني..كل شوية يقولو إنتا زي البزورة ما عندك هرجة..مدري كيف متزوج و مخلف..و خرابيط زي كده...! -و هما مالهم...؟! -مدري... بعدها سكتنا...! مدري لكن حاسة ورى عبدالرحمن شي...! قلت:و إنتا دا الموضوع مضايقك مرة...؟! -ها..لا عادي... -طيب... -ايش...؟! حك راسو و هوا ماسك ابتسامة..بعدها طالع فيا:أوكي جود..بصراحة قاعد أحاول أفتح معاكي أي نقاش و هذا أول شي جا على بالي.."ابتسم بحرج"..اتوقعت تبدأي تتكلمي عن غباء الناس و آرائهم الأغبى...! ما عرفت ايش المفروض تكون ردة فعلي..يعني أنا تعبانة و في غرفتي و يجيني واحد هدا كل هدفو..أنا عارفة عبدالرحمن عفوي بس بجد مني عارفة بايش أرد عليه...! و ما لقيت نفسي إلي أقول:طيب بصراحة..مني عارفة ايش أقولك.. تابعت بعد ثواني باسترسال مفاجئ:أقدر جداً إنك جيت لين حدي تبغى تفتح معايا نقاش بس عبدالرحمن خليني أقولك شي..إنتا منتا مضطر تفتعل أي شي..صدقني أنا مستعدة أرحب بأبوك في أي وقت لو حسيت إنو جوتو.."و أشرت بأصابعي بحركة".. قد كده مشاعر صادقة تجاهي فكيف إنتا و إنتا من مدة تبذل جهدك عشان توصل علاقتنا للوضع الطبيعي في الوقت إلي أعتبر فيه موقفي سلبي تجاهكم و ما زلت أحس بإني دخيلة على عماتي و بنات عماتي..أنا أعترف إني ما أقدر أنسى لكن في نفس الوقت مستحيل أحقد أو أطلب منكم إثبات على محبتكم..صدقني متى ما تجي إنتا و بناتك و حليمة تنوروني و تبسطوني..في أي وقت..ارفع السماعة و قولي..أنا يا عبدالرحمن ما عندي دي القدرة إلي تخليني أدخل في الناس و أسوي معاهم علاقات بس أنبسط و أحس بسعادة لمن هما يجوني..عشان كده حبيتك إنتا و سارة أكتر شي..لإنكم دخلتوا فيا غصباً عني...! طالع فيا و قال بصدق:عارفة..السلبية ذي مشكلة فينا كلنا..لين وقت قريب ما كنتي هامتني..من جد..كنت أقول و أنا مالي بوجع الراس..فاكرة لمن قلتلك إنو السبب أبوية و إنو لو مو أبوية أمي إلي تخاف علينا من غضب أبوية..ترا كل هذا راح من يوم ما اتزوجت..بس أنا فجأة حسيت ببناتي يكبروا..حسيت إني ما أبغاهم في يوم يحسوا بالحيرة تجاهك..لو أنا كنت مطنشك كأخت لأسباب أشوفها مقنعة هما ما رح يلاقوا أي سبب مقنع عشان يطنشوكي كخالة..بكده بدأت أتقرب منك بس "ابتسم" لقيت نفسي سعيد بتواجدي حولك..سبحان الله..ارتحتلك..كذة من غير سبب...! ابتسمت..ما عرفت ايش أقول لكني أحس بإحساس حلو...! ابتسم و هوا يوقف:طيب خلاص أنا بروح...! وسعت ابتسامتي:طيب ممكن تناديلي سعود...! قال بخوف طفولي:لااااا مابغا..زوجك حاقد عليا أخاف أنادي ولدو لكي يقوم يقلبها تحقيق...! قطبت حواجبي بابتسامة:ليه يعني...؟! -مادري يا شيخة عنو..والله زوجك عقد...! -علي..لا والله مو عقد..بالعكس...! ابتسم:يمكن معاكي إنتي مو عقد..مع الناس غرز...! -ها... -عقدة..ايش اللفل التاني..غرز... لمن ما راحت التناحة من وجهي قال:تفصيل..مدرسة... قطبت حواجبي مستغربة و مني فاهمة... -مالت عليكي..heavy blooded!! ضحكت:ايش يعني..تقيلة دم بالانجليزي...؟! هز راسو بايوة فقلت:هادي تضحك...! -يلا يلا خلاص بروح...بباي.. و خرج...! قطبت حواجبي بابتسامة و أنا أرجع أتمدد..دخل فجأة و خرج فجأة...! تمتمت لسببٍ ما:"الحمدلله" لكن سرعان ما اتذكرت عمو و ما احتجت وقت عشان أتوقع إني حرجع لبيتي و لسه ما أخدت منو كلمة...! ************************* | |||||||||
|
| |
|
06-03-14, 05:22 AM
| #30 | |||||||||
| نجم روايتي ومشرفة سابقة وفراشة متالقة بعالم الازياء
| الجزء السابع عشر (سُفرة..و لأول مرة) "جود يلا قومي الصلاة" قلت و أنا أقوم:لقيت توبك؟! -ايوة ايوة... اتوجه علي للدولاب بينما رحت أنا للحمام...! كنت حاسة نفسي تعبانة و أبغى أنام..استغفر الله... اتوضيت و خرجت..ما لقيت علي..الظاهر خرج للصلاة...! كبرت و صليت..بعد ما خلصت حاولت أنام بس ما قدرت..كنت تعبانة بس مادري ليه مو قادرة أنام..اتعوذت بالله من الشيطان و أنا أغمض عيني...! سمعت بعد دقايق صوت بكا قريب مني..فتحت عيني مفجوعة و كان سعود يبكي..جلست بتعب:بسم الله سعود..ايشبك...؟! قرب مني و حضني و قال ببكا:ماما أبغى أجي عندك..شفت..شفتك تروحي... رفعتو بصعوبة و سدحتو جمبي و انسدحت..طبطبت على صدرو بتعب:بسم الله حبيبي..لا ما أروح..بسم الله..قول بسم الله بابا... قعدت أقرأ على سعود لين ما هدي و هديت أنا كمان...! ^^^^^^^^^^^^^^^^^^^^ علي،،، همست:ايش قاعد تقول سعود؟!،كيف طاحت..ايش طيحها...؟! قال سعود بصوت متحشرج:خرجت بتجيب موية لنفسها و كانت الأرض مبللة فطاحت... -وذحين..كيفها؟! -علي مادري..أمي تعبانة..علي..أنا ما أقدر أكلم جود..اليوم خميس و إنتو أكيد جايين..كلمها بس لا تفجعها..قولها أمي كويسة...! -طيب..طيب الدكتور ايش قلك عنها...؟! قال بحرقة و وجع:يقول..يقول جاها شُعُر..ما..ما..يقول... قلت و أنا أفكر:شُعُر؟؟؟؟!!!! -يقول جاها شُعُر..شعر يا علي شعر... -خلاص خلاص سعود اذكر ربك..إن شاء الله ما فيها إلا العافية..أنا بجي مع جود اليوم و إن شاء الله جدة بخير...! -علي..لا تفجع جود..قولها إنها تعبت شوية..والله أخاف يسير فيها شي..علي الله يخليك..مني ناقص...! -خلاص سعود خلاص..أنا بتصرف..ما عليك.. قال بصوت واطي:علي..مني عارف ايش أسوي... -استهدي بالله يا رجال..أمك ذحين في بيتها تحت عينك و إن شاء الله ما فيها شي..بلغت أخوانك إنتا...؟! -ايوة..موجودين كلهم..بس..بس أمي تسأل عن جود... شي من الراحة اتسلل لقلبي لمن فهمت إن جدة تتكلم...! -خلص ولا يهمك..جايين..ما يجي العصر إلا و احنا عندك...! -إن شاء الله.. -تبغى شي...؟! -لا سلامتك... -الله يسلمك..مع السلامة...! تكيت راسي على ظهر الكنبة..يا ربي..ايش أقول ذحين لجود..والله لتنجن عليا..كيف أهديها...! "علي..." فزيت:هلا... -ايشبك...؟! -ها..ما..ما فيا شي... قطبت جود حواجبها و جات جلست جمبي: إلا فيك شي..ايشبك...؟! لازم أقولها..يا ربي عونك...! -آآآ..جود..دوبي مكلم عمك و... قالت بفجعة:ايش..فيه شي...؟! -ها..لا لا حبيبي بس جدة... -ايشبها جدة...؟! -ما فيها إلا العافية بس تعبت شوية...! دمعت عيون جود و أنفاسها عليت فجأة:علي..جدة ايشبها...؟! -ما فيها شي..جود ايشبك..اذكري ربك... بكيت:إلا فيها..ليش عمو كلمك و ما كلمني...؟! مسكتها من أكتافها:جود..جود ايشبك... -بربك علي..جدة فيها شي... -ما.. -بربك أقولك..جدة فيها شي...؟! هزيتها:جود ايشبك..إنتي حتى ما سمعتيني..جدتك ما فيها شي.. -طب..طب ايش تعبها..تعبت شوية..طيب ايش فيها...؟! -أول شي تهدي و بعدين..مني قايلك و إنتي كذة... زاد بكاها:هيا فيها شي..جدة فيها شي... قلت بشدة:جود... رفعت راسها بسرعة و قعدت تطالع فيا بشفايف مرتجفة...! حضنتها و قلت بصوت واطي:إن شاء الله تكون بخير...! -طب ايشبها..ليش ما تقولي...؟! -طاحت..طاحت من موية كانت عالأرض..في المطبخ... بعدت عني و قالت بصوت عالي:طاحت عالسيراميك...؟! -ما جاها شي..الحمدلله ما انكسرت..بس..بس جاها شعر..و..و..لفوا حوضها في المستشفى عشان العظم ما يتحرك و..و إن شاء الله بخير..هيا في بيتها ذحين و... شوية شوية جود كانت تغطي وجهها و تنهار بالبكا...! حضنتها:جود خلاص لا تبكي..ما فيها شي..عمك قال إنها كويسة و تسأل عنك تبغاكي..ما حتسأل عنك إلا و هيا فيها قوة..سمي بالرحمن ما فيها إلا العافية...! رفعت راسي لسعود إلي كان يطالع فينا من عند بابا الصالة..تركت أمو إلي مسحت دموعها و هيا تحاول تتمالك نفسها قدام ولدها !! ناديت سعود فمشي لنا ببطء و على وجهو الحيرة..طالع في جود:ماما ايشبك...؟! رفعت جود راسها:ما فيا شي..روح البس عشان نروح عند جدة...! سعود و هوا على وشك يبكي:ليش دحين..لسه... كنت عارف لو بكي سعود حترجع تبكي جود و وقتها حفقد أنا السيطرة...! -حبيبي جدة تعبت عشان كذة ماما تبكي..نبغى نروح لها ذحين عشان نقعد معاها...! طالع فيا سعود لثواني بعدين حط يدو على كتف جود:طب عادي ماما لا تبكي..زي لمن إنتي أول تعبتي في..في المدينة بعدين سرتي كويسة..عايدي ترى..والله جدة طيبة ما فيها شي...! قلت:إن شاء الله..ذحين روح البس عشان نروح لجدة...! راح سعود فقلت لجود:هيا جود..قومي نلبس عشان نروح...! قومتها و رحنا لغرفتنا نلبس...! يا رب..يا رب فعلاً ما يكون فيها إلا العافية..أنا ما طمنت جود إلا من خوفي عليها..بس يا رب ما يكون في جدة شي...! ^^^^^^^^^^^^^^^^^^^ سعود،،، قاموا بنات أخواني لإنو جود جات و معاها علي بيدخل يسلم على أمي...! دخلت جود و بعدت الطرحة عن وجهها إلي أثر البكا كان باين عليه..أول ما طاحت عينها على جدة انقلب وجهها..كنت بروح ألحقها لا يسير فيها شي لكنها كانت اتوجهت لأمي..انحنت و سلمت على وجهها و راسها و طولت عند رقبتها...! أمي كانت تمسح على شعرها و تقرأ عليها..أمي لحظتها كانت أقوى من جود...! أخفضت راسي لمن حسيت بعلي جمبي..حضني و قال بصوت غير مسموع:كيفك...؟! -الحمـ..الحمدلله... تركني و اتوجه لأمي..سلم عليها بعدها رفع سعود و خلاه يسلم...! جود مشيت لي و حضنتني..مسحت على راسها و بستو:بس بابا..جدة كويسة..ما فيها شي.. تركتها و قلت لعلي:تعال المجلس... التفت لسعود و حاولت أبتسم:تجي معايا... طالع فيا و على وجهو نظرة الـ ولا شي و هز راسو بلأ و هوا زام شفايفو...! شال علي سعود و همسلو بشي في أذنو فسكت الأخير و حط راسو على كتف علي إلي راح للمجلس...! التفت لجود و ابتسمت و أنا أحس بالوجع من جوتي:جود حبيبي لا تضغطي على نفسك..أمي ما فيها شي... طالعت فيا و التعب باين على عينها:هِيا كيف طاحت...؟! -ما..جود أبوية خلاص..خليكي إنتي دحين معاها..هيا من أول تسأل عنك...! و رحت للمجلس...! ارتميت عالكنبة جمب علي إلي كان حاط في حضنو سعود..سعود كان سااااااكت..كان في عالم ثاني..حسيتو مو معانا أبداً...! طالعت في أخواني..كانوا يتكلموا عادي..صح كانوا متضايقين بس مو زيي..كانوا كلهم أقويا..كانوا .. أنا ليه ضعفان..ليه أحس محد موجوع غيري..يمكن لإني عشت مع أمي أكثر منهم..يمكن لإني الصغير و الصغير دايماً الأقرب للأم...! بعدين جود..أنا أحتاج ذحين جود..يا ربي..استفغر الله العظيم..ما أعترض بس تعباااااان..أنا تعبااان...! أحس راسي حينفجر !! رفعت راسي و أنا أسمع سعد ينادي:علي.. طالع علي في سعد:نعم... ابتسم سعد:كيف حالك...؟! -الحمدلله بخير..إنت كيفك...؟! -بخير نحمد الله..كيف سعود و كيف بنت أخوية...؟! -الحمدلله... سعد:سعود..ليش ساكت..سعووووووود... علي:سعود كلم عمك... سعود كان مسترخي و شبه نايم بسبب الجو الهادي...! رفع نفسو عن علي و قال و هوا يطالع في سعد بتفحص:نعم... -كيف حالك...؟! -كويس... -ما بتسألني عن حالي...؟! طالع سعود في سعد لثواني قبل ما يبرطم و يحمر خشمو..رجع راسو لصدر علي و لف وجهو عن سعد...! سعد:يه..سويت شي...؟! علي و هوا يمد لي سعود بعد ما مديت يدي لو:لا بس هوا تعبان شوية...! سعد:عاد بغيت أتكلم معاه...! سعيد:ما عليك..الولد ذا مدلع...! همس سعود و ما سمعتو إلا أنا:أنا مو مدلع... مسحت على راسو و حسيت بحرارة.. التفت لعلي:فيه حرارة شوية... مد علي يدو يعس سعود و على وجهو انزعاج:يا الله.. قلت بصوت واطي لعلي:جود و هيا صغيرة كانت علطول تسخن لو حست بأحد تعبان أو بالجو متوتر...! "لو..محتاجين..تبغوا أنزل أجيب دوا؟!" عبدالله إلي اتكلم...! التفت علي بسرعة و قال بشدة:لأ... طالعت فيه مستغرب..ليش كذة يكلم الولد؟!،عبدالله معروف طول عمرو مبادر ويتطوع في كل شي..مو قصدو يتفضل عليه أو شي !! قلت:لا حبيبي..سعود يمرض مع الزعل عادي..ينام و يصحى طيب..ما عليك...! عبدالرحمن:طب ليه زعلان..أحد خاصمو..علي..يا مفتري... سعيد:ما تعرف ولد أختك يعني..طالع على سميو مدلع... طنشت لكن علي ما طنش:بس سبحان الله..ما شفت الرجولة إلا فيهم...! سعد:طبعاً..معروف..الطفل المدلل بحكمة دايماً يطلع رجال..لأنهُ يكون قد حظي بما يحتاج من حنان...! علي:مممم..صح ايوة... اتفاجأت لمن حسيت بسعود يقوم عني و يوقف،مسح عينو اليمين بقيضة يدو و قال بصوت مخنوق:غبيون كلكم..أنا مو مدلع... و مشي خارج من المجلس..انصدمنا كلنا..ايشبو الولد فجأة...؟! سعد:باين عليه من أول زعلان... عبدالرحمن:ياخي ليتك وديتو في بيت أبوية مع باقي البزورة... سعيد:الله يهديك يا علي..ليش تجيبو...؟! طالع علي في سعيد:ما جا على بالي... و وقف بعد ما قالي بيكلم أهلو...! قلت لسعيد:ما..ما عليك خلاص بيروح عند أمو..هوا من أول أصلاً ما يبغى يجي هنا... آه يا رب..مصدع..راسي يعورني..أحسو ثقيييييييييييييل..ثقيل مرة...! ^^^^^^^^^^^^^^^^^^^ جود،،، انفجعت لمن شفت سعود طالع من ورا الساتر إلي نحطو عند باب المجلس..وجهو ما كان عادي..الزعل باين عليه...! جا لين عندي..لفيت يدي حول أكتافو وقلت بصوت واطي:ايشبك يا بابا..ايش فيه...؟! طالع فيا و هوا مبرطم:أبوكي بس يقول مدلع مدلع..عشان عشان أنا قعدت عند بابا...! وقفت و انسحبت من الصالة إلي انتقل لها سرير جدة بما إنها أوسع و متهوية أحسن...! رحت لغرفتي و دخلت فيها مع سعود..رديت الباب...! خليت سعود ينسدح عالسرير و اتمددت أنا جمبو..فرصة عشان أرتاح شوية..قلت:ايشبك حبيبي..ليه زعلان...؟! -مادري..بس هادا أبوكي بس يقول مدلع..بعدين سرت ببكي... اتنهدت..لأول مرة أحس نفسي عاجزة عن التصرف مع سعود...! قلت:طب بابا تبغى تلعب جيم بوي...؟! هز راسو بلأ فقلت:طب تنام..حاسس نفسك تعبان...؟! -لأ ماما أبى معاكي... -حبيبي أنا تعبانة و لازم أقعد مع جدة..والله مني فاضية... برطم سعود..حسيت نفسي من جد مني عارفة كيف أتصرف...! اندق باب الغرفة المردود بعدها انفتح..كانت سارة...! دخلت بهدوء أكسبها إياه الوضع..جلست عالسرير بعد ما اعتدلت جالسة و سعود اتحرك و حط راسو على فخدي...! حطت يدها على سعود:حار... هزيت راسي بايوة فقالت:كيفك...؟! -الحمدلله..إنتي...؟! هزت راسها:طيبة..آآم جود..لو تبغي..أنتبه لسعود... بسرعة:لا حبيبي..ما يحتاج... -لا لإنو ماما قالت جايين ضيوف و الظاهر رح تنشغلوا...! -ضيوف ايه...؟! -ناس من الجماعة دولا..جايين يسلموا على جدة...! اتذكرت..قد مرة تعبت جدة و اتكدسوا الناس علينا بشكل متعب..و بدل ما يسيروا أدوا واجب تعبونا بذبايح الكل يوم و الضيافة و مدري ايش هوا...! عضيت شفتي السفلى..الله يعين بس...! قلت:سعود بابا لازم أروح أقعد مع جدة... ابتعد سعود عني و سحب البطانية و غطى نفسو...! اتنهدت فقالت سارة:ما عليكي..أنا بنتبه لو...! قلت:هوا رح ينام علطول بس خليكي معاه الله يسعدك لين ما تتأكدي إنو نام...! ابتسمت:طيب... قلت بصدق:شكراً... و خرجت و أول ما خرجت لقيت أم سارة في وجهي..مدري ليه بس حسيت قلبي طاح...! قالت و هيا تأشر على غرفتي:سارة جوة...؟! خفت..أخاف تحسبني أستغل بنتها أو شي..والله سارة هيا إلي عرضت..أنا مالي !! قلت:أيـ ..ايوة... -لحالها...؟! -للللأ...مع سعود... -آه بس حسبتها فاضية..باقي البنات وين...؟! -مادري... تابعت بسرعة:تبغي شي...؟! طالعت فيا:لأ يا ماما إنتي روحي اقعدي مع جدتك... و عدتني لغرفة جدة وين ما كانوا البنات مستقرين...! رحت للصالة و أنا قلبي يدق بقوة..يا ربي قد ايش أستحي منها..و رغم إنها ما تسوي حركات هبلة..بس دايماً إحس إني سلبت منها شي و أحس..هيا كمان تحس كده !! ^^^^^^^^^^^^^^^^^^^ جود،،، حطيت الصحن على الطاولة الصغيرة إلي قدام جدة و أنا أتنهد...! جدة مي راضية تاكل !! قالت وحدة من العجايز إلي على السفرة:الله يا أم سعد إن كانك بتتعبينا معاك..كلي الله يهديك... لأ..لأ فظيعين..من بعد العصر جو و إلمن دحين..ايش قلة الذوق دي..استغفر الله بدل ما ياخدوا أجر أخدوا ذنب..تعبت و أنا أرتب للضيافة لإنو لو ما كان كل شي بيرفكت حيروحوا يلفوا على العيلة كلها و يقولوا:ما فيهم سنع..ما فيهم كرم... أنا أداريهم و لا أداري جدة ولا سعود و لا أداري نفسي...! قلت:جدة الله يخليكي كلي..ما يسير كده..كلي الله يخليكي... قامت وحدة من العجوزات و هيا تحمد الله..قربت من جدة..أعرفها دي..دي صحبة جدة الروح بالروح...! حطت يدها على كتفي:قومي يا بنتي قومي ارتاحي... قلت:لا عمة مرتاحة..ما تقصري... هزت راسها:قومي..قومي ادخلي كليلك لقمة..شوفي ولدك..شوفي عمرك.."دنقت ليا"..و إن شاء الله نص ساعة و هم خارجين... -ها... -قومي قومي... جدة:قومي يا جود قومي... طالعت في جدة مستغربة و الحرمة تقومني..جلست صحبة جدة مكاني و بدأت تأكل جدة و أكلت معاها..قعدت أطاااالع..ليش تاكل معاها و ما تاكل معايا...؟! حزت في نفسي بصراحة..ليه أنا بنتها...؟! التفت لي الحرمة:هيا روحي يا بنتي روحي... سمعت رنة جوالي فرحت متجهة لغرفتي لكن استوقفني صوت سارة تناديني...! كان صوتها جاي من غرفة جدة..لسه أهلي ما راحوا..بس البنات من يوم ما جو الحريم قليلات الأدب دول و هما في الغرفة و عماتي و زوجات بابا و عمو سعد قاعدين يوجبوا في الحريم من أول...! رحت لغرفة جدة و وقفت عند بابها..كانوا قاعدين يتعشوا..غرفولهم و مشيوا...! قلت:نعم؟! سارة:اتعشيتي...؟! -لأ... -طب..تعالي معانا لا تقعدي ضغطك ينرفع و تتعبي...! -لالا مابا... خلود:بلا عبط تعالي لا تقعدي مع إلي هناك... -لا مابغا..بعدين جوالي يدق..يمكن علي يبغى شي...! سارة:طب نغرفلك... -والله مالي نفس حبيبي..كمان بروح أشوف سعود..شكلو حيبدأ سخونة...! -لا لا نومتو..ترى ما فيه شي... ابتسمت:شكراً حبيبي.. و أديتهم ظهري بمشي و قبل ما أتحرك سمعت همس:"ايشبها دي؟!" بصراحة ما عندي القدرة عشان أميز مين بالضبط بس على كلٍ ما يهمني...! رحت لغرفتي و لقيت اتصال من عمة..يوووه..ما فيا حيل أكلم بس عيب..لازم أتصل..عشان كده جلست على السرير و دقيت و ما كانت ثواني إلا وردت:ألو... -أيوة السلام عليكم...! -هلا و عليكم السلام..جود حبيبي كيفك؟! -الحمدلله كويسة..إنتي كيفك عمة...؟! -الحمدلله يا ماما..إنتي كيفك و كيف جدة...؟! قلت و أنا أتنهد:الحمدلله كويسة... -كلمني علي والله وقلي..طمنيني يا بنتي عليكم..جدتك كويسة...؟! -الحمدلله يا عمة جت على كده..الحمدلله... -حبيبي تبغي أجي عندك...؟! للحظة حسيت إني أبغى عمة...! قلت بلهفة من غير تردد:ايوة عمة... اتداركت الوضع:لاء عمة..ناس كتير هنا..جو من العصر..ما راحوا..تعبوني..و سعود تعبان..مو راضيين يروحوا..تعبوا جدة... -مين ذولا...؟! -مادري يا عمة..ما أعرفهم كلهم..ناس يقربولنا من بعيد..مادري أصلاً كيف عرفوا بالخبر..تخيلي بدل ما ييجوا يقولوا كيفك جو دقوا العشوة..راح علي جاب رز و لحم..اتعشوا و برضوا ما راحوا...! -يا بنتي أهلكم ذولا.. بقهر:أهلنا يثقلوا علينا..عمة تعبونا تعبونا... -خلاص يا ماما خلاص..بكرة إن شاء الله أنا أكون عندك لو تبغي..ولا أقولك متى ما بغيتيني اتصلي.. سحبت نفس قوي و طلعتو...! عمة:بسم الله عليكي... قالت بعد ثواني:هيا عمك يبغاكي... اتحمحمت عشان يتعدل صوتي...! عمي:أيوة... -احم..ايوة هلا عمي..كيفك...؟! -إنتي إلي كيفك...؟! -الحدلله بخير إنتا كيفك...؟! -أنا بخير..كيف جدتك...؟! -الحمدلله.. -سعود كيفه...؟! ما عرفت أية سعود يقصد لكني قلت:الحمدلله كويس... -جود ايش رايك تجيبين سعود عندنا...؟! -كيف...؟! -لين ما جدتك تصير طيبة..ترجعي على بيتك... استغربت:ليه..أنا حروح على بيتي إن شاء الله... -ما بتقعدين عند جدتك...؟! -ها..إلا بس... -علي قال ناوية تقعدين لين جدتك تتحسن... أوكي..أنا ما أعرف أي شي عن إلي يقولو...! -خلاص يسير خير..أشوف أنا كيف الوضع و أتفق مع علي و... سكت..مادري ليه..أحس كأني..مادري مادري... عمي:شوفي يا أم سعود..إنتي غالية عندي..لكن لو دريت احتجتي شي و ما كلمتي عمتك بزعل عليكي..و ها أنذا أبلغتكِ...! أجبرني أبتسم بآخر جملة..قلت:الله يسعدك عمو..ما تقصروا والله... -هيا خذي عمتك ... عمة:هيا أمي مع السلامة..سلمي على جدتك و انتبهي لنفسك... -إن شاء الله... -يلا نشوفك على خير... -مع السلامة... فصلت و أنا أتنهد..أحس نفسي ارتحت شوية..يا رب لا تحرمني منهم..عمو و عمة من أحلى الأشياء إلي سارت لي بعد زواجي...! التفت لسعود..كان نايم..بس على وجهو التعب..انحنيت و بستو..يا ربي عليك يا سعود..إنتا أكتر شي أشيل همو...! سعود مو من الأطفال الطبيعيين أو العاديين..مو أمدحو عشنو ولدي..لا باين عليه..سعود من الأطفال الأذكيا إلي يخافوا و يحسوا لو فيه شي مو حلو قاعد يسير..لو طفل طبيعي كان ما اهتم بمرض جدة بس سعود غير..يشيل هم الأشياء و يقلق...! دحين و هوا صغير كده..كيف لمن يكبر...؟! بدأ سعود يتحرك..أكيد حيصحى..لإنو نومتو كانت نومة تعب..تستمر كم ساعة و بعدها يقوم...! فتح عينو بعد دقائق و رفع راسو..بستو و أنا أحط يدي على رقبتو:ها حبيب مامي... مافي حرارة..زي ما اتوقعت..ديك كانت سخونة زعل...! -ماما... -يا عيونها... -ما نروح اليوم البيت...؟! -ما أعرف حبيبي..أنا أبغى أقعد مع جدة..بكلم بابا و أشوف... -ماما أنا أبغى معاكي... حضنتو:طيب حبيبي ولا يهمك... بعدتو عني بعد ثواني:هيا تقوم تغسل... قام سعود و هوا يقول:فيه ناسات برة...؟! ابتسمت:ايوة حبيبي بس إنتا امشي بسرعة روح الحمام..محد يشوفك...! -طيب إنتي تعالي... قمت و أنا أبتسم..حطيت يدي في يدو و رحنا..و بعد ما خلصت غسيل و تشطيف رجعت على غرفتي..جلست سعود على كرسي التسريحة و اتجهت لشنطتي...! أعطيتو لبان و عطرتو و بعدها خرجنا من الغرفة و استغربت من إنو الأصوات انعدمت إلا من صوت عماتي و البنات..و صوت أطفال جديد...! رحت للصالة و لقيتها خالية من سفرة العشا..بس عماتي و البنات كانو قاعدين قدامهم شاهي و جدة نايمة...! قلت باستغراب:وين الناس...؟! التفت لصحبة جدة إلي قالت مبتسمة: هيّا طردتهم لكي... -طردتيهم...؟! -لا والله لكن قلت إن أم سعد تعباااااانة و إنك إنتي ما فيكي شدة و ولدك تعبان..عاد خلاص..العيب بيكون عليا قلت هالكلام مو عليكم...! -ليه..خلاص سعود مو تعبان الحمدلله و كان دخلناهم جوة عن جدة...! سارة:إلا أحسن..يا شيخة ولا كأنو قدامهم مريضة..ايش ذا...؟! قامت سارة بابتسامة و شالت سعود:سعووووودي حبيبي..نمت معايا اليوم...؟! سكت سعود و لف وجهو فقالت:سعووووود..هيييي..ايش سويتلك أنا؟!،ليش ولدك كده مطنشني...؟! قالت أمها:نزلي الولد و خليه في حالُه...! قلت:لا عادي..سعود أبوية... نزلتو سارة و قالت بهمس حزين على سعود:والله حبيبي مرة زعلان...! خلود:خليه يروح..ترى جو أولادي و أولاد عبدالرحمن..جوة في غرفة جدة...! مسك سعود فيا:مابغا... اتنهدت... تركني سعود و راح..اتحركت لقدام السيب عشان أشوف وين بيروح..و راح لغرفتي...! رجعت جلست على أقرب كنبة مني...! خلود:ايشبو..مو على أساس يعرف أولادنا...؟! طالعت فيها:تعبان... أم سارة:تعبان ايش فيه...؟! رفعت أكتافي:مادري..عشان جدة و عشان الجو... عمتي صفية:ولدك ذا مدلع..ايش دراه هوا بمرض جدة...؟! استغفر الله يا ربي..عاد عمة صفية دي تنرفزني..عليها أخلاق و أسلوب..تخيلوها حماتي..الله يرفع بأم علي عنها بس...! سارة:جود تبغي شاهي...؟! -ها..لا حبيبي... -ترى فيه نعناع... ابتسمت:لا مابغا... سمعت جوالي يدق..كنت حقوم لكني لقيت سعود قدمي ماسك الجوال:بابا... ابتسمت:شكرا حبيبي... و قمت و أنا أسمع سارة تنادي سعود إلي راح لها بتردد...! رديت على علي لمن وصلت لغرفتي و رديت الباب:ألو... -أيوة السلام عليكم...! -وعليكم السلام هلا...! -كيف جدة...؟! قلت و أنا أهز راسي:الحمدلله كويسة... -و حفيدتها...؟! -الحمدلله... -طيب جود أكيد إنك بتقعدين صح...؟! -لو..عادي يعني...؟! -عادي... -شكرا... -طيب يختي ارسليلي سعود عشان نمشي... -كلمت عمة و عمو و قالـ... -عارف أنا إلي بلغتهم...! -ايوة قالتلي عمة..عمو يقول سعود يقعد عندهم بس والله مو راضي..يقول ما يبغى يروح يبغى يقعد معايا...! -لأ..أنا بروح عند أهلي و سعود بيجي معايا..جود إنتي رح تنشغلي بجدتك..سعود حيتعبك...! -والله مني عارفة..مو راضي..مو راضي حتى يكلم أحد هنا...! -ناديه طيب..بكلمه... -بس بشويش عليه..ترا مرة متأثر... -ايش بسوي لُه يعني..ناديه... ناديت سعود و خلال ثواني كان عندي..مديتلو الجوال فأخدو و ما سمعت إلا إلي قالو: -ليه؟! -مابغا..أبغى ماما... -لأ مو تعبانة... برطم و عيونو دمعت:مابغا... سكت لدقائق بعدين قال:أجي بكرة؟! -بكرة نجي هنا؟! -أمي و أبوية يجوا...؟! -طب أنا أروح عند أمي... -طيب.. -لأ مو زعلان... -مع السلامة... و مدلي الجوال،قلت:كويس اقتنع... -طيب..شوفي أنا بكرة أهلي رح يجوا..بيجيبوا سعود معاهم... -و إنتا طبعاً... -أكيد..تبغي شي قبل ما أمشي....؟! -لا سلامتك بس شوية أجهز سعود و أرسلو لك....! -يلا في أمان الله...! -مع السلامة...! وقفت:يلا سعود حبيبي..تجهز عشان تروح مع بابا...! -ماما أنا بكرة حجي...! -ايوة حبيبي إن شاء الله.. ما كان فيه شي أسويه غير إني أوصي سعود على أشياء معينة...! مشيت معاه لين باب المجلس و ابتعدت لمن شفتو يدخل...! جلست على الكرسي إلي جمب سرير جدة و أنا أتنهد...! سارة:جود سعود رايح...؟! -ها... كنت شاردة و مو منتيهة...! قالت:سعود حيروح...؟! -ايوة... -ليه...؟! -عشان مني فاضيتلو..حيروح هوا و أبوه عند أهلو...! حليمة:طب كان خليتيه يجي معايا...؟! ابتسمت:ما كان رح يرضى..بالغصبة راح عند جدتو و جدو...! أم سارة:ليه..خليه معاكي..بعدين ولدك مو شقاوي يعني...! أول شي:شغلة يروح لهم مالها داعي..و بعدين هما ما عرضوا إلا تأدباً و ذوقاً..تاني شي:سعود مدلع و يحتاج رعاية طول اليوم..أعرف أنا السبب لإني أبالغ في الاهتمام بيه لكنو فعلاً ما يقدر يقعد..خاصة في الأجواء الكئيبة دي...! قلت:لا أحسن يروح هناك..أنا ما حقدر أنتبهلو هنا...! فجأة طلع صوت جدة:جود... فزيت:نعم... -ازهمي منورة... -أنا فيه جدة..ايش تبغي...؟! قالت بصوت عالي:ازهمي منورة !! -جدة أنا فيه..قوليلي ايش تبغي..محتاجة شي...؟! -أقولك نادي منورة... كنت حقوم لكن سارة وقفت:خليكي خليكي...! و راحت للمطبخ و ربعد ثواني جات منورة و انصدمت لمن قالت لها جدة إنها تبغى الحمام..منورة اتجهت لحمام جدة و جابت الكرسي المتحرك و السطل إلي يتعلق في الكرسي عشان تقضي فيه جدة حاجتها _الله يكرمكم_ ....! انصرفوا من الصالة و راحوا لغرفة جدة..أما أنا فوقفت..أبغى أتعلم الطريقة الصح عشان بعد كده أنا..إلي رح أسوي لجدة...! هوا مو عن شي..منورة طيبة و تحب جدة و جدة تحبها لكن من أولى يخدم جدة..بنتها و لا شغالتها...؟! أعرف إني ما حقدر أسوي لجدة كل شي..بس على الأقل أتعلم..في الوقت إلي أكون فيه صاحية و مو تعبانة أنا أسوي لجدة كل شي...! رجعت جدة بعد ما خلصت على السرير بمساعدة منورة و أنا أطالع و ألقط كل حركة...! منورة رجعت الأشياء للحمام و بعدها رجعت للمطبخ..رحعت أنا جلست على الكرسي إلي جمب السرير بصمت...! بعد دقيقة كاملة سمعت:يا بنتي تعبانة إنتي...! قلت بزعل:مني تعبانة يا جدة...! -ما تعرفين... -خلاص اتعلمت... -إنك اولدي بالسلامة و أنا بخير...! غطيت وجهي و دفنتو عند كتف جدة..حطت يدها على راسي و قعدت تقرأ عليا...! مقهورة..ما أعرف بس حاسة نفسي...مادري..زعلانة من إلي سار و زعلانة عشان حاسة نفسي مني راضية..هذا قضاء..طب ما دام أنا مؤمنة بكده ليه مني راضية..ليه أحس نفسي مو هادئة..ليه أحس إني مغمومة...؟! رفعت راسي و بعدت شعري لمن حسيت بأحد يدخل الصالة..كانوا هما..رجعوا...! مسحت وجهي و أنا أسمعهم يقولوا إنوا الشاهي خلص...! بطبيعتنا ما نقدر نقعد من غير شاهي و نعناع على الطاولات...! مها:ماما والله جيعانين...! أم سارة:ليه ما اتعشيتوا..ما غرفنالكم احنا...؟! سارة:ايش غرفتولنا..لقمتين..ماما ايشبك..احنا فوق الخمسطعش بنت ما شاء الله...! أم سارة:سمي بالرحمن..والله لو بغيتوه كان فيه البركة...! انتبهت من كلامهم إنو الكل راح ما عدا أخواتي و أمهم و بابا و زوجة عبدالرحمن و أعتقد عند الرجال فيه زوج خلود لإني سامعة أصوات من عندهم غير إلي أعرفها...! وقفت و أنا أقول:فيه لو تبغوا أشياء مجمدة..بطاطس و نجتس و كده... جمعت سارة يدّينها:من جد؟؟؟!!! ابتسمت:ايوة... أم سارة:لأ..ليش البطر..مرة جيعانة روحي سويلك أي شي...! قلت:عادي..حتى أنا ما أكلت و أعتقد إنتو كمان..ممكن نسوي أي شي خفيف...! كنت أتظاهر بالقوة في الوقت إلي كنت فيه متوترة و خجلانة !! أم سارة:لأ..مالو داعي..الحرمة تعبانة خلوها ترتاح... التفت لجدة و رجعت طالعت في أمهم:بالعكس جدة تحب النجتس..والله ممكن تاكلها...! سارة بطفش و هيا تتكتف و ترجع على ورا:قصدها منورة...! -آآآم طيب أحد يجي يساعدني..بسوي الشاهي و..أحد..أبغى أحد يطلع النواشف معايا...! سارة بكسل:ينفع ما أجي...؟! -و هوا فيه أحد غيرك حيجي...؟! أم سارة:قوموا يلا ساعدوها...! أوبس..أنا ما كان قصدي شي..والله طلعت كده..لا يكون فهمتها على أساس إنها دقة...؟! وقفت مها و قومت معاها سارة إلي كانت تعترض...! رحنا للمطبخ و قلت أنا لمنورة تدخل تنام..رفضت فذكرتها بإنو بكرة ورانا قومة من بدري عشان جدة...! كنت قاعدة أسوي الشاهي و أنا أستمع لكلام سارة و مها....! كان نفسي لو أدخل معاهم في الحوار لكن خفت ما يتقبلوني..خفت يطلع شكلي سخيف و غير كده أنا مني من النوع إلي يدخل صح..عمتي دايماً تقولي إني أعطي إلي قدامي إحساس بإنو أقل مني و بإني إنسانة متعالية..قالت لي كده لمن اعترفت لي مرة عن أول انطباع عني..و إنها بس كانت تبغى ترضي ولدها إلي كان ما يعترف بشي اسمو زواج أصلاً...! أنا ما أقصد..قد مرة سألت علي لو كان دا الكلام صح..و بدون تردد أكد كلام أمو..من غير ما يفكر أو يحاول يتذكر حتى..كان يبغى ينرفزني..آه..أكره علي لمن أحسو يستمتع بعصبيتي...! خرجت من أفكاري على صوت سارة:جود التونة خلصت...؟! التفت لها:مافي في الكرتون...؟! -لأ... -طب..شوفي يمكن في الدولاب... أشرتلها و لمن راحت لقت وحدة صغيرة..طلعتها و قالت:ليش هنا...؟! ابتسمت:منورة تحب تخزن لوقت الحاجة... مشيت و سحبت من التلاجة الشطة و المايونيز و أخدت صحن و تبسي كبير و مفك و خرجت...! و أعتقد إنها معد حترجع المطبخ تساعد !! رفعت الكافتيرة عن النار بعد ما طفتيها و لمن كنت أصب الموية في البراد سمعت:اتوقعت رح تجي تتأسفي...؟! التفت بعد ما حطيت الكافتيرة:نعم... مها من غير ما ترفع عينها عن الطماطم إلي كانت تقطعها:اتوقعت..بس يمكن إنتي ما حسيتي إنك غلطانة...! قلت باستغراب:عن ايش تتكلمي إنتي...؟! -عن يوم الملكة...! احتجت ثواني عشان أرجع لطبيعتي..حسيت كأنو الزمن اتوقف !! قلت بعد ما أعطيتها ظهري و كملت صب الموية:و ليه أعتذر...؟! -تعرفي إنتي ايش يعني ملكة...؟! -ايوة أعرف.. -طيب... قلبي كان يدق بقوة..لكن فيه شي..قصدي أشيااااء..لازم تتوضح...! قلت:روحي اطلبي ذا الطلب من أبوكي..أنا غلطت..لكن مو عليكي و لا على أحد..أنا غلطت لإني رفعت صوتي على أبوية..هدا الشي الوحيد إلي أحس إني غلطت فيه..أنا تبت..و استغفرت ربي عشاني رفعت صوتي على أبوية بس ترا ما اعتذرت من بابا..هوا نرفزني بس صدقيني..لو كان فيه أحد ما كان انفعلت..حسيت إنو مافي قدامي أحد بعدين أنا ما اتوقعت إنو كل هدا يسير..أنا بس... قاطعتني بقهر:أنا بدل ما أنام مبسوطة نمت أبكي..مافي أي تبرير لتصرفك... -و أنا كمان..بدل ما أنام فرحانة لأختي نمت محروق قلبي..مين إلي نرفزني..مو أبوكي؟!..أنا سكت و ما انفعلت عشان ولا شي..أصر الكل عليا فجأة إني أبات و أنا ما كنت أبغى..كنت تعبانة..قلت لأ لأ لأ..بس ما سمعوا..آخر شي دمعت و قلت إني ما أبغى قام أبوكي بدأ يقول كلام بايخ و فجأة عمو وقف في صفو و هزأني..حسيت إنو التهزيء دا لازم يتوجه لأحد تاني..لا تطالبيني بأشياء أنا ما أقدر أسويها..الاعتذار دا لو حتطلبيه من أحد اطلبيه من أبوكي أو عمك...! التفتت بسرعة و كملت شغل و هيا تقول:عالعموم أنا مني حاقدة عليكي...! ابتسمت و أنا أرص الفناجين في صحن:لإنكم اتربيتوا صح ما شاء الله..من بعد ما جبت سعود و سرت ألاحظ أثر كل شي عليه سرت أقدر أفرق بين إلي متربين و إلي مو متربين ..بغض النظر عن الذوق و المجاملات إلي تسير كتير في بيئتنا..و اكتشفت قد ايش إنتوا متربين ما شاء الله..و مني قاعدة أجامل أو أكدب..بدليل إني حقولك إني لو عشت عندكم ما كنت حكون زيكم لإنو لا بابا و لا أمك و إلي هيا الأهم رح تتقبلني..كل دي الحقائق اكتشفتها بعد ما اتزوجت..و أمك ما سارت تعني بالنسبة ليا شي سيء زي زمان..لإني أنا دحين عندي بيت و عشان ما أكره أمك أو أحس إنها السبب في وضعي زمان أحط نفسي مكانها..بنت زوجي إلي ما قصرت عليه في بيتي..و من مين..من وحدة ما تسوى ظفري..شي يقهر... "فيه إنسانة طبيعية تتكلم عن أمها بذي الطريقة؟!" التفت مفجوعة و لقيت أم سارة تدخل للمطبخ...! قالت لمها:ودي الطماطم خلاص... سويت نفسي مو مهتمة و رجعت لرص الفناجين رغم إني خلصت منها لكن سويت نفسي قاعدة أرتبها أكتر...! خرجت مها من المطبخ فقالت أم سارة:ردي.. برضو طنشت.. قالت:على بالك ما أفهم الحركات دي..ترا عندي بنات..لا تسوي نفسك مو سامعتني... -ما أسوي نفسي، مشغولة قاعدة أرتب الفناجين... -براحتك بس مهما كان ماضيك مع أمك سيء ما يحقلـ... التفت لها بقهر و قلت من ورا أسناني:ما عندي أنا ماضي معاها و لا مع زوجك و لا مع أي أحد... قطبت حواجبها و قالت بعد ثواني:أنا ما قصدت أذكرك بشي..لكن ما يسير تتكلمي عن أمك و أبوكي بذي الطريقة..إنتي عندك أولاد..مهما كانت أمك سيئة المفروض ما يحسوا بذا الشي و ما يحسوا كمان بكرهك لأبوكي..بغض النظر عن كون أبوكي زوجي أو حتى أمك هذي زوجة زوجي... كان نفسي أصرخ في وجهها"مو زوجة زوجك" زميت شفايفي بينما كانت تقول:و إذا كنتي إنتي ما تكرهيني فأنا نفس الشي كمان..أنا أثق في سعود و في تربيتو..و بعدين لو كنت أكرهك ما كان خليت رقمك و لا حتى ايميلك يقعد عند سارة..و إذا علبالك ما كنت أعرف عن العلاقة الـ سرية بينك و بين سارة فتكوني غلطانة..أنا بالعكس كنت أبغاها تستمر لكن أخاف على أولادي و ما أسمح لأي أحد يلومني على هذا الخوف..أنا ما أكرهك إنتي كشخص..أنا أكره المشاكل إلي ممكن تجي من وراكي...! -واللهِ أنا كبيرة و أولادك كبار..أنا عن نفسي مني محتاجتهم..ما أنكر إني أحياناً نفسي أكون وسطكم بس خلاص..أنا متزوجة و عندي بيت أنا وسطو..تخافي عليهم من ايه...؟! قالت و هيا تفتح التلاجة و تطلع منها أشياء:أتكلم عن زمان... قلت و أنا أشيل الصحن إلي عليه الشاهي و الفناجين:ما أهتم بزمان... و خرجت من المطبخ..حطيت الشاهي على زاوية السفرة و رحت جلست عند جدة...! سارة:وي..تعالي اجلسي...! -ها..مابغا..تعبانة ما بجلس على الأرض...! و أول ما خرجت أم سارة قالت سارة:ماما شوفي جود..تقول زعلانة منك ما تبغى تجلس معاكي على سفرة وحدة...! طالعت في سارة مفجوعة..ايش بتقول المجنونة دي...؟! طالعت فيا أم سارة بعدين طالعت في بنتها:قومي جيبي السكرية...! -ماما... -بنت..قومي أشوف... قامت سارة بتأفف و أمها تقول لمنى:منى حبيبي الفناجين... لمن جات منى بتدف صحن الشاهي لأمها قالت:انتبهي لا تخبصي الترتيب... ابتسمت..دقة وااااااااااااضحة..المفروض إني بدل ما قعدت أعيد و أزيد في ترتيب الفناجين أعبي السكرية و أحطها في الصحن !! أم سارة:تعالي تعالي يا جود.. -مابغا مني جيعانة... قالت بلهجة أموية آمرة:تعالي بلا عبط... قمت..و أنا أفكر في الطريقة إلي استخدمتها..زي لمن تكلم بناتها لمن ما يسمعوا الكلام..بس طبعاً هيا قالتها بحكم إنها أم تكلم وحدة قد بناتها..أقول كده لإني ما أبغاكم تفهموا إنو خلاص كل شي اتعدل..سبق و قلت إنو ولا واحد حولي مثالي..كلهم طيبين لكن مو مثاليين و بيرفكت..عشان كده لا تفهموا لفظة "أموية" غلط !! جلست على جهة فاضية من السفرة و ما كانت ثواني إلا و سارة تفحط و تجلس جمبي..حطت السكرية عالسفرة بقوة:أقولكم جيييعااااااااانة...! أم سارة:سمي بالرحمن...! منى:مفجوعة وحدة...! و تتالت التعليقات على سارة إلي صرخت:ايشبكم إنتوا عليا..جود شوفيهم...! خلود:سيبي جود في حالها..طالعي كيف وجهها أحمر..هييييييي جود..جود.. رفت راسي لها:نعم... وين باقي الحوار...؟! مو مهم..المهم..إني مع أخواتي على سفرة نواشف..في ديك الليلة..في وضع اتخلى الكل فيه عن كل السخافات كسرت حواجز كتيرة..و زي ما يقولوا.. I broke the ice *************************************** | |||||||||
|
| |
 |
| الكلمات الدلالية (Tags) |
| منطق, الكاتبة |
| أدوات الموضوع | |
| انواع عرض الموضوع | |
|
|
1Likes
.png)
العرض العادي
