آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
29-11-14, 09:37 PM
| #94 | |||||||||
| نجم روايتي ومشرفة سابقة وفراشة متالقة بعالم الازياء  
|  السلام عليكم ورحمة الله وبركاته كيفكم حبايبي يلا شويات وبنقلكم البارت الجديد الكاتبه رجعت فتحت الروايه من جديد | |||||||||
|  |
|
29-11-14, 09:44 PM
| #95 | |||||||||
| نجم روايتي ومشرفة سابقة وفراشة متالقة بعالم الازياء
| بسم الله الرحمن الرحيم.. السلام عليكم و رحمة الله وبركاتة.. صباح/ مساء الخيرات و الليرات.. يا هلا و يا مرحبا فيكم من جديد بعد فترة انقطاع طالت اكثر من اللي كنت حاسبتة و قلتة لكم.. و جاني عتب كثير و كلام بس لازم تعرفون ان الشيء هذا مو بيدي.. انا لما يكون مالي خاطر بالكتابة و مخي موقف ما عندي الحماس لأني اكتب و ارتب افكاري و تبوني انزل بارت.. تتوقعون بيطلع البارت كويس..؟! بكون مستواة على مستوى باقي بارتات الرواية..؟! اكيد لا.. الكتابة تزور و لا تزار.. و ان شاء الله هذا الإنقطاع الأول و الأخير عنكم لين ننهي الرواية مع بعض.. و تأكدوا اني ما راح اتركها ابداً.. اسئلة كثير تجيني بتكملينها و الا لا.. لو ما ابي اكلمها كان ما ادخل المنتدى و لا الأسك و التويتر و ارد عليكم.. و قلت لكم من قبل لو ماني متأكدة اني راح انهيها ما نزلتها انا بعد قارئة مثلكم و اكيد ما يرضيني اقرأ رواية و اتعلق فيها و تترك لي الكاتبة بالنص.. ما راح اسوي هالحركة ابداً فيكم.. وثقوا فيني شوي.. اشكر كل اللي سألوا عني و ما تركوني و اسدوا لي تعاونهم معاي لو بكلمة.. و اللي دايم يرسلون لي على الأسك تأكدوا حتى لو السؤال عادي و جاوبتة مية مره وجودكم يزيدني حماس.. اشكر كل شخص قرأ روايتي وهي بقسم الروايات الغير مكتملة لأني احسها ثقة.. ثقة اني بكمل حتى لو ما كانوا واثقين يكفيني هالإحساس انا احسة.. ارحب بكل القُراء من مختلف الدول.. سعيدة جداً بمتابعيني من دول الخليج عامة و فلسطين و السودان.. شيء جميل و الله و جودكم جمالة ما ينوصف.. اشكر اللي ردوا على الرواية اول ما فتحتها المشرفة و ترى ما نسيتك Miss RoFa حتى لو من فترة طويلة يمكن اللي ردون مره مرتين انساهم لكن اللي ترد كم مره حتى لو تنقطع فترة ما انساها.. اخيراً مواعيد البارتات ثابتة كل سبت ان شاء الله.. بس هالويك اند بارتين بارت اليوم و الثاني السبت عشان يأخذ هالبارت حقة في الردود و التوقعات.. و عشاني مطولة عليكم و تستاهلون مين يعوضكم.. استروا على ما واجهتوا من اخطاء.. .. البارت الثالث و الأربعون.. اللقاء صدفة ! يذل الذاكره و الحنين يبكي اسراب الحمام.. حبك بقلبي ولآني,, ناكره بس يحتاجك و يحتاج اهتمام.. لـ رجف.. طلع من المزرعة بعد ما سمع صوت بنتة.. حس بانكسار بروحة من بنتة.. ألم فضيع ينهش شرايين قلبة.. ويش يقهر الأب كثر بنتة يوم تطعنة بسمعتة.. يوم تحسسة انها ما رباها و راحت مع واحد عشان تزوجة.. وثقت فيه و تركت ابوها..!! ليش هي تحسب نفسها بأي مكان عايشة..!! ناسية وين..؟!! : تفــضل.. < قالها بعد ما سمع صوت الطق ع الباب.. دخلوا عساف و عزام .. ادوا التحية العسكرية رغم استغرابهم من شكل الفريق غازي.. اللي عيونة بالأوراق و لابس نظارتة الشمسية.. رفع عيونة لهم.. وهم تقدموا لمكتبة.. آشر لهم على الكراسي : استريحوا.. جلس عزام مقابل عساف.. كل واحد يفكر شلون يبدون بالموضوع.. و غازي عيونة بالأوراق.. و مخفية خلف نظارتة.. عساف بثبات : سيدي.. اذا فيك شيء نأجل الموضوع.. غازي : قولوا اللي عندكم.. (رفع عيونة لهم يناظرهم من ورى نظارتة) اسمعكم.. عساف اخذ نفس واضح ان رئيسهم ما راح يكون صدرة وسيع لهم مثل دايم.. و الأسلم يستلم الأمور بجدية اكبر : تونا جايين من شقة راشد.. او الأصح تركي بن سيف.. تركي بن سيف ضابط في سلك الشرطة.. سافر من ثلاث سنين على الصين و طبها و من بعدها اختفى من على وجه الأرض.. و اللي صار له انهم خطفوة.. و عرضوة لتعذيب شديد.. حتى انهم اعطوه صعقات كهربائية عشان يفقد ذاكرتة.. (عساف نقل نظرتة لعزام ثم لرئيسة عشان يكمل) اصدرنا انا و عزام امر بتفتيش بيتة, و رحنا لشقتة و لقينا صور لنا كلنا في كل اجتماعاتنا.. وهو مو معنا.. و كأن هو اللي كان يصور.. عشان كذا مو ظاهر في الصور.. و الغريب.. ان لقينا له صور كثير وهو يتعرض لـتعذيب و اخذناها و سلمناها للأدلة الجنائية نرفع منها البصمات.. غازي النار اصلاً تشتعل بصدرة من بنتة و طعنتها له بظهرة.. تجية الطعنة الثانية من واحد عده مثل ولده و وثق فيه سلمة موضوع كبيــر و كان احد الأشخاص اللي اعتمد عليهم.. وين كان عقلة.. وين عيونة.. ويش صار له!! ضيع عقلة ما عاد يفرق و لا يعرف الأمين من الخاين!.! عزام باستغراب من وضع الفريق غازي : سيدي..!! غازي بحدة : لا عاد تناديني كذا.. ناديني باسمي.. لا جاء الوقت اللي استاهل فيه اكون رئيسك قولها لي.. ما كان عزام الوحيد اللي تفاجأ من الكلام عساف بعد تفاجأ ..تبادلوا النظرات ولفوا يناظرون رئيسهم عيونة على المكتب.. و كأنه اليأس متملك كل خلية فيه.. ما كان كذا..!! قبل كم ساعة بس ما كان كذا..!! ويش اللي قلب حالة بساعات..؟!! عساف اعتدل بجلستة و يدة على طرف الكرسي الجلد يضغط بقوة عليه ما راح يسمح له ييأس.. اذا هو تحطم بيأثر عليهم.. بيقدرون عليهم العصابة بكل سهولة.. : انت رئسينا و لو ما تستاهل تكون رئيسنا ما انحطيت بذا المكان .. و لا مسكت قضية كبيرة مثل هاذي.. هم قدروا يستغلون راشد.. هذا ما يعني ان كل شيء انتهى.. و احنا طحنا.. غازي بعدم مبالاة يهز كتفة و هو متنسد بذراعة على المكتب : شكلك نسيت ان احنا ستارة و جابر هو اللي ماسك القضية..(الخيبة اعتلت صوتة) خله يمكن هو يقبض عليهم و نفتك منهم.. عزام وقف بحدة : ليــش..!! ليش تبي تنسحب الحين..؟!!! ما تعودنا منك الضعف.. الحين انت بتأثر علينا كلنا.. كلنا.. مو احنا عيالك..؟! مو هذا اللي قلتة..؟! و الأب ما يخذل عيالة.. ما راح نسمح لك تنسحب.. الحين بنناديهم كلهم.. و بنتناقش بالموضوع.. ما راح نترك الموضوع بنصة.. يا نموت فيه.. يا نعيش منهينة.. عزام ادى التحية العسكرية و طلع.. عساف ناظر الفريق غازي : ما احد ينسحب من مهمة له الا ان ناوي يترك المجال كله.. انت ناوي تستقيل..؟! ما رد الفريق غازي.. هو مجروح.. مطعون من بنتة.. صحيح ما فكر بالاستقالة للحين لكنها ماهي بعيدة عليه ابداً.. حس انه انكسر..!! انكسر و لا هو حمل يتحمل اكثر.. بنتة و واحد من رجالة بيوم واحد.. ما حتى كمل على موضوع لينا 24 ساعة حتى ينصدم بـ راشد.. وقف سحب جوالة و مفاتيح سيارتة : انا رايح المزرعة.. طلع و ترك عساف اللي طلع وراه و شاف عزام يناظر غازي طالع.. عزام نزل الجوال من اذنة وهو يناظر عساف : ايش فيه.؟! عساف : سألتة بتستقيل و ما رد علي.. .. جالسات فوق.. حفيدات مساعد و بناتة.. جود مشتطة من الحزة اللي سمعوا فيها كلام عماد : اما يتزوج عليها.. راح اذبحة صدقوني.. انا بذبحة.. و استأثم فيه.. نهى : ما يقدر يسويها.. ما تزوجها من الشارع.. لها اهل يوكلونة التراب.. سها : اصبروا يمكن احنا فاهمين غلط.. حتى هي طردتنا و سكرت باب الجناح كله مو بس غرفتهم.. جود : الى متى نصبر لين يتزوج عليها..(مسكت اذنها اليمين) سمع اذوني قايل باسبوعين بيخطب.. عبير : مين بيزوجة بـ أسبوعين..؟! التحاليل لحالها تأخذ اسبوع.. جود : لا يا حبيبتي .. ابوه رجال واصل للمريخ.. يطلعها بساعة لا بغى.. هم الرجال حميـــر.. ما يقدرون.. البارح بس مجهضة .. يجيها اليوم يزف لها خبر زواجة يا عله بالماحي.. أسيل تربعت : يبي له تأديبة محترمة.. بس فيه شيء محيرني.. هي اساساً مو تزوجتة بدون رضاها..؟! ليش للحين متمسكة فيه على انه مشاري عرض عليها يرفع عليه قضية طلاق او خلع.. ندى بـ هدوء عكس خواتها و أسيل و عبير : لأنه زوجها و صارت مسؤولة منه.. تتوقعون شيء سهل الوحدة تكون مطلقة..؟!!! ماهو شيء هيــن وحدة ينقال عنها مطلقة.. ما احد بيرحمها.. عبير : لها رب يرحمها.. ما نبي رحمتهم.. ويش ذا الرجال ما يملى عينهم مرة وحدة لازم يصفرون العداد.. سهاد : بديتن تقطن خيط و خيط..أولاً هذا بالشرع.. الرجال من حقة يتزوج وحدة و ثنتين و ثلاث و اربع.. عبير بحدة : بس لازم يعدل مو من هنا و الطريق.. سهاد : و هو ما تزوج للحين عشان تعرفين هو عادل و الا .. ثانياً مو كل الرجال لازم يتزوجون اربعة.. بدليل عيلتنا.. جدي متزوج ثنتين.. و عمي ابراهيم متزوج اربعة.. و ابوي و عمي سعد كل واحد متزوج وحدة.. نهى اتسعت عيونها : يعني انتِ تشوفين عادي يتزوج على وعد..؟!! سهاد : طبعاً لا.. ماهو عادي.. متى صار لها معاه عشان يطق على راسها مره.. بدري على الحكم حيـــل.. اكيد ما يرضيني انه يتزوج عليها.. بس انا تعليقي عشانكم تتكلمون عن الرجال كلهم.. خلوا كلامكم بـ عماد ما يحتاج تغتابون جنس الرجال كلهم و تسبونة و كأن ما فيه رجال صالح بالدنيا ما يصير كذا.. أثير : و شيء طبيعي بين أي اثنين تو تزوجوا يكون بينهم مشاكل لفترة ماهي قصيرة.. لكن انه يتزوج عليها بخلال هالفترة هذا الشيء اللي غريب.. : السلام عليكم.. : وعليكم السلام.. ام ناصر : وعد بغرفتها..؟! نهى كانت بترد بس آشرت لها ندى تنطم لأنها تدري ممكن تقل أدبها : ايه يا خالة.. ام ناصر بقلة حيلة : اكيد سمعتن ويش قال عماد.. ما كلمتوها و عرفتوا ويش بينهم..؟! ندى : لا و الله يا خالة طردتنا و سكرت باب الجناح.. مريم تكلم ام ناصر : كلمي عامر.. ما احد يهجد ولدك الا ابوه.. عهود وراهم متكية بظهرها على الدربزان : على اساس يا عمة ما تعرفين عماد.. لا طق الشيء براسة سواه وهو ما يشوف الدرب.. عشان يمشي كلامة.. انهار : بس مو لدرجة يتزوج عليها.. اوكِ اختلفوا ينتظر لين يطخ اللي براسة و بعدين يناقشها.. مو كذا على طول يأدبها بمرة.. جود تناظر انهار و عيونها بتطلع من محاجرها من القهر عليها : لا و الله.. يأدبها بـ مره.. يعني الحين اختي هي اللي غلطانة.. و كأنك جالسة معاهم يوم تهاوشوا.. سها كملت على مع اختها : لو سمحتي يا ليت تحترمين نفسك.. ما نبي نتهاوش معاك.. تحطين وعد المذنبة من غير لا تعرفين شيء.. نهى وقفت قدام انهار : مضايقك انه بيتزوج عليها..؟!!! و الا مضايقك انك ما تكونين مخلصة عدتك..؟!! مريم بحدة : نهـــــــــى.. نهى تناظر امها : لا تصارخين علي انتِ مالك كلمة علي.. صوت الكف هو اللي سكت الكل.. تعلقت عيونهم بـ نهى و مريم اللي اعطت بنتها كف.. مريم بـحدة : قليتي ادبك حيـــل و لا تحترمين احــــد.. دامني هنا غصباً عنك تحترميني.. كل ما سمحت لك الفرصة رفعتي صوتك و قلتي كلام زي السم.. و لا تراعين احد.. نسيتي اني امك ولي حق عليك.. نهى ما كانت تناظر احد فيهم.. حتى امها.. وهي تسمعها تكلمها.. مريم صرخت على نهى : ليـــش ابوك ما رباك..!؟ ما علمك شلون تحترمين اللي اكبر منك..؟! ردت نهى ببرود مو غريب عليها هي اللي اكثر ما يميزها هي برودها : ما يخصك ابوي ويش علمني.. و ما اسمح لك لا انتِ و لا غيرك تتكلمين على تربيتي.. (أشرت على أمها) انتِ اخر وحدة بالدنيا انا ممكن اتقبل منها شيء.. انت ما اعطيتيني شيء عشان تطلبيني.. رميتيني بزر عمرها سنتين.. جاية يوم صار عمري 25 تبين مني اسمع كلامك..!؟! مو لازم تعلميني من قبل شلون اسمع لك..!؟ لا تقولين ابوك ما سوا و ابوك ما علمك.. لأنه علمني.. و علمني و علمني.. و قالي يا نهى.. اللي بتعطينة تأكدي انه بيعطيك.. لأنه بوقت عازتك لا طلبتية صد عنك و الدنيا اخذ و عطا.. و اللي ما يحترمك لا تحترمينة لأنه بيركب فوق راسك و لا بيقدرك.. و انتِ ما عطيتيني عشان اعطيك.. بوقت عازتي لك صديتي عني.. و لا احترمتي امومتك لي عشان احترمك.. انا ما اعتبرك بحياتي أم لها حق علي.. لا تحاولين الحين تمنعيني عن أي شيء.. لو تشوفيني ارمي نفسي بالنار انتِ مالك دخل.. مشت نهى عنهم.. انهار ناظرت خالتها بعد ما دخلت نهى لأجناح عماد عند وعد : ليش سويتي كذا..؟! يعني مو من طيب العلاقة بينكم و خربتيها زيادة عشاني..!! مريم بحدة ردت عليها كلام نهى يطعنها في صميم روحها : زودتها و ما عاد اني طايقة منها و من اختها شيء زيادة.. كل مره يطولن ألسنتهن علي و لا يحترمني.. هن محني من حياتهن.. و لا اعني لهن شيء.. وقفت أسيل : عن اذنكم.. أثير : على وين..؟! أسيل : طالعة اتمشى.. أثير انصدمت : هالحزة..؟!! أسيل : ايه.. سحبت طرحتها بما انها من قبل لابسة العباية لأنها مصرة تقابل نايف.. عبير تناظر أثير : ترى اختك خبلة...!! أسيل : من زمان مو من تو.. ام ناصر : خلاص مريم اذا ما عرفن خطاهن اليوم بكره بيعرفنة انتِ الحين ارتاحي.. و انا بكره بكلم ابو عبدالله و هو يتصرف معاهم.. عهود تكلم انهار : كان لازمها هالكف من زمان.. انهار : صح تنرفز.. بس ترى خالتي غلطانة اللي ضربتها.. مو من زين العلاقة بينهم و خربتها زيادة الحين.. كلامها ما يقدم و لا يأخر ما أثر فيني عادي.. عهود تنرفزت : الا تبط الكبد.. بس ايش معنى قالت لك هالحكي..؟! تهقين انها تدري عن علاقتك بعماد..؟! انهار : علاقتي بعماد انتهت باليوم اللي رضيت اتزوج فيه غيرة لذلك سكري ع الموضوع.. .. في غرفة بنات غازي.. امال : ابوك قال يبي يشوفها.. وهي منخمدة.. شوق : قولي له اكلت بنادول.. و نايمة ما راح تصحى الحين.. امال : و الله لا يدخل و يصحيها بالغصب.. و يحط حرة لينا فيها.. شوق مسكت ذراع امها ترجاها : يمه تكفين قولي لـ جدتي تكلمة.. ريما مالها ذنب.. امال ناظرت جوالها يضيء باسم غازي : هذا هو جاء.. اذا شفتي الوضع زفت و ممكن يذبحها.. علمي عمك عامر.. شوق انصدمت : من جدك يمه بتتركينها..؟! امال : ماني تاركتهم.. بس بكون لابسة عبايتي احتياط.. ابوك ما راح يهدأ.. لين يلقى مين يحط حرتة فيه.. شوق : و ريما هي اللي بتأكلها..؟!! امال ردت على الجوال بهدوء رغم ان هي بعد مصدومة من لينا.. لكن اكيد ما ترضى ان اللوم كله يجي على ريما حتى لو كانت توأمها مالها ذنب تتعاقب بخطأ اختها..! : الو.. و الله نايمة يا غازي اكلت بنادول نايت و ماهي راضية تصحى.. (غمضت عيونها و اخذت نفس) طيب الحين بتجيك شوق و تدخلك.. سكرت من الجوال حتى تناظر شوق : روحي دخلية.. شوق وقفت : يالله.. لينا ليش سوت كذا..!؟ امال : رووحي.. ابوك بيحط اول الحرة فيك عشانك تأخرتي.. طلعت شوق.. و امال لبست عبايتها.. تعرف زوجها.. اكيد بيحقق مع ريما وكأنها مجرمة.. مثل ما سوا من سنتين.. بس تيك المره ريما كانت تدري و مخبية.. الله يستر لا تكون هالمرة مخبية بعد.. بتروح روحها بين يدين ابوها.. لحظات حتى يدخل غازي و وراه شوق.. نظارتة ما نزلها عن عيونة.. جاي من المركز لـ هنا على طول و لا شاف احد فيهم.. طاحت عيونة على ريما نايمة.. : اطلعوا.. امال : غازي تكفى.. غازي بحزم : امال اطلعي.. امال تترجاة : تكفى و الله مالها ذنب كانت نايمة.. هي ويش دراها..؟!! غازي بصوت احتد اكثر من قبل : امال اطلعي ما ابي اعيد و ازيد بالحكي.. شوق على شفا حفرة من الصياح.. ريما ماهي حاسة بـ شيء.. و ابوها معصب.. ما راح يرحمها حتى لو هي مالها ذنب.. : بابا.. غازي صرخ فيها : شــــــــــوق.. صرختة خلتها تطلع من غير لا تترجاة يعتق ريما و هي ما تشوف الدرب.. طلعت امال وراها.. وغازي رفس الباب برجلة و قفلة من غير لا يدير ظهرة عن ريما.. اتجه لها و شال اللحاف عنها.. شالها.. و اتجة للحمام.. نزلها في البانيو وهو يناظرها.. ما زالت نايمة.. هي الوحيدة اللي ممكن تدري عن اللي انحاشت معاه لينا.. هي الوحيدة اللي ممكن تعرف اشياء عن لينا هو ما يعرفها.. لأن لو امها او شوق عرفوا من قبل بيعلمونة لكن ما يستبعد على ريما تخبي عنه.. حتى لو موضوع مثل هذا.. من سنتين.. كانت تدري عن لينا لما انحاشت مع سامي.. و كانت مخططة تغيب يومها عشان ما يقولها كنتِ تدرين.. و اليوم بالعة بنادول نايت.. عشان ما ينشدها عن لينا.. لكن هالمرة ما راح يرحمها.. مد يده للمويا حتى يفتحة على راسها.. فزت من نومها تصارخ .. تستوعب ويش يصير.. تلفتت بسرعة تحاول تفهم رفعت عيونها.. شافت الدش مفتوح و ابوها واقف.. تفكيرها البريء قادها لأنها طولت بالنوم.. و حاول يصحيها وما صحت.. اعتدلت واقفة بتعب مدت يدها و سكرت المويا .. مسحت وجهها بيدها و انقهرت منه : كان ممكن تصحيني بطريقة افضل من هاذي.. طلع حتى تسحب منشفة و تطلع وراه.. جلس على السرير من غير لا ينطق.. اتجهت هي للدولاب و سحبت لها بيجامة و رجعت الحمام تغير.. طلعت بعد دقايق لافة شعرها بمنشفة.. كانت مقهورة من الطريقة اللي صحاها فيها.. و قهرها من سالفة زواجة للحين ما راحت.. ناظرت فيه : ليش صحيتني..؟! نزل نظارتة و رماها على الكومدينة.. لف لها عشان تلتقي نظرتة القاتلة بنظرتها.. دب الخوف بعروقها بلحظة.. بلعت ريقها و ما زادت كلمة وحدة من نظرتة .. نظرتة كفيلة بانها تنحرها و ترميها قتيلة.. غازي بهدوء : مين هو..؟! عقدت حواجبها بحدة ..!! مين هو..؟! ويش يقصد..؟! يمكن يقصد مين يبي يزوجني..؟!!.. ما راح ارد.. دامه هو بيقرر خليه يقرر كل شيء.. يعني بيأخذ رأيي اصلاً انا ما ابي اتزوج الحين..!!! صدت بوجهها و ترمش بعيونها.. غازي : لا تقولين لي ما تعرفين.. و من غير لا لف و لا دوران.. لأني ما راح ارحمك.. و الله لأحط حرتي كلها فيك انتِ.. فا احسن لك قولي لي من هو..؟! ما راح يرحمني..!!! شكلي ما بعد صحصحت ما اثبت بابا ويش يقول..!. ويش اللي ما يرحمني انا ما سويت شيء غلط اصلاً.. ولو بيعاقبني على الكلام اللي قلتة ما كان ترك المجلس وطلع من وقتها.. ما أجلها للحين..!؟ و بعدين مين هذا اللي يتكلم عنه..!؟!.. وقف غازي وهو لاف يدة وراء ظهرة ما يبي يضربها ما راح تحمل كم كف منه.. ماسك نفسة بالقوة.. : صدقيني بالي ماهو طويل.. و لا يسمح لك توقفين قدامي مثل الصنم.. ولا اعيد عليك السؤال كم مره.. و لا تكذبين علي بـ شيء.. ريما بلعت ريقها نظرتة ابعد من تكون عن الأبوة.. نظرتة رعب : ما ما اعرف عن ايش تتكلم..!؟!!! فهمني طيب.. غازي : تراني نبهتك ما تكذبين علي.. لا تستغبين علي.. ريما شابكة يدينها بتوتر من ابوها : و الله ما ادري عن ايش تتكلم..؟!!! غازي : طيب.. اسم الشخص اللي راحت معاه لينا..؟! و قولي ما تدرين عن ايش اتكلم عشان ما اضمن لك ردة فعلي.. ريما تراجعت خطوة وراء مصدومة.. الشخص اللي راحت معاه لينا..؟!! هذا يذكرها باللي صار من سنتين.. بس الطريقة كانت الطف بكثيـــر من الحين.. حست نفسها مجرمة وقبضوا عليها بالجرم المشهود..!! بس بدون ذنب.. اذا كانت من سنتين حاولت تثني لينا على اللي بتسوية وما قدرت.. و غابت عن المدرسة.. هالمرة فعلاً هي ما تدري احتارت ويش تقولة.. ماهي فاهمة شيء.. لينا راحت..؟!!! استجمعت شجاعتها : والله مـا اعـــر... قطع كلمتها كف على وجهها.. الم عمرها ما حست فيه.. طاحت منشفتها من شعرها على الأرض.. شد شعرها من وراء و قربها منه نطق وهو يصير على أسنانة : قايل لك لا تكذبين علي.. ريما نزلت دموعها وهي تمسك يده بمحاولة تخفف مسكتة لشعرها : و الله ما اعرف انا مو فاهمة شيء.. غازي : و الله ما احد غيرك بيأكلها.. وينهـــــــــــــا..؟!!؟! ريما : و الله ما ادري.. ما ادري.. انا كنت نايمة ما اعرف شيء.. غازي يهز راسها عشان و يشد من مسكتة لها : لا تغطين عليها مثل ما سويتي من قبل..(صرخ فيها) و الله لا اذبحك.. احسن لك تكلمي.. ريما : بابا و الله ما ادري.. انا كنت نايمة ما اعرف شيء و الله.. غازي لف راسها و عيونها الباكية التقت بعيونة الحمراء الدم بعيونة من قهرة..! ويش هو اشد من قهر الرجال..!!! : بتفهميني انها صدفة.. بلعتي بنادول نايت عشان تقولين لي ما دريت..؟!! لا تخليني استاثم فيك.. لا تخليني اذبحك بيدي..!! دموعها على خدها تحاول تخلية يصدقها لكنه مصر على انها تعرف : و الله ما شفتها على يوم كنت بالمجلس.. انا طلعت على طول و نمت.. نفض يده من شعرها حتي تطيح.. سحب حزامة العسكري.. اتسعت عيونها وهي تشوفة ماسكة بيده و ثانية.. رجعت وراء زحف : بابا لا الله يخليك و الله ما ..... قطع كلامها بجلدة على جنبها.. صرخت من شدة الألم.. لكنه ما رحمها.. مقهور.. وما فيه احد ممكن يحس بقهرة.. هذا شرفة.. هذا عرضة.. يدوسنة بنات مراهقات..!!! يدوسونة عشان ناس ما يسوون..؟!! ماقصرن عليهن بشيء حتى يجازنة بـ هالشكل..؟!! بنى نفسة و اسمة و عيلتة و هن يهدمن كل شقاة بضحكة.. يبيعنة بتراب.. عشان شخص ما يسوى مواطي رجولة.. اعطاها الضربة الثانية و هي تترجاة يصدقها.. يضرب فيها و هي تصارخ تترجاه رافعة يديها على وجهها تغطية : بابا... لاااا.... مــــــــامـــــــــا... و الله ما... اعرف شيء.. لا ... بـــابـــا.. برا الكل اجتمع على صوت الصراخ مصدومين.. الكل عدا الحريم و نهى و وعد وميار.. امال : عمتي تكفين تصرفي.. و الله بيذبحها.. ام عامر تضرب الباب بعصاتها : غازي.. يا مال الصلاح افتح الباب.. البنية مالها ذنب.. ليش تعاقبها بأخيتها.. حرام عليك تعوذ من ابليس ادحر الشيطان.. امال تحاول تضبط دموعها عشان ما تبكي ناظرت شوق : دقي على عمك.. شوق هي اللي كانت تبكي.. ابوها غير اليوم.. غير.. حتى نبرة صوتة فيها من الوجع ما يذبح.. اتصلت على عمها و هي ترجف من صراخ ريما.. اختفوا الحريم كلهم عدا محارم عامر.. لحظات حتى يدخل عامر مفزوع : خير ويش فيكم..؟! شوق كلمتني تبكي..!؟ ام عامر وهي ما زالت واقفة عند الباب بـ فزع : تسمع لأخيك بيذبح بنيتة.. عامر سمع صراخ ريما و ترجيها لأبوها.. قرب من الباب حتى يدقة بقوة : غــــازي.. غـــــازي.. امال : تكفى يا ابو عبدالله و الله يذبحها وهي مالها ذنب.. ابتعد عامر خطوة عن الباب حتى يرفسة برجلة.. المره الأولى وما انفتح الباب مجرد صوتها دوى بالمكان.. رفس الباب مره ثانية.. و انفتح بقوة حتى يرتد عليهم بعد ما ضرب بالجدار فتح الباب بيدة و هو يشوف غازي يضرب ريما ابعد ما يكون عن اب وبنتة.. لو هي مجرمة ما عاقبها بهالشكل.. اسرع له حتى يبعدة عنها و يصرخ فيه : انهبلت انت..؟! البنية بتموت بين يديك..؟!! باقي في راسك عقل..؟! ام عامر : الشيطان لعب براسك و يبيك تغضب ربك.. تعوذ من ابليس تعوذ من ابليس.. غازي تنفسة السريع من غضبة و قهرة : ما راح اتركها لين تقول لي مع مين راحت.. امال : غازي تكفى.. قاطعها غازي بحدة : ما ابغى اسمع شيء منك.. لو انك قريبة منهن ما سون كل ذا من ورانا.. سكتت امال.. غازي ما عاد يثبت.. الغضب مسيطر عليه.. و غضبة انكب على ريما ظلم.. ابتعدت تزحف لزاوية و هي تشوف يدها اشبة بالدم متحجر في اماكن الضرب.. على عضدها كيف جنبها و ظهرها.. ما راح يكون اخف.. ام عامر : اتق ربك فيها.. البنية نايمة وشولة تنقزها من نومها.. غازي : يمــــه تكفين.. بربيهن من جديد.. و الله لأخليهن يرجفن لا سمعن اسمي.. مسكه عامر و يدفة مقهور منه : اطلع برا.. و رب الكعبة ان لمستها لا انت اخوي و لا اعرفك.. غازي بصدمة : تبرأ مني عشانهن..؟!!؟ تراهن بناتي.. و وطن راسي بالتراااب.. و الله لأربيهن من جد و جديد.. عامر صرخ فيه : مالها ذنب تعاقبها باختها.. روح عاقب ذيك لين تقول بس ما منعتك.. لكن ريما ما سوت شيء.. روح جيبها من اللي ذلفت معاه من تحت الأرض و اذبحها ما احد قايل لك لا.. غازي : الا سوت.. الا اكيـــد تعرف عن اختها وما علمتني.. خلتها لين تذلف تغطي عليها.. برا ما احد من بنات عامر او انهار او شوق تجرأ يدخل الغرفة.. شوق ترجف رعب و خوف.. خايفة يجيها الدور.. نقزت جري لـ فوق ما راح تتحمل الضرب.. و لا قسوة ابوها اليوم.. انهار بلعت ريقها : متأكدين ان خالي غازي يضرب ريما..؟! ليش ويش اللي سوتة..؟! عهود : انا بطلع فوق ماني عايفة عمري .. و الله لا يذبحنا كلنا.. اسمعوا صراخة على ابوي.. حتى جدتي فيه و يصارخ.. ام عامر : حرام عليك.. هاذي بنيتك قطعة منك.. ويش سويت فيها...!؟!! ما كانت قادرة تسوي أي شيء او تقاوم ضرب ابوها.. ترجتة بمختلف العبارات.. لكنها ما حركت فيه ساكن.. ضعف صوتها و انبح من صراخها و هو ما تعب من ضربها.. شهقاتها المتتالية هي اللي تدلل ان فيه انسانة في الزواية يتكلمون عنها.. ام عامر قربت منها مدت يدها لـ ريما : تعالي يمه .. ريما تعلقت برجل جدتها وهي تصيح و صوتها مبحوح ضعيف : والله.. ما سويت شيء.. و الله ما اعرف.. ما ادري.. طلع غازي من غير لا يفكر ان كان فيه احد برا محرم له او لا.. الشيطان تملك كل اعصابة.. و اعمى عنه بصيرتة.. خلاه يظلم بنتة.. و يعاقبها بذنب غيرها بدون وجه حق.. حتى لو كان شاك ان ريما تعرف عن لينا.. ما يحق له يعاقبها قبل ما يتأكد.. و لو تأكد ما تستاهل كل هالضرب.. لو نحرها بسكين اهون من تعذيبة لها.. لف عامر عليها وهي متمسكة بأمة.. تشاهق ومع كل شهقة انين.. انين يقتل.. لو غازي انصت لأنينها كان عرف انه ظلمها.. شهقاتها المتتالية و كأن تنفسها بينقطع متمسكة بجدتها.. تبي احد يحميها مو من اب.. من وحش..!! هذا مو ابوها.. مو غازي بن محمد بن حمدان اللي تعرف.. هذا مو الشخص اللي رباها.. هذا مو اللي يحميها من ظلها.. هذا مو غازي اللي تنطق اسمة بعد اسمها.. هذا شخص ثاني هي ما تعرفة.. ام عامر جلست بصعوبة على الأرض جنبها : بسم الله عليك.. امال اقتربت من بنتها : ريما.. ما زالت تشاهق و تصيح : بيــ ــذ بحـــ ـــني.. ما.. سو.. يت.. شـــيء.. و الله.. ظـــلــ مـــني.. عامر واقف : اهدي يا عمي بس ابوك شوي معصب من اختك.. بس يروق بيرجع يراضيك.. فزعت و هي تمد يدها قدامها تبي تحمي نفسها من القادم : لا ..لا .. و الله .. بيذبحني.. انا .. ما سويت شي.. ماما .. ماما .. حضنتها امال بقوة و ريما وجع جسدي و روحي ينهش كل جسدها المنهك ..تعلقت بأمها بضعف شديد ابعد عن بنت عمرها 17 سنة.. امال شدت عليها : اهدي.. خلاص عمك هنا.. ما راح يصير شيء.. ريما تبكي بـ شدة : و الله ما اعرف شيء.. و الله ما اعرف شيء.. بيذبحني.. ما اعرف شيء.. هنادي واقفة على الباب همست : يبه.. بيصير لها شيء.. ما يصير كذا..!! عامر ناظر هنادي : ويش تبينا نسوي..؟! هنادي : حاول تهديها.. يمكن تحس انها بامان معاك.. اذا ما قدرت.. نعطيها منوم.. لأن اعصابها مشدودة الحين ولازم تسترخي.. عامر : اجل اعطيها منوم.. هنادي : طيب كلمها انت اول.. عامر بحزم : بروح اشوف عمك الخبل.. و انتِ اعطيها منوم.. ام عامر : قولي لا اله الا الله.. اذكري الله يا بنتي.. ابوك يبيـــ قطعت كلمتها من صرخة ريما.. صرخة مجروحة تكذب اللي تقولة جدتها.. يبيها..!. و اللي سواه ويش يعتبر..!؟! ما حتى فهمت شيء.. ترجتة بخاطرها عنده.. و خاطر امه و اخوة.. و عيال اخوة.. قالت له كلام كثير تستعطفة فيه لكنه ما عطف عليها.. و العكس سواه ضرب فيها و علم على جسمها.. و هي للحين ما اتضحت الصورة و لا عرفت ذا العقاب كله ليش..؟!!.. انينها المختلط بشهقات يطعن قلوبهم.. و اللي يطعن اكثر انها مظلومة..!!! ريما : ظــلمــ ــنــ ــي.. و الله.. ما.. أعـــ ـــرف.. بــ يــذ ـبــحــ ـــني.. امال نزلت دمعتها من حالة بنتها : بس خلاص يا امي.. راح و الله راح.. عمك عامر ما راح يخليه يجي.. هنادي : عمة امال.. اذا ظلت على الحالة هاذي بيصير فيها شي.. اعصابها مشدودة.. و الخوف مسيطر عليها.. ام عامر : ويش نسوي..؟!! هاه.. هذا هي ماهي راضية تركد.. حسبي الله على اللي كان السبب.. حسبي الله.. هنادي : نعطيها منوم.. لازم تنام عشان اعصابها تسترخي.. (قربت هنادي منهم جلست على ركبها مدت يدها حتى تلامس مكان النبض على رقبة ريما.. بالرغم من ان ريما صرخت لكن هنادي ما بعدت يدها ريما تشد على امها ما في بالها الا الوحش اللي ضربها جاي يذبحها.. ما تبي تشوف شكلة و عيونة ما تبي تشوف شيء منه).. هنادي : يمه نبضها سريع.. راح يصير فيها شي لو ما استرخت.. خطر عليها نبضها يبقى بهالحالة.. امال : طيب اعطيها.. أي شيء خليها تنام.. هنادي : المشكلة انا ما جبت معاي شنطتي.. برسل واحد من اخواني الصيدلية.. (وقفت حتى تطلع برا).. ام عامر حطت يدها على شعر ريما تقرأ عليها وهي بحضن امها تشاهق و تأن.. و ريما تقمز مع كل لمسة من خوفها.. في الصالة فوق.. البنات ساكتات معاهم عهود و انهار.. يفكرون باللي سمعوة.. كل اللي سمعوة صراخ و لا فهموا شيء منه..!! و صراخ يوجع القلب.. عهود بقهر : عمري ما شفت عمي بالحالة هاذي..!!!!! انهار : تكفين عهود اسكتي.. جود : مين كان يضرب.. لينا و الا ريما..؟! انهار من غير لا تناظرها : ريما.. ندى : جود لا تسألين مالك دخل.. عيب اللقافة.. جود وقفت : ماهي لقافة.. العيب صدق اللي سواة ابوها.. ما فيه شيء يستاهل يخلي العالم تسمع صراخها.. عدا انها صديقتي.. بروح اشوفها.. مسكتها ندى : انتِ ما تستحين.. عيب.. و الله عيب.. بتحرجينها بعد .. بنات عمانها هنا ما راحن ايش دخلك تروحين.. جود سحبت عضدها من ندى : اقولك صديقتي.. ندى : حتى لو.. حطي نفسك مكانها.. بيكون لك خاطر تشوفين احد حزتها..؟! جلست جود.. مقهورة و هي صراخ ريما يرن بإذنها.. ما كانت مثبتة هي أي وحدة فيهن اللي تصارخ.. لكن الأكيد الكل سمع صراخها.. و كلهم تجمعوا عليه.. برا كانت الأوضاع متوترة بجانب .. هادية لـ حد ما في جانب اخر.. متوترة عند رجال غازي في غرفة التدريب.. عماد : مستحيل عمي يستقيل..؟! عساف : ما جبت هالشيء من راسي.. سألتة ولا رد علي.. ما شفتة كيف يأس.. سعود : ما اتوقع ان الفريق غازي يعرف لليأس باب.. اصدق أي شيء الا الفريق غازي ييأس.. عزام : يقول احنا ستارة .. جابر هو اللي ماسك كل شيء وهو اللي بيمسكهم و يفكنا منهم.. يعني كل شيء سويناه.. ما احنا مستفيدين من وراه.. نايف : تبوني اصدق.. ان الفريق غازي يبي يستقيل عشان طلع راشد جاسوس.. عساف : ماهو جاسوس..!! كلهم ناظروة.. باستغراب عدا عزام اللي يعرف ويش يقصد عساف... عماد : توك ويش قلت..؟! عساف : قلت تعرض للتعذيب وافقدوة الذاكرة.. لكن فيه رسايل كثير تهديد له عشان يتعاون معاهم.. ما رد عليها.. حتى بعضها ما انفتحت.. بعضها ورقية و بعضها جايتة على الايميل.. عزام : صحيح.. هذا الغريب.. يمكن في البداية كان يتعاون معاهم و بعدين تركهم.. لأن لقينا رسايلة صادرة من بريدة.. لـ بريد ثاني كاتب فيها معلومات عن عماد و عني و الفريق غازي.. لكن المعلومات عادية.. بعدها جاه تهديد انهم يبون يعرفون تفكيرهم مو بس المعلومات هاذي اللي ما تفيدهم بشيء.. و كان مستمر يرسل لهم اشياء لهم مالها فايدة.. عساف : عشان كذا.. انا و عزام متوقعين.. انا راشد او تركي.. كان بمرحلة ضياع.. يحاول يسوي الشيء اللي ما يضرة.. لا يخسر الأمن و لا يخسر العصابة.. و كأنهم شخصين بشخص واحد.. راشد اللي سووه العصابة كان يعرف المعلومات.. لكن تركي اللي بداخلة يمنعة لا يوصل لهم المعلومات.. عزام : و الدليل كل العمليات اللي سويناها ناجحة.. و كان معانا راشد.. او بالأصح تركي بن سيف.. نايف : طيب.. و الحين.. هو مين فيهم..؟! عساف : الدكتور يقول لازم تجيبون اهلة.. يجلسون معاه و يذكرونة.. يسولفون عليه.. يودونة اماكن كان فيها معاهم.. أي شيء.. عماد : انا اعرف اهله.. هم من قرى المدينة.. عزام : ماهم اهلة.. عماد اتسعت عيونة : نعم..!؟! عزام : ماهم اهلة... اللي احنا نعرف,, العصابة متفقة مع واحد .. كان له ولد و توفى اسمة راشد.. و جابوا تركي عشان يحل محل راشد.. عشان كذا احنا ما شكينا بـ شيء.. و قابلنا ابوه و تعشينا عندهم انا و انت.. سعود : يعني ندور على ابوه سيف.. ماهو مسلم...؟! عساف : ايه.. و اعتقد اسهل شيء.. تكلم اختك.. اكيد تعرف وين ساكنين.. و نروح لهم.. نايف : اختك زوجتة..؟! سعود : اذا تركي بن سيف بنفسة ايه.. مملك عليها من فترة طويلة.. نايف حط رجل على رجل : طيب.. ليش ما تأخذها له.. يعني هي شافتة و درت انه هو نفسىة خطيبها.. ليش ما تكون اختك اول وحدة تكلمة.. لأننا ما نضمن اهلة و ردة فعلهم.. سعود : لا.. ميار ما تدخل في ذا الموضوع.. لا من قريب و لا من بعيد.. عساف يحاول يقنع ولد عمة: سعود.. انا مع نايف.. هي اللي شافتة.. انت شفت شكلة لما شافها.. كان واضح كأنه يتذكرها..!! سعود بحزم : لا .. لا تحاولون يكفي وعد صارت بالنص و ضحية بدون قصد.. ما راح اضحي بـ ميار بعد.. .. في جلسة برا.. تجمع حاتم و ابوه فقط.. ابو سعود ابتسم : اجل ليش ما تزوجت..؟! حاتم : و الله ما جاء ببالي.. لأني اعرف ما احد بيزوجني.. الا ان كنت بتزوج من بنات الدار و انا ما ابي منهن.. مو قصوراً فيهن.. بالعكس متربيات ماشاء الله.. لكني ابي سند.. يبه.. من حقي يكون عندي سند.. ما كنت ابي عيالي بدون خوال دامهم بدون عمام.. ابو سعود : و الحين.. ما تبي تتزوج..؟! حاتم : لا يبه والله مالي خاطر فيه.. ما ابي اتزوج.. ابي اعوض كل شيء من حياتي ضاع بنيكم.. ابي اعيش بدور الابن اللي مو متزوج.. ابي احلل كل لحظة.. ابو سعود : يعني يا ابوي بتبرأ منك لا تزوجت..؟! انت بالذات بزوجك و اسكنك عندي.. يكفي عشت بعيد عني 28 سنة.. ولا حسيت فيها.. احيان الوم نفسي اللي ما سمعت كلام امك.. حاتم : ماله داعي تلوم نفسك.. انا لو مكانك بصدق.. انت اعطوك جثة.. اكيد ما بيخطر على بالك انه ماهو ولدك.. ابو سعود : انت كنت تعرف اسم امك..؟! ليش ما حاولت تسأل عنها..؟! حاتم : رحمة من ربي.. لأني لو شفتها و عرفت انها عايشة و متزوجة و عندها عيال كان ممكن ارتكب فيها جريمة.. يبه كنت مقهور.. مقهور و كل ما يطري علي اسمها انقهر.. كل ليلة اناديها حتى و انا كبير.. كانت تجيني من الهواجس الكثير.. كنت ابي اجابات لأسئلتي.. من هو ابوي..!؟ ليش تركتني..!؟ ليش غلطت اصلاً.. ليش ما تحملت نتيجة غلطها.. يبه اسئلة كثير كلها طلعت غلط.. ما ذكرت بيوم تمنيت اشوفها عشان ابوس راسها.. كل ما تمنيت اشوفها عشان اقتلها.. وراء ذلك ما سعيت وراء اسمها.. رحمة من ربي.. لأنها كانت مظلومة بافكاري.. ابو سعود : الحمدلله على كل حال.. رحمة من ربي.. امر المؤمن كله خير.. شلون عشت..؟! مين رباك..؟! حاتم : لحد الثانوي و انا كنت بالدار.. بعدها طلعت منه.. كنت ادرس بالجامعة و اخترت الطب.. و اشتغلت.. اشتغلت اشياء بسيطة عشان ادفع اجار الشقة اللي تقاطينا فيها انا و اخوياي.. وهي كلها غرفتين و صالة و مطبخ.. سبع سنين ما ذقت فيها طعم الراحية لا نفسية و لا جسدية.. و انا بعد ما كنت اراعي نفسي.. و لا أوي لعمري.. كنت ابي اسوي نفسي شيء.. ابي لي اسم الناس تحترمة.. (من غير لا يناظر ابوه لكن جرحة بصوتة واضح للي يسمعة) يبه الناس ما رحمتني صغير و لا احترمتني كبير.. يعني ويش هو ذنبي بكل اللي صار لي عشان كل ما شافوني حكوا فيني..؟! ويش ذنب كل شاب و بنت اهلهم توفوا ومالهم احد و تربوا بدار رعاية..؟! ويش ذنب أي شاب و بنت كانوا نتيجة لغلطة بين شخصين..!؟ يعني هو اللي اختار اهله يومهم يأشرون عليه ولد حرام و الا لقيط.. الله قادر يقلب حالهم و يصيرون اردى منا.. و اهلهم يموتون.. ليش اهلهم يعلمونهم الشيء الغلط.. ليش اهاليهم يحذرونهم ما يمشون معانا..؟! (ناظر ابوه يحكي له بعض من حياتة ابوه ما شاركة فيها) يوم كنت بالمتوسط و عرفت ويش معنى الحكي اللي يقولونة تهاوشت مع ناس كثير.. أي احد يأشر علي اتهاوش معاه.. حتى لو ما ادري ويش قال عني.. و اخوياي نفسي.. حتى اننا تنومنا بالتوقيف كم ليلة.. بعدها صرنا نكفخ بس مو لدرجة اننا نتنوم بالتوقيف.. لحد ثاني ثانوي.. بعدها وقفت عن المضارب.. (احتد صوتة) و قررت اني ادرس و ادخل اصعب تخصص في العالم.. اللي الناس كلها تحتاجها.. حتى لو هي سخونة و الا اصعب شيء الجراحة.. و اخذت الطب سبع سنوات.. و من غير لا افكر بالراحة قدمت ماجستير عظام.. ابو سعود حط يدة على كتف ولدة : ابيك تأخذ اجازة.. فترة.. حاتم : هذا انا ماخذ اجازة.. ابو سعود : لا هاذي ما اسمها اجازة.. ابيك باجازة اجازة.. لا رجع كل شيء طبيعي.. ابيك تروح معاي الشغل.. تروح لـ سعود الشغل تسير عليه.. و على ياسر بمـحلة.. و احمد يعني هاه اذا ودك بما انه بمستشفى مثلك.. ابيك تعيش معانا كلنا و تعرف كل شيء.. ما ابيك تحس انك مو منا.. و لا ابي هالشيء يراودك ببالك.. حاتم ابتسم : يبه و الله اني حاس اني منكم.. شفت خوفكم علي.. شفت حتى معاملة اخواني اللي ما يحسسوني اني ما اعرف عنهم شيء.. و لا هم يتحفظون قدامي من أي سالفة.. كل شيء يطرونة قدامي لأني اخوهم.. (زادت ابتسامتة تعبر عن راحة ما شعر فيها بأي وقت سابق) و امي.. امي اللي ما تخلص كل ساعة الا تتصل علي.. يمكن تتأكد اني ما ابعدت.. ما تدري اني متمسك فيكم اكثر من تمسكم فيني.. ابو سعود : لا تحاول احنا متمسكين فيك اكثر.. و... قطع كلامة بجلسة وليد الي قطع الجلسة بين ابوه و حاتم.. لف ابو سعود عليه.. وليد : السلام عليكم.. ادري جلسة خاصة بس انا ابي اكلمك.. ابو سعود : وعليكم السلام.. حاتم : اجل انا استأذن.. وليد بدفاشة : انطق ما قلت لك قوم.. حاتم اتسعت عيونة.. ابو سعود : نعـــم...! تراه اكبر منك.. وليد : و الله ادري.. بس ما فحالي احترم احد.. ابو سعود : لا شكلك ضيعت عقلك.. ويش رايك تنزل جزمتك و تهفني فيها بعد..؟! وليد : حاشاك يالغالي.. كل ذا عشان قلنا للحبيب انطق.. ابو سعود بحزم : كل ذا عشانك تقول ما تبي تحترم احد.. وليد : اوكِ حقكم على راسي.. (وقف وباس راس ابوه و حاتم و رجع مكانة) عسى سعادتكم راضين بس..؟! حاتم ابتسم : ما زعلنا اصلاً بس لا عاد تعيدها.. ترى اكسر لك كتفك الثاني.. وليد : جرب تقرب مني.. تراك ما تعرفني.. حاتم : مو شرط اعرفك.. تراني دكتور عظام.. وليد : ايه صح نسيت.. دامك دكتور.. ليش يوجعني..؟! حاتم : طبيعي يوجعك.. فترة و تخف.. وليد يتحلطم : اجل ويش فايدة هالجبس..؟! و رابطين يدي برقبتي..؟! حاتم : عشان يجبر العظم بالمكان الصحيح.. و يخف الألم عنك.. بس اصبر انت.. ليش آلمها الحين زي آلمها اول ما انكسرت..؟! وليد : لا.. بس شيء لا يطاق.. ابي انام.. ما عندك حبوب تنوم..؟! ابو سعود : شكلك تعبان صدق.. ويش اللي جابك هذا انت اكلت كسر من غازي..!؟ وليد ببساطة : عشانك.. اما غازي هذا حالة ثانية.. بأخذ حقي منه قبل لا اروح.. حاتم : غريبة علاقتك معاه..؟! وليد : معاقبني.. ما ادري اذا كنت تدري ان اختي انحبست بهالمزرعة فترة و انا جيتها.. و من جيتي تعاقبت خمس شهور.. حاتم : ايه حكوا لي ياسر و خالد القصة كلها.. غريبة صراحة.. احسها حرام صارت الضحية.. وليد : يبه ما تحمدت لها بالسلامة..؟! ابو سعود : و هذا اللي جاي تكلمني فيه..؟! وليد : يعني تقدر تقول كذا.. ابو سعود : ليش هي قايلة لك شيء..؟! وليد : لا.. ما فتحت فمها بكلمة.. بس لما رحنا انا و مشعل.. حسيت الوضع ماهو طبيعي.. خواتي فيهن شيء غريب.. ولما كلمت ندى قالت ما فيه شيء.. قلت يمكن للحين زعلانات على هلوسة نهى.. ابو سعود : ليش ما كانن جالسات مع بعض كلهن..؟! وليد : الا.. غير جويد المطفوقة جلست شوي و راحت.. ابو سعود : اختصر علي الوقت و قل لي مين قالك..!؟ ابتسم وليد : ندى.. لأني تنرفزت وجهها فيه شيء غريب.. و كنت احسب عماد ضربها.. و مسكت نفسي لي طلعت و سألت ندى ان كانت وعد متهاوشة مع عماد قالت لي لا.. و ان انت ضربتها.. ابو سعود : و انت الحين تسأل ليش تبي تحاسبني..؟! وليد : لا اكيد.. بس ابي اعرف السبب.. خصوصاً انك للحين ما تطمنت عليها و هي توها مِسلِبة (مجهضة).. ابو سعود : و انت جالس تراقبني..؟! و بعدين ويش دراك تطمنت و الا ما تطمنت..!؟ يمكن سألت عنها..؟! وليد : قلتها سألت عنها.. ما سألتها هي.. يعني ما تطمنت عليها.. ابو سعود : ويش رايك نغير الأدوار و تصير انت ابوي و انا ولدك و تحاسبني..؟! ابتسم وليد : ليش عصبت.. انا بس بخترع سالفة.. حاب اسمع صوتك الشجي.. ابو سعود بحدة : اذلف عني.. حلال اللي يسوية فيك غازي.. يالله انقلع.. وليد رفع حواجبة : تراني ماني مطول هنا.. بكره بتقول وينك يا وليدان.. اشتقت لخفة دمك و سوالفك المبهرة..! هههههههههههههههه.. ابو سعود يستهزئ فيه : هه مره يا مبهرة انت.. غازي وينه عنك..؟! وليد عفس وجهة : الحين انت ابوي و الا هو.. انا ولدك و الا ولدة عشان تسألني عنه..؟! ويش دخلني فيه.. حاتم : ايش بلاك عصبت.. احسن لك نام و ارتاح.. وقف وليد : هذا اللي بيصير.. مشعل نايم ما ادري ويش مسهرني مع الشياب.. ابو سعود نزل عقالة بيرميه على وليد اللي انحاش وهو يضحك على ابوه.. حاتم مبتسم وهو يناظر زول وليد يبتعد عنهم : ليش احسه غير عندكم..؟! ابو سعود : وليد غير..؟!! حاتم : ايه.. احيان احسكم شفقانين عليه.. حتى لما اليوم جاء فرحتك بانت بعيونك.. و اخواني فزوا اول ما شافوة.. حتى عماني و عيال عماني كانوا مستغربين.. ابو سعود تنهد و كأنه ينفث القلق على وليد خارج صدرة : لأنه رايح للموت.. و احنا كنا خايفين عليه لا يكون صار له شيء.. و يوم شفناة فزينا.. حاتم باستغراب من كلام ابوه : رايح للموت..؟!!! ابو سعود ناظرة : تكتم السر.. حاتم : افا عليك تسألني هالسؤال..؟! ابو سعود : بس هذا سر غير.. يعني حتى عن خواتك امك و خالاتك.. ما احد يدري غير انا و اخوانك.. | |||||||||
|
| |
|
29-11-14, 09:46 PM
| #96 | |||||||||
| نجم روايتي ومشرفة سابقة وفراشة متالقة بعالم الازياء
| .. يمشي وراء الفيلا.. كان جالس مع الشباب يتناقشون بموضوع راشد جاه ابراهيم ولد خالد ينادية.. ويقولة كلم عمتي.. حتى عساف و سعود طلعت عيونهم.. و سعود احتد صوتة على ابراهيم و سأله مين.. و عرفوا انها اسيل.. خبلة البنت.. ما يردها شيء عن اللي تبيه.. التفت على صوتها : انا هنا.. لف مبتسم : ويش عندك مناديتني تالي الليل..؟! تدرين عيال اخوانك بغوا يذبحوني ماسكين انفسهم عني.. أسيل نزلت الطرحة على كتفها و رفعت حواجبها : عيال اخواني..؟!! نايف : ايه عساف و سعود.. مو اللي راسلتة ولد ما ادري مين قال عمتي تبيك.. سعود بغى يثور فيني.. اسيل عفست وجهها : مالهم دخل.. عمتة انا غصباً عنهم.. نايف جلس متساند على جدار الفيلا : علميني ويش اللي مخليك تعرضين حياتي للموت عشانة.. أسيل جلست مقابلة و قريب منه : ما عرضتك للموت لا تكذب.. نايف مبتسم : الا عشانك ما شفتيهم.. على فكرة ترى ماهو عاجبهم اني اشوفك.. و خصوصاً بهالوقت بس ساكتين.. و انا ما ودي احد يكون بخاطرة شيء علي.. أسيل : وانا ما يهمني لو الكرة الأرضية بكبرها شايلة عليها.. دامني ما غلطت.. نايف بجدية : تالي الليل الساعة 11 يا اسيل.. ماهي زينة.. انا رجال ما يعيبني بس انتِ بنية.. أسيل : نايف ايش فيك..!! ما احد فيهم له دخل انا كلمت مشاري و وافق.. و بعدين انا كنت ابيك من قبل المغرب.. وما حصل لي الا الحين.. نايف : ويش ذا اللي من المغرب تقلين عشانة..؟! علميني.. أسيل : بصراحة سؤال بسيط مره.. نايف : بسيط ومن المغرب تقلين عشان تسأليني اياه..!! اجل اكيد عن زوجتي الجديدة..!! (مد لسانة يقهرها).. اعتفست ملامح اسيل و احتد صوتها عليه : الله يأخذك قبل ما يأخذها.. نايف : ههههههههههههههه اقسم انك هبلة.. اسيل وقفت : حمار لا تضحك.. نايف : ههههههههههه الله يونسك بالعافية يا شيخة.. كنت محتاج هالضحكة و تغيير اجواء الكأبة مع الشباب.. انقهرت منه هي معصبة و حضرتة يضحك عليها.. حتى ياليتة بالع ضحكتة و قعد بحسرتة ما فجرها قدامها.. مسك عبايتها قبل لا تمشي : اجلسي .. اجلسي ههههههههههههه.. أسيل : ماني جالسة.. ما احد قالك تسبني.. نايف : ترى بشد عبايتك و بتنقطع..(بحدة تمثيلية) انثبري مكانك.. أسيل رفعت حواجبها : لا و الله .. و ان شاء الله هالكلام لي..؟! نايف : لا للي معانا بسم الله بسم الله.. جلست وهي تتلفت : انت شفت احد..؟! نايف ماسك ضحكتة الخبلة صدقتة و من جدها خايفة!! : ايه كأني شفت شيء ابيض يتحرك وراك.. أسيل صرخت : آآ..... قطع صرختها نايف اللي حط يده على فمها : وجع بتفضحينا..!؟ الناس نايمة.. امزح عليك يالخبلة..!! أسيل ساكتة وهو ما زال يضغط على فمها بيدة اليمين و مثبت راسها من وراء بيدة اليسار : ماسكك و اكلمك أنتِ.. تسأليني سؤال غبي اكلم مين..!؟؟ ايش رايك مين بكلم يعني..!؟ اسيل بعدت يده عن فمها بقوة : و انا ايش دراني عنك.. يا حمار خوفتني.. نايف ضربها من راسها بخفة : لا تقولين حمار تراني ساكت عنك.. ضابط طول بعرض و مرتي تقولي حمار.. تدرين لو الفريق غازي يسمعك بس يسمعك ويش تقولين عني.. ما يحاسبك انتِ يحاسبني انا.. يمسكني من رقبتي و يعدمني.. يقولي ما قدرت على مره بتقدر على مجرم.. أسيل طنشت كل الكلام اللي قالة و اعتدلت مقابلة : كيف الفريق غازي..!؟ يعني كيف تعاملة..؟! نايف عقد حواجبة : ليش..؟! أسيل ما تبي تقولة ويش صار داخل و انه ضرب بنتة : بس .. البنات شافوة و يقولون انه رعب.. و انا بشوف تعاملة مثل شكلة و الا لا.. نايف عض طرف شفايفة السفلية : و انتِ شفتية..؟! أسيل ببراءة : ايه شفتة مره وحدة وماني بفاكرة حتى ملامحة.. نايف تربع : ويش رايك انادية لك تقزين فيه و تحفظين ملامحة..!؟! أسيل انتبهت انه يستهزء فيها و تبي تستغل اللحظة و تقهرة : عادي ما عندي مانع.. البنات يقولون انه رجال عن عشر ماشاء الله.. و يقولون وسيم.. نايف : اهااا وسيم .. ماشاء الله.. و البنات يقولون..؟! أسيل مبتسمة : ايه.. و يقولون مو مبين عليه انه كبير.. يعني يمكن يعطونة بالثلاثينات.. نايف : اهاا .. بالثلاثينات.. اسيل تزيد من ابتسامتها : ويش فيك كنك ببغاء تعيد الحكي..؟! نايف شدها من عضدها اليمين و قربها له و بحدة خافتة : ما ابي اسمع منك هالحكي مره ثانية.. لو ادري ان عينك راحت لـ رجال غيري لا اكون منهيك عن وجة الأرض.. أسيل انقهرت يضغط على عضدها بقوة و لا هامة و فوقها زعل ليش ما يراعيها وهو يقولها بيتزوج عليها..؟!! : و انت بعد لازم تعرف ان لو عيونك راحت لـ غيري بنهيك عن وجة الأرض.. نايف : هذا من حقي.. مره و ثنتين و ثلاث و اربع.. و انتِ حقك رجال واحد اللي هو انا.. أسيل فلتت عضدها منه : ماهو بكيفك.. طلقني اجل.. يوم عيونك زايغة ليـش تخطبني..؟! روح خل عندك تاريخ مجيد بالقز.. نايف رجع مسكها من عضدة بس هالمرة بيدة الثنتين و هي مقابلتة : انتِ ليش غبية..؟! ابي افهم مخك هذا من وين جايبتة..؟! اخوانك ماهم اغبياء.. مشاري محامي و راكان ماشاء الله ما ينحكى بذكائة بالكيمياء.. و اختك طب.. عدا اخوانك من ابوك ماشاء الله.. انتِ من وين جايبة هالمخ!..؟! خالتي يوم حملت فيك في مين توحمت..؟! أسيل مقهورة منه.. جالس يسبها و لا همه شيء.. و يمدح اخوانها و يحسسها انها اقل عن الكل: بعد عني.. (وقفت) الحق مو عليك علي انا اللي بغيت شوفتك جعل عيوني العمى.. مشت عنه و ادخلت مع الباب الخلفي قبل لا يلحقها.. نايف جالس مكانه : ما كذبت و الله غبية.. احد يدعي على نفسة بالعمى..؟!؟! ليش زعلت ما قلت شيء غلط..!!! : تكلم نفسك..؟! شكلك انهبلت.. التفت على الفريق غازي : هههههههههههه لا و الله كنت اكلم لي زول و اختفى عني زعلان.. الفريق غازي جلس على الأرض جنب نايف : و الزول لـ بنية و الا رجال..؟!! نايف تنهد : بنية.. بنية و اشقتني.. ابتسم غازي.. بالرغم من كل شيء يصير له الا انه ابتسم.. ما حس فيها لأن الابتسامة يبي يخدع فيها نفسة.. نفسة اللي انكسرت و يبي يجبرها بأي شيء .. أي شيء .. حتى لو هي ابتسامة مالها معنى.. أي شيء ممكن ينسية و يجبر كسر روحة بيسوية, بيسوية عشان ما يتوجع.. ما يتوجع وهو يحس ان اغلى الناس على قلبة مختبيات في حجرات قلبة يطعنونة بدون رحمة.. بدون اهتمام عن كل شيء سواه.. عن كل تضحية ضحاها عشانهن.. نايف لف على الفريق غازي : سيدي.. قاطعة غازي بحدة : لا تقولي سيدي.. ناديني غازي.. اذا مالك خاطر ناديني ابو عامر.. نايف ناظرة بإمعان.. عيونة عليها نظارة شمسية بعز الليل.. هذا يعني لابسها عشان يخبي شيء واضح بعيونة : تأمر.. تأمر يا ابو عامر.. فيك شيء..؟! تونس شيء..؟! غازي : من شد الوجع ما احس فيه.. نايف : عشان راشد..!؟! ما اخطيت.. انت افترضت انه كفو.. و الرجال من اللي قالوة عساف و عزام مبين انه كفو.. ما خيب ظنك.. يمكن صح ما يكمل معنا.. لكنه اقلها ما ضرنا.. غازي : ماهو بس راشد.. ما انكر انها حازة بخاطري.. لأني ما عديتكم الا عيالي اكثر من انكم تشتغلون تحت امري.. و انت تدري أي شيء تطلبونة حتى لو صعب جبتة لكم.. و اسمع منكم و اخذ بـ رايكم و لا اكسر احد فيكم.. ما ادري هذا جزاي في مين.. ما ادري مين هو اللي كسرتة.. عشان يكسروني.. ما ادري جزاي في مين..ما ادري.. نايف انصدم..!! كلماتة الأخيرة خلتة ينتفض للأب الثاني له.. اذا مو عشان راشد عشان مين..؟! غازي انكســر!! الشخص الكبير قدوتة المثل الأعلى بالنسبة له ينكسر..!! : من يوم ما عرفتك.. اول مره شفتك فيها.. انجذبت لك.. شفتك القيت علينا كلمة باحتفال.. و كنت موجود يوم التخرج.. لكني سمعت اغلب الشباب كانوا يتكلمون عنك.. عن تدريبك.. عن تعاملك.. و عن شدة القسوة اللي تشيلها بقلبك لهم عن اشياء كثيرة ما يتمنونها برئيسهم.. و لما اشتغلت بالمركز.. و انحطيت تحت امرك.. كنت متضايق.. كنت مقهور لو ماني برجال كنت بكيت من قهري.. انا كنت ادري ان العسكرية ماهي هينة.. و مستعد اتحمل شقاها.. لكن ان الشقى يكون الضعف عشان رئيس.. وقتها ما راح اتحملك.. خفت ينهدم حلم تحلمتة .. من زمان كنت احلم اشتغل بالعسكرية و امسك منصب كبير.. ويوم اشتغلت بمركزك.. و الله اني احس احلامي تبخرت.. داومت اول يوم.. و انت مسكتنا و دربتنا.. و يا كثر ما اخطيت و لا رحمتني.. رحت البيت و انا افكر بالاستقالة.. انسحب و اشتغل أي شغلة ثانية.. لكن مشاري هاوشني.. و قالي حارب عشان حلمك ماهو رئيس اللي يخليك تتراجع.. اليوم يهاوشك بكره بعده.. لكن ما احد بيقدر ينكر تعبك و شقاك و يشوفونك قد ايش تتعب عشان توصل لحلمك.. و بتكبر بعين نفسك قبل الكل.. و داومت.. و ذاك الاسبوع اتوقع بقي تصفقني قدام الشباب.. ما ادري ويش اللي كان ضارب بمخي.. ما ركزت بشغلي و انا ادري ان رئيسي ما يرحم.. لين ناديتني.. ناديتني بمكتبك.. و كلمتني.. غازي جالس وراء مكتبة امامة احد المتدربين عنده .. يتكلم بحزم قوي زرع في اعماق روحة و يخرج صوتة حاد : نايف.. العسكرية ماهي لعبة عيال و لا طيش مراهقين.. العسكرية تحمل.. و تصنع الرجال الشداد.. لازم تكون نَبِيه.. و تفكيرك حاضر و تركيزك ميه على ميه.. و انت حتى بتدريب بسيط ما انت قادر تركز.. ايش اللي مشغلك..؟! نايف شابك يدينة .. رد باحترام : ما شيء مشغلني.. بس هالفترة ماني بخير.. غازي : علمني ويش معتاز و بعطيك اياه.. و توعدني تصير رجال و تمسك الموضوع بجدية اكبر.. و الا ويش ناوي عليه انت..؟! ما تأخذ ترقيات و بتبقى بمركزك مثل ما انت..؟! نايف حس بالإحراج : و الله ماني بمعتاز شيء.. بس تفكيري مشتت.. غازي : و انا قلت لك لازم تفكيرك حاضر و تركيزك مية على مية.. شلون تخرجت من الكلية و انت هذا مستواك عندي..؟! نايف ودة تنشق الأرض و تبلعة حط نفسة بموقف سخيف على حساب ماهو مركز بتدريب شلون بيثق فيه و يمسكة شيء وهو ما يركز بتدريب عادي : و الله ماهو ذا مستواي.. غازي قاطعة بحدة : ادري.. و سأل عنك انا.. كلهم مدحوك لي.. ما ادري ويش اللي صاير لك هنا..؟! شلون بأخذك تدريب برا مع الشباب.. و شلون بخليك تتدرب على اشياء خطيرة عشان تكون كفوو و لهــا..؟! نايف بصوت خرجت فيه حدة طفيفة ما قدر يمنعها : و الله اني كفوو.. غازي ابتسم : ما شفتها للحين..!؟ ما وريتيني كفاءتك.. اسمعني.. اذا انت عندك امور بالبيت مضايقتك حاول تفصل بين بيتك و شغلك.. لأن الاثنين ما يدخلون ببعض.. هنا انضباط و التزام كل شيء مطلوب انك تأدية بأفضل ما عندك.. اذا محتاج اجازة تصفي امورك بعطيك اياها و لو انك توك ما صار لك مدة مداوم وما يصير تأخذ اجازة.. بس اذا بتخليك كفوو بعطيك اياها من عندي.. نايف : لا و الله يا سيدي.. مانيب معتاز اجازة و اموري بالبيت من احسن ما يكون يالله لك الحمد.. مير انا ما تعودت للحين على النظام هنا.. غازي وقف و اتجة لـ نايف وقف قبالة : ما راح ارحمك اذا سالفة تعود.. ما راح انتظرك سنة عشان تتقبل الوضع و انت متخرج من كلية و عارف و دارس و فاهم.. نايف تجرأ اكثر : انا اعرف النظام و اعرف كل شيء ..(بلع ريقة وهو يشوف هيبة رئيسة زادت عن قرب) انا مشكلتي انت.. غازي عقد حواجبة بحدة : انا!!!.. نايف : ايه.. يمكن الحكي يضايقك.. بس انا بعد غلطان اسمع من الناس قبل لا اشوف بعيوني.. و هذا مخليني اشوف حتى الشيء اللي تسوية كبير و يمكن اتثاقلة.. و يمكن لو احد غيرك طلبني هالشيء بشوفة عادي.. غازي ابتسم : بصراحة ماني فاهم... بس شكلك سامع حكي شين عني..؟! نايف بجراءة اكبر : واااجد.. غازي : هههههههههههههههههههههه..(ي� �ك دقنة بسبابتة) و هذا اللي مخليك ماهو مركز..؟! نايف : شايل هم و الله.. ان حطيتني في بالك ما اخذ حتى ترقية وحدة.. غازي : انت جاوبت على نفسك بـ نفسك.. قلت مشكلتك فتحت اذنك قبل لا تجرب.. و صرت تشوف كل شيء مني ثقيل حتى لو هو عادي.. شوف يا نايف.. انت صرت تحت امري.. و انا انسان ما احب الكسل و لا التكاسل.. يمكن فيه ناس انا ما اعجبتهم لكن اكيد في ناس يشوفوني رئيس كويس.. و اذا تبي الحين لا طلعت دور على الموظفين بمركزي و انشد عني.. يمكن انت سمعت من ناس ما تريد لي او لك الخير.. و هذا الشيء غلط.. ماهو انت الرجال اللي طول بعرض اعلمك ان هالشيء غلط.. ياما راح تسمع بحياتك.. (احتد صوتة) واذا بتفتح اذنك للقال و القيل مثل الحريم.. بتجلس مكانك و صدق ما تجيك و لا ترقية و تقعد على اهمالك.. (هز اكتافة) ماهو من حقي امنع عنك ترقية انت تستحقها.. ما يعني اني رئيسك اظلمك براحتي.. لو ماني كفو ما انحطيت بهالمكان.. و قبل كل ذا انا اخاف من ربي.. و اعامل كل هالشباب مثل عيالي.. اللي ما رضاة على ولدي ما ارضاة عليكم.. وما ارضى ان ولدي يهمل بواجبة.. و انت ولدي.. عشان كذا لو بنبدأ الإسبوع الجاي و انت على ذا الحالة صدقني ما راح ارحمك..(احتد صوتة أكثر لينبة نايف على جديتة الكبيرة) و الله يا نايف صدق احطك براسي و اضاعف لك كل شيء عن اخوياك لين تعلم و تصطلب.. نايف يتدارك الوضع قبل لا يطيح الفاس بالرأس : لا خلاص.. و لا يهمك.. بسوي اللي تبيه.. في الواقع نايف ما يدري ليش يذكر بداية لقاءتة بـ غازي له الحين.. لكنه حس انه محتاج يذكرة بـ ايام عُرف غازي بقوتة و شدة بأسة : علمتني اشياء كثير.. تعلمت منك كيف اتحمل اشياء صعبة.. دربتني على امور كثير و احيان كنت اتضايق منك.. بس كل ما ضاقت فيني رجعت لك.. لما قلت لي انت ولدي.. و كلكم مثل عيالي كنت متوقعة كلام تحكية بس.. لكني الحين احيان احس اني ولدك.. للحين اشوف ابوي كبير و لا ينكسر من شيء.. و وجعة ما احد يحس فيه.. يداوي روحة بـ روحة.. يخاف على اللي حولة اكثر من نفسة.. تعودت اشوفك كبير و قوي و صامد بوجة كل شيء ما تنكسر و لا تنحني.. مهما صار تظل واقف لين ينتهي كل شيء و تحمي كل من احتمى فيك.. و هالنظرة كانت تكبر معاي كل يوم اشوفك فيه كل يوم اشوفك اتمنى اني اكون بـ يوم زيك.. اتحمل أي شيء.. و لا أي امر يكسرني.. (ختم سلسلة حديثة برجاء) يبه احنا عيالك لا تكسرنا.. لا تستقيل و تترك عيالك.. تكفى يبه لا تخلي عيالك.. غازي تنهد.. كل الكلام و كل المواضيع هي صغيرة عند وجعة في توأمة : رغم اني ما اعرف ويش خلاك تقول لي هالحكي كله.. انا ما بعد قررت استقيل.. يبي لي كم يوم افكر بالموضوع.. و ماهو موضوع راشد اللي موجعني.. ما انكر اني متضايق منه و عليه لكن فيه اشياء ثانية تخصني انا.. في جلسة بعيدة نوعاً ما عنهم.. الشباب جالسين.. .. يوسف صاحيمن صباح الله خير و فايق.. مفلل نوم من البارح.. طلع برا و شاف ابو عبدالرحمن جالس لحالة باس راسة : صبحك الله بالخير يبه.. ابو عبدالرحمن : صباحك النور يا ابوي .. ماشاء الله ذاهن من بدري..!؟ يوسف سحب صينية القهوة و شال الثلاجة و الفناجيل نفض يدة اليمين نفضتين عن المويا الباقي بالفناجيل: ايه يبه ويش ورانا لا دوامات و لا علة.. ابو عبدالرحمن : انت تشكي من شيء..؟! يوسف يمد له فنجال القهوة : ما غير ظهيري متكسر و رجيلاتي تعورني.. عمي غازي حاطني براسة بيهد حيلي كل يوم.. ابو عبدالرحمن : عمك يبي مصلحتك.. يقول انك مطفوق و لا تعرف تسوق ما غير تمشي و تصدم و لاقطك ساهر مرات ما تنعد و تقطع اشارات.. يوسف ينزل الدلة و فنجالة بالأرض وهو له موال براسة يغنية : يبه مرات اكون مستعجل و يلقطني ساهر متأخر على دوامي.. يلقطني ساهر و ابوي يدفع الغرامة ازين من اني ادخل متأخر و يقلل من شاني الدكتور بين اخوياي.. بالله يبه تشوفها زينها بحقي.. رجال طول بعرض يهاوشة دكتور عاد انا و حظي يا مصري يا اردني يا سعودي.. ابو عبدالرحمن : افااا و انا ولد ابوي.. لا بالله ماهيب زينة ما عاش مين يقلل من شانك.. مير انت ليش ما تبكر بروحتك..!؟ يوسف : انا ابكر يبه مير الشوارع زحمة.. الناس كلها تداوم ما تقربها من ست ونص لين تسعة الا.. مير هاذي الشوراع اللي توديك الجامعة.. الاشارة تقفل علي كم مره.. ويش اسوي بعميري..؟! ابو عبدالرحمن : اطلع من قبل ست و نص يا وليدي ازين لك.. الشوارع فاضية.. عشان تفوت زحمة الناس.. يوسف ياربي اجيه يمين يقول يسار.. شلون اقنعة : يبه حتى لو بكرت.. ماهو كل يوم اقدر ابكر.. مرات اسهر مع اخوياي ما اصحى بدري.. و الا اكون تعيبان.. ابو عبدالرحمن يمد فنجالة على يوسف يصب له : تعيبان وشولة تداوم.. اقعد مكانك.. لو سقت بسيارتك و صادك شيء ويش بيغبر ابوك..!؟ يوسف : يبه ماهو على كيفي ما ادوام يرسبوني بالمادة يعطوني حرمان.. ابو عبدالرحمن : الله لا يحرمنا علينا جنتة.. ويش ذا.. : خلة عنك يا عمي لا تسمع له و الله ان قد يطلع براسك قرون.. لف يوسف لأبوه اللي جاء بنص مخططة بيخرب عليه.. يبي يكسب ابو عبدالرحمن بصفة عشان يكلم عمة و ما يخلية يتدرب.. سلموا ابو عبدالله و ابو سعود و ابو عبدالرحمن و ابو عمر و مشاري.. يوسف وقف يبوس راس كل واحد فيهم.. و ظل واقف لين هم باسوا راس ابو عبدالرحمن و جلسوا.. شال الفناجيل و القهوة يقهويهم.. عامر : شفت عمك..؟! يوسف يمد الفنجال لأبو عساف بما انه اكبر الجالسين بعد ابو عبدالرحمن و يكمل صب القهوة عن يمين ابو عساف : لا.. عامر يتساند على المركى يمينة : ويش عندك صاحي مبكر..؟! ماهي بالعادة.. اذا ما لعلعت عليك امك و صرخت فوق راسك ما صحيت.. يوسف مسك ضحكتة و هو ماد الفنجال لأبوة : يبه ما تفشلني قدام العرب.. بعدين نايم مبكر ليش ما اصحى مبكر..؟! اصلاً هاذي طبيعة الانسان و اللي المفروض تكون عليه البشرية اجمع.. مشاري : اجلس ما احنا بـ غرب عشان توقف و تقهوينا.. ارتاح.. يوسف : افا عليك.. لا بالله ما اجلس قبل ما تخلصون قهوتكم.. ابو عمر : لا بالله تقعد و الا ما احنا متقهوين.. احنا حسبة معازيب راعين محل.. لا جيناكم ببيتكم ضيوف اوقف و قهوينا ما احنا قايلين لك لا.. لكن هنا ما احنا ضيوف.. جلس يوسف بالوسط مقابلهم بحيث يقدر يصب للجميع بما انهم جالسين تقريبا جنب بعض.. عامر لحالة بصف و يمينة ابو عبدالرحمن ابو عساف ابو عمر ابو سعود ويمينهم مشاري : حياكم الله مير هاذي الساعة المباركة اللي تضيفونا فيها.. عامر ماسك ضحكتة ولدة النوم مأثر عليه.. بس تأثير ايجابي.. ما منع ابتسامتة من الظهور : ان شاء الله دايم هالسناعة.!! يوسف : طول عمري سنع بس انت و عيالك ما تشوفون سناعتي.. الله يخلي لي ام يوسف هي اللي تشوفها.. عامر : ايه صح احنا ما نشوف سناعتك.. بس ان شاء الله بدور عليها بعد فترة يمكن انا كنت اعمى و اليوم اللي شفت.. يوسف : كويس يعني اضمن انك بتشوف سناعتي.. عامر و عيونة على سيارة عماد الداخلة البوابة و وراها سيارة عساف : يا خوفي ادورها الظهر و لا القاها.. نشوف يا يوسف.. : السلام عليكم.. : وعليكم السلام.. سلموا على الكل و جلسوا.. ابو عبدالرحمن : من وين جاين من صباح الله خير.. عساف : كنا بالشغل يبه.. الفريق غازي ما طلع..؟!؟ عامر : لا .. ليش تبونة بـ شيء..!؟ عماد : ايه شوية شغل.. عامر : ازين بعد.. اشغلوة.. عماد ناظر ابوه : يبه صاير شيء بينك و بينه..؟! عامر استغرب من السؤال : بيني و بين عمك..؟!(احتد صوتة على عماد) صاحي انت تسألني هالسؤال..؟! عماد تنهد بـ قوة: عمي من البارح يتصرف تصرفات غريبة.. فيه شيء ماهو طبيعي.. حتى اني شكيت ان جدتي تعبانة و ما دريت عنها.. و كلمت عمتي مريم و قالت ما فيها الا العافية.. عامر : و بـ كذا شكيت اني متهاوش معاه..!؟ عماد : لا.. لأني اعرف هوشاتكم و الا توصل لـ الحالة اللي شفنا فيها عمي.. فيه شيء غريب.. حتى ان الشباب يقولون يفكر يستقيل.. عامر ببساطة : غيروا تفكيرة.. ما احد بيغيره غيركم.. ماهو انتم رجالة.. اضغطوا عليه.. جيبوا له شيء من تحت الأرض و حسسوه انكم ضايعين بدونه.. علموه ان هذا وضعكم من غيره.. مسكوة الأمور حتى لو يبي يتركها.. عماد : يبه الله يرضى لي عليك.. فهمني طيب ويش القصة و انا احلها..؟!! عامر : ما فيه قصة يا عماد.. كلامي واضح.. غازي عطاكم وما قصر بحق أي واحد فيكم.. جاء الدور اللي انتم تردون له.. عزام : لو يطلب اعمارنا ما غلت عليه.. و الكل يدري عن معزتة بقلوبنا.. و حالتة من البارح ماهيب عاجبتنا و احنا نضرب اخماس باسداس نطلع ويش المشكلة عشان نحلها.. قلبنا المركز و كل البلاغات مافيه شيء يقول انه فيه شيء اكبر منه و لا هو قادر يحلة عشان يترك الشغل.. سعود : وما نتوقع انه الشيء بالبيت.. لأن عمر الفريق غازي ما دخل البيت بالشغل.. و حتى لو هو متضايق ببيتة ايش دخل الموضوع بإنه يستقيل..؟!! نايف : نبي نعرف.. اذا انت تدري ويش هو اللي مضايقة علمنا..!؟ احنا يدينا مربطة و كل ما حاول نلقط خيط انفلت منا.. ماهو ذا الفريق غازي اللي احنا نعرفة.. عماد : يبه .. حتى يوم وفاة عمي الله يرحمة ما شفتة كذا..(يقصد ابو غازي بما انه عم ابوه لأنه زوج ام عامر فـ هو عمة).. ما عمري شفتة بـ هالحالة.. عامر : فيه اشياء ما تنقال.. ما يصير تطلع لأحد.. و انتم عليكم تطلعونة من ذا المزاج اللي هو فيه من غير لا تعرفون ويش فيه.. قاطعهم الصوت الحاد اللي سمع حوارهم : ماهو بكيفة يستقيل..!! (ناظر الشباب) وينه..!؟!.. عامر : الفجر راح لـ غرفة التدريب.. اذا تقدر عليه لا تقصر.. .. لا حول ولا قوة الا بالله.. لا أحلل نقل الرواية دون ذكر اسمي.. هاشتاق #رواية_لو_سألتي_الورد ضحكة قهر.. | |||||||||
|
| |
|
29-11-14, 09:50 PM
| #97 | |||||||||
| نجم روايتي ومشرفة سابقة وفراشة متالقة بعالم الازياء
| بسم الله الرحمن الرحيم.. السلام عليكم و رحمة الله وبركاتة.. شسمة ما ابي اكتب مقدمات مره مستعجلة و متأكدة انكم ما تقرونها لأني دايم اكتب موعد البارت الجاي وراء ذلك تنهال علي اسئلة متى البارت الجاي..؟!.. انا قلت البارت السبت و ما اعتقد اني حددت موعد الا ان صكني زهايمر الله و اعلم.. ربع الأسك انام و اصحى الاقي حول الثلاثين سؤال عن البارت..!!! طيب لسى ما انتهى اليوم.. باقي وقت.. و انا عمري ما اخلفت بوعد وعدتكم اياه.. ما ادري ليش ما انتم راضين تثقون فيني..!!! كل اللي ردوا على الرواية سوري ان ما علقت عليكم لأني مره مره مره مستعجلة.. حياكم الله جميعاً و يسعدني اني اقرأ تعليقاتكم و اشوف حماسكم رجع مع رجعة الرواية.. البارت إهداء لـ نفسي إرضاء لـ نفسي .. عشانكم مزعليني.. .. البارت الرابع و الأربعون.. كان ودك بالجفا شد الرحال مستحيل أقول تكفى حبني. لـ وحشتك "ناصر العنزي" في غرفة التدريب.. غازي هادي جداً عكس البارح تماماً.. جالس على الأرض و حاط المركى عن يمينة و متكي يناظر رجالة من وراء نظارتة.. وليد معصب.. و الباقين متوترين.. وليد : ماهو بكيفك تتركني بالنص.. ما راح اسمح لك.. انت دخلتني بهالموضوع.. و انت بتخليني اطلع منه منتصر.. ما راح تستقيل و تترك الموضوع.. انا ما فكرت اضحي بحياتي عشان انت تجي باول خطوات لي تبعد عني.. ماهو بكيفك.. انا اخذت منك كلمة بتوقف معي للأخير و بتحميني.. عشان كذا انت مجبور توفي بـ وعدك لي.. عزام مسك ذراع وليد اللي شبه واقف على ركبة و يكلم غازي مقهور منه : وليد اهدأ الموضوع ما ينحل بهالطريقة.. وليد : ماني هادي.. ماهو اول ما بديت يتخلى عني كان ترك الموضوع قبل لا ادخل فيه.. ما خلاني لين اقابلهم و احرق بيت أبوي.. و شفت الحرس بعيوني يموتون.. ماهو بعد ما عرفتهم و عرفوني.. عساف تربع : علمنا ويش صار..؟! قولنا شلون قابلتهم.. وليد تربع بيحكي لهم كل شيء صار.. رغم انه البارح كان ناوي يتمنذل عليهم.. لكن يوم شاف غازي هو اللي بيبدأ بالنذالة قرر يوقف لعب بأعصابهم : ثاني يوم من فتحت الكشك جاني شخص مبين عليه كشخة و من الكبارية.. لف يدور بالمكان بعدها جلس على الكرسي.. سألني عن نفسي.. اسمي و عمري.. و انا كنت اعرض عليه البضاعة و انتهت بإنه ما شرا مني شيء.. و زارني بعدها بيومين.. و قالي ايش تدرس و شغلك شكلة ماهو ماشي.؟! و من وين جبت الفلوس عشان تفتح كشك البضاعة قيمتها غالية ابوك عنده فلوس..!؟ وليد يناظرهم كيف مهتمين و يسمعون كل كلمة ينطقها و عيونهم مركزة عليه وعيونة تدور عليهم واحد واحد و احيان يناظر الأرض : من أسئلتة حسيت انه ممكن يكون واحد منهم.. فا جاوبت مثل ما اتفقنا من قبل الوالد متوفي من زمان و أنا ادرس بالجامعة سنة ثالث.. و الفلوس شوي من الورث و الباقي اخذت قرض.. و مشيت حالي بعد بالدين.. لين تيسر اموري و اسدد الخلق.. فـ عرض علي يشتري مني الكشك مقابل تسديد كل ديوني و يخليني اشتغل فيه و اديرة له.. عساف : و رفضت..؟! وليد بـتأكيد : طبعاً.. لأني لو وافقت ممكن يكون داخلة شك ان الكشك نقطة بداية بالطريق اللي يوصل لهم.. عدا اني ما كنت متأكد انه من العصابة.. قلت له لا .. انا فتحتة عشان استرزق.. انا انسان ادرس اغلب الوظايف تبي واحد متخرج من الجامعة.. و انا ما معاي الا ثانوي و فاشل فيها بعد.. قالي انا بشترية و بخليك انت تمسكة.. و رفضت عرضة اكيد ما شقيت و تسلفت عشان ابيعة.. اخر شيء قال لي طيب انا ابيك توظف عندي.. ما اتوقع يتعارض مع وظيفتك هنا و اذا تبي عطيتك واحد من موظفيني يساعدك.. سعود : طيب و بعدين..؟! وليد سحب قارورة مويا من اللي بوسط جلستهم مرصوصة بالصينية.. و فتحها : قلت له على حسب الوظيفة عشان يعرف اني ماني شفقان عليهم و يشك فيني.. قالي الوظيفة حتى لو كانت صعبة بتلقى على كل شيء تسوية مقابل للي تسوية و فوقة حبة مسك.. فا قلت له اول نجرب فترة يمكن انا ما يعجبني الشغل و يمكن انت ما يعجبك شغلي.. حزتها بس عرفت مقدار الشر بعيونة قالي لا اللي يدخل معنا ما يطلع.. لأن الطلعة بتكلفة حياتة.. كل الشغلة عندنا تأخذ امر و تنفذة من غير أي سؤال و تأخذ عليه مقابل و بنفس الوقت لك عندنا حق الحماية نحميك من كل شيء يضرك.. و تأكد اننا كل شيء نسوية نبغي فيه الخير.. و نساعد فيه ناس كثير.. شرب من المويا يبل ريقة حس انه مجرد حكي اللي صار معاه ريقة ينشف كيف لما عاش الوضع.!! ما يدري شلون هو عايش للحين..؟! : و بديت ارواغ فيه قلت له طيب اعطني يومين افكر بالموضوع و رفض قال معاك ساعة موافق اتصل علي و حط لي بطاقة على الطاولة.. و قال لأن اول شغلة بتسويها بعد صلاة العشا.. و طلع من عندي.. خلال هالساعة كنت ابي اتواصل معاكم.. بس ما قدرت.. لأني حسيت انه ما جاني بعد يومين الا وهو عارف كل شيء عن ايمن المنذر.. و قبل ما تخلص الساعة بدقيقتين دقيت عليه و قلت له اني موافق و قالي خير بيجونك رجالي و يجيبونك لمكاني و لا تستغرب من أي اجراء يسوونة لك.. لأنها للاحتياط فقط.. تعرف انت توك جديد علينا و لسى ما عندنا عليك ضمانات.. و جوني رجالة في البداية كنت باخذ سلاحي معاي بس بعدين غيرت رأيي.. عساف احتد صوتة : خبـــل انت رايح بدون سلاح..؟! شلون كنت تفكر..؟! وليد رد بحدة على عساف : انت اللي خبل تبيني اروح ومعاي سلاح.. على طول بيشكون فيني بأي صفة شايل معاي سلاح..؟! لكن لا دخلت معاهم اقدر اشيل سلاح من غير لا يشكون.. عماد يهدئ الوضع: طيب و بعدها..؟! وليد يذكر تفاصيل اللي صار له مع الرجال من لحظة دخولة .. دخل مع الباب و انفتح الرباط عن عيونة غمض عيونة بقوة و فتحها دارت عيونة بالمكان البيت كله مفتوح على بعض صالتين بكنب و المطبخ و غرفة النوم كلها مفتوحة على بعض.. بابين بس المقفولة بالمكان.. ما يدري ويش وراها.. "يمكن حمامات".. قاطع تأملة الصوت المرحب .. فاتح يدينة الثنتين : يا هلا بأيمن المنذر.. تقدم له بثقة و خطوات مدروسة وصافحة بهدوء و هو يرد على ترحيبة بالرغم من التوتر اللي يتملكة داخل بمكانهم بدون سلاح و مع واحد ما يدري ويش يبي فيه و الطامة لو كان الشخص مو من العصابة اللي يسعى لها : هلا فيك.. (ابتسم) الا صدق ما عرفت اسمك..؟! ابتسم الشخص ابتسامة بسيطة مائلة على جنب و نطق بوتيرة بطيئة و كأنها نبرة تحذيرية لـ وليد : الــــصقـــر.. رفع حواجبة باستغراب من طريقتة : الصقر..!! (ابتسم له بلا مبالاة).. مد يده باتجاة الجلسة : حياك خلنا نتكلم عندنا شغل مهم بعد ساعة.. تقدم وليد من بعد ما تقدم الصقر باتجاة الجلسة و جلسوا اثنينهم متقابلين بثقة متمردة على الصقر واضحة للأعمى حتى من نبرة صوتة و ثقة تهز اللي قدامة عشان يشككة بنفسة.. بالرغم من هذا جلس وليد بهدوء.. الصقر : هاذي الساعة المباركة اللي تنضم لنا.. وليد : ساعتك ابرك.. الصقر : ما ابي اضيع وقتي و وقتك يا ايمن انا ابي اشرح لك احنا مين و ويش هي اهدافنا.. وليد : تفضل اسمعك.. الصقر : احنا مجموعة فينا من الخير ما الله به عليم و لله الحمد.. وليد كان وده يتفل بوجهة من هالكلمة : الله يبارك فيكم.. < وده بس يزيد حرف النفي لا قبل يبارك.. بس ماسك نفسة بالرغم من التوتر عامل عمايلة فيه بس يتذكر هدفة اللي ابعد عن اهله عشانه يتحمل و يسكت.. الصقر : طبعاً.. انت تدري ان فيه ناس فيها حسد و ما تحب الخير لأحد.. و تبي تسوي اشياء كثير تفرق فيها الناس و تبعدهم عن الدين.. و احنا كله و لا ديننا.. وليد حس انه غلط.. و ان هالشخص ماهو من العصابة و انهم جماعة فيهم خير.. الثقة الطاغية على الشخص اللي قدامة خلتة يحس بهالاحساس : فعلاً اهم شيء الدين.. الصقر حط رجل على رجل و فارد يديه الثنتين على ظهر الكنبة العريضة اللي يجلس بوسطها : و احنا مهمتنا نوقف هالناس عن اللي يسوونة و نردعهم و نخليهم عبرة لغيرهم.. و عندنا رجال مكلفين بهالشيء و انت بتكون من ضمنهم.. تتلقى الأمر من غير لا تسأل عن أي شيء.. و تأخذ الخطة مثل ما هي و تنفذها بحذافيرها.. و لا تستغرب ان قريت اسم أي شخص سمعت فيه من قبل لأننا اكيد نعرف عنه شيء انت ما تعرفة.. و ما اخترناه الا انه يستاهل اللي بيصير له.. موافق تسوي اللي نبيه من غير أي سؤال و تنفذ اللي نبيه بالحرف.. و على فكرة عشان ما انسى راح تكون تحت حمايتنا.. وليد : طيب المقابل..؟! الصقر ابتسم ابتسامة صغيرة مائلة على جنب : لا تخاف ما ينوكل عشاك و انت واحد من رجالي.. وليد : ويش هي المهمة اللي بعد ساعة..؟! الصقر رفع حواجبة : ارتكبت اول خطأ.. قلت لا تسأل لأنك ما راح تعرف شيء انا ما ابيك تعرفة.. وليد : ما ارتكبت خطأ.. انت قلت فيه مهمة بعد ساعة و الساعة قربت تقضي.. الصقر : لا تسأل عن أي شيء مهما يكون صغير.. الا شيء تبيه عن المهمة انا غفلت لا اعلمك اياه بس.. اما غيره لا تنشد عنه.. و أي مهمة توكل لك تأكد انك ما راح تعرفها قبل مدة من الوقت المحدد اللي احنا نبي نسويها فيه.. اكثر وقت ممكن نعطيك اياه ربع ساعة عشان تتجهز بس.. ايش قلت.؟! وليد : اوكِ ما عندي مانع.. دام حقي بأخذة على دوز بارا.. الصقر ابتسم : متفائل فيك خير, و وجودك معانا بيدفعنا للأمام اكثر مما انا متخيل.. وليد وهو ما بين صراع المهمة هي الوحيدة اللي بتدلل هو من العصابة و الا لا هم فيهم خير و الا شر ما يبي يستبق الأحداث : ان شاء الله.. الصقر : تعرف تستخدم سلاح..؟! وليد : يعني مو مره حِريف.. الصقر : كويس عشان ما نبدأ من تحت الصفر.. و نضطر نخلي واحد يرافقك لين تتعلم على السلاح.. و الآن جاء وقت انك تعرف المهمة ويش هي..؟ تقدم الاثنين بجلستهم كل واحد مسند كوعة على فخذة و شابك كفوفة في حركة مشتركة اتفق فيها الاثنين.. الصقر : مهمتك الأولى ابسط مهمة ممكن تأخذها.. لا يجي ببالك اني مستهين بقدراتك لأني لو مستهين ما جبتك و عنيت نفسي.. لكن هي اشبه باختبار لك بشوف تقدر تسوية كامل و تجيب الفل مارك و الا لا.. وليد : ببيض وجهك ان شاء الله.. الصقر : ابيك تروح لبيت شخص و تحرقة مــن,,, إلى.. وليد تفاجأ.. اولها حرق بيت!! وين الخير اللي توقعة قبل لحظات منه.. حاول يضبط نفسة : سهالات ان شاء الله.. الصقر : ما سألتني بيت مين..؟! وليد رفع حواجبة باستغراب و هز اكتافة : ما قلت لي لا تسأل..؟! انفجر الصقر بضحكة ترددت على مسامع وليد.. صلب ظهرة و نظرتة ما زالت على وليد : كفوو يعجبني المركز.. بيت ابراهيم بن مساعد بن سالم.. وليد جف ريقة حاول يتنفس بهدوء عشان ما يبين صدمتة..!! أي مهمة هاذي.؟! يختارة هو و عشان يحرق بيت ابوه..؟! معقولة شاك فيه..؟!.. ضاغط على يدية بقوة عشان يخفف من توترة اللي حس بيظهر على ملامحة و ينكشف بكل سهولة.. كمل الصقر بهدوء : ابراهيم بن مساعد اتوقع انك سمعت فيه من قبل لو بالاسم.. اللي ابيه منك تحرق بيتة كله.. وليد جاهد ان صوتة يطلع واثق و ثابت و كأن الموضوع ما يعنية : تهديد له.. < ما قالها بطريقة استفسار عشان ما يشك الصقر في الموضوع.. الصقر : له ,,,,, و لولدة سعود.. عصفورين بحجر واحد.. عدا كذا ابي اثبت لغازي بن حمدان اني اقدر اسوي اللي ابيه.. و هو يتفرج و لا يقدر يمنعني لا هو و لا رجالة.. وليد حس بريقة جاف : و عيلتة..؟! مو يمكن يكونون بالبيت..؟! الصقر : اليوم خميس و عادتهم يطلعون الخميس من بيتهم.. و اذا لقيت احد .. اقتلة.. < نطق كلمتة الأخيرة ببرود قاتل.. و ما كأنه يهدر بارواح الخلق.. و يسفك دمهم.. وليد وده يمسك السلاح و يثور فيه.. اجل مهمتة يحرق بيت ابوه..؟!!! و اذا لقى احد يقتلة..؟!! يمكن وحدة من خواتة ما راحت..؟! يمكن اخوانة موجودين بالبيت.؟! اي قلوب يشيلونها بين ضلوعهم هاذي..؟!.. البيت ممكن يحرقة و يدري ان ابوه لو درى ما يزعل لأنه بيفهم انه انجبر.. لكن ان احد ينضر من عيلتة وهو اللي يضره هاذي اللي ما يتحملها.. : يـــــــــــــاهوه.. وليد رفع عيونة لـه من غير لا ينطق.. يحاول يتجاوز كل شيء.. عشان الأمن.. دامهم ناوين يحرقون البيت يروح هو يحرقة على الأقل يتأكد ان ما احد فيه و لا واحد منهم ينضر.. اما اذا هم راحوا ما يضمن ويش يصير.. أخذ نفس : تمام,,, عندكم خطة معينة..؟! الصقر : ايش فيك سرحت..؟! وليد : شيء طبيعي بـفكر بالموضوع.. مهما كان المهمة اللي تقولها ماهي سهلة.. تنحط تحت مسمى "جريمة" و هالخط دخولة بدون رجعة.. يعني لازم افكر.. الصقر رفع حواجبة : يعني ايش..؟! رافض المهمة.؟! وليد : ما قلت كذا..؟! الصقر بحدة : هذا معنى كلامك..؟!! وليد ببساطة تستفز الصقر : ليش عصبت..؟! الصقر : انت وافقت تشتغل معاي و ما جيتني هنا الا موافق على اللي بطلبة منك.. وليد بـ ثقة وقوة هو رضى ان يقدم روحة للموت فدا لوطنة.. ما راح يخاف ابداً هو قلق عشان اهلة بس : لا تغلط, انت اللي جبتني ماهو انا اللي جيتك هذا واحد.. اثنين انا كنت افكر بالموضوع بس.. لأن المهمة اللي انت تقول عليها سهلة ماهيب سهلة.. انت بتخليني ادخل بيت رجل اعمال اشهر من نار على علم.. و احرق بيتة.. ابسط شيء بيصير بيفتحون تحقيق و تجي المباحث.. الصقر : لا جات المباحث تكون انت قاضي من كل السالفة.. الا ان كنت غبي و تترك لك بصمات بالمكان او أي شيء يدل عليك.. و ترى ما احد من رجالي يراددني و انت ناوي ترفع خشمك علي من اول ساعة..!! وليد يتجاهل كلام صقر الأخير : طيب.!!! اذا كان الوضع مره صعب.. يعني لو طلعوا كلهم بالبيت ما راح اقدر احرقة.. او يكون فيه شرطة قريب من المكان هم ما اقدر.. الصقر : معاك خمس رجال يعاونونك بيمشون على امرك.. (احتد صوتة بنبرة تحذيرية) و ان سويت شيء غلط.. بيقضون عليك بنفس المكان.. وليد رفع حواجبة : تهددني..؟!!! بامكاني اطلع من هالمكان و ما ارجع.. الصقر رسم ابتسامتة المايلة على جنب : تهقى..؟!! انا ما جبتك هنا عشان اخليك تروح.. ابيك تكون معانا و انت جالس تماطل.. عايز لا تحرق بيت..؟! وليد بـ حدة : ماني عايز بس انت جالس تهددني.. الصقر : انا هنا رئيسك.. كلمتي هي اللي تمشي.. و تمشي عليك قبل غيرك.. ما احد يراددني ابد.. و انا وثقت فيك و وكلتك مهمة حتى قبل لا ادربك.. بس لاحقين على التدريب اول شيء نسوي لك اختبار قبول.. وليد : طيب.. موافق.. و رجالك بيمشون على كلامي..؟! الصقر : بالحرف.. وليد وقف : اوكِ.. و اذا خلصت ارجع بيتي..؟! الصقر : لا طبعاً .. راح تكون مع الشباب وهم بيجيبونك لي.. .. وليد يناظرهم : هذا كل اللي صار معاه.. و اديت المهمة.. و بعدها رحت معاهم و قابلت الباقين.. عماد : و شلون انقتلوا الشباب اللي حطيناهم عشان يكونون معاك..؟! وليد : انا اول من دخل البيت.. و الباقين ظلوا برا.. و شافوهم كانوا يتتبعونا و دخلوهم البيت و اقتلوهم فيه.. ما قدرت اسوي شيء.. لأن الوقت اللي دخلوهم فيه انا كنت فوق اتأكد ان ما احد من اهلي فيه.. ابي انحشة قبل لا يصير شيء و يوم نزلت.. كيد ان هم رابطينهم بسلاسل و قاتلينهم بعدها ولعوا بالغرفة.. عساف : و الجثة الثالثة لمين..؟! وليد : واحد منهم.. قالوا ان الرئيس امر انهم يقتلونة.. نايف : يذبحون الناس و يذبحون بعضهم بدم بارد.. غازي بعد ما كان مستمع فقط حتى على غضب وليد نطق اخيراً : كيف الصقر..؟! وليد : يبيني اصبح و امسي عليه حضرتة كني ولده.. (مسح بيدة السليمة على شعره) يقول بيدربني بنفسة.. وما قد شاف احد و راق له عشان يتنازل هو و يدربة الا انا.. عماد ابتسم : يعني نقول بداية ثقة..؟! وليد : ما يثق الا بنفسة.. عنده رجال من سنين و فوق هذا يشك فيهم.. سعود : و انت ايش دراك..؟! وليد : هو قال لي.. سعود : و هذا ما يعني انه صادق.. وليد هز اكتافة.!! : ويش اللي يخليه يكذب..؟! سعود مقهور من وليد : ويش اللي يخليك تصدقة..؟! وليد لوى فمة : ما احس عنده سبب يخليه يكذب علي.. انا ماني مهم عنده عشان يكذب علي واحد توه جديد يقدر يمحيني برصاصة وحدة.. غازي بحزم صارم : كأنه راق لك..؟! وليد : هه.. ويش فيكم..؟!!.. مو قصة راق لي.. بس مقهور عليه.. ويش اللي يخلي رجال بعمرة يفكر هالتفكير.. اول ما تكلم معاي راودني شك انه صادق و انه رجال فيه خير.. شكيت اني رحت للناس الغلط..!! بعد ما حكى لي كل شيء عرفت اني ما اخطيت.. نايف : لو فيه خير ما ربط على عيونك وما خلاك تشوف الدرب.. عزام : اذا بيصبح و يمسي عليك شلون جيتنا..؟!! وليد قلت له بسافر روما استوعب المهمة اللي سويتها اسبوع.. و وافق بشرط اني ما اتأخر عندي تدريب.. و حجزت على روما و رجالة يتبعوني و انسلت منهم بالمطار و طلعت من جديد و جيتكم بالمزرعة.. غازي بحدة عالية : لا عاد تجينا.. الا ان طلبناك فاهم..؟! انت جالس تخاطر بحياتك بهالشكل و حياة غيرك.. وليد ناظرة بطرف عينة و ما علق على كلامة.. او بالأصح طريقة غازي الحادة.. غازي ضرب يدة على المركى جنبة و صرخ على وليد : لا كلمتك تحط عينك بعينك و ترد علي زي العالم و الناس.. اخذ نفس وليد و ناظرة : ان شاء الله .. و اذا ربي كتب لي عمر بعد هالمهمة تأكد اني ما راح اظل تحت امرك.. غازي : اذا ظليت على هالاستهتار اللي انت فيه تأكد انه بيجنا خبر موتك قبل لا تستقيل.. وليد بحدة مشابهة لـ غازي : ماني مستهتر.. اسوي اللي اشوفة صح.. يعني انت مو مستهتر يوم قررت تترك الشغل بالنص..؟! على الأقل انا ما فكرت اترك شيء نويت اسوية و بديت فيه و خطيت اول خطوة و طريق الرجعة اسهل لي من اني اكمل على الأقل اضمن حياتي اكثر من اني اعرض نفسي للخطر.. البقية وضعية المتفرج .. غازي و وليد ما احد فيهم يقدر يدخل بالنص بينهم و يحل الموضوع بـ هدوء الاثنين يتناطحون و بالأخير يركدون.. غازي : و رب الكعبة يا وليد.. لو يراودني شك ربع بالمية انك ما انت بكفو لأسحبها منك و ارجعك بنفسي.. وليد وقف وعيونة على غازي فقط.. : ما راح اترك شيء بديتة..(آشر عليه بسبابتة) ولو انت شاك اني ماني بكفو ما كان عطيتيني اياها.. ولو انا مستصعبها على نفسي و انا ادري ان 99% بالمية ما اطلع منها عايش و مخاطر بحياتي ما كان رضيت.. و على فكرة لا راودك شك.. ما راح اكون هنا بكون هناك و علمني شلون بتطلعني من بينهم و تحافظ على حياتي.. قادرين يسوون اشياء كثيـر ما تخطر على بالكم.. معاهم ناس بشتى المجالات.. سعود : اجلس.. ما قلت لنا كل شيء..!؟ مبين فيه شيء ما قلتة..؟! وليد : قلت كل شيء.. نايف : ما علمتنا لما رحت معاهم بعد ما سويت العملية حقتهم. ويش صار حزتها..؟! وليد دف المركى برجلة و جلس عليها : قابلتهم.. صلاح و طقتة.. كانوا مهربينهم من السجن.. ما خلوني احضر اجتماعهم.. الصقر ماخذني ديزاين معاه.. خلاني اجلس بجناحة.. خلص اجتماع و رجع اخذني معاه.. عماد : ما حاولت تسمع شيء..؟! وليد : ما بعد انهبلت عشان احاول اتنصت عليهم.. أي حركة ماهي محسوبة ما راح اسويها.. اخاف يكون مركبين كاميرات و يكشفوني بسهولة.. عشان كذا كل شيء اسوية اكون مفكر فيه قبل.. سعود : طيب.. تقدر تزرع هناك ادوات تنصت صغيرة احنا نعطيك اياها..؟! وليد : سعود قلت لك ما راح اسوي حركة ماهي محسوبة.. صقر ما يخليني اعتب مكان لحالي.. ويوم راح الاجتماع جلسني بجناحة و قالي لا تعتب الباب تونس بأي شيء هنا.. لفيت بجناحة ما فيه أي شيء ملفت للإنتباة.. عساف حط يده على دقنة : اهتمام الصقر فيك غريب..؟!! وليد يناظر عساف : تتوقع انه شاك فيني..؟!(قبل لا يرد عساف جاوب على سؤالة بنفسة) جاء في بالي هالشيء.. بس لو شاك ليش ما قتلني بارضي..؟! ليش يأخذني معاه لمكان اجتماعهم..؟!! كان تركني ببيتة..؟! نايف : و انت جالس معاه ببيتة..؟! وليد : يعني مو مره.. بس مسكني حتى بعد المهمة يبي يشوف كيف اصوب بالسلاح.. و يقول بيحط لي برنامج تدريبي على السلاح و بيدربني بنفسة.. عزام : غريب تصرفة معاك..؟!!! وليد : حتى انا ملاحظ هالشيء.. بس لازم امشي فيه اشوف ويش تالية.. اذا حسيت انه شاك او يعرف شيء عني بنسحب منه بهدوء.. و اقفل الكشك و لا عاد ارجع له.. و اذا ما هو شاك بكمل فيه.. ادوام بالكشك و عنده متى ما ناداني.. نايف : طيب انت قضيت الليلة اللي بعد العملية عنده..؟! لأننا مراقبين شقتك ما رحت لها..! وليد : ايه.. قضيتها عنده و قبل الفجر طلعنا للاجتماع و بعدها رجعني معاه و قلت له اني بسافر اسبوع.. الحين برجع له كتفي مكسور و بينشدني..؟!! بجهز لي تمثيلية تليق بحضرة جنابة.. (دخل وليد يده اليمين بجيبة و خرج بكت الدخان و الولاعة من غير لا يهتم بأحد تفكيرة مشغول و يبي يروق).. اتسعت عيون سعود : ويش ذا.. وليد خرج السيجارة و حطها بـ فمة : ويش تشوف..؟! عساف ما كان اقل صدمة من سعود : من متى تدخن..؟!!! غازي بحدة : انقلع دخن برا.. وليد رجع بكت الدخان بس بجيبة العلوي على صدرة و خلاه فاتح اسهل له و ولع السيجارة : عاجبني المكان هنا.. سعود وقف و سحبها من فمة و داس عليها برجلة : هذا مكانها(آشر على الأرض مكان دوسة رجلة على السيجارة) ماهو فمك.. من متى انت تدخن هذا اللي علمك عليه الزفت اللي رحت له..؟! بيومين قلب راسك..؟! عماد بـ بساطة : من زمان يدخن.. ماهو من يومين.. سعود ناظر وليد اللي ما اهتم و طلع له سيجارة جديدة كان بيسحبها سعود لكن وليد وقف و ابعد عنه .. وليد : مالكم دخل ادخن ما ادخن هذا شيء راجع لي.. اخوي الكبير على راسي بس شيء يخصني ما تدخل فيه دامني ما سمحت لك.. سعود سحب السيجارة بعناد من وليد و داس عليها و احتد صوتة على وليد : احترم وجودي قدامك.. و الا ما عدت تعرف ويش هو الإحترام..؟! وليد تنرفز من حركة سعود : اللهم طولك يا روح.. ممكن تفكني من شرك.. ماني رايق لك.. ما جيت هنا عشان حضرتك تنشب لي.. سعود : لا يا شيخ.. الحين انا شر.. و هالسم اللي مفتخر فيه ماهو شر..؟! وليد اعطاة ظهرة : مالكم دخل فيني.. ما عدت بزر واحدكم يتحكم فيني.. اكبر مني مالك زود عندي عن الإحترام.. غيره مالك عندي.. سعود : ماشاء الله يالإحترام اللي مقطعك..؟! تدخن قدامي..! و تكلمني معطيني ظهرك..! و فوقها لسانك طايل علي..! وليد ينفخ فمة بـ ملل اخرج الهوا من فمة : اسمع.. كلمني باللي تبيه.. تبي بالشغل جلست و سولفت عليك لين بكرة.. لكن تجلس تقول تدخن و ما تدخن.. هذا شيء ما يعنيك.. شيء يخصني انا لحالي.. تفهم لحالي.. سعود كتف يدينة : خلاص بشوف يخصك لحالك شلون ان درى ابوي.. وليد : اذا بتتبع اسلوب غازي و تهددني بأبوي ما راح القي لك بال.. انا اسوي اللي ابيه.. ما عادني بزر.. تحفظ حق الأخوة تنصحني.. زود عنها ما تسوية.. عساف : لا انت انهبلت.. مبين تارك عقلك عندهم و راجع بلاه.. صاحي..!! غازي : خلوه على راحتة.. انتم ما بغيتوا الا مصلحة وهو ماهو جاهل و عارف ويش هو ضرر التدخين.. ولو يكتب بالنت هالكلمة و يبحث بالصور بيشوف ويشي سوية السم بجسمة.. اذا اليوم هو بخير بيجية يوم و ينهد من اللي يشربة.. على قولة ماهو بزر عشان نتحكم فيه.. (وقف غازي عازم على انه يطلع) رجال شواربة خطت بوجهة و يرادد على شيء هو يعرف انه غلط.. طلع و تركهم مع وليد.. سعود متنرفز من وليد.. اللي مو مهتم.. سحب سيجارة ثالثة و هالمرة ما سحبها منه سعود.. و وليد يدخن قدامة.. نايف : تراهم خايفين عليك..ليش تعاند..؟! وليد هز اكتافة بلا مبالاة : شيء راجع لي.. سعود : ماشي يا وليد.. بسكت عنك لكن تأكد ماهو على طول.. بيجي يوم اربيك من جديد على قلة احترامك.. .. | |||||||||
|
| |
|
29-11-14, 10:02 PM
| #98 | |||||||||
| نجم روايتي ومشرفة سابقة وفراشة متالقة بعالم الازياء
| ام سعود : بس يا امي من متى و انتِ تصيحين..؟! ميار في حضن امها و شوفة سراب تركي مرهقة,, مرهقة حد الوجع لها.. ثلاث سنين متمسكة فيه و بحبة و برباط وثيق ارتبطت به تحت اسم زوجة.. ثلاث سنوات تشتكي من عذاب فراق اليم لـ روحها المحاربة وسط اقناع الجميع انفسهم بموتة و محاولة اقناعها بالتصديق و حل الرباط بينهم.. : ماما ماهو مصدقيني.. و الله تركي.. عيوني ما تخبط فيه.. انا اعرفة يا ماما و الله اعرفة.. ام سعود : اذكري ربك.. اخوانك يقولون اسمة راشد بن مسلم.. يعني هم ما يعرفونة..؟! بس يمكن يشبة لـ تركي.. و انتِ من زمان ما شفتية و تهيأ لك انه تركي.. الله يخلق من الشبه اربعين.. و انتِ شفقانة عليه.. ميار غطت عيونها بيديها يعني غلطانة..!! هي شوقها انهكها و خلاها تتخيل تركي بالناس..؟!! ام سعود تكمل : يا امي ما يصير اصلاً اللي تسوينة الرجال ما يندرى عنه شيء.. انتِ تهدمين حياتك بإنتظارك له.. ابوك و اخوانك شايلين همك اكثر من باقي خواتك.. و بعد اللي سويتية ما ظنتي بتبقين على ذمتة.. فزعت جالسة : لا.. ما راح اسمح لكم.. الا اني اتطلق منه.. لا يا ماما تكفين لا تقولين كذا.. دخلت جود بعد ما طقت الباب : السلام عليكم.. : وعليكم السلام.. جود : سعود برا قال يبي يشوف ميار.. ام سعود : الله يستر ..(تناظر ميار) تحسبينة بيسكت ما تعرفين اخوك و الله اكيد انه مشتط وما احد ماسكة عنك.. زين اصلاً اللي اخوانك مخلينك للحين عايشة.. ماهي ناقصة قلق عشان امها تزيدة.. هي خايفة على تركي الغائب في الواقع الحاضر في روحها و خايفة على نفسها من اخوانها.. و قلقة من كل شيء.. حتى من انهم يجبرونها تنفصل عن تركي.. جود : ادخلة..؟! ام سعود : دخلية يمه و الله يعين.. بخلي جوالي طارف عشان يلحقك ابوك قبل لا يذبحك.. ميار : ماما خلاص.. تكفين خلاص.. سعود اخوي و اخواني كلهم على راسي و انا ما سويت شيء غلط ماهو بيدي اللي صار كلهم يلوموني ماهو بيدي افهموني تكفون و الله تعبت (نزلت راسها على فخذها تبكي بنحيب) ما احد فيكم رحمني.. دخل سعود وهو يشوف ميار جالسة على طرف السرير ثانية رجولها تحتها و مدنقة تبكي : ميـــار.. ام سعود حاطة يدها على ظهر ميار تطبطب عليها لفت على ولدها : هلا سعود.. سعود سكر الباب و اتجه لميار جلس جنبها : افااا كل ذا صياح..؟! ليش بالله مين هو اللي مزعلك..؟! ميار رفعت راسها عيونها صغرت من صياحها و خشمها و خدودها حمرا : اللي صار ماهو بيدي.. خلاص انا سمعت منكم كلكم.. يكفي.. سعود : لا ما بعد سمعتي اللي عندي.. بس ابيك قوية.. اذا انتِ على ذا الحالة ما اقدر اقولك من خوفي عليك..!؟ ام سعود زاد قلقها على بنتها و افكارها تودي و تجيب : خير يا ابوي ويش فيه.. تكفى طمنا و الله قليبها ماهو مرتاح.. سعود بهدوء عشان ميار ما تنفجع و يصير لها شيء من زود الفرحة او القلق و الخوف : ميار هي اللي كانت صح .. و احنا كلنا غلط.. ميار هزت راسها يمين و يسار بشويش من غير لا تفهم شيء.. وكأنها تقوله عيد..!! ام سعود : ويش يعني ذا..؟! سعود : راشد هو تركي.. و تركي هو راشد.. اتسعت عيونها صدمة .. و كأنها تتلقى الخبر.. قلبها و عينيها هم اللي كانوا يخبرونها انه تركي وما احد غيره اللي شافتة.. لكن الضغط من اخوانها و امها يخليها تراجع الأمر من جديد خصوصاً ان شوقها صار يوهمها بأشياء مثل ما قالوا لها.. لكن اللي شافتة هو تركي.. تركي بن سبف نفسة.. ام سعود : يا مثبت العقل و الدين.. انت ويش قاعد تحكي..؟! سعود عيونة على ميار الضائعة روحها ما بين فرحة رجعة و الصدمة لها بـ واقعها راشد!!: اقولك يمه راشد هو نفسة تركي.. همست ميار : كيف..!! راشد تركي..؟! اطلق سعود تنهيدة : ما اقدر اقولك على التفاصيل لأنها معلومات امنية.. لكن تركي فقد الذاكرة من ثلاث سنوات و عاش بشخصية راشد عند ناس و اشتغل معانا.. وقت ما شفتية هو كان يعاني من صداع له فترة طويلة يعاني منه و سببة ذاكرتة اللي فاقدها.. ميار : ع.. عشان .. كذا .. ما عرفني..!!؟ سعود يبي يطمنها : الدكتور يقول احتمال ترجع له الذاكرة بس ما عنده وقت محدد يقدر يعطينا اياه.. لكن ان شاء الله قريب مع الأدوية و محاولة التذكر من اهلة.. ام سعود : يعني هو ما يعرف نفسة..؟! سعود : و الله يمه ما ادري بس ما كنه يعرف نفسة او انه ضايع بين شخصين راشد و تركي.. لكن ان شاء الله انها فترة و تعدي.. ميار : بشوفة.. هو كان يناظرني يعني يمكن يتذكرني.. لازم اشوفة.. سعود بحزم صارم : لا.. قلت لك امن.. ما يصير تشوفينة.. لو بتشوفينة ممكن تروحين فيها.. شايفة كل اللي صار لـ وعد.. ممكن يصير لك اردى منه لأنك زوجتة.. و هو لا تذكر كل شيء بيتذكرك لا تشيلين هم هالشيء اهلة هم اللي بيساعدونة.. انتِ خليك بعيدة عن الموضوع.. ميار : لا .. مستحيل ما اقدر.. و الله بموت.. سعود : قلت لا.. ما احد راح يسمح لك.. اقولك ما يصير تروحين عشان خايفين عليك.. ممكن يأخذونك و الله ما يرجعونك عشان يقهرون تركي فيك.. تتوقعين لو رجعت له ذاكرتة بيقول ايه تعالي لي خليني اشوفك..؟! مستحيل لأنه بيعرف انه بيعرض حياتك للخطر.. ام سعود : يا أمي اصبري اللي صبرك سنين يصبرك فترة.. ميار ضربت فخذها : الى متى .. تعبت و انا صابرة.. ابي اتطمن عليه.. انا شفتة ماهو طبيعي.. و الله ماني مرتاحة.. تعبت و الله تعبت.. سعود : اصبري فترة اوعدك يا ميار اذا حسيت ان الوضع امان ابي اخذك بنفسي له.. قولي الحمدلله الحين عرفتي انه عايش و هنا يعني تيسر الموضوع كثير ماهو احسن من اول..؟!! حزت راسها بإية من غير لا تحكي.. عبرتها متفجرة بحنجرتها.. يمنعونها من شوفتة بعد ثلاث سنين غياب.. و بعد ما شافتة دقايق هو فاقد ذاكرتة فيها.. و هي متشفقة عليه و انتبهت لتفاصيل التعب في وجهة.. سعود : خلاص اجل اصبري.. بس ادعي ربك الله يحمية و يشفية و ينهي الموضوع على خير.. الجئي لـ ربك و بس.. ومثل ما فرجها عليك برجعتة بـ يفرجها عليك بشوفتة طيب ان شاء الله بس قولي يارب.. ميار دنقت حتى تنطق بنبرة محملة بالوجع و الرجاء : يـــارب.. .. المغرب.. في جلسة بدوا يتأقلمون عليها.. الشباب جميعاً مع الرجال على رأسهم ابو عبدالرحمن.. نايف جوالة بيدة و بـ جو بعيد عن اجوائهم.. يسولف بالجوال و مو منتبة لأحد منهم.. راكان : بدا يطقني الملل.. (ما خلص كلمتة الا جوالة يطق رد مبسوط) هلا يا اخوي.. بخير جعلني ما افقدك.. افا عليك فينا الشدة ليش لا و الله اني طفشان.. ههههههههههههه لا تظلم مشاري ماله دخل.. خلاص وين نتقابل..؟! اهم شيء صباحي..!؟ ابد ما حولك احد.. جعلك سالم.. مع السلامة.. (ناظر مشاري) يسلم عليك حسام.. مشاري : عليك و عليه السلام.. من كلامك بتطلع..؟! راكان : ايه و رجاءاً ما ابي محاضرات من احد.. بروح ابسط عمري.. بدال هالحكرة اللي ملينا منها كننا حريم خايفات و متخبيات ببيوتهن.. مشاري بـ أسلوبة اللين متفاهم : الله يرضى لي عليك.. لا تعاند.. و الله من خوفي عليك.. راكان : ادري بس هذا هم يطلعون ويروحون و يجون.. من حقي انا بعد اطلع.. مشعل : خذني معك تكفى ضايقة فيني الوسيعة.. ابو سعود : انتم من جدكم و الا انهبلتوا.. وقف راكان : انا ما انهبلت .. و بنهبل اذا جلست مقابلكم 24 ساعة.. (ناظر مشعل) يالله قم.. مشعل وقف.. ابو سعود : مشعل..؟!!! مشعل : الله يخليك لي.. ابي اشوف الناس انكبت و الله.. ابي اشوف احد جديد.. سعود يناظر مشعل مقهور منه من بعد وليد واللي يسوية : انهبلت انت واخوك.. كل واحد بيمشي راية..؟! مشعل مل من الوضع اللي جالسين فيه : انا مالي دخل بأحد.. و من جد طفشت.. صار لي كم يوم ما شافت عيني الشارع..؟! احمد : مشعل لا تعاند من مصلحتك.. خايفين عليك..!! مشعل رفع حواجبة : خايفين علي (ابتسم) كان اولى تخافون على غيري.. و مشى و وراه راكان.. سعود : ماشاء الله الناس صارت تخيط و تفصل من غير لا تشور احد..؟! ياسر : معاهم حق.. من جد طفشنا.. انا عني بكرة بداوم.. بشوف شغلي ما ادري لو الدنيا سايبة.. ومن الحين اقولك لا تسوي لي سالفة انا بسوي اللي ابيه من غير لا احد ينصحني.. ماني بزر احد يخاف عليه.. ابو عبدالرحمن بحدة حتى يسكت الجميع: ابك انتم ما تريحون الواحد.. ما عندكم سوالف تونس.. ما غير تهاوشون..؟! ابو عبدالله بصوت راكز : اقول يا عمي مساعد .. يومنا هنيا.. و احنا صرنا اهل.. و ان شاء الله قريب نفرح بالشباب كلهم.. حتى لو هي نتايج التحاليل تأخرت عن اليوم.. غازي كان هاديء جداً او بالأصح مو مبالي بـ شيء.. و كأنه ما يدري اخوة ويش يقول.. و الحقيقة ان اللي يقولة اخوة ما يثير اهتمامة.. مجرد شيء بيسوية عشان امه ترضى عنه و يقول انه خطب.. ابو عبدالرحمن : ان شاء الله.. بس تطلع نتايجهم و تتيسر امورنا كلهم يملكون.. ابو عبدالله اعتدل جالس : يا عمي احنا جماعة وحدة.. ولو اننا مو من فخذ واحد.. لكن عرقنا واحد.. و الدم ما يصير ماي حتى لو اختلفنا من سنين ماضيات.. و الحكي في الفايت نقصان في العقل.. ابو عبدالرحمن : عداك العيب يا ابو عبدالله انا اشهد انه منطوق رجال من ظهر رجال.. احنا كان بيننا و بينكم بنياتنا الثنتين.. و الحين بيصير بيننا ارواح متوالفة ان شاء الله.. كلهم مستغربين المقدمة اللي يتكلم فيها عامر.. و منتظرين يسمعون ويش وراه.. حتى عيالة ما يدرون ويش بيقول ابوهم.. بس اكيد انه ما يقول هالحكي كله الا وراه شيء.. ابو عبدالله : و احنا يا عمي يشرفنا نسبكم و قربكم.. ما هو بس بـ ولدي عماد.. و لا ببنياتي (يقصد شوق و هنادي).. احنا نبي قربكم و نخطب بنت ابراهيم الكبيرة لـ اخوي غازي. صــــدمة...!! اتسعت عيونهم من الصدمة.. طبعاً عيال ابراهيم هم اكثرهم صدمة بالخطبة.. ندى.. و الثانية.. لكن الصدمة تحولت لـ غضب شديد على رد جدهم.. ابو عبدالرحمن : و الله انها ما تعرف غيرة حليلة ان الله كتب لكم.. هي من نصيبة.. ابو عبدالله ما توقع ان الموضوع ينتهي بـ هالسرعة.. لكنه نطق برزانة : الله يكبر قدرك يا عمي.. مير احنا نبيكم تنشدون البنية.. من حقها تقرر حياتها هي بـ تكون الثانية.. كان على وشك ياسر يسفل فيهم و يأخذ موضع الهجوم على خطبة ما يدري شلون اقدموا عليها.. لولا ان عمة بندر مسكة وهو يصر على اسنانة : اركد.. حكيك بيصغر ابوي.. اصبر.. ياسر يناظر عمة بندر حمقان : يعني عاجبك..؟! بندر : لا.. و هجومك بعد ما راح يعجبني.. اصبر نشوف ابوك.. ابو سعود : دام ابوي عطاكم.. فـ بنيتي ما تطلع من شورنا.. غازي ما اهتم.. لو هو خطب قبل لا يصير له اللي سووه بناتة.. كان اصر على معرفة رأي ندى بنفسها .. كان خلى سعود يكلمها قبل و لا اقحمها بشيء.. اما الآن.. هو غير مبالي حتى بـ رايها.. مو لأنه ما يبيها.. و لا سمع منقود فيها.. لأنه ماهو حاس.. ماهو حاس بـ شيء ايجابي ابداً.. مشاعرة المكسورة بعد توأمة خلاه ما يفكر بـ طريقة صحيحة.. او ممكن يطري عليه الصح و لا يبي يسوية لأنه ماهو مهتم.. ابو عبدالله : اجل على بركة الله.. ان شاء الله يملكون مع الشباب.. لحظات حتى يقومون عيال ابراهيم.. واحد وراء الثاني.. و اولهم ياسر و حاتم ثم خالد و احمد و اخرهم سعود.. في غرفة جمعتهم.. معصبين.. الا مفولين.. من هالخطبة اللي انتهت حتى من غير لا ينرد الشور لأختهم.. و ياليتها الأولى بحياتة ما كانوا اعترضوا لكنها الثانية.. و الأكيد ان ردود افعالهم ماهي وحدة و الا اتفقوا على ردة فعل وحدة.. فيهم اللي معارض و بقوة و فيهم اللي متقبل الموضوع عادي.. يظل رجال غازي ينشرى و ما ينباع.. و نسبة مكسب.. ياسر يفتر بالغرفة : شلون جدي و ابوي يعطونهم من غير لا ينشدونها.. الثانية.. الثانية بحياتة ماهي الأولى..؟!!! احمد : يعني ويش تبي ابوي يسوي..؟! جدي هو اللي عطاهم و ابوي لو تنطبق السماء على الأرض ما تراجع عن كلمة قالها جدي.. خالد : يعني تبي هالخطبة تتم..؟! من بعد عساف اللي هي اول بختة تأخذ غازي و الثانية بعد..!؟! سعود بمحاولة لـ تهديئة الموضوع : اركدوا.. الموضوع ماهو سيء.. غازي بنفسة ما فيه عيب.. حاتم : بس متزوج يا سعود.. انا مو معترض على موضوع انها تكون الثانية.. لكني معترض ان رأيها ما انوخذ.. من حقها هي اللي تقرر حياتها لأنها هي اللي بتعيشها ماهو جدي و لا ابوي.. يمكن ما تقدر تحمل تكون الثانية بحياتة و هي تشوف عنده مرة و بنات..!! ياسر : ماهو على كيفهم يحلون و يربطون من غير لا يشورونا ما احنا جدران جالسين.. احمد : احنا ما نوقف ضد ابوي.. و دام ابوي قال موافق فا غصباً عنك توافق.. مالك كلمة من وراه.. خالد : انتم ليش ما تحسون..؟! مستوعبين.. ان غازي بالأربعينات و عنده اربع بنات..؟!! و ندى ما يعيبها شيء..؟! ليش تبون تزوجونها انسان ما يصلح لها..؟! ما فيه بينهم أي توافق.؟! سعود : خالد ماله داعي نضحك على بعض.. ندى ماهي صغيرة.. كم شهر و بتعتب على الـ 28 قلت فرصها بالخطبة .. و بعد فركشة خطبتها من عساف بتقل زيادة.. الناس بتنقدها و بيقولون لو فيها خير ما تركها ولد عمها.. فكر فيها شوي.. تبون لها الشين و الا الزين..؟! ياسر اتسعت عيونة وهو يناظر سعود : يعني انت راضي..؟! سعود : ايه.. لو فكرت في الموضوع بـ شوية ركازة.. بـ تشوف غازي مكسب لها.. تكون هي الثانية بحياة رجال و يعزها و يكرمها و لا تكون الأولى و ما تتهنى بحياتها و تقضيها كلها مشاكل.. خالد حط رجل على رجل : بتفهمني أي وحدة من خواتي لو جاها واحد طلبها الثانية ما ترفضة..؟! تذكر يوم حمد خطب وعد الثانية ويش سويت انت يوم دريت..؟! سعود : تتوقع لو ندى اصغر من كذا كنت بـ وافق اكيد لا.. كنت بـ أقول يمكن يجيها ازين منه واحد عزابي هي اول بختة.. و لو وعد كانت بنفس مكان ندى الحين كنت بـ وافق انا ماني مفرق بين خواتي.. و حمد يوم خطب وعد الثانية حتى هي اصغر من عيالة ماهو صاحي.. ابوي من حزتها رفض لأنه مستحيل ينفع لها.. و حمد ترى ما جاء و خطبها.. الا انه سمع انه ترد خطابها وهم عزابية قال يجرب حظة يمكن تبي لها واحد متزوج..!! و مبين انه سأل عن وعد كثير عشان كذا صمل و تجرأ يخطب من عندنا له.. ياسر : ويش سمع ..؟! ويش تقصد..؟! سعود : اقصد سأل عن مواصفاتها و راقت له.. كلنا نعرف ان وعد هي اكثر وحدة من خواتي انخطبت.. و اغلب اللي خطبوها عزابية و ردتهم فا هو جانا يجرب حظة بنت صغيرة و حلوة ترجع له شبابة.. احمد : انا مع سعود.. ماني شايف غازي فيه عيب حتى لو خاطب ندى الثانية.. ابوي لو ما تزوج خالتي منيرة و بغى يتزوج وحدة رابعة ما بعد تزوجت و لا احد فيكم بيعترض طريقة ابد.. الرجال ما يعيبة انه متزوج.. تعيبة اخلاقة.. و اخلاق غازي كلنا نعرفها.. ياسر ينقل نظراتة بين احمد و سعود : اشوفكم صفيتوا الاثنين مع بعض.. و عادي تخلونة يأخذ ندى.. سعود بـحدة : و انت بعد بيكون عندك عادي و بتفرح لها.. لأن ابوي عطاة كلامك و اعتراضك ماله معنى.. دخل بندر مقهور و جلس : استغفر الله العظيم.. جلستنا بهالمزرعة غلط بـ غلط.. يحلون و يربطون بمواضيع الزواج و لا همهم شيء.. بقي يزوجون ولد خالد و بنتة و نقضي.. ياسر يناظر اخوانة و يأشر على عمة : شفتوا حتى عمي ماهو راضي.. لأن الموضوع اصلاً ماهو منطقي.. بندر : لا بالله ماني راضي.. و اللي ما ارضاني اكثر ان ابوي عطاة و اكد عليه ابراهيم يوم قال بنتة ما تطلع من شورة.. ما هو رايح فيها الا البنية.. ابوكم استخف.. ما اعتبر من اللي سواه بـ وعد بيكمل على ندى..؟!! ابوكم مرات يحسسني انه لاقي بناتة بالشارع.. سعود : عمي الله يهداك ويش هالحكي.. هذا و انت تعرف ابوي و تدري ان ابوي ما يرخص وحده فيهن ولو هو شايف ان غازي ماهو كفو ما كان عطاة.. بندر : تكفى لا تنرفزني.. لا تخليني اطلع الخمير و الفطير.. بـشوف شلون بيتصرف بـ موضوع ميار.. و كيف بيزوج سها و دانه و جود.. ياسر يناظر عمة : و الحل يا عمي.. دامنا بأول الموضوع خلنا نتصرف و نمنعة قبل لا يملك عليها و يطلع الموضوع من يدينا.. احمد : ما انتم صاحين.. كلامك هذا قولة لأبوي وشوف ويش يقولك..؟! كنكم شايفين ابوي ما عاد له فايدة وكل قراراتة غلط.. تتوقعون لو غازي ماهو كفو كان جدي عطاه..!؟ و ابوي رضى و اكد على كلام جدي..؟! لو ابوي ما يهمه زواج أي وحدة من خواتي كان كلهن متزوجات من زمان و معيلات.. لكنه يعرف الرجال و يعرف غازي بإنه كفو ينعطى حتى لو هي الرابعة ماهو الثانية.. .. جمع بناتة بغرفة كلهن.. يبي يشوف اخر التطورات و يتطمن انهن تراضن بعد اللي صار من وراء نهى.. سلمن عليهن كلهن و وقفن ينتظرونة.. ابو سعود آشر لهن على الكنب : اجلسن بتكلم معاكن.. ندى جنبها دانه وسها و جود لحالها و ونهى و وعد جنب بعض.. قبل لا يجلس مسك وعد من عضدها : تعالي.. وقفت و جلست جنبة لما جلس.. ناظرها وهو محاوط كتفها بيدة اليمين و باين له نصف ملامحها : الحمدلله على سلامتك.. وعد ببرود : الله يسلمك.. ابو سعود ناظر بناتة : شخباركن..؟! مرتاحات هنا..؟! جود تتحلطم : لا.. ترى ملينا نبي نرجع بيتنا.. ندى ناظرت جود : مرتاحات يبه ما علينا قاصر الحمدلله.. سها : بابا و الله طفش ملينا من الجلسة هنا.. ابي اداوم ابي اشوف ناس غير اللي هنا.. ابو سعود : مسرع مليتن ما صار لنا اسبوع حتى..؟! امداكن..؟! و بعدين الجامعة قلنا نأجل الموضوع فترة.. سها : بيعطوني حرمان يا بابا على غيابي.. و انت تعرف مشاكلي مع رئيسة القسم و الله غير تشوفني ماني كفو للتخصص.. ابو سعود : قلنا بنحل موضوع رئيسة قسمك و الحرمان لا تشيلين همة انا بجيب لك عذر طبي.. ما احد راح يعطيك حرمان و انتِ معاك عذر طبي.. ابو سعود ناظر ميار : ما سمعت صوتك ميار..؟! ميار رفعت عيونها لأبوها : عادي ما عندي شيء اقولة.. ابو سعود : سعود كلمك.. عشان تركي..؟! ميار : ايه.. بعد كل شيء يقولي خليك بعيدة لين نشوف الموضوع.. انا انتظرة من ثلاث سنين عشان اخر شيء تقولون هالحكي..!!! ابو سعود : سعود خايف عليك.. يكفي علينا وعد صارت بنص القضية.. و ما نبي نضحي فيك بعد.. و هو خايف عليك لو دروا انك زوجة تركي ممكن يسعون وراك.. ميار : انا زوجة تركي.. ماني زوجة راشد اللي جلس يتكلم عنه سعود.. بابا افهمني الله يخليك.. سعود يقول فقد ذاكرتة و محتاج احد يذكرة بحياتة.. ابو سعود بـ حزم حتى يقطع تفكيرها بالموضوع : ابوه و اخوانة بيتولون الموضوع.. انتِ لا تدخلين.. لا من قريب و لا من بعيد.. ميار : و ان رجعت له ذاكرتة و ما ذكرني عشاني ما كنت معاه.. تراكم تذبحوني يا بابا.. و الله تذبحوني.. ابو سعود : ميار الله يرضى لي عليك.. ما عندي استعداد اضحي فيك.. اصبري فترة بس يتأكد سعود ان كل الأمور بخير انا بنفسي بوديك له.. و اجلس معاك لين تقضين و متى ما بغيتي خليتك تشوفينة.. بس الحين اصبري اللي صبرك ثلاث سنين يصبرك فترة ماهي طويلة ان شاء الله.. ميار تحس ان الموضوع خارج عن إرادتها متفقين و مخلصين ما راح يسمحون لها و وجودهم بالمزرعة يزيد ضعف صعوبة شوفة تركي : بصبر.. بس بابا ترى حتى الصبر له حد و ينتهي.. ما اضمن لك نفسي بطول و انا صابرة بعد ما شفت حالتة.. ابو سعود : ان شاء الله بتصبرين لين الوقت المناسب.. بس انتِ لا تفكرين بالموضوع ما ابيك تتعبين.. ميار اطلقت تنهيدة عميقة تعبيراً عن وجع بعد ما بكت كل الليل و الصبح بحضن امها و زادتها عليها سعود بكلامة : شلون ما افكر حتى و انا ما عندي شيء يشغلني.. ابو سعود : بتتيسر من عند ربك.. استعيني بالله.. ميار : و نعم بالله.. جود : شكلك جامعنا عشان نسمع حكيك لـ ميار و تحط وعيد بحضنك..؟! ما كني انا الصغيرة مكاني ماهو مكانها.. ابتسم ابو سعود : ما عقلتي انتِ كل ما شفتك اخبل من قبل..؟! جود : و ليش اعقل و اكدر على خويطري.. خليني خبلة عشان ما اموت ناقصة عمر.. ابو سعود : بعد تقولينها قدامي بتزيدين خبال.. ما تستحين مني انتِ..؟! جود : باباتي كأني قلت لك شيء عيب ترى عادي قلت لك بصير خبلة يعني عادي ماهو شيء استحي منه.. لازم تكون متعود على اني خبلة.. ابو سعود : انا ما ادري شلون بزوجك اخاف تفشليني بالرجال..!! جود شقت الابتسامة وجهها : قول ان جايني عريس كود يطلعني من سجنكم ذا و ارتاح.. ابو سعود : عز الله العريس اللي بيخطبك ما يحتاج ينشد عنك بس يجي يتسمع لهالحكي و هذا وجهي (ضغط على دقنة باصباعة السبابة و الإبهام) كان شفناه مره ثانية... جود عفست وجهها : اول مره اشوف اب يحطم بنتة التعيبينة..؟!!! دانه : انتِ تعيبينة ماشاء الله..؟! و لسانك ما وقف اجل لو طيبة ويش بتسوين..؟! جود : قل اعوذ برب الفلق..!! اذكري الله لا تنظليني.. دانه : قلت ماشاء الله لا تخافين عيني باردة ما اصك احد بعين.. جود تمسح على شعرها بيديها الثنتين : بعد اخاف على جمالي لا تخربينة بعينك الصاروخية.. نهى وقفت : عن اذنكم.. ابو سعود : اجلسي.. ما بعد خلصت عشان تقومين.. نهى بصوت مرهق من البارح ما نامت : تعبانة بابا ابي ارتاح.. ابو سعود : اجلسي ماني مطول عليك.. (جلست نهى حتى يناظرها ابوها) ايش فيك..؟! نهى : كل السالفة سهرانة و ابي انام.. ابو سعود : ليش من متى صاحية..؟! نهى : امس العصر.. ابو سعود عقد حواجبة بقوة : ويش مسهرك فوق 24 ساعة..؟! نهى : مالي خلق انام.. جود : يعني الحين لك خلق تنامين..!؟! نهى رفعت رجولها و ثنتها : لا مالي خلق اسوي شيء.. جود بتسرع : كل ذا عشان اللي صار مع خالة مريم..؟!! نهى نزلت رجولها و ناظرت جود و احتد صوتها عليها : ممكن ما تجيبين لي طاري هالموضوع.. كل من شافنا تكلم علينا ما تملون انتم خلاص عاد.. ابو سعود : نهـــى.. (نظرتة نهى لثانيتين و بعدها شتت نظرها عنه).. ويش اللي صاير بينك وبين امك.؟! نهى : و لا شيء.. ما صار و لا شيء.. ابو سعود : نهى ادري للحين مو متقبلة الموضوع.. بس ما يصير اللي تسوينة.. انتِ بغيتي شوفتها و انتِ جيتيها بنفسك.. ما يصير تصدين امك بعد ما اعطيتيها امل ان كل شيء بيكون طبيعي بينك و بينها.. نهى : بابا سكر عالموضوع.. صدقاً انا تعبانة و ما ابي اعيد و ازيد بالحكي.. و لا لي خلق اتكلم بالموضوع.. الله يخليك لا تضغط علي.. من جد تعبانة و احس السخونة بترجع لي.. ابو سعود : بس ابي اقولك لا تحرمين نفسك من جنتك يا نهى.. ما انتِ صغيرة عشان تجهلين فتحي مخك.. نهى : ان شاء الله بحاول.. و الحين ممكن اطلع..؟! ابو سعود : ممكن ليش لا.. وقفت نهى حتى تبوس راسة مسك يدها و حط باطن كفة على جبينها و حس انها فعلاً مسخنة : لساتك على ادويتك..؟!! نهى وقفت عدل بعد ما كانت مدنقة على ابوها : لا شفت اني تحسنت و تركتها.. ابو سعود : عمرك سمعتي بمضاد حيوي يتركونة قبل يكمل سبع ايام..؟! نهى : بابا لا تكبر الموضوع هذا عشاني سهرانة بنام و اصحى و اصير زينة.. ابو سعود : استغفر الله العظيم.. قبلت نهى راسة من جديد و طلعت قبل لا يسمعها محاضرة.. ابو سعود : انتبهوا لها شكلها هلكانة.. ندى : لا تشيل هم يبه.. ابو سعود : تراضيتوا بعد اللي صار بيت ابوي..؟! سها : ما زعلنا عشان نرضى.. ابو سعود ابتسم : ما زعلتوا..!! ههههههههه ما كنت معكم وقتها ابد.. سها : الا صدق وقتها بس بعدين خلاص يعني أي خوات يتزاعلون ساعة ساعتين و كل شيء يرجع طبيعي و ما كأنه شيء صار.. ابو سعود رجع يده وراء وعد بعد ما شالها لما مسك نهى : و الشيخة ويش اخبارها..؟! وعد : عايشة.. ابو سعود : بس..!! عايشة..؟! وعد : ايه.. ابو سعود : شكلك زعلانة مني..؟! وعد : لا ليش ازعل..؟! ما يحق لي اصلاً ازعل على احد.. ابو سعود ناظر بناتة : اطلعوا كلكم عدا ندى و الشيخة.. فعلاً طلعوا كلهم بعد ما باسوا راسة .. و بقت ندى و وعد معاه.. ابو سعود : للحين زعلانات من بعض..؟! ندى : لا يبه كل شيء رجع طبيعي.. مثل ما قالت سها ساعة ساعتين و يرجع كل شيء طبيعي.. ابو سعود : اكيد..؟!!! ندى ابتسمت : ايه.. ابو سعود ابتسم : طيب.. ابوك ويش له عندك..؟! ندى : حياتي كلها.. ابو سعود : الله لا يحرمني منك.. انتِ تدرين انك غالية عندي.. انتِ غير بما انك اكبر البنات.. وعد تنرفزت.. ما تنكر ان الكلام نرفزها ضعف لو وعلاقتها بأبوها عادية.. و فوق هذا هو سمعها الحكي هي من بِد خواتها.. ندى : الله يخليك لي.. ابو سعود : ابيك تدرين يا امي مو كل شيء بالحياة نبيه نحصلة.. و مرات يصير لنا اشياء حتى لو رفضناها بالبداية بس نعطي انفسنا الفرصة لأننا نتقبلها بنحبها وما عاد نستغني عنها.. ندى توترت حست ان الموضوع فيه عساف و الموضوع بيتكرر عليها خافت ان اخوانها مغيرين راي ابوها.. : يبه ليش هالحكي..!؟ ابو سعود : جاك عريس.. سكتت ندى ما هو من طبعها تتسرع تبي تلقط الموضوع كله عشان يكون لها حق انها تتكلم.. ابو سعود : بصراحة ما يعيبة شيء.. رجال له مركز و اسم و نسب.. و راعي دين يخاف الله.. و يوم خطبك ابوي عطاه.. و انتِ تدرين اني ما ارد ابوي و اعرف انك ما راح تفشليني و تقصين وجهي و بتفهمين الموضوع.. ما راح تسوين لي سالفة اني ما اخذت شورك.. زادت توترها ابوها ما قال اسمة.. و فوق هذا يقول ان جدها اعطاه..!! يعني الموضوع حسبة منتهي.. ابو سعود : بس عنده شغلة ممكن ما ترضيك و انا ما اشوفها عيب لأنك لو تشوفينها عيب بيكون هالعيب فيني بعد.. ناظرت ابوها و هي تشوفة خالي من كل العيوب حتى لو خواتها يشوفونة متحجر هي ما تشوف التحجر اللي يقولون عنه.. حتى لو خواتها يقولون كابتهم و اشياء كثيرة حارمهم منها هي ما تشوف هالحرمان.. اما يكون عيب فيه..!! هي ما قد شافت بأبوها أي عيب.. ابو سعود : متزوج.. اتسعت عيونها.. ما كانت هي الوحيدة اللي انصدمت وعد بعد انصدمت من الكلمة.. ندى : و كم بيكون ترتيبي بين حريمة..؟! ابو سعود : الثانية.. ندى : يعني ممكن يطق على راسي الثالثة و الرابعة..؟؟! ابو سعود : و اللي يتزوج وحده ممكن يتزوج ثنتين و ثلاث.. يا امي و الله رجال ما فيه منه.. ندى حست بالعبرة خنقتها : ومين هذا اللي ما قدرتوا تردونة و تعطونة حتى لو اني الثانية بحياتة و لاني اول مره بحياتة..؟! ابو سعود : غازي بن حمدان.. اكيد سمعتي باسمة كثير بالفترة الأخيرة.. دب الرعب بـ عروقها و هي تتذكر صراخ بنتة البارح : لا يبه تكفى و الله يذبحني.. ابو سعود ابتسم : ويش يذبحك.. هو طالبك زوجة مو ذبيحة للعيد.. هو صح تشوفينة تقولين انه عصبي و شديد لكن ما فيه رجال بالدنيا ما فيه رحمة.. ندى راح صوتها بـ تبكي : لا الله يخليك يبه الله يخليك.. و الله يصبحني بـ طراق و يمسيني بـ طراق.. عادي انا ما عندي مانع اتزوج أي واحد لو الرابعة.. بس غازي لا الله يخليك غازي لا.. ابو سعود زادت ابتسامتة بنتة شكلها من جدها خايفة : ويش هالحكي ما راح يصبحك و يمسيك بـ طراق انا واثق فيه.. لو ادري انه ممكن يمد يدة عليك ما قلت له اني موافق.. ماني مرخصك عشان اسمح له يضربك.. ما سمحت له نفسي امد يدي عليك عشان اسمح له يمد يده عليك.. ان كان كلامة كله يبي يريح فيه ندى.. فا أخر جملة كفيلة بأنه يجرح فيها اللي مجلسها جنبة ما سمحت لنفسي امد يدي عليك عشان اسمح له يمد يدة عليك.!! يعني لو عماد يضربها عادي دام هو سمح لـ نفسة يضربها.. !!!!.. ندى جالسة و ترجف كأنها تقلي على نار ماهي ثابتة بمكانها : و الله خايفة يبه و الله بموت.. ابو سعود : بسم الله عليك.. ويش هالحكي..؟! بخليك تشوفينة و يشوفك.. بتشوفين انه رجال فيه خير.. و اسمعي من اخوانك بعد و استخيري.. ماهو عيب يا ندى تكونين الثانية.. ندى : يبه عادي قلت لك لو اكون الرابعة ما يهمني.. بس غازي و الله اخاف منه.. ابو سعود : ليش ويش انتِ سامعة عنه..؟! ندى دنقت ما تبي تقولة انه ضرب بنتة البارح و صراخها الكل سمعة.. حست بهالشي هي تجرح ريما لأن هذا الشيء خاص في ريما و اهلها ما يحق لها تقولة لأي احد حتى لو سمعتة.. ابو سعود : ما قلتِ لي ويش سمعتي..؟! ندى : ما سمعت .. بس الكل يقول يخوف.. ابو سعود : اجل لا تحكمين على شيء قبل لا تشوفينة.. شوفية و اجلسي معاه بعدها ما تدرين يمكن قلبك يرتاح له.. ندى : لا ما ابي اجلس معاه.. بس.. خلاص انا بستخير.. بشوف امي.. ابو سعود : اللي يريحك.. ما تبين تشوفينة كيفك.. و اذا تبين ما عندي مانع بكلمة.. بس لا تفشلين ابوك يا ندى.. (ناظر وعد) حتى الشيخة ممكن تقولك رأيها بـ خالها.. وعد عقدت حواجبها من غير لا تناظر فيه : شكلك نسيت اني ما احب لها الخير و اني انانية و حسودة.. ندى : وعد قلنا الموضوع انتهى..!! ابو سعود : قلتِ تراضيتن يا ندى..؟! وعد : هالكلام مو ندى اللي قالتة انت اللي قلتة.. ندى بـ رجاء لـ وعد تقفل السيرة : وعد بليــــز!!! وعد : انا ايش قلت لك البارح..!؟ ما قلت لك لا تدخلين بيننا..؟!! لا تحشرين نفسك بالموضوع.. مو انتِ سعيتي ان بابا يدري بشيء كان ماضي ما عاد يعني شيء لأحد.. لا تخربين الباقي بعد.. ابو سعود شد على وعد ما كان يبيها تعصب و تنفعل عشان كذا حضنها اكثر : و لا كأني جالس جنبك..!؟ تصارخين عليها قدامي..!؟! ما اعرف يا وعد شلون افهمك.. تصرفاتك ما تعجبني.. احيان اشك اني ربيتك مثل اخوانك..! ليش تجازيني بهالشكل..؟! علميني ويش الخطأ اللي ارتكبتة بتربيتك..!؟ وعد تعض شفايفها بـ قوة.. و لا تحاول حتى تناظر بـ ابوها.. ابو سعود : ما تردين علي..؟! علميني ويش هو الخطأ عشان نصلحة و ننتهي من الموضوع.. بدل ما كل شوي مطولة لسانك..؟! ندى : يبه الله يخليك.. خلاص انسى الموضوع.. احنا تصالحنا.. وهذا هو المهم.. و الموضوع صدق قديم وما ينلقى بال.. ما فيه شيء يستاهل زعلك و زعلها.. بس وعودة تعبانة من بعد ما اسلبت (سقطت= اجهضت).. يومين و بتحسن نفسيتها.. ابو سعود : ندى لا تدافعين عنها و عن غلطها.. لا تخلينها تحس انها ما غلطت.. انا للحين ماني راضي عنها.. وعد ابعدت يده عن كتفها و لفت جهتة : ما انت راضي..؟! و لا انا راضية.. انت تغلط علي من غير لا تحس و لا تحسب حساب لخاطري.. كل مره تظلمني.. كل ما صار أي خلاف بيني و بينك قلت انك ما ربيتني.. اوكِ انا ما تربيت و قليلة ادب و حسودة و ما احب الخير لأحد وما استاهل انك ترضى عني.. بعد فيه شيء بخاطرك ما قلتة..!؟! ناظر بـ عيونها حسها غير.. غير عن بنتة اللي من فترة ماهي بعيدة كانت هي وعد..!! هاذي غير.. غيـر عن وعد بنتة.. حتى نبرة صوتها غريبة عليه.. و كأن الحياة انسحبت من نبرة صوتها.. مد يده حتى يلامس خدها : أنتِ تعبانة..؟!!! هزت رأسها بـ لا و طلعت بعد ما باست راسة.. ناظر ندى اللي كانت حاضرة جلستة.. ما توقع من وعد تطلع و هو يقولها ماني راضي عنك..!! ما يهمها رضاة..؟! لو ما يهمها ما كان باست راسة..؟! ايش التناقض اللي تعيش فيه..!! ندى قامت و جلست جنبة : يبه لا تضايق.. هي بس مرهقة من كل شيء.. اصبر عليها يومين و هي بتجيك تدور رضاك.. ابو سعود : انا اعرف بنتي اعرف وعد.. بس هاذي غير..! ندى ويش صاير لها..؟! تهاوشت مع امها..؟! ندى : لا.. نهى هي اللي تهاوشت مع خالتي مريم.. ما ادري ويش صاير لهن الثنتين.. بس وعد ممكن للحين ما تخطت ازمة انها اسلبت.. لكن نهى البارح قالت لخالة مريم كلام كثير ليـن ضربتها.. ابو سعود رفع حواجبة : مريم ضربت نهى..؟! ندى : ايه.. انا مستغربة من نهى.. و دخلت بعدها عند وعد وما طلعت الا لما ناديتنا.. لو لقيت العذر لـ وعد باللي تسوية ماني لاقيتة لـ نهى.. ابو سعود : يمكنها كانت مسخنة و خارتها بالحكي..؟! شفتيها ويش سوت يوم سخنت قالت حكي ما ينقال..!! ندى : ما كان فيها شيء .. بس سها تقول هي متأثرة بـ وعد.. ابو سعود : شلون..؟! نهى متأثرة بـ وعد..! اولاً نهى اكبر.. ثانياً نهى شخصيتها ماهي ضعيفة عشان تتبع احد براية.. لو قلتِ سها دانه اقولك ايه ممكن أي احد يأثر عليهم بس نهى لا.. ندى : قلت لـ سها انها شخصيتها قوية ماهي ضعيفة عشان احد يأثر عليها..!! قالت لي ان نهى ما راح تتأثر بـ احد فينا كثر وعد.. بدليل لما نهى قررت تشوف امها وعد كانت بعيدة.. بينما لو هي قريبة ما راح تشوفها.. و الدليل اللي يصير الحين.. و لو نهى تبعد عن وعد ممكن بعد فترة تلجأ نهى لأمها.. ابو سعود : يعني انتن تقولن ان وعد تعبي راس نهى..؟! ندى : لا.. ابو سعود كتف يدينة : يالله .. توك ويش قلتِ..؟! ندى ابتسمت ابوها مو فاهم فلسفة سها : مو شرط وعد تعبي راس نهى.. لكن نهى لما تشوف وعد اللي هي اصغر منها ترفض القرب من امها بتتأثر فيها.. لأن وعد بتتكلم بالموضوع بشكل سلبي لخالة مريم انتِ تركتينا وما همِناك و من هالحكي و نهى لما تسمعها بما ان وعد هي الوحيدة اللي عايشة معاها بنفس المشكلة بتأثر فيها.. ابو سعود : طيب يعني اذا ابعدت الثنتين عن بعض ممكن يصلح حالهن مع امهن..؟! لأن خوالهم كلموني كم مرة.. و انا بعد هالوضع ماهو عاجبني و ما ابيهن يضيعن جنتهن.. ندى : ممكن.. بس يبة لازم تعرف ان خالة مريم لازم تجتهد.. هي ولا مره سعت انها تجلس معاهن لحالها.. هي ما جربت هالشيء بصراحة هي مقصرة معاهن.. تطالبهن بإحترام و حب و اشياء نهى و وعد يشوفون مالها حق فيها هن للحين ما شافن منها الا الجانب السيء.. ما اعطتهن شيء من حنانها حتى لو بالإجبار.. اتوقع اذا ضغطت عليهن بتلقى شيء ايجابي ولو ان البداية بتكون صعبة بس ما لازم تيأس لأن اللي سوتة ماهو قليل خصوصاً ان وعد عرفت ان خالة مريم كانت تبي تسقط الجنين وقت ما كانت حامل فيها.. ابو سعود استغرب : ومين اللي علمها..؟! ندى : ما اعرف و الله.. عشان كذا خالة مريم لازم تحمل نتيجة اللي سوتة لأنها اخطت و لازم تتحمل نتيجة خطأها.. مهما كان هذولي بناتها و لو اليوم صدنها و بكره صدنها اللي بعده بيلجئن لها هي لأنها امهن و شافن طيبتها بعد ما كانن يعرفنها.. ابو سعود : طيب انا بقول لخوالهن هالكلام.. بس ويش رايك احسن الثنتين مع بعض و الا كل وحدة لحال..؟! ندى : حالياً ما تقدر تبعد الثنتين عن بعض.. هن بيبتعدن اذا رجعنا لـ بيوتنا وعد بترجع مع عماد و نهى بتتزوج فيصل.. وقتها ممكن تشوف كل وحدة لحالها من غير انت ما يكون لك يد.. لأنهن لو حسن ان فيه احد بيبعدهن عن بعض ممكن يتهاوشون مع الكل.. لكن خالة مريم لازم تجرب حظها الحين لو بالغصيبة.. لو دخلت عنده في جناح عماد اصلاً ما راح يتجرأن يطردنها برا.. ممكن يقولون لها لا تدخلين بحياتنا اما يطردنها من المكان اكيد لا.. ابو سعود ابتسم : ان شاء الله ما اكون اخطيت و غازي يعرف قيمتك.. ما قدرت تبتسم شتت نظرها عن ابوها.. رجع لها الخوف من جديد.. معادلة فاشلة يطغى فيها الخوف على كل شيء.. ما تقدر تتخيلة الا يضربها!!! رفعت نظرها لأبوها : يبه.. ليش هو قرر يتزوج على زوجتة..؟! ابو سعود : كنت متوقع تسأليني هالسؤال.. بصراحة ما ادري.. وما يهم السبب لأن المعنى واحد.. هو بيتزوج وما خالف الشرع في شيء.. ندى : بس هو صار له مدة طويلة مع زوجتة.. ما فكر يتزوج عليها ايش معنى الحين..؟! يعني لو زوجتة فيها شيء ما راق لحضرتة كان تزوج عليها من سنين مو من الحين.. عدا ان بناتة صاروا كبار..؟!! و انا شفت زوجتة ماشاء الله كاملة و الكامل الله ذربة و سنعة و ما فيها عيب لا خَلقي و لا خُلقي..!! ابو سعود : الرجال اذا اشتهى يتزوج بيتزوج متى ما طق براسة.. انا تزوجت على ام سعود بعد سنة و شوي من زواجنا.. و تزوجت على ام احمد بعد سنة و شوي بعد.. هذا يعني ان فيهن عيوب.؟! ندى : لا بابا و الله ما قصدت.. طيب متى تزوجت خالة مريم..؟! ابو سعود : يعني بعد اربع سنوات تقريباً ماني فاكر بالضبط كبرنا.. خلينا من سالفة زواجي.. ابيك تفكرين صح بالموضوع و تستخيرين.. ندى : ان شاء الله.. انت ارضى علي و الله بيكتب لي الخير من رضاك انت و امي.. ابو سعود ابتسم : راضي عليك .. الله يرضى عليك دنيا و آخرة.. ما ابيك تتركين خواتك.. ادري لسان كل وحدة ويش طولة بس انتِ الكبيرة و العاقلة.. ندى : و الله جالسة احاول.. و ان شاء الله اني بقدر عليهن.. .. في جناح عماد .. نهى منسدحة : تقولينة من جدك و الا تمزحين..؟! وعد : كلام ابوك..!! انا خاطري افهم جنس الرجال كيف يفكرون..؟! و مو بس كذا تخيلي بابا يقولها اذا تشوفينة عيب فا هو فيني هالعيب.. يضغط على ندى بالحكي.. من جد انقهرت و هي خبلة بعد تقول ما عندي مانع اكون الرابعة بس غازي لا..!! نهى : مالت بس صامت صامت و بتفطر على بصلة.. هاذي اخرتها بيزوجها الثانية..؟! شلون يوافق ابو سعود ما توقعت..؟! و اخواني وين مكانهم من الإعراب..!؟ وعد لفت حتى تنسدح على جنب : تبيني اعلمك بأراء اخواني احمد و خالد ما راح يعترضون الا اذا ندى اعترضت و ياسر و سعود بيقولون غازي رجال و النعم فيه ما ينرد نسبة ينشرى ما ينباع خصوصاً بعد ما ندى فركشت خطبتها من عساف.. و مشعل و وليد نما راح يبدون رأيهم بالموضوع.. نهى : و حاتم..؟! وعد : ما ادري ويش بيكون رأية.. ما بعد عرفت تفكيرة من أي فئة فيهم.. عموماً الأهم هو رأي بروو لأنه على قولة جدي عطاه و ما يبي ندى تفشلة.. نهى : ما توقعت ابوي يفكر بهالطريقة..؟! يعني مو الثانية..؟! وعد جلست حتى تربع : عمرك سمعتي برجال متزوج اربع حريم يعارض أي احد غيره انه يتزوج..؟! حتى لو كانت بنتة العروس.. نهى : بس انتِ قبل انخطبتي لـ واحد متزوج و أبوي ردة من عند الباب..!! وعد : لأني صغيرة و متأمل يجيني احسن.. او بالأصح بابا كان ينتظر عساف او عمر.. بما ان جدي حيرني.. اكيد ما راح يزوجني لـ واحد متزوج و عيالة اكبر مني و هو يدري ممكن يجيني نصيب ازين.. نهى : طيب انتِ ايش رايك بـ غازي..؟! وعد : غازي شكلة طيب و متفهم و محترم.. رغم ان بناتة يشكون من بُعدة عنهم يعني ندى لازم تحسب حساب ذا الشيء ما راح يكون لها وقت كبير في حياتة خصوصاً هي الثانية و عنده زوجة غيرها و بنات.. نهى : طيب و ندى..!؟ وعد : ندوش هي اللي لازم تقرر.. هي تعرف نفسها و تشوف نفسها اذا تقدر تتحمل يكون عنده مره غيرها و تترك غيرة الحريم و شغل الطباين و الا لا.. لأن خالي ماهو فاضي لـ حنة حريم و لا يبيها.. و بصراحة انا احس الموضوع منتهي.. اولا جدي عطاة.. ثانياً كلام ابوي لـ ندى.. و اخيراً رأي ندى بأنه ما يهمها لو تكون الرابعة.. نهى : طيب بما انك تقولين ان الرجال اللي متزوج ما يمنع أي رجال انه يتزوج وحده الثانية حتى لو بنتة.. لو حولنا الموضوع.. و قلنا يتزوج على بنتة مثل حالتك تتوقعين بيرفض بابا إن عماد يتزوج عليك..؟! وعد : لا.. لأنه ابسط شيء عماد بيقولة حليتة على نفسك ما يحق لك تحرمة علي..! بابا ما راح يقول شيء.. ترى الرجال ما يشوفون الزواج من كم حرمة فيها اشكالية.. نهى : و انتِ اكيد بتطلبين الطلاق..؟!! وعد : لا.. بجلس علة على كبدة.. نهى انصدمت .. اعتدلت جالسة : طبعاً تمزحين..؟! وعد : لا ما امزح.. اطلب الطلاق لما اكون عارفة لو رحت لـ بابا قلت له عماد بيتزوج علي بيمنعة.. و اخواني بيوقفون معاي.. لكن ما ابي اتطلق الحين.. ما صار لي اربع شهور متزوجة عشان اتطلق.. الناس بتحكي فيني مو في عماد خصوصاً اني قد انخطفت.. ما احد بيرحمني.. نهى : الله اكبر من متى يهمك كلام الناس..؟! وعد : ما يهمني.. لأنهم لو ما لقوا اللي يحكون فيه بيحكون بأنفسهم.. لكن انا بجلس فترة مع عماد.. اذا اعجبني الوضع كملت و اذا ما اعجبني فيه لي مين يضفني.. نهى : انتِ متأكدة انك بكامل قواك العقلية..؟! وعد : ايه.. عماد متوقع اني بزعل عشانة بيتزوج علي و اسوي له سالفة ويش طولها و بيأثر فيني الموضوع.. لكن يهبى.. و الله لأخلية يحس انه ولا شيء بحياتي.. اذا هو تزوج عشان يقهرني.. انا بعلمة ان زواجة ما فيه احد تضرر فيه الا هو و القهر له هو مو لي.. نهى : ما انتِ صاحية.. انا متأكدة انك ما انتِ صاحية..!! وعد : الا صاحية.. انا تحديت عماد مرتين وما راح انسحب و اخليه يكسب التحدي.. نهى : بتضيعين حياتك على حساب تحدي تافة قدر يستغلك فيه..؟! وعد : انتِ تشوفينة تافة انا اشوفة غيــر.. .. شوق : ما يصير من البارح و احنا منومينها و مهدئ وراء الثاني..؟! هنادي : ويش تبينا نسوي..؟! هي لا صحت و تذكرت اللي صار تصارخ.. و تنفعل.. امال : مو معقول يا هنادي بتظل كل الوقت نايمة..!؟ هنادي : عمتي هي تعرضت لأشبة بصدمة نفسية .. انصدمت بـ عمي و اللي سواه فيها هي الحين تحت عارض نفسي اللي هو الخوف.. و الخوف هو اللي مسبب لها اضطراب في نبضات القلب.. ام عامر تأشر على هنادي بعصاتها : اسمعيني يا بنتي انا ما فهمت من خثردتك ذي شيء.. علمينا ويش هو علاجها و نجيبة لها.. هنادي : يمه علاجها نفسي ماهو طبي.. انا الحين لما اعطيها منوم عشان اخليها تسترخي و اخفف من سرعة نبضها عشان ما يصير لها شيء لا سمح الله.. ام عامر احتد صوتها قل صبرها حالة ريما من البارح رديئة لأبعد حد : ويش القرقرة ذي.. عطينا العلم الوكاد.. هنادي ناظرت جدتها يأسة من انها تفهم هي ويش تقصد.. : يمه.. تدرين ويش هو علاج الخوف..؟! ام عامر : ويش هو..؟! هنادي سكتت شوي : المواجهة.. امال تكلمت بسرعة : لا .. لا تشوف ابوها لا.. اصلاً هو ما فكر يسأل عنها من البارح.. نسى ويش سوى فيها.. وهي ما بعد نست اللي سواة.. والله لو تشوفة يصير فيها شيء.. ام عامر : حسبي الله و نعم الوكيل.. انا ما ادري ويش اللي خلى ابليس يركب راسة.. دخلت مريم : السلام عليكم.. : وعليكم السلام.. مريم : كيفها الحين..!؟ امال امسح على شعر ريما النايمة : على حالتها من البارح.. مريم استندت على الدولاب : ما ادري ويش صار بـ غازي شكلة استخف..(ناظرت امها و امال) تدرون انه بيتزوج..!؟ هنادي هي الوحيدة انصدمت.. اما البقية ردود افعالهم كفيلة تخبرهم انهم يدرون من قبل.. مريم اعتدلت بـ وقفتها : كنتوا تدرون..؟! ام عامر : ايه.. ويش يقصرة ما يتزوج..؟! مريم : و زوجتة..؟! و بناتة..؟! امال : انا ما عندي مانع يا مريم.. و بناتة ان كان قبل بيعمل حسابهم الحين ما ظنتي.. شوق : ماما لا تقولين كذا.. اوكِ اللي سواه بابا ماهو بسيط.. بس من البارح و انتِ وجدتي تحسبون عليه و تسبونة.. مو معقول تنسون كل شيء يسويه لنا.. غلط على ريما ما أقول لا.. لكن ما يصير بعد انتم تغلطون عليه.. مريم جلست على سرير ريما و ناظرت امها مقابلها : انتِ طلبتي منه يمه صح..؟! ام عامر : ايه انا.. ويش عندك جاية تحاسبيني..؟! اولى انا احاسبك على تركك لـ زوجك و عيالك تراني امك.. مريم اخذت نفس : يمه الله يرضى لي عليك لا تدخلين موضوع بـ موضوع غازي.. غازي شكى لك من شيء عشان تزوجينة..؟! ام عامر : ماهو شرط يشكي لي.. انا اميتة و ابي له الزين.. و هو لازمة له و لـ بنياتة ولد.. ولو امال قادرة تجيب له عيال ما كان قلت له يتزوج.. بس كلنا نعرف و ما نقدر نعترض على حكمة ربي.. و انا اخترت له زينة البنات ماشاء الله.. مريم : بنت ابراهيم..؟! امداك تعرفين زينها من شينها..؟! مالك كم يوم من شفتيها..؟!! ام عامر : ما يحتاج اعرفها من سنين طويلة.. البنية سنعة و السنع يبان من الأول و فيها من الزين اللي يشلع القلب.. مريم : و تتوقعين ان غازي يدور على الزين..؟! غازي حتى لو يفكر يتزوج يبي له وحده عتبت على الـ 35 نضج تفكيرها.. ما عنده وقت يسمع سخافات حريم.. ام عامر : بنية ابراهيم ما حولها سخافات.. و الله اني من شفتها قلبي شفق لها.. و ودي اشوفها بـ بيت ولدي حليلة له على سنة الله و رسولة.. مريم : عاد بنت ابراهيم..؟! قلوا الناس يمه..؟! بنات ابراهيم يأكلن الواحد لحم و يرمنة عظم.. شوفي بناتي كيف و اختهم الصغيرة.. ام عامر : بناتك من سواتك يالرفلة.. و اختهم الصغيرة عادها بزر.. لا كبرت حاسبيها.. هنادي همست لـ شوق جنبها : من جدك عمي غازي بيتزوج ندى..؟! شوق : ايه.. ما ادري اذا خطب او لا بس قال لنا انه بيتزوج.. هنادي : و انتن ويش قلتن له..؟! شوق : ريما هي الوحيدة اللي اعترضت انا كنت مستغربة الموضوع و لينا ما اعترضت و لا فتحت فمها بكلمة.. و امي موافقة.. هنادي لفت تناظر شوق : مو معقول عمي غازي ضرب ريما عشانها معترضة على زواجة..؟! شوق : لا عشان شيء ثاني.. هنادي عقدت حواجبها : الا صدق وين لينا ما شفتها..؟! شوق شتت نظرها : ما ادري.. هنادي استغربت من شوق .. ناظرت جدتها و مرت عمها : وين لينا..!؟! ناظرنها الثنتين بـ قوة.. و كأنهن يتذكرن من جديد التوأم اللي حاولوا يلتهون عن موضوعها و لا يفكرون هي مع مين رايحة.. مريم : ايه صدق انا ما شفتها..؟! وينها..؟! ام عامر بحدة : لا احد ينشد عنها.. و الله ان سمعت وحدتن فيكن تجيب طاريها يا ويلها.. و سكرن على ذا الموضوع و لا عاد اسمع طارية.. وقفت ام عامر حتى تخرج من الغرفة وسط استغراب مريم و هنادي.. و صمت شوق و امال.. و اعتكاف ريما تحت المهدئات.. .. ام عبدالرحمن : ماشاء الله عليه ابو شوق رجالن ما ينرد.. عفست وجهها نوال : عمتي من جدك..؟! انا ابيك تكلمين ابو سعود.. ام عبدالرحمن بحزم : اكلمة بـ ويش هاه..؟! ما تقولين ان جدها عطاها.. مالنا كلمة خلاص.. ابو عبدالرحمن هو ادرى بالرجال.. ام حاتم : عمة الله يخليك اسمعيني.. انا ما عندي اعتراض على اخلاق الرجال.. كلن يعرفة و يذكرة بالخيــر.. ام عبدالرحمن تقاطعها : اجل ليــش ما تبينه لـ بنيتك..!؟ كارهة لها الزين..؟! ام حاتم تحاول تطول بالها من قالت لها ندى وهي اعتفست نفسيتها ابنتها قريباً تصح على اعتاب الـ 28 .. فرطت بـ عريس ثمين كا عساف حتى ترضى بـ رجل متزوج.. : ما ابيها تكون الثانية يا عمة.. بنتي ماهو قاصرها شيء.. ام عبدالرحمن : ليش ابو سعود يشوف بنيتة ناقصة..؟! يوم رضى على عطية ابوه لـ ولد حمدان..؟! بنيتك ان شاء الله يكون من نصيبها ابو شوق.. و الله انه بيعزها و يغنينها و يكرمها.. سكتت ام حاتم هي كا أي ام لا تريد لأبنتها سوا شخص يكرمها و يحترمها و تكون هي اول نصيبة.. ليست الثانية.. ام عمر همست لـ ام حاتم : هونيها ياخيه.. ام حاتم : ماني راضية بس ما بيدي شيء.. ام عمر : المشكلة ان عمي تدخل بالموضوع و عطاهم.. لو ما عطاهم كان ابو سعود اخذ شور بنتة.. ام حاتم : المشكلة ندى خايفة منه بس.. تعرفين بعد اللي سواه ببنتة البارح.. هذا همها و اللي باط كبدي انها قايلة لأبوها ما يهمها تأخذ متزوج بس ما تبي غازي.. و ابوها بيقنعها ان غازي و نعم الرجال دام ما عندها اعتراض على انها تأخذ معدد.. ام عمر : ما هقوتي ان قلتِ لها ما انتِ موافقة بتقول لأبوها انها راضية.. ام حاتم : قلتيها يا خيه عمي عطاهم يعني رأيي ماله معنى الحين.. .. لا حول و لا قوة الا بالله.. لا احلل نقل الرواية دون ذكر اسمي.. هشتاق #رواية_لو_سألتي_الورد ضحكة قهر.. | |||||||||
|
| |
|
| أدوات الموضوع | |
| انواع عرض الموضوع | |
|
|
224Likes
.png)
العرض العادي
