آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
05-10-14, 03:56 AM
| #81 | |||||||||
| نجم روايتي ومشرفة سابقة وفراشة متالقة بعالم الازياء  
|  بسم الله الرحمن الرحيم.. السلام عليكم و رحمة الله و بركاتة.. كل عام و انتم بخير و سعادة يارب.. اليوم بالرغم من نفوسنا ما حست بفرحة العيد.. لكن ما احد ينكر ان هاليوم فيه سعادة ولو بسيطة تلامس الروح لو من شوفة الأطفال.. بداية انا ابي ارحب بكل القراء الجدد.. خلال هالاسبوع في ثمان ايام من السبت للسبت زادوا أكثر من 40000 الف قارئ يعني بمعدل 5000 قارئ باليوم<< رياضيات ^_^.. مره انبسطت بهذا الشيء و حسيت اني مسوية انجاز عظيم و يارب اني اكون عند حسن ظنكم ان شاء الله و ما تندمون اللي قرأتوا روايتي.. لا تحرموني من تشجيعكم.. النقاش.. عندي صراحة شيء صدمني.. ردة فعلككم من خطبة غازي لندى.. بصراحة ما توقعت ابداً تكون ردة فعلكم الرفض ما لقيت احد ما عنده مانع الا يمكن واحد او اثنين بالكثير الباقي سب و طعن بام عامر ^_^.. توقعت انكم تفرحون بس شكل توقعاتي صارت تخيبني.. النقاش هالأيام حول الشك بمنيرة.. ما ادري شلون طرت عليكم بس ما راح انفي و لا أأكد .. الأحداث هي اللي تحكم بيننا.. متوقعة هالبارت ما القى تفاعل بالردود عشان العيد بس ان شاء الله تخيبون توقعاتي.. و متوقعة الرودو تركز على جزء و تترك الباقي << ما ادري ويش فيني صايرة اتوقع ويش بتردون عليه.. اهم شيء انهار و وعهود بيكوشون ع الردود بالسب ^_^.. أخيراً تمنيت اني انزل لكم بارتين بارت عيدية و بارت اساسي بس ما حالفني الحظ .gif) .. ان شاء الله هالبارت حسبة عيدية.. و احب اقولكم نسفت توقعاتكم بخصوص كلام عامر اللي توقعتوة خطبة غازي من ندى.gif) .. البارت الجاي بالويك اند ان شاء الله الجمعة او السبت.. قراء ممتعة للجميع.. و استروا ما واجهتم من اغلاط.. البارت الواحد و الأربعون.. صعب اكون اللي تبينه صدقيني مأتمة طبعي ،، ولا فرْح التطبّع.! وان نويتي بـ المفارق تصدميني داخلي من ظلم غيّابي ،، تشبّع لـ ماجد بن مقبل.. البارت الواحد و الأربعون.. ابو عبدالله : بأخذ شورها ان شاء الله مانيب جابر بنتي .. بس انا اعرفها ما راح تردني.. ابو عبدالرحمن : الله يرفع مقداركم.. ابو عبدالله : الله يجزاك بالخير.. مير يومك فتحت الموضوع .. احنا بعد لنا عندكم طلب.. غازي توقع ان اخوه بيحكي بالخطبة.. تمنى يصارخ عليه و يقولة لا.. اصبر عساف هنا ما كلمتة.. وقف بحدة : عن اذنكم.. عساف تعال ابيك.. عساف وقف : ان شاء الله.. ابتعد غازي باتجه غرفة التدريب لعماد و عساف كان معاه.. اخذ غازي نفس حمد ربه تدارك الوضع قبل لا ينحط بموضع تافة مع عساف.. ابو عبدالله : احنا اهل و الظفر ما يطلع من اللحم.. و بنيتنا لولدنا.. عماد و وعد.. ما بعد عاشوا مع بعض حياة زينة عشان يتخذون قرار بحياتهم.. لازم نصبر عليهم.. ابو عبدالرحمن : بنيتنا بنيتكم.. و احنا ما نبي لبنيتنا الطلاق.. ابو سعود : يبه.. انا وعدت وعد اذا تبي الطلاق ما احد بيردها عنه.. ابو عبدالله : استهدي بالله يا ابو سعود.. ما نبي الا الزين لبنتنا مثل ما نبيه لولدنا.. عماد بهدوء : انا و وعد تفاهمنا.. اجل فكرة الطلاق لفترة.. ياسر : نعــم..! ليش ان شاء الله ما وراكم احد تردون له الشور و تأخذون رأيه.. مره تزاعلون و مره تراضون..!؟ عماد تربع على الأرض : ليش تبي لأختك الطلاق..؟! ياسر : لا.. بس الأصول اصول.. عماد : و احنا ما تخطينا الأصول.. اليوم تفاهمنا على ذا الموضوع.. ما اعتقد احد فيكم يكره لنا الخير..!! خالد : مو قصة كره الخير.. بس مو متى ما اشتهيتوا تزاعلتوا و متى ما اشتهيتوا تراضيتوا.. ابو عبدالرحمن : اقصروا الموضوع.. دام ابوكم عطاها الشور و هي تبي تجلس مع رجلها ما احد بيقول لها لا.. ناظروا بعضهم ياسر و خالد سكتوا.. دام جدهم حكى ما احد بيقول له لا.. و لو حكوا اول من بيدبغهم ابوهم.. اما غازي دخل و وراه عساف اللي كان متوقع الموضوع ما يتخطى طلب او امر عسكري.. لكن غازي اتجه للكراسي الموجودة و جلس و بقي عساف واقف.. ناظرة غازي : استريح.. جلس عساف بثقة وهو يتجاهل نفسة و راحتها من الوقت اللي قالة عمه ان ندى ما تبيه.. منع نفسة حتى انه يفكر بالموضوع.. اما غازي كان متوتر مو خوف.. لكن مهما خفف الموضوع يظل صعب لانه ما يضمن ويش رد عساف : ابي اجلس معاك بعيد عن جلسة رئيس و موظف معاه.. عساف : تأمر.. غازي سند نفسة براحة على الكرسي : انا تزوجت من عشرين سنة تقريباً.. و ربي رزقني بخلفة كلها بنات.. شوق ثم ريما ولينا و بعدهم بعشر سنوات همس.. عساف كان مستغرب الموضوع لكن اول ما طرى عليه ان الفريق غازي متضايق و اختارة هو عشان يفضفض له انصت له بتركيز .. اكمل الفريق غازي : اذا كنت تسألني فانا راضي فيها.. لكن امي مره كبيرة و مقتنعة اني لازم اجيب ولد.. تبيه سند لبناتي.. على ان بناتي كبار.. لكن وجود اخ لهن بيسندهن خصوصاً مع وظيفتي و انا من فترة ماهي بعيدة تاركهن عند عامر لكنهن يوم كبرن اصرن ننتقل لبيت لحالنا.. عساف : الولد عزوة حتى لو بناتك كبار و هو صغير مردة يكبر و يسندهن حتى ابسط امورهن بتوكل له لأنه يعتبر ولي امر لهن من بعدك.. بعد عمر طويل ان شاء الله.. غازي : ماهي مشكلتي مع الولد.. انا عادي ماعندي مانع.. لكن ربي ما كتب لي مع زوجتي ولد عندها مشاكل .. و امي تبيني اتزوج.. ابتسم عساف بس شوي و اطلق ضحكة بسيطة : ههههههههه.. غازي ابتسم : ليش هالضحكة...!؟ عساف : ما توقعت ان ممكن ترضى تتزوج ثنتين.. يعني مثل عمي ابراهيم او اخوك ابو عبدالله.. غازي تنهد : حكم القوي على الضعيف .. انا اجيبها لك على بلاطة اشياء كثير مرددتني او بالاصح اتمنى انها تسعفني بتغيير رأي امي مثل بناتي و البنت اللي مختارتها امي.. لكن امي مصرة و معطيتني يومين عشان اخطب و الا بتغضب علي.. عساف اخفى ابتسامتة : رضى امك اهم عليك من أي شيء ثاني .. اما بناتك بيزعلن اليوم و يرضن بكره.. بنات عمي ابراهيم سون له سالفة على زواجة الأخير لكنهن بالنهاية اقتنعن.. و انت ما تقل عن عمي ابراهيم.. تقدر تقنع بناتك.. و تقدر تخليهن يتقبلن الأمر الواقع.. الا اذا انت اساساً مو متقبل زواج من ثانية يعني عشان زوجتك و عشرة.. غازي : زوجتي ما عندها مانع لأن هالموضوع انفتح من قبل.. قبل لا تجيب بنتي همس.. ولما حملت فيها اقنعت امي لكن طلعت بنت و امي لها فترة طويلة هاجدة.. و من امس وهي راكبة راسها ولو بكيفها ادخل عندها نهاية الاسبوع و معاي زوجتي.. عساف مبتسم : اجل فرحها.. لا تخليها بخاطرها.. غازي يلف و يدور عشان يلقى له مدخل عشان العروس : و الشغل..؟! تعرف هالفترة ماني فاضي.. عساف : خذ اجازة اسبوع يعني فترة نقاهة و احنا بنمسكة عنك و ان قصرنا حاسبنا باللي تبيه.. غازي : و انت.. متى بتزوج..؟ ليش ما تخلي عرسي و عرسك مع بعض..؟! عساف اختفت الابتسامة اللي كان رسمها : ربك ما كتب للحين.. غازي : ليش..؟! عساف : ما بعد حانت الفرصة..؟! غازي : ليش ما حانت ماهو انت محدد عرسك..؟! عساف : كنت.. و الغيتة.. ما صار بيننا نصيب.. غازي : السبب.. علمني اذا ابراهيم زعلان عليك او البنية زعلانة منك في شيء يمكن اقدر افيدك بخبرتي يعني عندي بنات اعرف تعامل معاهم.. عساف ابتسم من جديد : لا ماهو زعلان عمي.. بس الله ما كتب لي اخذها.. و خيرة من ربي.. غازي وعيونة على عساف تدقق بأقل التفاصيل في ملامحة : انت تحبها..؟! عساف ناظر الفريق و جاوب ببساطة : لا.. اصلاً انا ما خطبت الا عشان امي و ابوي و جدتي اللي يحنون علي اتزوج.. و هي ما ارتاحت لي و ما حصل نصيب.. غازي : ما ارتاحت لك.. له علاقة باللي قالة وليد بمكتبي..؟! احتدت ملامح عساف وما غاب عن غازي وقع جملتة على عساف .. اللي جاوب بهدوء : أي كلام.. غازي : انت عارف ويش اقصد.. عساف تراك واحد من رجالي خابزك و عاجنك.. اذا انت لك خلاف مع ابراهيم انا بعاونك و تأخذ البنية اذا لها خاطر بقلبك.. اما اذا ما تبيها هذا شيء ثاني.. عساف : لها خاطر بنت العم و بس.. (ناظر بقوة للفريق و كأنه لمح شيء ربط الكلام ببعض.. امه اللي امس اصرت على ولدها يخطب.. و انه متردد بالبنية.. و انه اختارة هو من بين كل رجالة.. عدا انه يصر عليه اذا فيه خلاف بيصلحة) ليش كل هالإصرار..؟! غازي يحك لحيتة بسبابتة : ابي اساعدك.. عساف يضيق عيونة : امك تبيك تخطب ندى بنت عمي..؟! غازي سكت للحظة وهو يناظر بالأرض بعدها رفع عيونة لعساف : ايه.. و انا ابيك ترجع ترتبط فيها اذا تبيها.. لعدة اسباب.. عشانك.! لأن انت اللي خطبتها.. و ابي امي تلهى عن موضوع انها تزوجني وحده ثانية على الأقل هالفترة.. عساف من ورى قلبة لأنه انرد منها وهو ما يعيبة أي شيء اذا كان يحب مره غيرها و ردتة.. بيجيها واحد متزوج مره غيرها : السموحة ما اقدر اعاونك.. بنت عمي ما بيني و بينها نصيب.. و ربي يكتبها من نصيبك.. تراها ما تنعاف.. شقردية.. غازي احتد صوتة : لا تستهبل علي.. اذا انت عادي عندك اني اخذها انا ماهو عادي اخذ اللي كانت بتصير زوجتك.. انا ابيك ترد لها.. بخلي زوجتي تكلمها.. بصلح اللي بينكم.. عساف وهو يحاول يكون طبيعي : انت قلتها كانت بتصير زوجتي.. و اللي بيننا ما يتصلح.. غازي : على شرط.. عساف : اللي هو..؟! غازي : زواجي و زوجك بليلة وحدة و الا ما اخذها و اقول لأمي انك تبيها.. وقتها ماهي قايلة لي غصب تأخذها بتقول ولد عمها اولى فيها.. عساف وقف : لا.. نفسي شافت من الحريم لين عافت.. غازي : ويش شفت..؟! عشان مرة ردتك تعيف الحريم..!؟ شوف ما اقولك ما عليهن تصرفات تنرفز .. بس لما يكون عندك مره تحس انها نصفك الثاني لا رحت البيت من بعد تعب تسمع منها كلمة حلوة تخفف عنك.. تلقى احد منتظرك و يخاف عليك.. ولا جبت بنات و سمعت لدلعهن و هواشهن و صالحتهن بتحس ان الحياة ما تمشي من غير مره تشاركك.. عساف : مانيب ضعيف لهدرجة عشان اعيف الحريم من مره وحدة..(من غير شعور بأن اللي قدامة رجل أخر يشعر بجرح رجل) بس عندي بقلبي من الماضي اللي يغنيني.. غازي وقف بحدة لدرجة ان كرسية طاح و مسك عساف اللي كان يبي يطلع من المكان اللي خنقة لفه عليه بحدة : ماضي..؟! يعني كلام وليد صح.. بتعيش على ماضي بنت .. ليش خطبتها اذا تبي اختها..؟! ليش ما خطبت اللي قلبك معلق فيها..؟! ويش اللي خلاك تجرح نفسك بهالطريقة و تعذبها.. الا ان كنت ما تقدر..؟! بس .. بس لما خطبت كانوا بنات عمك ما تزوجوا.. الا ان كنت..(لمحت ببالة مثل البرق المضوي) تقصد نهى المسماة لولد عمك من زمان..؟! عساف سحب ذراعة من كف الفريق غازي بقوة : لا.. ماهي نهى.. بس لأن اللي قلبي بغاها عقلي ما تقبلها حليلة لي.. انا و هي مقتنعين اننا ما نصلح لبعض.. و لما قررت اخطب خطبت وحده حسيت انها ممكن تناسبني.. لكنها ما تناسبني و هذا كل اللي صار.. غازي مسك عساف بقوة و دفة على الجدار و ضغط على أكتافة بقوة : بتعيش على طيف..؟! بتعيش على ماضي و تترك الحاضر..؟! تبي تقهر امك و ابوك عليك و لا يشوفونك داخل عليهم بزوجتك و عيالك..!؟ عشان مين ..؟! مين اللي لعبت فيك بهالشكل..؟! (صرخ عليه بحدة تردد صداها عليهم الاثنين) ما تقول عقلك ما بغاها.. يوم اتبعت عقلك ما يقولك الحين تزوج مره غيرها.. عقلك ما قالك ما تنفع لك.. متأكد ان هو اللي يقولك عيش على ماضي بيغنيك عن حاضر تعيشة..؟! عساف رفع عيونة للسقف وده ينزاح.. الهواء ما عاد يحس فيه من القهر اللي متجمع بصدرة.. لا تجمعها و تنفثها بوجهي.. ويش اقولك.. صارت لولد اخوك حليلة..؟! ويش اقول و انا اعرف و مقتنع ان احنا فعلاً ما نصلح لبعض.. و من غبائي يوم خطبت ما خطبت الا اختها.. اختها هي اللي عرفت بكل شيء صار من زمن.. صار و قررت اتجاوزة و انساة مع اختها.. و الآن ما عاد ابي اجرب اخطب مره و انرد من جديد و انا اعرف ان ما فيني شيء ينعاب.. ما فـــيــنـــي..< نطق كلمتة الأخيرة بـ بطئ.. غازي مسك عساف من ثوبة و شدة له حمر عيونة بعيون عساف : ويش لي عندك..؟! عساف عيونة حمراء من مجرد ذكرى مرت و حديث أُثير : اللي تبيه الا الزواج.. غازي فلت عساف و دفة بقوة على الجدار : هذا و أنا اللي كنت متوقعك رجال ينشد الظهر فيك.. اخذتك بأشد المواقف صعوبة عشان ثقتي ان عندك عقل نظيف يشور عليك بالزين.. باللي فيه الصالح.. ما يقول ادفن نفسك و عيش على ذكرى مره.. ما قدرت تخطى شيء صار بحياتك و بتعيش ما تجاوزت حدودة.. كان يقسى على عساف و هو يشوف كيف عيونة تتسع و تضيق من حدة كلامة.. عارف انه يجرح بكرامة عساف و رجولتة.. يبي عساف يتخطى اللي صار بقوة.. يتجاوز كل شيء.. ما يبقى على نقطة بنت حبها ما تزوجها عن قناعة و الحين يرجع يبي يعيش على ماضيها.. عساف كان متساند على الجدار وهو يناظر فيه عيونة حمراء و كأن قلبة ينزف و يدفع بالدم لعيونة و يفضحة.. غازي : لو انك رجال ما خليت مره تلعب بعقلك قبل قلبك.. تقول فكرت بعقلي ما بغاها.. تكذب على نفسك و تقنع نفسك بشيء غلط.. عقلك يبيها بس هي ما تبيك.. هي رفضتك.. صح ..؟! هذا اللي صار بينكم.!.؟! عساف جلس و مدد رجولة اللي لامست اطرافها ثوب غازي .. غازي معصب و عساف ضعف.. قلبة انفتح من غير لا يحس.. غازي جالس ينبش فيه و يلعب على أشد اوتارة ألم.. : لا تستفزني.. لا تستفز رجولتي.. ما راح اسمح لك حتى لو كنت رئيسي.. غازي يشد على عساف و يستفزة عشان يصحى ما يبيه يعلق حياتة و يوقفها : انا استفز عقلك اللي ما يعطيك غير الغلط اللي تسوية.. اصحى يا عساف.. عساف تعرف ويش معنى اسمك.. تعسف ما تنعسف.. ما تنعسف يا عساف.. مو مره تلعب بحسبتك و تعسف قلبك و عقلك و كل حياتك.. وقف عساف و طلع و غازي لحقة مسكة : عســـاف.. عساف سحب يدة.. و يصر على أسنانة : لا تكلـــــمنـــــي.. و مشى مسرع قدامة و معطي غازي اكبر طاف.. و لأول مره عساف احد يفتح له قلبة و يقرأ سطورة.. و يضغط على جروحة.. لأول مره عساف يضعف و مين يضعفة.. غازي.. غازي كان واقف ينظر له وهو كل شوي يبتعد عنه خطوة خطوة خطوة لين ما شافة يركب سيارتة بعدها رفع جوالة و اتصل على الحرس : بدر .. لا تفتحون له الباب.. لو يكسرة ما عليك منه.. و قفل الخط.. و اتجة له من جديد.. اما عساف.. حاس بضعف نفسي متعب جسدة.. ما توقع احد يكشفة.. الوحيد اللي كان يدري انه يحب وحده و عن قناعة بعقلة خطب اختها هو عمر ولد عمة .. عمر اللي نصحة ما يسويها.. يمكن لو خطب وعد و رفضتة كان اهون.. من انه يحب وعد و يخطب ندى و ترفضة.. و يجيه رئيسة يقولة انه بيخطبها.. و يكشف كل اوراقة اللي مخبيها عن عيونهم.. علق على البوري عشان يطلع من المكان بالرغم من قبل لحظات كان بس يتمنى ان السقف يختفي و يتنفس الحين يتمنى يطلع من المكان كله.. أسوراة تضغط عليه.. مجروح.. وهو جرح نفسة بنفسة و هذا اللي زاد آلمة للضعف.. شد على الطارة و اطراف اصابيعة بيضت من مسكتة و كأنه بيقلعها من مكانها.. ينتظرهم يفتحون البوابة عشان يطلع.. التفت لقزاز السيارة اللي ينطق و ما فتحة طنش.. جاه بندر و يزيد مستغربين من حركتة اتجة لسيارتة من غير لا يكلم احد و معلق ع البوري متجاهل ازعاج الجميع.. بندر : عســـاف ايش فيك..!؟ يزيد يناظر عمه بندر : شكلة متهاوش مع غازي.. بندر : هذا مو مخلي احد بحالة ناوي يمشي عليهم واحد واحد.. : اصلح الأخطاء.. بندر التفت لغازي : و بعدين معاك..؟! ناوي تكفخ معاه.. تراة ماهو مثل وليد.. غازي : مشكلتكم ما تشوفون اللي أنا اشوفة.. و ماني مجبور ابرر لكم افعالي.. مو بس وليد اللي لا تدخلون بيني و بينه.. عيالي بعد.. و عساف واحد من عيالي.. بندر احتد صوتة : لا يا شيخ.. كسرت كتف وليد و الحمدلله انه ماهو مضاعف.. و الحين بتكمل الباقي بعساف.. و مين ناوي عليه بعده..؟! غازي : ما ادري على حسب الوضع اذا استدعى اني اتدخل بواحد فيهم.. وليد واقف ورى غازي هو و باقي الشباب.. يحضرون الهوشة عن قرب.. : الله لا يوليك على صايم و مصلي.. غازي ناظر وليد : ترى حرتي فيك ما بعد بردت.. وليد رفع حاجبة الأيسر : و ناوي تحطها بعساف..؟! غازي احتد صوتة بوجه وليد : لا تدخل باللي ما يعنيك.. يزيد يناظر اخوة اللي مغمض عيونة و لا يسمع أي حكي من اللي يقولونة.. رجع يطق القزاز من جديد.. ماجد : عســـاف.. عســــاف.. و الله لا اكسر القزاز.. افتح الباب.. لكن عساف ما رد عليهم.. و لا التفت لهم.. دوبة يداري قلبة المفتوح و يصد عنهم لا يشوفونة.. غازي : ما راح تقدر تكسرة لأنه اصلاً مضاد لرصاص.. بندر : انا ابي افهم.. ويش اللي خلاك تنقزة من بيننا.. و تهاوش معاه.. حبكت يعني يوم شفتة رايق تبي تكدر عليه..؟! ابي افهم شلون تفكر انت..؟! يزيد : ما تحس انك مزودها.. ماهو عشانا بمكانكم تحكمت بكل شيء.. غازي ببساطة يناظر القزاز شاف عساف فتح الباب و نطق بحدة : خلهم يفتحون البوابة مانيب بزر عشان تحبسني.. غازي وهو يتجة لباب الرديف : ما راح اسمح لك اذا ما خاويتك.. بندر مسك غازي من ذراعة : تكفى غازي يكفي تعصب بالواحد و تبي تكمل عليه لين يطق.. شوف وليد ويش صار فيه من وراك ويش بتسوي بعساف..؟! غازي سحب ذراعة ببساطة من بندر : عيالي و انا حر فيهم.. (ناظر عساف) افتح الباب.. دخل عساف و سكر الباب وفتح القفل عن باب الرديف.. و ركب غازي جنبة.. و بعدها انفتحت البوابة عشان يطلعون اثنينهم.. بندر يناظر البوابة تتسكر من وراهم : ابي اعرف ويش ورى هالغازي.. وليد : اثبات رأي لا أكثر.. عماد : ويش تقصد..؟! وليد وهو يعطيهم ظهرة : يبي يمشي كلمتة علينا.. هذا كل الموضوع.. بروح اشوف وعودتي.. عماد مسكة قبل لا يمشي : نايمة.. لا تصحيها.. وليد : لا تخاف راسل لها و هي ردت لي.. مشعل : اجل انا معاك.. خلنا نشوف بنيات اربع و عشرين ساعة بوجية شباب و شياب.. بندر : ما تستحي على وجهك.. مين الشياب ابوي..؟! مشعل مبتسم : يعني ليش تنكر الواقع.. و الا ناوية تثبت شبابة و تزوجة.؟! هذا شيء ثاني.. وليد : تبي خالتي موضي تولع فينا..؟! راكان باستهزاء : لا تخاف ما احد مولع فيكم.. هذا اذا ما كان متزوج من قبل و عنده عيال ما احد يدري عنهم .. يعني عاد تجي عليه.. بندر ضغط على شفايفة السفلية : متى بنخلص من ذا الموضوع.. راكان : ماهو مخلص.. هذا الواقع و لازم تتقبلة.. .. : أنا آسفة.. وعد ناظرت ندى بحدة : على ايش..؟! ايش بالضبط تتأسفين عليه..؟! ندى تنهدت : كل شيء.. لما عرفت انك اجهضتي عشان نفسيتك كانت سيئة حسيت بالذنب.. وعد : حلوو يعني تحسين للحين.. و نفسيتي كانت بس..؟! مو ما زالت من وراك..؟! ندى : انا ابي اتخلص منه.. ابي اتخلص من الحبل اللي يخنقني فيه.. حاولت بـ أبوي أكثر من مره بس ماهو مصدقني.. ماهو مقتنع ان عساف يبيك.. وعد : انتِ غبية و ما عندي استعداد اعيد و ازيد بنفس الكلام.. و كلامك ذا يضرني ما ينفعني و لا ينفعك انا قلت لك اللي عندي و وضحت لك اكثر من مره وماني محبورة انك مو راضية تصدقين.. لو احد من اهل عماد يسمع حكيك عماد بينحرني.. عساف ولا شيء عند عماد و لا شيء..(همست) ما راح يرحمني.. كل خواتها بالغرفة كانوا يستمعون لصلح.. ودهم يسير بينهم كلهم.. نهى : لا تبالغين.. ما يقدر يسوي شيء.. وعد لفت على نهى اللي جالسة يمينها : ويش تتوقعين من رجال يقولون له ترى زوجتك تحب غيرك..؟! بيتقبل الموضوع عادي..!؟.. ما راح يراودة حتى شك فيها..؟! نهى : يأكل تبن.. لا ينسى انك متزوجتة ماهو برضاك..؟! وعد : يأكل تبن..؟! هه ضحكتيني.. ما أحد بيأكل التبن الا انا .. ما احد بيعيش معاه غيري (ناظرت ندى) مو انتِ وصلتي للي تبينه.. خلاص ادفني الموضوع بأرضة مانيب ملزومة أقنعك.. ندى : لا تفهميني غلط.. انت حسبة شقيقتي.. ان حسيت بالذنب عشان اللي صار مع ابوي.. وعد تمرر لسانها على شفايفها : ما يخصك بابا.. كل الحكي اللي قلتة لـ بابا مو لك.. ندى : يعني.؟! وعد : يعني لا ترجعين تفتحين ذا الموضوع من جديد.. خلاص انسية.. سها : خلاص عاد تكفون.. و الله ماهيب حالة هاذي.. كل الناس عايشة حياتها و احنا بوضع صعب و احنا زايدين الحالة مع بعض و كل وحدة منفسة على الثانية.. وعد : انا ما نفست على أحد فيكم.. حتى ندى.. انا متقبلة الموضوع بس خلاص.. ما عاد ابي احد يحكي فيه.. لا ترجعون تفتحون صفحات تقفلت التقليب فيها بس بيجيب لي الموت.. ندى قامت و باست راس وعد.. وعد للحظة انصدمت من الحركة.. واضح ان ندى حاسة بالذنب.. وعد حضنت ندى : ادري انك تحسين بالذنب عشان البيبي.. لكنه مو ذنبك.. صدقيني.. مو ذنبك.. دانه : خلونا نغير الموود.. بنات انا متوترة.. نهى : مره غيرتية الحين..؟! دانه : للحين ما رديت على بابا.. ايش رايكم..!.؟ ندى : انتِ اللي بتعيشين معاه.. دانه : انا ما اعرفة.. يعني ما اعرف اطباعة.. كل مره يجي فيها المح زولة بس يسلم على جداني.. ما اعرف كيف اخلاقة.. خايفة مره.. ميار : عادي طبيعي تخافين بس استخيري.. و اسألي اخواني الرجال هم اخبر ببعضهم.. دانه شهقت : اسألهم.. لا و الله لو اموت ما سألتهم.. نهى : اجل موتي.. دانه : نهى تكفين انا مو جالسة العب.. هاذي حياتي.. حياة يعني المفروض افكر الف مره قبل لا أقرر.. نهى : اجل بتموتين و انتِ للحين تفكرين.. التفكير مره وحده ان كثرت مرتين.. مو الف مره.. انتِ ويش تعرفين عنه..؟! دانه : اسمه و عمرة.. و ما عنده وظيفة.. نهى : وبرايك هذا شيء يستند عليه تفكرين على أساسة..؟! صحصحي.. قلتيها حياة.. ميار : طيب انتِ شلون فكرتي بفيصل .. فيديها يمكن تستفيد من خبرتك..؟! نهى : من جدك..؟! انا ما ادري شلون انخطبت لفيصل للحين..؟!! لا مو ما ادري..ب س يعني خطبة عادية بس فيصل اعرفة يعني كنت اعرفة و لما خطبني كان لي ثلاث سنوات متغطية.. يعني صدق كنت بزر و هو غصبني اتغطى مالت و ابوي قال كلمة ولد عمك ما تثنى تغطين.. وعد : ههههههههههههه شر البلية ما يضحك.. كلمة ولد عمك ما تثنى على ويش على غطاية ما علينا بس.. نهى : لا تذكريني منرفزني اصلاً على ذا الحركة خليه يوم الزواج غير اتهاوش معاه عشاه غصبني اتغطى.. ميار و دانه شهقوا من الصدمة.. ميار : من جدك..؟! بدل ما تستحين تقومين تفتحين حياتكم بهوشة..؟! نهى : ايه عادي.. اصلاً انا ناوية عليه نية قشراء لا اطلع السبع سنين من عيونة.. ندى : خير سهاوي ما سمعنا صوتك.. سها فركت يدينها : بنات بقولكم شيء.. نهى : تكفين اذا على دكتورتك الخبلة ذيك لا تنرفزيني على حسابها.. سها : لا.. مو عنها.. ميار : قولي اللي عندك حسيتك متوترة..! سها : انا سويت شيء غلط.. و احس ربي يعاقبني الحين.. ناظرن ببعضهن غلط؟!؟ و ربي يعاقبها..!!.. ندى : ويش سويتي..؟! سها : من اسبوعين تقريباً كنت خارجة و صادفت دكتورة نهال طالعة.. و تعرفون قد ايش هي طيبة.. و طلعت و انا اسولف معاها.. لما طلعت.. انا كنت رافعة نقابي.. وهي اشرت على سيارتها اللي كانت واقفة قدام باب الجامعة.. و ولدها كان برا.. على ان الدنيا شمس الا انه كان رافع نظارتة ينتظر امه..و طاحت عيني بعينة.. ما تخيلون حسيت ان قلبي بيطلع من مكانة بس عيني طاحت في عينة.. و حاولت اشيل عيني و شلتها تذكرت ان النظرة الأولى لي و الثانية علي.. لكن ملامحة ما انمحت من بالي.. صرت حافظة ادق التفاصيل بوجهة.. ذاك اليوم ما قدرت حتى اكل.. صرت احس اشوف عيونة حتى على صحن الأكل.. ندى قاطعتها باستهزاء وهي ترفع عيونها و تحرك يدينها بحالمية : و حبيتــية و تمتي بهواااة.. و قلبك خفق له.. ( ناظرت بسها و أشرت عليها بحدة) هيـــه انتِ صاحية..؟! فيه وحده تناظر بشاب عند باب الجامعة و تقول حافظة تفاصيلة..؟! انتِ وين عايشة..؟! عارفة ان النظرة الأولى لك و الثانية عليك يعني عارفة دينك و حدودك و تربيتك.. تحكين هالحكي.. نهى : لحظة ليش هبيتي فيها.. ان حاسة باقي شيء ما قالتة.. سها بلعت ريقها عشان تكمل ..نزلت رجولها اللي كانت ضامتها لصدرها : صرت اطلع كل يوم عشان اشوفة.. ندى وقفت و حطت يديها على راسها : يا كبرها يا كبرها.. توك تقولين شلتي عيونك عشانك تعرفين دينك.. عارفة انك بترتكبين معصية.. ضميرك ما صحى.. سها ناظرت بندى و قاطعت سيل الاندفاع و اللوم : خطبني.. ندى بلهت : نعم!..! سها : دكتورة نهال كلمتني عنه.. ولدها.. قالت من اليوم اللي شافني فيه كلمها عني.. نهى : طبعاً و قلبك الدلخ ذاب فوق اللي سويتية.. شافك عند باب الجامعة.. و عرف انك كل يوم تطلعين عشان تشوفينة.. اكيد لاحظ غبائك الزايد و انك صيد سهل غبية و تافهة.. ما راعت حدودها.. سها بحدة : انا ما قلت لكن عشان تلومني.. انا قلت لكم احس ربي يعاقبني.. انا قلت لها ان بابا ما راح يوافق.. مستحيل يوافق اني اتزوج واحد مو سعودي.. ميار فتحت فمها : هـــاه..!! سها : قلبي يأكلني مو قادرة اتحكم فيه.. من الوقت اللي قلت لها ان بابا ما يرضى احس الدنيا ماهي سايعتني.. حاسة اني تسرعت.. ندى : تسرعت..؟! ليش كنت ناوية تأخذين لك واحد مو سعودي..؟! اصلاً انتِ جاوبتي على نفسك بنفسك.. ابوي ما راح يوافق ولو بيدري راح يقلع لك عيونك هاذي.. سها : ممكن تروقون.. انا ماني ناقصة.. و الله حاسة بالذنب.. احس اني خنت ربي.. و بنفس الوقت ماني قادرة اتحكم بمشاعري.. احس اني جالسة الوم نفسي على كل شيء.. نهى : الحمدلله و الشكر على نعمة العقل.. سها : انا ما قلت لكم عشان تتريقون علي.. انا صدق صاكة فيني الدنيا.. دانه : طيب استغفري لذنبك الله تواب رحيم.. سها : انا مو بس حاسة بالذنب.. اقولكم شيء بقلبي يعذبني.. ميار : حبيتية..؟! ندى : هيـــه ويش اللي حبتة.. ماشاء الله من نظرة حبتة.. توها دانه تقول عن ثامر وهو ولد عمتنا منا و فينا انها خايفة و لا تعرفة.. شلون هاذي تحب واحد ما شافتة الا عند باب الجامعة و لا تعرف عنه شيء..؟! عدا انه مو سعودي.. يعني المفروض بديهياً ما تفكر ترجع و تجلس تتفرج على الرايح و الجاي و جات عيني بذا و راحت عيني لذاك.. قلة ادب.. وعد : انتِ الحين ليش معصبة..؟! ندى : ايش رايك يعني ماهو غلط..؟! وعد : غلطت.. بس البنت حاسة بالذنب.. ولايمه نفسها.. يعني ضميرها صاحي لو ميت ما جاها احساس بالذنب.. و بنفس الوقت مشاعرها تحركت و ماهي قادرة تصدها.. نهى : لا والله.. يعني عادي اللي تقولة..؟! وعد : ماهو عادي.. لأن احنا بمجتمع ما يرحم.. لو بيوقف الموضوع عندي كنا نقول نسأل عن الشاب دامه خطبها و ان طلع خير زوجناها اياة.. لكن ورانا ناس همها الأول العادات و التقاليد.. يعني يا سها مشاعرك لازم تضبطينها لا تطلعين تشوفينة و تجددين اللقا كل مره.. انسيه و لا تفكرين فيه طلعية من حياتك.. حطي فيه سلبيات تخليك تكرهينة حتى لو ماهي فيه.. يوم عن يوم المشاعر اللي بقلبك بتموت.. بيجيك واحد يرضيك و ينسيك اياه.. سها : ليش ما قلتِ احسن منه..؟! وعد : ما ابي احط بذمتي.. يمكن الرجال احسن منا كلنا.. سها : ما قدرت.. و الله العظيم حاولت.. احس مجرد ما افتح عيني اشوفة هو.. و لا غمضت اشوفة و لا نمت اتحلم فيه.. ما يفارقني و الله تعبت.. انا اعرف اني جالسة اعذب نفسي وما احد اصلاً بيعطيني وجه.. انا رفضتة قلت لأمه اني ما اقدر بابا و اخواني ما يوافقون.. ندى : الكل ما راح يوافق.. لا ابوي و لا اخواني و لا عماني و لا عيالهم و لا كل عيلتنا كلهم بيتكلمون عليك.. بتخلينهم يحكون فينا مااحد راح يسمح لك تنزلين من سمعتنا.. وعد : ندى.. تراك جالسة تغلطين من غير لا تحسين.. ايش اللي تنزلين من سمعتنا.. ما تدرين عن اخلاق الرجال يمكن عندى ربي احسن منا كلنا.. ليش حطيتي عيلتنا كلها احسن منه..؟! عشانة مو سعودي..؟! ليش احنا ملائكة و هم تراب..؟! ندى جلست : استغفر الله العظيم.. انقهرت ابيها تحس بغلطها..انفتح الباب بقوة و انقطع سلسلة حديثهم بدخول جود : يا عيني ع الجمعة.. وليد و مشعل جوو.. وليد و مشعل : هـــاي.. ندى : وعليكم السلام.. ابتسم وليد : ما تغيرتي..؟! ندى : ليش كم لك مسافر..؟ قرن..؟! وليد يبوس راسها عشان يحسسها انها كبيرة : و الله انتِ المفروض تصفين جنب جدتي فاطمة.. حرام اصلاً حتى تصفين مع امي وخلاتي.. ندى طنشتة وهي تناظر جاكيتة لابسة من غير لا يدخل يده اليسار فيه : خير ان شاء الله وليدوه ما عندك وقتك تدخل يدك اليسار مثل ما دخلت اليمين.. وليد : مالت عليك.. (نزل الجاكيت و رماه كان مخبي كتفة حتى لما سلم على امه سلم بسرعة بسرعة عشان ما تلاحظ) ارتحتي.. ندى : بسم الله عليك ويش فيك..؟! وليد : طحت من الدرج.. جود تحك دقنها : اعتقد هاذي الاعذار يقولونها البنات مو العيال من ويش خايف عشان ما تقولنا شلون انكسرت كتفك.؟! وليد : بالتدريب ارتحتي..؟! جود تناظر السقف : الكذب حبلة قصير.. وليد طنشها و سلم على نهى و باس راسها نفس ما سوا مع ندى.. نهى استغربت : خير ان شاء الله ويش عندك تبوس راسي..؟! وليد : ما تستاهلن هذا عشانكم اكبر مني.. وعد وقفت عشان تسلم عليه و باس راسها : سلامتك.. وعد ابتسمت : الله يسلمك.. مشعل سلم عليها : الحمدلله على سلامتك اهم شيء صحتك.. وعد : الحمدلله.. مشعل : لا تزعلين.. الله بيرزقك بغيره.. وعد : ان شاء الله.. نهى : ما احد قالي سلامتك.. و الا ما قالوا لكم اني كنت مسخنة و بموت..؟! مشعل : الا جبتي العيد و ارتحتي..؟! نهى : مالت عليك.. وليد : سلامتك الف سلامة.. و لا تزعلين.. جود : خير وليدان ويش عندك صاير حنون..؟! وليد : من يومي حنون بسم الله علي.. جود : شكل مو بس يدك المنكسرة اتوقع شيء بمخك انكسر.. وليد : انتِ تبين تشوفين وجهي الثاني.. انقلعي جيبي لنا قهوة.. جود صفقت : يـــس هذا اخوي اللي اعرفة.. ندى : انتِ وين غاطسة..؟! ما تنشافين حتى النومة البارح ما نمتِ معنا وين كنتِ سهرانة..؟! جود : مع ريمي.. و نمت عندهم.. اما اجلس معاكم و اكتئب لا يا عمتي انا عندي هبوط بالسكر اجوائكم تأثر علي.. ميار : اكلت عقلك البنت.. جود : يـــس.. على الأقل القى احد يوافقني..؟! وليد يحط رجل على رجل : مين ريمي هاذي..؟! جود تلعب بحواجبها : بنت اللي معاقبك.. وليد : بنت غازي..؟! نهى : ويش عندك تقولها كذا بطريقة غريبة.؟! وليد : لا غريبة و لا شيء.. حرام اعرف ان كان عنده بنات و الا لا..؟! دانه : يمكن ناوي تخطب..؟! وليد : مين..؟! انا..؟! لا يا شيخة.. تستهبلين.. انا بكمل مسيرة العيلة.. قبل ما يصير عمري 30 ماني متزوج.. ويش لي بالحريم و حنتهن توني بعز شبابي.. مشعل : من جد .. عاد كل مره طلب و طلباتهن ما تخلص اعوذ بالله.. ميار : كأنكم جاين عشان تتمشكلون معانا..؟! وليد : لا جايين نتطمن على المملوحة.. جود : يا بخت عينيك يا بت دا الولد وليد بيحبك.. مشعل بحدة بسيطة : انتِ للحين ما جبتي القهوة..؟! جود : لا تنفخ علي.. و الله اعلم ابوي اقوله مشيعل و وليدان يتخدمون فيني و انا دايخة.. انحاشت اول ما شافت مشعل وقف.. مشعل : مجنونة البنت.. كن فيوزها ضربت.. نهى : تأثير بنت الخال.. مشعل : أي خال..؟! نهى : اللي اسمه خالي.. غازي.. مشعل : اهاا لا تذكريني فيه.. باط كبدي.. ودي انقفة و اريح الأمة منه.. وليد : مرتاحين هنا..؟! دانه ابتسمت : دام كلنا بخير الحمدلله مرتاحين.. مشعل : كيف النفسيات بعد الهوشة.. سها : خوات نزعل و نترضى من غير شيء عادي يعني.. مشعل : من جد نفسيات.. وليد يناظر مشعل : أي هوشة.؟! مشعل : طبعاً طافك ذاك اليوم كنا ببيت جدي اليوم اللي انحرق فيه البيت.. فجأة قامن على بعضهن و تهاوشن اساس الهوشة الهانم نهى و قالت كلام ويش كبره لأبوي عن التربية و الضعف و القوة تخبر حكي خواتي ما يحتاج.. وليد يناظر مشعل : ايه..!؟ و بعدين..؟! مشعل : طلعت الأخت مسخنة و تهلوس علينا.. وليد : هاذي اخرتها.. عاد لا تقول تزاعلن وهي تهلوس..؟!(ناظر خواتة) بالله زعلتن من كلامها وهي مهلوسة..؟! نهى : هيـــه تحسسني ان مكاني شهار.. و الله .. بعدين يعني صدق انا غلطت بأشياء بس مو كل الكلام اللي قلتة غلط.. مشعل : على أساس انتِ مثبتة ويش قلتِ .. يعني يوم قلتِ لوعد خلاص بنروح ما نبيهم كانتِ واعية.. نهى تربعت : لا ما كنت واعية و لا اقصدها يعني وين بنروح مثلاً لكن يعني فيه اشياء صح.. مشعل : اللي هي..؟! نهى : و لا شيء احتفظ فيها لنفسي.. مشعل : ترى فيصل طفشان لو تنزلين تونسينة.. نهى : هه يعني على أساس بستحي منك الحين و اقول اني خجلانة .. لا صحصح انا نهى.. مشعل ابتسم : من زمان فاسخة الحيا.. وليد : ما دريتوا عمي بندر خطب.. بصوت واحد من الصدمة : هـــاه..!! مشعل : هواااه ان شاء الله.. وعد : صح ان احنا كنا جالسين بالغرفة بس اذا موضوع خطبة كنا بندري..!؟! شلون يخطب من غير لا يقولنا..؟! سها : و كيف و مين هي..!؟ مشعل : يالله عاد فكك نفسك انا ما كنت بقولهم على خطبة سعود رسمي تقوم انت تبطها و تقول عن خطبة عمي.. ندى : سعود خطب رسمي..؟! يعني غريبة احنا بهالمكان و تصير خطبة و ما خطبة..!؟! دانه : من جد.. بس شيء حلوو و الله.. مشعل : جدي قرر و نفذ خطب لسعود رسمي ثم خطب لعمي بندر.. نهى : طيب ما قلت لنا مين خطب له..؟! مشعل : بنت عامر الكبيرة.. وعد : هنادي.. مشعل و وليد ابتسموا مع بعض و ردوا الاسم بنفس الوقت : هنادي.. وليد : هههههههههه ماشي يالعم برفه عن نفسي فيك قبل لا اسافر.. مشعل : هنادي و بندر.. بندر و هنادي.. الله الله.. دانه : عقبال ما نخطب لكم ان شاء الله.. وعد : شلون جدي خطب لعمي بندر اخبره بيفكر..؟! وليد : حطة امام الأمر الواقع.. عدا انها طلعت دكتورة..!! نهى : من جدك..؟!! وجدي ويش سوى..؟! مشعل : ولا شيء... عمي بندر قال ما عنده مانع ابداً و عامر قال انه بيفتح لبنتة عيادة نسائية خاصة و عمي بندر رفض و قال ان عيادتها ما يفتحها احد غيره.. وعد : هه سبحان الله.. ما يبون الطب و يريد ربي يطيحون بزوجة ولدهم دكتورة.. مشعل : كنك تستهزئين..؟! دخلت جود و معاه الصينية : شوفوا معطيتكم وجه.. ولو وحده غيري ما خلت اخوانها يجلسون و هي تخدمهم.. مشعل : مين قال اصغر القوم خادمهم.. نزلت جود الصينية ع الطاولة بقهر : اجل هاه شوف مين اصغر وحدة و تخدم فيها.. انا مانيب جالسة معاكم ماني ملزومة اقهويكم..! وليد : خير ويش مشغلك يومك ما تجلسين معانا.. من زمان ما جلسنا مع بعض.. ما اذكر حتى متى اخر مره.. جود تمسح يديها المبللة ببلوزتها : لا تبالغ هذا واحد.. اثنين .. ويش عندكم شيء جديد ما غير الكأبة.. و الا بتهاوشون.. نهى : بس بس عمي بندر خطب.. جود ناظرتها : احلفي..؟! نهى : كلام اخوانك.. جود تربعت على الأرض بحماس : دام هاذي سواليفكم بجلس معاكم.. يالله سمعوني.. مشعل : حريم.. الله يكفينا كيدهن.. جود : اشوف عاد تتزوج و الا لا.. يومك تسب الحريم.. وليد : الا بنتزوج احنا متفقين نأخذ خوات.. جود : ههههههههههههههه الله يعينهن يااارب.. و يعين امهن و أبوهن.. و يعين امي و أبوي اللي بيروحون يخطبون لكم.. مشعل : و يعين بيتهم و اهلهم و كل قبيلتهم.. سها وقفت : عن اذنكم.. وليد : على وين..؟! سها : تعبانة شوي بأخذ غفوة قبل المغرب.. مشعل : ابوي يبيكم كلكم المغرب.. سها : طيب.. وليد يناظر وعد : الحين هاذي الغرفة لكن جالسات فيها..؟! وعد : هذا جناح عماد.. انا جالسة هنا.. مشعل ابتسم : يا عيني يا عيني انام بجناج زوجي.. وليد : هههههههههه حركات من ورانا.. مشعل : اجل انتم وين تنامون..؟! ندى : تحت.. احنا اصلاً كلنا كنا مع بعض بس بعدين وعد اخذت مفتاح جناح عماد و طلعت هنا.. وليد : ازين عشان ترتاح.. مشعل يناظر الدولاب و بعده خزنة كبيرة : ويش عنده رجلك حاطة له خزنة..؟! وعد : ليش هو الوحيد اللي يحط خزنة..؟! جود نطت للخزنة بلقافة و حاولت تفتحها : قافلها برقم.. وعد تناظر جود : انطقي مكانك.. عماد منبه ما احد يلمس شيء.. جود : الله و اكبر كنه بيدري عاد.. لا يأثر عليك و تصيرين معقدة.. بعدين بكرهك.. وعد : جووويد.. جود طنشت و فتحت الدولاب لكنها انصدمت لما شافت الأسلحة قدامها خلت الأبواب مفتوحة و تناظر فيها بصدمة : من جد هذا شكله ارهابي..؟!! وعد قامت و قفلت الدولاب : لا تصيرين بزر غير امسكِ عن كل شيء.. جود : طيب علميني زوجك ليش عنده كل هالأسلحة..؟! وعد بحدة : ما ادري ما سألتة.. خلاص عاد خلي كل شيء مكانة ترى بيلاحظ انك محركة ارقام الخزنة و بيحس ان فيه احد حاول يفتحها.. جود : شكله عفريت مثل ما تقول ريما عنه.. ميار : صدق وعد ما تخافين تنامين و المكان فيه اسلحة..؟! احس رعب.. وعد : رعب عشان سلاح هنا..؟! اخبره امان مو رعب..؟! (التفت لجود) لا تصيرين بزر الاحقك عشان ما تلمسين شيء.. جود : اصلاً بطلع بروح اعرف سالفة الخطبة من جدتي هي عندها العلوم كلها.. وليد : من جد البنت فاصلة..؟! معقولة تأثير بنت غازي عليها..!؟ ندى : يا حليلك ما شفناها تقريباً من يوم جينا ما غير ثنتينهن مع بعض.. و نايمة معاهن بعد.. وليد : ويش تنام معاهن .. فرضاً بيدخل عند بناتة زينة تكون عندهن..؟! نهى : عاد هن منسجمات ليش تنكد عليهن.. وليد : ماهو قصة تنكيد.. تجلس معها متى ما بغت لكن وقت النوم تنام عندكن.. ماهي زينة تروح عندهن.. نهى : خلاص قولها و اذا سمعت كلامك لك اللي تبيه.. وعد : يا عيني و صرنا نتكلم كلام كبار وليدان.. وليد : راحمك عشانك تعبانة و الا مردغتك هنا.. كنك تقولين اني بزر..؟! وعد جلست على طرف السرير : حاشاك.. بس صدق تغيرت.. ويش اللي غيرك..!؟ نهى : من جد حتى انا حاسة بالتغييـر..؟!! وليد : صبن قهوة بس بلا هذرة زايدة انتن تبن واحد ما يعطيكن وجه عشان ترضن.. مشعل : ندى..!! ليش غيرتي رايك.. ندى حطت عيونها بالأرض للحظة و بعدها رفعتها بثقة لمشعل : ما ارتحت.. وليد : بس من الأول المفروض تكلمين.. مو ابو يفاجئ اخواني البارح بالليل يعلمهم.. مو تخلين الرجال يحدد العرس و يجهزر ثم تقولين ما ابيه.. ماهي زينة.. على الأقل كنا غطيناها بيننا عيال عم .. مو الناس تدري انه خطبك و تردينة.. ندى : انا قلت لكم.. من قبل اني ما ابيه.. وليد رجاءاً لا تفتح معاي هالموضوع.. خلاص كل واحد راح بحال نصيبة.. وليد : اوكِ انا ما راح افتح الموضوع.. بس شوفي سعود و ياسر ان سكتوا عن الموضوع.. و يمكن خالد و احمد يأيدونهم.. لأنك اساساً وافقتِ لو ما وافقتِ كان لقيتي من يوقف معاك.. ندى : اقولك ما ارتحت.. و أبوي وعدني ما يجبرني.. و خلاص الموضوع انتهى.. مشعل : لا ما انتهى.. لو انك أصريتي على رايك و اول مره يوم جيتي لأبوي و قلتي له انك مو موافقة كان الموضوع أهون كنا وقفنا معاك وما زوجناك اياه.. بس الرجال ماهو لعبة مره موافقة ومره لا ما ابيه.. بتصيرين مثل الخبلة اللي وراك له سنين راجتنا ما تبي فيصل و بس جاء و كحلت عيونها فيه هجدت.. نهى لوت فمها : انت ويش عندك مستقعد لي.. انا لا تحطيني بمقارنات مع احد.. لأني مو مثلهم.. و على فكره ابوي موافق على رايها و قال لعمي ان ما بينهم نصيب .. يعني خلاص الموضوع انتهى ما يحتاج تعيدون و تزيدون فيه.. مشعل : و انتِ هانم دانه ما طرى لك تعطينا رأيك للحين.. بلعت ريقها و بظرف ثانتين وجهها احمر من الخجل.. عيونها ما شالتها عن السرير.. وعد : مير زين انك فتحت هالطاري.. دانه ما تعرف شيء عن ثامر.. انتم تحسونة كيف..؟! وليد : و لا انا ما اعرفة يعني ما قدر جلست معاه جلسة شباب.. بس الواضح انه رجال راعي صلاة و دين.. مشعل : انا مره طلعت معاه هو واخوياة.. عادي زي أي شاب.. وعد : مو كذا.. يعني عصبي..؟! طيب..؟! ايش يحب..؟! كيف التعامل معاه..؟! كيف علاقتة باصحابة..؟! يدخن و الا لا..؟! كل شيء.. مشعل : بالعكس طيب و محافظ على صلاتة كان هو يأم فينا جماعة.. فرفوش و مرات يفصل و يجيب العيد.. اما التدخين(ناظر وليد و رجع ناظر خواتة) ما ادري اللي جلست معاهم يوم وما شفتة يدخن.. ما قد شفت سيجارة الله يمحيها من على وجه الأرض بيدة.. اما علاقتة مع اخوياة عادي زي أي اصحاب و ما يصير تقيسين عليها.. وعد : بالعكس علاقتة مع اخوياة تعرف منها كيف شخصيتة تشوفة على طبيعتة مع اخوياة و مع اهله اكثر من تعاملة مع أي احد ثاني.. بينهم عشرة ما راح يكون فيه تصنع.. مشعل : قلت لك مالاحظت عليه شيء شين ينقد فيه.. نهى : يعني تأيدونها تتزوجة..؟!.. مشعل : اذا استخارت و ارتاحت و هو ماله شيء يعيبة ليش ترفضة..؟! وعد : و عمتي لطيفة..؟! تعرفون ان تعاملها صعب.. و تحشر نفسها باي شيء و احنا بنات اخوها كيف بمرت ولدها.. وليد : ويش اللي كيف مرت ولدها..؟! اكيد بتعزها مثل بنتها.. لا تفكرن بتفاهات لا تودي و لا تجيب.. الرجال ما عليه منقود و انتهى الموضوع.. ندى : ايش فيك عصبت..؟! وليد : ما عصبت.. بس كبرن عقولكن عن التفاهات..(ناظر ميار المبتسمة) خير هانم ميار ويش عندك من دخلت بس توزعين ابتسامات..؟! ميار : مرتاحة الحمدلله.. من جينا المزرعة و انا حاسة باحساس جميــل من زمان فاقدتة.. مشعل : يا عساه دوم.. ميار : اميـــن.. وليد : تبينا نشتريها من عماد..؟! ترى عادي.. وعد : ويش نشريها منه صاحي.. لا ما نبيها يا زين مزرعتنا زيناه.. وليد يشرب الباقي بفنجالة : لا تكذبين مزرعتة اكبر و احلى.. مهتم فيها ما شاء الله.. وعد : بس تجيب الكأبة.. .. غازي بعد ما القى القنبلة على بناتة.. ينتظر ردة فعلهن.. لكن و لا وحدة فيهن استوعبت اللي قالة ابوها عشان تعلق.. امال : ايش فيكن بلمتن..؟! ريما : ايش فينا..؟! جيتي معاه تكلمينا يعني عادي عندك يتزوج..؟! امال اخذه الموضوع ببساطة : اكيد عادي.. من حقة شرع ربي يقول يحق لها يأخذ وحده وثنتين و ثلاث و اربع.. اجي انا اقول لا ما تتزوج..؟! ريما مستغربة من ردة فعل امها : يعني ما يهمك يكون عنده مره غيرك و يجيب عيال منها.. و يعطيها شيء احنا محرومين منه كل هالوقت.. غازي : ايش اللي حرمتكم منه يا ريما.. ريما : وقتك.. وقتك.. حرمتنا منك.. عمرك ما جلست معانا مثل كل اب يجلس مع بناتة.. دايم مشغول دايم ما انت فاضي عادي ندور عليك ما نلاقيك.. و لا مره.. ولا مره سافرنا معاك.. اصلاً كم مره سافرنا يمكن ثنتين و الا ثلاث مع عم عامر لانه محرمنا الوحيد وما يصير نسافر بدون محرم.. و انت و لا مره كلفت على نفسك تأخذ اجازة عشانا.. و الحين باردة مبردة تقول بتزوج و بتجيب مره.. و بتعطيها الوقت اللي احنا اولى فيه منها.. غازي : حبه حبه.. دخلت المواضيع ببعضها.. ادري اني مقصر معاكم و... قاطعتة ريما بوقفتها : شفت يعني انت معترف بتقصيرك و تبي تزيدة و تجيب مره تلهى فيها عنا مو بعيدة اصلاً بكره تنسى ان عندك بنات.. كل هذا ليش..؟! ابي اعرف ويش اللي مجبرك على الزواج.. ماما ويش قصرت فيه عليك..!؟ امال بحدة بسيطة : ريمــــا.. حتى لو كنتِ زعلانة مالك حق تغلطين.. حدودك لا تتجاوزينها.. ريما سكتت عيونها بالأرض امتلت دموع.. دايم تشكي من بعده و الحين يبي يبعد زيادة.. غازي : اجلسي خلينا نتفاهم بهدوء.. ريما و العبرة بحت صوتها : ما ابي اجلس .. سوي اللي تبيه ما يهمني.. اتجهت للباب بتطلع لكن غازي اسرع منها وقف لها على الباب : ما ابي حركات بزارين.. انتِ كبرتي على ذا الحركات.. (اخذ نفس) امي تبيني اتزوج لو الموضوع واقف علي ما تزوجت.. انتن عندي مغنياتني عن الف ولد.. لكن امي معطيتني مهلة يومين لو ما خطبت بتغضب علي.. تبي لي ولد يشيل اسمي..و انتم تعرفون ان امكم واجهت مشاكل بعد ما جابتكم و لما حملت بهمس كانت بخطر و الحمدلله عدت .. بس ما يصير تحمل مره ثانية و تعرض حياتها لخطر اكيد.. ما تطلع منه الا بلطف من الله.. ويش تبوني اسوي.. ارضيكن و ازعل امي.. و الا ازعلكن و ارضي امي..؟! شوق : انا ما عندي مانع.. ما نقدر نقولك لا على شيء من حقك.. اهم شيء ما تكون قشراء و تأخذك منا.. وقتها و الله لا اذبحها.. غازي رفع حواجبة و ابتسم : يعني انتم هذا اللي خايفين منه وحده تأخذني منكم..؟!.. اصلاً تعيش معاكم بنفس البيت.. ما راح اسكنها بعيد ابد.. ما عندي استعداد لهالشيء.. ريما بحدة : ما نبي نشوفها.. غازي : بتشوفينها و عشان ما تحسون اني بعدت عنكم.. حتى لو هي مالها دخل.. و بعدين ما عندي استعداد افتح بيتين و حط على ذا و ذا حراسة.. و البيت كبير و يسع الجميع.. ريما : لا تقـهـــرني و انت تحسسني ان الموضوع عادي.. ليش جدتي كذا.. ربي ما كتب لك تجيب عيال .. يعني تضمن لا تزوجتها تجيب عيال.!.؟! غازي : ريما.. امي مره كبير.. ما تعلمت ما تعرف ان البلا بالرجال مو بالمره.. و هي راكبة راسها بهالشيء.. تبي تشوف عيالي.. خليني اتزوج و ارضيها.. ريما : بتنبط كبدي و الله بتنبط.. ما راح اتحمل حتى اني اشوفها.. شوق : جدتي اصلاً شلون تفكر تزوجك و احنا بمكان زي كذا.. مو على اساس امن و بتحرمونا حتى من الجامعة..؟! غازي : شافت البنت هنا و راقت لها.. الا تبيني اخطبها.. ريما التفت لخواتها وراها بما ان هي و ابوها ع الباب و رجعت ناظرت ابوها على سؤال شوق : هنا..؟! مين..؟! غازي: ندى بنت ابراهيم.. شوق وقفت مصدومة من الاختيار : اخت سعود..!؟ غازي : ايه .. اخت سعود.. ريما تضرب رجلها بالأرض: ليش ابي افهم.. انا حبيت بناتة ليش تبي تكرهني فيهم بسبة زوجتك الثانية.. غازي : ريما .. كبري عقلك.. ويش اللي تكرهينهم.. البنت ما تدري عن شيء.. امي اختارتها.. و انا لسى ما خطبت اصلاً.. جود : اختار غيرها.. الا هي.. لا تأخذ من بنات ابراهيم لا تخرب صداقتي.. و بعدين شلون تأخذ اخت نسيبك..؟! غازي : ما تسكتين شوي انتِ.. لو تفكرين بالكلام اللي تقولينة تستغربين من عقلك.. هذا و انا اقول انتِ بنت ابوها طالعة علي.. حكيمة حتى لو انك شيطانية.. تطيرين الحكمة اللي اشوفها فيك.. ريما جلست على الطرف : شوف اعرف اسلوبك هذا يعني تبي تحرجني و تخليني اغير رأيي اختار عمتهم.. عندهم عمة ما ادري ويش كبرها بس بنات ابراهيم لا.. شوق تفرك يديها : سعود بيوافق..؟! غازي : يمكن..؟! و يمكن كلهم يرفضون كونها الثانية.. يعني ما عندي توقع لرأيهم.. ريما تناظر شوق مقهورة منها : و انتِ هذا همك.. سعود بيوافق..؟! من زين سعود اصلاً.. و بعدين ما يهم اهم شيء بابا ما يتزوج.. غازي : ريما.. بتحطيني بينك و بين امي..؟! بقولك بختار امي.. لا تحطيني بهالموقف.. جنتي تحت رجلها.. صح انك بنتي وما ابي زعلك.. بس لا تحطين نفسك مع امي.. ما يرضيني هالشيء.. ريما حطت رجل على رجل : اعرف جدتي ما ترتاح لين تشوف معاك عشر عيال مو بعيدة تزوجك اربعة.. عادي عندها.. اهم شيء ولد.. صادقة جود و الله ما قالت شيء كذب.. غازي : ليش ويش قالت جود..؟! ريما : تقول حتى الحريم ما يبون الا العيال مالت عليهم من حريم.. ما يبون بنات جنسهم..و يفضلون الرجال عليهم.. اصلاً ما وخرنا الا ذا.. و الا الرسول عليه الصلاة و السلام عاش و عنده بس بنات و كل عيالة توفوا.. الناس تترك الدين و تفكر بس بعقولها اللي يبي لها اعادة هيكلة.. يعني انت يوم تتزوج ما انت ضامن ان خلفتك تكون عيال اصلاً ما انت ضامن انها ما تكون عقيم و الا ان ربي ما يكتب لكم عيال.. و الا تجيب عيال و يموتون... غازي تملل من الحكي و هي تتكلم بتفاعل تبيه يقتنع : ريما.. امي ما راح تقنتع الا بالشيء اللي تعرفة.. و الولد قمتِ و الا قعدتي عزوة و سند.. و لا كبر ما راح تنتظرين مني لا سفر و لا غيره.. ريما : لا كبر انطر يا حمار لين يجيك الربيع.. غازي يصر على اسنانة : ايه و الله انك حمار.. ريما : طيب يمكن اتزوج و عيالي يصيرون كبر عيالك.. و عيالكم بما انهم خوال عيالي يسفرونا مع بعض ملزومين فينا.. غازي : استغفر الله العظيم.. ريما تعرفين ان اكثر شيء اترك الاستهتار و اخذ المواضيع بهبال.. انا ماني جالس اطق حنك معاك و ابسطك.. امال تناظر ريما : ما تخبرها تفر الموضوع فر ما تخليك تطلع بفايدة.. غازي : مثل بعض الناس.. يبي لهم تربية من جديد.. ريما : انا متربية.. و بعدين ما قلت شيء غلط.. انت تقول ما تنتظرين مني سفر و لا غيره.. ليش يعني ناوي تبرا منا..؟! ناوي تولي ولدك اللي لسى ما جاء امرنا..؟! يعني احنا كم اعمارنا وهو كم عمره للحزة اللي تتكلم عنها..؟! شوق : ريمـــا خلااص.. ريما احتد صوتها : ليش خلاص.. انتم تحكون بحكي مو مقنع و تبوني اقتنع.. اقنعوا انفسكم بالأول عشان تقنعوني.. تقولون الولد عزوة و اقولكم البنت اعز.. ليش دايم مأخذين ان الولد هو الحياة هو السند هو الخير.. و البنت ما يطلع منها الا كل شيء شين.. و لا لها تقدير و لا غيره.. ما يعدونها شيء.. اول بالأصح ما يشوفونها غير ثقل عليهم.. غازي جلس على الكنب ساند ذراعة على افخاذة : ليش انا قد حسستكم انكم ثقل علي..؟! ريما : ما تحسسنا الا انك شايل همنا و اذا طفشناك بشيء ما تحملتنا.. حتى لا زعلت منا ما ترضى بسهولة و كنك تبي ترتاح اطول وقت ممكن.. دايم تنقلنا ببيت عم عامر و تخلينا هناك.. اسبوع اسبوعين.. اهم شيء ترتاح ان هم بناتك انزاح لو فترة بسيطة.. امال قاطعت بنتها اللي تسترسل بالحكي و لا هامها شيء : ريمــــــــا .. انتِ فسختي الحيا..؟.. غازي و عروق رقبتة تنبض بقوة من الكبت ما راح يحط الحرة فيها ماهو ناقص مشاكل يكفيه وليد اللي يبي له محايلة و عساف اللي حيلة انهد من كم كلمة جاتة بوسط قلبة .. : خليها يا امال.. خليني اسمع ويش عندها.. كملي بعد..؟! ريما سكتت.. و عيونها ما ركزت على شيء تناظر فيه.. : ما ابيك تتزوج.. ماني متخيلة يكون عندك مره بحياتك.. ما عندي استعداد اتقبل هالشيء.. غازي : طيب انا بتزوج.. و بكره بخطب.. تقبلتي هالشيء و الا ما تقبلتية انا جيتك بالطيب و الزين و حاكيتك.. لاني عادك كبيرة و عاقلة و تفهمين بالحكي.. انا ما راح اغضب امي عشانك.. انتِ ما تقدرين أي شيء يسوية الشخص عشانك.. لما اتركم عند عامر ماهو عشان افتك منكم.. عشاني خايف عليكم لا يمسكم شيء.. دام كانتِ متوقعة اني اشوفكم بهالشكل.. اجل ابشري بزوجك عشان ارتاح صدق.. جهزي لعرسك بيكون قبل عرسي.. و طلع بعد ما فجر كلامة بوجهها.. رفعت عيونها تدور ابوها اللي كان جالس.. عقلها عجز على استيعاب اخر جملة.. جهزي لعرسك..!! التفت و عيونها متسعة تناظر امها خواتها.. احد يحكي ويش قال ابوها..؟! احد يفهمها.. قلبها بينفجر من القلق اللي انتشر مثل النار بالهشيم في جسدها.. بيأكل قلبها .. يزوجها..؟! تعرفة ما يثني كلمتة وما يقول شيء ما يعنية.. جنت على نفسها.. امال وهي تناظر بنتها و كأنها واقفة على هواية لا هي ثابتة و لا هي طايحة.. عيونها ضاعت و تشتت كل شيء داخلها من حكي ابوها : ريمــا.. ريما ناظرت امها تبي تستوعب تبيها ترجع تعيد لها الحكي.. او تكذب فهمها.. تقولها تراك فهمتي غلط.. ابوك ما يقصد.. امال جلست جنب ريما و حطت يدها على ظهرها : ريمــي.. شوق : ايش فيك بابا ما يقصد.. يقول كذا عشان يخوفك..؟! ريما يخوفني..؟! بمستقبلي و حياتي ..!؟ : كيفة.. خلوه يزوجني مانيب قايلة لا.. بس و الله ما ارجع له.. قالتها و الدمعة طاحت من عينها.. طلعت من بينهم و هي مقهورة على ان ابوها ممكن يتخلى عنها عشان يرتاح.. حتى لو فعلاً ما يقصد.. هي تعرفة مستحيل يقول شيء ما يقصدة.. شوق : مامي.. ويش بتسوين..؟! امال : ما راح اسوي شيء.. مستحيل يسويها ابوكم.. ماهو بايع بنتة عشان يرميها بهالشكل.. توها على الزواج على الأقل لين تتخرج من الثانوي.. بس يبيها تحس بحجم الكلام اللي قالتة.. ما قصرت عاد هي .. بقي تبرا من ابوها.. شوق : بس انتم تعرفون ريما مندفعة و ما تثمن حكيها.. امال : ولازم تترك هالشيء.. خليها تحسب حساب الحكي قبل لا ترمية.. (ناظرت لينا اللي ما نطقت حرف واحد ولا ابدت رايها ابداً و كأنها قطعة اثاث موجودة مجرد ديكور) لينا.. ما قلتِ ايش رايك..!؟ لينا تمثل البرود : عادي.. يتزوج ما يتزوج ماهو مغير شيء بحياتي.. بتمشي مثل ماهي.. و يمكن اسوء.. امال : ليش ويش اللي اسوء..؟! لا توقفن ضد ابوكن وتحطنة بنار بينكن و بينه امه.. ما راح يدور رضاكن عند رضا امه.. هو بيتزوج عشانها و عشانكم عشان يجيب ولد يكون لكن سند.. يعني حاطن قدام عيونة.. و ما تشوفن جزاة..؟! يا ماما ابوكم يجي تعبان يبي كلمة حلوة راحة يحس نفسة بمكان بعيد عن المشاكل و ضجة الشغل.. ماهو معقول بيسمع كلام انه مقصر بحقكن و تخلهن كأنه ما سوا لكن شيء بحياتكن..!؟ يكفيكن فخر انكن بنات غازي بن حمدان.. شفتن لو ما سوا الا انه اعترف فيكن.. تبوسن الأرض اللي يمشي عليها.. شوق : ماما و الله نعرف هالشيء.. بس احنا متعودين ان بابا لنا لحالنا فا اكيد لما يقولنا الموضوع اقلها بنتفاجئ في البداية بس بنتقبلة .. هاذي حياتة و من حقة يقرر اللي يبيه دامه ما سوا شيء يلحقنا بالعيب و المنقود.. بس انا شايلة هم عشانها اخت سعود.. اخاف يتحسس من هالشيء.. امال : توك قلتِ ماهو عيب.. و لا هو حرام.. و الرجال يفهمون لبعضهم اكثر من احنا نفهمهم.. و ما عمري سمعت عن رجال يعارض على واحد انه يتزوج الثانية.. ممكن هو نفسة ما يتقبل يتزوج لكن لغيره ما عنده مانع.. شوفي عيال عمك عامر.. ما عندهم مانع من زواج ابوهم.. نفس الشيء سعود و اخوانة ما اعترضوا على زواج ابوهم.. الرجال يأخذون المواضيع ببساطة و عقلانية اكثر من الحريم اللي يأخذونها بحساسية و يحسبون لكل شيء الف حساب.. شوق تنهدت : ما ادري.. و الله خايفة ما احس سعود بيرضى.. امال : اذا ما يرضى بيردون على ابوك بالرفض.. ومو سعود لحالة اللي يقرر لأختة.. شورها بيد ابوها و هي اكيد بتقرر.. لا تشيلين هم.. انتِ اللي بتعيشين معاه و بيتقفل عليكم باب.. ما راح يزعل عشان ابوك فكر يخطب اختة.. لينا وقفت ببرود او البرود اللي تتلحفة قدامهم بس من وراه هي اضعف من كذا بكثيــر : عن اذنكم.. امال : اصبري.. اذا ابوكم سألكم مره ثانية ما تردين عليه الكلمة و تتمنون له الخير و تقولون له موافقات.. لينا : عادي .. لأني ما راح اقول غير هالحكي.. يتزوج او ما يتزوج.. هذا شيء راجع له.. انا اخر وحده ممكن تبدي رأيها فيه.. طلعت تنفس عن قهر بقلبها مخفي عنهم.. تظهر عكس ما تحس.. و يشوفون شيء هي تبيهم يشوفونة و تخبي الباقي داخل عشان ما احد يعرف آلمها.. .. | |||||||||
|  |
|
05-10-14, 03:57 AM
| #82 | |||||||||
| نجم روايتي ومشرفة سابقة وفراشة متالقة بعالم الازياء
| منسدح بالمكتب اللي غصبة غازي يجي فيه.. انفتح الباب وهو ما فكر يشيل اللحاف و يشوف مين.. ما يهمة شيء اللي يهمة انه ما يشيل و يبان ان قلبة مفتوح للحين.. يخاف يقرونة.. يقرون حروف حب ما احد قدرها.. يقرون سطور من الوفا ما وصلت لأحد.. يقرون عبارات من الغيرة ما حس فيها احد.. يقرون قصص من الخذلان ما احد قراها.. كلها مجتمعة بقلبة.. لشخص واحد.. "وعد" و اللي يوجعة انه مقتنع بعقلة انها ما تنفع له.. ما تنفع تكون له حليلة.. ما راح يتصافون ابد.. بيتعذب و تعذب معاه.. و ما احد فيهم بيقدر ينفصل عن الثاني ويقولون طلق بنت عمه.. كان يقدر يحجر عليها خصوصاً انها محيرة له.. وما يخلي جنس مخلوق يفكر انه يخطبها.. لكنه ما يبيها.. عقلة ما يبيها و قلبة للحين يشفق عليها.. ويش المعادلة الصعبة.. ويش تكون الحياة اللي القلب و العقل فيها ما يتفقون.. ورى مين يمشي.. قلبة اللي يقول ما راح تملى عينك مره الا هي.. و ما راح يسمح لك تنساها.. او تنسى ايام كنت تفكر فيها كا زوجة.. و الا عقلة اللي يقول تفكيرها غير عن تفكيرك.. ما راح ترتاح معاها و الا تعيش بحياة هادية مثل ما انت تطمح حتى عيالكم ما راح يرتاحون لأنكم بتكونون بين مد و جزر.. و تزوجت و راحت بحال سبيلها حياتك لا توقفها عليها.. : ما قمت للحين.. لو جاي احد غيري و شافك بالشكل ويش بتتوقع يسوي..؟! ما رد.. يفتح جروحة و يبيه ينثر عليها الملح و لا يتألم.. : عســـاف.. جلس عساف بحدة : انت رئيسي على عيني و راسي.. كلامك بشغلي يمشي بالحرف الواحد.. لكن لا تدخل نفسك بحياتي.. لو سمحت انا مابي اغلط عليك.. لك عندي من التقدير و الاحترام ما ابي اندم على شيء ما اتمالك اعصابي فيه.. غازي يتمسخر عليه : لا و الله.. تبيني ما اتدخل بحياتك و اشوفك تهدم نفسك بنفسك.. قوم شوف شكلك بالمراية.. روح شوف عيونك.. هذا عساف.!؟ عساف على سن و رمح.. قلبة ما يتحمل فرقى مره.. عساف شد اللحاف و رماه بعيد عنه : لا تستفزني.. قلت لك لا تستفز رجولتي.. غازي : ويش رايك تقوم تكفخني..؟! عساف : لا تكلمني بحياتي رجاءاً.. غازي : ماهو بكيفك.. غصباً عنك.. قلت لك زواجي و زواجك بليلة وحده وما انت راضي.. ويش اسوي فيك..؟! تبيني اجبرك.. ماني عايز عنها يا عساف.. حتى لو ماني ابوك قادر اني اجبرك.. عساف : انا ما انجبر.. الشيء اللي ما ابيه ما اسويه.. غازي : خلها برضاك يا عساف.. انا ما ابي اخذ وحده انت كنت خاطبها و امشي بحياتي.. عساف : قلت لك الموضوع ما يهمني.. ما يحرك فيني ساكن.. غازي : طيب اسمع كلامي.. اخطب.. عساف : ما ابغى اخطب .. عاجبتني العزوبية.. غازي : اللي تبيها وما تبيك.. و تقول انك ما خطبتها عن قناعة.. قناعتك ما تقول لك تزوج و عيش حياتك.. شوف عيالك و فرح اهلك فيك..؟! عساف : مالي خلق لحنة الحريم.. و لا طلباتهم.. و لا عندي استعداد اسوي عرس و حوسة و فشخرة مالها اول من تالي.. غازي : مين قالك حنة الحريم ماهي زينة..؟! (ابتسم) تراها تونس.. تسمع سواليفهن و تعرف كيف يفكرون.. و طلبات شيء طبيعي يعني انت ما عندك طلبات و الا ناوي تأخذ وحده و لا تعطيها شيء.. الحياة اخذ و عطى.. و المره تقدر تدربها على الشيء اللي تبيه.. و اذا تبي خذ لك صغيرة تقدر تحكم فيها و تكبرها على اللي تبيه.. عساف : صغيرة..؟! من جدك..؟! تعرف كم عمري..؟! غازي يطلع جوالة و يرمية : ايه اعرف.. 34 وين الاشكالية ويش يعيبك..!؟ عساف : صغيرة يعني كم 25.؟! بيني و بينها 9 سنوات..!! غازي : شكل السالفة راقت لك..؟! عساف يتجة للمكتب : ما راقت لي.. فكرة اني اتزوج كنسلتها و ما عاد ابي اتزوج.. غازي : عساف ما ابي اجبرك على شيء.. و اقدر اجبرك بطريقة غير مباشرة..؟! كلمتين لجدتك تجيب راسك.. مثل ما ابي جابت راسي.. عساف يجلس على كرسية الطويل : ما احد يجبرني.. خطبت و انرفضت يعني سويت اللي علي.. و ان ظلوا يحنون و الله لانحاش مثل ما انحاش عمي من سنين.. غازي من غير لا يناظر فيه و هو معطية ظهرة : يعني بتجلس كل عمرك برا مردك ترجع.. مثل ما رجع عمك.. و الا بتزوج من برا و عاد شوي اذا تقبلوا الموضوع.. عساف يرفع سماعتة : سلمان هات لنا ثلاث قهوة طبعاً انت معانا ابيك تونسني.. غازي رفع حاجبة من غير لا يلتفت عشان عساف يشوفة.. عساف : اوك.. قفل السماعة و رجع للكنب مع الفريق غازي : تسمع سوالفة هالسلمان رجال شقردي.. قلت له يجي يخطب من عندنا بس للحين ما صفت.. غازي : ومين ناوي تعطية..؟! عساف : ما ابي احدد له.. قلت له امه تجي و تشوف خواتي و بنات عمي.. اكيد هو عنده مواصفات يبيها ليش احرج الرجال.. غازي وهو يعرف ان عساف يصرفة عشان ما يحاكية بموضوع زواجة : شكلة معجبك حيل..؟! عساف : و ليش ما يعجبني.. ماهو مقصر ابد.. دخل سلمان وبيدة ملف وراة ابو سارة معاه القهوة ادوا التحية العسكرية : السلام عليكم.. : وعليكم السلام.. تقدم الاثنين.. عساف : استريح يا سلمان.. اشر له مكان مقابل لة و يسار الفريق غازي.. اخذ سلمان القهوة و نزلها على الطاولة قدام الفريق غازي و عساف.. و جلس مكانة.. عساف : ايش الأخبار..؟! سلمان توتر : امم و .. .. عساف : ايش فيك تلعثمت قول ويش عندك..!؟ سلمان : جانا تهديد للمركز..باسم الفريق اول غازي و باسمك و اسم العقيد سعود و العميد عماد.. عساف : احنا الأربعة وبتهديد واحد.!.؟! غازي : شلون ارسلوه..؟! سلمان : بالبريد.. و تتبعناه بس ما لقينا شيء.. يمكن احد حطة بالصندوق من غير لا احد ينتبة له.. عساف : راجعتوا الكاميرات..؟! سلمان : ايه و ما كان فيه احد مشتبهة فيه.. غازي سند ظهرة : و بعدين معاهم ما يملون.. عساف : ما ظنتي.. لازم نتصرف باسرع وقت بالخطة الأخيرة.. غازي : ان شاء الله بس ننتظر الوقت المناسب.. .. جلس عماد جنبة : ويش فيك احسك متغير...؟! راشد : الصداع صاك راسي .. من جيت الصبح.. عماد : اخذت بنادول..؟! راشد : اخذت و لا نفع.. عماد : خذ مره ثانية و حاول تنام.. ان شاء الله تنفع.. راشد انسدح : مالي خلق حتى ارفع راسي احسة بيفجرني.. دخل عزام : الفريق غازي ماهو جاي..؟! عماد : الا شوي بيجي..؟! و بيجيب عساف معاه.. عزام تربع عندهم : ودي اشوف يزن.. لي يومين ما شفتة.. عماد : يالله عقبالنا.. نشتاق لعيالنا.. عزام مبتسم : ان شاء الله.. شوفتة يضحك تنسيني همومي.. ويش انا مقبل عليه.. راشد يضغط على راسة : احس شيء بصدري يعورني..(يأخذ نفس بقووة) استغفر الله.. عزام : ايش فيك يا رجال.. تبينا نروح المستشفى..؟!راشد يتقلب و يضغط على راسة بقوة : لااا ما ابي اروح مكاان ااااخخخ.. عماد : اصبر ننادي لك واحد من عيال عمي ابراهيم.. (وقف و عماد و طلع).. عزام قرب من راشد : ايش بلاك.. هذا صداعك اللي دايم..؟! راشد يصر على اسنانة و هو يحس جمجمة بتتفتت من قوة الصداع و ضغطة عليها : اليوم اقوى شيء ما ينطااااق.. دخل حاتم مع عماد : خير ان شاء الله.. عزام : تعال شوفة هو دايم يجية صداع بس هالمره اقوى.. حاتم جلس : راشد أي مكان براسك يعورك..؟! راشد : ككللله كللله بينفجـــر... حاتم : دام له فترة يحس بالصداع كان لازم تودونة يكشف الصداع عرض لعدة امراض ما يبان الا بالتحاليل و الأشعة.. لازم نأخذة المستشفى.. عزام : طيب انا بأخذة.. بس عماد بلغ الفريق غازي ان انا و راشد طلعنا.. في نفس المزرعة وراء الفيلا.. البنات جالسين.. كلهم عدا ريما و لينا.. انهار : ماهو متعب عليك توك مجهضة و طالعة برا بالبرد..؟! وعد منبطة كبدها صوتها ما تبي تسمعة : لا عادي.. و حتى لو بتعب ما احد طلبك تقومين فيني..!! مريم : ردي بأدب..؟! وعد : ومين حضرتك عشان تطلبين مني ارد بأدب..؟! مريم احتدت نظرتها لوعد : امك.. وعد : ارجعي عيدي حساباتك امي ماتت باليوم اللي ولدتني فيه.. روحي دوري بنتك بعيد عني.. ندى بهمس : وعودة لا تخلينهم ينقدونك و يمسكون عليك شيء.. انتِ اذكى من كذا بكثير.. مريم : خير ان شاء الله.. مين مفهمك اني توفيت..؟! لا تفاولين علي.. وعد التفت على خواتها و بنات عمانها : ايش رايكم وحدة تجيب بيبي و تتركة وما ترعاة تتوقعون ان قلبها توقف عن النبض يعني ماتت مو..؟! مريم : ابوك ما علمك كيف تردين على اللي اكبر منك بأدب و احترام..؟! وعد : لا تجيبين طاري بابا.. بابا علمني اني اعامل الناس باللي يعاملوني فيه.. عهود تشرب من فنجالها : مو مشكلة عماد يعلمك.. وعد : خلاص .. بس قبل اسالية الشخص اللي ما وفا لك توفي له..؟! و اللي ما عطاك بعز حاجتك تعطية..؟! ولا قالك ايه.. حزتها يكون لنا كلام ثاني.. عهود : ليش متوقعة يعني ان عماد ما عنده قلب عشان يقولك اقسي على امك.. عشانها تركتك صغيرة.. لا يا عمري.. عماد اكبر من كذا بكثير عماد يخاف ربه و ما يظلم نفسة.. بس مشكلة انك مو مقدرة الشخص اللي ماخذتة خسارة فيك.. جود كشرت بوجهها : نعم نعم..!!! لا يا حبيبتي هو اللي خسارة فيه اختي وعد.. وعد جوهرة ما يلقى لها شبية بالدنيا كلها.. خليه يقدر اللي عنده و يحمد ربه كل ما صبح و مسا عاللي عنده.. انهار : ايش دعوة..؟! مين ماخذ..؟! مره ما بها زود عن باقي الحريم.. سها : والزود اللي تدورينة انتِ وشو.؟! وعد تميزت عن كل الحريم كاملة و الكمال لله.. جمال و دلع و دلال و حسب و نسب و تعليم.. ويش يبي زود ان شاء الله..؟! عهود : و الله اخوي ما يبي وحده ما تبر بأمها.. امك لو تصبحك بطراق و تمسيك بطراق تبوسين الأرض اللي تمشي عليها.. جود : الحمدلله جاوبتي على نفسك بنفسك.. قلتيها تمسيك و تصبحك يعني معاك.. ما تخلت عنك و رمتك.. و جايها بعد سنين لما كبرتي تقول انا امك و بري فيني.. وعد : اششششش (تناظر خواتها) خلاص الموضوع انتهــى.. عهود : و على كيفك تبدينة و تنهية متى ما اشتهيتي..؟! اصحي يا حبيبتي.. مو كل الناس على هواك و مزاجك.. وعد : عهود ما ابي اناقرك.. مالي خلق اتهاوش معاك.. عهود : لا تكفين تعالي تهاوشي.. من زينك عاد انا اللي ميتة اتهاوش معاك.. لو بكيفي ما دخلتك بيتنا و لا خليتك مرت اخوي.. وعد ابتسمت تستفز عهود : بس ماهو بكيفك.. حطي تحتها مليون خط.. ماهو بكيفك.. ميار وقفت : انا بروح اتمشى.. سها : خذيني معاك.. عهود : الله لا يبلانا بس هذا اللي اقولة.. عماد ويش لاقي فيك اللي مخليك للحين على ذمتة.. ابيه يعطيني شيء واحد بس يشوفة فيك الا طويلة لسان و قليلة ادب و بنت عدو ابوي.. نهى : بمشي لك الثنتين لاني ما ابي اتهاوش معاك لكن بوقف عند اخر كلمة بنت عدو ابوي..؟! ترى ابوك هو اللي لوى ذراع ابوي باسلوب خايس زي وجهة.. هذا يعني ان ابوك هو اللي ما يعرف غير الشر هو السبب بكل شيء صار من سنين و للحين.. ويوم مل و طفش جلس يدور الصلح .. و اختار مين يكون الضحية.. و حطها براس اختي.. و عرف كيف يخلي ابوي يسكت.. بس يكون بمعلومك ابوي كلم وعد لو تبي الطلاق تطلبة انا اصلاً ما ادري ويش مصبرها على اخوك للحين.. و الا شلون بتدخل بيتكم..؟!!! مريــم بحدة : بــــــــــس ما فيه أي احترام لي جالسة بينكن..؟!! نهى : لا تكلمينا كلمي بنات اخوك هم اللي غلطوا علينا.. اما تبينها تهين ابوي و اسكت و الله لو انه الكلام يطلع منك لأرد عليك.. الا ابوي.. خط احمر ما احد يتعداه.. انهار : كنك انتِ الوحيدة اللي عندك اب بالدنيا.. ما احد عنده غيرك.. يا عمي طيري.. نهى : اووهوو علينا.. اذا انتِ ترضين ان احد يتكلم على ابوك قدامك هذا شيء راجع لك.. لكن احنا لا.. فاهمة و الا تبيني اعيد بطريقة ثانية.؟! انهار : بطريقة ثانية كيف يعني بتقومين تعطيني طراق..؟!! مريم بحدة تناظر هنادي : دقي على ابوك خليه يجي يتفاهم معاهن.. هنادي : ان شاء الله.. طلعت جوالها من جيب تنورتها الجينز تتصل على ابوها.. نهى تستهزء فيهم : يعني ويش بخاف منه..؟! ترى ما اخاف من ناس ما تخاف ربها..؟! الله فوقهم.. عهود : احترمي نفسك تراك بمكانا .. لا تغلطين و تتجاوزين حدودك..!! نهى : لا يا شيخة.؟! تصدقين مره خفت منك..؟! على فكرة ترى اخوك هو اللي اصر نجي هنا.. حطيها حلقة باذنك.. عهود : على الأقل احترمي هالشيء.. قدري الجميل اللي حطة على رووسكم..!! مريم : عهووود خلاااص.. هنادي : ابوي بيجي الحين.. اللي مو محرم لها تتغطى او اذا تحب تدخل.. بالرغم من ان عامر جاي الا انهن ما سكتن.. و كملن هواش.. وعد : الجميل اللي حطه على رووسنا..!!!!! صدمتيني صراحة..؟! انهار : انتِ مو زعلانة منه ويش جابك هنا..؟! وعد ابتسمت بسخرية : لا يا شيخة..؟!! ايش جابني هنا..؟! هذا الشيء ما يعنيك.. لا تحشرين نفسك بيني و بينه.. نتزاعل نترضى نتقاتل انتِ ما يخصك.. حطي هالشيء بين عيونك.. عهود ابتسمت تستفز وعد : و انتِ حطي بين عيونك ان عماد قلبة ماهو لك.. وعد ضحكت ضحكة قهر ماهو ناقصها هو و تحدية عشان تجي اختة تكمل الناقص : طيب بنشوف قلبة لمين يا بنت عامر.. كل البنات دخلوا عدا وعد و نهى و انهار و هنادي و عهود ومعاهم مريم.. عامر : السلام عليكم.. : و عليكم السلام.. وقفن وعد و نهى يسلمن عليه عشان ما يخلون لهم مجال يحكون على تربيتهم.. بعد ما سلم عليهم جلس.. : خير ايش فيكم..؟! مريم : تفاهم معاهن.. كل وحدة لسانها ويش طولة ما يحترمن احد.. عامر يستند بيدة على المركى : على ويش..؟! انهار : هم ما يحترمون احد و لا يقدرون يردون على خالتي مريم و لا كنها امهن.. عهود : و لا هم مقدرين احد.. و كل وحدة رافعة خشمها شوي ويشق السماء.. انهار : عدا انهم تكلموا عليك.. و يقولون ما تخاف من الله .. يعني ايش تبينا نسكت عنهم..؟! عهود : هن اللي يخلن الواحد يطلع من طورة.. كلامهن استفزازي..؟!! و كأنهم متفضلين علينا.. انهار تكمل السلسلة مع عهود : ولا بعد يا عيني ماهو عاجبهن اللي جالسات هنا.. يا حرام مو رايق لهن المكان عشتوا بنات العز و الدلال.. نهى و وعد مع كل جملة يناظرن بعض.. و ساكتات.. مو خوف ولا ما عندهن رد.. بس لعانة يبن يسمعن كل اللي عندهن و يعرفن ويش اللي بيقولنة و من بعدها يحكن.. عامر : هاه يا بنات ابراهيم.. ويش عندكن..؟! نهى ببرود تتكي على المركى بينها و بين وعد مثل حركتة : و النعم و الله ببنات ابراهيم الله يطول بعمرة.. علم بناتك ما ادري ويش يطلعن لك.. حقيقة النصب اللي سويتة على ابوي.. عامر بحدة : مواضيع الكبار ما يخصكن تدخلن فيها.. نهى : و الله عاد بناتك يقولن ان ابوي نهب فلوسك.. ما تبي تعلمهن الحقيقة ويش هي.. قولهن لا يتعدن حدودهن و يحكن على ابوي.. و الا اقسم بالله ما نسكت عنهم.. عامر : ما احد له شغل بشيء بيني و بين ابوكن.. ما يخص احد فيكن و لا اسمع وحده فيكن تتكلم بذا الموضوع.. وعد : و الله احنا ما حكينا هن اللي حكن.. ما راح نسمح لهم يتعدون حدودهم معانا.. و ترى مالهم دخل باللي نقولة لمريم.. ما يعنيهن.. لو نسب و نطعن فيها ما يخصهن.. عشان هن ما عاشن اللي عشناة و يديهن بالماء يتكلمن و يتفلسفن.. مالهن دخل.. نهى : صادقة اختي.. احنا و مرايم ننجاز.. لا يدخلن عصهن بشيء ما يخصهن .. هن اللي حكوا فينا يوم حكينا مع مرايم.. يعني هن اللي بدن.. عامر : نهى .. امكم هذا موضوع خاص.. و الحكي ذا كله و القرقرة مالي خلق اسمع نقار حريم.. انتن قرايب و الظفر ما يطلع من اللحم.. هواش و نقار ما نبي.. احنا بوقت نبي نكون على قلب واحد.. اذا انا و ابوكم بعد كل اللي صار بيننا هذا احنا جالسين بمكان واحد و نأكل من صحن واحد.. و عايشين بنفس المصاب مع بعض.. الظروف ما تحتمل اننكم تهاوشون.. احنا بأزمة.. خلوا الخلافات هاذي على جنب متى بتصافون..؟! ما تدرون الواحد متى الله يأخذ عمرة عشان يكون بقلب كل وحده فيكن على الثانية..!!! انهار : ما يخالف احنا ما بقلوبنا حقد.. بس هم يلتزمون حدودهم لا نغلط عليهم و لا يغلطون علينا.. نهى : احنا ما حارشناكم.. انتم دخلتوا نفسكم بيننا و بين مرايم.. عامر : انتِ ما تستحين تقولين مرايم..؟! نهى ببرود : لا ما استحي.. يعني ويش امي..؟! لا طبعاً لأنها ما كانت معاي.. عامر : مو لازم تكون معاك.. اهم شيء انها ولدتك على الدنيا.. تراك تعقين فيها و تغضبين ربك.. وين بتلقين التوفيق من الله و انتِ مزعلتها..؟! وعد : على أساس هي ما زعلتنا.. لا نضحك على بعض و نسوي انفسنا ناس مثالية و ما تشيل بخواطرها شيء.. انا ما اعتبرها ام لي.. امي توفت من سنين باليوم اللي اولدتني فيه ماتت.. انا يتيمة الأم.. و ربتني امي نوال.. غير كذا ما عندي.. عامر : استغفري ربك غيرك يدور امها عشان جنتة تحتها و انتِ ترفسين النعمة.. وعد : هي اللي رفست نعمة ان يكون عندها بنات.. هي رفستنا و راحت تدور سعادتها.. هي ما اهتمت لبناتها و لا نشدت عليهم.. .. في مكان مو بعيد.. سها : ادري و اللي ندمانة.. قلبي يعورني.. ما تخيلين شلون و الله مو قادرة اتحمل.. حاسة بالذنب.. ميار : سهاوي لا تعقدينها ان الله غفور رحيم.. استغفري لذنبك.. سها : و انتِ ويش فيك شكلك مهمومة..؟! ميار : هالفترة تركي ما يروح عن بالي.. بس حاسة براحة.. يعني ما ادري شلون افسرها.. مرات اقول لا تضحكين على نفسك يا بنت لو هو بخير ما كان له ثلاث سنين مختفي.. يمكن بيجيك خبر و يقلب حياتك فوق تحت.. سها : تبين الصدق.. اتمنى يجيك خبر على الأقل تعرفين راسك من رجلك.. تعرفين شلون تمضين بحياتك.. ميار : ما ابي الا يجيني خبر يفرحني.. ما ابي خبر يضايقني و الله بموت لو عرفت انه صاير له شيء.. و الله بطق.. ما اتخيل نفسي من غيره.. سها : هو ايش يشتغل..؟!! ميار : ضابط.. كان يشتغل ضابط.. عليه هيبة يا سها.. مرات لا شفت سعود اتذكرة.. على انه هو اقصر من سعود بشوي.. الا ان زية العسكري و مشيتة تذكرني فيه.. تخيلي مره .. كنت زعلانة و هو كان مستلم له 24 ساعة و اول ما وصل بيتهم و عرف من رغد اني متضايقة جاني يراضيني.. ما يبي ينام وهو يحس ان خاطري فيه شيء.. ما راح لين خلاني انبسط.. مرات يتصل علي يحس فيني اذا فيني شيء.. حتى لو كنت بكذب عليه اقوله ما فيني شيء يعرف من نبرة صوتي.. سها : تزوجتية عن حب..؟! ميار : لا.. بس اول ما خطبني حبيتة تعرفين اول رجال بحياتي شيء طبيعي بتعلق فيه.. و لما ملكت و تعرفت عليه تعلقت فيه اكثر.. على انه فترة ملكتنا يمكن شهر و كم يوم بس.. الا اني كنت احس نفسي كتاب مفتوح قدامة.. مره مالي خلق اشتري للعيد و لما عرف ليلة العيد نزل السوق وشرا لي يقول ما ارضى ان زوجتي ما تكون مميزة أيام العيد و لا تلبس شيء جديد حتى لو خزانتك مليانة.. سها مبتسمة : من عذرك تحبينة.. .. في نفس المزرعة واقفة عند الحيوانات.. تتفرج عليهم.. وقفت عند الأرانب رغم انها ما تعرف أي ذكر و أي الأنثى الا انهم اثنين كبار و اثنين صغار يعني صغارهم : ياليت بابا يحبني مثل ما ابوكم يحبكم.. من زمان ما عاملني مثلهم.. مثل باقي بناتة.. ريما بنت ابوها مثل ما يقول.. و شوق شبيهة ابوها و همس دلوعة ابوها.. و لينا و لا شيء.. ما عدها شيء من بينهم.. كرهها.. ما صار يعدها شيء مهم بالنسبة له.. حتى اثاث البيت اهم منها.. ما سمع حتى رأي بموضوع زواجة و عادي عنده ما اثر فيه.. ما حس بفرق.. صوت همس عند اذنها و شيء حستة على رأسها : حركة وحده ترحمي على نفسك.. ما امداها تستوعب كلمتة الا حست بشيء يكتم انفاسها و تفقد السيطرة على نفسها.. و تروح في عالم اخر.. .. و في نفس المزرعة لكن قريب من البوابة.. راشد خرج من الغرفة مخنوووق ..يتلفت يمين يسار.. يحس بشيء ينهش جسمة و صداع يفتت خلايا مخة.. جلس على ركبة و يضغط على راسة بقوة : يكفـــي.. وينـــك.. وينـــــك.. غازي نزل مع عساف من سيارتة مصدومين بـ راشد جالس على ركبة و اشبه بـ ساجد على الأرض.. غازي : ايش فيه..؟! عزام : ما ادري ويش صار له .. كنه مخنوق بالغرفة و طلع.. راشد من شدة الصداع يضرب راسة بالأرض : آآآخ.. غازي مسكة من كتوفة و رفعة : راشد.. راشد ما يشوف قدامة من الصداع.. عيونة بتطلع من مكانها من شدة الألم.. : وينك..؟! ويش صار..؟! .. لا إله الا انت سبحانك اني كنت من الظالمين.. لا أحلل نقل الرواية دون ذكر اسمي.. هاشتاق #رواية_لو_ٍسألتي_الورد ضحكة قهر..   | |||||||||
|
| |
|
12-10-14, 07:25 PM
| #84 | |||||||||
| نجم روايتي ومشرفة سابقة وفراشة متالقة بعالم الازياء
| بسم الله الرحمن الرحيم.. السلام عليكم و رحمة الله و بركاتة.. قبل البارت ابي اعطيكم خبر.. البارت الجاي يا ينزل يوم السبت باذن الله مثل هاليوم.. يا تنقفل الرواية قبل يوم السبت.. و نأخذ بريك.. لأن مره طاقة براسي .gif) اخذ بريك فترة مو طويلة يعني اسبوعين كذا.. ودي اسوي رفرش لمخي شوي.gif) ..<< و هذا مو شيء اكيد يكون هالحين.. و ممكن انزل الرواية باستمرار ورى بعض و انهيها.. بس مستحيل تنتهي بشهر حتى.. فيه احداث كثير معلقة للحين.. و تحتاج وقــت طويل.. عشان كذا لا تستغربون اذا لقيتوا الرواية مقفلة.. و تأكدوا ان الفترة ما راح تطول اسبوعين ثلاث و تنفتح اذا انقفلت الرواية يعني ما فيه شيء أكيد..الشيء الثاني.. البارت هذا صـــدمة.. هذا اللي اقدر اقوله ممكن تتنرفزون حيـــل على حسابة خصوصاً بالقفلتين.. العودة للمدارس و الدوامات الله يهونها عليكم و فالكم الفلاح جميـــعاً يارب.. لا تنسوني من دعواتكم نتايج الوظايف بتطلع يوم الثلاثاء باذن الله.. فاقدة لي كم شخص بالبارت الأخير و ان شاء الله اشوفهم بهالبارت.. و حياكم جميعاً قراء جدد او مستمرين معاي الله يسعدكم جميعاً.. أتركم مع البارت.. البارت الثاني و الأربعون.. ذكريات الحب توجع !لو فرحتي والجفا لو ما يضرّك ! ما يفيدك طاوعك قلبك على الفرقا ورحتي الله يسامحك والله لا يعيدك لـ رجف.. كانت تشوف الرجال مجتمعين و عندهم حدث مشغلهم.. ميار : الله يستر لا يكون فيه شيء..؟! سها : امشي خلينا نوقف قريب و نشوف.. ميار : اخاف سعود يذبحنا و يعلق جثثنا على السور.. سها تمشي و تتركها واقفة وراها : شكل السالفة حماس .. على الأقل يكون عندنا شيء جديد نشوفة.. قربت و هي تشوفهم مجتمعين على شخص.. قربت و ضربات قلبها تزيد.. عيونها غرقت دموع قبل لا تعرف السالفة.. و لا حتى حست فيها.. وقفت سها على الجدار و هي ما وقفت.. وكأن قلبها يقودها له.. قلبها يقولها تراك صبرتي تعالي اشبعي بشوفتة.. تعالي اروي ضماك.. سها استغربت من اختها اللي تعدتها و راحت همست : ميـــار.. لكن ميار ما وقفت.. اتسعت عيونها و هي تشوفة.. وما احد منتبة لها فيهم كلهم حول راشد.. مستغربين ع اللي يصير له.. رجف قلبها و هي تشوفة على ركبة .. وجهة اسود.. و كأنه مخنوووق.. همست تنادية.. صوتها مبحوح : تــ ـــركــ ـــي..!!! ما احد انتبه لها الا هو.. سمع شيء يتردد باذنة غريب.. او غريب بالفترة الأخيرة بحياتة.. ناظرها .. ملامحها مشوشة.. يشوف زول مره بس ماهو مثبت شيء.. لما شافوة يناظر احد وراه.. كلهم التفتوا للي يناظر.. ميار قربت و رجولها ثقيلة .. لكن لحظة لحظة لحظة حست نفسها بتطير له : تـــــركــــي.. مسكها سعود قبل لا يصير شيء يندبون على حظهم كل اعمارهم مصدوم من اختة اللي تجري ناحية الرجال.. : ميـار..!! ميار تحاول تفك نفسها من سعود و تصيح : تـــركي.. ترككككــــي... تــــركي و الله تـــركــي.. كلهم غضوا البصر عنها.. و يناظرون براشد.. اللي ما شال عيونة عنها.. الصداع زاد و يضرب براسة و كأنة بيزلزل كل جسدة.. بيتفتت .. لحظات و بيحس نفسة اشلاء.. وقف بضعف و يتجة لزول اللي يشوفة.. مره تنادي حتى مو مثبت هي ويش تقول.. ميار مصدومة بشوفتة بشكلة بنظرتة و كأن الروح اللي فيه غير عن روح عرفتها.. راشد نسى نفسة نسى هو وين.. وهو مين.. يحس بشيئين.. صداع يفتت خلايا دماغة.. و شعور يقولة شوف هاذيك تراك تعرفها.. سعود لنا شاف راشد متجة ناحيتهم رجع ميار ورى : ميـار ايش تقولين..؟! ميار تناظر راشد.. عيونها ما شالتها عنه.. فيه شيء ماسكها عنه.. شيء تحاول تفلت نفسها منه و تروح لـه تأكد .. لها ثلاث سنين ما شافتة.. هو حقيقة.. و الا شوقها يخليها تشوفة بوجية الخلق حولها.. ياسر مسك راشد و صرخ فيه : خيـــر على وين..؟!!! غازي سحب راشد : راشد صحصح.. ايش تحس فيه.. راشد عيونة ما غير اتجاهها.. ما يشوف غير زول يحس انه يعرفة..!! بس ما يعرف مين.. يحس ان هالروح تنادية.. و ما يدري ليش..؟! همس بصعوبة : أنا.. أعـ ـرفك..!! بــ ـس (غمض عيونة بقوة وفتحها مـتأمل يشوف شيء من ملامحها عشان يعرفها) نـاسي.. اسمـك..!! انصدمت.. من كلامك.. سعود كان مثبتها بقوة و هي كلام راشد خلاها تصلب.. عيونها غرقت دموعها .. صرخت : تـــركي.. انا سارة.. شلون تنساني.. انت وعدتني ما تخليني.. ثلاث سنين انتظرك.. شلون تروح وما تطمنا.. شلون تختفي و لا تخلينا نعرف شيء عنك.. الحين ترجع تقول ويش اسمك..!؟.. (كان بـ ودها تنزل نقابها تخليه يشوفها يشوف ملامحها.. لكن باقي فيها ذرة عقل للحين ما فقدتها).. ابو سعود وقف بوجهها بينها وبين راشد : ميـار بابا..؟! ميار همست وما يسمعها الا ابوها و سعود : و الله تركي.. و الله تركي انا اعرفة مو مجنونة.. ابو سعود : سعود دخلها.. ميار : لا.. لاا.. (تمسكت بأبوها بقوة خوف من انها تفقد شيء شافت له سراب) تكفى بابا خليني اشوفة.. انت وعدتني اذا رجع ما تحرمني منه.. ابو سعود : هذا اسمه راشد.. انتِ صرتي تشوفين تركي بملامح الخلق.. ميار و كأنها طاحت من اعلى قمة لأرض قاسية : راشد..!!! ابو سعود : ايه راشد.. ادخلي.. ميار : مستحيل.. سمعتة قال يعرفني.. انا ما يتهيأ لي.. (تغافلت سعود و فلتت نفسها منه.. و راحت لـ راشد ركض) : قولهم انك تعرفني.. انا ما انجنيت.. قولهم ويش وعدتني فيه.. علمهم انك تركي.. انا انتظرتك.. عيال ابو سعود وجيههم.. طاحت بالأرض من حركة ميار.. سحبها خالد بحدة و شالها وهي تصارخ تنادي تركي.. ميـار : تـــــركي.. تـــــــــركي.. لااااااااا تــــركي.. راشد اذا من لحظات الأشياء مشوشة عنده و لا يشوف تفاصيلها.. مع وجود ميار و تنادية بـ تركي.. و عقلة عاجز عن الاستيعاب.. تحولت الدنيا بعيونة لـ سواد و طاح بينهم مغشي عليه بعد ما خالد دخل ميار للغرفة.. غازي رفع راس راشد على رجلة وهو يضرب خدة بهدوء : راااشد.. راااشد.. حاتم : لازم ننقلة المستشفى.. ممكن يكوف فيه شيء خطير.. الصداع مو شيء هين.. عزام : انا بأخذة.. بس احد يساعدني نحطة بالسيارة.. عساف وهو يشيل راشد من جهة و عزام من جهة : انا بروح معاك.. غازي حط يده على كتف عساف : انتبهوا.. سلاحك لا ينزل من خصرك.. و عيونك لا ترمش.. عساف : لا تشيل هم.. ياسر يكلم سعود : ودي الأرض تنشق و تبلعني.. سعود : ومن سمعك.. خلنا نروح نشوف ويش فيها شكلها هلوست.. فعلاً كل عيال ابو سعود راحوا للمجلس الخارجي اللي دخل خالد فيه ميار.. اما بقية الرجال جلسوا على الأرض و القهوة و الشاهي متوسطتهم.. غازي : وين عامر..؟! عبدالله يرفع حواجبة : نادتة هنادي تقول البنات متهاوشات..؟!!! غازي : مين..؟! عبدالله : ما ادري.. عماد : تدري بس ما تبي تقول.. عبدالله ابتسم : شيء زي كذا.. غازي : فراغة.. ما عندهن شيء يشغلهن.. وين يوسف و محمد..؟!! ناصر : تكفى عمي غير تخف عليهم.. و الله هلكتهم من اول يوم.. غازي : انا قايل لأبوك ما يتدخل.. لا تدخل حتى انت.. ترى ما دلعهم بزيادة الا انت و عبدالله تتسترون عليهم.. شفهم لـ سوو شيء ما يقولون لعماد.. ما يقولون غير لك او لعبدالله عشانهم يعرفون انكم تطلعونهم و تسمعونهم كلمتين و تهديد و ينتهي الموضوع.. وينهم..؟! ناصر : نايمين عند ابو عبدالرحمن.. عشان يعرفون انك ما راح تدخل و تصحيهم و تزعج ابو عبدالرحمن.. مشاري يكلم بندر : مين تركي..!؟ بندر : ميار مخطوبة او مملكة من قبل لا تجي عند اهلها.. و تركي فاقدينة من ثلاث سنين.. شكل البنت فيها بلى.. مشاري : غريبة..!! بندر : ويش الغريب..؟! مشاري : البنت مستحيل تكلم واحد زي كذا و قدام ابوها و اخوانها و مو متأكدة.؟!! وهو اسمه راشد..؟!! بندر : الله لا يستر لا يذبحونها بس اخوانها.. مشاري : عاد شوف ابو سعود جالس.. بندر : باط كبدي من اليوم اللي فقد فيه وعد وما قدر يرجعها طلع نفسة و مولي الأمور عيالة.. لكن و الله ما اخليهم.. مشاري : ويش تنتظر جالس يجيبونها لك جثة..؟!! بندر : الحين بقوم.. ما انت جاي..؟! مشاري : الا.. نتعاون عليهم.. وقف بندر و ومعاه مشاري.. ابو عمر يكلم اخوة : ويش قلت..؟! ابو سعود : ما عندي مانع نهى بنتك يا سعد.. و دام جاي الشيخ يكتب كتاب سعود و بندر يكتب لـ فيصل.. ابو عمر : و يـاسر..؟! ابو سعود : و ياسر بعد.. و الله ييسرها و نطلع من هالمكان.. ابو عمر : تكفى يا اخوي لا تعاند.. ترى عندك عيال يبونك.. لا تضرب الكل بالجدار.. و تنسى بناتك.. ابو سعود : ماني ناسي احد.. بس ما هو معقول بنجلس شهور هنا.. ما احنا صابرين و الله.. ابو عمر : ما احنا جالسين شهور اضحك عليك لو اقولك باصبر بس بِدت ان الموضوع في اولة.. انتظر لين يركد.. راكان و فيصل و ماجد و يزيد جالسين بطرف و يسولفون.. راكان : و الله ان حياتكم ملل و طفش.. شكلي بكره برجع لبيتنا.. فيصل : الموضوع مو على كيفك.. راكان يسترخي على المركى ورى ظهرة : للأسف ما تعرفني.. ما احد يوقفني عن نيتي ابد ابد.. لذلك لا تقول منو على كيفك هذا الشيء بيزيدني اصرار اني اعاند.. ماجد : لا تعاند و لا غيرة .. الموضوع حياة او موت.. راكان : و الحياة مره ماني مقضيها بحبسة هنا.. بكره ناوي اداوم ان شاء الله و اضرب الكل بالجدار.. يزيد : عمي.. ويش اللي تضرب الكل بالجدار..!! راكان : و بأخذ خواتي معاي.. بعد ليش يغيبون.. دراستهم صعبة.. فيصل : لا عاد راكان زودتها.. بتروح بكيفك.. بس أثير و أسيل لا.. راكان يشبك يديه ورى راسة : و اذا قلت لك هن يبن يداومن..؟!! فيصل : ماهو بكيفهم.. الدنيا معفوسة فوق تحت و حضرتهن بيداومن.. اللي يمشي ع البنات يمشي عليهن.. راكان : خير ايش فيكم عصبتوا.. ما عليش احنا ما نعرفكم غير من كم اسبوع.. لا تجلسون تتفلسفون و يعني خايفين علينا.. ما احد له دخل فينا.. فيصل احتد صوتة : لا ماهو بكفيك ترمي الكل بعرض الجدار و تسوي اللي براسك.. تبي تعرض حياتك للموت هذا هو الباب مفتوح لكن عماتي لا.. ابو عمر : خيـــر ايش فيكم..؟! راكان وقف : و الله انا ما انتظر رأي احد فيكم.. أسيل اخر سنة بالثانوي وماهي مضحية بمستقبلها على حساب خيالات.. و أثير دراستها صعبة و ما لازم تغيب عشان تفهم.. ابو عساف : ليش العناد ابي افهم..!؟!! راكان حط سبابتة على راسة : مزاجي.. و مو عشان عايشين معاكم بنفس المكان تحكمون فينا.. فيصل وقف : لا ماهو مزاجك.. بتروح لحالك سفرقك ما احد رادك.. لكن عماتي ما تأخذهن.. و مو عشان عايشين معانا لا يا حبيبي.. تراكم شايلين اسم عيلتنا.. و الدم اللي بعروقنا واحد.. ابو عساف : احنا ما نخلص من ذا الموضوع.. طلعة من هنا ما فيه.. لا لك و لا خواتي.. لو تنطبق السما ع الأرض ما تطلعهم.. راكان : لا يا شيخ.. حسبالكم الحين بخاف و أسمع كلامكم الحين.. لا يا عيني.. ما تعرفوني.. انا بايعها.. حياتي ما تهمني.. ولو كلفتني طلعتي من هنا حياتي.. بدفعها و اوقع عليها بعد.. ابو سعود : راكــان .. كلنا نبي نطلع ماهو بس انت.. لكن بس اصبر لين يتبين لنا الموضوع.. ماهو بالعقل اصلاً بنجلس كذا حاطين يدينا على خدنا و نترك كل شيء ورانا.. بس اصبر يا اخوي يومين.. لين نشوف.. فيصل : عمــي.. ما سمعت سعود ويش قال..؟! تطاوعة الحين.. و لا بعد ناوي يأخذ عماتي..؟! ابو سعود : سمعت.. و البنات ما احد بيطلع منهن حتى لو احنا طلعنا.. هنا اامن لهن.. لن نتأكد ان الأوضاع كلها تمام.. فيصل يناظر عيال عمة متنرفز يبي احد فيهم يفزع معاه.. بس يزيد هادي اصلاً ومستحيل يعترض على شيء.. و ماجد ما راح يحكي دام عمة حكى .. و عيال ابراهيم هم اللي ممكن يعترضون لكن ما احد فيهم هنا.. التفت يناظر عمه ابراهيم : دام السالفة كذا ماله داعي ننتظر انا بعد بكره بروح ادور لي وظيفة.. ابو عمر : فيــصل الموضوع مو عناد.. فيصل : انتم بتخلونة عناد.. و الا بتمشون الكلام على ناس و ناس.. ابراهيم بحدة : فيـــصل.. فيصل صد بوجهة شوي و رجع يناظر عمة : انا بعد مو مقتنع بكل اللي يقولونة سعود و عساف .. بس ساكت عشان حريمنا.. عشان عرضنا.. عشان وعد يوم انخطفت و ما احد قدر يسوي لها شيء.. و الحين يوم انحطينا بمكان على قولتهم امن بتفكون البيبان.. اجل ماني جالس حتى انا.. عماد : ممكن ما تجيب سيرة خطف وعد.. لأنها هاذي سالفة غير عن الموضوع اللي احنا نعيشة.. او موقف غير بالأصح.. فيصل : لا ماهو ممكن.. ليش ما هم نفس الناس اللي خطفوها وما قدرتوا تسون لها شيء.. عاشت شهر عند ناس ما تعرفهم و حضراتكم ما تعرفون وين مكانها.. و هم جالسين ببيوتهم ما احد فيهم تحرك على اساس انتم تسون شيء.. غازي بحدة : ما اسمح لك تتعدا حدودك معانا.. احنا سوينا كل اللي يطلع بيدنا لكنها هي انحاشت.. و ما فكرت ترجع بيت ابوها.. و لا معاها أي شيء نقدر فيه نتعقبها و نعرف مكانها.. يعني اذا بتلوم احد بموضوع وعد روح لومها هي.. و الا احنا من اول يوم رحنا و داهمنا المكان عشان حضرتها و بالأخير ما تقدر احد و تختفي.. تراني ساكت عنها.. ماهو عشانها.. عشان ابوها.. لكن دام فيك خير و تبي تكلم .. روح لها هاوشها.. راكان : حلوه هاذي يروح يهاوشها.. و بصفتة ويش .. حيا الله ولد عمها.. وعد ما سوت شيء غلط.. احتمت بعمانها.. يوم شافت ان ما احد فيكم قادر يحميها.. غازي صرخ على راكان : لا تقول احتمت بعمانها.. متى دريتوا انها بنت اخوكم..؟!! بتفهمني من يوم ما لفت عليكم عرفتوا..؟! راكان ابتسم و هو يلف بعيونة عشان يقهرهم : لا.. بس عادي كانت معززة مكرمة منحاشة من زوجها السكير.. عماد مسك راكان من ياقتة : تدري اني بضربة وحدة بدفنك بأرضك.. بنت اخوك استغفلتكم وهاذي مشكلتكم.. اغبياء تصدقون أي شيء و الا فيه ناس صاحين يضفون مره عندهم ما يعرفون عنها أي شي..؟!! يعني حتى انفسكم ما فكرتوا فيها ما فكرتوا انها ممكن تجيب لكم مصيبة و تودركم للقاع.. راكان ابعد عنه عماد بقوة و يعدل ياقة ثوبة : و الله اذا انت تفكيرك سيء و ما تظن بالناس الا الشر هذا شيء راجع لك.. و العرق يحن حتى لو ما عرفنا انها بنت اخونا.. لكن يبقى الدم في عروقنا هو نفسة.. شيء طبيعي بنثق فيها و نحميها.. ابو سعود بحدة : خــــــــــــلاص.. الموضوع انتهى بأرضة.. لا احد يعيد بشيء صار و انتهى.. فيصل : و الله يا عمي انتم بتكررونة ما اشوفكم اعتبرتوا.. ابو عمر بحزم : فيصــل عمك قال خلاص.. يعني خلاص.. فيصل : اوكِ بس و الله العظيم لو عماتي يعتبون البوابة اني لا ارجع بيتنا و معاي اختي و امي بعد.. : السلام عليكم.. : و عليكم السلام.. جلس عامر : ايش فيكم..؟! ابو عساف : ناظرهم صلوا على النبي و انثبروا اماكنكم.. تفاوتت الردود من الجميع : اللهم صلي و سلم على نبينا محمد و آلة و صحبة أجمعين.. عبدالله : ما ادري ويش صار من جينا و احنا نتمشكل..؟!! غازي : لا تقول بناتي مع اللي متهاوشات..؟! عامر ابتسم : لا.. انهار و عهود و وعد ونهى.. ابو سعود : استغفر الله العظيم.. عامر : ما يهم.. مردهن يتراضن.. لكن كلمهن عشان امهن.. عجزت اكلمهن اجيهن يمين يلفن يسار.. عماد : وعد لا احد يكلمها هالفترة انا بكلمها بعدين.. فيصل عقد حواجبة يعني جات على نهى..؟!!! بس ما علق و قال اللي بخاطرة.. .. عند عيال ابو سعود.. ميار تبكي.. و الكلام و ردود الأفعال متفاوتة.. بس الأكيد اللي مهون الموضوع وجود بندر و مشاري و احمد.. و حاتم ما تدخل و ابدأ رأية.. ياسر : يا ســــــلام عليك.. انا وجهي طاح بالأرض ودي ان روحي راحت و لا شفتها واقفة قدامة و تكلمة.. و لا كلنا واقفين.. كلنا و لا عبرتنا و احترمت وجودنا.. سعود : كان سألتينا.. كان قلتِ شيء و احنا علمناك انه راشد ماهو تركي.. خالد : مخك ضرب و صرتي تشوفينة بالناس.. طاوعناك على انك تبقين على ذمتة.. بس ما ينزر عقلك و تفضحينا بين الناس.. مشاري : ايش فيكم ما سكتوا و انتم من اليوم تحكون بالبنية.. اعطوها فرصة تقول اللي عندها.. لا تحكمون عليها.. خالد : بعد ايش..؟! هاه.؟؟! بعد ما سودت وجيهنا..؟! وليد متكي على الجدار و اخذ الموضوع ببساطة اكثر من اخوانة : ميار سوت شيء غلط اوكِ كلنا نتفق على ذا الشيء.. بس ما يستاهل صراخكم عليها ابد.. سعود كتف يدية : لا تكفى احلف.. خلني اصدقك..؟!! وليد : انا ما تكلمت عشان تتمسخر علي.. راشد تعبان.. و ميار شافتة و حسبتة تركي.. و هم كلهم شافوها تحسبة تركي.. و تركي زوجها يعني ما غلطت عشان تكلمون عليها.. اعطوها الفرصة انها تحكي.. ياسر واقف قدام وليد بينهم خطوات : انت بس تبي تعاند.. صح.. (آشر عليها بيده اليسار) طيب هاذي هي خلها تكلم.. يالله.. وليد : و الله غصب ما تكلم هابين فيها شوي و تقتلونها.. ميار : و الله تركي.. انتم مو مصدقيني.. بس و الله العظيم تركي.. انا من يوم جيت هنا و انا مرتاحة.. و الله كنت احس بشيء غريب.. و الحين عرفت انه عشانة موجود معاي بنفس المكان.. ياسر يمسك ياقة ثوبة بقوة و كأنه بيشقها نصين : يالله.. حسيتي فيه معاك بنفس المكان .. هيـــــــــه انتِ اصحي.. يعني لا قلتِ هالحكي احنا بننطم و نسكت.. لا يا هانم فاضحتنا بين الرجال.. بيقولون ابراهيم ما ربى بنتة.. و اخوانها ديكور واقفين رخوم ما مسكوا اختهم.. بندر بحدة : انطم انت و اياه.. خل احد فيكم يحكي كلمة وحده وشوف ويش اسوي فيه.. سعود : استغفر الله .. وجهي انقص.. ويش تبيني اسوي.. كيف بطلع اواجه الناس..؟! بندر : لا تحسف البنية.. اللي صار صار و انتهى.. هي تحسبة تركي.. و ما هو تركي.. يعني ما تعرف راشد نفسة.. ليش مسوين سالفة.. اللي بيشكك بأخلاقها اوكله التراب.. ياسر : مو هذا اللي نافشهم علينا.. يغلطن ثم يلقن من يطبطب عليهن و ما صار شيء..؟! وليد : ما غلطت يا ياسر.. لا تسوي سالفة.. من عذرها اللي سوتة.. لها ثلاث سنين ما شافت تركي.. و يمكن راشد يشبة تركي.. و شبهت عليه.. ياسر : يا شيخ..؟! ورى ما تقوم تهفني..؟! مشاري : استهدوا بالله انت و اياه.. فايقين للمشاكل ماشاء الله.. وليد : اقسم بالله واصلة معي.. و لا لي خلق اناقر هذا و هذاك.. دوبني افكر باللي براسي .. بس اني اشوفهم يهاوشون ميار على شيء ما يستاهل ما راح اسكت.. ياسر : لا تجلس تكلم و تبين لها الموضوع عادي و كأنها ما غلطت.. احمد : ياسر.. ما نقول ما غلطت لكن ماهو مستاهل الموضوع انك تعصب عشانة.. خالد : يعني عادي انها شوي و تمسك الرجال و تنادية باسم الزفت تركي.. و تفضحينا بين الناس و تنزل رووسنا بالتراب.. بندر وقف و مسك خالد من ثوبة ع الكتف و وليد من تيشيرتة على كتفة و شدهم : اطلعوا برا.. بسرعة انتم بعد الحقوا اخوانكم.. ما ابي اشوف احد فيكم.. و خل واحد يكلم ميار و الا يقولها ربع كلمة.. سعود : عمـــي..!! بندر : عمت عيونك ان شاء الله بسرعة الحق اخوانك .. كلكم برا.. طلعوا الشباب كلهم و مو عاجبهم الوضع ما بقي الا مشاري مع بندر.. .. | |||||||||
|
| |
|
12-10-14, 07:28 PM
| #85 | |||||||||
| نجم روايتي ومشرفة سابقة وفراشة متالقة بعالم الازياء
| .. في غرفة تجمع اسيل و اثير و عبير و صبا و سهاد.. أثير : ومين بيسمح لك تشوفينة يا هانم..؟! أسيل تفك شعرها و تلمة و ما تهتم لأحد : انا بسمح لنفسي.. أثير : اجل انقلعي و شوفية ليش جالسة.. أسيل : ماني رايحة عشان اشوفة..بس .... عبير : بس ذبحك الشوق يا خية.. أسيل : لا تلفقن علي.. (تمسح بـ سبابتها على شاشة الجوال وهو مظلم و تناظرهن) .. لكن بكلمة.. عشان شيء بخاطري.. سهاد : طيب روحي وين الاشكالية.. مو مملك عليك.. خلاص روحي ما احد بيقولك لا.. أسيل : بلا غباء انتِ و اياها.. شلون انادية.. يعني اروح عند الرجال و اقوله نايف تعال ابيك.!.؟!! و الله غير ينحرني.. عبيـــر تزم فمها : اوووبس.. بنصلي عليك الفجر اجل.. خلاص طيب ارسلي له رسالة..؟! أسيل بحدة : غبيـــة غبيــــة انتَ على مين طالعة.. لو عندي رقمة ما شاورتكن.. ما عندي رقمة.. أثير : طيب خلي رند تنادية لك.. أسيل شهقـــت : من جدك.. و الله تفضحني هالبنت.. اول اسوي لها اختبارات طلعت فضيحة ابعديني عنها.. سهاد : الحين عم مشاري و عم راكان عادي عندهم تكلمينة صح..؟! أسيل : لو مو عادي ما سويتها اصلاً.. سهاد : طيب ارسلي لواحد فيهم و قولي له يكلم نايف انه تبينه.. طق ع الباب سكتهن كلهن.. أثير : تفــضل.. دخلت هنادي مبتسمة : السلام عليكم.. : وعليكم السلام.. هنادي : اذا ما عندكم مانع تجون نجلس كلنا بالصالة حاطين قهوة و حلى.. عبير: فيه حريم..؟! هنادي : لا ما فيه.. كلهن صلن العشا و نامن.. بس احنا و ناديت وعد و خواتها.. وقفت عبير اول وحدة : دام فيها بلعة و ما فيه حريم اجل يلاا قووو.. ننبسط.. أسيل توقف و تناظر عبير اللي بتطلع مع الباب : تبن بوجهك ما استفدت من وراك شيء.. عبير التفت لها : خلاص الحين اكلم عساف و اقوله عمتك المصون بتكلم زوجها الجميل و عاد نتفق احنا متى نصلي عليك.. أسيل بحدة وهي تعداها : يخـــــــسى.. و الله اكلم مشاري اصلاً ما يفهمني الا هو.. أثير : خذي رقمة عشان ما تورطين مره ثانية.. جلسة بنات تجمعهم كلهم عدا ريما و لينا.. و معاهم مريم.. نهى : ايه انتِ مع خمدت ريما صرنا نشوفك.. جود تشرب من فنجالها : لا تذكريني.. قاهرتني .. و اتصل عليها ابيها تصحى ما صحت شكلها مخليتة سايلنت.. دانه : الحين صرنا كخـــة..!!! جود ترمش بعيونها : تقدرين تقولين كذا.. هنادي تسكر جوالها : بنات لا احد يطلع فوق عماد بيطلع الجناح.. جود : عادي حياه .. خليه يأخذ راحتة.. انهار : اكيد بيأخذ راحتة مكانة.. جود تمثل الصدمة : و الله ما دريت.. ندى : جووود.. ما نبي مشاكل.. جود : اوكــ ريلاااكس.. صبا : اجل وين ميار..؟! سها : ميار مع عمي مشاري.. أسيل ماسكة جوالها : لا تقولين.. يعني وشو ما اتصل..؟! سها : تتصلين على مين..؟! اسيل : مشاريوه..؟! سها : ويش دراني عنك.. بس ما انصحك.. لأن البنت مسوية مصيبة.. و عم مشاري و بندر معاها.. جود : ليش ويش مسوية..؟! سها عشان ما تقولهم لأن فيه ناس ما تعرفهم : ما ادري.. نهى : اهـــا.. هنادي منحرجة : بنات بقولكم شيء.. سكتن البنات يناظرنها و هي تناظر الأرض مستحية .. مريم : نسمعك قولي .. هنادي ناظرت عمتها اللي تدري ويش بتقول.. : ابي اسالكم انتم..(آشرت على بنات عيلة ابو مساعد).. ندى : اسالي عادي.. هنادي تأكل بشفايفها من الاحراج حطت نفسها بموقف غبي بس ابوها قالها فكري و معاك لين بكره عشان تعطيني رايك قبل الملكة.. و هي ما عندها مانع بس تبي تعرف على شخصية بندر : ......................... مريم تولت الدور عنها : كيف عمكم بندر..؟! عبير : كيف يعني عمي بندر..؟! نهى : اهـــا.. كذا السالفة.. سهاد مستغربة : أي سالفة..؟! نهى : ليش ما دريتي..؟! عمي بندر بيتزوج.. عبير شرقت بقهوتها : كح كح.. ويش قلتي..؟! جود : اجل طافكم نص اعماركم.. و احنا بعد.. اللي ما شفنا خشتة وهو يخطب.. < قلبن الموضوع و لا كأن البنت قدامهن.. أسيل : يا عيني بنيدير يتزوج.. احسن عشان يفك عني قاهرني.. عهود : استغفر الله.. و لا كأن عمتي سألتكم.. وعد تناظر هنادي : بصراحة عمي بندر ما ينطوف ابد مو قصور فيك.. بس انتِ سألتي عنه و انا اقولك وجهة نظري فيه.. عمي بندر طيب حنون و متفهم و تفكيرة منفتح.. غيور حبتين.. يعني لا رحتي معاه السوق ما يخليك تحكين ابد هو يقول كل شيء.. يقول ماني جدار امشي معاك..!! أسيل : و ثقيل دم و يسوي نفسة فاهم بالموضة.. و كل شيء ما يعجبة ايش هذا مو ستايل و ينرفز.. سهاد : حرااام عليك.. انتِ من فترة بسيطة حكمتي عليه و بشيء غلط.. أسيل : يا ربي قالوا مين يشهد للعم ردوا بنت اخوه.. عبير : هههههههههههههههه هذا من وين جبتية..؟! أسيل : من راسي.. (ناظرت هنادي) شوفي يا خيه.. ترى بنيدير بس يتهاوش و يجيب المرض و شايف اشكال و الوان.. و يهتم بالموضة.. يعني لازم تكونين ذربة و ستايل على قولتة.. نهى : اقول انقلعي بس.. و الله يا زينة.. فيه وحده يحصلها عمي بندر و ترفضة.. عز الله ان امها داعية لها بليلة القدر اللي بتصير حليلة لعمي بندر.. مريم : الحين توهتونا ما اخذنا منكم لا حق و لا باطل.. جود : انا جبتها .. كم وحده فيكن لو تقدم لها واحد زي عمي بندر ترفضة..؟! ما احد رفع يدة الا اسيل.. و البنات كلهم مبتسمات.. يناظرن اسيل.. أسيل : مالت عليكن غاسل مخكن بنيدير.. ندى ناظرت هنادي : لا تحكمين على عم بندر من نظرة اسيل .. لأنها في سلسلة هواش هالفترة معاه يعني تعرفين نقار الأخوان.. و الا عم بندر ماشاء الله رجال ما فيه منه اثنين.. و الأهم انه راعي دين ما يطوف فرض بالمسجد.. و حتى لو كان سهران يا ينتظر الصلاة يا يوقت الجوال و لا يطوفة الفرض.. نهى : غير هذا عمي معاه دكتوراة و عنده طموح يأخذ الزمالة من برا.. يعني انسان يقدر التعليم و يحب يطور نفسة و لا يوقف عند محطة معينة.. جود : عدا انا حبيب و يونس و ما يعصب بسهولة.. صح يعني اذا عصب ما يرحم بس والله نادر اذا عصب.. و مره متفاااهم.. عبير : ما فيه احد بالدنيا ما يعصب يعني هذا ما يعيب عمي بندر.. و الله انه حبيب.. مريم : كل ذا مدح بعمكن..؟! طيب ليش كل هالسنين و ما تزوج.. سها : لانه ما كان يبي يتزوج.. عادي الحين خطر عليه يتزوج و ما ظنتي هالشيء يعيبة.. انهار : ما بقي شيء ما مدحتوه فيه.. الا كم عمره عمكم..؟! صبا : عمره 35 بس طيب و حبوب مره و الله عمي ما ينطوف.. بس انتِ استخيري و ربي بيعينك على الاختيار.. أثير : انا صراحة ما اعرفة من فترة طويلة.. بس اللي شفتة فيه مثل ما قالوا البنات.. طيب و متفاهم اكثر من باقي شباب العيلة.. و عنده رأي حكيم ماشاء الله.. هنادي عفست وجهها : احترت زيادة.. ويش ذا..؟! عبير : كل المعلقات اللي قلناها و محتارة بعد.. جود قربت من هنادي وهي جالسة على اطراف اصابيعها مسكت من ذراعها : تكفين قولي موافقة بنروح نسوي فيه مقلب الله يخليك.. هنادي فتحت عيونها و ابتسمت : لا.. لسى ما قررت.. جود دفتها و جلست : مالت عليك.. بروح اقولة زوجتك شينة ما تنطاق معقدة.. ندى شدت جود من شعرها : انتِ فكينا من طوالة لسانك بس.. ناشبة للبنت .. خليها تفكر براحتها.. جود : كيفي بسوي بعمي مقلب.. ماشي ليش استعجل.. حتى لو ما سويتة فيه الحين بسوي فيهم مقلب لا تزوجوا.. عهود رفعت حواجبها : واثقة ان اختي بتوافق على عمك.. جود : لو الناس ينوخذون باهاليها و خواتهم كنا نصحنا عمي ما يخطب اختك عشان انتِ اختها.. بس الحمدلله ان عقولنا ما وصلت للمستوى.. عهود : هيــه انتِ بالبزر.. تراني معطيتك وجه.. من العصر و انتِ تطولين لسانك.. جود : يعني ويش بتسوين مثلاً..؟! بتضربيني..؟! مريم : عهود .. يكفي خلاااص.. مشاكل ما نبي.. انهار : شوق ويش فيك من جلسنا و انتِ ساكتة ما حكيتي شيء..؟! شوق : ويش تبيني اقول..؟! انهار : أي شيء .. يعني غريب اختفاء خواتك و انتِ ساكتة.. خالي غازي مزعلكن.؟.! شوق : لا.. وعد تناظر جوالها اللي يضيء بإسم عماد : الوو.. وعليكم السلام.. هلا.. (ابتسمت)اوك ثواني.. سي يو << كل الكلام من عندها الصح ان عماد اول ما قالت الو قالها تعالي فوق ابيك.. من غير لا سلام و لا كلام و عشان هي ما تفشل انه سكر بوجهها كملت باقي المكالمة.. وقفت : عن اذنكم.. جود : على وين..؟! وعد : لقااافة.. من وين جبتي هاللقافة ما كنتِ كذا..؟! جود ابتسمت ببرائة : احم من بنت اخوك ما يقوم احد الا تنشدة وين رايح و من وين جاي و يمكن تشاركة بالروحات عادي ما عندها مانع.. نهى : عرفتِ مين تختارين.. المفروض انتِ قدوتها مو هي.. وعد طنشت الحكي و طلعت لجناح عماد.. جود : يا اختي طفش ما فيه شيء يونس.. صحيح اني ما ابي الدراسة و كذا.. بس اهون من ذا الملل و احنا لنا يومين.. و لا ذكرت بيتنا يجيني دبل اكتئاب.. عبير : من جد عمي ما قال ويش بيسوي..؟! يعني اكيد ما راح نقعد هنا على طول.. نهى : غبيات.. اكيد بيشتري لنا بيت لين يرمم البيت من اول و جديد.. أثير : لو اني منه ما ارجع اسكن فيه ابد و لا ادخلة.. أسيل : جينا للناس اللي تطير.. استغفر الله ترى التطير حرام ما يجوز.. أثير : ادري و الله.. و انا ما اتطيرت خلاص البيت و انحرق ويش يبي فيه زود..؟! .. جناح عماد.. واقف عند الخزنة متأكد ان فيه احد حاول يفتحها.. و ما فيه الا هي.. وعد.. دخلت وعد و ما سلمت : فيه شيء اسمه اسلوب .. السلام عليكم.. مو تتصل و تطلبني و تسكر بوجهي يا ابو الذوق.. عماد طنش كل كلامها و مستند بيده على الخزنة : ليش حاولتي تفتحين الخزنة..؟! وعد : من جدك..؟! يعني الحين مناديني عشان عارف اني حاولت افتح الخزنة..؟! يعني ما فتحتها بس حاولت.. ليش مسوي سالفة..؟! عماد بحدة : وعد لا تنرفزيني.. منبهك من زمان .. غرفتي ما ابي احد يدخلها من يوم كنتِ هنا و اشر تلك على كل شيء محظور و قايل لك لا تلسمينة.. تعانديني ليش..؟! وعد : صابني فضول.. و شفت اسلحتك بعد يعني عشان اعرف انك دقيق و تلاحظ كل شيء.. عماد فتح الدولاب و فعلاً فيه احد فاتحها و واضح لأنه يعرف كل سلاح وين مكانه بالسانتي.. التفت لها : و بعدين معاك..؟! وعد جلست : لا بعدين و لا قبلين.. كل الموضوع ان صابني فضول و فتحتها.. بس ليش كل هالأسلحة..؟! عماد : ما يخصك يا وعد.. بمرر لك هالمرة بمزاجي.. هالمرة بس.. و خليني اعرف انك قربتي منها مره ثانية.. وشوفي ويش بسوي فيك.. عديتك مره عاقلة فاهمة و خليتك تجلسين بالغرفة لا تعبثين بأغراضي.. وعد حطت رجل على رجل : الله و الأغراض عاد.. من شاف اللي عندك ما قال انسان صاحي و يخاف ربه.. و انا ما عندي استعداد اعيش مع مجرم.. عماد سكر الدولاب بقوة و حط يده عليها : نعـــم..!! وعد : لا تتفلسف علي.. ما فيه رجال يخاف على مشاعر زوجتة و يحط عندها اسلحة بنفس الغرفة.. عماد : وما فيه مره صاحية تعصي زوجها.. ما يكفي اني فاتح لك الجناح و عازك.. و يوم طلبتيني المفتاح قلت ما يخالف زوجتي يحق له تقعد فيه.. وعد : يعني انت تحسب انك متفضل علي يوم عطيتني المفتاح..؟! هه شر البلية ما يضحك و الله.. عماد : شوفي ترى انا خلقة معصب منك.. الحين تقولين مجرم.. ومن فترة قايلة لعمانك اني سكير.. وعد : ليش تبيني اشوف خشتك و اظن فيك خير.. عاد هذا اللي شفتة منك.. و الا تحسب يعني الفترة اللي عشت فيها هنا قدرتني و عزيتني.. و ما خليت علي قاصر.. لا اصحى يا حبيبي.. تبيني اذكرك بكل يوم قضيتة هنا.. تبيني اعلمك اني ولا مره سمعت منك كلمة.. كلمة وحده تقول انك تخاف على من هي على ذمتك.. و لا مره يا عماد.. و لا مره خفت علي عشاني انا.. خفت عشان عرضك و شرفك.. عشان الناس عرفت اني زوجتك.. ولا مره حسيت اني زوجتك و انك محترمني و مقدرني.. و لا مره.. كل حياتي هنا معاك كانت زفت.. و لما رجعت لك ما جلست الا يومين.. اول يوم تهاوشت مع حبيبتك و لا قدرتني.. و لطعتني لـ تالي الليل من غير لا تنشد علي.. و ثاني يوم تصاوبت ببيت عمك.. و بعدها تشك بشرفي.. علمني بس عن يوم واحد قضيتة معاك زين.. علمني عن يوم واحد فيه احترمتني و قدرت انسانة محسوبة عليك.. و الا خلاص.. قلبك راح معاها و ما عاد تبي تعطي أي احد فرصة..؟! (لما نطقت هالجملة احتدت نظرات عماد لها) ماهو مسؤوليتي خانتك.. ماهو مسؤوليتي تحملني ذنب ماهو ذنبي.. انا ما اطلبك تحبني.. و لا ابيك تحبني.. بس قدرني.. لما اهلك يتكلمون عن قصص حبكم قدامي و عادي.. ولا كأني جالسة.. انطميت.. و قلت ما يخالف.. وكل مره اسكت و اسكت و اسكت.. لكن ماشاء الله جدتك تحكي لجدتي عن قصتك يوم شريتك هالمزرعة.. و تقولها بلى لفة.. (عبرتها خنقتها) و عادي ما كأني موجودة.. و المشكلة ان اللي هي السبب في كل ذا جالسة قدامي و عارفة ان هي السبب.. عارفة انها اخذت قلبك معاها.. اخذت قلبك.. انت الحين عايش بدون قلب.. و الا فيه رجال صاحي.. زوجتة تحمل يتهمها بشرفها و لما تسقط يحملها ذنب انها سقطت..؟!!!. أي شيء تكلمي عنه الا هي.. لا تذبحيني.. يكفي امس شفتها قلبي توه ما دارى جروحة.. تكلمي عن معاملتي معاك.. تكلمي عن حياتك.. تكلمي عن أي شيء.. بس لا تنبشين بجروح ما بعد ألتمئت.. لا تنبشين بقلبي و تكلمين و تتوقعين اني ما تأثر و لا انجرح.. ايه انجرح مجرد احد يتكلم عنها اتذكر اني مغفل و حبيت انسانة ما قدرتني.. اعطيت وحده قلب و باعتة برخص التراب.. شوفيها رجعت حره.. شوفيها انفكت من ذمة الرجال.. رجعت عشان تعيش بنفس البيت اللي اعيش فيه.. رجعت عشان اشوفها بالدخلة و الطلعة.. تكلمي عن أي شيء الا ان قلب وفا لها و ذبحتة.. لا تكلمين عن قلب حب و انطعن.. جلس و هو يسند ظهره على الدولاب.. و رجلة اليسرى مادها و اليمنى ثانيها.. و حاط يدها اليمنى على ركبتة .. حاول يداري كل شيء بقلبة.. و ينطق بهدوء : ايه صاحي.. و قلبي معاي.. و ان كان اهلي يقولون لك عن انهار و تنجرحين مثل ما تقولين.. هذا الشيء صار من سنين.. و لا أحد فيهم له حق يحكي عنه.. و حتى انتِ ما اسمح لك تجيبين طاريها لا زينة و لا شينة.. ما ابي التفت لماضي عشتة .. اللي يهمني الحين و المستقبل.. وما عندي استعداد اعيش حياة تعيسة على حساب قلبي كان معلق بمره مثل ما تقولين.. كـــــان .. كــــان.. و الحياة تمشي من غير حب.. مو لازم احبك عشان نعيش.. وعد : بس لازم تحترمني عشان نعيش.. ما تسمح لي اجيب طاريها..؟!! هه.. قلبك ما يتحمل صح..؟! وقف عماد على ركبة و صار قدام وعد اللي جالسة على السرير و شدها من معصمها : كلامي ما اعيدة مليون مره عشان تفهمينة.. لا تجبريني على شيء ما ابي اسوية فيك.. وعد تناظر بعيونة حمراء ليش..؟!! كله عشان جابت طاريها..؟!! : ويش بتسوي يعني.؟! بتضربني..؟! ما راح اسكت لك.. بتذبحني.. حتى انت بتموت معاي.. بتطلقني عادي ابركها من حزة.. عماد ابتسم على جنب بدون نفس : ماني مغفل هالكثر.. اضربك طبعاً.. لا.. أذبحك ماني بايع حياتي و مستقبلي عشانك.. اطلقك طبعاً لا.. لكن اادبك بمره مثلك.. وعد اتسعت عيونها : نعـــم!! عماد : اللي سمعتية.. وعد : هه.. لا يا شيخ احلف بس عشان اصدق.. ومين قال بجلس لك على ذمتك دقيقة وحدة.. عماد : يعني ويش بتسوين.؟! بتقولين لأبوك ابي الطلاق عشانة تزوج علي..!! ما سويت شيء يخالف الشرع و العادات.. ابوك متزوج اربع.. ما راح يقول لي ما راح اسمح لك تتزوج.. و اخوانك ما راح يرفضون لأننا رجال و نفهم بعضنا.. وعد ناظرت عيونة بقوة : جرب و تزوج.. والا انتظرها لين تخلص عدتها و اخطبها.. و رجع قلبك اللي معاها.. هزها بقوة و هو يصرخ فيها : لا تقولين هالحكي.. اقسم بالله يا وعد لا اندمك.. تحديني يعني و الله العظيم لا اوريك.. ابشري ان ما سمعتي خبر زواجي عليك خلال اسبوعين.. و قولي عماد ما قال و الله لأربيك من جديد يا بنت ابراهيم.. طلع من عندها و هي مصدومة من حلفة.. و هو طلع ما يشوف قدامة و نسى اصلاً ان فيه احد بالفيلا.. نزل الدرج بسرعة و قابل بوجهة خواتة و امه و عمتة مريم.. اما البنات كانوا بالصالة واقفين و سمعوا صراخ عماد بس ما يدرون ويش يقول.. ام ناصر مسكتة : عماد ويش بلاكم يمه..؟! عماد : ما فيني شيء.. معاك يومين يمه تدورين لي عروس و الا انا بخطب من راسي..خلال اسبوعين ابيها في بيتي.. و طلع بعد ما رمى قنبلتة و هم يناظرون ببعض مصدوميـــن.. مريم مصدومة : هذا انهبل..؟!! ام ناصر : ويش صار..؟! لا يكون سوا بالبنية شيء..؟!! سرب من النمل فجأة تعدا من عندهن.. بنات ابراهيم و عماتهن و بنات عمانهن.. اهم شيء يتطمنون على وعد.. هنادي : يمه سوي شيء.. قولي لأبوي.. عماد شكلة انهبل.. ام ناصر : استغفر الله.. و الله ان يسويها و لا يهمة احد و يضرب الكل بالجدار.. عهود : تستاهل من يجيب على راسها مره.. مريم : عهووود.. احترمي انها بنتي.. اللي ما ارضاة عليك ما ارضاة عليها.. الا ان اخوك يتزوج عليها.. البنت توها صغيرة حتى ما عاش معاها فترة و عرفوا بعض عشان يطق عليها مره.. ما كمل زواجهم نص السنة حتى.. و بعدين ويش الشيء اللي يستدعي يتزوجها عليها عشانة..؟! اذا ما يتفاهمون يطلقها و بعدها يتزوج.. مو كذا يأخذ عليها مره.. عهود : ما سوا شيء حرام يا عمة.. صح انه بكر فيها مره.. بس عاد هذا شورة.. و عماد لا قال الشيء يسوية و كلنا نعرف هالشيء.. ما احد يوقفة عند حدة مين ما كان.. و زواجتهم اصلاً غلط.. و شيء طبيعي يتزوج عليها لأنه من الأساس ما بغاها.. يعني بالله عليك يا عمة.. اللي عايشها اخوي هاذي تسمينها حياة زوجية طبيعية..؟! ام ناصر : عهوود خلاااص.. الموضوع بيد ابوكم.. هو اللي بيحلة من عنده.. .. قبل هالوقت بدقيقتين.. و برا.. اثنين من المراقبين واقفين قدام الفريق غازي و نايف و سعود.. غازي : شلون يعني تعطلت الكاميرا..؟!! : ما نعرف سيدي بس كأنها تعرضت لطلق ناري يعطلها .. و لقينا الحرس اللي ع الباب الخلفي مخدرين.. و صحيانهم.. غازي : ومن متى هالحكي..؟! : من قريب المغرب.. غازي صرخ : و توك تكلم.. بدري يا شيخ.. كان رحت نمت.. ماله داعي تسوي شغلك.. ارتاح احنا نخدمك.. بلع ريقة و هو يشوف عيون غازي و بحة صوتة الشديدة : و الله كنا بنبلغك من وقتها بس كنت مشغول مع العقيد راشد.. نايف : لا يا شيخ.. موضوع زي هذا تقطع فيه أي شيء.. تعرف يعني ايش كاميرات المراقبة تتعطل.. و الحراس يتخدرون.. يعني ممكن يكون احد اقتحم المكان.. يعني هذا تهديد صريح.. : احنا آسفين.. غازي شدة من ياقتة : آسفين ما تمشي عندي.. و اعتقد انك تعرفني.. احنا مأمنينكم على المكان.. و تستيهنون بشغلكم هذا الشيء ماهو عندي.. انقلع انت و خويك مفصولين من الشغل هنا.. و حقوقكم بتوصلكم.. : تكفى يا سيادة الفريق و... قاطعة الفريق غازي وهو يبعد خوية بقوة و تراجع الحارس كم خطوة ورى .. : كلمة زيادة ما ابي.. .. دخلت الغرفة عند خواتها.. ريما نايمة.. و لينا ماهي بفراشها.. توقعت انها بالحمام.. جلست على السرير تقلب بجوالها تنتظرها تطلع.. لكن المدة طالت.. دقيقة.. خمس .. عشر .. نص ساعة.. بعدها اتجهت لباب الحمام طقتة : ليـــنا.. (لكن ما فيه أي صوت حتى صوت ماء لو كان تحمم.. مدت يدها و فتحت الباب.. الحمام خالي تماماً).. استغربت وبن بتكون راحت.. دقت على جوالها.. لحظة و جاها صوت رجولي .. لكنها كذبت اذنها و تكلمت : الو.. أيــــش...!! مين انت..؟! اختي ويش تسوي معاك..؟! .. (اتسعت عيونها و هي تسمعة يقولها انها انحاشت من المزرعة معاه بعد ما تهاوشت مع ابوها.. عيونها غرقت دموع.. مو متخيلة لينا تسوي هالشيء فيهم.. توطي سمعة ابوها بالتراب.. تخلي الناس تلحقهم بالحكي) .. سكرت الجوال و هي تطلع من الغرفة تجري.. تشوف امها.. فتحت الغرفة على جدتها النايمة و امها من غير لا تطق الباب او تستأذن.. طاحت عند فراشها : يمـــه.. يمــــه.. فزعت امال و ام عامر.. وهم يناظرونها في الظلام.. و شوق تبكي.. امال : ايش فيك..؟! شوق : يمه .. لينا انحاشت.. لينا انحاشت يمه.. ام عامر : امك يا عامر.. بنتك ويش فيها انهبلت.. شوق تبكي و ترجف : دقيت عليها.. دقيت.. و رد علي.. قال لي انها انحاشت معاه.. قالي انها اتفقت معاه عشان يطلعها من المزرعة.. امال قلبها ما يدق.. أي سكين غرست شوق بقلب امها محملة بسم سكبتة لينا عليها.. بنتها اللي تعبت وقت حملها.. بنتها اللي شافت الموت وقت ولادتها.. بنتها اللي عانت عشان تربيها وتكبرها.. ام عامر صرخت على شوق : شغلي الضوء.. قامت شوق و شغلت الأنوار.. امال همست و صوتها بيروح من الصدمة .. بتفقد احساس انها تحكي : دقي.. على.. جوالها.. شوق ماسكة جوالها بقوة و ضغطت على رقمها و تتصل من جديد .. : مقفل.. ام عامر تعدل شيلتها : و الله ان وليدي يروح فيها.. دقي دقي على ابوك و عمك.. و ان يذبحونها عيال عمها و لا ينشدون عليها.. قولي لأبوك و عمك يجون هنا .. فضحتنا الله يسترنا بسترة.. يااارب لا تخسف فينا.. يارب لا تخسف فينا.. مرت دقايق عشان يدخل غازي اللي مستغرب من صوت بنتة و طلبها انه يجي هو و اخوه من الباب الخلفي لغرفة امه.. غازي و عامر : السلام عليكم.. ما احد رد السلام.. امال متغطية و مدنقة و مو باينة ملامحها.. و شوق جالسة جنب امها و هي تنتظر عاصفة ابوها.. عامر يناظر امه : خير يا وجه الخير.. ويش بلاك تونسين شيء..؟! ام عامر : شوق سكري الباب.. قامت شوق و سكرت الباب بعد ما غازي و عامر جلسوا جنب امهم كل واحد عن جنب.. ام عامر و هي تمسك راس عصاتها بقوة : اللي اونسة نار بصدري شبت و بتأكلني.. عامر فزع : افااا و انا ولد ابوي ولده.. ومين هذا اللي مسويها فيك و الله ان تبشرين براسة تحت رجولك.. ام عامر التفت لغازي الجالس يسارها : بنيتك.. لينا.. غازي عقد حواجبة : افاا مزعلتك.. و الله ان اجيبها الحين تبوس رجولك لا تكدرين خاطرك يالغالية.. (مد راسة يبوس راسها لكنه وقف على كلمة امه).. ام عامر : انحاشت مع واحد.. غازي اتسعت عيونة.. ما يشوف شيء رغم ان عامر في وجهة.. ما شافة.. ما شاف الا السواد.. ما رن باذنة الا كلمة امه.. لف وجه امه يمه : ويش قلتي..؟! ام عامر : مالقتها اختها.. ويوم دقت عليها.. رد عليها رجال و قال لها انحاشت معاه.. عامر : يمه ويش هالحكي..؟! ما تسويها لينا.. ام عامر : لا تكذبني.. هاذي اخيتها.. علميهم ويش قالك الرجال.. شوق بلعت ريقها و هي تشوفهم يناظرون فيها.. : قال انها اتفقت معاه و انحاشت.. عامر : اتفقت معاه..؟!! لا عاد.. مستحيل.. لينا ما تسويها.. غازي طلع جواله و هو ما يحس الا بالنار تحرق جسمة.. يخاف انها توطي راسة بالأرض.. اتصل عليها و جوالها مقفل.. ام عامر : اخيتها دقت و جوالها مقفل.. غازي وقف ما عاد يقدر يجلس.. ظل يلف بالغرفة.. يحاول يشبك الموضوع ببعض.. يحس روحة بتطلع.. تعطيل الكاميرات.. تخدير الشباب.. و اختفاء بنتة.. شوق فزعت على صوت نغمة جوالها.. و الخوف دب بعروقها يوم شافت اسم اختها على الشاشة .. همست .. : لينا.. بأقل من الثانية.. كان غازي ساحب الجوال منها و رد و حطة سبيكر.. جاه صوت لينا.. : شوق.. (صوت تنفسها واضح لهم) .. قولي لماما و بابا انا اسفة.. بس .. انا من حقي اعيش حياتي.. مع اللي احبة .. احنا بنتزوج.. انا ما ابي ارجع لكم.. قولي لهم يعتبروني ميتة.. عامر اللي اول ما رد غازي نط عنده عشان يسمع المكالمة.. سحب الجوال من غازي : ليـــنا.. لكن الجوال تسكر.. و الشاشة صارت سودا.. اشارة لـ إنتهاء المكالمة.. ام عامر : حسبي الله .. مين هذا اللي ضحك عليها و راحت معاه.. حسبي الله عليهم كلهم.. عامر : و الله نطلعها من تحت الأرض حسبالها الدنيا فوضى تقول احبة و بتزوجة..؟!! مين بيزوجها ان شاء الله..؟! غازي : اذا سفرها برا بيقدر يتزوجها.. حسبي الله كسرتني.. ما قصرت عليها بشيء.. لو طلبتني قالت لي تبي تزوجة.. و الله زوجتها اياه بس يكون يستاهلها.. و الله ازوجهم من عيوني و اتكفل بعرسهم كله.. بس عشان اشوفها فرحانة.. ما توطي راسي بالأرض و تدوس عليه.. امال : بنتي ما تسويها يا غازي.. و الله ما تسويها اكيد ضحك عليها.. غازي : الا تسويها.. سوتها من سنين.. سوتها من سنتين يوم كانت تكلم ولد اخوك من ورانا.. و يضحك عليها.. داشر ما يعرف ربه و لا يدل درب المسجد.. و يوم اكلمها اول مره و انصحها.. على اساس بنتي تفهم و كبيرة.. تقولي يحبني و احبه.. و تروح معاه من وراي لبيتهم.. و تبي تعيش هناك .. وماهي راجعة لين ازوجها اياه.. و ياليتة من زينة.. و الا ما مانعت و خليتة يأخذها.. باعتني عشانة حزتها.. و يوم شافني رحت عشان اجيبها انحاش من بيتهم و لا قدر حتى يوقف بوجهي.. شلون بأمن على بنتي عند واحد مثلة..؟!.. و فهمتها بدل المره الف.. لكن ما تفهم.. الحين تروح عشان تذبحني بروحتها مع واحد ما ادري من هو..؟! و تقولي بتزوجة.. و قولي لبابا انا اسفة..؟!! ويش تبيني اسوي.. و الله و الله لو اشوفها ما يشبعني دمها.. امال فزعت وهي تصيح : تكفى لا.. الله يسعدك هاذي بنتنا.. توأم ريما.. لا تذبحها و تذبحنا معاها.. هي صغيرة.. و انضحك عليها.. صدقني بترجع و الله بترجع.. بنتي ما تصبر عنا و الله ما تصبر.. عامر : المهم الحين ما ننفضح.. أي احد يسأل عنها غطوا عليها.. لين نحل الموضوع.. و نشوف وين مكانها.. و بس تجي يصير خير غازي جلس وهموم الدنيا حملتها له بنتة على اكتافة ما يكفية هم امن على عاتقة.. عشان تضعفة بنتة و تطعنة بظهرة .. نطق بصوت مجروح, مخدوع من انسانة هي قطعة من روحة : الله لا يرحمني كاني شفتها و رحمتها.. الله لا يرحمني كاني شفتها و رحمتها .. الله لا يرحمني كاني شفتها و رحمتها.. و وقف يطلع من مكان ضاق عليه.. صوت بنتة يتردد باذنة.. قولي لبابا انا آسفة..!! يتذكر يوم جاتة بمكتبة تتأسف له على اللي سوتة مع سامي.. لينا شابكة يدينها ببعض : انا اسفة.. غازي يناظر الأوراق : حصل خير.. بس عشان تعتبرين.. ان مو كل واحد ينقال له رجال هو رجال فعلاً.. سامي يوم عرف اني جاي لك.. ما قدر حتى يوقف بوجهي و يقول لي كلمتين.. و حتى يوم اخذك من المدرسة.. ما حطك بوسط بيت خالك لأنه يعرف اللي مسوية غلط.. حطتك بالملحق عشان ما احد يدري.. هو رجال ما احد بيلحقة بشيء.. لكن انتِ بنت.. و البنت مثل الثوب الأبيض أي شيء يدنسها.. لينا و الدموع بعيونها : طيب آسفة.. ما عاد بكررها.. غازي : قلت لك حصل خيــر و اتمنى.. مخك تفتحينة شوي قبل لا تكلمين أي احد و تحطين سمعتي بين عيونك.. و حتى لو هو ولد خالك ما يعني انه شخص زين و يخاف عليك.. كم مره مسوكة الشرطة و قضاها بالسجن..؟!! .. لا إله الا انت سبحانك إني كنت من الظالمين.. لا أحلل نقل الرواية دون ذكر اسمي.. ياليت تقرون المقدمة قبل لا تسألون متى البارت الجاي.. ضحكة قهر.. | |||||||||
|
| |
|
| أدوات الموضوع | |
| انواع عرض الموضوع | |
|
|
224Likes
.png)
العرض العادي
