قصور من طين / الكاتبة : كلي شموخ , كاملة

[جرح الذات]

" مدينة الأمل/الألم ..كم نعشقها ونهيم بها حد السماء ،،
أيا رياض الحلم كوني بخير محاطه بهالة من النقـــاء "
\
:


# الجزء الرابع #
\
:

قالها :هاه حياة قالتلك شي اليوم ؟؟
حياة: لا عمي أظن إنها ماجات ماشفتها اليوم ..
عبدالله: أحسن بعد .. تحاشيها كثر ماتقدرين .. هذي من زمان وهي تدور للشر عندنا ...
حياة: أنا أبي أعرف شي واحد بس .. هي ليش مشغلةٍ عمرها فينا .. تقول كن ماعندها
شغله إلا إحنا ..
عبدالله" بااااهه من قلبه": الله يهدييها ولايشغلها إلا بطاعته ..
حياة: طيب وش أسوي أنا ألحين ؟؟ .. مكتب الإشراف التربوي إذا ماجا اليوم بيجي بكره ..واذا ماجا بكره بيجي بعده لازم نحل الموضوع قبل لايصير شي حنا في غنى عنه ..
عبدالله " وحنان بحجم الكون": لاتحاتين حبيبتي .. مب حاصل إلا اللي يسرك ويرضيك ..

\
:

" غاليـــه قومي يامال البلا .. والله لو إنك مرتي كان من زمان وانتي فبيت أهلك"
غاليه :لحـــول يالحــسد ياخي تبي ترقد روح ارقد لاتحط حرتك فيني يانويّف !!
نايف: مالت عليك .. لو أبي أرقد ماشاورتك أصلاً .. بسرعه تعاليلي فالملحق عجلي ..
غاليه: نايف والله إني عجزانه قول وش تبي فالتلفون ..
نايف: يارب إرحمني ..حشا بلوه من بلاوي الزمن !!.. داري إن مافيك رجا
وفاقد الأمل إنك تنزلين فبقولك رساله وصليها لمهره ..
غاليه:أيـــواااه قولي من البدايه ماتبيني عشان سواد عيوني!!
نايف: ووش أسوي بسواد عيونك !! عيونك لرجلك مالي دخل فيها .. ولاسواد عيونها
محد يسواه !!
غاليه : ترررااا وتغزل مجنون ليلي ..
نايف: أقـــول إخلصي علي بتسمعيني ولا ترى برسلها مسج وبقولها الكلام اللي فخاطري وبخرب الدنيا..
غاليه: لالا الله يرحم والديك .. أعرفك مجنون وتسويها .. هاااه وش عندك ؟؟

\
:
" عصر اليوم نفسه "
\
:


فغرفته بعد ماسكر من فيصل خويه وتواعد هو وياه يروحون يوقعون عقودهم
بعد المغرب ..
دخل سعيد ياخذله شاور سريع .. لبس ثوب بني مقلم بخطوط مرتبه ودقيقه حليبية اللون ..
وقف قدام المرايه .. تمعن فوجهه ومرر يده على ذقنه .. تأمله لحظات .. له أسبوعين ماخفف
والعارض مسويه لوجهه هيبه ووسامه زادته جمال .. راح يم السرير وخذ غترته السكريه..
لبسها وعدلها بترتيب .. كشت كم كشته من عطره الجميل على أنحاءلبسه .. وتدهن بدهن العود الفخم على ذقنه وغترته ..
فهاللحظه دق باب غرفته بلحن .. من صوته عرف صاحب اللحن ..
فقال: إدخـــــــلي حبيبتي صيته الباب مفتوح ..
صيته " بغنج ": هههههه .. يـــاربي يمـــوت فيني حتى يحس فيني قبل لادخل !!
سعيد " يقلدها": ههههههه شفتي سمعتهم يقولون القلوب عند بعضها.. تخيلي!!
صيته: ههههههه .. حبيلك .. "وتنتبه لكشخته " ..الله الله ياأرض أحفظي ماعليكي
..شهالزين سعود بتعرس !!
سعيد: ههههههه الله يسمع منك .. هااه وش رايك فيني ؟؟
صيته : جد جد تطيح الطير من السما.. إقرا المعوذات سعود ترى مب عايفتك ..
سعيد: هههه طالع هذي مصدقه ..
صيته : والله من جد إحفظ الله يحفظك مب كنت تقوله لي؟؟
سعيد " ويقرص خدها بحنان": فديت عمرها وخيتي ماتنسى الدروس ..
صيته: هههههه لاماعليك اللي يجي منك عمري مانساه ..إلا صدق وش عندك وياهالزين كله!!
سعيد: عندي مشــــوار من أهم المشاوير فحياتي .. به ياأكون أولا أكون ..
صيته "إشتغل عندها الفضول": لااا عاد!! وشو تكفى قولي؟؟..
سعيد: امممم ماقدر سوسو بعدين أقولك .. إذا جا الوقت المناسب قلتلك .." ويتوجه للباب"..
ياللا مع السلامه وإدعيلي ربي يكتبلي اللي فيه الخير.. ولاتنسين غرفتي رتبيها ياويلك
تخلين الشغاله ترتبها ترى أعرف حركاتك ..
ووصل للباب وقابلته حنان أخته عنده .. هي لما سمعت صوته مع صيته جات ركض للغرفه
..دايم تبي تعرف وش يصير بينهم .. قد تكون غيره أو حسد أو لغرض ثاني فنفسها ..
سلم عليها سعيد بإبتسامته العذبه نزل ووجه للباب على طول لايمين ولايسار ..
ودخلت حنان عند صيته ولقتها ترتب غرفته ..
فقالت: أحـــــلى اثر الحب يسوي بلاوي.. ترتبيــن غرفته مره وحده !!
صيته "بجفاف": ممم عندك مانع يالشيخه !!
حنان : الصراحه لا .. إشتغلي ياللا .. " وتناظر الدريشه " ..ووو لاتنسين الدريشه
هناك فيها غبار مسحيه .. وووبعد الحمام غسليه أهم شي ..
صيته " تمسك أعصابها..وبإبتسامة سخريه ": تبين الصراحه حنان .. لعيون سعيد يهون كل شي..حتى لو يبيني أغسل جزمته غسلتها ..
حنان "إنقهرت من كلامها وحستبها تنغزها لصغر عقلها": ههههه أصلاً قدرك جزمته يا....
ولا بلاش أحسن ..
وتوجه يم الباب بتطلع ..
صيته : لو سمحتي حنان سكري الباب وراك أبي أشتغــــل على راحتي من دون عذال ..
وتطلع حنان وترجف بالباب وراها ..
وقعدت صيته ترتب غرفة أخوها بإبتسامة حب ورضى وحنان وووو كل الكلمات الي تجسد
حب اخت لأخوها اللي ياما إحتواها في عز حاجتها , وياما لمها في بعثرتها ,وياما ضمها وقت ألمها .. ربّاها فصغرها بالرغم من وجود أمها وأبوها الفيسولوجيين فقط .. حماها من الضياع فوقت مراهقتها المجنــونه .. حفظها فشبابها وعنفوانه .. سعيد هو كل شي وكل الأشياء بالنسبه
لها .. أم وأبو واخو وأخت ..حنان وعطف ورحمه ووووو مدينه ربيعيه في وقت خريــف جاف جدا!!ً أشجارها قلبها وقلبه وبس ..
\
:
" صدقيني ياغاليه الفلسفه صناعه باطله وكلها معتقدات خرافيه وضلال في ضلال "
غاليه : يابنت الحلال روقيني !! لو هي باطله مادرسها ابن تيميه ولاالغزالي ولاابن خلدون الله يرحمهم ومن قبلهم الإغريق وكثير غيرهم !!
حياة : ياالله!! .. طيب إفهمي هم وش منهجهم وليش درسوها وبعدين قولي انها مب باطله !!
غاليه " بحماس": طيب هااه وش منهجهم ؟؟ قوليلي يافيلسوفه ..
حياة : أول شيء ماحب احد يناديني بهالاسم .. ثاني شيء .. بالنسبه للإغريق فحسب معلوماتي أول من درسها فيهم سقراط وبعد مادرسها تخيلي وحّد وأيقن بأن فيه إله واحد فقط للكون وخالف قومه في عبادة الأوثان والكل نادا بإعدامه عشانه بس وحّد .. تخيلي هذا الكلام قبل الميلاد .. وقال عنه إبن القيم .. فهو أقرب القوم إلى تصديق الرسل، وكذلك تلميذه أفلاطون كان معروف بالتوحيد ومنكر لعبادة الأصنام، لكنه لم يجاهر قومه بهذا مثل مافعل أستاذه سقراط، فسكتوا عنه وكانوا يعرفون له فضله وعلمه.. لكن بعدهم طلعت الفلسفه وإختلفوا في الوصول للذات الإلهيه .. وإبن تيميه قال إن عندهم علم لاباس فيه في الرياضيات والطبيعيات لكنهم أجهل الناس في الوصول للذات الإلهيه اللي هي موضوع الفلسفه ومركز الأصل ..بل إن اليهود والنصارى أعلم منهم فيه!! .. وابن تيميه درس علم الفلسفه عشان يبين مدى بطلان هذا العلم وليس للبحث عن الحقيقه أو في نفسه أي شك ..وهو بذلك يختلف عن الغزالي رحمه الله اللي جرد نفسه من كل شيء وخلى الشك مبدأه للوصول للحقيقه لكن بعد ماتعمق فهذا العلم عرف مدى بعده عن الحقيقه ووحاربه وكتب ليبين مدى بطلانه وبعده عن الحق ..أما ابن خلدون فقال ان الفلسفه صناعه باطله لأن الفلاسفه يدّعون معرفتهم لكل شيء والكون أكبر من أن يحاط به !!.
فغرت عيون غاليه ومهره اللي كانت جالسه معاهم جنب أختها.. فقالت مهره وهي تربت على كتف حياة ..
مهره: عاااااشوااااا .. " وتشر على حياة بفخر".. أختي هذي!!
غاليه : ههههههه حشى حياة مهب كلمةٍ قلناها .. هبيتي فينا .. مشاء الله عليك محد يناقشك ..
حياة : هههههههه أجل وش.. ماالعب أنا !!
مهره: تصدقين حياة يعجبني فيك ثقافتك ..عندك علم بكل شي قاعد يدور حولك..
غاليه : هههههههه جاتني الثانيه !! .. أبداً لاتخافين تراك مب بعيده منها ..
مهره " بنظرة إستجداء لأختها": فديت عمرها .. محد رباني إلا هي ..
إكتفت حياة بإبتسامه ملت محياها وبوسه على خد أختها فجأه!! .. الأمر اللي رجع لمهره روحها اللي كادت تفقدها ..وعادلها نفس الحنيــن اللي ياما لعب فقلبها !!!
غاليه : لالااااا مانقدر على كذا .. كدا كتيــر أوي ... حرام عليكم راعوا مشاعري قدامكم جالسه
وانتوا قاعدين توزعون بوسات ونظرات حالمه ولاتعبروني !!
حياة " تغمزلها": أبداً ماينخاف عليك .. عندك مايسدك ..
غاليه : يــوه ذكرتيني .. تخيلوا يابنات بيطلع البر وبيخليني !!
مهره : لا عاااد ماله حق .. يروح ويخليك مره وحده !! اخخخ ماااش اخوي مايعرف الذوق ..
غاليه " تنطل عليها المخده " : مااالت عليك تاخذيني على قد عقلي !!
حياة: وهي صادقه مهره .. وش تبينه يزبعك معه وين ماراح !!
غاليه : مااعلي منه .. أصلا قالي وزعلت ..ماتشوفوني نازله بدري اليوم ..
مهره: اهاااا قوليلي .. أقول شعندها متكرمه علينا ..
وفهاللحظه دخلوا عليهم جدتهم وام نايف .. وقامت مهره تجيب القهوه والقدوع ..
" أثنـــاء القهوه "
حياة: يمه غاليه ترى بروح اليوم لخالتي ام راشد بوديها لبنتها ..
أم عبدالله : روحي الله يقبل أجرك يامويمتك ..
أم نايف : إلا صدق شلون ولدها لذلحين على حااله ؟؟
حياة : ايه والله يخاله الله يفك ضيقته ويفرج عليه ..
أم عبدالله :آآمين الله يقر عين مويمته به ..
حياة " تكلم مهره": سلطان موجود ؟؟
مهره : اممم ماظن أرسل لي رساله الظهر بعد ماجيت من الكليه قالي بيروح المزرعه العصر ..عاد مدري هو راح ولالا..دقي عليه وتأكدي ..
ام نايف: لالا سلطان مب هنا .. راح المزرعه مع عمه .. خلي بندر يوديك ولانايف..
حياة : خير ان شاء الله

\
:
ركن سيارته فأقرب موقف عند الخطوط السعوديه.. نزل بعنجهيته .. دخل المكتب سلم على المدير..كانت معرفته فيه قويــه حيل بحكم كثر سفرياته .. وفثواني أنهى أموره وطلع
بتذاكره معاه .. انتابه خوف بسيط من ابوه لكن سرعان ماتبخر من تذكر الونــاسه أو بالأحرى الصياعه اللي منتظرته يوم الخميس !!
\
:

قال " بغطرسه من دون لايطالعها": هيـــه تراني بسافر يوم الخميس ..
قالت " والمفاجأه خذت مجراها فمحياها": ويـــن؟!!!
قال: وانتي وش دخلك.. ماقلتلك أشاورك بس أحط عندك خبر ..
قالت "ودمعتها متعلقه فأطرف رمشه": حرااام عليك ومن بتخلينا له !!.. شوف حالنا كل ماسافرت شلون يصير ..
قال: أبداً ماعليكم شر.. تبين تروحين عند أمك ولابيت أهلي روحي ..
قالت " بحسره": زيد أخو عبيد .. يعني عند امي ولاعند اهلك زود عن هنا !!
قال " يتدارك إهتمامه": اممم مدري بس يمكن ترتاحين أكثر هناك .. هناك محمد ولد راشد بينفعكم أكيد..
\
:
"في وقت تتصارع فيه الشمس مع السماء "
\
:
فـ أحد بقايا أشلاء البيوت .. فأحد الأحياء القديمـه .. فبيت شعبي وصل عمره حد البلاء .. وغلافه وصل حد الرثاثه ..
جالسه أحد أطيب نساء العالم فمجلسها .. وعصاها جنب رجولها ..
جات الشغاله "تاتي" وحطت إبر الإنسولين والحبوب فالشنطه حقتها .. وقربت عبايتها لها ..
وقالت "تاتي": ماما همود يقول مايبي يروهـ ,،
فقالت الماما : لحول ولاقوة إلا بالله .. ووش فيه مايبي يروح الله يهديه ؟؟
تاتي: مااادري .. انا في قول ماما هيا في إبقى ..هو في قول إنقلأي !!
ماما هيا "تبتسم بعطف": خلاص أنا بروح أشوفه ..تعالي عنزيلي ..
وتقرب منها الشغاله وتناولها عصاها وتمسكها مع يدها .. راحت هي وياها يم غرفة حّمود ..
دخلت ماما هيا وصرفت الشغاله اللي كانت تبي تدخل وتقط معاها ..
ماما هيا : السلام عليكم
حّمود " يقوم ويعنز لها": هلا عليكم السلام ..
ماما هيا: شعلومك يامحمد ؟!!
محمد: بخير الله يعافيك
ماما هيا: منتب رايحٍ معي لعمتك ؟!!
محمد: لااا مب رايح .. عندي واجبات ودراسه مابعد خلصتها ..
ماما هيا: طيب .. مارح نطول .. قبل الساعه تسع بنكون هنا ..
محمد: لايمه مابي اروح .. مالي نفس ..
ماما هيا: أفااااا ياولد راشد .. مالك نفس تشوف عمتك وبنيتها .. ماكان ابوك بقطاع أرحام ..
محمد " وتغارقت عيونه سيــل": وهو عشان أبوي مانيب رايح .. الله يخليك يمه لاتظغطين علي .. لارحت واجهت رجلها وقام ينغزني بكلام عند الله خبره .. واللي يرحم والديكم خلوني فحالي ..
أم راشد " بنفس الأسى المعتاد تتمالك نفسها": خلاص ياامك مب لزوم .. ريح عمرك .. وعمتك
بدّك تشوفها إن شاء الله ..
في هاللحظه طقت تاتي الباب عليهم .. تخبرهم إن سيارة حياة عند الباب ..
\
:
" مارح نتخالف إن شاء الله أنت بس شرفني فالمكتب وان شاء مب حاصل إلا اللي يسرك ..
- هـ الله يحفظك "
سكر سماعة التلفون بأريحيه وإبتسامه ملت وجهه للصفقه اللي عقدها تو واللي رح تكسبه ملايين..
كلم حامد وطلبه يجي عنده بـ مكتبه البرزخي ..
دق حامد الباب وأذن له سالم بالدخول ..
حامد: سمّ طال عمرك
سالم: ماجا سلمان؟؟
حامد: لأه ماجاش..عاوزني أطلبه عـ الجوال ؟؟
سالم: اممم لامايخالف .. أكيد شوي ويجي ..أعرفه ولدي مايتأخر على ابوه
حامد: ربنا مايحرمكوش من بعض ..
سالم :اسمع انا بطلع ألحين ولجا سلمان قوله اني طلعت البيت خله يجيني هناك ..وبكره إن شاء الله بيجي عميل جديد يسمى أبو حمد إنتبه له ولجاء على طول تدخله علي..وخلاص قفل الشركه أذن المغرب ..
حامد: إن شاء الله طال عمرك .. هـ خلي بالي..إطمن حضرتك ..
\
:
" بعدمــا أُسدلت ستائر الظلام "

\
:
فطريقهم للكوفي .. منتشين حد العمق بعد ماوقعوا عقودهم .. قرروا يباشرون على طول
دام النشاط فيهم .. كلٍ سرحان فدنياه .. كلٍ له وادي عمقه مختلف ومجراه مختلف عن الثاني ..
فيصل عينه عالدريشه ..يتأمل بإبتسامه فشوارع الرياض الوسيعه ذات البذخ الجميل بكل ماتحويه في كل جزء من أركانها..والتطور الرهيــب اللي حصلها في فتره بسيــطه جداً..وشكل البدر اللي مره يطلع ومره تخبيه العماير ..
" يـــــــاهوه..فيصل وين الدنيا "
قالها سعيد بصـــوت يرج العظام ..
فيصل : بسم الله الرحمن الرحيم.. الله يخس وجهك يالكلب..
سعيد:ههههههه ارتعت !!..يالومك داخل جو حظرتك ..وانا من صبح أنادي ولاحولي أحد
فيصل : طيب هاه إخلص وش تبي ؟؟
سعيد: مابي شي ..بس ابي اعلمك اني مستانس ..
فيصل: لاوالله!! .. وش اسوي بك يومك مستانس .. سألتك ماشعورك في هذه اللحظه وانت
ستشتغل قهوجي ؟!!
سعيد: هيهيهي ماعلي منك .. قهوجي قهوجي واللي فراسه شي يجي يقوله
فيصل:ياواااد ..مانقدر عـ القوه هذي .. نتعب احنا كذااا.. بس تصدق أحسن مافيه هالكوفي
إنه مرح يخلونا جراسين نوزع على العالم ..يعني اللي يبي حاجته يجي ياخذها
سعيد : هذي هي ..يعني الحمدلله مارح تفتشل ولاتقول بصير قهوجي!!
فيصل: ههههه..إنها علــــوم ياخوك عسى ربك يعين بس ..
|
:
" والله يابنيتي مدري وين بلحق جزاكم "
قالتها أم راشد لحياة وهي تدافع دموعها وتخنق عبراتها ..
فقالت حياة : أفااا عليك ياخاله ..ماسوينا إلا الواجب..تراك والده علينا.. الله لايحرمنا منك
أم راشد: الله يقبل أجركم وانا أمكم ..ويوفقك ويسعدك ووخيانك وعيالي والمسلمين ..
بندر: بشريني ياخاله ..وش صار على راشد ؟؟
أم راشد "بوجع":والله ياوليدي على حطة يدك ماصار شي جديد .. إدعوله ربي يفرج عنه
بندر: الله كريــم ياخاله ..ربك قادر على كل شيء .. وأنتي أي شي تبينه ولايبيه محمد تراهي في ذمتك لايردكم إلا لسانكم ..
أم راشد: الله يوفقك ياولدي ويصلحلك النية والذريه ..خيركم سابق وانا امك
\
:
بعد ماصلت المغرب .. جلست تقرا مايدتها وتذكر أذكار المســاء ..
خلصت من أذكارها وقامت تنسدح على سريرها .. حست بخمول يسري بجسمها ..
تحسست مكان ألمها اليوم لكن الحمد لله هي أحسن ألحين .. هذا هو القولون يهيج وقت الزعل
والألم .. يكره الواحد فحياته بعدين يتلاشى وكأن شيئاً لم يكن ..
حتى نفسيتها غيــر الظهر ميه وثمانين درجه .. حنان حياة اليوم عليها خلاها تنتشي وتملك الكون ..إتسعت كبر السماء ..وتلونت بلون جوري .. حياه بالنسبه لها رمز الحيــاه .. رمز الفرح والنقــاء.. هي الوحيده الي تقدر بكلمه منهاتعيشها فجنه أو ترميها فجحيـــم ..
كانت حياة قريبه من مهره حد النفس ..حد العمق ..مهره كانت كتاب مفتوح ومقروء بتفاصيله
قدام حيـاة .. لكن العكس غير صحيح .. ياما حاولت مهره تقراها أو حتى تتهجاها لكن حياة
أعمق من هذا .. هــدوء وسكون مميت يسكن بين ضلوعها .. مشاعرها مغلقه ومتعلقه فيها لوحدها ..دهاليزها وأروقتها مايمشي فيها غيرها ..أحاسيسها مكتوبه لها فقط ..
بس قلب مهره دايم يحس بها إذا صابها شي .. مرضت أو تعبت
أو تألمت أو إهتمت أو إستوجعت .. أحاسيــس أخت طلعت للدنيا ماحصلت فوجهها غير حفظ الرحمن ثم رعاية أختها .. دعت الباري يخليها لها ويوفقها ويسعدها كثر مادخلت السعاده فقلوب نــاس ..
" مهـــور .. وين وداك البحر ؟؟" قالتها غاليه وهي تجلس على طرف السرير ..
مهره : هلا ؟؟
غاليه : أقول وين سبحتي فيه .. بحر جده ولابحر الدمام؟؟
مهره: ههههه لاذا ولاذا في بر الرياض ..
غاليه : هههههههه .. تصدقين مهره .. لو خيروني أسكن في جنيف ولا الرياض بسكن هنا !!
مهره : لالا .. معقـــوله!! .. يقالك وطنيه ألحين!! .. ياعمري غصب من ورا خشمك بتسكنين هنا
لأنك ولافي الحلم أصلا بيخيرونك ..
غاليه:هيهيهيهي بايخه ..بايخه .. ياحبيبتي اللي ماتعرفينه وانا مخبيته عليك خايفةٍ من عيونك لاتنظليني .. إن عندي قصر فيها وفي لندن وفي باريس ووفـ...
مهره :هههههههههه على هونك على هونك لاتذبحيني بالمفاجأه .. صراحه صدمتيني كل ذاه عندك ولاتقولين!! .. ومخليتنا ننطق كل صيف في السعوديه ..حرام عليك يااشيخه ..
غاليه : قايلتلك خايفةٍ من عينك ولالو على أهلي كان بخليهم يصبحون في ديره ويمسون في ديره ..
مهره : الله من المهايط اللي عندك يذا المره!! .. أقول وش عندك تراك أدوختيني وعطيتك وجه زياده عن اللزوم ..
غاليه :لاااااه ..أصلا الشرهه مب عليك الشرهه على اللي متعني لك وجايك مرسال ..
مهره " تحاول تداري إهتمامها ": امممم يعني انتي جايتني برساله !!

--------------------------------------------------------------------------------

غاليه : امممم يقولون ..
مهره : طيب بتقولينها قوليها ماتبين ياللا إقضبي الباب..
غاليه : والله شوفي لو إنه علي كان ماعطيتك وجه لكن عشان وخيي المسيكن وعشانه محلفني
بتكرم وبقول .. ياطويلة العمر نايف يعتذر منك ويقولك السمــوحه على اللي صار اليوم..
هو يثير جنونه لشاف ذاك الكلب .. ولايمسك أعصابه لشاف أحد من محارمه ..ويقول ترى مايرضى يجي في خاطرك شي من صوبه ..وووبس ..
مهره " بحيــله ": ووبس
غاليه : وش بعد تبين !!
مهره: ومسويتلي قصه وعرس عشان ذالرساله !!
غاليه :أقـــول والله إنك ماتستاهلين أحد يعطيك وجه .. خساره أخوي فيك ..
مهره : هههههه .. ومن قالك إنه لي أصلا!!
غاليه : ليه أرّبك ماتبينه ؟؟!!
مهره: عندك مــانع طال عمرك ؟؟
غاليه : والله لايجيني الطير ويعلمني إنك بتعيين منه إن أدفنك حيه .. معاد بقى إلا هي نايف بن عبدالله ينرد ..
مهره: وااااااااو الحميه .. هو لاصار شي يصير خير..
\
:
دخلت بيتها وشغالتها وراها .. فيد باق واليد الثانيه الجوال ..
شلت عبايتها وقالتلها تطلعها فوق بعد ماخذت الجوال منها .. تلفتت يمين ويسار في صالة بيتها
الممتلئه والخاويه .. مالقت غير قطع أثاث فخمه بالمعنى باليه بالمضمون ..
جلست على أحد الكنبات في الصاله ودقت على بنتها حنان وحصلتها برا عند صديقتها نوره ..
ودقت على صيته ولقتها فوق فغرفتها تذاكر وقالتلها تنزل تجلس معاها شوي ..
نزلت صيته ومرت المطبخ جابتلها كوب قهوه مع حبتين رطب .. وراحت للصاله اللي فيها أمها .. حبت راسها وجلست جنبها..وقالت أمها ..
حسناء:لاحــول كل ذاه قهوه!! حشا وين بترقدين اليوم !!
صيته : لاعادي يمه ..علي كويز بكره وراسي فيه ألم فضيع ..
حسناء : الله يهديك وش حادك على ذالدراسه كلها !!..وش زودك منها ؟!!
صيته : ألحين بدال ماتشجعيني وتدعيلي تقعدين تحبطيني !!
حسناء " بتصريفه ": أقــول أبوك وخوانك ماجاو؟؟
صيته : أبوي كني سمعت صوته .. أما سعيد فطالع من قبل المغرب وسلمان مدري عنه ..
حسناء " وهي تقوم": خلاص أجل بروح أشوف أبوك يمكن إنه فوق ..
صيته : ومنزلتني ومعنيتني من فوق عشان تسأليني عن رجلك وعيالك !!!
ماعطتها امها وجه ولقتها ظهرها ووجهت يم الدرج .. وطلعت عتبات الدرج وراسها فــــوق ..
دخلت غرفتها ولالقته .. دخلت غرفة المكتب وحصلته عند الخزنه وفيده أوراق صكوك وعقود ..طبعا ً ماحس بوجودها ولاإلتفت لها .. قربت كرسي من كراسي المكتب وجلست جنبه ..
فهالثانيه حس بوجودها ..من دون لايوجه يمها قال : خيــر ..عندك شي
حسناء: اممم لا ماعندي شي ..
سالم : طيب وشفيك ناشبةٍ جنبي !
حسناء : لاحــول ذاالرجال معاد يدانيني ولايداني قربي .. اعوذ بالله !!..ذي عينٍ صايبتنا
سالم " بهمس": من زين الخشه ينظلونها !!!
حسناء: وشــو .. تقول شي ؟؟؟
سالم : ابد سلامتك.. ممكن تخليني لحالي أبي أشتغل على راحتي ..
حسناء: لامانيب مخليتك ..فيه مره تخلي زوجها حبيبها لحاله فغرفتها ..
سالم: الله أكبر.. وش ذاالسنع اللي توه طالع !!..أقول إطلعي ولاجا سلمان خليه يجيني ..
حسناء : الشرهه مب عليك الشرهه على اللي يبي يدلعك أصلاً..
سالم : الله غني منك ومن دلعك ..إقضبي الباب يامال الوجع ..
وتطلع حسناء تسحب وجهها معاها .. رجفت بالباب ورجعت تنزل مره ثانيه بعد مابدلت لبسها
وخففت ماكياجها ..
\
:
" قبل صلاة العشاء بدقايق "
\
:
طلعت حياة من بيت سميره بعد مانزلت امها ولزمت عليها إلا تشرب فنجال قهوه على الأقل..
وماطلعت إلا بعد عهود ومواثيق على إنها تكرر الزياره ..
رجعت سميره للمجلس اللي كان فيه أمها بشــــوق كبيــر .. جلست جنبها وخذت بنتها اللي كانت
راقده فحظن جدتها وحطتها على أحد الكنبات الأرضيه ورجعت جنب أمها مره ثانيه ..
قربت صحن الفاكهه بصمت .. وبدت تقطع لأمها تفاحه بسكــون .. كنها تحاول تخبي شيء فملامح وجهها .. صمت مستمر مايقطعه غير صوت نحيب التفاحه المسكينه ..
إستغربت أم راشد من هدوء بنتها .. مب العاده تكون بهالسكون لشافتها .. عادتها تشل الأرض بسوالفها لها .. أصلاً من ملامح وجهها حست إن فيها شي تحاول تداريه من دخلت .. ماعجبها الوضع الموجع
فقالت: سميره ياامك فيك شي ؟؟
سميره "وعينها عالتفاحه ..خايفه من تلاقي العيون": أبد سلامتك مافيني إلا العافيه يطولي بعمرك ..
أم راشد: مهب ظني !!.. لاتخليني أحلف ان وراك علم .. قوليلي يابنيتي طلعي من خاطرك
سميره " وتناولها التفاحه":يابنت الحلال مافيني شي .. بس لأني ماقيلت اليوم .." ومحاولة ناجحه للتصريف" إلا يمه محمد وراه ماجا معك ؟؟
أم راشد: عجزت فيه ذاالولد ..صايرٍ قلبه رهيف معاد يداني أي شي ويزعل بسرعه ..
سميره : إيه مايخالف يمه .. كل العيال لوصل عمرهم 17 يصيرون حساسين وبسرعه يزعلون.. بس انتي يمه لاتخلينه ولاتقصرين عليه بشي ..
أم راشد: ربي يشهد اني ماقصرت عليه فشي باللي أقدر عليه .. عسى الله يفك عن أبوه ويقر عينّا بشوفته ..
سميره "باااهه": الله كريم .. وأمه معاد سألت عنه ؟؟
أم راشد:يــوه خبري بصوتها من تسع شهور .. حتى فعيد الله الكبير ماكلمت تعيد .. الله يهديها ويفتح عليها ..
سميره : أعوذ بالله على الأقل مب عشان العشره اللي بينا عشان ولدها عاد .. حشا مافي قلبها رحمه!! ..
أم راشد: وانا أمك الطيب مايرِّث إلا طيب .. والخبيث يرِّث الخبيث.. الله يهديها ويهديلها ..
سميره : إلا أقول يمه .. وش رايك أستاجرلك من ذا التكاسي عشان كل مابغيتو شي تلقونه على طول عندكم ..أحسن من كل يوم ننطل وجيهنا عند حياة وأهلها ..ياوجه إستح ..
أم راشد : يمك مابي أثقل عليك وراتبك ياالله يكفيك ..
سميره : جعلني حذاياًلك مابه تكليف ولاشي .. الراتب قده طاير طاير .. يجي فشي يمسكه ولايطير.
أم راشد : مدري عنك .. شاوري محمد وبكيفكم ..
\
:
" يالخــاين .. والله إني من زمان وانا أقول انك نذل..تروح وتخليني يابنيدر!!"
بندر: وش أسوي بك .. عسكري وبتقعد تقول ماعندي إجازه ومقدر أستأذن ومدري وشو..
قلت باخذها من قاصرها وبروح من دونك ..
نايف: هـا جعلك ماتهنابها ..وجعلها مسرى الدا.. ووويامال المرض بعد ..
بندر: وجـــع .. تحسدني الخايس .. نعنبو غيرك ولد عمك ونسيبك تبيني أموت ولاّيجني شي!!
نايف: ههههههه يــاليت أرتاح منك شوي ولاواجد ..
بندر" فاقد الحيله": الله يلعن بليسك .. من زمان وانا عارف انك قليل خاتمه
ودخل عليهم فهاللحظه سلطان وقال بعد ماسمع آخر كلمه ..
سلطان: منهو قليل الخاتمه ؟؟ لاتقول نايف!!
بندر:إلاّ وفيه أحد غيره ؟!!
سلطان : حليلك هذا مب قليل خاتمه هذا أصلاً ماله خاتمه .. ينخاف منه صدق .. حبيبه هو مصلحته بس .. لاااا ولارحت مثلا تعشى عند أحد ربعك ولاتقهوا يــاويلك بيعطيك أنواع
العيون والحسد ..أما هو عادي يروح ويتعشى ويتقهوا ويفل حجاجه بعد ..
بندر: هههههههههه تعلمني في نايف !! خبز يدي ..
نايف : لاحـــــــول إجتمعوا علي عيال عبدالرحمن .. حشا مغلين !! تقول كني شارون
أعوذ بالله ..هذا وانا بس مابيكم تروحون بلحالكم عشان أجسركم بس ولاصار لكم شي
أكون معكم ..أجل لوإني صدق عدوكم وش بتسوون !!
سلطان: وااااو ياربي عـ الرحمه والحنان مقطعه بعضها ..
بندر: إلا سلطان.. يقولون كنت بالمزرعه مع عمي وش عندك مب من عوايدك ؟؟
نايف: إيه أخبرك دايماً تخاف على نعولك لايوسخها الطين !!
سلطان : هيهيهي ماتضحك .. ورحت عشان ذالعمال الله يبلاهم .. أمس لوشايفين حال عمي
تقول كنه ميت له ميت ..ويوم سألته قال عشان العمال وبلاويهم فاللقح والغرس .. عاد قلت أروح أعطيهم كلمتين في ظهورهم عشان يتأدبون عيال اللذين ..
استهموا بندر ونايف على ابوهم .. كلام سلطان قد يكون فيه شي من الصحه .. عبدالله قلقان عشان اللقح ممكن !! لكن هالشي يبين على ملامحه الخارجيه أكيــد لا ..مما زاد قلقهم عليه ..
طبعا نايف المسمى بـ " سر أبوه " مامشى عليه الكلام وعرف بإحساس نبضه فعروقه
إن أبوه فيه شي غير مشاكل المزرعه .. وفداخله يستنى متى يختلي به ويعرف منه كل شي ..
\
:
بعد العشاء عـ الساعه 9:30..تجمع الكل .. جاو سلمان وسعيد البيت .. وصيته رجعت تنزل لما عرفت إن اخوانها
تحت .. وأبوهم نزل .. وامهم كانت تحت .. كلٍ موجود غير حنان اللي لألحين ماجات !! ..
كانوا جالسين فنفس الصاله الأرضيه .. سوالف الشركه اللي ماتنقطع بين سلمان وابوه ..
وإنصات سعيد المتملل .. ومحاولات صيته للخروج من هذا الجو.. وتحليــل وحفظ حسناء لكل كلمه تطلع من أفواه زوجها وولدها..
تلفت سعيد حوله يدور حنان لكن ماحصلها .. فسأل عنها صيته ..
سعيد: صيته وين حنان ماشفتها ؟؟
صيته : اممم مدري عنها حتى انا ماشفتها من قبل المغرب ..
سعيد : وشلون ماتدرين عن اختك .. كم مره قايلك خليك قريبه منها ترى سنها سن مجنون ..
صيته : يابن الحلال اختك هي المجنونه مب سنها .. طبايعها تدبل الكبد ..
سعيد " ناظرها بعتب ووجه كلامه لأمه ": يمـه وين حنان ؟
حسناء: عند صديقتها نوره .. ووصيت السواق لها يروح يجيبها ..
سعيد : الله الساعه تسع ونص ولذلحين عند العرب .. ماتستحون على وجيهكم مهيتين بنتكم ماتدرون عنها ..
إنتبه أبوه وسلمان على قوة الكلام .. فتدخل سلمان وقال : لحـــول مهيتينها مره وحده!! .. اللي يشوفك تصبح برا البيت وتمسي براه !!
سعيد : لو سمحت محد كلمك .. لوجهت الكلام لك ذيك الحين تكلم.. زين !
سالم : يامال المرض اللي يدخل حيلك .. كلم أخوك بإحترام .. هذا وانا قدامك تكلمه بهالطريقه
أجل إذا كنت مب موجود وش بتسوي هاااه ؟؟!!
سعيد " والزعل مبين فوجهه .. يقوم يبي يطلع ": مشكــور يابو سلمان .. متعودها منك طال عمرك ..
طلع سعيد لـ اللامكان والألم متغلغل فكل جزء من أركانه .. هذا هو حاله كل ماواجه أبوه واخوه .. تفرقه كبيــره بينهم من أهم إنسانين فحياته ..أبوه وأمه .. الشي الكبير اللي ياما سبب له آلام وأوجاع وأشياء كبيره فقلبه ..
\
:
" أقولك خليها تضف وجهها أحسنلك ياسميره ..لا أرتكب فيك جريمه "
سميره : لاإله إلا الله .. وانت وش جايك منها .. عجوز الرحمن وش تبي منها ؟؟!..
زوجها : مدري .. تركبني الحمى لشفت أحد من أهلك .. هاأحسنلك خليها تنقلع ..
سميره : لو سمحت ماله داعي هالألفاظ.. عـ الأقل إحترم كبر سنها .. وقصر حسك لاتسمعك
زوجها : تسمع وتطق براسها الجدار .. قالولك مهتم يعني ..
وتطلع أمها بعبايتها على راسها .. دموعها تشتعل من تحت الرماد .. قلبها يحترق .. وروحها تحترق .. ملامحها سادها الظلام .. وجهها المتجعد يحكي قصة شموخ متكسر ..
ناظرت بنتها قليلة الحيله .. وزوجها صاحب القلب " الأبيض" وطلعت من البيت دون لاتنطق بحرف سوى دموع قاتله ..
سميره بدورها دموعها سيل على خدها .. أمها تنهان قدام عينها وهي مافيدها حيله .. ناظرته بنظرة كره وحقد وغل ووو سوالف بغض وركضت تلحق أمها وجوالها معها ..
ومن فضل الله لحقت عليها قبل لاتطلع من السور ..
مسكتها من يدها وضمتها بقوه على صدرها .. بكت حيـــل .. دموعها رجواها .. دموعها معاذيرها .. دموع ألم .. ودموع فقد وحكايات حزن .. بكت بنشيج وبشهقات تنخفض مره وتعلو مرات .. تنكتم مره وتطلع مرات .. فقدت أخوها أكثر هالمره .. لوإنه موجود ماوصل حالهم لهالدونيه وهالمهانه ..
كان مارضى على أمه هالمراره .. وخذا حقها المسلوب .. كان عنزت على الدنيا .. وحطته على يمناها .. ووووو عاشت في جنه ..
حبت امها على راسها .. وحبت يدها .. وقالت بصوت متقطع : بيحي مني يمه .. لاتواخذيني
على قلة حيلتي ..
أم راشد " تمسح دموع بنيتها بحنان مُتعَب": أفااا عليك وانا امك .. لاتعّذرين من أمك .. عارفتٍ البير وغطاه .. لاتشيلين هم .. السالفه ضاعت في بحر ..
سميره : الله يحييني لين آخذلكم حقكم ..
أم راشد: حقنا مب ضايع عند رب العالمين ..
سميره : الله كريم .. لكن مايضيع حق وراه مطالب .. إن عاش راسي محد مرجع وخيي إلا أنا ..ومحد حافظٍ ماء وجهك غيري ..
أم راشد " تغير الموضوع بأسى ": سميره دقي على حياه تجيني هي وخوها ..لايطلع رجلك ألحين ويسويلك سالفه وانتي مب ناقصه ..
سميره : أبشري .. بدق عليها ألحين ..
\
:
دخلت عليها وهي تكلم سميره بوجع وتحسب .. عرفت السالفه قبل لاتقولها .. قصه جديده مع زوجها ..جلست جنبها على السرير..وبعد ثواني سكرت حياة وكلمت بندر وقال بياخذ غاليه معاه .. عشان هي وراها تحضير وشغل للمدرسه .. خلصت مكالماتها .. وإلتفتت لأختها .. وقالت : حسبي الله عليه .. وصلت به الحقاره يهين أمها قدامها !!
مهره : لاحول ولا قوة إلا بالله .. معليه مصيره بيجيله يوم ..
حياة : طيب على الأقل يراعي كبر سنها .. هي مثل الوالده عليه .. وكان مالهذا شان عنده
يحترمها عشان بنته ..
مهره: حياة صدقيني هالأشكال لابنتهم ولازوجتهم ولاحتى والدينهم يهتمون فيهم ومثلهم مثل التمثال قدامهم ..
حياة : ميبي !!.. الله يعين سميره ويسخرلها مابين السماوات والأرض..
مهره:آميـــن يارب العالمين .. تعالي يالدبه ماقلتلك ..ركبت اليوم مع خالد ولد جيرانا ..
حياة"بشهقه ": إحلـــفي !!!
مهره : قسم باالله حياه .. وجا نايف على وقت دخلتنا .. وسوا سالفه وتهزيء ومدري وشو ..
حياة : يـــــــاعيني .. يغار الرجال !!
مهره : ههههههههه حليله متحمس!! .. لاوزيدك من الشعر بيت أرسل لي غاليه تعذّر له ..
حياة: هلا والله بعـــد مراسيل ..
مهره: ههههههه مدري عنه مصدق مدري وش قصته .. بس ماعطيتها وجه .. يعني مابينتلها إني مهتمه بالموضوع وإن السالفه ماأثرت فيني ..
حياة : تعجبيني .. خليك ثقيله ولاتتعدين الخطوط الحمراء.. خليه يتولع فيك .. ويقول بنت عبدالرحمن مافيه منها ..
مهره : هههههههه طالع هذي مصدقه !!..أصلاً مافي بالي شي من ناحيته ..
حياة : إهيـــــيئ .. علينا !!..
مهره : امممم يمكن إني أفكر فيه .. لكن مب متشبقه ومتعلقه فيه .. يعني خذيته أور لا عــادي..وأصلا مدري حاسه مارح آخذه ..
حياة : ياشيــخه روحي .. الرجال متولع فيك .. أبصم بالمليون مارح ياخذ غيرك إن شاء الله ..
مهره : يابنت الحلال لوإنه يبيني كان من زمان تقدم .. قدله ثمان سنين متوظف ولألحين ماتكلم ولاقال شيء ..
حياة : هو أكيد عنده أسبابه .. بس خذيها مني قلبه متعلق فيك أنتي بس ..
مهره " بعد شي من الصمت والتفكير ": أنتي فيك شي !!
حياة : ههههه وش فيني .!!!!
مهره : مدري بس لك أيام مب طبيعيه ..
حياة " بسكــــون ": إذا مانحل الموضوع بقولك نتشاور ..

\
:
بعد ماتعشوا طلع عبدالله لغرفته ولحقته زوجته بكوب عصير طازج ..
دخلت عليه ولقته مستلقي على السرير وباله يشتغل .. مدته بالعصير بحب وجلست جنبه
وقالت : عبدالله عسى ماشر .. من أمس ووجهك منقلب !!
عبدالله " يشرب العصير بتنهيده ": سلامتك ياام نايف .. لكن بالي مشغول فالمزرعه..
مزنه : طيب وغيرها ..
عبدالله " عارف إنها هي الوحيده اللي تكشفه وقدامها ملامحه مقروءه ": هههههه .. يابنت الحلال
مافيني إلا العافيه ... موضوع شاغلني بكره ولابعده بينحل بإذن الله ..
مزنه : يعني مارح تعلمني !!
عبدالله " يقلدها": لا مارح أعلمك !!..
مزنه " تمثل الزعل " : طيــب..طيــب .. مهما علا موجك مردك للبحر راجع ..
عبدالله : أحلااااا ووين لقطتي ذالكلام منه ؟؟
مزنه " نست التمثيل": ههههه مدري ..إلا كني سمعت غاليه تقوله ..
عبدالله : الله يغربل بليسها .. إلا وشلونها مع رجلها ؟؟
مزنه : ماعليها مهب تقولي شي ..بس مبين عليها مرتاحه ..لو إنها تسلم من إستهتارها كان طلعت مافي اسنع منها .. وإن جامنها القصور مب جايٍ من بندر فديت قلبه ..
عبدالله : الله يوفقه وخوانه ويسعدهم ويقدرني على القومة على بختهم ..
\
:
- هاه وش رايك ؟
- والله مدري عنك كانك مقتنع توكل على الله ..
- مدري ..أحس إني متحمس بس خايف ..
- يارجال وش تخاف منه .. ترى هذا مستقبلك .. ياتكون أولا تكون ..
- والله ودي بس ماقدر أعيش من دونكم ..
- يالبيـــه النونو .. ترا قدلك سنيــن مفطوم ..
- هههههه .. حتى مب سهله 5سنين برا السعوديه ..والله صعبه..
- إسمع ترى البعثات مب بالساهل تجي .. يارجالٍ صامل بتروح ولا لاتذبح نفسك بالتفكير ..
- بستخير وبستشير والله يكتب اللي فيه الخير
\
:
يتبع

[جرح الذات]

وحسم الحب الموقف،، ووومحاولة ضجر !!"
\
:
# الجزء الخامس#
\
/
"
لبست عبايتها وطلعت السور مع نوره ينتظرون السواق يجي ..
جلست على عتبة الدرج للباب الرسمي وجلست نوره قريبه منها بشكل مقزز ..
مسكت يدَّها بتحريك إصبعها الإبهام على كفها بنعـــومه سخيفه ..
وقالت : خســاره الوقت يمضي بسرعه لجلست معك !!
نوره " بقرف باطني ": إيه صدقتي .. الثانيه تروح فلمح البصر حناني ..
حنان " بصوت خجول" : تصدقين لو طلعلي المارد السحري وقالي تمني ثلاث أمنيات بقولها كلها إنك تكونين جنبي طــول العمر ..
نوره " بضحكه هستيريه": وااااااو لهاالدرجه تحبيني!!!
حنان : وأكثر .. وأنا متأكده إنك تحبيني أكثر مني بعد ،،وأكثر من نفسك حتى،، صح حبيبتي ؟؟
نوره " تمثل الحيا،، وتحط عيونها فالأرض": يعني عيوني فاضحتني لهاالدرجه!!..
حنان " تطبع بوسه على خدها ": مدري وش بيصير فدنيتي من دونك ..
نوره : ههههههه لاتبالغين حنان .. كلها ثلاث شهور وأكون في خبر كان ..
حنان : لااااا حرام عليك ..أصلاً لدخلنا الكليه مستحيـــل تكونين فقسم غير قسمي ..
نوره : بس أنتي أكيد بتدخلين كليه زينه .. أبوك معارفه واجد وبيدخلك اللي تتمنين .. لكن أنا حالنا على الله ..
حنان : لاعمري مستحيـــل أدخل من غيرك .. يايتوسط لنا ثنتينا يانقعد ثنتينا ..
إطمنت نوره كليــاً .. قدرت تستحوذ على كل خليه من خلايا القلب والعقل والـ تفكير والتدبير ووووو كل شي ليــن أصبحت الهوا والماء بالنسبه لحنان ..
هي من أهل الطبقه المتسلقه اللي تتسلق على حساب غيرها ،، يعني حيــاتها كلها معتمده على الغير .. حبيبهم مصلحتهم وبس .. يرافقون الناس ليــن ياخذون غايتهم ولاخذوها قطوهم بحــر ..
إنتشت نوره للحب " العميـــق" ورجعت تقطع الوقت "البغيض" مع حنان ليمن يجي السواق ..
\
:
" طيب أنا أبي أفهم ليش أنتي زعلانه ألحين ؟؟"
قالها بندر يخاطب غاليه فالسياره .. بعد ماوصلوا أم راشد بيتها .. والصمت كان سالك طريقه
معاهم ..ليمن تكلم بندر ..
بندر: لاحـــول ..كني أتكلم على جدار ..
غاليه : هيــــي احترم نفسك مانيب جدار..
بندر:هههههه.. طيب وش رايك في سقف مب كنها أزين ؟؟
غاليه : هيهيهي ماتضحك ..
بندر: ياللا عاد بلادلع .. كل ماطرالك زعلتي بسبب أو بدون .. طيب أنا بروح مع ربعي ..
طلعة شباب أنتي وش دخلك فـ السالفه ..
غاليه : لااا ليه يوم تروح وتخليني .. تروح تستانس حظرتك وأنا منطقه فالبيت ..
بندر: حســـد يعني !!!
غاليه : حسد ما حسد سمه اللي تسميه .. اهم شي لاتروح وتخليني .!
بندر: ههههه ياناااس على كيفها الشغله .. اللي يشوفك بروح أوربا .. ترى بطلع البر إفهمي
تراب ونار ولحم..وانتي ماتحبين هالأشياء .. ماعليك لارحت لندن وديتك معي ..
غاليه : هيهي إحلف .. تحلم تروح وانا مانيب معك أصلاً .. على كيفك أخليك تصيع هناك مع
مخبلهم ..
بندر: يـــــــااااي تغــار علي ..وأخيراً إعترفت ..
غاليه " بكبر" : لاتستانس .. مب معناته اني أغار .. وش أغار عليه ياحظي!! ..بس حرام تروح تشوف الدنيا وانا مب معك ..
بندر" وأثرت فيه الكلمه .. لكن خلاها تروح مع خواتها": هــا غمٍ لك وردع لأمثالك ..كنت بسمحك وعشيك في سمر إنديان لكنك ماتستاهلين أحد يعطيك وجه ..
رجع الصمت لنفس الطريق .. والزعل صار جد فملامح غاليه الطفوليه اللي تصرفاتها مثل ملامحها ..
والحلم والسماحه شاقه لها مجرى فوجه بندر .. رقه وعذوبه وحنــان في الزمان الخطأ .. عالم حب .. وفصول طيبه .. حليــم في زمن اللاحلم .. وسمح في زمن اللاسماحه ..
لكن " إتقِ شر الحليــم إذا غضب "!!!
\
:
"
مدريـ متى؟؟!!
\
/
\
مدريـ متى !!
بس أذكر وقتها كنت طفله صغيرهـ
أكبر همومي دميتيـ..
لا.. لا!!
مب دميتيـ ..عروستيـ !
إيه كنت أسميها عروستيـ.
أرقص على صوت المطر
وتتبلل الشباصاتـ الحمر
وادخل يم ابويـ ويضمنيـ..
وقبل مايضمنيـ" يلمنيـ"..
/
\
/
مدريـ متى؟؟!!
بس أذكر وقتها كنتـ
أحبــــــــهـ حيـــلـ،،ــ
أفرح لعطاني فسحتيـ..
وقبل لاأنزل يقول عطينيـ بوستيـ
كان يمسح دمعتيـ..
كان يظلل فرحتيـ..
.
.
لكنــهـ
" رحـــلـ!!ـــ "
/
\
/
رحلـ ـ ، ـ ،ـ ـت
يابويـ وتركتنيـ طفلهـ صغيرهـ ،،
اخافـ من برد الشتاء وظلمة الليلـ
من بيدفيني بحنانهـ؟!
ومن يقولي هذي نجمة سهيـلـ ؟؟ ــ
.
.
رحلتـ
وتركتني أعانيـ وحدتيـ
جلستـ أكتم صرختيـ.!.
اااهـ ياكل الزماانـ،،
واااهـ ياكل الحناانـ،،
.
.
وجديـ توجد ياأغلى من ليـ
ليتـ العمر يفدى وأعطيك كل كلـيـ
/
\
أحبـــكـ كثر الأمكنهـ والأزمنهـ
وكثر اللي راحـ وكثر اللي بيجيـ
"عســانيـ مانحرم من طيفكـ"
.
.



المكان: هنا في جوارحي
الزمان: ذات جرح تبرأ منه الزمان

"
باست مهره حروفها بدموع غرقت فعينها ومليون تنهيده إنحبست فقيعانها ..
دعت لوالديها فداخلها بالرحمه والغفران ومثوى الفردوس الأعلى .. وتذكرت حديث الرسول
عليه الصلاة والسلام اللي أصبح ملازم لها فصباحها ومساها ..( ينقطع عمل المؤمن إلا من ثلاث – وذكر منها- ولد صالح يدعو له ) ..
دعت باللي جادت به نفسها .. وحطت راسها على المخده على أمنية ربي يمّن عليها وأخوانها
بالخيــر عشان يبنون لوالديهم مسجد يقابلون به ربهم يوم القيامه ويوم عرض الأعمال ..
\
:
" لحــول وذولا مايقرّون شهر على بعضه فالديره "
قالتها صيته وهي تكلم صديقتها سلمى فالتلفون ..
سلمى : والله إنك صادقه .. فشلونا قدام الناس .. كل يوم فديره .. وصياعه وقلة حيا ..
صيته : والنذل سلمان اليوم جالس معنا ولاقال شي !!
سلمى : حتى فهّاد ماقال شي .. بس كلمت سميره المسيكينه اليوم العصر ونفسيتها كانت زفت .. تقول انه يقولها بيسافر الخميس ..عاد أنا قلت مستحيل يسافر بدون سلمان ..
صيته : اهااااا قوليلي!!.. ياعمري ياسميره .. الله يعينها على أخوك .. صراحه ياسلمى تراني أكرهه ..أحسه مستهتر وماخذ الدنيا لعب وماعنده أدنى تحمل للمسؤوليه ..
سلمى : ماجبتي شي جديد!! .. حتى أنا أكرهه .. عمري ماجا وجهي فوجهه وحسسني بمعنى الأخوه .. حياته كلها شك في شك .. يجي البيت عشان ياخذ كم ريال من أبوي ولاامي ,,ولجيت فوجهه الله لايوريك ،، سوالف وتحقيقات مالها لاأول ولاتالي ،، ولاراح لذيك المسكينه ووراها الويــل .. حتى أهلها ماسلموا منه!!
صيته : الله يعينها ويصبرها .. طيب ليش ماتجيبونها تسكن عندكم ..كونه يفلح منها شوي ؟؟
سلمى : ياعمري والله إنك مسكينه .. يعني ماعرضنا عليها الموضوع !!.. قلنالها هي ..عشان عارفينه بيألف قصص مالها داعي .. عاد هي قالتله وتعالي شوفي وش سوا فيها " إيه تبين تروحين هناك عشان تنطلين بنتك على أمي وتاخذين راحتك في الهياته" ولا" عشان تصيعين مع سلمى على النت " ولا" عشان تقوين ظهرك بأهلي وانتي مالك ظهر ".. يــــوه ياسوسو كلام مالجده داعي ،، ويتكلم عن اللي بتروحلهم كنهم مب أهله !!،،
صيته : سلمى أكيد إنه مريض نفسياً.. أو عنده شي فخاطره مخليه بهالشكل ،، ماأتذكر كان كذا!!.. صدقيني أخوك مب خالي .. حاولوا تعالجونه .. ولاودوه لشيخ كونه مسحور ولامنظول ..أكيد فيه شي ،،
سلمى : يــاليت ،، بس هو جني مايخلي أحد يقرب منه ..
صيته : ياللا ياشيخه الله يعينا على الدنيا وبلاويها .. ترى عندكم وعندنا خيــر ..
سلمى " تبي تغير الموضوع": إلا تعالي شخبار المنتدى ؟؟
صيته : والله ماعليه ،، يااللا سلمى متى بتسجلين خلينا نصرقع الدنيا أنا وياك ..
سلمى : ههههههه لاحرام أخاف ينتحرون الناس ،، يكفي خبل وحده عندهم ..
صيته : هههههههه لامدام كذا خليك أحسن أخاف يجي ذنبهم فرقبتي .. بس
ياسلمى فيه وحده تجنن ،، انا بعدني ماتعرفت عليها بس مدري كذا أحسها فنانه..
هي عمرها تقريبا نفس عمرنا فـ 21.. ردودها تعجبني أحسها إنسانه راقيه ،،
وتفكيرها سامي ،، ومره نزلت خاطره وأعجبتني حيـــلـ.....
سلمى : لحـــول على هونك سوسو .. كل ذاااه !!،،
صيته : مدري ياسلمى أحسها تستاهل ،،
سلمى : أهم شي تأكدي من هالشي ،، لاتعرفين عليها وبعدين تكون من إياهم !
صيته : لاااا مستحيل .. هذي لها مع الليل حكايه .. ومستحيل تكون حكايتها
" سوالف أي كــلام "
\
:
" بعد مساءات مختلفه لنفس الصبــاح "
\
:
فمنطقه جنوب الرياض تسمى " الحاير" .. خلف أسورا منيعه .. وحمايات فظيعه ..
في ظلمات السجن .. خلف قضبان الألم والأمل .. ضمن سياج الغرق وحلم النجاة ..
وتغلغل الخوف في القلوب والأسى في النفوس ..
جالس فـ سجنه المظلم .. ونور الإيمان والحفظ مالي محيـــاه .. وحب الرحمن عامر فقلبه ..
والثقه العظمى منوره زنزانته ..
يقرا ورده اليومي من الأذكار والقرآن على سجادته اللي أهداها إياه صديقه فهد الله يرحمه
في آخر سفره لهم لمكه..
سكر القرآن بعد ماسالت دموعه كالأنهار خشيةً لله سبحانه وتعالى .. رفع كفينه للواحد الأحد ..
وأخذ بقرع أبواب السمــاء .. ولدموعه حكايه يحكي عنها المطر .. والرجـــاء عمره " ماخاب"..
(اللهم لك الحمد كله وبيدك الخير كله ..ويرجع إليك الأمر كله .. أنت رب الطيبين ورب الخلق أجمعين ،،اللهم أنت أحب من ذكر..وأحق من عبد.. وأرأف من ملك وأجود من سأل وأوسع من أعطى.. أنت الملك الذي لاشريك لك وأنت الأحد الذي لارفد لك،، كل شي هالك إلا وجهك.. لن تطاع إلا بإذنك ولن تعصى إلا بعلمك..تطاع فتشكر وتعصى فتغفر.. أقرب شهيد وأدنى حبيب.. والأمر أمرك والعبد عبدك والحكم حكمك والخلق خلقك وأنت الله الملك الرؤوف الرحيم ..
اللهم يامن له العزة والجلال يامن له القدرة والكمال يامن هو الكبير المتعال .. اللهم إني عبدك ابن عبدك ابن أمتك ماضي في حكمك عدل في قضاؤك ..أسألك بكل أسم هو لك سميت به نفسك أو علمته أحد من خلقك أو إستأثرت به في علم الغيب عندك أن تجعل القرآن العظيم ربيع قلبي ونور صدري وجلاء حزني وذهاب همي وغمي .. اللهم علمني منه ماجهلت وذكرني منه مانسيت وارزقني تلاوته والعمل به آناء الليل وأطراف النهار..
اللهم إن ناصيتي بيديك ..وأموري ترجع إليك وأحوالي لاتخفى عليك .. إليك يرفع حزني وهمي.. إليك اللهم أشكوظلم الظالمين.. وقسوة الفاجرين ..اللهم طال ليل الظالمين وانت أعلم بذلك،، فيارب أيوب وياراد يوسف على يعقوب أرني الفرج قبل الممات وقر عيني قبل الفوات يا أكرم الأكرمين .. اللهم إني أبث حزني إليك .. وأنت أعلم مني به .. يارب إني فقير إلى رحمتك .. مسكين متذلل لعفوك ومغفرتك فياأرحم الرحمن إجعلني من عبادك الصابرين التائبين العابدين .. اللهم لاتحوجني إلى أحد من خلقك ولاتكلني إلى نفسي طرفة عين ولاأدنى من ذلك .. اللهم إني أسألك بإسمك الأعظم الذي إذا دعيت به أجبت وإذا سألت به أعطيت أن ترحمني فإنك بي راحم ولاتعذبني فإنك علي قادر ..
اللهم إنك قلت وقولك الحق " إدعوني أستجب لكم" فهذا الدعاء وأرجومنك الإجابه وهذا الجهد وعليك التكلان ،اللهم تقبل دعائي وامن رجائي وأستجب سؤالي .. ياحي ياقيوم .. يارافع السماء بلاعمد ..وصلي اللهم وسلم على نبينا محمد وعلى آله وصحابته وسلم تسليما كثيرا .)
:
" الساعه العاشره صباحاً"
.
.
دخل الشركه بهـــــدوءه المعتاد .. وبطيبته المجنونه .. محترم فطلته .. ووقار مرسوم
فملامحه .. ووجه سمح سبحان من صوره !!..
نقّل نظراته بين أركانها .. وهاله البذخ المسرف ،، والترف المبذر .. مرت على شفاهه إبتسامة
سخريه ممزوجه برحمه على حالهـ.. ////
" الله عليك .. تبذخ فحلال اليتامى !!.. تجاهر بالمعصيه .. وتقول الحلال حلالك !!.."
كان يقولها لسان حال عبدالله بأســى .. وفقد رجا .. ووخوف ..
12سنه ماشاف وجهه .. ولاخاطب لسانه لسان سالم ..
بس قدر يسيطر على توتره الداخلي بحكمه ..
وصل الإستقبال وسألهم عن مكتبه .. ودلوه عليه ..
كان يطلع عتبات الدرج بسكــون وزلازل داخليه ..
وصل مكتب السكرتيرحامد بعد جهد بسيط ..
قال : السلام عليكم
حامد " يفز بقوى .. وكنه شايف ملك": أهلاً يافندم .. مرحبا ومسهلا..الأستاز أبوحمد؟؟ ..
حياك الله ..إتفضل حضرتك سواني حـ أ وول لأبو سلمان إنك وصلت ..
ماترك حامد فرصه لعبدالله يتكلم .. قده بيتكلم إلا دخل حامد مثل البرق مكتب سالم ..
"شكله خبل موصى !!"
ظل عبدالله واقف وقلبه يطحن .. ثواني إلا حامد جاي يدخله ..
\
:
" خلاص اجل كلمي واحد من ذالمكاتب .. وإتفقي معاهم "
سميره : اممم مدري .. مابعد قلت لمحمد أخاف يعاند ..أعرف حركاته !
حياة: لاإن شاء الله مب معيي .. بالعكس هذا أحسن له ولجدته وأحسن لكم كلكم ..
سميره : بكلمه اليوم وبنشوف..
حياة : خلاص حبيبتي سواء جبتو السواق أو لا ..إحنا تحت أمركم متى مابغيتوا..
سميره : الله لايخليني منكم .. والله إنكم سويتو فينا اللي مايسوونه الأهل لأهلهم ..
حياة : شدعوه عاااد سموره ماسوينا إلا الواجب ..
سميره : إلا شخبار مهور اختك .. من زمان ماسمعت صوتها ولاأخبارها ..
حياة: هههه بلانا من ذا العلوم اللي جاتنا !! .. ياطويلة العمر مهور بخير وتسرك علومها ..
البنيه بتخرج ذالترم ومدهره في ذالدراسه..
سميره : مشاء الله!! قد مهره البزير أم قرنين فسنه رابع !!
حياة : هههههه تخيلي .. عجّزنا ياسميره .. بنيتي بتتخرج !!
سميره : ياعمري هذا أنتي بس اللي عجزتي .. ولاأنا بسم الله علي توني عمري 27بس ..
حياة " بضحكه عذبــه زادتها شروق": يابنت الحلال .. حتى لو إنا بنات الطعش بتعجزبنا ذاالهموم..عسى الله يعينا على الدنيا بخيــر ويطلعنا منها سالمين ..
\
:
حنين شده له .. حب لمع فعيونه .. شــوق بحجم السماء دفعه له .. وجنون الأخوه طغا على ملامحه ..
يااااه نفس الشكل ماتغير .. نفس العيون الداخله والنظره العميقه .. نفس الجبروت ونفس الشموخ ..
إلا!! تغير فيه شي.. الشيب كسى عوارضه الغزيره .. وهالات عظيــــمه حول عيونه ..
مبين على وجهه القلق والأرق وووالهم!! لكن ممزوج بمكابره وغرور وأنانيه وووعنجهيه ..
قال عبدالله : السلام عليكم ..
إلتفت عليه سالم اللي كان منشغل فأوراق عنده وملقي الباب مقفاه يمثل دور المشغول .. لف كامل جسمه وبدت على وجهه آثار صدمه رهيبـــه ومروعه .. إبتسم بين مصدق ومكذب لكنه فرح بعمق!! جاته سعاده غريبه ،، فرح المفاجأه مختلف ..فز واقــف وهو فاتح ذراعينه يبي يحظنه
وقال: مـــرحبا .. مرحباً ملايين .. مرحباً هيــل عد السيل ..
ويقرب منه حد النفس ..حظنه بكامل قواه العقليه!! لكنه أبعد بســرعة البرق !.. إنقلب حاله .. الإبتسامه تحولت لتكشيره وتعقيدة حواجب .. الفرح تحــول تعاسه .. التعاسه تحولت لشرر وحمم بركانيه عظيمه كادت أن تخمد لكن أمر الله كان أعظم ..
قال سالم " بإقتضاب": خيــر إن شاء الله .. ترى معاد نوزع صدقات ..
عبدالله " بإبتسامة رحمه عطوفــه": أنت أدرى خلق الله إن لوإني أطر عند المساجد ماجيتك أطر منك،، يا...ياخوي !!
سالم: لاتقول أخوي جعلك الخوا اللي يخوي عظامك .. انا مالي اخوان غير عبدالرحمن ومات الله يرحمه .. ولاأنت طول عمرك تحلم إنك تصير أخوي ،،لكن تخسي ماتصير اخوي ،،
عبدالله " بحــلم": ههههه مب مهم تعترف بي ،، لكن المهم .. زيـــن إنك لذلحين متذكر إن عبد الرحمن أخوك!! ..
سالم" بمحاولة ضجر":عبدالله ترى وراي أشغال لاقبـــل ،، مب فاضي لـ لومك ،، كان عندك شي بتقوله قله ،،ولا إطلع من حيث ماجيت ..
عبدالله " مأيس منه": إسمع يابو سلمان .. ماجيتك عتّاب ولا لوّام ولامرسالٍ من أمك اللي ماترقد الليل إلا ودعوةٍ منها لاحقتك .. عيال عبدالرحمن ياسالم خل مرتك تكف شرهاعنهم .. يكفي أنت اللي من عرفتها وأنت ماعرفت الخير .. وإسمع كلمةٍ مانيب مثنيها .. والله ثم والله ثم والله ثالثه لايصير في حياة شي منها إن مايردنا غير شرع الله .. وأنت عااد عليك الحساب وش بنتحاسب عليه ووش بنخلي !!
سالم " والغضب بدا يسيطر على ملامحه .. من مرته من جهه اللي خلته فهالموقف بعد هالزمن .. ومن كلام أخوه المهدد": إسمع ياعبدالله .. عيال أخوي مالك دخل فيهم .. واحمد ربك مخليهم عندك كل ذالعمر ..ولا ترى الناس كلو وجهي عشانهم فبيتك .. ماخليتهم إلا رحمةٍ فيك .. مابي أقطع قلبك عليهم ..
عبدالله " ولذلحين مسيطر على كامل حواسه ": مشكـــور وماقصرت .. والله يقبل أجرك .. مع إني فاقد الرجا فيك إنك تخليهم عندك !! لكن القول مافي أسهل منه.. وفي ذمتي ماتسوي عندهم ياعمهم اخو ابوهم مثل ماسويت انا عندهم..ومهب منةٍ مني عليهم .. الحمدلله مالي مّن ولامعروف عليهم.. أبوهم راعي الأوله .. لكن الدنيا دواير ياخوك إن صفتلك اليوم مهب جايتك على الكيف بكره ..
سالم " يجلــس بقوه على الكرسي": ذلحين أنت وش تبي ؟؟..جايني طلاّب ؟!! مالك شي
عندي،، وورني شرع الله الي بيجي بيني وبينكم ..
عبدالله : لاإله إلا الله ،، وصلت بك لذا الدرجه ،، تستهزي فشرع الله ،، يارجال خاف ربك لاتنطبق عليك السما ..
سالم " بصوت عــالي" : أقـــول إقضب الباب الله لايهينك ..
عبدالله : بطلع من دون ماشاورك .. لكن مثل ماقلتلك علمٍ ياصلك ويتعداك .. عيال عبدالرحمن كفو أذاكم عنهم ولاترى والله إن تجي بيني وبينك ياسالم ..
وقفى عبدالله وطلع .. تارك وراه دنيـــا من التناقضات .. وحكايات نسيجها الهروب!! ..
\
:
" بعد التناقضات والهروب بثلاث ساعات"
\
:
كان اللواء مديره في العمل ماداوم اليوم .. فإستغل الفرصه وطلع طبعاً بإستإذان .. وصل البيت عـ الساعه 1:30.. طل براسه مع باب الصاله لكن مالقى أحد .. دخل شوي بعد مالقى شي.. تحنحن ودخل المطبخ اللي كانت أمه فيه تبي تكب الغدا .. جا من وراها ومسكها من كتوفها وروعها بعبارة الترويع الشهيره " بـــووووه" ،،
فقالت أمه: بسم الله علي وعلى عيالي الرحمن الرحيم .." وتلتفت له وكنها بتضربه بالمغرفه " ..نويف يامال العنا كم مرةٍ قايلتلك لاعاد تسوي ذالحركات .. تراهي تسبب الخلفه يامك ..
نايف: ههههههههههه تخيلي يمه شكلك وانتي مجنونه .. كان أول شي بسويه بتبرا منك ..
أم نايف: وجــــع مير تعطينياها في الوجه !!.. تتبرا !! أصلا منتب قادر تعيش من دوني .. أصلا انت لسافرت يومين تجيني تلهث تدور حظني ..
نايف: أحـــلاااااااا ياواثق .. يكون في علمك يمه ترى من أول ماعرس وانا كارشك .. ولاليه من أعرس من أخطب .. مشوار لين أعرس معاد فيني صبر أتحملك ..
أم نايف: نايف ماتلاحظ إنك داق الميانه بقوه .. تراني أمك يعني أمك يعني أمك .. لاتنسى !
نايف" يحبها على خدها بصوت": جعلني قبلها ذالأم .. روحي فدا روحها ..
أم نايف: إيه إدهن السير أشوف ..إدهنه !!
نايف : هههههههه .. داهنه من زمان .. هااه يمه جاو بنات عمي ؟؟
ام نايف: إيه حبيبي جابهم أبوك .. ورح إجلس معه هذاك هو عند امك غاليه ..
نايف : خيــر إن شاء الله .. وعجلوا بالغدا تراني ميتٍ جوع ..
ام نايف: وانت من متى شبعان !!!
ويطلع نايف وهو يضحك على سوالف أمه الحنونه والعطوفه .. أمه الرحومه .. الفتانه والعذبه ..
بدونها مايقدر يتخيل حياته .. وبها يرسم أجمل لوحه .. فنّانه في رعايتها .. وفنّانه في حنانها ..روحها تهيم بينهم كلهم لاتمل ولاتكل .. تعطي هذا بسمه .. وتاخذ من هذاك دمعه .. تعطي هذي أمل .. وتاخذ من هذيك يأس..
" ربي إغفرلي ولوالدي ولمن دخل بيتي مؤمناً ..ربي إنك غفور رحيم"
قالها نايف بعمق .. ياالله شكثر يحبونهم ويدمونونهم حد التخمه ..
وصل للمقعد اللي فيه أبوه وجدته .. تحنحن قبل لايدخل .. لما دخل كانوا يتكلمون .. وتعابير
وجيهم مبينه فيه شي .. من شافوه كتموا وبلعوا الكلام ..
نــايف: الله !! وش فيكم سكتوا ؟؟.. أجل جيت في وقت غلط ..
ام عبدالله : إيه بالله جاي فوقتٍ غلط .. هاإقضب الباب وورنا مقفاك لين نناديك ..
نايف : شف العجوز!! ياعيني عليها تطرد لاوبعد لين نناديك إخص ممنوع إصطحاب الأطفال!! ..أفاااا ياأم سالم طغيتي علي وانا ولد الغالي ..
أم عبدالله : ياماااال الفنى .. لاعاد تطري ذا المودمي قدامي .. قلبي غضبانٍ عليه ليوم الدين .. الله لايبيح منه ولايحلله ..
عبدالله وولده .. صدمه كبيره علت محياهم .. أول مره أمهم من هذاك اليوم تدعي عليه .. لا مب محللته بعد ،،ياقوتها و"ياقلبها المكسور" ..
فقال عبدالله : يمه جعلني حذاياً لرجولك .. لاتدعين عليه .. إدعيله بالهدايه والصلاح كود يوافق ساعة إستجابه ويستجيبلك الباري ..
نايف: يايمه جعل يومي قبل يومك .. ماقد عرفتك دعّايه .. إدعيله بالهدايه فديتك .. ترى دعوة الوالدين مستجابه ..
ام عبدالله " وهي تمسح دموعها بطرف شيلتها" : بلاني من كثر ماذوقني ،، ياالله ياكريم جعل ماكان دعيناله على غفلة منه إنك تقبله يارب العالمين .. وتهيده وتهديله .. بس شوف ياعبدالله واللي رفع سبع وطمن سبع ياإن صار فبنت عبدالرحمن شي معادهب موقف فوجهه غيري .. ياتنكسر سلقته ولاننكسر كلنا ..
عبدالله : لاإله إلا الله .. ليتني ماعلمتك .. ذلحين أنا معلمك أبي الشور وتثورين أنتي!! .. خابرك راعية حكمه يمه وراعية عقل !!!
أم عبدالله : عقول الرجاجيل تطير لجاو عند ذالأمور.. شعاد بالحرمه المسكينه !..
هنا نايف تأكد وبصم بالمليون إن فيه شي .. وهذا الشي كايـــد بالحيل وهو اللي خلا أبوه مب طبيعي خلال اليومين اللي راحت .. ثار فضوله يبي يعرف وش صاير .. لكن مدام إن أبوه ماقاله أكيد مايبي يعلمه..لأن عبدالله مهما صار ومهما حصل العلوم كلها عند نايف .. وإذ ماقالها فهذا أكيد له حاجه فنفس عبدالله ..
\
:
دخل البيــت مايشوف قدامه .. كن الشيطان متركز قدام عيونه .. صار يناديها بصراخ يفجر الجدران ..
نزلوا الكل من غرفهم على الصوت العنيف بما فيهم إهي .. خذوا عتبات الدرج الوحده بثنتين ..
يناظرون بعض بعلامات إستفهام ..ونظراتهم تحمل مليون علامة تعجب ..
قال " بصراخ ": تعالي يابنت الكــــــلب .. وش أنتي مسويه بحياه يالحيواااااانه ..
جمد كلٍ فمكانه .. وش هالتطور كل هالصراخ عشان حياة .. شي عظيم !!
قرب منها يبي يشد شعرها لو مالحق عليه سعيد
وقال: على هونك يبه .. إذكر الله ،، الموضوع بينحل بطريقه أحسن من كذا ..
سالم " وبصراخ أخس": مـــعااااد بقى إلا هي ياولد المَرَه ..تجي تعلمني وشلون أتعامل مع اهل بيتي .. سعيد أبعد عن وجهي يالثور لاتجي كل الحره فيـــك ..
تراجع سعيد بصمت وطلع غرفته بهـــدوء وتكرهم تحت بينحرون فـ بعض ..
حسناء " ببرود قـــاتل": لالا.. صراحه خطير ياسالم .. كل ذا الصراخ وذاالحكي عشان حياة ..وش هالتطورات الرهيبه!! ..
سالم : 12 سنه يالبقره وأخوي ماطب لي مكان ولاخاطب لساني لسانه .. واليوم جايني عشان بلاوي حظرتك مع بنت أخوي!! ..
حسناء: وانت من متى تهتم لأمرهم يامال الجنه !! .. وبعدين أنت عارف كل يوم انا في مشاكل مع حياة وش معنى ذالمره!!..وبعدين وش خلاه أخوك جعل المرض يفتت عظامه ..
سالم : جعل المرض يفتت عظامك أنتي يالخبيثه .. وخوي ولامب اخوي مالك دخل .. وعلى كثر مشاكلك أنتي وياهاا ماقد جاني ولامره إلا ذالمره!! ..يعني أكيد إن ذالسالفه أكود .. وانا باصمٍ بالمليون إنك متبيلتها في شرفها.. تراك كلبه وتسوينها .. لكن إسمعي ويمين الله لايجيني الطير ويعلمني إنك مشوهةٍ سمعتها ولامتعديةٍ حدودك وأنتي عارفتها .. لاأحرمك من كل شي تبذخين فيه .. ولااحرمك من عيالك .. ولااكرشك فبيت أهلك الطراروه ووووألا ياراجع ..
رمى برصاصته المدويه عليها .. والكل مفجــوع من هالكلام اللي قاعدين يسمعونه ..
حنان وصيته تغارقت دموعهم ..أما سلمان طلع بنفس مانزل من ذهول لغرفته ..
حنان حبيبة أمها ماقدرت تتحمل الموقف ..أول مره تشوف امها تنهان قدامها وهي ساكته ومافيدها حيله ..فطلعت غرفتها وهي تتحلطم على أبوها وتدعي عليه ..
أما صيته الحنون جلست مع امها تحت .. حاولت تستشف من وجهها أي تعبير لكن أي تعبير بتقدر تاخده من هذا التغطرس والخيلاء ..
صيته : يمه..
حسناء : شوفي صيته مانيب ناقصتٍ نصايحك وبلاويك .. فلو سمحتي إنقلعي مني لاأطلع حرتي فيك ..
صيته : يمه بس أبي أقول لك .. ليش ماتخليني أروح لبيت عمي عبدالله وأستسمح منهم عشان أبوي يرضى عليك ..
حسناء : مــالت عليك وعليهم .. مع الطير زعلهم كلــهم ..عنهم مارضوا قالولك مهتمه يعني !!.. وأبوك ماعليك منه دواه عندي .. قال أيـش .. بيحرمني من كل شي .. هو يقدر أصلا
يتخلى عني !! ..
صيته : يمـــه تكفين خليني أروحلهم .. عمري ماشفتهم ولاعرفتهم إلا بالأسامي .. أعوذ بالله وش ذالقطاعه عااد ..
حسناء: أقول صيته ضفي وجهك ولاترى والله لاتشوفين شي عمرك ماشفتيه ..
\
:
بعد ماجا من الجامعه كلم أخته تجيبله غداه في مجلس الرجال الداخلي .. وبينه وبين نفسه مقرر يفتح معاها الموضوع ويستشيرها .. وماخذا هذا القرار إلا بعد مداولات كثيره .. مهره أكثر
وحده متعلقه فيه ومب بالسهوله يقدر يقنعها باللي يبي .. أما حياة بتقتنع على طول
مدام هي عارفه إن هذا فيه مصلحته أولا وأخيراً .. بالرغم من حبــها الأمومي له ..
لكن عمرها ماكانت توقف حجر عثره في طريق أي واحد منهم ..
حدودها الحمراء .. طيع ربك وصلي فرضك .. والباقي سوي اللي تبي ..
جلس على الكنب والأفكار توديه وتجيبه .. بعد ماإستخار حس براحه كبيره للموضوع ..
ومن قبل،، الموضوع جاه كذا من ربه .. تســـاهيل على أحلى مايكون ..
دخلت عليه مهره بصينية الغدا وقعدتها على الأرض بإبتسامه حنــونه ..
وقالت : السلام عليكــم سلطاني ..
سلطان " وهو يجلس قدام الصينيه": مرحبا عليكم السلام .. كيفك يالدبه .. حشا كل يوم تبطبطين اكثر من قبل .. أشك ..أشك إن وزنك وصل للميتين ألحين !!..
مهره " بشهقــه ": مــرض !! ..حرام عليك ميتين مره وحده !!..حشا لو اني فيل عاد،،والله وزني 50ماتغير قدله سنيــن ومنيــن ..
سلطان يبدا أكله بشراهه ولاهب يمها ..
مهره : الله أعلم من اللي متبطبط!! .. " وتطالعه كنها مذهوله"..لحـــول شوي شوي على العيشه .. لو إنها بتشتكي كان إشتكت .. حشا كن قدلك سنه ماكلت ..
سلطان : شوفوا ذلحين بتعيفني عيشتي .. قولي مشاء الله يابنت الحلال ترى قد راس مالي صحتي ..
مهره : ههههه مشاء الله ..مشاء الله .. أقول سلطان ..تبي شي ..أبي أروح انام معاد فيني عـ الجلسه ..
سلطان : إيه مهور اصبري شوي ..أبيك فموضوع ضروري .. اجلسي لين أخلص غداي ..
مهره " وهي تقفي": يـــابوك ياااه !!.. لاوالله لو إنك بتموت ماجلست .. موضوعك يتأجل حبيبي .. بنام وبصحى وانت توك ما خلصت غداك ..
طلعت مهره .. وتركت وراها دوامة من القلق ،،
\
:
فملحقهم منسدح على فراشه ..مشغل المكيف على بروده عاليه بالرغم من برودة الجو اللطيفه ..كأن صوت المكيف بيقضي على الضجه اللي بداخله .. أو برودته بتخفف حرارة البراكين الي تغلي بداخله ..
من إنسدح وهو يتقلب يمين ويسار ،، والأفكار توديه شمال وجنوب ..
" ياالله وش صاير ،، ليه أبوي ماقالي ،، أسأله ؟ لالا أكيد بيصرفني مدامه ماقالي من الأساس ،، ويمكن الموضوع خاص ويبي يحله بطرقته ..أرسل غاليه لها ،، طيب منهي فيهم حياة ولا مهره !! .. بس أتوقع حياة لأنها دايم فمشاكل مع مرته .. عسا بس ماتبلوها بشي !!طيب اخوانها يدرون باللي صاير ؟ ماظنيت ..بندر مايخبي علي شي .. لحـــول يانايف وانت وش دخلك!! .. السالفه شكلها منتهيه أو قدها بتنتهي وشوله تبي تنقب،،لكن والله ليعلمني الطير إنهم بس يفكرون يضرونهم في شرفهم إن مايردهم مني إلا المقابر "
وهكذا كان تصارع نايف مع أفكاره ،، ترميه لجهتهم ،، وتأخذه لهم ،، وتغدي به منهم ،،
هذا هو نايف متولع بعيـال عمه حد الـموت ،، يحبهم حد الثماله ،، يعشقهم حد الوجد ،،
عمره ماتخيل حياته بعيد عنهم أو فـ مكان مايكونون فيه هم ..
ورث حبهم عن أبوه ،، وعشقهم من عطفه ،، وتولع فيهم من عمق مسؤليته تجاههم ،،
فكانت قيلولته بسببهم ملــيئه بالحمى البارده ،، والإنفلونزا الحـاره ،،
\
:
" بعــد العصر"
\
:
طق الباب على أخته يبي يصحيها لصلاة العصر .. لكن ماردت .. وطق مره ثانيه ونفس
الحاله .. وبعد محاولات من الطق اللي كادت أن تبوء بالفشل فتحت صيته يعلوها " نــوم"
وقفت وتركت الباب مفتوح
وقالت " وهي توجه يم السرير تبي تكمل النومه" : حياك سعيد ادخل ..
سعيد: هههههه احلفي !! .. بدخل اجل بنتظرك لين تدخليني ؟؟ .." ويشوفها وهي تحط راسها
وتلحف "..هـــيه قومي صلي الناس طالعين من الصلاة وانت تبين تكملين نومتك !..
صيته : يــوه سعيد الله يخليك خلني خمس دقايق بس ..
سعيد : ويعني هالخمس دقايق بترقدين فيها .. ياشيخه قومي النوم ملحوق عليه لكن صلاتك
بتفوتك ..
صيته" بدلع" : سعــيد والله مانمت .. توني حاطه راسي ،، من نزلت عند أمي توني طالعه ..
سعيد : إلا صدق وشوله كل هالرجه ؟!! ولاأقول قومي صلي بعدين تعالي قوليلي انا جالسلك هنا ..
وقامت تصلي ..وبعد فتره تقارب عمر العشر دقايق جات تجلس معاه ..
قال : هــاه طار النوم ؟؟
صيته : لاوالله ماطار .." وتفتح عيونها بيدينها" .. شفه يناقز مناقز ..
سعيد : هههههه .. هااه قوليلي شصاير؟؟
صيته : أبد ياطويل العمر والسلامه ،، امي مسويه سالفه مع حياة بنت عمي عبدالرحمن
وشكل السالفه كــايده لأن أبوي يقول جايه عمي عبدالله الشركه اليوم يبي أمي تكف شرها ..
سعيد " وذهــول مظلم ": باالله عليك .. عمي عبدالله جااه!!!
صيته : قسم بالله هذا اللي يقوله أبوي ..
سعيد : ياالله .. شف الدنيا ،، فارقه عشانهم ،، وإجتمع به عشانهم ،، الله عليك يابو نايف
طول عمرك وانت راعي الأوله .. ياخساره ليتني كنت هناك عشان أشوفه ،أكيد الدنيا لطمت به ،، أكيد لحيته كساها الشيب ،، أ..
صيته : على بــاله !!.. اللي يشوفك تكلم عنه يقول كنك تعرفه .. ترى آخر
عهدنا بهم كنا بزران .. أنا شخصيا ماعرف شكل ولاواحد منهم ،،حتى جدتي الله يحفظها كلــش ماحْيَتهٌم الذاكره !!.
سعيد : هذا أنتي حبيبتي .. صح العيال أكيد كبروا ألحين ومستحيــل أعرفهم ..
لكن عمي وجدتي مستحيــل يروحون من بالي .. ترى يوم راحوا منا
كان عمري في الـ 13يعني ماعلي ماكنت صغير ..المهم،، طيب أنتي ماتعرفين
وش السالفه اللي سوتها أمك " الطيبه" ؟؟!!
صيته "بأسى": ااممم للأسف ماأعرفها ،، كانت بتقولها لي هذاك اليوم ،،
لكن أنا بغبائي صرفتها ماكنت أدري إنها مسويه بلوه ! لكن حنان تعرف
لأنها طرف في الموضوع على حد علمي ..
سعيد " بنفس الأسى": لحـــول وذالبنت مالها شغل ،، ماغير هياته وتطييح في خلق
الله ،، لكن ماعليه أنا أعرفلها .. لكن وقسم بالله لاتكون السالفه مثل ماأنا متوقعها
ليجيها شي مامر على بالها ..
صيته : الله يعينها حياة ،، حظها الردي جابها عندهم في نفس المدرسه ..
سعيد " باااااهه" : حياة .. يجيها اللدغ من أقرب الناس لي ،، الله يقدرني
ويقويني وأرجع لهم كل شيء ..
صيته : ياعيـــني ،، عاد حب الطفوله من يقدر يقول شي !!
سعيد " يقوم يبي يطلع ":أقول صيته مساك الله بالخير ..
صيته : ههههههههه حليله إستحى ،،
سعيد " وهو عند الباب ": هيهيهي شفتي خدودي شلون حمرت ..
\
:
بعد مانزل زوجها ،، فتحت الستائر لتفّرج عن أنحاء الغرفه ،، ثم فتحت الشبابيك
لتمنحها حرية أكثر ،، وبدت في ترتيب الغرفه بهدوء ،، نفس الروتين كل يوم،،
حيـاتها كلها على رتم واحد ،، وتمشي على وتيره وحده وعلى الموجه نفسها،،
تسلسل معروف للأحداث إلا مادخل في المجهول ،، دايما تمنع أي فكره توحي لها بتقصيرها أو عجزها من سد حاجاته العاطفيه أو توفير الأمن العاطفي أو الإكتفاء العاطفي لقلبه وروحه وجميع أجزاءه ..
قطع عليها ترتيبها " الخـاوي" صوت نغمة جوالها .. راحت يمه ..وشافت الرقم غريب،،
مو من عادتها ترد على أرقام غريبه .. حطته على السايلنت ورجعته مكانه ،، لكنه واصل
الدق لأكثر من خمس مرات !! .. وفي المره السادسه رفعت التلفون تبي ترد !..
\
:
يتبع

[جرح الذات]

"
مثل ماوعدت بنزل قبل الجزء برنت بأسماء الشخصيات بما إنه إكتمل ظهورهم

"

\
:
"عائلة عبدالله"

أم عبدالله/ أمــه

أم نايف " مزنه"/ زوجته

نايف ، غاليه / عياله "25،29"

بندر ، حياة ، مهره ، سلطان / عيال أخوه عبدالرحمن "20،21،27،29"

":":":":":":":":":":":":":"

" عائلة سالم "

حسناء / زوجته

سعيد ، سلمان ، صيته ، حنان / عياله "18،21،27،27"

":":":":":":":":":":":":"

" عائلة سميره "

فهاد / زوجها

سلمى / أخت زوجها "21"

أم راشد / أمها

راشد / أخوها

محمد / ولد أخوها " 18"

":":":":":":":":":":":":":":

نـــوره / صديقة حنان "18"

\
:
"

[جرح الذات]

\
:
" تبكي يفتتها الألم،، تئن يؤلمها الوجع ،،
تغادر ملئى بالضجر ،،
ترحل إلى العدم ،،
وتسافر إلى الإنكســار
ثم ترجع حيـــث كانت،، تلفها الأقنعه !!"
\
/
# الجزء السادس#
\
:
" هـــاه حمــاده وش رايك ؟؟"
محمد: والله ياعمه مانبي نكلف عليـك ..
سميره : وش تكلفون أنت ووجهك ،، قد الراتب طاير طاير ,, فيروح فيكم
ولا في بطنه ..
محمد : لا ياعــمه لازم أشاور أبوي ،، أخاف يزعل علي ..
سميره : الله يرحم والديك يامحمد لاتكبر الموضوع .. بالعكس أبوك
بيستانس عشان لاجيتو تزورونه تلقون لكم أحد يوديكم ويجيبكم على طول،،أحسن
من نطلة وجيهنا كل يوم والثاني على نايف ولابندر وأخوه ..
محمد : امممم كلامك منطقي .. لكن والله ماابي أكلف عليك .. بنصبر ذالشهرين
لين أتخرج من الثانوي وأشتغل إن شاء الله وبعدها يحلها الحلال .. ومهب من كثر
مشاويرنا فديت قلبك ..
سميره : سبحان الله!! كني أسمع كلام راشد .. نفس الإقناع ونفس الإسلوب
حتى طريقة الكلام .. صدقوا يوم قالوا كل أرض تعطي بذرها .. عسى
الله يكملك بعقلك حبيبي .. ويخليك لأبوك ولنا كلنا ..
محمد " بتنهيده من ورا الأسلاك ": آمــين يارب .. الله يجزاك بالجنه ..
وأبشرك واحد من المدرسين اللي يدرسوني مواعدني بشغله محترمه فالصيف،،
يقولي تدخل ذهب،، سألته وشي لكن رفض يقولي يخاف تشغلني
عن دراستي ،، عاد ناوي إن شاء الله إذا كانه صادق أول راتب بستلمه
أجيب به محامي لأبوي ..
سميره " شعور جميــل تشعر فيه وهي تسمع كلامه" : الله ينورلك طريقك
حبيبي .. أهم شي ألحين لاتشغلك ذاالأشياء .. تراك ثانويه عامه
ومابقى شي على النهايه .. يعني شد حيلك وبيض وجيهنا ..
محمد : أبشري بسعدك ياام الدوني .. لكن لاتحرمينا من دعواتك ..
\
:
بعد ماخلصوا الناس من صلاة المغرب ،، بين من صلى وقلبه عند الله ..
وبين من صلى وقلبه فالدنيا ومشاغلها ..
فبيت عبدالله وبالتحديد فنفس المجلس اللي تغدا فيه سلطان ..
جالس فيه سلطان وأخوه بندر .. كلم حياةعلى أساس تجي لهم ولاتقول لمهره
إنهم مجتمعين .. قال كذا بعد ماشار عليه بندر إنه يخلي حياة تفتح معها الموضوع،،
تفادياً لكثرة الهم اللي بيركبه لشاف وقع الخبر عليها من جهه ..ومن جهه ثانيه
حياة أقرب لنفسها من أي شي كان ..
دقايق إلا حياة جايتهم .. إبتسمت بنفس الإبتسامه المشرقه ..
وقالت : الســـلام عليكم ..
ثنينهم : عليــكم السلام والرحمه ..
بندر " يشر لها تجي جنبه ": ياالله حي الحيــاه ،،
حياة : يــاقبلــة الله .. تصدق ماحبيت إسمي إلا منك .. أدمنته تخيل .. معاد أكتب
إسمي إلا الحيــاه بنت عبدالرحمن .. يــاااي إسمي فنــان ..
سلطان : ياخطـــيره أنتي ،، ياالحيــاااه ،،
بندر" يشوفه بطرف عين " : وعععع يجيب المرض من فمك ،، إسكت لاتروع البنت
وتكره إسمها ،،
سلطان : أقول لايكثر طال عمرك ،، أنجز وقل ماعندك
بندر : أحلـــى يتأمر!! ،، على كيــفي بتكلم متى ماأبي ،، لاتحدني أقوم واخليك لحالك ،،
وحياة مكتفيه بضحكه فتــانه مع النجوم الي تلمع فعيونها بحنــان وحب ،،
بندر " بجديه": إسمعي ياطويلة العمر ،، العلم والله مابه إلا سلامتك ..
سلطان بيسافر ويبي الشور منك ،، هو قالي وأنا قلت توكل على الله .. مستقبلك
مب حايلينك من دونه .. إلا هو صمم ياخذ شوركم كلكم ..
حياة " ببعباطه ": طيب يسافر أحد راده .. هذا هو لسافر مايردلنا العلم ..بس وشو مستقبله يعني يبي ياخذ دوره ولاشي ؟!!!
سلطان : لاحبيبتي .. مب دوره .. أنا بروح أدرس برا دراسه .. يعني أربع
سنين .. خمس سنين وحولها ..
حياة" بضحكة المتفاجيء،،وعبرة الأم": سلطان تقوله صادق ولامن حركاتك ؟؟!!
سلطان : هههه لايابنت الحلال والله إني أقوله صادق ..
حياة " تتمالك نفسها ": وتخلينا لحـالنا !! ،، وتوحد أخوك !!
بندر : حياة عيوني وش يخليكم لحالكم .. وأنا مب مالي عينك .. والوحده مابه
وحده البيت عامر ياقلبي .. ياشيخه خليه يروح يشوف حــاله ،، مب باقيله غير
شهادته ،، والله لاأنا نافعه ولاانتي مب نافعه غير نفسه بعد رب العالمين ..
حياة " بذهول غريب": أنت صادق ،، لـكن أنت مقتنع ياسلطان ؟؟
سلطان : لو مب مقتنع ماعرضت الموضوع عليكم ..
حياة : حبيبي ترى مب المراد يوم ولايومين ،،ولاشهر ولاشهرين ،، ترى ذي سنين!!
بندر: ماعليك أنا ضامنه لك ،، أخوك ذيب وحطيه على يمناك ..
سلطان : وإن ماقدرت أتحمل قطعت البعثه وجيت .. الأمر سهل وانا أخوك والرب كريم ..
حياة : يعني بتروح على حساب الحكومه ؟؟
سلطان : أيــه وهذي بعثات خاصه بيتكفلون بي من إلى ..
حياة : طيب ودراستك هنا .. أنت ماباقيلك إلا سنه .. حرام تفوتها عليك ..
سلطان : ماعليه بأجلها وبقدم إعتذار ،، الدراسه هنا تصبر لكن هالبعثه ماجات إلا بطلعة
الروح ..
بندر: ومانقص منك ترى أنا سداد وانا اخوك ..
سلطان : ماتقصر يابو عبدالرحمن .. رايتك بيضاء ..
حياة : وعمي عبدالله خذيتوا رايه ..
سلطان : اليــوم إن شاء الله بقوله قبل مايمسي .. مع إني داري إنه مب مخالف
وإن زادني ولا مب منقصني ،، لكن أبوي ولازم الراي يرجع له ..
حياة " بقلب يعتصره الألم": خلاص عيوني ،، دامك مرتب أمورك ،، ومقتنع خلاص توكل
على الله .. وإستخير ربك بعد .. وجعل إن كان فيها خير لك في دينك ودنياك الله يسهلها
عليك وإن كان فيها شر لك في دينك ودنياك الله يكفها عنك ..
سلطان : آميـــن ،، بس حياة باقي شي واحد .. مهره ،، والله إني شايلٍ همها بشكل
ماتتصورينه .. أبيك تفهمينها على الوضع ..وإن هذا مستقبلي .. وهالدنيا أخذ وعطا و......
بندر " بفرفشه تغير الجو": لحــول بيعطيها محاظره في الصبر ألحين .. خلاص هي عارفه
وش تقول لاتقعد تقرق على راسها ..
سلطان : يــاخي أنت تطلبني شي !! ،، ماكلٍ حلال أبوك أنا !!
وتقوم حيــاة فوسط هالأجواء المختلطه بين التفاؤل ومحاولة التفاؤل ،،
وموجات السكون تعلوها بشكل أكبر ..
\
:
" يلعن إبليسه يامهــور،، قسم بالله كوش علي جلدي من كلامه،،
الحقير ،، اعنبوه ماعنده خوات يخاف يسوى فيهم مثله "
مهره : حبيــلك ياغوالي ،، هالأشكال ماهمهم غير اللعب مع بنات الناس
وعلى قولتهم تسليه وتضييع وقت ،، مادروا إن هذا الوقت بيحاسبون عليه
ثانيه ثانيه ..
غاليه : تصدقين حتى يوم قفلت فوجهه رجع يكلم كم مره .. والله إني خفت
ليجي بندر ويشوف الرقم .. وتصير سالفه ..
مهره : أنا من رايي تقولين له ،، أحسن لك .. إفرضي دق وهو جالس عندك
وش بتسوين ؟؟.. خليه يكلمه ويأدبه عشان يدري ان وراك رجال !!
غاليه : لاااااا مستحيــل .. أجل مابعد عرفتي أخوك !! .. مره صار موقف
زي كذا وقلتله .. قعد يهاوشني وسوالي سالفه .. يقول أنتي اللي ليه تردين
على أرقام غريبه ماتعرفينها ..
مهره : مب حل .. طيب فرضا المتصل أحد يعرفك لكن ماتوفر عنده تلفونه هذا الوقت،،
كان مفصول .. خربان .. أي شي ،، يقعد ماتردين عليه عشانه يتصل من رقم غريب ..
غاليه : يرسل مسج يامال العافيه ..
مهره : كان إمتلى التفون مسجات .. الحل الوحيد إن الشباب يتغيرون ويحترمون أنفسهم ..
غاليه : ههههههههههههههه أحــلـــى ،، ومن بغيرهم أنتي طال عمرك !! ،، أبشرك
ألحين البنات هم اللي يسعون لهم .. الزمن تغير يامهور والدنيا صارت تخوف ..
مهره : أقـــول غاليه .. تراك نفختي راسي بذاالحكي .. تبين تقولين لرجلك
قوليله .. ماتبين بكيــفك بس على الله يوقف عند حد !! ..
غاليه : أولاً الشرهه مب عليك .. ثانياً إن شاء الله معادهب مكلم ،، ثالثاً إنقلعي
من غرفتي عشان ألحين موعد بندر بيجيني ،،
مهره : رابعاً مانيــب ميتتن عليك أنتي ووجهك ،، خامساً قومي والله إن تنزلين معي
تعبتوا من ذا المواعيد الغراميه ..
غاليه : يكون فمعلوميتك فقط مابينا مواعيد غراميه وهبال بزران !! ،، ويكون فمعلوميتك
الثانيه لذلحين وانا مزاعلته بس يجييني شور ويروح إني أسامحه .. " وحركه مقصوده للإستفزاز" لكن شكلي بسامحه بكره بيروح البر وأخاف معاد يرجع لي .. خله يموت وهو راضي عني ..
مهره : عمــى يعميك يالكلبه .. روحك قبل روحه إن شاء الله ..
غاليه " وهي تقفي بتطلع من الغرفه ": بس عشانك اخته روحك قبل أرواحنا أنا وياه ..وبقوله إني كنت أنتظرك عشان أسمحك لكن مهره حلفت علي إلا أنزل " وتلف لها وتحرك حواجبها فوق وتحت وتركض بهبال وكنها عارفه وش بيجيها"..
\
:
فـ كوفي ديي جالس هو وياه على أحد الطاولات الخارجيه .. مستظلين بالسمــاء وتهفهف
عليهم نســمات الهوا الرقيقه وفيها اللطيف من البروده ..
مطلعين جوالاتهم على الطاوله .. وأكواب الإكسبريسو بجنبها وصحن كيكة التوفي بدوره
متخذ له مكان وكأنهم يتشــاكون!! ..
كان يقوله على اللي صار اليوم فبيتهم .. والسالفه اللي سواها أبوه عشان بنت عمه ..
ووش كثر تعجبوا من الهاله اللي سواها عشانها .. وهو اللي قدله سنين ماعرفلهم دار..
دق جوال فهاد ومن شاف الرقم حطه على السايلنت ،، ودق مره ثانيه وعطاه بيزي..
عرف سلمان إنها مرته .. اشفق على حالها اللي ماتغير مثل كل يوم .. تطنيــش أبرد
من الثلج عند زوجها ولاهامته الدنيا باللي فيها ..
فقال : ياخي تراك زودتها .. كل يوم على ذاالحال مامليت!! ،،
فهاد : أقـول سلمان مب ناقص هروجك ,, خلك فحالك الله يرحم والديك ..
سلمان: يافهاد ترى المره إن صبرت عليك اليوم مب صابره عليك بكره .. والله لوإنها مب بنت
أصول والله ماتحملتك لذلحين ،، ولا من اللي بيصبر على بلاويك .. تصبحها بشر
وتمسيها بشر !!،،
فهاد : هههههههه ,, قطعت مصاريني .. أصلاً تحمد ربها إني مخليها عندي لذلحين
ولامن بيخلي عنده مره اخوها مسجون وراعي بلاوي الله يكافينا !!
سلمان : ههههههه لا في هذي انت اللي ضحكتني .. تلعب على مين يابابا ،، ألحين
أخوها راعي البلاوي .. هاااه كني ماعرف البير وغطاه يافهيد !!
فهاد " يصرف الموضوع بعد ماتلون وجهه بألوان قاتمه": سلمان خلني وأهلي فحالنا الله يرحم حالك ،،وبعدين تعال ماعلمتك ترى حجزت فالفندق بالقاهره يومين وبالغردقه ثلاث أيام وشرم الشيخ يومين بعد .. حجزت لي أنا وانت وباقي الربع يصرفون نفسهم ،، عجزت منهم
كل شي على راسي ..
سلمان : أنت اللي جايبه لنفسك ،، على بالك مسوي عضلات وراعي فزعات وأنا اللي
بتكفل بكل شي ومدري وشو ،،
فهاد : يارجال نبي نتجمل فيهم بس عجزنا وإنا نتجمل فناس مايعرفونك إلا وقت المصلحه..
سلمان: ههههه يابن الحلال أول كلام غير ده ،، ماتجملت فأهلك عشان تجمل
فرجاجيل ماتعرفهم إلا من يومين ،، إلا قول أكيد خلصت مصلحتك عندهم وخلصوا معها ..
فهاد "بلا إهتمام": إلا علمني شخبار الأسهم ،، يجيني شور أرجعلها مره ثانيه،،
سلمان : والله ياخوك السوق طــاير فالعلالي ،، يعني اللي يبي يبيع يبيع ذاالأيام ..
تكسب ذهب .. تعرف وش يعني ذهب !!،، تخيل فيه شركات قبل 5شهور بس 750وحولها
ألحين صكت 1500 ،، ياخوي شاب نار!!
فهاد : الله كريم ،، أجل بتوكل على الله وبدخلها .. كون الله يرزقنا !!
سلمان : حليــلك !! ومن وين بتجيب الدراهم وانت لاشغل ولامشغله واللي كنت مجمعه
ذهب مع الريح !!؟
فهاد: الله يسلم المره ،، بخليها تاخذ قرض على راتبها ،، ليه راتب على الفاضي !!
،،كون يجي منها نفع ولافايده ،، وهي مغير وظيفتها التحلطام والتشكاي الله يفرج لي
منها ،،
\
:
يتحركون مثل النحل ،، يشتغلون بحماس كبر الكون ،، ويناظرون بعض بنشوةالإنتصار..
فرحه تغمرهم ،، في هالمكان حسوا نفسهم مختلفين بالرغم من خوفهم الباطني
من أي كلمه ممكن تدمي كرامتهم أو تجرح رجولتهم ،،
سعيد وفيصل لابسين الزي حق الكوفي الأبيض مع الزيتي ،، وحاطين الكب على روسهم
بأناقه،، وسامه تعلوهم ،، ووجيه صبوحه مبتسمه تبعث الراحه فوجه كل من شافهم ..
ثاني يوم لهم فالشغل ولأليحن أمورهم ماشيه تمام .. لامضايقات ،، لامشاحنات ،،
لامشــاكل..
" مســـاك الله بالخير أخوي"
قالها زبون لـ سعيد اللي يحط الكريم على الميكاتو..
سعيد " بإبتسامه منشرحه": مسيت بالنور والسرور ،،
الزبون: ياالله حيه ،، شلونك أربك بخير ..
سعيد : بخير يامال الخير.. هااه وش تامرني طال عمرك ..
الزبون: مايامر عليك عدو.."ويعطيه اللسته"..نبي الله لايهينك ثنين هوت كراميل .. وكيكتين فراوله ..
سعيد : أبشر بسعدك .. ثواني ويكونون جاهزين..
وبعد ثواني كان الطلب جاهز للزبون فصينيه ،، قده بياخذها ويروح إلا قال : أنت جديد ؟؟
سعيد: لبيه ؟؟
الزبون: أقول أنت توك جديد هنا .. أول مره أشوفك أنت وذاك الرجال" ويشر على فيصل"..
أنا عميل دايم هنا لكن أول مره أشوفكم ..
سعيد: إيه طال عمرك هذاك خويي تونا متعينين أمس ..
الزبون : يامــال العافيه اللي تدخل حيولكم .. والله إنا مانجي أنا وعيال عمي هنا إلا عشانكم .. نحب ذالكوفي عشان كله سعوديين .. شوفتكم ترد الروح إيه ورب الكون ماقوله كاذب ..
سعيد " بفرحه لكلام كان محتاجه فهالوقت": الله يرضى عليك .. هذا من طيب أصلك
الله يحييك حياةٍ طيبه ..
الزبون " خلاص يبي يروح": الله يوفقكم ياخوك ويفتحها فوجهيكم ..
\
:
حنان:باالله عليك نوني مو حرام اللي تسوينه فيني
نوره " بإهتمام مصطنع من ورا السماعه": ليه حبيبي وش سويــت ،، ترا ماتهونين علي ..
حنان: أشوفك اليوم تمشين اليوم مع هذيك الخايسه ،، لاوبعد عطتك ورده الله ياخذها..
يعني ماتدرين إني ماأدانيها ..
نوره : طيب وش أسوي ياعمري هي نادتني وإستحيت أردها ..
حنان : لابليز لاتستحين .. مثل ماأنتي ماتبيني أمشي مع أحد غيرك .. أنا بعد أغار عليك
وماأبيك تماشين غيري .. أوحتى تناظرين احد غيري ..
نوره " بنفاق": أمـــوت فيك.. الله لايحرمني من حبك ..
حنان" بدلع وحيا على غير سنع": ههههههه روحي قبل روحك..
نوره" بحيله": تدرين حنون اليوم رحت انا وخوي لجرير أبي أشتريلي لاب توب
ولقيت أسعارها نـــار.. " وتمثل الضيقه" .. وقالي أخوي طلعنا طلعنا مناب من أهلها ..
عاد تضايقت بالحيل كان ودي بواحد .. ياخســاره ..
حنان : ماعاش من ردها في خاطر النوري .. والله ماتمسين بكره إلا وهو عندك ..
نوره " بدور الكرامه": لاااااا حراام عليك .. ماقلته عشان تجيبينه .. بس أشكيلك وأطلعلك اللي فخاطري،،حرام عليك حنون ماله داعي تكلفين على عمرك ..
حنان: أفااااا عليك .. كم نوري عندنا .. مافيه إلا وحده وتسوى الدنيا ومافيها ..بس لجا بكره تفاهمنا على الشركه اللي تبينها وناخذ الأفضل .. أوكيه ..
نوره : ياعمري أنتي .. الله يخليك لي ولايحرمني منك ..
\
:
" قبل مايسكن كل شي إلا الأنفاس
،، فـ بيت عبدالله"
\
:
"
صباحك حب
صباحك كان أحَّب
صباحك فتنه
صباحك كان أفتن
اممممم كان
وكنت
وستكون
في خبر كان ..
أتساءل لماذا اشتهرت هذه التسميه بالذات !!
ولمَ لم يقولوا في إسم كان أو في كان نفسها ..
تحمل نفس المعنى أليس كذلك ..
ربما لأن الخبر منصوب!! ..
أولأنك نٌصبت على اللاشي
أو لأنك تكونت من النصب ..امممم ربما !..
ماذا؟؟ ماذا تقول ؟؟
كأنني سمعتك تضحك ،، وووتحسبني ثمله !!
واااااو يحسبني أهذي !!
هههههه أهذي ،، يهذي ،، هذيان ....... الخ الخ الخ
الخ مختصر إلى آخره ،، سبع كلمات اختصروها في ثلاث ،،
ياالهي كم يحبون الإختصار في كـــل شي ،،
اممم تصدق حتى أنا إنتقلت إلي العدوى
وعشقت الإختصار
تعرف مشاعري تلك ؟؟!!
لالا ليست تلك التي تعرفها ،، الحب والجوا والـ... أتحامل على سذاجتها ،،
المهم ،، مشاعري هذه جميــــعها أختصرتها أيضاً في ثلاث
كلمات / كره كره كره ........ كره كره كره ......... الخ"
تركت مهره القلم .. ورجعت تقرا الخربشه الثمله حقاً ،، إبتسمت لسكرها
وقطعت الورقه وأحكمت قبضتها ،، وبرميه صائبه جات فالزباله .. وفخاطرها
تقول " هـاااه وش في راسك بعد أنتي جيتي فخبر كان!! ،،صدق سكرانه ،، أقوم أنام لتجي الثماله فشيٍ أكبر"
سكرت الدفتر بعد ماضم القلم بين أركانه .. وحطته فالدرج ،، بيته ،، وراحته،،
هدوءه وسكونه ،، يضم كلماتها وحروفها ووقلبها ويروح بها داخل بعيـــد،،حيث السلام والأمان ،، يمدها بالعطف والحنان ،، يخمد براكينها ،، يخفف زلازلها ،،
ويركد أمواجها ،، تعطش يرويها ،، وتحزن يواسيها ،، تشكيله ويسمعها ،،
بيرها الغـــويط ،، وسرها المدفون ،، يحتويها أكثر ويضمها أكثر ..
قامت مهره تبي تطفي الأنوار عشان تنام إلا دخلت عليها حياة ..
وبإبتسامه حنونه قالت : مابعد نمتي ؟؟
مهره : إلا أنا نايمه ألحين .. أكلمك من الحلم ..!!
حياة: هيهيهيهي خارج نطاق الحياه يعني،، تخيلي لو يصير صدق .. تكونين في الحلم
وتكلميني أنا في الواقع ،، وتكونين عايشه حياه انتي نسجتيها لاهموم ولاعنا وكل شي
على كيفك .. اممم شلون أقولك ،، مهور فاهمتني ؟؟
مهره " عاجزه من مجاراتها": إيه إيه فاهمتك ..
حياة: داريه إن مافي راسك ،، " وتجلس على الكنبه ".. تعالي إجلسي أبيك
فسالفه ..
مهره "تتثاوب": يــوه ياحياة أبي أنـــااااام مافيني من سمع ..
حياة: لاحبيبتي لازم أقولك السالفه أبي أرتاح .. تحملي شوي ،، خمس دقايق مب ضارتك ..
مهره " تفرك عيونها": الله يعيني عليك قولي الله لايشغلنا إلا بطاعته ..
\
:
" علي ذاك اليمين إن مايبتعه ولايشبر شبر برا الرياض "
- يابنت الحلال لاتوقفين فوجه الرجال خليه يشوف حاله منتب دايمتله ..
" ياعبدالله تلعب علي ولاتلعب على نفسك ،، وين بيصرف منه.. من حلال أبوه !!
ولا من نخلك !! "
عبدالله : يايمه الله يجزاك بالجنه الولد بيروح محفول مكفول مب صارفين عليه شي ..
أم عبدالله: يارجال قول كلام يدخل العقل .. ولد بنت خالي مرسلينه لذيك الديره ،،
تقول نرسل له 20000كل شهر ،، وين بتجيب 20000منه ،، إلا يقضب أرضه
والله متكفل برزقه .. ويكمل دراسته هنا .. وش يفرقها عن هناك .. ولا عشانه بيلبس
البانطلون وبيفصخ الغتره بتصير غير ،، إلا خله بين حيه وفيه ،،
عبدالله : ياميمتي لاتحطمينه ،، والفلوس بنسنعها جعلني فداك ،
أم عبدالله : يامك الفلوس إن تسنعت اليوم مهب متسنعةٍ الصبح ،، وتبيها
صريحه مانيب مخليةٍ وليدي تكويه الغربه .. وين قلبي اللي بيخليه يعيش
بعيد عني .. أنت وش بلاك !! نسيت كلام أبوهم أجل !!
عبدالله : لا فديتك مانسيته قدام عيوني ليل مع نهار ،،لكن سلطان رجال وماينخاف عليه .. الله يرحم والديك لاتوقفين في طريقه ،،إذا قالك شي قولي الله يستر عليك .. تراك إن عييتي
والله مايروح .. إن يدوس على مستقبله وحياته كلها عشانك ..
أم عبدالله : لا بالله مانيب قايلتٍ الله يستر عليك ،، إلا بقول ترى موتي روحتك،،
أكذب عليك !! .. وجاك العلم لاتقعد تمنيه وتشجعه ترى روحته بروحي ..وإسمع الحكي
\
:
"صباح بنفسجي يميل للإغمقاق"
\
:
كأنها واقفه على جمر .. ماصدقت يخلص الطابور عشان تناديها فغرفتها ..
راحت لها حياة على وجهها ماتدري وش الدنيا عليه ،، دخلت عليها بكل ثقه
وخطواتها متفقه معاها ،، وقفت قدام مكتبها بسلاسه وقالت : سمي ابله حسناء
طالبتني ؟؟
سفهتها حسناء اللي كانت تمثل دور المشغوله في كلاسيرات قدامها ،،
حياة " بحــلم كنه حلم عمها ": أبله حسناء الله يعافيك كانك تبين شي ولاترى عندي حصه .
حسناء " ترمقها بنظره أحقرمنها": ياحياتي ياحياة مسرع ورحتي تشكين لعمك ياعمري،،
رايحه تبكين عنده حبيبي ،، مو قلنالك مايبكي إلا البزران!! ،، كم مره وانا أعلمك عجزت وأنا
أربيك !!
حياة "تستجدي القوه": تربيني !! ،، يــاحليـــلك !!
حسناء" بعصبيه": يــاحليلي!! تمونين حظرتك،، حبيبتي لاتنسين من قاعده تكلمين ،،
واسمعي يابنت عبدالرحمن وقسم بالله لاأدري إنك متشكيه لعبدالله مره ثانيه وانه رايح
لسالم مره ثانيه قسم باالله لتكون نهايتك على إيدي ،، هالمره مارح أفضحك وبسكر على الموضوع .. لكن المره الجايه الله يعينك .. حطي الكفن تحت سريرك من الحين ..
حياة " بذهول تحاول تخفيه،،وبصلابه تحاول تظهرها": لاحـــول كفن مره وحده !!
امممم الكفن جاهز على كل حال ،، الموت بيزورنا في أي وقت .. لكن أهم شي
يجينا وإنا مستعدين له أحسن من إنه يجينا على غفلةٍ منا .." وتقفي" وووأتمنى تكونين
مستعده ..
وتطلع بسرعه قبل ماتزيد إنفاجارات حسناء اللي إنربط لسانها من كلام حياة ،،
الموت ،، الله أعلم قد فكرت فيه أو قد مر في بالها !! ولامجرد إسم أدرج في قواميسها
تفاعلاً من روتين الحياه ..
" عمي عبدالله رايح لعمي سالم !!!! ،،
ليش ماقال ولاسمعت من أحد ،، ياالله ليتني ماعلمته
أكيد أحرجته معاه ،، ياربــي يعني لو قلت لبندر ماكان أحسن .. أروح البيت وأشوف وش صار "
\
:
طلعت مع الشغاله فوق عشان تشرف عليها وهي ترتب غرف البنات مثل ماجرت العاده ..
دخلوا غرفة حياة بما إنها الغرفه الأولى والأقرب لهم رتبوها وطلعوا ..
توجهوا للغرفه اللي جنب غرفتها لكن لقوا الباب مسكر .. قالت أم نايف يمكن إنها مسكره الباب قبل لاتطلع .. فتحت الباب وحصلت الأنوار مقفله ،، شغلتها إلا حصلت مهره في سريرها
نايمه بتعـــب ويرّحم حالها ،، مرهقه ،،مبين على شكلها ،، ودمعه يتيمه نازله من زاوية عينها اليمنى وحاظنها كفها بنعومه كنه يهدهدلها ..
خافت عليها خالتها .. غايبه !! ،، غريبه ولاقالتلها إنها بتغيب ولاحطت عندها خبر ،،
حطت يدها على راسها تتحسس حرارتها وحصلتها كنها مرتفعه شوي ،، راحت لدورة المياه
وفتحت الصيدليه وجابت الترمومتر ،، شغلته وحطته فإذنها ،، قامت مهره مرتاعه ،،
سمت عليها خالتها وقالت : بسم الله عليك حبيبتي لاتخافين بس أقيس حرارتك كنها مرتفعه ..
رجعت مهره لمخدتها الحنونه ،، حلم ! كنه في بالها ،، ماحست بشي ،، وغرقت في توسونامي
من النــوم ..
\
:
" أقول والله يابندر محد ماخذها غيركم يالمدرسين ،، اجازات بالشهور ،، ورواتب على كيفكم
وتطلع متى ماتبي وتدخل متى ماتبي ،، ولاشغل ولامشغله بس ألقي درسك وإنتهى الموضوع"
بندر : يابن الحلال وش محد ماخذها غيرنا ،، إلا أنتوا يالعساكر ماخذين الدنيا كلها ،، دورات
وبدلات ،، أبداً علومكم كلها زينه يانايف لاتقعد تغبّر لي ..
نايف: هههههه أنت طيب وبخير ؟؟
بندر: ههههههه الحمدلله بنعمه ،، والحمدلله اليوم بنمشي للبر وشبة الظو وفلة الحجاج ..
نايف" بقهر": الله يخسك يعني لازم تذكرني ،، أجل أنت ماسمعت راعي السالفه يوم يقول
لعياله .." أنتوا رحتوا للبر .. قالوا إيه .. قال وشبيتوا الظو .. قالوا إيه .. قال وطبختوا المضغوط .. قالوا إيه .. قال ومعكم نايف ابن عبدالله .. قالوا لا.. قال أجل تكذبون ماطلعتوا البر!!"
بندر: هههههههههههه يلعن ام المشوار .. ياحليلك اثرك مشهور عندهم !!
نايف: هذا إن دلك دلك على إنه عيبٍ عليك تروح وانا مهب معك ،، هم وهم مايعرفوني
عرفوا قدري ،، وانت ياولد عمي ونسيبي رايحن ومخليني ..
بندر : اخخخخ لاتحسسني بالذنب ياخوك .. لانخليني أهّون ..
نايف: إلا هّون ،، ولاخلوها بالأربعاء عشان أروح معكم ..
بندر : أقول ظف وجهك يوم رتبنا العزبه وكل امورنا زانت تقول هونوا ولابعد نأجلها لبعد بكره ..أقول لايكثر طال عمرك وفمان الله عندي حصه لاتأخرني وأنا معلم مجتهد ..
نايف : ههههه احلاااا يامجتهد ،، أهم شي إعقل في الفصل لاتفشلنا قدام الطلاب .. وخل عنك
الصرقعه ..
\
:
كانت تكتب في النوته
" كيف أكون في زمن الإنكسار
وكيف أكون في هذه المعمعه
دنيا غريبه
وواقع أغرب
وأم مجرد تسميه لاأعرف معناها !!
أم،، تعريف مجرد من أي تعاريف
وام،، معنى خالي من أي معاني
ليتني أشعر مثل مايشعرون !!
كم هو صعب أن يموت الشخص وهو حي أمامك .........
وووو للحديث بقيه بسعة ماء البحر ،، حتماً سأعود "

سكرت نوتتها بعد ماشافت البنات يفزون ومشرفة الشاشه تطلع إيذاناً بإنتهاء كلام الدكتور
اللامتناهي،،
شافت ساعتها حصلتها 11:15،، وفتحت آخر صفحه من نوتتها تشوف جدولها
حصلتها آخر محاظره لها اليوم .. فكرت تكلم سلمى ويتقابلون لكن مزاجها
متعكر .. مالها نفس فأي شي حتى سلمى!! .. كلمت السواق ودقايق إلا وهي
معاه فالسياره ..
\
:
لما صحت من النوم ،، صحت بثقل داخلي وخارجي .. تنهدت بقوه وقالت بعبره
" يـــاليتني نايمه طول العمر"،، حست بنفسها معرقه حيــل ،، تحسست عمرها وحصلت
حرارتها مرتفعه شوي ،، وبطنها فيه ألم فظيع ،، وكبدها تاكلها أكل .. فتحت درج الكومدينه اللي جنب السرير وخذتلها بندول إكسترا على الريق ..
وقامت تبي تتروش كون تخف الحراره وتتنشط شوي ويروح الضيق اللي فيها ..
بعد ماتروشت وحست بعمرها شبه نشاط نزلت تحت عند أهلها ،،
طبعاً مافيه غير جدتها وخالتها يتقهوون شاهي .. سلمت عليهم وجلست جنب
جدتها ..
فقالت أم عبدالله وهي تناظر عيونها المبين عليها التعب : وش فيك يابنيتي عسى
مافيك شي يعورك ؟؟
مهره: لاأبد مافي شي يعورني ..
أم نايف: لاحبيبتي أنا قست حرارتك اليوم ولقيتها كنها مرتفعه ..
مهره: فديتك ياخاله تروشت وخفت إن شاء الله .." وينغزها بطنها فهاللحظه وتمسكه بألم"
أم نايف : بسم الله عليك مهور وش فيك ؟؟
مهره " والألم يعتصرها": بطني ياخاله بطني ..
أم عبدالله : بلاك من الجوع ،، قومي يامال العافيه خذيلك خبيزه وحطيها فيها جبنه ولااللي
تبين،، قومي يمك تراك مسرفةٍ في نفسك بذالجوع
أم نايف " وهي تقوم ": لااانا اللي بجيبلها خلها ترتاح ..
مهره " تتلوا على عمرها بدمـوع محرقه": يمــــــــــــــــــه
وشوي إلا جات أنه موجعه من أعماقها ،، وأعلنت معاها رحلة فقدان للوعي !!!
\
:

يتبع

[جرح الذات]

" أسطورة إغريقيه ،،
حب لايوجد له مثيل ،،
جعل الأبجديات تتلاشى في لحظت من لحظاته "
\
:
# الجزء السابع #
\
:

واقف ومعنز راسه على الجدار بوجع ،، مغمض عيونه كنه يستجدي الإسترخاء لكن لامجيب ،، التوتر واضح كالشمس في وجهه ،، والضيقه متقوقعه في صدره ،،
قاله عمه عبدالله وهو يربت على كتفه: يابوك ياسلطان لاتحمل نفسك فوق طاقتها ،، أنت عارفها ضعيفه ومعها القولون ومب أول مره تطيح علينا ،،
سلطان " بآهــه عميــقه": الله يهديها كانها دايماً معنيتني ،،
عبدالله : وأنا أبوك إدعلها بالعافيه .. وإن شاء الله ماقدامها إلا الخير ..
سلطان : هي ماراحت الكليه اليوم ؟؟
عبدالله : لا تقول خالتها إنها ماراحت ،، طلعتلها الصبح وحصلت حرارتها مرتفعه ،، والضحى
نزلت عليهم وطاحت عليهم ..
سلطان " يهز راسه ": هاابس أكيد حياة قالتلها على السالفه ،، والله ياإن كان كل هاللي
صارلها عشان السفره والله ماعتبه برا الرياض ..
عبدالله " بإبتسامه عطف ": يابوك كانه على مهره فمقدور عليها ،، الموت أمك غاليه
حالفةٍ أيمان إنك ماتروح وعجزت وأنا أقنعها البارح ...
تسلسلت الكلمات لأعماق سلطان ،، رجع لنفس وضعه ،، عنز راسه بأكثر وجع ،،
وغمض عيونه بإستجداء أقوى ،، ووضوح الشمس صار قيلوله ..
بعد دقايق من هالوضع طلعت عليهم أم نايف اللي كانت داخل مع مهره تقول لهم
إن مهره فاقت وتبيهم يدخلون عليها ..
\
:
قبل ماينتهي دوام المدرسه بربع ساعه ،، على الساعه12:45،،
جالسات على مكتبهم ،، يصححون دفاتر البنات بملل ،،
سكرت حياة الدفتر اللي قبالها وهي تحس بضيقة صدر وقالت : لاإلــه إلا أنت سبحانك
إني كنت من الظالمين ،، " وتسكر الدفتر اللي قدام سميره "،، خلاص عاد مامليتي !!
سميره : عندك شي ثاني تسوينه ؟؟ يابنت الحلال خلينا نضيع الوقت لين نطلع ،،
حياة " تتذكر مهره" : الله يعيني على مهور ،، الله يهديها ذالبنت مدري متى بتعقل !!
سميره : ياالله ياحياة مصيرها بتتعود على الوضع ،، لاتاحتينها مهره مره ماينخاف عليها ..
حياة : لاوالله ينخاف عليها ،، كل ماطرالها ضاقت وعورها القولون ،، الله يستر ألحين
لاتكون منتهيه منه ،، وهي ماعليه بقدر أقنعها لكن سلطان أنا عارفته جعلني قبله لايحس
بس إنها تعبت عشان موضوعه وربي مايروح ،،
سميره : إدعيله باللي فيه الخير والخيره ،، الله ينورله طريقه حبيبتي ،، لاتشحنين نفسك
أنتي ،، إن شاء الله ربي بيسرر أموره ،،
وفهاللحظه دق جوال حياة ،، طلعت الجوال حصلته بندر اخوها ،، ردت عليه وقالها إنه
عند الباب عشان تطلع ،، وبعد دقايق معدوده رن الجرس معلناً إنتهاء الداوم الروتيني ،،
ولبست عبايتها وطلعت ،،
\
:

في هذاك البيت العتيق ،، اللي هواه الطيبه ،، وماه الصبر ،،
فنفس مجلسها جالسه قدام التلفزيون ،، حاطه على قناة المجد للقرآن الكريم ،،
وقاعده تردد وراء الشيخ سورة الملك تبي تحفظها ،،
جاتها تاتي بإبرتها اللي قبل الغدا ،، وإستسلمت لها ماما هيا ورفعت أكمامها لها ..
قالت تاتي وهي تضرب الإبره وتسمع القرآن : ماما هدا مجد كويس مره ،،هدا إنت في
نوم في صباح ،، تاتي يسوي بيت وإسمع قرآن ..
أم راشد " بروحها الطيبه ": بارك الله فيك يابنيتي ،، ايه إسمعي القرآن عشان ربي
يحفظك ..
تاتي : إن ساء الله ماما ،، " وتطلع من جيبها رساله وتعطيها أم راشد" ،، ماما
هدي رساله أنا في إبقى ودي لماما مع راتب شهرين بس ،، أنا في أعرف ماما هيا مسكين
ومدام سميره زوج مافي كويس ..
أم راشد " بإبتسامه تجنن لخبث هالشغاله ": مايخالف إن شاء الله بعد يومين بنرسلها
مع راتبك ،، بس عاد قومي ألحين حمي الغدا محمد بيجي ألحين ..
تاتي : لااا ماما خلاص غدا حــار ،، أنا لسا طفي من على نار ..
أم راشد " بفتــور للباب اللي دايم مايتسكر ": هاخلاص عااد روحي للمطبخ لابغيتك
ناديتك ..
تاتي : ليــه ماما أنا في إجلس مع ماما هيا .. " وتهمز رجولها " .. أنا في همز رجيلاتك
وفي همز ركيباتك .. أنت مافي أعرف همز .. تاتي بس همز ..
ضحكت ام راشد لحركاتها ،، دايم تدور لها حجه عشان تجلس وتتهرب من الشغل ،،
إسترخت وخلتها تكمل تهميزها الــ " الفنان" ..
بعد دقايق جاء محمد من المدرسه حط كتبه على أقرب معناز .. وراح بشوق يم جدته
حب راسها وجلس جنبها بعد ماقال للشغاله تجيب الغدا ،،
محمد " بعد ماشاف الشغاله تهمز رجول جدته وتأكد إنها راحت ": حشــا ذالمودميه
لزقــه ،، أعوذ باالله ..
ام راشد " بإبتسامه ": يامك الله لايحرمني منها ،، عز الله شايلتني من الأرض شيل
وإن كان فيها ذالطبع الشين ،، إنها ملقوفه بس مايخالف ياحيه فيها ولافي غيرها ..
وشوي إلا وهي داخله عليهم بالغدا،، حظرته على السفره وأذنيها منطوله عندهم
عساها بس تسمع سالفه ولاتلقطها ،، قامت بثقل ولو الود ودها إنهم عزموها معهم ،،
محمد : أقول يمه قبل لاأنسى ،، ترى بكره بنروح لأبوي
أم راشد : إن شاء الله ،، ولاوش رايك بعد بكره ،، الخميس أحسن عشان نروح من بدري
الطريق مب سهل ..
محمد : امممم ماظنيت بقدر الخميس ،، أناباخذ سيارة واحد من الربع وقلتله على بكره
باخذها ،، وبعد بشوفه ويصير خير..
\
:
" باالله عليك !! والله إن قلبي كان حاس ،، ذالمهبوله مدري متى بتريحني ،،
طيب وش أخبارها ألحين "
بندر : يابنت الحلال هدي عمرك مافيها إلا العافيه ،، عمي وخالتي وسلطان عندها
ألحين ،، كلمني سلطان يقول إنها طيبه بس بيعطونها مغذي ويطلعونها المغرب ..
حياة " تدافع العبرات ": طيب ودني لها الله يخليك ،، أبي أتطمن عليها ..
بندر : حياتي وش فيك أنتي ،،أقولك إنها طيبه وبتطلع المغرب تقولين ودني لها ،،
أمي غاليه فالبيت لحالها ،، ومرتي المصونه تلقينها غرقانه في النوم ولاداريه وش الدنيا عليه ..
حياة " بإنفعال": ياخي صحيها ،، إذا ماحسستك إنها معك في ذاالأمور متى بتحسسك !!
أعوذ باالله منك ومن سلبيتك ،، حشا مب رجال !!
بندر " بحلم بعد ماأخذ نفس عميق ": المرجله مخليها لوقتها وأنا أخوك ،، عالعموم
بوديك لأختك وأمي غاليه عندها شغالتها ونايف أكيد بيروح البيت لبغت شي بتدق ..
علت موجات الصمت حياة ،، ولفت وجهها للشباك وتعنزت على المرتبه ،، وبدت حكايات الدموع الصامته ،،وتأنيب الضمير ،، ماكان له داعي هـ الملح ،، أخوها أكيد مب عاجبته تصرفات زوجته وأكيد في قلبه من الوجع حكايه مصيرها بتمل ،، لكن هي بنت عمها مهما كان ،، وأختها قبل كل شي
حتى لو كانت زوجة أخوها ،، علاقتهم أقوى من إنها تتكلم هالكلام ،، وبعدين هم متصافين
من دونها ،، هذا اللي كان يجول بخاطرها الرقيق ،، طردت الحكايات الكريمه ،، ورجعت
لتفكيرها فأختها وكيف إنها تقدر تهديها وبأي كلام تقدر تقنعها ،، ماتدري إن الموضوع
إنتهى ومهره تعبت لشيء مولي من أمس !!
\
:
فالبيت الخاوي ،، بعد مارجعت صيته من جامعتها صلت الظهر ،، ونزلت الصاله
عل وعسى تلقى أحد يونسها وينسيها ضيقتها اللي من أصبحت وهي مضيقه عليها ،،
نزلت مابعد أحد جاء لألحين ،، جلست قدام التلفزين وقعدت تقلب فالقنوات وكالعاده
مافي شي يستاهل ،، قفلته بعد محاولته الفاشله لتسليتها ،، إسترخت على الكنبه
وغمضت عيونها ،، والذكريات اللي أبت الموت بدت بثها اليومي ،، تجي بسلام
وتروح بحرب ،، تحبهم رغم إنها ماتعرفهم ،، تودهم رغم إنها ماتذكر أشكالهم ،،
تتمنى تبوس يد جدتها ،، وتحب راس عمها ،، وتتناقر مع بنات عمانها ،، تنطل
المخده على هذي ،، وتشكي لهذيك ،، وتواسي هذي ،، وتشيل الهم عن هذيك ،، تتمنى يكونون قريبين منها
تستشيرهم لضاقت الأمور ،، وينصحونها لفرت الصدور ،، تحبهم لكنهم أرواح دون أجساد فقلبها ،،
" صيـــته راقده وأنا أبوك ؟؟ "
صيته " بفزع ": لبيــــك !!
سالم : قومي يابوك إرقدي فحجرتك أحسنلك ،،
صيته : لايبه مارقدت بس قلت بسترخي لين تجون عشان نتغدى سوا
سالم " وهو يجلس ": ليه مابعد أحد جاء؟؟
صيته : لا فديت قلبك بعدهم ..
سالم : غريبه !! مب بالعاده أمك تجلس لذاالحزه الساعه 1:15 !!
صيته : ماعليه يبه أكيد هم فالطريق ،،
سالم " بتبلد ": مايهم ،، روحي حبيبتي شوفي الجرايد عند الباب الرسمي جابها
السواق ،، روحي جيبيها ،،
صيته " وهي تقوم ": أبشر يطولي عمرك،، " وترجع كنها تذكرت شي وتجلس جنبه قريبه" ،،
يبه معليش أسألك سؤال بس ماتعصب ،،
سالم " وكنه عارف السؤال من قبل لاتقوله ": إسألي ولك الأمان ،،
صيته : أكيـــد !! كلام رجال ..
سالم "وبإبتسامه عجيبه على وجه تورم بالآهات المتعجرفه": كلام رجال ،، إسألي يابوك ،، كون في سؤالك راحةٍ لي ،،
صيته " بصوت دامي" : أنت أمس يوم جاك عمي عبدالله وش سويت ،، يعني وش شعورك ،،
امممم أسألك بالله يابوي ماحنيت لهم ،، وماإشتقت لجدتي ودفاها !! وعيال عمي عبدالرحمن
ماجاو قدام عينك ،، بالله عليك يبه لمتى وانت على ذاالحال ،، الموت بيجيك في أي حزه
ماتدري عنه ،، وش بتقول لاقابلت ربك ،، وش تقول لـ تقابلت أنت وعمي عبدالرحمن لـسألك
أنت صنت الأمانه اللي فرقبتك ولاهملتها وإنغريت بوصخ الدنيا ،، وش بتسوي
لو مت وجدتي غضبانه عليك ،، 12 سنه يبه وأنت ماخاطب لسانك لسانها ولاشافت عينك عينها ،، والله يبه لو إنها ميته مادريت عنها ،، يايبه إرحم حالك وحالنا ،، الناس كلت
وجيهنا ،، يقولون مهملٍ عيال أخوه وناطلهم على رجال غريب ،،
سالم " وعيونه فالأرض ،، والدموع تبي تصهل على خده !!!" : يكفــــي الله يخليك ،،
" ويمسح دموعه اللي توها بتنزل بطرف غترته"،، أنتوا تحسبوني مخليهم كل ذاالفتره بكيفي ،،
12سنه تحسبونها هينةٍ علي ،، والله إنها مثل العلقم ،،مثل المر على قلبي ،، أنتوا ماتدرون وش فيني
مالكم إلا الظاهر ،، يابنيتي اللي يدري يدري ،، ويمين الله إني من يومها وانا ماذقت لذيذ النوم ،، والراحه محاربتني ،، أنتوا وش دراكم وش أنا فيه ولاوش أنا عليه ،، كلٍ لاهي فحياته ،، ماتعرفوني إلا لابغيتوا ذاالدراهم ،، ولاّتعرفوني عشاني أبوكم لا،، عمركم ماسألتوني وش فيك ،،، تشكي من شي ،، تعبان من شي،،
ماهمكم إلا أنفسكم وبس ،، لكن وش أقول غير حسبي الله ونعم الوكيل ،، إدعيلي يابوك ،، إدعيلي إنها يفرجها علي ويفك عني وعن كل مسلم ..
" مشـــــاء الله ،، مجتمعين !! ،، وش عندك تحسب ،،، لايكون قاعدين تحشون فيني !!"
جاهم صوت حسناء من وراهم كصوت البومه لما تحرمك لذيذ الرقاد في الخلا الخالي ،،
ثم قالت بعد ماحد رد عليها " حشى كني شيطان !! وش فيكم ماتردون ياكافي !! "
وتقوم صيته بعد ماألجمها كلام أبوها القريب للطلاسم ،، لغز !! ،،مشت كنها مسيره بدون علمها،،سرحـــانه فذاك البحر العميــق اللي ماله نهايه ،، كنها غرقانه ماتدري وين النجاة..
وش هالكلام ،، أبوها يحس !! ،، متعذب من فراقهم ،، يشكي من عدم إهتمامهم !! يـــاااااه أبوها فيه قلب !!
لكن هل بتلقى حل لهذا اللغز ،، وبتقدر تفك الطلاسم الغريبه ،،
مشت وأمها تتكلم وتهاوشها عشانها قامت بعد ماجات وهي ماسمعت أي شي
من هالكلام " الجميل" ،، طلعت غرفتها وإنرمت على سريرها وغرقت أكثر فبحرها ،،
أما تحت عند هذاك القلب اللي مايندرى هل نسميه الحنون المعذب أو المتعجرف المتكبر ،،
بعد ماسمت بدنه زوجته بكلام بالكاد كان يسمعه ،، قام وراح لغرفته ومعاه الجرايد ،،
قالتله بعد هم طويل تحطله الغدا ،، لكنه سفهها وطلع فوق دون لايرد عليها ،،
\\
:
في أكره الأماكن في العالم ،، في صاحب الأنوار الحمراء والأسره البيضاء ،، حيث
يجتمع الألم والأمل ،، في سريرها الأبيض منسدحه وفيدها الغذايه ،، وخالتها جنبها تحاول تأكلها وهي مب راضيه ،، وعمها يحاول فيها واخوها يحاول فيها لكن لاحياة لمن تنادي ،، ماغير مكتفيه بالصمت الموجع،،
عصب سلطان من حركاتها اللي مالها معنى والجوع أكيد بيزيدها تعب على تعبها وقال : انتي وش ذاالدلع
عاد ،، كل ماطرالك طحتي علينا ،، صرنا نخاف نسوي أي شي عشانك ،، نحرم أنفسنا من أحسن الأشياء
عشانك ،، وفي النهايه ماتساعدين عمرك ،، لاعيشةٍ صاحيه ولاأكلٍ صاحي ،، وش على بالك أعصابنا
على كيفك !! نداريك نداريك ومالنا جزا حتى في صحتك ،، حشى ماصارت أنانيه ذي !!
رمى سلطان قنابله وطلع وتركهم وراه عيونهم طايره ،، والذهول سيطر عليهم ،،
عمه عرف إنه ماقاله من فراغ ،، الضغط اللي يعيشه خلاه في معمعه ،، وخالته بعد اللي توها عارفه بالموضوع فهمت الوضع وفخاطرها بتاخذ اللي فخاطره لكن في الوقت المناسب ،،
أما مهره ماغير دموع مؤلمه نزلت فمجراها وإتخذت لها مكان في وجهها وأصبحت سيده فيه ،،
رجع الألم من جديد في بطنها ،، لكن قدرت تسيطر عليه أو بالأحرى ماكانت يمه ،،
أما برا بعد ماطلع سلطان جا فوجهه أخوه بندر وحياة ،، وهو مهب يمهم كلــش،، عواصف قاعده تثور فداخله
وقفه بندر وقاله : هيــــه أبو الشباب تعال
سلطان وهو يحاول يسيطر على نفسه ويروح يمه : هلا جيتو ؟؟
بندر : لارحنا ههيهيهي ،،
حياة : ياربي على خفة الدم اللي مب فوقتها ،، هااه سلطان شخبار صحة مهره ألحين ؟؟
سلطان "بثوره": أختك ذي عليها قل عقل ،، خبل تعرفين شيعني خبل ،، كل ماطرالها ضاقت
وتعبت علينا ،، لاجا ذاك الوقت إنجلطت ولاإنشلت خلوها تنفعها ضيقتها ،،
ويروح بضيــقه بحجم الكون ،، وااهه متناثره على أطراف وجهه ،، مع إنه كان متوقع إن هذا كله
بيصير منها لكن مايدري ليش إنفعل لهالدرجه ،، متحمس كثير للسفره ،، كان بتخليه مختلف ومميز طبعا،،
وبتغير كثير في حياته وفي حياة اخوانه ،، وقبل كل هذا ماجات بالساهل وكلٍ يتمناها ،، ومب أي واحد تجيه
والفرصه الحلوه ماتجي إلا مره وحده في العمر ،، وكان مقرر من أول ماجاته أي إعتراض من أي واحد من أهله بيهملها ويلغيها ويدوس على مستقبله عشانهم ،، خاصة خواته اللي من طلع على الدنيا وهم معه ،،
ربوه وكبروه ورعوه ،، شالوا عنه الألم وشالوا عنه التعب ،، فجاء الوقت اللي يردلهم جميلهم في إعتقداه
حتى لو كان هذا الرد بيكون على حساب حياته ،، وأحسن إن جدته منهيه الموضوع من قبل لايبتدي وعليها
أيمان وحلوف مستحيل ينتهكها .. طلع مايدري وين وجهته يمه ،، بس أهم شي عنده يختلي بنفسه
ويرتـــاح ..
":":":":":"
دخلت حياة وبندر على مهره ،، ولقوا الوضع متوتر ،، الكل ساكت ومهره دموعها سيدة وجهها ،،
راحوا يمها وسلموا عليها ،، ومن شافوا دموعها عرفوا إنه من سلطان ،،
بندر حب يلطف الجو وقال : مهور شكلك تبين البر ،، يابنت الحلال كان قلتيه من الأول ووديك ماله داعي
كل ذاالتمثليه ،، بوديك من دون لف ودوران ،،
حياة : إنك انت ماتدري ،، ذالبنت فيها حيله مدري من وين جايبتها ،، من يوم درت إنك بتروح وهي
حالتها حاله متفقه هي ومرتك على ذالمسرحيه ،، غاليه خططت ومهره عاد نفذت ،، لكنها ضبطت الدور
صح ،، مشاء الله عليها أختي عليها تمثيل ولاحياة الفهد !!..
عبدالله : هااااه وش فيكم على بنيتي ،، خلوها في حالها ،، أصلا هي لوتبيني أوديها البر من عين بكره وهي فيه ،، كم عندي من مهره أنا ،،
أم نايف : من قدك يامهور ،، كلٍ يبي يبي يرضيك جعل ربي يرضى عليك يمك ..
إنحبست دموعها ،، ووقفت التيارات إلى إشعار آخر ،، وبدت البسمه ترسم في محياها العذب ،،
وبدا الألم يتبدد من تقاسيمها وإن كان متربع فداخلها ،، قعدوا يسولفون معها ،، ينسونها التعب شوي
ويفرقون الألم بعيد عنها ،، وعلى الله يقدرون ..
\
:
في غرفتها بعد ماجات من المدرسه ،، مستلقيه على سريرها وجوالها في إذنها ،، تضحك ضحك مقرف
وتعلق تعليقات ساخره على المدرسات ،،
كانت تقول : يــــاحرام يانوري شفتيها كنها خلاطة إسمنت ،، صراحه الله يعينها على نفسها ،، يبيلها عاملين
يشيلون معها لحمها ،،
نوره " تجاريها بضحكه سخيفه ": هههههههههههه الله يقطع بليسك حنون ،، أما عليك تعليقات تموت من الضحك ..
حنان : ههههه بسم الله عليك من الموت حياتي روحي قبل روحك إن شاء الله ..
نوره " بنفاق" : لا حرام عليــك ،، إن شاء الله أنا أول ،، وشلون بعيش من بعدك !! لا.. لا مقدر
حنان : عاد أنا اللي بقدر !! حرام عليك ،، خلاص عندي حل ،، وش رايك كلنا فيوم واحد ؟؟
نوره " بسخريه": ههههه على كيفك هو ،، " وبنغزه" .. لو هو بيدنا كان موتنا اللي نبي وخلينا اللي نبي ..
حنان : إيه والله صدقتي ،، كان أول من بمحيهم من الوجود عبدالله وعياله وعيال أخوه ..
نوره "وإحتقار من ورا السماعه": وش فيك تقولين عبدالله كذا كنه مب عمك !! وعيال أخوه كنه مب عيال عمك!!
حنان : يخسى يكون عمي ،، وعيال اخوه صحيح إنهم عيال عمي لكن صراحه مايشرفوني ،، مالت عليهم
وعلى اليوم اللي جاو للدنيا ..
نوره : حنان جد ليش كل الحقد والحسد عليهم .. مع إنكم كل الخير عندكم ،، يعني مافيه عندهم أي شيء
ممكن ان الواحد يحسدهم عليه ،، وصراحه أحسهم مايستاهلون كل هالحقد ،، أحسكم مبالغين فيه!! ..
حنان : ياعيني على الرحمه ،، أصلاً أنتي ماتعرفينهم كثر ماأعرفهم أنا ،، هذول يدسون السم في العسل
يسحرونك بكلامهم وبأفعالهم وهم أشر خلق الله ..
نوره : اممم غريبه هذا وانتي ماشفتيهم طول عمرك وتقولين هالكلام!! ،،
حنان : صحيح إني ماشفتهم ولاأعرفهم ،، لكن من كلام أمي عرفت كل شي عنهم ،، صراحه ناس يخوفون،،
نوره : مع إني اشوف العكس على أبله حياة ،، أحسه مرّه طيوبه ومره كيوت ،،
حنان " بشي من الغيره،، ومحاوله ناجحه لتغيير الموضوع": هيييه حدك !! ،، لاتمدحين أحد قدامي
كم مره قايلتلك أنا ..
\
:
رجع البيت على الساعه 2:30 بعد يوم من الدوام الشاق والمتعب ،، كان عندهم مهمه غير عاديه اليوم ،،
وبذل كل جهده فيها ،، يحس بالراحه إذا قدم كل مايملك من طاقه في عمله ،، غير طبيعي
شعوره لما يمسكون عصابة ترويج ،، ولاحتى مروج واحد ،، نشوه حد السماء إذا قدم
لو شي بسيــط لوطنه ،، عاد شلون لما ينقذ ملايين الشباب من دمار حل بهم أو كان فطريقه لهم ،،
دخل نايف داخل البيت وتحنحن وقالتله جدته يدخل وإن ماعندها أحد ،،
دخل سلم عليها وحب راسها وجلس عند روجولها الممدده وقعد يهمزها وقال : وين العرب ؟؟
ام عبدالله : في المستشفى
نايف " بعد مافز واقف ورفع واحد من حواجبه" : عسى ماشر أحد فيه شي ؟؟
أم عبدالله " تجره من طرف بنطلونه عشان يجلس": بسم الله عليك ،، إجلس ياولدي مامن شر ،، بس مهره
تعبت شوي وودوها ..
نايف " يطلع جواله يبي يدق على بندر،، بعد مازادت نبضات قلبه من الراعه": بندر عندها ؟؟
أم عبدالله : والله مدري بس أبوك وسلطان اللي مودينها وأمك معهم ،، وحياة وبندر لذلحين ماجاو فكود إنهم عندها .. ومن يوم راحوا محدٍ دق علي ،، وأختك الزلابه مجنخرةٍ في فراشها..
دق نايف بلاوعي على بندر ، وسأله عنها ووش فيها ووش سبب تعبها ووو أسئله إلى مالانهايه عساه بس يبرد لهيبه ،،
سكر منه وشاف جدته اللي كانت تستغفر،، ووجهها مليان صبر وسوالف سلوان ذبلان ،،
طمنها على حالها وهي لسانها ماوقف من ذكر الله ،،
سكتت شوي وقالت : تبي وصيتي ياولدي وعلمها عيالك وعيال عيالك وكل من عز عليك ،، إذا كاد عليك الامر فإستغفر عشرين مره وصل على محمد عشرين مره وربك بيفرجها عليك عجل مابطيت ..
إبتسم نايف لوصيتها البريئه اللي تحمل حكمة مره عجوز مالها رجا إلا فربها الكريم وقال : الله يطولي فعمرك
الإستغفار والصلاه مالها عدد معين ،، بنستغفر ليــن مانقول بس ،، ورحمة ربي واسعه جعلني مابكيك ..
أم عبدالله : جعل العافيه ماتبكيك يمك ،، رح إفصخ ذااللي مزرزرك " البنطلون" وتعال تغد معي ،،
كلاني الجوع واختك مانزلت ،،
نايف " بإنفعال وهو يوقف ويتوجه للدرج": الله يهديها ذالمره ويعين رجلها عليها ،، بروح أصحيها
خل االرجال يجي ويلقى مرته قدامه ،، حشى كن ماعنده مره !!
وقبل مايطلع فوق راح للمطبخ وقال للشغاله تكب لهم الغدا ،، وراح يطلع فوق ..
\
:
توه قايم من النوم ،، عيونه متنفخه وقشته طايره ،، غير نفسه الخايسه ،، تلفت يمين يسار ولاحصلها ،،
راح غسل وجهه ونزل ،، لاتوضا ولاصلى ولاهمــه شي ،،
لقاها في الصاله تأكل بنته ،، جلس على أقرب كنبه وقال : هــيه جيبي لي القهوه والقدوع ..
وتقوم بصمت من دون لاتطالعه ولاتكلمه حتى ،، عجزانه من مناقره وتفتح على نفسها باب مب متسكر ،،
جلس لحاله مع بنته الدانه في الصاله ،، البنوته من شافت أبوها وهي منطلقه بطهر البراءه له ،،
قعدت تحوم وتحوم حواليه وهو ولامعبر روحها ،، تطالعه وترقص له وتغنيله لكن وين الحياه فقلبه ،،
قعدت تلعب بصوت عالي مزعج وهو معاد تحمل ،، دزها من كتفها بكل قوته كنه يدزله واحد عربجي ،،
دخلت أمها على طيحتها وبكيها اللي يقطع قلب اللي مايحس ،،
حطت الصينيه قدامه بسرعه وركضت لبنتها وخذتها فحظنها وضمتها بكل ماأوتيت من قوه ،،
وقالت : حسبي الله ونعم الوكيل ،، حسبي الله عليك حتى بنتك مافي قلبك ذرة رحمه عليها ،،
قال " بجبروت": أقــــول لايكثر ،،وتعالي صبيلي القهوه دام النفس عليك طيبه ..
قالت " وهي تقفي": معاد تهمني ،، شفت الجدار اللي وراك ،، صرت انت وياه واحد ،،
قال "ببـــرود": حتى أنا معاد تهميني ،، لوما راتبك كان من زمان وأنتي فبيت أهلك ،، ولاوش أبيبك
مافيك شي يبكى عليه ,, على فكره ترى بوديك البنك اليوم ،،أبيك تاخذين قرض بمية ألف ،، وتراه أمر
يعني لاتناقشيني لو سمحتي ..
طلعت ببنتها من دون لاترد عليه ،، وقلبها يحترق ،، ومليان قهر وغيظ وغل ،، والدموع مارضت تنزل كنها
تجبرها على تقوية كرامتها وعزة نفسها ،، وكنها تعلمها إنه عمره ماكان يستاهل إنها تنزل عشانه ،،
لكن ياترى صدق قلة الحيله بس هي اللي مخليتها تصبر على ذا كله ،، ولادنيـــا ثانيه مخليتها تتصبر !!
\
:
بعد ماطلع فوق مر من غرفتها وغظ طرفه ،، مع إنه حاول يناظر على راحته حتى إنه جاه شور يدخل الغرفه!! ،، مافيه عنده أحد ،، ولحاله فوق مامعه إلا ربه ،، لكن حس بشعور كنه يخون نفسه ،، إستحى من عمره ،،
ومشى بخطوات سريعه يم غرفة أخته ،، طق الباب بقوه كنه يحاول يبدد الإزعاج اللي داخله ،، فتحت مرتاعه من هالطق اللي يروع بصدق ،،
قال نايف : وجــع وش هالنوم ،، مهره بغت تموت وأنتي ميته في فراشك ،، والله ليحترق البيت ولايقنبل
ماحسيتي فيه ،، نعنبوك إستحي على وجهك نقدتينا عند الرجال ،، ماتخيلين ولاتستحين أعوذ باالله منك ومن طبعك ..
غاليه " والنوم طار": لحـــول ومتعني وطالع فوق عشان تقولي هالكلمتين ،، " وتدخل " .. كان كلمتني
بالتفون وقلتها ،، حرام عليك تعبت نفسك ..
نايف " بدا دمه يفور بجد": انا داري من زمان إن مافيك رجا ،، وصدقيني ياغاليه بيجيلك يوم تندمين
فيه ،، ترى الرجال مهما صبر وتحمل بيوصل حد وبينفجر ،، لاتحسبين بيسكت عليك طول العمر ..
غاليه : نايف لو سمحت لاتقعد تفضى راسي ،، وبعدين كني سمعتك تقول مهره في المستشفى ليه وش فيها ؟؟
نايف: لااا زين توك تذكرتي!!
غاليه " تاخذ جوالها ": أحسن مب لازم تقولي ،، بكلم بندر وأشوف وش السالفه ،، بيقعد يسويلي قصه ألحين ..
نايف : شوفي أنا ماطلعتلك عشان سواد عيونك ،، جدتك من صبح وهي جالسه لحيلها وانتي مكبره المخده
ولاهماتك الدنيا بااللي فيها ،، إنزلي عاد عشانها بس ،، ياوجه إستح عاااد ..
ويطلع بنفس الإزعاج اللي دخل به ،، وبخطوات أسرع نزل تحت عند جدته ..
\
:
إرتفع صوت الحق منادياً لصلاة العصر وهي مابعد نامت ،، إشتكى السرير من كثر تقلابها ،،
الدهشه مسيطره على عقلها بشكل غير طبيعي ،، "معقوله هذاك يكون أبوي ،، هذاك الجبروت
مجرد قناع ،، طيب وش حاده على ذاك كله ،، مستحيل يكون خوف من أمي ،، مب لهالدرجه ،، وهو
كل يوم وياها في هواش ومشاكل ،، يعني لوإنه عشانها داراها وخاف على زعلها ،، ياربي وش ذالحاله ،،
طيب أرجع أكلمه مره ثانيه وأشوف وش في خاطره ،،، لااخاف عاد يهاوشني بيقول ذي ماتنعطى وجه،،
أقول لسعيد ،، يمكن عنده علم ولاخبر ،، كون أرتاح ويبرد قلبي ،، وأقدر أبرد قلبه "
\
:
رجع عبدالله وبندر وحياة من المستشفى ،، وجلست أم نايف عند مهره على أساس بيطلعون
المغرب ،، ومن دخلوا تلفوهم اللي في البيت بالأسئله عن أحوالها وصحتها ومتى بيطلعونها ..
قامت غاليه تجيبلهم الغدا بعد ماأهدت زوجها إبتسامه ساحره ..
طلع نايف عشان حياة تاخذ راحتها ،، تغدوا وبعد الغدا قام عبدالله بيروح المزرعه ،،
فقالت أمه : بتروح المزرعه؟؟
عبدالله : إيه يطولي بعمرك ،، تبين تخاوين ؟؟
أم عبدالله : إيه والله ودي بها ،، خاطري ضايقٍ شوي ،، حشى مندسين في ذالبيوت كنها عقوبه ..
بندر : إحمدي ربك يمه ،، عندكم سور يركض فيه الخيل ،، عاد وش تقولين باللي ساكنين فشقق
كنها جحاره ..
أم عبدالله : نحمده ونشكره ليل ونهار ،، الله يرزقنا ويزيدنامن فضله ،،
ويطالع عبدالله الجالسين يسألهم إذا فيه أحد بيروح معهم وكلٍ تعيجز ،، ومافيه أحد بيروح غير أمه ..
راحت حياة تجيب عباية جدتها وجزمتها ،، لبستها إياها وطلعت تعنز لها لين الباب ،، وبعدين خذا يدها
ولدها وقده بيروح ،،
إلا قالت حياة : عمي
عبدالله " يلتفت لها ،، وتلتفت معه جدتها": لبيه..
حياة : لبيت بمنى إن شاء الله ،، إلا أنت رحت لعمي سالم !!!
عبدالله " إبتسم ،،شكل الروحه جابت نتيجه": إيه رحت ،، ليه قالتلك شي مرته ..
حياة " بتحفظ": هااه لالا ،، بس قالت كان ماله داعي تجي بين الرجاجيل ،، كان بنحلها ودي بس هذا اللي قالته ..
أم عبدالله "مامرت عليها": يحليلها إثرها جات طيبه !!
عبدالله " اهو الثاني مامرت عليه": ههههه شفتي يمه الدنيا تتغير في غمضة عين !! ،، المهم حياة
أي شي تقوله لك ولاتذيك فشي قوليلي وانا بسنعها لك ،، ترا والله إنهم رخوم ماعندهم إلا الحكي ..
حياة " بإبتسامه ": خير إن شاء الله ،، وبإذن الله معاد منها وذى ..
عبدالله " وكنه تذكر شي":أقول حياة روحي جيبي عبايتك ،، أمي لازم أحد يجلس معها ،،أنا بروح
للعمال ،ومايصير تجلس لحالها ..
ام عبدالله: يارجال إمش ،، وش شايفني عجوز ولابزر لازم احد يهدهدني !!
حياة: هههههه حبيلك انتي شيخة البنات أصلاً ،، تدري عمي ترى هذا قناع اللي على وجهها ،، هي مخبيه
ملامح وجهها الشبابيه خايفه لحد ينظلها ،، تعرف الحسد كاثر ذالأيام وعيون الناس ماترحم ..
عبدالله: صح صح أتذكر إني دخلت عليها مره وشفت وجهها الأصلي كنها نانسي عجرم ..
حياة " بذهول": أحــلا بعد أنت عرفت نانسي!! عز الله خربت الدنيا،، وبعدين تكرم أمي غاليه من نانسي
وأشكالها ،،
أم عبدالله " تعبت من الوقفه ،، ولاداريه باللي قاعدين يقولونه وكنهم في عالم غيرعالمها": لحول
ياناس إدخلوا وريحوني ولاخلونا نمشي ،، تراني عجيز مسكينه يحسبوني مثلهم رجولي شايلتني..
ظحك عبدالله وحياة ظحكة فنانه تبعث في النفس الراحه ،، وكنها منبعثه من نفس مرتاحه !!
دخلت حياة وطلعت فوق غرفتها وإنسدحتلها شوي ليمن يأذن المغرب ،،
أما تحت في الصاله كان بندر جالس لحاله بعد ماقامت زوجته تجيبله الشاهي ،،
جات وحطت الصينيه وجلستها قدامها ،، وعطته نفس الإبتسامه الأوله ،،
عاد هو قال : لحــول وش بلاك اليوم مغير توزعين إبتسامات !! ضايقه عليك أجل !!
غاليه " بنفس الإبتسامه بعد": ياخي كيفي زوجي وأتبسم في وجهه على كيفي ،، في راسك شي هااه؟؟
بندر " متشقق ": أكيـــد بكيفك ،، كلي لك تحكمي فيني مثل ماتبغين ،،
غاليه " وهي تصب الشاهي وتقرب منه": بقولك على سر وياويلك إن علمت أحد ،،
بندر" بفرحه": تكفين لاتقولين إنك حامل !!!
غاليه " تتصنع البرود": لامب حامل ،، شي أحلى من كذا
بندر: يااااي وش أحلى من ذاه قوليلي ،، لجا اليوم اللي يجي عندنا ولد ولابنيه يملا علينا حياتنا
ويغير من الروتين شوي ..
غاليه "تحاول تحافظ على ملامح وجهها،، وتحط يدها على كفه ": الله لايحرمنا حبيبي ويرزقنا
الذريه الصالحه .. " وتغير الموضوع" . أففف كنت بتنسيني السر ،،
بندر: هاااااه وشو ؟؟
غاليه : أ ...أ....تراني سامحتك وبخليك تروح البر على راحتك
بندر" بضحكه رجت الجدران": زين زين ،، كنت خايف أروح وأنتي مب راضيه أخاف أموت
وانتي زعلانه علي ،،هههه ياحـــرام ياناس تحسبني معبرها ..
غاليه " تضحك": عاد وش نسوي نعبر أنفسنا دام محد عبرنا ..
بندر " يرفع أطراف أصابعها ويطبع قبله رقيــقه عليها": أفــاااا عليك كل ذاه وماعبرتك !!! ،، اللوم
على بعض الناس اللي كني مب زوجهم ولاحبيبهم ولاحياتهم ،، ماقد شفنا منهم غير العتب والزعل
وعمرهم ماقد حسسوني بقيمتي عندهم !!
غاليه " ببوسه أحلى": مارح أقول إلا جعل يومي قبل يومك ،، وش تبي بعد غير ذاه !!!
\
:
كان مشتاق لعمته حيـــــل ،، معاد قدر يصبر منها كثر ماصبر ،، قرر يروحلها بالرغم من تحفظه على روحاته لها ،، لكن مثل ماقيل الشوق غلاب،، ماكان يدري إن زوجها بيسافر وبتجيهم ،، ولاّكان ماراحلها ،، كان كلها يوم وبتجيهم وبتجلس عندهم إلى أجل غير مسمى ،،
طلع من دون لا يقول لجدته إنه بيروحلها ،، خذاله ليموزين وراحلها بيتها ،، وطول الطريق يدعي ربه
مايلقى زوجها موجود ،،
وصل البيت بعد ربع ساعه في الطريق ،، حمد ربه يوم ماشاف سيارته موجوده ،،
حاسب الليموزين ونزل ،، دق جرس الباب بذوق ،، وشوي جاه صوته الجهوري من ورا الباب
يسأل من عنده ...

\
:

يتبع

[جرح الذات]

﴿ الجزء الثامن ﴾

\
:

على الساعه 5:30 كان موجود في غرفتها ،، جالس في مكانه المعتاد على كنبته المخصصه له ،،وهي جالسه قدامه ،، ينتظرها تبدا في الكلام لكن هي بين إن الذهول مسيطر عليها لأحلين ،،
قال بحنان يملا الكون ويغطي عليه : صيته حبيبتي وش عندك ؟؟
صيته " تطالعه كنها فاقده الذاكره": هاااه ،،
سعيد " يقلدها": هاااه ،، وش فيك صيته وش عندك مناديتني تراني مشغول ومعطل نفسي عشانك،،فبسرعه أظهري مافي جعبتكي ..
صيته " بحواجب مرفوعه" : يــوه ياسعيد حصل اليوم شي عمرك ماشفت زيه !
سعيد : احزر يعني !! إخلصي قولي وشو،،
صيته : سعيـــد وش فيك اليوم حرص!!،،
سعيد: يالومي فيك ،، أقولك عندي شغل،، وأنتي فاتحتلي فمك ومفغره عيونك ،،
صيته: بلاك والله ماشفت اللي شفته ،، وجعلك يارب ماتشوفه !!
سعيد " بدا الإهتمام يعلوه شوي": صيته لاتقلقيني وش صاير ..
صيته : أبوي ياسعيد ،، أبوي ،، " وتنخرط في دوامة بكاء "..
سعيد " بإنفعاال": عســـاه ماضربك !!
صيته " بصوت من ورا الدموع مبحوح ": ياليته ضربني ولاشفت اللي شفت ولاسمعت اللي سمعت ،،
سعيد " يقرب منها ،، ويمسح على راسها بلطف ،، ويحاول يحتوي إنفعاله": طيب حبيبتي ممكن تسكتين شوي ،، أبي أفهم وش صاير .. " ويمسح دموعها بظهر كفينه" .. خلاص ياعمري أنتي تكلمي وش اللي حصل ..
وتبلع عبرتها ،، وتمسح باقي دموعها ،، وتتعتدل في جلستها ،، وتبدا تحكي السالفه لأخوها بالتفصيــل ،،
وهذاك من تكلمت وهو منصت بكل جوارحه ،، كـــل مافيه مذهول ،، أحاسيسه كلها منشده ناحيتها،، كنه مب مصدق اللي يسمعه ،، ياالله شـهالدنيا ،، وش هالشي العظيم اللي بيمنع ولد من أمه ،، ولاعم من عيال أخوه ،، ولا أخو من أخوه !! ،، وش هالشي الكايد اللي بيقطع أرحام 12 سنه ،، وبيحرمه لذيذ النوم ،، ويسلب من عينه الراحه ،،
كل هذا كان يدور في باله طول ماهي تتكلم ،،
بمشاعره المتناقضه بين مصدق ومكذب قال : أنتي تقولينه صادقه !!!
صيته : قسم بالله ياسعيد ،، يعني شايف الوضع يستدعي الكذب !!
سعيد : لا !! ،، بس يمكن هو قاعد يدورله مبرر ،، أو يبي يظهر قدامك بمظهر الأبو الصالح اللي أكيد ماقطع أمه إلا بسبب كايد !! ،، أو يمكن يستجدي إهتمامنا !!
صيته " وترجع العبره": أنت صاحي !! ،، أنت لو شفت منظره ،، لو شفت شكله ،، أقولك قاعد يمسح دموعه بطرف غترته وأنت تقول قاعد يدور مبرر ومدري وشو!!،، لاسعيد ورب الكون إن أبوي فيه شي ،،
رجع سعيد لورا ،، وعنز يده على طرف الكنبه مع تخليلها بين خصلات شعره ،، وأبحر فذاك البحراللي أبحرت فيه صيته ،، وغرق مثلها لكن بعمق أكبر،، يدور له الخلاص ،، ويدور لأبوه النجاة ،، الأمور مختلطه عليهم ،، والعقده باقي مانحلت ،، وشكلها قويه ،، قويه بالحيــــل !!
قالت صيته في لجة البحور : إسمع أنت ألحين خلك قريب منه ،، وحاول تاخذ مافي خاطره ،،
كون ربي مايكتبله الصلاح إلا على يدك ،، وأنا من اليوم ورايح بجي فوجهه فالطالعه والنازله ،،
سعيد : يابنت الحلال أولي كلام غير داه ،، كنك ماتعرفين البير وغطاه ،، يعني ماتدرين إنه لاشافني كنه يشوف جني قدامه !!
صيته : أقول سعيد ،، لاتتهرب من أول ضعف حسيت إن أبوك فيه ،، أنتو أصلا ماتعودتوا توقفون مع بعض فوقت الشده،، كلن فحاله وفحياته ،، ولاطاح الواحد كلن تخلا عن الثاني ،، وياسعيد أبصم إن أبوي في محنه وش خانتك لاصديت عنه ولاوقفت معه وشفت وش فيه ووش مافيه صدقني الدنيا بتدور عليك !!
ويتسلل سعيد ويعلوه السكون ،، طلع من الغرفه ومن البيت بأكمله بهــــدوء ،، ركب سيارته
رايح للكوفي وبدا معاه مشوار التفكيـــر اللي أكيد إن مداه أبعد من الكــوفي ،،

\
:

من قبل العصر وهو يدق عليه وجواله مقفل ،، عرف إنه حاطه على خدمة موجود ،، مايبطل حركاته سلطان ،،قال بيدق وبعدين هو يشوف رقمه ويدق عليه ،، لكن ألحين بيذن المغرب وهو ولادق ،، دق على واحد من ربعه يسأله عنه لكن قال إنه ماشافه اليوم ولامر عليه أبد من طلعوا من الجامعه ،،قلق عليه بزياده ،، من هو فالمستشفى وهو شكله ضايق ،، وخاطره متكدر ،، " يالله سترك " ،،قالها بندر بقلب مشوب بالقلق على أخوه ،، عنز يده اليسار على المعناز وفيده اليمين الجوال ،، ووجهه مبين عليه الشحنه ،،
قالتله غاليه اللي من صبح تراقبه : يابن الحلال عين خير ،، إن شاء الله مابه إلا الستر ،، يمكن جواله مافيه بطاريه وطفى عليه ،، ولاماعنده شبكه لاتحاتيه حبيبي إن شاء الله ماقدامه الا الخير ،،
بندر " وهو قايم ": الله يستر ،، هو طلع من المستشفى وهو ضايق،، اممم أنا بروح أجيب مهره وخالتي ،، أذن المغرب ،، وكني أشوف مهره ألحين مولعه ..
غاليه : لا أولروح صل بعدين روح المستشفى ،، تصبر مهور ماعليها خلاف ..
بندر " وهو بيطلع": يصير خير ،، شوفي حياة قوليلها إذا دق عليها سلطان ولاشي تخليه يكلمني ،،ولاهي تطمني عليه ،، ياللا فمان الله ..
غاليه " تودع طيفه اللي إختفى بسرعه": إن شاء الله .. الله يحفظك..
بعد ماطلع زوجها شالت صينية القهوه والشاهي وودتهم المطبخ ،، ورجعت مره ثانيه للصاله ،،جلست قدام التفزيون بس ماشغلته ،، ماتدري ليش ماتحب تشوف التلفزيون هالوقت بالذات ،،وقت مغيب الشمس تحب تستشعر عظمة الخالق فالغروب ،، منظرها وهي تغيب وتودع سماها العظيمه شي غير طبيعي بالنسبه لها،، خذت جلالها وطلعت برا في السور ،، جلست على عتبات الدرج حقت الباب الرئيسي ،،وعينها للسماء فـــوق ،، تراقبها ثانيه بثانيه ،، تذكرت كلام حياة لها ذيك الأيام ،، أيام حياة الأوليه!! ،،
" لاتفوتين عليك لحظه من لحظات التأمل في عظمة الخالق ،، اول شي على أجر ،، ثاني شي حلو الشعور اللي تشعرين فيه فهاللحظات ،، يعني هي لحظات حلوه واللحظات الحلوه بتجي أيام نتمناها ،، فتأملي دامك تقدرين "،،
كانت تقوله لها حياتها ذات "قرب" ،، مسحت غاليه دمعتها اللي كادت تخونها ،، وااهـــه بعمق المحيط طلعت من جوفها على الحاجز اللي بنته هي بيدينها بينها وبين أختها ،، إبتسمت بحزن على ذيك الأيــام الخوالي وقامت تبي تروح للملحق حق العيال توسع صدرها شوي بالتنقيب والبحث ،، دخلت أول شي السيب " الممر" اللي يوديله ،، من دخلته وهي مسدده خشمها من أنواع الروائح اللي قاعده "تداعب " حاسة الشم عندها،، فتحت الباب بقـــوه لأنها عارفه إن نايف كان نايم ،،
سدت خشمها بقوه وقالت : وجـــــع حسبي الله عليكم وش ذاالريحه ،، وعععع حشا تقول جيف ،، الله ياخذبليسكم ماتسبحون!!!
وتروح يم الشباك وتفتح الستاره بقوه ،، وتفتح الشباك بقوه أكبر ،، لفت بعيونها يمين يسار تدور لها صيد ،، مجله ولاشريط ولابرنجلز ولاحتى سنكرس ولاأي شي ممكن تسرقه وتنحــاش ،، لكن ذاالعيال أعوذ بالله منهم مايخلون وراهم شي من آثار الجرائم !!
قالت بهمس كنها تسمح نفسها " أحسن أصلاً مابي شي !!" وتبتسم إبتسامه خبيثه وتوجه لبرادة المويه اللي كانت ورا الباب وتصب لها كــاس مويه من البـــارد ناهيك عن البروده اللطيفه الأصليه في الجو ،،
وتوقف على راس نايف ،، وتقول " بخبث يبرد على القلب": نــــايف ،، نوني ،، حبيبي قـــوم عندي مفاجأه ،،
نايف " صحى من سمع صوت الباب والستاره والشباك وعرف إنها غاليه من دفاشتها ": غاليه إطلعي برا دامني راقد ،، قبل لاأقوم عليك وأمسطك بالعقال ..
غاليه " ببرود" : لالا وش عقال ووش أمسطك مالـــه دااااعي ،، " وتصفق المويه بقوه على وجهه وتنحاش" ،، يبيلك سوط مب عقال هههههههههههههه
ويفز نايف من الراعه يلحقها ويقول : لعنةٍ تلعنك يالحيوااااااانه ،، أوريك يالكلبه ،،
غاليه " بضحكه ماليه وجهها يمين ويسار": هــــيييي لاتلعن ،، ترى والله لعلم أمي غاليه ،،
نايف " بإستفزاز": ياملعونه ياملعونه ياملعونه ،، هاااوش في راسك ،، " ويركض بسرعه عشان يمسكها"
غاليه " تبين كنها تقززت": حـــرام عليك نايف ،، اللعنه رجعت عليك ألحين ،،والله مايصلح ،،أأأأ هههههه ،،
ومسكها نايف وقال : مسكتك يالحماره ،، هاإختاري وش أي السبل تبيني أعذبك فيها ،،
هي على ثلاث مستويات ،، المستوى الأول مرتفع جداً ،، المستوى الثاني مرتفع جداً جداً ،، والمستوى الثالث مرتفع جداً جداً جداً ،، إختاري أيهما أحب إلى قلبك ،،
غاليه " برجا": ههههههه لاأنا طامعه في كرم أخوي حبيبي ونور عيني اللي مالي فالدنيا غيره ..
نايف : إيه إيه إدهني سيري ،، لاحبيبتي ماعندنا ذالحركات ،،
غاليه " تصرف الموضوع ،، وتلف عليه وتدور": يــوه يانايف مادريت ،، سلطان من قبل العصروبندر يدق عليه وهو مقفل جواله ،، ويقول إنه يوم طلع من المستشفى اليوم شكله ضايق ..
نايف : قولي والله !!
غاليه : قسم بالله ماأكذب ،،
نايف " يرفع حاجبه ": لايكون سواها !!! ،، " ويروح يغسل وجهه ويلبس ثوبه وغترته " ،،
فقالت غاليه بعد مالحقته: نايف وش فيـــــك قولي ،، ترى أخوه ميت عليه ،،
نايف " يطلع من الباب الرسمي للشارع": لا لا مافيه شي ،، بتأكد وبدق على بندر ،، مع السلامه ،،
غاليه : لاحـــول ولاقوة إلا بالله ،، وش بلاهم ذولا اليوم !!

\
:

دخل غرفته بسرعه ،، يبي يتحاشى جدته لاتشوفه بهالحاله ،، دخل دورة المياه وإستفرغ كل اللي فبطنه ،،
طلع ورمى نفسه بكل قوته على السرير ،، وغمض بقــوه يبي يطرد أي طيف ممكن يعيدله اللي صار ،،
نزلت دمعه وحده من زاوية عينه ،، مسحها بسرعه ،، قام من السرير بقوه ،، وأبعد كل محاولات الضعف للي كانت تبي تسلل لداخل نفسه ،، قال يخاطب اللاوعي عنده " أنا أقدر ،، أنا أقـــدر ،، أنا أقدر،، أنا أقوى منه ،، بجد انا أقوى منه،، مارح أتباسى بعمري ،،
أنا أقوى بربي ،، وأقوى بإيماني ،، عندي صلاتي ،، وقرآني ، وبعد عندي دعوة أبوي وجدتي ،، هو وش عنده غير لسانه ،، مايستـــاهل دمعتي وأنا رجال ،، والله ماتنزل عليه دامني حي "

\
:

"لحـــول ،، ياللا يايمه بنمشي الدنيا ليلت وورانا مشوار لين البيت "
قالها عبدالله للمره الألف لأمه عشان يمشون ،، من نص ساعه وهو يعيد نفس الكلمه لكن هي وين تروح وقدامها رنوف !! ،،
أم عبدالله : يارجال أنت وش بلاك ،، خلني أشبع منها ،، لي أسبوعين ماشفتها !! ،، إيه أنت وش عليك كل يوم وجهك فوجهها!!
عبدالله " بإبتسامه": خلاص وعد كل يوم بجيبك لها ،، وإذا ماجيتي بصورها لك ،، خلاص إتفقنا إتفقنا هـ يلااا قومي ،،
أم عبدالله " تقوم بثقل ": الله يصلحك كانك بتقومني وأنا مابعد مليت عيوني من شوفتها ،،
عبدالله : أبـــد ماكنك من يوم جيتي وأنتي متبطحةٍ عندها ،،
أم عبدالله : جعلني مابكيها ولاأبكي عيالها ،، أهم شي خل العامل يشملها ويعزل قعيدها منها ،،
وخله يركب السطل في السياره ،،
عبدالله " بضحكه رنانه" : أبشري يطولي فعمرك ،، أنتي إركبي بس والدنيا بتزين ..
وصلها للسياره ورجع للعامل يوصيه على الناقه ،، ورجع محمل بسطل الحليب ،، وماأدراك مايخفيه الحليب !!

\
:

" يابو سلمان والله العظيم انا إديتكياها وأنت مضيت عليها ورقعتها تاني ،، والله العضيم ماكتبدتش عليك"
سالم : كذاب ملى وجهك ،، انا ماشفت شي ،، ولاوقعت على شي !!
حامد: يابيه وربنا مكدبتش ،، لو عاوزني أقيبهالك أقيبها ،،
سالم : طيب ليش ناسي انا ،، علمني ليش هاااه !!
حامد : ماعرفشي حضرتك ،، بس دي مش أول مره تنسى،، إنت على طول تنسى حاقات إنت عملتها ،، وحاقات ماعملتهاش بتحسب إنك عملتها ،،
سالم " يدور بكرسيه ": أقـــول لايكثر ،، أقول إنقلع وخذ الباب وراك ،،

\
:

" يمين بالله ماعندك ذرة إحساس ،، ولاليش أدنس إسمه العظيم وأحلف به عليك ،، أصلا ماتستاهل حتى أتكلم معك "
ويروح يمها ،، ويشد شعرها بقــوه ،، ويجرها له ويقول وهو مسكر على أسنانه بعصبيه : ماأستاهل هااااه ،، ماأستاهل تتنازلين !! ،، على بالك ميتن عليك ،، ولا بيجيني المرض إذا ماكلمتيني !! ،، " ويدفها بقوه لين طاحت على الأرض "،، تحسبين نفسك من هـــاااه!!
عشانك أنتي اللي تصرفين على البيت بتشوفين نفسك علي ،، لاياحبيبتي إصحي أنا الرجال هنا ،، لاتنسين وخليني في بالك دايـــم ،، ولاأعد لين العشره وأنتي ماجبتي عبايتك تروحين للبنك واللي خلقني إن ماتمسين على خير ذاالليل ،، بســـــــــرعــــــــه ..
وتناظره بجفـــاف حار جداً ،، تقوم بألم وتعطيه نظره ساوته بالتراب ،، طلعت عتبات الدرج كنها عجوز جــار عليها الزمن ،، دخلت غرفتها بألم ،، وراحت يم سرير بنتها النايمه باستها وأستودعتها ربها الذي لاتضيع ودائعه ،، طلعت جوالها من الشنطه وأرسلت " إدعيلي ،، محتاجتكم حيــل " ،، وخذت عبايتها المعلقه على الشماعه وخذت شنطتها بعد ماحطت كرت العائله والتعريف حق مدرستها ونزلت ،،

\
:

" تشربينه يعني تشربينه ،، كلمه مانيب مثنيتها "
قالتها أم عبدالله بصيغة الأمر لمهره ،، من بعد ماجات من المستشفى وهي جات من المزرعه إستلمتها وبدت رحلة إكلي هذا وخلي هذا ،، وإشربي هذا وخلي هذاك ،،
مهره " شوي وتبكي ": يمـــه والله ماحبه ،، حرام عليك شوفي حياة عندك وغاليه هذي هي جنبك خليهم يشربونه ،، وش معنى انا !!!
أم عبدالله : لايكثر هرجك أقول ،، إشربي إخلصي علي ،، ولا إكليه بالتمره إختاري ياذا ياذا ،،
مهره : ماأخس من عبيد إلا عسفان ،، خلاص بشربه بس فّوحوه لي ،،
أم نايف : ولايهمــك نفّوحه ،، ونحط معه زنجبيل وهيل بعد !!
غاليه " وهي تطالع مهره ": ونسكافيه يمه عشان ست الحسن ماتشربه كذا ،،
حياة " بإستفزاز": وبعد نسكويك خاله ،، مهور دلوعتنا لازم ندلعها زين مازين ،،
مهره " بنظره ": تتريقون حظراتكم معليــه بيجي يومكم ،، " وتناظر جدتها اللاهيه في إستغفارها " ،، طلبتك يمه ،، إغصبيهم الله يسعدلي وجهك ،، شوفيهم يظحكون عليك،، يقولون أمي غاليه مسيكينه ماتقدر إلا على التعابى وإلا إنا الصحيحين نتحداها تقدر علينا ,, " وتناظرهم وتحرك حواجبها " ،،
هم شهقوا مع بعض ذيك الشهقه اللي كانت بتطلع روحهم ،، يــاعوينهم وش بيفكهم منها ألحين !! ،،
أم عبدالله " بإبتسامه" : انا مقدر إلا على التعابى ،، معليه بتشوفين أنتي وياها ،، يــامزنه جيبي السطل ،، فوحي كاس لمهره بس ،، وأنتو لكم الطازج ،، إشربوه بغبوقه بعد ،، خلونا نشوف من أقدر عليه أنا ،،
حركوا شفايفهم بغـــل ،، وناظروا مهره بحقد ،، ومهره ميته من الظحك ،،

\
:

فنفس الوقت ،، وفنفس البيت لكن في مكان ثاني ،، فالملحق الخاص بنايف وسلطان ،،
جالس عبدالله وبندر لحالهم ،، نايف لألحين ماجا،، وسلطان لألحين مادق ،، وقلوبهم تغلي ،،
عبدالله : بندر ترى جبنا معنا حليب خلفه ،، كانك تبي إدخل جب ،، ولاكلمهم يجيبون ،،
بندر " بعيد عنه": لا لا مابي ،، خله لين يجون العيال ،،
وعلى تتمت كلمته دخل نايف وجواله فأذنه كان يقول وهو مبتسم : الله يهديك وأنا أخوك
طيب علمنا إنك بتروح ،، مخلينا نطبخ على نار وانت متهني ،،
ثم ضحك وقال : أهم شي لاتنساني من ذيك الدعوه الزينه اللي علمتك إياها ،، والله يقبل منك وأنا أخوك والله يرجعك لنا سالم غانم ،،
ثم قال : الله ياخذك والله إنك ماتستاهل الكلام الزين ،، نبي نتجمل فيك يعني إنك في مكه ،، كون ولاكون تطولنا دعوه ،، لكن وش نقول ذيل الكلب عمره مايتدعتلشي ،، المهم لاتنسانا من الحمبص وحلاو البيض ،،
بعدها قال : هههههههه فمان الله ،، الله يحفظك ،،
سكر السماعه وجلس مقابلهم ،، ثنينهم عرفوا إنه سلطان ،، لكن الدهشه مرتفعه شوي ،،
قال بندر بسرعه : راح لمكه صح !!
نايف : إيواااه ،، وإعتمر وخلص عمرته بعد ،، وقده فالفندق ..
أبو عبدالله : مشاء الله ،، زين يوم راح ،، خله يروح عن نفسه شوي ويرتاح ،،
بندر : وشو زين !! ،، يروح حظرته مرتاح وإحنا قلوبنا على جمر ،، يسافر ولايقولي ،، وطول اليوم وأنا قاعد أحاتيه ومشتحن عليه ،، ماجلس وسواس فالدنيا إلا جاني ،، وفالنهايه حظرته مكيــف ومستانس في مكه ،، لكن معليه علمه عندي ،،
سكت شوي ،، وطلع جواله بعدها بشوي ،، دق عليه ،، وعلى طول رد عليه سلطان بصوت مبين عليه الراحه
وقال : أرحب ،، أرحب أرحب ،،
بندر : لامرحبا ولامسهلا ،،
سلطان : أفااااا ،، عسا ماشر ياخوك
بندر: إلا الشر بعينه ،، سبع ساعات وأنا أدرولك ،، وقلبي يطحن عليك ،، وأنت ولاهمك ،،
ماقلت بدق على أخوي أطمنه علي ،،
سلطان : عل هونك الله يطولي بعمرك ،، السفره جات كذا تساهيل من الله ،، قلت بسافر مكه آخذلي عمره أرتاح بعد اللي صار وأدعي ربي بالخيره ،، ووالله إني رايح المطار كذا على عماي ،، وتسهل الحجز على طول ،، حتى حرامي والله إني طالع أشتريه قبل ماتقلع الطياره بساعه ،، وكنت بدق عليك ألحين لكن سبقتني ،،
بندر : مهب عذر ،، كان أرسلتلي رساله ،، يابندر ترى بروح لمكه ،، مابتكلفك شي ،، أحسن من الحوسه اللي حستني إياها ،،
في غمرة العتاب بين أخو وأخوه ،،
كان عبدالله يقول لولده : شكلك كنت داري !!
نايف : حرام إني ماكنت أعرف ،،بس حسيت إنه رايح ،، من يوم جاته سالفة البعثه وهو يقول بروح العمره ،،عاد بعد اللي صار اليوم تأكدت إنه راح ،، ورحت المطار وسألت رجاجيل أعرفهم هناك وأكدوا لي ،،
عبدالله : ماحصل إلا الخير ،، الله يحفظه ويستر عليه ،،

\
:

خذت دبدوب أبيض نــاعم،، وخذت معاه شموع في كاس على شكل قلب وكان ملونه بأحمر مع أصفر ،، ومرت نكتار وخذت لها أشياء خطيره من عنده ،، وبعدها راحت الحميضي وخذتلها ساعه عجيبه بسير أبيض مرصعه بالألماس ،، بعدين مرت السواني وخلتهم يغلفونها لها وحطت معاه كرت بعد ماكتبت فيه " ربي وهبنياك أعظم هديه ،، ماأهديتك قدرك وربي ،، لك قلبي ،، أحبـــك موت "،، إنتهوا من تغليفها وطلعت بشكل باذخ جداً جدا ،، طلعت من السوق بنشوه كبيــره ،، وسعاده أكبر ،، ركبت السياره بعد مانزل السواق وخذا منها الكيس ،،
،، ناظرت الكرتون اللي جنبها برضى وقالت للسواق يروح بيت حبيبة القلب ،،

\
:

بعد ماإنغصبت على الحليب وعرفت إن أخوها سلطان سافر لمكه،، طلعت فوق كهفها مثل ماسماه عمها عبدالله ،، دخلت الغرفه وطلعت الجوال حصلت مسد كول من أخوها سلطان ومسج من سميره ،،قرت المسج بتنهيده وقالت بهمس تكلم عمرها " الله يعينك ياسميره ،، ويصبرك على ماإبتلاك ،، عز الله بتدفنين عمرك حيه ،، أنتي لو تسمعين كلامي بس وتحفظين الباقي من ماء وجهك ،، أبي أعرف بس وش مصبرك عليه لذلحين ،، يارب عينها عليه يارب " ،،
وحطت على رقم أخوها سلطان كانت بتكلمه لكن حست بخمول ،، قالت بتقوم تتروش تتنشط شوي بعدين ترجع تكلمه ،،

\
:

فالكوفي ،، كان داخل ماطلع للخدمه ،، شافه فيصل خويه ضايق وقاله بياخذ مكانه ،، كان سرحــان فدنيا أبوه ،، الكلام اللي سمعه من أخته مب سهل ،، ألف فكره وألف هاجس قاعد يروح ويجي ،،أبـــد مالقى تفسير للكلام اللي قاله أبوه اليوم ،، طلع جواله من جيبه ودق على سلمان لكنه مارد ،، وفي المره الثانيه جاه صوته يقول : مرحبا
سعيد : مرحبتين ،، كيف الحال ،،
سلمان " بإقتضاب": بخير
سعيد " بنفس الإقتضاب": وينك ؟؟
سلمان : وش عليك مني !!
سعيد : لاماعلي منك ،، لكن أبيك فموضوع ضروري ..
سلمان : مانيب فاضيلك ،، كانك تبي فلوس رح لأبوي يعطيك ،، محد كلا حلي وحلاي غيرك ،،
ياخي إترك منك هالوظيفه اللي تاخذ ولاتعطي وتعال إشتغل عند أبوي فكني من مصاريفك شوي !!
سعيد " بتنهيده ": الله غني منك ومن حلالك ،، إرتاح مارح أطلب منك شي بعد اليوم ،،منة الله ولامنة خلقه !
سلمان : الله كريم ،، اتمنى هالشي ،، إخلص علي وش فيك داق ؟؟
سعيد : ياخوي أبيك فموضوع ضروري أنت ماتفهم !!
سلمان : لاماأفهم وش في راسك !! ،، وياخي ترى مب فاضيلك قلت ،، بكره وراي سفر ،، وإسمع ياويلك تعلم أبوي ،، تراه مايدري ،، وقسم بالله لاتعلمه ماتلقى مني خير ،،
سعيد : انت تدري إنك تافه وسخيف ،، وماعندك سالفه !! ،، أقولك أبيك فموضوع ضروري وأنت تقول وراي سفر ،، أمحق اخو ،، سبحان من جمعنا في بطن واحد !!
ويسكر السماعه فوجهه ،، وينطل التلفون على الطاوله اللي قدامه بفقد ،، ويقوم بيطلع يمكن تخف هالشوشره اللي داخل عقله ،،
\
:

دخلت النت قالت تخفف الضغط اللي جاها اليوم ،، سجلت دخول للمسن بس قبل لاتسجل الدخول حطت الحاله غير متصل ،، مالها نفس تكلم أحد ،، إنفتح وحصلت سلمى موجوده إبتسمت لها لكن وين تكلمها وهي فهالحاله ،،
فتحت صفحة المنتدى اللي كان محطوط الصفحه الرئيسيه لها ،، وبالتحديد صفحة الخواطر ،، فتحت صفحات أخرى في إرتباطات ثانيه ، وصارت تتجول بصمت فيها ،، فتحت على ذيك الخاطره " الرقص على حافة السعاده " تبي تشوف حكاية ليل ردت عليها أو لا ،،
حصلت ردها من ذاك اليوم وردود جميع الأعضاء مثل ماهي في مكانها ماتغيرت ولاردت على أي واحد منهم ،، فتحت على الفايل حقها وحصلت آخر دخله لها من هذاك اليوم اللي نزلت فيه الخاطره ،، ماجا في بالها ،، سكرت الصفحه ،، وراحت للصفحات الثانيه تستجديها تخفف عنها لكن أفكارها مستحيل تخليها ،، مالقت شي مهم في هذاك الوقت أو بالأحرى ماأهمها كان أعظم ،، قدها بتقطع الإتصال لكن جات فبالها فكره ،، وبسرعه راحت تنفذها قبل لاتتراجع !! ،،

\
:

بعد صلاة العشاء ،، دخلت غاليه المطبخ تبي تجهز عزبة زوجها ،، خذت السله وحطت فيها كل اللي يحتاجه من أغراض الأكل والشرب وكل شي ،، دخلت عليها أمها وهي تدخل الأغراض ،، راحت يمها تساعدها وتشرف عليها ،، وتشوف وش حطت ووش ماحطت ،،
فقالت غاليه بحنان : يمه فديتك إرتاحي ،، خلاص سويت كل شي
أم نايف : مايخالف حبيبتي بس بشوف وش سويتي ،،
غاليه "بمكر": ليــه مب واثقه فيني ، ولا مب مره ولا مب مره هاااه ؟؟
أم نايف " بمكر أكثر": شوفي ،، هو الثقه موجوده ،، لكن إنك مره هذي فيها نظر !!
غاليه " بتمسكن": يمــــه حرام عليك ،، تربيتك وبعد فيها نظر !!
أم نايف : إن البلا إنك تربيتي ،، عز الله أجديت في كل شي إلا فتربيتي لك !!
غاليه " بتقلب زعل ": لحـــول ،، ليه يادافع البلا اللي يشوفك كني فاجره !! وشو ماجديتي فتربيتي ليه عاصيه ولافاسقه !!
أم نايف " بحكمه": لاإله إلا الله ،، وش فيك هبيتي فيني ،، لايمك لانتب فاجره ولاعاصيه ،، بس ماتعطين رجلك حقه ،، يمك ترى حقه عظيـــم عليك ،، ورضاه من رضى رب العالمين ،، أنتي وأنتي في ذمتنا رضانا من رضى رب العالمين ،، لكن بعد ماجيتي فذمته رضاه قبل رضانا ،، ياغاليه ياحبيبتي إفهميني ،، الرجال مب معناته إنه صابر ولايتكلم ولايشكي إنه معجبته تصرفاتك ،، المره وش خانتها وهي مهملة رجلها ،، الرجال يعرس يبي الراحه ويبي مرته تريحه وتشيل عنه لعرس عليك ذيك الحين ولاطلقك وش بيفيدك رقادك ولاإستهتارك فيه ،، لاقمتي ذيك الحين من نومك ولاصحيتي من غفلتك يكون فات الفوت ،،
غاليه " ووجهها متلون ألوان قاتمه": يمـــه وأنا ماجلس معك إلا تفتحيلي ذالموال الطويل العريض ،، أنتوا وش دراكم وش اللي فخاطري ،، ووش دراكم عني وعنه ،، يعني عشاني ماقومله الظهر صارت مشكله وإنه بعرس علي ولابيطلقني !!! ،، أعوذ بالله منكم ومن تفكيركم !! ،،
أم نايف " بحلم": ليتها جايه على القومه ياغاليه ،، قوليلي متى آخر مره حطيتك فعينك كحله ،، ولازينتي وجهك بشوي مكياج ،، ولاقوليلي متى آخر مره لبستيله لبس صاحي ،، قدلك شهور وأنتي بس بذالجلابيات اللي هرت من كثر ماتلبسينها ،، وليته من قل ملابس عندك ،، الدولاب مليان أشكال وألوان وأنتي مافكرتي فيوم تزينين لرجلك قدام خواته ،، تحسبينه مايتأثر ،، لاعيوني تلقين قلبه متقطع ،، لكن شوفي وش مصبره !!
غاليه " بغضب": حلوه وش مصبره !! ،، بندر مايهمه هالأشياء الشكليه ،، هو عارف إني أحبه وأبديه على عمري ،، يعني شوي كحله ولاشوي أحمر وأخضر ،، ولالبس بيعرف إني أحبه ،، ولابيزيد من حبه لي ،، وش هالمنطق !!
أم نايف : منطق العقل وأنا أمك ،، لكن خلي في بالك الرجال مثل البزر الصغير تملاه الفرحه للاقى إهتمام من زوجته ولو بأدنى شي ،، وأقرب مثال أبوك الله يطولنا فعمره ،، ولا وش بيصبره علي وأنا من جبتك معاد حملت ،، لقى الدل الزين والوجه الزين ،،ولقى له وحده تشيله من الأرض شيل ،، تشيل عنه همومه ،، وتواسيه فأحزانه ،، وتشاركه ففرحته ،، وتعينه على نفسه وعلى طاعة ربه ،، ولامثل ماقلت وش حاده على الصبر وأنا أمك !!
ناظرت غاليه أمها بدموع تعلن النزول القريب ،، وبقلب يعلن التأثر الشبه بعيد ،، حطت البريق اللي فيدها في السله وطلعت بسرعه لغرفتها ،، مأمنها وأمانها ،،

\
:

فأطهر بقــاع الأرض على الإطلاق ،، فالبيت الحرام اللي الصلاة فيه تعادل مئة ألف صلاه مع الرسول عليه الصلاة والسلام ،، حيث الخشوع والخضوع والذل والعزه ،، حيث الرجاء والأمل ،، حيث الولع والإنطفاء ،،حيث الرحمة التي وسعت كل شي في الأرض وفي السماء ،، نادى المنادي لصلاة العشاء بعد عشر دقائق من أذان العاصمه الرياض ،، وهو جالس في المصابيح القريبه من بوابة الملك فهد الله يرحمه ،،قاعد يقرا قرآن بعد ماتحلل من حرامه ،، بعد ماأذن المؤذن سكر المصحف وقام يصليله ركعتين تحيه للمسجد ،، ويدعي الله باللي فيه خير وخيره فدينه ودنياه ،، خلص من الصلاة ورفع كفينه للواحد الأحد اللي مايخيب الرجا ولايردله طالب ،، ودعــاه بأن يوريه الحق حق ويرزقه إتباعه ويوريه الباطل باطل ويرزقه إجتنابه ،،
ويعينه على نفسه وعلى خوانه ،، ويسكر باب السفره في نفسه ويعينه على نسايانها والإبتعاد عنها ،، وإن كانه ترك مستقبله عشان يرضي جدته وخواته إنه يرزقه رزق ماحسبله ويفتحها فوجهه من حيث ماولاه ،،
أقيمت الصلاه ،، وجاه صوت الشيخ الخياط لينذر ببداية رحلــة خشوع وإرتماء بين يدي الرحمن الرحيم ،،

\
:

بعد ماطلعت غرفتها ،، إنرمت على سريرها بشوق كنها مفارقته قدله سنيـــن ،، غمضت عيونها وجاتها الأفكار نفسها ،، والهم نفسه ،، وكلام سلطان يعاود الكرّه مره ثانيه ،،
خذت جوالها من جنب المخده ،، قالت بتكلمه تهنيه بالعمره ،، لكن عورها جرحه ورمت الجوال جنبها بألم ،، باقي الحكايات توديها وتجيبها ،، كانت بتقوم تصلي لكن شافت اللاب توب على المكتب وسوفتلها نفسها الصلاه ،، وراحت يمه تبي تشبك على النت ،،
شبكت وإنفتح المسن تلقائي ،، كالعاده كل القائمه عليهم العلامه الحمراء ،، مافيه أحد يستاهل تضيع وقتها معاهم ،، كان تفكيرها كذا ،، كلـــهم كلامهم كذب في كذب ،، مظاهر كتابيه فقط ،،
كل كلامهم ماله معنى ،، إهتماماتهم غريبه عجيبه ،، وتفكيرهم دون مستواها ،، لألحيــن مابعد لقت أحد تقول إنه يستاهل إهتمامها !! ،،
فتحت على المنتدى ،، وفتحت صفحه تعنيها كالوجد ،، أنرسمت على شفاها إبتسامه متعبه على وجه مايدري وش الدنيا مخبيتله ،،
دق جوالها فهاللحظه ،، وقطعت الإتصال على غير وعي منها يوم شافت الرقم قد مر عليها ذات يوم والمشكله اللي كان بيسويها لهم ،، إنتظرت شوي كون يسكت لكنه واصل الإتصال ،، ردت عليه وسكتت لحظه ليــن تأكدت إن الصوت صوت حرمه إستغربت !!
....: السلام عليكم
مهره: عليكم السلام!!
....: شخبارك عساك بخير
مهره: الحمدلله بخير،، من بغيتي أختي ؟!!!
....: اممم بغيتك أنتي ،، مب هذا جوال مهره بنت عبدالرحمن ؟؟
مهره : إلا وصلتي طال عمرك ،، من معي ممكن اعرف ؟؟
.....: وحده حابه تتعرف عليك ..
مهره: طيب ممكن اعرف من أنتي ،، هذا الجوال قد شفته قبل في جوال بنت عمي ،، كان دايم يزعجها !!

\
:

يتبع

":":":":":":":"

" رذاذ الأرق يملأ وجهها ،، والأمطار المتعبه تغزو مقلتيها ،، هي كما هي محرقه "

[جرح الذات]

﴿ الجزء التاسع ﴾
\
:

فتحت على المنتدى ،، وفتحت صفحه تعنيها كالوجد ،، أنرسمت على شفاها إبتسامه متعبه على وجه مايدري وش الدنيا مخبيتله ،،
دق جوالها فهاللحظه ،، وقطعت الإتصال على غير وعي منها يوم شافت الرقم قد مر عليها ذات يوم والمشكله اللي كان بيسويها لهم ،، إنتظرت شوي كون يسكت لكنه واصل الإتصال ،، ردت عليه وسكتت لحظه ليــن تأكدت إن الصوت صوت حرمه إستغربت !!
....: السلام عليكم
مهره: عليكم السلام!!
....: شخبارك عساك بخير
مهره "وعلامات التعجب على وجهها": الحمدلله بخير،، من بغيتي أختي ؟!!!
....: اممم بغيتك أنتي ،، مب هذا جوال مهره بنت عبدالرحمن ؟؟
مهره : إلا وصلتي طال عمرك ،، من معي ممكن اعرف ؟؟
.....: وحده حابه تتعرف عليك ..
مهره: طيب ممكن اعرف من أنتي ،، هذا الجوال قد شفته قبل في جوال بنت عمي ،، كان دايم يزعجها !! وأعتقد كان ولد !!
....." بتلعثم": هـااا ههههه ،، لالا وش يزعجها ،، انا كنت أبي أكلمها وأسلم عليها ،، لكن هي ماعطتني وجه فقلت أكلمك أنتي ..
مهره : مشاء الله شكلك عارفه العائله كلها !!
......: أكيد ،، أعرفكم واحد واحد !!
مهره : طيب ممكن تقولين من أنتي ،، لأني بديت أمل ..
.....: لاااا وش تملين !! المشورا توه بادي !!
مهره " بتعقيدة حواجب": وش مشواره بعد !! ،، "وبنرفزه" لو سمحتي ممكن تقولين من أنتي !! بسرعه قبل لاأسكر السماعه فوجهك ,,
.....: هههههههههههه ،، عادي سكري ،، بكره بكلم وبتردين علي ..
مهره : وااااو واثقه بعد ،، بسكر ،، ودقي بكره وشوفي من بيرد عليــك ،،
وتسكر الجوال وتحوله على موجود ،، وهي داخل نفسها ماتدري حاسه إنها وحده من صديقاتها تسوي فيها مقلب ،، " يـــاويلهم مني كانها وحده منهم" كانت تقولها فخاطرها وهي تفكر مين اللي ممكن تسويها فيها ،، بددت الأفكار وأغلقت الكمبيوتر وقامت تصلي ..

\
:

فاليوم الذي يليه ،، نهار يوم الأربعاء ،، الربيــع مخيم على الرياض ،، والسمـاء والشمس متصافيـــن اليوم ،، ومن خجلها متخبيه ورا الغيوم ،، ونسمـات الهواء العليــل تهب بين اللحظه والأخرى ،،
إستأذن بندر من دوامه هو ومجموعه من ربعه عشان طلعتهم للبر اللي تأجلت لليـوم ،، عشان طيحة مهره أمس ،، كلن توجه لبيـته يجيب اغراضه وعزبته ،، وبعد صلاة الظهر يتجمعون عند المفرق ويتوجهون للتنهاة ،، دخل البيت وراح يم جدته وخالته ،، صبحهم بالخيــر وجلس معهم ،،
قالت له جدته بهمس وهي تطالع مزنه لاتسمعها : تراني أبيك في سالفه ،، لصليت الظهر تعالي وأعلمك ،،
بندر" يضحك لهمس جدته ": يؤ يؤ ياحليــلك لصليت الظهر بقولكم فمان الله ..
أم عبدالله : وين بتروحله ياكافي !!
بندر: يمـــه وش فيك !! ذلحين قدلي أسبوع وأنا معلمكم إني بروح البر وانتي تقولين وين بتروح!!
أم عبدالله : إيـــــــه ،، نسيت يمك الله لايشغلنا إلا بطاعته ،، هـ الله يحفظك ويستر عليك ،، ياالله جعل ملايكـة الرحمن تباريك ،، هالله هالله في نفسك وأنا أمك تلحف زين من البرد ،، وسكروا عليكم الخيمه زين مازين لاتجيكم الxxxxب ولاالديبان ،، ترى البر ماينومن الله يكافينا الشر ،،.
بندر: هههههههه فديت عمرك ،، كني أول مره أروح للبر !! ،، تراني من طروشه حافظه شبر شبر ،، لاتحاتين جعلني فدا رجيلاتك ،، كلها يومين وبكون عندكم .
أم نايف " بحنان كنها تداري خيبة بنتها": ياولدي ترا كل شي جاهز ،، العزبه وفراشك وكل شي على كيفك ،، مابقى غير تاخذها وتوكل على الله ،،
بندر "بإبتسـامه ملت محيـاه": الله يعطيك العافيه ياخاله ويرضى عليك ..
أم عبدالله " تكلم مزنه": ترى هي ذلحين اللي مجهزه كل شي ،، ومخليه بنتها تكبر المخده ،، روحي روحي قومي بنتك يامــال الدوام ،، تشوف رجلها وتباريه ،، بيروح عنها يومين وهي مكبره المخده ومكبره الراس بعد ،، عزالله بيشيب وليدي عجل ماأبطى !
أم نايف " تمتص كعادتها": الله يهديك ياخاله بنيتي هي اللي مرتبه أغراض رجلها من أمس ،، وهي قامت من صبح لكن طول عليها بندر وطلعت غرفتها ،، تقول لجاء خليه يمرني فوق ،، " طبعا كلام من تأليفها "،،
وتطالع أم نايف بندر عشان يقوم تفادياً لكثر الكلام اللي بينقال ،،والسيره اللي مارح تتسكر إذا إنفتحت ،،وهو بدوره قام وهو مغمض،، عمى عينه هالموال المقرف بالنسبه له ،، راح بيتوجه للدرج فقالت جدته : إيــه رحلها ،، رحلها محد كبر راسها غيرك !!

\
:

بعد العصر ،، في السياره متوجهيــن لبيت أهلها ،، يبي يقطهم عندهم عشان " يســافر وهو مرتاح " على زعمه ،، أو يخلي مسؤوليته تجاههم ،، هذا إن كانت المسؤوليه موجوده أصلاً ،، بكره طيارته لكن عشان يجهز على راحة راحته ،، مافيه أي إزعاجات أو منغصات ،،
طبعاً لاكلام لاصوت ،، بس يقطع الصمت ويرجعه صوت دانه بنتهم اللي عيونها مشبصه على القزاز ،، وصوتها يجي ضاحك مره ويجي مطلسم مره ثانيه ،، ووبعد فيه صوت الإف إم قاطعه عليهم الطريق ،،
وصلوا للبيت وقدها بتنزل مسك يدها بتناقض ،، وطلع من جيبه ميتين ريال ومدها بها ،،
وقال : هذا الموجود معي ،، صرفيبه عمرك أنتي وبنتك ،، وإن شاء الله مارح تحتاجون شي ،،
كلها يومين وجايكم ..
سميره " تخزه من ورا البرقع": يــاحليلك هذا جودك!! ،، ماقويت إلا على ميتين ،، خلها خلها
لاتنقص من عمرك !!..
فهــاد " بجليـد": هـاشفتي ،، كل ماجيت أتقرب منك خطوه تبعدين خطوات !! وو ..
وتقطعه سميره بصوت مـال : لالا ياحرام تتقرب مني ،، وش هالتواضع !! ،، فديت عمره زوجي يتقرب مني بميتين ريال وهو توه لاهف مني مية ألف ،، أخخخخخ شكثر يحبني !!!..
فهاد " وبصوت أقرب للعالي": بديــنا المنه ،، أنتي عارفه لومعي شي كان ماقربت رزقك ،،
ولارزق الحريم من اللي ميتن عليــه ،،
سميره " بنغزه": هههههه ليته جات على رزقي بس !! ،، المــوت اللي يطمع فاللي فيد غيره ..
فهاد " يرجع الفلوس فجيبه": أصلاً شرهتك على من عطاك وجه ،، إذلفي ذلفوبك إن شاء الله ،،
وتنزل سميــره ببنيتها ،، وتفتح الباب الخلفي وتنزل شنطتها وأكياسها ،، وهو ولاحتى فكر يســاعدها أو حتى يبوس بنته قبل لايســافر ،،

\
:

حسناء: أبي أعرف أنا كل ذاالفلوس اللي تاخذينها ويــن تروح ؟!!!
حنان" بدلع": مـاما حبيبتي أنتي وش عليك وين أوديها ،، الخير واجد يعني بتنقصه ألفين ريال لعطيتنياها !!
صيته : أحـــلاااا ،، أحـــلاااا ،، ألفين ريال !!،، مب توك ماخذه 10000 نعنبوك وين تودين ذالدراهم !!!!
حنان " بدون لاتطالعها تشرلها بيدها بحقاره": أقــول إسكتي إسكتي مالك دخل بيني وبين أمي ،، خليك في عشيقك أحسنلك !!
حسناء " بشهقه": وجـــع وش عشيقه بعد !!!
حنان " بكيــد": مدري ،، إسأليها أحسن ،، مابي أفضحها ،، مهما كان هي أختي !!!
صيته " بذهول": عمى يعمي قلبك يالكلبه ،، وش ذالكلام يامال المرض ،، وش عشيقه ووش هباله ،، إيــه إيـــه طلعي الكلام وصدقيه زين ،، داري عن عمرك ولبقي فيني ،،
حنان" ببرود": الحمدلله واثقه من عمري ،، مايحتاج أداري على شي ..
صيته : مـــره واضح ،، تحسبني ماأعرف ببلاويها وهبابها مع نوره !! ،، تراني عارفه كل شي من الألف إلى اليــاء هاخليني ساكته أحسن عن تطلع البلاوي صدق ،،
حنان " بربكه وهي تقوم": هاااه !! يمه بتعطيني الفلوس ولالا ؟؟؟
حسناء اللي مثل الأطرش في الزفه : أنتي ووياها وش علمكم ،، تناغزون بالحكي وأنا مدري وش السالفه ،، عشيقها وهبابها ومدري وشو ،، إسمعي ياصيته إسمعي ياحنان تحسبوني يوم ماأسأل عليكم إني مطنشتكم ولامهملتكم ،، ترى كل علومكم عندي ،، وأنا ترى مخليتكم على راحتكم عـالآخر ،، هاأحسنلكم لا تخونون ثقتي فيكم ولا ترى والله لايعلمني الطير إنكم مسودين وجيهنا ليحصلكم شيء عمركم ماشفتوا مثله وإن شـ .....
وتقاطعها حنان وتقول بمسكنه: يمــه أنتي أعرف الناس فيني ،، تراك دايم تقوليلي أنتي نسختي الثانيه ،،ومستحيل أخيب ظنك فيني ،، يعني لايجي في بالك مجرد تفكير من صوبي ،، " وتطالع أظافرها بخبث"،، عاد الدور والباقي على بعض النــاس ..
صيته " توقف بعصبيه داخليه": تحسبيني برد عليــك وببرر قدام أمي كلامك ،، لاحبي أنا محترمه نفسي قبل أي شي ،، وواثقه من تصرفاتي قبل ثقة أمي فيني ،، وعمري مافكرت أخون الثقه وألف وأدور على أهلي ،، " وتقفي للدرج" ،، وعلى فكره تراك ماتسوين عندي إلا مثل الشبشب اللي فرجولي ،،
وتطلع عتبات الدرج ببــرود ينرفز وذيك واصله حدها من كلامها ودقاتها ونغزاتها ،،
قالت ووجهها أحمر وهي تلبس عبايتها الفستان : يمــه بتعطيني الفلوس ولاكيف ؟؟
حسنـاء " بسلبيه تقهريازعم إنها بتهديها": لاحبيبتي شلون ماعطيك ،، كم عندي من حنون ،، بعطيك فوقها ألف هديه وش بعد تبغيـن ،، بس قوليلي وش تبين في السوق توك أمس راجعه منه ،، وماأعتقد ناقصك شي ...
حنان "بإقتضاب": أكيد مو ناقصني شي ،، بس عاد نوره ناقصها أشياء وقالتلي أروح معها ،، ومستحيل أروح ويدي فاضيه ،، فهمتي يمه ،، هاخلصي عطيني الفلوس وريحيني ،،
وينزل سعيد فهاللحظه الحرجه بعد ماسمع آخر حوارين دار من بينهم ،،
قامت حسناء تجيب الفلوس وخلت سعيد وحنان يتناحرون ،،
قال بعبط بعد ماسلم وشافها لابسه العبايه وحاطه الطرحه على كتفها والمكياج مالي الوجه : ويـن العزم إن شاء الله ،،
حنان " بهمس واضح": جــانا الثاني بيقعد يفرد عضلاته علي ألحين ..
سعيد " كنه سمع الكلام وعصب به": أيـــش ،، أفرد عضلاتي!! مشــاء الله وش هالإحترام !!
حنان : لحـول ياسعيد ،، ماصدقت على الله أفتك من صيته تجيني أنت ،، الله يرحم والديك خلني بحالي لو سمحت ،،
سعيد : وأنتي وش اللي مضيعك غير هالشي ،، مخلينك على راحتك لأبعد درجه ،، سهر فبيوت الناس لتالي الليول ،، وهياته في الأسواق مع كل من هب ودب ،، وش بعد تبين غير ذاالضياع ،، هااااه علميني ؟؟
حنان تسفهه وتطلع جوالها وتقعد تقلب فيه ،،
سعيد بعصبيه يروح ياخذ الجوال منها بقوه ويرميه على الكنبه ويقول ووجهه قريب من وجهها : أنا لقدني أتكلم ردي علي ،، لاتخليني أتكلم على جدار..
حنان تطالعه بنقمه: أقول سعيد ريّح ريّح ،، لاتحاول تفرض سيطرتك علي ،، روح لحبيبة القلب طلع رجولتك عليها ،،
ويمسكها مع كتفها ويجرها بقوه له وهو يقول وهو مسكر على أسنانه : ياحيــوااااانه ،، بفرضها غصب من ورا خشمك ،، وطلعه مافيه طلعه أنتي وذاالعرس اللي لابسته ،، وشوفي من أقدر أفرد عضلاي عليه !!
وهنا تنزل دموع التماسيح سيــل على خد حنان وتقول من ورا الدموع : بروح يعني بروح ،، مب أنت وأشكالك اللي بتمنعني ،،
قد سعيد بيرد عليها إلا دخل أبــوه ،، شاف حنان وإستغرب من الدموع ،، ومن وجه سعيد المحمر والمبين عليه الغضب ،،
قال وهو يقرب منهم : عسى ماشر ،، وش هالدموع حنان ؟؟
حنان "منتهزه الفرصه وتبكي بدلـع": يبه شوفه ضربني وماخلى فيني مسبه إلا قالها ،، لاوبعد منعني من الطلعه !!
سعيد " برفعة حواجب": وجــع أنا ضربتك يابنت الـ.... " ويطالع أبوه ويسحبها"
سالم : لا كملها أحسن ،، تشتمها فيني وأنا واقف ،، أجل فغيابي وش بتسوي ،،
إسمع دامني حي ترى مالك حكم على بناتي ولاعلى بيتي ،، لامت ذيك الحين فتناحروا لاوصيكم .. "ويكلم حنان" ،، وانتي وانا أبوك تبين تطلعين إطلعي ماعليك منه بس لاتتأخرين حبيبتي ،،
وتروح حنان بسرعه لأمها اللي كانت مقبله عليهم وتاخذ الفلوس وتنطلق قبل لايتغير الوضع ،،
سعيد " وضغطه ضارب": إنتبهوا إنتبهوا على بنتكم ،، تراهي ضايعه ضايعه إلاإن كان حفظ من ربي ،،
يرمي كلماته ويقفي ،، يبي يطلع هو الثاني يدور راحته بعد هو ،،
إستوقفه أبوه وقال : مب أنت اللي بتجي تعلمنا شلون نحفظ بناتنا ،، إحفظ نفسك أول وبعدين تعال تكلم ،،
سعيد " ببرود": أبشـر طال عمرك ،، تامرني بشي بعد ..
سالم : وش أرجي منك يامال البلا ،، إنقلع قلع الله مداك ،،
ويطلع سعيد يجر وراه وجعه ،، يطالع فالأرض بتنهيده ،، كنـه يقول متى بتبلعيني وأرتاح ،،
توجه لسيارته وركبها ،، شغلها وجــاه صـوت الشيخ القطامي بـ (( ولاتقل لهما أف ولاتنهرهما وقل لهما قولاً كريما)) ،، يتسلل داخل عروقه ،، جــاء فوقته وفعز إحتياجه له ،،
يااااااه كم تغلغلت هالآيه بصوته ،، كنه أول مره يسمعها منـه ،، صايره مختلفه حيل ،، معناها
وصله بالحرف ،، طلع من السور متوجه لمكان راحته ،، وقف عند الإشاره اللي بعد شارعهم ،، وهو من ماطلع قاعد يفكر فأبـوه وطريقة تعامله معه ،، وبكلام صيته اللي تعاتبه ليش إنه مب موقف معه ،، زفر ااااهه من أعماقه على حيرته بين أبوه المقّنع وأبوه اللي خلف القناع ،، وكيــف يقدر يساعده ويوقف معاه وهذا حاله معاه ،، وهذا أسلوبه معاه ،، قال فخاطره"بلقالي حل فيوم ،، وربي مب مخليني ،، وبالتأكيد فيه طرق كثيره بس أهم شي ماتملص منها وأكون أقوى من أي شي ،، مهما كان هذا ابوي وله حق علي اللي بسويه فيه اليوم بيسوونه عيالي فيّ بكره " ،،ورفع حاجبه كنه متذكر شي ورجع يخاطب نفسه ،، " سلمـان !! ،، سلمان بيسافر بكره ،، عسـاه يطول بس ،، خلاص إنحلت ياسعيد إنحلت "!!!!

\
:

داخل فالبيت اللي تو طلع منه سعيد ،، بعد ماطلع جلس سالم فالصاله ومعاه مرته ،،
قالت حسنـاء: سالم ترى معاد بقى على الإجازه إلا شهرين ،، وترانا نبي نسافر من بداية الصيف ،،
سالم "بإقتضاب": طيب ؟؟
حسناء: وشو طيب ،، يعني هالله هالله جهز نفسك ،، وخلهم يحجزونلنا من ألحين ، تعرف الحجوزات فالصيف تكون صعبه ..
سالم : يصير خيـر بس ترى مب رايح أنا ، حلالنا من بيقابله ..
حسناء: عنك مارحت ،، بس أهم شي تحجزلي أنا وبناتي ،، والدراهم خبرك بها ..
سالم : مالت عليك وعلى بناتك ،، مانيب ميتن عليكم ،، ولو الود ودي كان من زمان حارمك من كل شي بس عاد وش نسوي قال وش حادك على المر قال اللي أمر منه ..
حسناء " بإحتقار":هههههههههههههه ،، مسكين حالتك صعبه والله ،، الله يعينك ويصبرك علي ،،
سالم: آميـــن ،، بس لاتستانسين الصبر مارح يطول ،، مصيري باخذ اللي أبي وربي بيساعدني إن شاء الله ،، ووأرميك رمية الكلاب ..
حسناء" ترفع حواجبها بسخريه": شفت أنت تحلم إنك تاخذ اللي ودك فيه ،، ويمين الله ماتاخذه دامني حيه ،، تبي حلنا وحلالنا يروح لمزنه وعيالها ،، ياوالله اللي بتبطي ،
سالم : مزنه وعيالها والله إنك تسوين مواطي رجليهم ،، يكفي إنهم لموا أمي وعيال عبدالرحمن،،ولا وش حادهم عليهم ،، أنا ياعمهم مافكرت أسوي مثل ماسووالهم ،، ووالله لو أموت عشانهم إني ماالحق جزاهم،،لاوبعد يصرفون عليهم وليته من كثر حلال عندهم لكن ربك منزل البركه فيهم ،، وإنا الله يستر علينا مصير خيرنا بينمحق ،،
حسناء: أقول لاتقعد تخوي راسي بذاالحكي ،، مالهم من ولامعروف ،، عبدالله ماطلع للدنيا إلا على يد أخوك عبدالرحمن ،، يعني ماله جزا لو خذا عياله عنده يردله شوي من جميله ،،
سالم " ويوقف": أصلاً الشرهه مب عليك الشرهه على اللي معطيك وجه وجالس معاك ،، والله ماتستاهلين إلا تراب فال وجهك ،،
حسناء" وهي تشوف طيفه اللي طلع": مــالـــت عليك ،، التراب فال وجهك أنت يامال الفنى ،،
وهوطلع بعصبيه يلعن اليوم اللي عرفها فيه ،، واليوم اللي صارت فيه زوجته ..
طبعاً هذا كله كان على مرأى ومسمع من صيته ،، اللي من دخل أبوها وهي جالسه على الدرج من الخلف وتشــوف كل شي ،، إرتفعت حيرتها فــوق ،، وزاد تفكيرها للسماء ،، " السالفه فيها أمي يعني !!،، ياربي وش هي مسويتله ولاوش يطلب منها ،، وش الشي اللي بتموت مب معطيته إياه ،، ياالله لهاالدرجه يمـه تحرمين أبوي من أهله !! ،، بس معليه يمه ياأنا ياانتي ،، ومصير الحق بيطلع طال الزمن ولاقصر "!!

\
:

( فـــاصل بصحبة الذكريات التي أبت أن تكون ذكريات )
.
.
فغرفتها منسدحه على السرير برفقة الدمـوع ،، منسدحه بوضع كنها حاظنتلها شيء ،،
رفعت البرواز من حظنها ،، شافت الصوره وتحسستها بطرف إبهامها وزادت دموعها بحر ،،
بكت بصوت واضح ،، وبشهقات أبت أن تموت فصدرها ،،
كـانت طفله بعمر الورود ،، وبشكل الورود ،، وبعبق الورود ،، شعرها الأشقر منسدل على
كتوفها ،، والشباصات الملونه تملاه على شكل طوق بشكل مرتب ومنمق ،، والفستان الأبيض
اللي كساها لين ركبها يملاها فرح ،، يااااااه يانظرتها البريئه ،، وياعيونها الطاهره ،، ويابياضها النقي ،،
كان شايلها رجال ،، أخذ من القمر ملامحه ،، ومن البحر عمقه ،، ومن الليل نظرته ،، ومن النهار نــوره ،، وإبتسامه تملا الكون وتفيض ،، لابس الثوب الأبيض والشماغ الأحمر ،، لاإله إلا الله سبحان من صوره ،،
شايل البنيه بحنـــان عجيب ،، وجنته اليسرى تلامس وجهها الطاهر ،، وأنفاسه قريبه من أنفاسها ،،وكان يغمز بعينه للي ورا الكاميرا ،، كنه يقهرها أو يشعل غيرتها ،،، مدري ألف هاجس وألف فكره تطري لهذي الصوره ،، صوره عجيــبه ،، لاوصف لها ،، تنزل الدموع غصب للحنان اللي بداخلها ، وللحب الطاغي على ملامحها وتضاريسها وعلى كل جزء فيها ،، بنت وأبوها متعانقين ،، البنيه محد قدها فحظن أبوها ومافوقها فوق ،، والأبو حبه فاضحه للي فحظنه وللي قدامه خلف الكواليس،،
رجعت حيـاة تضم الصوره بألم أكــثر ووجع أكثر ،، وذكريات مميته لاحصر لها ،، بكت بنشيج يقطع الفؤاد ،، وبأنفــاس متقطعه وبحنيــن معذب ،، وبشــوق أبى أن يذبل ،، وووبصبر المؤمن اللي كان مالي قلبها ،،

\
:

تحت في نفس البيت ،، لكن في جهه ثانيه من التحت ،، في الملحق حق العيال ،، جالس عبدالله وولده نايف يتقهوون ويتحادثون ،،
قال نايف: يبـه ترى خلاص قررت بآخذلي قرض على الراتب وبنسعى في المصنع إن شاء الله ،،
عبدالله : لااا وش قرضه ووش مصنعه ،، والله ماتاخذ لك قرض الله يكفينا شر الغيب وشر مافي الغيب ،،
نايف : هههههههه ،، خايف اموت وتتدبس أنت فيه ،، لاماعليك حتى لو مت بيجلسون ياخذونه من راتبي لين ياخذون حقهم ،، لاتخاف عليهم مايضيعون حقهم حتى لو إنك فقبرك !..
عبدالله : ههههه لاواناابوك ،، مب مسألة حقوق ،، بس المصنع بيقوم بيقوم إن شاءاالله بدون قرض وديون مالها داعي ،، ترانا في قبول خير إن شاء الله ..
نايف : أحــلى يبه وش ذالخير الله يرحم والديك ،، تراني ولدك وعارف البير وغطاه من وين بيجي يعني ،، من الأراضي ولا من الأسهم اللي فايضه علينا ،،
عبدالله : ربك كريم ياولدي ،، ماعليه كايد ،، وبإذن الله مايجي رمضان الجاي إلا وقد بدينا فيه ..
نايف " بعجب": يبــه أنت تقوله صادق ،، قاعد تشتغل من وراي هااا ؟؟
عبدالله : لاوالله مانيب أشتغل من وراك ولاشي ،، لكن لجاء وقته بقولك إن شاءالله أنت وعيال عمك ،،
نايف: والله إنه ينخاف منك يذا الشويب ..
عبدالله : ههههههههههه مانيب هين ترى ،،
نايف : أنا أشهــد منتب على السنع ،، وبعد تعرف تخبي علي!! الله يادنيا !!
عبدالله : هههههههه إستعينوا على قضاء حوائجكم بالكتمان ..

\
:

فأحــد الأسواق ،، قاعده تمشي بغنج هي و"عشيقتها"،، ااووه عفواً صديقتها ،، والعبايات فساتين سهره ،، واللثم على وجيهم يالله تغطي خشومهم ،، والمكياج مايحتاج كلام ،، وصوت الكعب ينسمع من آخر دور ،، كانت حنان حاطه يدها ورا خصر نوره بشكل ملفت للنظر ،، بــانت ملامح خصرها أكثر وضوح ،، ونوره متقززه فداخلها من هالحركه الروتينيه لكن طبعا قدام حنان هي أحلى الحركات ،،
قالت نوره : حنون حبيبي تعبت من المشي ،، تعالي نروح نجلس فوق ونطلب لنا شي نشربه ولاناكله ..
حنان " تضحك بميــوعه": وانتي ماهمك إلا بطنـك هههههه!!! ،، بس ياللااا لعيونك نروح نشرب شي ،، كم عندي من نوري أنا ،،
نوره : يــافديتك وفديت عمرك ،، " ويروحون يم السلم الكهربائي "،، حناني ياعمري أنتي اللاب توب أمس يجنن ،، حبيــلك ماكنت أحلم فيوم من الأيام يجيني لاب توب بهالقيمه ،، كان حدي واحد بألفين ،، بس بسبعه وااااو ماتخيلتي شكثر دخلتي الفرحه فقلبي ،، لاوالساعه عاااد ،، اوووف شكلها جنـان والألماس شي غير طبيعي ماخليت أحد من أهلي ماوريته ،، كلهم صاروا يدعولك ،، " وتحرك إبهامهما على ظهركفها"،، الله لايحرمني منــك حبيبتي ..
حنان " بحنـان": ههههههه والله لوداريه كل ذالسعاده بتجيك مع اللاب توب كان من زمان شريته لك عيوني ،، انتي أصلاً لو تطلبين عمري مارح أبخل عليك به أنتي ماتتصورين شكثر تعنين لي ..
نوره " بنفاق": وأنتي بعد تسوين عندي الدنيا ومافيها ..

\
:

عند غاليـه فغرفتها ،، توها طالعه من تحت ،، جالسه ترتب فغرفتها ،، وتطلع غسيلها وغسيل زوجها للشغاله ،، دخلت مهره عليها بدون لاتدق الباب ،، جلست على الكنب اللي قدام التلفزيون وحطت رجل على رجل وخذت الريموت وشغلت التلفزيون وقالت : أصصصص ولاكلمه ،، على كيفي غرفة أخوي وأتحكم فيها مثل ماأبغى ..
غاليه : شوفي إحتراماً له ،، وحفاظاً على مشاعره في غيابه مارح أقولك شي وبخليك تسرحسن وتمرحين على راحتك ..
مهره" تدور للمناقر": يـــاااااجعله أول !! ،، زين تعلمتي كيف تحافظين على مشاعره ..
غاليه " بإقتضاب": بلــيز مهره ،، بتفتحين معاي الموال أرجوك أمرحي ،، لأن مالي خلق والله على كثر الحكي ..
مهره: لحـــول وش فيكم اليوم كلكم ماتنقربون ،، مايقول الواحد كلمه إلا سكتوه ..
غاليه " بإهتمام كنها عارفه وش تقصد": حيــاة صح ؟؟
مهره" والحزن تذكرها": إيــه ياعمري عليها ،، دخلت عليها وحالتها لله ،،
غاليه " والدموع ملت عينها كنها تدورها": اااه اليوم مرت سنتين ،، شكلي بروح عندها ،،
تروحين معي ،،
مهره : لالا ،، لاتروحين هي طردتني من شوي ،، ماتعرفين حياة ماتحب أحد يشوف ضعفها ،،
غاليه : طيب أنا مو أي أحد ،،
مهره : كنتي !!
غاليه " بااااهه": ياليت الزمن يرجع ورا وأصلح كل شيء تهدم ،، كان هي ألحين فحظني ،، وتبكي على صدري ،،
مهره : لو بيدينا كان رجعناه ،، لكن اللي يروح مايرجع يالغلا ،،
سكتت غاليه وعلت موجة سكونها ،، وإرتفعت يدها لعينها تمسح الدمعه اللي نزلت بدون إستئذان ،،
قالت مهره : ياالله ياغوالي ،، الله يهديك أنا ألحين جايتك نغير جو وانتي تزيديني ،، يابنت الحلال والله إن كل شي بيتصلح ،، وحياة مصيرها بتسلى ،، الدنيا كذا ياعمري أنا اللي بجي أعلمك !!
وغاليه مستسلمه للي علاها ،،
مهره " تغير الجو": يــــوه تعالي ماعلمتك !!!!!
تناظرها غاليه بإهتمام كنها تقولها وشو ؟؟،،
مهره : شفتي الرقم اللي ذاك اليوم تقوليلي عنه ،، هذاك اللي تقولين إنه وقح وكنتي خايفه لايكلم وبندر عندك ،، هذاك غاليه عرفتيه ؟؟
غاليه : إيــه ،، إيــه وش فيه ؟؟
مهره : كلمني !!
غاليه " وعيونها طايره": إحلفي !!
مهره : والله العظيم إنه كلمني ،، لكن الغريب فالموضوع إنك تقولين انه رجال ،، وأنا اللي كلمني حرمه ، لكن من نفس الرقم ،،
غاليه : لاااوالله !!
مهره : قسم بالله ،، وشكلها عارفتنا واحد واحد ،، تقولي أنتي مهره بنت عبدالرحمن !! ،، وتقول إني كلمت غاليه بس ماعطتني وجـه !!
غاليه : يلعن شكلها !! ،، والله اللي كلمني رجال ،، وقالي كلام ماينقال ،،
مهره : غريبه والله ،، وش ذالمره ؟؟،، لاوبعد واثقه من نفسها ،، تقول بتكلم اليوم وبرد عليها !! ،، شكلها ماليه يدها !!
غاليه : يؤ!! ،، إنتبهي يامهور منها ،، لاتكون من ذوليك السلق ،، وتبي تجرك معها !!
مهره: لاماأتوقع ،، أنا شاكه فوحده من صديقاتي توسوي فينا مقلب ،، لأن وحده منهم معاها رقمك ،، فقالت تبدا فيك أول ،، وأكيد صوت الرجال اللي سمعتيه كانت تستخدم هذيك السماعه اللي تضخم الصوت وتخليه كنه صوت رجال ..
غاليه : امممم يمكن ،، كل شي جايز ،، بس أهم شي كوني حريصه على نفسك ،، ترى الدنيا معادهب نظيفه ،،

\
:

على الساعه 11:30 كانت صيته شابكه عالنت ،، وفاتحه المسن على الحاله الحمراء " الظهور دون إتصال"،، من دخلت وهي جالسه على أعصابها ،، تنتظر نتيجة اللي سوته أمس،، لكن لألحين لامجـيب ،، أحبطت توقعاتها بشكل،، وماتدي ليه حست إن كرامتها إنهانت ،، حست إنها فرضت نفسها بشكل غير عادي ،، نامت آمالها لكن ماماتت ،، حدسها يقول إنه بيصير اللي تبغيه ،، شافت الساعه وقالت فخاطرها "تو الوقت ،، هي من أهل الليل وآخره" ،،
حست بالملل ،، قالت بتطلع وترجع تشيك بكره ،، سوت تحديث لصفحة الفايل الشخصي اللي كانت فاتحته ،، وحصلتها أون لاين ،، رجع الأمل يصحى مره ثانيه ،، إنتظرت نص ساعه ثانيه لكن نفس الشي مامن مجيب ،، قررت تطلع ،، سكرت صفحات المنتدى وعيونها على المسنجر كون ولاكون تقبل الإضافه فأي وقت ،، سكرت كل الصفحات ومابقى غير المسطيل الطويل ،، قعدت تناظره برجـاء ،، كنه هو اللي بيقنعها تقبل ،، حطت الماوس على الإكس وقدها بتضغط عليـه إلا جاها ذاك اللون الأخضر يتلالى في مستطيلها وينوره ،،

\
:

يتبع

":":":":":":":":":":"

" ع ـندما يكابر الـ كبرياء ،،"

[جرح الذات]

﴿ الجزء العاشر ﴾
\
:
بادرت صيته بالكتـابه على طول من دون أي مقدمات ،،
ح ـلم سيكون ( صيته): واااااااو حكاية ليـل بغيت أفقد الأمل بقبولك ،، كنت بطلع ألحيـن لكن زين لحقت عليـك ،،
على كف الزمن : السلام عليكم ،،
ح ـلم سيكون (صيته): هههههه آسفه " وجه الخجل"،، عليكم السلام ،،
على كف الزمن : شكلك بنت صح ؟؟
ح ـلم سيكون( صيته ) : اممممم إيه بنت ،،
على كف الزمن : حلو،، إحساسي مايخيب ،، لأني ماضيف عيال ،،
ح ـلم سيكون (صيته) : سيم سيم ،، شخبارك عساك بخير ؟
على كف الزمن : الحمدلله بنعمه ،، لكن ماقلتيلي من أنتي ؟؟
ح ـلم سيكون (صيته ) : اممممم وحده معجبه فيك " وجه الإغاظه"
على كف الزمن : ياااااي ،، ياكثرهم المعجبات حددي أي وحده فيهم ..
ح ـلم سيكون ( صيته ) : ههههه أحلى ياواثق ،، أنا طال عمرك عضوه معاك فالمنتدى ودايما تعجبني ردودك وإسلوبك وطريقتك فالنقاش ،، والخاطره اللي كتبتيها آخر شي واااو أعجبتني بشكل ماتتصورينه ..
على كف الزمن : " وجه الخجل" تسلميلي هذا من ذوقك ،، لكن بعد ماعرفتيني بنفسك ؟؟
ح ـلم سيكون ( صيته ) : تعرفين ( إنطفـاء )
على كف الزمن : ووااااو ودي محدش يعرفها ،، بعد هذي ردودها عجيبه
ح ـلم سيكون ( صيته ): هاذي ياالغاليه أنا ..
على كف الزمن : هلا والله ،، فرصه سعيده والله ،،
ح ـلم سيكون ( صيته ): الله يرضى عليك ،، أنا أسعد والله ..
على كف الزمن : لكن ماقلتيلي من وين جبتي الإيميل ؟؟!!
ح ـلم سيكون ( صيته ) : جبته من مصادري الخاصه " وجه الإغاظه"..
على كف الزمن : هههههههههه أحلى يامصادر ،، معلينا لكن لاحظي ترى ماأقبل أي إضافه
ومب أي أحد أتكلم معه ،، وتصدقين أغلب اللي عندي بلوك ،، ممكن تقولين مغروره ،،
لكن صدق أحس بينا تباين في التفكير وكلامهم وأسلوبهم مايعجبني ماخذين الدنيا هزو ولعب ،، لكن يوم شفت إيميلك عجبني الإسم ،، أحلام بائسه ،، واااو حسيتك غيـر ،، قلنا نشوف وش وراهم وإن ماعجبونا بعد حطيناهم ضمن القائمه الحمراء " وجه الإغاظه" ،،
ح ـلم سيكون ( صيته ) : ههههههه وعيني عينك تقولينها لي ،، إن جيت على كيفك ولاطردتيني ،، كذا بحس إني فإمتحان !!
على كف الزمن : ههههههه شدعوه عاد ،، ياللا اا عشان خاطر التفاؤل اللي فنكك بمهلك شهر،، مافيه غيري وغيرك عندي ،، بنشوف طريقة تفكيرك ومستوى روحك !!
ح ـلم سيكون ( صيته ) : يااااي وش هالتواضع ياصاحبة السمو ،، والله تكلفين على نفسك ،، شهر كامل ،، لالا حرام عليك بتظلمين عمـرك !!
على كف الزمن : هههههههه أدري إنك تنغزيني لكن بعديها لك ،، وووعلى فكــره أحس إني إرتحت لك ،، ومتوقعه فيك خيـر ،، ووووعلى فكره ثانيه إحساسي مايخيبني أحياناً وليس دائماً
ح ـلم سيكون ( صيته ) : والله إنك شي ،، وأنا بعد بمهلك شهر عشان تتخلين عن غرورك وتعيشين حيـاتك كما هي ،،
على كف الزمن : لا ماعليـك إرتاحي ،، أنا راضيه كذا ،،
ح ـلم سيكون ( صيته ) : يـاحـــرااااام ياناس تحسبه على كيفها ،، لاياماما خلاص أنتي فعهدتي ألحين وبربيك على كيفي " وجه الإغاظه "

\
:

" الساعه الثامنه صباحاً "

:
يوم الخميس ،، ركب محمد وجدته وعمته سميره السياره متوجهين للحاير ،، شغل السياره
وتحرك بعد ماتأكد إن أهله ركبوا ،،
قالت أم راشد وهي تشهق كنها تذكرت شي : سميره يمك قلتي لرجلك إنك بتروحين معنا ؟؟!!
سميره" بلا مبالاه": الله!! يعني بيوافق إذا قلتله ،، خليني أروح من شوري أحسن،، لأنتظر رايه عز الله بموت ماشفت أخوي ..
أم راشد: لايامويمتك لزوم عليك تاخذين شوره ،، اللي تطلع من البيت بدون إ ذن رجلها تلعنها الملايكه لين ترجع ..
سميره : يابنت الحلال ،، ذاه حرام عليه المرجله ،، والله إنه مايستاهل عمري اللي راح معه ،،
لكن وش نقول خليك ورا الكذاب ..
محمد: يـاعمه لوإنك سامعتن شوري كان جبتي بنيتك وجلستي فبيت أبوك معززه مكرمه بدال ذاالذل والمهونه اللي يصبحك ويمسيك علـيها ،، ترجين من وراه شي بيوصلك لبراءة أبوي ؟!! والله ماتلقين عنده شي وإخذيها مني ،، اللي مثل ذولا مايخلون وراهم شي ،، سكن بسم الله علينا ..
سميره : ماعليكم مني ،، مصيري بلقالي خيط ،، وش ذنب أخوي أصلا عشان يشيل السالفه كلها عنه !! ..
محمد: لاوالمشكله أبوي بعد مب راضي يعترف عليه !! ،، مدري وش وراهم ثنينهم !!
أم راشد : لاإله إلا الله ،، مايضيع حق وراه مطالب ،، وفكونا من ذاالسيره ،، شغل لنا قرآن ولاشيخ يحدثنا يقصر الطريق علينا ..

\
:

فبيت عبدالله ،، عالساعه 10:15 ،، طلعت حيــاة من المطبخ بزبدية العريكه وتوجهت للمقعد اللي جدتها وعمها وخالتها جالسين فيه ،، كانت تحس عمرها أحسن من اليوم الكئيب اللي مرت فيه أمس ،، مع إن التعب فقلبها والحزن له قرون سوداء فيه ،، لكن مبين على وجهها أفضل من امس ،،
دخلت عليهـم وقالت بمرح : وعندك صحن عريكه من إيد حيـاة وصلحووووووه ..
أم نايف : عســـانا مانعدمها يارب ..
أم عبدالله "ولعابها شوي ويسيل": عـــاد عريكة حياة من يقدر عليها ،، أحسن من يسويها إهي !!
حياة " بمكر": وأخيــراً إعترفتي يمه ،، ياالله منك مشكله المكــابر !!
عبدالله : هههههههههه علومك كلها زينه يابوك ..
وحطت الزبديه على السفره بضحكة خجل لعمها ،، وصوتت للشغاله تجيب الحليـب والمويه ،،
وأثناء ماهم ياكلون قالت أم عبدالله : هااه ياحياه ماعاد قالتلك ذيك شي ؟؟
حياه : منهي نفداك ؟؟؟
أم عبدالله "تشر بيدها بعفويه كنها ماتبي تنطق بإسمها": ذيك ماغيرها ،، مرة سالم
حياة: إيـــه ،، لاأبداً أبشرك معاد قربتني .. بس الله يستر منها لايكون قاعده تجهز لشي قوي!!
عبدالله : لايابنت الحلال تفاولي خير ،، وإن سوتلك شي معاد موقف فوجهها غيري ،، لاتحاتين ،،
أم عبدالله"وعينها على السفره": انا من يوم فارقت وليدي وأنا شاكةٍ فشي ،، لكن خايفة تقولون ذي موسوسه ولاتبلا المره ،، ولاوش يخلي ولدي يبعد عنا ولايكلمنا كل ذاالسنين !!!
أم نايف " ترفع حاجبها كنها بتقول نفس الشيء اللي بتقوله خالتها": أنا بعد شاكة فشي بس كنت مستحيه أقوله !!
ويتحنحن نايف فهاللحظه ،، ويطالعون حياة عشان تتغطا ،، لكن هي قالتلهم إنها بتطلع فوق عشان ياخذ راحته فالفطور ،، خذتلها كاسين حليب وطلعت ومع طلعتها نادوا نايف عشان يدخل ،،دخل نايف بإبتسامته المعهوده ،، وبعد ماسلم وحب الروس ،، جلس يفطر معهم ،، بدون لايتقهوا ولاحتى يبل ريقه بتمره ،،
فقالت ام عبدالله : بسم الله الرحمن الرحيم ،، وش ذاالشفاحه ،، إكلك تمره أول !! نظف فمك بعد الرقاد ،، ترى عيشتك مافيها بركه وانت مابديتها بالتمر !!
نايف:هههههههه حلوه نظف فمك ،، اما عليك مصطلحات ، وبعدين شفتك مشفوحه على العيشه قلت بشوف وش هي عليه " ويرفع حاجبه بمكر"!!
أم عبدالله" بتمسكن": جويــعه ،، ومن امس ماكليت شيء ،، راقدتن بجوعي الله يخلف علي!!
نايف : ههههههه عادي كلنا من أمس ماكلينا شي ،، وأصبحنا وهذا إنا نفطر ..
عبدالله : نــايف ًاصبح أصبح ،، خل المسكينه فحالها ،، قم جبلك قهوه وقدوع وتقهو العريكه مب طايره ،،
نايف: ألحيـن أكثر ماكثر الله الحريم فذاالبيت ،، وأنا اللي أقوم أجيب القهوه ،، أمحق عنصريه عندك يبه !!!
عبدالله : ههههههه ،، تبي أمك تجيبه يعني !!
أم نايف " بحنان": أجيبله روحي لو يبي كم عندي من نايف أنا ؟؟؟
نايف " بإبتسامه ملت الوجه ،، وهو يطالع أبوه": طبعا واحد ،، والعمر كله له ،
عبدالله : مانيب راد عليك ،، أصلا واثق من نفسي حبيبي ..
ويقول نايف على قومة أمه : أمــوت وأعرف وش أنتي مسويتبه يذاالعجيز ،، حشا ساحرته ،،
أمه تلتفت عليه : لاإله إلا الله ،، الرزاق في السماء والحساد فالأرض ،، قل مشاء الله ،،
" وتضحك وتروح" ..
نايف "يكلم طيفها": مشــــاء الله ،، الله يخليك له ، عشان مايطيح فكبدي بس !!
عبدالله :لااااااه ،، أنت شكلك فيوم من الأيام بتدق الإصبع معي !! ،، هيــــــه تراني أبوك أبــــوك إفهم ،، يعني لاتشوفني معطيك وجه بقوه تحسب ماعندي شخصيه ،، إنتبه ترا شخصيتي قويه بعد!!
نايف : هههههه طيب ورني ،،
عبدالله " بيأس": الشرهه مب عليك أصلا ،، أقول بس تخاوي للمزرعه ؟؟
أم عبدالله " ترز وجهها" : أنا بخــاوي ..
عبدالله " برعب" : لالا الله يرحم والديك ،، خليك فعريكتك أحسن ،،
نايف " بخبث": أفاااااا عليك يبه ،، تهرب من أمك ،، يااالك من ولد عاق !!
أم عبدالله "ماتدري وش السالفه": ولاأقولك رجيلاتي معورتني بروح الصبح ..
عبدالله " يطالع ولده": ههههههه النوايا مطايا ،، هااه بتخاوي ولالا ؟؟
نايف " يقلد جدته": لااارجيلاتي تعورني يوم ثاني ،،،
عبدالله: أحـــسن ..
ويطلع عبدالله من البيت تارك وراه القلوب الحنونه ،، والنفوس الرحومه ،،
وعند البـاب الرسمي مع تعتيبة عبدالله للباب ،، إلا يشــوف ذيك الحرمه العجوز المبرقعه متوجهه يمـه ،، عرفها من مشيتها وحركة يدها فالعبـايه ،،
" يـــــوه ،، ياالله صباح خير مافيه شر " قالها فخاطره بعد ماغمض عيونه وصد يبي يركب السياره ،، بس هي لحقت عليــه قبل لايركب وقالت : السلام عليكم ،، صبحك بالخير يابونايف ،،
عبدالله " يلتفت لها وعيونه على الأرض": هلا هلا عليكم السلام ،، صبحك بالنور والسرور ،، ياالله حي أم خــالد ..
أم خالد: الله يحييك ويبقيك ،، كيف أصبحت يطولنا بعمرك ؟؟
عبدالله " وعيونه توها غاضه": صباح السهاله الله يرضى عليكم ،، شخباركم أنتوا وشخبار شايبك وعيالك ،، وراهم معاد لهم حس ولاطاري ؟؟ حتى المسجد معاد نشوفهم فيه ؟؟
أم خالد " تتلعثم": هاااه ،، لالابس الشايب تعيبين شوي ،، والعيال تعرفهم شباب مايقرون فمكان ..
عبدالله : لا مايشوف شر إن شاء الله ،، ماقدامه إلا العافيه ،، زين يوم قلتيلي خلينا نزوره ونقوم بالواجب ..
أم خالد : الله يرضى عليك يابو نايف ،، دومك راعي الأوله الله ياجعل ربي يغفرلك ولوالديك ،،
عبدالله عرف إن حكيها ماله نهايه فقال: الأهل داخل حيـاك الله ..
ويركب سيارته ويسكر الباب بســرعه ،، كنه يسكر وراه ألف سالفه وألف قصه مب منتهيه من فم هالمخلــوقه ،،
تحرك هو ،، وهي تحركت بدورها لداخل ،،
دخلت البيــت بدون لاتدق الجرس حتى ،، وصلت للصاله الداخليه ماحصلت أحد ،، وتوجهت لغرفة الجلوس اللي كانوا جالسين فيها بعد ماسمعت أصواتهم ،، وكنها راعية البيـت وشايلة الكلافه كلـش ،،
دخلت فجأه وقالت وهي تحرك يدها بحيث تشير على الجالسين كلهم : السلام عليـكم ..
طبعا الكل تفاجأ ،، بسم الله من اللي بيدخل عليهم ذاالحزه ،،
قالوا وآثار الذهول على وجيههم : عليكم السلام ..
ويقوم نـايف بقرف وهو توه ماكمل فطوره ،، إلا هذولي من بد العالم كلهم مجرد مرورهم على خياله يسبب لـه الجنـون ،،
قالت أم خالد بطرف عين: لحـول لحظرت الشياطين !!
ويسفهها نـأيف ولايعطيها أدنى إهتمام ،،
مالقت بالها لـه ،، حتى هي نايف يعتبر مصدر قلق لها ولعايلتها ،،
جلست بوقاحه وعزمت نفسها على الفطور ،، وبعد ماجلست قالت : هنهم ..
أم عبدالله " بإبتسامه عذبه": مايمدينا نقول وانت منهم ،، مشاء الله عليك عزمتي عمرك !!
أم نايف " بإبتسامه أعذب": حيااك الله أم خالد ،، شخبارك عساك بخير ,,
أم خالد" تمثل السحا": يـوه الله يلعن بليس واعوانه ،، نسينا السلام !!
وتقوم تحب راس أم عبدالله ،، وتجي أم نايف وتسلم عليـها ،،
أم خالد : مشـاء الله ريحة العريك نستني نفسي !! ،، إلا من سوايا من ؟؟!!
أم نايف : هذي حـ ..
أم عبدالله " تقاطعها": مزنه مزنه مسويتها ،، ماتعرفين طبخها مشاء الله !!
أم خالد" بدهـاء": لالا ذاه مب طبخ مزنه ،، تعلميني في مزنه !! ،، ذاه طبخن غير ،،" وبمكر أكثر" ،لايكـون احد البنات مسويته وماتبوني أنظلها !! ،، لاتخافون لاتخافون عيني بارده مهب من ذيك الصواريخ ..
وتطالعها أم نايف وفي وجهها ضحكه مكتــومه ،، وعيونها تتنقل بين خالتها وجارتها ،،
ومحاولات خالتها الفـاشله لكي تقنع الجاره "الطيبه" بإن العريك من طبخ مزنه ،،
قالت أم عبدالله بعد مافقدت الصبر: أنتي وش لك ذلحين ،، طبخ مزنه ولاطبخ غيرها !!
أهم شيء عيشة تدخل فبطنك وخلصنا !! ،، ياحبك يذاالمره لكثر الحكي !!..
أم خالد" ووجهها نط أحمر": وش بلاك ياأم عبدالله الله يهديك ،، ترانا نسولف !!
أم عبدالله : أمحـق سوالف !! ،،
أم نـايف" تغير الموضوع": إلا شلون عييلك ياام خالد عساهم طيبين؟؟
أم خالد : الحمدلله نشكر الله ونثني علـيه ،، "وتشدد" خالد إن شاء الله مواعدينه بالوظيفه يوم السبت ،، ومشاء الله رجال وتحطينه على اليمنى مب ناقصه غير المره ..
أم عبدالله : مشـاء الله ،، الله يرزقه ..
أم خالد: ياحيك يامزنه ذكرتيني ،، تراني ياام عبدالله أبيك فسالفه ،،
وتطالع ام نايف عشان تفهمها وتقـوم ،، الحلال حلال أبونا والغرب طردونا ،، قامت ام نايف بطيبه وقالت : أجل بروح أسويلكم الشاهي ..

\
:

فوق بعد ماطلعت حياة ،، وتوجهت لغرفة مهره وقومتها وشربت معاها الحلـيب ،،
كانت مهره متعنزه على السرير ،، وحياة جالسه عند مستوى ركبتها ،،
قالت مهره : ماكلمك سلطان أمس ؟؟؟
حياة:امممم إلا كلم بس مارديت عليه ..
مهره" بطيف حزن": من راح ماسمعت صوته !!
حياة:ماكلمتيه ؟
مهره: اممم لاا ..
حياة: وماكلمك هو ؟
مهره: بعد لا ،، وأصلاً كنت متوقعه مايكملني ..هو طلع ذاك اليوم من المستشفى وهو زعلان مني ،، بس حتى مب مبرر عشان مايكلم ويتطمن علي ..
حياة: ماتعرفينه !! ،، هذا هو سلطان لزعل من الواحد لازم يتحرر منه ،، وييخلعه عنه مثل الثوب ليـــمن يتأكد إنه قادر على لبسه مره ثانيه بدون لاثقوب ولاتمزقات ،،
مهره: ههههه حلو التشبيه ،، بس حتى حياة ماسويت شيء يزعله مني لهاالدرجه !! ،، يعني هو بيدي هالقولون الزفت ،، كنه انا اللي أتحكم فيه بريموت ،، الله أكبر عليه ..
حياة : ياشـيخه بيرجعلك بيرجعلك ،، أنتي وياه بسم الله الرحمن الرحيم مايمديكم زعلتوإلا رجعتوا على طول ولاكن شي صار ..
مهره:ههههههههههههه لاحـول .. قولي مشاء الله ..
حياة: ههههه مشاء الله مشاء الله ..
وبعد لحظات صمت مرت على الثنتين ،،
مهره : حيـاة !!
حياة: لبيـه ,,
مهره: لبيتي بمنى إن شاء الله ،، ممكن أسألك سؤال ؟؟
حياة : يعني لو قلت لا،، مارح تسألين ؟؟
مهره: هههههه إلا بسأل ،، بس نسوي ذوق أول ههههه
حياة: هاإسألي وخلصيني ..
مهره: امممم كيف تقدرين تحوطين نفسك بكل هالهاله من القوه ،، وأنتي فداخلك أضعف من كل شيء ،،
حياة " بعذوبه": ووش دراك إني أَضعف من كل شيء ،،؟؟
مهره " بحيا" : مممم أدري ،، يعني كل التجارب اللي مريتي فيها كانت قاسيه ،، وانتي الحين تمرين بضغط نفسي وعصبي بسبب حسناء وغير حسناء كثيــر ،، وهذي كلها أشياء تخلي الواحد يحس بالضعف ,,
حياة : وليـش مااخليها سبب قوتي ؟؟
مهره: حياة لاتقعدين تفلسفين علي !! ،، أنتي ماتقدرين تنكرين إنك ضعيفه ومحتاجه لصدر حنون ترمين نفسك عليـه ،، وتبكين على حظنه ،، بس مشاء الله عليك رغم هذا كله تقدرين تتملصين من كل شيء وتصنعين لك قناع من القوه ،، يعني اللي يشوف حالك أمس مايقول هذا أنتي اليوم .. ومب أمس بس غيره وغيره كثيـر..
حياة " وبنظره تحمل ذاك الحزن الأسود": يابنت الحلال لاتكبرين الموضوع ،، السالفه كلها لاتأيسين من رحمة الله ،، وخليك قويه به ،، وخلي البـاقي كله عليه ،، هو اللي بيلهمك القوه وبيعينك بالصبر وبيسليك بذكره ،، صدقيني مهره قد قربك من ربك قد مابتكونين متطمنه ،،
لأنك ميقنه إن كل شيء يصيرلك هو مكتوب من عنده ومقدر لك من قبل لاينخلقون الخلق ..
فبتكونين راضيه وموكله أمرك لربك ،، وصدقيني صدقيني ربك مايكتبلك إلا اللي فيه الخير ،،
وخيره بتشوفينه فحزته أو بعدين ،، يعني السالفه ومافيها إيماني هو سبب قوتي ..
مهره" بإبتسامة مطمئنه": والنعم بالله ،، مانرجي سواه .. بس حياتي أنتي إنسانه ومب معصومه من الشيطان ووساوسه ،، يعني ماقد مره حسـيتي بضعف أو حسـيتي بالكبت ،، مستحيـل !!،، الإنسان مثل البلونه ينتفخ ينتفخ ويوصل لحـد وينفجر ، يعني ببساطه كثرة الضغط تولد الإنفجار ،،
حياة : يـــوه يامهور ،، ياكثر ماأنفجر ،، بس عاد بيني وبين نفسي ،، تعرفين !! ،، ترى ماكنت كذا كتومه لهالدرجه ،، يعني أول كانت عندي غاليه ،، وبعد ممم كان عندي فهد ،، بس،، بس " وتغمض عيونها بإسترخاء كنها ترجيها ماتخونها" ،،بس كلهم خذلوني !!
مهره" بعطف باذخ": لاإله إلا الله ،، بس أنا ماخذلتك ياحياتي ..
حياة " والتعب طفح على وجهها": شوفي مهره ،، أنا ماتعودت أشكي إلا لهـم ،، يعني ماقدر أغير طبعي ،، صدقيني مهره ماقدر ..
وترجع تغمض عيونها بنفس الإسترخـاء ،، وهي قابضه يدها بقوه وتحركها فوق تحت بخفه كنها بهالحركه تمنــع الدموع أو تمنع خذلانها لها وتتغلب عليــها ،،
مهره : حيـاة إتركيها ،، خليـها تطلع حرام عليك ،، خليها تتنفس ،، حتى الشيء اللي فيه راحتك بتحرمينك منه ،، ياشيخه إرحمي حــالك ،،
وتقوم بتطلع وتقول "بإبتسامه" : خلاص أنا بطلع ،، خذي راحتك ،، صيحي ليـن تشبعين ..
حياة "توها مغمضه": تعالي ،، ماله داعي ،، خلاص إنتهت السالفه "وتفتح"،، خلاص عشان خاطري غيري الموضوع ..

\
:

[جرح الذات]

قال بإبتســامه متعبه على وجهه ،، تخفي وراها الكثـير والكثـير من الصبر : ياحياالله مويمتي ،، ووخيتي ،، لو إني داري إنكم بتجون كان فرشتلكم الأرض حرير ،،
فقالت أم راشد بنفس الإبتسامه وقد تكون ممزوجه بتعب أكثر ووجع أكثر وووصبر أكثر: الله يحييك ويمحق شانيك ،، والحرير خلنا نوفره لين تطلع بالسلامه إن شاء الله ..
الكل : إن شاء الله ،،
راشد " يطالع أخته بحنان": وش ذاالساعة المباركه ياسمور اللي بتجيني فيها ،، نعنبوك سنتين ماشفتك فيها إلا مرتين ،، حرام عليك عاد مب عشاني عشان ربك عاد !!
سميره " تداري دموعها اللي من شافته وهي تنذر بنزولها": وش نسوي ياخوي تعرف الدانه صغيره ،، ومين أخليها عنده ،، صعبه شوي ..
راشد: الله يبيح منك ياخوك عدّ شعر راسك ،، وداري إنه هو اللي مانعك مني ،، مايجهلني فيه !!
سميره " بتنهيـده": ياراشد ،، إعترف عليـه وريحنا كلنا ،، والله إني بالكاد أدف عمري معه عشانك ،، ولاهو والله معاد ينصبر عليه ..
راشد " بذهول": عشـاني !! وأنا وش دخلني ؟؟ ،،
سميره: هاا ،، وش دخلك !! ،، مب مصبرني على ذله ولاإهاناته اللي ماتنتهي ،، وعلى مكله لي ولراتبي إلا أنت ،، ياراشد تدري كل يوم يجي أقول اليوم أحسن ، اليوم بلقى الدليل ،،
اليوم بلقى المسدس ولابلقى الأوراق ،، ولخلص اليـوم ومالقيتها قلت خلاص بكره بيسهى وبينساها فمكان وأكيـد بلقاها ،، والله ياراشد كل يوم وأنا على ذاالحال ،، تخيل توه لاهف مني مية ألف وبسددها على 7سنيـــن ،، لكن قلت يابنت الحلال صدقة عن أخوك ،،
راشد" يقاطعها": على هونك على هونك حبيبتي ،، ومن قال إني أبيك تدورين دليل ولاشي ،،
أنا راضي باللي أنا فيه ،، أنا شايلها عنه بكيفي ،، ولالوإني أبيه يدخل السجن كان من سنتين وأنا معترف عليه ،، وش حادني على ذاالبهذله كلها ،، لكـن ياسميره هو عظمه طري ومب راعي سجون ،، ودانه بسم الله عليها لاكبرت وسألت عنه وش بتقولين لها ،، أبوك في السجن ،، ولامات مقصوص ،،
سميره " بدمـوع أعلنت إنتهاء صبرها": الله عليـك ،، يعني هو ألحين حاس فيك !! ،، ولادانه على قولتك معطيها وجه ولاملقيلها بال ،، حتى الإبتسامه ياالله يالله من الشهر للشهر لإبتسم فوجهها ،، وأنت مافكرت في ولدك !! ،، بعد هو لجوله عيال بكره ،، وسألوا عنك وش يقول !! جدكم مات مقصوص ،، حرام عليك ياراشد مب مكفي أمه اللي تخلت عنه فعز حاجته لها ،،
ياراااشد فوق ،، إنتهى عصر التضحيات وإنتهى عصر النخوه ،، الزمن تغير ياخوي والرجال معادهم على خبرك ،،
راشد : شوفي ياسميره ،، والله ثم الله واانا قلتها من قبل له ،، إني أخذل واحد تعزوابي !! فهذا على موتـي ،، والله لضحي بحياتي كلها عشان " العز العز يابو محمد" ،،
وتتدخل أم راشد بعد ماكان الصمت موقفها من كل اللي دار وتقول بدموع حارقه تنبيء بإنكسار الشموخ : يامــال المعزه ،، يامـــال المعزه ،، الله يقبل منك يمك ،، الله يكتب أجرك ..
سميـره " مولعه": وش بعد يمه !! بتشجعينه هاااا ،، ويمـــين الله مايرتاح ذاك الحقير وأخوي متمرمط بداله ،، وقسم بالله لتكون نهايته على يدي أنا ..
ويطالع محمد أبوه بنظرة عتاب خفي ،، هذا هو من يتكلم أبوه يـســـوده الصمت ،، ويبلمه السكون ،، ويعلــوه الهدوء ،، مايقدر يعاتبه أو يناقشه فاللي سواه ،، لأنه يعتبرها من مبادئه وعرفه اللي مستحيل ينتهك لو حتى على حســاب أغلى من يمشي على الأرض بالنسبه له
" محمد" ،، توجه يمه ،، حبه على خشمه وراسه وقاله : لاتحرمني من دعواتك يبه .
"ويطالع جدته وعمته " ويقول : ياللااا مشينا ورانا خط ..
ويوقفون ويصلحون عباياتهم ،، ويسلمون على راشد اللي حظن كل وحده فيهم ،، وتمسك سميره يد امها ويمشون ومحمد يتقدمهم ،،
راشد" بحنـــان كبر الكون": محمد ..
يلتفت له محمد بلطف ويقول: لبى قلبك ..
راشد: لبى قلبك والحشا ،، اقول حللني ياولدي مب شايل إلا همك ..
ويقرب منه محمد ،، وبحركه عفويه يلمه ،، ويحب على جبيــنه برقه ويقول : الله يبيح منك دنيا وآخره ،، لاتشيل همي ،، تراك مخلي راشد ثاني وراك .. إرقد وآمن نفداك ..

\
:


" الساعه الواحده ظهراً"
،
،

فمطار الملك خالد الدولي ،، فصالة الرحلات الدوليه ،، توهم داخلين بشناطهم المليــئه ،، لابسين البناطيل والتيشيرتات ،، والكبات على روسهم ،، والسماعات فأذانيهـم ،، ويدفون الشناط قدامهم،، اللي يشوفهم يعرف سبحان الله إنهم رايحين لمعصـيه ،،
نص سـاعه وأمورهم كلها مخلصه ،، توجهوا لصالة الإنتظار ينتظرون حزة الإقلاع ،،
لقولهم كرسيين فاضيه ،، وتوجهوا يمها بسرعـه قبل لايسبقهم أحد لها ،،
جلس سلمان وحط شنطة اللاب توب جنبه على الطاوله اللي على يمينه ،، وفهاد جالس على يساره ،،
قال فهاد وهو يطلع جواله ويحط على رقم : مدري لـيه أحسها رايحتن لأخوها اليوم !! قلبي ناغزني حاسها بتلعب من وراي ..
سلمان : يابن الحلال خلها تروح له وش لك فيها !! ،، حرام عليك حرمتها إياه وبعد ماتبيها تشوفه !!
فهاد " بعصبيه": هيــه إسمع مب كل ماطريته قدامك قمت تنغز بالحكي ،، أنت عارف إن كل شي صار من دون قصد ،، والسالفه كلها جات صدفه !!
سلمان : الله صدفه !! ،، على غيري على غيري ،، ماتمشي علي ألاعيبك يابابا ..
عصب فهاد من جد ،، يدق عليها مشغول من ناحيه ،، ومن ناحيه ثانيه تلميحات سلمان اللي مالها معنى بالنسبه له ،، فقال : يـاخي بكيفي ،، بكذب الكذبه وبصدقها!! ،، هو زايده عنده جرعة النخوه شوي وشال القضيه بكيفه ،، أنت وش عليـك ،، الله عليك يالحسد !!
سلمان " بضحكه رنانه": وووش أحسد عليه ياحظي !! ،، السالفه كلها سجون فسجون ،، بس أبيك ماتستمر فهالتفاؤل اللي معيش نفسك فيه ،، لأن مصير الحق بيطلع ،، وخذها من عزيز ترى أخته مب صابره عليك لذلحين إلا وفراسها علم ..
فهاد " رافع واحد من حواجبه": علم !! ،، لايارجال ،، ذي ماعندها ماعند جدتي !! ،، لوها تبي شي كان خذته من زمان هذا أولا ،، ثانيا لوإنها ناويه إنها تخليني كان ماعطتني مية الف من راتبها ،، لالا ،، مستحيــل المره أجوديه مهب من راعيات ذاالعلوم ..
سلمان : جاك العلم ،، وخلك حريص .. ومتوقع متوقع شف أقول متوقع ماأجزم ،، إن الحق بيطلع على يديها مدري ليـه ،، يعني إنتبه وركز فحركاتك ..
ويطالعه فهاد بتفكيـر كنه بيسرح ،، وبالفعل سرح فوادي بعيـد عن مكانه ،، عند سميره ،،
مب داخله فعقله ،، سميـره !! ،، ماقدر أصلاً يفكر مجرد التفكيـر فالكلام اللي قاله سلمان تو ،، أبعـد هالهواجيـس ،، ورجع يدق مره ثانيه عليها .. دق وبعد طول إنتظار جاه صوتها عبر الفضـاء يقول بإقتضاب : هـلا ..
فهاد : هلاوين ،، كيفك ..
سميره : بخير ،، وأنت ؟
فهاد: طيب ، شخبار دانه ؟
سميره : بخير ..
فهاد : أنا ألحين فالمطار ،، رحلتي بعد بعد نص ساعه ،،
سميره : وبعديـن ؟؟
فهاد: وشو بعدين ،، هذا بدل ماتقولين تروح وترجع بالسلامه ،، بشتاقلك حبيبي ،، الله يحفظك ،،
سميره" تقاطعه": اهاااا خير إن شاء الله ،، طيب أنت مكلم تبي شي ؟؟؟
فهاد " بإنعدام صبر": شرهتك من كلمك أصلاً ،، من كنتي تكلمين قبل شوي يابنت الكلب ؟؟
سميره : لحــول ،، بتشتم أبوي فقبره !! أعوذ بالله منك ..
فهاد " مسكر على أسنانه": سميره لاتروحين السالفه ،، من كنتي تكلمين ،،
سميره : وش دخلك ؟؟ ،، ولاأقولك كنت أغازلي واحد عندك مانع !!
فهاد " وصوته يرتفع ،، ويخفضه بعدماأشر له سلمان": لعـــنه تلعنك ،، وتقولينها فوجهي !! ،، أنا من زمان قايل إنك تخونيني ،، لكن زين يوم إنك إعترفتي وريحيتيني ،، ياالله إلعبي إلعبي إستغلي الفرصه وإشبعي ليـن أجيك ،، بس يــاويلك ياسميره لجيـت ،، والله إن حسابك حساب ،،
سميره " تضحك من وراالسمـاعه": أقول فهاد ،، أزيدك من الشعر بيت ،، تراني زرت راشد اليوم ،، هههههههههه
وتسكر السمـاعه فوجهه ،، وتمحي الضحكه المزيفه اللي إنرسمت على شفاهها ،، ويحل محلها صاحب المكان الأصلي ،، اللي إستوطنه وإستعمره من أربع سنين ، من أخذت فهاد ،، وإحتل باقي أجزاءها بعد مادخل أخوها السجـن ،، البؤس كان هذا حالها معه ،، يأخذ إستراحات المحاربيـن أحيـانا وسرعان مايرجـع ليحتلها ثانيه ،،
أما عند ذاك "اللطيـف" دمه صار غلايه ،، ووجهه تلون بالأحمر من الغضب اللي علاه ،،
" تسكرين الخط فوجهي ياحيـوانه ،، تسكريـنه ،، طيــب والله لخلي لياليك سوداء يابنت الحيوان " ،،
وهكذا كان كلامه من سكر منها ،، مغير يسب ويلعن ،، وحالته حاله ،،
وسلمـان مخليــه ولاكلمه ولاحتى قاله وش فيك ،، مخليه يطلع اللي فخاطره لخاطره ،،
دقـائق وهم على هذااالحال ،، من ساخط غاضب يلعن الدنيا واللي عليـها ،، وآخر يمتطي الراحه والنعيــم والبرزخ اللي منتظره بعد ساعتين ،،

\
:

فنفس المطـار ،، لكن فجهه ثانيه منه ،، فصالة الرحلات الداخليه ،، تو سلطان نازل من طيارة جده ،، النفسيه اللي راح بها ،، غير النفسيه اللي جا فيها ،، راحـــه مابعدها راحه يحس فيها ،، طمأنينه وراحة بــال وفيره تملاه ،، شعر بأن أهلـه ورضاهم يسـوون عنده الدنيا ومافيها ،، والدراسه ربي بيعوضها باللي أحسن منها ،، يكفي إنه جالس فديرته وبين ناسه معزز مكرم ،، كـان يمشي خــالي مامعه إلا كيس فيده ،، نزل مع السلالم ،، ودخل في المصاعد لــين وصل مواقف السيارات ،، مشى مشى لين مكان سيارته ،، وركبها وتوكل على الله وتحرك وشوقه يسبقه ..

\
:

بإعتبار إن مجلس الرجال ،، أو قسم الرجال بوجه عام هو أهدى مكان فالبيت ،، وأبعد مكان عن المنغصات والقرف اللي متوقعه من زوجته ،، كان سالم جالس فيه قاعد يقرا جرايده بهـدوء ،، لابس النظارات ومتعنز ورجل على رجل والجريده ماسكها بيدينه الثنتين على رجوله ،، يفصص كل كلمه فيها ،، يقراها من اول صفحه لآخرها ،، كنه يحاول يبدد وحشته ووحدته بمعرفة أخبار العالم .. او حتى مصايبهم !! ..
سمع صوت باب ينفتح ،، غمض عيونه وخذا نفس عميــق ،، كنه يقول يارب ماتكون هي ،،يارب ماتكون هي ،، كل شي فيه عاجز من مناقرها وطولة لسانها ،، ولحظات إلا وسعيد داخل عليـه ..
وترتخي عضلات سالم بعد ماشاف سعيد ،، ويرجع يكمل قراءه ،،
دخل سعيـد وقرب منه ووطى على راسه وباسه عليه وقال : مساك الله بالخير ..
سالم " بعدم إهتمام": هلا ،،
سعيد يجلس وبإبتسامه يقول: ماخليت ولاجحر فالبيت إلا دورتك فيه ،، مابقى إلا هالمجلس قلت بروح أشوفك فيه وزين يوم حصلتك ..
سالم "بإقتضاب": خيـر فيه شي ؟؟
سعيد: لا ابداً سلامتك ،، بس قلت أكيد إنك جالس لحالك وجيت أونسك ..
سالم : مشــاء الله ،، من متى هالتطور ؟!!
سعيد : امممم ،، من اليوم ورايح ..
سالم : الله غني ،، عايش بكم ولابدونكم كله واحد ..
سعيد : بس أنا مب عايش ،، تحسبني مرتاح وانا إسم ولد لك ،، لاتاخذ مني ولا أعطيك ،، يايبه والله إني حياتي مب حياه ،، وين ربي بيدخلني الجنه وانا ذا حالي معك ،، مب مخليني ألحق لابرك ولاجزاك ،، كل ماجيت أبقرب منك صديتني ،، كل ماجيت أبقرب منك قارنتني بسلمان ،، وإنه أحسن منك وإنه وقف معي وإنه إشتغل معي وإنه وإنه وإنه ،، يايبه هذا جزاي اللي أبي أريحك مني ،، مابيك تشيل همي ،،
سالم " بذاك الكبرياء اللي خايف ينكسر": وأنا قد شكيتلك .. قد قلت لك ياسعيد تراك مثقل علي روح دورلك شغل بعيد عني ؟؟!!
سعيد : لا جعلني حذاياً لرجولك ،، بس يايبه خلاص إنا كبرنا وصرنا رجاجيل نقدر على أنفسنا ،، وبعدين بكره بنعرس وبيجونا عيال اجل كل مابغوا أدنى شي جيناك نقول عطنا يايبه ولدنا يبي حليب !! ،،
سالم " يكابر": أنا راضي أنت وش عليك !!
سعيد: بس يايبه هذا بيقلل من قدري قدام نفسي وقدام زوجتي وحتى قدام عيالي ،،
سالم : ألحين أنا أبي أفهم كل ذاه وش عشانه ؟!!
سعيد" بإبتسامه حنونه": أبي أفهمك ليش انا ماشتغلت معك ..
سالم : طيب وإذا فهمت ؟؟
سعيد: أبيـك تعذرني لأنك إذا عذرتني بترضى عني وإذا رضيت عني بكون راضي عن عمري ..
سالم"بإبتسامه ياالله طلعت": خلاص عاذرك ،، هارح إرضى عن عمرك لاأوصيك ..
سعيد: يــوه لااا بعد باقي هنا دنيا لين أرضى عنها ،،" ويقوم يحب خشمه ويحب راسه بقوه " ،، لكن أول الغيـث قطره ،،
ويطلع منه ،، ويتركه بحيرته ،، سعيد قلقان شلون يلحق بره ،، وخايف على رضاه ،، لا ويقوله هالشيء فوجهه ،، وجـاي يجلس معاه ،، ومتعني عشانه ،، كان عقل سالم يضج بالأفكار والأسباب اللي خلت سعيد يتعناله ،، مادرى إنه شيء طبيعي لكل ولد بيضيع منه أبوه يحاول يلمـه قبل لايختفي ..
ترك الأفكار على جنب ،، ورجع لنظارته ولجرايده وولهدوءه ولعالمـه الخاص ..

\
:

عبدالله : أرحب ،، أرحب ،، مرحبا والله ومسهلا ،،
سلطان " يقرب من عمه ويحبه على خشمه": البقى يابو مرحبا ،، الله يحييك ويرضى عليك ..
ويواجهه نايف وتسالمون بالخشوم ويقول نايف : هــاااه بشر عسى جبت قسمي من الحمبص.. وحلاو أبو بيض ..
سلطان : ههههههههه ،، مالت عليك الناس تطوروا قدهم ياكلون حلاو باتشي وأوبرا وأنت توك فالحمبص وحلاو أبو بيض ،، أقول لاتقوله عند احد تفشلني ..
نايف : هههههههه ،، ماعلي منهم يتطورون على عمارهم ،، بس أنا رمز العزه عندي ذالحمبص ..
سلطان : الله !! ياإلهي رمز العزه مره وحده ،، لالا حالتك صعبه ..هههههه
عبدالله " بعد ماخلص ضحكته": أقول عمره مقبوله ياسلطان ..
سلطان : الله يقبل منا ومنك صالح الأعمال ..
نايف: ولاتعبت ..
سلطان : ولاندمت ،، والتعب مابه تعب هوينه حيـل ..
عبدالله : زين زين ،، وأنت أصلا بس واحد ،، بتجي خفيفه ..
سلطان : إيه والله صادق ،،" ويوقف" ياللااا بروح أسلم عليهم ،، عن إذنكم ..
عبدالله : تعال خذني بروح معك ..
ويقوم عبدالله ويطلع ،، ويقوم وراه نايف ويجي جنب سلطان ويشبك يده اليمين فيسارسلطان ،،
قال سلطان : شكلك كذا والله أعلم والله أعلم بتدخل معي صح؟؟
نايف: يعجبني فيك ذكائك ،، تفهمها وهي طايره مشاء الله عليك ..
سلطان : اهااااا ،، وطبعا بتدخل وخواتي جالسات ..
نايف : امممم أظن هالشي ،، لأنهم فهالوقت يكونون تحت ،، بس لاتخاف أكيد بجلالاتهم عليهم ...
سلطان : لاااه حلو حلو ،، وحظرتك تبيهم يجلسون معك بدونها ،،
نايف : ماعندي مانع صراحه ،، يصير؟؟ !!
سلطان : أقــــول إنقلع لألفك بذالعقال ،، معاد بقى إلا هي تدخل على محارمنا ..
نايف : ههههه طيب ياتبنه هذا انت بتدخل وأختي داخل ماقلت شي ..
سلطان : ياحبيبي أختك مرت اخوي لاتنسى ..
نايف : يــاسلام .. وأختك مرتي لاتنسى !!
سلطان: هيهيهيهي ،، عند ماما يابابا ،، فشرعك هذا ،، أنا داري من صبح تلف وتدور تبي تدخل عشانها ،، وإنك تدور أدنى مدخل عشان تقنصها بعينك ،، لكن هذا عشم إبليس فالجنه ياالحبيب ..
نايف : ههههههههه ،، شوف سلطان لو أبي أشوفها شفتها غصب من ورا خشمك ،، ولاأنا مابي أشوفها لأسباب خاصه فيني ،، مب عشانك انت ووجهك ..
سلطان : يــاحرام يسمح نفسه ،، هههههه أقول إقضب إقضب أرضك أحسنلك ..
ويدخل سلطان عليهم بشــوق كبير ،، ويسلم عليهم واحد واحد ،، ولما وصل لمهره حظنها بحنان ،، وقرص خدها بلطف ،،
وبصوت هامس قال: وحشتيني يالدبه .. ولاتقول عندي أخو مسافر ،، بكلمه وبتطمن عليه ..
مهره " بدلع": نتغلـى ،، نشوف باقي غلانا ولاطار ..
ام عبدالله " تقاطعهم وتبدد لحظات الأخوه الحانيه": عمره مقبوله ياسليطين ،، ولايعلم أحد إنه بيروح ،، ولايقول بودي جدتي أكسب فيها أجر وثواب ..
سلطان : ههههههه ،، فاتتني يمه ،، المره الجايه أبشري ،، حتى لو إني اشيلك على ظهري ..
أم نايف : يامرحبا والله تو ماردتلي الروح وانا امك ..
سلطان : الله يرضالي عليك ياخاله ،، ويخليك لنا ولايحرمنا منك ..
" ويوجه الكلام لحياة " ،، هاه حياة شخبارك عساك بخير ..
حياة: والله الحمدلله بنعمه ،، أنت اللي عسى ماتعبت فالطواف ولاالسعي ؟؟
سلطان : أبد والله مابه تعب ،، والطاعه فديتك ربي يعينك عليها ولاتحسين لابتعب ولاإرهاق منها ..
وفهاللحظه يدق جوال مهره اللي كان جنبها من يسار ،، وسلطان جالس يمينها ،، شافت الرقم وتلعثمت وبان الإرتباك عليها ،، ناظرت غاليه اللي كانت جالسه جنب أبوها ،، وحطته على السايلنت ،، رجع يدق مره ثانيه والكل إنتبه لها ،، تداركت الموقف وقالت بربكه : عن إذنكم وحده من صديقاتي بكلمها وبجي ،،
وتطلع منهم لغرفتها برجول مرتجفه ،، وبيدين ياالله تشيل الجوال ،، قعدت تناظر فتره فشاشةالجوال ،،
قلبت وضعه كله صامت بهزاز ،، ودق حول ست مرات فوقت واحد ،، وكل ماهز يهز جسمها كله معاه ،، فالأخير إستجمعت قواها كلها وردت ..
مهره : ألو ..
......." بميوعه": هههههه مرحبا ،،
مهره: مرحبتين ،،
.......: ماسألتيني وش فيني أضحك ؟؟
مهره : مايحتاج ..
......." شوي وتكسر من كلامها": بقول حتى لو ماسألتي ،، أنا مو قلتلك بتردين علي بتردين علي ،، هذا انتي رديتي علي مثل ماقلتلك ..
مهره" مغتاظه": شوفي انا مارديت عشانك ،، بس أنتي أزعجتيني حيل ،، أحد يكلم فالقايله !! ،، قلت خليني أشوف وش وراها ؟؟
.......: أولاً خلصت القايله ،، بقى نص ساعه على العصر ،، ثانيا وش وراي امممم هذي يبيلها وقت !!
مهره: إيـــه والمطلوب مني أكلمك لين يجي هالوقت ..
.......: أيــــوااااه عليكي نور ..
مهره: ههههههه حلو ،، وأكلم وحده حتى إسمها ماعرفه ،، و
....."تقاطعها": ممديه على إسمي ،، لكن ألحين خلينا فيك حبيبتي ..
مهره: واااو حبيبتي بعد!! ،، أنتي مين؟؟!!
.......: أنا عارفه تحسبيني وحده من صديقاتك .. لكنك والله ماتعرفيني ولاقد شفتيني فحياتك كلها ،، بس أنا عارفتك زين مازين ..
مهره : طيب خليني معك،، أنا عارفتني زين مازين ،، بنت عمي وش عرفك فيها،، ومن هذاك الولد اللي كلمها من نفس الرقم ..
....." تتلعثم،، وكنها تسكت أحد عندها": هاا ،، أنتي وش بلاك أنتي والولد ،، أنا بس يوم كلمتها كان صوتي مزكوم وحلقي يعورني وصار صوتي خشن شوي ..
مهره" ماعدت عليها": تلعبين على بزر أنتي!! ،، صراحه ينخاف منك ..
......"ببرود": لااااا وش ينخاف مني والله إني وديعه ومامني شر ،، أنتي بس عاشريني وشوفي كيف إني حبيبه ..
مهره : طيــب أعاشر لي وحده حتى إسمها ماأعرفه !!
.......: خلاص بقولك إسمي الأول بس ،،
مهره: بس أنتي تعرفين إسمي كله !!
........: وش بيفيدك ؟؟ ماتعرفيني أصلاً ،، يعني مارح تنفعك إسم عائلتي ،، إسمي ياعمري نهى ،،
مهره"تسترجع" :امممم نهى نهى ماقد مر علي الإسم ..
نهى : قايلتلك ماتعرفيني ..
مهره: طيب يانهى أنتي وش تبين مني بالضبط ؟؟
نهى: امممم مابي شي ،، بس أنتي عاجبتني !!
مهره : أيــش !!
نهى " تتلخبط": لالا مب عاجبتني بالمعنى اللي فهمتيه ،، أقصد يعني شكلك حبوبه وطيوبه وودي تصيرين صديقتي ..
مهره: إسمحيلي ماصادق ناس ماعرفتهم إلا من التلفون ..
نهى : ماعندك ثقه بنفسك ؟؟!!
مهره : وش دخل ثقتي بنفسي ألحين ،، لا بس شلون أتكلم مع وحده وأسولف معها ماعرف عنها إلا إسمها وصوتها ؟؟
نهى : إنتي بس جربيني ،، صدقيني مارح تقدرين تستغنين عني ،،
مهره : هههههههه ثقه زايده ،، لاإسمحيلي ،، إنتي بالذات ماعندي ثقه فيك ، قلبي ناغزني منك ،، معليش إعذريني على صراحتي بس اللي فقلبي بقوله ،، ومعليش السموحه لو قلتلك لاعاد تكلمين على هالرقـم ..
نهى " بغيظ مكتوم": ههههههه لاتحاولين ، بدق بدق لــين تردين ،، حبيبتي مقدر أستغني عنك ..

\
:

تحــت فنفس المكان ،، حيث القلـوب المجتمعه على الحـب ،، والنفــوس الملتمه على الطيـبه ،، مكان ماكانوا جالسين من شوي ،،أم عبدالله من تكلمت فالبدايه معاد تكلمت ،، والسكون شاق فوجهها طريق ،، مب عادتها الصمت البحت ،، ياإما تسولف أو تستغفر وتذكر ربها ،، لكن هي من طلعت منها أم خالد وهي مب على حالها ،، لاحظت هالشيء مرة ولدها ،، لكن ماقالتلها شيء ولاسألتها ،، تعرف خالتها إذا كان تبي تقول بتقول ،، وإذا إلتزمت الصمت مابتخونه ،، هي كانت تلاحظها بعد بصمت ،، وتبي عينها تطيح فعين زوجها عشان تشر له عشان يفهم ويشوف وش فيها ،، بعــد جهد جهيد إنتبه لها عبدالله وفهمها من حركة عيونها المتوجهه يمها ،، هو أساساً كان جالس جنبها مايفصل بينهم إلا مركى لكن مايشوف وجهها من الأمام ،، كل اللي يشوفه شق وجهها الأيمن ،، قرب فمه من إذنها ،، وهمس لها : عسـى ماشر ..
قالت وهي مرتاعه: بسم الله ،، أبد ماشر ،،
وتقـوم على تتمة كلمتها ،، وتوقف بثقل ويقوم وراها يعنزلها ،،
وتقوله : تعـال فحجرتي أبيـك ..
ويمشي معاها لــين حجرتها كنها تقوده ،، لاهو ولاهي نطقوا بأي كلمه ،،
وصلوا للحجره ،، جلست على الجلسه الأرضيه ،، وتربت على المكان اللي جنبها تشر له يجي يجلس ،،
جلس جنبها متعجب وقال : يمــه وش بلاك !!!
أم عبدالله " بإبتسامه": مابلاني شي يمك ،، بس أبي أنشدك هو ولدك خاطره في مهره ؟؟
عبدالله : هااا ،، نايف ،، إيه ،، مدري عنه ،، ماقد قالي شي ،، ليش يمه ؟؟
أم عبدالله : جايـينها خطاب اليوم ..
عبدالله " بعلامة تعجب": أيــش !! ،، ومنهم ذولا !!
أم عبدالله : خـالد ولد جيرانا ..
عبدالله " وإرتاحت ملامح وجهه": ههههه مشاء الله عليه وله عين يخطب بعد ،، خليه أول يشتغل ويلم نفسه بعدين يجي يخطب بنات الحمايل ..
أم عبدالله : لاا أمه تقول إنه بيستلم وظيفته يوم السبت ،، وإن شاء الله إنه رجال ماعليه ،، والعرس يعقل المجانين يمك ..
عبدالله : لااااه على حساب بنتنا !! ،، لايمـه قوليلهم الله يرزقكم ،، مالهم نصيب عندنا ..
أم عبدالله : يارجال شاور أخوانها يمكن عندهم راي ثاني ..
عبدالله : يعني ماتدرين إن خالد ذاه أبغض مخلوق يمشي على وجه الأرض عندهم ،، والله مايرضون تعلميني فيهم !!
أم عبدالله : هـ خلاص الله يعيني على لسانها ..

\
:

فوقت إرتفاع صوت الحق ،، طلع سالم من مخبأه كنه منحـاش من شي ،، أو كن شي يطرده ،،
طلع لفوق يبي يتوجه لغرفته ،، مـر من غرفة صيته اللي على طريقه ،،
كـانت مشغله سورة البقـره فالأستريو الكبيـر ،، والصوت على قدر من الإرتفاع لابأس به ،،
زادت نبضات قلبه ،، والعرق كنه مـويه تصب ،، ووعظامه ياالله يالله تشله ،، دخل بـــقوه عنيـــفه جداً عليها فالغرفه ،،
ويقولها بصوت رج جدران البيت كلـه : سكـــريه سكريــه يابنت الكلــــــــب ..


يتبـع ..

":":":":":":":":"

" ضج ــ!!ـــيج "

[جرح الذات]

﴿ الجزء الحادي عشر ﴾

\
:

واقف فالمكـان اللي مايقدر ينكر إنه غير فيه أشيـاء كثيره ،، والمكان اللي أصبح مصدر للراحه له ،، ومتنفس يبدد ضغوطات الحيـاة بالحركه فيه ،، واقف سعيد يجهز أحد طلبات الزباين برضى ،، والزبون واقف قدامه وفيصل خويه جنبـه يجهز أحد الطلبات الأخرى ،،
مابقى غير عشر دقايق ويأذن المغرب وينتهي دوامهم لهذا اليوم ،، يوم الخميس عندهم فترة بعد المغرب والعشاء إجازه ،،
شطبوا شغلهم فخمس دقايق ،، والخمس الدقايق الثانيه كل واحد خذاله كوب إكسبريسو وطلعوا يشربونه فالسياره ،، ينتظرون لين يأذن المغرب ويصلون مع الجماعه ،،
قـال سعيد وإبتسامه منوره وجهه داله على راحـه لابأس بها يحس فيها : الله يافيصل ،، شكثر الواحد يرتاح لما يحس إنه طور من شيء كان وده يسويه من قبل ،، والظروف حايله بينهم ،، والدنيا كلــها واقفه من دونهم ..
فيصل" فاغر عيونه": هاااا ،، أنت وش تقول ،، والله مافهمت ولاشي !!
سعيد" ينتبه": ههههههه ،، حتى أنا مدري وش قلت أصلاً ،، ههههههه
فيصل : أحمق !! ،، كنت تقول راحه وتطور وكلام من هذا القبيل ..
سعيد : إيــه ،، أقول شكثر الواحد يشعر بالراحه لما يحس إنه حقق نجاح فالتقرب لشخص ما ،، يعني بدون فلسفه ،، اليــوم مختلف عندي قول ليه ؟؟ قلتلي ليه ،، لأني تكلمت مع أبوي اليوم بدون لاهواش ولاصراخ ،، ماقولك كلام أبو لولده ،، وإني حسيت إني أكلم أبوي ومشاعر حسيتها لا ،، لكـن الهدوء اللي يكلمني فيه وإهتمامه باللي قاعد أقوله ،، هذا بحد ذاته يعتبر تطور .
فيصل " بإبتسامه رقيـقه": أكيـد ،، وأول الغيث قطره ،، يعني اليوم هادي معك ومهتم بكلامك ،، بكره تنشال جميع الحواجز وتنهدم كل الجسـور ..
سعيد : الله كريـم يافيصل ،، والله إني حاس فأبوي محتاجني حيــل ،، أول مره أحس فهالشيء ،، أختي قالتلي كلام صحاني من غفلتي ومن نومتي ،، تصدق بدعيلها ليل نهار إنها خلتني أتخذ هالخطوه ،، ولا لولا الله ثم لولاها كان لألحين متقاعس وماعلــي منه ،،
فيصل" تهلل وجهه من سمع الطاري": الله يخليــها لك ،، ولايحرمكم من بعض ..

\
:

فغرفتها ،، بعد ماصلت المغرب جلست مثل المجنــونه على النت ،، مثل الضــاله اللي تدورلها على طريق يرشدها ،، أفكار يضج بها عقلها ،، وهواجيــس مزعجه تكــاد تقتلها ،، وأشيــاء مجنونه بحكمها تخشى تصدقها ،، تفتح الموقع ورا الثاني ،، مثل التايهه ،، مثل العطشان اللي يلهث ويلهث علّه يجد مايبل ريقه بقطرة ماء ،،
" عيــن !! ،، لا ماأتوقع ،، كلامه لي هذاك اليوم يدل على إنه فيه شي مقصود من أحد ،،وهو عارف مين!! ،، لو عين مب متكلم بهالطريقه ،، ممم وكلامه لأمي بعــد والشيء اللي يبيه منها ،، أأ ،، سحــر !! ،، أمي ساحرته !! ،، لا لا ،، مو معقوله،، مستحيــل وش حادها على هالشيء؟؟ ،، فلـوس طيب الفلوس عندها بسحر ولابغيره ،، ماأعتقد إنه سحر ،، يــوه بس وش تفسير اللي حصل اليوم ،، يسمع قرآن وينفر منه ،، والصوت الغريب اللي طلع منه وبسرعه إختفى ،، وعيــونه!! ،، لاأكيد فيه شيء ،، معمول له عمل واضح ،، يــارب ماتكون أمي ،، يارب ماتكون أمي ،، تكفين يمه لايكون انتي ،، خليك محتفظه بأدنى صوره حلوه فقلبي ،، يــ ..."
ويقطع عليــها أفكارها اللي تعج ،، الصفحه اللي إنفتحت لها عن الرقيه الشرعيه ،، وفيها يتكلم عن الأعراض التي يعرف بها صاحب العين أو السحر أو المس ،، وبدت تقرأ برجاء السطور ودموعها تسبقها لها ،، كنها تترجاها تخذلها ،، وكنها تتوسل لها تقول شي غير اللي شافته ،،

* الشعور بالضيق خاصة بعد صلاتي العصر والمغرب.
*تخيّل فعل المريض لأشياء وهو لم يفعلها.
*شحوب في الوجه أو صفرة فيه ، أو ظهور أثر كدمات في الجسم مائله للزرقه أو السمره
*كثرة حدوث مشاجرات بين الزوجين أو إزدياد النفور بينهما ،، أو فيما بين أفراد الأسرة لأسباب تافهه. !!
* حصول الغضب الشديد لأدنى سبب .
*ضعف القدرة على الإبصار وزيغ واضح في النظر.
* تمكن الهم والغم والحزن والكآبه والأرق والقلق .
* تغير الصوت وسرعة حركة الرمش عند سماع القرآن .


سكرت الصفحات بدون لاتكملها ،، خلاص قرت اللي تدور له ،، قفلتها وحده وراء الثانيه بعيــون مليانه دموع ،، وبقلب مليان أسى ،، تمنت إنها بعيـــده عن هذا كله ،، وتمنت إنها ماشافت هذاك كلــه ،، وتمنت إن أمها ماهي أمها ،، وإن أبوها بصحته وعافيته ،، شكثر كان قاسي عليها مساء اليوم ! ،،
بتقطع الإتصال كانت ،، إلا توسط الشاشه مربع صغير لينذر بداية الحكايه ،، كانت بتقطع الإتصال فعلا حتى بعد ماشافته ،، لكن إستحت تقطعه وهي توها شابكه ،، بيحز فخاطرها وبتعرف إنها شافتها وطنشتها ،،
إلتزمت الصمت بالبدايه ،، إلين قدرت تتحرر شوي من اللي إعتلاها ،،وكتبت ..
* ح ـلم سيكون (صيته): هلا والله ..
* على كف الزمن : هلابك ورحب ،، وينك لي ساعه أصوت ومحد سامع ؟
* ح ـلم سيكون(صيته) "بإقتضاب": أبد سلامتك سمعنا لك عليه شوي
* على كف الزمن: اهاااا ،، اجل لازم نسويلك تركيب إذن جديده ..
*ح ـلم سيكون: اممم مايصير نركب لنا حياة جديده ..
*على كف الزمن : اوووه ،، ياليت ،، كان أنا أول من بركب ،، ولو طلبوا فيها ملايين الملايين،،
*ح ـلم سيكون: آه ياليل ،، ليتنا نموت قبل ماتجينا المصايب من أقرب الناس لنا ،، تعرفين شكثر هو مؤلم شعور إنك تنلدغين من أقرب الناس لك ؟ تشعرين كمــا الضال الذي يمشي فصحراء مليــئه بالرمال المتحركه ،، كل ما تعمقتي أكثر في داخلها كلما جذبتك أكثر إلى قعرها ،،
*على كف الزمن: صحيح ،، الجرح من الأحباب مختلف تماماً ،، يستكين لكن لايندمل بأي حال من الأحوال ،، بس إعذريني على السؤال أنتي فيك شي ؟؟
*ح ـلم سيكون : لا سلامتك ،، الراحه مقدمه لي على صحون من ذهب ..
*على كف الزمن : اممم هذي مزحه ولارزحه؟،، عالعموم على راحتك ،، بس أبصم بالمليون إن فيك شي ،، وعلى هواك حبيبتي متى مابغيتي تقولين أنا حاظره لسماعك ،، بس معلومه حطيها فبالك ،، الفضفضه لواحد مايشوفك يخليك مرتاحه أكثر من اللي يشوفك ،، يعني ماتحسين إنك مكبله بظروف الكلام اللي بيخونك أكيد،، ومقيده ببنظرة عينه اللي مارح تفارقك،، لكن فالكتابه بتكتبين على راحتـك وبتطلعين اللي فقلبك بدون لاتتقدين لابظروف لسان أو ظروف حكي أو كلام أوعيون أوأو ،، أشياء كثيره ممكن تقيدك صدقيني ..
*ح ـلم سيكون : بس أنا وش عرفني باللي قدامي ،، بيتقبل فضفضتي بصدر رحب أولا ،، أنا وش أعنيله ،، هو وش يعنيلي ،، وإلى أي درجه وصل لها عندي عشان أفتح له قلبي ،، يبيلها وقت ليل ليـن ناخذ على بعض ..
*على كف الزمن: أنا ماأجبرك حبيبتي ،، الشيء بالشي يذكر ،، أنا حسيت إنك متضايقه وقلتلك هالشي ،، وإعتبرني مثل أختك إذا إحتجتيني بتلقيني موجوده أكيــد ،،
صيته من ورا الشاشه ،، مليــئه بالتناقضات فهالوقت ،، تبي تستسلم لضعفها وتقولها ،، لكن عزة نفسها تمنعها من ذلك ،، آراء كثيره تحوم حواليها وهي جد تبي تستسلم لهالضعف ،، تبي أحد يشور عليها فهالوقت بالذات ويدلها على الطريق الصحيح ،، تبي واحد يكذب اللي تفكر فيه أو يصدقه ،، تبي أحد يلمس على همها بحنـان ،، فكتبت ..
*ح ـلم سيكون: ليل ؟
*على كف الزمن : لبيــه ..
*ح ـلم سيكون: امممم أبي أسشيرك فشيء حصلي اليوم ..
*على كف الزمن: ههههه مو قلتلك فيك شي ،، مشكلتي لحبيت أحد أحس فيه من وراء القضبان ^_*
*ح ـلم سيكون : ههههه حليلك أمداك تحبيني!! ،، تونا أمس متعرفين على بعض
*على كف الزمن : وش أسوي عاد بقلبي إرتاحلك راحه مابعدها راحه
*ح ـلم سيكون: والله نفس الشيء أحس فيه ،، القلوب عند بعضها ..
*على كف الزمن : أدري أصلا كل من عرفني حبني ،، مب أنتي أول وحده تقولين ،،
*ح ــلم سيكون: طيب أمرحي ،، ترا مايمدحونه الغرور " تغيظ"
*على كف الزمن: طيب لاتصرفين ياللا قولي اللي عندك ،،
وبدت صيته تحكي لها اللي صار اليوم بدون الخوض فالتفاصيل ،، وهي تحــاول ماتغفل أي حركه سواها يمكن تكون هي أعلم منها فأمور مثل هذي ..
قالت على كف الزمن بعد ثواني من الصمت : الله أعلم إن أبوك مسحور ..
*ح ـلم سيكون "برجـاء ودموع من خلف الشاشه": تكفين لاتقولين !!
*على كف الزمن : حبيبتي أنا ماأجزم ،، بس هذي أعراض السحر ،، طيب لحظه ،، تتذكرين وش هي الآيه بالضبط اللي كانت مشغله ..
*ح ـلم سيكون: اممم مدري من الربكه معاد تذكرت ،، لكن كنت مشغله سورة البقره
*على كف الزمن: اممم جينا لمربط الفرس ،، خلاص أكثر مايهيج الشياطين هي !!
*ح ـلم سيكون " وأنهار على خدها": شياطين !! ،، لاااتكفين لاتخوفيني ..
*على كف الزمن : حلم حبيبتي وش فيك ،، مافيه إيمان !! ،، إن كان فيه شيء صدق الرقيه بتروحه ،، بس أهم شيء تعرفون من اللي عامل له العمل عشان تقدرون تفكونه هذا أولاً ،، ثانياً إذا ماقدرتوا تعرفونه أنتوا بنفسكم لازم تودونه لشيخ يقرا عليه ،، وبعد الله سبحانه بيشفى إن شاء الله ،،
وسكتتوا ثنتينهم للحظات يتجاوز عمرها الدقيقه ،،
فكتبت على كف الزمن : امممم تصيحين صح ؟؟
*على كف الزمن : عيوني ،، أنتي ألحين وش المشكله عندك قوليلي .. ترى ياما عالم وياما ناس إنسحروا اوإنظلوا أو تلبسوهم شياطين وبعد القرايه والمداومه على الرقيه كل شيء زال ،، حبيبتي الأمر مب صعب مثل ماأنتي متصورته ،، بس أهم شيء تكون عنده العزيمه على الإمتثال للرقيه وكل شيء بعون الله بينحل ..
*ح ـلم سيكون : وشو الأمر مب صعب !! ،، حرام عليـك أبوي مسحور وأنتي قاعده تستسهلين الموضوع!! ..
*على كف الزمن : ياالله ألحين إحنا بصمنا إنه مسحور !! ،، ياعمري أنتي هذا مجرد فرض ،، يعني لألحين مابعد تأكدتي ،، يمكن مجرد لبس ، يعني يمكن كان أبوك متضايق وأزعجه صوت المسجل العالي ،
*ح ـلم سيكون : ياســلام ،، يزعجه صوت القرآن !! ولاالصوت اللي طلع منه ،، ولاعيونه ياسلام عليك !!
*على كف الزمن : لحـول ترى ماعرفتلك ، قلتلك مسحور ودليتك على سبل العلاج ماعجبك وهبيتي فيني ، قلتلك غير كذا بعد ماعجبك ،، وش تبين أقول بالضبط عشان أريحك ؟؟
*ح ـلم سيكون : آسفه ،، بس والله مب عارفه وش أسوي ،، أحس إني فدوامه مب عارفه أطلع منها ،،
*على كف الزمن : طيب بسألك ،، أبوك نسيانه كثير ؟
*ح ـلم سيكون : إيــه حيل ،، يسوي أشياء وينسى إنه سواها ،، وأشياء يبي يسويها وعلى باله إنه سواها ،،
*على كف الزمن : طيب ،، تحسينه دايم متضايق ومهموم ؟
*ح ـلم سيكون: اممم كل يـوم أشوفه على هالحال ،، بس إحنا عندنا ظروف فعايلتنا أتوقع منها وهذي أشياء قريتها من شوي ،، الأعراض وشكيت فهالشي لكن كلامك يأكدلي !!..
*على كف الزمن : مممم طيب طيب ،، عشان تقطعين الشك باليقين ،، شغلي آية السحر اللي فسورة البقره(( واتبعوا ماتتلوا الشياطين على ملك سليمان ...)) فوقت وجوده فالبيت ،، وشوفي كيف حاله ،، إذا تأثر بقوه بقوه خلاص تأكدي من هالشيء ،، وإذا غير هذا فإحمدي ربك ،،
*ح ـلم سيكون : خايفه والله خايفه ،،
*على كف الزمن : طيب إذا خايفه من هالخطوه ،، خلي أحد من أهلك يقوم بها ،،
*ح ـلم سيكون : مممم ياليت ،، بس ...
*حلم سيكون : خلاص يصير خيــر ،، الله يساعدني ويكون فعوني ،،
*على كف الزمن : أيوااااه هذا اللي أبيه منك ،، ربك لاتبعدين عنه ،، خليك دوم قريبه منه وإدعيه يفرج عن أبوك ويفك عنه ،، وبعد بعطيك إسم كتاب حلو مره ،، بينفعك كثير وبتستفيدين منه حيل ،،
*ح ـلم سيكون : الله لايحرمني منك ،، والله لجّيتك بمشاكلي ،،
*على كف الزمن : افاااا عليك ،، والله حسيت إني أتكلم مع وحده من خواتي ،، وتصدقين ولاأقولك بعدين ،، عالعموم إنتبهي لأبوك زين ولاتهملينه ،، إذا كان فيه شي لاتتهاونون فيه بادروه بالقرايه والعسل والسدر والله يبري شكواه وشكوى كل من إشتكى ،،
*ح ـلم سيكون : الله كريم ياقلبي ،، ياللاا أنا بطلع تامريني بشي
*على كف الزمن : سلاااامتك سلااامتك ،، لاتنسين طمنيني عليه ،، إذا ماحصلتيني أون لاين أرسليلي رساله خاصه فالمنتدى ،،
*ح ـلم سيكون : أبشري من عيوني ،، لاخليت ياقلبي ،، فمان الله

\
:

" قــل والله "
عبدالله : مايحتاج أحلف ،، مايستاهل الموضوع ..
نايف " بغيـــظ واضح فكامل ملامحه": يامــــال الموت ،، يعني عارف إنها لي ومتأكد إنه مب ماخذها ،، وش قصده الكلب يبي يقهرنــــي ،، يبي يفقع مرارتي جعله حادث يفتت عظامه ..
عبدالله " بزعل": لحـــول وش ذاالدعاء يانايف ،، خاف ربك بترجع عليك الدعوه ،،
سلطان" بقهر أكثر": إلا الله ياخذه ويفكنا منه ومن غثاه ،، وش بعد ذالطاري !! ،، يجي يخطب بنتنا ،، من زين الطبايع عااد !! ،، لاصلاه ولادين ولاخلق زين!!..
نايف : لاااا وبعد أزيدك من الشعر بيت ،، ماخلى بنت فالعالم كله إلا وكلمها ،، أنا بس ودي أعرف هو متوقع إنا بنوافق عليـه !!،، والله إنه بس يبي يغيظني ،، ولاشوفوا وش يلمح له !!
عبدالله " بجديه": لاإله إلا الله ،، الموضوع وإنتهى خلاص ،، قلنا لأمه الله يستر علينا وعليكم مالكم نصيب عندنا ،، وشوله كثر الحكي ووتقطيع لحم الرجال !!

\
:

جالسه هي وياها فالغرفه ،، توها جايتها ،، ومن جات بســرعه خذتها وطلعتها وكرها ،،
هـــــدوء يسودهم ،، كل وحده تناظر الثانيه بنظرات تحمل معاني الحب بزعمهم ،،
حنان حاظنه كف نوره بيدينها الثنتين وتحركهم عليها بدفء ،، وتناظر فعيونها شوي وتناظر فكفها شوي ،،
قالت نوره تبي تقتل الملل اللي تحس فيه : حنون وراك تطالعيني كذا ،، والله أستحي ..
حنان " بضحكة ميوعه": أنجن عليك وأنتي مستحيه ..
نوره " بنفس الضحكه مع قرصه خفيفه على خدها": وأنا أنجن عليك بكل حالاتك ..
حنان " بلطف ": عساه مايخليني ،،
نوره " بجديه": تصدقين حنان إن إحنا فـ ثانويه عامه !!
حنان : هيهيهي لاماأصدق ،،
نوره : لاجد حنان ،، الإمتحانات معاد بقى عليها إلا حول الشهر وإحنا ماندري وش السالفه ،،
حنان" بلامبالاه": يابنت الحلال روقيني ،، بننجح بننجح ،، والجامعه داخلينها داخلينها يعني خلي مني كثر الكلام اللي يضيق الصدر ،، وتعالي أسمعك شريط نوال الجديد يجنــــن ..
وتقوم وتجرها وراها وتحظنها من ورا كتفها برقه وتروح يم الأستريو وتشغل الشريط ويغرقون في ضلالهم ..

\
:

بعد ماقطعت الإتصال ،، فتحت الوورد وكتبت الآتي ،،
"
كمــا الجسر المعلق في السماء ،، أنت ،
أنظر إليه بخلســة ،، وعبثاً أحلم بالوصول إليه ،،
،،
رجوى ))
هل تسعفني وتقول لي كيف أخلعك ،،
هل أهب لك الكون وماوراءه
وتقتلك بداخلي ،
أعمى هو الحب يتخبط بين قلبي وبيني واختار ماهو أعمى مثله ،،
،،
،
كما السراب بقيعةٍ ،، أنت ،
أحلم أيضاً عبثاً بالنهل منه ،، وأنت لاتمهلني حتى قرب النظر ،،
أي .......

:

" وش تســـوين " ،، قالتها غاليه مع فتحها للباب بقوه ،، ودخلتها الدفشه معه ،،
طالعتها مهره بغيظ وقالت : بسم الله الرحمن الرحيم ،، وجع يوجعك كم مره معلمتك لعاد تدخلين علي بهالشكل ،، هااألحين قطعتي علي الإلهام ،، وين بيجيني مره ثانيه !!
غاليه : إخــص يالشاعره ،، أقول ريحي ريحي بتسويلي فيها ألحين ،،
مهره : مالت عليك ،، وش دراك أنتي عن ذاالعلوم ،، خليك خليك فنومك أحسن لك ،،
غاليه : هيهيهيهي ،، ماتضحك أبد ،،
مهره : ماقلتها عشان تضحكين ،،
غاليه: أقول شحمي شحمي ..
مهره: هاهاها بفكر ،، وصدق ترى ماقلتلك اليوم جلست مع حياة جلسه جلسه ودك بها!! ،،
غاليه : ليه وش صار ؟؟
مهره : سلامتك ماصار شي ،، لكن تكلمت معاها فسالفة إنها منعزله بعمرها وهالكلام ،، وتدرين وش قالت ؟؟
غاليه: امممم وش قالت يامال العافيه ..
مهره : تقول ماكنت كذا من قبل ،، تقول من بعد ماخذلتيها إنتي وفهد الله يرحمه صارت بهالشكل ،، يعني معاد حست بالأمان بمعنى أصح ..
غاليه " بضيق": الله عليـها ،، واختك هذي ماتعرف تسامح!! ،، عشان كلمة حق قلتها بتحملني ذنبها ،، وفهد الله يرحمه وشو خذلها بعد !! ،، عشانه مات وخلاها فهذا خذلها!! ،، وين الرضاء بالقدر ووين الإيمان اللي تتكلم عنه ،، بالله عليك يامهره هذا منطق تتكلم فيه !!
مهره : لحــول ياغاليه لاتعصبين ،، أنا بس أقولك هي وشلون نظرتها للموضوع ،، وبعدين لاتلومينها زوجها وبنتها اللي كانوا يعنون لها الدنيا ومافيها ماتوا فليله وحده ،، وأنتي ياأغلى من الكون كله جيتي وكملتي الناقص ،، يعني بالله عليك وين بتحس بالأمان بعد هذا كله ،، زين ماجاتها عقده نفسيه ولاإنجنت ،،
غاليه " بشده": مهره حبيبتي الله ياخذ والله يعطي ،، ومب معناته إن زوجي يتوفى أو بنتي بتتوفى خلاص بتوقف الدنيا ،، وبنعزل على عمري وبكره كل الناس ،، ومب ..
مهره" تقاطعها": إصبري إصبري ،، ألحين حياة كرهت كل الناس ،، غاليــه لاتبالغين !!
غاليه: يمكن بالغت فهالكلمه ،، لكن قوليلي كيف كان حالها بعد الحادث ،، مب كان تناظر الدنيا كلها بسواد !! ومب كانت يالله يالله نشوف وجهها !! ،، وأسألك بالله كيف صار حالها بعد ماقلتلها هذاك الكلام اللي سبب زعلها ،، ماتغيرت وإنفكت شوي شوي من عزلتها ؟؟
مهره : إلا والله ،، بس هي شايفه إنك جرحتيها !!
غاليه : وشايفه إني ماأحس فيها وإني خيبت ظنها فيني!! عــارفه كل هالأشياء ،، وهذا اللي معقدني فحياتي ،،
مهره : بس تراك ماعندك إسلوب ،، كلمتيها بطريقه همجيه وماعرفتي تطلعين اللي فخاطرك زين وكانت مشاعرك جافه وأنتي تتكلمين وهذا اللي زاد الطين بله ..
غاليه " باااهه": وهذا بلاي ،، ماعرف أعبر عن اللي فداخلي ،، لبغيت الكلام طـار ،، ولبغيت المشاعر طارت ،، ووكل شيء يطير لبغيته ..
مهره : غاليه حبيبتي ترى هذي مشكله بحد ذاتها ،، اللي حولك بينظر لها على إنها تقصير منك ،، أو إنهم مايعنون لك شي من هالجفاف وهالأسلوب ..اممم ماعلينا ألحين ،، اللي المفروض يصير الآن ،، ترجعين أنتي وحياة مثل قبل وأحسن ،، والله حياة محتاجة لك غوالي وأنتي بعد أحسك محتاجتلها ،، فبيت واحد وكلامكم كله رسمي في رسمي ،، والله حرام ،،
غاليه " توقف وعيونها متغارقه": والله أنا أتكلم معاها طبيعي وماكن شي بينا ،، لكن هي .. ،، الله يعين بس ..
وتروح تبي تطلع ولما وصلت للباب طخت راسها بيدينها كنها تذكرت شي ورجعت لمهره وقالت : الله لايشغلنا إلا بطاعته ،، جايتك أقولك أبيك تروحين السوق معي ونسيت ..
مهره : ههههه ،، وش عندك ؟؟
غاليه : وش دخلك ،، بشتريلي أشياء خاصه أنتي وش عليك !!
مهره : هههه حلوه أشياء خاصه وأنا بروح معك ،، عالعموم مدام بندر بكره بيجي فعرفت وش تبين " وتبتسم بخبث"،، ووأبشري دقايق وأكون جاهزه كم مرة أخو عندي ..
غاليه " وهي توجه يم الباب": مــــالت عليك وعلى أخوك " وتناظرها وتطلع لسانها " ،، وعلى فكره ترى نايف بيودينا ووالله ماتقولين شي حلفت ..
مهره " مغتاظه": هـــــــــيه تعالي تعالي ،،
وتمشي غاليه كنها ماسمعت شي ،، ومهره تحلطم وتكلم عمرها ،،