وعدتك ما أحبك وغلبني الشوق في حبك / للكاتبة ولاء العيون ، مكتملة

[لامارا]

62


بيت ابوطلال بعد ربع ساعة تجمعوا البنات كلهم في بيت ابوطلال باستثناء شهد ورؤى الي حالتها لاتقل عن حالة شهد
واهي بعد متعبها الحمل والوحام .. كانوا جالسين في الحديقة وسوالفهم وضحكهم محلي جلستهم .



ابرار : اي والله , الله يساعدهم عاد مساكين ثنتينهم حمل
سارة : وانتي الصاجة .
ايلاف : صراحة احسن شي ان يوم العرس وليد وفارس تصالحوا .
مي : اي والله , الحمدلله الي ربي حنن قلوبهم .
ولاء : وانتي الصاجة ازعجونا بزعلهم مابغوا يتصالحون .
ايمان : مابقى الا شهد وفارس نرجعهم لبعض .
ليان : شهد تغيرت ترا ... يعني احسها صارت احسن من اوول
نور : اي والله ترا قامت تبتسم وتسولف وتضحك ولما نجيب طاري فارس عادي يعني ماتجلس تعصب ولاتغير الموضوع
بيان : ان شاء الله في امل ترجع لفارس .
ايلاف : بيان انتي لسى مداومة ع العلاج .
بيان تهز راسها بـ أيه : ايوا .
زهرة : يلا ان شاء الله تتحسنين وترجع لك الذاكرة .
بيان : ان شاء الله .
مي وقفت : بروح اجيب العصاير .
ايمان لحقتها : بجي اساعدك .



مشوا مي وايمان متوجهين للمطبخ واول مادخلوا علطول ايمان سكرت الباب
مي : بسم الله شفيك خرعتيني .
ايمان : مي بقولك شي.
مي : شفيك, صاير شي بالبيت؟
ايمان : لا .. بس في واحد تقدم لي.
مي بفرح : صج ... زين وان شاء الله وافقتي.
ايمان : لا سمعيني بالاول..يوم العرس يوم امي ارسلتنا انا وزهرة نجيب الاغراض من السيارة واحنا راجعين
تهاوش معانا بزر وبعدها راح جاب اخوه .
مي : طيب وش دخل هالموضوع بالرجال الي متقدم لك .
ايمان : اخو البزر اسمه ياسر وامي تقول الي متقدم لي اسمه ياسر صديق اخواني وامه جات عرسكم وشافتني
مي : يعني قصدك ان ذاك اخو البزر اهو نفسه الي تقدم لك.
ايمان : اتوقع كذا.
مي : طيب وانتي ليش خايفه ..فكري واستخيري
ايمان : فكرت وحسيت اني مرتاحه بس خايفه.
مي : لاتخافين .. ووبعدين دامك مرتاحه وافقي ولاتطولين المسأله.
ايمان : .................
مي تدف كتفها : اووه وكبرنا وبنتزوج .
ايمان : يلا بس جيبي العصاير.



بيت ياسر .

كان جالس في الصالة مع امه واخوه عبدالعزيز يلعب بالبليستيشن

ام ياسر : اقول ياسر .. تراني كلمت المره وقلت لها ان احنا نبي بنتهم ايمان وقالت لي بترد لي خبر .
ياسر : ماكأنك استعجلتي يما.؟
ام ياسر : لا ما استعجلت ولاشي وان شاء الله تكونون من نصيب بعض وافرح فيك ياولدي واشوف عيالك .
ياسر : بس انا لسى ماجهزت شي وين بنسكن والمهر وو
قاطعته ام ياسر : ماله داعي كل هذا ... اكيد انكم راح تسكنون هنا وانا بحط ايمان بعيوني لاتحاتي واذا على المهر
انت تشتغل ياوليدي واذا ماكفاها الي عندك نعطيها زيادة.
ياسر : الي تشوفينه يما .


بيت ابووليد
كانت جالسه في الغرفة مع وليد وكان يسولف معاها ومتردد كيف يفتح معااها الموضوع في النهاية استجمع نفسه
وليد : يمما انا بقولك اني ابي اكمل نص ديني .
ام وليد : والله هذي الساعة المباركة يوم اشوفك بتتزوج .
وليد : بس يما ابوي مو مقتنع بالبنت الي انا ابيها
ام وليد : وليد يمما ترا بيان ماتصلح لك وصدقني مارح ترتاحون بالعيشه لانها ماتحبك .
وليد : يما اناا مارح اتزوج غيرها واذا انتو مو راضي فيها مارح اتزوج .
ام وليد : ياوليد لاتتعب قلبي
وليد : بس يما المشكلة وانحلت وانا اعتذرت للكل
ام وليد : تكلم مع ابوك وحل معاه هالمشكلة
وليد : يما تكفين انتي كلميه وقنعيه , وقوليله بنت غيرها ماني ماخذ
ام وليد واهي تطلع من الغرفه : الله يهديك ياولدي .



يوم جديد يحمل احداث جديدة بيت ابوليان كانوا نور وليان جالسين عند شهد في الغرفة ويسولفون قررت ليان
تفتح الموضوع مع شهد وتحاول تقنعها لعل ترضى
شهد : ليان تكفين لاتذكريني بالماضي . انا الحين قررت افتح صفحة جديدة واعيش واربي الي ببطني .
ليان : شهد ... حرام عليك الي ببطنك يحتاج ابو حرام تخلينه يعيش بدون ابو طول حياته .
شهد : بس انا مابيه يعيش مع ابو مثل فارس .
نور : فارس مايعيبه شي .. صح اهو غلط لكن مو معناته اذا غلطنا نضل طول عمرنا نفكر بغلطنا .
ليان : شهد الواحد يغلط ويتعلم من غلطه .. ليش قلبك لهالدرجة قاسي عليه
نور : ما تذكرين قبل كيف تحكين لنا شكثر تحبينه ومستعده تعيشين معاه طول عمرك وين راح ذا كله .
شهد تجمعت الدموع بعيونها : خلاص خلاص والله احبه بس مقدر اسامحه لاني احبه مقدر اسامحه لانه كسرني
ليان : صدقيني فارس مستعد يسوي لك كلشي بس انتي رجعي له اذا مو عشانك عشان الي ببطنك .
شهد : خلاص لاتفتحون هالموضوع معاي مره ثانيه .
سكتوا ليان ونور وصاروا يسولفون بسوالف ثانيه اما شهد مو معاهم وتفكر بفارس وهل ترجع له او لا.



تسريع الاحداث , بعد مرور شهرين , ايمان وافقت على ياسر وملكوا على بعض , ليان وتركي علاقتهم مافي مثلها
ومقررين يسوون عرسهم مع ايمان وياسر , ام وليد كلمت ابو وليد بخصوص موضوع وليد وبيان وحاولت
وابو وليد وافق عشان ولده وتقدموا لبيان واهي وافقت وطبعا بيان لسى فاقده الذاكره , وابووليد كلم ولده سعود
بخصوص الزواج وقاله انه يبيه يتزوج مع اخوه وليد وسعود وافق وخله امه تخطب له ساره وطبعا سارة بالبداية
رفضت وبعد محاولات وافقت ووليد وسعود ملكوا وبيسوون العرس مع تركي وياسر بعد اسبوعين العرس
شهد لسى تفكر بفارس وبعد مافكرت بحياتها وبفارس وبطفلها قررت تسوي التالي .



قبل العرس باسبوع في بيت ابوفارس .. نزلت بيان تركض واهي تنادي امها
بيان : يمماا يلا ترا بنتاخر على السوق .
ام فارس تنزل من الدرج : يلا انا جايه بس وين اخوك ؟
بيان : فارس بالسيارة ينتظرنا من زمان .
ام فارس : يلا وترا ابرار تبينا نمرها

طلعوا ام فارس وبيان ركبوا السيارة حرك فارس توجهوا بيت ابوطلال اخذوا ابرار وتوجهوا للسوق .


بيت ابووليد كانوا ايمان وزهرة يلبسون عباياتهم عشان بيروحون السوق وام وليد تناديهم
ام وليد : يلا يابنات تأخرنا .
زهرة : جايين يما انتي روحي ركبي السيارة .
ام وليد : بسرعه ترا سعود معصب يقول تأخرتوا .
زهرة : طيب يلاا ايمان .

نفس الشي طلعوا وتوجهوا للسوق واخذذوا معاهم مي .

بيت ابوليان ليان خلصت تجهيزاتها للعرس وشهد كبر بطنها ووصلت للشهر السابع والحمل متعبها مرا
اما نور كانت بالصاله تلعب بلايستيشن .
نور : شهد شفيك ؟
شهد : تعبانه مرا
نور : نوديك المستشفى
شهد : .............
نور لفت عليها : شهد شنو هذا .؟
شهد تناظرها : مدري نور حدي تعبانه .
نور وقفت وراحت تركض فوق شوي ونزلت ووراها ام ليان توجهوا لها بخوف
ام ليان : شهد شفيك يممماا ؟؟
شهد : اههه خالتي " ومسكت يدها بقوه "
جات ليان تركض : شفيكم ؟ ... شهد شفيك ؟
ام ليان : روحي نادي ابوك بسرعه .. نور روحي جيبي عبايتي وعباية شهد
راحت ليان تركض ونادت ابوها ونور راحت تجيب العبايات لبسوا شهد عبايتها وطلعوا وركبوا السيارة
وعلطول للمستشفى ..اول ماوصلوا استلموها الدكاتره حطوها ع السرير ودخلوها الغرفه اما الباقي وقفوا برا
ينتظرون مرت ربع ساعه ونص ساعه والدكاتره يطلعون ويدخلون من الغرفه وكل ماسألوهم صرفوهم وهالشي
خلاهم يخافون اكثر.
ليان : ياربي لايكون صار فيها شي.
نور : اهه والله قلبي يتقطع عليها .
ام ليان تقرأ قران ووجهها مليان دموع وابو ليان واقف ويدعي لها .
نور : ليان تتوقعين يصير لها شي.؟
ليان : لا ان شاء الله .


بعد مرور ساعة طلع الدكتور ووراه ممرضتين توجهوا لهم
ابوليان : دكتور طمنا عن حالتها كيفها الحين ؟
الدكتور : بصراحه المريضة وصلت لمرحلة الولادة المبكره واضطرينا نحط لها طلق اصطناعي.
ام ليان: طيب شهد بخير؟
الدكتور : هي ولدت بالشهر السابع يعني مبكر كثير واسباب الولادة في الشهر السابع سوء التغذية و الوزن المنخفض
وفي اسباب غيرها لكن اكتشفنا انها ولدت مبكر بسبب سوء التغذية وحالتها النفسية أثرت على الجنين , لازم تضل
بالمستشفى لين نتأكد من صحتها والجنين رح يضل عندنا الين يكتمل النمو عنده .
ابوليان : الحمدلله على كل حال , مشكور دكتور .
الدكتور : العفو ولو واجبنا." وراح دخلوا عند شهد لكنها لسى ماصحت من تأثير البنج "


بيت ابوطلال الساعه 10 الليل
دخلت وفي يدها اكياس كثييره ووجها احمر من التعب طاحت ع الكنب والاغراض طاحوا ع الارض
سارة : اهه تعبت تعبت اووف
ام طلال : الحمدلله امدانا نخلص اغراضك ... بكره بنروح شقتك عشان نرتب اغراضك وقبل العرس بيوم
بتروحين تتحنين .
سارة : طيب بس انا الحين بقوم انام حدي تعبانه .
ام طلال : طيب نوم العوافي .
اخذت الاغراض وصعدت فوق دخلت الغرفه وقفلت الباب حطت الاغراض ع الكنب ولبست بجامتها جلست
ع السرير واخذت تلفونها واتصلت على سعود شوي وجا صوته .
سعود : هلا بالحب .
سارة : هلافييك . اخبارك؟
سعود : كل ماتكلميني اصير احسن من اول .
سارة بخجل : دووم يارب .
سعود : اه اخيييرا قرب العرس
سارة : شدعوه لهالدرجة تحبني وتبيني؟
سعود : سارة وربي اني اححببك من زمان لكن ماعترفت لك
سارة بصدمة : امانه؟
سعود : والله
سارة : طيب ليه ماعترفت لي؟
سعود : تبين الصراحه .. انتي قبل كان لسانك ممرا طويل ودايم تتهاوشين وانا اكثر واحد تتهاوشين معاي
الزبدا خفت اقولك وتشرشحيني فـ قلت احتفظ بحبي لك بنفسي .
سارة : اهاا.
سعود : اهمشي الحين احناا مع بعض وبعد كم يووم بتكونين حلالي ومحد بيقدر ياخذك مني.
سارة : طيب قلبي انا تعبانه ابي انام .
سعود : اووك نوم العافيه .
سارة : يعافيك , مع السلامه .



نهاية البارت .... توقعاتكم؟

[لامارا]

البارت 63 والأخير


قبل العرس بيوم .. ليان وايمان وبيان وسارة كل وحده راحت تتحنى للعرس واما الباقي كانوا يجهزون اغراضهم
للعرس ... شهد عرفت انها ولدت بالشهر السابع ورح تضل بالمستشفى اسبوع لحد مايتأكدون انها بخير وبعدها
بتطلع وطبعا جابت بنت .. الكل عرف بولادة شهد المبكرة وماقدروا يزورونها وأجلوا الزيارة لبعد العرس
وفارس كان قلبه متقطع عليها لكن مابيده شي .. شهد مارح تروح العرس عشانها بالمستشفى



يوم العرس { تركي , ليان - وليد , بيان - ياسر , ايمان - سعود , سارة }
صحا الكل من بدري البنات والحريم جهزوا اغراضهم ولبسوا عباياتهم وعلطول للمشغل اما الشباب
توجهوا كلهم للحلاق وبعد ماخلصوا طلعوا وراحوا يتروشون ويلبسون و عالساعة 6 المغرب خلصوا وتوجهوا
للقاعة .. دخلوا البنات القاعة اللي كانت وسيعة وصوت الدي جي مالي ارجاءها والمعازيم الي جاية تبارك دخلوا
الغرفة وفصخوا عباياتهم وجلسوا يسلمون على بعض شوي ودخلوا المعاريس وحده ورا الثانية فصخوا عباياتهم
وتعطروا وجلسوا .

ولاء : سارة شوي شوي لاتطيحين .
سارة : ولاء والله ماعرف امشي فيه ذا مررا عالي.
ولاء: ماعليه حبيبتي بس الليله بتلبسينه .
سارة : طيب طيب مسكيني زين .
ولاء : هاه لاتطيحين وتتعورين , بسم الله
سارة : خلاص تركيني .
بيان : مو من صجك سارة منتي عارفة تمشين فييه .
سارة : لاتتطنزون علي ترا اعرف امشي بالكعب مو لهالدرجة الانوثة عندي صفر
زهرة : اي والله وانتي الصاجة .
ابرار دخلت : ليان يقولون لك تجهزي الحين بتنزفين .
نور : مو كأن بدري؟
رؤى : مو بدري ولاشي ... وبعدين اربع معاريس شي اكيد بيزفونهم بدري عشان يالله يمديهم يخلصون قبل الساعه 2
ليان : طيب شكلي حلو امانه شوفي مكياجي , طيب فستاني مرتب؟
مي: عمري ليان وربي تهبلين مشالله عليك .. يلا قومي .

وقفت ليان وساعدوها البنات طلعت من الغرفة وووقفت عند المدخل دخلت على موسيقى وسط انظار الكل وكانت
مبتسمة وطايره من الفرحه الليله بتكون ملك لتركي , وصلت للكوشة واشتغلت الانوار وجات ام ليان واهي تيبب
حظنت بنتها شوي وجاو البنات وحظنوها وجلسوا جنبها يسولفون وبعدها قامو يرقصون على اغنية .


اعلنوا دخول تركي انطفت الانوار وانزف تركي على اغنيه وصل لليان وباس جبينها ووقف جنبها صورو كم صورة
ضلو شوي وطلعوا وبعدها زفوا باقي المعاريس وكل واحد راح لغرفة عشان يصورون وبعدها كل واحد طلع
زوجته للفندق .. عند الرجال مشوا اغلبيه المعازيم اما الشباب كانوا جالسين على وحده من الطاولات ينتظرون الحريم
يخصلون عشان يمشون .
سيف : حاول تكلمها او خلي خواتك يكلمونها ان شاء الله ترضى
محمد : واهو الصاج , وترا البنات يقدرون يقنعونها
طلال : انت جرب منت خسران شي .
فارس : ودي اكلمها بس والله مالي وجه .
اياس : صج انك غلطان وان مالك وجه تكلمها بس لازم تتشجع .
طلال : اهي الحين محتاجة لك اكثر من اي احد .. الاكيد انها تبيك وتبي ترجع لك بس تكابر .
فارس تنهد : خلاص بحاول بكره اروحلها مع خواتي واكلمها .
اياس : لاتيأس يافارس وحاول معاها
فارس : ان شاء الله
احمد :يلا اخليكم انا ماشي.
محمد : حمود بتروح بيتنا؟
احمد : ايه بروح اخذ رؤى وبسام .
محمد : اجل في طريقك وصل ايلاف
احمد : اووك اتصل فيها تطلع .

عند الحريم .

زهرة : ايه يما خلصت .
ام وليد : يلا لانتأخر على بدر .
زهرة : اووك يما .
ام وليد : يلا ياخواتي انا بروح مع مي وبدر .
ام فارس : حياك الله , يعطيك العافيه .
ام وليد : الله يحييك ويعافيك .
ابرار : يما تبيني اوصلك؟
ام فارس : لا فارس موجود , انتي روحي لاتتاخرين على طلال .
ابرار تسلم على امها : اوك يلا مع السلامه .
ولاء : يما بتروحين مع بدر؟
ام طلال : لابروح مع طلال وابرار
ولاء : اوك انا مشيت مع السلامه .


مشى الكل متوجه لبيته .. عند فارس نزل امه وطرا في باله شي وقالها انه عنده مشوار وبيرجع دخلت ام فارس البيت
اما فارس مشى في المستشفى كانت جالسه ومتملله بروحها حتى بنتها ممنوع تشوفها وقفت على رجولها واهي تقاوم
الالم توجهت للنافذة وصارت تناظر الناس الرايحة والجاية شوي حست بصوت الباب ينفتح طنشت وقالت اكيد السستر
جاية تكشف سندت راسها على النافذة وتنهدت وقالت بهمس : اه يافارس وينك ابيك وابي اشوفك محتاجه لك
ابي حنانك ابي ضمتك ابييك ... معقولة ما اشتقت لي مثل ما اشتقت لك .؟
: مين قال اني ما اشتقت لك ؟
شهد لفت وانصدمت من اللي واقف قدامها : فـ فارس؟!
فارس قرب منها : صحيح اشتقتي لي.؟
شهد ارتبكت : آآ ... فارس بعد عني.
فارس مسك يدها : شهد لو تبين نرجع وربي نرجع لبعض .. صدقيني حتى انا محتاجك .
شهد رفعت راسها : فارس لوسمحت لاتتكلم بهالموضوع.
فارس : ليمتى بنضل مسكرين على هالموضوع , دامك تبيني وابيك خلينا نرجع لبعض ليش نخبي على بعض.
شهد دمعت عيونها : ............
فارس مسك وجهها بيدينه ومسح دموعها : لاتصيحين , شهد بالله جاوبيني صدق انتي تبيني ولا؟
شهد : فارس
فارس : قوليلي ايه ولا لا؟
شهد نزلت عيونها ورجعت رفعتهم وهزت راسها بـ أيه .. ابتسم فارس وحضنها بقوه واهي حضنته .. حضنته تتحسس
الامان منه .. اشتاقت له كثير واشتاقت لحضنه وحنانه ... حطت راسها على صدره وشدت عليه كانها تقوله لاتتركني.
فارس : شنو بتسمين بنتك؟
شهد : افكر بـ تيمان .
فارس : اممم
شهد : ماعجبك؟
فارس : دامه عاجبك اكيد بعجبني .
شهد ابتسمت : تصدق للحين ماشفتها .. تتوقع مين تشبه؟
فارس : اكيد تشبه امها
شهد : ويمكن تكون احلى من امها وتشبه ابوها.
فارس : بس الاكيد تشبهك
شهد :يالواثق.
فارس : خلاص لما نشوفها بنعرف مين تشبه.




يوم جديد في بيت ابووليد .. كان الكل متجمع هناك وطبعا المعاريس بيسافرون بعد يومين عشان مافي حجز الا بعد
يومين كانوا توهم مخلصين غدا والحريم يغسلون ويرتبون اما الرجال يشربون شاي والشباب سوالف وضحك
والبنات نفس الشي بعد دقايق انضموا الحريم مرت نص ساعة على سوالفهم شوي ودخل فارس وعلى وجهه ابتسامه
دخل وسلم عليهم وجلس عند ابوه وطلب من الكل يسكت عشان بيتكلم .
فارس : انا وشهد قررنا نرجع لبعض
الكل فرح بمناسبة هالخبر والبنات حضنوا بعض والحريم دمعت عيونهم من الفرحه
ابوفارس : اخيرا مابقيتوا تتفقون
فارس : يبه اليوم نجيب المملك ونرجع لبعض مافيني صبر
طلال : من قدك بتعرس مرتين .
فارس : استح تراها مرتي
الشباب : ههههههههههههههههههه
سعود : عسى الله لايفرقكم مره ثانية .
الكل من قلب : اميييين .


المغرب بعد الصلاة توجه الكل للمستشفى وفارس اتصل على المملك عشان يجي دخلوا الحريم والبنات وسلموا
على شهد واهما طايرين عليها من الفرح دخلوا الرجال والشباب وسلموا عليها من بعيد وبعدها طلعوا
والبنات كل شوي يحرجونها , شوي وجا المملك ورجعوا شهد وفارس لبعض واخيرا .. سلم عليهم المملك ومشى
والكل بارك لهم وطلعوا عشان يخلون فارس وشهد على راحتهم .. تقدم فارس لشهد ورفع راسها وناظر بعيونها
فارس : اخييرا مابقيتي تغيرين رايك .
شهد : فارس
فارس : عيونه ؟
شهد : وعدتك ما أحبك وغلبني الشوق في حبك.
فارس قرب شفايفه من جبهتها وباس جبينها ونزل عيونه لشفايفها وماقدر يقاوم وباس شفايفها وحضنها




بعد مرور شهر
- فارس وشهد رجعوا لبعض والفرحة مو سايتعهم وسمو بنتهم تيمان
- سافروا المعاريس شهر العسل شهر
- زهرة خطبها ايثان ووافقت عليه ونور خطبها ولد عمها اياس ووافقت عليه وسيف نفس الشي خطب ايلاف
وعرسهم بعد ثلاث اسابيع
- ولاء اكتشفت انها حامل بالشهر الثاني
- رؤى ولدت وجابت بنت سمتها ملاك .
- بيان رجعت لها الذاكرة بيوم عرسها ولما عرفت انها تزوجت وليد ماصدقت وطبعا صارت مشكله
بينها وبين وليد وليلة عرسها كانت متضايقة على نفسها وكيف انها قبلت في وليد لكن بعدين تأكدت من مشاعرها تجاهه وقبلت فيه وعاشو حياتهم .




نهاية روايتي الاولى جمعت بيت الحب والفراق والحزن والفرح والمحبة , كتبتها اناملي الصغيرة وابدعت في كتابتها انتهت بحب فارس لشهد اللي فرقتهم المشاكل مع ان حبهم لبعض كبير لكن شاء القدر انهم يكونون لبعض ورزقهم الله بمولودة اسمها تيمان بصراحة مدري كيف اختمها لكن اتممنى حازت على اعجابكم
تمت في 9 / 11 / 1437هـ




- ايش اكثر شي عجبكم في الرواية ؟
- الي عنده اي انتقادات يكتب ؟
- ميين الشخصية الي عجبكم دورها في الرواية ؟
- وان شاء الله اذا قدر الله اني اكتب لكم رواية ثانية بافكار مختلفة وبس والله ومع السلامه .

[ندى تدى]

شكرا حبيبتي على المجهود الرائع

ويعطيك العافيه