آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
24-10-16, 11:17 PM
| #41 | ||||||||
| مراقبة عامة ومشرفة منتدى الروايات المنقولة  
|  ****** الــجـــزء الآخــــيــــر ****** ****** الــجــزء الــحــآدي والــعــشــرون ****** ابو يزيد وصل للمستشفى ويوم دخل لقى العالم متجمعه وماهي على بعضها اتجه بيشوف منعوه حراس الامن حاول ورفضوا جاه الدكتور : سم ابو يزيد : انا والد يزيد اللي صاير عليه حادث الدكتور : اهااااه هذاك مع ابنك ويطالع الى هذاك سلطان جاي له يسلم عليه ويحب راسه وكان يبكي سلطان ابو يزيد : وش فهي يزيد يادكتور الدكتور : والله مدري وش اقولك ابو يزيد : قلي وش فيه ولدي ( يصرخ بصوت عالي ) الدكتور : انت انسان مؤمن بقضاء الله وقدره ولدك واخو سلطان يطلبونك الحل ابو يزيد انصدم هذا ولده الوحيد هذا سنده هذا يمناه مات معقوووله مات ابو يزيد : يادكتور ( ويبكي بعد هالكلمه ) تكفى يادكتور ولدي تآكدوا يمكنه مو ولدي يادكتور وحيدي ذا تكفى سو له اي شيء يادكتور تكفى الدكتور : طيب حنا ثواني ندخلك عشان تتعرف على الجثه ابو يزيد يهز راسه بالموافقه وهو يبكي مآيدري وش يسوي يبكي بكاءه مايفيد لو صدق مات يزيد من التعب ماقدر يوقف وجلس على الآرض بنفس الممر حق المستشفى طلع جواله ومده لـ سلطان اللي كان يبكي سلطان : سم ياعم ابو يزيد : عندي اسم ابو راكان دق عليه وقله يجي هنا سلطان : اقوله اللي صاير ابو يزيد : ايه قله وقله لا يعلم احد سلطان اخذ الجوال واتصل على ابو راكان ( ابو راكان خال يزيد ) ابو راكان كان نايم وشاف الرقم واستغرب بهالوقت ابو يزيد ابو راكان : هلا ابو يزيد سلطان : السلام عليكم الاخ ابو راكان ابو راكان : الله الله منو انت سلطان : انا سلطان خوي يزيد ولد ابو يزيد ابو راكان : ايه هلا وش فيه وش جابك هالجوال لك سلطان : ابو يزيد قالي اكلمك واقولك تجي لمستشفى المجمعه ابو راكان : ابو يزيد وش فيه سلطان : لا ابو يزيد عندي هذا هو بس يزيد ولده .. وسكت ابو راكان : وش فيه يزيد سلطان : يطلبك الحل توفى بحادث قبل شوي ابو راكان : انت وش تقول انت شكلك منتب صاحي سلطان : طيب خذ ابو يزيد ابو يزيد ياخذ الجوال وهو مايقدر يقول كلمه وحده اصلن ابو راكان يسمع بكاء ابو يزيد : ابو يزيد هالولد وش يقول ابو يزيد : راح يزيد يابو راكان راح ولدي راح عضيدي وسندي يابو يزيد راح ابو راكان استهدي بالله انا جياك جايك لا تتحرك من مكانك ابو راكان دمعت عينه وقفل التليفون ام راكان : سلامات وش فيك وش فيه ابو يزيد ابو راكان : لا حول ولا قوة إلا بالله ام راكان : ابو يزيد وش فيه ابو راكان : يزيد يطلبك الحب مات فحادث قبل شوي ام راكان : ياويلي ياويلي ياويلي يامه ياويلي يامه اعووذ بالله من كلمتك اعوذ بالله ابو راكان : يابنت الحلال وش فيك انا الي فيني مكفيني انا برووح للمستشفى وشوفي ترى محد يدري للحين بس انا وانتي والله لو ادري انك قلتي لاحد لتشوفين شيء مايعجبك مانبي الناس تتعب والسبه انتي انا اقول لاختي واخواني بطريقتي فاهمه ام راكان : ان شاء الله ( وهي تبكي ) ابو راكان لبس واخذ اغراضه وطلع للمجمعه ابو يزيد جاه الدكتور الدكتور : تفضل اخوي عشان تتعرف على الجثه ابو يزيد يقوم معه وكان سلطان ماسكه عشان مايطيح ابو يزيد في نفسه يقول يارب ماهو بولدي يارب ماهو بولدي يارب تكفى انا ولا هو يارب توه صغير يارب تكفى يارب تكفى يارب تكفى يارب يفتحون الغرفه ويدخلون ويرفع الدكتور الشرشف الآبيض عن وجهه ام ماجد تبكي وتطالع في بنتها ساره : يماه تكفين وش فيك علميني ( ساره تبكي مع امها ) يماه لاتخوفيني عليك تبيني اكلم احد يوديك المستشفى ام ماجد وهي تبكي : لا مابي مستشفى ساره : يماه اجل وش فيك ام ماجد وهي يالله تتكلم : سالتك بالله ياسوير انتي ناويه تسوين شيء اليوم ساره انصدمت من كلام امها وش اللي تقوله ووكيف عرفت ان هالليله فيها شيء ساره : يماه وش تقولين انتي وش بسوي يعني ام ماجد وهي تبكي : انا اتحلم فابوك لي اربع ايام يجيني وانا نايم ويقووولي افاااااء اوصيك على بنتي وتضيعينها افاااااء زعلتيني منك ويرووح وكل يووم على هالحاله اليووم لا جاني يبكي ويقوووول الحقيها تراها بتضيع الحقيها ولا بتضيعين انتي وماجد معها يابنتي تكفين علميني فيك شيء تكفين يابنتي ( تبكي وتجلس عند رجول بنتها وهي تترجاها ) تكفين وانا امك تكفين ساره سمعت كلام امها وبكت ووقت ماطاحت امها طاحت عند رجولها وتبوس رجولها وتبكي وتقول : سامحيني يماه سامحيني تكفين سامحيني تكفين يا ساره ام ماجد : ساره وانا امك علميني وش فيك وش اللي غيرك ساره سكتت وهي تبكي ولا قدرت تقول شيء ام ماجد : يابنتي قولي لي والله اني لآعطيك اللي تبين بس علميني لاتحرقين قلبي تكفين وانا امك ساره تطالع لآمها وهي تبكي ولا تدري وش تسوووي ام ماجد تمسح دموعها : قولي والله ما اقولك شيء ولا اقول لـ ماجد قولي لي ساره : آنا ااااا ام ماجد : قولي وانا امك ساره : اكلم واحد ويبي يشوفني اليوم ام ماجد تشهق وتحط يدها على فمها ساره تبكي وتنزل راسها ام ماجد : لا ياساره ماربيناك كذا ولا حرمناك اي شيء تبينه لا يا ساره ليه يا ساره ماقصرنا معك بي شيء حرام يا ساره حرام عليك ام ماجد : افاء يا ساره افاااء ساره : خلاص يماه والله ماعاد اكلمه من الحين والله لا آتركه ولا آكلمه وعد مني اني ما اكلمه ام ماجد تطالع في بنتها وقامت ولا قالت لها ولا كلمه دخلت غرفتها وسكرت الباب شووي وطلعت وجلست بالصاله خوف على بنتها ساره من البكاء ماتدري وش تسووووي اتصلت على عادل عادل كان قريب من البيت : هلا قلبي ساره تبكي عادل : وش فيك ساره ساره : عادل تكفى لاتجي خلاص تكفى ياعادل عادل :وش السالفه ساره وهي تبكي قآلت السالفه له كآمله عادل سكت مايدري وش يقوول ساره : تكفى عادل عشاني خلاص انساني مقدر استمر معك اكثر من كذا تكفى ياعادل عادل : خلاص يا سـآره اللي تبينه سويه اذا يريحك فرآقي أبشري برآحتك وسعآدتك ساره تبكي ماتدري ليش مو معقوله اول مره تحب لها انسان وتفآرقه كم تمنت تشوفه لها بالحلال عادل : خلاص يآساره لاتبكين انتي بطريق وانا بطريق والله يستر عليك بس تكفين ادعي لي في كل صلاة ساره : تكفى سامحني عادل : انا اسامحك على ايش ساره تراي ماكنت اصلي اخر الليل انتي اللي خليتيني اصلي انتي بطيبك وقلبك عرفتي تغيريني وانتي ماتدرين ساره انتي اللي سامحيني والله يستر عليك دنيا وآخره فمان الله بقفل عن اذنك سكر المكالمه وقفل الجوال وقعد يفكر هل اللي سواه صح او غلط هو صحيح حبها بس مو معناتها يفارقها كذا لا سعادتها بعيده عني وش ابي فيها الله يسعدها وين ما كانت ساره بكت وهي تفكر باهلها وعادل ماتدري قرارها صحيح او لا من البكاء واللي فيها من الضيقه نزلت تحت ولقت امها تصلي جلست عندها لين سلمت من الصلاة والتفت على بنتها ساره حاطت راسها بحضن امها وبكت وامها تقول لها : استغفري ربك وتوبي له هو اللي يغفر لك ولا انا اسامحك على طول ولا عمري زعلت عليك بس هالشيء ماكنت متصورته منك ابد ساره : لا يماه خلاص والله ما عاد اكمله ابد والله ام ماجد : مآعليك مني طالعي ربك ولا انا ضعيفه مصيري اروح عن هالدنيا ساره يزيد بكاءها : لا بعد عمرً طويل يماه ابو يزيد دخل وشاف يزيد رفعوا الشرشف عن وجهه ابو يزيد يطالع ولده بحسره وقهر يبكي يبكي قهر على وحيده اللي طلع فيه بهالدينا راح الولد وراح العضيد سلطان كان ماسك يد ابو يزيد اليمنى وابو يزيد يضغط يده من القهر لين بغت تنكسر يد سلطان يبكي ابو يزيد يوقف عند راسه ولده يحب راسه ويحرك يده على وجه ولده عينه وخشه شفايفه يبكي ابو يزيد يبي ولده يبيه يرجع له مايقدر على فرقاه ابو يزيد : يارب لطفك ياارب لطفك يارب احرمني لا اخوان ولا ولد يسندني يارب رحمتك علي يااارب يارب رحمتك يااارب يجلس عند سرير ولده الدكتور : ادع له بالرحمه يا ابو يزيد ادع له بالرحمه ابو يزيد : الله يرحمه الله يرحمه الدكتور : خلاص ياعم لازم نطلع ممنوع نطول هنا ابو يزيد ولا كانه يسمع الدكتور وهو يمسكه مع يده الثانيه ويطلعه برى الغرفه هو وسلطان والممرض يغطي ولده ابو يزيد : تكفى بحبه تكفى يادكتور بحبه تكفى الدكتور رحمه ولا قدر يقوله شيء الممرض رفع الشرشف ابو يزيد يقرب من راس ولده ويحبه حب راس ولده اللي اخر مره راح يشوفه فيها بهالدنيا حب خده وهو يبكي ووجه ولده صارت دموع ابوه كلها عليه الدكتور ماقدر يمسك نفسه بكاء ويقول : يابو يزيد ياعم خلاص الله يرحمه ويغفر له ابو يزيد يضم ولده وهو يبكي الدكتور مسك كتف ابو يزيد : يابو يزيد الله يغفر له ويرحمه الله يجعل قبره روضه من رياض الجنه ادع له بس مايبي غير الدعاء ابو يزيد يطلع من الغرفه وعيونه على ولده لين ماسكروا الباب دونه ودن جثة ولده ابو رآكان قبل لا يوصل للمجمعه اتصل على عيال اخوه اثنين وقالهم عن اللي حصل وقالهم تعالوا عشان تخلصون اوراق الجثه وتنقلونها للرياض اباخذ ابو يزيد واجيبه للرياض وانتم لا احد يدري وصل للمجمعه ودخل المستشفى ولقى ابو يزيد يبكي واللي يشوفه يقول فاقد عائلته كلها من البكاء اللي فيه قرب منه وحب راسه : عظم الله اجرك الله يغفر له ابو يزيد ساكت ولا قال شيء يبكي وبس ابو راكان قوومه وجلسه على كراسي قريبه من العنايه المركزه وشاف شاب واقف يبكي وقرب منه : انت سلطان سلطان : ايه انا ابو راكان : انا ابو راكان شلون مات يزيد سلطان : حادث ابو راكان : ايه شلون الحادث سلطان : انا كنت امشي وراهم بسيارتي وانفجر الكفر اللي يمين وراء وهم كانوا بالمسار الايسر وانحرفت السياره للشبك وضربته وتقلبت ابو راكان : كم يمشوون سلطان : والله مدري ابو راكان : من اللي معه سلطان : اخوي ابو راكان : وعساه سلم سلطان وهو يبكي : لا والله يطلبك الحل ابو راكان : الله يغفر لهم ويرحمهم سلطان ولا قال اي شيء ابو راكان اخذ ابو يزيد وطلعوامن المستشفى بعد ما جاء عم سلطان واخوه الكبير بالطريق كلم اخوانه الاثنين وقالهم عن اللي حصل وقالهم روحوا لبيت ابو يزيد واتصل على اخته الثانيه متزوجه وقال لها كل شيء الكل اتجهوا لبيت ابو يزيد الكل كان منصدم لفقد يزيد الانسان اللي حبوه الكل لطيبه وحسن تربيته كل من عرفه ماعرف عنه غير طيبه وفزعته للجميع امه وخواته ماعرفوا امجاد ماعرفت امها وام شروق وشروق واشواق ماعرفوا للحين اتصل اخو ابو راكان الكبير على ام يزيد وردت عليه وهي نايمه ولا عرفت عن طلعت ابو يزيد لين شافت الاتصال ومالقته ام يزيد : هلا اخوها : هلا ام يزيد شلونك ام يزيد : بخير وش فيه اخوها : مافيه شيء بس افتحي الباب انا عند باب الشارع ام يزيد : وش فيه احد فيه شيء امانه احد فيه شيء اخوها : لا ماحد فيه شيء انتي افتحي الحين ام يزيد تسكر الباب وتروح تركض وتفتح الباب ام يزيد شافت وجهه وجهه اخوها الثاني عرفت انه فيه شيء ام يزيد : تكفون وش فيكم احد فيه شيء اخوها الكبير : يابنت الحلال مافيه الى الخير انتي خلينا ندخل داخل ويمسكها معي يدها ويدخلها داخل البيت وام يزيد تطالع اخوانها وتبكي وتنتظرهم يصدمونها بالكلام تدري فيه شيء بس وشو الله يستر اخوها الكبير : انتي انسانه مؤمنه وراضيه بقدر الله سبحانه ام يزيد وهي تبكي : يزيد ولدي اخوها الكبير : ايه يزيد صار عليه حادث على طريق القصيم وابوه راح يتطمن عليه وبيعلمنا ام يزيد : امانه يزيد فيه شيء تكفوون علمووني اخوها : مافيه شيء ان شاء الله انتي استغفري ربك بس وماعليك ام يزيد : البنات وينهن راحت تركض لغرفة بناتها فتحت الباب ولقتهن جالسات يسولفون ويضحكن ابرار : يمااه بسم الله وش فيك مضاوي ماسكه قلبها ام يزيد : يزيد صار عليه حادث ابرار تبكي وتقول : ياويلي يماه يماه منو اللي قال هالكلام ام يزيد وهي تبكي : اخواني تحت يعلموني ابرار تركض تحت ومضاوي معها وام يزيد لحقتهم وهي يالله تمشي من اللي جرالها ابرار : خالي تكفى يزيد فيه خالي امانه معك قول انه بخير تكفى خالي قول تكفى خالي خالها الكبير ماقدر يمسك نفسه وقعد يبكي وضم بنت اخته وسكت دخلت اختها وبكت مع اختها فهمت ام يزيد اللي حصل ام يزيد وابرار ومضاوي حالتهم مايعلم فيها الى الله وصل ابو يزيد وابو راكان دخلوا وجلسوا بمجلس الرجال دخل ابو راكان لداخل البيت ولقى الكل يبكي سلم عليهم ام يزيد : ابو يزيد وينه ابو راكان : بمجلس الرجال ام يزيد راحت تركض لمجلس الرجال ابرار لحقت امها ومضاوي وراهم دخلت ام يزيد وهي تطالع وجه ابو يزيد : ابو يزيد يزيد وينه ابو يزيد رفع راسه وشافها وهي تبكي وكانه يبي احد يقوله شيء يهديه شوي ابو يزيد : يزيد راح يزيد راح مااات ماااات ولدنا مات ام يزيد : ياويلي ياولدي ياويلي ياويلي ابرار ومضاوي يبكون بصراخ حتى خوالهم جو يركضون عرفوا ان ابو يزيد قالهم وصار كل واحد يهدي له وحده ومايدرون هم يهدونهم او يهدون انفسهم ابو راكان قال لام راكان تتصل على ام امجاد ام راكان اتصلت ويالله ترد ام امجاد قالت لها كل شيء ام امجاد انصدمت من الخبر ماتدري وشلون تقول لبنتها دخلت غرفة بنتها ام امجاد : امجاد امجاد وانا امك قوومي امجاد : هاه يماه ام امجاد : قوومي بنروح لبيت خالك ابو يزيد امجاد سمعت صوت امها تبكي وهي تقوم : وش فيه يماه ام امجاد : اممممم يقولون واحد من خوالهم تعبان مشينا لهم امجاد : يماه واحد من خوالهم ونرووح الحين بهالوقت يماه خالي فيه او احد من عياله او زوجته ام امجاد : يابنتي مافيني للاسئله قوومي البسي بسرعه بروح اشوف اخوي امجاد خنقتها العبره لانها سمعت امها تقول بشوف اخوي وكانت متوقعه ان خالها فيه شيء لبست بسرعه وطلعت بالسياره ام شروق عرفت عن اللي حصل واتجهت لبيت اخوها ومعها بناتها ام شروق : هاه علمتي امجاد ام امجاد : لا والله للحين ماقدرت والله ام شروق : طيب لاتقولين لها الى هناك حنا نقولها انتي اسكتي شروق واشواق كانوا متضايقات لابعد الحدود عشان ولد خالهم وعشان بنت خالتهم وصلوووا لبيت ابو يزيد ام امجاد كانت قايلهل لسواق ينتظر سواق ام شروق لين وصلوا جميع عشان بنتها دخلت ام امجاد وشافت رجال عند باب المجلس كان ابو راكان واقف عند الباب وابو يزيد وبناته وزوجته بالمجلس يوم دخلوا ابعدوا الرياجيل عن الباب دخلت ام امجاد وام شروق والبنات كلهن وكانت امجاد منصدمه من ايش ماتدري تشوف شروق وقفت جنبها وماسكه يدها وكانت ترجف كانت تطالعهم بنظرات ماتدري وش وهم يطالعونها بنظرات شفقه بس ماعرفتها دخلت امجاد معهم وشافت الكل يبكي بس ناقص يزيد امجاد تسمع امها تقوووول لخالها : الله يغفر له ادع له بالرحمه وهو ساكت تسمع خالتها ام يزيد تقول راح ولدي ولدي راح يا ام امجاد ولدي منو ولدها يزيد معقوله يزيد وشو يزيد ماااااااات طررررررراخ امجاد طاحت على الارض البنات يشيلونها وامها وام شروق ويدخلونها داخل بعد دقايق تصحى وهي تبكي تسالهم ويعلمونها وتبكي وهي تكذبهم الكل صار يبكي كل من عرف يزيد لازم يبكي عشانه تجمعوا في بيت ابو يزيد بعض اقاربهم ومع صلاة الظهر صلوا على يزيد صلوا على الانسان اللي الكل يشهد له بالخير الانسان اللي الكل يعرف انه طيب التربيه وطيب الاصل ابوه ماكان يقدر يوقف على رجوله وجابوا له عربيه امه كانت جالسه بعبايتها وكل من جاء يسلم عليها وهي جالسه عندها ام شروق وام امجاد واختها وعندها بناتها ابرار ومضاوي اشواق وشروق كانوا عند امجاد مرت ايام العزاء الثــلآث ايام كآمله عليهم كلهم حزينه واشين ايام في حياتهم الكل كان فاقده والكل كان يبكي عليه المتآثرين الآساسين بفراقه امه وابوه وخواته وامجاد و اشواق لإنه كان يلعب معها هي واخته مضاوي عشان يستانسون ابو شروق وصل صباح يوم الدفن وجلس معهم الثلاث ايام كامله ولا تركهم ساره وصلها الخبر من نوف اللي وصلها الخبر من شروق ارسلت لها رساله على جوالها وملكه خبرتها نوف برضوا وعزوا صاحبتهم ام ماجد حضرت العزاء مع بنتها ساره ملكه آجل قرار الموافقه لبعد شهر كآمل لانها ماتبي تحتفل بشيء وصآحبتها بهالحاله فقررت تآجل الموآفقه شوي وقالت لآخوها اصبر بفكر ماجد ما كلم اخته للحين وكان مقرر بيكلمها لين تزين امورها وتهدى صحتها لانها تعبانه عشان فراقها لعادل وعشان امجاد وماجد متوقع عشان خويتها | ||||||||
|  |
|
24-10-16, 11:21 PM
| #42 | ||||||||
| مراقبة عامة ومشرفة منتدى الروايات المنقولة
| بعد آيـآم العزاء ابو شروق اتصل على ام شروق وقالها ابجي االعصر اوكي ام شروق ماعارضت وقالت اووكي مع انها متخوفه لانه من جاء ماكلمها ابد ولا شافها كان ساكن برى البيت بناته كانوا يدرون انه هنا بس دامه ماطلب يشوفهم ماطلبوا انهم يشوفونه ماجد شآف حالة ساره اللي رجعت زي ماكانت اول بس مبين فيها الضيقه ولا هي قآدره تحط عيونها بعيون امها ماجدالتآمين اللي على السياره قبل الحادث عوضوه بمبلغ قدر يشتري منه سياره ثآنيه ويروح ويجي فيها وآمه وعمه تطمنوا على صحته مع ان الدكتور محذرهم من نآحية العصبيه الزايده اللي بتكون عنده لازم يستحملونها هالايام بس ماجد ماعليه خوف من هالناحيه لانه اصلن هو مرضي ربه واهله يعني محد بيعصب عليه او بيعصب على احد ماجد طلع لغرفة أخته وطق الباب ساره : تفضل ماجد : السلام عليكم ساره : وعليكم السلام وش اخبارك اليووم ماجد : الحمد لله والشكر له بنعمه غيري ماهي بعنده ساره : الحمد لله ماجد : انا جآيك بكلمك بموضوع ساره خافت ليش مآتدري بس حست الموضوع فيه إنا ماجد : شوفي وانا اخوك انتي تعرفين فارس ولد عمي ساره : ايه ماجد : عمي كلمني يقول فآرس يبي سآره على سنة الله ورسوله وانا قلت له الرآي الاول والاخير عند امي وساره ولا انا ما اشوف في فارس اي عيب واتمناه لـ ساره وسـآره له ساره سمعت هالكلمتين انصدمت ودمعت عينها كيف تحب لها مخلوق وتآخذ غيره ماقدر ومابيه وفي داخلها صياح نبضها يقول عادل يبيك لاتاخذين فارس وعقلها يقول لا خوذي فارس عادل مايبيك نزلت راسها وبكت ماجد : افاء وش فيك وانا اخووك لو ماتبينه علميني والله ماياخذك بس لاتبكين ساره : مدري بس مابي اتزوج الحين ماجد : انتي شايفه على فارس شيء او فيه شيء مو عاجبك ساره : لا والله فارس ونعم فيه كامل والكامل الله سبحانه بس ماجد : بس وشو وش فيك سكتي ساره : مدري والله مدري ماجد : طيب انتي فكري على رآحتك ومتى ماقررتي علميني وتراهم مكلميني من اسبوعين وانا ساكت ماقلت شيء لك وتراء فارس ونعم وانا اشوفه زين لك بالحيل طيب وحبوب ويكفي انه منا وفينا ساره ساكته وتفكر في كلام اخوها واكثر ماتفكر فيه بالصراع اللي بداخلها ماجد : يالله انا بطلع عن اذنك ساره ولا ردت عليه نزلت راسها وكملت بكاها تفكر وش بتسوي هل بتوافق عليه وتكسر قلبها وتكسر كبريئاها ولا ترفضه وتبقي اللي مابقى من قلبها والامل البسيط اللي بقاء لهم انهم يرجعون من جديد لبعض هي وعادل امجاد تعبــآنه وماتبي اي احد يكلمها او يقول لها حتى السلام عليكم معقوله حُبها اللي نماء معها من الطفوله يختفي فجاءه بعد ماتحقق حلمها بكت وبكت وآنقهرت على نفسها فكرت بالانتحـآر كم مره بس لو مو مصيرها النار كان انتحرت كانت شروق دايم قريبه منها وتهديها وكانت خايفه عليها اكثر شيء فتحت مذكراتها وكتبت ويدها يالله تكتب من الرجفه اللي فيها ( لم أعلم آنه حآن وقت الفرآق مبكراً كنت متيقنه بإنه سوف يكون الفراق مصيرنا وانه لآيفرقنا عن بعض سواء الموت ولكن كُنت أظنه بعيداً عننا وليس هو بالقريب ولكن إرآدة الله حآلة دون فرحتي بك إلهي كم تمنيت آن أكون له حليلته فتحقق الحلم وأصبحت حليلته ولكن لم تدوم الحال إلهي أرجوك آجمعني به في جنان الخلد وجعلني من من يصلون عليهم في صلاة عصر اليوم إلهي إجعلني من من كتبت نهاية حياتهم في هذا اليوم اللهم اقبض روحي مع من قبضت روحهم في هذا اليوم إلهي كم أحببت ذلك الآنسان في حيآته إلهي إجمعني به بعد ممآته إلهي إجمعني به بعد ممآتي ) سكرت المذكره وكملت بكآها دخلت عليها أمها وشافتها تبكي وحال بنتها مايسر لا عدو ولا صديق ام امجاد جلست جنب بنتها وضمت بنتها وهي تتكلم : تدرين وانا امك هالكلام اول مره تسمعينه مني ابوك يوم اول ما جاء وتقدم لي كنت مابيه وكنت رآفضته بس أخوي قالي تراه طيب وتراه وتراه وصار يقنعني لين ما اقتنعت وافقت عليه ويوم عآشرته صرت اشوف الدنيا بعيونه ومابي اشوف بعيوني كان هو كل شيء بهالدنيا لي كان يروح لدوامه واول مايطلع اجلس ساعه بس واتصل فيه من شوقي له والله انه اغلى مخاليق ربي عندي لين حملت فيك وجبتك صرت احبك واحبه لانك اغلى هديه منه لي وكان يقولي بنتي بتكوون العون لي دام ربي مارزقني عيال هي عووني بعد كم سنه قرر يرووح يجاهد انا رفضت وزعلت ورحت بيت اختي ومره دق علي بالليل وقال ابيك قلت وش تبي قال انا عند بيت اختك ابدخل وابجلس بالمجلس تعالي وقفل التليفون رحت له وكنت متوقعه انه بيرآضيني ويقول ارجعي خلاص مانيب رآيح دخلت وسلم علي وضمني على صدره والله من ضمته بكيت لاني عرفت انها اخر ضمه وكان يبكي قالي تكفين جيبي بنتي ابشوفها قمت من غير شعور وجبتك وجلسك بحضنه وقام يحبك ويضمك ويشم شعرك ويبكي كنت اشوفه وابكي وقلت له تكفى لا تخلينا من لنا غيرك تكفى حنا بحاجتك قال لي يالغاليه انا بإذن الله برجع لكم وانا رايح اليوم رايح بس قبل اروح عندي شغلتين ابي اوصيك فيها لين آرجع بإذن الله آمانه بنتي لاتبكي وانتي تخلينها تبكي تكفين متى ماشفتيها تبكي ضميها وقولي لها ابوك يحبك ويسلم عليك ويقوووولك ان ماشفتك بالدنيا بشوفك بجنات النعيم ان شاء الله بكيت وقلت له والثانيه قال لي الثانيه انتي يشهد ربي علي اني احبك اكثر من نفسي واني اعشق مواطيء رجليك مو اعشقك بس تكفين نفسك لا تتضايق عشان اي مخلوق حتى انا تكفين لايضيق صدرك واياك تبكين تكفين اياك تبكين وقام وهو يبكي جاء بيطلع والتفت علي ورجع ضمني وبكاء كانه طفل صغير لين حسيت انه بنفسه يدخلني في وسط جسمه فكني وضمك وقام يبكي اكثر من البكاء اللي بكاه لي ومسح دموعه بكمك وحبك على جبينك وقالي تكفين بنتي امانه برقبتك وبكيت وبكاء وياي وطلع انا ماكنت بقولك هالكلام بس امس شفت ابوك امجاد ترفع رآسها وكآنها مستغربه شفتي ابوي شلون يعني ام امجاد كملت كلامها ولا خلت بنتها تفتح فمها بكلمه وحده ضمتها على صدرها وكملت كلامها ام امجاد : شفت ابوك بالحلم جاني مبتسم وقف يطالعني من بعيد ثم بكاء سالته وش فيك تبكي قال تبيني اضحك وابتسم وبنتي ضايقه الدنيا فيها افاااء يالغاليه ماهقيتك تخلينها برووحها والله لو اقدر اجيها جيتها وشلت الحزن اللي بدآخلها بس تدرين قولي لها اني بخير ويزيد بخير لاتشيلين هم والله يابنتي قال هالكلمتين ثم ضحك وابعد عني ثم التفت وقال تراي مشتاق لك لا تتآخرين صحيت من نومي وبكيت بكيت لاني شفته لا ويضحك بعد وبكيت لانه يقول يزيد بخير وان شاء الله يزيد بخير عند ربه ويوم قالي لا تتآخرين خفت عليك من الدنيا ( بدت تبكي ) امجاد اسمعت كلام امها وكملت بكاء مع امها ام امجاد : والحين وانا امك اقولها لك تكفين عشاني وعشان ابوك قوومي وادعي ليزيد بالمغفره تراه ان شاء الله انه بخير وارجعي لحيآتك امجاد تبكي ولا هي قآدره تقول اي شيء تذكرت ابوها كانت تآمل بيزيد ينسيها حنان الاب اللي فقدته بس راح يزيد ومن بقى لها بهالدنيا غير امها ابو شروق وام شروق ابو شروق دخل المجلس وجلس ينتظر ام شروق ام شروق عرفت انه جاء وجلست عشر دقائق لان بدآخلها خوف من اللقاء اللي لأول مره من 15 سنه يصير هاللقاء شروق واشواق كانوا نايمات لانهم جالسات مع امجاد لين الفجر بعد العشر دقائق دخلت عنده ام شروق : السلام عليكم ابو شروق : وعليكم السلام ( وكان جالس ولا قام لها ولا طالعها لانه كان يطالع جواله ) ام شروق انقهرت من حركته : سم وش تبي ابو شروق وهو يرفع راسه ويطالعها : اجلسي وراك واقفه الكلام طويل وطويل بالحيل ام شروق : لا ماعندي وقت اجلس قوول عادي وحاول تختصر الكلام ابو شروق : تبيني اختصر الكلام لو اقولك الكلام يعني لي 15 سنه كيف اختصرها بكم سنه سنتين بكم تبيني اختصرها ام شروق : قول وخلصني ابو شروق : اجلسي يابنت الناس وخليني اعرف اتكلم ام شروق وهي تجلس : هاه جلست وش تبي ابو شروق سكت شوووي وآخذ له نفس وقال : تذكرين قبل 15 سنه او 16 سنه يوم اضربك تذكرين الكلام اللي قلتيه لي وخلاني اضربك ام شروق تتذكر وتتذكر اللي حصل .. يالله معقوله للحين يتذكر هالكلام يتذكر اللي حصل اللي حصل قبل 15 سنه ( ام شروق كانت تكلم بالتليفون وابو شروق تو يدخل البيت سلم وجلس بنفس الوقت نزلت التليفون وراح تلحق شروق لانها كانت مساكه جوال امها ابو شروق يحسبها نست تسكر التليفون قام ومسك السماعه بيسكرها سمع شخص يتكلم رفع السماعه وسمع واحد يقووول الوو وين رحتي لاتقولين زوجك جاء ههههههههههه قلبووو وينك .... من القهر سكر التليفون بوجهه واتجه لام شروق وضربها وضربها وهي تبكي ماتدري ليش وهو يضربها يقوول تخونيني وتكلمين حيوانك للحين يـ...... والله ماخليها لك لا وتربين بناتي بعد عشان يطلعون مثلك هاه ام شروق من القهر اللي فيها قآلت لا يكون مصدق انهم بنآتك أنت تراهم بس بآلآسم عصب عليها وضربها ضرب ماضربه اي مخلوق ابد يالله بالله قدر يكتم غيضه بس بعد مالعب فيها من الضرب وهي تبكي قالت له كلمه هزته هز وماقدر يسوي اي شيء غير انه يطلع من البيت ويروح للبنان قالت له اشوفك نسيت نفسك تراء بسهوله الحين اسجنك بس تدري ليش ما سجنتك لإني أبي لين يكبروون البنات واؤريهم أبوهم الحرآمي انقهر وطلع ... هذا اللي حصل قبل 15 سنه ومن يومها مايكلمون بعض نهائياً وكان ابو شروق ينتظر كل سنه انها تقدم شكوى جد وكل سنه يقول السنه الجايه ) ام شروق : اي كلام تقصد ابو شروق : ان البنات مو بناتي ام شروق : وللحين تفكر بهالكلام ابو شروق : انا ما انام الليل بسبة هالكلام هالكلمتين لاتكون مصدق انهم بناتك ماخلتني انام ولا خلتني ارتاح بحياتي لا معك ولا مع زوجتي الثانيه ام شروق : طيب وش المطلوب ابو شروق : ابي اعرف هم بناتي او لا ام شروق : بعد هالـ 15 سنه تبي تدري وش يهمك فيه ابو شروق : كيف وش يهمني فيه تبيني اروح اخذهن واحللهن وش بيقولن وش بيقولون الناس ام شروق : اي جد وش يهمك انت اصلن ماتبيهم وماتحبهم وش تبي فيهم خلاص انسى السالفه وانسى ان لك بنات طلقني فاهم طلقني واعطيك كل الاوراق اللي عندي وانسى ان لك بنات ابو شروق : ماراح اطلقك لين اعرف هم بناتي او لا ام شروق : قلت لك انسى ان لك بنات كيف تبي تعرف وانت ماتبيهم تجرحهم وتقول ابي اعرف هم بناتي او لا ابو شروق : كيف تبيني اكون حنون على بنات مدري منو بناته كيف تبيني اصبر على جرح يقتلني من سنين وانا اشوفهن قدامي كيف تبيني اطلع معهم وكيف وكيف يكفي اني مبقيهم باسمي ولا انكرتهم علميني يابنت الناس هم بناتي او لا ام شروق : اذا يهمك هالشيء لهدرجه ابيك توعدني انك تطلقني بعد ما اقولك وتبعد عن بنآتي نهائياً ابو شروق : فراقك عيد عندي لاتخافين بطلقك بس قوولي لي ام شروق : والبنات ابو شروق : يعتمد على اذا هم بناتي او لا ام شروق : لا ابيك توعدني ماتكلمهم ولا تقولهم شيء ابو شروق : يابنت الناس لا تحرقين اعصابي تراي ماقمت امسك اعصابي ام شروق : شوف انا بيدي اكثر من حل واولهن واسآلهن أقدم الآورأق اللي بيدي للمحكمه واطلب الطلاق وجبراُ عليك بتطلقني وبتسجن عشان السرقه ابو شروق : فكري بس تقدمين الاوراق وصدقيني ان طحت ماطحت لحالي ام شروق : وكيف بتطيحني معك لا يكون بتقول هي اللي تسرق معي ابو شروق : لا بس عندي اشياء لك انتي اخلي بناتك يكرهونك واختك واخوك وكل اللي يعرفونك ويتوقعون انك تروحين جد لجل المحلات اللي لك وللبضائع ام شروق بصدمه : وش تقصد ابو شروق : ابد بس بالصدفه عرفت فراس اللبناني وعرفت سالم السكرتير وعرفت حمود مدير المكتب اللي بجده وغير اللي عرفهم في دبي ام شروق : انت حاط احد يراقبني ابو شروق : لا ابشرك بالصور بعد وبعض الاشياء عندي لها مقاطع مثل فراس قدرت ادهن سيره ويعطيني اللي ابيه وسالم ابد وظفته بوظيفه وبراتب اكثر وجاب لي مقاطع كثيره عشان الفلوس بس ام شروق دمعت عيونها من القهر : يالحيوان ابو شروق : شفتي شلون انا من اليوم اعصابي تلفانه لجل بعرف بس البنات بناتي او لا وانتي يوم اكتشفتي اني كاشف كل الاعيبك انقهرتي الحين علميني هم بناتي او لا ام شروق : شوف عطني اللي عندك واعطيك اللي عندي ابو شروق : لاتعطيني ولا اعطيك احتفظي باللي عندك وانا بحفظ اللي عندي ولانضحك على بعض ونخبي صور من اللي نملكه علميني هم بناتي او لا وانا اطلقك وينتهي الموضوع بسهوله ام شروق انقهرت ونزلت راسها ماتدري وش تقوووول هل هي ترفض تقوله ويفضحها عند بناتها واختها واخوها ولا تقوله وتسكته وتنتهي السالفه مالها الى انها تقول له ام شروق : تراك وعدت انك تطلقني ابو شروق : هههههههههه اصلن كم لي ماشفتك ولا جلست معك يعني على اساس انك زوجتي ام شروق : طيب ورقتي متى تجي قبل لا اقولك ابو شروق : اليوم ام شروق : تضحك علي كيف تجيبها والمحكمه مسكره ابو شروق : انتي قولي لي وانا اجيب لك ورقتك اليوم ام شروق : طيب ابو شروق : طيب قولي هم بناتي او لا ام شروق : يوم تضربني كنت ابي اقهرك واحرق اعصابك عشان كذا مالقيت قدامي الى كذا وقلت لك منو اللي قالك انهم بناتك اصلن والحمد لله قدرت احرق اعصابك واقهرك ابو شروق : يعني بناتي مو بنات غيري وش يثبت لي ام شروق : اول شيء من تزوجتك قطعت علاقتي مع اللي كنت اعرفه وبعد ما جبت اشواق انت كنت تسافر وتخليني ورجعت اكلم اللي كنت اعرفه وبس ابو شروق : طيب وش يثبت لي ام شروق : قول لبناتك بنسوي تحليل عشان جوازاتكم وتاكد منهن ولو تبي انا اقولهن ابو شروق اقتنع بكلامها : لا خلاص هالكلام يكفيني ام شروق : طيب متى الورقه تجيني ابو شروق فتح ظرف كان قدامه وطلع ورقه وعطاها اياه وقال هذي ورقتك سمي ام شروق اخذتها وقراتها وفرحت وفجاه تطالع فيه وهي منقهره وتطالع الورقه وتطالعه وهي تبكي ابو شروق : ادري انك منصدمه من تاريخ الطلاق عادي طلقتك قبل 13 سنه يوم كنتي تكلمين سالم السكرتير ولا قلت لك لان مابيني وبينك غير هالبنات ام شروق : وليش ماقلت لي من زمان ( وهي تبكي من القهر) ابو شروق وهو يضحك : ليش اقولك انتي كنتي تجلسين مع رجال مو محارم لك عادي انا اشوفك بس طالعه ولا داخله على الاقل انا كنت محرم لك بيوم من الايام ههههههههههههههه ام شروق انقهرت بكت وقامت بتطلع فتحت البآب إلى تشوف شروق وآقفه عند الباب تتسمع ام شروق تطالع بنتها بصدمه شروق تطالع امها بصدمه ابو شروق ندم على كلامه تمنى ان بنته ماسمعت كل الكلام شروق تطالع في ابوها وفي امها وهي تبكي قالت لهم : اذا كل واحد فرحان ومبسوط انه مآسك على الثآني شيء وكل واحد فيكم يهدد الثاني وكاننا مو بناتكم ولا فيه شيء يربطكم بين بعض مافكرتوا فيني وبااشواق من زمان والحين واحد يقول ابعد عن بناتي والثاني يقول يعتمد على اللي تقولينه لي فكرتوا انتم هل حنا نبيكم او لا فكرتوا هل حنا بحاجتكم او لا بس تفكرون بانفسكم ماهمكم غير انفسكم الله لا يسامحكم لا دنيا ولا اخره الله لايسامحكم لا دنيا ولا اخره مابيكم واسفه اذا انا واختي جيتنا لهالدينا سببت لكم مشاكل تطلع الدرج متجهه لغرفتها طررررررررررررراخ تلتفت وتشوف امها طايحه على الارض تركض وتشيلها هي وابوها وتركض تجيب عبايتها وتلبسها ويروحون المستشفى بعد ثلاث ساعات بغرفة العنايه يطلع الدكتور ويكلم ابو شروق : انت منو ابو شروق : انا ابو بناتها الدكتور : يعني زوجها ابو شروق : طليقها ليش هي وش فيها الدكتور : انتم اوادم مؤمنين بالله وقدره المريضه جتها جلطه بالراس وتسببت بشلل نصفي مع فقدان امكانية الكلام شروق وهي تبكي : يعني شلون الدكتور : الوالده جاها شلل نصفي وماراح تقدر تتكلم الا بمشيئة الله وحده ادعو لها يالله فمان الله ابو شروق يطالع في بنته اللي ناظرت فيه وهي تبكي قالها : اؤديك للبيت شروق طالعت فيه وطنشته ومشت اخذت لها تآكسي وراحت لبيت خالتها واتصلت على اشواق لين ردت وقالت لها روحي بيت خالتي الحين مع السواق امجاد قررت بعد ماطلعت امها منه انها بتنسى اللي حصل او على الاقل تبداء صفحه جديده وتحاول قد ماتقدر انها تسعد امها جوالها يدق تطالع فالاسم الا هي شروق ترد عليها : هلا شروق شروق كانت تبكي : امجاد امجاد : بسم الله شو فيك شروق : خالتي فالبيت امجاد : ايه وش فيك شروق : طيب انا عند بيتكم جايه امجاد : يالله وتسكر منها وتركض تعلم امها اللي امها ماتدري وش السالفه بغت تتصل على اختها بس قالت اخاف شروق ماتبي امها تدري يوم دخلت شروق طاحت في حضن خالتها وبكت ام امجاد : وش فيك يابنتي وش فيكم وانا خالتك شروق : امي يا خاله امي ام امجاد : وش فيها امك تكلمي شروق : امي طاحت علينا وودينها للمستشفى والدكتور قال جاها شلل نصفي ام امجاد : بسم الله عليها وش تقولين انتي شروق : امي جاها شلل نصفي ولا هي قادره تتكلم بعد اليوم اشواق كانت توها داخله وتسمع كلام شروق وتطالع في اختها ومو مصدقه اللي حصل امجاد راحت لأشواق ومسكتها جلسوا وهم يبكون ام امجاد : وش السالفه علميني شروق قالت ان ابوها طلق امها وامها طاحت ويوم ودوها المستشفى مع ابوها قالوا جلطه تسببت لها بشلل نصفي وفقدان النطق نهائياً ام امجاد : مشينا للمستشفى وصلوا المستشفى وتكلموا مع الدكتور ودخلوا على ام شروق وشافوا حالتها ابو شروق اخذ اغراضه وسافر للبنان ساره من الضيقه اللي فيها والهم دخلت المنتدى ولقت عادل متصل ارسلت له يفتح المسن ورفض حاولت فيه وقالت ضروري تكفى وفتح المسن وسالها وش تبين قالت له كل شيء عن فارس وانه خطبني ومادري وش اسووي انا افكر فيك بس كيف اخذه وانت ماخذ كل تفكيري عادل : شوفي يا ساره انا صحيح حبيتك وابيك لي بس صدقيني فارس ولد عمك افضل مني لك وراح يسعدك اكثر مني انتي بس فكري تحبينه واقتنعي فيه كزوج ولا تفكرين فيني نهائياً لاني لو تزوجتك ماراح اسعدك مثل فارس فارس راح يحط قدام عينه انتي بنت عمه يعني راح يحافظ عليك انا ممكن بي وقت اطلقك ولا علي من ادنى مشكله بس ولد عمك صدقيني بيخاف عليك ويعرف انه مالك غيره فراح يحبك اكثر واكثر صدقيني اقول لك هالكلام وانا احبك ومابي اخسرك بس دام جت للزواج صدقيني هو افضل وافقي عليه وصدقيني راح تنبسيطن معه ساره بكت ولا تدري وش ترد عليه قالها : عن اذنك هذا اللي عندي وماراح اغيره وياليت توافقين عشاني فمان الله عطاها ديليت وسكر المسن ودخل المنتدى ونزل موضوع عن تركه للمنتدى نهائياً وسكر المنتدى وطلع بعد مرور اسبوعين ام شروق طلعت من المستشفى وسكنت هي وبناتها عند اختها ام امجاد وشروق واشواق صاروا يجلسون عند امهم كل الوقت وامهم كل ما شافتهم تبكي قهر على العمر اللي ضيعته من غير بناتها امجاد حالتها النفسيه افضل بكثير من اول امجد كل يوم يكلم اخته ويتطمن على خالته ويكلم خواته باليوم مره او مرتين شروق واشواق فرحوا كثير يوم عرفوا ان امجد يكلمهم قدام ابوه وامه ولا احد يقوله شيء بالعكس ابوه متكفل بفاتورة المكالمات بس مستغربين هجران ابوهم لهم وشروق تقول اذا يبي يرجع لنا حياه واذا مايبي ربي يسعده من دوننا ساره قررت قرار نهائي ولا هي متراجعه عنه نهائياً نزلت تحت ولقت ماجد وامه ساره : السلام عليكم ماجد وامه : وعليكم السلام ساره : ماجد تذكر الموضوع اللي كلمتني عنه ماجد : ايه هاه وش ردك وش اقولهم ساره سكتت شوي : الرآي رآيك وانا اختك واللي تشوفه زين سوه ام ماجد تبكي من فرحتها : على البركه يابنتي والله اني كنت عارفه انك بتوافقين ساره دمعت عينها ماتدري هي فرح ولا قهر ماجد : على البركه وانا اخوك ووالله ان فارس من اطيب الرجال وينشرى والله عن اذنكم بكلم عمي واقوله والله اننا تاخرنا عليه واجد ام ماجد يوم شافت ماجد طلع من الغرفه : اقول وانا امك والله ثم والله انك اخترتي الخيار الصحيح وانا شايفه لك اسابيع وانتي شايله هم وكنت متاكده انك بتختارين فارس ادعي ربك انه يسعدك مع فارس ساره وهي تبكي : امين ام ماجد تضم بنتها وتبكي عشانها ابو فارس بعد مابشره ماجد قاله اجل على خير الشهر الجاي ان شاء الله الملكه وبعدها بشهر ثاني الزواج وش رايك ماجد : خير البر عاجله وانا بكلم الاهل واعلمك ياعم ابو فارس : على خير وسكروا وراح ابو فارس يبشر ولده واهله نوف وفيصل وزياد وشيماء واسماء وسلمان سلمان تقدم لـ شيماء اخت فيصل وزياد صاحبه زياد وافق وفيصل مارفض شيماء بعد تفكير طوويل وآفقت وقرروا الملكه ببداية الاجآزه نوف الحمل صار يتعبها وفيصل جاب لها خدامه وقال لها اهم شيء ماتتحركين نوف راحت وشآفت بآحد المستشفيات الآهليه نوع الجنين وقالوا لها ولد وفيصل فرحآن حيل ويدعي ربه انه يجي سليم وان الله يصلحه زياد حصل له وظيفة في ديوان المظالم وصآر من البيت للدوام للمسجد وآغلب وقته مع خواته ام ماجد اتصلت على ام امجاد بعد الحاح من ساره ام ماجد : السلام عليكم ام امجاد : وعليكم السلام ورحمة الله وبركاته ام ماجد وبعد السؤال عن الحال وبعض السوالف الخفيفه : والله وانا اختك متصله عليك وانتي لك حق الزياره بس تعرفين السكر شوي متعبنا ام امجاد : الله يشافيك لا والله اتصالك يكفي يا ام ماجد تسلمين والله ام ماجد : انا متصله وانا والله يشرفني اني اطلب يد بنتك لولدي ماجد وانتم تعرفون ماجد وحنا نعرف بنتكم وقلت اكلمك قبل لايجون الرجال ونشوف رآيكم ام امجاد بصدمه : والله الشرف لنا وانا اختك والراي عند البنت ولا ولدكم مافيه قصور ولاينعاب ام ماجد : على خير خلي البنت تفكر برآحتها ومتى ماقررت علمونا وترانا اهل سواء وافقت او لا ترانا اهل واوعدك بالزياره ان شاء الله وسلمي على ام شروق وان شاء الله اني بزورها هاليومين ام امجاد : حياك بي وقت وان شاء الله نرد لكم هاليومين سكروا من بعض وكان هالقرار متخذته ساره وامها بعد الحاحها الطويل عليها وماجد كلموه وماكان رافض الشيء بالعكس متقبل الامر وينتظر ردها ام امجاد كلمت امجاد بنتها وامجاد انصدمت وماتوقعت انو ساره بتطلبها لاخوها ملكه كانت جالسه هي وامها ويتقهوون دخل بدر : السلام عليكم الكل : وعليكم السلام بدر : ملووكه تراء عبدالحمن اشغلني كل يوم يسالني وش صار وش صار هاه ماقررتي او لا ملكه سكتت شووي ونزلت راسها حياء بدر : يعني اتصل عليه واقوله يجي هو واهله ملكه : اللي تشوفه بدر : اجل على البركه اتصل واعلمه ام بدر : دقيقه يابدر بدر : هلا يماه سمي بغيتي شيء ام بدر : اتصل عليه وقله البنت رافضه ماتبي الزواج الحين تبي تكمل دراستها ملكه انصدمت وبدر انصدم غريبه ليش مع ان امه كانت تقوله دايم اعزم عبدالرحمن وش اللي غيره بدر : ليش يماه ام بدر : بتراددني برآيي وانا امك رح قله رافضه وانا بكلم اختك الحين بس رح قله والموضوع انتهى وماراح نتناقش فيه ابد بدر : بس يا يماه ملكه موافقه ملكه كانت من الصدمه ماتدري وش تقول ام بدر : يابدر دق عليه وقله ولا ترى بزعل عليك ليوم الحساب بدر : خلاص اقوله وامري لله يقووم بدر ويطلع ملكه تطالع في امها وتطلع غرفتها وهي منقهره من حركة امها امها طلعت وراها لغرفتها ودخلت وقفلت الباب ام بدر : تدري ليش رفضته ملكه وهي تبكي : لا ليش ام بدر : لان عبدالرحمن فكر فيك بالحرام ويوم ماقدر يوصلك يبيك بالحلال وانا وانا امك ابي رجال يعرف السنع لبنتي ومن اول المشوار يبيها بالحلال وعبدالرحمن انسان تربيته ماهي زينه لو زينه كان فكر بصاحبه قبل يزعجك او يتصل عليك ملكه : بس يماه هو يحبني ويبغاني ام بدر : ايه يحبك بس شهر شهرين سنه وبعدها بيمل منك وبيتذكر انك كلمتيه لو يوم واحد وبيكرهك ويشك فيك ملكه اسكتت وماقدرت ترد على امها ام بدر : والله لو جاك من البدايه والله لاجبرك تاخذينه بس الحين لا لاني ابي لك الراحه واذا مو مقتنعه بكلامي قومي قولي لاخوك خلاص امي موافقه ملكه تطالع امها وهي تبكي : خلاص دامك ماتبينه لي مابيه ورايك ازين من رايي ام بدر : انا متوقعه انه هذا رايك من البدايه بس انصدمت انك وافقتي وانا امك ملكه بكت وضمت امها ام بدر : خلاص ماعليك انسي اللي حصل وصدقيني ربي بيرزقك اللي اطيب منه واخلاقه افضل من اخلاقه شروق : يالحيوانه وافقي عليه اللي اعرفه من كلامك انه طيوووب وحبوووب ويكفي انه انسان يصلي وعارف ربه عدل امجاد ساكته ولا قالت اي شيء شروق : شوفي والله لو ما وافقتي بتندمين على عمرك يابنت من يحصل لها رجال موب مثل الرجال الثانين يطلع ويروح ومايجي الى اخر الليل يعني اكيد بيحافظ عليك ويهتم فيك وراح يحبك صدقيني وافقي وماراح تخسرين وبعدين تدرين استخيري بالليل وربك ان شاء الله بيقدم لك الخير بعد يومين امجاد تعلن الموافقه على ماجد وام امجاد تتصل وتبشر ام ماجد اللي بدورها فرحت كثير لولدها وساره اللي ما اتصلت من ذاك اليوم عشان ماتحرج امجاد اتصلت وباركت لها بعد اسبوع ابو فارس وفارس وماجد عند ابو يزيد يتقدمون لأمجاد اللي رحب فيهم ووعدهم بالخير وكلم ام امجاد وقالت انهم كلمونا قبل والبنت موافقه وكلم ابو فارس واتفقوا بمنتصف العطله الملكه والزواج خلال شهر ونص كلهن ابو شروق كلم بناته بعد اقناع من ولده امجد وتسامح من بناته والبنات سامحوه وقرر يحجز لهم ببداية الاجازه للبنان وام شروق وافقت انهم يروحون 10 ايام ويرجعون ماجد تزوج امجاد والله رزقهم بعد سنه ونص بنت اموووره سمووها ساره وفيصل ونوف نوف الحين حامل للمره الثانيه بعد ماجابت ولد وسموه مروان وزياد مزعجهم يقول اذا ولد تراء اسمه زياد هههههههههههههههه شيماء وسلمان للحين مالله قسم لهم بحمل بس عايشين حياتهم ومبسووطين لآبعد الحدود رهف وابراهيم بعد التحاليل اللي قبل الزواج اكتشف ابراهيم انه فيه ايدز وقرر يسافر لبعيــد بس علم رهف اللي بكت وماتدري وش تسووي اكيد المرض منقول لها واكشفت وقالوا سليمه وابراهيم سافر وترك الكل وراه ساره وفارس ساره حامل بالشهر الرآبع وحياتها مع فارس من احسن مايكون فارس يحبها مووت قررت انها تلتهي فيه وتترك النت فتحت مدونتها وكتبت ( عندما قررت أن أحبك قررت أن ابداء معك حياة جديده قررت ان اكون ساره اللتي تريدها امها ان تكون ساره لمن حولها ولسيت سوارة حزن لكل من ارتداها سوف ابقى احبك ما حييت فانت من علمتني كيف اكون كما اريد انت زوجي وانت قريني وانت تلك الانفاس التي اعييش بها وسوف احبكي وابقى احبكي يا امي لما صبرتي علي في صغري وفي كبري اخي ومن اوؤكل له امري بعد الله سبحانه لن انساك من دعائي لكل من عرفني هنا اتمنى لكم ان تدعون لي بالسعاده الدائمه ولن انساكم من دعائي ...... لو مديت السعاده بيديني وقلت ابيها لك صدقني انت اغلى مــن يستاهل يديني ...... ) ****** النهــــــآيــــه ****** الكآتب آبو سـآرهـ آنتهت روآيتي وآنتهت حكآيتي اللتي تمنيت أن لا أنتهي منها فعلاً فقد بقيت معها وبقيت معي هي جزء من حيآتي وجزء من حيـآة أنــآس أحببتهم كثيراً هي أمنيه وتحققت بالنسبه لي هي وآقع أُجبرتوا عليه هي حـيـآتي ومآ تبقى مني كتبته هنا بين هذه الصفحات والسطور آتمنى من من ينقلها آن يذكر أسم المصدر وكآتب الروآيه | ||||||||
|
| |
|
01-09-17, 08:18 AM
| #43 | ||||||||||
| مشرفة منتدى الروايات والقصص المنقولةومنتدى الـروايــات الـعـربـيـةوعضو مميزفي القسم الطبي وفراشة الروايات المنقولةومشاركة بمسابقة الرد الأول ومحررة بالجريدة الأدبية 
|  التعديل الأخير تم بواسطة لامارا ; 01-09-17 الساعة 09:17 AM | ||||||||||
|
| |
|
| أدوات الموضوع | |
| انواع عرض الموضوع | |
|
|
.png)
العرض العادي
