آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
20-07-16, 09:16 AM
| #1 | |||||||||||||||||
| مراقبة عامة ومشرفة منتدى الروايات المنقولة  
|  الحب بين ماء ونار، للكاتبة/سارة الخولى، مصرية، (مكتملة)
| |||||||||||||||||
|  |
|
20-07-16, 09:21 AM
| #2 | ||||||||
| مراقبة عامة ومشرفة منتدى الروايات المنقولة
|  بعد نجاح قصتي الاولى القلب الضائع ......... وعدتكم اني ارجعلكوا بقصة تانية اول ما اوصل مصر بالسلامة ........ ومن مصر ام الدنيا قررت اني اكتب قصتي التانية........وزي ما احنا عارفين .....ان القصة الاولي كانت باللغة العربية لاستخدامي شخصيات اجنبية فيها ..........لكن المرة دي انا هغير وهكتب قصة بالعامية المصرية ......الابطال هيبقوا مختلفين كتير عن ابطال القلب الضائع...........والقصة مضمونها واحداثها مختلفة تماما عن مضمون واحداث القلب الضائع................ اتمني ان قصتي التانية تنال اعجابكم ......... القصة بعنوان (الحــــــب بين ماء ونار) التعديل الأخير تم بواسطة فيتامين سي ; 20-07-16 الساعة 10:31 AM | ||||||||
|
| |
|
20-07-16, 09:22 AM
| #3 | ||||||||
| مراقبة عامة ومشرفة منتدى الروايات المنقولة
| جلست عائلة (صدقي علوان )علي مائده الطعام لتناول طعام الافطار.......بداخل قصرهم الذي ينم كل شئ بداخله عن الذوق الرفيع .....والترتيبات المتقنة .....وفي نفس الوقت........الثراء الفاحش...... صدقي وهو يلوك قطعة خبز في فمه: امال فين شمس؟؟.......مانزلتش لغاية دلوقتي ليه؟؟ سوسن هانم : والله ما اعرف ........ده النهارده اول يوم في دراستها .....بس هي علطول كده متأخرة .......اصل...... وهنا يقطع كلامها صوت شمس المرتفع وهي تركض علي سلالم القصر: صباح الخير مامي ........صباح الخير دادي سوسن : يابت خرمتيلي ودني ........100 مرة قولتلك البنت لازم تكون هادية وصوتها واطي يضحك حسين ضحكة مجلجلة ثم يقول: وماله يا سوسن ........سيبي البت علي راحتها ........اقعدي يا حبيبتي شمس وهي تجلس علي المقعد : انت بس اللي ناصفني في البيت ده يا بابا..............مش عارفة من غيرك كنت عملت ايه سوسن متصنعة الغيظ: بقي كده يا شمس .......انتي خلاص نسيني اني امك.....ويهمني مصلحتك شمس وقد بدأت في تناول الطعام : لا يا مامي.......طبعا مانستش .....بس انتي علطول بتحبكيها عليا .......وبابا دايما فاردها...... صدقي بابتسامة واسعة: طبعا يا حبيبتي ..........انتي بنت صدقي بيه علوان.......عايزك تشوفي نفسك كده .........وتعملي كل اللي انتي عايزاه..........ومالكيش دعوة بكلام مامتك اللي لا بيودي ولا بيجيب همت الوالده بقول شئ ولكن قاطعها مشهد شمس وهي تقوم من علي المائده وتتناول حقيبة يدها ...... -بت يا شمس .......انتي كده كلتي؟؟ ده انتي لسه قاعده ........ شمس وهي تميل علي والدتها وتقبلها: معلش يا مامي ..........لازم الحق المحاضرة .........ماينفعش اروح متأخرة الام بخبث : ومن امتي ده بقي ان شاء الله؟؟..............ده انتي علطول متأخرة .......وعلطول مش هامك مصلحتك شمس بضيق : ما خلاص بقي يا مامي.....من الصبح عمالة تهزأيني وساكتة ...... الام بضجر : والله ما فيه فايده فيكي ..........هتفضلي كده طول مانتي ماشية ورا كلام ابوكي هز صدقي رأسه مبتسما وغمز لشمس بعينه وكأنه يقول لها ( ولا يهمك من الكلام ده وحاولي تلمي الموضوع) تلقت شمس الاشارة ......فقالت بابتسامة هادئة متصنعة: حاضر يا مامي ........من عنيا......هسمع كلامك في كل حاجة ......ودلوقتي ممكن بقي امشي؟؟ سوسن وهي تشعر ان ابنتها ( بتسكتها وخلاص): ماشي ياختي.......اتفضلي.....بس اياكي ترجعيلنا بمشكلة.........وفي الكلية انسي خالص انك بنت صدقي علوان........بلاش الانعرة علي خلق الله شمس وقد اصابها الملل فردت بنفاذ صبر: طيب يا مامي ........اي خدمات تانية؟؟ -لا شكرا يا ختي..........وخدي بالك وانتي بتسوقي لم تجب شمس وانما اتجهت بخطوات مسرعة نحو باب القصر ...وهي تشعر انها اخيرا قد نجحت في الهروب من هذه المحاضرة الصباحية والتي تستمر معها طوال فترة الدراسة ....فتمتمت : ربنا يهديكي يا ماما يا مدوخاني .........ثم رسمت علي شفتيها ابتسامة ساخرة وهي تقفز بداخل سيارتها الرياضية الحمراء : ويهديني انا كمان ......... وانطلقت شمس بسيارتها بسرعة فائقة لتطلق مع انطلاقها عاصفة من الرمال المتطايرة والتي حجبت الرؤية تماما داخل القصر وعقب خروج شمس ....... سوسن بقلق: انت ليه استغنيت عن السواق بتاعها؟؟ صدقي بللا مبالاة: بنتك اللي طفشته .........كل شوية تتسببله في مشاكل .....لغاية لما الراجل زهق..... سوسن بضيق: يعني هي بنتي انا لوحدي.....مانت السبب في دلعها ده ......بدل ما تأدبها تقعد تقولها اعملي اللي انتي عايزاه........بالذمة ده كلام؟؟ صدقي وهو يقوم من علي المقعد ويرتدي جاكت البدلة الانيق: بقولك ايه........هو انتي خلصتي محاضرة شمس .....هتمسكي في محاضرتي .......طلعيني من دماغك بقي ...... سوسن متصنعة الهدوء: يا حبيبي انا قلقانة عليها......بنتك جميلة وغنية وعلشان كده حاسة انها سيده العالم ........وكل يوم والتاني عاملالنا مشاكل ومفيش علي لسانها غير (انت ماتعرفش انا بنت مين؟؟.....انا بنت صدقي علوان )............علمتها الغرور يا صدقي .......دلوقتي محدش بيقدر يقف في وشها ولا يصدها .......انا خلاص تعبت منها.......البت بتعاملني علي اساس اني صاحبتها مش مامتها........مش بتحترمني خالص صدقي بضجر: مش بتحترمك ايه؟؟.........ماهي بتقولك يا مامي سوسن بعصبية : يا سلام .......يعني خلاص كلمة مامي دي هي الاحترام كله؟؟.........انا قصدي في اسلوب كلامها معايا يا سي صدقي زفر صدقي بملل ثم قال بلهجة حاول بها ان تكون هادئة : انا زهقت يا سوسن ......ارحميني بقي.....البت لسه صغيرة......دي يادوب في تانية كلية ......بكرة تكبر وتعقل .......وبعدين ماتنسيش انها البنت الحيلة.....وجبناها بعد 20 سنة جواز .........وبعد كتير من المحاولات ........احنا مش هنعيشلها طول العمر يا سوسن........لازم ندلعها دلوقتي......امال بس هندلعها امتي.......؟؟ اطلقت سوسن تنهيده عميقة وهي تقول: ما ده اللي انا خايفة منه.......نفسي تتحمل المسئولية اكتر من كده .........نفسي تهتم بدراستها ........لاننا زي مانت قلت مش هنعيشلها .... صدقي وهو يربت علي كتف سوسن: ماتقلقيش يا سوسن ..........بنتك تقدر تحمي نفسها من اي حد .......لازم ماتبقاش ضعيفة .........لازم يطلعلها ضوافر وانياب ........علشان تقدر تعيش في البلد دي بسلام من غير ما حد يستغلها او يضحك عليها ..... اومأت سوسن برأسها وهي تقول : ربنا يحميها ........ صدقي وهو يقبل رأس زوجته : ان شاء الله........يالا انا ماشي دلوقتي.....عايزة حاجة ؟؟ سوسن وهي تربت علي يده الموضوعة علي كتفها : عايزة سلامتك يا حبيبي...... بدون كلمة اخري خرج صدقي من باب القصر ليترك وراءه سوسن مستغرقة في تفكير عميق...... يتبع......... | ||||||||
|
| |
|
20-07-16, 09:23 AM
| #4 | ||||||||
| مراقبة عامة ومشرفة منتدى الروايات المنقولة
| .......بعد انتهاءها من تناول الافطار .........جلست سوسن علي مقعد وثير في الشرفة الواسعة والتي تطل علي حديقة القصر ذات الالوان المتداخله......والتي تضفي عليها اشعة الشمس رونقا خاصا يجعلها بمثابة لوحة فنية .......وبدأ سيل من الافكار............. تذكرت كيف كانت حياتها قبل الزواج من صدقي........كانت مجرد فتاة فقيرة وحيده يتيمة الاب وتراعي والدتها المسنة .......كانت تسكن في شقة متواضعة في منطقة القلعة .......كانت حياتها بسيطة ..خالية من ايه تعقيدات .........وعندما تقدم لها صدقي .......كان صاحب مشروع صغير........ولكن منذ زواجها به ..كان ذلك بمثابة (فتحة خير عليه)...........توسعت اعماله وتقدمت .......والمشروع الصغير اصبح شركة كبيرة .....ثم مجموعة شركات ...........وسريعا ما اصبح اسم (صدقي علوان ).....يحمل سحرا خاصا ...يجعل كل من يسمع به يبدي الاحترام والتقدير ......... كانت حياتهما جميلة ..........مستقرة.....ولكن كان ينقصها شيئا هاما .........بل انه في الواقع كان اهم شئ.............كان ينقصها طفل .........ذهبت هي وزوجها الي جميع اطباء مصر تقريبا........ولكن ما من فائده......بعضهم كان يقول ان العيب بها .......والبعض الاخر يقول ان العيب بزوجها........والبعض يقول انه ليس هناك مشكلة في الانجاب ......وانها مسألة وقت لا اكثر ولا اقل............لم يقصر ايا منهما في تناول الادوية ......... طوال 20 عاما بذلت اقصي مجهوداتها لتنجب صغيرا يملأ منزلها بالضحك والمرح ........ واخيرا.......وبعد ما اصابها من يأس واحباط جعلها تتوقف عن تناول العلاج.........شاء الله ان تضاء حياتهما بنور شمس ساطعة ...........كانت جميلة .....رقيقة .......لطيفة ........ناعمة ...........وفور رؤيتها قررت ان تطلق عليها اسم شمس.........كان الانسب لها ......كيف لا وهي صاحبة الوجه المشرق والعينان العسليتان .......والشعر الحريري..... كبرت شمس......وكبرت معها مشاكلها...........بعدما وصلت لمرحلة المراهقة.....بدأت تكتشف انها الاجمل والاغني بين صديقاتها..........كانت مرغوبة من جميع شباب المدرسة الثانوية .........كان الجميع يتمني ان تنظر لهما شمس ولو لمرة واحده........كانت ممشوقة القوام .....شعرها كستنائي اللون يمتد طوله الي اسفل ظهرها بقليل.......كان خصلاته المموجة الرقيقة تنساب في نعومة......بشرتها كانت بيضاء كاللبن الحليب.......عيناها كبحيرتان ماء عذب ......تعكس اللون الذي يقع في المنتصف بين الاخضر والبني.......كل من كان يراها كان يقول انها ايه في الجمال............ولكن للأسف........كان هذا الجمال بمثابة نقمة عليها ..........جمالها والمدعم بغناها جعلها تنظر الي العالم من الاعلي ........كانت متكبرة........مغرورة....... كان لوالدها دورا كبيرا في افسادها ........كان يحنو عليها كثيرا..........لا يعاتبها .........لا يقسو عليها ابدا حتي لو اخطأت............اصبحت لا تحترم كبيرا ......ولا تشفق علي صغير .......كل ماكان يهمها ان يبدي الجميع لها الاهتمام وينصاع لأوامرها ........عندئذ فقد تشعر بالرضا .......... حاولت والدتها جاهده ان تسعي في تغييرها.....ولكن لا حياة لمن تنادي ........ قطع سيل افكار سوسن صوت الخادمة (فتحية ): ست سوسن..........فيه واحده عايزه حضرتك ....... نظرت سوسن الي فتحيه والتي وقفت ممسكة بجهاز اللاسلكي ثم قالت بهدوء: مين ؟؟ ...... وقبل ان تجيب فتحيه .....التقطت سوسن جهاز اللاسلكي ووضعته فوق اذنها وهي تقول: صباح الخير......مين معايا؟؟ اتاها صوت انثوي رقيق: ااخس عليكي يا سوسن.......انا توقعت انك هتتصلي بيا اول ما تقومي من النوم سوسن وعلي شفتيها شبح ابتسامة: مين ؟؟......عبير؟؟ -ايوة ياختي ....عبير..... سوسن وقد اتسعت ابتسامتها: ازيك يا عبير.....عاش من سمع صوتك .....بس خير......انتي بقالك كتير مسألتيش.....اشمعني كنتي مستنيه اتصال النهارده عبير معاتبه: كده يا سوسن؟؟..........بقي معقولة تنسي سوسن بجدية: انسي ؟؟..........انسي ايه؟؟ عبير بسرعة: عيد ميلادي يا هانم سوسن: ليه؟؟.......هو النهاردة ايه؟؟...........اااااااااااااا� � ........اسفة خالص يا عبير......نسيت والله عبير بضحكة مستفزة: عموما انا هسامحك .....بس بشرط .......تيجي النهارده الحفلة ......وتعوضيني بهدية حلوة سوسن بشرود: هدية ........؟؟...........ثم تابعت بجدية: اه يا حبيبتي طبعا........اكيد عبير بسرعة: ماشي يا حبيبتي .......هستناكي النهارده باليل علي الساعة 8..........ثم تابعت بسرعة: اه .....وطبعا بلغي صدقي سوسن : اه .....اكيد ان شاء الله -مع السلامة -مع السلامة يا حبيبتي اغلقت سوسن الهاتف ......ثم دقت ازرار الهاتف بسرعة وسرعان ما اتاها صوت صدقي: الو ..... -ايوة يا صدقي..........بقولك.......عيد ميلاد عبير النهاردة .......وانا كنت ناسية......عايزة انزل اجيبلها هدية صدقي ببرود: هتجيبيلها ايه؟؟ سوسن بسرعة: اي حاجة.......خاتم .......او عقد الماظ...... صدقي: بس ماعدقتش هتلاقي في الخزنة فلوس تكفي تمن حاجة الماظ........بقولك ايه ؟؟.....خوديلها حاجة من عندك ......انتي عندك الماظ كتير سوسن : ليه بس يا صدقي ......مانجيب حاجة جديده احسن صدقي بنفاد صبر: ياستي اديها حاجة من عندك .....وانا ابقي اجيبلك زيها....... سوسن : طب اديها ايه بس؟؟ صدقي بعد ان زفر بحده: اي حاجة يا ستي.......سلام دلوقتي بقي علشان ورايا اجتماع همت سوسن بقول شئ ....ولكن فاجئها صوت غلق الهاتف ........نظرت الي الهاتف بغيظ ثم تمتمت : بقي كده يا صدقي.......ماشي ذهبت سوسن الي حجرتها وبحثت في صندوق مجوهراتها كثيرا.........واخيرا استقرت علي سلسلة رقيقة يتوسطها قلب رقيق من الالماس الخالص....فتمتمت : يارب تعجبك يا عبير ........ وضعت سوسن السلسلة في علبتها الانيقة ......فبدت الهدية كما لو كانت قادمة للتو من محل مجوهرات......... في ساحة الجامعة .... جلست شمس فوق سيارتها الرياضية ..........وسط اصدقائها الثلاث ......والذين تفرقوا حولها...... لو نظرت الي هذا التجمع.......لأدركت علي الفور ان الشمس قد اختارت وجه شمس بالذات لتلقي بأشعتها عليه........فتضيف عليه جمالا فوق جمالها...... كانت شمس بالتأكيد هي من تسود هذا المجلس .......حركاتها...ضحكاتها ........صوتها ........كانوا عنوان لفتاة ارستقراطية .......تشعر بجمالها كثيرا...... ميس: بس انتي النهارده حلوة اوي يا شمس شمس بغرور: مانا عارفة.....وايه الجديد ميس : ياساتر........ده بدل ماتقوليلي شكرا شمس بلا مبالاة : شكرا يا ستي احمد: والله اللي بيعجبني في شمس انها علطول واثقة من نفسها رانيا: بس الثقة لما بتزيد عن الحد ......بتتحول لغرور احمد : وايه اللي مايخليش واحده زي شمس تتغر.......دي ممكن تقول للقمر قوم وانا اقعد مكانك ميس ببرود: وهيرضي يقوم؟؟ احمد وهو يقترب من شمس ويبتسم بخبث: اكيد هيقوم........ولو ماقمش ....انا اللي هقومه بنفسي .....ولا ايه يا جميل؟؟ مطت شمس شفتيها ثم قالت ببرود: وليه تقوم القمر ......وانا الشمس؟؟ تعالت ضحكات احمد ثم قال: اموت انا ....... تبادلت ميس مع رانيا نظرة استياء ثم قالت محاولة تغيير الموضوع: والله يا جماعة انا حاسة بالذنب اني ماحضرتش المحاضرة رانيا : اه ....وانا كمان شمس ببرود: والله ما شفت اعبط منكوا.........حد يروح الجامعة علشان يحضر محاضرات؟؟ ميس: امال هنيجي ليه؟؟ شمس: علشان نضحك ونتبسط.......وبعدين ما احنا لسه في اول السنة......تلاقي الدكتور ماشرحش حاجة ميس بابتسامة واسعة: قال يعني لما يشرح هتحضري..... شمس بفتور : والله لو لقيت الدكتور ظريف ودمه خفيف هحضر......انما لو طلع شبه معتز ابو بدلة الحلاقين دي طبعا مش هحضر تعالت الضحكات ثم قالت ميس بمرح: اه والله.......انا كل لما كنت اشوفه بس داخل .....كنت اتفتح في الضحك علطول ....معرفش ليه؟؟ رانيا : يابنتي .....ده هو علي بعضه كده كان نكتة .......يالا بقي الله يرحم ايامه........بس اتطمني يا شمس ......انا شفت الجدول .....مش بيدرسلنا خالص....... شمس وهي تنظر الي ساعتها : ربنا يستر...... احمد: مالك يا شمس؟؟.........وراكي ميعاد ولا حاجة؟؟ شمس : لا بس انا لو روحت متأخر عن مواعيد المحاضرات ماما هتفتحلي محضر.......وانا مش ناقصة بقي رانيا : ليه يا بنتي..........هي مامتك لسه زي ماهيا متغيرتش شمس: اه ياستي.........مش عارفة الست دي فيه ايه بينها وبيني........علطول مش واثقة فيا ......رحتي فين؟؟........هترجعي امتي؟؟........بتكلمي مين؟؟.............كأني لسه عيله ميس بمزاح: مانتي بصراحة يا شمس مايتوثقش فيكي....... شمس بضجر: والله ما هي ناقصاكي يا ميس .........كفاية اللي انا فيه ..........زكان نفسي ربنا يرزقني بأم طيبة كده شبه بابا رانيا: يابنتي ما مامتك طيبة ........بس بتخاف عليكي شمس بضيق: طب ماهو بابا بيخاف عليا برضه........بس بيعاملني بالراحة خالص........ احمد : بصراحة يا شمس انا لو عندي بنت قمر زيك كده كنت خفت عليها.........بس معرفش باباكي سايبك كده ليه همت شمس بقزل شئ ولكن قاطعها صوت رنين هاتفها شمس ترد بسرعة: ايوة يا مامي..........ايه؟؟..........ايوة طبعا حضرت امال هلعب يعني؟؟......اه ......لا معرفش.........حفلة مين؟؟..........طنط عبير؟؟..........ياماما مش عايزة اروح......الست دي انا مش بطيقها......ايه هو اللي عيب؟؟.....بمزاجي اروح او ماروحش دي حرية شخصية......يامامي بتزعقي ليه دلوقتي؟؟..........الله.......ياست� � براحتي........يوووووووووووووو ه بقي........طيب خلاص هشوف ......اقفلي بقي........سلام شمس بضيق: اوووووووف...........انا زهقت من التحكمات دي ......بتاع ايه اروح احضر حفلة مش عايزة احضرها؟؟ ميس : فيه ايه يا شمس؟؟........فيه حد مايحبش الحفلات - اه يا ستي......انا...........انا اصلا بكره الست دي ومش بحبها... رانيا : ست مين؟ شمس: مش وقته..........انا لازم اروح دلوقتي........سلام وبدون اي كلمة اضافيه قفزت سوسن بداخل سيارتها ............وهمت بتشغيل المحرك .....ولكن ..... شمس: يووووووه........ده ايه اليوم الملخبط ده؟؟.... رانيا: فيه ايه؟؟ شمس بضيق: العربية عملتها معايا تاني....... ميس: يابنتي ماهو من كتر الدعك فيها .......هو اللي انتي بتعمليه فيها ده شوية؟؟ شمس: امال انا جايباها عربية رياضية ليه............علشان كل شوية تشلني ؟؟ احمد بهدوء: حاولي بس تاني حاولت شمس كثيرا في تشغيل المحرك.......واخيرا دارت السيارة .......وانطلقت شمس بدون ان تتبادل كلمة واحده مع زملائها وقررت ان تمر اولا علي ورشة لتصليح السيارات .........قبل ان تذهب لمنزلها ........... يتبع...... | ||||||||
|
| |
|
20-07-16, 09:24 AM
| #5 | ||||||||
| مراقبة عامة ومشرفة منتدى الروايات المنقولة
| ......كانت شمس اثناء قيادتها مستغرقة في تفكير عميق.......هي تشعر انها تمقت عبير هذه .....ولا تري لذلك سببا ......ولكنها كانت تشعر انها غير ودوده كما هي تبدو او كما تحاول ان تبدو......... وصلت شمس الي ورشة تصليح السيارات .......وما ان وقفت حتي رأت جميع العمال في حالة انشغال كاملة.....تفحصت ببصرها الورشة جيدا ......ثم ذهبت الي اقرب عامل اليها وقد انهمك في تصليح احدي السيارات شمس ببرود وهي تقف خلف هذا الشخص: يا انت التفت هذا الشخص اليها.....بهتت شمس للحظة مما تراه.....كانت تري امامها شابا وسيما ....طويل القامة ..قمحي اللون .....اسود الشعر ....... رفع هذا الشخص النظارة المخصصة للعمل من فوق عينيه وهو يقول: اي خدمة يا انسه تنحنحت شمس وحاولت ان تخرج من وسط حالة انبهارها ثم قالت بلهجة حاولت بها ان تكون بارده وهي تشير بيدها الي سيارتها: عربيتي اللي واقفة هناك دي -مالها شمس بشئ من العصبية : يعني ايه مالها ؟؟.........عايزة تصليح.......المحرك فيه مشكلة وهنا اقترب منهم شخصا ما وهو يقول : فيه ايه يا باشمهندس ؟؟.......ماتكمل تصليح التفت له الشاب وقال : حاضر ....ثم التفت الي شمس وهو يقول بلا مبالاة : اسف يا انسه .....انا مشغول دلوقتي زي مانتي شايفة ......ممكن تطلبي من عماد (قالها وهو يشير الي عامل يقف علي مسافة امتار منه ويتناول كوبا من الشاي) وبدون كلمة اضافية التف الشاب الي السيارة .....وتابع التصليح.........مما اثار حنق شمس بشده ..... فقالت وهي تغرز اصبعها في كتفه : وانا مش ماشية من هنا الا لما انت نفسك تصلحلي عربيتي الشاب بدون ان ينظر اليها : يبقي تستني حضرتك لغاية لما اخلص شمس بحده : انت يابني ادم معندكش نظر........ازاي تسيبني واقفة لوحدي وسط محل كله عمال وقرف التفت لها الشاب وقد بدا ان صبره قد نفد: بقولك ايه .......قلتلك لو مستعجلة تروحي عند عماد ....وبعدين ايه عمال وقرف دي؟؟..........هما العمال دول مش بشر زيك ولا كائنات فضائية....... شمس بعصبية زائده: انت ازاي تكلمني بالاسلوب ده ؟؟..........هو انا واحدة من الزبالة اللي بتشوفهم كل يوم ؟؟.....انت ماتعرفش انا بنت مين يا استاذ؟؟ الشاب وقد ارتفع صوته :مايهمنيش اعرف يا انسة........هو انتي جاية هنا تجري شكل ولا ايه؟؟.........دي حاجة غريبة والله شمس بنفس العصبية وبنبرة توعد : بقي كده؟؟.........انا بقي هعرفك انا ابقي مين ... وبنفس العصبية ذهبت في خطوات مسرعة الي مكتب ادارة الورشة ........ مط الشاب شفتيه في لا مبالاة ثم عاد الي العمل..........وما هي الا لحظات حتي سمع صوت الفتاة يحتد في الكلام وهناك من يحاول تهدئتها........ترك الشاب السيارة والتفت ليري شمس وقد جاءت بنفس الخطوات السريعة ومعها منصور صاحب الورشة........ شمس بحده با لغة: اهو هو ده الحيوان اللي بقولك عليه الشاب وقد اختنق وجهه بحمرة الغضب فقال بأعلي صوته: ماتحترمي نفسك يا بت انتي .....هو محدش قادر عليكي ولا ايه؟؟ شمس بنبرة الغير مصدق لما تسمعه: انت ....انت ازاي تكلمني كده .....انت ما......... قاطعها الشاب بتهكم مقلدا نبرة صوتها: .......متعرفش انا بنت مين؟؟ اشتاطت شمس غضبا لما تسمعه ..وهمت بقول شئ ولكن قاطعها صوت منصور: احترم نفسك يا علي .......انا علمتك تتعامل مع الزباين بالشكل ده؟؟ علي بحنق: يا باشمهندس ......انا عاملتها بأدب بس هي اللي طولت لسانها شمس بحنق: مااهي الاشكال اللي زيك لازم الواحد يعاملها كده....... علي بغيظ : شوف ياباشمهندس........شفت الانعرة بتاعتها.......وبعدين انت علمتني اني لازم اخلص الزباين بالدور.....وهي جت وكنت بشتغل في عربية.....قلتلها تروح لعماد علشان فاضي وهي اللي مارضيتش شمس بغيظ: ايوة .........ومفيش غيرك هيصلحها منصور: صلوا علي النبي يا جماعة......ولم الدور يا علي وروح صلحلها عربيتها ...وسيب عماد يشوف العربية دي علي بلهجة حاول بها ان تكون هادئة: انا اسف يا استاذ منصور........بس انا مش همد ايدي في عربيتها بعد ما غلطت فيا ......واعلي ما في خيلها تركبه منصور وقد اقترب من علي وهمس: يا علي لم الدور وبلاش الالاطة دي ......ده باباها راجل واصل...وممكن يقفلنا المحل ده من بكرة لو قالتله علي المشكلة علي بلا مبالاة: خلاص .......لو وجودي هيسبب مشكلة انا مستعد استقيل منصور: لا يا علي ...انا عارف انك محتاج للشغلانة دي زي ماحنا محتاجينلك.....انا بقولك لم الموضوع احسن ....... وهنا قطع صوته صوت شمس وهي تقترب منه وتناوله هاتفها المحمول وعلي شفتيها ابتسامة ساخرة: بابا عايزك ارتجف منصور وتناول الهاتف بيد مرتعشة: ايوة ......ثم تنحنح وتابع بلهجة حاول ان ينتزع منها اي توتر : ايوة يا صدقي باشا ..........خير؟؟.........ايه؟؟........... .لا والله يافندم.......انا ماعملتش حاجة.......طب ليه طيب قطع الارزاق........حاضر حاضر ياباشا ........ثم نقل بصره الي علي بتوتر وهو يتابع: حاضر يافندم .........اللي عايزه هيكون...... اغلق منصور الهاتف وعلي ملامحه نظرات التوتر......ثم نظر الي شمس والتي كانت ترمي علي بنظرات الشماته....ثم التفت الي علي وقال بلهجة مشفقة: اسف يا علي.........صدقي باشا بيهدد انك لو ماصلحتش العربية بنفسك يبقي تقدم استقالتك ......يا اما ............وصمت لحظة ثم تابع وهي يطأطأ برأسه في اسف: والا هيقفل الورشة نظر علي الي شمس ليجدها رافعة رأسها بشموخ وفي عينيها نظرة استعلاء وشماتة وعلي شفتيها نفس الابتسامة الساخرة .......ثم قالت بتهكم : صلحها بقي يا باشا ........علشان تعرف ان طلباتي لو ماتعملتش بالذوق هتتعمل بالعافية...... نظر لها علي نظرة حنق وهو يقول بلهجة قاسية ضاغطا علي كل حرفة من حروف كلماته : اعتبرني قدمت استقالتي يا بشمهندس...... ثم ادار ظهره لهما واتجه الي غرفة تبديل الملابس بخطوات متعالية وكأنه لم يكن في معركة خاسرة منذ قليل ادت الي طرده من العمل.........اما شمس فلكم ان تتخيلوا حجم غضبها عندما رأت رد الفعل هذا والذي لم يكن غير متوقعا البتة.............فبالرغم مما فعلته لم تتحقق لها رغبتها......وهذه كانت تعتبر سابقة في تاريخها........سابقة مؤلمة لا تتحملها............ يتبع.......... | ||||||||
|
| |
|
20-07-16, 09:25 AM
| #6 | ||||||||
| مراقبة عامة ومشرفة منتدى الروايات المنقولة
| عاد علي الي منزله منهكا …….متعبا………كان يشعر ان شيئا ثقيلا يجثو فوق صدره……كانت الاف الاسئلة تجول بخاطره …… دق علي جرس الباب …….و...... -ايه ده ؟؟...........علي ؟؟..........ايه اللي جابك دلوقتي ؟؟......... علي بملل وهو يزيح صديقه من امامه ويدخل : والنبي ماهي ناقصاك يا اشرف........سيبني في حالي اشرف وهو يغلق باب الشقة: ايه ده ..ايه ده؟؟.............ده شكل الموضوع كبير.......ايه اللي حصل يابني علي وهو يلقي بجسده علي مقعد انتريه قديم : استقلت من الشغل ....... اشرف مندهشا : ياخبر اسود .........ليه يابني.....ده انت حفيت علشان توصل للشغلانة دي ؟؟.......جاي دلوقتي ببساطة تسيبها ؟؟ علي بشئ من العصبية : اهو اللي حصل يا سي اشرف.......ومش عايزك تفتح بقك بكلمة تانية........انا فيا اللي مكفيني ..... اشرف بلهجة حاول بها ان تكون هادئة: طب ليه بس يا علي؟؟............انا صاحبك برضه مش اي حد علي بهدوء: انت عارف اني عمري ما كنت هسيب الشغل ده الا علي عيني ........بس اهو اللي حصل اشرف ممازحا: ياعم ماتخلص وتقولي اللي حصل......ولا يمكن تكون اترفدت ومكسوف تقول لم يجب علي وانما القي اشرف بنظرة نارية جعلته يدرك ان مزاحه ليس محببا الي علي في هذا الوقت بالذات فتنحنح قائلا : انا اسف يا علوة ........بهزر والله قام علي من فوق مقعده واتجه الي غرفته وهو يقول: انا داخل اريح شوية اشرف وهو يلحق به ويمسكه من ذراعه : فيه ايه يا علي؟؟..........يابني انت علطول حساس كده؟؟.......والله بهزر معاك علي وهو ينظر الي صديقه بعينين دامعتين: انا عمري ما سمحت لحد يكسرني يا اشرف........وعمر ما حد اتجرأ وهانني ..........بس النهارده .......... وصمت علي ولم يستطع بماذا يمكنه ان يكمل جملته..........ربت اشرف علي كتفه وهو يقول باشفاق: خلاص يا علي .........اتغدي بس الاول علشان زمانك جعان ..........وبعدين نبقي نعرف ايه هي حكايتك يا سي الاستاذ علي ( قالها وانفتح في نوبة من الضحك ) علي بلهجة جاده: ايه ده ؟؟............هي البت سنية هي اللي جابت الاكل النهارده ولا ايه اومأ اشرف برأسه ايجابا وهو يحاول ان يكتم ضحكته علي بعصبية : خلاص والله مانا واكل ......... اشرف وهو يجذبه من ذراعه: ليه بس يا علوكة ...........دي والله طبيخها حلو ......... علي بتهكم : طبيخها حلو ؟؟............خليهولك يا اخويا ......انا هدخل اطبخ حاجة سريعة ليا ........وخليك انت في اكل الست سنية اشرف ملهوفا: بجد هتطبخ.......خلاص اكلني معاك ابوس ايدك علي مبتسما: واكل سنية ؟؟ اشرف وهو يسبقه علي المطبخ: نبقي نأكله للقطط ........يالا يا علوة تبعه علي الي المطبخ .........وبدأ الاثنان في تحضير طعام سريع لهما ................. دخلت شمس القصر ......وهي تشعر انها لا تري امامها .........وما ان دخلت ......... سوسن بشئ من العصبية : حمدلله علي السلامة يا هانم........هو ده اللي انا جاية دلوقتي؟؟ لم تجب شمس ......بل ولم تنظر حتي الي والدتها .........وهمت بالصعود الي غرفتها ....لحقت بها سوسن وجذبتها اليها بشده وهي تقول: انا مش بكلمك ؟؟ زفرت شمس في حده ثم قالت بشئ من العصبية : يووووووووووووه ....يا ماما احنا مش هنخلص من المحاضرات دي .........وانا خارجة محاضرة......وانا راجعة برضه محاضرة......... انا خلاص اتخنقت سوسن بحده : يابت انتي مش هتتلمي بقي...........ماتتعلمي الادب شوية .......انا مامتك ولازم تحترميني اكتر من كده شمس وهي تفلت يدها من بين قبضة والدتها: يا ماما انا مابقيتش صغيرة.......انا خلاص كبرت ومش محتاجة رعاية من حد ........ سوسن مبهوتة: بقي كده يا شمس ؟؟.........دي اخرة تربيتي فيكي ؟؟...........خلاص مابقيتيش محتاجاني؟؟.......يعني لو مت ده مش هيفرق معاكي؟؟ شمس بلهجة هادئة: بعد الشر عليكي يا مامي .........انا ماقولتش كده.......بس برضه مش كل حاجة تحبكي عليا فيها .......وبعدين انا اصلا اعصابي تعبانة النهارده ومش مستحملة حاجة سوسن : اعصابك تعبانة؟؟.........والله ان كانت بتتعب فأنتي اللي دايما بتكوني السبب في ده ..........هو فيه حد بيقدر يقف في وشك ؟؟ وهنا تذكرت شمس موقف علي معها ........كانت تشعر حقا بالحنق كلما تذكرت رد فعله علي تهديدها فأجابت بلهجة حاولت ان تكون بها هادئة: من فضلك يا مامي .......انا مش قادرة اناكف واهاتي دلوقتي..........ممكن تأجلي المحاضرة دي بعد ما ارتاح شوية ؟؟ سوسن بتهكم : اه زمانك يا عيني تعبانة من كتر حشر المعلومات في دماغك ........يالا ربنا يصبرك علي المحاضرات والدكاترة ..... لم تجب شمس وانما صعدت الي غرفتها ..........وما ان دخلتها حتي اسلمت جسدها الي فراشها ..........وبدأت في نوبة من البكاء المرير.......... دخل صدقي الي المنزل ليجد سوسن جالسة فوق مقعد وثير واضعة يدها اسفل ذقنها ويبدو انها مستغرقة في تفكير عميق....... صدقي : احم احم...........نحن هنا التفتت سوسن الي صدقي والذي وقف وعلي شفتيه ابتسامة واسعة ثم قالت بهدوء: انت رجعت امتي؟؟ صدقي وهو يهم بالجلوس: نعم .........لا ده انتي شكلك مش هنا خالص .......مانا لسه داخل حالا من الباب سوسن شارده: مخدش بالي ............ صدقي وهو ينظر الي سلالم الدور العلوي: هي شمس رجعت؟؟ سوسن بنفس الشرود: ايوة صدقي بهدوء: مالك يا سوسن؟؟............هو فيه حاجة شاغلاكي؟؟ سوسن : بنتك يا صدقي....... صدقي بشئ من الحده: مالها بقي بنتي؟؟...........ماهي زي الفل اهي؟؟.........ولا انتي غاوية تنكدي علي نفسك وعليا وعلي المسكينة دي من غير سبب سوسن بحده اكبر: يا سلام .....انا اللي علطول بطلع نكدية في الاخر وكلامي مجرد تحكمات.........ثم صمتت قليلا وتابعت ولكن بهدوء: يا صدقي انا خايفة علي البنت ...........اقولك ايه بس؟؟مانت علطول مش فاهمني .....ومش هتفهم كلامي صدقي : بصراحة مش فاهمك.......ومش مستعد افهمك ........لأني شايف ان بنتي احسن بنت في الدنيا ........وانتي اللي مكلكعة المواضيع سوسن : ماشي يا صدقي ..........خلاص اتفضل اطلع لبنتك وشوف ايه اللي كان مزعلها النهارده وموترها اعصابها علي حد قولها صدقي وقد هم بالوقوف : اكيد انتي ..........هو فيه حد غيرك؟؟ صعد صدقي الي الطابق الثاني .....واتجه الي غرفة شمس....... صدقي بلهجة مرحة وهو يطرق الباب : حبيبة بابا هنا؟؟ قامت شمس وجففت دموعها بسرعة ثم قالت بصوت متوتر : اه يا بابي......اتفضل ...... فتح صدقي الباب وما ان رأي شمس في هذه الحالة حتي اقترب منها وهو يقول في حنان بالغ: حبيبتي .......... بتعيطي ليه؟؟ شمس محاولة تهدئة نفسها: ابدا يا بابي .......عيني واجعاني بس؟؟ صدقي: بذمتك ده كلام ؟؟...........هو انا يعني مش شايفك؟؟.............ايه اللي مضايقك يا حبيبتي؟؟.........مامتك ولا حد تاني شمس محاولة ان تخفي موضوع الورشة عن والدها تماما : لا طبعا ........هو حد يقدر يضايقني .......ثم اطرقت برأسها وتابعت بصوت خافت : غير مامي صدقي وكأنه تذكر شئ للتو: اه صحيح؟؟..........الواد الغبي اللي في الورشة ده عمل ايه في الاخر ؟؟............صلحلك العربية؟؟ شمس بتوتر : ها ...............اه طبعا .......هو يقدر مايصلحهاش ؟؟........ اطلق الاب ضحكة طويلة ثم قال: ايوة هي دي بنت صدقي علوان ..........تعرف تجيب حقها وزيادة كمان شمس وقد خف توترها: اه طبعا ........ صدقي وهو يربت علي كتف ابنته : طيب يا حبيبتي .........انا هسيبك دلوقتي ترتاحي.........بس ماتنسيش اننا رايحين النهارده حفلة طنطك عبير .............عايزك تبقي اميرة الحفلة ........ماشي؟؟ شمس بابتسامة مصطنعة : حاضر ......... صدقي وهو يقبل ابنته علي جبينها : نامي دلوقتي يا حبيبتي علشان تبقي فايقة في الحفلة....... اومأت شمس برأسها ............. خرج صدقي من غرفة ابنته ...........تاركا وراءه شمس والتي فضلت النوم علي التفكير في المأساه التي حدثت لها اليوم.......... يتبع............. | ||||||||
|
| |
|
20-07-16, 09:26 AM
| #7 | ||||||||
| مراقبة عامة ومشرفة منتدى الروايات المنقولة
| بعد انتهاء علي واشرف من تناول وجبة الغداء .............قام اشرف بتحضير الشاي له ولصديقه ....... اشرف بمرح وهو يمسك بصينيه الشاي: ايوة جااااااااي وعندك واحد شاي لسي الاستاذ علي .......سيد الناس كلها علي بغيظ: انت مش هتبطل بقي ؟؟...........ولا خلاص سنية بهتت عليك ؟؟.......... اشرف وقد جلس وبدأ في وضع السكر بالشاي: انا مش عارف انت مش طايقها ليه؟؟........دي والله بت غلبانة وطيبة .......وبتحبك علي : والله يا اشرف لو فتحت سيرة الموضوع ده تاني .......لا هتبقي صاحبي ولا اعرفك؟؟ اشرف : يا خبر اسود ومنيل........لا خلاص يا عم ........احنا منقدرش نستغني برضه......خلينا نغير الموضوع واحكيلي علي اللي حصل النهارده في الورشة وايه اللي خلاك تستقيل ؟؟ علي وقد تبدلت ملامح وجهه 180 درجة : بلاش نتكلم في الموضوع ده يا اشرف....... اشرف وهو يربت علي ساق علي : روق يا علوة كده وفرفش...........والله مافي حاجة مستاهلة زعلك ........وبعدين انت عارفني .........حشري من يومي.......يعني هفضل وراك لغاية لما اعرف........فقر واعترف دلوقتي احسنلك ........ علي وقد ظهرت علي شفتيه شبح ابتسامه : انت مفيش فايده فيك ......... اشرف : يالا بقي يا علوة ............رسيني علي الموضوع وانا هحلهولك علي بأسف: خلاص .......هو مكلكع ومش هيتحل........ اشرف: بس احكي بس ....... وبالفعل بدأ علي في سرد ماحدث معه اليوم .......وما ان انتهي......... اشرف بغيظ: تصدق انت بتستهبل علي بعصبية : ماتلم لسانك يا اشرف......... ايه بستهبل دي ؟؟ اشرف بهدوء: اسف يا علي ........بس بصراحة انت اللي جبته لنفسك....... علي بتهكم: والله؟؟.......ازاي بقي ان شاء الله -يا علي فيه حاجات ماينفعش معاها العصبية.........وخصوصا اكل العيش ........في ظروف البلد المنيلة دي .......شغلانتك كانت لقطة ..........وانت سبتها علشان ترضي غرورك ...... - ولو يا اشرف......... انا ماستحملش الاهانة وانت عارف كده .........كرامتي اهم حاجة عندي ........ولو علي رقابتي -يا سلام..........يا شيخ كفاية فلسفة.......كرامة ايه يا ابو كرامة ..........لما تكون الكرامة قصاد اكل عيشك ........يبقي تتحرق في داهية الكرامة علي وقد تحول هدوءه الي عصبيه: لا يا استاذ..........ده يمشي مع اي حد ....... الا انا .........انا ماطاطيش راسي لأي حد ........وخصوصا ادام بنت اهلها ماعرفوش يربوها ....... اشرف وهو يحاول تهدئة علي: اهدا يا علي وصلي علي النبي .......... -عليه الصلاة والسلام -انت مش هتصلح الكون يا علي ..........وزي ما بيقولوا الرزق بيحب الخفية...........تقدر تقولي بقي هتلاقي شغل فين دلوقتي .......وبنفس المرتب اللي كنت بتاخده؟؟ علي بشرود: ان شاء الله هلاقي ........وبمرتب احسن كمان.......انا خريج هندسة سيارات ......... اشرف بتهكم: سلامات يا هندسة....... علي بعصبية: بقولك ايه يا اشرف........لو هتفضل تتريأ كده .......يبقي احسنلي ادخل انام ......عن اذنك ...... وقام علي واتجه الي غرفته واغلق الباب وراءه .....بدون تبادل كلمة اضافية مع اشرف ...........اما اشرف فقد شعر بدوره انه قد قسا علي علي بشكل كبير ......... فقرر ان يصالحه ........ولكن بعد ان يهدأ قليلا ............. ************ في المساء دخلت سوسن غرفة ابنتها بهدوء..........لتجدها مازالت مستغرقة في نوم عميق اقتربت منها وهمست في هدوء: شمس .........حبيبتي ........يالا قومي يا جميل شمس وقد فتحت عينيها بتثاقل : مامي ؟؟.........الساعة كام؟؟ -الساعة 7 يا حبيبتي........... يالا قومي علشان تجهزي للحفلة....... شمس وقد همت بالجلوس: ايه الحنيه دي ؟؟...........اللي يشوفك دلوقتي مايشوفكيش وانتي بتزعقيلي اول ما جيت سوسن وهي تتحسس شعر ابنتها: غصب عني يا شمس........انا خايفة عليكي......مش هتحسي بشعوري الا لما تتجوزي وتجيبي عيال .........ساعتها هتعرفي يعني ايه خوف الام علي بنتها شمس بهدوء: يا مامي ماهو بابي بيحبني وبيخاف عليا ........بس حنين ومش بيزعق كتير -انا عارفة يا شمس ان باباكي طيب ..........بس اسلوبه في التربية فيه غلطات كتير ......علمك الغرور والتعجرف ........ الغرور وحش يابنتي ........وحش اوي..........المغرور ده بيبقي مكروه من الناس كلها ..........حتي لو كان الظاهر انهم بيحترموه ..............تقدري تقوليلي انتي مين اصحابك المقربين اللي فعلا بتحسي انهم بيحبوكي وبيخافوا عليكي ؟؟ شمس بملل: مامي .........علشان خاطري بلاش محاضرات دلوقتي اطرقت سوسن برأسها وهي تقول بيأس: عندك حق .....فعلا مفيش فيكي فايده........بس بكرة مسيرك تعرفي شمس : ايوة يا ماما..........سيبي بكرة يعلمني وخلينا في الحفلة اللي انا مغصوبة علي حضورها دي سوسن بأسف وهي تهم بالنهوض: مفيش فايده فيكي .........يالا اتفضلي اجهزي خرجت سوسن من غرفة ابنتها وهي تشعر بالالم والحسرة وكل ما تطلبه هو ان يحفظ الله ابنتها وينصرها علي نفسها ............. تجهزت شمس للحفل ..............كانت ايه في الجمال .........كانت ترتدي فستان طويل نبيتي اللون وقد ثبت عليه شريط ذهبي احاط بمنطقة الخصر .....عاري الكتفين ......وقد ارسلت شعرها الطويل المموج الي جانب واحد ليغطي احدي الكتفين دون الاخر ......وثبتت عليه ورده كبيرة لامعة من النبيتي الممزوج باللون الذهبي .........وامسكت حقيبة صغيرة ذهبية اللون مع حذاء ذو كعب عالي رفيع ذهبي اللون.............. وما ان وصلت مع والدها ووالدتها الي منزل عبير.............دق صدقي الجرس...... عبير وهي تفتح الباب : اهلا اهلا يا سوسن..........وحشتيني (وانهالت بالقبلات علي وجه سوسن والتي بدت مستسلمة لها تماما وكأنها قد اعتادت علي هذا الترحيب في كل مرة تراها سوسن فيها) اما شمس فقد كانت تشعر بالاشمئزاز لما تراه .........و....... -بت يا شمس...........ايه الجمال ده؟؟..........والله وكبرتي واحلويتي(وانهالت ايضا عليها بالقبلات مما ازعج شمس كثيرا) سوسن: صلي علي النبي يا عبير ..........مابنتي حلوة من يوم ما اتولدت -لاااااااااااااااااا بس المرة دي حلاوتها زياده شمس ببرود : ازيك يا طنط عبير وهي تربت علي كتفها : ازيك انتي يا حبيبتي .........اخبارك ايه شمس بنفس البرود: الحمد لله.......... عبير وهي تلتفت الي صدقي: ازيك يا استاذ صدقي.........عاش من شافك -معلش يا مدام عبير.......اهي مشاغل عبير: يالا مش مشكلة.........اهم حاجة انكو نورتوني في الحفلة دي ........يالا تعالوا تعالوا اعرفكوا علي باقي الناس............ ودخل الجميع ..........ومع دخولهم بدأ التعارف ..........وكثرت التعليقات حول شمس وجمالها............كان الجميع يشعر بالسعاده ............. الا شمس.........فبالرغم من كلمات الاعجاب والتي تنهال عليها من كل جانب........الا انها لاتسعد بها........او لنقل انها اعتادتها وملتها ............... عبير : عن اذنكوا يا جماعة ........ثواني وجيالكوا سوسن : اتفضلي ........... ااتجهت عبير الي ركن من اركان المنزل ........و -انت يا سي حسام...........مش تركز معانا كده وسيبك من الموبايل اللي في ايدك ده؟؟ التفت لها حسام .........واذا به شاب طويل القامة ........نحيل ......بني الشعر .....وسيم الملامح ..... حسام متوترا: ثواني يا جميل ..........خليك معايا ثم وضع يده فوق سماعه الهاتف وهو يقول: فيه ايه يا عبير؟؟ عبير بغيظ: انت اللي فيه ايه؟؟...........شمس وصلت من ساعة وانت مش راضي تتعتع من مكانك ........وماسكلي الموبايل حسام وهو يضع الهاتف فوق اذنه: هكلمك كمان شوية ............واغلق الهاتف وهو يقول : شمس مين؟؟ عبير بغيظ: نعم ياخويا ؟؟............شمس مين؟؟ حسام وكأنه تذكر للتو شيئا: اها .........شمس ..........هي فين دي؟؟ عبير : والله ؟؟............حمدلله علي السلامة ..........اهي يا سيدي (قالتها وهي تشير الي شمس ) حسام مبتسما ابتسامة واسعة: اوباااااااااااااااااااا.... ........دي حلوة اوي عبير مؤكده: اه ........وغنية اوي........يالا بقي شوف هتظبطها ازاي حسام : عيب يا بيرو ..........ده انا حس .........وحياتك عندي لا ادوخها عبير وهي تجذب يده : لا ياخويا........مش عايزاك تدوخها............كفاية تخليها تحبك بس..........خلينا نستفاد شوية من ابوها ........... حسام : طب بس بقي ......علشان مايخدوش بالهم ............. اقتربت عبير وهي ممسكة بيد حسام وهي تقول: اعرفكوا يا جماعة ..........ده حسام اخويا ...... سوسن بسرعة: اللي كان في امريكا؟؟.......... عبير : اييييييييييوة هو ده.........ثم التفتت الي حسام وهي تقول: واعرفك يا حسام.....دي سوسن اتعرفت عليها عند الكوافير ......وده جوزها صدقي باشا علوان.........ودي بقي ...... قاطعها حسام : شمس..........غنية عن التعريف (ثم صافحها وطبع علي يدها قبلة رقيقة ) ابتسمت شمس ابتسامة هادئة وسحبت يدها بسرعة من بين يده وهي تقول: تشرفنا يا استاذ حسام .................... حسام بشئ من (السهوجة ): ده انا اللي ازدت شرف يتبع.......... | ||||||||
|
| |
|
20-07-16, 09:27 AM
| #8 | ||||||||
| مراقبة عامة ومشرفة منتدى الروايات المنقولة
| استيقظ علي مبكرا .........ارتدي ملابسه الانيقه......او لنقل انه الطقم الانيق الوحيد لديه ...والذي يستخدمه دائما في مقابلات العمل ........وما ان خرج للصالة .........حتي وجد اشرف وقد جلس لتناول فطوره اشرف مرحبا: اهلا اهلا يا علي بيه............ايه يا اخواتي الالاجة دي .........وانت رايح بقي علي فين ان شاء الله بالشياكة دي.......؟؟ نظر علي الي اشرف باستياء........كان مازال يشعر بالغضب مما قاله اشرف بالامس........ولكنه حاول ان يتمالك اعصابه .......فأشرف مازال صديقه العزيز ........ علي بهدوء: رايح اشوفلي اي شغلانة اشرف: اه ماهو شكلك كده..........انا عارف البدلة دي ...دي خلاص بقت تخصص مقابلات .........بس هتلاقي شغلانة ازاي؟؟.....هتمشي تقول لله يا محسنين.......محدش عنده شغلانة زياده ؟؟....... علي وهو يقترب من باب الشقة ويلتقط حذائه: والنبي مانا حمل هزارك يا اشرف...........ممكن تتنيل وتسكت اشرف وقد امتلأ فمه بالطعام: يابني طب تعالي كلك لقمة .........هتنزل كده علي معده فاضية؟؟ علي بضيق: يابني ماتبلع الاكل اللي بقك الاول .........ده ايه القرف ده؟؟............هو انا لسه هعلمك؟؟ اشرف بضحكة كبيرة: يا حبيبي يا علوة..........ربنا مايحرمني من حنيتك عليا.....ده انت زي امي اللي خلفتني ومانسيتنيش..... لم يرد علي علي تعليقه وانما ارتدي حذائه وهم بالخروج من باب الشقة.......و -علي التفت علي الي اشرف والذي ترك طعامه وقام اليه....... علي بملل: فيه ايه تاني؟؟ اشرف بأسف : انا اسف يا علي لو كنت ضايقتك بكلامي امبارح......بس انا كان قاصدي افوقك.......الدنيا ياما بيحصل فيها........ولو الواحد قعد يدقق علي كل صغيرة وكبيرة ماكنش حد استمر في شغلانة ولا حد عرف ياكل عيش في البلد دي.......... ربت علي علي كتف صديقه وهو يقول: انا مقدرش ازعل منك يا اشرف........ده انت يابني اللي بقيلي في الدنيا........تقدر تقوللي ليا مين غيرك في الدنيا دي؟؟.........ولا حد ..... ( وهنا تقطرت عبرة من عين علي ........وما ان رأه اشرف هكذا حتي ضمه اليه) وهو يقول: ولا انا ليا غيرك يا علي...........انت خلاص يابني بقيت قسمتي ونصيبي ........متدبس فيك بقي اعمل ايه ابتسم علي وازاح صديقه عنه وهو يقول : بقي كده ؟؟......طب مفيش غدا النهارده ........ابقي اطبخ لنفسك بقي يا حلو اشرف مترجيا: لا علشان خاطري يا علي ......ده انا صاحبك حبيبك ....... علي وهو يفتح الباب ويهم بالمغادرة : عموما ........لو ربنا وفقني ولقيتلي شغلانة ..........ليك عندي عزومة علي الغدا بره....... هم اشرف بقول شئ ولكنه تراجع عندما وجد سنية وقد ظهرت علي عتبة المنزل..........في كامل زينتها......او لنقل في كامل بهرجتها.......بدءا بجلابيه (اه ونص) والمنديل ابو ترتر........مرورا بالمكياج والذي (دهنت )به وجهها .......وانتهاءا بالخلخال ابو جرس والذي التف حول كاحلها ....... سنية بابتسامة واسعة : سالخير يا سي الاستاذ علي...........علي فين كده بالشياكة دي؟؟ تبادل علي نظرة مذعورة مع اشرف وهو يقول: ابدا يا سنية.........انا رايح الشغل سنية وهي( تدب) بيدها علي كتفه وتلوك اللبانة باسلوب مستفز: بقي شغل برضه ياسي علي؟؟..........ولا مقابلة شغل؟؟ علي بشئ من العصبية : 100 مرة قلتلك مابحبش اسلوب الخبط ده ..... .....وبعدين هو انتي كنتي بتتصنتي علينا ولا ايه ؟؟ سنية : لا والله يا استاذ علي ..........انا كنت جاية اخد الصينيه بتاعه امبارح........وبالصدفة سمعتك بتتكلم.......اصل بصراحة كان صوتك عالي اوي .......وبعدين ان كان علي الخبطة تتقطع ايدي والله قبل ما توسخلك بدلتك ........بس والله ايدي نضيفة وحاطة عليها كالونيا .......حتي شم (قالتها وهي تمد يدها الي انف علي ليستنشق عبير الكلونيا المختلط برائحة (تنضيف سمك)) علي وهو يزيح يدها باشمئزاز: ايه القرف ده؟؟....ابعدي كده سنية وهي تشم يدها : والنعمة نضيفة ........دي ريحة السمك مش باينة خالص.......او باينة شوية.........يوه يقطعني..........انا اسفة يا سي علي نظر لها علي باحتقار وهو يقول : ولا يهمك ..............عن اذنك بقي علشان مستعجل (وازاح سنية من طريقه وهم بالنزول) اما سنية فقد انهالت عليه بالدعوات: يارب تصيب ماتخيب ابدا يا سي علي.........يارب يوقفلك ولاد الحلال.......الهي ما تخزيه ابدا ......وانصره علي مين يعاديه ثم التفتت الي اشرف والذي كان واقفا يراقب هذا المشهد والذي رأه من قبل مئات المرات (اما في الافلام الابيض والاسود .......واما عن طريق سنيه............كان يشعر ان سنيه بمثابه شاشة افلام متحركة (تشكر برضه بتجيبله السينما لغاية البيت ) سنية بقرف: يالا يا سي اشرف ..........ناولني الصينيه .......عايزة اطلع ااكل الطيور اشرف: ياخبر اسود ..........هو انتي بتأكلينا في الصينيه اللي بتطلعيها للطيور سنية بحده: ومالها الطيور ياسي اشرف.......ولا هي حلوة في الاكل ووحشة في عكس ذلك اشرف مشيرا الي سنيه باصبعه: حلوة في عكس ذلك دي .......جبتيها منين؟؟ سنيه وهي تلوح بيدها : مالكش صالح.......يالا ادخل هاتلي الصينيه....... اشرف بسرعة: حاضر..........وما هي الا لحظات حتي خرج اليها يحمل الصينيه وقد رصت عليها الاواني فارغة تفحصتها سنية جيدا ثم قالت : اه ......طبقين مسطحين .....و ..........معلقة غريف .............وطبق..........اه ..........تمام كده اشرف باستياء : ياستي يعني احنا هناكلهم عليكي؟؟ سنية بعصبية وهي تتناول الصينيه : يوه.........عايزة اتأكد..........حرام يعني.......ولا يكونش حرام؟؟ اشرف: لا حرام..........قصدي .....حقك ياستي سنية وقد تهللت اساريرها فجأة : والاكل كان حلو؟؟ اشرف شاردا: متهيألي ......كلوا منه كتير اوي.......شكله عجبهم سنية : ليه هو كان فيه حد معاكو ؟؟ اشرف وقد تنبه للتو ان سنيه لا تعرف بموضوع القطط فابتسم قائلا :...... لا يا سنيه انتي بتغلطيني ليه......قصدي انا وعلي كلنا منه كتير سنيه بشئ من الحده: يعني المهم سي علي عجبه الاكل ؟؟ اشرف بحماس: اه طبعا طبعا.........ده حتي عجبته الملوخية اوي وقاللي انه عايز يعرف منك الطريقة ....... سنية مبهوتة: بس انا ماطلعتش ملوخية امبارح .........انا كنت عاملالكو بامية اشرف متوترا: اه اه .......بامية.......عجبته اوي....... سنيه بخجل: يالا مطرح ما يسري يمري ....... اشرف وهو يتفحصها جيدا: طبعا المقصود من الابتسامة دي علي ......مش انا ......صح؟؟ سنيه بعصبية وهي تهم بالنزول: وانت مالك انت ؟؟........يالا سلام ياخويا .......وابقي دورلك علي شغل ....بدل مانت قاعد في البيت زي قرد قاطع كده........ اشرف : ابقي ادعيلي يا سنيه........انا عارفك تقية ودعاءك مستجاب سنية وهي تلوح بيدها: ياخويا روح........... اغلق اشرف الباب وهو يقول: البت سنية دي طالعة من عيني.....بس لسانها بس يتقص شبر كده وهتبقي اخر حلاوة ........................وذهب اشرف لاستكمال ما تبقي من افطاره ************************************* علي مائده الطعام جلست سوسن مع صدقي لتناول طعام الافطار....... سوسن بعد فترة صمت طويلة : قوللي يا صدقي صدقي : مممممممم......... سوسن بتوتر: ايه رأيك في حسام؟؟ صدقي: حسام مين؟؟ سوسن بحده: ركز شوية يا صدقي.........حسام اخو عبير صدقي بلا مبالاة : ماله؟؟ سوسن : انا حسيت كده انه معجب بشمس صدقي: وايه الجديد؟؟.............ما كل اللي بيشوف شمس بيعجب بيها سوسن : مش قاصدي يا صدقي....انا قصدي اني حسيت ان اعجابه من نوع مختلف صدقي: ازاي يعني؟؟.......مش فاهم سوسن: يوه يا صدقي........ماتمثلش عليا ...........انت عارف انا قاصدي ايه صدقي وقد ترك مابيده من طعام وتحول اهتمامه لسوسن: اسمعي يا سوسن.......انا عارف انتي تقصدي ايه........وزي ماقلتلك ناس كتير قبل حسام اعجبوا بشمس.........بس مش معني كده اننا هنجوزها لكل اللي اعجبوا بيها............صح ولا ايه؟؟ سوسن: صح .........بس انا يهمني اعرف رأيك فيه ايه.........علشان لو عبير فاتحتني في اي حاجة اكون علي علم برأيك....... صدقي وهو مستغرق في التفكير: والله انا مش شايف فيه عيب معين.........شكله شاب كويس......وشكلهم ناس طيبين........بس انتي مش شايفة ان مستواهم ااقل مننا؟؟ سوسن بضجر: ايه اقل مننا دي؟؟........هما يعني علشان مش عايشين في قصر زينا يبقوا اقل مننا؟؟...........لعلمك هما مستواهم المادي حلو اوي.........ومرتاحين جدا........وعندهم اراضي واطيان في بلدهم..........وانت بنفسك شفت بيتهم واسع وفخم قد ايه......... صدقي:سوسن انتي عارفاني .......الماديات مش بتفرق معايا كتير ........احنا كنا اقل منهم كتير والحمد لله ربنا كرمنا..........بس انا بتكلم عن شمس........شمس اتولدت وفي بقها معلقة دهب......وماعتقدش هتوافق انها تسكن في اقل من قصر زي القصر اللي اتربت وعاشت فيه ........... سوسن: عموما حسام ده بيبني فيلا في مصر الجديده ........عبير قالتلي كده.........يعني ماتشيلش في دماغك موضوع الماديات........انا لما سألتك عن رايك كان قاصدي رايك في الشخص نفسه صدقي وهو يقوم من فوق المقعد ويلتقط الجاكت: خلينا مانسبقش الاحداث.........الناس لسه ماتكلموش معانا في حاجة........ومش هنفضل نرسم تخيلات في الهوا ...............عموما تبقي تجسي نبض بنتك من ناحية الموضوع ده.........واللي بنتي عايزاه هيكون..........الا صحيح هي فين ؟؟مانزلتش تفطر ليه؟؟ سوسن: نايمة فوق.........قالتلي مش هتروح الجامعة النهارده...........والله بنتك مش عاجباني من امبارح يا صدقي........شكل فيه حاجة شغلاها........هموت واعرف ايه هي ..........بس هي مش راضية تقوللي صدقي وهو يرتدي الجاكت: يا ستي .........هي مرحلة المراهقة دي فيها تغيرات كتيرة.......تلاقيها في حالة حب ولا حاجة ...........ومين عارف يمكن يكون حسام........... ابتسمت سوسن ولم تعلق .......اما صدقي فقد ربت علي كتفها وهو يقول: ماتخافيش علي شمس .........ان شاء الله رزقها هيجي لغاية عندها ........يالا مع السلامة تمتمت سوسن بخفوت: مع السلامة........ خرج صدقي من منزله وهو مازال يفكر في مستقبل ابنته.......وكلمات سوسن مازالت تتردد بداخل عقله................ولكن ليس هذا وقت التفكير.....انه وقت العمل .......... يتبع......... | ||||||||
|
| |
|
20-07-16, 09:28 AM
| #9 | ||||||||
| مراقبة عامة ومشرفة منتدى الروايات المنقولة
| استيقظت شمس من نوم متقطع ...............وما ان استيقظت حتي نزلت الي الاسفل لتري والدتها وقد جلست تتصفح بعض الجرائد............. شمس بصوت عالي وهي تتجه نحو والدتها: صباح الخير يا مامي...... اجفلت سوسن فقالت بفزع: يابت خضتيني .........صباح النور شمس وهي تدير رأسها في ارجاء المنزل: هو بابا مشي؟؟ سوسن وهي مازالت تنظر الي الصحيفة: اه مشي ....... وهنا جاءت فتحية تحمل كوب من القهوة الساخنة لتضعه امام سوسن..... سوسن : شكرا يا فتحيه...... شمس: اعمليلي كوباية قهوة انا كمان يافتحيه ...بس عايزاها ساده اومأت فتحية برأسها وهي تقول : حاضر يا ست شمس...... جلست شمس علي مقعد الانتريه الوثير ..........وهي تقول: شايفاكي مهتمة اوي بالجرايد يا مامي........ايه فيه حاجة جديده؟؟ سوسن وهي تطوي الجريده: ابدا........اخبار النهارده زي اخبار كل يوم......مفيش جديد اومأت شمس برأسها ......اما سوسن فتابعت: شمس .......انا عايزة اسألك سؤال....... شمس بترجي: بس والنبي يا مامي مايبقاش ليه علاقة بالمحاضرات اياها.........علشان انا حاسة اني دماغي هتتفرتك......... سوسن بابتسامة صفراء: لا يا شمس..........ماتقلقيش الموضوع مالوش علاقة بأي محاضرات......انا بس كنت عايزة اسألك عن رأيك في حسام اخو طنطك عبير شمس بلا مبالاة: من ناحية ايه يعني؟؟ سوسن : من كل النواحي يا شمس.........يعني شكله .......طريقة كلامه......شخصيته؟؟ شمس بخبث: فيه ايه يا مامي بالظبط؟؟......قوليلي بتسألي ليه وانا اجاوبك سوسن بنفس الخبث: بت يا شمس.....ماتقعديش تلفي وتدوري........انتي وقفتي مع حسام امبارح طول الحفلة........ماحستيش في كلامه بأي تلميحات كده ولا كده؟؟ شمس بابتسامه ماكرة: اكيد كان فيه تلميحات ........بس ده يفرق في ايه؟؟........انا مش حاسة بأي حاجة ناحيته........يعني حاسااه عادي اوي........ سوسن : خالص خالص........؟؟ شمس: يا مامي انا لسه صغيرة......ولسه بدري اوي علي ما افكر في حاجة زي كده.......يعني ماتحطيش في دماغك اي حاجة ليها علاقة بالعرسان والجواز والحاجات دي........الا بعد ما اخلص دراسة سوسن : طيب يا ست العاقلة........بس يارب تفلحي في دراستك شمس محاولة اغلاق اي باب للمناقشة في الدراسة : ان شاء الله....... وهنا جاءت فتحية تحمل كوب القهوة لتضعه علي المائده و............. شمس بعصبية: ايه اللي انتي هببتيه ده؟؟ فتحية بلهجة اقرب الي البكاء : انا اسفة خالص يا ست شمس........والله وقع غصب عني سوسن : مالك يا فتحية ....انا حاسة انك مش مركزة خالص الايام دي.......هو لسه الصداع بتاع كل فترة ده بيجيلك ولا ايه؟؟ فتحية باسف وهي تطأطأ برأسها: اه يا ستي......كل شوية احس ان الدنيا بتدور بيا كده ....ومابعرفش اتلم علي نفسي سوسن بهدوء: طب ماتروحي تكشفي يا فتحيه...... فتحية : لا يا ستي انا هبقي كويسة شمس بضيق: ياستي ماتروحي تكشفي بدل ماتفضلي تكسريلنا وتوقعيلنا في الحاجة رمت سوسن شمس بنظرة نارية تحمل معني(عيب كده ) اشاحت شمس بيدها وقامت من فوق مقعدها واتجهت الي غرفتها....... سوسن بهدوء: لازم تروحي تكشفي يا فتحية........وانا هديلك اجازة علشان ترتاحي شوية......انتي بقالك كتير ماخديش اجازات فتحية : ازاي اجازة بس ياستي .......؟؟ومين هيشوف طلبات البيت؟؟ سوسن وكأنها تذكرت شيئا للتو: انتي مش كان ليكي اخت؟؟........ فتحيه بتوتر: اختي مين ؟؟..........سنية؟؟ سوسن : ايوة سنية.........زمانها كبرت دلوقتي .....قوليلها تيجي تشتغل مكانك وانتي في فترة الاجازة فتحية بتردد: بس ياستي سنية مش بتاعة شغل خالص.........وانا عارفة انها مش هتريحك سوسن: قوليلها بس وخليها تيجي تقابلني بكرة......... فتحية : تحت امرك ياستي .........زي ماتحبي سوسن: يالا بقي انتي يا فتحية روحي دلوقتي ...........وماتنسيش تبعتيلي سنية بكرة فتحية: ربنا يخليكي ويعمر بيتك يا ست هانم....... وانصرفت فتحية لتجمع اغراضها وتهم بمغادرة القصر........ ***************** دق الباب في منزل علي........... اشرف بصوت عالي: ايوة جاي ........جاي فتح اشرف الباب و............: ايه يابني ..........كل ده خبط؟؟ لم يجب علي وانما ازاح اشرف من امامه ودخل الي الشقة.........اما اشرف فقد ظل يراقبه منذ لحظة دخوله وحتي لحظة جلوسه علي احد مقاعد الانتريه المهترئة........ تنحنح اشرف ثم قال بتردد: طيب انا شكلي كده هنزل اجيب سندويتشات فول وطعمية ..........لأن علي ما اعتقد مفيش غدا بره النهارده ........... لم يجب علي وانما اعاد رأسه الي الوراء لتستقر علي ظهر المقعد ........ اقترب منه اشرف وهو يقول: فيه ايه يا علي؟؟............انت تعبان؟؟ نظر علي اليه بهدوء وهو يقول: هو فيه حاجة في البلد دي تريح؟؟.........خلاص......العيشة كلها بقت تعب في تعب اشرف: ايه اليأس ده ياعلي........؟؟.........كل ده علشان مالقيتش شغلانة؟؟ علي بحسرة: المشكلة يا اشرف اني لما دخلت هندسة ميكانيكا قسم سيارات دخلته علشان عرفت انه قسم ليه تقله.......وان اي شركة بتشتغل في مجال العربيات تتمني واحد متخرج من القسم ده.......بس اللي لقيته غير كده خالص.......للدرجة دي بقت بلدنا مش بتقدر العلم ولا الشهاده اللي حفيت علشان اوصلها؟؟....... ربت اشرف علي كتفه وهو يقول: ماهي دي بلدنا يا علي.......انا وانت عارفين ده كويس......ايه الجديد يعني؟؟ علي بأسف: علي رأيك ايه الجديد؟؟.............يالا .......ربنا يجازي اللي كان السبب هم اشرف بمعاتبته علي تركه لوظيفته ......ولكنه تراجع خوفا من ان يجرح مشاعر صديقه فأكتفي بقول: ان شاء الله خير.........وربنا هيعوضك بشغلانة احسن من اللي كنت فيها وبمرتب اعلي كمان اومأ علي برأسه وهو يقول: امين .............انا داخل ارتاح بقي علشان انا من صباحية ربنا بلف علي كعب رجلي ...... اشرف: طب مش تاكل حاجة الاول؟؟ علي وقد نهض واتجه الي غرفته : ماليش نفس....... دخل علي غرفته واغلق الباب .........ليلقي بجسده علي الفراش ...........ويستعد لفترة طويلة من الراحة....... ************* في الصباح الباكر ..........استيقظت شمس واستعدت للذهاب الي كليتها ......... شمس وهي تركض علي الدرج: صباح الخير يا مامي.........امال فين بابا؟؟ سوسن بعد ان ارتشفت رشفة قصيرة من كوب القهوة: صباح النور .........بابا راح الشغل .........مانتي صاحيالي متأخر شمس : اه صح........بس ده يامامي مالوش علاقة بالاهمال او التأخير.........انا محاضرتي الساعة 10 ودلوقتي الساعة 9 ونص.....يعني هلحق....... سوسن: طب قوللي ان شاء الله .........لا العربية تخسع منك تاني وتوصلي متأخرة شمس بتوتر: اه يامامي ........واضح ان اللي صلحها المرة اللي فاتت ماصلحهاش بضمير .......هبقي اعديها علي الميكانيكي النهارده سوسن : ماشي.........وخدي بالك وانتي سايقه شمس وهي تتجه الي باب القصر: ان شاء الله فتحت شمس الباب و................. شمس بتعجب وهي تتفحص تلك الواقفة والتي ارتدت (جلابية سوداء ووضعت علي رأسها طرحة سوداء يظهر من تحتها المنديل اياه ( ابو ترتر)): انتي مين؟ سنية وقد فزعت عندما فتح باب القصر فجأة: انا .........انا سنية ياستي....الشغالة الجديده شمس وهي تنظر اليها(بقرف) من رأسها حتي اخمص قدميها : اها .........اخت فتحية؟؟ اتسعت ابتسامة سنية فقالت : اييييييييييوة .....عليكي نور ياست............ست مين؟؟........شمس صح؟؟ سوسن بصوت عالي: مين ياشمس؟؟ التفتت شمس وهي تقول: دي الشغالة الجديده يا مامي سوسن : طب ماتدخليها ......انتي واقفة تحققي معاها؟؟ شمس وهي تنظر الي فتحية باشمئزاز : ادخلي........ اتسعت ابتسامة فتحية وهي تقول : علي فكرة........انتي حلوة اوي يا ست شمس شمس بنفس نظرة الاشمئزاز : ميرسي........ ثم ازاحتها من طريقها ومضت تاركة وراءها سنية والتي وقفت تتمتم: ده ايه ياختي الانعرة دي.......هي يعني علشان بيضا وعنيها بنفسجي هتتألط علي خلق الله........؟؟.........اما عجايب سوسن بصوت عالي: ادخلي يا سنية سنية بسرعة وقد همت بالدخول: حاضر يا ستي ............. دخلت سنية واغلقت الباب وراءها ..........وما ان دخلت الي القصر حتي فتحت فمها في بلاهة .......كانت لا تصدق ماتراه..........لا تصدق ان هناك من ينعم بهذه الحياة المترفة........كانت تظن ان ماتراه في الافلام والمسلسلات مجرد (ضحك علي الدقون).......لم يخرجها من وسط حالة انبهارها الا صوت سوسن سوسن: تعالي يا سنية اقتربت سنية من سوسن وهي مازالت تتفحص كل ركن من اركان القصر........وما ان وقفت امام سوسن سنية: صباح الخير ياست هانم سوسن بابتسامة هادئة: صباح النور........طبعا يا سنية انتي عارفة انتي جاية هنا ليه اومأت سنية برأسها وهي تقول: عارفة ياستي.......احل محل فتحية لغاية لما تخف سوسن: واظن فتحية فهمتك القوانين .........يعني تشتغلي في البيت ازاي......وايه اللي مطلوب منك ......وايه اللي مالكيش دعوة بيه سنية بغباء: لا ماعرفش سوسن: طيب.....باختصار يا سنية.......انتي مطلوب منك تنضيف البيت اليومي......يعني تلميع ترويق ....وكنس ومسح.......الطبيخ مالكيش دعوة بيه......عبده هو اللي بيطبخ....بس يعني ممكن نطلب منك حاجة خفيفة......يعني شاي او قهوة .....كده يعني......وطبعا احنا مابنحبش انك تتجسسي علي اي حد في البيت.....ولا تنقلي كلام.....ولا ليكي علاقة بالمشاكل الشخصية.......كل اللي مطلوب منك تنضيف البيت وبس سنية بخضوع: تحت امرك يا ستي........ سوسن: يالا بقي ...........ابتدي الشغل........فيه دور غسيل عايزاكي تغسليه............اه نسيت اقولك الغسيل والمكواة برضه عليكي سنية وقد بدأت تشعر بثقل المهمة : من عنيا ستي.......... سوسن : يالا اتفضلي..........اوضتك اللي جنب المطبخ دي(قالتها وهي تشير الي غرفة سنية ) اتجهت سنية الي غرفتها........لتستعد ليوم عمل طويل ..........وشاق يتبع.......... | ||||||||
|
| |
|
20-07-16, 09:30 AM
| #10 | ||||||||
| مراقبة عامة ومشرفة منتدى الروايات المنقولة
| عاد صدقي الي منزله متجهما .............وما ان دخل وهم بالصعود الي غرفته .........حتي نادته سوسن>>>>>>> سوسن: صدقي.........مالك كده داخل لا سلام ولا كلام .........وبعدين ايه اللي جابك بدري النهارده ؟؟ نظر صدقي الي سوسن والتي جلست جلستها المعهودة علي مقعد الانتريه الوثير............. صدقي بتوتر: مفيش يا سوسن........اصلي تعبان شوية قامت سوسن من فوق مقعدها واتجهت الي صدقي وهي تقول: تعبان؟؟.........خير يا حبيبي الف سلامة عليك .........تعالي اقعد (قالتها وهي تمسك بيد صدقي وتصطحبه للجلوس)......وبعد جلوسهما ........ سوسن: مالك بقي يا صدقي؟؟........فيه حاجة مضايقاك في الشغل؟؟ نظر لها صدقي وهو يقول: اه يا سوسن.......هم كبير واتحط علي دماغي سوسن بقلق: فيه ايه يا صدقي؟؟.........قلقتني....... صدقي بشئ من الحده: العمال ياستي... سوسن : مالهم؟؟ -عاملين اضطراب عن العمل ...........وقال ايه عايزين زياده في المرتبات سوسن: نعم؟؟..........تاني؟؟...............د� � انت حتي لسه مزود مرتباتهم من شهر.......هو كل شهر ولا ايه؟؟ -ايوة..........والمشكلة بقي انهم كتار اوي..........هلاحق عليهم منين ولا منين؟؟ -لا لا اكيد فيه حد زن علي دماغهم .........او استحلي موضوع الاضراب ده .........وشايف انك انت مش هتقدر تستغني عنهم علشان خلاص بقوا كفاءة -ما ده اللي انا حاسه.........بس اطوله بس وساعتها ................ سوسن وهي تربت علي كتفه: هدي نفسك يا حبيبي..........وخلينا نتصرف بشكل عملي.........ونفكر ممكن نعمل ايه؟؟ صدقي بحيرة وهي يستند برأسه علي يده: مش عارف يا سوسن ...........مش عارف -طب هي مرتباتهم دلوقتي في حدود كام؟؟ صدقي بسرعة: بصي يا سوسن.......طبعا الاقسام بتختلف وكل قسم مرتباته بتختلف عن باقي الاقسام........وكل درجة جوه القسم برضه مرتبها بيختلف عن باقي الدرجات.. سوسن: مانا عارفة كل ده .......بس انا قصدي مدي مرتباتك يتراوح بين كام وكام صدقي.:يعني .......اصغر عامل عندي بياخد تقريبا 900 جنيه.......واكبر عامل بياخد حوالي 3000......ودي غالبا بتبقي فئة المهندسين اللي بيشرفوا علي عملية تركيب المحركات وصيانتها لو محتاجة صيانة.......يعني هما متخصصين في تجميع وتركيب الاجزاء الميكانيكية في العربية سوسن: طب ما مرتباتهم تعتبر كويسة اهي......... صدقي: ايوة كويسة .........وبصراحة انا حاسس انهم بيتدلعوا.......علشان كده انا بفكر استغني عنهم واجيب عمال جداد........ سوسن: لا ياصدقي.......ماتقطعش رزق حد........انت في الاول تهددهم انك ممكن تسرحهم.....ولو وافقوا علي مرتباتهم كان بها........اما بقي لو حبوا يمشوا فمع السلامة......وزي ماقلت شوف عمال غيرهم........ده غيرهم بيتمني يشتغل بمرتبات اقل من كده كمان اومأ صدقي برأسه وهو يقول: ربنا يسهل .........وهنا انتبه صدقي الي سنية والتي وقفت علي مسافة امتار منهم .......وبدأت في تلميع مقاعد السفرة.......... صدقي وهو يميل علي سوسن: مين دي؟؟ سوسن وهي تلتفت الي سنية: دي سنية اخت فتحية.........جاية تشتغل مكانها علشان فتحية تعبانة وانا اديتها اجازة تستريح صدقي وهو يربت علي ساق سوسن: طول عمرك حنينة يا سوسن.......انا طالع ارتاح شوية بقي ........حاكم العمال دول رفعولي ضغطي سوسن : الف سلامة عليك يا حبيبي..........يالا اطلع ارتاح صدقي وقد هم بالوقوف: عن اذنك.............(وصعد صدقي الي غرفته تاركا وراءه سوسن وسنية والتي كانت تتابع بالحرف الواحد حديث سوسن وصدقي ) ********* خرجت شمس من قاعة المحاضرات .........واتجهت الي كافيتريا الجامعة ..مع صديقاتها ......رانيا وميس رانيا: انا بصراحة مبسوطة اوي اني حضرت المحاضرات النهارده....... ميس : بصراحة...الواحد لما بيحضر المحاضرات بيحس انه ليه لازمة في الحياة ........ولا ايه يا شمس؟؟...............شمس؟؟ التفتت شمس وهي تقول: ايه ؟؟..........فيه ايه؟؟ رانيا: لا ده انتي شكلك مش معانا خالص شمس بتوتر: لا ابدا انا معاكو.......... ميس: مممممممم .........طب انا كنت بقول ايه؟؟ شمس بنفاد صبر : معلش يا ميس.......انا حاسة اني مش طبيعية الايام دي..........وممكن اكون فعلا مكنتش معاكو رانيا: تعرفي يا شمس انا نفسي في ايه؟؟ شمس: في ايه ؟؟ رانيا: نفسي اشوفك مرة تضحكي........انتي علطول حاسة بالهم........ومحسسانا بالهم معاكي.........هو انتي مش بتفرحي ابدا؟؟...........ليه مش بتضحكي زينا وزي باقي الناس؟؟ شعرت شمس ولاول مرة ان هناك من يفهمها ....بل وانه امسك بمنتهي السهولة بطرف خيط المشكلة والتي تعاني منها دائما شمس بعد تفكير عميق: تصدقي يا رانيا .....انتي احساسك صح.......انا فعلا مش بحس اني سعيده......... ميس: ليه يابنتي؟؟..........ده انتي عندك تقريبا كل حاجة.........ايه اللي ناقصك؟؟ شمس بأسي: يمكن علشان انا عندي كل حاجة؟؟...........يمكن لو اتحرمت من حاجة هحس بسعاده اكبر؟؟ رانيا: ماتقوليش كده يا شمس..........احمدي ربنا علي اللي عندك شمس: انا نفسي اضحك زي بقية الناس.........مش عارفة ليه علطول مش سعيده.......بالرغم ان كل اللي بيشوفوني بيقعدوا يقوللوا اشعار فيا .......وكلامي مسموع من كل الناس.......وبابايا من كبار رجال الاعمال في مصر رانيا بخبث: طب ودي حاجة وحشة؟؟ شمس: ايوة وحشة..........انا نفسي حد يقوللي لا ......... ميس بتهكم: يقولك لا؟؟...........طب ده انتي كنتي كلتيه بسنانك........ شمس وعلي شفتيها شبح ابتسامة: انا معاكي اني بتضايق اوي لما محدش يسمع كلامي........ده لو حد اتجرأ وعملها يعني ..........بس فيه شعور بالرضا داخلي كده.........بحس بيه لما احس ان فيه حد رافض كلامي او بيتحداني(كانت شمس تصف ما شعرت به وهي واقفة امام علي .........لا تدري ماكان بالضبط هذا الشعور؟؟........لقد كان شعورا بالضيق والانزعاج والالم .......مخلوطا ببعض الرضا.........انه شعور غريب بحق) رانيا وهي تلوح بيدها: لا لا لا ........انتي كده لخبطيني خالص.......انا مش فاهمة انتي عايزة تقولي ايه؟؟ شمس: انا عارفة انكوا مش هتفهموني.......بس عامة هو ده اللي انا حاساه.........ومعرفش حتي قولتلكوا الكلام ده ليه؟؟...............بس اديني قولته بقي ........علشان معنديش حد تاني اتكلم معاه........ده انا حتي مش بتكلم مع نفسي .........مش عارفة حاسة ان نفسي رافضة تتعرف عليا ميس وهي تتحسس جبهة شمس: شمس حبيبتي ........انتي سخنة ولا ايه؟؟..........ايه الكلام الغريب ده؟؟.......ماهو حاجة من الاتنين.....يا اما انتي بتقولي قصيده واحنا من غباءنا مش فاهمينها .........يا اما انتي محتاجة دكتور نفساني شمس وهي تزيح يد ميس بعصبية: قلتلك 100 مرة يا ميس اني بكره اسلوبك المستفز ده ميس : ايوة كده.........هي دي شمس اللي احنا عارفينها....دايما عصبية كده ودمها حامي........مش بقي دور الفتاة البائسة اللي كنتي بتمثليه علينا من شوية همت شمس بقول شئ ......... ولكن قاطعها صوت شخص ما: صباح الخير رفعت شمس عينها ...لتجد حسام واقفا وعلي شفتيه ابتسامة واسعة....... شمس بتعجب: حسام؟؟...............ايه اللي جابك هنا؟؟ حسام بابتسامة مستفزة وهو يميل علي شمس : تفتكري يعني ايه اللي جابني هنا ؟؟ ارتبكت شمس من طريقة اقتراب حسام منها ........اما رانيا فتبادلت نظرة تعجب مع ميس ثم قالت: مش تعرفينا يا شمس؟؟ تنحنحت شمس وهمت بقول شئ الا ان حسام قاطعها قائلا وهو ينظر الي رانيا: انا حسام.......صديق لعيلة شمس.......ثم التفت الي شمس قائلا: ممكن ياشمس تقبلي عزومتي علي الغدا؟؟ شمس بتوتروهي تهم بالنهوض : لا اسفة يا حسام ........انا لازم اروح دلوقتي .......ماما زمانها مستنياتي ........خليها مرة تانية ........ حسام بابتسامة خافتة: طب اوصلك بعربيتي........ شمس: لا شكرا ......... انا معايا العربية بتاعتي........عن اذنك...... تركت شمس صديقاتها مع حسام وذهبت الي مكان وقوف سيارتها.............. اما حسام فقد تبادل مع رانيا وميس نظرة خالية من اي معني ثم قال : عن اذنكوا.......... جلست شمس في سيارتها .....وكما اعتادت حاولت ان تدير محركها ........ولكن .......... -مش قلتلك تعالي اوصلك بعربيتي؟؟ شمس وهي تنظر الي حسام والذي كان يتبعها بدون ان تشعر: هي فيها مشكلة .......بس بتشتغل في الاخر حاولت شمس مرارا وتكرارا ادارة المحرك ولكن يبدو ان المحرك كان يعاند معها ليجبرها علي الذهاب مع حسام في سيارته حسام مبتسما وقد وقف وضم ذراعيه امام صدره: اظن كفاية مكابرة بقي .......لان عربيتك شكلها حالفة ماتتحرك....... نظرت له شمس بضيق ثم تمتمت: يعني حبكت تكسفيني كده في اليوم ده بالذات ؟؟............. لم تجد شمس حلا اخر سوي ان تخرج من سيارتها وتتجه مع حسام الي سيارته وهي تقول: المرة دي بس ....علشان انا مش متعودة اركب مواصلات حسام وهو يلتفت اليها: من عنيا يا جميل......ها........تحبي تتغدي فين بقي؟؟ وقفت شمس .........ليقف حسام بدوره وهو ينظر اليها قائلا: وقفتي ليه؟؟ شمس: انا اتفقت معاك انك تروحني وبس.......والغدا سبق واعتذرتلك عنه حسام وهو يمسك بيدها: خلاص ماتزعليش ..........تعالي هروحك جذبت شمس يدها من بين يدي حسام وهي تقول : طيب .......بس من فضلك خللي بيننا حدود تنحنح حسام باحراج وهو يقول: طيب........اتفضلي وبعد خمس دقائق كانت سيارة حسام تنطلق في طريقها الي قصر شمس...........وبداخلها.......... حسام وهو يلتفت الي شمس: انتي فيه حاجة مضايقاكي يا شمس؟؟ شمس بشرود: لا .........ليه؟؟ حسام: ابدا يعني بس حاسس كده زي ما اكون انا تقيل علي قلبك مثلا شعرت شمس وكأن حسام قد وصف بالضبط ما تشعر به تجاهه فتمتمت في توتر: ابدا..........ليه بتقول كده؟؟ حسام دون ان ينظر اليها: يعني.........ده مجرد احساس.......اصلك مش قابلة اني اعزمك علي الغدا ........ولا قابلة اني امسك ايدك........هو احنا مش اصحاب ولا ايه؟؟ شمس وهي تنظر الي زجاج السيارة: انا لسه ماعرفكش اوي يا حسام........يعني ماتلومنيش لو عاملتك بالشكل ده حسام بابتسامة واسعة: يعني افهم من كده انك لما تعرفيني اكتر ..........هتسمحي ان التكليف اللي بيننا يتشال؟؟ شمس وهي مازالت تتطلع من نافذه السيارة: ممم......بس يتشال في حدود المعقول ......... حسام: وساعتها توعديني انك تقبلي عزومتي علي الغدا؟؟ همت شمس بالرد علي حسام ولكن قاطعها مرور السيارة من امام ورشة منصور ..........ما ان رأت الورشة حتي خفق قلبها بشده.......وبالرغم من ان السيارة قد مرت امام الورشة سريعا الا انها قد استطاعت ان تمسح بعينيها المكان بأكمله بحثا عنه.........لم تستطع شمس ان تفسر ما سر بحث عينيها عنه ؟؟...........مع انها تعرف جيدا انه قد استقال ...وكان ذلك بسببها ........ومع انها ايضا تمقته بشده...........ولكن مهلا .......... طالما هي تمقته.......لماذا يخفق قلبها الان وتشعر كما لو كانت تريد ان تراه ؟؟..........لماذا تلوم نفسها لأنها كانت السبب في طرده.؟؟...........ما هذا الشعور الذي يجعل الكره الشديد يجتمع مع اللهفة للرؤية في قالب واحد؟؟..........هل يعقل ان يتمني الشخص رؤية غريمه؟؟.............هل يعقل هذا؟؟.......... -شمس .............شمس شمس بتوتر: ها .........بتقول حاجة يا حسام؟؟ -لااا......شكلك ماكنتيش معايا خالص...........ايه اللي شاغلك؟؟ شمس باقتضاب: مفيش -اها ........اقدر اعتبر ان سؤالي ده محظور في الوقت الحالي..صح؟؟ شمس بجدية: بص يا حسام.........سؤالك ده محظور في كل الاوقات.......لاني مابحبش حد يسألني عن اللي في دماغي...........انا لو قلت حاجة بمزاجي ماشي.......لكن حد يعرفها غصب عني.لا والف لا .......ولا دلوقتي ولا حتي بعدين.......مفهوم؟؟ حسام: حيلك حيلك..........خلاص يا شمس ماحصلش حاجة ........انا قلت بس اسأل علشان كان شكلك مش مركزة في كلامي.......لكن طبعا انتي ليكي حرية الرد او عدم الرد شمس بتهكم: شكرا يا سيدي....... لم يعلق حسام علي كلمتها ......وانما تابع القياده في صمت......وما ان وقفت السيارة امام القصر.......حتي فتحت شمس الباب سريعا وخرجت من السيارة بدون تبادل كلمة واحده مع حسام........... -شمس التفتت شمس الي حسام وهي تقول: نعم......... حسام متصنعا الاسف: انا اسف لو كنت ضايقتك النهارده..........بس انا ماكنتش اقصد حاجة شمس بابتسامة متصنعة: محصلش حاجة.......وشكرا علي التوصيلة حسام بمزاح: ده واجبي يا قمر....... لم تعلق شمس علي جملته السخيفة وانما ادارت له ظهرها واتجهت الي باب القصر تاركة وراءها حسام يتمتم : يا ساتر..........دي شكلها طالعة فيها اوي.........شكلي كده هتعب معاها..........ثم صمت لحظة تابع بعدها بابتسامة ساخرة : بس بصراحة .........هي تستاهل التعب (قال حسام جملته وادارالمحرك .......لتنطلق سيارته ومع انطلاقها يبدأ حسام في التفكير.........كيف يمكنه الايقاع بشمس؟؟.............انه حقا سؤال ملح...........وهااااااااااام) يتبع........... | ||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
