آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
29-09-16, 09:02 AM
| #21 | ||||||||
| مراقبة عامة ومشرفة منتدى الروايات المنقولة  
|  كانو منسجمين في جلستهم وفجأه انقطع بث البرنامج الي يبث على التلفزيون وطلع تحذير بخبر عاجل سيبث على الهواء مباشره بعد دقائق حمود :ارفعو على التلفزون ياعيال واسكتو خلونا نسمع وش العلم ظهر مذيع الاخبار على التلفزيون واعلن خبر هجوم الجيش العراقي على الكويت الكل انفجعو ومانهم مصدقين ابوفهد ابك ابك هو يقوله صادق ابك كيف يغزون الكويت وهي من طول المده واقفتن معهم في حربهم على ايران حمود الله لايخزينا الله لايفضحنا من يصدق ان صدام يغزي الكويت ابك الدين الي يجمعنا وين راح الدم والعروبه والجيره كلها مالها عنده حرمه غزيل ياربي لاتسخط علينا يالله ياكيف الاخوان يتذابحون بينهم قمراء يويل حالي الحرب قامت تكفى ياحمود دق على ابو وليد تعين وشهي اعلومه يمديهم ارسلوه للحرب حمود جب التلفون ياولد اخذ حمود التلفون ودق على بيت ابو وليد ورد عليه ابو وليد حمود : وشلونك ياخوي عساك بخير وش العلم الي سمعناه وانت بتروح للحد والا الله يحفظك ابشر وانا اخوك لاتشيل هم الله يوفقكم وينصركم على من عاداكم انتهت المكالمه ابو فهد :بشر وش يقول يقول اليوم يجهز بيته ويقظي لاهله وبكره بيمشي للحد قمرا يارب تحفظ اخوي وكل جنودنا يالله الجميع اللهم امين حمود ويقول اصبر اسبوعين كان مواريها مطوله اخذ اهلي في بيتك اسلم لهم من الرياض غزيل ليه الرياض وش علمه ابو فهد كيف وش علمه الرياض العاصمه اول مايضرب في الحرب اهيه قمرا ايه بس هم يقولون الحرب على الكويت مهيب علينا حمود ياعوق العلم حنا والكويت واحد لاضربت الكويت مالسعوديه بجالستن تفرج ولاتدخلت ضربت معها مير والله ان قاله الله لنردهم خايبين ابو فهد عز الله انهم واقفين معه في حربه على ايران وقفة رجالن واحد مير الانسان لاطغى بغى تعود على الحروب وطمع في جيرانه الخسيس صيته :يعني جيشنا اليوم بينهد على الكويت حمود :لا الجيش بيعسكر على الحدود السعوديه الحرب مهيب سهله لازم اتفاقيات ومشاورات بين الدول علشان يقدرون يدخلون الكويت فهد :وحنا وش علينا من الدول انشاورها همانه جيشنا ورا مايفكونه على الكلب صدام ويردونه قبل يتمكنون من البلد ابو فهد مهوب على كيفهم لازم يافقون مع باقي الدول علشان يضمنون ان دول العالم تكون معهم على صدام لو نزلو للحرب من روسهم وش يضمنهم ان دول العالم ماتتفق عليهم مع صدام ويقلبون الحرب على روسهم يابوك السياسه تسبق العسكر في كل شي والاخربت الدنيا حنا مانا بعايشين في العالم الحالنا نقرر الي نبي وننفذ من غير شور احد والحكومه مهيب مقصره هذاهم في الاخبار من سمعو بلحرب وهم من ديره لديره يعقدون اتفاقات ويحثون الدول الثانيه على مشاركتنا الحرب خبر الحرب كان فاجعه على اهل الكويت واهل السعوديه وكل العرب الي وقفو لجانب الحق ولاننسى ان بعض الدول وقفت مع المعتدي اهل الحاره تحولو فجأه الى محللين سياسيين وصار الكل يتكلم في السياسه الي ماكانت قبل الحرب تعني لاغلب الشعب السعودي اي شي توالت نشرات الاخبار واصبحت الاخبار اهم حدث عند الجميع بمجرد ماتبدى نشرت الاخبار يسود الصمت ويجتمعون اهل البيت حول التلفزيون يسمعون اخبار الحرب القوات السعوديه صارت تنزل تعليمات في التلفزيون لشعب تحسبا لاستخدام العدو لصواريخ محرمه دوليا والتعليمات تقول انهم يغلقون فتحات الدرايش او اي فتحات في البيت واذا سمعو صافرات الانذار يلزمون بيوتهم والي عندهم قبو ينزلون فيه اكثر امان لهم صيته ومحمد تولو مهمة تجليد حواف الدرايش والمكيفات والرياجيل صارو يشترون المواد الغذائيه بكميات كبيره تحسبا لاي طاري أئمة المساجد صارو يدعون على العدو في كل صلاه والمصلين يأمنون ويدعون معهم وفي المقابل يدعون بنصر لنا ولأهلنا في الكويت الكويتيين بدو يدخلون السعوديه وكثير منهم جلسو يدافعون عن بلدهم ومحد يقدر يلوم اي فريق منهم لاالي طلعو والاالي قعدو كلهم لهم حجتهم وظروفهم ومحد يقدر يلومهم الحرب ابد ماهي سهله | ||||||||
|  |
|
29-09-16, 09:03 AM
| #22 | ||||||||
| مراقبة عامة ومشرفة منتدى الروايات المنقولة
| في الرياض اشتغلت صافرات الانذار تنبه عن هجوم صاروخي العالم انهلعو وراحو يركضون للغرف الي مجهزينها ومسكرين كل منافذها والي عندهم كمامات البسوها في اسكان الحرس الوطني اظربت الصافرات بصوت مخيف والعالم هجو يم القبو في الاسكان اقبيه تحت المدارس في بيت ابو وليد في غرفت البنات هلا كانت نايمه على سريرها وحلا جالسه تلعب بالعابها في الارض حلا تركت الالعاب ونزلت تركض مع الدرج هلا نقزت من نومها مفجوعه وخمت عباتها وطرحتها ونقابها ولبستهن اي كلام وهي تركض ام وليد تصيح عليهم مع الدرج بسرعه ياعيال على القبو بسرعه الخدامات ثنتين اول ماسمعن الانذار تركن كل شي وهجن ام وليد دخلت المطبخ وسكرت الغاز وراحت تلبس عباتها عشان تروح القبو هيفا كانت جالسه في المقلط ومشغله الفديو على فلم مصري ومنسجمه معه جاء مشهد حفله فيها رقاصه ترقص والبطل يتأملها بطريقه منحطه وهنا الحظه الي انطلق فيها الانذار هيفا انفجعت وصارت تصيح لاياربي لاتكفى يالله انقزت لتلفزيون بطفيه ماعرفت من الخوف مصعت سلك المحول من الكهربا وراحت تفصل سلك الفديو والتلفزيون من التحويله (السلك الكهربائي الي يكون فيه عدت افياش علشان نشبك اكثر من جهاز في نفس الوقت ) راكان واقف عند باب المقلط وشاف كل شي سوته هيفا وفقع ظحك مع ان الظرف مايساعد راكان هههههههههه يالخبله خلاص طفى قيدك فصلتيه من الجدار تفصلينه من التحويله ليش هيفا وجع انقلع عني بغى يطيح قلبي خفت اموت وانا اتفرج على المسطل ذولا راكان :الله لايخزينا عاد شوفي الخاتمه كيف صاح الانذار مره ثانيه وراحو يركضون للقبو في القبو الناس متجمعه من كل الاعمار واشكالهم عجيبه كل شخص طالع على البس الي كان عليه الي بسروال وفنيله والي بثوب النوم الحريم راحمهم ربي بالعبايه محد يشوف وش لابسات بس الشباب حفله ام وليد تهدي الاطفال المنهارين من الخوف وتحاول تنسيهم الي هم فيه اماعيالها كانو مجتمعين كلهم في مكان واحد طبعا المكان زحمه والكل جالسين حول بعض هلا التفتت على حلا وشهقت جايه من غير جزمه ياويلك من امي لو درت بتحش ارجولك حش حلا والله ان علمتي علي لاعلم عليك لاتنسين انك طالعه مامشطتي شعرك والابعد لابسه البجامه راكان هههههههه ياويلتس ويلاه جريمتك لاتغتفر عند امي بتشب في شوشتك حريقه هيفا على اساس انت طالع منها ترا اثيابك الي انت لابسها من قبل الظهر ماغيرتها هلا :يالمخنز يالتمساح يالوصخ وليد :ترحم على روحك يااخ العرب المشنقه في انتظارك راكان :دام كلنا مذنبين في نظر الست الناظره خلونا نستر على بعض ياجماعه هيفا :وش حادني استر عليكم انا ماعندي مخالفات مروريه سجلي نظيف وليد :وانا سجلي معقم ماهو نظيف وبس هلا :اصلا انا لابسه عبايه يعني ماراح تشوف لاشعري والاحتى بجامتي وبعدين انا كنت نايمه وش تبوني اسوي اقعد امشط شعري لين يجي الصاروخ في راسي هيفا يجي الصاروخ في راسك اهون عند امي من انك تطلعين من غرفتك مامشطتي شعرك وليد :وانتي طالعه من البيت كله مو بس غرفتك السلام عليكم كان هذا سلام جماعي من عيال خالهم الي جوهم من جهه ثانيه من القبو ردو السلام باصوات متفاوته اعيال خالهم ابراهيم صديق وليد مناير كبر هلا وصديقتها انوار كبر حلا وصديقتها جلسو يسولفون وفجأه سمعو صوت انفجار قوي وانخلعو من الخوف الحريم والبنات قامو يصارخون من الخوف الشباب الي اعمارهم كبيره في الثنوي او اكبر توترو صارو يتجولون في القبو ويهدون الناس الصوت الي سمعوه كان صاروخ اسكود اعترضته القوات السعوديه وفجروه وهو باقي في السماء قبل يوصل لهدفه وانزلت شظاياه على الرياض بس ماكان فيه خساير مر الوقت وصار الوضع أمن ورجعو الناس لبيوتهم في بيت ابو وليد مجتمعين في الصاله هيفا حنا لازم نروح لعمي حمود لمتى وحنا عايشين في رعب وليد :عمي كان بيجي ياخذنا الاسبوع الي راح وانتم الي عييتو ام وليد :انا اخاف نثقل على الناس وبيتهم صغير بنحشرهم راكان :يمه تكفين خلينا نروح على الاقل نتعرف على عمي واعياله كملنا ماشفناهم والله اني انقهر يوم اشوف اعيال المدرسه فزعه هم واعيال عمهم وانا معرف اعيال عمي ام وليد :خلاص اجل نروح بس تكفون كل واحد يلزم حدوده ولاشوفكم تسوون مشاكل مع الناس يكفي انا بنحشرهم في بيتهم وليد :زين يمه اجل بدق على عمي واقوله يجينا ممداهم يكملون كلامهم الاالتلفون يدق ارفعته ام وليد وعليكم السلام الحمد لله بخير الله يسلمك لاابشرك مابنا الا العافيه ايه كنا في قبو المدرسه خلاص ابشر والله يابو محمد مانا بكارهين جيتنا عندكم مير نخاف نثقل عليكم تسلم الله يخليك لنا ذخر ياهلا مع السلامه وليد :هذا عمي ام وليد :ايه يقول من اليوم يتصلم على البيت ماحد يرد ومرتاعين علينا ويقول بكره بيجي ياخذنا مايقدر يصبر وهو كل اشوي يسمع ان الرياض مطلقن عليها صاروخ هيفا :زين انها جت منه اجل يالله قومو جهزو اغراضكم ام وليد :يابنات انتبهن لاتخذن من ملابسكن القصيره شي تعرفون اهل الدوادمي مانهم متعودين على هالملابس حلا :وحنا وش علينا منهم ام وليد :اذا كنا في بيتنا ماعلينا منهم بس لمى نكون في بيتهم لازم نلتزم بنظامهم هيفا :انا الحمد لله عندي تنانير الجامعه طويله وبعد عندي تنانير كثيره غيرها طوال هلا :يمه ماعندي طويل الاالبناطيل ام وليد :لو فيه وقت رحت لسوق واشتريت لكم ملابس تنانير هيفا ماتجي عليك هلا:لايمه ويني وين هيفا ام وليد :الشكوى لله خلاص انتي وحلا اخذو بناطيلكم وملابسكم القصيره لاتاخذون منها شي ام وليد :وليد انت وراكان ماعندكم اثياب وليد :لايمه من متى حنا نلبس اثياب وبعدين لبسي ماني مغيرن فيه شي وماعلي من احد في الدوادمي الناس تعودت على الوضع وماعاد يتخبون في البيوت لاسمعو صافرت الانذار مثل قبل مع العلم انهم ماكانو يسمعونها الافي التلفزيون ومع الوقت تاكدو ان ماعليهم خطر وصارو لاسمعو صافرة الانذار يتجمعون على التلفزيون يشوفون اهل الرياض واهل المناطق الحدوديه وش صار عليهم والي له اهل في الرياض تلقونه بس متمسكن في التلفون ويدق على اهله يتطمن عليهم في بيت حمود الاستعدادات لجية اهل ابو وليد وصلت لذروتها ابو محمد من بعد الفجر حرك يم الرياض يجيب اعيال اخوه اغزيل وقمرا وبناتهن يشتغلن في البيت وقيدهن فرغن غرفة صيته من اغراضها كتبها صفوها في كراتين ودخلوها في المخزن وملابسها ودوها غرفت امها حمود ودو ملابسه عند اخته قمرا وبيقعد في بيت ابو فهد علشان مرت اخوه تاخذ راحتها زودن على ان البيت ضيق المقلط للعيال كلهم وقسم الحريم للحريم وبناتهن وطبعا صدرت تحذيرات شديدة الهجه للعيال انهم مايعتبون قسم الحريم والايدخلونه ابد | ||||||||
|
| |
|
29-09-16, 09:04 AM
| #23 | ||||||||
| مراقبة عامة ومشرفة منتدى الروايات المنقولة
| ابومحمد كان معه جراكل ماء شرب لرعيان حقون حلاله واكل لهم مرهم نزل اغرضهم عندهم وتفقد الحلال وقعد عندهم شوي وبعدها مشى يم الرياض ام وليد تدري ان حمود بيجيهم من بدري وقيدها مجهزتن عفشها الي بتاخذه معها كله ومجمعينه في الصاله حمود سيارته ددتسن غمارتين واهل اخوه واجد ومعهم خدامتين زودن عليهم علشان كذا جاهم على جيب مستاجره من شركات تاجير السيارات وصل حمود بيت اخوه على الساعه ظ§الصبح وليد فتح الباب لعمه وقلطه في المجلس راكان كان في غرفته مخلص لبس ويمشط شعره اول ماسمع الجرس نزل يركض مع الدرج وكله حماس لشوفة عمه وصل لباب المقلط على طلعت وليد من عند عمه وصدم في وليد وليد :وجع يالمطفوق كسرتني راكان ابعد ابعد بشوف عمي العزيز بتمقل فيه ياخي بتاكد ان عندنا اهل صوت راكان عالي وسمعه حمود وابتسم بترحيب لولد اخوه ووقف له من قبل يدخل عليه بيت الحرس وانت نازل من درج الدور الي فوق يكون على يمينك تحت الدرج مخزن وبعد المخزن الصاله وهي زي الغرفه تنتسكر بباب جرار والباب واسع مره مقابل الدرج باب قزاز يطلع على مدخل صغير باب الحوش مقابل لباب القزاز مباشره وباب المطبخ على يسار الي يدخل من الحوش للبيت لودخلت مع باب المطبخ تلقى على يسراك غساله ملابس اتوماتك ونشافة ملابس حراري وقبال هالباب مباشره مخزن صغير له ارفف حديد تابع للمطبخ وانت واقف على باب المطبخ الي يم الحوش على يمناك المطبخ امش يمين تلقى الباب الداخلي للمطبخ الي يطلع منه يلقى حمام الحريم الله يكرمك على يسار باب المطبخ مقابل لباب الحمام بنفس حجم الباب مدخل من غير باب يروح لدرج والمخزن والصاله مقابل لباب المطبخ مباشره باب المقلط تدخل من باب المقلط على يمينك مباشره باب مدخل صغير فيه بابين باب المجلس مقابل لباب المقلط ويسار باب حماح الرجال الله يكرمكم وجنب الباب مغاسل الرجال ومن كذا الصوت وصل عند حمود لان المسافه بينهم قريبه دخل راكان المجلس وهو يرحب ويهلي حمود تحمسله مره ويوم سلم عليه راكان خمه وحظنه راكان ماكان متوقع الحركه وماهو متعود احد يحظنه حس بمحبه لعمه واستانس على شوفته ام وليد قيدها مجهزه القهوه والفطور واخذهن وليد ووداها عند عمه وجلسو يتقهوون ويفطرون يوم خلصو فطور قامو غسلو ورجعو يجلسون وراكان دخل المواعين داخل حمود يكلم راكان وهو شايل صينية الاكل بيطلعبها من عندهم حمود :بناتي وين ياراكان مانهن جاياتن يسلمن علي راكان :اعجبه اسلوب عمه وحس بأنتما كبير اله الابيجون هالحين بس كانو يحترونك تخلص فطورك وليد حس ان عمه حنون عكس ابوه الي جاف معهم ولايعبر عن مشاعره ابد راكان نزل المواعين في المطبخ عند الشغالات وراح لأمه وخواته في الصاله راكان :عمي ينشد عنكم ويقول وين بناتي ماجو يسلمون علي هيفاء بوناسه صدق قال عنا بناتي راكان لايفوتكم عمي ذا يجنن تصدقون يوم سلمت عليه خمني وحظني وحسيته مستانس مره بشوفته لي هيفاء ياسلام والله وطلع عمي حنين وعنده قلب هلا بنحاسه يمه كن رجلتس انحش هيفاء نقزت واقفه بروح اسلم وطلعت قبل تسمع رد امها هلا وحلا الحقو هيفاء هيفاء دخلت عند عمها وهي لابسه تنوره طويله وبلوزه باكمام طويله واول مادخلت سلمت حمود هلا والله ارحبي انتي هيفاء هيفاء :ايه ياعمي انا هيفاء الله يهداك ماعندهم مزيونه غيري يعني المفروض تكون متأكد انه انا حمود سلم عليها وهي حبت راسه حمود حده مستانس بعيال اخوه هلا والله بالزين هلا دخلت يقول هلا بالزين يعني انا وكملت السلام عليكم وجت يمه تسلم حمود ضحك كلتسن مزايين لاتهاوشن الهواش في الصبح مهوب زين العيال والبنات ضحكو وليد يعني وفرو الهواش لظهر ترا هواش الظهر يمدحونه حمود ضحك لاالله لايجيب اهواش حلا كانت واقفه عند مدخل المجلس ومتردده تدخل والا بس من سمعت ضحكهم وسوالفهم تشجعت ودخلت السلام عليكم حمودلاحظ الارتباك على وجهها رد السلام وفتحلها يدينه الثنتين ياهلا بالصغير المزيون حلا ابتسمت واستحت حمود مسكها بيدها وسحبها في حظنه وحظنها وباس اخدودها ورجع مسكها بيدها وجلسها جنبه وحط يده من ورا كتوفها هلا وحلا كانو لابسين بناطيل وكانو متوقعين يسمعون تفشيله قويه من عمهم حمود لاحظ لبس بنات اخوه وعياله وماعلق لانه ببساطه يتقبل الشخص الي قدامه زي ماهو ومتواضع مع الكل ويتعامل مع الناس بسلاسه وبساطه مايحب التعقيد في العلاقات ام وليد لبست عباتها وراحت تسلم على حمود ام وليد :السلام عليكم حمود وهو مكانه الله حيها وعليكم السلام والرحمه وشلونتس يام وليد ام وليد :بخير ياعساك بخير بشرني عن الاهل وشلونهم حمود :ابشرتس كلهم بخير ويسلمون عليتس ماجاكم عن ابووليد علوم ام وليد :كلمنا قبل يومين الحمد لله بخير ويسلم عليكم سلامن كثير حمود :الله يسلمه ويحفظه ويرده لنا سالم غانم الجميع امين ام وليد حنا جاهزين متى تبينا نمشي حمود يالله توكلنا على الله خلونا نمشي هالحين افتحو البايكه ياعيال بدخل السياره نشيل العفش وليد وراكان قامو طلعو للحوش وفتحو البايكه وحمود دخل الجيب داخل وقربه من باب الحوش والعيال والخدامات صفو الشناط والفرش في السياره وخلصو وسكروها ام وليد شيكت على البيت وسكرته زين وطلعت مع بناتها وشغالاتها لسياره واركبو كلهم وحركو لدوادمي في الدوادمي الكل مستعد وينتظرون حمود والي معه متى يوصلون وقيدهم من امس مقررين ان غدا اهل ابو وليد اول مايوصلون عند ابوفهد وبيكون غدا مختصر يعني يادوب الضيوف واهل ابونمر واهل حمود والعشاء بيكون عند حمود وعازمن عليه الحاره كلها في السياره حمود ماسكت ابد طول الطريق يسولف مع اعيال اخوه ويمزح معهم وهم مستانسين عليه حمود :هايوليد وش تدرس فيه هالحين وليد :اناخلصت الثانويه السنه هذي والسنه الجايه بدخل جامعه حمود :وش التخصص الي بتدخله وليد فكر ان عمه ممكن يساعده يقنع امه بسالفة السفر وليد :ابي ادخل هندسة ديكور داخلي وان شاء الله بروح انا وولد عمي ندرس برا ام وليد :مستحيل اخليك تروح للخارج حمود :تعوذي من ابليس يام وليد دامه بيروح يدرس وولد خاله معه خليه يروح يتعلم ويشتد عوده السفر الحاله يعلم كيف لاصار علشان الدراسه والعلم ام وليد :الدنيا تخوف يابومحمد وانا اخاف عليه من السرابيت واهل المخدرات حمود :السرابيت واهل المخدرات في كل مكان والانسان مايردعه عن الردى غير دينه وخوفه من ربه ثم اخلاقه وعقله ووليد رجالن مصلي وصوام ويعرف ادروب الرياجيل ماهوب مخزن نفسه بيده وليد استانس على كلام عمه وصار يحاول يقنع امه يمه الله يهديك انا تربيت ايدينك وتعرفيني زين ماداني السرابيت ولاعمري قربت منهم انا بروح ادرس واتعلم واطور نفسي واشوف دنيا جديده توسع مداركي ام وليد كنها بدة تقتنع قالت الحين الدراسه بعيده لاجت يصير خير | ||||||||
|
| |
|
29-09-16, 09:04 AM
| #24 | ||||||||
| مراقبة عامة ومشرفة منتدى الروايات المنقولة
| وصل حمود لبيته ونزل من السياره ورحب بعيال اخوه ودخلهم البيت محمد وسالم ينتظرونهم عند الباب وخمو ابوهم يسلمون عليه قبل الضيوف ثم سلمو على عيال عمهم ومافاتهم لبس راكان ووليد ماعجبهم البس ابد بس مابينو شي نفس ابوهم سلمو عليهم بحراره ورحبو فيهم حمود ياوليد ترا غداكم عند ابو فهد وهم هالحين يحترونكم على القهوه نزلو قشكم وتعالو عنده انا بروحله هالحين وليد :ابشر ياعمي وفتح السياره وصار هو وراكان وعيال حمود ينزلون العفش ويدخلونه الحوش والشغالات يودونه الغرفه المخصصه لهم ماعدا اغراض العيال حطوها في المقلط ام وليد وبناتها ادخلن داخل البيت وغزيل ترحب وتهلي واستقبلتهم احلا استقبال ام وليد انشرح صدرها لغزيل وطريقة ترحيبها فيهم صيته سلمت بنفس الحراره الي سلمت فيها امها وهي تسلم لاحظت نظرات التكبر والغرور على هلا وحلا لانهم ماعجبهم لبس صيته وهم اذا لبس البنت ماعجبهم يحسون انها اقل من مستواهم ومايتكلمون معها صيته شافت لبس حلا وماعجبها بس ماكان عندها نيه تجرحها اما هلا باقي عبايتها عليها وماشافت وش لابسه صيته ماتحب الي يتكبر عليها ومستحيل تتقرب من شخص تكبر عليها هيفاء كانت فرحانه باستقبال اهل عمها لهم وسلمت على صيته بفرحه كبيره وهي تقول واخيرن صار عندي بنت عم حتى لو اصغر مني بكم سنه ياشيخه عديني من هالحين صديقتك وغصب بعد مافيها مشاور صيته افرحت بهيفاء اكثر شي وقالت ابد انتي من هالحين صديقتي وترا عقلي اكبر من سني يعني مانتس متوهقتن بصداقتي هيفاء عجبها رد صيته وابتسمت لها بقوه ياسلام على الثقه غزيل :يام وليد قمرا تحترينا على القهوه وغداكم عندهم اليوم ام وليد :الله يكثر خيركم وخيرهم الشغالات قيدهم دخلو العفش وليد اخذ شنطته واغراضه ودخلها المقلط وقال للعيال روحو انتم وانا ببدل والحقكم ودخل المقلط وسكر الباب عليه عند الحريم غزيل يالله خلونا نمشي واشتالت عناد صيته اغراض عناد في المطبخ اجمعيها في شنطته والحقينا صيته طيب يمه ام وليد :افا يام محمد تجيبين ولد والاتبشرينا غزيل ظمت عناد وباست خدوده وزينه من ولد هالولد له سالفه اعلمتس ابها عند قمراء وطلعن صيته اخذت شنطة عناد القماش من غرفت امها وراحت للمطبخ ولقت امها مجهزه رضاعات عناد وحليبه وترمس المويه على دولاب المطبخ دخلتهن كلهن في الشنطه واشتالتها على جنبها وطلعت وليد خلص لبس وطلع في نفس الوقت الي وصلت صيته فيه باب المقلط صيته شافته وشهقت بسم الله الرحمن الرحيم وليد ماعجبته صيته ابد وقال خير شايفه جني صيته :ياليت شوفة الجني اهون من شوفتك ابك انت ولد والابنت والاالسواق حقهم وليد حس ظغطه وصل للمليون وده يذبحها على هالكلام بس اظطر يمسك نفسه علشان خاطر عمه ومع اعلى درجات السيطره عنده ماقدر الاانه يرد وانتي طالعه من اي قبر انتي وخلاقينك ذي صيته سفهت الكلام الي قاله عنها وناظرته بتقزز يع يع يع كنك سلقه مصلوخه وطلعت من عنده بسرعه وليد صاح من وراها انتي قليلة ادب صيته كملت طريقها وماردت لانها ماتبي تكبر السالفه وهم توهم ضيوف وليد وصل حده من النرفزه وراح يغسل وجهه يهدي اعصابه شوي وبعدها نشف زين وراح لبيت ابو فهد دخل وليد المجلس وانصدمو الجالسين بلمنظر الي شافوه كان لابس قميص احمر لاصق عليه وبنطلون اسود لاصق هو الثاني منظره بنسبه لهم كان مقزز صحيح انهم شافو راكان قبله بس على الاقل الي لابسه راكان مايختلف اثنين على انها ملابس رجال بس ذا ملابسه مشكوك في امرها غير ان راكان اجتماعي بقوه ويعرف يكسب الناس بسرعه اما وليد مايتفاعل الامع الي يعرفهم والناس الباقين يتعامل معهم ببرود وليد لاحظ نظراتهم وعرف انهم محتقرينه والاعبرهم ابو فهد وابو وليد اظطرو يتجاهلون الموضوع احتراما لحمود اما نمر وفهد عطوه نظرات احتقار لوهي رصاص اذبحته في ثانيه وحده من قوها سلم وجلس جنب عمه وتركي قام يصب القهوه صيته صار لها شويات عند الحريم وقامت من عندهن غزيل :وين بتروحين صيته :ابروح اسلم على ابوي ماشفته من يوم جاء غزيل :روحي ولاتبطين دخلت صيته المجلس ببتسامه عريضه وهي مشتاقه لابوها معنه ماطول راح ورجع في نفس اليوم حمود فز واقف يوم شافها دخلت ووليد كشر نمر وفهد عيونهم رادار وشبكت على صيته وليد لاحظ نظرات فهد ونمر وابتسم بتهكم وفي داخله يع الله يقرفكم مالقيتو الاهالبنت المتخلفه ولامن زين الطبايع شابكين عليها ثنين حمود خم صيته بشوق وضمها لصدره وصار يبوس راسها وخدودها وعيونها وهو يرحب فيها ويهلي ياهلا بام الصيت ياهلا بالغاليه ياحي هالزول صيته هلابك يبه افا يبو صيته تجي وتروح لبيت خالي قبل تسلم علي حمود ماعليه يابوتس هالمره سماح صيته هالمره بس سماح يبو صيته محمد بغيره من وين جبتيها ابو صيته ذي تراه ابو محمد حمود ضحك ابوكم كلكم لاتهاوشون راكان في داخله شكلها فله بنت عمي ذي والاابوها مطيرها فوق الريح وليد في نفسه قسم بالله قهر تكون هذي بنتك انت صيته جت بتطلع ناداها فهد صيته صيته :هلا فهد :جيبي عناد راحت صيته ورجعت تشيل عناد حمود مد ايدينه الها هاتيه روح ابوه هاتيه فهد خالي وش ذا انا الي طالبه حمود ولدي وبكيفي صيته تعدت فهد وعطت ابوها عناد وليد وراكان استغربو راكان :قلنا مانشوف بعض غير كل سنتين مره بس ماتوصل ياعمي انك ماتبشرنا انه جالك ولد حمود الولد جاء عطيه من رب العالمين وماجاء فرصه نعلمكم ابه وقص على عيال اخوه قصة ضياع صيته وكيف لقو عناد وليد :طيب الشرطه مالقوله اهل حمود :لاوالله مالقو احد وسوو اعلان في الجريده وماجاهم احد راكان :الله على بنت عمي شقرديه عند الحريم قيد غزيل وقمراء علمو ام وليد بقصة عناد ام وليد :ماشاء الله على صيته عقلها سابقن سنها بسم الله عليها هيفاء :يمه منك ياصيته كيف جا في بالك انك تعطينه تمر لوانا مكانك ماقدرت اسوي شي من الروعه صيته : انا اشوف الحريم دايم يمرسن التمر لعيالهن قلت مافيه غير هالطريقه علشان اقدر انقذ حياته اما الروعه والله اني اخذتن حقي منها مير وش اسوي قمت اتصبر عسى ربي يفرجها علي والحمد لله جاء الفرج | ||||||||
|
| |
|
29-09-16, 09:05 AM
| #25 | ||||||||
| مراقبة عامة ومشرفة منتدى الروايات المنقولة
| البارت ظ£ظ£ في مجلس الرجال بعد الغدى ابونمر :عشاكم الليله عندي ياوليد وليد :ماله داعي الكلافه طال عمرك حمود :وليد واخوانه عشاهم الليله عندي اناوقيدني عزمت ابو نمر :كل مشروك مبروك انا بجيب ذبيحه وانت جب الثانيه والرياجيل نحطهم في الدكه الي بين بيتي وبيتك والحريم كيفهن ان بغن في بيتي والافي بيتك كله واحد حمود :دامها تسذا ماهنا خلاف ابو نمر :قل تم ياوليد وليد :تم الله يكثر خيركم قبل المغرب بشوي في بيت حمود راكان واقف قدام مغاسل الرجال يزبط اشماغه وجاه وليد وليد :هاه اشوفك لابس ثوب راكان :ايه اخذت واحد من عند محمد انت سمعت عمي وش يقول عازم اهل الحاره كلهم وانت شفت كيف العالم تبحلق فينا من وصلنا للحين وانا بصراحه ماعندي استعداد اكون نكتت الموسم في الدوادمي كله وليد :اجل انا ماحسبت لهم حساب وخلهم ينكتون لين تنتحر النكته حمود دخل ينادي وفي يده ثوب اماراتي وشماغ اماراتيه ماخذهم من عند فهد وفهد في الكم شهر السابقه طال بسرعه واظطر يفصل مجموعة ثياب جديده وهذا الثوب من ظمن الثياب الي فصلهن جديد وماقط البسه ومعه لبسه داخليه كامله بكراتينها حمود :وليد ياوليد وليد راحله هو وراكان حمود حط يده على كتف وليد يابوك ياوليد ترا اليله بيجون اهل الحاره كلهم وفيهم شيبان مايعرفون لبسكم ذا ولاقط شافوه وانا اعرفهم السنتهم احد من السيف وانجس من التسلب وانا مابي احد ينطل عليكم هرجن ماهو من مقامكم ولامن مقام ابوكم وليد :عمي لبسي عادي وانا مقتنع فيه ولاعلي من احد حمود : خابر يابوي انه عادي بس مايناسب شيابنا ولاشافوه مانهم بساكتين بيحذفون عليك من الحتسي الي ماله سنع لين يفقعون مرارتك وليد استحى من عمه ابشر طال عمرك علشانك بس واخذ الثوب وباقي الملابس من عمه حمود لامنك لبست تعال ازين الشماغ على راسك وليد :ان شاء الله وليد لبس بعد مارسل الملابس الداخليه للخدامات يكوونها وكووها وجابوها له وراح لعمه حمود والشماغ على كتفه احمود اخذ الشماغ وهو مبتسم ويطالع ولد اخوه بفخر ماشاء الله بعدي ولدي وبدى يلف الشماغ على راسه نفس الإماراتيين وطلع شكله رزه في الثوب صيته عرفت ان وليد لبس ثوب من ثياب فهد وبنحاسه فكرة انها تنكد عليه وبما انهم راحو يصلون المغرب راحت في الحوش تنتظر رجعتهم من الصلاه الرجال والعيال ارجعو من الصلاة سواء وقامو يرتبون الدكه لضيوف مع بعض لانه ماعاد بقى وقت وياصلون وليد ماهو متعود على الثوب واول مره يلبسه في حياته فمبتلش فيه فدخل بيشوف هالعصبه الي على راسه وش صار فيها باقي عدله اولا دخل الحوش ولقى صيته واقفه على الباب الداخلي للبيت صيته شافته وابتسمت ابتسامه عريضه هي في نفسها معترفه انه رزه في الثوب بس القراده وماتسوي قالت ياشين السرج على البقره عاد مالقيت غير ثوب فهد يابعد الثريا عن الثرى تلقى الثوب هالحين يتعوذ منك من بعد فهد يرافقك انت ياحظه الردي وليد مامربطه عنها الاان عمه حنين معهم وطايرن فيهم لسماء وواضح انه يحب هالبنت العله اكثر من اعياله كلهم دمه فار واعصابه ثارت وكره فهد وثوب فهد وقبلهم صيته العله بس حاول يظبط نفسه ويتكلم بهدو ناضرها بسخريه ههه انتي بس حددي ايهم الثريا بنظرك فهد والا سكت لحظه بعدها غمز بعينه وكمل والانمر والاتلعبين على الحبلين هنا صيته اشتبت حريقه في اعصابها واندمت على انها تليقفت عليه اختبصت ماتدري وش تقول استدارت من عنده بسرعه وراحت وهي تمشي مقفيه قالت اصلا الكلام معك خساره وليد ابتسم بقوه وراح يتأكد من شكله في المرايه وهو مستانس انه اخيرا اعطى هالمتخلفه ظربه في الصميم وبينه وبين نفسه يقول تخسين انتي وفهد ونمر معكم عند الحريم ماعزمن احد ومافيه عندهن غير نفس الاشخاص الي حظرو الغداء اليوم وكلهن تقريبا في المطبخ يجهزن قهاوي الرياجيل ويجهزن الذبايح لطبخ وحدهن مشغولات مر العشى علا خير من دون احداث مهمه وارجال الحاره عزمو وليد لاكنه اعتذر عن العزايم وحمود ايده في ذالك وبكذى بتنتهي ظيافتهم عند اهل الحاره على هالعشا | ||||||||
|
| |
|
29-09-16, 09:07 AM
| #26 | ||||||||
| مراقبة عامة ومشرفة منتدى الروايات المنقولة
| في يوم اخر من ايام الحاره في الصاله الداخليه لبيت حمود ام وليد في رايها انه افضل حل علشان تبعد عن اي مشاكل انها تتعامل مع الناس برسمه هي تسولف مع غزيل وقمراء بس ماتتحرك داخل البيت الى من الغرفه الي حطوها لها لصاله وماتتعدى هالمكانين بعتبار ان البيت ماهو بيتها وماهو من الذوق انها تاخذ راحتها وتتجول فيه وملزمه بناتها بنفس النظام اذا بغت شي لازم تستاذن من غزيل لو اعيالها سوو اي شي تظن انه ممكن يضايق غزيل تعتذر فورا وبكثره وغزيل واعيالها ناس بسطاء واجتماعيين حدهم ومايحبون هالرسميات لانه في رايهم ام وليد واعيالها من اهل البيت والمفروض يتصرفون بتلقائيه هذا الاختلاف في المفاهيم خلا العائلتين في توتر ام وليد تخاف تضايق الناس في بيتهم وتتصرف بحذر وام محمد تعتقد ان اظيوفها ماهم مرتاحين عندها ومتظايقين من سبب ماتعرفه نرجع لصاله ومين فيها كانت هلا وحلا يتفرجون على التلفزيون اما هيفاء كانت جالسه في الجهه البعيده عن التلفزيون وبتحديد قريبه من باب غرفة صيته الي هي الان غرفتهم وحدها زهقانه جت عندها صيته تسولف معها اقول هيفاء وش رايك انا وانتي نسوي العشاء الليله ترا امي مره تعبانه من الحمل حتى انها اخذت عناد وراحت تنام هي وياه شوي تقول علشان تريح ظهرها وتقدر تقوم تسوي العشاء ام وليد في هذي الاثناء كانت واقفه على باب الغرفه وتسمع كلام صيته واشرة لهيفاء انها ماتنبها علشان تسمع باقي كلامها هيفاء انحرجت لانها ماتعرف تطبخ قالت طيب ليه تتعب عمرها هي خلي الشغالات هم يطبخون صيته لاامي تكره طبخ الشغالات ومستحيل تخليهم يلمسون الاكل هيفاء يعني امك قالت انها تبينا نسوي العشاء صيته لا امي ماقالت شي بس انا شفتها طول اليوم كانت تتوجع من ظهرها وبس تشوف احد تسوي نفسها طيبه ومافيها شي هيفاء توهقت من جد بس انا معرف اطبخ انتي تعرفين صيته لا معرف بس عندي مجلات فيها وصفات طبخ خلينا نختار وحده منهم ونسويها زي ماهو مكتوب في المجله هنا ام وليد تدخلت مايحتاج مجلات والا شي انا بسوي العشاء وانتي وهيفاء ساعدني وتعلمن مني الطبخ صيته استانست وانحرجت في نفس الوقت وقالت اخاف نتعبك معنا ياعمه ام وليد حست انها مقصره مع غزيل الحرمه حامل وتعبانه وشايله مسؤلية طفل رضيع زودن على حملها وهم جو وكملو الناقص صحيح ان الخدامات قايمات بترتيب البيت ونظافته بس هي لاحظت ان غزيل بمجرد ماتدخل المطبخ تطلع الشغالات منه واحتراما لرغبة راعية البيت ام وليد راحت للمطبخ هي وهيفاء وصيته وطلبت من الشغالات يروحون يجلسون في الصاله هيفاء يمه وش بتسوين عشاء ام وليد :بسوي بروستد دجاج مع بطاطس مقلي وسلطه وايدام خضروات بلحمه علشان الي مايحبون البروستد ياكلون منه هالحين اول خطوه لازم نسويها هي فرز المكونات بنشوف وش موجود عندنا من المكونات الي نحتاجها والناقص نسجله في اورقه ونخلي العيال يجيبونه ام وليد بدت تعدد المكونات على صيته وصيته تشيك على الثلاجه وادراج المطبخ وتقولها وش فيه ووش مافيه هيفاء معها الورقه والقلم وتسجل النواقص خلصت هيفاء وعطت الورقه امها تتاكد انها مانست شي ام وليد شيكت عليها وحطت فيها الفلوس وعطتها صيته يالله عطيها العيال يجيبون الاغراض صيته اخذة الورقه وراحت تشوف وين العيال لقت وليد جالس على عتبة الباب وحده طفشان وباقي العيال يلعبون كوره في البرحه ومع انها شافتهم اسئلت وليد وين العيال وليد :يلعبون كوره صيته :وانت ليش مارحت تلعب معهم وليد حده طفشان وماله خلق يتهاوش معها علشان كذا رد على اسئلتها لعل وعسى تفارق عنه رد كيفي مابي اروح وفي نفسه وش ابي فيهم اذا مابقى منهم احد ماتمسخر علي اكثر كلمه سمعتها من جيت هنا ياخكري حتى اني ماسمعت اسمي كثر ماسمعتها صيته بنكاده ماتبي والا هم الي مايبونك الله العالم انهم نافينك مثل العنز الجرباء كلمت صيته جرحت وليد حيل ياماسمع الناس يتمسخرون على لبسه وعلى طريقة قصات شعره بس ماكان يهتم لان هالسخريه في النهايه كان مصدرها طريقه لبسه وهو مقتنع بلبسه وماعليه من احد بس هالبنت كلماتها ارماح تنغرز في اعمق اعماق النفس وتطعن بقوه التفت عليها بقوه والله مافيه اجرب الاانتي انا مدري كيف وحده قليلة ادب مثلك تكون بنت عمي حمود اكيد انك وارثتن هالجلافه ذي من خوالك صيته ماصدقت داسلها على طرف خوالي اطلق منك الف مره على الاقل رياجيل تهتز لهم المجالس مانهم خكى لارجالن مع الرياجيل والاحرمه مع الحريم وليد وصل حده خلاص قام واقف وصفقها كف على خدها من قوه طاحت على الارض على طلعت نمر من بيتهم وشاف وليد يصفق صيته وهو سمع الصجه قبلها ومايدري وش السالفه جاء يركض وطاح ضرب في وليد وصارو يتبادلون الضربات العيال الي في الملعب شافو المضاربه وانطلقو يمها عشان يفرقونهم صيته قيدها قامت من الطيحه وخدها مورم من قو الضربه وتتفرج على المضاربه وهي حاقده على وليد نمر اخيرا تمكن من وليد وطرحه على الارض وقام يردسه برجوله في بطنه فهد ومحمد وتركي وراكان وسالم كلهم فزعو مع وليد مع ان فهد ومحمد يحبون نمر اكثر منه بس القرابه تحكم فهد دف نمر عن وليد وراكان انطلق عليه يظربه وفهد ومحمد قامو يفرقون بينهم ونمر مايبي يخسر اخوياه علشان وليد واخوه علشان كذا اظطر يستجيب الهم ويكف يده عن راكان مع ان راكان مازال يضربه نمر خلاص ياورع رح عني وراك راكان انا اعلمك منهو الورع فهد ومحمد بصراخ خلاص كافي نمر ادخل بيتكم وانت امش ادخل وجر فهد راكان بيده تركي وسالم قيدهم قومو وليد من الارض وكان بينطلق على نمر بس محمد مسكه ودفه داخل البيت ادخل الله يرحم والديك ادخل فكنا من المشاكل فهد دخل وراهم وهو حده مقهور يالرخمه مزرن في الرجال مخليه يتردسك كنك نعجه تحت رجلينه وليد ظغطه واصل مليون وموب ناقص فهد اقول تقلع انت الثاني ماني ناقص امهايطيه محمد بصراخ خلاص كلكم خلو السالفه تنتهي هنى بلازيادة هرج انت وياه فهد عطى وليد نظرة احتقار وراح لبيتهم صيته مازالت تفرج وتقيم ردت فعل كل واحد منهم والاكنها سبب الهوشه وليد دخل المقلط طلعله ملابس وراح يتروش ويهدي اعصابه صيته عطت الورقه محمد وقالتله يروح يجيب الاغراض الي فيها ام وليد سمعت صراخ فهد على ولدها وانقهرت ونادت راكان وانشدته وعلما بلهوشه وهم مايدرون ان صيته سببها ام وليد ارجعت للمطبخ وسحبت كرسي طاولت المطبخ وجلس عليه وتكت ايدينها على الطاوله وصارت تفكر بهم هذي ماهي اول مره يتهاوش وليد مثل هالهوشه وينغلب فيها قبل سنتين تهاوش مع مصعب ولد خاله وهم عندهم في الجنوب ومصعب بغى يكسره لولا اخوها فرق بينهم ومن بعد ذيك الهوشه وليد ماعاد طب الجنوب برجله وكل ماراحو يجلس في البيت وهذا يعني ان هذي هي اخر مره يطب فيها وليد الدوادمي وصارت تتعمق في افكارها اه اعيال خواله ربو على الجبال والمزارع واعيال عمه ربو على البران ورعي الحلال وكلها تعلم الخشونه وقو العزيمه والصبر اما ولدها مسكره عليه البيت لايروح ولايجي اه ياوليد الظاهر اني جيت باحميك وجنيت عليك انا لازم اوافق على سفره لدراسه براء لعله يتعلم كيف يعتمد على نفسه ويخشوشن شوي محمد جاب الاغراض وصيته ماتبي تشوف ام وليد بعد ماتهاوشت مع ولدها فراحت عند ساره ام محمد كانت منسدحه على سريرها وتتألم من ظهرها وتفكر ليه ام وليد وبناتها كاشين منها وتتذكر اذا كان سوت اي شي ممكن يضايقهم لاكنها ماوصلت لنتيجه قالت خلوني اقوم اطبخ عشاي لايباتون الناس جواعا طلعت غزيل من غرفتها تشيل عناد على كتفها هلا اول ماشافتها طالعه قامت على حيلها وراحت لها عمه عطيني عنيد غزيل ابتسمت لها وعطتها عناد خذيه بس انتبهيله زين يامي هلا ان شاء الله واخت عناد وجلستبه عند حلا وصارن يلعبنه وهو مبسوط معهن غزيل دخلت المطبخ وشافت ام وليد تشتغل افا يام وليد تشتغلين هنيا وانا اتسدح في الغرفه ام وليد ابتسمت لها اسمعي يام محمد من اليوم وطالع بنقسم الطبخ بينا انا علي العشاء وانتي عليك الغداء والفطور نسويه سواء انتي حرمتن حامل ومسؤلياتك كثيره وانا ماعندي شي وبيني وبينك طفشت من الجلسه بلا معنى وودي اسلي عمري بطبخ ومنها اساعدك غزيل استانست لانها فعلا تعبت من كثر الشغل قالت دامتس مهتويتن الطبخ شورتس وهداية الله والبيت بيتس واناتراني اوخيتس مابينا فرق كل مابغيتيه سويه من غير نشده ولامشوره ام وليد اعجبها بساطة غزيل وتلقائيتها وردة عليها الله يسلمك يام محمد انا اشهد انك نعم الاخت صيته متشوقه لطبخ مع ام وليد علشان كذا ماقدرت تطول عند ساره وارجعت للبيت حمود رجع من عند غنمه وعلموه العيال ان وليد ونمر تهاوشو وانهم مايدرون عن سبب هوشتهم وان صيته هي الي كانت عندهم يوم تهاوشو كل ذا قالوه له وهو واقف عند سيارته اول ماوصل صيته طلعت من بيت خالها بتدخل بيتهم وشافت ابوها واقف مع العيال وراحت سلمت عليه وحمود مسكها بيدها وقال تعالي ابيتس ودخل بيته وصيته تمشي معه وليد طلع من المقلط وشافهم مع بعض تجاهل صيته وسلم على عمه وحمود قاله تعال ابيك ياوليد ودخل المجلس هو وصيته ودخل وليد بعدهم حمود سكر الباب معك وتعال سكر وليد الباب وراح يمشي لعمه الي مازال واقف في نص المجلس اشر حمود يمين المركى وقال اجلس هنا وجلس وليد في المكان الي اشر عليه عمه وهو متوقع انه بيعاتبه على ضربه لصيته حمود جلس على المركى الي جنب وليد بظبط ولقى وليد ظهره وجلس صيته قدامه وصار بينها وبين وليد ووجهه لصيته وظهره يم وليد حمود :هاه ياصيته وش العلم الي صار اليوم صيته نزلت راسها باحراج من ابوها وارجعت ارفعته وحطت عيونها في عيون ابوها وعقدة مابين حجانها بعصبيه وقالت عمتي قالتلي اعطي العيال ورقة المقاضي يجيبونها من البقاله وانا طلعت بعطيهم الورقه ومالقيتهم مالقيت الا وليد كان جالس على عتبة الباب وليد عقد حواجبه بتوتر واستغراب معقوله بتعلمه بلحقيقه زي ماصارت حمود ليش ماعطيتي وليد الورقه علشان يجيب المقاضي وبصراحه ردة عليه صيته متجاهله وجود وليد خاصه انها ماتشوفه الحين بسب ان ابوها جالس بينها وبينه صيته :ياكرهي لهالوليد يبه ولد اخوك ذا انا ماادانيه لاشفته تنبت الشياطين في راسي وليد مقهور من كلامها ووده يقوم يكفخها وفي نفسه يقول وش هالوقاحه انا بعمري ماسمعت احد يعلن كرهه لاحد قدام الشخص الي يكرهه على اساس انا ميت عليك اه بس لو ماعمي جالس كان ذبحتك وشربت من دمك حمود :ناظرها نظرة استنكار وقال وليه تكرهينه وليد ولد عمتس ومثل اخوتس ولاغلط عليتس بشي صيته : يحول يبه يعني لاصار ولد عمي لازم احبه مالت عليه حمود وده يلتفت على وليد يشوف ردت فعله بس مايبي يحرجه واكيد انه هالحين يبي ذبحة صيته حمود :ايه كملي صيته ابد يبه سئلته عن العيال وقالي يلعبون كوره .......الخ صيته علم ابوها بكل شي صار بتفصيل الممل ومثل ماصار من غير زياده والانقصان وهذا اكثر شي حير وليد كيف قدرت تواجه ابوها وتقوله كل شي صار ليه مازود كلام كذب على وليد طيب ليش مانقصت من الكلام او غيرت من الكلام الي هي قالته لوليد حمود:طيب ياصيته انا بنشدتس هالحين وبيتس تقولين الصدق صيته :افا يبه انت خابرني ماقول الاالصدق والاكان مانشدتني من البدايه حمود :صحيح وانا اشهد انتس ماتقولين الاالصدق وانا بنشدتس الغلطان انتي والاوليد صيته : يبه انا الغاطانه بس انا يوم غلطت من القهر الي اكل تسبدي يبه انت تدري انا يذي حمدان ننعد على الاصابع ولاطلع منا واحدن رخمه والامظيعن الجاده قالو ذوي حمدان رخوم لونا واجد كان الطيبين يغطون بطيبهم الرخوم ومحد يدري عنهم حمدان ظحك على كلام صيته غصبن عنه وهو مايبي يظحك وليد ماعاد فيه صبر ارخمه في عينتس يالي ماتستحين ويناظرها بقهر من وراء عمه حمود رد وليد عنها بيده وهو يظحك تعوذ من ابليس الله يهداك وليد عمي انت ماسمعت بنتك وش تقول حمود الاسمعت ولونك صبرت كان سمعت انت ردي عليها حمود :اسمعي ياصيته وليد مهوب ارخمه مثل ماتقولين ولايلحقونه ارخوم وان تسان قصدتس لبسه تراها مغير خمه وخمته في فترة شباب وبتعدي وينسى هالبس واسنينه وليد بدفاع لبسي مافيه شي غلط حمود :وليد انصحك انك تراجع نفسك بهداوه وبتعرف الغلط وينه فيه وانتي ياصيته دامتس معترفه بخطاتس اعتذري لولد عمتس صيته :ايه معترفه بخطاي وللهالحين بخطي زود ولو يموت ماعتذرتله وقامت اطلعت من المجلس حمود يضحك على حال وليد وهو كاتمن قهره من بنته وعلى عناد صيته واصرارها على الغلط رغم اعترافها ابه حمود حط يده على كتف وليد بحنيه ومحبه يابوك هاذي بنيتي الوحيده وفهيدان ولد عمتك حاطن عينه عليها وفهد انا اعرفه زين صلف وراسه يابس وانتسانك تبي حقك منها ابشربه اطلعه من عيونها مير انا ودي انك تسامحها ماودي والله اكسر شوكتها وهي بنيه خلها لاكبرت لهي جريه وتاخذ حقها بيدها بكره لامنها اعرست ماني داخلن بيتها معها هي ورجلها ولدري وش يجري عليها فيه من وراي علشان تسذا ماتعودت اني انهرها والااكسر خاطرها بشي علشان لاحتاجتني تجيني وماتستحي مني في شي وليد استحى من عمه وكبر في عينه انه من هالحين يحسب احساب لزواجها والرجال الي هي بتاخذه وهو شاف بعينه كيف ان نمر وفهد يحومون حولها وكلهم شخصياتهم قويه ومايهابون شي وصيته في شخصيتها ذي قدهم وليد مسموحه ياعمي مبي منها شي ولاكبرت وراحت لبيت رجالها حنا كلنا من وراها ولي يرشها بلماء نرشه بالدم حمود :بعدي ولدي وهذي الهقوه فيك يابومحمد وليد ابتسم لعمه ياالله اشكثر هالعم حنون ومتفهم حمود اسمع ياوليد بكره على خير ابيك تسرح معي للغنم وش قلت وليد انا معك وين ماتبي ياعمي صيته راحت سيده للمطبخ ولقت عمتها وهيفاء مشغولات بتقطيع والتجهيز للطبخ صيته :هاه عسى مافاتني شي ام وليد ابتسمت لامافاتك شي تونا نجهز تعالي قطعي مع هيفاء الخضروات علشان الايدام صيته ابشري يااحلى عمه هيفاء الله الله وقامت اتدلع صيته :اذا مادلعت عمتي مرت عمي الشيخ محمد من ادلع ام وليد :اها اجل تدلعيني بس علشان عمتس محمد صيته :ياعمه احمدي ربك جاتس من وراه دلع وزين عمي الله يرده لنا سالم ام وليد وهيفاء امين يارب | ||||||||
|
| |
|
29-09-16, 09:07 AM
| #27 | ||||||||
| مراقبة عامة ومشرفة منتدى الروايات المنقولة
| في صباح اليوم الثاني حمود مشى هو ووليد يم الحلال وليد من توفي جده حمدان ماشاف البر ولاطلعله وحتى يوم كانو يزورون جدهم حمدان في البر مايتعدون يومين بالعدد وبعد امهم ماتخليهم يتعدون الخيام يعني ماله في البر والحلال حمود لاحظ كيف وليد متقرف من الحلال وريحته ومع ذالك تعمد يطلب منه يساعده يحط معه العلف للغنم ويمسكله الشياه علشان يحلبها وليد طقت كبده من القرف الي هو فيه بس مايبي يطلع خكري قدام عمه زي مايشوفونه اهل الحاره كلهم واولهم صيته حمود خلص من حلب الشياه وحط لها العلف ونادى وليد حمود :تعال يابوك اخذ قارورة المويه هذي عبها تراب وحطها شاره بنرميها وليد :ماعرف لرمايه ياعمي حمود :وانا جايبك معي علشان ادربك على الرمايه وبعد بعلمك السواقه وان شاء الله ماتمشي من عندي الاورخصه السواقه معك وليد استانس حيل اخيرا بيطلع من السجن الي امه حاكرته فيه تقوله جد ياعمي حمود جد الجد وانا ابوك كل يوم باخذك معي صبح وعصر الصبح ادربك على الرمايه والعصر اعلمك السواقه وبنجي انا وياك الحالنا ولاتعلم احد وش نسوي عند الغنم الي ينشدك قل نروح نطعم الحلال ونرجع وليد حس ان عمه مايبي يحرجه او يعرضه لتعليقات من فهد وغيره علشان كذا قاله مايعلم احد بلي يسوونه عند الغنم وفعلا هذا هو قصد حمود مايبي احد يتمسخر على ولد اخوه او يحرجه بكلمه كذا والاكذا مر اسبوع كامل وحمود مستمر في تدريب وليد على الرمايه والسواقه وعلمه حتى ذبح الذبيحه وصلخها وكل مره يطلبون منه العيال انهم يروحون معه للغنم هو وليد وحمود يرفض ام وليد عرفت من وليد ليش عمه ياخذه للغنم وحست بأمتنان لحمود فعلا وليد محتاج لرجال يخاويه ويعلمه بعد ماكمل وليد اسبوع من التدريب صار حمود ياخذ راكان معهم ويدربه نفس مادرب وليد وبعد اسبوع ثاني صار ياخذ العيال كلهم او الي يبي الروحه منهم اما وليد صار المرافق الخاص لعمه وصار يحس انه صديقه موب عمه حمود يعامل وليد ببساطه يسولف معه ياخذ رايه يحترمه ويحسسه بقيمته وهذا الشي زاد من ثقة وليد بنفسه ورفع مكانت عمه في نفسه فوق وفي يوم جديد من ايام الحاره في صالة بيت حمود غزيل جالسه ومجلسه صيته قدامها وتحط على شعرها حناء يوم خلصت محنيته لفته كعكه ورا ولبستها قبوع قماش له اطراف طويله شوي تلفها من ورى الرقبه بعد ماتلبس القبوع ثم تردهن قدام وتربطها على مقدمة الراس صيته قامت من عند امها بعد ماخلصت وراحت يم الحوش وهي طالعه صادفت وليد طالع من المقلط وفي نفسها وع ذا وش مقعده اليوم صارله ثلاث اسابيع يوميا يروح مع ابوي للغنم وليد شم ريحة الحنا الي في شعرها لمى مرت من قدامه وليد يع وش ذالخياس قرف يقرفك انتي وشكلك دايم تجيبين الهم صيته وقفت واستدارت يمه المقرف انت واشكالك يالسحليه سبحان الله كل ماشفتك ماتذكر الاالورل والاالضب له شخصيه وليد :اي اكيد الضب له شخصيه ومطابقه لشخصيتك المقرفه قاله وتعداها طالع لباب الشارع صيته طقت في راسها فكره دخلت داخل البيت شافت امها وام وليد وعناد والبنات كلهن في الصاله يتقهوون وحدهم مندمجين في السوالف يعني مايمها احد دخلت المطبخ بخفه اخذت فنجال واترسته حنا من زود الحنا الي بقى في الطاسه بعد ماحنت شعرها وطلعت بخفه مثل مادخلت من غير ماحد ينتبه لها وليد جالس على عتبة الباب ويفكر في دراسته هل امه وابوه راح يسمحوله يطلع برا يدرس او لا ويحس امه متغيره معه والحصار الي فارضته عليه خف كثير ياترى علشان حنا في بيت عمي وماتبي تعارض عمي وهي في بيته والاوش القصه صيته جت تركض ونادته بصوت عالي وليد وليد فز واقف خرعته بصوتها وهو كان سرحان خير ماتعرفين تكلمين مثل الناس صيته وهي ماسكه الفنجال في يدها الااعرف اتكلم مثل الناس حتى اسمع وقالت بطريقه مسرحيه الي على شعري وش اسمه وليد مانتبه للفنجال الي في يدها وقال بطريقه مسرحيه يقلدها اسمه قرف صيته وبحركه سريعه ارفعت يدها وكتت الحنا على ملابس وليد وهي تقول هذا نصيبك من القرف جبته لك بنفسي كانت تبيه في وجهه بس حسافه جاء كله على صدره وقام يسيل على تحت وليد تنرفز حده سحب جزمته من رجله وحذف صيته وهو يهاوش ياكلبه ياوصخه وش ذالقرف جت الجزمه في ظهر صيته لانها كتت عليه الحنا وهربت تالمت من الظربه وبغت تطيح لاكنها تماسكت في اخر لحظه اخذت الجزمه واحذفت وليد لاكنه قدر يتفاداها جاء بيحذفها مره ثانيه لاكن صيته قيدها اختفت داخل وهي تحك ضهرها وجع يوجعك ياكلب بغى يكسر ضهري وليد نزل تيشرته ورماه في زباله واخذله ملابس وراح يتحمم هلا شافت صيته داخله عليهم الصاله تحكك قالت حشى قطوه موب بنت صيته لايشيخه الكتوه تاكلك لقمه وحده قالتها بلكاف اشاره لدلع هلا حلا بفزعه لختها يمه ديناصور مو قتوه استبدلت الطاء بالتاء تاكيد دلع هيفاء اشوف الصاله قلبت حديقة حيوان صيته من خواتس المايعات حلا قلتيها مايعات يعني شي يذكرك بشموع ورد عطر اي شي فيه رقه وحلاوه بس انتي يالقطوه جايه من زمن سابق مدري وشلون وصلتي زمنا بنات تتوقعون عندها الة التنقل عبر الزمن البنات بضحكه جماعيه هههههههههههههه صيته بسخريه ههه ضحكتيني والله اني فاهمه هالزمن اكثر منك يالي ماتعرفين الاانك تلوين فمك وتقولبين عيونك في خلق الله وع وش شوفت النفس ذي هلا موب شوفة نفس يالفاهمه بس في ناس مواستايل ابد كبودنا تحوم منهم غصب شنسوي هيفاء بس انتي وياها عيب عليكم صيته خليها تطلع الي في قلبها عادي ترا ماهتم بالحكي الي ماله قيمه غزيل وام وليد يسمعن ومايبن يدخلن في سوالف المبزره بس شافن السالفه طالت عن حدها غزيل صيته احترمي بنات عمك عيب كذا صيته انا ماغلطت على احد والي يغلط علي والله لاعطيه لين اغطيه ام وليد صادقه صيته هلا هي الي بدت بس عاد يابنات انتن بنات عم ولازم تكونن مع بعظ نفس الخوات هلا وحلا ناظرن بعض وبهمس وع مابقى الاذي تصير اختنا صيته استحت صادقه ياعمه والله اني ماشيل في قلبي شي على احد الاولدك العصل عجزت ابلعه ام وليد حرام عليك والله ان وليد حبوب وطيب صيته دام بتمدحون فيه خلوني اروح لشيخه اصرفلي وقامت اطلعت ماشافت وليد بس شافت باب الحمام(الله يكرمكم) مسكر وفيه صوت ماء معناته الدلوع يتروش راحت لبيت شيخه لقت باب الشارع مفتوح ونمر توه طالع منه ولمى شافها وقف على الباب نمر :هلا بصيته صيته طنشت الترحيب شيخه فيه نمر :ايه شيخه داخل وساره عندها صيته :طيب وخر عن الباب بدخل نمر :ولدعمك الخكري باقي يتلقف عليك صيته انقهرت هي ماتدانيه وتكرهه بس يبقى ولد عمها ولد عمي مهوب خكري ولو يتلقف علي لسنه الجايه انت مالك دخل نمر انقهر لا اشوف قايمه تدافعين عنه صيته اقول موب لازم توخر عن الباب وارجعت لبيتهم نمر يفكر وجع ذي وش قصدها من الي سوته الحين | ||||||||
|
| |
|
29-09-16, 09:08 AM
| #28 | ||||||||
| مراقبة عامة ومشرفة منتدى الروايات المنقولة
| رجعت صيته للبيت وهي داخله شافت وليد واقف قدام المغاسل يمشط شعره ولابس جنز ازرق مع تيشرت ابيض مرسم صيته تفكر الحين ذا وش سالفته مع ذا الشوشه منتفها تنتيف شي طويل وشي مسحوت وبعد لابس اساور في يدينه ياربي رجال ذا والاحرمه ياعلت كبدي شكله بعدين بيتهاوش مع حرمته على الاساور كل ماشافها شرت اجداد اكيد وده يلبسهم صيته كانت واقفه في نص الممر وتهوجس وليد انتبه ان صيته مسنتره وراه صار لها مده صارلك ساعه مبققه عيونك فيني لذي الدرجه معجبه صيته مابقى الاانت اعجب فيك لاوالله الاشفقانه على الي بتاخذك والله انها مسكينه هقوتي من كثر ماتخمخم اساورها وحلقانها بتلبس هي الثوب والشماغ وترتز بين الرياجيل بدالك وليد في لحظه اشتعل في اعصابه حريقه وصرخ باعلى صوته انكتمي ياكلب وحذفها بفرشات الشعر الي في يده بس من حسن حظها اخطتها لانها بمجرد مانهت كلامها دزت داخل ام وليد وخواته جن يركضن يشوفن وش فيه ام وليد وهي تشوف وليد يتحرك بعشوائيه في نفس المكان رايح جاي وحده مقهور شوي يشد شعره واشوي يزفر بقهر وحالته حاله خير ياوليد وش فيك وليد مايبي احد يعرف الكلام الي قالته له صيته عشان كذا صرف الموضوع مافيه شي يمه بس زهقان شوي هلا: والله ان القرده الي تو ادخلت قايله شي مخليه يتجنن كذا وليد بصرخه قلت مافيه شي خلاص ام وليد تأكدة ان صيته ناطله عليه كلام شين تعرفها زين السانها طويل وبعد تكره وليد بس دامه مايبي يتكلم في الموضوع خلاص كيفه هيفاء راحت لصيته اقدر اعرف انتي وش قايله لوليد ومخليته يعصب كذا صيته: انتي سألتي وليد هيفاء :امي اسئلته بس رفض يعلمنا صيته :خلاص دامنه ماعلمكم معناته مايبيكم تعرفون هيفاء : صيته بلا كلام فاضي انتي وش قلتي لوليد صيته :ماني بقايله وش قلتله ومالك دخل في الي قلته هيفاء بزعل الشرهه علي الي جايه اكلمك ووليد لااشوفك تزعلينه مره ثانيه صيته متى مابغيت ازعله زعلته وماني منتظره اذن منتس هيفاء قامت عنها وهي معصبه وتفكر ياربي هالبنت اذا استلعنت محد يقدر عليها وليد طلع من البيت كله وراح يتمشى على الشارع العام وهو حده زهقان ويفكر اف هالبنت لاتطاق انا ماني متخيل انها بنت عمي حمود شعلة وقاحه وقلت ذوق وكمل تمشي لحد ماأذن المغرب راح صلى ورجع البيت شاف سيارة عمه حمود برا معناته عمه وصل واكيد باقي في المسجد التفت وراه شاف حمود والعيال يطلعون من المسجد كمل يم البيت ووقف ينتظرهم على الباب حمود اول ماشاف وجه وليد عرف انه حده متنرفز واكيد صيته مصدر هالنرفزه ابتسم في وجه وليد يخفف عنه وحط يده على كتف وليد هاه متهاوش مع قطوتي وليد ابتسم على الكلمه غصب حرام عليك ياعمي ظلمت القطاوه قل لبوه يمكن اصدق محمد : صيته تشكل كل اشوي على شكل ماتثبت على حال واحد سالم يكمل كلام محمد مر لبوه مرات قطوه مر حمامه مرات نسره مر عصفوره مرات ديك ماتبلش الوجه الي تبيه تطلعه في ثواني فهد : حدكم عاد ترا معطيكم وجه من اليوم تحشون في زوجة المستقبل وانا ساكت وليد :الله يهني سعيد بسعيده ليتك تتزوجها من هالحين وتفكنا حمود :افا تبون الفكه من بنيتي والله انكم لتحلمون تجيبون زيها ومايحصلكم وليد :عن نفسي الله يبعدها عني فهد : انا احلم فيها هي مابي الي زيها حمود : ترانا معطينك وجه يافهيدان ولاتعلق نفسك بالبنت ترا والله ان قالت مابيه انك ماتشدها بيدك فهد : والله انها ان قالت لا ماتقوله الا من زود دلعك الها محمد :عاد البنت الوحيده عندنا يحقلها الدلع حمود رفع صوته ينادي وهو داخل للمجلس والعيال وراه ياصيته تعالي ياصيته صيته قيدها غسلت شعرها من الحنا وتسبحت وامها توها مخلصه من جديلتها سمعت صوت ابوها وجت للمجلس كانت معصبه اليوم كله كان مليان مشاكل ونكد وقفت على باب المجلس بصمت وهي تناظر فيهم فهد يبتسم لها وكانه يقول مشتاق وليد يناظرها بحده وكنه يقول اكرهتس محمد وسالم وتركي وراكان كانو يسولفون مع بعض وماهم يمها ابوها يبتسم لها وكنه يقول احبتس حمود :تعالي وراتس واقفه على الباب تسذا صيته :بس يبه زهقانه حمود :تعالي عندي جت وجلست قدام ابوها وميلت نفسها على صدره وحمود حط ايد على كتفها والثانيه يمسح فيها على شعرها هاه يام الصيت زهقانه والامسويه شي غلط وليد ركز كل حواسه معهم طريقة كلام حمود مع صيته وطريقة ردها عليه دايم تجذبه صيته : كلها يبه حمود :وش الغلط الي سويتيه صيته : ابي اخليه لنفسي حمود : طيب على راحتك المهم انك عارفه انك غلطتي والمفروض ماتكررين الغلط مره ثانيه والأهم انك تعتذرين من الي غلطتي عليه صيته :مابي اعتذر يبه حمود :ليه صيته ناظرت وليد بحقد كذا لعانه وقامت داخل حمود تاكد انها متهاوشه مع وليد وماحب يتكلم معه قدام العيال فهد وده يعرف وش بين صيته ووليد ماهي اول مره يتهاوشون بس الي مريحه نوعا ما انه مبين ان وليد مايطيق صيته وصيته نفس الشي بس وش سبب هوشاتهم اه بس لو اعرف | ||||||||
|
| |
|
29-09-16, 09:09 AM
| #29 | ||||||||
| مراقبة عامة ومشرفة منتدى الروايات المنقولة
| مرت سبعة اشهر من احتلال الكويت وحانت الان ساعة النصر في صباح يوم الخميس ظ،ظ¤ظ،ظ،/ظ§/ظ¢هجري اشرقت شمس النصر على الكويت وتحررت اكويت العز من ايدي المحتلين الغاصبين الخونه الشعب الكويتي والشعب السعودي ذالك الصباح اجتاحتهم فرحه لايعادلها فرحه كانو شعب واحد في بلدين وكانو بلدين بقلب واحد الفرحه عمة السعوديه والكويت الاغاني الوطنيه تبث على مدار الساعه الناس في الشوارع يباركون لبعض ويبشرون بعض المسيرات انطلقت في الشوارع تحمل علم الكويت وبجانبه علم السعوديه خلونا نشوف فرحة اهل الحاره بعد صلات الظهر والناس طالعين من المسجد مالهم سالفه الاالنصر والتحرير ويومهم يوم عيد كانو حمود وابو نمر وابو فهد واعيالهم واقفين قدام المسجد يتكلمون عن التحرير وشافو شباب كويتيين طالعين من المسجد حمود شاف الشباب ووجه كلامه لهم قرت اعيونكم ياهل الكويت وارتفعت اصوات الي معه بتبريكات الشباب الفرحه ماهي سايعتهم جو سلمو على احمود والي معه اكبر واحد في الشباب الله يبارك فيكم يارب ومبروك لكم بعد ابو نمر الله انه يبارك فيك يشهد الله ان فرحتنا بتحرير الكويت ماتقل عن فرحتكم الشاب الكويتي ادري والله ياعم ووقفتكم معنا ماننساها ابد هاه متى ناوين ترجعون للكويت الشاب طوالي ياعم الديره تحترينا وحنا اشتقنا لترابها حيل في الكويت كانت الفرحه غير فرحه من قلوب موجوعه مابقى بيت في الكويت الاودخله حزن الي اعيالهم راحو اسارى والي اعيالهم استشهدو والي بناتهم اغتصبن والي والي الجنود العراقيين اجرمو فيهم وماحترمو لادين والاجيره ذبحو الاطفال والمسنين انتهكو الاعراض هدمو البيوت والمباني مابقى اكويتي الاوارتكبت في حقه جريمه وجريمة احتلال الارض تكفي الجميع عما سواها رغم وجعهم رغم قلوبهم الي تنزف دم ماقدرو الاانهم يفرحون بتحرير الارض ولسان حال كل كويتي يقول الكويت الغاليه وكل مافقدناه فدوه لترابك يالكويت دمنا فدوه ارواحنا فدوه اعيالنا وبناتنا بعد فدوه الاالتراب اترابك ياكويت يبقى الاغلى عندنا كلنا انتهت الحرب وارجعو اهل الكويت لبلدهم وبدو مرحلة العمار والنهظه نحو مستقبل مشرق | ||||||||
|
| |
|
29-09-16, 09:10 AM
| #30 | ||||||||
| مراقبة عامة ومشرفة منتدى الروايات المنقولة
| في اليوم الثاني بعد التحرير كان يوم جمعه وفي بيت حمود في غرفة غزيل ام وليد جهزت اغراظك واغراظ النونو تصبري دقايق ويرجعون من الصلاه غزيل وهي تتألم من طلق الولاده عناد وينه ام وليد عناد مع هيفاء ومابه الاالعافيه خليك في نفسك لاتشيلين هم احد الاانتي دخلتي التاسع والا غزيل توني دخلته اه ياقلبي على عناد كمل عشره شهور ياخوفي يرفض الرضاعه من صدري ام وليد ان شاء الله يرضع من صدرك وتقر عينك فيه ويصير ولدك من الرضاعه صيته دخلت عليهن وتكلم بسرعه يمه ابوي وصل ام وليد لبست غزيل عبايتها واخذت الشنطه الي جهزة فيها الاغراض وطلعو مع حمود لالمستشفى في المستشفى دخلت غزيل غرفة الولاده وام وليد وحمود ينتظرون برا بعد نصف ساعه من الانتظار طلعت عليهم الدكتوره تبشرهم مبروك جالكم ولد حمود غزيل وشلونها يادكتوره الدكتوره الحمد لله المدام بخير والولاده طبيعيه والمولود كمان الحمد لله صحته ممتازه ام وليد دخلت عند غزيل بعد ماطلعوها غرفة التنويم مبروك ماجاك يام محمد غزيل الله يبارك فيك ماتدرين متى بيطلعوني من هنا ام وليد الحمد لله صحتك زينه والمولد بعد من فضل ربي بخير وبكره الصباح ان شاء الله تطلعين حمود ترك ام وليد مرافقه مع غزيل ورجع للبيت وهناك فرحتهم ماتوصف وليد :مبروك ياعمي ودامه ولد سمه زياد على وزن عناد حمود :الله يبارك فيك وتم اسمه زياد في اليوم الثاني طلعت غزيل وزياد من المستشفى وفي البيت فرشولها في الصاله وجهزو سرير النونو والكل ينتظر وصولهم من المستشفى عناد يبكي جوعان وهيفاء قامت تسويله حليب صيته :لا لاترظعينه علشان لاجت امي ترظعه هيفاء : والله ماخليه ينتظر زود مسكين جوعان لاجت عمه يمدي ترظعه لاجاع مره ثانيه واخيرا وصلت غزيل وام وليد ومعهم زياد والكل يرحب ويهلي وام فهد جابت القهوه والعصيده وترمس الحليب ابو حلبه وجلسو عند غزيل يتقهوون ويسولفون وعناد اول ماشاف غزيل رمى نفسه عليها مشتاق الها غزيل كان ودها ترظعه على طول بس هيفاء قالت لها توها مرظعته بعد ساعتين ونصف من الانتظار والتوتر جاع عناد وام محمد اخذته ترظعه من صدرها في البدايه صدد عنه وبعدين بدا يرضع صيته ركضت لبوها تبشره ان عناد رظع من امها وحمود من قو الفرحه خم مخباه وعطى صيته خمس مئة اريال ابشاره فرحتهم كلهم برظاع عناد اكبر بكثير من فرحتهم بمولد زياد بعدها بسبوع رجع ابو وليد من الحرب حمود اول ماشاف اخوه محمد داخل عليه من الباب خمه وظمه لصدره بقوه وصار يبوس خشمه وراسه وايدينه وعيونه تدمع من الفرحه كان خايف انه يفقد اخوه مثل مافقد ابوه قبله وابو وليد فرح باستقبال اخوه اله وندم على بعده عنه طول الفتره الماضيه وليد واخوه وخواته وحتى ام وليد فرحتهم برجعت محمد لاتوصف وفي نفس اليوم الي وصل فيه ابو وليد حمود ذبح ست ذبايح ثنتين لخوه محمد وثنتين تمايم زياد وثنتين شكر لله على ان عناد رضع من صدر غزيل وصار ولدهم شرعا من الرضاعه ابو وليد جلس في بيت اخوه حمود مدة اسبوع وكانو اهل الحاره يعزمونه يوميا غدا وعشاء لين ضيفوه كلهم وبعد ماكتمل الاسبوع رجع هو واهله لرياض وارجعت الحياة الى طبيعتها المدارس افتحت وكلن رجع لمدرسته وليد وابراهيم راحو يدرسون برا وراكان دخلته امه نادي رياضي بعد العصر والباقين حياتهم مستمره كلمعتاد | ||||||||
|
| |
|
| أدوات الموضوع | |
| انواع عرض الموضوع | |
|
|
415Likes
.png)
العرض العادي
