آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
29-10-16, 11:01 PM
| #41 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  الحلقة السادسة والثلاثون نمت شوية وصحيت الساعة 5 ظبطت حاجتى واتاكدت من شنطتى - بابا: خلى بالك من نفسك يا لولو - حاضر يا بابا - بابا: ولما اتصل تردى على طول - حاضر - ماما: خليكى مع جوزك ومنة وخلى بالك من نفسك و.. - محمد بيرن ثوانى - السلام عليكم - وعليكم السلام - انا جاى اخدك و ماتنزليش انا هطلع - ماشي - سلام - سلام وجه محمد وماما وبابا ادوله الالف وصية - يالا بينا؟ - يالا وروحنا للباص وقابلنا منة ومصطفي - خلونا نركب سوى كلنا في الكرسي اللى وره - مصطفي: لا ماينفعش متعب جدا - مش مشكلة بس نقعد مع بعض - محمد: لا يا عليا الطريق طويل جدا وهنتعب - ماشي - محمد:ماتزعليش بس والله متعب جدا وهتتعبي - ماشي خلاص وركبنا وكل الطلاب والدكاترة جم وركبت جمب الشباك علشان اتفرج حبة ولقيت بنت من دفعة سنة تالتة جاية وعمالة تتمرقع وتكلم محمد بمياصة - هو الطريق هياخد كام ساعة يا دكتور ؟ (وانتى شايفاه السواق ياختى جاية تساليه؟ ) - المفروض 8 ساعات ممكن اقل او اكتر - يااااه كتير اوى (خلاص ياختى روحى روحى بيتكم طالما كتير عليكى وكفاية مرقعة وقلة ادب ) - ــــــــــ - طب هو ايه البرنامج؟ - مش عارف والله انا جاى اتفسح زى زيكم - اه انا مبسوطة اوى انك جاى معانا (انك؟ هو بيلعب معاكى في الشارع؟ وبالنسبة لمراته اللى متلقحة جمبه ولا انتى نظرك ضعيف) - شكرا ربنا يعزك (هو ده اللى ربنا قدرك عليه ياخويا؟) - مودى خلينى اقعد جوه انا - طب اسيبك انا بقي دلوقتى يا دكتور باااااى (اه ياختى هش هش يارب يجيلك اسهال مفاجئ في مناخيرك وماتلاقيش مناديل يا بعيدة ) - كده احسن؟ قمت قعدت اتمايص انا كمان هيا يعنى جت عليا عالاقل انا مراته حلاله - اه ميرسي اوى يا دكتور - هههههههههههه انتى بتغيري؟ دى طالبة عندى - والله؟ طيب وقمت قايمة من مكانى وروحت لدكتور شريف دكتور فيزيا كان بيدينا في سنة اولى وسافر بعثة وكان لسه راجع - دكتور شريف ازى حضرتك - تمام الحمد لله ازيك انتى يا علياء - ياااااه حضرتك لسه فاكر اسمى؟ - اه طبعا انتى كنتى من اكفأ الطلاب اللى عندى ماقدرش انساكى - هههههههههههه اكفأ ؟ حضرتك طيب اوى يا دكتور - لا فعلا انا مش بجامل يمكن انتى من الناس القليلة اللى كنت بحس ان عندهم دماغ مش جمجمة فاضية - ربنا يكرمك يا دكتور يارب انا بس حبيت اقول لحضرتك حمد الله عالسلامة - الله يسلمك - عن اذنك يا دكتور - اتفضلى ورجعت وانا حاسة ان محمد بيطلع نار من مناخيره - اول واخر مرة يا علياء تعملى كده تانى انتى فاهمة؟ - ليه انا عملت ايه؟ ده كتور عندى لقيته قلب وشه وزعقلى - علياااااء كلامى يتسمع انتى فاهمة ؟ - فاهمة فاهمة (لا مش جبانة ولا حاجة بس من خاف سلم برده) وفضلنا قاعدين ساكتين حبة مش كنت قعدت جمب منة عالاقل كان فاتنا نازلين رغى طب اقولها تيجى الكرسي اللى جوه هيا كمان؟ لا حرام عمالين يتكلموا هيا ومصطفي بلاش اغلس عليهم اما محمد صاحب مصطفي مابيتعداش منه ليه؟ ويسيب اليت تتمرقع ويقوللى طالبة عالاقل انا كلمت الدكتور بكل ادب واحترام ولا هو حلال ليه وحرام عليا رحلة من اولها زى الفل لا وكمان لف وشه ناحية الشباك مقموص حضرته ييييييه هنفضل ساكتين كتير كده؟ بعت رسالة لمنة - محمد مخاصمنى اتصرفي لقيتها ردت عليا برسالة - مخاصمك ايه مانتوا كنتوا بتتكلموا الصبح عادى - اه ماهو لسخ مخاصمنى - انتوا لحقتوا؟ - اه واتصرفي بقي - ههههههه وانا مالى ماتلاقيكى انتى اللى زعلتيه - لا ماجتش جمبه - امال مخاصمك من غير سبب - لا زعل علشان روحت اقول لدكتور شريف حمد الله عالسلامة - لا مالوش حق !هتشلينى ما الراجل راجع من السفر بقاله شهرين او تلاتة حبكت تسيبي محمد قاعد وتروحيله - معرفش بقي المهم انه مخاصمنى - هههههه هفضل اعلم فيكى لامتى اتصرفي انتى وبس بقي مصطفي بيقول علينا مجانين - بقي كده تسيبي صاحبتك في وقت زنقة؟ - ههههه اه الى يغلط يصلح غلطته - طب ماتقوليش غلطت بس انتى ماشوفتيش البت اللى جت تتمرقع عليه - بلاش استعباط واعترفي بغلطتك - برده هتقوللى غلطت - اه غلطتى بطلى عند عالفاضي ولا انتى عايزة تتجوزى طرطور تروحى تسلمى على راجل غيره فيسقفلك - بت خليكى مع مصطفي بتاعك انا غلطانة اصلا انى بكلمك سيبتنى من منة اللى مافيش منها رجا طول عمرها ندلة ولفيت لمحمد - محمد؟ - ممممم (مش راضي يرد عدل ولا حتى بيبصلى) - جعان اجيبلك تاكل؟ - لا شكرا - طب انا جعانة - طيب كلى - مش بحب آكل لوحدى - ـــــــ - اه يانى يا بطنى اللى جعانة - قولتلك كلى - قولتلك مش بعرف آكل لوحدى - ــــــــــ مابيعبرنيش عااااااااااا بعتله رسالة انا زعلانة منك واتفضل صالحنى لفلى وقاللى - عارفة انتى بتفكرينى بمثل - ايه؟ - ضربنى وبكى وسبقنى واشتكى - ايه الامثال البيئة دى يا دكتور ؟ - هههههههههه بيئة ها؟ - شوفت بقي بتاخدنى في دوكة علشان انسي انى مخاصماك - ههههههههه دوكة؟ وبعدين انتى اللى زعلانة كمان - ايوة واتفضل صالحنى حلو - وانا مزعلك ليه هو انا اللى سبتك ورحت اسلم على راجل غريب - اولا ده الدكتور بتاعى ثانيا اشمعنى انت؟ - انا ايه؟ انا قمت حتى من مكانى؟ هنا بقي وطيت صوتى مش علشان خايفة لا علشان البت الممرقعة ماتشمتش فينا - لا بس فعدت تكلم البت المايصة - طالبة عندى بتسالنى ورديت عليها واطن رديت على اد الكلام ولا هزرت ولا فتحت معاها حوار - وانت ترد عليها ليه اصلا وهيا تيجى تسالك بتاع ايه ماعندها المشرفين عالرحلة تروح تسالهم - يمكن مش عارفة مين المشرفين او شافتهم مشغولين او او التمس لاخيك سبعين عذرا - حاضر حاضر هلتمس - هههههههههههه - بتضحك علي ايه؟ - علشان مش عارف ببقي انا اللى زعلان وينتهى بيا الامر بصالحك ازاى معرفش - والله؟ انت كده صالحتنى؟ واصلا اصلا انت بتصالح وحش - هههههههههههه طب علمينى اصالح حلو وانا اصالحك ياستى - كمان انا اللى هعلمك؟ تؤتؤ دانت حالتك ميؤس منها خالص - ههههههههههههه معلش حاولى وان شاء الله هكون تلميذ شاطر - لالا مافيش امل للاسف مافيش غير حل واحد - ايه هو؟ - انك مش تزعلنى تانى ابدا - ههههههههههههههههههههههههه ههه حاضر مش هروح اكلم دكاترة تانى ابدا وانتى قاعدة - شطوووووووور - هههههههههههه ماشي بس الكلام كان ليكى يا جارة لقيت رسالة من منة - ها ايه الاخبار؟ - اتصالحنا ياختى ولا الحوجة لاشكالك - هههههههه ماشي ربنا يهنى سعيد بسعيدة لقيت محمد بيكلمنى - هو بالنسبة للفطار كانت عزومة مراكبية ولا ايه؟ - يا سلام؟ مش قولت مش عايز - الكلام ده كان من شوية انما طاقتى كلها راحت في مصالحتك وجعت بقي - هههههههههه حاضر خد بالهنا وغصب عنى اه والله غصب عينى عينى جت عالبت المفعوصة اللى ماعندهاش حياء عمالة تبص على محمد - شايف البت قليلة الادب مانزلتش عنيها من عليك - مين دى؟ - ولقيته بيدور عليها وعمال يبص - ماتبصش امال فين غض البصر يا استاذ؟ - ههههههههههه حاضر , انا لو منك اغيظها وااكلنى في بؤى - ههههههههههه انت بتتلكك بقي - خلاص براحتك ده كان مجرد اقتراح انتى حرة قمت استجمعت كل ما املك من شجاعة واتاكدت ان ماحدش بيبص غيرها كله مركز في حاله وقمت اديته حتة ساندوتش في بؤه لقيتلكم البت ولعت وبصت قدامها والله معرفش خيبة ايه دى البنات بقت بجحة بجاحة لا وبتعاكسه قدامى عينى عينك مافيش حياء على راي المثل اللى اختشوا ماتوا - كملى - اكمل ايه؟ - مش هتأكلينى - لا كل من نفسك انت كبرت خلاص ولازم تعتمد على نفسك - ههههههه بقي كده؟ طب مش هاكل بقي وذنبي في رقبتك - اهئ اهئ كل بقي بالله عليك والله بؤحرج والله علشان خاطرى كل - حاضر علشان بس ماتتحرجيش قدام الناس شوفتى انا كويس معاكى ازاى؟ - ههههههههههه اه شطور خالص وحبة وكان فيه ولد ماشي في طرقة لاتوبيس الظاهر رايح لحد في كرسي تانى والراجل خد حتة مطب فاجاة والواد اتشقلللط وانا طبعا غصب عنى قولت يا حبيبي قوم مين سمعنى؟ سى محمد طبعا - نعم؟ مين ده اللى حبيبك ان شاء الله؟ - والله والله دى بتطلع غصب عنى والله العظيم لقيته ابتسم - يعنى علشان اسمعها منك اقوم ارمى نفسي من الاتوبيس - بعد الشر هو فاضل كتير عالغردقة؟ - ههههههه بتغيري الموضوع انتى خدت بالى عامة لسه بدرىىى يجى 6 ساعات - يااااه انا زهقت بقي وكمان عايزة انام انا صاحية من بدرى - طيب نامى - افرض وصلنا - ههههههههههه هتفضلى نايمة 6 ساعات يعنى ولا ايه؟ وعامة لو وصلنا هسيبك نايمة وانزل مش هقلقك - يا سلاااام ! ماشي وانا هرجع بورسعيد وخليك لوحدك في الغردقة - هههههههههه وانا اقدر برده؟ المهم نمت شوية وصحيت لقتنى نايمة على كتف محمد وشي طبعا سخن نااااااار يادى الفضيحة افرض حد شافنا هيقول علينا ايه؟ شلت كتفى من عليه - صباح الخير والحب والجمال - احم صباح النور هو عدى اد ايه - ههههههههه ساعة وربع ماتخافيش لسه بدرى المهم عدى الوقت واخيرا الحمد لله وصلنا ونزلنا في بيوت الشباب وطلع محمد ومصطفي حاجزينلنا سويت انا ومنة لوحدنا احسن برده علشان مانختلطش بحد تانى واتفقنا نطلع نرتاح وعلى بالليل ننزل نتغدى بره للاسف طلعت كل السويتات مش بتطل عالبحر وظبطنا المنبه ونمناااااااااا وصحينا بالليل بنلبس ونزلنا وقعدنا ساعة الا ربع مستنيين باقي الطالبات اللى بيتمكيجوا ويتزفتوا فوق دماغهم تقولش رايحين فرح والدكاترة المشرفين كانوا عايزين يقسموا الطلبة لمجموعات وكانوا عايزين يدوا لمحمد ومصطفي مجموعة - لالالا تدى لمين انا جاى انا ومصطفي نتفسح وبس مالناش دعوة بحد - ايوة يا عم يابختك وعقبالى - قر بقي الله اكبر - هههههههههه ماشي الله يسهلكم - على فكرة عادى ممكن ناخد حد معانا مش مشكلة - والله؟ طب اقوله يجيبلنا معانا كام بنت؟ - لا انا بقول خلينا براحتنا احسن - ههههههههههه اه بينا يا صاصا نخلع من الناس دى - طب انت عارف الاماكن؟ - ههههههههه عيب عليكى دانا صايع قديم وودانا مطعم اسمه فيش اند فيش - عااااااااا انا بكره السمك ويوم ما اسافر اروح مطعم سمك برده؟ - هههههههههه حد يكره السمك؟ - اااااه انا - منة:واناااااا - مصطفي: مش شرط تاكلوا سمك هو عنده كل الماكولات البحرية وعنده ملوخية بالجمبرى وشوربة سي فود تجنن - ماشي واكلنا وقعدنا نتمشي شوية وروحنا اشترينا زعانف وسنوركل لزوم المية بقي وكده - وانتى هتنزلى المية ان شاء الله ازاى؟ - ازاى ايه؟ - ماعنديش انا نزول مية - لا احنا ممكن ننزل بدرى خالص وماحدش في المية - ماشي ننزل بكرة سوى بقي ان شاء الله لقيته بيضحك معرفش ليه وفي الاخر روحنا النزل وطلعنا نمنا ومحمد ومصطفي قالوا هيسهروا مع باقي الدكاترة والطلبة يلعبوا تحت وطبعا نسيت اقولكم عالخمستاشر الف مكالمة اللى بابا وماما كلموهانى صحيت الصبح بدرررررررى من 4 الفجر ومش جايلي نوم تانى تقريبا علشان مش متعودة انام بره بيتنا مونى اصحى بقي انا زهقت يابت اتهدى انا نايمة متاخر مانا نايمة معاكى احنا هنستعبط ــــــــــــ يييييييه اصحى بقي الساعة بقت 6 يووووووووه الواحد مايعرفش ينام منك ابدا اصحى يابنتى خلينا ننزل المية علشان مش هنعرف ننزل لما الشباب يصحوا مية؟ في ثوانى هكون جاهزة هههههههههه انتى مسخرة ولبست عباية من ام كباسين علشان افتحها في المية اعرف اتحرك بيها وبعت لمحمد رسالة هنروح ننزل المية لما تصحى حصلنا وروحنا ونزلنا المية اللى كانت تحفففففففففة تحسي ان مية بورسعيد جمبها مية مجارى يالهوى عالجمال المية شفافة ياخوانا وفضلت العب انا والبت منة وفيه سمك صغنون حوالينا يااااانى عالحلاااااااااوة وفاجة حسيت رجلى اتزحلقت ومافيش تحتى ارض والله اعلم ايه اللى حصل بعد كده صحيت لقتنى في حتة غريبة كلها ابييييييييض في ابييييييييييض انا مت ولا ايه اجودعاااااااان بس ببص علي تيدى لقيت متعلقلى محلول تقريبا انا في المستشفي - هو ايه اللى حصل؟ ومين اللى جابنى هنا - عليا انتى فقتى؟ انتى كويسة يا حبيبتى؟ - ممممممم بس حاسة انى دايخة شوية هو حصل ايه؟ - اعمل فيكى ايه بس ماصحيتينيش ليه انزل معاكى؟ - انا قولت حرام اصحيك وانت نايم متاخر هو حصل ايه بس؟ - مش عارف انا صحيت على رسالتك ولبست وجيت لقيت منة بتصوت وبتشدك في المية - ممممممم انا بحط رجلى عالارض مالقتش ارض اتخضيت ودى اخر حاجة فاكراها - اه هو الدكتور قال انه اغمى عليكى وضغطك كان واطى جدا تقريبا من الخوف لان اصلا الملوحة عالية جدا المية بترفعك لوحدها ومافيش مية في الرئتين الحمد لله يعنى ماكنتيش بتغرقي اغمى عليكى بسفي المية - الحمد لله - حرام عليكى قلبي كان هيقف - بعد الشر عليك سلامة قلبك - بس عارفة احسن حاجة حصلت ايه؟ - ايه؟ - من شوية لقيتك عمالة تقولى محمد ماتسيبنيش ومحمد انا بحبك - نعم؟ انا؟ لالا انا اصلا اقصد يعنى قصدى يمكن - ههههههههههههههه اهدى اهدى بهزر معاكى - الله يسامحك وقفت قلبي - هههههههههههه واحدة بواحدة بقي - امال منة فين؟ - راحت تصلى الضهر - هو احنا لسه الضهر؟ - ههههههههههه الضهر بتاع تانى يوم يا حبيبتى انتى مغمى على سعادتك من امبارح - يا خبر ! وبابا وماما؟ - اتصلوا كتير جدا قفلت تليفونك وقلت انه فاصل قالولى ان معاكى الشاحن قولت انى اخدت الشاحن منك وانك في الاوضة بتاعة البنات مش هعرف اطلعلك والله يسامحنى بقي على كل الكدب ده خدى بقي طمنيهم - حاضر كلمت بابا وماما وطمنتهم عليا ولقيت منة جت - انتى صحيتى يا حبيبتى حمد الله عالسلامة - الله يسلمك - وقفتى قلبي حرام عليكى الحم لله ان الدكتور كان جاى - ههههههههههه واضح انى وقفت قلب كل الناس - هههههههههههه اه وكمان ضيعتى علينا يومين من الرحلة سعادتك عايزاكى بكرة تبقي زى القردة انا عايزة اخرج واتفسح مش جاية الغردقة اقضيها مستشفيات انا - ههههههههههههه ندلة طول عمرك - ندلة؟ ماطمرش فيكى انى بقالى يوم ونص على اعصابي وقاعدة جمبك يا جذمة - محمد: احم طب انا هخرج لمصطفي بقي - يالهوووووووى عالحب يا بت يا لولو لو شفتى محمد كان هيتجنن ومصطفي بيقول انه قعد يعيط ياعينى قطع قلبي - يا حبيبي يا محمد - ياختى كنتى قوليها وهو هنا حرام عليكى ده غلبان خالص وطلع معقد ياعينى من ساعة ما اهله ماتوا وبعدين مراته الاولانية - نعم؟ هو قال كده؟ - قال ايه؟ - جاب سيرة مراته؟ - لا مصطفي بيقول انه قعد يقول يارب احفظها وخليهالى يارب وانا ماليش غيرها وجام سيرة مامته وباباه وانه كل مايحب حد يسيبه - مممممممم ياعينى , تفتكرى لسه بيحبها؟ - هيا مين دى؟ - مراته الله يرحمها - بت ماتجننيش اديكى قولتى بنفسك الله يرحمها هتغيريى من واحدة خلاص ماتت وراحت لربنا - مش عارفة خايفة يكون لسه بيحبها وبيحاول ينساها بيا - هههههههههه ضحكتينى وربنا عالاقل هيا ماتت امال بقي هو يعمل ايه وانتى خطيبك السابق لسه عايش - عايش بس انا مابطيقهوش - وهو ايش عرفه؟ وبعدين ينسياها بيكى ازاى يا حسرة دانتى منشفة معاه الحياة عالاخر اتلهى دانا لو جوزك كنت بصيت بره يا شيخة - بت امشي روحى لجوزك ودخليلي جوزى - ههههههههههه ماشي يا حضرة المستعجلة وكفاية عليكم كده بقي بارتين في واحد اهو ايدى ورمت كتابة | ||||
|  |
|
29-10-16, 11:02 PM
| #42 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الحلقة السابعة والثلاثون منة خرجت وانا قعدت افكر في كلامها انا حتى ما بقولوش حاجة ومنشفاها عليه هو بجد ممكن يسيبنى؟ يروح يدور على حد تانى يشاغله انا بحبه بس مش عارفة كل اما اجى افكر حتى اقوله بحس لسانى بيتربط فك بقي يا لسانى فككككك لقيت محمد دخل عليا - محمد؟ - يا عيون محمد - انا ...انا... محمد ربنا يخليك ليا بجد - ومعرفش ايه اللى حصل لقتنى قعدت اعيط اعيط - مالك يا علياء؟شش اهدى بس يا حبيبتى انا جمبك اهو اهدىىىى - اوعى تسيبنى يا محمد بالله عليك ماتسيبنيش - ماتخافيش انا جمبك اهو والله مش رايح في حتة اهدى بس وفضل يحسسلي على شعرى لحد ما هديت خالص لقيت فونه بيرن - يا خبرر ده مصطفي انا نسيت خالص كان عايز يدخل وقولتله هخليكى تلبسي الطرحة عاجبك كده؟ - ولقيته جابلى الطرحة ولبسنى وسندنى قعدنى وبعدين راح ينده لمصطفي هو ومنة - مصطفي: حمد الله عالسلامة يا علياء - الله يسلمك ولقيت منة بتوشوشنى - كنتوا بتعملوا ايه؟ ها؟ هااااا؟ كنتوا بتعملوا ايه؟ - مصطفي: روح ريح انت يا محمد وانا ومنة قاعدين معاها اهو - لا روح انت يا بطل وخد مراتك انا قاعد مع مراتى ها؟ اخد بالك انت؟ - هههههههههه انت بتغير يا عم ؟ انا غلطان انك صعبت عليا انك مانمتش من امبارح - لا ياعم مايصعبش عليك غالى روحوا انتوا لقيت منة بتوطى عليا تانى توشوشنى - ايوة يا عم يابختك وااالعة وبعدين بعدت عنى وقالت لمصطفي - يالا نمشي احنا يا صاصا ونجيبلهم على بالليل وانتى انجزى عايزة اتفسح مش جاية الغردقة اقضيها في المستشفيات انا ومشيوا - انتى كويسة يا عليا؟ - الحمد لله - طيب خدى بقي كلمى بابا وماما احسن يشكوا في حاجة - ماشي - انا هروح اجيب عصير وجااى حسيت انه حب يسيبنى على راحتى رغم انى كان نفسي امسك ايده واقوله خليك جمبي اتصلت بماما - السلام عليكم - وعليكم السلام لولو يا حبيبتى انتى كويسة؟ - ايوة يا ماما الحمد لله - الحمد لله يارب قلبي كان واكلنى عليكى من امبارح - لا ماتخافيش يا ماما كان نفسي اوى تبقي معايا المية هنا حلوة اوى يا ماما ولا الاجانب في كل حتة حوالينا - ربنا يسعدك يابنتى يارب المهم اتبسطى انتى وخلى بالك من نفسك وخلى بالك من جوزك لواحدة من الاجانب تلف عليه وتاخده منك - ههههههههه اجانب ايه بس يا ماما ماهو كان فى انجلترا وقعد هناك كذا سنة - يابنتى اهو ربنا حماه تقومى انتى تضيعيه من ايدك هنا - ههههههههه حاضر يا ماما هخلى بالى منه حاضر امال بابا فين؟ - ابوكى نايم استنى اصحيه - لا يا ماما ماتصحيهوش - يابنتى ده كان قلقان عليكى اوى استنى - لا يا ماما لما يصحى خليه يكلمنى حرام بدل ماتصحيه - انتى تعبانة ولا سخنة ؟ - انا؟ لا ليه؟ - اصلك عاقلة اوى انهارده - ههههههه ماشي يا ماما الله يسامحك لقيت الدكتورة خبطت ودخلت خفت ماما تسمع حاجة - طيب يا ماما انا هقفل بقي علشان نازلين نتغدى بره سلام وقفلت السكة بسرعة لقيت محمد داخل وره الدكتوره وسالها - تقدر تخرج امتى يا دكتورة؟ - هيا خلاص بقت كويسة تقدر تمشي دلوقتى لو تحب - طيب فيه ادوية اجيهالها؟ - لا , بس اهتموا بتغذيتها كويس - حاضر والدكتورة مشت - هتقدرى نمشي؟ - ايوة اصلا زهقت من قعدة المستشفي - هههههههههه انتى لسه صاحية من شوية لحقتى تزهقى امال انا اعمل ايه؟ - ربنا يخليك ليا يارب - ويخليكى ليا . بس ايه مناسبة الدعوة الحلوة دى؟ - يا سلام؟ هو لازم مناسبة علشان ادعيلك - ههههههههههه لا ياستى ربنا يخلينا لبعض هسيبك بقي تغيري الهوم عندك في الشنطة دى وخرج وسابنى وروحت عالشنطكة لقيت فيها كلل الهدوم كله كله لبست وانا محروجة جدا وخرجت - هو مين اللى جابلى الهدوم؟ - انا خليت منة صاحبتك تجيبهم امبارح - الحمد لله - ليه في ايه؟ - ها؟ لا مافيش يالا؟ - طب اسندى عليا - لا انا خلاص كويسة همشي انا - ياعليا اسندى انا زى جوزك يا حبيبتى - مانا عارفة بس انا فعلا كويسة واقدر امشي ماتخافش - ماشي براحتك روحنا لقيت محمد بيتصل وبيقوللى - نزلى منة تاخد منى حاجة - حاجة ايه؟ - اكل يا عليا نزليها يالا - طيب ماتخلى مصطفي هو اللى يجيبه - يجيبه فين؟ - قصدى يديه لمنة - هههههههه حاضر - بتضحك على ايه؟ - على نفسي هههههههههه - والله؟ طب سلام - سلام يا حبي - ونزلت منة وجابت اكل بالهببببببل وقعدت تاكلنى في بؤى لحد ما اتنفخت تانى يوم روحنا اتفسحنا في شارع شيرى وبرده اتغدينا بره واحنا قاعدين في المطعم لقينا الطلاب داخلين علينا ونفس البت الممرقعة جت علينا - ايه ده يا دكتور انتوا هنا؟ ايه الصدف الحلوة دى؟ صدف؟ يا قرعة يا بنت الناس ال.... سامحنى يارب قمت خدت لقمة بالشوكة وادتها لمحمد في بؤه - طيب احنا هنطلب ترابيزة كبيرة ماتيجوا تقعدوا معانا - لا شكرا عايزين نقعد لوحدنا براحتنا وتقلت اوى على كلمة براحتنا يمكن البعيدة تحس - اه اوك عن اذنكم - احرجتى البنت يا علياء - والله؟ خايف على مشاعرها ؟ طب اتفضل روح اقعد معاهم - مش قصدى يا عليا اكيد بس كان ممكن ترفضي باسلوب احسن شوية - حاضر فضلت قاعدة ساكتة وبيتكلموا وانا اهز راسي وبس وخلصنا وروحنا واحنا تحت بيوت الشباب محمد ندهلى - عليا - نعم - انا اسف - على ايه؟ - على انى زعلتك - لا عادى - طب بتعيطى ليه دلوقتى؟ - مش بعيط دى حساسية - طب والله اسف وشوفي بقي اطلبي اى حاجة منى وانا هنفذهالك بس ماتزعليش - قولتلك مش زعلانة - بس تعرفي انا فرحان انك كلمتيها كده حسيت من كلامك انك بتحبينى وزى ماقولتلك براحتك قوليها لما تحسي انك عايزة تقوليها - محمد! - يا عيون وقلب محمد - احم - ههههههههه احم احم - طيب مش هنطلع بقي منظرنا مش لطيف - اه صح يقولوا ايه علينا راجل واقف مع مراته الساعة 10 بالليل ؟ يا الطار يا العار - ههههههههههه طب يالا - يالا يا حبيبتى وامرى لله ووصلنى لحد السلم - خلى بالك من نفسك لو حسيتى باى تعب كلمينى ماشي؟ - ماشي - احلفى - ههههههههه هكلمك والله - اى حاجة حتى لو تعب بسيط - حاااااضر - محمد! - ههههههههههه احم - هههههههههه بحبك وطلعت جررررى عالسلم وهو عمال ينده ولولا انه جناح للبنات بس اعتقد انه كان ممكن يطلع ورايا لقيت منة في الاوضة ايه مالك بتنهجى ليه؟ - ها؟ لا مافيش - انتى تعبانة؟ - ههههههههه لا ماتخافيش - طب وشك احمر ليه؟ - ها؟ عادى من الحر - حر؟ بت هو محمد قالك ايه تحت؟ - ماقالش حاجة ولقيت تليفونى بيرن ده محمد كنسلت - مين ؟ - محمد؟ - هو لحق؟ رن تانى كنسلت فضل يرن واكنسل - يابنتى ردى يمكن عايز حاجة ضرورى وفي الاخر بعتلى رسالة ردى لوقتى حالا والا هطلعلك الاوضة وربنا مجنون واعملها ييييييييييييه هرد بقي وامرى لله - السلام عليكم - انتى قولتى ايه؟ - ماقولتش - لا قولتى قولى بقي وحياتى عندك - وحياتى عندك - ههههههههه لا قولى انتى قولتى ايه عند السلم - ماقولتش - لا قولتى - تؤتؤ ماقولتش حاجة - لا قولتى انك بتحبينى - ممممممم - طب انا بقي بحبك اكتر وهخلى سها تغلس علينا كل يوم - سها مين؟ - الطالبة بتاعة المطعم - لا والله؟ وحضرتك عرفت اسمها منين بقي ان شاء الله؟ - هههههههههه مش طالبة عندى - وانت بتحفظ اسامى كل الطالبات؟ دانا بيتهيالى انت ماعرفتش اسمى غير لما جيت تخطبنى - ههههههههههه لا طبعا دانا عارف اسمك من قبل ما ادرسلك اساسا - اه وعارف اسم الاستاذة سها من امتى؟ - طب والله العظيم بحبك وبحب جنونك وطفولتك وغيرتك وبحب كل حاجة فيكى - احم - احم تانى ليييييييه؟ ماكنا خلاص فكينا الشفرة - عايز ايه يعنى؟ - عايز سلامتك - تسلملى يارب من كل سوء - الله الله عالدعوات الحلوة - احم طب يالا بقي علشان هنام - ماشي يا حبيبتي تصبحى على طاعة الله - وانت من اهل الجنة يااااارب - يااااارب سلام عليكم - وعليكم السلام وباقي الايام قضيتها فسح وخروجات وحسيت انى قربت اكتر من محمد طلع طفل جدا واقل كلمة تفرحه بس في عصبيته ياباااااااى وغيرته فظييييييعة وخلصت الرحلة وعلى اد ما ماما وبابا وحشونى لانى اول مرة ابعد عنهم على اد مازعلت روحنا بقي وخلاص الامتحانات عالابواااااااب وعلى وعد من محمد انه مش هيكلمنى خالص بتاتا اطلاقا الفترة دى علشان مايعطلنيش عن المذاكرة وما شاء الله في نفس اليوم بعدها بساعتين بالظبط كلمنى - والله؟ مش قولت مش هتكلمنى ؟ - وعليكم السلام , انا غلطان انى قولت اتطمن عليكى - هههههههههههههه لا خلاص انا تمام الحمد لله وبشد في شعرى اهو - بتذاكرى ايه؟ - عندى امتحان كيميا تفتكر هذاكر ايه؟ بيولوجى؟ - ياباااااى عليكى اقفلى اقفلى انا عيل اصلا انى كلمتك - واهون عليك تقفل في وشي وانا بذاكر وتعبانة - تعبانة مالك؟(قالها بخضة ياعينى مشاعره مرهفة اوى محمد ده!) - هههههههههههههههه تعبانة من المذاكرة يعنى - حرام عليكى يا عليا والله هتجبيلي القلب والسكر والضغط - بعد الشر عليك - خايفة عليا؟ - طبعا مش جوزى - والله؟ يعنى ايه تقضية واجب؟ انا هقفل قبل ما يجرالى حاجة فعلا سلام - سلام وده ماله ده كمان كنت دوستله على ديل !! مسم يالا اشوفكم بقي الحلقة اللى جاية | ||||
|
| |
|
29-10-16, 11:03 PM
| #43 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الحلقة الثامنة والثلاثون وجت فترة الامتحانات ومحمد عمل اللى عليه وزيادة وكان بيكلمنى مرتين تلاتة بس عالاقل يعنى وخلصت الامتحانااااااات - منة: اييييييوة بقي واخييييرا وداعا للكلية وواهلا بالحرية - هههههههههه بكرة ياختى تزهقى من قعدة البيت وتقولى ولا يوم من ايام الكلية - لالالالالا كلية ايه؟ قطيعة يا اوختشي انا عايزة اتجوز بقي - هههههههه عمرى ماشوفت حد مستعجل عالجواز زيك متسربعة على ايه؟ - كل ده ومتسربعة؟ عايزة اتجوز بقي واتلم انا وصاصتى في بيت واحد - يابنتى الجواز ده عبارة عن مسئولية وقرف - مالكيش دعوة انتى ياختى معقدة انا عايزة يبقي ليا بيت وانا اللى مسئولة عنه واولاد واكون اسرة هيييييييييييح - ههههههههه يادى الهيح بتاعتك دى عامة ربنا يسعدك - المهم عايزة ننزل نخلص حاجتى ونحجز لان صاصا قال لفرح كمان اسبوعين - يالهوى؟ بسرعة كده؟ - سرعة ايه يابنتى انا قبت اخلل جمبك داحنا كنا عايزين بعد الامتحانات على طول بس للاسف القاعة محجوزة , المهم امال انتوا ناويين امتى؟ - مين ناوى على ايه؟ - ههههههههه بالذمة بمخك ده انتى طالعة الاولى ازاى؟ - ههههههههه ماله مخى يابنتى - انتى ومحمد هتتجوزوا امتى؟ ولا ناويين تخللوا ان شاء الله - ههههههههه اه هنخلل انا كده مرتاحة لسه بدرى المهم خليكى في نفسك يا لوزة - ههههههههه يا صغيرة عالهم يا لوووووووزة - هههههههههههههه ولقينا مصطفي ومحمد جاين علينا - مصطفي: مونى مش يلا يا حبيبتي - طب وعلياء؟ - لا سيبيها ليهم ترتيبات تانية - مممم اوك سلام يا لولو ومشت جرررررى مع مصطفي وانا واقفة مكانى زى العبيطة - مش يالا احنا كمان؟ - اها يالا بس هيا منة ومصطفي رايحين فين؟ - مالناش دعوة راجل ومراته احنا مالنا - نعم؟ بتكلم جد هما رايحيين فين؟ - يا سااااتر مصطفي عامل لمنة خروجة حلوة بمناسبة انها خلصت امتحانات واخر سنة في الكلية وكده - اهاااااااا ماشي ولقيت محمد مش ماشي من طريق البيت - انت رايح فين؟ - مفاجأة - يعنى مش رايحيين البيت؟ - تؤتؤ هفسحك بقي فسحة تحلفي بيها طووووول عمرك - يا سلام! ليه انت مش هتفسحنى تانى ولا ايه؟ - هههههههه نفسي اعرف مخك ده شغال ازاى - كدهووووون ابتسم وهز راسه وسكت - طب مافيش نبذة مختصرة عن المفاجاة؟ - لا - طيب اى تلميح - لا - طب اى حاجة من الكنترول - برده لا - احسن اصلا مش عايزة اعرف - ههههههههههه اصلا مش هقولك - ياباااااى عليك قوللى بقي بالله عليك - لالالا - 3 لا؟ - ايوة - هتقوللى؟ - ههههههه لا ولقيت محمد وقف فاجاة - يلا وصلنا - وصلنا فين؟ - وصلنا هنا يالا انزلى - دى ملاهى - ايوة - ايوة ايه؟ احنا جايين نعمل ايه هنا؟ - هنتفسح - بتهزر صح؟ - لا ايه مالك؟ - انا بخاف من كل اللعب ومابركبش حاجة خالص - بجد؟ - اه والله بدوخ جدا - انا اسف انا عارف ان البنات بتحب الملاهى - لاماهو انا مش بنات - مابتركبيش حاجة خالص خالص؟ - كنت بركب العربيات زمان - طيب تعالى اركبك - لالا كبرت عالحوار ده - لا تعالى بس - اركبي - وانت هتركب فين؟ - جمبك - لالا جمبي ايه ؟العربية اصلا صغيرة - لا كبيرة هتكفينا - لالا اركب في عربية تانية - حاضر وامرى لله وركبنا وقعدت اخبط كل العربيات والف حوالين نفسي وكنت مسخررررة ومحمد ياعينى الظاهر صعبت عليه بقي كل ماحد يجى يدوسنى يقف في وشه ياخد هو الصدمة وخلصنا ومحمد جابلى غزل البنات وبالونة - طيب ماتيجى نلعب في بيت الرعب - لالالا اخاف - تخافي من ايه؟ انا معاكى اهو - لالا انا بخاف - مانا معاكى ماتخافيش انتى دخلتيه قبل كده؟ - ايوة وانا صغيرة خالص وشوفت عفريت وفضلت احلم بيه شهر كامل واعيط ومايجيليش نوم - لا لازم تقاومى خوفك تعالى هندخل سوى - لا يا محمد بلاش علشان خاطرى - ماتخافيش والله مش انتى بتثقي فيا؟ - لا - لا ايه؟ - عاااااا بلاش بلاااااااش - لا يالا جمى قلبك كده - اوووف ماشي دخلنا بيت الرعب وغمضت عينى وسمعت اصوات وحركات غريبة حواليا وقعدت اصوت وكلبشت في محمد - روحنى يا محمد انا عايزة اروح رووووووووووحنى اهئ اهئئئئئئ - طب اهدى بس وفتحى عينك والله مافيه حاجة فتحى بس - لااااااا انا عايزة اروح سمعت محمد بيكلم حد - معلش اقلع الماسك بس لانها خايفة وسمعت صوت حد غريب - ماتخافيش ده ماسك فتحى عينك بس فتحت عينى براحة لقيت واحد لابس شبه الزومبي وماسك في ايده الماسك - ها؟ صدقتينى؟ غير اراديا لقتنى بضربه وبقوله - بقي انت اللى كنت عامللى الرعب ده كله ومعقدنى من وانا صغيرة لقيت محمد بيمسكنى والراجل ياعينى عمال يعتذر وفاجاة نزلت عليا هيستيريا ضحك من حيث لا ادرى وعما فقت لقتنى في حضن محمد تقريبا - احم حاسب كده يالا نطلع وجريييييت بسرعة على بره واتخبطت في كل حاجة قدامى ووشي بقي استوووووووى - استنى بس استنى رايحة فين؟ - يالا نروح - لا نروح ايه ؟ لسه باقي المفاجاة - لا يالا اتاخرت وبابا وماما هيقلقوا عليا - لا ماتخافيش انا استاذنت من بابا وماما - يووووووه يعنى مافيش امل اروح؟ - لا (ياخبر ! هو انا كنت بتكلم بصوت عالى ؟) مالك وشك احمر ليه؟ - ها؟ لا عادى علشان بس كنت خايفة او علشان الجو حر او يمكن علشان دوخت شوية - هههههههههههه اه يمكن يمكن يمكن , اهدى ماحصلش حاجة - اوك مش يالا بينا بقي؟ - هههههههههه يالا ومشينا لحد ما وصلنا للمشي ولقيت محمد بيدخلنى من حتة عمرى ما شوفت حد بيدخل منها وبيقوللى يالا اركبي - اركب ايه؟ - اركبي اللنش - اهئ اهئئئ انا بدووووخ من المراكب والحاجات دى - لا بقي مش معقول - اعملك ايه يعنى؟ كنت اسالنى - ووكانت هتبقي مفاجأة ازاى؟ بس واضح انها كانت مفاجأة غير سارة, يعنى مابتركيش المعدية؟ - بركب بس لو مضطرة وبدوخ فيها برده علشان كده بكره بورفؤاد - طيب تعالى اركبي ومش هنمشي - لالا افرض وقعت - ماتخافيش انا معاكى اهو - انت بتعرف تعوم؟ - اه - بجد؟ - اه والله امال مين اللى انقذك في الغردقة؟ - ماشي وامرى لله - اركب انت الاول وركب محمد وبعدين مدلى ايده - لا انا هركب لوحدى ولسه جاية اركب اعتقد اتزحلقت نزلت في حضنه لا بقي عااااااااا الراجل يقول ايه؟ دى مقصودة بقي - على اد مانا مش حابب اقطلع اللحظة بس مش يالا؟ اكتشفت انى لسه في حضنه هو احنا ليه ماعندناش الاوبشن اننا ندفن راسنا في الرمل زى النعامة؟ فضلت ساكتة ولقيته مشي قعد عالترابيزة اللى كان عليها اكل وقعدنا اتغدينا واعتقد ان محمد كان بيتكلم بس بصراحة ماسمعتش منه ولا كلمة احراجى حتى نسانى انى قاعدة في مركب ونسانى الدوخة والتعب يارب مايفكرش انى قاصدة اكيد فكر انى قاصدة وقال انى بستعبط ياربىىىىىىى - عليا ... عليااااااا - ايه في ايه؟ - لا ابدا مافيش انتى عجبتك القعدة للدرجة؟ تحبي نفضل قاعدين شوية كمان؟ - ها؟لالا يالا المرة دى مسكت ايده وانا بخرج من المركب اهو ايده احسن - هو احنا مش مروحين بقي؟ - لا لسه - لسه ايه تانى ؟ كفاية كده بقي - لا متخافيش المفاجاة دى بقي هتعجبك وودانى دار ايتام ويانى عالاطفال وجمالهم وقعدت العب معاهم وطلع جايب لعب وحلويات وخلانى اوزع معاه وفرحت اوووى واحنا مروحين بقي - ها؟ اتبسطتى ؟ - اااه جدا جدااااااا ربنا يخليك ليا يارب - طيب الحمد لله اهو حاجة عجبتك بدل المفاجئات الوحشة - على فكرة كانت حلوة جدا كفاية انك فكرت فيا وازاى تفرحنى - انا على طول بفكر فيكى - ربنا يخليك ليا - صحيح منة قالتلك فرحهم امتى؟ - ايوة قالت بعد اسبوعين ان شاء الله - طب ماتيجى نعمل فرحنا معاهم - ايه؟ لا طببعا - لا ليه؟ طب حتى نخليه بعدهم بيوم واهو تخلصى حاجتك مع منة لانها بعدها اكيد هتنشغل في جوازها هيا - انا تعبانة اوى معلش نأجل الموضوع ليوم تانى , ماتيجى تطلع معايا - لا شكرا اتفضلى انتى طلعت البيت ياباااااااى الرجالة دول !! اف منهم بجد انا اعرف ان البنات هيا اللى بتبقي مستعجلة عالجواز دى خيبة ايه دى! ونممممممت بقي لحد تانى يوم واشوفكم بقي الحلقة اللى جاية | ||||
|
| |
|
29-10-16, 11:04 PM
| #44 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الحلقة التاسعة والثلاتون والاخيرة صحيت على موبايلي بيرن - السلام عليكم - وعليكم السلام بقيتى احسن دلوقتى؟ - الحمد لله - طيب ها ؟ هنعمل ايه في الفرح - فرح مين؟ - فرحنا يا عليا هنتجوز امتى؟ - يا محمد انت مستعجل على ايه؟ - مستعجل؟ - ايوة استنى عالاقل النتيجة تبان انا ماقدرش اتجوز ولا اعمل اى حاجة قبل النتيجة انا على اعصابي اساسا - ده على اساس انك لو لا قدر الله مثلا وقعتى في مادة هنلغى الجواز ولا ايه؟ - بعد الشر ايه اللى انت بتقوله ده؟ - انا اللى بقول؟ فعلا عندك حق انا اسف يا مدام علياء ولما تحبي تتجوزى ياريت تبقي تبلغينى مع السلامة وقفل السكة ياباااااااااااى طفل فعلا هما الرجالة كده يا تنفذى اللى هما عايزينه يا يقلبوا عليكى حاجة هم المهم انشغلت الفترة دى في التحضيرات مع منة ومحمد ماعبرنيش من ساعتها استغليت الفترة دى وقعدت اصلى قيام واستخارة وادعى يارب اكتبلى اللى فيه الخير ويوم الخميس بالليل لقيت ماما دخلتلى الاوضة - لولو هو انتوا متشاكلين انتى ومحمد؟ - ليه بتقوللى كده؟ - اصل بابا اتصل يأكد عليه يجى يتغدى بكرة زى كل جمعة اعتذر وقال مش فاضي - لا اصله بس علشان يعنى عنده تصحيح وكده فالفترة دى هتلاقيه مضغوط مش اكتر - مضغوووط؟ طيب يابنتى وقامت وهيا عالباب لقيتها لفت وقالتلى - علياء جوزك طيب وابن حلال , صالحى جوزك يابنتى ومشت بقي كده يا محمد ؟ اهون عليك كل ده ماتكلمنيش؟ يعنى للدرجادى؟ نزلت اليوم ده مع منة للكوافيرة بتعملها ماسكات - مالك مش على بعضك ليه؟ - ها؟ لا مافيش - انا نفسي اعرف انتى ليه مش عايزة تتجوزى - يابنتى مش مش عايزة بس عايزة بعد فترة يعنى فيها ايه لما نستمتع بحياتنا شوية الاول - ماتستمتعى يابنتى بعد الجواز دانتى غريبة وربنا - يابنتى اصلا الجواز بيدخل من الباب ينط الحب من الشباك - ده مين العبقرى اللى قالك كده ان شاء الله؟ - انا عارفة من نفسي - انتى معقدة والله ومش عارفة ليه؟ ماعندك باباكى ومامتك اهم خديهم مثل اعلى - بابا وماما دول حالة شاذة - طيب وبابايا ومامتى برده حالة شاذة؟ - ايوة يابنتى اهالينا دول مافيش زيهم - لا يا علياء يا حبيبتى دول الطبيعى اما بقي اللى بتتكلمى عنهم بقي هما الحالة الشاذة - طب اسالى باباكى كده لسه بيحب مامتك زى قبل الجواز؟ - ايوة يابنتى لسه بيحبها هو اكيد مش زى الاول لانه كان الاول معاه طيش الشباب انما دلوقتى بقي اهدى بس معاه عشرة ومودة ورحمة وسكن انتى مش متخيلة انا مستنية اللحظة اللى اتجوز فيها اد ايه - متخيلة ياختى متخيلة دانتى قرفتينى عايزة اتجوز عايزة اتجوز - طب بطلى تبصي على تليفونك واتصلى انتى - لا طبعا اذا كان قبل الجواز وبيعمل فيا كده هيعمل ايه بعد لما نتجوز - انتى حالة ميئوس منها الله يكون في عونك يا محمد - بقولك ايه سيبك منى وخليكى في اللى انتى فيه عدى باقي الاسبوع ومحمد لسه ماتصلش برده وانهاردة اهو الجمعة وفرح منة وهو برده ماكلمنيش صحيت من بدرى فطرت وجهزت هدومى اللى هروح بيها الفرح هروح مع منة الكوافير وابقي ارجع اغير واروحلها تانى علشان ماينفعش اكيد انزل بيهم من دلوقتى نزلت روحت لمنة ولما جه ميعاد الكوافير لقيت رسالة على موبايلي انزلوا انا مستنيكم تحت - مين؟ - ده محمد بيقول مستنينا تحت - ممممم يبقي هو اللى هيوصلنا - انتى كنتى عارفة؟ - لا صاصا قاللى هيخلى حد يوصلنا بس ماقاليش مين - طيب يالا نزلت وقولت - السلام عليكم - وعليكم السلام ركبت جمبه ومنة ورا وفضلنا طول السكة ساكتين وصلنا الكوافير ونزلنا وبعد ساعااات منة قربت تخلص مونى انا هروح اغير واجيلك طلعت بره لقيت محمد لسه واقف هو واقف من سااعتها؟ اركب معاه ولا ؟ ممكن يكون بس مستنى منة لقيته بيزمر روحت ركبت جمبه فضل ساكت برده - مش هتروح تغير؟ - هروح وارجعلك اخدك - طيب هتفضل مخاصمنى؟ - وصلنا انزلى هخلص واجيلك محمد مخاصمنى , عاااااااااااااااا لبست لقيت رسالة منه انا تحت لما تخلصى انزلى لا بقي ريلي؟ حتى مش عايز يسمع صوتى ؟! نزلت لقيته بسم الله ما شاء الله لابس البدلة ومظبط نفسه قمر ياخواتى قمررررررر حبيبي قمر يا ناس احم ركبت العربية - ما شاء الله حلوة اوى البدلة عليك - ________ روحت لمنة - ها قولى رايك بصراحة بالله عليكى - انتى مين يابنتى عدينى عايزة اشوف صاحبتى - يا علياء بقي بالله عليكى انا على اعصابي طلعت حلوة؟ - حلوة ايه يا بت؟ انتى جبتى الجمال ده كله منين يخرب عقلك دانتى بسم الله ما شاء الله ههههههههه الظاهر طلعتى حد تانى لما شلتى الجلخ - جلخ؟ اه يا معفنة - معفنة بس بموت فيكى - حبيبتى يا علياء انا مش عارفة من غيرك كنت هعمل ايه؟ - هتعيطى يا بت وتبوظى المكياج؟ ويبقي طبقتى مقولة شيل مكياج صاحبتك تلاقي رفعت ابن عمتك - هههههههههه جتك ضربة حاسبة يا بت عريسي فين؟ - هههههههه معرفش ياختى هو عريسك ولا عريسي؟ تلاقيه فاق في اخر لحظة وقرر ينفد بنفسه - بقي كده؟ ينفد ها؟ - ااااااه دراعي هيورم يا مفترية الله يكون في عونه مصطفي - مصطفي بيرن يبقي اكي بره يالا بسرعة - شوفوا البت؟ طب اتقلى شوية هتفضحينا - شكلى حلو بجد؟ - بصراحة يعنى في الواقع الواحد مارضاش يصدمك بس هيا يعنى الحلاوة حلاوة روح بس انتى طالعة حلوة قلبا وقالبا - عليااااء ! مردودالك يا علياء ليكى يوم - ههههههههههه مسيرك يا ملوخية تقعى تحت المخرطة يالا ياختى عريسك بره البسي الكاب اخلصى - وخرجت منة ركبت مع مصطفي وانا ركبت مع محمد اللى فضل ساكت برده وطبعا الفرح كان في قاعة منفصلة وروحت لقيت ماما هناك شوية وطلع مصطفي بصراحة مانساش تعابير وشه اول ما شاف منة ولا تعابير وشها وهو بيبوس راسها وبعد التهييص والذى منه والوداعات والعياطات نزلت منة روحت مع مصطفي والعاقبة عندكم في المسرات والعروسة للعريس والجرى للمتاعييس بس بصراحة الواحد اتفتحت نفسه عالجوااااز ماما وبابا قالوا هيحصلونا هما بعربيتنا ركبت مع محمد ساكت باشا اه اخو محمد على باشا عادى يعنى بعتله رسالة موافقة فضل سايق وماشافش التليفون - احم على فكرة انا موافقة لقيته بيبصلى باستغراب زى ماكون مجنونة - ايه؟ - موافقة على ايه؟ - على اننا نتجوز - اااااااه طيب - طيب مش هنحدد ميعاد الفرح؟ خد نفس طويل ووقف على جمب - انا عارف انك وافقتى وخلاص علشان تنهى الخصام وده انا اكيد مش عايزه انا عايزك توافقى لما تكونى فعلا حابة اننا نتجوز ويكون عندك استعداد تقضي باقي حياتك معايا ومتأكدة تماما من مشاعرك ناحيتى , ساعتها بس هنحدد الميعاد ولو يابنت الحلال حسيتى ان انا مش الانسان اللى بتحلمى تشاركيه الحياة قوليلي بصراحة بدل مانفضل نخدع بعض وساعتها انا عمرى ما هقف في طريق سعادتك - خلصت كلام؟ بصلى تانى باستغراب انا مافيش حد في الدنيا يقدر يجبرنى على شئ بس الفترة اللى فاتت لما كنت مخاصمنى عرفت قيمتك وحسيت اد ايه انا ...(يووووووه ماكنت بتكلم حصل ايه؟ ده وقته لسانى يقف) انا يعنى افتقدناك يعنى و .. و... حاسة ان قلبي بيسابق الصاروخ وبيدق يدددددق وقرب يخرج بره ووشي سخن ناااار - وايه؟ - ______ - ها؟ - حدد بقي الميعاد يا محمد ماتبقاش رخم بقي - هههههههههههههههههه ياربي والله انا اخرتى على ايدك يا هموت يا هيودونى مستشفي المجانين - بعد الشر عليك - طيب تحبي الفرح يبقي امتى؟ - براحتك - لاااااا براحتك انتى - طيب خلاص خليها بعد اسبوعين - اسبوعين؟ كتير اوى يا عليا - عما الحق اخلص حاجتى والله - يووووووووه ماقولتلك كنتى خلصتيها مع منة - معلش بقي قدر الله وما شاء فعل - طيب مبروك - على ايه مش لسه - هههههههههه حضرتك نجحتى وكالعادة الاولى عالدفعة وهتتعينى مبروك يا دكتورة - بجد؟ متأكد؟ - اه والله جبتهالك من الكنترول بنفسي - وكل ده وساكت؟ - مانا خفت اقولك تفتكرى انى بستعجلك عالجواز - ياااااه هتعين بجد الله الله عالاخبار الحلوة اطلع بقي خلينى افرح ماما وبابا ونجرى بقي الاحداث شوية خلصت حاجتى كلها وحجزت انا وماما وحرام من تانى اسبوع منة نزلت معايا وخلاص انهاردة الفرح وقلبي قرب يقف وحاسة ان الاحداث بتجرى من حواليا وانا مش حاسة بنفسي وروحت الكوافير ومحمد جه خدنى وروحت القاعة والناس بتباركلى حاسة كانى بتفرج على فيلم وحد عمال يجرى الاحداث واوبااااااا احنا في السكة لبيتنا طول الطريق قعدت ادرب نفسي انا اول ما هدخل من باب البيت هقوله محمد انا بحبك ايوة هقوله هو خلاص جوزى هقوله بحبك عاى يعنى زى اى كلمة مانا بقول لمنة بحبك وبقول لماما وبابا عادى اول ما دخلنا من باب الشقة فضلت متنحة ولسانى وقف - مبروك يا احلى زوجة في الدنيا عليا مالك؟ اوعى بالله عليكى يغمى عليكى بصى براحة خالص وماتخافيش ولو تحبي بس نصلى ركعتين وهختفي من بعدها من قدامك لحد بكرة عنيا بدأت تدمع - عليا انتى كويسة؟ هزيت راسي باه - طيب تقدرى تروحى تتوضي؟ هزيت راسي تانى باه دخلت الاوضة واتوضيت بالفستان بغض النظر انى بهدلته بس ده كان حلم حياتى اصلى ورا جوزى بالفستان خرجت ومحمد صلى بيا امام وحط ايده على جبهة راسي وحسيت بنار مكان ايده وقال الدعاء وبعدها لقيته راح خد بجامة ورايح الاوضة التانية وانا واقفة مكانى ياعينى عليك يا محمد , يا عليااااء فوقي بقي فوووقي ادينى المين ياربي؟ خدت قرار شجاع وخدلت الاوضة اغير لقيت ماما حطالى حتة بتاع البسه لبست وامرى لله ورايحة الاوضة التانية ياربي باللى انا مش لابساه ده هيقول عليا ايه؟ يوووووه يارب قوينى قوينى ايه؟ يخربيت قلة ادبي لالا عادى محمد جوزى محمد ايه؟ جووووووزى لقيت محمد اول ماشافنى اتصدم وفضل مبحلقلى اروح الاوضة تانى ولا ايه؟ ارجع؟ لالا خلينى لا انا هروح لا انا شجاعة لااااا لقيت محمد قام وقف قدامى - بحبك اووووى اوى اوى اوووووووى - وانا كمان - انتى ايه؟ - انا .. انا هروح الاوضة التانية - لالا تعالى هو دخول الحمام زى خروجه؟ وهنا بقي بيتك بيتك يا شابة منك ليها راجل ومراته مع بعض مالكم انتوا؟ - يا علياااااااااا يا علياااااا - ايه؟ ششششششش انا ما صدقت نيمت حازم - بتعملى ايه؟ - بكتب قصة حبنا على فتكات - طب وقولتلك انهم كنتى مطلعة عينى؟ - انا؟ دول كلهم عارفين انك رخم ومسميينك رخامة اصلا زيى - بقي انا رخم؟ - كنت يا حبيبي كنت - هههههههههه طب انتى قولتى حازم فين؟ - نايم في الاوضة - طيب تعالى بقي اوضتنا اما اوريكى مين اللى رخم - لالالالا انا خلاص استنى لما نتغدى بس - غدا ايه دلوقتى تعالى الاول هقولك بس كلمة - ههههههههههه انت مابتشبعش كلام ابدا - حد يشبع من الحلويات دى بذمتك؟ احم نعتذر عن قطع المشهد الظاهر فيه تشويش في القمر الصناعى شششششششش المهم بقي فاكرين لما قولتلكم في اول القصة ان قصتنا بدات بخناقة؟ ايوة كانت يوم المحاضرة لما هزقنى سعادته طبعا كلكم فكرتوا انى كان قصدى هشام هشام مين؟ انا اول مرة اسمع الاسم ده انا حياتى بدات من يوم ماعرفت محمد حازم بقي حبيبي بكرة هيكمل السنة وطبعا ماتفتكروش ان كل الحياة كانت وردى هيا ككانت كلها شد وجذب وخصوصا ان محمد عصبي موت وبيغير موووووت مووووت وانا طبعا كمان ماكنتش بسكتله هو والبنات الممرقعة وافتكر اول شكلة لينا لما عرفت انى حامل ومحمد كان مصمم اسيب الشغل بس انا نشفت دماغى ونزلت وهو اسبوع ونص بالظبط وكنت فرفرت وقعدت في البيت اقعد اه انما بمزاجى انا ودى كانت حكايتنا بس كده النهاية تمت بحمد الله رائـــيــكم ؟؟ التعديل الأخير تم بواسطة لامارا ; 02-11-16 الساعة 10:40 PM | ||||
|
| |
|
25-06-17, 04:23 PM
| #45 | ||||||||||
| مشرفة منتدى الروايات والقصص المنقولةومنتدى الـروايــات الـعـربـيـةوعضو مميزفي القسم الطبي وفراشة الروايات المنقولةومشاركة بمسابقة الرد الأول ومحررة بالجريدة الأدبية 
|   | ||||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
