29-03-17, 03:48 PM
| #1 | ||||
| كاتبة في منتدى الروايات والقصص المنقولة 
|  تجاعيد الزمن *مكتملة* السلام عليكم ورحمة الله وبركاته انتهيت بحمد الله من كتابة روايتي الاولى صيته ظبي النفود وهذا انا اطل عليكم من جديد بروايه جديده وفكره جديده اتمنى تعجبكم يسعدني ان اقدم لكم روايتي الثانيه تجاعيد الزمن ماراح اطول في المقدمه وراح اخلي الروايه تتكلم عن نفسها بارت اليوم قصير نوعا ماء فقط انها البدايه ان شاء الله راح انزل كل اسبوع بارت واحد والاسبوع الي اتحمس فيه راح انزل بارتين  تجاعيد الزمن انا وضحى العجوز الي رجل في الدنياء ورجل في الاخره زي مايقولون الناس عن العجائز قدامي منول كانو ينادوني وضحى ثم بعد ماصرت ام صارو ينادوني ام غلاب وهالحين صار كلن ينطل علي اسم من عنده عجوز قريح عجوز عرعر اعجيزنا ادري ادري بتقولون هذا الصدق انتي عجوز ايه انا عجوز بس الي اسم والي كنيه تنادوني ابها وشهوله تقولون العجوز جت العجوز راحت تراها تجرح وتعور في القلب واقفه قدام المرايه تناظر نفسها وتمسح على صدرها بيدها منول كان هالصدر مرتز كنه حب الرمان واليوم يتدلى مثل قربة الراعي ثم امسحت على شعرها القليل بيدها منول كان هالشعر مثل شلال الحرير غزير وناعم واسود سواد الليل واليوم كنه ليفة دلة القهوه اجمعه كله بين اصبعين ولونه خليط من لون الحناء ولون الشيب ارفعت يدها قدام وجهها واحزنها كيف تكرمش جلدها وامتلت تجاعيد هذي هي تجاعيد الزمن تعلمني ان الزين اقفى كله ومابقى الا العمل الصالح والعيال البارين ياعزتي للي ماعنده اولدن يبر فيه سمعت صوت باب غرفتها يفتح وابتعدت عن المرايه بسرعه كأن وقوفها قدامها تهمه رجساء : يمه تبين شي ام غلاب : لامبى شي وين بتروحين رجساء : ماني برايحه مكان بس شفتك ابطيتي في الغرفه قلت يمكن تبين شي ام غلاب : ابجي هالحين لفت على راسها شيله خفيفه والبست من فوقها المروجل ( قطعة قماش سودا مثلثه نفس شكل الشماغ المثلث بس من اقماش حرير اسود عادي ) اسمعت اصوات اهواش في الصاله واطلعت تشوف وش فيه رغم كبر سنها مازالت صحتها جيده طويله تميل لنحف بعكس بنتها رجساء المكتضه بالشحوم في الصاله ام ريان ماسكه جبهة ولدها ريان بمنديل وواضح انه مفلوق وتصيح على الشغاله باعلى صوتها : ياشمس وين شنطة الاسعافات لمتى وانا انادي ريان واهو معصب : يمه ترا كلها جرح بسيط فكيني خليني اروح ادبغ الفقراوي الوصخ ريماس بضحكه : ياشيخ سلملي عليه الي دبغك انا اشهد انه جابها صح في الجبهه يالطواقي ريان بعصبيه :اقول انقلعي لاقوم اكسر راسك ام ريان : بس انت وياها هذا الي اخذناه من الكوره الهواش والتخلف (ريماس تشجع النصر وريان يشجع الهلال والخرابيط الي قالوها حسب ماشوف واسمع من المشجعين وانا ماحب التشجيع لاحد يقول انتي مع الفريق العلاني والاالفريق الفلاني المباريات الي راح يجي ذكرها في الروايه مالها علاقه في الفريقين مجرد نتايج وارقام من راسي وابشركم مافهم في الدوري السعودي فتكفون لحد يوجع راسي ببطولات فريقه ) ادخلت الصاله بخطوات هاديه بطيئه نسبيا وعينها على جبين حفيدها ريان الي مبين انه مفلوق حست بألم يعتصر قلبها فهذا اكبر احفادها الذكور وله معزه خاصه اقتربت منه حتى وقفت قريب عنده : راسك وش فيه من الي فالقك عسى يده للكسر ام ريان بقهر على ولدها : هذي ادروب الكوره ياعمه ريان :اف حسستوني جايكم مصوب من الحد الجنوبي ام غلاب بحنق : ياليت كان نفتخر فيك ونشيلك على روسنا ياصويب الكوره والله من الردى ام ريان تنظف الجرح وتلف عليه شاش بقهر :تخسون انت والدشير الي افلقوك ترحون للحد الجنوبي ريان : وشوله نروح اصلا الي هناك يسدون ريماس : هههههههههههه في الكوره وتفلقتو الله يغني الوطن عنكم ياشيخ لايروح من كيسنا رجساء :السلق الثانين وين لايجون مفلقين بعد ريان ناظرها بقهر : يعني انا سلقه ريماس : ههههههههههههههههه منذو مبطي من سؤ حضها ان امها انتهت من لف الشاش على راسه نقز من جنب امه بقهر وهجم عليها وبدت مضاربه عنيفه بينهم ام غلاب : بس انت وياها يالي ماتستحون قرو في الارض ياورع اترك اختك يابنت فكي شوشته ام ريان ورجساء يفرقون بينهم على صوت خالد ينادي : ياهوه ياعرب اتركو ريماس وريان بعض خوف من عمهم الي جاء وباقي يتشاتمون ام ريان طول اليوم طرحتها ملفوفه على راسها وبرقعها على وجهها علشان حموانها اخوان زوجها ساكنين معهم في نفس البيت اخذت شرشفها والتفت فيه :ادخل خالد قيده سمع اهواش ريماس وريان وبصرخه : بس انت وياها اذا مانكم قد التشجيع لاتشجعون ريان : بسخريه جاكم الصحفي الرياضي الي مايفهم في الرياضه شي خالد : مفهم في الرياضه شي علشاني ضد التعصب والهمجيه الي انتم عايشين فيها بزعم التشجيع ريماس بقهر : عمي تكفى اترك عنك الصحف الرياضيه وشف شي ثاني تغطيه ياخي ترا عندنا حرب في الجنوب رح شف الجنود الضعوف وش ناقصهم وتكلم عنهم ريان بحماس للفكره : اول مره هالفقراويه تقول شي صح ترا ازعجوني الطلاب في المدرسه عمك ابثرنا عمك حوم اكبودنا واهو مايفهم في الكوره شي خالد : هالحين علشاني انقد التعصب الرياضي والهمجيه في التشجيع صرت ماأفهم في الكوره وبعدين شف جبهتك كيف صارت كنها طماطه مفقوعه كله بسبة التعصب الغبي الي انتم عايشين فيه بعد ماشفنا لمحه صغيره من حياة عائلة غلاب نجي لتعريف بالشخصيات الجده وضحى عمرها خمسه وستين سنه مازالت بصحه جيده رغم كبر سنها غلاب اكبر اعيال الجده عمره ثلاثه واربعين سنه مدرس متزوج من ساره عمرها سبعه وثلاثين سنه اعيالهم ريان عمره خمسة عشر سنه مشجع متعصب للهلال ذكي ومتفوق دراسيا يطمح لان يكون دكتور جراح في المستقبل بنتهم ريماس ثلاثة عشر سنه مشجعه متعصبه لنصر ذكيه جميله دلوعه تجيد الرسم واصغر من ريماس ولد ثاني اسمه هاني عمره تسع سنوات يشجع الهلال اصغر منه بنت اسمها دانه عمرها ست سنوات رجساء بنت الجده الثانيه عمرها اربعين سنه ارمله زوجها له سنتين متوفي في حادث سياره وحاليا عايشه في بيت اخوها غلاب الي هو اساسا بيت العائله الكبير ووارثينه عن ابوهم عندها بنت عمرها عشرين سنه تدرس في الجامعه اسمها روان واصغر منها بنت عمرها خمسة عشر عام اسمها جمانه وريان راضع مع جمانه ولدها الوحيد فراس عمره تسع سنوات وهاني راضع مع فراس سبب ارضاع رجساء لعيال اخوها هو اصرار بنتها روان على انها ترضعهم علشان لاكبرو ماتتغطى عنهم ولنفس السبب ام ريان ارضعت فراس ولد الجده الثاني خالد صحفي في جريده رياضيه مناصر للاخلاق الرياضيه السويه ويحارب التعصب الرياضي علشان كذا المشجعين مايحبونه عمره ثلاثين سنه ولد الجده الثالث نواف عمره خمسه وعشرين سنه ميكانيكي شاطر مخلص الثانويه وماقبلته الجامعه لان معدله منخفض طموح عنيد وصبور واخر شي يفكر فيه كلام الناس الي ياما سبوه وقللو من قيمته فقط لانه يشتغل في ورشه تصليح سيارات جميع هاؤلا يسكنون في نفس البيت باقي الشخصيات راح تضهر في الوقت المناسب روابط الفصول الفصل الأول ج1... اعلاه الفصل الأول ج 2... بالأسفل الفصل الثاني الفصل الثالث الفصل الرابع الفصل الخامس الفصل السادس الفصل السابع الفصل الثامن الفصل التاسع الفصل العاشر الفصل الحادي عشر الفصل الثاني عشر الفصل الثالث عشر الفصل الرابع عشر الخامس عشر الفصل السادس عشر الفصل السابع عشر الثامن عشر الفصل التاسع عشر الفصل العشرون الفصل الحادي والعشرون الفصل الثاني والعشرون الفصل الثالث والعشرون الفصل الرابع والعشرون الفصل الخامس والعشرون الفصل السادس والعشرون الفصل السابع والعشرون الفصل الثامن والعشرون الفصل التاسع والعشرون الفصل الثلاثون الفصل الحادي والثلاثون الفصل الثاني والثلاثون الفصل الثالث والثلاثون الفصل 34، 35 الفصل السادس والثلاثون الفصل السابع والثلاثون الفصل الثامن والثلاثون والاخير التعديل الأخير تم بواسطة كاردينيا الغوازي ; 29-01-18 الساعة 08:13 PM | ||||
|  |
|
29-03-17, 04:33 PM
| #2 | ||||||||
| مراقبة عامة ومشرفة منتدى الروايات المنقولة  
| السلام عليكم ورحمة الله وبركاته حيا الله نبض أفكاري وياهلا بالحامل والمحمول منور الوحي ياعسل وسجليني من متابعينك إن شاء الله ههههههههه لازم أشوف وش بتسوين في ولدي علاب وعياله ماشاء الله غلاب جاء له بنت وولد غير عياله اللي أعرفهم وماحد علمني ههههههههههههه الجده وضحى يازين الجدات ياناس خاصه اللي مثل وضحى واضح إنها حبوبه وخفيفة دم ربي يسعدها ام غلاب غلاب عاد هذا ولدي بالرضاعه وولدها الله يحفظه لنا ريان ياشين التعصب للكوره خلك في دراستك ماراح ينفعونك اللاعبين ولا الكوره اللي غير كل يوم والثاني أصابات هذا عيالي اللي واحد بيسوي عملية رباط في رجله والثاني ناوي يلحقه كل يوم اصابه شكل وياليتهم لماهم مكسرين عمارهم في نادي والا المنتخب إلا ماغير هوايه ولعب مامن وراه فايده ريماس ريان ولد وبعذره لكن أنت بنت وبتجننين على الكوره وتحارشين ألمجنون أخوك ليه صدق تستاهلين الدبغ من ريان نواف العمل ماهو عيب وأترك كلام الناس عنك المهم عمل شريف تترزق الله منه والله بعض الأعمال الحره أفضل من الوظيفه من دخل وغيره ولا أحد يتحكم بك أنت حر نفسك أستمر في عملك وياجبل مايهزك ريح خالد بيض الله وجهك وأكتب الصح وماعليك في أحد ولا تجامل ولا تنافق تسلم يمينك نبض ومنتظرين بقية الأحداث وأبطالنا الباقين | ||||||||
|
| |
|
29-03-17, 10:28 PM
| #3 | ||||
| اهلاً وسهلاً كاتبتنا { نبض } ومبروك مولودتك الثانيه… بدايه موفقه نجي للجده واعليه مسكينه جالسه تقارن صورتها الحاليه بصورتها ايام شبابها… . التقدم في السن مايرحم… ولازم تبان أثاره… بس شكلها حليووه هـ الجده وراح نستمتع بقصتها مع اولادها واحفادها… عيال غلاب فاهمين حبهم للكوره غلط… اكره شي اشوف ناس متعصبه للكوره ترى انا اكره الكوره وسنينها… ريان خلك في دراستك حب الكوره ماقلنا لا بس بحدود… ريماس اتركي عنك في الكوره ولا تنسين انك بنوووته واهتمي بـ أنوثتك افضل… خالد انت صح موفق في شغلك… نواف ان شاءالله في المستقبل راح تكون شيئ كبير وراح تبدع في مجالك… والناس عطها اذن من طين واذن من عجين .. نبض تسلمين على البارت… بـ انتظار ابداعك… | ||||
|
| |
|
29-03-17, 10:59 PM
| #5 | ||||
| نجم روايتي وفراشة الروايات المنقولة 
| مبروك نبض روايتك الثانيه بدايه موفقه وضحى ومقارنتها لنفسها كيف كانت ومااصبحت اليوم واضح انها تتحسر على شبابها وبنفس الوقت صراحتها مع الناس مضايقتهم فلذلك بداوا يلقبونها بالقاب العجائز اما عائلتها فالحلو انهم كلهم حوليها من اولاد لاحفاد حتى ابنتها الارمله تعيش معها الي اختارت هي وزوجه اخيها الكبير غلاب ان يجعلوا ابنائهم اخوه بالرضاعه ليبقوهم بحريتم مع بعض دون وجود حواجز \\\\حبيت مناقشه الاحفاد ومقاتلتهم على الكره وهذا مايحصل بكثير من البيوت وخاصه اذا كان كل واحد يشجع فريق ام خالد فمعه حق هو صحفي رياضه ولكن عقله الكبير يرفض العنف والتعصب وهذا رائ مزبوط فالرياضه اخلاق ولكن للاسف تعصبنا جعلنا نخرج عن هذه الاخلاق واعتقد بالفعل خالد يجب ان يكون صحفي على الجبهه لانه قادر على نقل الحدث وبصدق \\\نواف مهنته شريفه بس يظن الناس ان عمله عيب وان مهنته عار تفكير رجعى ونواف يجب ان يثق بنفسه ولايرد على احد طالما هو يعمل بمهنه لاتخرج عن الشرع والدين سعيده بعودتك يانبض وسعدت بتعرفي على عائله وضحى وبانتظار القادم | ||||
|
| |
|
31-03-17, 03:06 PM
| #6 | ||||
| كاتبة في منتدى الروايات والقصص المنقولة
|  تكملة البارت الاول في العصر ثاني يوم ام غلاب طالعه من بيتها متجهه لبيت جارتها مزنه ام مسعد وقبل توصل الباب طلع بدر حفيد مزنه واول ماشاف وضحى جايتهم اطلق ضحكه سامجه : هههههههه عجوز اقريح جايتنا اليوم وضحى الله المستعان هالعيال ماعاد في اوجيههم حياء : الله انه يصلحك ويهدي قلبك بدر اطلق ضحكه ثانيه مالها سبب الاان كانت الحماقه احد الاسباب الوجيهه لضحك :ههههههه ياعساك تدشرين وضحى السعته بالخيزرانه على ساقه بحنق : تهبي الله يهبيك بدر انحاش عنها ووقف جنب سيارته وقام يحك مكان الضربه واهو مازال يضحك : ههههههه ماسويت شي علشان تضربيني انتي وحده صالحه ودعيتيلي بالي عندك وانا واحد داشر ودعيتلك بالي عندي والجود من الموجود عاد كان ادعاتي هي الي صابت ابشري بعزك التس علي امشيك في دواعيس الرياض كلها وشيشتس ودخانك على احسابي سنه كامله انا كريم وانتي تستاهلين وضحى امسكت راسها من قو الهرجه الي اسمعتها : لاحول ولاقوة الابالله الله انه يردك لطريق الحق قالته واهي تدف الباب وتدخل عند مزنه قبل لاتسمع اعبر من الي اسمعته اما بدر ركب سيارته واهو حده مبسوط انه شاف ام غلاب وطقطق عليها شغل سيارته ورفع على صوت الاغاني اعلى شي وشخط بسيارته واهو حده مروق وضحى ادخلت حوش بيت ابو بدر واتجهت للمكان الي تعرف انها بتلقى فيه من تشاركها تجاعيد الزمن مزنه الي كانت جالسه على قطعة زل قدم غرفتها الموجوده في الحوش واقهوتها قدمها ورادوها في يدها اول ماشافت وضحى مقبلتن عليها قامت تهلي وترحب : ياهلا ومرحبا الساعه المباركه الي شفناك الك كم يوم غايبتن عني وضحى : الله يبقيك وشلونتس عساك طيبه مزنه : الحمد لله مابي الا العافيه وضحى واهي تشوف ضعف مزنه الي تجاوزت السبعين وحركتها البطيئه وشحوب وجهها : وينتس ووين العافيه وانتي طايحتن في هالغريفه لاونيس ولاجليس والبيت مابينتس وبينه غير خطوه مليان ناس مزنه بحزن وحسره : الله انه يصلحهم ويخليهم لعييلهم والاانا ماعاد ابى الاحسن الخاتمه وضحى : حوفتس ارخمه ورا ماتنطلقين على الثور ابو بدر ثم تخلينه يسنع حريمه الي يصولن ويجولن في بيت ولدك وانتي محذوفتن في الحوش كنك اشحيذيذه مزنه : مالي في الناس لزوم خليني امسك ارضي عن المشاكل ووجع الراس في الورشه وقف صاحب احد السيارات سيارته في الورشه وطلب من نواف انهم يشوفون العطل الي فيها واهو يظن نواف مجرد مدير على العمال بس يوم شافه فتح كبوت السياره وبدى يشتغل عرف انه ميكانيكي صاحب السياره : انت الي بتصلحها نواف : ايه انا الي بصلحها وابشرك العطل بسيط صاحب السياره : وخر بس وخر لاتعدم سيارتي مابيلك تصليح نواف : وليه ماتبيني اصلحها ترا شغلتها مره بسيطه صاحب السياره : شغلتها بسيطه الا مافي راسك الا الدجه امس موديها الهندي الي دايم اصلح سيارتي عنده يقول يبيلها قطع غيار وانت تقول بسيطه نواف : يلعب عليك ماتحتاج قطع غيار والاشي خلها عندي نصف ساعه وتعال استلمها من احسن مايكون صاحب السياره : اللعب عندك الله يصلحك مير وخر اهنا قاله وسكر كبوت سيارته وراح ركب ومشى نواف لاحول والاقوة الابالله الاجانب طايحين فيهم غش واكل افلوس على الفاضي والمليان وانا الي من دمهم ولحمهم مانهم واثقين في المشكله قايله ماتحتاج قطع غيار اجل لونها تحتاج قطع غيار وضربة افلوس وش بيقول عني في بيت اخر وفي غرفة النوم شاديه لابسه شورة وبدي ورابطه شعرها ذيل احصان : مشعل تكفى خلنا نروح نتعشى في مطعم مشعل : لا امي ماتحب المطاعم والاتاكل اكلها شاديه بعصبيه : بس انا احبها وابيها واعيالي يحبونها مشعل بصرخه : قلت لا يعني لا خلصنا وقومي جبيلي ماء شاديه انفخت بقهر :اف وش ذا العيشه كل شي لا واتجهت للباب بتطلع تجيب الما لولا ان صرخة مشعل وقفتها : خير ان شاء الله بتطلعين كذا شاديه لفت يم الشماعه الي جنب الباب واسحبت روبها البسته وشدته على خصرها باحزام من نفس القماش واهي تحلطم : اف وش ذا الغثى في صالة الشقه شهد الي عمرها سبع سنوات تلعب مع اخوها ثامر الي عمره ثلاث سنوات بالعابهم الي ناثرينها في كل مكان حولهم اما من زحفت لمحياها تجاعيد الزمن فكانت تتفرج على قناة بدايه في نفس الصاله واسمها منيره اطلعت شاديه من غرفة النوم ومرة على الي في الصاله اشملت منيره بنضرة كره وراحت للمطبخ افتحت الثلاجه اسحبت منها قارورة ماء وارجعت واهي ماره مع الصاله التفتت على منيره وبعصبيه : شهد قصرو على التلفزيون ازعجنا قامت شهد قصرة على التلفزيون لاخر شي وارجعت تلعب منيره الله يالدنيا بعد ماكنت انا راعية البيت والقايمه بكل شي فيه جاء اليوم الي اشوف نفسي فيه شي زايد عن الحاجه محكوره في هالشقه لاشغل والامشغله ولاعندي مايونسي غير هالتلفزون وهالشباب الي يتراكضون فيه ماكنهم الا اعييلنا الله يصلحهم ويخليهم لعينن ترجيهم ايه الله يصبرني خوياتي كلهن راحن الله يرحمهن ويغفر لهن .............. ايه الله يذكر ابويتاتنا منول بالخير الي الها احوشه ويدخلها الهواء وتدخلها الشمس مهوب مثل بيوت هالوقت الي كلها شقق كبر كفي لاحوشن اطلق رجليني فيه ولاسعتن تشرح النفس طلعها من هواجيسها صوت شهد وثامر يتهاوشن وجاء ثامر يتخبى ورى منيره بعد ماضرب شهد بوحده من الالعاب شهد الحقته تبي تضربه ومنيره تفرق بينهم : روحي وراك خلي اوخيك خلاص يابنت ضربتيه روحي وراك شهد اضربت ثامر وبكى وباقي تبي تضربه ازياده طلع مشعل على صوت اهواش اعياله : بس انت وياها ثامر ركض لابوه رمى نفسه عليه واهو يبكي ومشعل بدى يمسح على ظهره ويحاول يهديه : بس حبيبي انت رجال قوي وماتبكي شهد تحاول تبرر الي سوته علشان ماتنتعاقب : يبه هو الي بدا وضربني بالعبه ثامر يدافع : احسن تستاهل هي ماخذه سيارتي وراميتها بعيد شهد : انا قلت وخر عن المكان الي العب فيه ماتفهم ثامر : مانه على كيفك اوخر انتي الي وخري العابك عن موقف سيارتي مشعل : بس انت وياها وكل الالعاب هذي تجمعونها هالحين وتشيلونها في صندوق الالعاب شهد : لايبه تكفى نبي نلعب ثامر : خلاص مانتهاوش مشعل : مافيه اجمعو الالعاب بسرعه اشوف قبل اقشها كلها في الزباله بدو شهد وثامر يجمعون العابهم ومشعل التفت على امه شافها تفرج على التلفزيون والصوت مقصر رفع على الصوت وجلس جنبها وبمزح : كل ماجيت لقيتك اتابعين هالشباب السامجين الظاهر انك حاطتن عينك على واحد منهم منيره بابتسامه لولدها واهي متعوده على مزحه معها : ايه اباخذ واحد منهم مير الي بيخطب انا والاهو مشعل : ههههههههههههههه والايهمك يمه انا اشتغلكم خطابه واخطبه لك بس علميني من هالي جازلك بعد ابو مشعل منيره واهي تبتسم لذكرى حزينه : محد ياخذ محل ابو مشعل الله يرحمه ويغفر له ثم اشرت على التلفزيون والله يامك كانهم انت الله يخليهم لعينن ترجيهم ويصلحهم مشعل : هالدعوات الزينه ماغير لشباب بدايه وانا مالي فيها نصيب ترى بديت اغار منهم منيره تناظره بحب وابتسامه : والله اني ادعيلك في كل وقت الله انه يخليك لي ولايحمني منك ويصلحك ويصلحلك اعيالك مشعل اخذ يد امه وباسها : اللهم امين والله يديمك فوق روسنا شاديه اطلعت من الغرفه واهي لابسه بجامه بسروال طويل وتيشرت جت اجلست عندهم وبلعانه :خالتي ماغير تفرج على هالطخمان التفت عليها مشعل بنظره حاره بغيره من الكلمه الي قالتها يعني هي تشوف انهم طخمان وعلى طول غير على قناة الصحراء وكانو يعرضون صور الأبل مصحوبه بشيلة مدح منيره استانست على صور الأبل : ياحليلها شاديه لوت بوزها : وينه حلاها منيره : كلها حلا ننتقل لمكان ثاني وبتحديد كوفي شوب شبابي والموجودين اهناك خالد واصدقائه الخمسه ناصر : شف الكلب ذا وش منزل في قناته على اليوتيوب خالد : من ناصر : من يعني بدر الداشر خالد : وع تكفى الاذا اذا شفته قدام بيتهم تصيبني اغلقه مابقى الا اتفرج على مقاطعه السخيفه عادل : هالسربوت ابومقاطع سخيفه ووقحه متابعينه تعدو المليونين جواد : المشكله خمه لااخلاق والاذوق مدري على وش يتابعونه ومقاطعه تارسه برامج التواصل الاجتماعي كل مافتحت برنامج لقيته في وجهي يزيد : بالعكس يوسع الصدر انا اتابعه في السناب والانستقرام واليوتيوب صالح : يع مالقيت الا هالسلقه اتابعه انا اتصبر عليه لين اشوفه حاط على راسه طرحه على اساس انه بنت هنا ودي امسكه واجلده بالعقال لين يتفل العافيه ناصر : المهم خلونا من ذا كله شوفو وش منزل عن ريان ولد غلاب هنا تناقزو الشباب من كراسيهم والتفو حول ناصر يشوفون المقطع في جواله وكان المقطع عباره عن تصوير لهوشة ريان وخويه بعد مبارات النصر والهلال وبعد ماعرض مقطع الهوشه علق عليه : شايفين البزر ذا تراه ولد اخو الصحفي العظيم خالد الدهيش الي فاقع روسنا بالاخلاق الرياضيه ياخي مدري وش اقول المقطع ابلغ من الكلام صراحه هههههههههههه وانهى كلامه بضحكه سمجه اما التعليقات على المقطع كلها سب وشتم وقذف لخالد واهله كلهم وشرشحو المسكين ريان والمقطع انتشر بشكل واسع جدا والكل ياخذ مقطع الهوشه ويركب عليه مقطع من عنده والي يسب والي يلعن خالد انقهر : الحقير عديم الاخلاق ريان توه مراهق وشلون يصوره وينشر عنه كذا ناصر : المصيبه ان ريان سابن جماهير النصر في المقطع هالحين النصراويين بينطلقون عليه خالد : هذا الي انا احذر منه ناس همج مايفرقون بين الشخص وتصرفاته بدال ماينقدون الفعل نفسه يهجمون على الشخص الي قام بهالتصرف ويشوهون سمعته وسمعت اهله صالح : دق على اهلك خلهم يمنعون ريان لايطلع ترا ان شافوه هالمسبه في الشارع بيدقون اعظامه خالد وقف بنرفزه : هذا اذا ماكان اندق وانتهى اخذ جواله ودق على ريان طول ماجاه رد ثم انفتح الخط وجاه صوت ريان يلهث بسرعه الحق علي | ||||
|
| |
|
31-03-17, 03:38 PM
| #7 | |||||
| كاتبة في منتدى الروايات والقصص المنقولة
| اقتباس:
ياهلا ومرحبا وسعيده جدا بمتابعتك لروايتي ولدك غلاب مافيه خير كيف يجيب اولدين ومايعلمك ولايعزمك على تمايمهم الله يخليلك اعيالك يارب ويحفظهم من كل شر وحياك الله | |||||
|
| |
|
31-03-17, 03:42 PM
| #8 | |||||
| كاتبة في منتدى الروايات والقصص المنقولة
| اقتباس:
الله يبارك فيك للاسف بعض البنات يهتمون في الكوره ويتعصبون للفرق اكثر من الشباب | |||||
|
| |
|
31-03-17, 03:44 PM
| #10 | |||||
| كاتبة في منتدى الروايات والقصص المنقولة
| اقتباس:
ياهلا ومرحبا والله يبارك فيك رد شامل ومتكامل كالعاده | |||||
|
| |
 |
| أدوات الموضوع | |
| انواع عرض الموضوع | |
|
|
.png)
العرض العادي
