01-04-17, 07:14 PM | #1 | ||||
| رح تلاقي حالك بين كلماتي "( لما تحس إنك خلص كبرت .. همك زاد .. مسئوليتك زادت .. مشوارك الحقيقي بلش .. كل شيء تغير و بسرعة كمان ! قبل شوي كنت طفل صغير .. عايش الدنيا بدون هم .. بدون تدقيق في التفاصيل .. الوقت يمكن زمان ما كان يعني إشي .. بس هسآ صرت بدك تسابق الوقت .. بدك تبلش بأشيآء كثير .. بس خايف الوقت يخونك أو بالأحرى خايف إنت اللي تخون الوقت .. التفاصيل الصغيرة جدا جدا صارت تهمك .. بدك الكل يعطيك مجال عشان تثبت حالك .. و تبين للجميع إنك خلص كبرت .. و إنك خليفة ع هاي الأرض .. بس ممكن إنت نفسك ما تعطي لحالك مجال خايف من حالك ! أو يمكن خايف من صعوبة الدرب ! أو يمكن خايف من صعوبة الناس ! أو يمكن خايف من عيوبك و نقاط ضعفك ! صار في كثير شغلات بتخاف منها مش لأنك ( خويف ) .. لأ عشانك بلشت تنظر للأمور بوعي أكبر و صارت نظرتك ثاقبة للأمور .. صرت تحس كل حركة محسوبة عليك .. و كل فشل إشارة سلبية بتدل إنك مش قدها ! طبعا هاي مشاعر طبيعية , بتصيب الإنسان لما ينتقل من مرحلة لتانية , بس في أشخاص بتضل هاي الأحاسيس مكبوتة فيهم .. بحاولوا يطنشوها .. و إنت بدورك لازم مش بس تنطشها .. لازم تستبدلها بمشاعر إيجابية ثانية .. و تستشعر عظم مسئوليتك و دربك الطويل مقارنة بهاي المشاعر اللي لو ضلت فيك رح تحبطك و رح توقفك و تثبط عزيمتك و تحقق رغبة شيطانك ! و يمكن في كثير مواقف بتضايقك و يمكن هالمواقف صارت تحرمك النوم و الفرحة .. رغم إنها مواقف عابرة و تافهة .. هون لازم تسأل حالك .. و تقارن بين هدفك العظيم و دربك الشائك و بين وقوفك على أتفه الأمور .. و تقول و تعاتب نفسك : كيف رح أوصل إذا هسا وقفت ؟! كيف رح أصبر و من هسا تعبت ؟! كلنا مرينا أو بنمر بمرحلة النضج .. و هي مرحلة متعبة فعلا .. كأنك كنت نايم و بلشت تصحى و توعى للحياة , خايف و ما بدك تمر بالصعوبات اللي مر فيها كثير ناس قبلك .. بس لازم تحط ببالك شغلة , إنك رح تعيش و تشوف .. و إنو كل إنسان عندو طريقة بالتعامل مع الشغلات .. و إنك نظرتك للأمور من الآن و تخوفك منها قبل ما تمر فيها أصعب من لما تمر فيها فعلا , ربك رحيم جدا , لا تقلق .. ما رح يتركك .. رح تمر بصعوبات أكيد , بس هاض لا يعني إنو هاي الصعوبات رح تضل و إنك وقتها رح تنهار , لا لا , شوف قديش ناس أكبر منك و كانوا خايفين مثلك , بس هيهم عايشين و ندمانين إنهم بيوم فكروا نفس تفكيرك الآن , لأ في منهم كمان ناسي إنه كان خايف أصلا .. بتحس إنه في كثير شغلات براسك .. بدك ترتبها .. بس مش عارف من وين بدك تبدى ! و ممكن تحس إنك صفر و الكل بيفهم و عارف الطريق و إنت لا .. جاي ع بالك تعمل بطولات ترضي فيها حالك قبل ما ترضي الناس , لأنه صوت ضميرك تعبك ! و ممكن تحس إنك بدك تحكي مع حدا و توضحله تفكيرك و هدفك و مشاعرك .. بس بتتراجع لأنك عارف إنه مش رح يفهمك .. لأنك إنت لسا مش فاهم أو ما بدك تفهم .. بتشوف إنه داخلك معقد .. و بتعرف تماما إنك إنت سبب هالتعقيد .. بس برضو مش قادر تبسط الأمور .. برضو إنت عارف تماما إنه عمق تفكيرك بالأمور و نظرتك المستبقة للأحداث سبب كآبتك .. ممكن أحيانا تتهرب تقعد مع حالك لأنك تعبت منها .. و بيجي ع بالك تقعد مع حدا تشرحله عن شخصيتك بس مش عشان هو يعرفك عشان إنت تعرف حالك .. | ||||
01-04-17, 10:10 PM | #2 | ||||||
مشرفة سابقة بمنتدى قلوب أحلام وافتح قلبك، نجم روايتي، حارسة وأسطورة سراديب الحكايات
| السلام عليكم ورحمة الله وبركاته ..... مساء الامل والتفاؤل عزيزتي.... كلماتك جدا رائعة وتبث الامل والإيجابية لمن حولنا.... فالشخص يجب ان يثق بنفسه اكثر ولا يهتم بكلمات الغير... سلمت عزيزتي... الموضوع جدا جميل.... تحياتي وودي لك... التعديل الأخير تم بواسطة الأسيرة بأفكارها ; 02-04-17 الساعة 01:30 AM | ||||||
مواقع النشر (المفضلة) |
أدوات الموضوع | |
انواع عرض الموضوع | |
|
|