[لامارا]

لحقت يوسف وطلعنا ركبنا السياره وتحرك .. وصلنا المطار بسرعه لأنه جريب شوي عن بيت عمي ..
نزلنا كنت ورا يوسف .. بس عقب رحت قعدت في الانتظار وراح خلص اجراءات السفر والطياره .. ورد صوبي .. رحت وياه لسوق الحره وقال شو أبا اشتري .. ما خذينا وايد أشيا .. خذينا شوي .. عقب أعلنو انه الطياره بتقلع .. ردينا ورحنا صوب الطياره ,,

يوم نحن نركب يوسف كان ميود ايدي لأنه زحمه وايد غير انه صيف والناس كلها تسافر ,, رحنا قعدنا ..
وربطنا الحزام ,, والطياره دقايق وأقلعت ..

يوسف طالعني وقال : خفتي ,,؟؟
قلت له : لأأأأ ..
يوسف : لازم حرم الشيخ يوسف ,., ما تخاف هههه

طالعته وقلت : ماخذ في روحك مقلب تصدق هههه
يوسف : تعالي جيه سويتي لنا فيلم هندي قبل ما نطلع اليوم ..
طالعته وقلت : ما يخصك ,,

يوسف طالعني وقال : نواري صخي .. عيب ..
طالعته : آسفه ,,

طالعني وقال : ههههه حياتي والله .. فديت اللي يخافون من ريايلهم ,,
قلت بهمس : يفداك كلي وربي ..

يوسف ابتسم وقال : عيدي ,,
قلت : لأأأأ ليش نازعتني ..

يوسف : دلوعوه ,,
قلت : مب انت تقول حرم الشيخ يوسف ..

يوسف : نواري جيه تحت عيونج هالات ,,
تميت اتحسس عيوني وقلت : مدري ,,

يوسف : بس مسود تحت عيونج عدل ,,
قلت : يمكن من القعده ع الكمبيوتر ..

يوسف : عاد شكلي ما بخليج تقعدين ,, عليه مره ثانيه الا مره في الاسبوع
طالعته قلت بسرعه : لأأأأأ ..... أنا أ .......... وتذكرت انه سر جان أسكت ,,
يوسف : شوه ؟؟

قلت : لا ماشي بس كنت بقول اني من زمان ما قعدت عليه عشان العرس ,,
يوسف : أشك انه كلامج صح ,,

طالعتها وقلت : شو يعني أجذب عليك ,,, بس أكيد من التعب ..
يوسف : يبالنا وقت الين ما نوصل ,,
قلت له : هي لبنان بعيده شوي ,,

يوسف : سرتي لبنان قبل ,,؟؟
قلت له : لأأأ بابا كان يسفرنا بس ماليزيا و مصر ودول الخليج هههه
يوسف : احمدي ربج انزين هههه غيرج ما يسافر ..

قلت له : هي الحمدلله .. انت سرت لبنان قبل ..
يوسف : وايد ,,
قلت له : شي طيب ,,

يوسف : بناتهم طر ,,
طالعته بقهر : يا ريتني ما ييت عاد دول الخليج أحسن ..

يوسف ضحك : ههههه فديت الزعلانين ,,
قلت : سير خل اللبنانيات ينفعونك ..

يوسف تم يضحك علي ,, يت المضيفه وقالت : سي ، أهلين كيفكون ,,
يوسف رد : مناح ,,

المضيفه : نائيصكون شي .. بدكون شي ,,
يوسف : لأأ خدمتكن في أي بي ,, مو نائصنا شييي ..

المضيفه : نحنا تحت أمركن امتى ما بدكون ايانا .. نجي ,,
وقعدت تدلي يوسف ,, انقهرت الريال يرمسها عادي .. ولا جنه صاير شي ..

قالت : المدام حبيبتك ولا زوجتك ,,
قالت زوجتك بطريقه حلوه خخ جان يوسف يرد : حبيبتي وزوجتي كمان ,,

المضيفه : اي الله يهنيكون مع بعد شكلكون عرسان جدد ,,
يوسف قال : أي جايين لبنان شهر عسل ,,

المضيفه : بتنورها ..

وتمت ترمس يوسف شوي حسيت روحي أغلي من العصبيه جني بركان ومهدد بالانفجار ..

يوم روحت ,, يوسف شافني وقال وهو يبتسم .. : حلوه لاه عندها أسلوب ,,

طالعته وأنا كلي قهر وصديت ,, متعمد يقهرني هالانسان ويرفع ضغطي ,, يعرف شو نقطة ضعفي ..

طالعته وقلت : هي وايد حلوه لو تباها خذها بعد .. وصديت عنه ,,

يوسف تم يضحك ويقول اني هبله .. ما عبرته ,, عقب ساعات يوم الطياره تهبط ,, ربطنا الحزام وحزامي ما طاع ينربط ,,

جان أطالع يوسف وأقول : أوييييييه هب راضي ينربط ..
يوسف طالعني ضحك وقال : أحسن هههه

طالعته وأنا معصبه : هاللي يهمك يعني أوكي .. ما عليه ,,
يوسف طالعني وقال : ما بربطه الا يوم تقولين حبيبي آسفه ,,

قلت له : ع شو بعد أتأسف ,,
يوسف : لأنج زعلتيني قبل شوي ..

قلت له : هي مبين ,, روحك طفرت بي وقهرتني وآخر شي أنا أتأسف ..
يوسف : خلاص برايج ,,

ومره ثانيه قالو خلاص الطياره بتهبط ,, طالعت يوسف وأنا متخرعه وشوي وأصيح ..

مسكت ايده و قلت : يوسف اربطه .. والله آسفه حرام بموت ..
يوسف ساعدني ربط لي اياه وقال : حياتي ليش تخافين ,, ما في شي يخوف ..

طالعته : هي ليش أخاف ,.. تباني أموت وما أخاف ,,
يوسف : ههههه غبيه ,,

قلت له : محد غيرك ,,
يوسف : تراني بفتح لج اياه ,, وبفرج من الدريشه ,,

قلت : اذا الدريشه تنفتح يعني الطياره والناس اللي فيها بيطيرون هع ..
يوسف : خلي معلوماتج حقج ,,

طالعته وقلت : حبيبي ما بتغشى في لبنان ,,
طالعني وقال : شوه ..؟

تخرعت قلت يمكن يباني أتغشى ,, نزلت راسي وقلت : اللي يريحك ,,
يوسف : لا لأأأ الكلمه اللي قبل ,,

طالعته وتذكرت تلومت الصراحه بس قلت له : ما بتغشى في لبنان ,,
يوسف ابتسم جنه فهمني وقال : هي محد يتغشى اهناك عادي .. وبعدين انتي امبونج ما تتغشين ,,

قلت له : بس انت اللي قلت تغشي ,,
يوسف : هي يوم نرد الامارات من فوق الين تحت أباج أسود ههههه أغار ,,

طالعته وقلت : أونك عاد ,, عاد مو لهالدرجه ’’, ،،

وهبطت الطياره في لبنان ,, نزلنا .. ويوسف خلص اجراءات المطار والسفر ,, وهالسوالف عقب ياه يود ايدي وطلعنا ,, بصراحه المكان يخبل بمعنى الكلمه .. حتى يهبل شوي عليه ,, حسيت روحي في بلاد برا ,, لهالدرجه المكان حلو ..

عقب يوسف اتصل مدري على منو بس الظاهر مأجر سياره وفي واحد طول هالأسبوعين هو اللي بيودينا ويردنا ..

ركبنا السياره ورحنا صوب الفندق ,, طول الوقت كنت أطالع برا ,, الجو وايد حلو .. أحلى عن صيف الامارات بس بعد الامارات حلوه بحرها وبردها وفي كل حالاتها ..

وصلنا ونزلنا الفندق .. رحنا الجناح ,, ويوسف بعد ما العامل دخل الأغراض راح قعد عالقنفه ,,

قال وهو يمسح راسه : أوف تعبت ,,
قلت : هي القعده ممله في الطياره ,,

طالعني وقال بخبث : بس المضيفه ما حسستني مول بالملل ..
صديت عنه ,, ورحت صوب الشنطه أطلع لي ملابس عسب أتسبح ,, سمعت يوسف يقول ..

يوسف : فديت اللي يغارون ع رياييلهم ,,
ما رديت عليه .. وقلت : اتصل بـ عمي قول لهم وصلنا ,,

يوسف : هي كيف راحت عن بالي ,,
دشيت الحمام أتسبح وانتو بكرامه وأنا مقهوره ليش يوسف يحب يضايجني دوم ..

طلعت وأنا شعري مبلل ,, يوسف قال : الوالد سلم عليج ,,
قلت له وأنا رايحه صوب المرايه ,, : الله يسلمه من كل شر ,,

يوسف ياه من وراي ,, مسك الفوطه وحطاها على شعري وتم يطالعني من المرايه وقال ,,
يوسف : حبيبي جففي شعرج قبل لا تمرضين ,,

ابتسمت له رد لي الابتسامه وشل ملابسه عسب يتسبح ,, ومشى وهو يطالع صوبي ..
عقب تميت أطالع برا من الدريشه صح انه ليل ,, بس بعد الجو حلو والمنظر خلاب وايد ,,
تقريبا الحين جريب الفير ,, الوقت راح بسرعه ونحن في الطياره ,,

ما حسيت الا ويد تمسك جتوفي ,, : ها حياتي ,, ما تاكلين ,,
طالعته وقلت : مب يوعانه كليت في الطياره ,,

يوسف : أكيد ما تبين عشا ,,
قلت له : والله العظيم ولو شريت ما باكل لأني هب يوعانه ,,

يوسف ابتسم : على راحتج يلا ارقدي باجر ورانا حواطه ,,
طالعته : هي الله يستر هههه ان ما فلستك ,,

...........................

قمت من النوم طالعت حواليني شفت يوسف راقد ,, وحالته حاله .. تعبان وايد أخاف يمرض ..

قمت رحت تسبحت ولبست وكشخت ,, لبست بنطلون جينر وقميص أسود مع رصاصي وأبيض .. ورديت شعري كله على ورا ورفعته و رفعت قذلتي بطريقه حلوه .. رحت صوب الدريشه طالعت برا ,, الفندق هذا يطل على حدايق كلها خضره وأسواق ,, مدري ليش يوسف ما حجز لنا صوب البحر أحلى ,, طالعت وراي شفت يوسف بعده راقد ,, رحت صوب علبة الميكب ,, حطيت فونديشن خفيف ومسحت ويهي بالبودر عسب يتساوى لون البشره والفاونديشن يلمع .. وحطيت جحال خفيف .. وقلوز .. عقب لبست طقم خفيف ونعومي .. شفت صوب يوسف بعده ما تحرك راقد ..

حسيت روحي ميته يوع .. رحت صوب الثلاجه عسب أشوف شي أكله ,, ما عيبني شي ,,
ركزت عدل طالعت في الثلاجه .. غرشه شكلها غريب ,,

ركزت وركزت .. أوه هذا ويسكي ,, غربلات اليهود ,, غريبه شاللي يايبنه اهني ,, حاولت أعرف تذكرت انه في الفنادق يتواجد بكثره هالشي ,,
رديت قعدت ,, آخر شي مليت رحت صوب السرير قعدت وتلحفت ,,

يوسف ما حس اني ييت يمبه بعد ,, صدق هالانسان نومه ثجيل .. الله يعيني عليه .. بس في كل الحالات فديته فديته فديته ,, وتراني أدل بيته ههههه

آخر شي نفذ صبري .. وهزيته ,, قلت : يوسف ,, يوسف حبيبي قوم ..
تحرك وما رد عليه قلت : حبيبي يسوف قوم .. يعت تراني بموت يلا قوم ..

تحرك وغطا روحه بالبطانيه وقال : هممم خليني أرقد ..
شوي وأصيح : يوسف قوم ملييييييــــــــت حرام ..

يوسف قام وكله رقاد : انزين انزين ,,
قام وشل اللحاف عنه بطريقه غجريه لدرجه تحركت ورديت ريوس ع السرير زين راسي ما دق السرير ..
خفت منه وايد ..

قال : أوف ما تخلين الواحد يرقد بعد ,,
أول مره يعاملني جذا ,, وهذا ثالث يوم زواجنا عاد عقب الله يعين دام البدايه جذا ,,

قعدت حسيت دموعي بتنزل .. ليش يعصب علي بس لأني وعيته من الرقاد ,, طالعت الساعه شفت الساعه هنتين ونص الظهر ,, بسه رقاد ..

يودت روحي ,, ترييت تميت قاعده أترياه ,, طلع من الحمام وانتو بكرامه وراح يلبس ,,
تميت صاخه وما أرمس ,, طالعني قال : شو فيج ,,؟؟