[لامارا]

(لا إله الا أنت ..سبحانك اني كنت من الظالمين)
-------------------------------
أعلم ان من يقسم كذبا يصوم ثلاثة ايام لتكفير هذا الذنب فكم يوما ستصوم انت لقولك "اقسم انني لن اخذلك ابدا يا عزيزتي" !!! انا اتذكر انك رددتها كثيرا

الورقه الثالثه
عند جوري.. جلست تحت الدش بملابسها وهي ضامه رجولها لصدرهاوسانده راسها عليها،زادت دموعها وحطت يدها على فمها وهي تحاول تمنع شهقاتها اللي تفلت منها بين لحظه والثانيه،هزت راسها بعنف وكأنها تطرد صوته اللي جالس يتردد داخلها "ماحبها..انفرضت عليا.. احبك انتي.." كلامه يتكرر ويتكرر داخلها"ليه يا خالد تذبحني ليه تموتني،صارت تضرب صدرها بقوه وبهمس/ كله منك.. انت السبب،انت ليه حبيته،ليه نسيت اللي سواه فيا،ليه سامحته وقبلت فيه . كيف عايش معايا 5 سنين وهو مو طايقني.. ولا يحبني.. وكمان مجبور عليا ،حياته معايا كانت كذب .. كيف قدر.. كيف طاوعه قلب يمثل عليا الحب..
قلبها/(الحب) بس هو عمره ماقالك (احبك) كنتي تصبحيه وتمسيه على كلمة (احبك) كل مره كنتي تقوليها يقولك (وانا كمان) بس عمره ماقالها صريحه.
جوري/بس هوا قال انه الحب مو بالكلام وهوا معاه حق،وانا صدقته ورضيت قلت يمكن مايعرف يقول كلام حب وغزل.بس تصرفاته كانت ثبت لي انه يحبني.. اسلوبه معايا،وقوفه معايا ضد لطيفه وليلى لما يتصرفوا معايا بوقاحه ،هداياه، صحيح ماكان زي الحب اللي قريت عنه في الروايات ولاقصايد الشعر ،بس حبني.
قلبها/بس كنتي متأكده انه مايحبك.. عالاقل مو زي ماانتي تحبيه..
جوري/يمكن لأني أول مره أحب ..يمكن لأني صغيره.. يمكن لأني حبيته عني وعنه واكتفيت باللي قدمه ليا رغم احساسي بأنه بينا شي مفقود ..
قلبها/لاتضحكي على نفسك،انتي في داخلك كنتي متأكده انه يكن لك أي شعور الا الحب..
جوري بألم/طيب الخمس سنوات اللي عشناها،اذا ماكانت حب ايش تكون؟
قلبها/من ناحيتك كانت حب.. بس من ناحيته.. يمكن احترام.. الفه..تعود.. اعجاب.. عشره ،موده،اي شي ماعدا الحب.
جوري باستغراب /والحب ايش يكون غير اللي قلته،مو ذي الاشياء اللي توصل للحب، ربنا ماقال وجعلنا بينهم حب.. ربنا قال (وجعلنا بينهم مودة ورحمة)..
قلبها/انتي ليه مصره على كلامك،تبغي توصلي لووين بالضبط.
جوري/ انت اللي ليه ياقلبي تبغى تحطمني وتكسرني..
قلبها /انا مابغى احطمك ولااكسرك، ابغاكي تفوقي من الكذبه اللي عايشه فيها ومصدقتها..
جوري بصدمه/كذبه.. كذبه.. حبي ليه.. حياتي معاه صارت كذبه! غربتي عن أهلي وبلدي صارت كذبه؟صدمتي فيه وتعبي لسنه كامله وانا احاول اتقبله واسامحه واحاول اخطط لحياتي معاه صارت كذبه؟
قلبها باستهزاء/الحمد لله ..قلتيها بنفسك، حبك،غربتك،حياتك، مو ملاحظه انك بتتكلمي بصيغة المفرد؟ ماقلتي حبكم، ولا غربتكم ،ولا حياتكم.. ليه؟ لانك متأكده انك عايشه كذبتك لوحدك بدون مايشارك فيها،
راجعي نفسك.،ارجعي لبدايتكم، ارجعي وواجهي مخاوفك اللي دفنتيها.. ورح تشوفي حقيقة حبك كامله وهيا مجرده من كل الاضافات اللي اضفتيها علشان تخترعي عالمك المثالي وتقدري تكلمي حياتك بدون تفكير..
جوري بتوتر وقلق/ارجع لفين.. لمتى.. ذي مو شهر، ولا سنه ،ذي ست سنين ،تعرف يعني ايه ست سنين،يعني طفولتي ومراهقتي مجتمعه،تبغاني انبش فيها وافتح جروحي من جديد، وانا ماصدقت نسيتها ؟ واذا لقيته زي ماقلت ..كله وهم ،كذبه عيشت نفسي فيها.. كيف رح استمر معاه،كيف هكمل كذبتي وانا عارفه انها مجرد كذبه.. مجرد وهم اختلقته علشان يطابق احلامي اللي رسمتها معاه.. ضربت صدرها بقوه وهي تبكي/ كله منك،انت السبب،ليه ماصرت زي باقي القلوب! كل شي عندها عادي ومباح.. الحب،الكذب،الخيانه.. كلها تتشابه،مايقيدك حرام وعيب وغلط،ليه ليه؟
سندت راسها عالجدار وهي ترجع بذاكرتها لوراء، ومضات فلاشيه مرت عليها عن كل شي عاشته.. ولادة قصي،موت ابو خالد، مشاكلها،لحظات حب وخصام، ولادة ياسمين ،صدمتها في اخوان خالد وكرههم لها، زواجها، صدمتها فيه،كل شي عاشته عدى على ذاكرتها بسرعه،شريط حياتها كله انعرض قدامها بس بشكل عكسي بكل حلوه ومره ،لحد ماشافت نفسها في بيتهم.. ابتسمت بحنين للصوره اللي قدامها.. ابوها وامها واخوانها.. ايامها الحلوه اللي ذكراها مافارقتها لحد اللحظه ذي …
اللهم اني اصبحت اشهدك.. واشهد حملة عرشك وملائكتك ،وجميع خلقك ..انك انت الله لا إله الا انت..وحدك لا شريك لك، وان محمد عبدك ورسولك