[فيتامين سي]

الجزء الحادي عشر

مرررررحبا .. وصلنا في القصة لين ...
فكرة حمد والطريقة اللي بغى يجوف فيها عائشة ..
سامية : نش نش ييب دفتر التلفونات ..
حمد بعبط : والله ؟؟؟
سامية : اقولك ترى بغير رايي ها ..
حمد يركض صوب الدفتر : لالالالالا خلج مكانج .. ولا تغيرين ولاشي .. (يمسك الدفتر ويروح لها) هاج .. يلا ..
سامية : اوكيه بس بليز انطم عشان ما تحس بشي ..
حمد : اوكي يالسبالة ... يلا اتصلي حشى ذليتيني ..
سامية : اففف اوكي اوكي اتريى ........
سامية وهي تدق الأرقام : مثل ما وصيتك .. ولا كلمة ..
حمد : اقول حطي ع السبيكر ..
سامية : لا حووووول .. اتريى ...
ام عائشة : الو ..
سامية : ألو السلام عليج خالو ..
ام عائشة : وعليج السلام والرحمة .. منو ويايه ؟
سامية : وياج سامية ربيعة عائشة ..
ام عائشة :يا حيا الله سامية .. اشحال امج واشحال صحتها ان شا الله بخير ...
سامية : والله الحمدلله بخير .. اقول خالو .. عائشة هني ؟؟
ام عائشة : لحظة بس بزقرها لج ..
(ام عائشة تزقر عائشة )
حمد يقرص سامية : سموي دقي ع السبيكر ..
سامية : آي يالحمار .. لحظة لحظة بس ..
ودقت ع السبيكر ..
وشويه الا وعائشة شلت السماعة ..
عائشة : ألو ..
سامية : هلا والله براعية أحلى الووو ف دبي كلها ...
عائشة : هلا وغلا حبيبتي .. منو .. سامية ؟؟
سامية : هي .. مسرع نسيتيني .. مالت عليج ..
عائشة : افا عليج ما نسيتج ولا شي .. بس كنت ابغي اتأكد ..
سامية : انزين .. ماعلينا .. خبريني .. عندج شي اليوم ؟
عائشة : مثل شو يعني ؟؟
سامية : يعني مشغولة بشي ؟؟
عائشة : مممم يمكن شويه .. ليش ..؟
سامية : اباج تمريني .. لأاني تولهت عليج واباج بسالفة ضرورية ..
عائشة : خير ان شا الله ..
سامية : الخير بويهج .. يوم بحصلج بخبرج كل شي ..
عائشة : انزين انتي ما ترومين تمريني ؟؟
سامية : لاوالله ماروم .. انتي تعالي آخر مرة أنا ييتج ..
عائشة : هههههههه اوكيه مب مشكلة .. بشوف هالكم يوم يوم بفضى بخبر اماية وبييج ..
سامية : على خير ان شا الله ... الا ما خبرتيني .. انتي سجلتي ف اي كليه .. ؟
عائشة : كلية الشارجة ..
سامية : ول .. جيه شو ناوية تدخلين ؟
عائشة : طب ان شا الله ..
هني ظهر صوت ضحكة قوية من تلفون سامية .. وصاحب الصوت ريال ..
عائشة بخوف : سامية حد حذاج ؟
سامية تشل السبيكر وبتوتر : هااا ؟؟ لا هذا اخويه دق ع السبيكر ويلس يضحك عليه ..
عائشة ما عيبها الموقف : اها ..
سامية : انزين اخبرج انا ببند عنج الحينه .. اوكيه ..
عائشة : اوكي برايج ..
سامية :يلا مع السلامة ..
عائشة : مع السلامة ..
وسكرت الخط ..
سامية تصارخ على حمد : ايه انته اشحقه تضحك جيه ؟؟ والله البنت حست بشي ..
حمد : ههههههههههههههههههههه ولاشي هههههههههههه ولاشي..
سامية تعايب عليه : ولاشي ولاشي .. مااااااااااالت عليك والله مالت .. حمود من الحين أخبرك .. اذا ناوي تلعب ع البنية ترى انسى السالفة ..
حمد : لا تخافين انا ما بلعب .. بشوفها .. ان عيبتني باخذها .. وان ما عيبتني خلاص .. دار درى ودار مادرى ..
سامية : اوكي عيل جهز عمرك عقب كم يوم بتينا البنية ..
حمد : يا وييييلي .. تامرين أمر بستقبلها بالبشت هههههههههههه
سامية : سخييييييييييييييييييييييي ف حمووود ..
--------------------------------
اكيد كلكم تبون تعرفون شو استوى ببومحمد .. خخخخ ادري ..
الله يسلمكم بو محمد لحق عليه ياره بو جاسم .. والله ستر .. وكانت الطيحة مب قوية وايد .. بس بومحمد يحتاج للراحة ...
في المستشفى ..
ما وعى بو محمد الا وهو ف مكان غير مألوف بالنسبة له ..
عاد الذكي بدال ما يزقر السستر زقرني أنا ..
بو محمد : قلييييب انا ويني ..
*كم مرة يالشيبة اقولك لا تسألني انا .. يا ربي بتظهر الشعر الأبيض من راسي .. ادريبك تغار مني لاني حلوة وشعري ما فيه ولا شعرة بيضة ... قوم بسرعة وازقر السستر*
بو محمد : وانتي يالحمارة .. ما تدرين اني ماروم انش .. مب المفروض اني الحينه مكسر وماروم اتحرك ؟؟
*اووه صح تعال .. خلاص اتريى لين ما اييك الفرج يلا ببباي *>>>خخخخ نذلة
وتم بو محمد يتريى لين ما ياه ياره بو جاسم ..
بو جاسم : الحمدلله ع السلامة يا بو محمد ..وما تشوف شر ...
بو محمد : الشر ما اييك الغالي ...
بو جاسم : ياخي ليش تكلف نفسك والدكتور موصنك ترتاح ..؟؟
بو محمد : شسوي يا بو جاسم ماروم اهد النخل بدون ما اسقيه واخرفه ..
بو جاسم : الله يهداك .. جيه ما تييب لك مزارع يهتم بنخلك ؟؟
*بلاك يا بوجاسم انت ما تدريبه ؟؟ خخخ يبغي يسوي تجارة .. يشمس الرطب عشان يستوي سح ويبيعه للناس *
بو جاسم : وانا اقووووول بلاهم شركات التمور خسرانين هالأيام ..
*خخخخخ اقول اسكت وكمل رمسة وياه .. مالت عليك .. الحين لو تجرب سحه بييك مغص بييلسك 40 يوم في البيت .. هذا اذا ما يتك غيبوبة بعد خخخخ *
بو محمد : اقول بو جاسم خلها تولي وكمل رمستك ...
بو جاسم : دورك ..
بو محمد : هي صح .. والله مادري .. ان شا الله بطالع شو السالفة .. والله كريم ...
بو جاسم : تعال الدكتور موصنك ترتاح اليوم يعني ماشي ظهرة ..
بو محمد : شووووووو ؟؟ لالالالالا طبعاً .. خبره اني ابغي أظهر .. بنتي روحها في البيت وماروم اودرها ..
بو جاسم ف قلبه : اللي يسمع الحينه الأخ موول مقطع .. البنت روحها مسرحة من زمان ..
بو محمد : الله يخليك روح رمس الدكتور ..
بو جاسم : ان شا الله ...
وفعلاً .. الدكتور طاع يظهره .. ووصاه يرتاح .. بعد تدرون بو محمد فيه قرحة ف المعدة بعد .. وما يستوي يتعرض لأي اجهاد ....