[منال سالم]

في مجرة ما بعيدة ، حيث الأزهـــار المتفتحة ، والطيور المغردة .. جلس قوس قزح ومعه أصدقائه من النجوم والسحب وأيضاً القمر يتسامرون سوياً ..

ولأن الجو كان شديد الحرارة ، فلم يتحملوا البقاء طويلاً تحت أشعة الشمس الحارقة ، فاختبئوا أسفل المظلة ..
................

زفر قوس قزح في ضيق ، ثم نظر إلى أصدقائه وقال ..
-قوس فزح: اووف ، الجو حر أوي ، أنا مش عارف امتى الشمس هتبطل غلاستها معانا ، وتخلي الجو يبقى جميل
-أحد النجوم : متقولش كده ، كمان شوية الشمس هتمشي وهيطلع القمر مكانها
-قوس قزح: بس أنا عاوز ألعب الوقتي ، لسه هستنى لما القمر يطلع ، يا سلام لو الشمس تمشي بعيد
-سحابة ما: عارف يا قوس قزح هي لما هتمشي ، احنا هنطلع براحتنا، ومحدش هيضايقنا
-قوس قزح: بصراحة كده أنا معنتش بحب الشمس زي زمــان ، هي مالهاش أهمية ولا لازمة
-أحد النجوم : وأنا زيك ..

............

وقفت الشمس على مقربة منهم تستمع إلى ما يقولون ، فحزنت في نفسها كثيراً ، وبدأت تذرف الدموع ..
-الشمس باكية : أنا محدش بيحبني ، أنا محدش عاوزني ، إهيء .. إهــيء

سمع بكاء الشمس أحد السحرة الطيبين ، فوقف إلى جوارها ، ثم تحدث معها بصوت هاديء و..
-الساحر : مالك يا شمس ، بتعيطي ليه ؟
-الشمس: محدش بيحبيني يا ساحر ، محدش عاوزني


وقف الساحر يفكر قليلاً في حل ما ، صمت قليلاً ثم تحدث بـ ...
-الساحر: متزعليش يا شمس ، أنا هساعدك
-الشمس باستغراب : هتساعدني ازاي ؟
-الساحر : ايه رأيك لو خدتي اجازة
-الشمس باندهــاش : اخد أجـــازة
-الساحر : ايوه ، تاخدي أجازة ، تقعدي على البحر شوية
-الشمس : أقعد البحر
-الساحر: ايوه ، وانتي لما تغيبي ، هيعرف أصحابك أهمية وجودك معاهم ، وأنا هساعدك في ده
-الشمس مبتسمة : يا ريت
...........

أمسكت الشمس بمظلتها الملونة في يدها ، ووضعت نظارتها على عينيها ، ثم نظرت للساحر ، فقال لها
-الساحر: جاهـــزة
-الشمس: أيوه

أمسك الساحر بعصاه السحرية ، ثم ابتسم للشمس ولوح لها بالعصا وهو يردد كلمات غير مفهومة و...
-الساحر : آكــا .. باكــا ، آكــــا .. باكـــا ، آكـــا .. باكـــا .. بوووو

وبالفعل اختفت الشمس تماماً ...

..............

لاحظ قوس قزح اختفاء الشمس فصاح فرحاً في أصحابه و..
-قوس قزح: بصوا يا أصحابي ، بصوا ! الشمس مش موجودة
-أحد النجوم: بجد ؟
-القمر مندهشاً : مش معقول !
-سحابة ما بسعادة : الله ! دي فرصة عشان أطلع وأملى الدنيا مطرة
-أحد النجوم: يالا نلعب ، يالا نتبسط ، يالا نقضي كلنا وقت حلو
-قوس قزح: يالا بينا يا أصحابي

خرج قوس قزح ومعه النجوم والسحب والقمر ، وظلوا يلهون سوياً لساعاتٍ وساعات حتى سقطوا من التعب ..
-قوس قزح: أيوه بقى ! احنا كل يوم هنفضل نلعب ونتبسط ومافيش شمس تاني هتزعجنا
-سحابة ما: أنا مبسوطة انها اختفت
-أحد النجوم: يا رب ماترجعش تاني

...............

ظل الوضع هكذا لعدة أيام ، لا توجد شمس .. والجميع يلعب ويلهو طوال الليل ...

ولكن في النهاية شعر الجميع بالملل ، فالحياة أصبحت كئيبة ، لم يعد للطيور صوت ، ولم تتفتح الأزهــار كما كانت تفعل كل يوم ، وظل الجو كئيباً ، مظلماً وبارداً ...
-قوس قزح: الجو برد أوي
-أحد النجوم: أنا تعبان ، عاوز أرتـــاح
-القمر: مش قادر ، أنا هافضل أقعد كده لوحدي ، فين الشمس ، أنا عاوز أنــام
-سحابة ما: معدتش فيا مطرة ، فين الشمس عشان تبخر المياه وأجمع المطر من تاني

-قوس قزح: الشمس وحشتنا أوي
-أحد النجوم: انت اللي زعلتها وخليتها تمشي
-قوس قزح: أنا لأ .. انت كمان زعلتها
-سحابة ما : لأ انت اللي زعلتها

...........

تشاجر الأصحاب معاً ، فسمع صوت شجارهم الساحر الطيب ، فنظر إليهم ثم قال
-الساحر : هتبطلوا خناق أمتى ؟
-سحابة ما: الحقنا يا ساحر ، الشمس اختفت واحنا مش لاقينها
-الساحر : وهي اختفت كده لواحدها ؟
-قوس قزح بصوت حزين : لأ ، احنا زعلناها
-الساحر: وده صح ولا غلط ؟
-أحد النجوم: لأ ، ده غلط ، احنا مكنش لازم نعمل كده
-قوس قزح: صح .. الشمس مهمة في حياتنا ، واحنا منقدرش نستغنى عنها
-الساحر : يعني عرفتوا غلطكم ؟
-الجميع : أيــــوه
-الساحر : طيب خلاص أنا هساعدكم
-قوس قزح: بجد ؟؟ يعني هترجع الشمس تاني
-الساحر : ايوه ، بس تعملوا اللي هاقولكم عليه
-الجميع: موافقين
-الساحر : قولوا ورايا بصوت عالي
-الجميع : نقول ايه


أمسك الساحر بعصاه السحرية ثم لوح بها في الهواء وهو يردد بصوت مرتفع ..
-الساحر بصوت مرتفع : احنا أسفين يا شمس ، متزعليش يا شمس
-الجميع: احنا أسفين يا شمس ، متزعليش يا شمس
-الساحر: ارجعي يا شمس ، احنا بنحبك يا شمس
-الجميع: ارجعي يا شمس ، احنا بنحبك يا شمس


وبالفعل جاءت الشمس مجدداً ، فاستقبلها أصحابها بالأحضان و..
-قوس قزح: انا بحبك يا شمس ، وأسف لو كنت زعلتك
-سحابة ما: اوعي تسيبنا تاني وتمشي ، انتي صاحبتنا ، واحنا منقدرش نستغنى عنك
-أحد النجوم: بنحبك يا شمس
-القمر : وحشتينا يا شمس
-الشمس بسعادة : وأنا خلاص مسمحاكم ، وبحبكم كلكم


أشرقت الشمس من جديد ، وامتلأت الأرض بأشعتها الذهبية الجميلة ، وعادت الطيور للتغريد من جديد ، وتفتحت الأزهـــار ، وعاش الجميع في سعادة وســـــرور ...

.
.
.

تمت