كان ياما كان .. كان في سنجاب صغير حلو وأمــور بس شقي أوي ، وكان اسمه سنجوب .. سنجوب كان عايش مع مامته في بيتهم اللي موجود جوا الشجرة الخضرة الكبيرة ..
مامته دايماً كانت بتحذره من انه يعمل شقاوة ، وتطلب منه انه يسمع كلامها ..
وفي يوم من الأيام شاف سنجوب في البيت الرمـــادي بتاع القطة شوشو اللي ساكنة جمبهم طبق كبير مليان بندق
وسنجوب كان بيحب البندق جدا جدا ..
مامته نبهت عليه إنه مايخرجش من البيت ويفضل أعد جوا لحد ما هي ترجع من السوق ..
سنجوب وعد مامته انه هيسمع الكلام ، بس أول ما هي خرجت ، راح خارج هو كمان من البيت ، وجرى بسرعة ناحية بيت القطة شوشو الكبير
وقف سنجوب تحت البيت وأعد يفكر ازاي هيجيب طبق البندق ، اللي محطوط على التربيذة ، بص حواليه وشاف سلم كبير فقال لنفسه
-سنجوب: أيوه أنا هاخد السلم ده ، واسنده على الحيطة هنا ، وأطلع بسرعة عليه لحد ما أوصل للشباك ، وأدخل منه لجوا الأوضة ، هلاقي طبق البندق قصادي ، هاكبش شوية كتار منه ، واطلع اجري بسرعة قبل ما القطة شوشو تشوفني
وفعلاً سنجوب عمــل كده ، وطلع بشويش على السلم ، وقبل ما ينط جوا الأوضة بص كويس بعينيه فشاف القطة شوشو نايمة على سريرها ..
-سنجوب : اووبا ، القطة شوشو نايمة جوا ، أنا هاتسحب وأمشي على طراطيف صوابعي وهي كده مش هاتسمعني
وراح سنجوب ناطط جوا الأوضة ، ومشى بشويش بشويش بشويش لحد ما وصل للطبق اللي على التربيذة ، ومد إيده على البندق اللي مش بتاعه ، وأخد حبة كتار من غير ما يستأذن ..
وقبل ما يخرج سنجوب من الأوضة وقعت من ايده كام حباية بندق فخبطت في الأرض وعملت صوت جامد خليت القطة شوشو تصحى ..
بصت القطة شوشو لسنجوب وهي زعلانة منه ، وراحت نطة نطة كبيرة أوي على سنجوب وقامت مخربشاه جامد في ايده ، وفضلت تجري ورا سنجوب اللي رمى كل البندق من ايده في كل حتة ، وراح خــارج بسرعة من الشباك ..
رجعت مامت سنجوب من السوق فلاقت سنجوب متعور في ايده وأعد يعيط ، فسألته و..
-الأم : مالك يا سنجوب ؟ بتعيط ليه ؟
-سنجوب: أنا عملت غلط يا مامي
-الأم : عملت ايه يا سنجوب ؟
-سنجوب: انا خرجت من البيت يا مامي من غير اذنك وروحت أخد بندق من عند القطة شوشو
-الأم : طب وانت استأذنتها يا سنجوب ؟
-سنجوب : لأ يا مامي .. أنا خدته من وراها وهي لما شافتني بعمل كده خربشتني
-الأم: عــارف يا سنجوب لما ناخد حاجة مش بتاعتنا من غير ما صاحبها يعرف بتبقى اسمها ايه ؟
-سنجوب: ايه يا مامي ؟
-الأم : بيبقى اسمها سرقة ! والسرقة حاجة حرام و غلط اننا نعملها
-سنجوب: بس أنا مكونتش عارف ، أنا كنت عاوز أكل بندق
-الأم : ماينفعش تاكل حاجة مش بتاعتك ، وتمد ايدك على حاجة من غير ما تستأذن
-سنجوب : يعني أنا كده غلطان يا مامي ؟
-الأم: اه يا سنجوب ، انت غلطان ، ولازم تتأسف للقطة شوشو على اللي انت عملته
-سنجوب: بس هي خربشتني
-الأم : خربشتك لأنك خدت حاجتها من غير ما تقولها ، وبعدين أنا كمان زعلانة منك
-سنجوب : ليه يا مامي ؟
-الأم : عشان انت خرجت من البيت من غير ما تقولي ، وماسمعتش كلامي
-سنجوب : أنا أسف يا مامي ، مش هاعمل كده تاني ، أخــر مرة
-الأم : خلاص يا سنجوب أنا هسامحك بس بشرط
-سنجوب: شرط ايه ؟
-الأم : تروح معايا الوقتي للقطة شوشو ، وتتأسفلها
-سنجوب : بس هي هتخربشني تاني
-الأم : لأ مش هتخربشك لو انت اتأسفتلها
-سنجوب: حاضر يا مامي
وفعلاً راح سنجوب مع مامته على بيت القطة شوشو واتأسفلها على اللي عمله ، وصالحها عشان ماتبقاش زعلانة منه ، فهي لما لاقيته بقى شطور وسمع الكلام ، وعرف غلطه واعتذر لها كمان راحت جيباله طبق كبير مليان بندق واديتهوله هدية
فرح سنجوب أوي ، وشكر القطة شوشو وشكر مامته وقال
-سنجوب : أنا مش هاعمل شقاوة تاني ، وهستأذن قبل ما أخد حاجة مش بتاعتي
وتوتة توتة خلصت الحدوتة
