[لامارا]

**
ابو سعود اخذ نفس الارجليه وهو متكي : يا حلاوة العطلة
نهى جلست عند أمها : ماما أبغى عصير
أم سعود : خلي عينك على أخواتك ما يبعدون
من هنا
جلست عائشه بضجر : ملل اففف
ام سعود : انتظري نجيب لك مهرج !
عائشه : ما ابغى مهرج أبغى ساره ألعب معها
ابو سعود وهو رافع حاجب :ما ينفع اللعب الا مع هذي الساره !!
إلعبي مع اخواتك
قاطعته وهي ماده بوزها: مملات ما ابغى ألعب معهن !
اسماء جلست وضربتها على رأسها : أموت علشان ألعب معك !
نهى وهي رافعه حاجب : الحين تفضلين ام القمل
علينا ؟!
عائشه بغضب : لا تقولين عنها كذا...انت ام القمل والجرب
ام سعود بنهر : عائشة !
عائشه بقهر : ليه يتمسخرون عليها لانها فقيره !
ابو سعود بسخريه : للي يسمع يقول من غنى ابوك !
الله يخلي القروض والا كان بنشحد اللقمه
ام سعود بحنق من اصراف زوجها :- والله ما دمرنا غير القروض متخيل كم عليك ديون
وغير ربعك للي مستقرض منهم
ابو سعود بضجر : وبعدين ؟!
حنا جايين نستانس مو للنكد
وأخذ نفس من الارجيله
عائشه تناظر ابوها بتذكر : صحيح بابا تذكرت
ابو سعود بهدوء : وش فيه ؟!
عائشه بابتسامة : تعرف إمام المسجد بالحاره ؟!
ابو سعود رفع حاجب باستغراب وش جاب سيرته : ايه
عائشه كملت : أخته صارت تدرسنا تربيه اسلامية
ابو سعود بلامبالاه : وش اعمل لها اروح اخطبها يعني ؟!
خزته أم سعود بعصبيه
ضحك على رد فعلها : كونها موظفه تساعدنا بالمصروف
وش رأيك ؟!
وغمز لها
ام سعود ناظرته بنظرات ناريه : جرب وشوف
ضحك على رد فعلها وبعدها ناظر عائشه : وش فيها معلميتك ؟!
عائشه بحماس : قالت لنا ما يصير ننهى الشخص عن فعل سيء
ونفعل مثله
وطلبت نعطيها مثال
ابو سعود بملل : ناويه تعملي درس هنا ترى راسي مصدع
عائشه بحماس : لا يا بابا بس أنا رفعت إصبعي
وجاوبتها
قلت لها مثل بابا
فتح عيونه بعدم فهم !
تابعت كلامها بحماس : قلت لها بابا يمنعنا نحضر أغاني ومسلسلات بس هو يحضر عادي
حتى مره بالصدفه شفته حاط على رقاص
قاطعها وهو يسند نفسه ويعدل جلسته : حسبي الله على عدوك
وش هالكلام ؟!
مسكها من إذنها : ما لقيت الا هذي تقولين لها !
هذا أخوها يدور لي الزله ويشهر فيني
انت هذا لسانك الطويل لازم دوم يبربر
قاطعته وهي تحاول تبعده عن إذنها : والله بس أعطيتها مثال مو قصدي
ترك إذنها وبتحقيق : وش قلت لها كمان ؟!
مدت بوزها وهي تفرك اذنها : قلت لها ما يسمح لنا نندخن ونشرب ارجيله و هو دائما يدخن
قاطعها بغضب : وغيره وش قلت لها ؟!
عائشه بتذكر ابتسمت : صح بابا قلت لها
إنك تضربنا اذا تكلمنا بكلام شوارع ووصخ
أما إنت عادي تتكلم بكلام وصخ
عض على شفته بقهر وناظر زوجته للي حاطه يدها على فمها تكتم ضحكتها : عجبك كلام هالزفته ؟!
فضحتنا
ام سعود هزت رأسها وهي كاتمه الضحكه
بعصبيه ناظر عائشه : وقسم بالله لو أسمع مطلعه حرف برا البيت ما تلومين إلا نفسك فاهمه
عائشه لوت بوزها : أنا وش قلت ؟!
انفجرت أم سعود ضحك على براءة عائشه
أبو سعود بغضب : وش قالت معلميتك بعد هالفضائح ؟!
عائشه ابتسمت : ما قالت شيء
بس أكيد قالت وين ابوه يمنعه عن هالاخطاء
وقف وخزها بعيونها : وين أبوي ؟!
صدق انك قليله أدب بعدين نتفاهم على طول لسانك
مثل لسان الكلب يلق
قاطعته : بابا حرام تشتمني
طالعها : مو انت اعطيتي للمعلمه مثال
وانا اعطيت مثال على لسانك الطويل
حاست بوزها ما عجبها كلام أبوها
**
**
**
تناظر جدتها تشرب الشاهي ملت من الجلسه : يمه تتوقعين وش تعمل عيشه الحين ؟!
ام سعيد بنرفزه من تعلقها بعائشه : وش تبغين فيها ؟!
ساره ابتسمت : بس اشتقت لها
حاست بوزها ام سعيد ورجعت تطالع التلفزيون
ساره ناظرت جدتها ببراءه: يمه أخاف ام سعود تزعل علي لأني تأخرت عليهم
يمكن فكرت اني ما ابغى اروح معها
واخاف تمنع عيشه تكلمني
قاطعتها بعصبيه من الغباء للي معشعش بعقلها :وبعدين مع هبلك الزايد قلت لك الحرمه ما تبغاك تلعبين مع بناتها ليه رازه وجهك عندهم
ساره بعدم اقتناع : لا هي تحبني بس علشان القمل
ما تخليني ألعب مع عيشه
ام سعيد ناظرت التي في وهي تردد : خبله خبله
وبعدها طالعت ساره : يلا وقت النوم الحين
باكر عندنا شغل كثير قومي نرفزتيني من خبالك
قومي
بطبعها الهادي وقفت بدون اعتراض : ان شاء الله
**
**
**
**
**
نهى ترسم احلام زينها لها الشيطان
ناظرت اسماء : شفتي ما أحلى سيارته
معقول ييجي يوم وأركبها ؟!
اسماء ميلت شفتها بسخريه : ما اظن تركبينها
ما شفتيه كيف رافع خشومه للسماء !!
وبعدين وش جاب لجاب ؟!
اكيد رح يخطب من طبقته مو مثلنا
نهى ما عجبها كلام اسماء : وحنا وش ناقصنا ؟!
اسماء : لو باعك ما تجيبين حق سيارته
نهى طنشت كلامها : كيف اخليه يعرف بحبي له ؟!
اسماء بتفكير : اكتبي رساله له على الورقه
نهى بخوف من الفكره : لا لا اخاف
وبعدين كيف اعطيه الورقه
اسماء بتفكير : اممم مع عائشه الخبله
نهى بتردد : لا خلاص انسي اخاف امي وابوي
يعرفون
اسماء بلامبالاه : بكيفك
وبتذكر ضربت جبهتها : صحيح امي قالت لي
اناديك تبغاك ضروري
وقفت نهى وضربتها على كتفها : غبيه الحين جايه
تقولين
وطلعت بسرعه لامها
**
**
**
كملت شغلها بسرعه وطلعت للشارع وركضت لما شافت عائشه مع بنات تلعب
اقتربت وهي تبتسم ونادت بصوتها الناعم : عيشه
ناظروا البنات لها ووقفت بعد ما شافت إبتسامة عائشه
عائشه بابتسامة : تعالي ذول بنات خالتي
سوزان بضحكه سخريه تناظر ساره: تقول عيشه !!
ضحكوا البنات عليها
ابتسمت على ضحكهم وبتبرير: عادي ادلعها
عائشه مسكت يد ساره: ايه اسمعي عيشه
هند لوت بوزها بقرف: ما نبغى نلعب معها
سوزان : ايه ما نبغى نلعب معها
عائشه بحده: غصب عنكم تلعبون معها
امل بجعرفه: فستانها يقرف ممزوع وقديم يع
ساره ببراءه : ايه وانا اركض الصبح وقعت وتمزق
وبابتسامه لما ارجع امي رح تخيطه لي
ويرجع جديد
امي تقول انه الفستان حلو علي
وابتسمت لمديح الجده
انفجروا البنات بالضحك عليها
عائشه بقهر من سخريتهم لها : لا تكلمينهم
تعالي نلعب مع بعض !
ساره ناظرتهم ببراءه : ليه ما اكلمهم ما قالوا شيء!
عائشه بحده: يا غبيه يتمسخرون عليك !
تعالي نلعب هناك
وقفت محتاره ومنحرجه كيف تترك البنات : لا حرام خليهم يلعبون معنا
قاطعتهم اسماء وهي مسرعه لهم : تعالوا ماما جهزت الحلويات
ركضوا البنات باتجاه البيت
بلعت ساره ريقها وهي تتخيل أصناف الحلويات
مسكت عائشه بيدها وابتسمت: يلا تعالي
هزت راسها وركضت معها باتجاه البيت
دخلت بفرح واخيرا رح تأكل حلويات جدتها
ما تعمل لها هذي الاشياء
سبقتها عائشه وهي توجهت خلفها قبل ما تدخل
وقفتها نهى وحطت يدينها بإعتراض : لا ماما قالت ممنوع
ساره بتبرير :،بس عيشه عزمتني
رفعت ساره نظرها لام سعود : وش تبغين يا ساره ؟!
نهى جاوبت عنها :،تبغى تدخل
ام سعود بإعتراض :،لا وين تدخلين ؟!
عيب عنا ضيوف يلا بسرعه ارجعي لجدتك
ساره تعتذر ببراءه : خالتي انت زعلانه مني لاني ما رحت البارحه معكم ؟!
ضحكت ام سعود على هبلها : ايه زعلانك منك
والحين بسرعه ارجعي للبيت
ساره ضاق صدرها من زعل ام سعود : انا آسفه خالتي خلاص المره الجايه ما رح اتأخر عليكم
ام سعود ضحكت : عشتو
الاخت ناويه تنشب لي بكل طلعه
اقول انقلعي عند جدتك بسرعه ارى مو فاضيه لك
ساره :،بس عيشه عزمتني
قطعت ساره كلامها وهي تشوف الباب تقفل بوجهها
ناظرت الباب بصدمه
ظلت واقفه للحظات ومثبته نظرها على الباب
بلعت ريقها وهي تسمع اسماء: ماما ابغى من هذا الحلو
لفت وجهها واعطت للباب ظهرها وهي تحس
لعابها رح ينزل
مشت خطوات بطيئه وهي تبلع ريقها
وهي تتخيل الحلويات
وتكلم نفسها
منعتني أدخل علشان تأخرت عليهم بالطلعه !
والله مو قصدي !
وش فيها لو كان عندهم ضيوف ؟!!
والله ما اعمل شوشره ورح اجلس مع الصغار
مؤدبه !
ليه ما خلتها تدخل ليه ؟!
مشت بالشارع وهي تمسح دموعها تبغى حلويات
ليه مكتوب عليهم الفقر والحرمان ؟!
رفعت نظرها للسماء والدموع تنزل من عيونها الصغيره وهمست وخي تتذكر كلام جدتها : الحمد لله
**
**
**
**
دخلت ام سعود بابتسامة : اففف نشبه هالبنت
ام سوزان : مين ؟!
ام سعود جلست ومعها طبق الحلويات : حفيده ام سعيد تطرديها وملزقه
ام سوزان : كان دخلتيها مع البنات
ام سعيد وهي تقسم الحلويات : بلاك ما شفتي ملابسها الحين توسخ لي البيت
ناهيك عن المدرعات للي برأسها
وانا عندي 3 كشش مو فاضيه اقعد انظف
ام سوزان : من هالناحيه معك حق
بس لو اعطتيها صحن
قاطعهم سعود وهو يمشي تدعثر وضرب الطاوله
وانقلبت الطاوله بما فيها
وصارت الحلويات والعصير فوق بعض مع القزاز للي تكسر
ام سعود وهي تناظر كل تعبها وتجهيزاتها على الفاضي تكلمت وهي شاده على اسنانها : كله من عينها هالساره
حسبي الله
وناظرت الحاضرين عيونهم على الاطباق للي تكسرت واعتلت ملامحهم الخيبه
**
**
**
**
**
انتهى البارت ...انتظروني يوم الجمعه بإذن الله ...دمتم بخير