عرض مشاركة واحدة
قديم 02-02-17, 09:41 AM   #10

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

" البارت الثامن "
//
معظم الناس هم ناس آخرون
أفكارهم آراء شخص آخر وحياتهم تقليد , وعواطفهم اقتباس
أوسكار وايلد
: تزوجيني !
التفتت له سارا اللي كانت متقدمه عليه بالمشي ... وعيونها مفتوحه بدهشه ولؤي كان يطالعها بملامح جادة .. ابتسم بخفه ثم ضحك : ههههههههههههههههههههه يفوتك وجهك .. امزح امزح
سارا عصبت : مايضحك !
لؤي : هههههههههههههه الا يضحك
سارا حمر وجهها : سخيف
لؤي : افا انا سخيف ؟
سارا : ايه سخيف وتافه كمان .. هالامور ماينمزح فيها وانا ماخذه راحتي معاك لاني احسك ...
سكتت وهي تطالعه ... بلعت ريقها وكملت : لاني احسك رجال عاقل ومحترم
لؤي : ههههههههه شفيك تحمستي ؟ صرت مو محترم يعني ومجنون عشان مزحت
سارا تنهدت : خلاص لؤي اذا انتهت مساعدة الهدية انا راجعه البيت
لؤي : ماتبغي نتعشى قبل نرجع ؟
سارا كملت طريقها : مالي نفس ..
طالعها لؤي وهي تبتعد .. واضح انها زعلت ! تنهد ماكان له داعي يمزح مزحته البايخة هذي .. لام نفسه وهو يبتسم تلقائي لاتذكرها ملامحها حركاتها تصرفاتها .. تحرك عواطفه هذي هي الزين اللي يكمل بنظره ...
***
الريــاض الساعة 2 ظهر /
دخلت ميهاف البيت .. وهي راجعه من عزيمة بسيطة مسوينها لها صاحباتها بمناسبة خطوبتها تنهدت وهي تطالع العائلة مجتمعه بالصالة وابوها صوته مرتفع : كذا تسوي فيني يامسود الوجه !! .... انا انا الحمار اللي معطيك الخيط والمخيط .. واخرها طلعت ممنوع من البحرين وقطر والله اعلم وش بعد ؟
ام نايف : يابن الحلال هد بالك .. كلش بالتفاهم ينحل ..
نايف وهو يحاول يضبط انفعالاته : مهما كان ... ما اسمح له هذا فراس بمجلسي يجلس يتعدى , وهذا جدي هو الغلطان اساسا باي حق معطي فراس هالعز هذا كله .. ولا هو على راسه ريشه وحنا على راسنا حشيشه
أبو نايف : اجتهد .. اشتغل .. سو لك مشروع يرفعك بعين جدك .. جالس تسافر وتبذر فلوس وتفلها من ديره لديره وتتوقع ياصلك كل شي
نايف بغضب : لا فراس اللي كلش مايسافر !
ميهاف : السلام عليكم
ابو نايف : وعليكم السلام !
ميهاف : ماخلصت هالسالفة ؟ خلاص يبه نايف .. كلش بالرواق بتضلون معصبين لمتى يعني ؟
نايف وقف : انا مالي دخل .. الكل يعاتبني انا ويحطها علي كاني سبب المشكلة ( طالع ابوه ) وانت يبه بطاقاتي لو تضل مجمدة راح اروح للامارات بطريقتي والحقها بقطر والبحرين
طلع وسكر الباب وراه ... ابو نايف التفت لام نايف : خذي ! خذي هذي تربيتك .. من كان صغير وانا احاول اضبطه وانتي تطلعين لي .. شوي شوي على الولد هذا اللي خذيناه منك ومن عيالك
ام نايف : وهو انت فعلا طريقتك غلط ! لو تترك لي نايف هذا عرفت اربيه لك .. بس انت شغال صراخ عليه .. علمني اللحين صراخك عليه جاب نتيجة .. صار يشتغل ؟ تعدل حاله ؟
ابو نايف : يله تفضلي اسلمك الامور كلها ... علميني وش بيطلع معك والله ماتقدرين عليه خلي مني الحكي
مسكت ميهاف راسها وصعدت لفوق وسط صراخ امها وأبوها ... خلاص الوضع مايطاق من امس والوضع كله صراخ بصراخ .... دق جوالها طالعت المتصل : لؤي
ردت : هلا لؤي
لؤي : مبببببببببببروك ... الف الف مبروك
ميهاف دون نفس : يبارك فيك
لؤي : شفيه صوتك ؟ كانك مو مبسوطة .. لايكون تقلدين صديقتك بعد وتنغصبين .. يكفي واحد مسكين انرد تردون الثاني بعد
ميهاف : ههههههههههه .. لا قبلناه خلاص .. ليش ماوصلك خبر شصار امس ؟
لؤي : لا .. عسى ماشر ؟
ميهاف : صارت هوشه بين نايف وفراس ولد عمي وابوي معصب والحال مأساه
لؤي برواقه : عادي كل الشباب لازم يصير بينهم زي كذا .. انتي طولي بالك وانبسطي عروسه
ميهاف : ههههههه ياحليلك ليتك موجود والله ... كل البيت اعصابهم متوتره ماتقدر تتكلم مع احد
لؤي : لا أجيكم ولا شي .. اتركيني هنا مبسوط
ميهاف : وماراح تجي قريب ؟
لؤي : لا .. لا صارت مناسبة مهمه بس جيت .. زي زواجك مثلا !
ميهاف : اوف ! على كذا بتقعد سنه الظاهر
لؤي : ليش ..؟ متى زواجك ؟
ميهاف : ماحددناه ولا راح نحدده .. الموضوع كله خطوبه بس
لؤي : بجد ؟ والله الخطوبات الطويلة هذي مايمشي حالها .. عجلو احسن
ميهاف : وانا شدخلني ؟ هو يبغى كذا .؟
لؤي : وانتي ايش تبغي ؟
ميهاف بارتباك : انا ..؟ .. انا مابغى شي عادي
لؤي : على لؤي ياميهاف ..؟ انتي مو راضية صح
ميهاف تنهدت : وش بيدي ؟ مقدر اصير المشفوحة واقول يله تزوجوني عقب 3 شهور
لؤي : الله يعينك ... بس مفروض تتزوجينه صدق معجباته كثار اخاف تطيرك وحده منهن
ميهاف : فالك ماقبلناه ..!
لؤي : المهم حبيبتي ان شاء الله الف مبروك ... حبيت ادق ابارك لك واتطمن عليك صدقيني انبسطت لك من كل قلبي وليتني موجود عشان اطلعك من جو الخنقه بالبيت
ميهاف : تسلم والله .. مكالمتك لحالها طلعتني من الخنقه
لؤي : يله باي
سكرت ميهاف واستلقت وهي تحس مالها خلق كلش .. مافيه شي يحمسها رغم خطوبتها ومفروض الكل يمها بس المشكلة سرقت الاضواء منها ..
***
بيت أبو فراس :
أسماء بعد الإحباط العاطفي اللي اصابها وراء فقدان الامل من مقابلتها هيثم بعد كذا .. قررت تشغل نفسها عن الموضوع قد ماتقدر طلعت من غرفتها ونزلت لتحت مافيه احد غير ياسمين : هيه انتي وين اهلي ؟
ياسمين : مدري ..
اسماء : زين قومي دوري لي ماما
ياسمين : وليش ماتدوريها انتي ؟
: اسمعي كلام اختك الكبيره وقومي !
فزت ياسمين .. واسماء التفتت لفراس اللي تو دخل : ياجعلني ما اخلا بس سنايد
فراس : شخبار رجلك ؟
اسماء : احسن مره .. صرت اعرف امشي دون عكازاتي بس بالبطيء
فراس : أول الغيث قطره
نزلت ام فراس : هلا بعيالي حبايبي
اسماء : مااااماا .. انا ناويه أعزم ميهاف اليوم
ام فراس : ايه اعزميها ليش لا ؟
اسماء : ايوه راح اسوي حفلة صغيره لها .. واعزم البنات بس يعني ترا مو عزيمة حريم وعجايز
ام فراس : جالسة تطرديني انا وربوعي ياقليلة الحلا ؟
اسماء : لا ياماما مو كذا .. بس جد بتخربون علينا الجو ولا راح نعرف نفلها
ام فراس : براحتك بس اعزمي بنات عمتك
اسماء كشرت : بعزم وداد .. سجى ذالبزر مب لزوم
ام فراس : اسوم خلي مني الهبال واعزمي بنات عمك كلهم
اسماء : والله سجى هذي غثيثة .. حكيها واجد وتتصيد ماتصدق تسمع صوت رجال تطمر تشوف من
ام فراس : الله يهديها .. وبعدين صغيرة عادي بس عيب ماتعزمينها
اسماء : اففف خلاص بعزم وداد وبقولها تجيب اختها معها ... يارب يارب ماتجي
فراس : يمه انا جوييييع بموت من الجوع .. متى بتحطون الغدا ؟
ام فراس : اللحين نحطه .. خسى الجوع
جلسو على الغداء والكل موجود ماعدا بدر ..
اسماء اللي كانت تكلم طول الغدا وتعزم .. طالعها فراس : خير انتي قومي وهالمكالمات بعيد عنا
اسماء سكرته : خلاص خلاص هذي آخر مكالمة .. المهم ماما خذي ياسمين معاك اليوم
ام فراس : الحرمة اللي بروح لها ماعندها بنات كبرها
اسماء : مب مشكلتي .. تروح لوحده من صديقاتها مابي احد بالبيت يقلقني وانت انس صرف حالك
انس بعصبيه : بتطرديني من البيت يعني !
اسماء : ايه اطردك .. عندك مانع ؟
فراس : خـلاص ! بزارين قسم بالله ... أنس باخذه معاي
انس : مابي اروح .. انحرم من بيتنا يعني
فراس طالعه بنص عين : بتروح ورجلك فوق رقبتك .. وش تبي تجلس عند الحريم تسوي ؟
أنس بقهر : خلاص زين ! بس وين بنروح ؟
فراس وهو ياكل : بنمشي على الكورنيش وعقبها بزور فرع الشمال
انس : طفش بروح اسمع كلام الشغل اللي يطفش
فراس طالعه بنظره سكتته وظل ياكل بصمت .. اسماء راحت للمطبخ تكمل تخطيط وتجهيز للمناسبة
***
بدر كان بالمطعم مع واحد عازمه .. بنص الغداء دق جواله " نايف " : هلا
: الو بدر ؟؟
بدر عقد حواجبه : عبد المجيد ؟ ليش داق بجوال نايف ؟
عبد المجيد بربكة : انا ونايف بالممشى ونايف طاح فجأه ومامعي سيارة و ..
بدر وقف بسرعة : جايك جايك خلاص !!
استأذن بدر وطلع مسرع وهو حاس ان هالشي بيصير .. نايف معه صداع مزمن واذا اشتد نقاش او نفسيته تعبت يزيد معه وصل مسرع وهو يشوف التجمع عليه .. كان نايف صحى من اغمائته وجالس على جانب الرصيف وماسك راسه وهو يحسه بينفجر .. جلس بدر عنده : نـــــايف شفيك!
نايف عقد حواجبه بقوه : بدر صوتك عالي اسكت !
بدر : قوم قوم معاي المستشفى
نايف بإنزعاج : مافيه داعي مستشفى .. مافيني شي
بدر بحده : نيوف لاتخليني اجرك قدام العالم ... تعال المستشفى
نايف تافف وقام معاه .. وراحو للمستشفى ومافيه شي جديد .. صداع مزمن وش العلاج الممكن له .؟ مجرد عطوه حبوب تخفف عليه ..
طلعو من المستشفى .. التفت له بدر : قسم بالله انت مو صاحي ..! هد بالك شوي عشان هالمشكله تتلعوز صحتك وتلعوزنا معك
نايف : محد طلبك تتلعوز .. وخلاص بدر قسم بالله راسي بينفجر
عبد المجيد : خلاص خلاص .. تعال بوديك البيت اللحين وارتاح
نايف : وهو فيه راحه بالبيت ..؟ ابعدني عن البيت قد ماتقدر
بدر : خلاص ناخذه بيتنا .. هناك يرتاح
نايف طالعه بنص عين : تسوق امها ؟ ابعد من ابوي اروح عند فراس ... عبد المجيد مشينا بيتكم
عبد المجيد : يامرحبا ومسهلا .. حياك بتنور
بدر : اسبقوني .. انا بروح الصيدلية اصرف لك الحبوب وجايكم
***
جـــدة _ الساعة 2 ونص /
غادة جالسة قدام التلفزيون .. وتضحك على فيلم كوميدي .. جلست ابتسام جمبها : ما شاء الله عليك .. النفسيه متحسنه مره
غادة دون اهتمام : وليش ازعل يعني ؟ مايهمني فراقه اذا هو مستغني عني
ابتسام : من قلبك هالحكي ؟
غادة : من صمصومة قلبي بعد .. ليش هبله انا اذبح روحي وهو مو حاس ولا داري عني
ابتسام : قوييييية والله
غادة : طبعا شعبالك ..؟
ابتسام : تصدقين غادة .. احس خايفه يطول احمد ويعرف هيثم انك موجوده هنا .. وقتها مصيبة جد
غادة : لا ان شاء الله ماحيعرف .. وقت يكون بالبيت انا بدخل غرفتنا وهو مايدخل غرفتنا اساسا ولا يدري ايش فيها
ابتسام : ان شاء الله .. والله احس مالي خلق هالمشاكل كلش ..
غادة : اقول ابتسام .. معقولة بابا ماصحى للحين ؟
ابتسام : تو مريته .. للحين ماصحى يقول تعبان شوي ويبي ينام
غادة : طيب شوفي هيثم .. يجي يشوفه
ابتسام : لا اخاف اخوفه على الفاضي ... وهو مشغول بقوم اللحين واصحيه وان شاء الله مافيه الا العافية
دخلت ابتسام على ابوها .. ومسكت قلبها وهي تشوفه ينصرع بشكل مخيف صرخت : غاااااااااااااادة !!
ركضت غادة بخوف لعندها وقلبها طاح وهي تشوف المنظر : يبببببببببببه
ركضت غادة تدق على الاسعاف وهي مو مستوعبه .. بينما ابتسام ماسكه ابوها وتبكي بهستيريه ..
في المستشفـــى /
كان هيثم يمشي للصيدلية .. وقت جاه مهند يركض : هيثم !
هيثم : شفيه ؟
مهند بهلع : الحق .. ابوك تو دخل المستشفى واللحين الدكاتره عنده
ركض بسرعه للجهه .. وهو يشوف الغرفة اطباء وغادة وابتسام برا وواضح عليهم الخوف تقدم عندهن : شصاااير ؟!
ابتسام وهي تبكي : ما ادري .. ما ادري اليوم كان تعبان ورفض يصحى .. فجاه دخلت عليه كان صرع و ..
ربت هيثم على كتفها : هدي هدي ..
دخل هيثم لعند الاطباء داخل .. وهو يحاول يعرف شصـــاير لكن رفضو وجوده وطلع .. بعد فتره طلع الدكتور قابله هيثم : شصاير دكتور ؟
الدكتور هز راسه : ان شاء الله خير
هيثم طالعه بصدمه : دكتور هالنظرات اعرفها زين .. اعطيها اهل المريض اذا صرت شاك بشي خطير ..
الدكتور : ما أبي اخوفك لحد ما أتاكد .. بس انا استغرب انت كدكتور مالاحظت
هيثم : دكتور انا على طول هنا .. ونادر اشوفه واذا شفته على الماشي والفتره الاخيره ماكان فيه شي خطير
الدكتور : خلاص هيثم تطمن .. ان شاء الله شكوكي غلط والوالد مافيه شي
هيثم : لا .. لازم تقولي ولا رحت بنفسي اجري الفحوصات
الدكتور تنهد : نشك ان معه سرطان
هيثم انصدم لكن تماسك : سرطان ايش ؟
الدكتور : راح توضح الفحوصات هالشي ..
هيثم تسند على الجدار وقال بهمس : لا حول والا قوة الا بالله .. لا حول ولا قوة الا بالله
الدكتور ربت على كتفه : خلك قوي مثل ما اعرفك دايم ..
هز هيثم راسه بعدم استيعاب .. انتبه لخواته من بعيد يجون : هيثم شصار ؟ شقالوا لك ؟
هيثم وقف بقوه : لسى الفحوصات ماوضحت بس ان شاء الله خير ..
ابتسام : اكيد
ابتسم هيثم يطمنها : ان شاء الله ... ( التفت لغادة مستغرب ) انتي هنا ! مو مسافره ؟
غادة بقلق : مو وقته هيثم .. ابوي نبي نشوفه
هيثم : ماراح تقدرون اللحين .. لازم فحوصات وكم شغله ابيكم ترجعون البيت ترتاحون وانا موجود
ابتسام باصرار : ماراح ارجع قبل اتطمن .. ولا راح ارجع الا مع ابوي
هيثم : وجودك ماراح يودي ولا يجيب .. فلا تتركيني شايل همكم هنا وارجعي البيت
غادة : عفيه هيثم .. اقل شي لحد تخلص الفحوصات والله ماراح نقدر نرجع
هيثم تنهد : اذا احتجتو شي كلموني .. انا رايح اتابع الفحوصات
هزت ابتسام راسها : حاضر
دخل هيثم لغرفة الفحوصات .. التفت له الدكتور وهز راسه .. بلع هيثم ريقه : سرطان ؟
الدكتور : سرطان الدم ومنتشر بكل دمه .. وانت افهم ..
هيثم : يعني مافيه امل حتى نستأصل
الدكتور : ساعاته معدوده ... ادعو له وودعوه بآخر لحظاته
مهند حط يده على كتفه : على اجر وانا اخوك .. على اجر
مسك هيثم يده وردد بصعوبه : اللهم لا اعتراض .. اللهم لا اعتراض
مشى بثقل لحد وصل السطح ... طالع بالسماء وهو يدعي بتضرع : يارب رحمتك .. يارب الهمني الصبر ...
***
بيت أبو فراس- قبل العشاء بساعه :-
حطت اسماء اللمسات الأخيرة بعد ماخلصت الكشخة .. كانت لابسه /
فستان سماوي بقصة فكتورية ومشجر بورد بنكي طوله ثلاثة ارباع ومناسب رشاقة جسمها ونحالته.. مع خف بيج بفيونكة خفيفه .. وشعرها الاشقر لكتفها مجعدته
ومرتبته بطريقة تشبه الستينات .. مع روج احمر ومناكير حمرا .. طالعه نعومه ومناسبها اللوك طالعه كأنها من الستينات بجد .. ومناسبة بشرتها البيضاء النقية وعيونها الزرقاء .. نزلت لتحت وهي تتأكد ان الكل طالع ومحد بالبيت ..التم الكل والجمعه اكتملت بحضور وداد وسجى .. ومنال وغاليه صديقات ميهاف المقربات ... كانت ميهاف آخر
الواصلين .. فتحت لها اسماء وهي تعاتبها : وينك تاخرتي مره !
ميهاف : ياشيخه اسكتي .. السواق مشغول بعد الشين فضا لي .. واخواني محد موجود وبابا عنده عزومه بالبيت
اسماء : يله الكل موجودين ترا
ميهاف : اصبري بوقف عند المرايه افصخ عبايتي وارتب شكلي
فصخت عبايتها وكانت لابسه /
بلوزة خضراء ساتان بكم طرزآن وحزم بالنص .. مع بنطال ضيق اسود .. وكعب ذهبيه وشعرها ناعم بطريقه منفوشه .. وكبه كبيره من قدام
وملفف الاطراف ومكياجها .. روج برتقالي مناسب شفايفها الريانه
وكحل فرنسي .. وطالعه فتنه كعادتها .. رشت عطرها
واسماء صفرت وهي تغني : مذذذهلللللله
ميهاف : تسلمي .. والله كنت شايله هم شكلي
مابي يصير بايخ بأول طلعه لي قدام العالم من خطوبتي
اسماء : والله انتي لو تلبسي زباله .. زباله مايطلع شكلك بايخ .. فتنه ياعمري تعالي تأخرنا على البنات
ضحكت ميهاف : ههههههه ياحبي لك يختي .. وانت كمان هاللوك ماخذ منك حته
اسماء بثقة : عارفه
دخلت ميهاف وضمت مباشرة صديقاتها وصراخ البنات المعتاد عند اللقاء .. ولأن صديقاتها اول مره يقابلنها من انخطبت : مبرووووووك .. اخيرا قررتي تعطفين على واحد من الخطاب وتوافقين
اسماء : هييه .. وش تعطف ماتعطف ؟ هذا اخوي هو اللي تنحسد عليه
غاليه وهي تحاوط ميهاف من كتوفها بفخر : حدك حدك .. هذي ميهاف والله وتصدقت على اخوك يم وافقت
منال : ليش الكذب يا غاليه . ؟ واذا ميهاف صديقتنا نحبها وكلش بس الحق .. خطبها واحد بمليون
اسماء : ايوه .. كفو منال قل الحق ولو على قطع رقبتك
ميهاف : ههههههههههه ياهوه ابثرتونا .. اجلسو اشتغلو هوشات مباشره
غالية : والله انا ما اتهاوش الا كرمالك .. مابي بنت الحما هذي تدخل دور الحماه الشريره وتذلك من اللحين .. لزوم تاخذين حقك على طول
ميهاف : بعد عمري .. مايبي اخذ حقي خليها تتجرأ بس تسوي فيني شي ؟
اسماء طالعتها بنص عين : وانتي فكري تزوديها .. اعلم اخوي وافضحك عنده
وداد : ههههههههههههه والله وطلعت علاقه جديده بين اسماء وميهاف
سجى : اقووول نبي نجلسس .. تعبنا واقفين وين الضيافه يا اسماء
اسماء : خلي منك الشفاحه والضيافه بتجيك .. تفضلن من هنا
جلسو بجلسة رايقة على انوار النافورة بالحديقة وعصير وانواع اصناف الحلويات والحلا والكيك وتنسيق الطاولة بشكل رايق .. والجو يفتح النفس /
غالية : اقول اسوم .. ناخذ راحتنا محد بالبيت يعني ؟ خطيب ميهاف مثلا ؟
اسماء : هههههههههههه لا مافيه احد مصرفه الكل عشانكم ..
منال : ميهاف امانه وش شعورك ؟
ميهاف وهي تاكل : ههههههههههه وش شعوري يعني .؟ ما تغير شي مجرد صرت مخطوبه لواحد ولا الحال نفسه مو زواج عشان اخترع
سجى : صدق متى ناوين تتزوجون ؟
ميهاف : لاحقين .. بدري
وداد : الله يوفقكم ... ماتوقعت صدق
سجى طالعت بالديجي المركون وشهقت : ااااااااااااا ديجي !! بنات بنقوم نرقص
تحمسو البنات معها .. وقفت منال : ايييييييييه تكفون شغلو .. فيني طرب وودي ارقص لعيون صديقتي الحلوه
اسماء : هههههههه من عيوني .. يله طلعوا المواهب نشوف من السنع فيكم
وداد : وانتي كمان نشوف سنعك
اسماء : لا لا .. انا ماحرقص رجلي توجعني برتاح .. انتو وروني ابداعاتكم
شغلت اسماء الديجي .. وبدا الصوت العالي يرج المكان صرخت عشان يسمعونها : ايش تطلبون الاغنية ؟
سجى : شغلي حاجه لكريس براون
شغلت اسماء " yeah " .. قامت سجى ومنال ... ورقصن بحماس وهن ينططن اقرب منهن للرقص ..
ميهاف تصفق : هههههههههههههههههههههههه عاشن
منال وهي ترقص بحماس : عاشن من مكانك يالجبانة !
سجى : والله سخيفات قومو ارقصو .. !!
غالية: انا ارقص بصراحة بس مو اجنبي .. شغلو حاجه للجسمي
منال : بنشغله بس بشرط .. ترقص العروسة بعد
ميهاف : ههههههههههههه اكيد .. بس الاجنبي هذا انا مالي فيه
غيرو الديجي لاغنية عربيه مسرعه .. قامت غالية وسحبت معها ميهاف بالهز الشرقي .. ميهاف بمؤهلاتها بالجسم كان يكفي منها بس تحرك خصرها عشان تجذب الانتباه ..
صفقت اسماء بحماس وهي تصفر : اديييييييييييلو ..
مشت ميهاف وهي ترقص لحد ماوصلت اسماء ومسكتها مع يدها وسحبتها : ارقصصي
اسماء ماكانت مره بالرقص الشرقي .. فهزت شوي بشكل مضحك ثم جلست : ههههههههههه مقدر اكمل مع هالمبدعات
كان تناسق ميهاف وغالية بالرقص رائع .. متعودات من زمان يرقصن سوا وفاهمات بعض ..
بعد ماخلصت الاغنية صفقو بحراره ... منال : اروووووووووح وططططي .. مبدعاات
سجى : ميهاااف علميني كيف ابي اعرف
ميهاف : هههههههههه مدري كيف اعلمك حركي خصرك وبس
سجى : ياسهلها بس حركي خصرك وبس ! علميني كيف احرك خصري وبس
حاولت ميهاف تعلمها : ههههههههههههه لا مو كذا بسرعه .. صيري انسيابيه ولاتحركي جسمك كله بس المنطقه اللي تبغيها ..
وسجى المسكينة تحاول تقلد .. لكن بالاخير صرخت باستسلام : اااااااااااااااااا خلاص ماعرفت !! والله والله صعب
ميهاف : مو صعب .. اجتهدي وتعرفي ..
غالية : هههههههههه خلي الرقص لأهله بس ..
وظلن بالسوالف والضحك والوناسة .. وش اروق من جمعة بنات بنفس العمر والجنون والصرقعه ..
***
الكـويت – المساء /
كان لؤي راجع للشركة ياخذ ملف نساه ومهم مضطر عليه .. قبل يطلع انتبه لضوء خافت بقسم الترجمة عقد حواجبه ودخله كان خالي ونور خافت بالمكان .. مد يده بيطفي النور ويطلع لكن طالع بمكتبها بين زحمة المكاتب بنفس الصالة وجلس على الكرسي وهو يشوف بفضول ترتيب المكتب .. فتح درج صغير بعشوائيه وانتبه لإيطار صورة داخله صورتها وهي طفلة بعمر 5 سنين ... وبأحلى والطف شكل ممكن عيونها التركوازية كان أوسع وتضحك بمرح وشعرها البني الأسود .. كان بني فاتح اكثر وجمبها حرمه خمن أنها امها .. الشبه واضح نفس لون العيون والبشرة .. لكن الملفت بالصورة الرجال اللي جمب امها مشوبه صورته بالقلم وممزق وجهه .. حتى أنه ماقدر يشوف لمحته او يميزه مجرد جسمه ومحاوط امها من خصرها .. كان منغمس بتأمل الصورة حتى انسحبت من يديه بقوه رفع راسه كانت واقفة وواضح على تعابيرها الغضب : من سمح لك ؟
لؤي : سارا .. وش تسوين هنا بهالوقت ؟
سارا : نفس الكلام لك .. شتسوي وليش تنبش باغراضي !؟
لؤي حس موقفه بايخ بجد : مو تنبيش .. لفتني النور هنا جيت بطفيه فــ
سارا : فشنو ؟! قلت افتش اغراضها واشوف !!
لؤي : تعوذي من الشيطان ماله داعي كل هالعصبية .. كنت ادور ملف وبعدين لو شي خاص مره ماكنتي بتحطينه هنا
سارا دخلت الايطار درجها وسكرته باقوى ماعندها : هذي اسمها لقافه يا استاذ ! واقتحام لخصوصياتي ..صدق مهزله واحد وقح والثاني ملقوف
لؤي : ماله داعي تغلطين .. والموضوع اخذ اكثر من حجمه على اساس شفت مخدرات وأبر .. كلها صورة بشوفها بمليون مكتب غير مكتبك
سارا سحبت شنطتها وجاكيتها : اوك رح لهالمليون مكتب وسو نفس الحركة وبنشوف ردة فعلهم
لؤي : خلاص اوك انا اسف .. ماله داعي كل هالصراخ !
سارا وهي بطريقها طالعه : لو كلمة اسف تحل كل شي ماحتجنا الشرطة هجل !
لؤي مسح على وجهه بارتباك ورمى الكرسي برجله بقهر : حساسيه زايده استغفر الله !
وطلع من القسم وهي قافله معه ..
***
جمعة البنات .. الساعة 12 ونص :
جالسات على طاولة العشاء وكلهم جالسين الا اسماء واقفه وتسولف بحماس : ههههههههههههههههههههههه اتوقع ياميهاف لاتزوجتو بيصير دولابه هو اكبر من دولابك . وبيجلس قدام التسريحة وبيستعملها اكثر منك
غالية ميته ضحك : ههههههههههههههههههههههه لا لا تو ادري انه كذا مستحيل
منال : ههههههههههههههههههه لا انا توقعت يكون كذا بما انه بالمجلات وواضح عليه .. بس لهالدرجة نو واي !
اسماء وهي تقلد عجرفة تعابيره وتاشر لنفسها : انا بدر الكل يحكي عن وسامتي ويحط صوري .. آخذ مين ؟ فلانه ؟ لا اعذروني ماتليق بمقامي ومستواي
وداد : هههههههههههههههههه عيدي عيدي
اسماء : ولااا لو تشوفون غرفته .. ولا حمامه انواع الزيوت والمعطرات و ..... حاجه فضيعه انا اذا ابغى شي ما اروح السوق اروح غرفته مباشره
ميهاف : ههههههههههههههههه والله طحت بمغرور !
اسماء : لا حبيبتي هو مو مغرور .. بس هو مقتنع انه احسن واحد فينا فحنا نحترم قناعته .. انتي كمان احترمي هالقناعه شفيك ؟
سجى : ههههههههههههههههههههههههه ههه خلاص اسماء نشرتي غسيله قدام خطيبته مسكين
اسماء : يستاهل ! قاهرني .. من كسرت رجلي وهو مايبي يطلعني .. تخيلو ياخذ كل البيت كله حتى ياسمين وانس الفصع ويتركني لحالي
منال : ههههههههههههههههههههههه انتقمتي وبزياده ماقصرتي فيه
اسماء : لا لا مانتقم لين يطيح من عينها ... ميهاف طاح من عينك ؟
ميهاف : ههههههههههههههههههههههههه هههههههههههههههههه لو طايح ماوافقت !
اسماء : ياشيينك .. انا وهو اخوي طاح من عيني خلاص
غالية : بعد عمري ميهاف اصيله
اسماء : ههههههههههههه تدرون وش يقهر بالموضوع كله ؟ امي !!
منال : ههههههههههههههههه خلصت من الرجال راحت لأمها
اسماء : ههههههههههههههههههههههههه هه لا يعني بجد تعطيه على جوه بزياده ... نافخه راسه كل ماشافته تشعر فيه ... ( تقلد امها ) بعد عممري وليدي يجنن .. ما ششاء الله تبارك الرحمن وسيم مدري ليش هو وسيم كذا ؟
سجى : انتي من جدك ؟
اسماء : استهبل يعني ؟! ايه كل المجلات اللي يطلع فيها تقعد ساعه تطالع فيها وتحبحبها .. تعشقه
غالية : هههههههههههههههههههههههه اثر راس المشكلة امك يعني
اسماء : ههههههههههههههههههههه والله محد عارف له الا فراس .. كل ماشافه عطاه اياها كاش
سجى تنهدت : هذا الرجال
منال : ههههههههههههههههههههههه حرام عليه .. عاد الحق يعني صح مغرور بس هو وسيم يختي يحق له
سجى بدفاع : لا يختي .. فراس اوسم منه ولا صار له كذا .. بس هذا فراس من مثله فديت بس
اسماء طلعت عيونها : هيييييييييييه هيه سجيه .. شوي شوي استهبلنا !
سجى : يالييييييييييل يختي خليني اخذ راحتي .. مجرد فضفضه !
اسماء : بعلمه ترا .. وفراس عاد يستحقر هالهبال ترا
سجى : الله يلعن الذل بس
غالية دق جوالها : يله يابنات هذا اخوي جا ..منوله تروحين معاي ؟
اسماء : يوه لسى بدري .. ماشبعنا منك يختي
منال : ايه بروح معاك .. لا اسوم تسلمين ماقصرتي والله انبسطنا كثير بس خلاص
ميهاف : الله معاكن حبيباتي .. والله فرحت اليوم بشوفتكن كثير عيدوها
غالية : اكيييد
لبسن عباياتهن .. وقامت اسماء : يله بوصلكن الباب
طلعت اسماء معهن ... واول مافتحت باب البيت كان بدر داخل ومرهق وواضح التعب عليه بقوه لأنه ضل طول اليوم مع نايف وتكلم معه وهداه لحد رجعه لبيتهم يتصالح مع ابوه .. كان لابس بنطال اسود قصه نازله للركبه جنز طويل وشيرت عنابي طافي كم نص مرسوم عليه بوب مارلي بالاسود وجاليه ابيض فوقه طويل لحد الخصر وجزمه رياضيه سوداء .. اناقته المعتادة ودون يربط عمامه على راسه وهذا نادر لأن الغتره السوداء طارحها على كتفه وبدر كان شعره محلوق على طول مايطول شعره ابدا لكن محلوق بطريقه مرتبه والشعر المحلوق مايلبق على الكل لكن لابق له مع حاجبه المقطوع .. اسماء : بدر شوي على جمب البنات بيطلعن
بدر ماله خلق : يطلعن ماراح اكلهن !
اسماء همست لهن : يمه معصب .. امشن ماعليكن منه ..
طلعن البنات لبرا .. واسماء طالعته بنص عين : خير مالك خلق .. وجهك تافل العافيه
بدر : بقوه ... وين امي ؟
اسماء : مب موجوده .. محد موجود بس انا وصاحباتي
هز بدر راسه : انا بصعد مباشره اعتبريني مو موجود
اسماء : بدر .. حرام تجلس مطنشها يكفي امس فشله قدام العالم .. اقل شي سلم عليها
بدر من الارهاق كانه ناسي ان جمعه لصاحبات اسماء اكيد ميهاف فيها : موجودة اللحين ؟
اسماء ابتسمت : ايه .. خلك هنا بقولها تجي تسلم عليك قبل تصعد
بدر : زين
رجعت اسماء للبنات .. وكانت ميهاف حاطه رجل على رجل وتسولف مع وداد : ميهاااف
ميهاف : سنه عشان توصلينهن للباب .؟
اسماء : هههههههههههههه لا .. بدر قابلني وانا اوصلهن وبيسلم عليك قومي
ميهاف ( ايه اللحين بتسلم ! ) : ماله داعي اسماء اللحين .. بعدين ماستعديت
اسماء طالعت بوداد يعني ساعديني... وداد : ميهاف قومي وش ناقصك ؟ مجرد سلام على الماشي
اسماء : ايه وبعدين ترا العناد مايجيب شي .. قومي اخلصي الرجال ينتظر
ميهاف : اففف لاتحنون مااابي .. مو غصب
سجى : والله ما اكون مكانك الا تلقيني متربعه اسولف معه اللحين
ميهاف مسكت جوالها ولا كأنها تسمعهم اساسا .. اسماء : اخر كلام يعني ؟
ميهاف طالعتها بنص عين .. يعني مستحيل !
استسلمت اسماء وطلعت لبدر : اصعد بدر خلاص .. ماتبي تسلم
بدر : شنو ؟
اسماء بقهر : الحق عليك انت .. محد قالك تجحدها ذاك اليوم ؟
بدر : حضرتها ماتبي تجي يعني .. ؟
اسماء بارتباك : تقول ماستعدت ..
بدر بعصبيه : احسن تجلس بالطين لين يلين .. اصلن تعبان ومالي خلقها !
تنهدت اسماء بيأس منهم .. هذا وهم توهم خاطبين ورجعت للبنات ... بعد فتره والجمعة صارت هادية والبنات مجرد يسولفن على الهادي بعد تعب البطرة سمعن صوت حنحنة .. اسماء : هذا فراس اكيد !
طلعت كان صاعد لفوق .. وانس جالس يشبك البلايستيشن بيلعب : شجابكم ؟ تو البنات ماراحو
فراس : الخلا .. الساعة 2 جمعة بنات لهالساعة !
اسماء : احول خلاص لاتعصب ..
فراس : امي وين ؟
اسماء : امي عند الجيران .. تو دقت علي وقلت لها لاراحو البنات بعلمها تجي
فراس فتح عيونه : ماتستحين على وجهك انتي ! وش جالسات تسون يعني عشان تسوين طرد جماعي لكل اللي في البيت !
اسماء : مانسوي شي .. بس بناخذ راحتنا
فراس : قدامي دقي على امي تجي اللحين
اسماء : يووووه فراس .. ياسمين بتجلس تزعجني و ..
قاطعها بصوت مرتفع سمعنه البنات بالغرفة : اسماء !
اسماء مسكت جوالها ودقت على امها تجي .. اول ماخلصت طالعته : مبسوط ؟
فراس : هيه انتي .. عدلي اخلاقك قبل أأجل سفرتي هالشهر واتفرغ لك ارجعك للدرب
اسماء تكتفت بقهر : وانا وش سويت ؟ هذا دقيت عليها
صعد فراس .. واسماء رجعت للبنات وجلست بعصبية .. وداد بارتباك كانت تجهز عبايتها .. اسماء : وين ؟
وداد : مدري شكل فراس معصب و ... خلاص دقيت على عبد المجيد بيجي
ميهاف : يمه .. شفيه معصب صدق ؟
اسماء : ماعليك منه .. عشان امي للحين عند الجيران
ميهاف : ايه تستاهلين .. انا من كلمتيها اقولك خليها ترجع عاد امك ياعمري جلستها تجنن وزياده ع كذا مخليتك ع راحتك
اسماء : انا عشان ياسمين هالبثرة .. نط بوجهي يمتي كاني مسويه جريمة
ميهاف : معه حق بصراحه .. لأول مره بقولك تستاهلين اللي جاك صدق
اسماء : فكينا فكينا .. !
صوت انس برا : اسماء جويع .. والخدامه رقدت ابي عشاء
اسماء : شفتو ! شفتو ! هذا اول القلق .. اصبرو تجي ياسمين بعد
ميهاف : انا لله .. عشان طلب عشاء يعني ؟ مسكين يختي قومي ولا قمت اعطيه
اسماء : انس انقلع من وجهي قبل يجيك مخمس اللحين .. امي بتجي اللحين وبتسوي لك
سجى : وداد عبد المجيد دق يله نطلع
ودعو البنات ... وميهاف وقفت : انا بعد السواق شوي وجاي
اسماء مزاجها معكر : افففف زق بجوي على اخر وناستي
ميهاف : ههههههههه روقي عاد انتي .. كلها نفخه تسوي فيك كذا
اسماء ضمتها : يله حبيبتي في امان الله .. بتوحشيني
ميهاف : وانتي كمان
طلعت ميهاف بعبايتها .. تو بتفتح الباب تطلع مسكت يده مقبض الباب التفتت له وهو يطالعها بعيونه العسلية الحادة رفع حاجب : ماتبين تسلمين اجل ؟
ميهاف بلعت ريقها وقالت بهدوء : وخر بطلع
بدر: اولا سلمي ... ثانيا مو انا اللي تردين لي طلب حطيها ببالك بما انك بتمضين باقي العمر معي
ميهاف بهدوء : على بالك انت الوحيد عندك كرامه وماتنرد .. حتى انا عندي كرامة ولو كنت تبي تسلم كان سلمت زي الناس من البداية !
بدر ببساطة : انتي اللي بديتيها .. ولا حركتك بالمطعم كنتي متوقعه تمشي كذا ؟
ميهاف : والله بالمطعم عطيتك رايي بصراحة .. اذا انت ماتتقبل مب مشكلتي
بدر : لا ياعيوني انا اتقبل .. لو ما أتقبل ماكنت رفضت العرض عشانك وخسرت , بس اللي ما اتقبله هو الاسلوب الشرس حقك .. تعالي بأسلوب وشوفي وين بوصلك
انفتح باب البيت .. كانت ام فراس فتحت عيونها : بدر .. ( ضيقت عيونها ) ميهاف ؟
بدر ابتسم : هلا يمه جيتي ؟
ام فراس ما اعجبها الوضع : ايه جيت .. شجالسين تسوون ؟
بدر : شنسوي يعني .. نسلم
ام فراس : ايه بس ليش لحالكم ؟ اسماء البازع وينها ؟
ميهاف انحرجت .. موقف بايخ قدام امه عاد : خالتي انا كنت طالعه السواق برا .. وصادفته ماكنا متوقعين
ام فراس : ايه سواقكم برا .. في امان الله
طلعت ميهاف .. وام فراس التفتت لبدر : بديران .. وش كنت تسوي وياها ؟
بدر : هههههههه والليل يمه .. يعني حديقة وهي بعبايتها وش نوع المنكر اللي بيصير ؟
ام فراس ضربته على كتفه بخفه : وتقولها بعد !
بدر باس راسها : يا غاليه ماصار شي .. انا صاعد انام
ام فراس : نوم العافية ...
دخلت ام فراس : اسسماء
اسماء كان جالسة بملل عند التلفزيون : ايه يم
ام فراس : شتسوين هنا ؟ وتاركه ميهاف وبديران لحالهم برا ؟
اسماء فتحت عيونها : هاه !وين ؟
ام فراس بعصبيه : بالحديقة .!
اسماء : شدراني . هههههههههههههههههه اما كانو بالحديقة ؟ وش يسوون ؟
ام فراس : مالت عليك .. مبسوطة هاه !
اسماء : شنو يمه علميني صدق .. شقاعدين يسوون ؟ ولا تدرين بروح اكلم ميهاف اضحك عليها
صعدت لفوق .. وام فراس هزت راسها بيأس ..
***
أول ماوصلت ميهاف البيت .. حصلت هدية لؤي بغرفتها انبسطت من قلب انه فكر فيها حتى وهو بعيد .. دقت عليه مباشرة دون تفكير رغم تأخر الوقت : لؤؤي
لؤي : هلا
ميهاف : شكرا شكرا على الهدية .. مره مره تجنن
لؤي : اهم شي اعجبتك
ميهاف : ههههههههه عاد تصدق دقيت وانا احس الوقت متأخر .. ماتوقعتك صاحي شمصحيك للحين ؟
لؤي : مدري .. صاحي وبس .. وانتي شمصحيك للحين ؟
ميهاف : تعرف اليوم كله حفلات وعزايم .. هلكت خلاص تو وصلت البيت
لؤي : الله يهنيك
ميهاف : شفيه صوتك ..؟
لؤي : مافيه شي ... اقول ميهاف بسألك سؤال وجاوبي بصراحة
ميهاف : شنو ؟
لؤي : لو كنتي موظفة بشركة .. ويعني مختلطة ودخلتي بيوم شفتي إيطار صورة عائلية لك بيد واحد وهو بمكانة صديق يعني شبتسوين ؟ بتعصبين ؟
ميهاف : ايه بعصب ونص ! صورة عائلية معناها صورة امي وانا دون عباية .. وعلوم
لؤي : لا لا ميهاف .. يعني اعتبري انه نظامك غربي شوي تداومين اساسا دون عباية وكلش فري
ميهاف احتارت : لؤي من هذي ؟
لؤي : مو احد .. بس موقف صاير مع واحد
ميهاف : لؤي اعرفك انا .. ممن هذي ؟
لؤي تنهد : وحده ..
ميهاف : ايييييييييوه .. وحده من هالوحدة اللي مسهرتك الليل ؟
لؤي : بقولك .. بس بيني وبينك هاه لاتخورينها
ميهاف : ماعليك ستر وغطا !
لؤي : اااخخ ياميهاف لو تشوفينها .. انسانه عجيبة حمدت ربي مليون مره ان اسماء رفضتني عشان اجي واشوفها
ميهاف شهقت : تحبها لؤي ؟
لؤي : لا بس شكلي بالطريق .. احسها دافعي هنا ما اصحى بدري الا اذا تذكرت اني بشوفها .. اذا شفتها احس الدنيا تحلى بعيني
ميهاف : الله .. الله .. الله .. والله وطحت ومحد سمى عليك .. من هذي اللي قلبت كيان اخوي ؟
لؤي : كلش فيها ملفت ياميهاف .. متواضعه مع ذلك واثقة بنفسها كأن محد أحسن منها حتى انا حاقرتني من الثقة ههههههه
ميهاف ابتسمت وهي تسمعه : ايوه ؟
لؤي : هههههههههه شنو ايوه جالسه تحلليني انتي ؟
ميهاف : لا بس تحمست اسمع عنها ..
لؤي : ماراح تفهمين من كلامي .. لازم تقابلينها عشان تفهمين
ميهاف تحمست : حلوه ؟
لؤي تنهد : حلوه وبس ؟
ميهاف : امانه لؤي .. دامها فري كذا ارسلي صورتها
لؤي : لا ياشيخه فكينا بالغلط شفت صورة اهلها سوت لي سالفة لها اول مالها تالي
ميهاف بجدية : لؤي
لؤي : هممم
ميهاف : انا مبسوطة عشانك .. من جد يعني واتمنى يتحقق اللي ببالك بس لازم تفكر صح يعني وش نهاية هالعلاقة ؟ من كلامك عن البنت واضح انها متفتحه جدا .. وانت تعرف أبوي ..
لؤي : ماراح افكر بهالشي اللحين .. اساسا البنت مو ملقيتني وجه عشان افكر بابوي اللحين
ميهاف : والله حاصلها !
لؤي : ههههههههه روحي علميها
ميهاف تثاوبت ..
لؤي : روحي روحي نامي .. اشغلتك بسوالفي
ميهاف : حنام .. بس يله جعل حظي حظها وواحد يحكي عني بنفس الطريقة
لؤي : قواك الله اخضعي بدر وخليه يشعر فيك
ميهاف : ههههههههههه ايه طيب
لؤي : تصبحين على خير
ميهاف : وانت من أهله
بعد ماجافاه النوم .. فتح مدونته وكتب بإلهام /
- جميلة الصورة .. ذكية الملامح .. سريعة الخاطر .. في ضحكتها جرس موسيقي عذب وبعينيها صفاء عجيب .. تلك هي حبيبتي ~
***
مستشفى جـدة /
طلع هيثم من ثالث غرفة عمليات لليوم .. للحين مايبي يدخل على خواته وأبوه .. ومنع الدكتور يقولهم أي خبر يبي يتصرف هو دق جواله " ابتسام " .. دخله بمخباه وفصخ زي العمليات ولبس معطفه .. ودخل الغرفة وابتسم : حمد الله على السلامة يبه
أبو هيثم : الله .. يسلمك .. ها يابوك وش قالو لك ؟
هيثم دخل يده بمخباه وغرز اظفره باصبعه : كلام كثير يبه مو مهم .. الخلاصه ان هاليومين لازم تروق لأن النفسية مهمه جدا .. وبوكل هالمهمة لخواتي لاتتركونه ولا دقيقه هاه !
ابتسام : ولا يهمك .. 24 ساعة حوله
هيثم بالم بداخله : خلاص هذا كل اللي يحتاجه ...
غادة ضمت ابوها : الله يطول بعمرك يبه .. ومانشوف فيك شر
هيثم هزته كلمتها " الله يطول بعمرك " : غادة .. ماجاوبتيني للحين وش جالسة تسوين هنا ؟ رجلك وينه ؟
غادة : بدبي ..
هيثم عقد حواجبه : ايه عارف .. وانتي ليش مو معاه ؟
غادة : مابي اروح .. بجلس معاكم
هيثم مو غبي ومافاته انه في شي .. بس ماله خلق اللي فيه كافيه : اجل انا بطلع الكافتريا وبجيب لكم غدا مره وحده
طلع .. وقابله بطريقة عمانه تنهد واستقبلهم : وين مشعل ؟
هيثم : موجود ..
أبو احمد : ووش فيه ؟!
هيثم : مافيه الا العافية !
أبو مرزوق : نبي نشوفه
هيثم ماله نفس كلش .. مشى بطريقه : من مانعكم ؟
دخل ابو احمد وابو مرزوق .. ابو احمد فتح عيونه : غادة !
غادة مسكت قلبها : هلا .. عمي
أبو احمد : شتسوين هنا ؟ متى رجعتو ؟ واحمد وينه ؟
ابتسام : غادة ماراحت مع ولدك ..
ابو احمد : وليش ان شاء الله ؟ حنا مزوجينه عشان تهملينه ؟
ابتسام كان بتتكلم بترد لكن غادة ردت بسرعة : ابوي كان تعبان .. ولا قدرت اروح واخليه ..
ابو احمد التفت لابو هيثم :شايف سوات بنتك يامشعل !
ابو هيثم : حدك .. ولدك هو اللي رماها عندنا ورفض ياخذها وسافر مع ربعه
ابو احمد : مستحيل هالحكي صحيح !
ابو هيثم : الا صحيح حتى لو ماتبي تصدقه .. ولو بنتي موعاقله كان فضحته لكن العتب عليها وعلى عقلها
ابتسام : يبه هد .. مو زين لاعصابك
أبو احمد التفت لغادة : انتي قومي اللحين ارجعي معي .. حتى لو ولدي غلط وتركك ماتجلسين عند اهلك خلاص ماعاد بيتك .. بيت رجلك يتلفاك
غادة : راح اجي بعد مايطلع بابا ..
ابو احمد : مافيه ! اللحين قدامي ترجعين معي
غادة خذت عبايتها بيأس وهي تحس بكل معاني القهر .. باست راس ابوها وطلعت معه أول ماركبو السيارة دق على احمد : الو ! ......... ليش غادة مب معك ؟ ... اسمع يا احمدوه علم ياصلك ويتعداك لو ماترجع اليوم لاشكيك عند الشرطة واقول فلوسك مب حلال.......... انقلع باللي مايردك
سكر الجوال وهو معصب : وانتي يصير معك كل ذاه وماتتكلمين ..!!
غادة : هو قالي ما أتكلم .. شاسوي يعني ؟
ابو احمد : تتصرفين .. بس شاقول ..؟ بزر وش بيطلع منك الا الردا
اول ماوصلوا البيت .. دخلت البيت اول ماشافتها ام احمد شهقت : غادة ! شتسوين هنا ؟
ابو احمد دفها قدامه بقوه : ماراحت اصلن حضرتها ! .. ولدك بس اللي راح وهي جلست حضرتها تبي ابوها
أم احمد : صدق انك منتب وجه سفر ولا سنع ... كان خليتها عند ابوها ليش جبتها حنا الغلطانين اللي طلعناها من بيت ابوها بالبداية
غادة انقهرت .. ولدهم الغلطان وهي اللي تاكلها بعد مشت متجاهلتهم لفوق ..
ابو احمد : اوقفي محلك انا احاكيك !
غادة تجاهلته ولا كأنها تسمعه ... ام احمد هزت راسها : هذي اللي تبيها لولدك قليلة حلا وماعندها مبادئ
أول ماوصلت غادة غرفتها دق جوالها " حبيبي " ردت بقهر : نعم !
احمد : الله لاينعم عليك .. وش اللي تفهمينه من اهلي لايشوفونك ! رحتي ترززتي قدامهم مامر اسبوع
غادة : لو سمحت اذا داق تنكد علي كافيني اهلك ..
احمد : اصص ولا كلمة .. باختصار انا مانيب مخرب وناستي عشانك وراجع فقسم بالله لو مايدق علي ابوي اللحين ويتركني اجلس براحتي حسابك عسير
غادة بقرف : تصطفل منك لابوك لامك لملعون جدك انا مالي دخل !
سكرت السماعة دون تسمع ردة ورمت الجوال وهي متكتفة معصبه ... رجع يدق مسكت جوالها وصممته وقفلت باب الغرفة ولبست سماعاتها ورفعت لاعلى شي وجلست بغبنه ..
***

بالصبــاح – بيت أبو فراس /
كان الكل بالحوش وفراس يرفع شناطه بيمشي .. باس راس امه .. ام فراس بقهر : والله مامداك ..
فراس : ماجيت هالمره عشان اطول
التفت فراس لبدر .. تنهد ومسك يده وحط فيها بطاقة بنك : هذا حساب فيه 350 الف مهرك
فتح بدر عيونه : من جدك ؟
فراس : ايه .. هونت يخي لو تمسك الشركات ضيعتها بيومين خلك بعروضك وانا بتصرف
بدر : يعطيك العافية .. والله هالخدمة ماحنساها
فراس : احسن لك ماتنساها !
اسماء : وانا مالي شي ؟
فراس : لا .
اسماء برطمت : بخيل
فراس : يله استودعكم الله
: في امان الله ..
اول ماطلعت سيارته تنهد بدر : ياحليله والله بشتاق له
اسماء : نصاب ! بلا عشان الفلوس ولا لك يومين تحش به
بدر ضرب راسها بخفه : ههههههههههه انطمي انتي
ام فراس : الله يحفظه ويخليه لنا
بدر : امي بتبكي الله يصلحه فراس ذاه
ام فراس : يصلحك انت .. ولا هو ماعليه خوف
بدر : افا يمه وش شايفه علي ؟
***
بيت أبو نايف – صباح /
كان الكل جالس بالصالة .. والصمت سيد الموقف نطق ابو نايف .. ونايف كان جالس بصمت ..
ابو نايف : انت تدري ان اللي سويته غلط .. انك تمنع من دخول دولة هذا شي كبير !
نايف بهدوء : ايه ادري ..
ام نايف : والصراخ والعصبية اللي استعملناها معك امس .. ماتنفع ولازم ناخذك بالسياسة ونتفاهم
ابو نايف : يانايف انت ماعدت صغير .. لمتى يعني بجلس اصارخ عليك واعصب ونلاحقك كانك مراهق ؟ خلاص عمرك 30 سنة وعندك ولد ..
نايف : كويس انك عارف .
ابو نايف مسك اعصابه .. ميهاف طالعت نايف بلوم : نايف خلاص !
ابو نايف : عقب اللي سويته واللي عرفته عنك .. فيه شيئين لازم تسويها واذا ماسويتها انا مستحيل اسامحك ووقتها البيت يتعذرك رح صرف حالك بحالك
نايف كان ساكت ينتظر الطلبات اللي بتدمر حياته مثل ماهو حاس ..
ابو نايف : بعطيك فرع الغربية .. امسك ادارته واشتغل خل عندك مصدر دخل يعزك
نايف : و ..؟
ابو نايف : وتزوج
نايف : يبه الزواج مايناسبني .. وعندي تجربه سابقه يعني مايحتاج
ابو نايف : وانا ماعندي شي اقوله غير كذا ..!
نايف : خلاص راح اتزوج .. بس ماراح اشتغل بالشركة
ابو نايف بصرامه : نايف ! حنا مو قاعدين نمزح .. ع بالك اللي سويته سهل ولا لعبه احمد ربك اني رضيت ومعطيك شيئين أي شخص ثاني بيعتبرها هديه شغل وزوجه وش بعد
نايف تنهد : سوو اللي تبون ..
ابو نايف : موافق يعني ؟
نايف باستهزاء وهو طالع : خيار ما أوافق متاح من دون ما انطرد من بيتك
ابو نايف : لا
نايف : اجل لا تسأل اسئلة سخيفة !
هز ابو نايف راسه وهو يشوفه طالع .. اخلاقه مقفله بس دام وافق خلاص هذي بداية الخير التفت لام نايف : دوري وحده اخطبيها له
ام نايف : بنجلس انا وميهاف اللحين وبنفكر بوحده تناسبه
ابو نايف : ايه فكرو .. خلاص تعبت منه هالولد ابي ازوجه وارتاح من همه ومسؤوليته !
***
غـادة صحت من النوم ولبست على السريع تبي تنزل تطلب منهم ياخذونها لأبوها .. بطريقها بتنزل انفتح باب الغرفة ودخل أحمد ... استغربت غادة ماتوقعته يرجع : ....
احمد سكر الباب وراه وتسند عليه وحط شنطته رفع حاجب : قدها ؟
غادة : شنو ؟
احمد وهو يفصخ حزامه ويطويه بيديه : قدها تتكلمين معي بهالاسلوب ياملعون ابو جدك انتي ؟ وقدها تسكرين السماعة بوجهـي ..؟
غادة بلعت ريقها لكن قالت بقوه تكابر : انت قهرتني ! ووش بتسوي يعني ؟
احمد ........


الاسئلة :

- اكثر شخصية مظلومه .؟
- افضل شخصية لهالتشابتر ؟
- اسوأ شخصية لهالتشابتر ؟
- افضل ثنائي ؟




التعديل الأخير تم بواسطة لامارا ; 02-02-17 الساعة 11:54 AM
لامارا غير متواجد حالياً   رد مع اقتباس