[لامارا]

المحطة الثالثة :-
الزوجة الثالثة :-رفقا بالقوارير
=========
بارت(3)

فَلْتُظْهِرَنَّ العَدْلَ مَا اسْتَطَعْتَ *** وَلْتَكْتُمَنَّ الحُّبَّ إِنْ عَجَزْتَ
وَالْتَمِسَنَّ الْعُذْرَ عِنْدَ الْغِيرَةِ *** فَهْيَ كَحُزْنٍ مِنْ طِبَاعِ الْمَرْأَةِ
وَلْتَتَّقِ الإلَهَ فِي الوَصَايَا *** فَإِنَّهُنَّ أَطْيَبُ الْبَرَايَا
وَلْتُرْفِقَنَّ بِالْقَوَارِيرِ التِي *** الكَسْرُ فِيهَا قَدْ يَقَعْ بِالْكِلْمَةِ

الكويت 1985م
شهر يناير تم عقد قران عايد على جمالات عبده حمدي ..

ولقد تميزت جمالات في إجادتها. فن للتفصيل والخياطة والطبخ وأعمال الكوافير ..حيث انها كانت تعمل في صالون بمصر ..فترة من الوقت ..وبعدها عملت في مشغل للخياطة الملابس ولقد جاءت للكويت للعمل خادمة في البيوت بعد وفاة والدها ..

في الفترة من منتصف السبعينات وحتى بداية الثمانينات كانت موضة جلب الخادمات من مصر ومن يحالفها الحظ تتزوج من كويتي ..وانتشرت ظاهرة زواج الرجال كبار السن من مصريات .

. ولقد تنقلت جمالات في اكثر من بيت واستقرت بها الحال عند ام عايد غزيل ..وبعدها وعرضت عليها غزيل الزواج من ابنها حمود. وهو من ذوي الاحتياجات الخاصة ..تعرض لحادث سير في طفولته ..ما تسبب في بتر رجليه ..وأصبح عاجزا .عن الحركة . ووجدت في جمالات الزوجة المناسبة له حتى تقوم بخدمته ..ورعايته .
ولقد كانت له جمالات نعم الزوجة حتى وفاته متأثرا بمرضه


وقامت جمالات بتجهيز نفسها ..وذهبت الى السوق مع نعيمة .جارتها المصرية المتزوجة من طلق العازمي جارهم ، فهي حاصلة على رخصة قيادة ولقد اشترى لها طلق سيارة وتقوم بتوصيل نساء الحارة مقابل مبلغ مالي .. وهي خبيرة في شوارع الكويت. واسواقها
.

تدل كافة الاسواق المشهورة في الكويت بذلك الوقت ..ذهبت الى سوق الأقمشة المشهور بالكويت باسم البلوكات واشترت أقمشة خاصة لقمصان النوم وأقمشة متنوعة ..كما انها اشترت بعض أقمشة الستائر والشراشف ..وذهبت لسوق السالمية والمباركية وحولي وأسواق الفحيحيل ..واشترت ذهب ..في مهرها ..واتفقت مع الكوافيرة وهي مصرية ..لتجهيزها يوم عرسها ..
بدعت في تفصيل الملابس الجميلة .. خصوصا المنامات ..وكانت نعيمة كل يوم تزورها فهي ابنة بلدها وصديقتها منذ الطفولة ومتعاطفة معها .

.
نعيمة تقول :-يا جمالات ان كنتي عاوزة تكسبي قلبه ....طبعا في اللهجة المصرية ..قولي له حاضر يا سيدي بلاش عند ولا تدخلي في مشاكل مع الxxxxب موضي وحصة ..سمعيه الكلمة الحلوه هو وأمه ..والبسي له الهدمه الحلوه
حسسيه انه ما فيش حد زيه بالعالم .ولا توجعي راْسه بالمشاكل زي ما بتعمل موضي .وحصه دَا احنا نسمع صريخهم كل يوم ..خله يحس انك غير عنهم ..هادية عاقله هو صحيح احنا نسمع انهم حلوين لكن عمرنا ما شفنا شكلهم عامل ازاي

الراجل عندهم يا بت ما عمره شاف وشه مراته ..ولا كشفت له .. يا بت طلق اتجنن اول ما شافني اتهبل وانسحر في جمالي ودلالي .. سمعته الكلام الحلو لحد ما كره ام عياله الزنانة ..وهو دلوقتي خاتم في صباعي .اشترى لي العربية .ولكني نفسي اخلف منه حتة عيل ..
.ما اعرفش ليه حملي أتأخر ..يارب يرزقني منه ولد يا بت ..يكون لي سند في دنيتي ..وأخذ الجنسية وابقى كويتيه ..يارب ادعي لي ..يا ختي ..بقى لي ثلاث سنوات مجوزه منه ..

جمالات :-ربنا يرزقك الولد الصالح ..ليه ما تأخذي علاج من ام نايف دي خبيرة بالطب الشعبي ..انا اول ما اتجوزت المرحوم ..حمود تأخرت بالحمل ستة شهور وراجعت االدكتوره ما فيش فايدة وأخذت علاج من ام نايف شهرين وحملت طوالي ..

نعيمة :-انتي عارفة انها ما تحبنيش تكرهني علشان صاحبتها زوجة طلق .. الاولى الله لا يحوجني ليها .. يا اختي دي تمشي وتتكلم فيا بين الناس نعيمة فيها ونعيمة قالت ونعيمة عملت ..خلينا نبعد عن الشر ونغني ليه ..
ابعد يا شر ..ابعد يا شر ..وتضحك بصوت عالي بضحكتها الرنانة ..
جمالات :-على راحتك يا اختي ... وماله نبعد عن الشر ..بس حيجي يوم وتترجيني اجيب لك علاج من عندها ..خليكي فاكره ..

ليلة العرس :-

---------

تقرر إقام عشاء بسيط للرجال وحفلة صغيرة للنساء ..في بيت عايد في منطقة الرقة .. كل الجيران والأحباب تم دعوتهم للحفلة ..الاستعداد للعشاء على قدم وساق
موضي وحصه ..قدم لهم عايد رضوة ..واشترى لكل واحدة منهن أطقم ذهب مثل جمالات ..موضي تقول لو تعطيني ملايين الدنيا ما يسدون عنك وزعلت وذهبت الى بيت عمتها خلده ، اما حصة رضت بالأمر الواقع ..هي من النوع الذي يستسلم بسرعة ويقنع.

اما موضي لا فهي كشعلة النار ..في العناد وقوة الشخصية ..ترفض الخضوع لأحد او الاستسلام كثيرا ما جلبت لنفسها المشاكل بعنادها ..ولن تتقبل جمالات ابدا ..
رغم الذهب الذي اشتراه لها هي لا تريد الذهب عندها الكثير منه انها تريده هو..أخذت اولادها ..اكبر بناتها غزيل ..عمرها 12 وبعدها نجد 11سنة وبعدها نجود 10 سنوات نوره 9سنوات احمد8 سنوات حمود 7 فهد 6 فيصل 4 أصغرهم سطام عمره خمس شهور ..اما حصة

قررت ان تمسك العصا بالنص ..لابد ان ترضي عمتها غزيل وترقص بعرس عايد وتبارك له حتى تكسب قلبه ..هذي جمالات معروفة بلسانها العسل ..حلوة اللسان ..راح تسحر قلب عايد وهو عمره ما سمع منها كلمة حلوة. كانت تستحي منه وتخاف انه ينقد عليها اما
وموضي ما تدري عنها تحضر او لا فهي راعية مشاكل وتقدر تفك نفسها شخصيتها قوية ما احد يقدر عليها الكل يهابها ..اما هي فهي ضعيفة ..ونقطة ضعفها عمتها غزيل اللي ربَّتها . ....



لبست حصة ثوب الزري ولبست فوقه المسرح (المسرح هو ثوب مطرز فيه زري يلبسنه الحريم ..قماشه تور يرتدنه النساء بالافراح ) ..وحنت يدينها وتعطرت ..وصفت بالصف مع الحريم ..وقامت ترقص على أهازيجها الشعبيه ..صفافات .( قبل النساء البدويات بالكويت ما يعرف الطقاقات في الاعراس يتجمعن ويصفن صفين بينهن حافظة للشعر وتقول القصيده ويردن ورآها بلحن جميل وعلى هذي القصيدة رقصت حصه

ياراعي البارود والمحزم الزين
ذبحتني ياويل اهلي عليا
ليتك تطيح من السما واتلقاك
واقول هذا من عطا الرب ليا
امي وابوي وعزوتي من فداياك
وعيوني اللي غالياتن عليا


وفجأة تدخل موضي ..في ثوبها الأحمر وفوقها المسرح الاسود المطرز ..وشعرها الاشقر المسدول الذي يصل الى أردافها وقررت انها ترقص ومسكت الخيزرانه وقابلت حصه وبدأن الصفافات يرددن هذه القصيدة:-


قولوآ بسم آلله على من شآفه

دآنتن فآزت على من حولهآ

وآلسنآفية من عمآم وخوآل

يآعنود آلبيض يآبنت آلآجوآد

آقصدوآ لـ آلزينة يآعمآتهآ

شعرهآ برآقن فوق متونهآ

قولوآ بسم آلله على من شآفهآ


آه تقول في داخل نفسها آه نار .. قايده في قلبي وعايد عنيد ما يغير رأيه ..ما انا بنت فلاح اللي تفرح قلب المصريه وتشمتها وتشمت العرب عليا ، والله لاقهرها مثل ما قهرتني ..اذا ابوها حصني ..انا ابوي ذيب مروض الذيابه ..


ودخل عايد وأطلقت النسوة الزغاريد ..واتجه الى الجناح المخصص له وكان في استقباله وموضي وحصه وعياله جسار واخوانه ..وعيال موضي ..

.. ..وناظرت له موضي ..وفي قلبها ..نار وتقدمت منه ..وقبلت رأسه ..وقالت مبروك يا عايد ..هو يدري انها اذا كانت غاضبة منه تقول له عايد واذا رضت عليه قالت له ابو جسار ..ابتسم ..قربها ..منه وباس رأسها وقال الله يبارك فيج ..وبعدها جاءت حصه وتقدمت منه وقبلت راْسه وقالت مبروك يا جسار ..باس رأسها وقال لها الله يبارك فيج ..
وبعدها اتجه الى داخل لوالدته للغرفة وقفت أمه عند الباب وهي تزغرد الذي عند باب شقة جمالات ..دخل وجد أمه في انتظاره بَارَكْت له وهي تبكي ..
قالت له مبروك يا وليدي ..سامحني يا أمك ان كان غصبتك تأخذها . كله علشان خاطر الضعوف عيال الغالي حمود

..قبل راْسها ..قال لا تبكين يا الغاليه ....لو ما طلبتي مني كان انا تزوجتها من كيفي هذولا عيال حمود لمن نخليهم ...

غزيل :-عسى ربي يرضى عليك دنيا وآخره ..ودخل عايد على غرفة جمالات ..

جمالات :-في كامل زينتها وفستانها الأبيض الجميل الذي يظهر تفاصيل جسمها المتناسق انها بيضاء طويله عيونها سود واسعة انفها طويل شفايفها ممتلئة شعرها اجعد طويل ولكنها.
متوسطة الجمال لا يمكن ان نقول عنها قبيحة ولا يمكن ان نقول عنها جميلة ..إنما مملوحه ..ولكنها ليست في جمال موضي .. والتي كانوا يطلقون عليها لقب الحمره. دخل سلم وقبل رأسها وقال الدعاء :-
وبعدها صلى ..استأذنته حتى تغير ملابسها ..ارتدت قميص نوم جرئ جدا ..ودخلت وهي تتصنع الاستيحاء ..تمشي بخطوات موزنه . عايد اول مرة يرى امرأة تدلع وتتهادى في مشيتها ..هذه جريئة. انها الأنثىالحقيقية .. التي ترضي غروره كرجل ..نعم اقتربت منه ..وجلست ..بجواره وامسكت يديه .عايد في غرفة النوم عند موضي وحصه يُطفئن الأنوار لا يرى من ملامحهن شيئا انه حتى لم يرى وجه حصه ولا حتى موضي اخر مرة شاهد فيها وجه موضي قبل ان ترتدي البرقع .

.لم يرتدن في يوم من الأيام قميص نوم بل لا يعرفن ما هو قميص النوم ابدا .. نعم كل شيء عيب ..وحرام وزوجي ينقد علي ..إنهن تربية أمه غزيل كل شيء عندها اما عيب او حرام .. اما موضي رغم انها واصلت تعليمها الى الصف الثالث ثانوي ولكن وصايا عمتها خلده لها بالتمسك بالحياء وان لا تلبس لَبْس جرئ. الرجل ينقد على المرأة ويقول عنها ما تعرف الحياء بارع ما في وجهها حياء .

لكن هذي مصرية .جاءت .مجتمع مختلف عنا ..هذا الشئ اسعد عايد .. ومضت الليلة الاولى ..وعاش بها عايد كالملك المدلل وكانت جاريته جمالات ..بل انها قامت ترقص له الرقص الشرقي ..وكل ليلة ترتدي له قميصا شكل ..
عشرة ايام قضاها عايد مع جمالات ..كانت من اسعد ليالي عمره شعر ان شابا صغيرا وكأنه لأول مرة يتزوج ويتعامل مع أنثى ..

اذا اقبل عليها تقبل يديه ورأسه وتحضر وتغسل قدميه بل تطعمه الطعام بيديها انها تدلعه كأنه طفل صغير ..
طلب عايد من جمالات عدم الاحتكاك مع موضي وحصه وعدم الاقتراب من قسمهن والتزام مكانها ..وقالت له تأمر يا سيدي ..انا من إيدك دي لأيدوك دي .

بعد العشرة الأيام ..انتهت ايام وليالي العسل ..وغدا ستكون ليلة موضي ..وبعد ان اعتاد عايد على دلع جمالات ..كيف ستكون نظرته الى موضي ...؟؟

دخل عايد الغرفة عند موضي وكانت جالسة تتفرج على التلفزيون ..ترتدي نفنوف موديل كلوش طويل وكمه كلوش مثل كموم الصعايدة هذا الموديل منتشر في تلك السنوات ..برقعها عليها ..

دخل وقال :السلام عليكم
موضي :-ردت عليه وقالت وعليكم السلام..

ناظر لها وعصب وقال :-انا كل ما دخلت الا وعليك برقعج وراج ما تنزلينه ..ماهو حرام ترى ان شفت وجهج تراج زوجتي حلالي ..شوله تتغطين عني ..؟

وضعت موضي يدها على رأسها وشهقت وقالت انا اشهد انك ما انت بصاحي يا فضحي فضحاه تبيني اشيل برقعي للخلا ثم للخلا ياربي سترك .

عايد :-ماهو عيب ولا حرام شيلي البرقع اذا شفتج لابسته في الغرفة عندي قطعته .
وقام عايد وسحب برقعها وينزعه من على وجهها موضي تصرخ ..يا فضحي فضحاه .واخذت تغطي وجهها في ملفعها ، قام عايد وسحب الملفع و انفك شعر موضي الحرير الناعم وانسدل على أكتافها ..ناظر لها عايد وادار وجهها ناحيته ومسك ذقنها ورفعه وقال انتي جذيه احلى ياقلبي ..

موضي بالرغم من إنجابها تسعة ابناء من عايد الا انه لم تتعود على جرأته هذه ..انها المرة الأولى التي تجلس معه بالغرفة بدون برقع منذ ان اجبرها على لَبْس البرقع تعودت عليه بل انه لا تتخيل في يوم ما انها تخلعه عنها ..انها لا تملك جرأة جمالات فبحكم البيئة التي نشأت بها فكل شيء عيب وتذكرت نصائح عمتها خلده المرأة لازم تكون ثقيلة عند رجلها في غرفة نومها ولا تفسخ ثوب الحياء ولا تكون جريئة الرجال لو ضحك في وجهج راح ينقد عليج .. حتى أمها تقول نفس الكلام ..وأم نايف ..وغيرها ..سرحت موضي ..وهي تفكر في كلام عمتها خلده وامها وأم نايف وناظرت حق عايد
..وقالت يا خوفي انك تنقد عليا الحين وانا مصلعة قدامك ؟؟( مصلعة يعني بدون ملفع وبُرقُع اي بدون حجاب ).
عايد :-يا حرمة انا رجلج ..يحق لي اشوف كل شيء ..حرام عليج تتغطين عني ..
موضي :-انت من يوم أخذت المصرية ما انت بصويحي ..ترى انا موضي ما انا بجمالات اللي ما تعرف سلوم العرب ..ابك ذولا كل شيء عندهم عادي الحرمة ما تغطي شعرها انت ما تشوفهن بالتلفزيون.
عايد :-استغفري ربك ولا تغتابين الناس ..بعدين الاختلاف بين الناس طبيعي ..يعني كل عرب لهم سلمهم ..
اطلب منج طلب يا ام احمد لا تجبين سيرة ام عاطف ولا سيرة ام جسار ..ترى كل وحدة لها مكانتها عندي ..الله يرضى عليج يا موضي .بطلي غيرة ترى الرجال تزهق نفسه من الحرمه الحنانة وراعية المشاكل الواحد يبي يسمع الكلمة الزينة اللي تشرح الصدر وتسعد النفس ويشوف الزول الحلو ..ماهو كل ما دخل بيته النار مولعه ..والحرب قايمة ..بس يسكت هذي وهذيك ..
موضي :-عاد الغيرة نار في قلب قلب كل حرمة الله زرعها فينا ما تقدر انت تمنعها ..اللي ما تغار ماهي حرمة ..
الله يستر منك ما أخذت الا عشرة ايام وأدمنت الكلام الحلو اجل بعد سنة ويش تبي يا خوفي تنفتح نفسك للرابعه ..عاد الله اعلم ما ادري من اي بلد راح تكون ..

عايد :-قام يضحك وجلس على السرير ..وقال على راحتج الرابعه اختاريها لي انتي.
..
أخذت المخده من الحرة وحذفتها عليه وهي تضحك علشان ما يعصب عليها بعد رابعه ..خاف ربك ..شطبت على الحريم كلهن ..

ضحك عايد بصوت عالي وقال :-عاد تدرين معنا ضابط تزوج على زوجته وينصح بالتعدد ويقول قلب الرجال فيه اربع حجرات ..كل حرمة في حجره ..

موضي:-حجروا عليه قال اربع حجرات ..هذا فندق ما هو قلب ..

عايد أشر بيده على لَبْس موضي وقال :- ثم ويش هالخلاقين هذي ا اللي عليج تقول ملابس عجيز ..ما تعرفين اللبس شلون ساير مثل باقي الحريم .

موضي :- انا قلت والله انك من يوم عودت من عند المصريه وحنا ما انا بخير الحين ما تعجبك خلاقينا صارت مثل خلاقين جدتك ؟؟؟طول هالسنين كلها ما تكلمت الحين تكلمت ..!!!

الله يستر منك لا تقلب باجر علينا امرح بس امرح خلنا نعين من الله خير
..وعلى صوت بكي سطام الصغير أخذته من الكاروكة ..وهي االسرير الخاص بالاطفال .. ..وحملته بين يديها وقامت تضمه لصدرها ..اسم الله عليك يا حبيبي انت ..اسم الله عليك نام يا قلبي نام ابوك الحين حنا ما نعجبه ....وقامت تقرأ عليه قرآن حتى هدأ ونام ..

وراحت أطفأت النور وحطت رأسها على المخدة وعطت عايد ظهرها وقالت :-قواملق جدتي قال ، الحين صارت خلاقينا من زين خلاقين ام السعف والليف ..كلها شلحات دالعه يقالها ثوب رقاصه اخر عمري انا بنت فلاح البس ملابس مايعه ..يا الله سترك .

عايد :-حط رأسه ونام ..وهو يفكر في جمالات ورقتها وضحكتها ..رغم جمال موضي لكنها ما تقول له كلمه حلوه .دايما مندفعة تتشاجر مع من يخالفها .غمض عيونه وقال دعاء النوم ...ونام

من اصبح افلح ...
مع الفجر قام عايد ..وجد موضي تحضن صغيرها سلطان وترضعه ..ورجعت لبست برقعها ..هز رأسه ..وقال انا ما قلت لج شيليه ما ابي اشوفه عليج داخل غرفة النوم ..ما منج فايده ..واتجه لدورات المياه حتى يتوضأ وتوجه للمسجد ..
موضي استغفرت ربها بعد ان نام سطام ذهبت الى دورة المياه وتوضت ..وأخذت جلالها والسجادة..وفرشت سجادتها وصلت ..بعد ان أنهت الصلاة قرأت وردها اليومي ..ثم وضعت المصحف بداخل الدرج مع لَبْس الصلاة ..واتجهت للمطبخ تجهز قهوة عايد وفطوره ....هو متعود بعد صلاة الفجر يفطر عند أمه في غرفتها ..أخذت الصنية وجهزت لعائد القرص ..والعصيده ..والحليب بالزنجبيل والشاي والقهوة ..والتمر ..مع البيض المسلوق ..والقشطه والمربى والأجبان ..ودخلت وقبلت راس عمتها ..وفرشت السفرة وحطت الريوق..(الفطور )..وجاء عايد ومعه عياله جسار واخوانه وعيال موضي وقبل راس أمه ويدها ..وكذلك فعل ابنائه وجلس بجوارها وقال حيا الله ام عايد ..وجلس عياله حول جدتهم ..
قالت العجوز :-تحيا يا قلبي عسى ربي يسعدك ويحفظك يا ابوي ..هلا بجسار واخوانه هلا بالشيوخ ..
قالت غزيل :-قم يا جسار قهوي ابوك ..

وقامت موضي وقالت اسمحي لي يا عمه ..سطام تعبين ابي اروح اشوفه اخاف يقوم البارحه ليله كله يبكي ما امرح ..مغير يفز من نومه ..
غزيل :-اسم الله على وليدي لا يكون مسخن ..
موضي :-
يا عمة الظاهر انه يسنن ..عليه إسهال وإنتي بكرامه وسخونة ..
عايد :-خلنا ناخذه للطبيب وراج ما قلتي لي من البارح .
موضي :-انا وديته للطبيب الأسبوع اللي فات مع اخوي وعطاه الطبيب مضاد ..اخاف عليه من كثر الادويه وأم نايف عطتني له خريطه بها محلب ومره ..تقول انها زينه حق التسنيين ..
عايد :-ولو ..لازم ناخذه للطبيب يكشف علاه ..
موضي :-على راحتك .
عايد :-الساعة سبع تجهزي علشان نروح للطبيب ..

وفي الساعة السابعه ..جهزت موضي ابنها ..سطام ..وجاء عايد وركبت معه السياره في المقعد الأمامي ..واتجهوا الى مستشفى خاص ..
موضي :-هذا ماهو طريق المستوصف ..
عايد :-لا انا رايح لمستشفى المواساة بالسالميه ....خل يشوفه دكتور متخصص أحسن من المستوصف ..حتى اتطمن علاه ..
وصلوا المستشفى ..وفتح له ملف ..وأخذوا رقم ..وبعدها دخلوا على الطبيب وفحص سطام ..وقال لهم هذه الحرارة من أعراض التسنين وان شاء الله حيكون كويس اطمئنوا عليه ..وعايد تكلم معه بالمصري ..
موضي :- تقول في نفسها من الحين انعوج لسانه ايه ريحة الحبايب ..

بعدها ..قال عايد الحين ويش رايج نمر السوق.
موضي :-مالي حاجه بالسوق .
عايد :-بس انا لي حاجه ..
واتجهوا الى سوق السالمية اشترى حق أمه جاكيت وشال شنطة وحذاء طبي وثم ودخلوا محلات نسائية ..وعايد يطلب من البائع كل شيء ثلاث قطع .
وموضي مولعه نار ..ودخل محلات متخصصة في الملابس النسائية الداخلية واشترى ..لزوجاته الثلاث ..
وبعدها دخل محلات الأطفال واشترى حق عاطف وعواطف ولسطام واخوانه ..واشترى لبناته الأربعه وإذن الظهر .وهم في السوق ..وقال :-انا رايح أصلي تعالي للمسجد ..هذاك الباب مخصص للحريم
موضي :-انا ما علي صلاة ..قالتها وهي مستحيه..
عايد :-ضحك:- وقال للحين تستحين مني يا موضي ..
موضي :- ولين اموت ..
عايد :-اسم الله عليج لا تجبين طاري الموت عسى ربي يطول بعمرج ..لا توجعين قلبي ..
ثم ذهب حتى يلحق على الصلاة ..وبقت هي في داخل السيارة وهي تحضن سطام وتضمه لصدرها ..وبعدها جاء عايد وادار محرك السيارة وقال بِسْم الله الرحمن الرحيم توكلنا على الله ..
ويسمع صوت سطام يبكي ..ويقول يا قلب ابوك انت ..سلامات ما تشوف شر يا بوي .
ووصلوا المنزل .. وعايد دخل السياره داخل الكراج ..وكانن بناته يلعبن ..ولما اسمعت صوت سيارة ابوهن قامن يركضن له ..ابوي وصل ..وأول ما نزل من السيارة ارتمن بحضنه وفتح الباب الخلفي وقال حبيبات ابوهن تعالن جايب لكن معي هدايا وأَخَذْن الاكياس من ابوهن وهن فرحات وقالت غزيل يبه ليش مل اشتريت لي عروسه ..مثل عروسة شريفة بنت نايف ..
قال لها عايد :-افا بنت ابوها تستاهل اشتري لها كل اللي تبي ماهي عروسه وحده الا درزن عرايس ..العصر ان شاء الله يا ابوك اشتري حقج وحق خواتج ..حظنت ابوها وباست رأسه وقالت عسى ربي يخليك لي ..
وأخذت الاكياس ودخلت داخل باب الصالة وبعدها جاوا باقي عياله..وطلعت حصه ونادها وقال هذي الأغراض لج ..وأعطاها الاكياس ..ونادت موضي بنتها نوره ونجود وقالت اخذن الاكياس هذي
لغرفتي ولا تفتحنها ..
أخذن غزيل ..أغراض أمها ..ودخلت داخل ..وبعدها موضي دخلت ودخل ..وعايد يحمل بيده الأغراض التي اشتراها لامه وجمالات ..دخل عند أمه وكانت جمالات جالسه عندها ومعها عاطف وعواطف على الارض كانت تدهن رجلين غزيل وتعمل لها مساج ..

سلم عايد وفزت له جمالات .. وقامت وباست راْسه وكتفه وهي تقوله يا حيا الله ابو جسار ربنا يخليك لينا هلا في شمعة الدار .

قبل راس أمه وباس يدينها ومدت جمالات يدينها هات عنك يا ابو جسار ..وغزيل تقول في قلبها ..يا ويلّي ..ان اشهد انها ما تستحي تحبه وانا جالسه .

ومد عايد :-قال اسمحي لي يا ام عايد وهذي الهدية البسيطة.اشتريت لج شال وجاكيت علشان يدفيج في هالبرد وجوتي جديد خبر ان رجلج توجعج وقلت خلني أخذ لج جوتي طبي يريح ريجالاتج ،وهذي الشنطه ويش رايج بها يا ام عايد ..

غزيل :-يا عسى ربي يخليك لي يا بوي انا عندي خير جثير عسا اشتريت لأهلك .
عايد :-اشتريت للجميع .يا يمه وهذي حقج يا جمالات ..وفيه بعد أغراض حق عاطف وعواطف ..
جمالات باست راْسه وكتفه وقالت متشكرة يا ابو جسار عسى ربنا ما يحرمنا منك ..تعيش وتجيب لنا ..
وننتقل ..الى حصه في غرفتها وهي تفتش الأغراض وتصيح اول شيء بدلة ..كم تنوره وبلوزته ..وبعد ها فتحت الاكياس الثانيه وهي تحذف الكيس وتصيح عندما شاهدت قمصان النوم وحذفتهن بعيدا عنها وقالت :-يا فضحي وتضع يدها على صدرها ..ويش هذا شلحات ..
للخلا هو انهبل ..الرجال ويش بلاه ..

ووطلعت تسأل موضي وقالت :-انتي كنتي معه يوم أشترى المنكر ذَا ..

موضي:-اي بالله كنت معه . مير خوينا ما عاد هو بالأولي.. اقعدي خلني أقول لج .يا وخيتي يا حصه ..الرجال ما عاد يبي يشوف البراقع علينا ..ويعيب على خلاقينا .يقول كأنها خلاقين جدتي ..

حصه :-ياوك ..يا ويلّي ..هو العلم ذَا وكاد ..

موضي هزت رأسها قالت :-اي والله انه وكاد
.
يا وخيتي يا ليتج شفتيه هو يهرج مع الطبيب المصري تقول بلدياته على قولة جمالات ..وقال لي عقب ما طلعنا انا ابي اشتري لكن ملابس على ذوقي ..ولا اللي يقهر يا ختج انه اشترى لام السعف والليف معنا .
حصه :-يا علها الماحي ..يا عزة الله ما حنا بخير ..

الا جسار داخل ..يمه ابوي يقول جهزي الغداء..ترى كلنا نبي نتغدا جميع و قال حق عمتي جمالات تجيب الغدا وتحطه عند جدتي ..
قالت حصه ..نتغدى جميع من متى يا أمك ؟؟
جسار :-عمتي جمالات اقترحت هذا الاقتراح ..لا وأبشركم ابوي قرر يروح العصر ويشتري تربيزه على قولة عمتي جمالات .اي (طاولة طعام )
تقول جمالات أحسن حق جدتي ما تقدر تجلس بالقاع علشان رجليها ..
موضي :-ما قلت لج خوينا تغير ما عاد هو بالاولي ..

وذهبت حصه للمطبخ وغرفت العيش ..وكانت طابخه محبوس لحم أخذت الدولكة وصبت فيها اللبن وجهزت ..صحن التمر .. وأخذتهن الى غرفة عمتها غزيل ..

وجدت جمالات فارشه سماط كبير وعليه أطباق متنوعة .دجاج محمر ، ورز ابيض ومكروونه بالشاميل .وسلطة .تبوله ، وشوربه عدس وسلطات وخيار باللبن وحصه دخلت ..ومعها اللبن .قامت جمالات عنك يا حبيبتي ..هاتي وأخذت جمالات صحن العيش وحطته على السماط ودولكة اللبن ..والأكواب .اكواب الجبن ..(الأكواب الزينة حق رمضان والمناسبات ..وقالت جمالات :-امال فين موضي ..
بنات موضي سعيدات ويقولون حق ابوهن :- الله الغدا اليوم حلو صح جسار مو كأنا في رمضان ..حنا ما نشوف هذا الاكل ونتجمع الا في رمضان ..ا
رد علييها سعود اخوها ولد حصه اي والله ..بس الله يهديج يا يمه ليه ما طلعتي الأكواب الجديدة ..بدل أكواب الجبن هذي .

عايد ..سعيد اول مرة يحس باللمة ..موضي وحصه دائماً يأكلن بروحهن بالمطبخ بس هو يأكل مع عياله وأمه .لانهن يستحن منه ..(عند بعض النساء في تلك السنوات عيب المرأة تأكل عند الرجل ..)

جلست حصه ..وبعدها جات موضي وهي تحمل ابنها سطام وهو يبكي وقالت :-يا عمه اسمحي لي سطام تعبان لازم امشي فيه والله ما راح يسكت والغداء انا لاحقة عليه ما انا بجوعانه الحين اذا جعت اكلت ..
عايد :-تعالي آكلي لج لو لقمة ..زين سلطه علشان خاطري ..

موضي :- ان شاء الله. .ومدت يدها وأخذت. تمره . وقام سطام يبكي ..أخذت التمر وقامت وطلعت للصالة تمشي فيه .

عايد تغدا وهو يسمع صوت بكي سطام ..وقلبه مع موضي ..ويقول حق أمه :-هي البارح الليل كله ما نامت ..والصبح ما فطرت زين اكيد الحين تعبانه
. بعد ما تغدا قال :-كرمكن الله والله يعطيكن العافيه على هالغداء الطيب والجمعه الحلوه .. وطلع واتجه للمغاسل حتى يغسل يدينه . وذهب الى مطبخ موضي ..ولقى جدر العصيده اللي من الصبح أخذ الجدر حطه على النار حتى يسخن ..وطلع له صحن وغرف فيه
قال ادري فيها عنيده ما راح تاكل من غدا جمالات ..وهي ما تحب االلحم وحصه طابخه اللحم عناد في موضي ..وأخذ لها من القرص اللي كان في المحفظة .وغرف منه وصب لها كوب حليب اللي كان في المطاره قال زين انه لحد الحين حار ووحطهم بالصينية ودخل الغرفة ..و لقى موضي شايلة برقعها ونايمه ولامة سطام بحظنها ..وحط الاكل على الطاولة الصغيرة ..واتجه حق موضي وباس رأسها فزت من نومها وقال :-اسم الله عليج .تعالي جبت لك الاكل بنفسي
موضي:- ما أحب اللحم ..
قال :- انا ادري ان عليج الدورة وانتي تتعبين منها ولحد الحين وانتي على ريوقج الصبح وهذا انا جبت لج من العصيدة وهذا القرص ..والحليب هاتي سطام خلني أحطه بسريره ..صدق من قال اجر الوالدين على الله ،أخذ سطام منها وحطه بسريره .
واتجه الى موضي ومسك يدها وقال:-
لا توجعين قلبي يا موضي ..هذا وجهج اصفر من كثر التعب .فزت برقعي وين برقعي .ضحك عايد ومسك الكفشه. وغرف من العصيده حطها في فمها وقال:-هم .. بِسْم الله ..وابتسمت وبان أسنانها صف اللؤلؤ وباس رأسها .
وقال :- من قدج اليوم العقيد عايد بنفسه يوكلج بيده ..
موضي مسكت يد عايد وباستها وقالت :-عسى ربي ما يحرمني منك يا الغالي ..
عايد :-ولا منج ..موضي انتي غالية عندي بالحيل ها طلعتي تعرفين كلام غزل ..يا هنيك يا عايد لما موضي تتغزل بك .
موضي قامت تضحك :- اجل ليش ما اعرف ما هو بس المصريه اللي تسمعك الكلام الحلو ..
بس لا تنسى بقت حجره فاضيه ما سكن بها احد لحد الحين ..بقلبك .

عايد قام يضحك ..قال ما قلت لج البارح انتي اختاري بنفسج من يسكنها ..
-----------------------------------------------------

وعند هذه المحطة نتوقف ونكمل باْذن الله تعالى قريبا

..للعلم بعض الشخصيات في الرواية حقيقيه مازالت تعيش معنا .. والرواية مقتبسه من قصص حقيقه ..للناس عاشوا معنا . على ارض الواقع ..
..استغفر الله العظيم 🍃🍃🍃عدد خلقه 🍃🍃🍃ورضا نفسه 🍃🍃🍃وزنة عرشه ومداد كلماته 🍃🍃🍃🍃
وتقبلوا تحياتي 💐