[فيتامين سي]

البارت الخامس


اشواق /اليوم الجمعة من أجمل الأيام والويكند الوحيد.

حتى يوم السبت عندي دوام في عيادتي الخاصه وباقي

أيام الأسبوع مابين دوام في المستشفى الحكومي

وتدريب طلاب الأمتياز اخرج من البيت الساعه 8

الصباح وارجع 10في الليل ..

الجمعة اليوم الوحيد اللي اجلس مع أمي واخواتي

وسعادة الكون كلها تحتويني وأنا اشوف أمي حولنا

واسمع سوالفها وضحكتها وادعي ربي مايغيب حسها

عنا يوم ..

الليله شابين النار في الحوش الدنيا ضباب وبرد وحنا

جالسين حولها اقتراح اختي ندى جهزت الشاي والقهوة

والكرك على الفحم ..وخزامى ترتب السفرة مو حبآ فينا

علشان بس تصور عندها هوس تصوير وياويلنا اذا

آكلنا قبل ماتصور ..

ريم في المطبخ تحط لمساتها الأخيرة على العشاء.

الراحة اللي تحتويني الأن اعجز اوصفها ناظرت

أمي اللي سادحة على كرسي حديد ماتقدر تجلس

وقت طويل وانا اتعوذ بالله من يوم بدونها..أمي

أعظم أم ..أمي المرأة المكافحة العظيمة صنعت

أشياء يعجز الرجال عن صنعها..مات أبوي وترك

في ذمتها اربع بنات وبلا مصدر دخل ثبات

ورغم ثقلنا على عاتقها إلا انها صنعت منا

اشياء عظيمة زرعت فينا قوة الشخصية الأعتماد

على النفس .الثقة .القوة في اتخاذ القرار وتحمل

نتيجة اتخاذ القرار..

من عرفت أمي وهي قوية ماعمري حسيتها ضعيفة

حتى في اصعب المواقف

ماعمرها وضحت لنا انها ضعيفة او محتاجها

كانت تلبي كل طلباتنا.

كانت أم حازمة شديدة وصارمة في قراراتها عندها

بعد نظر في اتخاذ اي قرار وكل قراراتها صائبة

ورغم انها أمية لا تقرأ ولا تكتب لكنها كانت

حريصة كل الحرص على مستوى التعليم لنا

انا واخواتي من الأوائل على المدرسة أمي

تقدس التعليم والعمل والوظيفة تقول شهادتش

سلاح لش طول العمر

وفيها حنان الكون كله لما نتعرض لشي.

شفت ريم خارجها من باب الصالة معها العشاء

طبعآ هي طباخة من الدرجة الأولى عليها نفس

في الطبخ ماشاء الله وكلنا نطبخ حتى الطبخات الشعبية

بأمر من أمي وماعندنا شغالة ابد رافضة فكرة الشغالة

تقول عندي اربع بنات واجيب شغالة ليش وطبعآ قرارها

لانقاش فيه ولاتراجع عنه.

ريم /وهي تحط حافظات الأكل عند خزامى خذي ورتبي

ذا السفرة بسرعه خلينا نتعشاء .

خزامى /منهمكه ترتب ولاردت تحاول شغل الشموع

وتطفى من الهواء وما استسلمت .

ريم /خزامى الأعلان اللي مسويته لمستوصف الأسنان

امس مخيس صراحه!

خزامى /رفعت راسها وهي تناظر فيها وليه مخيس.!

ريم/الكرستال اللي مركبينها لي صحيت اليوم م

ماحصلتها مكانها..

خزامى/مشكلتش والله يمكن اكلتيها، شوفي انا باقي

مكانها وهي تفتح فمها وتأشر عليها.

ندى/حتى انا باقي مكانها ..

أشواق/حركات متى رحتوا.!

ريم/امس جيت من الدوام وخزامى ناشبه لأمي تبغى

تروح الأعلان وأمي تعبانه ومستحيل تخليها تروح هي

وندى لوحدهم مع السواق وعلشان اريح أمي رحت أنا

معهم وسوينا تنظيف اسنان وتركيب كرستال وبعدها

اعلان ثاني لمطعم مارجعت إلا هلكانه مدري كيف

أمي متحمله ..

أشواق /حلو ماشاء الله استفدي من خزامى واعلاناتها

انت وندى.

خزامى / تناظر في أشواق هيا انت اصه اكثر وحده

استفدي من اعلاناتي اكثر مني حتى قولي لي بأمانة

متى اخر مره رحتي السوق الساعات الماركة والعطور

والشنط والفنادق اللي في الرياض تتبطحين فيها ببلاش

وحجوز الطيران ..

أشواق/ وهي تضحك حتى ولو مو مثل كل يوم غداء

او عشاء في مطعم،

خزامى/ مااشره عليك حريم ناكرات المعروف.

اخواتها يضحكون وانت ايش مثلآ!

خزامى /انا غيرر وهي توجه كلامها لأمها صح يمه انا

غير .!

عائشة (الأم) /وهي مستمتعه بسوالفهم انشد انش غير

عن كل مخلووق،

خزامي /وهي تناظر في اخوانها اتوقع جتكم الشهادة

من اصدق إنسانه وهي تقوم وتحضن أمها فديتش

ياأجمل أم وهي تبوس راسها وتمسك جوالها وتفتح

تطبيق السناب وتمسك يد أمها يمه صح أنا احسن

وحده في بناتش .!

امها /وهي تضحك كلكم مثل بعض غالين .!

خزامى /لا يمه مااسرع مغيره كلامش!

وهي تسمع اخواتها يضحكون ..

ندى /اقوى مسخره احذفي السنابه احسن بس!

خزامى /والله ماغير ارسلها مالش صلاح.!

ارسلتها وهي ترجع تمسك يد أمها يمه فديتش

لا تفشليني عند 6000متابع تكفين يالغالية.!

فتحت السناب وهي تسأل نفس السؤال،؟

أمها وعلشان تفتك منها قالت انتِ احسن واجمل

وحده في بناتي يله اذلفي قبل تلعب العصا ذي

على ظهرش،

ضحكت وهي تكتب عصبت نبع الحنان وارسلتها.!

:

:

:




علي/ يحب يقضي اغلب وقته مع أمه

هي في المطبخ اللي مفتوح على الصالة وهو يتابع

اخبار الحد الجنوبي وبقلبه يدعي الله يحفظ عياله

ويستودعهم الله .

كان رافض فكرة دخولهم المجال العسكري بس ابوي

كعادته المسيطر وقراره وكلمته هي اللي تصير

كل واحد من عياله متخرج من الثانوي بتقدير ممتاز

وكان لكل واحد أمنيه وحلم بس قرار جدهم صادر

كل احلامهم وأمنياتهم وعياله مستحيل يرفضون

لجدهم كلمه او يعارضون اي قرار منه وابوي

يحبهم حب كبير لدرجة اشك انه يحبهم اكثر مني

ويحمد الله وهو فخور فيهم كل واحد رتبة عالية

الحمدلله وحماة لدين والوطن ..،؟

وعبدالله الوحيد اللي دخل المجال اللي يبغى وجده

لما عرف انها وظيفة ممتازه وافق وسانده .

انتبه لصوت أمه وهو يلتفت لها وباين الخوف عليها

وفارس يحاول يحضنها وهي تدفه وبعصبيه

الله ياخذ عدوك ياذا الخبل اخرعتني انت ماترتاح

لين تهب لي جلطه.

فارس /وهو يضحك بسم الله علاش بسم الله علاش

من الجلطه كنت بحضنش بس وانت خفتي مااخبر

بنات الشيوخ يخافون وهو ياخذ الأكل من يدها

والسفره والله مايحضر العشاء غيري انت ارتاحي.

اعطته وهي ترجف من الخوف كانت لاهيه في شغلها

والخبل ذا جاء وحضنها بقوه ‏ ‏من ورا.

خرجت وهي تجلس جنب ولدها اللي من شافها قال هذا

كله من دلعش له كم مره قلت لش لا تعطينه وجه

وهو يشوف فارس خارج من المطبخ عليهم بالآكل انت

ماتفهم ذا مزح تمزحه مع جدتك ماتفرق بينها وبين

اخوانك واصحابك وهو يحذفه بالمفتاح على صدره .

هيلة/بعصبيه الله لا يسامحك ايش بك عليه ايش دخلك

بيني وبينه محد مونسني غيره وهو تقوم لفارس عورك

المفتاح اشوف وهي تحط يدها على صدره بروح جدتك.

فارس/ بضحكه افا عليش اتعور انا فارس اسم على

مسمى ذيب لا يهمش مو انا اللي اتعور من مفتاح

وهو يناظر ابوه سمعت تقول محد يتدخل بيننا وهو يضحك

و يترتب الآكل على السفره يله حياكم على قل الكلافه..

دخلت أميرة وهم يتعشون أبوها بحب هلا بأميرة

أبوها تعالي تعشي معنا .

أميرة /وهي تدنق تسلم على راس ابوها وجدتها بالعافية

دوبي طلبت من المطعم شوي وبيجي .!

هيله/ بحب لها قومي يمه تعشي معنا احسن لش

من اكلهم .

فارس /خليها ياجده ماتحبه هي ماتحب إلا أكل الكفار.

تخيلي ياجده يطبخون لحم كلاب ولحم حمير .

أميرة /بتقزز فارس اسكت يع مقررف.

علي/وهو يعرف ان الحرب بتقوم بين فارس وأميرة بس

انت وهي وجه كلامه لأميرة امش وينها.

أميرة /نايمة

علي /زفر وهو يكمل اكل وساكت .

هيله/ لا حول ولاقوة ياولد شف حرمتك ايش بها الحرمه

ماهي بخير كل يوم وهي اخس من اللي قبله.

علي/كفاية يمه ماخليت بها مكان وكل شي سليم

يمه بنت اخوش طيبه مافيها إلا العافية بس وساوس

ذبحتها .

هيلة/وهي حاسه بولدها انه تعبان مع زوجته حاول

فديتك أم عيالك وبنت خالك وتستاهل أم أحمد اصبر .

علي/يمه جميلةماهي راضيه تساعد نفسها علشان

اساعدها رافضه تتقبل مني حتى الكلام حابسه نفسها

في الغرفة حتى عندش ماتنزل ولدها يروح الجنوب

ولا تكلمه ولا تطمن عليه والله اني طفش منها.

هيلة/حاول معها شوفها اذا تبغى الجنوب عند اهلها

وأنا عفى الله عنها لاتجيني انا اروح لها.


انتهى

غراس الجنة/سبحان الله والحمدلله ولا اله الا الله والله اكبر يغرس لك بكل واحدة شجرة من الجنة".