ليس هنـــآك اسوء من قلب بلا ضميــر عندما ترزق بطفله
وتجعلها مهـــآنه مذلـــوله جسدها يشوهه الكـــدمــآت
بسبب مشاعـــر طغت عليـــها وجعلتها كالعميــآء
جردت من انسانيــتها
جردت من انوثتها
والضحيـــه / آطفال ليس لهم ذنـــب
دق بـآب الجرس وهوا راخي راســو ... ماسك الشنطه اللي على كتفه واصابعو كلها مجرحــه
انفتح الباب .... اخوه بااستغراب : ايش بك اتأخرت
حاول يتحاشى نظرآتـــه ويدخـــل لكن الكل كآن متجمع بالصــآله
ابـــوه وامــــه واخوآنو الاتنين والكل يسئلو نفس السؤال : ليــش اتأخرت !
رفع راسسو وعينـــو كلها دموع عمرو 16 سنـــه
وجهه كلــو كدمــآت وخشمــو دم
الام شهقت وحطت يدها على قلبها : ايش بكك ياتميم
وكأنه هزأتو بالكلمه دي نزلت دموعــو على طـــول
بكــي بصوتـــه طاحت الشنطه من كتفه وغطى وجهه بيدو المجرحــه
شالت يدو من على وجهه وهيا خايفه : قولي ايش بـــك
يحاول يتكلم بين شهقاتــه : اصحــآبي يقولو اختي وسخــه
صمـــــت
صوت بكـــآه بس اللي في الصاله
الكل انخرس وملامحهم ونظراتهم المكسوره اللي تتكلم وكأنه جا يعصر لليمون على جرحهم
كمل وهوآ مقهور : يقولو انها بنت """" وانو احنـآ راضين وعارفين ايش كآنت تسوي
ياخد نفسو بين بكــآه ويكمل : قلتلكم مابى ارجع لما تخلص الاجازه
امـــو نزلت على ركبــها ودموعها في عينها تحاول تتكلم بكل قوه وتخلي اولادها ياخدو دي الثقه : دي مو اختك لو احد قال انها وسخه قلهم ايوا وسخه
يطالع فيها مفجوع : والله اللي يتكلم عنها حضربو
اخــوه بعصبيــه عمرو 25 ومتزوج : حتتضارب مع الكل عشانها ! لاتخلي احد يكســرك
امــآ اخوه اللي اكبر من تميم بسنـــه انسحــب مو قادر يقتنع بتفكير اهله الغريب عن اختــهم اللي المفروض في يوم وليله
يعادوها ومايدافعو عنها
وماينحرق قلبهم عليــها لو انجابت سيرتها
تميم يمسح دموعه: مابى اروح المدرســه
الام وهيا تشد على كتفـــو : شايف بسببها تبا تحرق مستقبلك .. تبا تدمر نفسك ! .. بكرا حتروح وحتشتكي على الوسخين اللي سوو كدا حتكسر عينهم كلهم لو جيت
تميم بعد يد امو وقال بعصبيه : مااابى ارووح قلتتت
دخل غرفـــته هوآ وآخوه التاني وبلبس المدرســه
انسدح على سريره واتغطى باللحـآف وقعد يبـــكي وكأنه طفـــل صغيـــر
اما في السرير اللي جمبـــو ..
سامع صريخهم بـــرا
مسوي مجنون
مايبى يسمعهم
مايبى يتناقش معاهم
مو عارف اللي يفكر فيه صح ولا لا
شويا يكرهها وشوياا يشتقلها ...
تـآمر حط السمــآعات في اذنـــو وفتح الاغاني على اعلى شي عشان مايسمــع صوت شـــي ...
كان المفروض يتغدو لـــكن محد له نفس يتغدى
انسدت نفســـهم ...
الاب قاعـــد على الكنبـــه ... نظراتو مكســـوره .. مالو ســآر اي كلمــه بالبيت
الام ممشيــه كل شـــي
الام قاعده جمبـــو تحاول تكون الحلقه القويـــه بالموضووع تصرخ وتقولهم كلام تقنعهم فيــه وآخر الليل
يسمع زوجهـــآ شهقاتها لين ماتنــآم
مهما مثلت القوه لازم في لحظه تشيل القنــآع
اخـــوهم " لـــيث " انسحب من البيت وهوآ كاره اختـــو وكــآره كل حيــآتهم بسببها
راح لمـــرته وهوا بدي اللحظه شايل هم انو يقولولها حــآمل ببنت
البنــآت حاليــآ بنسبه له عـــآر وبس
صمــــت في البيــــت مو طبيعـــي
أجواء متوتره
كل وآححد في عــآلم عايش لوحدو
الهم مكبر الام والاب اضعاف اضعاف عمرهم
خــرجت من الغرفــه وهيا تلعـــب
صغيــره
مو فاهمه الا انو فجأه اختها " تــرف " سارت مو فيــه
فجأه تسمع الكل كارهها ويسبها في البيت بدون سبب
لكن هيا نفــس تفكير تميم مشتاقين لها وبــس ...
صرخه فجعتها وخلتها تطيح الكــآسه البلاستيــك من يدها : لمــى ادخلي غرفتـــك
حتى ماأخدت الكــآسه دخلت غرفتها وبـــس
ماهتمت عارفه انو امها معصبه كالعادهـ .... وكلهم يشردو لغرفهم كآنت بتروح لأخوانها لكن مع الفجعه
ماقدرت تروح وماتبى تخرج عشان لاتتهزأ
خرجت كيـــس المكعــبــآت الكبيـــره وكتتهم في الارض وتبــآ تبني قصـــر الأميــره
ولآ نص ســـآعه وســـآر هجوم على غرفتــها فجعها
فكت الباب واترزع بالجدآر ...طالعت مفجوعه : ايش في ماما
صغيـــره لســآتها تــآني ابتدائي ...
الام والجوال بيدها وشكلها عقلها بيطيـــر من اللي بيسير فيــها : دوبها كلمتني استاذتــك
لمــى !؟؟؟؟
الام جــآت لعندها وهيا تطالع في لمى المتربعه بكل عفويــه بالارض : فين شردتي هــآ!!
لمى انفجعت : ماروحت مكــآن
الام عرفت من اسلوب بنتها انها بتكذب مسكت من شعرها لين ماوقفتها
وتصررخ وعرووق رقبتها كلها بارزه : قووووليلي ولا والله لاأقتتتلك واللله يالمى لاأقتلك
لمى تحسسس شعرها بيتقطع :والله ياماما _ كانت بتتكلم بس من الالم والخــوف بكيت بكل صوتها _
والام تشد شعرها وتحركها وكأنها لعبه بيدها : قووووليلي لاتجننيني تبو تفضحوووني تبو تموتوني انتوو
الاب مو في البيـــت كآن دوبو خــآرج
والأولاد جو يجـــرو مفجوعيـــن يطالعو عند الباب مو مستوعبين ايش بيسير
الام ولساتها تصـــرخ : اتكلمي _ تديها كف على وجهها وبيدها التانيه ماسكه شعرها _ اتتتكلمي بقوول
تــآمر ماقدر دخل وسار يحاول يسحب اختـــو وهيا تدفو : اطلللع برااا اقولك
لمـى فلتت من يد امها وجات ورا تــآمر
الأم مع العصبيـــه تضرب نفسها ووجهها كلو احمـــر : حسبيه الله ونعم الوكيييل حسبيه الله فيكم انا ايش سويتلكم الله ينتقم منكم
تــآمر خاف من دعوآت امــو: ماما اهدي
الام رفعت يدها بتحذير : والله ياتـآمر لو مااخرجت من الغرفه ياويلك
لمى ماسكه في بلوزته من ورا وتبكي خايفه يسيبها من كتر مو شاده حاسس انها خانقتــه
تــآمر : قوليلي طيب ايش اللي سار
الام اتنرفزت مرا منـــو دفتـــو ومســـكت لمى من شعررها وسحبتها معاها وهيــآ تبكي بكل صوتــها دخلتها غرفتها
وقفلت عليــها الباب :قوليلي فين كنتي
لمى بعدت عنها وترفع صباعها الصغير وتبكي : والله واللله كنت خايفه من الأبله لأني ماحليت الوآجب
والبنات قالولي انها عصبيه وتضرب ونزلت قعدت الدرج
الام مو مقتنعـــه ماتثق في بنـــآتها من بعـــد ترف
ضربتــها من كل قلبـــها
ضربتها لين ماتحس الحريقه اللي في قلبها هديـــت شويـــآ
امـــآ بررا تـــآمر يدق البـــآب زي المجنون وهوا يسمع صريـــخ اختـــو
طالع في تميم الي واقف لساتو عند باب غرفه لمى وماتحرك : اتصللل على ابـــويا بسرعـــه
تميم ولا اتحرك
تامر صرخ : بسرررعه روح
تميم راح للتلفون يحاول يدق الرقم اللي المفروض حافظو زي اسمو
مو قادر
يضغط اول رقمين ويرجع يقفل
يضغط تلاته ارقام ويرجع يقفل
وحاول تالت ورابع وفجأه استسلم وســـآر يبــــكي ....
فتحت باب الغرفــه وخـــرجت اما تــآمر راح لاختــه اللي مرميه بالارض وتبكي بدون صوت
آمـــآ هيا دخلت الحمام قفلت البـــآب
واقفه مكـآنها ماتحركت
حاولت تستوعب اللي سوتــه
وقعدت بالارض وســـآرت تبــــكي
محــد ســآر بعقلــه بسبب الفضيـــحه
الام اتحولـــت لكــآئن مافيه اي رحمـــه ...
ولمـــى اللي حـآليا البنت الوحيـــده هيا الضحيــه .
طفوله ملوثه بالوآقع
ومـــضت الايــآآم والشهور والسنيـــن ...
لن ابــآلغ واخبركم انها لم تمر عليـــهم ايام ابتسمو وضحكو فيــهآآ
ولكن قســوه الحيـآه والظلم طغت على جميــع اللحظات الجميـــله
لحـــظــآت ســـٍريعـــه ...
انـــآ لمـــى...
حيـــآتي كلها اتدمرت بسبب اختي " ترف "
جسمي كلــو كدمــآت اصحى من نص نومي بسبب الألم
اتوفى بابا بعد سنـــه من فضيحه " تـــرف "
وامـــي بعد وفــآته ســآرت اسوء
اخواني يدافعو عنـــي لكن بسببها يشردو دايما من البيـــت
وانا اللي اقعد معـآها
اخــآف من كـــل شــي لو طاحت فرشه من يدي تصرخ عليــآ
لو طلبت مني طلب وغلطت فيــه تضربــني باأي حــآجه جمبــها
اخويا ليث آخذ مرتـــو وسافرو ومانعرف شي عنهم غير اتصالات
انا ماحبــو اصلا لأانو يتصل كل يوم ويزيد هَم مـــآمآ ويحرص عليها انها تنتبه عليا عشان لاأكون
عار عليهم زي تــرف
بنسبــه للمدرســه ماما تجي كل يــوم معـآيا وتستناني لين ماأخرج !
ابتدآئي ومتوسط وثنوي
ودخلت الجـآمعه وبحكم الاختلاط في مدينتنا كرهتني بالدراســه لو مر رجال وهيا جمبي تقولي انتي طالعتي وشوفتك
سارت عيني في الارض وبرضو ماأسلم من لسانها
ماعرف اتعامل مع احـــد بسببها
خلتني بدون شخصيـــه
اكتــر اتنين اكرهم في حيــآتي ماما وتــرف
دمرو حيـآتي
نفسي اروح ازور ترف واخرج اللي بنفسي
لكن ماما مانعتنا نشوفها ...
ماما راحتلها مره بس
ماندري ايش سار معاها
لكن كل بعد فتــره يتصلــو عليـنــآ حاولت 4 مرات تنتحــر
وكل مرا تنتحر تزيد مده عقابها 6 شهور
وغيــر مشاكلها اللي بنص السجــن
وقعدت سنتنين لأنو امي مارضيت تاخدها وعرفنا بعد فتــره انها خرجت
امي لدحين مفجوعه كيــف خــرجت لأنو لازم احد من الاهل يخــرجها ودا السؤال اللي محد يعرف اجابتــه
اما بنسبــه ليــآ ... قتلت ماما كل احلامي وطموحـــي
بنتني زي ماهيا تبــآ انا ماليــآ رايي دخلتني ادرس شريـــعه
بعد مآكنت ابا طـــب
حتى لما حاولت ابني صداقات في الجــآمعه قابلتهم ماما وكسفتني قدآمهم تطلع كل عيـــوبي
وتتكلم عني بطريقه مو حـــلوه وتقول عني عاصيـــه وانا حتى صوتي مايترفع عليــها
مدري ليش اتعامل دي المعامله واخوآني شايلتهم فوق رآسها
تميم ســآر طبيب اسنــآن
وتـــآمر محــآسب في شركــه
تــــرف ....
استوعبت بعد دخولي الاصلاحيــه اني حآمل وكآنت دي صدمتي
لأني كنت احسب اللي تحمل هيا اللي تلبس فستآآن ابيض وتجيب بعدها النونو
كنــت احسب انو الطفــل يخرج من بطن امــو ويكون لابس ملابســه
يالله قد ايش كنت بريــئه ...
مريــت بتسعــه شهور حمـــل وانا عمري 15 سنــــه
كبـــرت ميـــه مرآآ مع التجربـــه
وكبرت الف مــرا لما ولدت
وكبـــرت مليـــون مرا لما مرت سنتنين وهوا بحضني
وسحبوه بكل وحشيه مني وودوه الملجأ
كآن عمري 16 سنــه وحسيت ايش يعني امـــومه ...
اصعب لحظــه في حيــآتي كنت اتوقعها دخول الاصلاحيــه بس كآنت
اصعب لحظـــه لما حرموني من ولدي
عشــت ديك الفتره حاله نفسيــه صعبه سرت اكلم نفسي كتتير
سرت هجوميــه وعدائيـــه على اي احد
احلــم فيه دايما انو يناديني وماقدر اخدوو
احلم فيه انو "جيعان وماحد ياأكلو "انو يبكي ومحد يحضنو" انو مريض ومحد يسهر معاه ...
بعد ماستوعبت اللي ســـرلي كرهت كل صنــف الرجــآل الا ولدي " سامي "
كآنو دايما يجهزو جلسات عشان اتقابل مع اهلي
بس محد كآن يجــي
مرا ماما جآت وشافتني وبكـــيت
وقفت مكآني حتى ماحضنتها
وهيا ماحضنتني ببساطه لأنه ممنوع احد يلمسني ..
كنآ نبكي وكل وحده ف مكآنها
وكأنها تلومني ليش سويتي كدا
وانا الومها واقلها ليش ماجيتيني طول دي الفتره
قربت خطوه كنت حتجرأ حسيت ايش يعني ام بعد ماجبت ولد
كنت حتكلم
بــس خرجــت
مافهمت ليش جآت .؟ مافهمت ليش مو راضيه تسامحني ..؟
اعرف انو اخوآني يبـــو يقتلونـــي انا كنت البنت الكبيــره
او بنسبــه لهم حاليآآ العار الكبيـــر في العيـــله
اما بنسبــه للاصلاحيـــه ...
بعد ماكنت في دنيــآ واسعــه بعد ماكنت زي الفراشه بكل مكآآن اطيــر
سرت في زنزانــه مافيها غير فراش حقيـــر واضائــه خافــته
حتى الكلام محســوب علينــآ
الوآن الجدار الكئيـــه
نخرج من باب وينقفل الباب السابق وكأنه سجن ورا سجـــن ...
كل بعــد فتــره تجيني محــآكمــه جديده ويحبسوني فوق الشهور شهور تــآنيه
وفوق عدد الجلد اللي اخدو جلــد تـــآني
اتذكـــر اول مرا انجلدت فيــه اغمى عليــآ من الالـــم
مستحيــل انســى شي ســآرلي بداك المكــآن
مستحيل انسى الاهــآنه والسب ونظرات الا ستحقار اللي كنت اشوفها بعيونهم
ومديره السجن في كل مشكله اســـويها اعرف اني حتعاقب بس اسويــهــآ
حاولت اكتــب لماما رســآله لكن جو رموها بوجههي وقالولي امك تقول ماعندها بنت اسمها تـَرف
طلعت فيــآ بقرف وقالت " انتي عار عار عليهم "
مستحيل انســى كلمتــها ...
مرا سمحو انوولدي يجي يزورني ... لكن ممنوع اللمســه
ممنوع احضنـــه
نظرتــو وهوا يطالع في الكلبشات اللي بيدي ورجلي
وبشعري النــآشف المشعتر
وبوجهي البآهت كسرتني زيـــآده
خلتـــني ابطــل مشــآكل وآحــآول اخــرج عشان اوفرلو بيئــه كويســآ
بس وجآ اليــوم اللي اخرج فيـــه من دا المكــآن
مافي اهل ياخدوني لكــن بعــد معــآنآه جا اخويــآ تــآمر وخرجني
شوفتــو وحسيت قلبي حيخــرج كبـــر ســآر رجال عمرو 27سنـــه
اول ماخرجنــآ مسكني من يدي
حسبت حيحضني
وقالي بتهديد وعينو مليــآنه دموع : مابى اشوفك تــآني
طالعت فيه مفجووعـــه : فين اروح
قال وهوا يتكلم من ورا قلبــه وخايف من اللي سواه : روحــي عند صحبتك خلود اتكلمت معاها مابى اسمع سيرتك بعد اليوم
نزلت دموعي ماعرف ارد عليــه
هديــل دي صحبــتي كآنت مسجونه معايا مدري كيف وصلــها !
مدري كيف عرفــها !
شــد على يدي وشويا يكسرلي هيا: ليث وامي ولمى لو شافوكي حيقتلوكي فاهمه
طالعت فيه بترجـــي : اسمعني
ساب يدها : لاتتكلمي انتي ماتدري ايش سويتي فينــآ _ صوته رجف _ انا مو عارف ليش خرجتك اصلا
مسكت يدو وأنا اترجاه خوفت يرجعني تــآني للمكــآن: والله ماحتسمعو سيرتي انا عندي ولد ابا اربيــه ابا بس ولدي ماحجيكم
يبــآ يبــكي ومــآسك نفســو ... : حوقفلك تـآكسي وحديــه المكــآن وعنوان صحبــتك ومابى اسمع شي عنكم
حركت راسها بالايجــآب وهيا تمسح دموعها : طيب
كمل كلامه وهوا يحذرها : مابى اسمع شي عنك
بكل خوف ترد : طيب
وقفلها تــآكسي وركبــت ومشيــت السيــآرهـ
امــآ هوا منهــآر من جوتـــه مو عارف ليش ســوآ كدا
بس يحس انه من حقــها تعيش واللي شافتــو بداك المكــآن يكفيــها .. الجلد والحبــس والاهــآنه يكفي
ماتوقعها كدآ شكلها اتغيـــر باين من وجهها قد ايش اتعذبت
خرجـــت لعالم جديــــد
عدلت حيـــآتي عشت انا وخلود حيــآه جديده في بيـــت وآحد ...
وبعد محاولات عده وصعوبــآت مريت فيها اخدت ولـــدي لحضنــي تانـــي
لــكن شهور قليله خلود رجعت تدمـــن وسحبتني معــآها لدي السكــــه .
هـــديـــل ...
كــل يــوم يمر وانا على امل ماما تجي تآخدني ...
كل يوم اقول بكــرا
وفجا انسى نفسي اسبوع اسبوعين وابسط موقف يخليني ابكي واسئل عم جاسم متى تجي
يالله قد ايش يعصب لما اجيب سيرتها
اسوء يوم في حيــآتي لما صرخ عليا وقلي هيا سابتك وباعتك ليــآ
شكــلو مرا كآن معصب مستحيــل هيا تسوي كدا
مع انو احس روان مصدقــتو
كلامو آثر في نفسيتي كتيــر ماصدقتو بس كلامه وجعني
جلست اربعه ايام ماتحرك من مكاني
وروان تروح تشتغل بدالي
وتجبلي اكل وتتحايل عليا اكل
وتغطيني وقت مانام
ولما ينقص الفلوس تتهزأ والكل يبا يشتكي لعم جاســم اني انا مابسوي شي
بس روان تحطها فيها وتتهزأ بدالي
مرت الشهور والبنات قررو يشردو بعد ماعصب علينا عم جاسم وحرمنا من الاكل يومين
اتحمســـت
كنت ابا اسيب المكآن المقرف دآ واشرد اعيش في اي خرآبه ولا اعيش تحت رحمــه واحد
لكــن روان مارضيـــت
تقول انو اتعودت على المكآن وخايفه تروح اي مكان تآني ..!
اول مانفتح الموضوع اتضــآربنـــا
وصرخت عليها وماحسيت بنفسي لما ضربتها من القهر
كنت ابكي ابا اروح معاهم ابا اشررد بس ماقدر اسيبها
اطالع فيها وبترجي لكن مارضيــت تجي
شردت معآهم
لكـــن بنص الطريق استوعبت انو روآن عندي اهم من اي حآجه
مستوعبين لما تنحرمو من العيله وتلقو في شخص واحد
الام والاخت والصحبـــه وكل شي دي روآن
رجعت ولقيتها تبــكي بكل صوتــها
ديك اللحظه انا وروان سرنــآ واحد
همنآ واحد كلمتنا وحده عم جآسم جاب بنات بعمر ال 8 سنوات
واحنا سرنا بالـ 24
انا وروان غير مرا عن بعض
روان كل يوم في مصيبه وتسرق وعبيـطه ولتحــه كل العيوب فيها بس تموتني ضحك
يعني مايمر يوم الا وفيه مصيبه وتورطني معاها وننام واحنا نضحك
روآن ....
كبرت على يد عمو جآســـم .... ماعرف ولا شي غير عمـــو جآسم
وهديــل تبــآ تسيبو تقول انها اتخنقت مو قادره استوعب تفكيــرها
دا عالمي مستحيــل اروح لمكــآن تـآني
انا راضيــه بحيــآتي راضيــه بشغلي
التطورات في حيــآتي
سرت انظف بيوت الـنـآس واخد مقابل عليــه
ومازلت اسرق
وهديـــل لدحيـن كارهه دا الطبــع فيا
وكارهه على قولها الذل اللي احنـآ فيـه
لما نتكلم انا وهيا في دا الموضوع لازم نتجادل
وكأننا متزوجين وعندنا عشره اطفال
ماأنكر انو بعض الاحيـآن تسير مواقف تحرق قلبي لككــن حتسير سواء مع عمو جاسم ولا بدونه
نظره النــآس لينا اتغيرت عن اول بحكم انو كبرنـــآ
في الحــآره
سارو الشباب يطالعو فينــآ
صح محد يقدر يسويلنا شي لانهم يخافو نشتكي
لكن النظرات تكفــي
اما في خارج الحــآره نتعرض للأذيــه والتحرش بشكل يومــي
مانقدر نتكلم مو من حقنا نشتكي لانو احنا اللي حنخسر ...
هديـــل بنسبه ليـآ كل حآجه عمري ماحسيت ايش يعني عيلــه وهيا حسستني بدا الشعور
مع انو شخصياتنا غير مرا عن بعـــض
هديــل عاطفيـه وبس تضحك على اي حــآجه اسويها بس لما تعصب واحتاجها
تسند الظهر بدون كلام لما تفك فمها بالتهزيئ والشردحه ماتسكت
هيا السبب اللي مخليتني اقدر اكمــل ايآمي ...
مــــٍرت الــــسنــــيـــــن .....
في آحد البيــــوت البسيـــطه وآقـــفه جمــب ولدها اللي ســآر بعمر الـ 12
سـآر بطولــها اللي يشــوفهم مع بعض مايستوعبــو انو دا ولــدها
مايستوعبــو متى حملت وولدت وكبــر
شعــرها مبهدل لآبســه قميس بيت قصير وعليــه روب
كل شويــآ تغطي جسمها بالروب وهيا بالقوه تحاول تتكلم معاه : لا تتآخر
تغمـــض عينــها بكل قوتــها وهيا حــآسه بصداع ..
يطالع فيها وهوا عارف ايش بــها بس سآكت
كمل فطورو وهوا قاعد على الكنبه ويطالع بالتلفزيون
تـــرف وهيا تحاول تركــز : ايش .. _ ضربت جبينها _ قصــدي نسيت
ســآمي انسد نفسو عن الاكــل وقف وشال شنطه المدرسـه السودآ
قال وهوا يذكرها : الساعه عشره حيجي صاحب الشقه ياخد الايجار لاتنسي
يكلمها وكأنه هيا اصغر منــو
فتحت عينها على وسعها : اييييوا صح صح يبالي اقول لخلود
سامي حط الشنطه على كتف واحد واستغرب : مو اخدتي منها انتي نص الايجار
ترف ضحكت وحطت يدها على فمها : ايوا صرفت _ ضيقت على عينها _ بس شويا
سامي بقله حيله وصوتو علي : مو قلتلك اديني الفلوس انا امسكها
ترف تبرر لنفسها : سامي والله كنت احتاجها
سامي قرب منها وبهجوميه قال: في ايش احتجتيها .؟
ترف تطالع حولينها وهيا مشتته مرا : اممم ... كنت ابااا
سامي بعصبيــه : حشيش صححح
ترف فتحت عينها بخوف : لا لا حبيبي انا بطلت _ حطت يدها على كتفو _ مستح
سامي دف يدها بعصبيه _ مشي وهوا مقهوور _ انا رايح المدرسه
ترف حاولت تلحق وراه : سامي اسمعني والله
ومالحقت تبرر لنفســها الا هوا قفل باب الشقه بعصبيـــه
غطت اياديـــها على عينها وسارت تدوور بالغرفه بتوتر
وفجأأأه صرخت بقله حيــله
الا سامي
مو قادره تتغير كل مرا تحاول تتغير عشــآنه
بس ضعيفــــه
خلـــود خرجت مفجوعه وهيا دوبها صاحيـــه : ايش فييي
ترف جلست على الكنبه : تعبببت تعبببت
خلود لساتها واقفه مكانها خلاص اتعودت كل بعد كم يوم مضاربه سامي وترف ...: ايش فيـــه
ترف تهرج بخوف : سامي عرف اني حششت
خلود اتثاوبت بملل : دام شايفه نفسك كدا ليش خرجتي من غرفتك
ترف مسكت راسها : مدري مدري
خــلود مو فارقه معــآها : روحي نــآمي ياشيخه حيجي وهوا مو زعلان ماتعرفيه
ترف : الا بس انا وعدتو
خلـود رفعت اكتافها : عادي اوعديه تاني
ترف : لا لا حبطل ماحكدب عليه
خلود ضحكت بااستهزاء لانها عارفه طبــع ترف : انا حدخل انام صحيتيني انتي وولدك من صباح ربنـــآ
البيت عباره عن ثلاث غرف
غرفه سامي , غرفه ترف , غرفه خلود
والصاله هيا مكان جلستهم واكلهم ...
خــرج ســآمي كآره عمــرو ... كآره نفســو ... بس مايقدر يكره امــو
يحــزن عليها يعرف انو لو رجع حتجي تحضنو تبكي
عارف انها حتتأسفلو وتقلو واللله ماكررها وماحسويها
عنـــدو امل كبيــر فيـــها
عارف قد ايش مضغوطه ف حيــآتها وعمرها مانقصت عليه بشي
وكل مرا يصدقهـآ وحيصدقـــها ويديها كمــآن فرصـــه ...
رآآح للمدرســه وطبــعا الاجتهاد دا شي اللي يحبـــو ...
يعشــق المدرســـه ودا الشي اللي يحلي يومـــه .
آمـآ بنسبـه لترف حطت راسها على المخده وقعدت تبـــكي لين مانـآمت
دقــت الساعــه عشــره ...
وهنــآ خلــود زآدت من عندها فلوس وادتو لصاحب العمآره ورجعت تنــآم
ســآمي خلــص من المدرســه
عـآرف انو امو منآحه وبــكآ دحين
اشترى غدى بطريــقو ورجع البيــت
فتح باب الشقه بمفاتيحـــه
وحطها على الطاوله مع شنطتو ودخل المطبــخ
جهز الاكــل لاأمو وكأنه هيا الزعلانه مو هوآ
ودخل عليها وهوا شايل صحن الاكل
جلس جمبها على السرير : ماما ... ماما
فتحت عينها بشويش طالعت في الاكل وبعدها بسامي وابتسمت
اتذكرت الي سار الصباح ورفعت جسمها على طول
سامي يحط السلطه على الرز : يلا كلــي
تــرف تنقهر انو ماحتلقى زي ولدهآ
ودا الصراع اللي دايما بينها وبين نفســها ...
حط صحن الاكل على رجلها وهيا مسكت يدو: الله يخليك ليا
سآمي ابتسم وهوا لسى شايل في نفسو عليها : اباكي تاكلي عشان اتكلم معاكي بموضوع
تــرف شربت كآسه مويـآ : حبيبي شويا حآكل قولي ايش فيـه
سامي اتربع على السرير قبالها بااهتمام : لقيتلك وظيفه
ترف رفعت حاجبـها بااستغراب : طيب انا عندي شغل !
سامي يفكر بكل شي اكتر منها : بس الدخل بسيط وبتتعبي مرا ياماما على الفاضي
ترف ضحكت : طيب فين العمل
سامي بحماس : في محل ملابس ابو صاحبي مشتري وكالتها
ترف عقدت حواجبها : طيب ؟
سامي : تقريبا المحل فاتح منو في كل مول ماشاءالله عليـه المهم كلمتو تتوظفي عنــدو ..
ترف : كلمت صاحبك
سامي بفخر : لا ابوه
ترف : هههههههه منجدك
سامي : ايوا
ترف ميلت جسمها عليه ودفتو : يسعد ولدي اللي كبــر
سـآمي ابتسم ودقيقه واختفت الابتسامه :ماما انا بسوي دا كلو عشان ماباكي تشتغلي مع خاله خلود اباكي تخرجي لعالم تآني
ترف لحظه صمت وبعدها حطت راسها على كتفو وحست انها حتبكي : كل ماأحس اني اكره نفسي انتا تسحبني وتخليني اطالع في الحيآه بنظره تانيه
رفعت راسها وحضنت وجهه بيدها : انتا احلى شي سار في حيــآتي واعرف اني كبرتك بمشاكلي بس _ مسحت دموعها _ انا ماعندي احد غيرك
مسك يدها وباسها : انا عارف انك تبي تتغيري وبتحاولي
ابتسمتلو بين دموعها
سامي وقف : يلا انا بروح استحمى
ترف : طيب حبيبي
وهوا عند الباب اتذكر : اوه صحح نسيت اقولك ترا في العصر حنروح نقابل ابو صاحبــي
ترف : امااا
سامي يطالع فيها بحماس ويرفع حوآجبه الاتنين : اتجهزي ياقميل
تــرف ضحك : روووح استحمى
خــرج وهيا تطالع ومفتخره فيـــه
تحس انها ظالمتو في حيــآتو
تفكيره وكلامو كأنه ولد بالعشرين
بسبب الظروف اللي عاشها مع امو وخلود واضطر يكون لهم الرجال قبل لايكون المراهق اللي يبا يعيش اللحظه
اضطر يرد بصرامه على اي احد عشــآن لايشكو في يوم انو امو وصحبتها بدون سنــد
اضطر يسوي حاجات كتيــر عشان وصل لدي المرحــله ....
تــرف نطت من على الســـرير وطالعت في نفسها بالمرآيه وعلى وجهها ابتســآمه عريضــه
اخيــرا جو جديـــد غير عن وظيفتها هيا وخلود الممله
فتحت دولاب ملابســها مو عارفه ايش تلبس
شي كآجوال
ولا شي رسمي
ولا شي انيق
نادت بحماااس : ساااامي
بس ماردد
: ااوووف
غمآزاتها الاتنين محفوره بخدها من كتــر مو مبتسمــه
غصبــآ عنــها مهما قدمت على وظآيف
ماكانت تلقى اللي تبــآه
لكن حاليآ دي وظيفه حبتها مع انو ماتدري كيف طبيعه العمل
مــر الوقت وهيا بالغرفه وحايســه
دخل سامي وشعرو المبلل على جبينو ومدخل يدو وسط اذنو ويحركها ...
ترف ابتسمت : اخيرا جيييت شووف شووف ايش اللبس _ تحط البلوزه اللاولى _ دي _ وتحط الثانيه _ ولا دي
سآمي : ههههههه من جدك ياماما اللبسي اي شي
ترف اتذكرت : هيي هناك ناديني ترف مو ماما اخاف يحسدوني
سآمي : ههههه طيب
عارف انه محد يصدق انها امو بذات لما يقعدو يضحكو ويتكلمو مع بعض كأنهم اخوآن
تــرف شكلها صغير وطفولي ودا الشي يخليه متحسس حتى من اصحابو لما يشوفوها ...
طفوله ملوثه بالوآقع
التعديل الأخير تم بواسطة um soso ; 10-07-17 الساعة 11:49 AM |