[d3do3a]

الفصــل الثـــآلــــث ...



الكـــل بيطــآلع فيـــها مفجوعيــــن .... منزلــه رآسها وماتبى تطالع فيـــهم من كتــر الخـوف
عدي يخبط عـــزام بكتفو بدون محد ينتـــبه ... يمكن اكتر اتنين مبسوطيـــن عدي وعزآم
امــآ عــلآ زي رده فعل امها مفجووعه وبـس
الشــآهي قدامهم وكلهم نسيــو انهم طالبين شاهـــي
الآب بهدوء وابتسامه على وجهه : كيفك يابنتي
هديل بدون ماترفع راسـها : الحمدالله
عدي وعزام كآنو حينجلطو من الحماس لما هرجت عربــي ومافيه اي تكسيـــر
الاب وقــف وطالع في مرتــه : ناديها
حس الوضــع ماينفع يتكلم معاها قدام الكـــل
الام وقفت وهيا لســى مفجوعه : تعالي
هديــل بكل طـآعه مشيت ورآهم وهيا مو عارفه ايش الموضـــوع
الام جمب زوجها وتتكلم بهمس : كيف اصرفها دي
الاب : ليش تصرفيها
الام فتحت عينها مفجوعه وهمست بقهر : عشان اولادك كيف اقعدها
الاب : اهاا طيب
فتح باب الغرفـــه ودخل هوا ومرتــو عدو على الكنبــه واشرلها تقــعد قدآمهم ..
الام موو عارفه كيف تصرفـــها
الاب : قالتلنا نانا انك تبي تشتغلي ..
هديـل : ايوا _ بكدب _ انا دورت كدا مكان اشتغل فيه ومالقيت احد يفتحلي بابه
الاب : فين اهلك !
هديـل تلعب بطرف البلوزه الطويلـــه بتوتر
حست الشعور دا زي يوم ماجابها جاسم تتعرف على البنــآت
بلعت ريقـها : ماعندي
الام بتردد : وفين كنتي عايشه قبل لاتجي هنا
هديــل : كنت _ سكتت مو متعوده تقول لاأحد حكايتها حاولت تقوي نفسها وتتكلم _ كنت عايشه مع بنات من وانا صغيره ونبيع في السوق مويا وحاجات تانيه
الام : وفينهم دحين
هديل رفعت كتفها وعينها مليانه دموع : مدري _ ماكانت تبا تجيب سيره الشرطه _ انا وصحبتي شردنا وهيا راحت تدور على شغل في مكان تاني
الام طالعت في الاب ماتنكر انها حزنــآنه بس برضــو اولادها شباب : يعني انا كان نفسي اساعدك بس انا عندي اولاد
هديل قاطعتها بترجي : والله ماأخرج وهما فيــه حنظف البيت واقعد مع نانا واسوي اللي هيا تباه وبــس ايش تبيه مني انا حاضر
الام انقهرت مرا مو قادره تقولها لا ولا قادره تقولها ايوا : يابنتي والله اسفــه كآن نفسي اسآعدك
هديل ماتبى ترجع الشــآرع : والله العظيم ماحتحسي بوجودي
الام طالعت بزوجها تباه ينقذهــآ
: يابنتي روحي نامي دحين ولما تصحي نتكلم
هديــل حستهم محترمين مايبو يخرجوها في الشارع بدا الوقت المتأخر ودامهم بيتكلمو يعني متمسكين برايهم: طيب
خـــرجت هديـــل وعدت من قدام عدي وعلا وعزام وهيا راخيه راســها
عزام حط يدو على قلبو وهوا يستهبل: ايش بها كدا زعلانه
عدي طالع فيه : لاتقول امي وابويا خرجوها
علا :اكييد حيخرجوها منتو شايفين كيف عينكم حتطلع على البنت
عدي : احنا مبسوطين انو في وحده حتساعد نانا بس عشان كدا مافي سبب تاني
علا : هههههههههههه اسري بلله
دخلت الام والتلاته طالعو فيــها
علا : ايش ســـآر
الام قعدت على الكنبه واتنهدت بضيــق : حزنتني والله بس صعبه اجلسها قلنالها مانقدر قعدت تترجى ماعرفت ارد قلها ابوكي بكرا نتكلم
عزام يسوي بريئ: وليش صعبه تجلسيها
الام طالعت في اولادها الاتنين اللي باين انهم مقهورين : ولاشــي كدا مزاج ماباها
عدي : سايره قاسيه الفتره الاخيره
الام : هههههه اقولك روح نــآم وراك جامعه
عدي :بكرا ماحروح
الام : لك تلاته اسابيـــع مابتروح اهجد ياعدي
عدي مسك بلوزته بقرف : اكررره الدراسه مابى اكمل
الام وقفت : قوم ناام مافيا حيل اتناحل معاك ... بروح لاأبوكـــم ...



هديـــل دخلت الغرفـــه حق نانا .. ونانا كآنت مستنيتها ومتفائله مرا وصدمتها هديـــل
نانا : ليش !
هديل مالها نفس تتكلم رفعت كتفها : مدري بس حنام هنا وبكرا امشي
نانا اشرتلها على الفرشه اللي بالارض : حطيت هادا لليانه
هديل ابتسمتلها : شكرا
ونانا انسدحت على سريرهـــآ ...
هديل خرجت جوآلها وترســل كول مي لروان ... مو عارفه هيــآ فيـــن ولا ايش ســآر معاها
بالها بدأ ينشغل عليـــها ...


طفوله ملوثه بالواقع ...


في شوارع عشـــوائيــه تفتقر للتنظيم ..
طاحت عـــلى الارض بسبب صخـــره
ماحست باألم ماحست بالجرح اللي برجلها
كل اللي كــآنت خايفه منـــو انهم يمسكــوهآ وبــس . تطالع فيهم وهمــآ يجرو وملامحهم كلــها شــر
رعـــب فضيـــع لأول مرا تحس بكل دا الخــوف
رفعت نفســها من الارض ورجعت تجـــري بدون هــدف
تجــري لأبعد مكــآن ممكن تــروحـــو
وتسئــلها هديــل ليش مانشــرد من عند جاســـم
اتذكرت لما كآنت صغيره وضاعت في الشــآرع وجـآ وآحد يحاول ياخدها
اتذكرت لما ضربــها واحد بسبب انها تطلب منو فلوس طفشتو
اتذكرت لما سحبــو منها اولاد كل الفلوس اللي كآنت تحطهم في الحفــره
ورموها في الركنيــه وضربوها كلهم
تتذكــر مواقف ماتحب تحكيها لأحد لكـــن اللي بيسرلها دحين دا جوابها على هديــل
ببساطـــه لأنهم بنــآت حيتهانو وماحيقدرو يسو شــي ...


بدأت تشـــوف الشــآرع العآآم وتشووف سيــآرات واضائــه عاليـــه
شايفتو بعينها بس من الرعب تحسو لســـى بعيـــد ...
وصـــلت للرصيـــف وقطعت السكـــه بدون ماتطالع في السيـــآرات
فجأه المكـــآن ينقلب كلللو اصوات بواااري وازعــآج
طالعت وراها ماشافتهم شــآفت حديقـــه فيها العاب مرجيحه وزحليقـــه
وكلهم عوائـــل راحت على طـــول لأكتر مكان فيه ضجه عشـــآن ترمي نفســـها بينهم
عشــآن تحس بالأمان
برضو قعدت تتاكد بخوف ومالقتهم
جلست على العشب الاخضــر في نص الحديقـــه
ازعاج
اصوات رجال
ممزوجه بضحكات وبكــآ اطفال
خد ... اشتري دا. .. انتبه لاتطيـــح ... يابنت تعااالي ...
صوت تنفـسها لسى عالي
نبضات قلبها ماهديـــت
تسمع الاصوات وتبـــكي
ياألله قد ايــش تتمنى تكون واحد من دول الاطفال
تبا الأمان اللي عندهم
تبا احد يخاف عليها لاتطيح ولا لاتبــعد
غطت يدها بوجهها وتبــكي وكأنه مافــي احد
فجأه نسيــت الكـــل
مخنووووقه اكتتر مكــآن يكســرها جلست فيــه
انها تشوف عيله مهتمه باأطفالها
دا بنسبــه لها شي يقتــــلها
حست بشي على كتفها وقفت مفجووعه
حرمه كبيره في السن : فيكي شي يابنتي
روان رجعت على ورا واشرت براسها بالنفي : لا
مشيــت وسابت الحرمه لوحدها ماتبا احد يكلمــها ماتبا احد يسوي نفســه مهتم فيــها
خرجت الكاب من جيبها ولبستو ودخلت شعــٍرها
تمشي وهيا تطالع حولينها خايفـــه
ركبت تــآكسي وقالتلو يوديــها للمكــآن اللي فيــه هديـــل ...
خرجت جوالها لقتــو صامت وفيــه رسايل من هديــل اتصلت عليها على طول بعد ماحاولت تعدل صوتها
: الو
هديل مفجوعه : فييينك انتي
: روان دحين جيتك
هديــل : ايش سار معاكي
روان :لقيت مكـآن اشتغل فيــه ..
هديــل : حللو .. انا شكلي حخرج من هنـآ
روان: ليشش
هديـل : مدري الام خايفه على اولادها وتقولي مايسير بس حيخلوني انام اليوم
روان :طيب اسمعي ولا اقول دحين لما اوصل اخرجيلي
هديــل مو عارفه كيف حتخرج بس طبــعا لازم تشـــوف روان ..: طيب

قفـلت من هديــل وهيا حاســه انها مسئوله عنــها
طول عمرها هيا تهتم بنفسها وبهديــل ...

امــآ هديــل مستنيــه البيــت يهدى فجأه ســآر صمت
نانا نامـــت وبتشخر بكل صوتــهابالغرفه
فتحت البــآب بتردد خرجت راســها ..صمت مو طبيعي
واللمبـــآت مقفـــله غرفتها تحت جمب المستودع مالهم علاقه بقســم البيت مــرا
بس لازم تطــلع عشــآن تخرج لروآن
طلعت الدرج وخرجت للممر الطويـــل وقفت شويــآ وهيا تتاكد فيــه احد ولا لا وبعدها فتحت باب الحوش
وخـــرجت
اول ماوصلت رنــه لجوالــها فتحت باب الشارع وروان دخلت الحوش ...
هديــل على طول حضنتها :وحشتيني
روان نفسها تبـــكي بس ماسكــه نفسـها كل وحده حتسوي قويــه عشان تسند التانيـــه ...
روان :وانتي كمان
هديـل بعدت عنها وانفجعت من شعرها مسكتو : ايش سويتي وايش دا اللبس
روان حكتــها فين بتشتغل وايش الكذبــه اللي الفتــها
هديل : مو منجدك
روان : مشي حالك اهم شي اننا نشتغـــل بس كنت بقولك انو حاولي تماطلي معاهم
هديل : ايش اسوي
روان :قوليلهم بس يومين اشتغل عندكم على بال اختي تدور مكـآن نقعد فيــه
هديـل : ولو مارضيو
روان : انتي حاولي وانا اول ماخلص بكرا من شغلي حروح ادور احد ممكن يشغلنا الاتنين
هديــل : طيب تعالي ننام
روان : ماحقدر ادخل
هديل مسكت يدها : حنام تحت محد ينزل مرا
روان : بلاشي تخليهم يعصبو من اول يوم
هديل ولساتها مصممه : ماحنام بدونك ولا حخرج معاكي دحين
روان : هديل اهجدي
هديل وتسحب يدها : محد حيدري والبيت كبير ضايعين فيه
روان باستسلام دخلت وراها وهيا تهمس : حتودينا بدهيه
هديل ابتستملها ودخلــو البيـــت وهما يمشو بشويــش
نزلو على طول وقبل لاتدخل غرفه نانا : ترا في وحده معايا هنــآ
دخلو وانسدحو وهديل تغطي وجه روان وتضحك بشويش : لاتباني ياعبيطه
روان تخرج خشمها وهيا فاتحه عينها بقوه : تبي تموتيني ياغبيه
هديل بس تضحك مرا وحشتها روان غطتها تاني بللحاف: افرضي صحيت وشافتك
روان تشيل اللحاف من وجهها : اجل تصحى تشوفني ميته عادي
هديل :ههههههه يلا يلا حكيني ايش سويتي
روان : ولاشي بس لقيت دا المكان اللي اشتغل فيه وبــس خلصت وجيت
هديل اتنهدت : ادعيلي يخلوني هنا
روان : انتي اتمسكني ولا تبيني اعلمك زي زمان
هديــل فجاه ضحكت : فاكره ديك المسكينه اللي تجينا كل يوم تدينا فلوس عشان تحسبك عميه وانا اقعد ماسكتك وابكي
رواان فلتت ضحكه منها وحطت يدها على فمها مفجوعه: ههههههه ياحيووانه لاتضحكيني ماقدر امسك ضحكتي
هديل تتذكر وتكمل : مانسى وجهها لما شافتك تلعبي وقلتيلها انا بس في الظلام اشوف
روان حاطه يدها على فمها وهوا احمر مستحيل تنسى داك اليوم :ههههههه مصاصه دماء
هديل غطت وجهها ووجه روان تحت اللحاف ويتاهمسو ويضحكو


في البلكونـــه واقف وهوآ مو مستوعـــب مين دخلت بيتهم ...!!
رجع لغرفـــته وقعد متنــح شويــآ وبعدها نزل يشوف ايش الهرجه ومين دي اللي جايتهم اخر الليل
بــس مالقى احــد وقف عند الدرج اللي ينزل لغرفه نانا ومتردد ينزل ولا لا
طالع حولينه ونزل بهدووء وصل لغرفه نانا وحط اذنو على الباب
سمــع ضحكــآت خفيفـــه !
وفجأه صمت وفجأه ضحكك
رجع لغرفتـــه وهوا مو عــآرف ايش الهـرجه بس حيصحى بدري يشوف مين دي اللي جــآت كمان ...

طفوله ملوثه بالواقع ....



في آخـــر الليل يدور بسيــآرتــه في الشوارع بدون هـــدف
مـــلل
طفـــش وقف كدآ مرا لأي مجموعه بنات او بنت واقفه لوحدها ويوصلها
يسلــوه ويخلو الوقت يمـــر ...
جا النــوم ورجع لبيـــته دخل الشقــه ولقى ابــوه قاعد على الاخبــآر: هلا
: اخيرا جيت
جلس على الكنبه اللي جمب ابوه:ماتوقعتك صـآحي
: انسدحت ماجاني النوم قلت استناك _ رفع الريموت وهوا يوطي الصوت _ كنت بكلمك ف موضوع
طالع فيه وهوا مستني يتكلم
: قررت اتزوج
لؤي مفجوع وقال باانكسار واضح بعينه: امي لها شهرين متوفيه !
: الحزن بالقلب ياولدي ربي عالم قد ايش مشتقلها بس ايش اسوي
لؤي لسى ماستوعــب ضحك : بجدك !
: لسى حدور وحده على قد حالها وترضى بيا
لؤي سكت شويــآ وبعدها وقف : دام انتا متخذ قرارك خلاص الله يوفقك
الاب متمسك بكلامه عارف انو ولدو حيزعل يومين ويرضى : والله فكرت بالموضوع كتير واستخرت والحمدالله
لؤي : طيب انا حنام تعبان
الاب : تصبح على خيــر _ ورفع الريموت وزاد الصوت _
لؤي دخل غرفته والشي الوحيد اللي يحط حرته فيه قفلتو لباب الغرفه جلس على طرف السرير وهوا
متنرفز
معصـــب
متضـــآيـق
لســى مافاق من فقدو لأمو وابــوه حيتزوج
لسى مخنوق سار يكره انو يرجع البيـــت
كل شي مالو طــعم
فطورهم غداهم وعشاهم
جلستهم في الصــآله ســآر مالها معنــى مافي حديث يتكلموه غير شي يخنق زياده
اتنهد بكل صوتـــه وكل اللي يتمناه بدي اللحظـــه انو يضمهــآ
ويقعد معاها ...
دق جوآله خرجو من جيبو رقــم غريـــب
دي تالت مرا يتصل عليــه دا الرقـــم ..
خليه يرد ويخلـــص ... : الو
: لؤي ؟
: ايوا هلا مين معايا
: انا وليد
لؤي : وليد مين
: وليد ال""""
لؤي استوعب : معليش بس صوتك متغير بالجوال
وليد استغرب بس كمل كلامه : والله كنت احاول اوصلك طول اليوم وماقدرت انا اسف لاني جيت سجلت اسمي ومشيت اتصلو عليا الاهل سارت ظروف كآن نفسي اشوفك واعتذرلك بس مالقيتك
لؤي تنح : متى انتا مشيت !
وليــد : الساعه 9 الصباح
لؤي وهوا يتكلم وفبالو يفكر بـــشي تــآني : اهااا يعني ماقدرت تحضر اليوم
وليد وهوا يعيد : ايوا معليش ولاحقدر اجي دي الفتره انا اسف بجد وعارف انك اعتمدت عليـآ
لؤي : طيب انتا مارسلت احد بدالك !
وليد بااحراج : لا والله معليش مافكرت ت
لؤي :مومشكله حصل خيــر اهم شي انتا كويس وكآن نفسي اشوفك امي حكتنا عنك كتير
وليد : الله يرحمها ويكثر من امثالها كآنت انسانه طيبه ووقفت كتير معانا
لؤي : امين يارب لو احتجت شي اتصل عليــآ
وليد : مشكور ماتقصـــر
قفـــل وهوا على وجهه مية علامه استفـــهام
طيب مين اللي في المستودع ....!
قام غيــر ملابســـه وهوا باله بس في الموضوع دآ
مو قادر ينـــآم يبا يجي الصبــآح عشان يعرف ايش الهـــرجه ...



قـــآعد على ســريـــره يتــآبع عــلا لها يومين ولا جابت سيــره صحبتـــها
انقهـــر ..
ومالحـــق يفكــر اكتـــر الا ويسمــع صوت صراخ اختـــو دف اللحاف
ونط من فوق سريره ....


في المطبــــخ وماســـكه شعـــر بنتها قدام القدر اللي على الفـــرن وبيغلي الاكل : كم مرررا اقولك لاتكثري الملح ماتفهمي ماااتفهمي
لمــى تحس البخــآر الحــآر بوجههها : ممامااا انا اسفه الله يخليكي
امها وصلت لمرحله ماتقدر تتحكم بنفســها وموهمه نفسها بدا الشي لأنو دي التصرفات بس مع شخص واحد بتسويــها :ماتفهمي الا لما
اديكي درس وقتها تستوعبي
قربت وجهها اكتــر وسارت لمى تصررخ بكل صوتـــها : ماااامااا اااه ماااماا الله يخليكي الله يخليكي
جا تـميم زي المجنووون سحب اختـــو :من جدككك ياماما !!!!!!!!!!!
مسكت في اخـــوها وجسمها كلو يتنافض وتبكي بكل صوتها
الام بعصبيــه : ذووق الاكل ماينطعم الله يقرفها طبعا مو فاضيــه يادوب تتجهز لخرجتها الجيـــه
تميم اشر لأختو : روحي غرفتك
لمــى على طـــول شـــردت ...
تميم سار مايرتاح يسيب لمى مع امو لازم ياهوا ياتــآمر في البيـــت ...
وبنفس الوقت عارفين انه امهم اللي فيها مرض نفـــسي ...
كـآن نفسو يقولها كلام كتيـــر بس عارف طبع امو انها حتعصب لو دافع عن لمى وحتتجنن زياده وتضربها اول ماتجيها فرصه
مسك امــو وحضنها : لاتعصبي نفسك لمى صغيره ماتفهم انتي المفروض تعلميها
امو تهرج برضو معصبه وهيا في حضنو : هيا بقرره كم مرا اعلمها ماتفهم
تميم يهرج معاها وكأنها طفله: ايوا بقره كلنا عارفينها ماعندها ربع ذكائك لازم تستحمليها ولا ليش تتعبي نفسك انا اجبلك اللز اكل من برا
امو بعدت عن حضنو ورفعت يدها : لاا سدت نفسي الله يسد نفسها ويسد طريق توفيقها ان شاءالله
مرا انقهر من الدعــــوه ..بس ايــش يقول يسكـــت ويدعي انو الله يسعد اختــو ويوفقهـآ ...

قفـــلت باب غرفتها وقعدت ورا الباب تبـــكي بكــل صوتـــها
تمرر يدها على وجهها اللي تحســـو حــآر
مو عــآرفه ليــن متى حتعيش دي الحيــآه
لين متى حتكون مضطهده ف دآ البيت اليوم امها
وبكرا ليث جاي على الغدى فاأكيد في مصيبه تـآنيــه

قامت من مكــآنها وهيــآ تبــآ تــروح الحمام مسحت دموعها
خرجت من غرفتها واتوجهت للحمام اللي بين غرفتها وغرفه امــها بس فيــه احد

اتوجهت لقسم الضيـــوف شويـآ بعيد عن غرفـهم
دخلت المجــلس حق الرجال وفيه جوتـــه الحمام الخــآص ... دخلت وقفلت الباب على نفسها
بعد ماخلصت غسلت وجهها تبا تتجهز لخرجتها
ماحتحرق قلبــها بقعدتها بالبيت
دوبها بتفتح الباب الا كل شي في جسمها جبــس لما سمعتو يتكلم ..: هلا تــرف
حست عينها حتخرج من مكانها من كتر الصدمه حطت اذنها على الباب
تبا تتأكد دقات قلبها كل مالها تـــزيد
حطت يدها على فمها وهيا تحاول تضبط انفاســـها

في مكـآن تــآني فجعتها لاتقل عنـــها
فجعتها اضعاف اضعاف اللي تحس فيـــه لمـــى
مو قادره تتحرك من على سريرها
صوتها رجف لاشعوريـــآ تحاول تمسك نفسها بس ماقدرت : ايوا تـآمر
خلود تطالع فيها صح بعض الاحيـــآن يتضاربـــو ويتمشكلو كتيــر
بس تعرف قد ايش بتعاني تــرف وقد ايش انظلمت
ماقدرت تشوفها وهيا كدا ضعيفه
خرجت من الغرفه وسابتها
تـآمر قعد على اقرب كنبه بعد ماسمع صوتــها : كيفك
ترف: كويسـآ
كلمات بالقوه تـــخرج من كل وآحد
تـآمر سكت شويـآ وبتردد قال : كيف ولدك
ترف نزلت دموعها ومسحتها بكبرياء وكأنه شايفها : تمـآم
تـآمر : كم عمرو دحين
ترف تجاوبو مو قادره تقولو ليش اتصلت مبسوطه لأنو بيكلمها : 11 سنه
تامر ابتسم وبنفس الهدوء لساتو يتكلم : ماشاءالله
لحظه صمــت تــآنيه
تامر : كنت متصل اسئلك انتي تخرجي برا البيت كتير
ترف مافهمت ايش غرضو من السؤال بس جاوبت : بس اروح لدوامي وارجع ليش ؟
تـآمر : عملك فين
تررف مرا خافت بس ماتحس تامر ممكن يضرها قالت : اشتغل في محل """"
تامر باستغراب : محل """"" يعني في مول تشتغلي؟
ترف : ايوا
تامر هنا حس المفروض يقولها : اسمعي انا اتصلت لسبب واحد بس
ترف ساكته وتباه يكمل
تـآمر : ليث كآن مسافر ورجع وبيدور عليكي
ترف مرا خافت بس كان عندها امل انهم عرفو الحقيقه انها مظلومه : ايش يبا
تامر مو عارف ايش يقولها : بس كنت بقولك انتبهي على نفسك وكنت ابا ارسلك صورته لو شفتيه في اي مكـآن _ سكت وبعدها قال _ انتبهي على نفسك
ترف لاشعوريا بكيت بصوتها بعد ماكانت تبكي بصمت : ايش يبا مني انا وولدي في حالنا مانبا شي منكم
تامر : انا ماليا صلاح ولا ابا شي منك وبنفس الوقت حبيت اديكي خبر بس
ترف خلاص تبا تقفل : طيب
تـآمر بتردد : انا اسف لو
ترف قاطعته : مالك صلاح شكرا لانك اتصلت ..فيه شي تـآني ؟
تامر فهم انها تبا تقفل : لا
ترف : طيب مع سلامه
قفلت بدون ماتسمع رد منـــو ... رمت الجوال بعصبيه على اللحاف
وانسدحت على مخدتها وبكيت بكل صوتتتها
حتى لما سارت حـــره يبو يقيدوها
يبوها تمشي في الشوارع خايفـــه تشوف احد فيـــهم ..
خلود على طوول دخلت الغرفه لما سمعتها وجات جلست عالسرير وحطت يدها على ظهر ترف : ايش سار
ترف تتكلم بكل صوتها وهيا معصبه وتبكي : ليث يدور عليا مو مرتاح اني عايشه ومبسوطه يبا ياخد روحي الله ياخد رووحه
خلود تمرر يدها على ظهر ترف : ماحيقدر يسويلك شي لاتخافي
ترف تهرج بين شهقاتها : حسبيه الله ونعم الوكيـــل حسبيه الله فيهم
خلود : حبيبي انتي اخصريكي منهم لو احد قرب منك اشتكي عليــه وبس

صوت نغمه الجوال رفعت جسمها ترف من ع سرير على طول ومسكت الجوال
كانت بتفتحه الا فيه رمز سري ادته لخلود ووجها احمر من البكى : افتحيه دا تــآمر
خلود بكل طاعه فكت من غير ماتسئل
فتحت الواتس وشافت الصوره رسمت ابتسامه قهر على وجهها ودموعها تنزل : شوففيه دا ليث
تحط الجوال قدام خلود : دا اخويــآ
رجعت تطالع بصورته وتبــكي بدون ماتتكلم
مرت دقايق وهيا تطالع فيـــه
طالعت في خلود وملامحها كلها قهر : يشبه سـآمي
خلود اخدت الجوال منها : طلعيهم من راسك انا لو ادري تامر حيقولك دا الكلام ماكان خليتك تردي
ترف تاشر على نفسها : عادي انا زيك بلهه اتوقعت انو يبا يشوفني واشتقلي
قامت من على السرير وهيا مو عارفه ايش تبا بس تحس نفسها مخنوقه
تمشي بالغرفـــه وهيا تحرك يدها على صدرها وكأنه الغرفـــه مافيها هوى
: الله ياخدو
وقفت قدام التسريحه وشالت المزهريه وكسرتها في الارض وكآنت بتشيل العطور
خلود قامت مفجوعه من السرير ومسكتها : تتتترف اهجدي ساامي لايصحى
دفتها وهيا تمسك بلوزتها : ايش يبووو مننني ايش يبووو رامينني لوحدي وبرضو مو هاين عليهم اعيش
خلود تحضنها وتحاول تتكلم : خلاص اهدي الله يخليكي
ترف لسى تحس في كلام جوتها كان نفسها تقولو لتامر : مالو حق يتصل يقولي دا الكلام مالو حق يحرمني اني اعيش براحتي
خلود :مالهم حق انا عارفه انا غلطانه لاني رديت عليــه _ بعدت عن ترف وطالعت بوجهها _ خلاص انتي اقوى من كدا لاتخليه ياأثر عليكي
تــرف تمسح دموعها وقالت بقهر : حرقلي قلبي بكلامه



واقفه ورا البــآب رجولها مو شايلتها مع الفجعـــه
لا لا يمزززح تـــآمر
تتمنى يطلع يمـــزح
دحيــن عــرفت مين خـــرجها
كمــآن يتواصل معــآهآ
حســـت بكره فضيع لتامر
مو عارفه كيف حتطالع في عينــــه
بعد مامشي قعدت شويـــآ وبعدها راحت لغرفتها وانفجرت بكـــى
لين مادق الباب وبعدها فتحـــه
دخل بس راســـه وهوا مبتسم عارف انها تبكي يحسب عشان امها ضربتها : يامزتي ماتبي تلبسي ولا ماحتروحي
رفعت راسها وهيا تطالع فيــه : قايمه
تميم : والله لو أمي دخلت وجهك بالقدر كآن برضو روحتي يلا يلا استناكي
قفل الباب
وهيا ضحكت مع انو الموضوع جارحها بس اتخيلت شكلها وهيا محروقه ورايحه ...
اتجهزت لبست عبايتها وحطت شنطتها على كتفـــها وخرجت
سلمت على امها وكأنو ماسار شي ولقت تميم واقف بالشورت الاسود وبلوزته السودا المخططه من الجنب بفصفوري عند الباب
: يلا يلا _ يطالع في سـآعته _ اتاخرنا
: طيب
ركبــت معاه السيـــآره وهيا موضوع تــآمر وتــرف مو راضي يخرج من راســـها ....
تميم كل شويـآ يطالع فيــها : غريبه ماتبي الجوال
لمــى : اوه نسيتو _ فكت الدرج وخــرجتو شغلتو _
تميم : كيف اتعلمتي مكياج .؟
لمى وعينها على الجوال: ايوا مع اني بس ليا اربعه ايام لكن استفدت مرا
تميم : كوويس
لمـى على طول فكت السنـآب وتتفرج على عـلا
ليــن ماوصلت تتفرج وهيا بالها مو فــ السنابات مـــرا بالها كيف توصل لتــرف ولا كيف تبرد قلبــها .
: مع ســـلامــه
امـآ تميم مالقى موقــف قدام القـآعه فاضطر يمشي
وهيا مشيت باإتجاه الباب مسكت الشنطه بتدخل الجوآل واللي واقف عند الباب يدير ويمشي
سد الطريـــق وهوا واقف ويطالــع فيها بااستغراب
لمحت احد رفعت راسها عن الشنطه وانفجعت مو عارفه ليش وااقف كدا
ابتسم واشر عليها بعفويـــه : انتي معايا بالجامعه صح
مسكت حبل الشنطه وحست قلبها حيخرج من مكــآنه : معليش متاخره
بعد عن الباب باستغراب وسابها تدخل


رجع لسيــآرته واتصـــل : ايوا .. علا حطيتلك الاشياء عند الباب .. اخر مرا اتعامل كأني سواق عندك
علا : هههههههههههه حبيبي عُدي والله معليش ... مرا مرا شكرا

لمـــى دخلت .. وقلبها يدق بسسسرعه
اييوا موقف زي كدآ يخليها يمكن مفجوعه طول يـــومهـآ
موقف زي كدا لو ســـآر وامــها فيـــه كآن فضحتها
كآن طلعتها هيا الغلطانه مع انو مالها صلاح ...
نفضت كل الافكــآر من رآســــها ...

وركزت بالشي المهم " علا " وبــــس ...مر الوقــت بســرعه صح لاشعوريــآ تسرح وتتذكر تــرف
بــس كل ماتتذكر انها شي مو مهم عشــآن تفكر فيها بمكـــآن زي كـــدآ
لأول مرا تبا تقدم نفسها على الكـــل ...



بـــرا
برضـــو اليـــوم مر وماجـــآت اللي مستنيـــها مرا بدأ يتضايق من الموضوع
خرج السماعات من اذنــو وهوا في نص اللممشــى ويفكر يسوي دي الحركــه ولا لا ...
ليش مايسويـــها يبا يطمن دا رابع يوم يجي وماتـــجي بعد الطيحــه
رجع حط السماعات وكمــل يجــري شال الفكره من رآســـو
دق جواله ورد : ايوا لمــى
: طيب السياره بعيده انا حجيكي لما اتصل اخرجي _ قفل _
وراح لأختو دوبو وقف عند القــآعه الا شــاف سيــآرتها
ابتســآمه اترسممت على وجههه مو طبيعيه
ماتصـــل على لمــى
مايباها تخـــرج
اما صحبـــه علا فكت بــآب السيـآره وخــرجت
بتمشي كويسس يعني مافيها شي
بسسرعه قدم يبا يوصل قبلها لعند البــآب
يمشي بخطوات سريـــعه ووصل وهيا تمشي وتتلكع
مسوي انو مشغول بجوآلـــه
واول ماوصلت طالع فيها وانو اتفاجئ : اهللن
مرا اتفاجئت لما شافتــه واتفاجئت اكتــر انو كلمها : اهلين !
وقفت في مكـآنها ولا اتحركت
: كيف رجلك
طالعت في رجلها ببلاهه وبعدها قالت : كويسا !
طالعت في الباب وهيا تبا تدخل وهوا عارف انها منحرجه كدا وقفها بسؤال تاني : انا اسف على داك اليوم
تهرج بهدوء وهيا من جوتها بتموت من كتر مو مستحيه : لا انا اللي ماشوفتك انا اللي اسفه
تميم برضو هرج بسرعه قبل لاتمشي : كل يوم اجي مع اختي على اساس اشوفك واعتذرلك والله
ابتسمت ووجهها حمـــر : الله يديك العافيه مايحتاج انا اللي منحرجه منك
تميم ابتسملها وهيا هنــآ راحت فيها لاشعورياا ابتسمت تـآني بتنــآحه وبعدها اشرت على الباب : صحبتي مستنيتني
تميم : اوك معلليش
وهيا اول مادتو ظهرها فرصعت عينها مفجوعــــه
ودخلت تدور زي المجنونه على علا وخدودها محمره بشكل فضيــــع ...





في القــآعه لمـى واقفه ومستنيه اتصـــآل تميم
جـآت جمبها وقالت وهيا تتذكر : امم لمى صح
لمـى وابتسامه على وجهها :اييوا
علا ابتسمتلها : ماشاءالله عليكي ابهرتيني والله اليوم
لمى متفاجئـــه ماتوقعت تجي تكلمها وتمدحها كمان : بجد !
ماعندها ثقه بنفســـها
حست اللي سوتـــه مو داك الشي وكلهم كآنو احسن منها
علا وباين انها اعجبت مرا بعملها : ايوا حبيبتي والله ابدعتي وحابه بجد اكلمك بموضوع يخص دا الشي _ مدتلها بطاقتها _ خدي دا رقمي اتصلي عليا
لمى مدت يدها مو صدقــــه : ان شاءالله
علا : مع سلامـــه
لمــى ولسى الابتسامه على وجهها ونفسها تنطنط كمان : مع سلامه
تطالع في الكرت مو مستوعبــــه
فوقها صوت جوآلها اللي يدق من غيـــر ماترد خرجت على طول

اما عـــلا شافت صحبتها ...
: رشااااا
رشـــآ نفس الصوت اللي مبسوطه وتبا تبكي بنفس الوقت : علاا
علا وقفت : ايش بك كمان !
رشا حاطه يدها على خدودها اللي تحسهم زي النـــآر : تعالي نروح ناكل حلا يفوقني من الصدمه
علا : هههههههههههه لاتقولي شوفتيه تاني
رشــآ : ايييييوا الكلب يجننن نفسي احضنوو وهوا يكلمني
علا : هههههههههههههه ايش جابو
رشا تحرك نفسها بدلع : كآن بيطمن عليا
علا : المفروض انتي الللي تطمني عليه
رشا عرفت ايش قصدها ضربتها على كتفها : والله العظيم ماعورته انا اللي اتعورت
علا: بجد جا عشان يطمن عليكي ؟
رشا : لا قلي هوا يجي مع اختو هيا هنا بس مدري بتاخد دوره ولا تشتغل المهم انو كان بيطمن عليا
علا : ياعيني ياعيني يعني انا السبب في التعارف دآ
رشــآ مدت يدها : حضن حضن ياصحبتي
علا حضنتها وهيا تضحك : هههههههه حشوفك شكلي كل يوم
رشا بعدت وتطاالع فيها : كم يوم باقي على الدوره وتخلص
علا : يومين
رشا حطت يدها على قلبــها : تتوقعي حيقدر يشبكني في يومين
علا : ههههههههههه لا الا لو كنتي خفيفه
رشا بمزح رفعت عدسه عينها على فوق وهيا تفكر وبعدها طالعت في علا : بجد ماحفوتو لازم اكون خفيفه

خرجت من القــآعه والارض مو شايلتها من الفـــرحـــه
شافت تميم ومسكـــت يدو وشدت عليها : علا علا تباني اكلمها
ماشين بطريقهم للسيــآره
تميم بااستغراب : في ايـــش ..
لمى : مدري بس عجبها المكيــآج اللي سويتـــه وقالتلي تبا تتكلم معايا كانت مستعجله ومع الصدمه ماسئلتها ف ايش المهم اني ابا الجوال عشان اتصل عليها
تميم : هاتي جوالك لما نوصل وحخليه معايا متى ماتبي تتصلي تعالي غرفتي وكلميــها
لمى نطت وهيا تمشي : ااااه مرا مبسوطه
تميم : هههههههههههههه