[فيتامين سي]

نزل من الدرج وهومشغول بجواله يقراء المحادثة الي وصلته من خوية شاف أبوه وزوجته ولدها جالسين بالصاله يتقهون علق .. بطريقة مستفزة : اووو العايلة السعيدة مجتمعه اليوم وطالع أبوه وهو يشوف نظرات الاستحقار بعيونه ..قال بوقاحه :على هونك ي ابو مصعب خف علينا ...

ابو مصعب بحده: أجلس تقهوى وخلنا نتكلم

مصعب ابتسم بسخرية :نتكلم في نفس الموضوع يبه كم لنا وحنا نعيد ونزيد بنفس السالفه ...

قالت بدلع ابد ماهو لايق على عمرها : خلاص يكفي ي صقر
خلي الولد على راحتووو

مصعب ميل فمه بسخريه وأشر عليها بتصغير :سمعت قالت خله على راحتووو


طالعه بعصبيه :طيب ممكن أعرف متى ناوي تداوم

ابتسم بوقاحه وأشر على عناد :خلي ولد الجوهره. يداوم بدالي وخليه يشغل شركتك النايمه

عناد بعصبيه:ليه مين قالك اني محتاج اتوظف بشركة ابوك
سكت يوم شاف نظرة العتاب من زوج امه وقف على طول وطلع ....

مصعب بسخريه: وش فيه ولد الماما نفس علينا كذا فجأه
شوفي حل مع ولدك اي شيء يعصب منه هالنفسيه ويقال آلحين عفيف نفس خف علينا بس ....

شافها تناظر ابوه بدون ماترد عليه قرب بوقاحه ....
وهو يأخذ فنجان القهوه من الطاوله ..صغر عيونه :اوه شكل هالمره ماضبط لك البوتكس .. اي والله عندك خد أكبر من خد غبي هالدكتور. رحتي له وهمس بوقاحه أكثر عدليه بسرعه قبل ابو مصعب مايشوف له شوفه ثانيه ترا قلبه فندق ويغيرك بلحظه هالصقر.....وضحك بصوت عالي مستفززز...

ابتسمت مقهوره من ولد زوجها الوقح بس مستحيل تنوله مراده :تطمن ابوك مايشوف غيري ولا لا صقور وابتسامتها توسعت يوم شافت كيف وجهه حمر وعصب ماعوزك تنتصر علي ..

ابو مصعب : الله يخليك لي ...
وطالع ولده بحده وانت اجلس تقهوى مثل الخلق وخلك من الكلام الي ماله داعي ولا توكل الله يستر عليك

مصعب حس بقهر وحقد أكثر يكرها ويكره ولدها المعقد ..
أبوه صار خاتم بيدها وبيد ولدها ....

حط الفنجان بقوه وبعدم احترام وقال بحده:عليكم بالعافيه طلع
وهو معصب بالحيل
بدل مايقهرها قهرته الخبيثه ..لكن هين ي الجوهره ماكون مصعب إذا ماطلعتك من هالبيت ...ركب سيارته وحركها بسرعة جنونيه ...مد يدها ..وأخذ الجوال ودق رقم خويه بعصبيه :تخاوني للبر وأجل المشور الي قلت له عنه بعدين ..

:تم

مصعب : خلك جاهز مافيني انتظرك ...

عادل ابتسم على جنب : اقول مصعب وش مسويه فيك الجوهره ومخليتك تهج للبر بها الحر سكت من السبه القويه الي جته وتقفيل الخط بوجهه ...عض شفته اخخخ وقت ثقالة دمي يالله الحين وش يفهمه هالعنيد اني امزح معه بسرعه رجع دق عليه قفل بوجهه كتب له ((تكفى مر علي ودي فيها ي رجآل هالطلعه )) فتح الرساله وطنش
رسل له مره ثانيه وهو يضحك بخبث((عشان الجوهره طيب))

رمى الجوال وهو عارف خويه مستحيل يروح بدونه صح يزعل ويعصب ...وفيه كل العبر.. بس بسرعه يرضى ... وفعلاً كلها دقايق وشاف رقمه يدق رد عليه وهو ماسك الضحكه : ي هلا والله بهالصوت وينك من زمان عني .....

بعصبيه :اطلع بسرعة ولا حركت وقفل بوجهه
بسرعه طلع يركض وركب السياره ...رد السلام مارد عليه حرك بسرعه وهو مقفله معه عقد حواجبه:وش مسويه فيك
الجوهره معصبتك كذا ...

مصعب وهو صاك على سنونه:عادل بتسكت ولا نزلتك
وبعدين مين الي يقدر على مصعب ماغير فيني طاقه ودي اطلعها بالتطعيس ..بالبر.. والجوهره مابي اسمها ينذكر قدامي ..

عادل رفع حاجب : بحاول اصدقك ي رجآل

مصعب مسك على رأسه : عساك ماتصدق وقف جنب المحطه وقال بضيق : أنزل خذلي دخان و تعال سوق بدالي ..
رأسي يوجعني ...

عادل بحزن على حاله : ليه مسوي بعمرك كذا والله مافي شيء يستاهل تضيع حالك عشانه جالس تدهور عمرك على الفاضي ..
ماغير اتعبت عمرك بهالدخان تبلعه ...

مصعب بطفش : آلحين هالبربره عشان قلت لك أنزل خذلي دخان

عادل طالعه وقال بتردد: ترا علمني منصور أنك طلبت حمود يجيب لك من السم الي يبلعه ولا تنكر مصعب ماراح اسمح لك تدهور حالك أكثر من كذآ

مصعب نزل من غير مايرد عليه واتجهه لمحطه وخذ له دخان وطلع وبسرعه بدلوا أماكن بعض
...وبعد هدوء لمدة نصف ساعه قال بصوت تعبان : ودي اعرف
وش مسويه له ومخليها الكل بالكل لا وجهه يفتح النفس ولا أخلاق زينه ....


عادل طالعه بحزن كان مرجع المرتبه وحاط يده على عيونه هز رأسه على حاله :كل مره تسأل هالسؤال وارجع ارد عليك وأقولك زوجته وش تبيه يسوي بالله أكيـد بيعزها وبنظره مافي مثلها

مصعب ابعد يده عن عيونه وطالعه بعصبيه:زوجته قول ساحرته
إلا هذيك وش فيها ينحب ...

عادل زفر بضيق نفس الحكي يتردد وينعاد كل مره : مصعب كبر عقلك وصفي نيتك وبعدين ماهوأنت خاطب خلاص
ي رجآل خلي ابوك يعجل لك بالزواج وانشعل بحياتك وخلي ابوك بحاله وكاد بعد الي بتأخذها يكون بها خير وتبعدك عن الي ناوي تضر بها نفسك

مصعب ابتسم بخبث :انشغل بحياتي واخلي الجوهره تأخذ راحتها
هذا المستحيل بعينه بتزوج وبسكنها على قلبها ....

عادل بيأس :والله انت حالتك صعبه

مصعب رجع حط يده على رأسه وزفر بضيق: سق وانت ساكت بعض مرات اندم اني أخذك معي يقال الحين جايب الحل قال ايش تزوج واستقل بحياتك ....ابعد يده وناظره بعصبيه وبعدين منصور ال*** متى قالك
عادل ندم انه قاله منصور الي خبره ليته ..ماقاله أسمه ...آلحين بيسوي مشكله مع الضعيف ..
@
@
@
@
@
رفعت شعرها وبطفش :اوف أميره ترا حدي طفشت وبعدين يستاهل ولد الجوهره خليه مايعرف يكسر خشمه غير مصعب
شايف حاله وهو عاله على عمي ..

أميره بضيق من كلام أختها :اقولك ابوي يقول فشله امس بالمجلس والله لو كان غيره كان قام ومسح بخشته الأرض بس مسوي قدر وحشيمه لابوي وعمي ...

الشموخ زفرت بضيق : اف اف هذا كله ليه مصعب رمى كم كلمه على دلوع الماما صراحه مكبرين السالفة وهي ماتستاهل .

أميره بقهر : صدق لايقين على بعض انتي وها المصعب

الشموخ بغرور : اكيد لا يقين على بعض ولا شلون بوافق عليه

أميره ابتسمت بسخريه :الله يستر عليك من هالمصعب لا يرميك بعد تعرفيه ماله أمان ...
الشموخ ضحكت بغرور :وش الي تقوليه يالمجنونه روحي زين
شوفي لك شغله غير المحاماة عن ولد الجوهره يقال آلحين بيجي يخطبك ...والله انه ماهو في هواك ولا هو داري عنك متعبه نفسك ومتعبتني معاك على الفاضي ....

أميره وجهها حمر من القهر ...وقفت وهي معصبه ...من وقاحة أختها ...وطلعت وقفلت الباب بقوه .....

الشموخ بضحكه كلها شماته : باب غرفتي وش ذنبه .. ...
@
@
@
@
@::
وصل مكتبه الخاص .. وهو قرفان .. فتح ملف القضيه ورجع سكره ..ماله نفس يشتغل على القضيه ويركز وهو بهالعصبيه .. ..كل مايذكر... كيف امس مصعب.... فشله قدام الرجاجيل ..واليوم بعد يتمسخر عليه ...وده يعرف وش الي سواه معه .. ومخليه يكرهههه بهالطريقه... وليته يكرهه ومخليه في حاله ..لا مايخلي فرصه غير يفشله .. هز رأسه..افضل شيء أطلعه من رأسي ...واشتغل ...فتح الملف وهو يطالع القضيه الي صعبه بالحيل رن جواله ...رفعه شاف رقم الي موكله ......بيذكره بموعد الجلسه ...أكيد ...زفر بضيق وفتح الخط .....
@
@

@
@
أول ماوصلوا البر طالع مصعب :الجوو حر بالحيل ...الله يسامحك على هالمشوار ..
مصعب طالعه بسخريه ورفع يده يأشر له: وقف وقف هنا بس
...
عادل عقد حواجبه : تنزل هنا لا لا المكان هنا مو حلو خلنا نقدم شوي .....
وانت مزاجك يبي هدوء وبضحكه خايف شوي وتتهاوش مع الي موجودين ....مافيني افك بينكم يكفي الي يصير بالاستراحه كل يوم ...وطالعه بضحكه ي رجآل ليه تدور للمشاكل دواره ..

مصعب طنشه و.فتح الدريشه للأخير وقال بصوت تعبان وحزين :كان تحب البر بالحيل ..وبذات لو جا مطر وماجت هنا تزعل مني وماتتكلم علي لمدة يومين .وتهددني تسحب علي السياره ..طالع عادل بحزن انحرمت من العيشه الي تتمناها كل مره مع رجلها وجت هذي وأخذت كل شيء ....حس بكتمه والضيق يزيد عليه صرخ بقوه .. عادل وقف بسرعة...بنزل ...

عادل وقف السيارة وهو مفزوع...عليه ..لمتى بيجلس كذآ ..
مقدر حبه لأمه بس كذا يعذب نفسه ...نزل بعده وجلس قريب منه وقال بصوت هادي : تبي ترتاح تصدق عنها ولا تجلس تفكر في أشياء راحت وتتعب حالك وبعدين أبوك ندمان والله

مصعب بسخريه طالعه : ندمان وهو مع الجوهره قول مرتاح
سكت وهو يسمع صوت الرجآل الي يصرخ طالع عادل وهو
عاقد حواجبه : وش فيه الله يستر بسرعه فز و تقدم منه وهو
يركض ...ناحيته ...شاف مجموعه رجاجيل متجمعين بمكان واحد قال بصوت عالي : خير ي جماعه وش فيه لفته الاثنين الي ماسكين الرجآل الكبير بالسن وهو طايح على
الأرض ويبكي بصوت عالي ويطالع البئر المفتوحه ....

:ولدي طاح هني تكفى لوعندك خبره تقدر تنقذه
ولا اتركوني أنزل لولدي ...حياة بعد مابيها ....

مصعب بسرعة رجع للسياره .....وهو يركض ...

عادل طالع خويه يركض لجهة السياره أكيد ماقدر يتحمل الموقف أكيد ذكره بأمه يوم ماتت وبذات مع نحيب الرجآل الكبير قال بسرعه : دقوا على الدفاع المدني بسرعه وانت ي عم وشلون تنزل وكاد إنها غميقه ....
صرخ وهو يصيح : قلت لكم حياة بعده مابيها ...فكوني ..

عادل بحزن عليه نزل ومسكه وهو يهدي عليه صرخ بالي حوله : ارجعووا دقووا على الدفاع المدني ..

: دقينا وآلحين جاي بالطريق ...يقول قريب ...

صرخ الشايب بصوته كله : بيموت قبل يجي صدقوني وليدي طفل مايقدر يتحمل فكوني خلوني أنزله وان مات أموت معه

عادل وهي يهدي فيه : ي عم لا تخاف وأحمد الله البير شكله
مهجورو مابه ماء وان شاءالله ماهي غميقه لا تخف ...يوم شاف
زاد بصياحه صرخ وهو يطالع الشاب الي واقف: بسرعه دق شوف وينهم فيه وسكت وهو يشوف مصعب جاي يركض وبيده حبل ......وكاد بعقل صاحبه شيء وش الي ناوي عليه ...

وقف بسرعة وتقدم منه قال بخوف : وش ناوي عليه مصعب
لاتقول ....
مصعب وهو يأخذ نفسه بصعوبه : الي في بالك وابعد عني

عادل بسرعة : مستحيل أخليك تسويها لا تنسى عندك ربوو بتموت والله وباقي ماوصلت له ...

مصعب ربط الحبل على خصره وقال بعصبيه : عادل ابعد عني واسمع الي بقوله لك أنت خلك ماسك بالحبل زين شافه متردد
طالع الشاب الي واقف مثل قلته قال بصرخه: تعال بسرعه خلي فيك فايده وامسك هالحبل زين وانا بطب أول ماوثق الحبل عليه...بسرعه نزل بالبئر شوي شوي .وهو متمسك بالحبل..كان يحس بكتمه وهو توه في البدايه بس تحمل ...عشان يقدر ينقذه قال بصوت تعبان يآرب قدرني .....
عشان هالرجال المسن يآرب لا تفقده ضناه ...أول ماحطت رجله بالقاع فرح ان البئر ماهي غميقه .سمع صوت ون خفيف الدنيا ظلمه بسرعه مد يده وتحسس.. بحذر ويوم تأكد من وجوده ..أخذه بسرعه وحاول يصرخ بصوته كله : اسحبوو الحبل بسرعة .......
يادوب.. يسحبونه حس ان الولد الي بيده معاد له صوت كان يون بس فجأه سكت حس بخوف صرخ بصوته كله: بسرعة تكفون لا
يروح فيها ..حس بتوتر وخوف الدنيا ظلمه عليه والولد مايدري
وش حاله فجأه سكت ...عض شفته وهو يحاول يساعدهم وهم يطلعونه أول ماطلع على صوت صراخهم وبذات ابوه الي أخذه منه وهو يكلمه منهار : يبه يبه رد علي ولدي مات قلت لكم قلت لكم ...
مسك بعادل الي يساعده يطلع بسرعه قال بصوت عالي : لازم نسعفه ....


عادل بسرعة أخذ مويه ورشها على وجهه البزر حس الروح شوي رجعت له بدا يبكي ...ويناظرهم بخوف الشايب صرخ بفرح يوم سمع صوت ولده يصيح : الحمدلله يآرب الحمدلله يآرب ...مد يده ومسك يد أبوه ....وهو يصيح متعور ...بكل مكان بجسمه ..حمله وهو يشوف الدفاع المدني الإسعاف بعد .ركض ناحية الإسعاف وهو يصرخ : تفكون عالجووه ..........

..مصعب وعادل راحوا معاهم للمستشفى ....
أول ماوصلوا ...شافوا أبوه بعده يصيح ...قرب منه مصعب : ي عم قول الحمدلله ولدك طلع منها بالسلامة

: جسمه كله تكسر ...وهو ضعيف وين يقدر يقوى على هالكسور ..
مصعب : ماعليه ي عم قدامه العافية شاءالله وكلها كسور وتجبر...

:وحيدي ماجبته إلا على كبر والله لو صار به شيء رآح أموت
مصعب قرب من عادل وهمس : شوف كيف يحب ولده ...
يالله ليته أعطى أبوي شوي ....

عادل هز رأسه بضيق : مووقتك أبد. ...

قرب من الرجال الشايب وقال بحزن : تطمن ي عم ان شاءالله مابه شيء وحنا معك لما تطمن على ولدك

: الله يجزاكم الخير .وطالع مصعب وهالرجآل السنافي ماطلع من جزاه الله يطمني على ولدي ويبشر بالخير ..
..وسكت وهو يشوف إخوانه وعيالهم جاين قال بصوت حزين : ي ابو بدركان ولدي بيغدي اليوم

ابو بدر قرب منه وضمه: تصبر وانا أخوك ...

مصعب حس بضيق ...مسك على صدره..و.قال بهمس :نمشي طفشت من الدراما......

عادل هز رأسه بزعل من كلامه :روح أنت لحالك انا بجلس بتطمن على الولد . ...
مصعب تحرك من غير مايرد عليه ..راح للسياره .وطلع بخاخ الربوو وأخذ منه جرعه .طالع بكت الدخان وده بوحده تعدل له مزاجه بس وين يقدر وصدره قام عليه ...كح أكثر من مره ..مسك على صدره .وهو يحس بضيق ...نزل المرتبه
وارخى جمسه ينتظر عادل ..قفل عيونه ...بتعب ....يبي يأخذ له غفوه ....وكاد يرتاح صدره يهدا عليه ....بس الوجع زاد مد يده
وأخذ البخاخ وأخذ جرعه ثانيه زفر براحه يوم هالمره جاب معه نتيجه ...رجع قفل عيونه بتعب ...فز على تقفيلة.. الباب طالع خويه ..وقال بصوت تعبان: آيش صار معاهم ....

عادل براحه سند رأسه على المرتبه : ابشرك رأسه سليم بس والله مابقي شيء بجسمه ماتكسر رجوله ويدينه .. والشايب منجن بالحيل ...طالعه مستغراب تصدق توقعت تمشي وتخليني .. ..
ماتوقعت تنتظر ساعتين ابتسم على جنب ..وش ذي الحنيه نزلت عليك ادري فيك قلبك ميت ...اليوم سويت إنجاز قوي بصراحه غامرت بحالك وطمرت في البير وأنت ماتدري ...ان بها ماء أولا. ..وبعد جيت معاهم للمستشفى وآلحين. ..جالس تنتظر ...وماحركت أعرف ان صبرك قليل مره .....

مصعب حط يده على رأسه وضغط عليه بقوه قال ببرود : حرك

عادل :تأمر أمر ..سكت شوي وقال بفضول كم تتوقع عمق البئر يوم طبيت فيها

مصعب عقد حواجبه وقال : اتوقع ماتعدي خمس امتار الحمدلله وهي بهالعمق إلا يمكن كان رحنا فيها انا وهالبزر

عادل : اللهم لك الحمد ..هز رأسه وهو يتذكر صياح الشايب يالله لو صار به شيء اتوقع يموت ..

مصعب : من حقه جابه على كبر يقول
عادل هز رأسه : اي والله صادق جابه على كبر وخاف يفقده موقفه صعب

مصعب بطفش ومزاجه مقفل على الآخر : طيب ممكن أعرف متى بتحرك ....وتفكنا من هالشايب ولده ترا هذا قفل ...وهو
يأشر على رأسه

عادل رفع يده : ارجع انخمد مصعب أبد ماتكمل معروفك ...
وضرب على رأسه اوه لازم أخذ رقمه عشان أطمن على ولده
مصعب بسرعة : ي ويلك تنزل ..

عادل طنشه وفك الباب ونزل .....وهو يقول : دقايق بس ..
.