[فيتامين سي]

ام ياسر بقهر: ليته يسمع كلامي ويخليني اخطب له أمل بنت جيرانا ...وش رايش فيها بالله

نوفه : آلحين بدل ماتصلحي بينهم تقومي تزوديها ..

ام ياسر: صدقيني معاد به صلح هالمره واذكرش ان الطلاق حاصل ياسر من بعد جلسة الجماعه بمجلس ابوها وفشلته قدامهم يهدد لو ماتراجعت عن طلبها ..معاد لها رجعه وآلحين ينتظرها تعقل وتكبر عقلها وبيرجع يكلم الجماعه ويروحون معه ويشوف وش يصير معاهم هالمره ي ترجع ي يطلقها ..ويفكنا شرها هي وأبوها

نوفه بحكمه:ليت مبارك ماكلم الرجاجيل هذاك اليوم وراح لهم والسالفه باقي مابردت ..ليت مخلي الأمور شوي تهجد مثل آلحين قد لها حول الشهر يعني لو راحوا ان شاءالله خيروفيه أمل تطخ عن الي برأسها

ام ياسربعصبيه : من متى حنا نمشي كلمتنا على رجاجيلنا ي نوفه وعساها ماترضى عشان اكسر رأسها ب بنت سعيد والله أتمناها من زمان له ..صغيره وبها الزين ماهو مثل العجيز عفاف لاخلقه ولا أخلاق وهو مستخف عقله عليها

نوفه بعتب: خافي الله ولا تهرجي عنها بذي الطريقه ..وعفاف مافيها شيء ينعاب ...وبعدين لا تحكمي عليها ماقد كملت السنه مع ولدش عشان تعيبي على أخلاقها
ام ياسر بقهر : هذي وماقد كملت السنه وهذي سواتها هي وأهلها والله أحمد الله انها ماحملت وابتلش ولدي معاها

نوفه هزت رأسها بضيق: استغفرالله العظيم


شدن
..طالعت الكتاب بطفش ..اليوم علينا آخر ماده وبكره أخريوم خلاص الحمدلله وتبدأ الإجازة ..ومتشوقه حيل لرمضان ...قفلت الكتاب .وطلعت للحوش تفاجأت بوجود ام ياسر عندنا.افف فاتني وش صار بينهم ي ترا من متى هنا .فتحت عيني بصدمه يوم قالت ام ياسر : هاا بتروحي معي لبيت ام سعيد واخطب أمل لياسر ولا رحت لحالي

نوفه بحده: استخفيتي والله وش خطبه الرجآل يبي مرته وانتي تبينا نروح نخطب له حرام عليش

.جلست اسمع كلامهم .. شدني موضوع ان خالتي تزوجه الله حماس ....مابعده ..ليت تزوجه ويبرد قلبي في ابله عفاف .....بس عاد مالقيتي إلا أمل صغيره مره عليه ...وهو قده شايب كبير عنها ..قربت منهم وجلست ...بس سكتووا يوم شافوني جلست ...عضيت شفتي بقهر ..لهالدرجه معاد فيه ثقه ...

نوفه بحده : شدن ارجعي غرفتش وكملي مذاكره

شدن :كملت الحمدلله
ام ياسر بقهر :طيب روحي شوفي لش شغله ولا روحي للبنات

شدن بقهر .: قولوا انكم تصرفوني وبس ..مديت يدي وأخذت معمول وفنجان قهوة ابي اماطل عشان اسمع نهاية السالفه ....
بس طرت واقفه من صرخه أمي ..دخلت غرفتي ..وانا أفكرفي زواج أمل وياسر ...والله حرام صغيره مره وبعدين صديقتي وطيبه حيل حرام تنظلم بياسر ...

@@@@@@@@@@@@@@@@
@@@@@@@@@
@@@@
@@
@

الرياض
اليوم الثاني
::
::

قفل..الجوال وهو مستغرب. .وش يبي فيهم الشايب ..
طالع مصعب الي مشغول بجواله ..يآربي من يوم نقل لبيت أمه وهو أخلاقه بخشمه ليته يرجع بيت أبو بدل هالوحده ساكن فيها ...وقف وقرب منه وجلس وهمس له تصدق مين الي قفلت منه توو .....

طالعه ببرود : مايهمني
عادل عض شفته بقهر من برود خويه :الشايب داق عليه يقولي أعطني رقم خويك الي أنقذ ولدي ....

مصعب رفع حاجب وقال : هالشايب ماراح أخلص منه صرفه

عادل بحده : وشلون الرجآل طالب رقمك تقولي اصرفه
وشلون
مصعب بطفش : تراك اذيتني ولو رسلت له رقمي ذبحتك

عادل طنشه ...وارسل الرقم ..وهو يطالعه ...ابتسم بخبث
هين والله لاخليه ينشب لك بعد ...وفعلاً كلها دقايق ودق جواله قال بأبتسامه واسعه : مين داق عليك شوف

مصعب صغر عيونه بقهر : لا يكون سويتها وارسلت رقمي له

عادل وقف وهو ماسك ضحكته : الظلم ظلمات يوم القيامة شوف بس مين الله يهداك ...دايم تظلمني
مصعب فتح الخط وهو مقهور : الووو
رد بحماس عليه: السلام عليكم

مصعب : عليكم السلام

: معي مصعب

مصعب أخذ نفس : ايوه مصعب معاك خيرفيه شيء
الشايب بفرحه: معك ابومحمد ان شاءالله انك عرفتني يا السنافي انشهد انك رجال ولد رجآل والله اني ماهو عآرف اجازيك على الي سويته يالنشمي ...

مصعب طالع عادل بحقد آلحين وش يفكه من هالشايب ...قال بطفش: هلا فيك ي عم أكيد عرفتك ..وتسلم واللهو الي سويته واجب واي أحد مكاني بيسويه من غيرتردد ....

الشايب : اسمع ي بوي ولدي بيرخصونه اليوم ان شاءالله
ومسوي عزيمه كبيرة وأبيك تحضرها وآلحين بخلي ولد اخوي يرسل لك العنوان ...ولا جيت لي بنفسي قولي وين مكانك

مصعب قفل عيونه بصبر وهو يتحلف في عادل: اعذرني ي عم مشغول حدي خلها مره ثانيه وابشر بعزك ...

ابو محمد بسرعه :والله ان تحضر ولا زعلت منك

مصعب بعد يحلف عليه عرف انه ماراح يخلص منه وناشب له عض شفته وهو يدعي الله يصبره : تم

ابو محمد بفرحه : آلحين بيرسل لك العنوان وإذا مادليت دق بس وبنفسي اجي يمك وأخذك ...

مصعب بضيق : اوك خليه يرسله وبدل عنوانك ان شاءالله
ابو محمد بترحيب: ي هلا فيك بتنورالديره

مصعب هز رأسه مكانه بعيد وماله مزاج يروح بس ويش يسوي مع هالنشبه : تسلم ي عم وقفل منه وقفز بخفه مسك برقبة عادل: رسلت له رقمي ي ال*******

عادل وهو يحاول يصرخ ماهو قادر :ما رس لتتت له

مصعب بصرخه وهو معصب : ي شيخ بصدقك آلحين

عادل وهو يحس بكتمه : م ص عبب فكككني بموت

مصعب اعطاها بوكس بكتفه وفكه وهو معصب ...

عادل مسك كتفه بالم وهو يصرخ : حسبي الله عليك ي الظالم شايف نفسك انك معضل وتحط حيلك فيني ...

مصعب أشر بتهديد انه بيعيطه الثاني بس على طول صرخ عادل
: روق ي رجآل

مصعب بقهر : ليه أعطيته وانا محذرك

عادل وقف وهو ماسك كتفه بألم : نشب لي وش اسوي كل وقت يدق يقولي ارسل لي رقم السنافي وبهمس مايدري فيك حتى بيت ابوك مطرود منه
مصعب صغر عيونه بقهر وطلع من البيت .وهو يسمع صراخ عادل ..راح البيت أول ماوصل دخل شاف عناد قدامه بالحوش جالس ويكلم صقره الي واقف على يده إبتسم بحقاره وهو يناظر الصقر: تبيع

عناد من غير مايطالعه : الصقر يبي له صقار ...

مصعب عض شفته بغيض: ماعليك وكاد اني أخبر منك فيه

عناد رفع حاجب: الصقور واجد روح خذلك ((لزام ))مابيعه بكنوز الدنيا واعطاه ظهره ومشى

مصعب بسخريه : بعرض عليك مبلغ وكاد تغير رأيك

عناد وقف وقال:قلت كنوز الدنيا كلها ماتغنيني عن لزام
ولو تبي طير حر أبشر بكلم خويي يشوف لك وأحد

مصعب طالعه بسخريه وقال : مابي غيرالي بيدك


عناد رفع حاجب: بعيد عنك ...

مصعب طالعه بحقد ...ودخل البيت شاف زوجة أبوه جالسه قدامه ...ميل فمه بابتسامة كلها حقاره للي قدامه جلس على الكنبه بقوه وقال : وينه صقرك اليوم غريبه دايم جالس معك
الجوهره ببرود وهي تطالع اظافيرها:عاذرته مشغول

مصعب ضحك بوقاحه : ههههه كويس وانتي عاذرته إلا كان بتكون نهايته وخيمه ..

الجوهره بقهر من وقاحته لازم ينكد عليها بس تعرف كيف تخليه يموت بقهره: بسم الله عليه قلبي مايطاوعني الله يخليه لي
ولا يحرمني منه وبمشماته ..قولي وش رجعك أبوك يقول جالس بيت أمك ...

مصعب ببرود ظاهري وهو وده يقوم يفرك خشتها الأرض : على كيفي وقت ماجي أجي عندك مانع
الجوهره طالعته بسخريه ومدت يدها وأخذت فنجان القهوة

مصعب :بقولك عرضت على ولدك سومه طيبه في طيره بس رفض حاولي تقنعيه يبيعه مني

الجوهره ببرود: قلتها بنفسك رفض وشهوله ارجع أكلمه


مصعب رفع حاجب اوه مستقويه مره هي ولدها خلاهم بس مده رجع وهم كذا لا لا طلوعه من البيت ماهو في صالحه ....وقف وقال ببرود : أنتم الخسرانين

الجوهره بخبث :مدام حنا في عز أبوك مستحيل نخسر الله يطول بعمره ويبعد عنا كل شر ومن فيه شر ....
مصعب طالعها بحقد :والله ماغيرك شر
طلع لغرفته وهو وده يذبحها ويريح نفسه منها ...رمى نفسه على السرير ..وهو يتذكر عزيمة الرجآل....زفر بضيق افف آلحين انا فاضي لعزايم ...قفل عيونه بصبر يوم جواله رن ...نزل يده وطلعه من جيب بنطلونه. ..ورفعه شاف رقم عادل ...زفر بقهروهو يفتح الخط : نعم

عادل بضحكه: وش رايك نمشي الحين تعرف يبي له مشوارمكانه وحنا آلحين قريب من المغرب يعني يالله يمدي ..

مصعب عض شفته بصبر: العزيمه لي ولا لك ودي اعرف

عادل : عزمني قبلك امش بالله خلنا نروح والله اني متشفق ودي اشوف البزر كيف حاله ....

مصعب زفر بضيق: الله يصبرني عليك بس يالله اجهز وامر لك قفل بوجه ورمى الجوال ...وجلس ...وهو ضايق ماوده يروح
هالمشوار ...بس عارف ماله خلاص منهم ..أخذ شور ..ولبس الثوب وتكشخ بالشماغ ..ونزل وهو يلعب بالسبحه بيده ...شاف ابوه قدامه قرب منه وسلم عليه
ابو مصعب قال وهو مستغرب من هالاخلاق نزلت على ولده: ماشاءالله والي متغير فيك اليوم

مصعب ابتسم على جنب : ترببت يبه وحط يده على خده مكان
الكف عشان يذكره ..
ابو مصعب وهويتهرب : وين رايح

مصعب : مشوار خاص وهو يطالع الجوهره .....فيه شيء تبي تعرفه أكثر

ابو مصعب هز رأسه بيأس من ولده رفع يده: الله يستر عليك روح ..وارجع لهنا هذا بيتك

مصعب عض شفته بقهر : وهذاك بيت أمي وبيتي ولا نسيت
.

@@@@@@@@@@@@
@@@@@@@
@@@@@
@@@
@@
@
في الجنوب
::
::
:
واقف جنب الإشارة...وهو يفكر ..يحس الأمور تعقدت زود هو راكب رأسه وهي بعد يحس بكرهه للأرض ..بس بعد يحسها عيبه بحقه حرمه تحكمه وتمشي كلمتها عليه ..طالع الجوال يوم وصله صوت المسج ...
مد يده وأخذه فتح المسج فتح عينه بصدمه وهو يقرأ محتواه ((هذي أخرتها ي ياسر تقولي اتنازل عن شرطي وأنت رايح تخطب بنت جيرانكم أمل البزر الله يحرق قلبك مثل ماحرقت قلبي )) مصدوم حده متى راح.. خطب بنت جيرانهم دق عليها يبي يتفاهم معاها ويعرف مين الي قال لها هالكلام قفلت بوجهه ...عصب زود رجع دق نفس الحكايه قفلت ارسل لها ((طيب ردي وخلينا نتفاهم ماهو ترمي كم كلمه كلها كذب وماتكوني قدها))وكلها دقائق
وصله ردها ((ياسرلا تحاول تنكر المدرسه كلها تتكلم عن خطبتك من أمل هذي أخرتها والله وأنا بنت أبوي معاد إني راجعه حتى لو تنازلت عن شرطي ماهو أنا الي تجي على رأسي
مره ولا تدق ماراح ارد عليك)) رمى الجوال بعصبيه واتجههه لبيتهم وهو مقهور حده متى راح خطب ولافكر بعد يتزوج عليها
يموت ويعرف مين الي مطلع هالكلام ..الكذب
@@@@@@@@@@@@@@@
@@@@@@@
@@@@
@@
@

الرياض
::
::

أول ماوصلوا الديره ..استقبلهم الشايب وعيال أخوه وصوت
الرصاص وهم يرحبون فيهم قلطوهم للمجلس الكبير ...والي كان به ..الرجاجيل ...ينتظرونهم ..


عادل أول ماجلس طالع مصعب الي جلس جنبه و أبد ماهو رايق همس له: ياخي فكها شوي عيب الرجآل عازمك وجالس يرحب فيك من وقت ماوصلت وانت ماغيرقالب خشتك



مصعب بهمس: عادل ترا مقفله معي اسكت شوف ذي الزحمه تقول عرس ...غربلنا هالشايب ...

عادل بقهر: انت ماهو كفوو حد يعزمك ويقدرك ...وسكت وهو يمد يده الي يقهويه ..وهمس لمصعب قوم خلنا نسلم على الولد

مصعب .. وقف معاه ورحوا جهة الولد الي ممددد على الكنبه وسط المجلس قرب منه وجلس: كيفك اليوم ي بطل

البزر بخجل: بخير بس هذي باقي تعورني وهو يأشر على رجله المكسوره

مصعب ابتسم له بحزن : ماتشوف شر وهذي يبي لها شوي وتخف ..خلك رجآل ...

ابو محمد : الفضل لله ثم له ي محمد هذا الي نقذك .وقرب منه
وسلم فوق راس مصعب الي أبد ماتوقع ...

ورفع صوته بالمجلس : اشهدوا علي ي جماعه اني عطيت بنتي لهالرجال الكفوو ولا أبي فيها ريال واحد وليت أطلع من جزاه

مصعب طالع عناد بصدمه من الي قاله الشايب همس له : كيف
يقول ماعنده غيرهالولد الحين هالبنت من وين طلعت ....
....
@
@
@
نتوقف هنا ولنا لقاء قريب بإذن الله
نوني
لا ابيح ولا اسامح الي ينقل روآيتي بدون ذكرآسمي ومابيح الي ينقلها على الانستقرام حتى بذكر آسمي
" سبحان الله بحمده سبحان الله العظيم "
" الوتر أحبتي "
الله يرحمك يامن اوجعني فراقك
...