[كاردينيا الغوازي]

المشاركة الأصلية كتبت بواسطة مروة العزاوي

السلام عليكم حبايب طبعا حارد عليكم اثنينكم بنفس البوست اعذروني
اني وصلني حديثكم اكيد وفاهمة عليكم جدا
انتوا الاثنين تكلمتوا وكالعادة تهبون لتحجون وياية وتوضحولي اشياءات وامور اغفلها
طبعا بس احنا نعرف عن شنو دااحجي
انتوا الاثنين اعتبركم اخواتي الروحيات من اول رواية نزلتها وثنيتكم كنتوا مسانديني مشرفة وقارئة
ولحد اخر رواية نفس الوضع وقبل سنوات شهدتوا انتوا الاثنين اسوء حالات وصلتلها وحجيكم بوقتها ولسة محتفظة برسائلكم خليتوني اتراجع عن عمل جنوني والسبب بوقتها شي مايسوى اصلا
بس كنتوا الوحيدات فاهميني وفاهميني سبب تصرفي وقتها
وهنا همين انا وصلني الي تريدون تقولوا وعارفة لو حد ثاني هو المنزل البوست او الرواية كان حديثكم اختلف
والله فرحانة بيكم كلش
نجي للحديث عن البوست....صدقا اتمنى اني اكون شايفة البلد مثل ماشايفي
بعيونكم الان العراق وبغداد ماتشبه الي شايفته عيوني ولا الي حاسته بروحي
من عمر 17 اي من بدات الحرب ولحتى الان وصلت الاربعة والثلاثين ماشفت اي شي من الي تقولوا .....هو موجود بس اني ماكنت محظوظة حتى اشوفة او اعيشه
وتمنيت ويا اتاملت من سنوات وقلت باجر وباجر كلشي يتغير وميفيد
حتقولولي كل العراق شاف الموت والعذاب والتهجير والالم ....معاكم بس
لاتنسون مو كل الناس نفس النفوس مو كل انسان مثل طبعكم والي شايف نص الكلاص المليان
كلامي اعتبرتوا ظلم ويمكن اساءة للعراقيين بس هذا ماكان قصدي وانت الاعرف بية وقلتوها بنهاية حديثكم لكن راي مااجى من فراغ وحكمي مااجى من عدم وسودوايتي ماانولدت بيها ...
في ناس مثلي ماتكدر تنسى اعدام اهلها ودمهم لسة تتخيلة بالجراج في ناس مثلي ماتنسى التوابيت الي شافته
في ناس مثلي ماتنسى هجوم الامريكان وهما نايمين بالسطوح والسلاح على راسهم
انا وصلت لحد من كثر روحتي العزاء وزيارة المقابر تمنيت اني تابوتي يكون الجاي ...اي بزعت من الدنيا
اني مااقدر الان اغير نظرتي هذه من مجرد حديث او اعمار بسيط صار من كم سنة ببغداد
ازيف يوم واضحك بالصور بس حقيقتي الكئيبة تطلع بكتاباتي انا مو بس حزينة بل غاضبة ايضا بداخلي
منو يرجع عمر ال17 و18 والعشرينات الي... هذا العمر الي المفروض احلم واتامل بي اتوظف واتزوج وانجب اطفال
غيري عدوا اي ونسوا او تناسوا الي شافوا وعاشوا
بس الي مثلي مشت وعدت بالمهدئات والاطباء لتنسى ووصلت للموت من سنوات ومااعرف لحد الان كيف نجوت!!
وخسرت من بعدها هواي اشياء تخليني مااقدر اقولكم الخير موجود .....بعديش اجا الخير والامان
بعديش اجا البناء والاعمار والهدوء
بعديش اجا كل الي دكولوه..... بعد سلسلة ماسي ......ذكرياتها ماتروح من بالي مستحيل
الان لو صارت حرب وتكررت الاحداث اقدر اواجهها لان فعلا تعودناوقلبنا مات
بس والماضي من يمحي من راسي!!
اني قبل ال17 كانو يسموني المرحة الان لقبي الكئيبة النحسة.... رافضة اي عيشة رافضة زواج وخلفة حتى لايعانون اطفالي مثلي
اكبر طموحاتي الان هي يظل مزاجي معتدل خلال اليوم لا انتكس بنوبة !!
راح اتكلم عن نقاط قلتوها وانا معكم لانكم صادفتوا هالشي لكن اني ماصادفته للاسف
الجيرة الطيبة ماشفتها الي صادفني جيران اكلوا وشربوا ببيتنا وبعد الحرب اول من باعنا للمحتل
ماكو عائلة وذكريات الي بقى من عشيرتي عم وخالتين والباقي يااما ميت او لاجي يعني حتى ماكو امل اشوفهم
العيد لازم نروح للشيخ معروف "مقبرة "اصلا الاموات عندي اكثر من الاحياء
لارمضان مثل قبل ولا مناسبة مثل الاول ضحكي يستمر بعرس لحظات واحاول اكذب اني سعيدة
وقلتلكم مايفضحني كتاباتي ...كتاباتي هي نظرتي للحياة ويكفي اني ازيف النهايات بامال وسعادة اصلا ماموجودة
اذا البلد اتحسن اعتقد ان الاوان فات لتتحسن نظرتي عنه
في نقطة ايضا عن العشائر بالريف وليش قلت ماكو دين
العشاير حتى مامعطين للمراة حرية ومعتبيرنها مثل الحيوانات حشاكم اي دين ورث مايعطوها مصيرها معروف واستخدامها هنالك معروف ايضا وريس اي عشيرة واولهم عشيرتي مانشوفهم غير وقت المشاكل بس المهم كعدة الفصلية بلكي يطلعون كم مليون.... اي دين هذا الي علمود ديك طفر من مزرعة لمزرعة يكعدون عشاير وياخذون فصلية منهم !!
ووووامور كثير اصلا اني ماتطرقت الها مجرد حكيت عن جانب اخذته بالرواية وهو الدعارة وشرب الكحول
باقي السيئات تركتها مخفية
الزوراء ياام سوسو دخلتها مرة وماعدت حعيدها وركزي قرب السيارات وشوفي شو عملوا الكويلات خلوني اكتئب من حياتي وياريت يتحرجون من العوائل روحي طبي عليهم اوقات المدارس الصبح ولاتروحين من جانب الالعاب
او شوفي هما فديوهاتهم على الفيس او السنابات اصلا متابهين بالي ديسوو هناك
ادخلي جروبات عراقية هما بينشروا هالشي مع انهم عندهم فانز عرب واجانب موجودين بيشيرون صور بنات الليل وارقامهم وفديوهات الشواذ ومايحصل بالمنتزهات وعلى الجسور
ارجع اقول انا موشايفة الي قلتوا ولو شفته ولو قليل اقصد النخوة والدين والشهامة والعدل والطيبة حولي ماكان عانيت اصلا وماكانت كتاباتي حتكون سوداوية وماكنت عشت منطوية وحزينة
ولعلمكم اني مو من النوع يلي يريد يعيش بدولة اجنبية او اعتبر الدول العربية احسن لابالعكس ياما اجت اوقات المفروض نهاجر وانا اول المعارضين انا قلت انولدت ببغداد وحموت ببغداد ان شاء الله ماافرط بذكرياتي الي باقية من طفولتي
لكن قبل مااكون ظلمت العراق والعراقيين اني انظلمت وانتوا انظلمتوا بس مرات اكو ظلم شخصي الانسان وحدة يعانية
حتى ابسط حقوقي انطردت بيها وانهانيت
البلد ظلمني قبل لااظلمه ونبذني قبل لااكون نظرتي هاي عنه
ومع ذلك انا لو راجعتوا اخر كلامي قلت العراق حي بقلبي وبغداد القديمة بخيالي ماتموت
لكن مو الي اشوفهن الان لان اختصار عيشتي بالبلد هي الجحيم نفسه
اني متاكدة انكم تنقهرون لمن تشوفون عراقي يقول هالشي لعد ابشركم
حتنقهرون هواية لان الي مثلي ومثل نظرتي كلش هواية بس انتوا الي مامصادفيهم لسة
كنت اتمنى نكون نفس الراي خصوص انو احنا بلد واحد بس للاسف في ناس
ظروف البلد حطمتهم واستسلموا
وفي ناس قدروا ينجون ويتحدون ظروفهم ويتفائلون خير واقول بالعافية عليكم وعليهم كنتوا اقوياء
اشكركم غالياتي
وعذرا للاخطاء الهواية لان كتب البوست سريعا مااردت اتاخر عليكم بالرد

مروة العراق ابونا .. ابو كاعنا .. ابو الطين الي انخلقنا منه .. وابونا بضيقة شديدة ولازم نتحمل وياه
انا ايضا مريت بظروف حياتي وحياة اولادي تعرضت للموت مباشرة واذا انت شهدت جزء من الماسي فاني شهدتها من الثمانينات وحرب ايران والشباب مثل الورد الي راحت

التسعينات والي صار بيها وانا حامل بابني وزوجي بخطر

والفيات وما ادراك ما الفيات والحرب والخذلان والغضب وموت الحبايب والاحتلال
تدرين شنو فرقي عنك مروة اني عندي قدرة اشوف الطيب وادور عليه

انت الغضب الي جواج مخليج ما تقدرين تشوفيه
كل لمحة خير واصالة بالمواقف الصعبة مسجلتها براسي كل قصة من اقارب واصدقاء وجيران
جيراننا ام محمد لما دافعت عن بيت اهلي لما ارادوا ياخذوه وما خافت وتعاركت وياهم
الشباب الي اخذوا خفارات بعد الاحتلال والانفلات الامني يحمون بيوتنا واحنا ننام بالليل
الناس الي وقفت بالشوارع وتوقف السراق الي كانوا ينهبون دوائر الدولة وترجع السرقات للمساجد حتى احد يستلمها
اصدقاء زوجي الاطباء الي رجعوا للعمل بدون رواتب بس يساعدون الناس
هشام الذهبي اكبر مثال للانسانية وهو يحتضن اطفال الشوارع واقام دور للعجزة
مجموهة هنريك اذا تعرفيها وهو رجل مسيحي يفتر العراق كله يساعد الجميع ويجمعلهم تبرعات
الشباب الي ماتوا بانفجار الكرادة وغزل الشاب بخطيبته قبل ما يروح لقدره
وغيرهم هواية اقدر اخبرك عنهم

ولو اظل اتكلم ما راح اتوقف لان الكلام ما يخلص عن نماذج تشرح القلب وتاكد الخير حيظل موجود لانه سنة الله في خلقه ووعد ربنا ان الارض يرضها عبادي الصالحين


في كل الاحوال مروة رجاء خاص .. ممكن تكتبين عن قضايا سوداوية تشوفيها وتجسديها في رواية وسبق وحنان نقلت قضايا موجعة عن السجون لكن لا توصفين العراق بهذا الشكل التعميمي الظالم لان يهينا جميعا كعراقيين ويبخسنا حقنا
والله والله والله وانا بغربتي هذي العراقيين الطيبين فوق الراس ينحطون وبيهم مميزات ما تلقيها باحد غيرهم
اتذكري احنا بمصاب جلل ولازم نكون اقوياء والصبر والتسامح والابتسامة بوجه الحزن من شيم رسول الله عليه الصلاة والسلام

كل الي اتمناه ان لاتذكري بلدنا الجريح بسوء كافي مصايب الدهر علينا واتذكري كلمتج تأذي وتقتل ايضا والحاقد يستغلها ابشع استغلال والناس مو ناقصة