[فيتامين سي]

رابط لتحميل الرواية هنــــــــــــــــــا

البارت الاول.....

رواية...انا هي جميع نساؤك
بقلمي..نور سمو العراق
💔💔💔💔💔💔💔💔

لا تلوموني...

فقد مللت البقاااء.....

صوتي لا يصل...

وصراخي لم يسمعه احد...

انجدوني ...

ساعدوني...

فالدنيا قد اوقعت بي ...

في كهف مظلم...

في طريق لانهاية له...

انا هي،جميع نساؤك...ابتدئ اول حلقاتها وماتحمل من احزان وافراح ومسرات..تشتعل،داخلها المشاعر وتنطفئ...من الفائز ومن الخاسر ومن المجروح اترك الحكم اليكم احبتي المتابعين....

............ .........

جنت واكفه علئ شباك الفندق بالامام الكاظم عليه السلام...

صار يومين من وصلنه البغداد بعد مااجينه من العماره.. انه ومرة عمي ويانه مرسال من جدي وهو يطلب المساعده من حفيده الضابط

احنه كلشي،ما نندل ببغداد بس،من طلبنه ياخذونه للامام الكاظم عليه السلام بسرعه وصلونه الضريحه زرنه وحجزنه فندق وصار يومين ندور علئ ابن عمي بالعنوان الموجود بالمرسال...وماكوو..ندور ونرجع نبات بالفندق.

سحبت نفس قووي وين چنه وين صرنه...ماتت الحياة بعيني رغم صغر عمري..

الناس الاحبنهم محاصرهم ملك الموت...من غير الراحو...

اختنكت بعبرتي لمن تذكرتهم خليت اديه علئ شفايفي حتئ مرة عمي ما تسمع صوت نحيبي...

تؤم الروح اختي غروومه الحنينه بعد مااكدر اشوفنها ولا احضي بيها...

رجعت بذاكرتي من جنت گاعده انه وياها بالبستان
انسولف على احلامنه البسيطه

جنه كاعدين انه واختي غرام بالبستان والحلال ياكل بالعلف ....

باوعت عليها وابتسمت اختي التوم شحلاتها وچنها بوجهها تعكس صورتي لان انه وياها وجهين لصوره وحده...

گرابتنه اهل بغداد يشبهونه بممثله مصريه مااعرفن اسمها بس اتذكر اسمها فتحيه مدري ابوها اسمه فتحي..

ناويه بس اروحن البغداد اشوفنها بتلفزيونهم عبن احنه ناس عرب وماعدنه تلفزيونات...ولو حلم انه اروح البغداد...

انتبهت الصوت غرام من حجت..خيبه شمالج مبلمه بوجهي شنهي ما شايفه حلوات..

هزيت ايدي ولويت شفايفي ما راضيه بكلامها.. خييبه منيلج حلووه...چنج ذيج الصخله الشاميه...واشرت علئ الصخله

غرام حطت ايدها علئ صدرها بصدمه وگالت...يااا انه اشبه الصخله الشاميه صدگ ماتستحين وچا اذا الصخله تشبهني هم تشبهج لان انه وياج حبايه ومفشوگه ولا تنسين احنه تووم

جاوبتها واني اعفس ملامحي...عله بگلبج چااا انتي اله تلزگين وتجين وياي حتئ ببطن امي مارتاحيت منج كاعده علئ گلبي...

كالت...مو صوجي صوج ابوج وامج...

ضحكت عليها وكلتلها بغرور...بس انه احله منج بهواي..

كالت وهي توكف وتنكت ملابسها...لا احله ولا شي ثنينه نتشابه اصلا انتي لو ما دگيتي برجلج هلال وگمر حتئ امي ماتعرفج ولا تميزج مني...

حطيت ايدي علئ چتفي وانه افركه تذكرت جدي من دكيت وطاحلي بعصاته سواني خبز عروك. كلتلها...خايبه لا تذكريني لحد هسه ما انسئ عصاة جدي...

كالت وهي تنش الغنم وتضحك...جااا اكوو وحده عمرها 15 سنه وبعدها ما متزوجه تروح تدگ دگاگ على رجلها حتئ شباب السلف يباوعون عليج ادري بيج...والله لو جدي كاتلچ بمگوار محد يلومه...

كلتلها بعاند...اول وتالي ادگن ... وبعدين جدي ليش صايبته غيره چي احلئ من جدتي ؟

باوعتلي متفاجئ وتضحك ...انت احله من جدتي ولج جدتي من حسنها وحلاتها جدي سماها حمامه...

ضحكت كلتلها...وانه طالعه علئ هل حمامه..

ضحكتك وكالت...وان شاء لله تلگيلج صگر يصيدج

كتلتها واني احلم بفارس الأحلام...انه اريدنه صاحب چلمه واريدنه مشاعره متوجره..وكون يسمع اغاني ويسمعني چلمات جريئه...

ضحكت كالت...شنهي الكلمات الجريئة؟

ضحكت بخجل ونزلت راسي..يعني يگلي احبنج اموتن عليج انتي كل هلي

ضحكت هم خجلانه كالت..يمه منج ماتستحين اي وبعد كملي شتردينه؟

كلتلها...اريدنه كوون ممثل لو فنان وكون بنات السلف كلها تركض وراه....

غرام بس تضحك كالت...اي وبعد وبعد

كلتلها...وكون من يطلع بالتلفزيون ويسألونه شنهي رأي معجباتك بيك..

يكلهم. ويرد عليهم..هو اكوو معجبات جدام حسن حبيبتي

كملت ضحكتها وشالت الصخله بيدها كالت ...اي ولج شوقتيني كملي...

كلتلها...واريدنه ذكي وفطن ويفشل كل مخطاطتي الرعونيه...من اريد اغورنه...

واريدنه افتخر بي واگول بيني وبين نفسي وجدام الكل...

انا كل نسووانه.....

غرام غمتها بثنين اديها...انهجم بيتج ان شاء لله على هل لفح ...شنهي ليكون انتي بت المعيدي وانه ماادري...

منارس...جااا شنهي بت المعيدي احله مني امداني

غرام...اي والله امداج..خلي اروح اعلف الهوش لا جدي يجيني...

منارس...اكلج غرام صدك شيخ وثاب جاي الديوان جدي

غرام بااستغراب..ياهوو الگلج؟

منارس..اخووي زاهد هو اجه وكال شيخ وثاب اجه الديوان جدي بسيارته من بغداد

غرام بضحكه..هله هله اجه حبيب الگلب

حسيت گبيت نار من گالت حبيب الگلب عطت بوجهه بعصبيه...خاااب،هي لا دكولين حبيب الكلب انه مااحبنه بس جدي لازكلي،بي

غرام ...اي منارس لا تنسين عبن جدي ربطج بي من جنتي صغيره وانتي اله ماتصيرين الغيره

منارس بعصبية...شنهي انه هايشه وربطني بي،انه مااريدنه اتزوجي انتي

غرام بنص عين...وليش ماتردينه

منارس باارتباك...هييج من الله مااحبنه. وبعدين كلهم يكولون عليه صاير شيخ معينه جدي علئ گرابتنه ببغداد وضال يتعيقل ويتعنقر عليهم وفاتح مضيف

غرام...اي چااا هاي،من الزينات..وتره هو هم حلو

منارس..انه اصلا ما شايفته انه من حقي اختار الشخص الاتزوجه..مو بكيفهم يربطوني من انه صغيره بأي واحد

غرام..خاب دروحي العووبه صحلها رجل صارت تحجي مثل اهل بغداد وتتعيقل علينه..

درت وجهي وعفتها تحجي لوحدها..

وهي،اخذت نشت الحلال وراحت تسرح بيهن ..

انه وكفت ورحت ناحيه الشط...جنت لابسه جواريب نزعتهن ولابسه بجامه جوه ملابسي،رفعتها لحد الساق...

فتحت شيلتي،واحس الهواء البارد لفح رگبتي...

دخلت رجليه بمي الشط احس برودته وصلت لعضامي..غمضت عيوني وفتحت. اديه وجريت نفس طوويل...

حسيت بوجود شخص،ثاني شاركني التنفس

فتحت عيوني انصدمت من شفت ذاك الشاب،الي مركز بنظره علئ،رجليه...

نزلت ثوبي بسررعه وخجل ونظراتي مركزه عليه اما هو انتقل بعيونه من رجليه لعيوني .

بعد ما رسم ابتسامه خبيثه علئ شفايفه...

جان لابس دشداشه لونه صحرواي وغتره ابيض واحمر ولازم سبحه من العقيق الاصلي.

بلعت ريگي،من نضراته وعيونه..

جان طووويل حييييل وجسمه جثل...لحيته بي چم شيبه مطشره..

نظراته حييل جريئه ومانزل عينه اببد اني،طبيعي كأي بنيه كسرت نضراتي،ونزلت راسي ولفيت شيلتي..

تقرب اكثر مني واني ضليت بمكاني همس بهدوء وبرود...هلال ونجمه

رفعت عيوني بصدمه وهمست...شتقصد:؟

ضحك وكمل..عجبني الدكاك البرجلج انتي ياهي المحجوزه اليه لو اختها...

نزلت راسي.. لا انه انه انه

كمل بثقه...انتي منارس لو غرام

رديت بسرعه. انه غرام المحجوزه الك

ضحك بثقل..حتئ،لو منارس المحجوزه الي انتي عجبتيني،يا غرام

ضليت ارجف من كلامه وخليت وشلت جواريبي ولبست قبقابي « نعالي » ومشيت من جدامه

هو ضحك بصوت عالي علئ،خجلي وكال بصوت مسموع.. ماعرفتج عن نفسي انه شيخ وثاب،لازم فخذ جبير من اهلج وعمامج ببغداد

درت وجهي،عليه ورديت بسخريه.. ماكوو شيخ بعد جدي،واذا انت شيخ فعله نفسك مو علينه لان احنه شيخنه هو جدي

ضحك وصفك ايده ...ههههه افااا هذا كلام دكولينه الرجلج وتاج راسج وجبيركم بعد جدج

رديت عليه...عمر جدي طويل ان شاء لله ويعيش بكد تراب ابووك الله يرحمه

كال.. اااه لسانج سليط يبنت ابووج جدج هو جدي وجبيرج انه عايش،من خييره لا تضنين مااحبنه بس من هسه جاي اكلج انتي مرت شييخ ال....وراح تصيرين شيخه على الكل.

تركته ومشيت ما حبيت حجيه يحجي بس بالشيوخ والتكبر والتفاخر...

بس،احسن شئ سويته گتله انه غرام ههههههههههه هسه يلزك بغرام ويعوفني...

اي مااحبنه مااعرفن ليش..الزواج مثل الاكله اذا ماتحبين تاكلينها محد يكدر يجبرج عليها.

زين انه ليش مااريدن اتزوجه؟

رجعت جاوبت نفسي..لان انه اكره الزواج شنهي تعاي لازم تگابلينه اربعه وعشرين ساعه وهو كل شويه يبوسج ييييع لعبان نفس..

ضليت اتلفت واني اخاف واحد يسمعني ويشاركني افكاري جدتي وجدي وامي واخوتي لو يدرون هذا تفكيري وصخ وجايف هييج جاا من زمان غسلو عارهم...

يمه اسم لله خليني اروحن لگن الدجاج اوكلنه واشربه ماي لاجدي يجي يكتلني..

رحت الگن الدجاج ودخلت بين الدجاجات اخذت السله وصرت الگط البيض وانتقل بينهن...

رجعت من ذاكرتي و دموعي على خدي شكد جانت الحياة حلووه بعيني ومريحه..

بس اليوم احس عايشه برعب وانه تاركه اهلي واخوتي واولاد عمي محترگين حرگ

غرام لمن اتذكرتهه ماكدرت اكتم عبرتي وصرخاتي

بجيت بصووت عالي وضليت اضرب علئ وجهي وانه انعيها..غرومه سوده بوجهي غررام انه وياج توم متشابهين بكلشي ليش بهذا الشئ ما تشابهنه

فزت مرة عمي بسرعه اجت حضنتني،من وره وهمست بصوت حنون...عمه يمنارس ادعيلهم لا تسوين هييج انه ابني،مو هم وياهم جاا شسوي،اعترض علئ،امر رب العالمين هذا امر ربنا ومابيدنا حيله...ولا اعتراض علئ امره...

درت وجهي عليه واحس العبره تاكل بصدري شهكت شهكه احسها كطعت شرايين كلبي وهمست باانكسار..اختي غرومه؟

جرت نفس عميق ومسحت دموعي...غرام ماي،وتبده ورقتها طاحت الله يعين جدج علئ ماابتلاه..

رديت بعصبية ...بس هو السبب

باوعتلي بحده وعصرت اكتافي..اسكتي هذا الحجي عيب جدج جبير عشيره والصار انتي عارفته غرام انتهت علينه بخوتج والباقين لازم اندور علئ ولد عمج الضابط ونوديله مرسال جدج ونطلب منه المساعده..

جانت الورقه بيدي رفعتها ماعرفت اقراها جنت اتمنئ اقره واكتب بس مع الاسف انه ما داخله مدرسه وحلمي ادرس..

نزلت الورقه وهزيت راسي بأي...

كالت...هاي صار يومين وانه وياج ماخلينه مچان يعتب علينه مارحنه اله حتئ،نلگه المنذر احنه تيهنه الطريق وبغداد جبيره..

منارس..وهسه شلوون

ام جاسم...خلينه نروح للمركز اليشتغل بي

منارس..جااا وين نعرفه..وبعدين انه اخافن من الشرطه اضلن ارعش وانتي تعرفيني شلون من اشوفن شرطي بالشارع شلون اغمض عيوني..جاا شلون تردين تطببيني للمركز؟؟

ام جاسم..بلا عياره جاي شيسولج هو نسأل علئ الولد ونخلي يساعده هناك وادم منتظرتنه وانتي ضاله تتعايرين جاي ياكلج شنهي

منارس بتوتر...خووش چااا نروح

سحبتني،يمهه ونومتني بصفها علئ القريوله..« السرير»...

ضلت تمسح علئ شعري وتسكت بيه وانه ابجي كل شويه مشتاقه لامي واخوتي وغرومه...

احنه عايله چبيره بالعماره وجدي هو جبير هاي العشيره وكل الافخاذ ترجع اله

عدنه ديوان جبير هناك..جدي چلمته مسموعه ومحد يغير رأيه...

انه عندي ثنين اخوان زاهد وعابد وانه وغرام توم وابوي مستشهد بحرب ايران..ببداية الثمانينات انه جنت طفله من مات...يمكن عمري خمس سنوات اكثر اقل مااعرف بس جنت ماافهم من مات ابوي.

امي جانت صغيره من مات ابوي بس ماتزوجت عبن تحب ابووي

وجانت مرة عمي ام جاسم تخاف من امي تاخذ رجلهه منها وجانت مشاكل هي وامي..

بس احنه اولاد العم ابد مابينه مشاكل...

جدي عنده ثلاث اولاد

ابووي مستشهد عنده بس انه وغرام وزاهد وعابد

وعمي ابو جاسم..عنده جاسم وسالم وازهار وبعد ماخلفت كل ماتجيب طفل يموت...

وعمي الثالث هو ابو المنذر...انه بصراحه مااعرفنه بس يكولون جان يداوم عسكري ببغداد وهناك مستقر ودارس اميه وناجح وهو شاطر وضال يشتغل ببغداد بعد ماتسرح من العسكريه..

وحاب بنيه بغداديه من كرابتهم وجدي خاطبها وقابلين من اجت للعماره ماكدرت تعيش وياهم ولا كدرت تتأقلم علئ الوضع..

طلكت من عمي بس عمي حيييل يحبها راح يرجعها كالت ماارجع اله تستقر ببغداد عمي رفض،يكعد هناك وهو جبير ابو راد يطلكها خلعي..

وطلعت حامل بالمنذر ابن عمي...

بعد ماكدر وهو يحبها اخذها حجه بحجتين ورجعها واستقر ببغداد مايجينه مرات جان يجي...

ومن قبل ست سنين عمي مات بجلطه...

جدي تخبل عليه وكال اهل بغداد موتو ابني بدهن السيارات مالهم انه كتله اكل دهن حر..

سوه فاتحه جدي بديوانه ونكلبت الوادم علينه

بس جدي انصدم بالمنذر مسوي فاتحه ومامعترف بفاتحة جدي...

حلف جدي بعد ماتربطه اي صله بالمنذر ولا عايلته وكال حبل الود البينه مات ودفنته..يقصد علئ عمي

وفعلا حبل الود انكطع لا جدي يسأل عنهم ولاهم يسألون عنه..

احنه متعودين عليهم مايسالون بس،جدي جان يروح الهم وكطع وياهم...

الحادثه الصارت بينه هي الي،خلت جدي يتنازل ويطلب المساعده من المنذر رغم يعتبره عدوه بس،لان هو بالدوله وضابط واكيد يكدر يساعدنه

وبسبب الحادثه جدي ماكدر يترك عايلته فدزاني انه ومرة عمي لان امي هم لاحها طشار من الصار...

غفيت ماحسيت علئ،روحي من التعب والقهر الي،صار وياي..

فزيت علئ،صوت مرة عمي وهي تصلي باوعت عليها جانت متوسطه بالعمر والشمس حاركه بشرتها والاسود لابسته...

كمت بسرعه رحت غسلت وتوضيت ولبست عباتي وحجابي وفرشت السجاده وصليت ودعيت لاحبابي

هي باوعت عليه وخلصت لفت سجادتها

واني كملت الفرض ولفيت السجاده كلتلها..صباح الخير

ردت بحزن...منين يجي الخيير واحنه بضيم حالنه

جريت نفس قووي وزفرته...

كالت...حضري نفسج نروح للمركز وبلكي يدلونه عليه ولد الحلال...

حضرت نفسي بسرعه ولزمت الرساله بيدي

طلعنه من الفندق بعد مادفعنه الفلوس...

اجرنه تكسي ورحنه ندور علئ ولد عمي ونسأل السايق اندل المكان الي،بي المركز...

وصلنه للمنطقه الموجود بيها المركز...

انطينه الكروه للسايق ونزلنه...

شفت المركز مطوق بالشرطه وسيارة الشرطه مركونه بباب المركز ضليت ارجف من طبيعي اخاف حيييل من الشرطه

اذكر مره اجيت البغداد انه وجدي لان ابوي شهيد واحنه قاصرين ردنه نستلم راتب ابووي وشفت الشرطي فرفحت من البجي عبالك صرصره وحطت عليه وجدي يضحك عليه والشرطي هم يضحك مااعرف ليش اخاف خووف مو طبيعي من اشوفن واحد لابس الزي العسكري..

دخلنه للمركز سالنه علئ المنذر كالو بذيج الغرفه

وكفنه مقابيل الغرفه دكينه الباب وهو بصوت يخووف ومبين القوه عليه...

كال...ادخل

دخلت مرة عمي وانه مچلبه بذيالها...

ارجف من فوك لتحت..

باوعت عليه فتحت عيوني مصدومه يممه يخووف وجهه كل معانيه خشنه خشمه چبير وعيونه ناطه وحمر وشواربه ثخان حييل جنهن مكناسه ويلمعن سوود وضخم وحواجبه معقووده سود تخوف وسمين وحاط المسدس گباله...

من شفته ترحمت علئ،عمي هذا شافط الهوه كله وخانگ عمي ابو مناخر الطنطل...

شهل ابن عم جنه جني..

بلعت ريكي وصرت وره عمتي...

ام جاسم..السلام عليكم سيدي انه جايه من طرف شيخ صلف...

الضابط بااستغراب..شيخ صلف منو؟

ام جاسم بتوتر...جدك انه جايه من العماره وجدك رسلك مرسال وهو طالب العون ورايدك تكون النه حزام ضهر

الضابط..بس اللحضه وين المرسال اني بحياتي. مسامع عندي اهل بمحافظه ميسان

طلعت الرساله من جنطتي..وانطيته اله بخوف وتوتر وهو جان جامد مايباوع بوجهي..شمرته ورجعت العمتي ملهووفه وعبالك مسويه انجاز عظيم

باوعنه عليه وهو يتمعن بالرساله والخط المكتوب والطلب المطلوب...

نزل الرساله وكال...بس اني مو المنذر المنذر بالغرفه الثانيه

حسيت براحه مو طبيعيه وتنفست باارتياح همزين ماطلع ابن عمي لان شواربه تخنگ وشكله ماحبيته

وكف وحط المسدس بحزامه مشه كدامنه واخذنه لغرفة المنذر

مشينه وراه بهدوء

وهو دك الباب ودخل..

واحنه دخلنه وراه...

الضابط..السلام عليكم

المنذر بدون مايرفع...وعليكم السلام

الضابط...اليوم عندك ضيوف من ميسان

باوعت عليه هو ضحك كال..اهلا وسهلا وينهم

مااكدر اوصف شكله لان مااعرف شصار بيه دموعي صارت تتطافر من عيوني

رغم خوفي،من الجيش بس،بسرعه صارت عندي جرئه وتقدمت همست بصوت باكي...هذا مرسال رسله جدي صلف الك وانه طالبه العون والمساعده لاهلي،وانت المنقذ بعد ربي...

رفع نظره اليه والتقت عيوني بعيونه....

#ايها المنذر
لاتتهاون في احتضان دمعتها الهزيله
وعن احتواء كسيره لجأت اليك
هاربه من مخاوفها ومن صراعاتها
لا تبخل في ان تبث في اعماقها الاصرار والثبات والمقاومه..
فهي ستغزو جميع نساؤك💔

نهاية البارت...يتبع..

كونوا انتم كونوا بخير..احبكم

نور سمو العراق