عرض مشاركة واحدة
قديم 14-06-19, 08:31 PM   #34

Rewayt_dalia
 
الصورة الرمزية Rewayt_dalia

? العضوٌ??? » 446329
?  التسِجيلٌ » Jun 2019
? مشَارَ?اتْي » 80
?  نُقآطِيْ » Rewayt_dalia is on a distinguished road
افتراضي

.
.
.
الجـــــــزء الســــابع والعــــشرون
.
.
.
في الفنـدق
بعد مآوصلو ومر على وصولهم حول النص سآعه
جالس بالصاله وبشته ممدد على الكنب ولسا لابس الغتره مافصخهآ
قام بتردد وفتح بآب الغرفه ويرفع حآجبه بإعجاب ،
طلبت من الي سوت تسريحتها ماتحط مثبت الا رشه بسيطه ولما دخلت الغرفه تروشت ولبست بجآمه هادئه بلون اوف وايت فكت تسريحتها وانسدل شعرهآ بطريقه جميله وفيه تكسرات بسيطه ، مسحت الميك اب كامل وصارت بطبيعتهآ ماحطت اي شي على وجهها
لفت بسرعه لما انفتح الباب وتشوفه وقف متسند عليه ، ارتبكت وضآعت حروفهآ منها ماعرفت تنطق صدت بسرعه التهت باللي قدامها
مشى بخطواته لهآ وقرب منها جلس جنبها ، حرك شعرها وجآبه لقدام وصار يلعب بأطرافه ، ومبتسم على جنب مروق على ربكتها الي مبينه من صدرها يرتفع وينزل من التوتر : كل شي اقدر اوصفه واتكلم عنه الا شي واحد
رفعت راسها له بمعنى وش ؟
مشاري : انتي ، لو اتكلم من الحين لبكرا بكون ماوصفت فيك شي
حست بالجو صار حر ، ومو بس صار حر بدت تحس بكتمه ، حبست نفسها وبنبره اقرب للهمس : شكرا
عقد حواجبه مستغرب من هدوئها وحتى خجلها غريب عليه تعود على طولة لسآنها وتعجرفها ، غرورها ، كرهها العنيف له : خايفه مني ؟
بلعثمه وبصوت بالكاد ينسمع : شـ..ـوي
ضحك عليها بقوه : ههههههههههههههههههههههههه هه شوي !!! ..." ومسك يدها رفعها لعند وجهها " من دخلت وانا ماسكها وماهدت من مسكتها وهي ترجف ...." ويشد على يده اكثر : وش الي تغير ؟؟ قبل اسبوع ماكنتي كذا
سحبت يدها منه بهدوء : مدري ليه خايفه
ابتسم عليها وقام سحبها معه : تعالي تعشي معي
لينا بإندفاع : لااا شبعانه مابي شكرا عليك بالعافيه
لف لها مستغرب : وش فيك ؟ شبعانه وش ماكله بالله ! تعالي يلا وكلي ... وسحبها غصبا عليهآ وراحو الصاله يتعشون
______________________
في القآعه وبعد مانتهى الزواج وعلى وشك يمشون
لين بترجي : تعالو كلكم معنا بيتنا
ريم نقزت : لا تعاللوو بيتنا
ندى : حنا الاكثر عيوني انتي معها كل وحده تجيب قشها وتجي
داليا : صادقه حنا الاكثر في البيت ف بدون نقاش كل وحده تجي
وبعد معآرضات قدرو انهم يغصبونهم ويسحبونهم كلهم لبيت بو فيصـل
.
.
_____________________
بيت بو فيصـل
مسكها من ذراعها بهدوء وتمثيل ويسحبها لبيته : سمحت لك تروحين الزواج بس فلتك مع البنات تنسينها
نوف طاير قلبها : ليييه صاير لي كم يوم ماشفت احد منهم
فيصل يرص على اسنانه : وعسى عمرك ماشفتي احد ، غرفتك يلا
سحبت نفس ماتبي تتجادل معه ومشت من جنبه دخلت غرفتها فصخت عبآتها وجلست بملل على السرير .. ثواني الا وتسمع فيصل يقفل الباب غمضت عيونهآ بقوه وتتأفف بضجرر وملل يذبحهآ
_______________________
عند البنـآت
تجمعو كلهم بغرفة ندى
فرشو لهم في الارض وتسدحو ، غلب عليهم التعب والنوم وماطولو كثيـر الا نآمو
_______________________
عنـد سمر
سكرت من هيا بعد مااخذت موعد ملكتهم بالضبط
و قامت وهي تبتسم بخبث وتفتح درجها وتطلع فلآشات واللاب توب وتحطهم في الارض وتبدأ بشغلهآ
________________________
ثـآني يوم على العصر
لبست فستان نآعم بلون ازرق كحلي يوصل لعند الركبه والاكمام نص ، تركت شعرها مفتوح وحطت غلوس فآتح ومسكرا مكثفه ،
وراحت فتحت الباب الا تلقآه في وجهها
تركت مقبض الباب بسرعه ورجعت لمكآنها ، استغرب وراح لها : وش فيك ؟
رفعت راسها له متوتره : في موضوع بتكلم معك فيه لازم اقول لك اياه
سحب نفس وراح جلس على الكنبه بروآق : اسمعك
صارت تلعب في اصابعها بتوتر : انا ....
.
____________________
بيت بو فيصل
جالسين حول الطاوله ويصفقون ويغنون بحماس لملكة دآليا الي بعد يومين
ودآليا تسلك لهم ومعطيتهم جوهم وتبتسم ببرود
ريم تصارخ : امانه اسمعي بتجلسين معاه كذا يمين بالله ليطلقك من اول ليله
داليا ضحكت : وشو يعني ! اجلس وانا شاقه الضحكه ؟
لين وتأشر عل فمها : اضحكي اضحكي مثل الناس وش ذا البرود
تنهدت وتعدلت بجلستها واتسعت ابتسامتهآ وفكرها ابد مو معهآ .. وتتكلم مع نفسها سرحانه بالطاوله " وش اسمه ؟ كيف شكله وتصرفاته ؟ وش يعرف عني عشان يرضى حت بمرضي الي بيمنعه من الذريه !؟ ايييهه صدق والله من قال الي يبينا عيت النفس تبغيه ، والي نبيه عيى البخت لايجيبه
..........
بعد مامر عليهم حول النص سآعه
نور قامت عند داليا وهمست بإذنها : انتظرك برا لاتبطين علي
هزت راسها لها بـ طيب .. وطلعت نور برآ تمشي بتوتر وكل شوي تلتفت تنتظرها تطلع ومآطلعت ...: اافففف وينـ........ ماحست الا باللي يحط يده على فمهآ ويسحبهـا وهو راص على معصمها ويدخل معها المجلس الخارجي
.
.
_____________________
عنـد نوف
قآمت بملل وتطق الباب : فيصصل ، اففتح لي الباب والله بينجن عقلي من الجلسه لحالي هنآ
تنتظر ثواني وماجاها رد ، طقت الباب بأقوى : ففيييصصصلل ااففتتتح لييي ي خي ماصارت ذي حاله حابسني بين اربع جدران والله انعدمت نفسيتي صرت اكلم نفسي مثل المجنونه ، اففتتحح لي يلااا عآد ياخي سو اي شي ثاني حتى لو تضربني والله راضيه بس لاتحبسني بهالطريقه ،
رفست الباب برجلها وتجلس متسنده عليه وتلم رجولها لعندها وتدفن راسها بين ركبهآ بيأس وقل حيله ،
____________________
عنـد فيصل وسعـود
سعود : اخر شي تفكر انك تسويه هو انك تطلقها
فيصل بيجن جنونه : اعيش معها ليه ؟؟ ماتفهمني ؟ البنت ماتبي مني عيال انت مستوعب ؟
سعود : للامانه ماني بمستوعب هالشي بس ياخي الا الطلاق ماهو ب حل ابد
مرر يده بشعره بثقل وضيق من غير مايرد
سعود بعد تفكير ، فز بجلسته : عندي فكره !!
رفع راسه له مضيق عيونه وبهدوء : وش !
سعود : اسمع ...........
___________________
في الفنـدق
منزله راسهآ وبتوتر : مشآري عجزت اتقبل بداخلي انك زوجي وافهم نفسي ان هذا نصيبي ، والله ماقدرت ، حاولت حاولت اطفرك مني وفشلت ! ولاخر يوم قبل زواجنا وانا ماتمنى هالزواج ابد ،، بس ربي كاتب ان تكون انت زوجي وانت الي من نصيبي ، اوكي ! انت انسان الف بنت تتمناك مافيك شي كامل وماكامل الا وجهه بس شي مو بيدي اني اتقبلك او لا شي خارج عن ارادتي والله والـ...
قآطعها لما قام لعندها وصار مايفصل بينهم شي : وانا قلت من قبل مايهمني اذا انتي تقبلتيني او لا ! انتي دخلتي براسي وحلفت يمين مايكون من نصيبك غيري وغيره ابد مافكرت فيه ، وبعدها عن وجهه وطلع من الغرفه متنرفز من كلآمها
اما هي تناظر الباب بصصدمه عصبت وجلست على الكرسي مطنقره : وش اسوي معه ذاا !! ااافففففف
بصوت عآلي كلمها : البسي عباتك عشآن نروح بيتنا
قامت من غير نفس ولبست عباتها وطلعو رايحين لبيت بو مشآري
________________________
بيـت بو فيصل
رافست برجولها بمحاوله انها تطلع بس جلسها على الارض غصب، رفعت راسها له معصبه : بأي حق هاااه شـ....... حط يده على فمها بقوه يسكتها : ااصصص بتسمعيني للآخر وبعدها بتحكمين بنفسك وانا على قرارك بتصرف !
بعصبيه حاولت تشيل يده من على فمهآ عاند وبيده مسك يدينها ثنتينهم ورصهم ببعض وباليد الثانيه مسكر فمها : اعترف .. انا خاطب واسمها هيا ،خطبتها بالفتره الي عرفتك ان انتي نور الي تكلميني وبصراحه كنت على علآقه بهالبنت ، قبل لاتعصبين ! حاولت وحاولت اني افكك نفسي منها ماقدرت بكل وقت تحاول انها تكلمني وبس والله واقسم بالله اني ماقد مره اتصلت عليها او حتى اني اسأل عليها اتهرب منها بشتى الوسائل وماقدرت ، البنت بكل وقت طالعه بوجهي ، ماكنت عارف وشلون اتتخلص منها ، يمكن مراح تصدقيني لان لي سوابق بهالسوالف بس والله واقسسم بالله وهذاني احلف لك لما تعلقت فيك انتي كرهت كل البنات غيرك انتي وماصرت اسال الا عنك انتي ، بس هذي وكل ماحاولت ابعد عنها تقرب نفسها مني اكثر ، لما عرفتك وعصبت تهورت وقلت لامي تخطب لي وماكان قدامي الا هي ، كنت غبي متهور متسرع ماعرفت اتصرف ولااوزن الامور ومعمي بعد بس هذا الي سويته ! غلطان ، اعترف وراضي باللي تقولينه حتى لو تسبين .. بالوقت الي امي خطبتها حسيت بالشي الغبي الي سويته وصرت ادور طريقه عشان اكنسل هالشي بس ابوي ومثل مانتي عارفته عنده كل شي ولا انه يتراجع بشي يسويه ، رحنا تركيا وانصدمت هناك لما كلمتني الوالده وقالت بيروحون يخطبونها لي رسمي ويحددون الملكه ! كأن احد عطاني كف ودي اصارخ اقول لا وقفو مابيها مابي هالزواج بس ماعطوني مجال الا وبنفس اليوم راحو خطبوها وحددو موعد الملكه ، .... تنهد بضيق لما طاحت دموعها على يده : لاتصيحين !! مابي اشوف هالدموع ، قولي كل الي بداخلك صارخي سبي سوي اي شي ، ،
ردت بصوت مخنوق : ولو صارخت بيتغير شي !
تركي بهدوء ونبرة ترجي : والله اني احاول مابيهاا نورر مابيهاا افهمي ذا الشي ، باقي 5 ايام على الملكه والله ماترك ابوي ولا دقيقه الا ويتراجع بكلمته ولو ماحصل وهذاني احلف لك يمين بالله مااحـ.. " رفعت يدها بوجهه وكأنها تنهي كلامه " ...: منت مجبور ! عيب عليك تنزل راس ابوك بين الرجال
طير عيونه بصصدمه : نوورر !
صرخت بعصبيه : وش تبينيي اقولك !! جيتتتكك اكثر من مره احاول اني اوضح كل شي وانت رفضضت ! ورحت خطبت والحين تقول مابي ؟؟ وش يفيدني بالله كلامك الحين ؟ تحاول تفهمني كل شي الحين وبعدها بكم يوم بتملك على البنت ؟
صررخ بوجهها : ماابمللك عللى اححدد مراح يصييير ذا الشي افههميي
باستهزاء من غير ماتناظره : ليتك فهمتني ، ليتك سمعتني قبل ماتتتصرف هالتصرف كلامك الحين مايقدم ولا يأخر ودامك اعترفت بهالشي بنفسك ، مااقدر اقول غير الله يوفقك
رفع راسه وهو يسحب نفسس ويلف لوين مامشت : نور لاتكابرين وتغلطين غلطتي !
وقفت ولفت له : وش تبيني اسوي ! عموما كنت طالعه انتظر داليا لانها قالت بتقول كل شي وعارفه كل مافي الموضوع والحمدلله سمعته منك عشان ماكون ظلمتك ، ودامك سويته بنفسك .. " بغصه " .. الله يوفقك
..ومشت عنه شوي لقت داليا بوجهها وباين سمعت كل شي ، ابتسمت لها بوسط الدموع المتجمعه بعيونها ، ماتكلمت ومشت لداخل البيت
شد شعره من وراه ومشى رفس الجدار برجله ، ويلف لجهة داليا الي واقفه بصمت : وش فيك !
بنبره كلها بحه ، ضيق وحزن : ياخوي جيتك عون وشفتك تبي تنعان !
تذكر سالفتها وخطبتها المفاجأه ، تنهد ومشى لها ، توه بيتكلم الا ارتمت بحضنه وضمته بقوه : تـعبـ..ـت
مسح على شعرها بهدوء : سلامتك من كل التعب ، يابوي انتي هونيها وتهون
بعدت عنه وجلست على الارض : اذا تشوف اني اقدر اهونها بهونها ، بس وربي ماقدرت
جلس جنبها ومسك يدها بقوه : لك مني وعـد الخطبه ذي ماتكمل وانا اخوك ،
وسعت عيونها بسرعه ولمعت بعينها نظرة فرح : صصددق !
تركي ابتسم لفرحتها : وعد رجال ، ابتسمي انتي بس ،
_______________________
بيـت بو مشـآري
بعد مادخلو وسلمو جلسو مع بعض وجابو الشاهي
ام مشاري صبت لمشآري ومدتها له وصبت لنفسها وتسندت وهي تضحك وتمثل البراءه
مشآري يلف للينا ويعطيها حقته : خذي ، ويفز يصب له ستكانه ثآنيه
انصدمت ام مشاري من حركته وصارت تغلي بداخلها من القهر ، بنفس الوقت الي ابتسمت لينا بانتصار وعجبتها حركة مشاري
بعـد فتره مسك يدها ووقف : عن اذنك يمه بنروح نشوف الجناح
ام مشاري ابتسمت بخبث : اي روحو اذنك معك
وراحو للدور الثالث ويفتح باب الجناح وييننصصدددمم كشر ملامح وجهه بإنزعاج من الريحه
لينا تمشي وهي مكشره : وش ذا ؟؟ حامسين ثوم وبصل بالشقه
عض شفته السفليه مععصصبب وهو يتذكر توصياته لامه
.
.
: ابي المكان كله بريحة مبخره ومعطره تراني بجي بثاني يوم ماني بمطول
.
.
من غير مايناظر لينا سكر باب الجناح وراح يفتح النوافذ ويشغل مراوح الشفط ويطلع الجمرر يحطه على الفرن ويشغل عليه
انقهرت من تطنيشه لها وراحت دخلت الغرفه فصخت عباتها وتروح بتعلقها في الدولآب الا وتنصصصددمم بدولابها المحيوس وملابسها منثره و مرميه بأرضية الدولاب همست منفجعه : عمى ! ليه كذا ملابسي !
انتبهت بمشاري دخل الغرفه سكرت الدولاب بسرعه عشان ماينتبه وراحت تتجول في الشقه وهي ساكته ومرتفع ضغطها من الريحه !
_______________________
عنـد فيـصل
دخل بسيآرته للكراج ، طفاها ونزل ، دخل لبيته وراح غرفتهم طلع جواله ومفاتيحه وجزدانه حطهم على التسريحه ، وطلع رايح لغرفة نوف وهو يفكر بالكلام الي قاله سعود
،
حط اذنه على الباب ماسمع حس ، فتح البآب بهدوء ودخل ميل راسه شوي لقاها متسنده عالجدار ورا الباب ونايمه لامه رجولها
دخل وراح لعندها بهدوء ويحط يده عند ظهرها والثانيه تحت ركبها ويشيلهآ ويسدحها بسريرها بهدوء ويجلس جنبها باطرف السرير ، نزل عيونه على بطنها وبتردد حط يده عليه ويدعي ربه يحفظ له ضناه ، تنهد وقام غطاها عدل وينزل لمستوى راسها ويبوس جبينها بهدوء وخفه وطلع طفى الانوار وسكر الباب
_______________________
عنـد سعود
جهز كل علب الهدايا بشكل انيـيق ، ياخذ القلب ، وحطهم بغرفته بجنب ثوبه الجديد المعلق وشماغه ، يناظرهم بنظره غريبه
فتح اللاب تـوب ودخل ع الموقع وتأكد حجوزاته واموره الي تخص بعثته
وبعدهآ قام يتاكد من اوراق العمليه ومن تاريخهم ويطلعهم يحطهم على الطآوله
جلس على السرير وملتفت لعلب الهدآيا يتنهـد بتوتر وهو يحس بإحساس غريب ، قلبه مو متطمن
______________________
في الليـل ،
غرفة البنات اخر شي جلسو يلعبون اونو وبعد ماتعبو قامو تسدحو وبعد مامر الوقت حول الساعه الا ربع،
وهم متسدحين وبإضاءه خآفته
شوق منسدحه على ظهرها ومرجعه يدها ورا راسها وتناظر السقف بهدوء سرحانه وتفكر بعمق ،
ندى الي كانت تطقطق بالجوال سكرته وانسدحت على جنب وانتبهت لها : بنت ! .. وش تفكرين به ؟
انتبهت ولفت لها : هـ .. ههمم
ندى : اقول وش تفكرين به !
ميلت براسها لندى ، وبصوت اقرب للهمس : احس بشي غريب ! حيل مو قادره افكر بشي غيره
ندى استغربت : بسم الله وشو ؟
انسدحت على جنبها مقابله ندى ، وتناظر بعيونها الكل لقتهم بسابع نومه ، وبتردد : ندوش ، احس اني فاقده نواف .." بتتكلم ندى الا قاطعتها "..: ااصص انطمي لاتتفجعين ! ي خي اهو الانسان الوحيد الي يخليني اعصب و اتنرفز يروق على عصبيتي والله والله يروق ! مقالبه معي ماتخلص وانا بعد ! ، تصدقين بالوقت الي ينرفزني صدق اعصب ويجن جنوني بس بعدين اذا تذكرت كذا اضحك على نفسي وعليه ،
ندى وبنبرة هدوء : اجل وش فيك ذا اليومين عليه مانتي طايقه حتى اسمه
تغيرت ملامح وجهها فجأه ، ورمشت بحركه سريعه ورجعت انسدحت على ظهرها من غير ماترد
ندى باستغراب : اكلمك انا
شوق بهدوء : عشان ابي اكرهه نفسي فيه
ندى انفجعت : اايييي لييييييهه !؟ وش صار ؟
لفت لها : صار شي مقدر اقوله ، بس من بعدها وانا مدري احس اني مختبصه ! ماني عارفه اكون هاديه اذا شفته ، غصب انرفز نفسي واحرق اعصابي عشان اقنع نفسي اني اكرهه ، بس هذا حالي من كم يوم اذا جيت انام يطري على بالي ، احس اني حيل فاقدته ،، " وتتنهد تنهيده طويله " ماش عجزت اكرهه ،
ندى زفرت : لحستي مخي تراك ! والله مافهمت شي ،
شوق بلعثمه قربت منها ومسكت يدها : خآيفه
بإندفاع خافت على اختها : اي من وشوو ياعمري انا قولي وش فيك !
غمضت عيونها بقوه وفتحتهم وهي تشد بيدها على اختها : ابي ابعده عن تفكيري ! مابي افكر فيه مابي مابي
ندى ابتسمت : ووين المشكله !
شوق : لان " وتزفرر بيأس " .. : اااوووفف ندى مدري والله مدري مو. فاهمه وش فيني بس خايفه من تفكيري الزايد فيه
ندى بنظرة شك : تحبينه شوق !
ضرب قلبها بقوه حتى حست برعشه بأطرافهآ ناظرت اختها بشوي خوف : مـ..مدري !
_____________________________
يـوم جديد
بيت بو مشـآري الساعه 12 الظهر
صحت من النوم على صوت الباب الي فجعهآ ، قامت تركض وبسرعه تفتحه وهي تفرك عيونها
ام مشاري طيرت عيونها : لذا الوقت نااييممه !
لينا تنهدت : مانمنا الا على وجه الصباح
ام مشاري بصوت عالي ونرفزه : ومشآري من صباح ربي جالس وش معنى انتي
لينا سحبت نفس : معليش ، راحت علي نومه ، خلاص هذاني صحيت
ام مشاري بتكشيره : غسلي وجهك وصلي وانزلي سوي معي الغدا
طيرت عيونها : ننععممم !!
ام مشاري بسخريه : هاا ان شاءالله يادلوعة ابوك مانتي ناويه تطبخين
لينا رفعت كتوفها : بس ماعرف !!
ام مشاري ربتت على كتفها : وش دعوه ! اعلمك ماهي بصعبه !! .. استعجلي يلا انتظرك
وراحت عنها اما هي سكرت الباب وهي تحك راسها وتدخل الصاله وتنتبه للحاف الي على الكنب والمخده ، وتذكرت البارح
.
.
على السآعه 2 الليل
جالسين في الصاله ومشغلين على فلم مندمجين فيه عالآخر وكل واحد ناسي وجود الثاني جنبه ،
،
بعد ماخلص الفلم
قامت بتدخل الغرفه تنام الا وقفها : طلعي لي مخده ولحاف ابنام هنا ،
لينا لفت له : يكون احسن ... ودخلت طلعت لحاف ومخده وطلعت حطتهم جنبه ،، ومشت الا مد رجله ، تكرفعت وطاحت ع الارض " صرخت " : وووجعع
ابتسم باستفزاز وعدل مخدته وانسدح من غير مايرد عليها
اما هي قآمت وهي متنرفزه : وش ذا الاسلوووب !
مشاري ببرود : مالي خلق ارد عليك روحي نامي
بداخلها " حيوان " .. ومشت دخلت الغرفه وصفقت الباب بقوه ارتاع من صفقته ، عرف انها تبي تنرفزه ، ابتسم ببرود يطنشها ويحرق دمها ،
______________________
بيـت فيـصل
فتحت عيونهآ بإنزعاج ونغزات ببطنها اوجعتها ، قامت وهي عاقده حواجبها بألم ودخلت الحمام غسلت وجهها وتوضت ، طلعت صلت ولما خلصت ، راحت تفتح الباب وكالعآده مقفول ! ضربت الباب براحة يدها ورجعت على السرير وترتمي بقوه ، خلاااااصصص بتنفجر من الملل بتموت من هالعقاب الي فوق طاقتها
قطع عليهآ افكارها النغزات القويه الي رجعت لها ضغطت على بطنها بألم وانسدحت
اخذت جوالها واتصلت على امها ،، وجاها الرد : هلاا ببنتي القاطعه هلا باللي ماتسأل
نوف بتعب : هلا فيك يالغاليه وش اخبارك ؟
ام مشاري : زينه يمه الحمدلله ، انتي وش اخبارك وش اخبار الحمل معك
نوف بخنقه : تعباااننه يييمه
فزت ام مشاري بخوف : بسم الله عليك وش فيك وش تحسين به !!
نوف وهي مكشره : يمه نغزات قويه توجعني حيل ، احس اذا جتني مقدر حتى اوقف
ام مشاري : وفيصل وينه عنك مايوديك للمستشفى
نوف بلعثمه : فيصل ماهو هنا يمه لسا ماجا وماحبيت اخوفه
امها تنهدت : طيب اسمعيني يمه ، خليك مرتاحه لاتتحركين ولاتشيلين شي ثقيل يمه اخاف انك جالسه تشتغلين
نوف انفجعت " اكثر من كذا " : ان شاءالله يمه ، لا ماشتغل كثير
امها بإندفاع : ولاحتى قليل ! مابيك تتحركين يمه توك بالشهور الاولى خليه حملك يثبت
نوف بهدوء : ان شاءالله
انتبهت ام مشاري للينا الي دخلت المطبخ : يلا نوف يمه اخليك انا الحين ، وسكرت من عندها ، حطت الجوال على الطاوله : جهزت لك اللحم عشان تغسلينه ، ابيك تنظفينه زين ، وبعدها اغسلي الرز ، وخليه على جنب ، و.." قاطعتها لينا منفجعه : وش ذا وش ذا !! تراي توي متزوجه توي عروس بحناي !! وش لحمه ورزه الي اغسلهم
ام مشاري ببرود : انتبهي للسانك لايطول ،
لينا: ماطولت لساني ، بس جالسه تكلميني وتامرين علي حالي حال الخدم ! وش دخلني انا باللحم اغسله والخدم اكثر من وحده هنا ؟؟
ام مشاري بسخريه : اذا امك ماعلمتك تطبخين وتصيرين حرمتن سنعه انا اعلمك واكسب فيك اجر ، عجلي علي ولاتكثرين بربره ، خلصي شغلك واذا خلصتي تعالي ، ومرت من عندها وطلعت من المطبخ
حطت يدها على جبينها مفجوعه ماهي مصدقه !!! وش الي جالس يصير ؟ راحت لعند اللحم كشرت باشمئزاز هي من غير شي تكره تاكله هالمره تغسله!
نادت وحده من الخدم تجي توقف جنبها وتعلمها وصارت تغسله وهي مكشره ومضيقه عيونها
.
.
_________________________
في الشـركه
تركي بنفاذ صبر : يايبه انا تسرعت وقلت اخطبوها لي ، البنت ماتصلحح لي يبه ماتصلح
بو فيصل : لاحول الله !! وتوك تستوعب ان البنت ماتصلح ؟؟ ملكتك مابقى عليها الا كم يوم وش اقول للرجال نا
تركي : قل له مافي نصيب الولد هون مايبيها
بو فيصل صرخ : لعب عيال هوو !! تقوله بالساهل ! ماني بمكلم الرجال والبنت الي اخترتها بتاخذها .. لاتجنني انت واخوك
تركي بصوت عالي : يبه ماني بمرتاح لهالزواج افهمنييي ! كوابيس تجيني كواابيسس من افكررر يبه يقبضني قلبي وش فيك مصر برايك كذا ؟
بو فيصل تنهد : لاحول ولاقوه ،، قم اطلع ورح لشغلك والله يهدي بالك وتعوذ من الشيطان مافيه الا الخير
تركي تنرفز وقام طلع من المكتب وهو واصـله معه الايام تقرب وهو مو قادر يسوي شي للحين !!
________________________
على السآعه 2 بيت بو مشآري
دخل مشاري وابوه البيت الا على طلعة لينا من غرفة الطعام وهي تجفف يدهآ وباين عليها التعب .. راحت لابو مشاري وباست راسه لفت لمشاري ناظرته ببرود وبتصـد الا وبحركه سريعه مد يده وسحبها له سلم عليها وباسها بالخد وردت عليه بابتسامه بارده ...: لفت لام مشاري الي جالسه بالصاله : ياخاله الغدا جاهز وحطيته على الطاوله ... " وتلف لعمها ومشاري " غسلو يدينكم قبل الغدا يبرد
قامت ام مشاري : يلا وانتي عجلي تعالي
لينا بهدوء : ماعليه خالتي ماحب اللحم عليكم بالعافيه ... ومشت من غير ماتناظر احد وصعدت الدرج راحت جناحهم دخلت وسكرت الباب وترمي بنفسهت على الكنب وتنهـار بالبكي مقهووورره بتنفجررر من قهرها
.
.
حس بشي غريب صاير من طريقة الكلام بينهم وراح لحقهآ ويوقف عند باب الجناح ويسمع صوت بكيها " تنهد بضيق لما تاكدت له ضنونه اكيد صاير شي " حط المفاتيح عشان يطلع صوت خرخشه ويبين انه وصل فتح الباب ودخل الا ينتبه فيها قامت وتدخل الغرفه ، حط مفاتيحه على الطاوله ودخل الغرفه ، فصخ غترته : افطرتي عشان ماتتغدين ؟
كانت معطيته ظهره وبحده : مو شغـلك ،
مشاري تنرفز : ردي عدل ، ولا ليه احرق نفسي ، مع نفسك عساك ولااكلتي شي
لينا سحبت فوطتها ومرت من عنده دخلت الحمام وصفقت الباب من غير ماترد عليه ،
تنهد وغير ملابسه ونزل يتغدآ
________________________
في الليـل
بيـت بو فيصـل
ووين ماهم جالسين في برا وجالسين على الارض وفارشين لهم وبوسطهم الشاي والحب والحلويات
الا فجـأه
: ههههوووووووبببباااااااااا
لفو بسرعه الا بـ لينا جايه لهم : فالينها من دوني هاااا
اول وحده لين قامت وضمتها بقووه وكانها من شهر ماشافتها : ووحششتينييي يمه قلبييي
لينا : ايه باين وانتي فالتها هناا وناسيتني اصلا
سحبوها البنات معهم وجلست تسولف وتضحك معهم
ندى تغمز : اخبار الزواق ايه ياختي ؟
لينا ومغطيه فمها بورقة الاونو قبل لاترميها : صبري اسبوع او اسبوعين واسأليني لسا بدري
و مر الوقت عليهـم من غير ماتحس ونست نفسها بوناستها
.
.
______________________
بيـت بو مشآري
رجع البيت الساعه 1 ، انوار البيت هاديه وتوحي بان البيت مافيه احد او نايمين ، رآح لجناحه ونفس الشي كان اظلم ، توقعها نآيمه وراح للغرفه شغل الانوار ، السرير مرتب وباين مافيه احد رفع حاجبه ، مستغرب : لينا !!!!
راح للحمام وفتحه مافيه احد ، رفع يده ويلقاها 1 طار قلبه : وين راحت هذي .. ويهرول بسرعه طلع من الجناح وينزل لقى امه بتدخل الغرفه : يييممه
لفت له : نعم
مشاري راح لها : لينا وينها ؟
عقدت حواجبها : و انا شدراني عنها
مشاري استنكر : وش ماتدرين !! ببيت واحد انتو ماهي بالشقه فوق وين طلعت ماقالت لك شي ؟؟
ام مشاري : لا اقولك ماشفتها يمكن طلعت وانا بالغرفه مانتبهت لها
رفع راسه ويزفر بنفاذ صبر ويمشي من عندها وهو يتصل بجواله
اما هي دخلت وهي تبتسم بخبث وتتذكر
.
.
جالسه بالصاله لوحدها الا نزلت لينا ولابسه عباتها ، جت وقفت قريب منها : خالتي انا بروح بيت عمي بو فيصل مع البنات اذا جا مشاري قولي له
ام مشاري : يوه ! وليه ماقلتي له
لينا بعجله : اتصلت عليه مايرد وارسلت له بس للاحتياط قولي له ، يلا عن اذنك وطلعت بسرعه
مدت يدها واخذت بياالة الشاهي : على جثتي والله !
.
.
_______________________
عند البنات
سمعت جوالها يرن وقامت بسرعه اخذته وردت : الوو
مشآري بنرفزه : وينك انتتتيي لهالوقت ههاا وينك ؟؟
لينا ستغربت : بيت عمي بو فيصل وين بروح يعني
مشاري صرخ : وعللىى اي اسسااس تروحين ههااا
لينا بعدت الجوال عن اذنها منزعجه ورجعت قربته : وش فيك قلت لامك تقول لك وبعدين ارسلت لك انا !،
مشاري صرخ : دقايق وانا عند الباب ، ثواني تبطين والله يآويلك ، وسكر من غير مايسمع ردها
كشرت : سمام الهاري الي يسمك ، ولبست عباتها وتنقبت وطلعت له بعد مآوصل
واول ماركبت
لف لها متنرفز : ابي افهم خذتي اذن من منو عشان تطلعين
لينا ببرود وهي تناظر قدام : اولا ارسلت لك ثانيا قلت لامك وثالثا وين انا رايحه ؟؟ تراه بيت عمي
بحده مسك يدها ورص عليها بطريقه توجع : والله لو هو بيت ابوك ماتروحينه قبل اسمح لك
تألمت من رصته وحاولت تفكها باليد الثانيه : كسرت يدي فكني ،
رص عليها اكثر لدرجة شوي وتتكسر عظامها : تنعاد ؟؟
صصرخت بالم : ااتترررررككك !
صرخ بصوت اعلى منها : رررددييي تننعععااااادد ؟
بألم وهي ماسكه يده : لآ خـ..ـلاص
رمى يدها بحضنها وتعدل بجلسته ومشى من غير مايكلمها
واول ماوصلو البيت دخلو شقتهـم وهي موصله حدها من القهر بدلت ملابسها ولبست بجامه سكرت الباب بعد ماطلع وطفت الانوار وانسدحت على بطنها دافنه راسها تحت المخده تبكي بصمـت
_______________________
يـوم الملكـه على المغـرب
بيت فيصل
خلصت وحطت الميك اب ولبست فستآنها الي كان بلون لحمي ماسك على الجسـم بأكمام جبنيز ويوصل لنص السآق
وقفت تلقي اخر نظره على نفسها ، قطع عليها فيصل الي فتح الباب ودخل ناظرها لوهله تنهد وتنحنح : جهزتي ؟
بهدوء ردت : ايه
دقق بالنظر على بطنهآ وراح لعندهآ بوسط ربكتها وتوترها مسكهآ من زندها وباليد الثانيه يمسح بـ يده على بطنها عاقد حواجبه : ليه مو بارز ! ؟
نزلت عيونها تصد بنظرها عنه : لسا بدري توني ،
فيصل يناظرها بتركيز ومتنح : اااممم ، " رفعت عيونها له وانتبهت لنظراته "..: وش فيك !؟
فيصل رفع حواجبه وكانه انتبه وبجفاف : اشيك عليك بس ! يلا البسي عباتك بسرعه
هزت راسها بالايجآب وراحت تجيب عباتها وبعد مالبستها
وطلع معاها لبرآ وقف ورفع صبعه بوجهها : حسك ! اسمع انك متحركه كثير ، صدقيني ماتلومين الا نفسك ، لان اي تصرف بيضرك انتي والي ببطنك مراح افسره بطيب نيه تسمعين
بهدوء وقل حيله : ان شاءالله ، ودخلت لعند البنـآت
_______________________
شقـة مشآري
لبست عبآتها وحطت الغطا على كتوفها وخذت شنطتها وراحت له تدوره ، لقته بالمطبخ واقف يشرب مويه ، وقفت بهدوء عند الباب : انا جاهزه اذا ممكن توديني
ناظرها ببرود رافع حاجب : وليه لآبسه عباتك ؟
لينا رفعت كتوفها ببرائه : لأني جاهزه ،
تنهد وحط الكاس على الطاوله وراح لها بيشيل الغطا من عليها الا شدته وهي عاقده حواجبها : لييه !
سحب الغطا بقوه من غير مايرد وبحركه سريعه فصخ عبآتها ، تنرفزت من حركته : ووشش فيك !
مشاري مميل فمه يناظر فستانها : بتروحين كذا بين الحريم ؟
نزلت راسها للفستان : ليه وش فيه !
قرب منها ورفع يده على الجدار حصرها وباليد الثانيه بأطرف اصابعه يمررهم على كتفها ويمشي بهم الين الكتف الثاني ويهمس : مابغى هذا ينكشف لاحد غيري ! وينزل عيونه يناظر الين وش يوصل ..: حتى انه فوق ركبتك ! ... ويرفع راسه يناظرها بتحدي ويهمس : غيريه ،
طيرت عيونها بعصبيه ..: لا طبعااا مالبسته عشان اغيره ،
مشآري ويعيد بكلامه وهو يدق صدرها بأطرف صبعه : بـ..تـ..ـغـ..يــ..ـريـ..ـنـ..ـه ه
دفت صبعه مكشره : مراح اغيره !! سلامات مافيه شي لبسي لاتجلس تدقق لي كذا
بعد عنها وهو يتنهد رافع حاجبه : خلاص اجل خلك هنا مافي روحه
صرخت منفجعه : ننننععمم !
طنشها ومشى راح الغرفه ولحقته معصبه وتناظره وهو يلبس ثوبه وياخذ شماغه ويلبسه ويحط القلم بجيبه ويلبس سآعته ويتعطر من فوق لتحت ومطنش وجودها !
وراح بيطلع من الغرفه الا صدته سكرت الطريق : ككيف يعني ماروح ؟ فهمني بسس !! ملكة اخوي ترى وش فيك انت
مشاري ببرود : قلت لك غيري ذا الفستان وروحي ولاانطقي هنا
علت صوتها متنرفزه : اااييي مو على ككييفففكك !! تففهم انا لبسي عاجبني مراح اغييررهه
مسكها من كتوفها بقوه وبعدها عن طريقها وقفها عند الطاوله وباستفزاز ، رجع له لها ومسك وجهها يبوس خدها : لاتظلين جوعانه زين يابابا ! ... " مسحت خدها بققرررفف منه وركضت وراه لما وصل لباب الشقه صرخت : خخللااااصص بغيره ،
وهو معطيها ظهره تنهد مبتسم " ولف لها رجع يمشي للغرفه ويفتح دولابها يدور بين الفساتين وهي تناظره ماسكه اعصابها لاتتنرفز وتصفقه ، طلع لها فستان ثاني اكمامه ثلاث ارباع واطول من هذاك ، مسكها وقربها منه وحط الفستان عليها يشوف طوله : اااممم كذا زين خلاص البسي هذا
سحبت الفستان بعصبيه ودخلت تبدل وطلعت وقفت قدامه والشرار يتطاير من عينها : كككذذا ززيين يااخخ ؟؟
بروقان وببرود بيقتلها قرب منهآ يحاوط رقبتها بعناد ويضرب خدها باطرف اصبعه : اسمي زوجك ، مو يااخ ،
شالت يده وبعدت عنه لبست عباتها وتنقبت : ممكن نمششي " وبنبرة سخريه " يازوجي
ابتسم ببرود واشر لها تمشي وطلعو وطول الطريق صاده تهز رجلها بتوتر ، اما عنه يناظرها مروق وعاجبه الي يصير
________________________
بيت بوفيصل ،
الكل مربوش ومحيوس البنات يتزينون ، وام فيصل وام مشاري وام سعود يشرفون على الترتيبات والتجهيزات
.
عن داليا الي كآن فستانها خليجي اخضر بـ تطريزات ذهبيه فخمه من فوق نص كم ماسك على الجسم من عند البطن وفيه نفشه خفيفه من عند الخصر ونازل
ومعه الطرحه الخليجيه الشعبيه الي اطرافها مطرزه بتطريز فخم ذهبي ( ماتكون مثبته في الشعر ، تكون العروس حاطتها فوق راسها وماسكتها )
مكيآجها ناعم مرسوم الايلاينر بشكل عريض وجميل
والروج باللون الاحمر الغامق
.
ماكآن فيه معازيم كثير وكان طلب من داليا ماتبي يجون ناس كثير ومكتفيه بالاهل والاقارب بس وشوي من الجيران ،
______________________
نور وريم ولين ولينا واقفين مع بعض عن البوابه ويستقبلون الضيوف
ريم : والله يعني شوي وبنجلط لما دريت ان سعود هو بياخذها وش ذا الفلم ليه مايبيها تدري
لين بضحكه : جاية له حالة انفصام عجزت اعرف السبب منه يقول مالك دخل
نور : والله حاله ! وش يبي اخوك ذا
لينا : احس اذا شافته انه سعود والله مدري يييممممييي احس شعور مدري كيف يمه جاني بطني من الخوف
________________________
في غـرفة داليا
ام فيصل ماسكه المبخر ومدخلته داخل الطرحه الي كانت فوق راس داليا وتبخرها : ابتسمي !! خلاص عاد ترى مراح يتغير شي اذا جلستي كذا مطنقره
بهدوء : ان شاءالله
لفت ام فيصل لنوف الي كانت جالسه على السرير : وانتي شفيك مطنقره !!
تعدلت نوف بابتسامه : لآعادي مافيني شي
دخلت شوق تركض : يممماااااااهه تترككي واقف برا يقول يلا انزلو يبي دلول توقع !!
.
.
نرجع بالزمن نص سآعه
عند الرجال
تركي منرفز ومتوتر : والله والله لو صار بالبنت شي ياويلكم
فيصل مسكه يهديه : اسسككتت وجع وش فيك ! شدعوه بنذبحها تراه عرس
تركي شوي وينجن جنونه : انت من جدك ولاتستهبل ؟ ماخبري فكرك عن الزواج يكون كذا
فيصل ابتسم وهو رافع حاجبه : لاني عارف انها مابتلقى احسن منه ،
تركي بغضب : وينه عريس التبن للحين ماجا هااا وينه وين اهله؟
..........: اافاااا!! الحين انا صرت عريس التبن ؟
لف مفجوع مطير عيونه بصصددمه ومتنح : هاااااهه ! ششهق مو مستوعب : سعووود !!
،
،
طلعت شوق تركض لما اتصل عليها تركي : هاااهه شفته ؟ كلمته ؟
تركي بخبصه : اسمعي ، رجل اختك طلع سعود ولد عمي !
صرخت بصدمه : وووشششششووووو
سكر فمها بسرعه : وعمى !! رجال وش كثرهم وش له الصراخ كذا
نزلت يدها بضحكه مستنكره : تكذب !! سعود سعودوه ماغيره !!
تركي من بين اسنانه : اي اي وهذا جالسين يعقدون الحين بسرعه طيري وخليهم يجون
شوق بفرح : يااسلاااااام وش ذا الاكششن بتفرح الحيين لما اقولها ،، ولفت بتركض الا سحبهااا بسرعه : هههيييهه بلا طفاقه ! لاتنطقين ولاتقولين لها ، ناديها وخلصنا يلا ذلفي
.
.
.
نرجع لواقعنا
بترجي مسكت جلابية امها : يمممه تكفيين لاترضينها علي تكفيين ،
بحنيه مسحت على راسها : مراح تندمين يمه صدقيني مراح تندمين ، اذكري ربك ويلا انزلي وانتي تمشين اقري اذكارك
ومسكت يد بنتها ونزلو من الغرفه ولحقوهم نوف وشوق
ووقفو عند الباب
جا تركي لهم ومسك الكتآب ومده لها وبذراعه مغطي اغلب الصفحه بحيث مايبين منها شي الا نهايتها
مسكت القلم سحبت نفس وسمت بالرحمن ووقعت بسرعه وحطت القلم ،
تركي وقلبه طاير من الفرح سحبها بسسرعه لحضنه ضمها بقوه وهو ماسك الكتاب : الف مبروك يالغاليه ، تتهنين يارب
بهمس وصوت مخنوق : الله يبارك فيك ، ولفت بسرعه عنه
ومسكتها امها مشت لجهة السرداب
دقآيق بس كانت واقفه وهم يضبطونها ويعدلون مسكتها للطرحه
.
.

الا وتشتـغل زفـة " يــاغـآلـــيـه "
يآغاليه سمي ودخلي باليمين
بيمناچ يافال البنات الصالحآت
يآ غاليه هالليله كل المسلمين
قاريين لچ يآلغآليه المعوذات
.
.
مشت بوسط انظآرهم شاده على اطراف طرحتها ترجف ايدينهآ وعيونهآ تنتقل بين الحاظرين تدور من ممكن تكون امه او اخته !
كل الموجودين تعرفهم زين مافيه احد غريب ، استغربت " معقوله لسا ماوصلو !؟"
وصلت لكرسيها ووقفت بهدوء وبدت ريم تصورها
جت عندها ندى تعدل الطرحه وتحطها بمقدمة راسها همست وهي تدور بعيونها : وين اهله ؟؟
ندى ابتسمت : موجودين !
داليا توترت : وينهم وش لابسين ؟ اي جهه جالسين ؟
ندى خززتها : صصص حين التفت يعررفون نتكلم عنهم اسكتي بعدين اعلمك عنهم
وراحت عنها
اما هي جلست بهدوء ، التفتت وطاحت عينها على ام سعود الي كانت تناظرها بحب وفرح تقرا المعوذات تحرسها بعين الرحمن وتحميها من عيون الحاسدين ، وتحمد ربها مليون مره انها كانت من نصيب ولدهآ
ردت لها ابتسامه بارده وصدت بسرعه لما جا بفكرها سعود رصت يدينها ببعض ونزلت راسها تتعوذ من بليس وتبعده عن تفكيره مايصير تفكر به وهي على ذمة انسان ثاني
.
.
______________________
كآن طالع من المجلس الخارجي ورايح لدورات المياه ومر من جهة البيت وقف يفكر فيه احد او كلهم تحت بالسرداب !!
راح وغسل يدينه وراح من الجهه الخلفيه للبيت ودخل من جهة المطبخ نادى وحده من الخدم وجت له : نعم !!
باستعجال وخايف يكون احد موجود : فيه احد هنا ولاكلهم برا في السرداب ؟
الخدامه : لا كلهم تحت يبي شي ؟
اشر لها بمعنى لا ووقف عند الباب متردد يسوي الي برآسه ولا ،
.
.
______________________
السـآعه 10:30
قامت ام سعود ومسكت ام فيصل وهمست باذنها : سعود يبي يدخل الحين ،
ام فيصل : اي خليه يدخل وين المشكله
ام سعود بفرح : زين اجل انا بعطيه خبر وانتي قولي للبنات والمعازيم يتغطـون
ام فيصل : طيب .... وراحت للبنات : يلا ي بنات تغطو العريس بيدخل
رفعت راسها لامها بسرعه وقلبها صآر يرقع بقووه توترت اختبصت ونادت نوف : نووووفف
نوف بعجله بتروح تلبس : هاهه
وقفت بتوتر : وش يدخل الحين ! تو بدري
نوف وهي تمشي : عرس هو ؟؟ تراها ملكه يلا انا بروح البس عبآتي ، وراحت من غير ماتنتظر ردها
انتبهت حق لين ولينا ماراحو نادتهم مستغربه : وش فيكم مارحتو ؟
لين ضربت جبينها وهي عاضه شفتها : ييوووهه يلا يلا هذا بنروح
وركضو بسرعه لفوق يجيبون عبايتهم


Rewayt_dalia غير متواجد حالياً   رد مع اقتباس