[لامارا]

رشفة عشق
الـعـبـاديـــه
البارت_34_


‏وأشاحَ عنّي بناظِريه مُـعاتِـباً
‏لـمّـا رأى حُسـنـي بـكل وقـارُ..
‏وأتاني مُسرِعاً يقـولُ “تخمّري”
‏إنّــــي وربُّ الـعَـالــمــيـن أغـارُ.
~~~~~~~~~~~~~~~~~~~~~~~~~~~~~~
إيڤان
وصلنا للبيت وردت انزل من السياره . لگيت نبأ واگفه بالطارمه ومنتظرتني انزل ومتخوصره ورافعه حاجبهه ...السياره دخلهه صفاء للطارمه وهيَ تنافخ وتنافس ..
اول مانزلت عاطت بصفاء
- رجعتها بالمبارك بس كون أرتاحيت ..؟؟
صفاء نتر بيهه
- فوتي جوه مااسمع صوتج يلا دي
- لا والله خوفتني
ركض عليهه سحبهه من شعرهه ودخلهه وهيَ غلط وفشاير عليه ماينلبس عليهه ثوب !!
هاي اول يوم مشكله بعدني ماشفت شي !
دخلت للشقه وخليته يضرب بيهه وصوتهه واصل لراس الشارع !
بقيت اتفحص بأرجاء الشقه نظيفه ومعطره مبينه تنظيف جديد ..
رحت لغرفتي وصفطت جنطة ملابسي ..
دخل صفاء وجهه أحمر وعيونه بگصته .. نزع جواريبه بعصبيه ولسانه ماسكت من الغلط عليهه ..
آني عاگده حواجبي ووجهي معفوس واصفط بالملابس بالگاع وهوَ ع الچربايه ..
گال
- إيڤان شما تحچي وياچ لاتردين عليهه خليهه ساكته چلب يعوي ويسكت
آني بحرگة گلبي عطت بيه
- اي والله هيَ عوزهه تغلط عليه وابقى ساكته واباوع عليهه شلون تهين بيه موو هيج تريد صفاء آغا ؟
- لا حبيبي مو هيچ بس خليهه تلغي وتسكت
- اگلك شنـو انتَ ماإلك نيه تطلگها ؟؟
صفن وعيونه تحيرن گال
- هـاا؟؟
- شـنو هـا صفاء طلگهه آني شرطي چان تطلگهه بس بابا گال خطيه والناس شتگول بس آني ميصرفلي الناس لان هيج نماذج تستاهل سم
- ماادري اشوف
وگفت على حيلي وذبيت الملابس من إيدي
- شتشوف مثلاً تريدهه گول خل ارجع من هسه
- يااريدهه يابه مااطيقهه اصلاً بس اسمهه يوغف على گلبي
- اي طلگ وفضنا
- هوَ اطلگ بس يعبر شهرين لان بعدهه عروس خاف يگولون بيهه عيبه
- طزز
- عوفينه منهه اليوم ممصدگ إنتِ يمي يوم عيد
إجه بأتجاهي وفاتح إيديه يريد يحضنني !!
اول ماتقرب يمي طفرت وعطت
- خير خير شكو
- مرتي يابه
- صفاء مااريد لتتقرب تدري بيه حامل
- اسهللج الولاده (ويغمزلي)
عصبت حيل من تصرفاته اقل تصرف منه صاير ينرفزني
دفعته وطلعت للمطبخ إجه وراي احتضن خصري بسرعه وسحبني عليه وحط راسه برقبتي ..
دفعته وتذمرت
- صفاء وخررر
عكد حاجبه وضاج ابتعد وكال
- لتسوين شي اني اجيب جاهز
- مااحب الجاهز
- مو انتي حامل واخاف على ابني يتأذه
- لا مابيه شي الحمد لله حامل مو مشلوله
- بكيفج
خليت اللحمه ع النار وبقيت انظف لان هـٰذا التنظيف ميعجبني احتمال اسراء منظفه ..
سويت الشقه تلمع وطبخت غدا مركة بيذنجان لان يحبهه صفاء ..
صبيت وصحته ياكل ويباوع بيه بنظرات لهفه واني مدنگه بس اشوفه بطرف عيني ..
كمل اكل وگال
- افيشش عاشت ايدج هـٰذا الطبخ مو الطبخ الجنت اكله يوميه والنوب اكثر مرگه احبهه
- بالعافيه
- يعافيج مرتي
ونيت بعدم رضا
- مممم
ضحك وراح سبح ونام ..
اليوم مارحت للدوام بقيت ..
ثاني يوم گعدت من الصبح سويت ريوگ وشغلت قرآن احب استمعله الصبح وحطيت السفره وحضرتله الحمام وملابسه وكويتهن هـٰذا كله خلال ربع ساعه .. اركض منا ومنا ..
كعد تمغط وصبح عليه باوعلي مبتسم كال
- احلى صباح بهيج وجهه
- يلا كوم اسبح تأخرنا ع الشغل
عكد حاجبه وكال
- تأخرنا ؟؟
ياشغل هـٰذا ؟؟
خزرته ولميت يفتي مثل العجايز الخبيثات من يسون هالحركه ..
- صفااااءءء لتسوي نفسك متعرف تعرف كلش زين ياشغل
- ممم ماالج نيه تتراجعين عن هالشرط
- لا مالي نيه كوم يلا هم يله توصلني وتروح لشغلك
تذمر وعكد حاجبه كام مزعوج وشمر الغطه حيل
- اووووووف
رفعتله حاجبي ماراضيه ولميت الفراش وعزلت الغرفه ولحكت ابدل ..
اني من اطلع احط مكياج بس خفيف جنت مااحط بس من الحمل احس نفسي تعبانه ووجهي احس مابي روح ف احط قليل ..
تمكيجت ولبست ملابس مستورات .. طلع من الحمام لگاني واگفه اتعطر ومبدله بكامل اناقتي ..
اول ماطلع ينشف بشعره ووجهه مغطه بالخاولي وخر الخاولي ورفع راسه عليه فتح عينه وانصدم ..
عكد حاجبه واشر عليه من الطول للطول
- شنو هاي
اني كتله ببرود
- شنـوو؟؟
- هـٰذا لبس هـٰذا
بقيت اتمقلج واتدلع بالبغدادي
- لعد شنـو لبس إيش ؟؟
- إيڤان غيري وامسحي
- وات وات وات ؟؟
- يلا إيڤان بسرعه تره احرمج الشغل
- تدري بالشرط ف مو بكيفك
عاط بصوت عالي
- بكيفي يابه بكيفيي اني رجلج وحر تدرين بيه اغار واشتعل غيره من هالتصرفات واللبس وخصوصاً جسمج ماشاء الله ماكو حاجه اگول
بقيت بنفس النبره مال التمقلج كتله
- اني مااگدر ابدل لان تأخرت
- إيڤان احچييي عدددل كافي هيج نبره
- امسح بس الايلاينر
- الحمره اهم شي
- مااكدر اعذرني
- تعالي اني امسحهه (وغمز)
اول ماعرفت تفكيره طفرت
- اني اني امسحهه وخر
ضحك وكال
- يلا
مسحت المكياج كلهوت وتخصرتله
- يلا خنروح
- بعد عباه وياج
- صفاااااءءءءءء
- يلا حبيبتي انتِ بس عباه وبالعياده ذبيهه
- اوفف
لبست عباه وطلعنا للعياده طول الطريق ينافخ ويتأفأف لو بيده يخليني محبوسه بالشقه ..
..
خلصت دوامي واتصل عليه اجاني ومن رجعنه شرطت عليه يفرني بالسياره يلا نرجع ..
وهم صدك فرني واشتره مسواگ للثلاجه مال الحلويات ..
رجعنا للبيت وگتله العصر يطلعني اريد استغل الفرصه واغير من حياتي الى متى باقيه وراه بعد بكيفي اقرر مو حابسني
كتله ماقبل عفست وجهي وبقى يحجي وياي مااحاجيه وزعلت ..
اخر شي استسلم ووعدني يطلعني ..
طبخت دولمه ولفيت سمبوسه وعصاير ومـي للعشا وصارت بالـ6 طلعنا لمنتزه الناصريه العام وفرني ع الشط الاضويه بالليل ومنظر الشط والنافورات النابعه والناس ع الملتمه ع الحشيش وفارشين سفره ويتعشون ملتمين واصوات ضحكهم مرتفعه ..
إضافه لمناظر الاشجار والخضار بكل مكان ..
شفت المراجيح والاطفال اشو اشتهيت اتمرجح .. كلت لصفاء
- صفاء مرجحني
خزرني
- اكيد تخبلتي
تنغوصت ورققت صوتي
- فدوه فدوه خل اصعد تحرك بداخلي احساس الطفوله اريد ارجع طفله
- ترجعين طفله لو تجيبين طفله ؟
- اجيب طفله واسميهه اسونه
- لا يجي يوسف
- اهووو صفاء اسونه والله
- اكلج كولي ليش تجذبين عليه مسويه سونار وشايفته بنت لو بس حجي؟
ارتبكت لان واني ببيت اهلي سويت بس محد يدري بس اني رحت لدكتوره صديقتي وكالتلي بنت
- هـاا؟؟ لا ممسويه
هوَ يعرفني من اجذب وجهي يصير احمر وعيوني مااحطهن بعيونه ..
رفع راسه بإصبعه وكال
- مسويه مو؟؟
همست
- اي
عصر عيونه وكال
- بنت لو ولد؟
كتله بواهس وطفوله وامد بالكلمات
- بنيه صغيرونه تخبل لو شايف شكلهه تموت عليهه اني كزكزت ودي بس اجيب
عفس وجهه وكال بنتر
- يلا كومي خل نرجع ونغير الغرفه
تفاجئت كتله
- صفاء شبيك ضجت تره هوَ رزق من رب العالمين
- لا عليمن ضجت الحمد لله (وتلمس بطني)
- بس شكلك يكول ضجت
نتر بيه
- إيڤان داكول ماضجت ليش تلحين
- علكيفك يابه شگلنه
- يلا كومي
لميت الغراض ورجعنا اول ماوصلنا لف راسه ونام !
ادري بيه ضاج بس ميعترف لان يدري بيه اكله رزق من الله وهوَ صدگ رزق لااعتراض على حكم رب العالمين وبعدين شبيهن البنات ..
غسلت المواعين على كيف خاف يطلعن صوت طگطگه ويگعدنه واتحرك بهدوء ..
دخلت للغرفه طلعت ملابس من الكنتور اريد اسبح ..
من فتخت الكنتور طلع صوت ..
اول ماطلع الصوت فز هوَ وكعد على حيله نتر
- متكولين شخص هنا مطمور
خزرته ورفعتله حاجبي
- اكلك لتنتر هيج تره اني مو دوشگ رزايل عندك
فرك وجهه وكال
- استغفر الله
سحبت ملابسي ورگعت الكنتور بكل قوتي ودخلت للحمام ..
..
طلعت لكيته متمدد .. مشطت ورحت نثرت شعري ع المخده ونمت .
اول ماغمضت حسيت بيه تقرب عليه ..
سحب شعري ويتلمس بيه ويخلي على خشمه ويستنشق بهداوه ..
اني غلست رغم گاعده ..
سحبني لحضنه بهدوء ودفن وجهه برقبتي ونام ..
..
گعدت الصبح بثگل ايده على بطني همست بصوت ناصي
- اخخ اخخ صفاء إيدك
رفع راسه بتثاقل ونعاس من شافني متألمه نظرلي بقلق
- هـاا شبيج ؟
- بطني تأذيني
- اخذج للدكتوره؟
- لا لا بس خل ارتاح إيدك على ثگلهه حاطهه على بطني وتأذيت
بوسني بخدودي وهمس
- آسف حبيبتي آسف خل اخذج كومي بدلي
- هسه اسوي اعشاب واصير زينه
- اني اسويلج بس نامي
- لا لا اني اسويه
- اشـش اني
راح سوه أعشاب وجابه إلي حار شربته وحسيت بإرتخاء بعضلات جسمي وارتاحيت حيل ..
ماحسيت على نفسي وغفيت
..
گعدني صفاء ع الغدا ..
يهمس بصوت خافت خاف يفززني
- إيڤان يلا حبيبتي اكعدي
- مممم
- كومي تغدي
من كال هيج رفعت راسي مستغربه
- غداويش؟؟
- ههههـه طبخت يابه
- صدگ؟؟
- اي والله
- شطبخت ؟؟
- برياني الا بشده
- لا والله صفاء احجي الصدك؟
- يابه والله طبخت كومي وشوفي
كمت مستغربه واشوف الميز مال الطعام مليان اكل ومقبلات وترتيب بطريقه مال مطاعم ..
غسلت وكعدت مبتسمه
اكلت طبخه كلش طيب مثل المطاعم تماماً
كتله
- يجنن شنّو مشتغل بمطعم؟
كال
- طباخ يابه شعبالج
- هههـه بعد انتَ اطبخ بس كول مشتغل بمطعم
- اي من جنت صغير حيل اشتغلت فتره مؤقت
- اكول
- اي يابه شعبالج
- ههـه
كملنا ماخلاني المس العوده كال
- روحي الج اجازه اسبوع لاشغل ولادوام
باوعتله بنظره عود كشفتك
- هـا اگول كاتل روحك بس كون مااداوم
- لا والله بس علمودج واصلاً بعد متطبخين منا لما تجيبين
- ههههـه لا خطيه انتَ
- لا عيوني من اتعب اشتري جاهز اريد اصير ابو بيت
- ودوامك صدك؟؟
- اكعد بالـ7 اطبخ واروح
- لا صفاء تتعب
- معليج يابه معليج
- ههههـه
..
بقيت مااداوم وحطيت دكتوره صديقتي لما اجيب يلا ارجع ..
وبقى صفاء يطبخ ومدللني ماالمس اي شي بس ملابسه اغسلهن واكويهن لان ماخليته واحضرله الحمام قبل لايسبح ..
بيوم نايمه وصفاء طالع للشغل ومركب الغدا ضحكت على دلاله طلعت دلالي اله قاطات ..
بقيت اغسل ملابس واسمع قصيده ومااحس الا الباب اندفر !
ترگع ترگع بالدگه ركضت فتحته واشوف نبأ !!
عطت بيهه
- امو واحد هيج يدك الباب؟؟
رفعت إصبعهه تهديد
- باعيلي لج من اليوم تنزلين تنظفين البيت تخليه يلمع و أي قذاره ماريد
ضحكت بإستهزاء وصوت عالي
- ههههههاي دتتشاقين موو؟؟
- لا صدگ احجي مو خدامين عندج احنه نشتغل وننظف وانتِ كاعده هنا
رفعت صوتي وحچيت بجديه
- اسمعي حبابه اذا تنظفين ف ماتنظفين الا قذارتج ووصخج اني شكو انظفلج كافله بيج قابل وهسه راويني عرض اجتافج
- والله تنظفين
دفعتهه من متنهه
- اطعلي بابا اطلعي
سويت هيج وهيَ مباشرةً سحبتني من شعري واني هم سحلت شعرهه ودنكت راسهه للگاع حيل اول مادنگت صارت بطني مقابيلهه ضربتني بوكس عطت ودفعتني وگعت على ظهري
الدم گام ينزل من بين رجليه وهيَ مباشرةً نزلت تركض ووجهه انخطف
- اخخخخ صفااء وينككك
اريظ ازحف اوصل للتلفون ماكو رجليه بايدات وجسمي نحلان والألم يذبح مااتمناه لعدوي..
بقيت ازحف وعيوني تصب دمع ..
وصلت للموبايل دگيت اسمه وخابرته اشهگ
- صـ.. صـ.. صفاء الحگليي
- هـا عمري شبيج شصاير
- نبأ وگعت إبني
- شششنننووووووو احرگ الدنيا غير
- تتـ.. تعال
- جاي
بعد ماحسيت على شي ..
گعدت بعد فتره طويله على صوت ضوضاء ومستشفى واضويه طاگه بعيني ..
فتحت عيوني صفاء لازم إيدي ومگابلني
اول مافتحت دمعت عينه .!!
انصدمت گتله بصوت متقطع
- لاتگولهه !!
بنتي صاير بيهه شي؟؟
رمش بعيونه وبقى ساكت
عطت
- صفففاااء احجييي
- مابيهه شي شبيج
- جذاب اكيد تريد بس تسكتني
سحب إيدي على بطني وكال
- تلمسيهه
من تلمستهه ارتاحيت وحسيت بيهه
- شصاير بيهه؟؟
- ماكو شي بس رادت توگع وتلاحكنا عليهه سولج ربط
- الحمد لله
نبأ وين؟؟
- طلگتهه بنت الكلب
- خطيه
عاط وخزرني
- إيڤااااان
- اعتذر يابه
اني بيه طبيعه اذا الشخص اذاني مااكرهه ابد احقد عليه اي بس اكره لا ومااتمناله الشر لان متعودين من احنه صغار هيج علمونه اهلنه الدنيا زايله ماكو حاجه للكره والحقد ..
رجعت للبيت لكيتهه نظيفه الحمد لله منظفين الدم ..
بقى صفاء على دلاله الي وجبت بنيه سميتهه يقين لان جان عندي يقين يجي يوم وربي يعوضني بتعبي ..
والحمد لله ..
بعدهه صار عندي يوسف وجان نسخه مصغره من ابوه حتى العيون خضر وابيض گطن وارث البياض مني وحواجبه ثخان وشگر عليه ههههـه بس الشگار لاابوه مو إلي ..
ردت اقفل على بنيه وولد بس رب العالمين رزقني ببنيه لخ سميتهه اسينات ولقبهه اسونه .. ..
~~~~~~~~~~~~~~~~~~~~~~~~~~~~
حـوراء
آخر قرار إلي چان ماارجع لعباس وأيقنت نفسي لعبانه منه ومن تصرفاته بس من إجه خبر گالو تطوع بالحشد تخبلت صح لازم يدافع عن الوطن بس اني مااگدر افارگه لان اليروحون ذوله مستغنين عن ارواحهم وانطوهه فداء للوطن وهوَ هيج فكر بس بنفسه مافكر بيه وبطفلي المقبل ..
إتصلت عليه ميجاوب تخبلت !!
بقيت اتصل تقريبا 400 مكالمه قليل اتصل من 3 العصر لـ12 بالليل مامليت ابدد ولحظه مانهيت الاتصال ينقطع وارجع اعاود ..
بقيت ابجي ودموعي تصب ..
دولي رساله قصيره خلتني انهار
( اني رايح للموت لتتصلين)
بقيت اشهك والطم وازلغ بخدودي اموت بلياه لا اجذب على نفسي والله ..
اتصل الجهاز مغلق عززا !!
اهلي التموا عليه ووجهي صار اصفر وتخربطت ميته وجع ..
امي انطتني عصير برتقال شربته اشو كمت اغفي ونمت محاسه على نفسي طلعت حاطتلي منوم .
..
گعدت الصبح على اصوات اهلي همس !
نزلت ع الدرج واسمع ابويه يگلهم
- شلون نگول الهه خاف تتخربط
رائد .. يابه هوَ يريد يموت خلوه حتى تتندم وتنجر اذنهه ويظل ضميرهه ياكل بيهه
امي كالت .. اني مااگدر اگلهه واشوف بنتي تموت مقابيلي
نزلت ركض من سمعت كلامهم
- ماما شصاير وياه شبيه؟؟
كلهم ساكتين ..!!
عطت بصوت عالي
- احجوو ..
ماكو كلام
بجيت وعطت
- عليكم الله احجوا مات مو ماات؟؟
- لا لا مامات بس تصوب
اغمى عليه وكعدت على ضرباتهم ركضت لبست شال وجبه وكتلهم
- اخذوني هسه يلا
بابا كال
- بعدهم بالمستشفى ماجابوه
- ميخالف اخذووووننيي اتخبل اذا بقيت
ركض رائد حضر السياره وصعدني وصلت لبيت جدو ابجي وحضنت خالتي وبقت تعاتب بيه
- ليـش هيج ولج ليـش شكد راد يشوفج قبل لايروح بس لا يشتشهد وينحرم شوفتج جرحه خطير
- خاله اشش ميصير بيه شي اني ادري وبعد مااعوفه والله
- ان شاء الله مابي شي
بقوا مده طويله يلا اجوا للبيت مايقبل يبقى بالمستشفى يكرهه مايطيقهه اصلاً ..
اجه وياه ممرض يعتني بجرحه صاير بكتفه ..
اول مادخلوا كلنا ملتمين واني واگفه اباوع عليه وابجي
رفع راسه شافني باوعلي بعتب ودنگ اني شبعت بجي ..
بقيت اشهگ ..
العالم كلهه يمنه وتسلم عليه ويتحمدوله واني اريد اروحله وحدي ماكو.
اخر شي خالتي كالت راح اصرفهم كلهم وروحي لان مشتاقلج حيل ..
راحت ورجعت اشرتلي
رحت جسمي يرجف واطگگ بأصابعي من التوتر ..
سحبت نفس ودخلت للغرفه جان ممدد بس كتفه مستقيم ..
دخلت وباوعت بيه خجلانه ودنگت ..
هوَ شافني وجر حسره ..
بقيت واگفه بالباب واطگطگ گال بهمس
- تعالي هنا ( اشرلي على مكان يمه)
رحت يمه صفن بوجهي بنظرات ماانساهه للموت ..
عيونه تحجي عتب ووجهه تعبان
همس
- ميت عليج خفت لااموت ومااشوفج
حطيت اصبعي على حلگه وهمست
- اشششش لتتفاول
- اخخ يابه مشتاقلج كلشش تعالي احضنيني
- كتفك مو زين
- معليج بس تعالي هسه يطيب
تقربت سحبني لحضنه مباشرةً وبقى يطبع بوسات على راسي وخدودي ويشم بقوه
- اخخ عطرج مشتاقله حيللل
- واني هم مشتاقتلك ليش متجاوب عليه
- اشش خلي الماضي ماضي وعوفيني بأبني الكبران
بقى يتلمس بطني ويبوس بيهه فرحان ..
كال
- ترجعيلي مو؟
بسته بخده وهمست
- اكيد بس بعد ماكو ضرب ؟
- اي وعد رجال ودراستج ترجعيلهه بس ها للسادس وخلاص
- امم يلا ميخالف حتى اذا ذبني الدهر عندي شهادة السادس اتعين عليهه
- خوش اني اقريج معهد طبي يابه
- هههه متواضع
- كلشش
- مبين ههه
استمرت حياتنا وعباس ماقصر عليه وبطل عادته مال الضرب وكملت سادس طلعت معدل 70 وگعدت ماكملت كليه لان يغار عليه وهم صار عندي مصطفىٰ مخبلني اني وابوه وكح حيل ومدنفش يخبل خدوده مال عض هههه وحالياً حامل ببنيه
ولهنا وانتهت قصتنا وياكم واكيد ماانتهت حياتنا مستمرين عشناهه بكل تفاصيلهه ومرينا باسوء الظروف ورب العالمين واكف ويانه لان جان مختبرنا واحنه صبرنا وانطانه ..💜
إصبروا فإن الصبر جميل ❤
(ان الله يحـبُ الصـابرِين) صدق الله العظيم

اتمنى استمتعتوا بالقراءه واخذتوا العبره من القصه ..
واترك للابطال المجال يكملون حياتهم بدون تدخل مني ومنكم ..
تتفضلون بره لو لا😂
لا هالمره مااطردكم هالمره بابي مفتوح على هالقصه اللطيفه 👇 تعالو واتشرف بيكم حبيتكم شخص شخص وجانت كل وحده تعلق وتصوت من انزل البارت البعده ابقى انتظرهه وهيج وياكم كلكم احبكم كوممممممااات💜
وياكم اضافه لااخيتي الضلعه بس يزيد حسابهه تنشر قصصهه Aya_Alabadi