[فيتامين سي]

#بنت_المؤمن
شيخ الشباب²
من كتابات زهراء العراقية
#الفصل12

صباح الخير
أقرو الملاحظة بنهاية البارت رجائاً❤

هل تسمعينَ أشواقي
عندما أكونُ صامتا ؟
إنَّ الصمتَ ، يا سَيِّدتي
هو أقوى أسلحتي…
أفضل أن تصمتي وأنت في مملكتي
-نزار قباني
▪︎ياسر
كوثر عزمتهن على العشا

انه رحت بغرفتي ابدل دخلت رقية
- اليوم يوم ياسمين همزين شفتك شفتك
حضنتني من ظهري

-ليش بجيتي اليوم ؟

- خفت خفت عبالي اجت اصيح عليه عليه
لان لان رجعتني ما عبالي ما عبالي
اتريد تعرفني تعرفني هو هو يصير تتعرف عليه؟ لو لو لا

درت أعليها و لزمت وجنتها الطرية بطراوة و ببياض گلبها الرهف

- يصير بس لازم تكول الج تجي وتاخذ اذنج

- بس هي ما ما كالت الي الي

-اي غلطت وانه الها

-لا لا تظربها خطية خطية بتها بتها حلوة تخاف تخاف بس بس لا لا تبوسها بعد بعد

- لا ما ابوسنها

- ولا ولا تنام يمها
اخذ اخذ فراشك ونام ونام يم يم المرة امها

- مو امها خالتها وامي مرت ابوي

لعبت بكذلتها و اشوف ببرائتها الغيرة

- حلوة حلوة بتها

- اي

- شعرها حلو زهراء اريد اريد اجيب الها قراصات عادي عادي ؟

-عادي ..

كنت ماخذها وكاعد على السرير بجيها اليوم جرح مسمعي مارايد الها الاذى بكد حبة الشكر واليوم بجت اهواي ..

-خوش خوش اوصي زينب اجيب الها

-هم زينب
أكلج انت مخابرتها

-اي اي

-بعد لا تعيديها

-ليش ليش ما يصير تجي لهنا؟

-لا،
تجي هنا ميت هلا بيها بس من يصير عدنا شي ما يصير اهلج يعرفوه هاي الامور تظل داخل هذا البيت

- بس بس اني اني اريدها اريدها يمي

- إذا صار شي خابريني انه
وبعد ارد اعليج بس مو كلشي اهلج عدهم علم بيه

-خوش خوش ..

-هسة عادي عادي احجي وياهم لو لا

- ليش لعد لا

-زينب كالت لا تحجين وياهم

بستها وكرصت خدها

-احجي و لا تستحين منهم همه اهلنا .
تعالي ..
خذيتها وطلعت لبرة

ظلت ياسمين صافنه على لبسي تراك بيتي واليوم يومها !

-تعال علي بوية جيب موبايلي من الغرفة

كعدت يم ياسمين
همست
-اطلعين بلاية عملي صايرة

- انه ما اعلية والله امك جابتني

-انه الج بسيطة خل نرجع للبيت

ما حسيت الا راس يمي يسمع و ياسمين ظلت تباوع بسخط لرقية الي حطت راسها يمنا

هم همست رقية مثلي

-لا تضربها حباب

خلت ياسمين تباوع النا بستنكار

- لا تخافين لا تخافين ما يضربج بس لا تعيدها حراام بابا يكول حرام اطلعين من بيتج من غير علم علم زوجج الملائكة تلعن بيج بيج

ياسمين-الملائكة

- اي اي الملائكة اكو اهنا على ايدج اليمنى ملاك
ياسر هاي ايدي اليمنة مو

تأشر على ايدها

-اي

-اي اهنا يكتبون اعمالج اعمالج الصالحة
واهنا اهنا تلعن بيج وتكتب

اشرت على امتونها ، وشفت ياسمين تباوع الها بأستهجان وشرود بمعانيها الصافية....

صاحت كوثر من المطبخ
-رقية رقية تعالي

-اجيت اجيت ...
وكفت
-مو تضربها حباب اوعدني اوعدني

-رقية
روحي عاوني كوثر

-حباب حباب كول وعد وعد خطية خطية

برطمت
-انت ضربتك توجع توجع
ولزمت خدها ...

- وعد يلا بوية روحي

اذتني حيل بهاي حركتها لهسة تذكر ذيج الايام ...طلعت رقية وتاركه اعيوني تتبع اثرها بألم ...

ياسمين

-هاي حقيقية ؟ هي هيج ؟

التفتت عليها بخزرة

-دوم تعيد الكلام ؟

-اظني مو طفل اجذب اعليج لان اخاف منج

- اسفة اعتذر
ما فاهمة حالتها اتصالاتها و دلعها خلاني اخاف عليك تعوفني وتلتهي بس بيها ...

- شفتيها تخاف أعليج لان هي خابرت تحس بالاتأنيب
هاي الي مستغربة منها تحس اكثر منج دخلتي بيتها واجبرتيها على هذا التعارف مالتج...

قاطعتني

- ياسر وحق الله انه ما راضية بس خالتي كالت اغضب اعليج اذا ما رحتي وياي وهي تتكفل حكم طلعتي من دون علمك

كفحت انفاسي بغضب ورحت للمطبخ اشوفهم شنو محتاجين

،
على العشا ظهرت اكثر شخصية رقية لياسمين، شفت بعيونها ندم خاصة بعد العشا اخذت الطفلة منها وكعدت تحاول تمشط شعرها.

كعدت يمها ياسمين

-لميه هيج بالاول

علمتها و سوتها رقية

-هههه صار صار حلو هههه مو مو

-اي عاشت ايدج

كان كلامها وياها بستغراب

- بس رخيها شعرها قصير ما يتحمل
ضب
رختها

-هيج هيج

-اي عشتي

- بتج حلوة حلوة

- شكرا ...علاوي هم حلو

- انت انت حبابة طلعتي اني اني عبالي عبالي ضايجه مني مني

-ليش ؟ اني ببيتج

-مو مو بيتي اجار وياسر ياسر يدفع مو مو بابا ؟

رديت اني اعليها

-ولييج جا اذا ابوج يدفع يصير بيتج وانه لا

ضحكت
-يعني شنو شنو ما فهمت

-هيج هيج

ضحكت من جديد وكعادتها وجهة بشوش ، و باوعت لياسمين

- اني اني عندي علبة كبيييرة مكياج عندج ؟

- لا ماعندي

-ليش ؟

- ما ادري ما احط اهواي مكياج عندي شي لا باس بيه

- بس بس ياسر يحب يحب الحمرة الحمرة عندج عندج

- اي عندي

- لا تاكلين بصل بصل تكول زينب اصير بيج ريحه مطيبة

-منو زينب؟

-اختي اختي الي كلت كلت الج هي احلى احلى منج

-هاااا ؟

يسولفن ما يدرن كلنا نصغي لحوارهن ...

- هي هي احلى منج منج بس بس انت حيل حيل حلوة بس هي ابيض منج؟

-جا هو الجمال بس للبيض

- ما ادري ادري ههههههه
ليش ليش ما ما تلبسين بوشية بوشية

-جنت البسها هسة ذبيتها ما احبنها

- اني اني بابا بابا لبسني لبسني من من مرتضى ضرب ضرب ياسر وهو يتحرش بيه

طلعت جكارة ادخن و مرت ابوي ندستني وكالت
-شنهو متحرش بالبت ولك

-البت صارت مرتي
،
-اي اي جان يدزلي رسايل

كوثر- كومي رقية غسلي استكاين الجاي

كومتها كوثر من يمنا ....
اشوية واخذت مرت ابوي و ام زهراء
لبيتي الثاني ..
دخلنا للبيت هي جدامي شايلة زهراء وانه معتكزة أعلية امي دخلنا للهول كالت امي

- احلفك براس ابوك انه الي خذيتها و هي خايفة منك ما رادت تروح بلاي علمك

تسمعني يمة شو تحك بحليتك

-ليش هيجي سويتي يمة

تطلعين مرتي بلاية علمي

- لأجل أريحك يا يمة هيجي احسن
شافت وضع مرتك راح تقدر وهمين لازم يا يمة بينهم مودة لا تسوي الي سواه ابوك بيني وبين امك الرجال بيده يصلح حال نسوانه بلاية ما يظلم وحده بيهن وبيدة يگلبهن وحوش بينهن

كعدت تعبانه وانه وكفت اسمع كلامها

- مرتك شفنا وضعها البنية من اهل الله بسرعة تنكسب بعد الي صار شفتها اشلون تعاين لياسمين و ياسة كلبها ابيض شفتها اشلون تغيرت وخنست
موش احسلك هسة راح ترتاح من نجة ولحة ياسة اعليك متعبتك ...هسة شافت وقدرت هذا الي ردته

شفت نظريتها بيها أصحية

ردت اطلع كالت
-لا تحاسبها يا يمة خطية

رحت للغرفة بس دخلت اخذت ملابسها
وخاولي اتريد تطلع، سديت الباب و فريت المفتاح ..

- عبالج كلام خالتج كافي يشفع الج

-بس والله كلامها صحيح اني هسة ارتاحيت

- وانه شايل منج طلعتي من غير اذن رجلج

سكتت

- هاي المرة راح اسكت عنج لخاطر خالتج ... بس ترة ما راضي اعليج و الملائكة سجلت لعناتها اعليج طالعة من الباب و وليج ما يدري ...

-خرب كلام رقية
لا عفية ارضى عني شعندي غيرك انه

- والله ما راضي ولا راح ارضى

رادت تحجي فتحت الباب وطلعت راجع لبيتي الثاني وهو اليوم ليلتي يم ياسمين ...

ظليت اروح للشغل وارجع لبيتي (بيت رقية ) زعلي جايد حتى ما تعيدها وتستغفلني هي وامي....
ادز مسواك بيد صبي من صبياني ..
أسبوع وعفيت عنها لكيتها اتريد رضاي
،،

بصبحية رحت اشوف خليل بمحلة

لكيته وية العمال يشتغل واكف على الحساب .. ويمة صاحب محل ياخذ بضاعة كبيرة وهو ملتهي وياه
لزمت ذيل شعرة( شعرة شادة للخلف)

وخرة عن ايدي

-اكعد ياسر جايك هسة
حسين جيب نفرين جاي
ولك
جيب جاي عوف الكراتين

كعدت انتظرة

اجه يمي ساحب كرسي وكاعد اعليه بعد ما خلص ويه الرجال

- ها اكلك هذا الزيت البارحة استلمته

- لا اخوك خذاه انه ما عندي مجان بالمخازن
صدك مبروك الله يتمم على خير

-الله يبارك بيك

-جيب المرة وتعال تغده يمنا اليوم

- يم اهلها المرة

-بعد حبلت شخلصك هههههه

-خليها يمعود مرتاح
بس يالله اخ راسي اخ ظهري وانه المبتلي

-جنك بعدك ما مرتاح

-شرتاح يمعود طفلة وامي كربصتني بيها وانه مدري اشبيه انعميت
شكول الها تكعد تبجي
خليها سكته يمعود لا يسمع واحد...

اي شخباركم

-انه ما عندي اخبار جديدة
صدك الخبر هذا صحيح بت عمك انخطبت (رسلان)

- اي

خابرتني اهنا شهد

- ها
-السلام عليكم
-وعليكم السلام !
- اني ببيتك هسة يم رقية
-اشبيج تبجين؟
-اي اني زعلانه يمك

عفتها تبجي وسديت الخط واترخصت من خليل ورحت للسيارة راكنها يم محلاتي....

دخلت للبيت ادور اعليها

لكيتها بغرفة كوثر

كوثر
- كلت الها لا تخابرك

- شهد شصاير ليش زعلانه ؟

- ما اريده بعد
ما دامه هيج....

-شنهو صاير

كوثر - اختك حامل وتعارك وياها رجلها ما يقبل تحبل هسة

-وليش هيج سويتي مو كايلة الج الطبيبة ارتاحي على الاقل سنة

- ياسر بعد صار غصبا عني

- وليش زعلتي

-هو جابني يكلي ظلي لا ترجعين من يطيح تعالي!

عفتها ورحت ورثت جكارة بالهول ..
كاعد على الارض تارك الجلسة واسحب انفاس منها

اجت كوثر
- ها شراح اسوي

-شسوي؟

-ما تخابر رجلها تفهم منه

-مرة ورجال متعاركين انه شنهو

- طاردها

- بينهم عركة يطلع حجي منه نازل وصاعد اذا هو خابر او اجه الي حجي وياه وهاي افهمي شنو جافصة وياه ما يجيبها هيج مرتضى الا تدوس ببطنه الا يطلع من طورة ..

- شفهم بس تبجي خليها تهدأ
اروح اسوي غدة هسة

-وين رقية

-بالحمام
تحتاج ساعة الا تطلع
علاوي بغرفة امه يلعب ويه جهالي

▪︎ زينب

ضميري أنبني اروح اشوف امي حبيبتي ضوجتها البارحة

شفتها ماهي بغرفتها الصبحية وين رايحه .. دورتها بالبيت لكيتها بالحديقة يم شجر البرتقال والنبكة كاعدة على كرسيها وتقرة دعاء ...

-ماما تردين اسوي الج عصير ليمون

سدت الكتاب

- باجر ابوج كال اخر يوم ويبلغهم بعدم موافقتج

يا بتي ما غيرتي رايج ما الله هداج

-اصلا ما فكرت ابد
خليل ما اخذتي رأي بيه وانت تدرين ببتج عدها ميول اله
مو ردتي اتقرب منج اسولف الج هواي
سولفت وانت درتي وجهج عني

-ادري ببتي ثولة

-يوم !

- اي والله ثولة كلش
خليل لا شهادة مثلج
لا خلفية دينية مقبولة

- يمة يعني الا الشيخ

-ماجد مو شيخ
بس ما شارب ابوه مربيه تربية صحيحة حافظ للقرأن مثل اخوتج
وشهادة وبيت و سيارة

خليل امه تريده يمه وهم مو هذا سبب رفضي

- الله يمة متقبل منه توبته ويصفح
و اخذ حفيدة شيخ هسة
لأنه خوش انسان ويعرفوه

-بتهم سمعت الخبر لا شهادة ولا شخصية عدها مثلج ولا جدها مثل
ابوج ولده ويه خليل يشتغلون ناس الله يسهل الهم و يوفقهم بس ماعدهم واحد عنده شهادة مثل ابوهم او جدهم
ما فلحو فبتهم بنية بسيطة

-امها محاضرة دينية واكيد هي م.....

- عوفج من ام البنية هسة و خليل يا يمة تعانين وياه انت مثقفة واعية خفت عليج ما لاكيتج بباب جامع اني
شوفي خواتج اشلون زواجات شهايد و اخلاق
رقية حبيبتي بوضعها وزوجها شوفي اشلون مثقف
ليش افرق بينكم بالقسمة
انت الوحيده بيهن جامعية ما توقعت اصلا بيوم تميلين لواحد لان صاعد سيارة اخر موديل

-لا لا ماما والله انت تعرفيني مو مادية ليش هيج وياي؟

- ولا عاجبني اشلون اتقبلة زوج لبتي بايع ومخلص
يا يمة يخوف حيل
الي ماخذ بت عمته مدري گرابته و عايفها والله شنو شفتها ما توالم وياها بعد ما انكشفت عليه وهي من دمة وعرضة
اشلون امن انطيه بنتي

- هسة راح بعد والله يوفقه بس حبابه خل اليوم يبلغهم بابا

-اي ليش

- ما اريد واحد اصير اله خدامه ولبته
وادري بمحمد هسة مصر عليه لخاطر اطفاله يعني بيبي سيتر اله ولاخوه

-اطفال اختج !

- ماما ترديني اصير خدامه

- لا يمة ما يهمني بزواجج غيرج
اطفال اختج حتى لو تقربتي منهم الهم ابوهم مصيرة يزوج
بس انت الاول والتالي
يا يمة فرصج قليلة

-اووه هم عادتها ادري عمري مليون

- المشكلة مو بعمرج المشكلة

سكتت

-شنو ماما قصدج افهمة ترة

- اي بسبب ترك ابن عمج الج و بذني الي الله لا يوفقهم بعدهن يهمزن عليج اذا مو هنه جلاوزهن وحبايبهن يحجت علينا اشكال خالتج يوصلها الحجي(خالتي ماخذه ابن عم ابوية )

و ذني جاراتنا حتى من الحي ما جاي يدك بابنا احد ..
مجاي تلاحظين انت محد يسأل عنج غير كم واحد من الدوام مالتج و هم مابيهم حظ بعد خمس سنوات راح يتغير الوضع للأسوء
انت يا يمة بالعراق مو بغير مكان البنية فرصها عدنا بأول عمرها مو بتاليه

- ادري بكلامج صحيح بس
اني مستعدة انتظر ولا اخذ واحد توه ميته مرته راح يظل شبحها يطارد ذكرياته والمقارنة و و
حتى بذلت قصاري جهدي حتى لو كنت اني افضل دائما المفقود مرغوب اكثر من الحاضر ...
بلكت تجيني قسمة فرصة زينه اكثر من هاي

-لا حول ولا قوة الا بالله شسوي الج بعد
حجيت اهواي والله الكلام يأذي راسي
احسة يدك دك بيه

- سلامتج

حسيتها تعبت من صدك هي الكلام المطول يتعبها وهم لان ما نفع وياي حيل حسيتها ضايجة ..

على العشا كدامي امي فتحت السالفة وكالت لأبوية

- كول لابو مصطفى البنية رفضت

ما جاوب بابا واستمر ياكل

مرتضى- ليش زينب
ماجد انسان مثقف
متزن

سكتت ما جادلت

-عوفها

رفعت راسي اشوف تعابير وجه بابا هو الي كال عوفها بلا مبلاة

مرتضى
-ليش بوية مو الانسان ما ينقاس هيج
واذا كان ارمل

جاوبة ابوية - هي الشغلة صارت مخربطة امهم خطبتها لاخوه و هو قبلها حاجي وياي كلام اذا مر وكت يطلبها لاخوه مرة ثانية

-غير صار سوء فهم

ما فهمت بليلتها برود بابا معقولة مثلي يفكر لأن مزوج وين حماسة الي بالاول ؟

بعدين بعد ما بابا انطاهم الرد عرفت سبب بروده من امي الي حيل ضايجة منا أثنينا ما عاجبها وضعنا مع العلم بابا مااله علاقة خيرني ب لا واي واني الي كلت لا ...
المهم السبب هو خربطتهم من امه خطبت ومخلية ببالها اني لرجل كبير
وتجرأت وحتى من اعتذر منه السيد ظال ماخذ بخاطرة من داخل وشكى لأمي اشلون يفكرون ياخذون بنته الي عمرها فوق ال٢٤ الى رجل عمره ٤٣ سنة وعنده اطفال اخاف يعرفون من محمد سالفة مرضي القديمة والي راحت بس ظلت بصمة الي، وهذا شي اكيد فضاج مع هذا كال النا واني رفضت وخلصت من بيت السيد قاطبتاً...

رجع صفى بالي لأموري واشلون اصفيها
الدوام بعد كم شهر وامي الحمدلله لسانها تحسن وبتحسن دائم بس ما تكدر تمشي شهد البنية دوم تكولي اقنعي والدتج اني اساعدها بغيابج ..
ححاول مع امي بس عبود اشلون
دوامي يطول اروح من الضحى للعصر مرات الغروب حبيبي متعودة عليه بالي يظل يمة وبتول لازم أهيئها نفسياً للدوام من جديد بعد ما راحت عليها سنة
،
مرت الايام و سمعنا بصوفي الي قلت علاقته بيه رجلة تم شفائها و رفع عنها
الجبس

فقرر بابا يروح يشوفه لحفيده وطبعا اني حشرت نفسي حشر و امي توسلت اله اني اروح الولد ما يجينا و حتى قاسم و التوم كطعهم عني السيد...

لبست بتول وعبود و رحنا مع مرتضى و مرته

أول ما وصلنا لبيت فاطمة هاج الحنين بداخلي وبدأ يفور و بعقلي صارت تصور الذكريات من جديد اول ذكرى اجت ببالي اول ما اجينا اني وياها وامي نضفنا البيت وضحكاتها ترست اذني وهي تكول واخيرا طلعت بيت وحدي مملكة خاصة بيه
دمعت والحزن رجع ولع بيه وية روجات الذكريات ، دخلنا من فتح النا قسوم الباب للحديقة ،لا اراديا رحت ادور زرعتها الي حطت بذرتها و طلعت ورد متسلق برتقالي اللون ترس الحديقه ترس لأن البذور من وحدها توكع على التراب و تطلع اوراقها تخضر ... ما زالت مقاومة و ظاهر خضارها بعبث واصلة لسياج البيت مغطيته وجايه زايد على التواليت الخارجي ...

ردت الوف الها لكن ظهر السيد بزي افندي و رحب بينا ودخلنا واني نزلت عبود راح يركض لأبوه هو واخته

شهد - والله حلو البيت تصميمه غربي

-اختيار السيد
بس الاثاث كله فطومة قطعة قطعة جهزته ههه كانت تاخذنها وياها ورجلينا تطيح صعبة حيل بالاختيار وتسأل رأينا وتخالفنا تاخذ على رأيها!

-والله ذوق التخم و البردات فدشي كلشي لون لكن بتناسق حيل حلو

- اي
بحسرة واه داخلية كلتها واني بديت اختنك اجانه صوفي وكعد يمنا

-أشلونج خاله هليام ما اتلعبين كلاش ؟

استغربت تغيره ورجوعه لطبيعته وياي كان قاطع وياي وبعدين افتشلت

من مرتضى كال
- تلبعين كلاش هههههههه

- لا مليتها

ابوية كال- اشكبرج بوية تلعبين هذا النت عالم واسع أستفادو منه بجمع معلومات كان مستحيل رصدها بالسابق

كان يتكلم ويباوع لصوفي

السيد - خليها هي طالبة وتمل
تظل زنوبة صغيرة

اول مرة ادلع منه واول مرة هيج يتوجه الي الحديث ؟
لا وبعد دافع الي ؟

شفت شهد مبتسمة بايدي ندستها وخزرتها بلعت أبتسامتها

بابا رد عليه
- الله يرحم فاطمة هي ربتها لزينب ويه امها

احنيت راسي اخفي الدمعة الي اسربت مني بسهولة بمجرد ذكرها

السيد
- الله يرحمها اذكر بزواجي منها زينب طفلة بحضنها
و بعد اسبوع زواج صارت تبجي عليكم اكثر شي عليها متعلقة بيها

كلهم وجوهم مبتسمة بوجوم لكن القلوب يا ترى مثلي ملجوم و يتحسر ...

- خليها تلعب وية صوفي يلوك الها اللعب

ما بلعتها بعد كلمته و تركيزهم عليه ذيج وينها مبينة دا يبرر خطب امه الي و يصرح هو ما راضي اني يعتبرني صغيرة ولو هو الرجال من خطبني لأخوه ذاك وينه ما راضي على عرض امه ..

اني خنست واذا ببابة تندك وتطلع اخته جاية كعدت يمنا وانفصلنا الرجال عن النساء لان رجلها وياها احنه بالهول المفتوح على صالة كبيرة بيها قفص الببغاء الملكية لكنه مو بيه !

وهمه بالاستقبال وصوفي كعد يمنا اشوية وراح يم الزلم ..
ابوية طلع من الاستقبال وكال الي
اروح اسوي شي يشربوه شنو الكاه كدامي ...

السيد طلع وفهمت من كلام بابا السيد راد هو يضايف ضيوفه بس والدي اصر عليه يكعد النسوان يصرفن ..

رحت للمطبخ و اباوع للأثاث مشتاقه اله مثل شوقي لصاحبته ..
سمعت صوت قاسم خلفي

-خالة يكول بابا اكو عصائر محضرهن بالثلاجة

-ها اووك

-كيكة جوة حبابه ظمي الي منها

-اوك

قطعت الكيك و اجاني عبود يتمشى

يناغي يريد ياكل ...

اجت وراه طفلة من عمرة

- ننه نننه

فهمت اتريد تاكل

وبيدها ممة فارغة تلعب بيها اخذتها غسلتها وحطيت الها بيها عصير برتقال وانطيتها و عبود صار يبجي غار ...

-هسة ماما
بس اخلص اشربك بيدي نسيت اجيب ممتك

لبست عباتي من خلصت وكلت اصيح لقسومي ياخذهم واني اخذ الي حضرته للبنات ..
خلصت و شربت الولد و عفته يم شهد و النسوان خوات السيد ،الثانية هم اجت اني وديت الصينية للمطبخ واخذني حنيني لحديقة فاطمة ..

وكفت يم النخلة الهندية و طلعت تلفوني اطك صور الي و اجاني عبود طلع مترقبني ويضحك مسوي انجاز لكاني . شلته وظليت اجعص بوجه بوجهي واطكطك تاليها واني عافصة وجهي طلع احد من التواليت يعدل بحزامه
درت وجهي على النخلة وغلست

سمعت صوت طفلة تسولف التفتت شفت الطفلة ام الممة الحنطية و الرجال شالها ..
طلع قاسم
-هاي اجتك وكحه بدت عصيري على الارض

ماجد
- ليش هيج فطومة

-عمو عمو اخذني وياك لبيت جدي حباب

هلا هذا عمهم دخل ادخل احسن الي مريت من يمة وكأنه تفاجأة على ما يبدو ما التفت من طلع لحد ما وصل يم شباك الهول المغلق
واني مريت اريد ادخل

همست
-السلام عليكم

- وعليكم السلام

قاسم
-هذا عمو ماجد

دخلت ما اعتقد عبالهم سمعت ما اهتميت المهم همزين ما شافني من الاول كابتن ماجد بته حليوة سمورة
خطية اشكد ضايجه على كمية الايتام الي عدهم ...

سولف الي قاسم عيشتهم اهنا على البيض والاكل الجاهز ابوهم بس يطبخ شوربة وتمن والباقي كله جاهز من المطاعم و يغسل ملابسهم و صحونهم و خواته يجن مرة بالاسبوع ينظفن بس هو نظيف و يحاول يعلمهم على النظافة والاعتماد على النفس خاصة التوم متعبين حيل واشقياء حتى من يروح للعمل روضة دوام مسائي يحطهم و الصبح هو بالحضرة وياه ياخذهم والكبار بالبيت ..

-بالله اشلونها شوربة ابوك

-طيبة حيل ..
وعمو ماجد البارحه سوانه مخلمة لحم

-عمك كاعد يمكم

-من يروح بابا هو يجي يمنا اني وصوفي

-اها و عمامك البقية

-يجون بس مو دوم عدهم عوائلهم

-ممممم وانت بعدك على التليفون قرن
تلعب بيه

- لا
كالها بزعل

-بابا اخذ كل الاجهزة خفاهن خله بس الابلي و التلفزيون

-حييل

-بس صوفي ما اخذه منه بس اني

-تستاهل هههه صوفي مو مثلك مدمن

- خوش مسوي وياكم ابوكم

- اشوكت يزوج حتى نرتاح بلكت ترجع التليفون الي مثل امي

-حبيبي بعدك صغير مو زين على اعيونك

-اكلج انت عود ليش ما ازوجتي عمو
وجان تجين يمنا واخذ تليفونج

-اسكت عيب تحجي بهاي المواضيع
عشتو

-صرتي جدي حسن
وهم عشتو

شو هذا يضحك وماخذ ميانه
عدلت اله غرفته وطلعت للهول اشوية وشفت صوفي كاعد من دخلت كام الي وكعد يمي لوين ما كعدت

-خالة بابا راح يسجلني بنادي

كالها والفرحة تتطاير من اعيونه

-بس اخلص جلسات العلاج الطبيعي

-مال كرة قدم؟

-اي
ما ادري اشلون اقتنع وحده

-صوفي ابوك ما كان معترض على الطوبة وانت تدري كان ضايج من تأخيرك بالليل برة

- اي وخلاني اوعده حدي للتسعة بالليل وارجع واذا تأخرت ابطل من النادي

-هههه حيل خوش سوة

، ،
طلعنا وطلع السيد يزتتنا
شفت شهد تتكرظم

-اشبيج

-تعبانه ودايخه حيل ..

- اي تردين اتخلصين من العشة لوتيه

ابتسمت و ما مدت السانها شو ..

ارتاحيت من شفت الاطفال مستقرين ،

ثاني يوم الصبح سمعت صوت شهد
ومرتضى
طلعت من غرفتي من سمعت لهجتهم مو حلوة وعراك بينهم قوي
ما فهمت اشبيهم وما تدخلت بس وكفت بمكاني اشوفهم

هي نزلت وهو يكول الها
- روحي لاخوج ولا تجين بعد

- شنو شو تطردني اني رايحه اخذ كوثر وتأكد حمل لو مو حمل وارجع

- حمل مو طلع بالاختبار حمل
روحي يم اخوج و من يوكع الطفل تعالي ما بيه حيل بعد اني أستنزفت كل طاقتي

- رايحة وما راجعة بعد ما دامك هيج

اهنا تدخلت من شفتها تصعد وهو كمل الدرج ونزل ..
رحت وراها

-شهد شصاير

-اني حامل واخوج ما يريد الطفل جابلي اختبار ومن عرف شوفي شنو سوة بيه وعمل انواع الكلام الي يسم البدن واني بعدني ما مسوية تحليل دم

-شهد اهدي لا اتلمين ملابس يمعوده

اوووف انتِ مو ماخذه مانع اشلون صار

-اني اريده

صاحت بيه

-اي بس مو هسة رحمج يرتاح حتى يثبت الطفل مو زين عليج هيج

- ارتاحيت بما يكفي

-يعني انت متعمده

-لا ما متعمده بس نسيت

علت صوتها وهي تأشر على الحبوب المطشرة على الميز

-اني اكرها اكره هاي الحبوب اخذها وامنع روحي من اكثر شي اتمناه
لج اني اريد طفل وانتظرة بلهفة واخذ حب يمنعة!
-غير حتى يجي

- نسيته والله نسيته يومين متقاطعات من كرهي اله

-هسة عوفي الجنطه

-لا اخوج ما يريدني

-لج كلام واحد عصبي وخايف عليج
والله

- خايف عليه وهيج سوة بيه ما سمعتي شكال اهنا قبل لا انزل شاردة منه

رايحه لبيت اخوية

راحت ما بقت ومرتضى وصلها بكل جفى
ما اعرف اشبيهم هيج انقلبو على بعض

،
كنت انظف العصر بالهول بعد ما كركبة عبود وعلاوي الي مسير يمي وحده اليوم وضايجه لأن شهد صارلها أسبوعين ماكو ومرتضى ما يرضى احد يدخل ،

بابا كان بغرفته يتعبد يم ماما الي تقرة ادعية عفتها قبل اشوية ..

ندك الجرس
-يووه قداوي طالع اف
بتول افتحي الباب يمكن ابوج اجه ياخذج بتولة

-مو خدامه اني

ردها الشهير القاتل عضيت شفتي طبعا هاي كلمتي اكولها من يطلبون مني كومه امور لاكفتها مني خرب

-ولج مو لابسة ومتحضرة لابوج يجيج اليوم

- بابا يجي بالخمسة هسة مو بالخمسة

-ساعة السودة الي علمتج بيها على الساعة
ولج فرق نص ساعة هيج ابوج مضبوط

حطيت فوطه على راسي من يم تعلاكة المراية الي بالممر وطلعت للباب
حطيت راسي خلف الباب وكلت منو بهمس بابا ما يقبل نعلي اصواتنا

-اني
صوت مرة ما ميزته
فتحت الباب واني خلفها
وصارت بوجهي مرت عمي ام كرار ابتلع وجهي لونه وبهتت

-عمه !؟

- شو خل ادخل

تراجعت للخلف متسعة فتحة الباب مترددة بدخلتها

و هي اتقدمت خطوة عليه وكالت

-عدمن مسويته ؟

- شنو ؟

-سحرج لبتي يا ظالمة

- شتكولين انت عبالج كل الناس مثلج

- دفعتني
تراجعت اكثر للخلف مخضوضة منها
وظلت تدافع بيه و تتهمني مسوية سحر لبتها

- كالو الي مواصفاتج يا سحارة وين دافنته بتي ما يطلع الها صوت

- وخري عني ..
سديت الباب

دخلت اصيح لأهلي

ضربتني على متني و دفعتها ردتها بدفعه دخلتني للممر واكعه حيل على الكاشي وايدي تجلغت

-ااخ
هجمت عليه ادعي و تخونك بيه و تريد اجاوبها تحت التهديد السحر وينه مدري منو منطيها عمري ومواصفاتي بتها مدري اشبيها ...

حسيتها وخرت عني لزمت ركبتي و فركتها و شفتها على الارض وكعت وكامت اثاري بابا موخرها عني كمت واجت تهجم عليه مرة ثانية
ختلت ورة ابوية حتى لا توصلني

-اطلعي برة
صاح بيها و طردها

- بتك الفاجرة مسوية لبتي سحر

- اعوذ بالله منكم اطلعي برة و كلامي وية ولي امرج

- مرتك هاي المسوية نفسها تخاف الله شوف شنو مسوية لبتي

طلعت من خلف ظهرة و وكفت كدامها وكلت

- دطلعي اطلعي
ولي منا انت ودجاليج بتج تخبلت اني شعليه

ضربتني راشدي فرلي خدي فر و هجمت ومستمرة تظرب وبابا يوخرني عنها وهي ما تردع
ما اعرف اشلون بابا فقد رشده وابعدها عني لكن ضربها راشدي موكعها على الارض اني من شدهتي شهكت وهو هم اعيونه مفتوحه على وسعها وكانها قنبلة وانفجرت ببيتنا خلتنا نصرف بلا وعي وياها ..

-االا اسويها كعدة شيوخ يا شيخ
وافضحك

خلت وطلعت وبابا دخل لغرفته وركع بابها

لا ياربي ورطت ابوية لو داخله من بابا وخرني عنها وما مراددة
اوووف مني الا احجي خنيثة شبعت دك تاليها حطيت ابوية بموقف زفت

ندك الجرس وظل يدك ويدك واني مغلسة
بعدين مليت وطلعت ...
-بتول وثول ابوج هذا ليش ما تفتحين

-بعد خمس دقايق الا يجي

تأفأفت وكلت منو

السيد صوته اعرفه كال اني ابو مصطفى
بتول خل تطلع

فتحت الباب فتحه كلش بسيطه
وردت انطق واكول ثواني وتطلع
سمعت صوت كرار

- عمي اهنا

السيد جاوبه
-ما اعرف

دفع الباب ودخل كرار

عدلت الفوطه على راسي

- كرار شرايد

-ابوج وينه

-شنو جاي تتعارك ويه عمك لو اضربه

- أعلمه الاصول

-اطلع برة واني الي راح اعلمك الاصول
ما يصير تدفع الباب هيج عليه

سمعت صوت خلف الباب السيد

- اطلع اشلون تتهجم هيج عليها

-انت ما عليك اطلع منها

شفتها الشغلة تخوف دخلت ابسرعة كلت لابوية طلع وكرار ما زال واكف
صيح على ابوية واشوفلك الباب تنفتح ويدخل السيد صاح بوجه كرار

-لا اصيح على عمك تاج راسك

ابوية طرد كرار وكدام السيد
اني يم باب الممر واكفه ..
من شفت الاسلوب احتد اتقربت اكثر وكفت بنص الحديقة من شفت كرار نافس ريشة على السيد والاصوات علت
بتول واكفه وتباوع يمهم حيل قريبة رحت الها جريتها من شفت كرار لزم السيد من ياخه ثوبه
والسيد دفع للخلف .. رجع كرار وضرب السيد بوكس على حلكة خلاه تأوه و لزم حلكة شفت دم بين اصابيعه يجري
راجع بخطواته !

شهكت من شفت السيد مدمي الحلك والعمامة وكعت

يتبع
هذا بارتين وليس بارت
ربما هي معجزة جعلتني اكتب مبكرا 🌹❤ وربما أشتياقي لكم وربما محبتي لكم
غدا في بارت لكن قصير و بعد غد ايضا النشر سوف يتغير الى يومي لكن الى بارتات اقصر حسب طاقتي ❤🌹 لكن بشرط
دعوة جماعية من قلوبكم المؤمنة الصابرة على الحكومة
يارب تسقط الرئاسات الثلاث و تقدم للمحاكمة مثل أسلافها قولو امين...

زهرتكم 🌹