السلام عليكم ورحمة الله وبركاته
الرواية مش مجرد حكاية بتقدم شخصيات في قالب درامي او اجتماعي او رومانسي ...بل اعتقد ان مفهمومها اوسع من كده بكتير
لما بتقرأ رواية خاصة لو كانت عمل عظيم زي رواية عالمية لتولستوي او ديستوفسكي او تشالرز ديكنز او عمالقة الادب الفرنسي امثال فيكتور هيجو او الكساندر دوماس انت مش بس بيتسني لك انك تسافر لعالم موازي فيه مئات من القصص و الحكايا انت بيتسني ليك انك تشوف احداث ووقائع ممكن تكون حصلت قبل ده ......ميزة الرواية انها بتخليك تفهم الطبيعة البشرية اكتر كل ما بتقرأ روايات و خاصة لو كانت روايات بتتميز ببناء ممتاز للشخصيات كل ما هتقدر تفهم البشر بشكل عام تركيباتهم النفسية دوافعهم نقاط ضعفهم و مع كتير قراءة الروايات انت بتشوف ملايين من النماذج الي احيانا كتيرة اوي بتكون مقتبسة من الحياة الواقعية و ده بيكون ليه الفضل انه ينمي قدراتك التحليلية و الاستنباطية
الرواية كمان تقدر تستمد منها معلومات ثقافية بس ده مش في كل الاحيان ...يعني عندك مثلا الراحل أحمد خالد توفيق كان قارئ موسوعي و مع كل رواية سواء منفصلة او مرتبطة بالسلاسل الشهيرة الي كتبها (ما وراء الطبيعية ...سافاري...فانتازيا) انت بتكتسب معلومات لا بأس بها عن الطب و مجالات اخري كتيرة
الرواية كمان بتديك لمحة عن ثقافة الشعوب و عاداتهم و تقاليدهم ده غير ان في روايات كانت بتحاكي احداث تاريخية مهمة زي رواية الحرب و السلام لتولستوي و رواية قصة مدينتين لتشالرز ديكنز و رواية البؤساء لفيكتور هيجو
بعض الروايات بيبقي ليها ابعاد نفسية و فلسفية جميلة جدا بتخلي افق القارئ يتوسع يعني عندك مثلا نجيب محفوظ كتير من رواياته كان ليها جانب فلسفي ..و رواية القضية الغريبة لدكتور جيكل و مستر هايد الي تعتبر اول رواية اتكلمت عن مرض الشيزوفرانيا
عن نفسي دايما كنت بلاقي راحة و سعادة و انا بقرأ رواية بشعر دايما انها بتنقلك لعوالم ممتعة و بتخفف من الاحساس بالفراغ و احيانا كتير كانت بتقلل من الضغوط الحياتية
|