[Hoba Nasry]

_شظايا_القلوب

_مش عارفه حقيقي أعبر عن مدى حبي و إعجابي بجمال و روعة قلمك و أفكارك و صدق المشاعر الإنسانية اللى بتوصلني و أنا بقرأ سردك للأحداث و رسمك الشخصيات
كنت دائماً أشوف في حفلات أم كلثوم الجمهور في كوبليه و بيتفاعل مع وصلة غنائها و بيتسلطن و يقول عظمة على عظمة و أسأل نفسي لدرجة دى هما مبسوطين لما بقرأ شظايا بحس الإحساس ده و في كل مشهد ببقي عايزة أصرخ بأعلى صوتي من الإندماج و الحالة الجميلة من السحر و أقول عظمة على عظمة يا نور أبدعتي 👏👏👏👏👏👏👏
شابووووه حقيقي حاسة و كأني مسافره في طريق طويل بس و للغرابة أنا مبسوطه جداً بالرحلة و مستمتعة جداً جداً و أتمني الطريق يطول و الرحلة ما تنتهيش رغم شوقي لمعرفة هتنتهي بالشخصيات اللي حبيتهم و أرتبطت بهم لفين لكن مش عايزه أفارقهم دمتي مبدعة ومتميزة دائماً يارب 😘😘😘😘😘😘😘⁦❤️⁩⁦❤️⁩⁦❤️⁩⁦❤️⁩⁦❤️⁩⁦❤️⁩⁦❤️⁩⁦❤️⁩⁦❤️⁩ ⁦❤️⁩

_وفاة_ياسر

_ياسر الراوي و سواء حبناه أو كرهناه لكن تظل حقيقة ثابتة هو شخص بيحب أبنائه و عائلته جداً جداً و بيحاول دائما يحميهم حتى من يملك سواد الروح و الجرم لكنه ما بيفرطش في دماء فرد فيهم، و عشان كده موته أثر فيهم كلهم لأنه كان الوتد الصلب اللي بيتسندوا عليه و واثقين إنه دائما في ظهرهم
_خالد و اللى فقد الأب و السند و إحساس بالضياع و الندم على الوقت اللي قضاه بعيد عنه
_منى الزوجة اللي فقدت حبيب العمر و زوجها و أبو أولادها
_شيماء و اللى كانت أكثر حزنا على فراقه و تخبط
_بدور و اللى فراقه كان بمثابة غصة في قلبها و سماحها له بقلبها حتى لو اللسان ما نطقش و تحجر الدموع في عينيها
_مريم و اللى كان خبر وفاته صدمة ليها و مشاعر متضاربة من غضب إنه تركها قبل ما تحصل على سلامها النفسي و تمنحه السماح و الغفران و بين إحساس بالذنب إنها رفضت تقابله و تودعه، و خالد اللي لما شافها أنفصل عن كل اللي حواليه و حس بألمها و حضنها و لأول مرة تستقبل حضنه و ما تجفل و ترفض أو تتوتر بالعكس حست بمشاعر مختلفة ما جربتهاش قبل كده إحساس باليتم و الفقد و لأول مرة تنطق لفظ أبي و تسأل خالد إذا كان أبوها مات فعلاً
_نوة و شذى و اللي برغم حزنهم لكنهم كانوا بيأدوا واجب العزاء و إستقبال المعزيين و مدارة آلامهم و هما شايفين و سامعين النفاق الإجتماعي و النميمة عليهم و ذكر كل تاريخ العائلة و مريم و بدور من غير إحترام لمشاعرهم و حزنهم لنعي فقيدهم
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
_راشد_إيهاب

_إيهاب و اللى سافر عشان يتأكد من وجود راشد و إياب و سبنتى في العنوان اللي توصل إليه خالد، و وجده و عرف أنه كان متفرغ لرعاية أولاده و ترك أعماله لناس بيشتغلوا تحت إيده، و وصل لبيته و من ملامح وجه راشد عرف أنه هو اللي منحهم طرف الخيط اللي وصلهم إليه و ما تفاجئش لكنه كان متوقع زيارة خالد اللي لبس ثوبه اللي تركه راشد بإرادته و خالد تحمل المسؤولية لكن ما أضفش بصمته الخاصة به، إيهاب من خلال تفحصه البيت لاحظ أنه بيت راقي يميل للبساطة و الجمال و فيه حب و دفئ و روح بريئة تسكنه و لمستها واضحة في كل ركن من أركانه و اللى كان من إختيار ذوق سبنتى بعد ما راشد ترك لها المهمة دى عشان يحسسها بالإنتماء لبيت يخصها
_راشد و إيهاب الإتنين شخصياتهم بتتميز بالهدوء و الثبات الإنفعالي في مواجهة المواقف الصعبة، في حوارهم مع بعض كانوا بيتكلموا من غير مشاعر الغضب و العصبية تتحكم فيهم
راشد و اللي كان حريص في كلامه معاه يأكد على إنه كان بيحمي أولاده من بيئة عائلة الراوي الموبوءة بالحقد و الكره و المؤامرات و إنه إيهاب يمكن لو واجه نفس ظروفه كان تصرف نفس التصرف بدافع حمايته لصغاره
و مع ذلك راشد ما كانش ناوي يظل مختفي بأبنه طول الوقت و ترك لبدور طرف الخيط عشان تتبعه و تتواصل معاه و أعتقد أنه يقصد التليفون المحمول لكن في ظل الفوضى اللي كانوا فيها محدش أنتبه، من خلال كلامه مع إيهاب راشد في حقائق لسه مخفية و هيفصح عنها لصاحبة الشأن في الوقت المناسب
راشد كان في صراع بين إنه يظل بأولاده هنا في بيئة صحية سبنتى أشتد عودها و بتبني مستقبلها و إياب بيكبر في جو عائلي جميل ملئ بالحب والحنان، أو يرجع للصراعات من جديد
لكن إيهاب وضع أمامه حقيقة أنه إياب هيكبر و ممكن يعيش نفس عذاب نزار و مأساته
_لكن موت ياسر الراوي حسم القرار بالعودة، موت ياسر اللي أثر في راشد و كان متصور إنه قدامه الوقت يعاتب كل منهم الآخر و في النهاية يحصل على حنانه الأبوي لكن القدر كانت له حسابات آخرى
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
_بدور_إياب_سبنتى

_مشهد لقاء إياب مع بدور و من قبله تهيئة راشد لإبنه و إنه هيقابل طاووسه الذهبي عشان ما يجفلش و يخاف و حماس إياب للقائه، المشهد من لحظة دخول إياب مع إيهاب و إلتفاتة بدور و لحظات من عدم التصديق و مش قادره تنظر عشان خايفة يكون مجرد وهم و سراب و تفوق منه و بعدين النظرة و نزولها قدامه كفرس أصيل،دموعها آهاتها الإشتياق و اللهفة و بتتفحصه بعينيها من غير ما تجرؤ إنها تلمسه قرب إياب و مسحه دموعها و لمسها بإيديه كلامه لا تبكي أنتى جميلة جداً
و أنتى الطاووس و هنا بدور مقدرتش و حضنته بكل الحب و الحنان و الشوق إليها و بعدد السنين اللي إتحرمت منه
المشهد عيشتني فيه بكل تفاصيله و حسته كأنه مشهد سينمائي بيتحرك ببطئ و تركيز مشهد رائع جداً جداً جداً

_إياب و اللى كان من الطبيعي جداً إنه ما يتقبلش بدور بسهولة لأنه ما يعرفهاش و رفضها لأنها في نظره بعدته عن العالم الوحيد اللي يعرفه و كل اللي كان بيطلبه هي أمه اللي يعرفها و حبها، طعنة نافذة في قلب بدور و أمومتها و غضب من راشد لحرمانه من إبنها و خلي أخري أخذت مكانها
و محدش للأن يعرف مين هى أم إياب المتعلق بها أوى كده

_سبنتى و اللى كانت رافضة الرجوع تاني بعد ما حاولت تستقر و تبني لنفسها حياة جديدة و ده أول الصعوبات اللي واجهت راشد في عودته رفض سبنتى و تشبثها في إياب
سبنتى اللي أستعان بها عشان تكون مع إياب بعد رفضه التام لأى قرب من بدور، سبنتى برغم رفضها إنها تدخل بيت الراوي من تاني لكن من أجل إياب و شيماء تنازلت و جات
_دخولها القوى و اللى كان بمثابة صدمة للكل في اللي كان سعيد برجوعها و حنين ليها و خوف و رعب من ظهورها
و تفاجأوا بسبنتى مختلفة الخذلان و الآلم و السنوات غيرتها
سبنتى تربية راشد و فخورة بكده أصبحت أكثر قوة و صلابة و ألم و خذلان من الجميع و عشان كده مش قادره تتعامل معاهم و كأن شيئاً لم يكن، برغم حنينها لمنى لكن جرحها منها كان أكبر

_شيماء و اللى أول ما سمعت صوتها و كأنها زى الغريق اللي وجد يد تنقذه، شيماء في وسط عائلتها و أمها و أخواتها لكنها كانت حزينه مطفية ما صدقت إنها تلاقي تؤام روحها و جريت عليها تفحصت ملامحها تروى سنين الفراق و البعد و حضنهم لبعض و اللي أنفصلوا به عن كل الموجودين
علاقة سبنتى و شيماء من العلاقات الإنسانية اللى بحبها جداً جداً جداً، سبنتى الوحيدة اللي بتقدر تحتوي شيماء و تدعمها و تدفعها للصمود و المقاومه مهما كانت الظروف و عشان كده شيماء كانت في أمس الحاجة إليها و حست بالخيبة إنها مش هتفضل جنبها و هتسافر تاني

_بدور و اللى تفاجأت إن ماما هي سبنتى و شافت تشبث إياب بحضنها و راحته و هدوئه في وجودها، سبنتى عوضت إياب عن حرمانه من بدور و غيابها عنه و كانت متعاطفة معاها و مع إياب و مش عايزة تشوف مأساتها بتتكرر و حرمان أم من إبنها زى ما هي حرمت من حنان أمها
جوان و اللى عينيها و نظراتها بتطاردها و تحن إليها لكن وعدها لراشد و دفن الماضي و حفاظاً على حياة جوان الجديدة بعدت عنها، و مش عايزه إياب يمر باللي مرت بيه
سبنتى أحتضنت إياب و كانت له الأخت و الأم و الصديقة و واضح جداً أد إيه بيحظي بالحب و الحنان و الدفئ و عشان كده بدور شكرتها و ممتنة ليها و إنها ما كانتش تتمنى إنه يقول لماما حد غيرها و ده مفاجأة لسبنتى إن الكلام ده يصدر من بدور نفسها و اللى دائما كانت بتحمل ذنب علاقتها و حقدها من راشد في سبنتى و نسيت إنها مجرد طفلة صغيرة يتيمه محتاجه الحب و الحنان و ده اللي حسته بدور و إنها أد إيه أخطأت في حقها و مع ذلك سبنتى ما ردتش عليها بنفس الطريقة و كانت أكثر رحمة منها و دلوقتي بتعرض عليها المساعدة في إنها إزاى تكتسب إياب و محبته و تعرفها عليه و إزاى تتواصل معاه و تقرب منها و كل ده مقابل شرطين إنها ما تخرجش من حياة إياب و ما تقابلش خالد
الجرح و الخذلان اللي حسته بدور من نبرة صوت سبنتى مهما تحلت بالقوة و الصلابة
_بدور و سبنتى الإتنين كانوا نسخة من بعض القوة و الصلابة و الشموخ والكبرياء و الذكاء و التحدي لكن سبنتى بتتميز إنها محتفظة بنقاء روحها و قلبها و فطرتها السليمة و بتتحكم في مشاعرها و مش بتسمح لها أنها تقودها
_من الحاجات اللي حبيتها أوى في حوار سبنتى و بدور إنها ما حاولتش تتدخل علاقة بدور و راشد و تسمع منها تبريرات لأنها ما تخصهاش برغم حبها الشديد لراشد و ولائها له و حبت تفهمها إنها مش هي اللي لوحدها عانت و تألمت لكن هي كمان كانت بتشوف أبوها سنة و نص بيأخذ من المهدئات بتاعتها عشان يعرف ينام
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
_راشد_خالد_سبنتى_بدور

_راشد من لحظة دخوله عزاء عمه و وقوفه جنب خالد له حضور قوي و هيبة بتفرض نفسها في أى مكان بيخطو إليه
راشد و اللي أحتمل إنه خالد يفرغ فيه غضبه من غير ما يرد أو يدافع عن نفسه و كان له الكتف اللي يبكي عليه فراق والده بعيد عن واجهة فارس آل الراوي و واجهة رجل الأعمال الصلب و خالد كان في أشد الحاجة لحضن صديقه و معلمه الروحي و أخوة كان بيكنها لراشد و بيتعلم منه

_خالد كان حريص إنه ينفذ رغبة والده و سمح لعزام بحضور العزاء، حضنه لمريم و إحتوائه ليها هى بالذات و طمنها إنه والده سامحها و متفهم موقفها و مش بيلومها و إنها من الإسمين اللي وصاه عليهم، خالد كان ندمان على الوقت اللي ضيعه في بعده عن والده مالحقش يقضي وقته معاه
_فتح وصية ياسر الراوي و اللى كانت صدمة لراشد و خالد و واضح إنها بتحتوى على شرط إدارة راشد و بدور الشركات مع بعض و معاهم خالد لحين إكتسابه الخبرة الكافية لإدارتها و ده سبب خيبة و خذلان لخالد إنه والده ما كانش عنده الثقة فيه و من نجاحه رغم أنه ترك حياته عشان ينفذ رغبته لكن واضح إنه ما كانش كافي من وجهة نظره
بس أعتقد أنه تفكير ياسر الراوي أبعد من كده هو عايز يعيد لم شمل عائلته من جديد يد واحدة مع بعض و يجبرهم إنه يكون في شئ يجمعهم
_راشد و اللى تعمد يفوق خالد و إنه ما خالفش وعده معاه في حماية بدور هو كان وقتها بيشمئز منها و وعده إنه سبنتى هتكون له لو هي نضجت و أختارته و إنه هو اللي لا يليق ببنته اللي بتتقدم بخطي ثابتة في حياتها و مستقبلها و أصبحت إمرأة قوية

_خالد و اللى مازال بيلف في نفس دائرة التوهة و تخبط المشاعر و متصور إنه سبنتى أول ما تشوفه هتجري عليه و تعتذر عن عدم وفائها بوعده له، للأسف الشديد خالد ما تعلمش من الماضي المؤلم اللي عاشوه و بيبحث مع المحامي إزاى ينزع حضانة إياب من راشد و نسي إن كل خطواته مكشوفة لراشد و فاهم طريقة تفكيره لكنه منتظر يشوف تصرف بدور و إذا كانت أخذت عبرة من الماضي ولا لسه على نفس العند و الغباء، خالد ما أختبرش معارك الحياة
الحقيقية و في أول إختبار فشل فيه و نفذ مخطط ياسر
خالد اللي أنتزع من سبنتى وعد غير منطوق منها و في حالة نفسية سيئة و بيحاسبها عليها، و دلوقتي خطب و بيدعي إنها إمرأته اللي بيتمناها و إن سبنتى لا تعني له أى شىء مجرد ما بدور دبرت لقاء يجمعهم هما الثلاثة سبنتى و خالد و لانا
كل حصونه تهاوت و نسي العالم و تمسك بها و يكتشف التغيرات في شكلها الجديد
لكن سبنتى تمالكت نفسها بعد إهتزاز لحظي و تخطته و كملت طريقها و أظهرت شراسة لأنه تجرأ و تعدى على مساحتها الخاصة و مسك إيديها
و لانا اللي شايفة خطيبها ما أهتمش بوجودها و مشاعرها
و جري وراء سبنتى و تركها مجروحه الكرامة

_راشد و اللى عاني هو كمان من خيالات إن حبيبته تزوجت من أخوه و قلبه و رجولته اللي كانوا بينزفوا و هو بيعتنى بأولاده لوحده و رافض لوجود أى مساعده و متفرغ لرعايتهم بالكامل، سبنتى و راشد هما الإتنين ساندوا بعض الرابط اللي بيجمعهم سوا أقوي من لو كانت بنته من صلبه فعلاً
_سبنتى لما حست إنها تطاولت في الكلام على راشد و اللي حالياً بقت بتنده بابا أتصلت به و أعتذرت له و طلبت حضنه و دعمه و إحتياجها إليه في وسط المشاعر اللي بتحاصرها حالياً و هو بحنانه و تفهمه دائما ليها شعر بها و الوحيد اللي بيعرف يحتويها

_راشد و اللى ما كانش مستعد للقاء بدور حالياً و يشوف جرح أمومتها و رفض إياب ليها ولا نظرات لوم وعتاب منها
و بدور كل اللي كانت عايزة تشوفه و توصله لراشد إنك أنت كمان أخطأت بحرمانها من إبنها و لما يكبر هيحاسبهم هما الإتنين عن خطأهم في حقه و يمكن يكرههم هما الإتنين
راشد أنسحب من المواجهة حالياً لحين اللقاء في جولة آخري هيكون الفوز من نصيبه

_تميم و اللى كاره و متضايق من رجوع راشد و كأنه بعودته هيفسد عليه خططه
_عزام و اللى ياسر الراوي قدر يخرجه من السجن بعد ما راشد أوقعه في الفخ و حماه لكنه أبعده، عزام صمته ده يخوف و أكيد هيكون وراه كارثة و خاصة برجوع راشد و سبنتى

الفصل جميل جداً جداً و محتاج مناقشات كتير أوى كل مشهد محتاج يتبروز من جماله
سلمت يمناك 👏👏👏👏👏⁦❤️⁩⁦❤️⁩⁦❤️⁩⁦❤️⁩⁦❤️⁩⁦❤️⁩


🌸🌸🌸🌸🌸🌸🌸🌸🌸🌸🌸🌸🌸🌸🌸🌸

_