السلام عليكم أول تجربه لي بكتابة رواية اتمنى تقرؤها َوتعطوني رآيكم فيها
....................
نويتك بيني وبين نفسي ولكل امرئ ما نوى
دلع دلع قومي ماصار نوم الساعه ١١ وانتي نايمه
دلع : ماما تكفين بس شوي تعبانه طفي النور وانا خمس دقايق واقوم ماما اووف كالعاده امي تدخل كأنها إعصار تخرب نومتي وتطلع
ام محمد :ميري ميري طلعي لحم من الثلاجه بسرعه وانقعي رز
ميري :حاضر ماما دلع مافيه يقوم علشان انا يرتب غرفه
دلع :استغفر الله حتى ميري تدخل بنومتي
ام محمد :زين نزلتي
دلع :ماما حبي ايش رايك نروح لخوالي اليوم
ام محمد :سبحان الله وانا اقول وش قومك
دلع :ماما شفيك اللي يسمعك يقول خوالي بأمريكا مدري فرنسا كلها نص ساعه وحنا عندهم
ام محمد :اقول انثبري
............
محمد :سيدي بإذن الله كل حاجه بتكون مثل ماتبي وأكثر
العقيد ماجد : انا اعتمادي عليك هاذي المجموعه جايه من الإمارات دوره ثلاث شهور معهم رئيس المجموعه بعد انسان محترم وانا شخصيا اعرف مكانته هناك وحتى كان بينا زيارات عائليه ناس لهم مكانتهم ويهمني هو وغيره انه نطلع قدامهم بأحسن صوره
محمد :أمرك سيدي
..........
ابو محمد :وضحه يا وضحه
ميري :ماما صلاه
ابومحمد :خير ان شاء الله
دلع دلع
دلع :هلا يا احلى بابا
ابو محمد :انا كم مره قلت لك قولي يبا يما ايش بابا ماما
دلع : لا والله ماحب تعودت كذا بابا يا بابا ايش رايك نروح لخوالي ولله اشتقت لجده
ابو محمد :ومن مانعكم خل خالد يوديكم رحو استانسو دامها بدايه العطله
دلع : ااه خليني ساكته هاذي ماما تقول مو كل يوم نروح اللي يسمعها يصدق بلمدرسه نروح بلويكند ومن أجزنا بلشين كل ثلاث اسابيع نروح مره
ابو محمد :طيب زين روحي حضري الغدا مع ميري
دلع :اوك يا احلى بابا
......
ع الغدا
ابو محمد : ام محمد ماودك تروحين لأمك سمعت ابو عادل يقول امس ماخذينها للمستشفى
ام محمد :بسم الله عليها شفيها امي
ابو محمد : طلعت مافيها الضغط بس
ام محمد :غريبه ساره ماقالت لي
.........
دلع بغرفتها مابقى الا اثاث غرفة نومها تاخذه معها
وناسه بروح لموضي بس شفيها جوالها مقفل
......
خالد :يا هانم وضحه ياعسل ياام محمد تأخرتي عليا حضرتك
ام محمد :وجع مصري انت علشان تتكلم كذا كأنك بياع فول
خالد : افا يمى انا خالد افضل دكتور أسنان بالدنيا تقولين لي بياع فول
ام محمد : أشك اساسا انك كنت تدرس بمصر طب أسنان الله اعلم كنت بياع فول
خالد :دلععععع يلا بسرعه بوديكم ورايا شغل
دلع : جيتكم شفيكم
..........
بيت الجده
دلع : نزلت تركض اول وحده من باب الحريم هي وحوستها
طررراخ ااخ يمى مكياجي ودموعها اربع اربع وشلت النقاب
الا عادل طالع من المطبخ مين انتي بسم الله تعورني
دلع : من الصدمه نست تتغطا لملمت أغراضها وتركض ع الدرج للغرفه المنشودة
فتحت الباب ظلام غرفه موتى ولا ايش
موضي يا شريره اصحي
موضي : دلع الله يوفقك بس نص ساعه مانمت الا ساعتين
دلع : وهي تنزل أغراضها بلغرفه غبيه انا اللي فرحانه اني جايه عليكم
موضي :دلععع
دلع : طلعت وطبقت الباب قوه ونزلت وهي ع الدرج تذكرت عادل
تنقبت خاف يطلع بوجهها مره ثانيه اساسا اول مره تشوفه شكثر تجي ع جدتها لانه بيت حالها ابو عادل بيتهم وبيت جدتها بنفس السور بس لما يجون بلويكند يكون اما بالمجالس ولا ع قولة اخته الغثيثه فطوم بالاستراحه مع خوياه
الجده : ولله يابنتي مافيه شي الحمدلله طيبه وبخير
ام محمد : ولله ياأمي انصدمت يوم خبرني ابو محمد انك اخوي ناصر قايله له انك تعبتي امس
الجده : وين تعبت شوي الضغط والحمدلله الحين تشوفني مستانسه بلمة الحبايب عندي
دلع وينها
دلع :حبي جدتي فديت اللي يسألون عني
الجده :هلا بحبيبة جدتها
ام عادل : السلام عليكم سلمت وكيف حالكم كيفك ام محمد كيف الحلوه
دلع : الحمده مرة خالو مشتاقتلك
ساره ام موضي : هلا ولله بوضوح ودلوعه
ام محمد : هلا بس انا زعلانه منك
ساره : ليش بلله ماسويت؛ شي بمزح
ام محمد : كيف امي تتعب وماتعلميني
ساره : كان باليل والوقت متأخر وكنت بكلمك من شوي وانكم جاين
ام محمد :خير ان شاء الله
ساره : دلع موضي ماجيتيها صحيها من النوم من امس وهي نايمه
دلع :جيتها تقول نص ساعه بس وتصحى
ساره : ااخ من هلبنت جننتني وقامت تبكي
ام محمد : خير ايش صاير ساره موضي فيها شي
ساره : شقول كانت صغيره وانا عايشه ع اعصابي بعد ماتوفي زوجي الله يرحمه وانا كل يوم اقول الحين ياخذونها مني اعمامها ولا يغصبوني اتزوج واحد منهم بحجه تبقى بنتهم عندهم ولو مو الله ثم ابويا الله يرحمه وقف معي وبقيت بيت اهلي انا وياها معززه مكرمه كان الله اعلم كيف قضيت عمري بس زين بعد انهم عيال عمنا ولا ماسكتو واخذوها غصب ونا متحمله هلحياه واقول تكبر وترتاح الحين مقضيتها نوم تنام اكثر ما اشوفها ولا كل وقتها بالغرفه
ام محمد :وانتي تبكين خوفتنيني عبالي صاير شي الحمدلله موضي بنت شاطره بجامعتها كلها سنه وتتخرج ان شاء الله وتتوظف وبالعكس موضي كلها حيويه يوم اشوفها احس الدنيا بخير
دلع : ماما وانا يوم تشوفيني شنو تحسين
ساره :دلع انتبهي تجيبين طاري لموضي عن كلامي زين حبيبتي
دلع :خاله اطمني ماتطلع كلمه خلصت النص ساعه بروح اصحيها ههههههههه
......
موضي موضي يلا واحد اثنين ثلاثه وشغلت النور
موضي : اش اش يلا مع السلامه نكمل حديثنا بعدين وسكرت الجوال
دلع : موضي من تكلمين مرام الغثيثه
موضي : لا وععع مو مرام
دلع: أجل ايش فيكي تقولين اش اش وسكرتي يوم جيت
موضي : اممممممم إذا قلت لك ما تعلمين احد
دلع : الناس اليوم غريبين كلهم يقولون لا تعلمين احد حسستوني اني وكاله اخبار
موضي : من قالك غيري
دلع :هاا مافيه احد قال
..............
انتهى اتمنى تقرونها وتعطوني رايكم علشان اكمل
روابط الفصول
الفصل الأول .... اعلاه
الفصل الثاني .... بالأسفل
الفصل الثالث .... بالأسفل