[هاجر جوده]

يتبع البارت 3





ناظرت عمتها : مطولين !
ام فياض بضجر : دوبنا دخلنا !
وبعدين معك !
الجازي بانفعال : اذا رح ترافقي عمتي نجوى رح نبات هنا!
نجوى بمزح : افا يا قليلة الحياء !
الجازي بضجر : متى نرجع للبيت !
فياض من خلفها يتكلم : عجبكم شيء !
ام فياض : ايه
فياض متعمد : وش رايك يمه بهذه القطعه !
ام فياض ؛تجنن وحتى سعرها حلو !
طالعتهم الجازي وتحس نفسها رح يغمى عليها هذه اسعار طرية !
نجوى : لو تجيب لون اسود احلى !
صح يا جازي !
الجازي تقدمت بدون ما تشوف القطعة : وش دخلني !
تقدم منها ومد لها ديما : خذي احمليها شوي !
الجازي برفض : ظهري انكسر وانا حاملها خلينا نرجع للبيت !
نجوى : اقول طيري دوبني واصله ليه ما جبتم العرباية
ام فياض مدت يدها : هات انا احملها
مطت الجازي بوزها بضجر واخذت ديما منه !
توجه يشتري لعياله ملابس على ذوقه !
نجوى بضحكه: خير ما عمل لانك يا جازي اشك انك تشتري لعيالك !
مطت الجازي شفتها : الحين ملابس ديما مب حلوة ؟!
ام فياض تناظر فستان ديما : بالعكس حلو
الجازي وهي تمشي بشويش : هذا اشتريته من محلات إلي قريبه من بيت اهلي تخيلي بس ب (...) ..هذا المول يستغل الناس
نجوى ما عجبها الكلام : كل شيء بسعره !
ورجعت تتجول !
توجهت الجازي باتجاه فياض وهي تناظره منشغل بالاختيار ..متأكده زعلان منها تعرف طبعه اذا زعل ...وبمحاوله حتى ترجع المويه لمجاريها : تعال نجلس ننتظرهم يكملون العيال مب ناقصهم ملابس !
ما رد عليها يقال مندمج بالاختيار تكلمت تستضعفه : مب قادره اوقف على حيلي من التعب !
فياااض
ناظرها برفعة حاجب : مب قادره !
بس اشوف لسانك وش طوله !
سبلت عيونها ببراءه: انااااا
اخذ منها ديما بابتسامة ما يقدر يزعل منها كثير ...هذه الانسانه دخلت قلبه وعششت فيه ...يمكن يشوفها البعض عاديه او مب ذاك الجمال لكنها بنظره ملكة جمال فيها جاذبيه مب طبيعيه عيونها لوحدهم فيهم سحر ..مد يده ينزل عن عيونها حتى ما تبان : امشي قدامي اشوف !
مسكت الجازي بيد خالد بحرص ووسيم يركض امامهم ويضحك بسعاده ...
رفعت نظرها له وابتسمت : وش رايك نتعشى بالفلوس بدل ما تصرفها على الالعاب والملابس !
خزها بعيونه بابتسامه،: هذه المطاعم نصابه يقدمون لك وجبه ما تيجي بزاوية المعدة ويأخذون فلوس بالهبل!
يا حلاة العشاء بالبيت بأقل التكاليف !
قرصته بكتفه : تتمسخر علي !
الحق علي ابغى اوفر لك !،
ضحك بضحكة رنانه : انا ما ابغى توفرين لي !
ناظرته بمحبه وسعاده لكن بنفس الوقت كان جزء منها «رونق » تعيش حياة اضطراب وتشتت بدون ما احد يحس فيها او يعرف بوجودها !

**
**
•*
**
لجين بغيره : ليه يعني انت إلي خطبوك !
مع اني احلى منك !
رونق وهي تناظر نفسها بالمرايه وتتأمل وجهها : خذيه مبروك عليك !
لجين بحسره: وكيف أخذه !
تصدقين يقولون كل اهله بالخارج ساكنين وهو رح يسفرك معه ويعملون حفله برا ..والبعض يقول انه اهله ماتوا وما بقى له احد ! ذ
عايش لوحده علشان كذا يبغى يستقر ويتزوج مسكين ما يدري انه رح تقلبين حياته فوق تحت !
رونق التفتت لها : وش رايك نبدل بشخصياتنا تنتحلين شخصيتي على انك العروس وتتزوجين هالزفت مثل المسلسل إلي حضرناه
لجين تحمست : موافقه بس كيف ؟!
رونق بتفكير : ما اعرف دقيقه خليني افكر !
كيف كيف امممممم المشكله عند اهلنا !
مب عند العريس الاهبل لانه ما يعرف من فينا العروس !
لجين : فكري !
رونق بتفكير : اممم شوفي وش رايك تطلعين للعريس يمكن يتخرع ويهون عن الزواج وكذا نتخلص منه !
وش رايك !
لجين انتفخ وجهها بغضب : صدق انك قليلة حياء !
انت شفت وجهك قبل ما تتكلمين !
تنهدت رونق وبداخلها خوف: يا ليته يشوفني ويهج قبل الزواج
لجين مطت شفتها : وين قبل الزواج ! ترى يا حلوة باكر الملكة و الزواج
العريس مستعجل مسكين مستعجل على حظه النحس !
رونق تحس نفسها رح تبكي لما تفكر بالزواج ...اخذت نفس عميق ليه تضيق خلقها المفروض تفرح إنها مشكلتهم المادية رح تنحل !
ناظرت لجين بأمر : ابغى انام انتهت وقت الزيارة انقلعي على بيتكم !
لجين ضربتها على راسها وطلعت وهي تركض !
شتمتها رونق بصوت عالي ....
غمضت عيونها وبدات تبكي بصمت وهي تتمنى امها وابوها عندها !
تحس نفسها رح تنتقل للمجهول !
حباة جديده ظروف مختلفة ...ما تعرف اذا تقدر تتأقلم مع الوضع الجديد او لا !
**
**
**
جالسه بضجر بغرفة الصف وهي تسمع صديقتها المقربة تتكلم عن امها وابوها : صحيح انه بابا مب موجود لكن ماما عوضتنا عن كل شيء !
تخيلي امي رفضت الزواج حتى تربينا وما نعيش عند زوجة اب!
مب مثلك امك تركتك وتزوجت !
مريم حز بخاطرها هذه السالفة : بس زوجة ابوي مثل امي تعاملني وكأنني ابنتها ما احس انها زوجة اب
صديقتها مطت شفتها : لا يغرك مستحيل اكيد بتفضل عيالها لانهم بالاول والاخير يبقون عيالها !
مريم بعدم اقتناع: مب كله واحد !
صدقيني انها احن علي من امي الحقيقية !
صديقتها بخبث: انا لو مكانك ارجع ازور امي واخرب علاقتها بزوجها وعيالها واخرب حياتها !
وش تظن نفسها تخلف وترمي خلفها !
ما تفكر انها رمت خلفها بنت مشتتة محرومه تعيش مع امها وابوها حياة سعيده!
لا تقولين زوجة ابوك حنونه ومن هالخرابيط صدقيني تبقى زوجة ابوك !
تبغين تقنعيني انك ما تحسين بالنقص بين اخوانك !
اخوانك عايشين بين امهم وابوهم وانت لااااا
لا تقولين انك مبسوطه بينهم لااا هذه سعادة موهومه !
الحين لنفرض انها امي تزوجت وعشنا مع زوجها حتى لو عاملنا مثل عياله مستحيل يعوضنا عن ابونا الحقيقي !
ضاق خلق مريم من الكلام وبرجى : قفلي الموضوع ما ادري ليه كل يوم بعد يوم اتحسس من هالموضوع !
لما افكر انه كان لي اخت توأم ورحلت بسبب اهمالها اكرهها بزياده !
ما تدرين كم أتمنى انها عايشه وتشاركني حياتي !
تتوقعي لو عشنا مع بعضنا اكيد رح تكون حياتي غير !
على الاقل يكون لي رفيقة درب لي !
انا ما ادري احس بداخلي فراغ ...ما ادري وش ابغى بالضبط !
وانا صغيره كنت اسعد طفله على وجه الارض لكن الحين كلما اكبر يوم احس
سكتت وهي تمسح دموعها وبداخلها حزنها عميق كل يوم يزيد ...
**
**
**
واقفه على الكوشه وبداخلها قلق كبير بعد ما ملكت على شخص ما تعرفه !
مقهورة من عمها هدم كل احلامها ...كان نفسها تلتقي بزوج المستقبل وتعيش قصة حب معه مثل ما تشوف على التي في !
بس دوم حظها نحس بكل شيء !
ناظرت جدتها الي ترقص بفرح من حقها تفرح بعد ما وقعت على كنز يريحها من عناء الفقر !
ابتسمت وهي تناظر لجين ترقص مع جدتها بحركات مضحكة ...مسكينه ذابحه نفسها حتى تنخطب !
توسعت ابتسامتها وهي تشوف رفيقاتها بالمدرسه ...لوحت لهم بفرح وبصوت مرتفع : ياهوووووو
ام مرعي التفتت لها وهي تشوف رونق بدات تهز يمين وشمال وهي واقفه ..دوبها هاجده ومستحيه وش قومها يا فضحيتها الناس الحين تنقد عليها المفروض العروس تكون هاديه وما تتصرف كذا !
اقتربت ام مرعي منها وبحزم : اجلسي فضحتينا
الحين ينقدون عليك !
رونق بابتسامه : يا جدتي هذا يوم زواجي لازم اعمل إلي ابغى فيه
زوجة مرعي جلستها بالغصب :-اجلسي !
مطت شفتها بضجر منهم وسرعان ما وقفت بحماس لما شافت ابله الرياضيات وبصوت مرتفع : ابله سعاااااد !
ام مرعي تفشلت منها قرصتها بكتفها بقوة : فضحتينا !
رونق جلست ورجعت لها مخاوفها من الزواج !
مرت مراسيم الزواج وبدأ العد التنازلي لانتقالها لبيت زوجها !
اخذت نفس عميق وهي تحس نفسها بحلم وباي لحظة رح تصحى منه !
واقفه وتفرك عيونها بتوتر من الموقف وهي تسمع عمها مرعي يوصي عليها زوج الغفله !
ام مرعي وهي تبكي : ابنتي امانه عندك حافظ عليها !
مط شفته بطفش منهم لولا انه هالقريه ما يزوجون مسيار والا كان ما تزوجها كذا وارتاح من هالمراسيم !
ناظرها متغطيه كامل طولها متوسط !
الاهم تكون حلوة !
صديقه صورها له ملكة جماااال
فتح باب السيارة لها : تفضلي !
ركبت السياره بتردد وقلبها يرتجف من الخوف !
ناظرت عمها تبغى ترجع معهم خايفه من هالغريب ..لكن عمها مسك يدها ودخلها للسياره وهو يتمتم وهو يدعي لها !
لحظااات وغادرت السياره بهدوء ...تاركه خلفها القرية إلي عاشت فيها اجمل واتعس اللحظات !
**
**
**
جواد بحده : اشوف رجلك سلكت على هناك !
اسمعيني زين بيت وليد طلعيه من راسك انا ما ابغى اي علاقة بينهم تفهمين !
ناظرت ابوها وعيونها تلمع بالدموع حساسه بزياده ما تتحمل احد يكلمها كذا : بس يا بابا انا
جواد خفف نبرته : اسمعي كلامي يا مريم
عبود وهو جالس وبيده سبحه :ما عنا بنات كل يوم والثاني طالعات !
انقهرت من عبود بالرغم انه من عمرها الا انه له كلمه عليها ويتحكم وكأنه رجال كبير : انا اكلم بابا ما كلمتك !
جواد رفع حاجب بانتقاد :-اخوك واسمعي كلمته !
مريم بضعف وهي تناظر اخوها : ليه حضرتك تزور بيت جدك
عبود مط شفته بسخريه : الحين تذكرت حضرتها انه بيت وليد بيت جدك !
وباكر تطالب تزور امها في بيت زوجها !
انقهرت من عبود وتدخلاته ..ناظرت ابوها شوي وتبكي : بابا يعني انا لي بنات خالات ليه ما اتعرف عليهم !
جواد ينهي النقاش : ما بدنا هالمعرفة هذه بنات عمك حولك وانتهينا !
مريم ناظرت الجازي وهي داخله ومعها شاهي !
عبود بسخريه : تعالي يا يمه اسمعي اختي الرقيقة وش تبغى !
تبغى تروح اليوم لبيت وليد !
الجازي ناظرته : وش فيها بالاول والاخير هم بيت جدها !
ناظرتها مريم وابتسمت بمحبه لهذه الانسانه !
جواد بحزم : قلت قفلي الموضوع !
قومي يا مريم شوفي اختك صحيت والا !
وقفت وناظرت عبود بقهر مراهق وعامل حاله رجال عليها!
عبود بضحكه : لا يطق لك عرق !
الجازي بعد ما طلعت مريم ناظرت جواد بعتب : خفف نبرتك معها الحين مريم بسن
قاطعها : اعرف كيف اتصرف معها !
الجازي بتذكير : لاتنسى وصية جدي!
سكت جواد للحظات وبعدها تكلم : انا أرسلها بالوقت إلي اشوفه مناسب !

**
**
**
دخل عند امه وجه اسود وملامحه ما تتفسر !،
ام مرعي قلبها هبط لما شافت ولدها كذا : مرعي وش صاير !
جلس ويحس ضغطه مرتفع : مصيبه يا يمه مصيبه الا قولي فضيحه !
ام مرعي ما بقى فيها حيل : وش صاير تكلم تراك خرعتني !
زفر من هول المصيبه : اليوم التقيت بالصدفه مع رجال اعرفه وتبادلنا الكلام والأحوال
ام مرعي صبرها نفذ : ايه وش صاير !
ناظر امه وجهه اسود من الهم : يقولي بعد ما خبرته عن زوج رونق يقول هذا واحد لعاب يتزوج مسيار كل يوم مع وحده ويتزوج الحرمه اسبوع ويطلقها !
ام مرعي تحس كل شيء حولها أسود : حسبي الله عليكم والحين جاي تتكلم !،
انت ما سألت عن الرجال !
هز راسه بالنفي : مرزوق يقول صديقه مدحه كثير ووضعه مرتاح
قاطعته بغضب :-اعمتك فلوسه !
وش نعمل الحين اذا طلقها يا فضيحتنا بالقريه وش رح تقول الناس عنا !
مرعي سكت لوقت قصير وهو يسمع امه تثرثر فوق راسه بغضب !
اخذ نفس عميق و بعدها تكلم : اسمعيني زين لو صار هالشيء
ما في حل الا .........
فتحت ام مرعي عيونها بدون ما تنطق حرف واحد !

**
**
**
انتهى البارت ...انتظروني يوم السبت بإذن الله ...دمتم بخير !