[فيتامين سي]

البارت12

"جئتُكِ من كل منافي العمر ،
أنام على نفسي من تعبي."

يوم الوفاة الثلاثاء الساعة 10 الصباح
واقف بعد ماخبرهم الدكتور

تقدمو همام وباهي : انت اخرت العملية وانت عارف ان حالة ابوي تخلبطت فجاءه

وخر ايديهم واسند ظهره على الجدار بتعب
والتزم الصمت

ثار همام وهو يضربه على صدره بقوه : انت ذبحت ابوي انت السبب

باهي ابعد همام عن ضيف : اتركه ماتشوف الدم اللي على ثوبه

دنق راسه ضيف وهو يطالع ثوبه عقد حواجبه بصمت رفع عيونه الحمراء لهمام وباهي: اذ
عندكم شك اني ذبحت ابوي او تسببت بوفاته ابعدو عني ماني محتاج خوتكم لو كان بقلوبكم ذرة شك بطلع الحين من المستشفى بس ما اظن بتشوفني مره ثانيه

مشى وهو يضغط على كفه بقوه لحقوه همام وباهي : ضيف ضيف وقف

وقف وهو ياخذ نفس بصعوبه: للحين عندكم شك

وقفو قباله وهم يطالعونه بعيون دامعه تكلم باهي بنبره مرتجفه: ماحنا شاكين فيك بس لحظة غضب وعدت

همام وهو يمسح عيونه: اسف بس

قاطعهم وهو يضمهم له ويطبب على ظهورهم على خفيف: لحظه وعدت

ابعد عنهم : بخلص اجراءات الوفاه وبعدها بنطلع للبيت نبلغهم

اشر على همام: خلك معي وباهي انت اقرب واحد للبنات اطلع لهم الحين وبنلحقك بعد مانخلص

هز راسه وهو يمشي طالع لبرا المستشفى


بالبيت جالسين بالصاله كلهم متوترين دخل باهي وهو متلثم وعيونه حمراء

فزت ام رنوه وام همام: دخل العمليات

نطق باهي ب اسى: ابوي يطلبكم الحل

طاحت تبكي ام همام

تصبرت ام رنوه وهي تمسح دموعها: عمامك

قاطعها بكرهه: اكيد انهم دروا

مسكته / روح لهم ياباهي

مسك ايدينها : ضيف يقولهم

تقدم لخواته اللي يبكون ماعدا بسيل اللي واقفه تطالعهم بجمود ضمهم وهو يهديهم

عقدت حواجبها وهي تطلع فوق

سكرت باب الغرفه جلست بالارض وهي تضرب قلبها بقوه وعيونها مليانه دموع: لاتبكين لاتبكين محتاجينك غمضت وهي تاخذ نفس بسرعه

بالسياره :

دق جواله تنهد وهو يطلعه : الو

رد عليه بشماته: توفى عمي الصراحه مدري منين تلقاها مسكين ياضيف الكل يتخلى عنك لا ام ولا ابو

رد وهو يحط ايده على راسه : فايز ترا مالي خلق لك وعطني الضابط اللي سمح لك تكلم

التفت همام ب اهتام وهو يسوق ومركز مع ضيف

فايز بسخريه: شفت هبوب اللي دايم تحطها صح بالاخير كذبت عليك ووقفت معي تذكر عدل وش صار بعرسك ولا اذكرك وزياده على كذا بنتك ابشرك بالعنايه اتوقع مافي احلى من هالاخبار ابوك وبعدها بنتك وبعدها انت

سكر وايده ترجف من القهر : حسبي الله عليك يافايز

همام بخوف وهو يشوف وجهه مختنق وجسمه يرجف من القهر: ضيف تبيني اوقف الاقل اجيب لك ماء

اخذ فتره وهو يتنفس بسرعه بعدها هدا لثواني وهو حاط يده على صدره: حرك للبيت بسرعه

همام ارتبك وهو يشغل السياره من جديد ويحرك بسرعه


وصل البيت وهو ينزل والعصبيه واضحه بوجهه

دخل همام وهو يطالعه واقف يناظر الباب
صد بعيونه لفوق وهو حاير مايدري وش يسوي

طلع جواله وشاف رسايل سعود يتوعد فيه يبي سيارته دق من غير تردد

وبصوت مخذول: وش السوات لشخص قدمت له كل شي ولازال يطعن فيك ويخذلك انفجر اعصب اوريهم قوتي اطلع حرتي فيهم ولا اسكت واظل ساكت مثل ماصار من ثلاث سنين ؟!

سعود تعدل وهو يرتكي على المركى:ليه تحط له قدر من الاساس دام بين معدنه لك يستاهل تنفجر علشانه يستاهل تحرق من نفسك علشان شخص يتلذذ بتشتتك تماسك ماعلمتك العسكريه كيف تنسى اوجاعك وتبدا الحرب من جديد ماعلمناك كيف تقوم بعد ماتطيح كم مره شفت ناس مظلومه وقضايا تشيب الراس تسوى عند مشاكلك ولا مشاكلهم اعظم

قاطعه بنبره مخنوقه: بلاك ياسعود ماتدري وش اللي محرقني ومخليني كذا ضعيف من جهتم

سعود بفزه : معاك باللي تبي اشر وانا لها ياضيف ماعاش من يضايقك

ضيف: ابوي توفى تغير صوته وهو يحاول يتماسك: لازم اشوفك اليوم
سعود: اصلا انا جايك الحين
ضيف : لا تجي لين انا اجيك

سعود ب استغراب: طيب

سكر الجوال وهو مو عارف وش السبب اللي يخلي سعود شخص مريح بالنسبه له وهو اللي تعود مايقول لاحد عن اللي بداخله هز راسه وهو يدخل

توجهه للمجلس وهو يتنتح : ابوي يطلبكم الحل والدفن اليوم العصر

فز جده وعمامه وهم مصدومين

نطق ضاري اللي توه داخل: قولهم سبب الوفاه

شد على يده بقوه وهو يحاول يضبط عصبيته وهو يطالعه له ب استصغار

كمل ضاري: علشان ضيف تاخر رفض عمي يدخل العمليات

دخل باهي وهو يطالعهم: غريبه وش عرفك وحنا ماشفنا حتى زولك لايكون انت اللي رافع ضغط ابوي

غمض بهدوء وهو وده يتخلص من اللي قدامه واحد واحد: الرجال راح لرحمة ربه وبنبدا نستقبل العزا بعد الدفن اللي يبي يبيض الوجهه ويوقف معنا حياه الله واللي يبي يضايقنا هذاك الباب

طلع وهو متجاهلهم

دخل البيت وهو يطالع لخواته اللي لابسين عبايتهم ويبكون مانطق بحرف وصعد لفوق

بدا يضرب الباب بقوه وهو يناديها: بسيل اطلعي بسيل

صرخ بقوه وهو يضرب الباب بكل قوته

فتحت الباب ببرود : شتبي

دخلها للغرفه وسكر الباب
ضمها على طول بقوه: ابكي لاتسكتين اصرخي ب اعلى صوتس ادري ان قلبتس يحترق

بسيل بوجع: ماقدر ابكي عجزت ضيف

ابعدها وهو يطالعها بود : لاتصيرين نسخه مني اصرخي ب اعلى صوتس

تطالع له بضياع غمض عيونه وهو يهز راسه لها

صرخت بقوه وبعدها بدت تبكي ضمها وهو يجلسها على سريرها طبطب على ظهرها بحنيه
: تصدقين ماقد خفت على احد قد ماخفت عليتس اول وحده فكرت اواسيها انتي

بسيل وهي تشاهق: من متى وانت تعرف بحالتي

ضيف وهو يلعب ب اصابعها: من زمان من يوم بديت استفزتس واتهاوش معاتس علشان تفرغين اللي بداخلتس

مسحت دموعها وهي ترفع نفسها وتحب راسه

: مشكور

مشت من جنبه بتطلع بس مسك ايدها وبنبره حنونه: لاتنسين اني موجود علشانتس بس وحطي ببالتس ان خواتس بكفه وانتي بكفه لحالتس

بسيل اهتزت شفاتها وهي تهز راسها

طلعت وبقى هو جالس غمض عيونه وهو يردد بداخله : ثلاث ايام بس اصبر فيهم

مر اليوم مابين حزن وصبر لبعضهم

ب اخر الليل جالس بمجلس سعود ينتظره

دخل سعود ومعه دفتر وقلم وابيده الثانيه شبسات كثيره

طالعه ب استغراب : ليش كل هذا

سعود وهو يجلس قباله: ماعليك منه وعطني السالفه من البداية وبعطيك راييي

بدا بسرد سالفته لسعود تجاهل بعض تفاصيلها وعطاه المهم

بقى سعود ساكت لدقايق وبعدها بدا يفتح الشبسات وحطهم قباله وبدا ياكلهم

طارت عيون ضيف من تصرفه: هيه شتسوي انت

سعود رفع عيونه : انت شبلاك تقاطعني خليني جالس افكر كيف احل مشكلتك

ضيف ب استنكار: كذا تحل مشكلتي

هز راسه وهو يأشر على الشبسات هذا انت وهذولا جدك وفايز وهذا ضاري وهذي بنتك

مسك راسه وهو يررفع راسه لفوق: توني احس اني تنكه يوم جيتك

سعود وهو يكمل اكل والقلم مثبته خلف اذنه : من زمان تنكه توك تدري

ابعد الاكل وحط دفتره بالارض سحب القلم وهو يتكلم بتفكير: لو بديت تحقق مع عمك بتقوم الدنيا فوق راسك ولو اشتكيت هم بتصير مشكله كبيره وخصوصا انت بفترة عزا يعني من فاضي لسوالفك ثانياً بنتك يمكن تكون سالفه وهميه من فايز ويمكن تكون حقيقه وعلشان كذا لازم نتاكد اتصل على المستشفى الحين وبنشوف

طلع جواله وهو يعطيه سعود وبنبره مكسوره:

كلمهم انت انا ماقدر

هز راسه وهو يتصل

ثواني وجاه صوت الممرض

سعود : السلام عليكم

الممرض : وعليكم السلام

سعود: بسال عن طفله دخلت العناية المركزه

الممرض : والله ياخوك اكثر من طفله جتنا بالعنايه بس قبل كم يوم جتنا حاله حرجه وكانت طعن لطفله عمرها ثلاث سنوات دخلت العنايه وامس توقفت دقات قلبها بس الحمداله انقذها ربي والحين هي بالعنايه المركزه ودخلت غيبوبه

سعود بصوت هادي: شسمها طيب

الممرض : توق عبدالعزيز ...

سعود طالع لضيف اللي وقف وعيونه طايره سكر على طول وهو يمسكه من ثوبه: وين رايح

ضيف بعصبيه: سمعت قال توق هالاسم متفقين عليه حنا يعني بنتي كيف كيف طاوعهم قلبهم يسون بطفله كذا كيف والله لا اوريهم والله لا اعلمهم ان لله حق

لوى رجله وطيحه بالارض وبعصبيه اقوى منه: خبل انت بتفقد البنت كذا فكر بعقل لو رحت الحين وتذابحت وياهم وش بتستفيد اجلس خلني اشوف حل يرضي الطرفين

جلس وهو يتنفس بقوه : سعود خليني اروح سعود ماني بخير لو جلست هينا لثانيه وخليتهم

صرخ عليه: مالك طلعه

تخصر وهو يعطيه الاوامر: اول شي تسويه تسوي نفسك مانت داري عن شي لين يخلص العزا
ثاني شي زوجتك حاول ب اي طريقه تجيبها لبيتك ولاترجع مع اهلها

ثالث شي امسك نفسك وبكره انا بطلع لسكاكا وننقل توق هينا بكلم الضباط ومراح يقصرون معنا

وبنرفع قضية تلاعب بالنسب وبكذا كل الاطراف بتكون بالسجن وش تبي احسن من كذا

/ وش يصبرني وبنتي بينها وبين الموت شعره ضرب صدره بقهر: طول الثلاث السنين كنت ارسل لعبدالعزيز فلوس خوف ينقص عليه شي وبالاخير هذي سواته

سعود جلس قباله وهو يحط ايده على كتفه: ماهو وقت تحاسب نفسك ابيك تخطط معي شلون ناخذ زوجتك من الفندق من غير لاتحس وعمامك بنلعب فيهم بس نضمن جيت توق

وقف : بتروح معي لبيت الضابط ... اكلمه بموضوع توق

هز راسه ب لا : ماني رايح برجع البيت

سعود : اقابلك بعد ثلاث ايام

هز راسه بضياع وهو يطلع
____
اليوم الثالث بعد انتهاء العزا الصباح

داخل غرفته:

: سعود انت صادق

سعود ب ابتسامه: ايه العصر طيارتها وتاكدوا من كل اوراقها والتحاليل اثبتت انك ابوها وبدت المحكمه بالقضيه

ضيف وهو يوقف : يعطيك العافيه ماقصرت ياسعود
سعود: اقول تقوى ومرتك بتسافر لـ المانيا مع خالها طلبت توصيل للمطار

ضيف : تعرف شتسوي

سعود : ابشر

ابتسم وهو يسكر الجوال والامور بدت تنحل بالنسبه له
_____
بالوقت الحاليي


تعالت صراخاتهم بعد دوى صوت الطلق الناري

رفع راسه ضيف وهو يطالع لسعود مبتسم: وصلت وصلت

رد له الابتسامه وهو يحذف ابو هبوب بالارض: بيض الله وجهك

دخلو الشرطه تقدم سطام وهو ينطق: سيدي عبدالعزيز ... وضاري.... مطلوبين للامن

ضيف وهو يأشر عليهم : حياك هذا عبدالعزيز وهذا ضاري
بعد ما اخذو عبدالعزيز وضاري وابو هبوب

وقف سطام بجنب سعود اللي جالس يطالعهم ويبتسم : تراك محاسب لاتنسى انك استخدمت سلاحك بغير مكانه وهذي بحد ذاتها عقوبه

تكلم ضيف وهو جاي لهم: حي الله سطام سحب سعود بجنبه: وش دليلك ان سعود صوب

سطام طالع لضيف وابتسم : ماقدر عليك

ضيف وهو يطبطب على كتفه: اعتبره رد جميل

ابعد سعود ذراع ضيف وهو يهمس له: سيارة اهلك بتوصل الحين

هز راسه وهو يوادعهم

وقف برا وهو يطالع السياره اللي وقفت

تقدم وهو يفتح الباب لها وبنبره صارمه:

لتس خيارين يتنزلين معي ونكمل مع بعض
يا ترجعين لـ الالمانيا مع ورقة طلاقتس

الى هنا.