[فيتامين سي]

السلام عليكم
رواية هذيان بين جمر وجليد
البارت الثامن
نورا ناصر
هذيان بين جمر وجليد..
هذيان .. كلام مفكك غير معقول كلام لا يفهم..
جمر .. قطع متقدة من النار ..
جليد .. رجل قوي صبور ..
هذيان يمثل فرح .. جمر وجليد .. الامير علي الدر..
سراب الحقيقة بين الكذب قد خطف..
أهذي من صهد الحزن والأسى..
رفقاً بقلباً قد اضطهد .. مات الحبيبُ..
ومات قلبي ظلماً .. فرفقاً .. بقلباً ..
كان وطن فأصبح منفئ.. مقيدة تلك الاماني..
بأغلال جمراً .. احساسي كحقيقة والخيال حيث لامنطق يعقله..وماذنب قلبي غير الهوى ..
جليد بين صخوراً ورماد .. يلتهب حقدي ويملئ ثنايا القلب بين ذكرياتي المحطمات..
بقلمي سمسمة
"
توجهت لهيام خنكتها من ركبتها وصفيتها على الحايط عطت بوجهه شسويتي بيها ولللج ؟
هي لزمت اديه تريدني اخلصها من قبضتي وملامحها متوجعة ، حسيت بنفسي راح اكتلهه خلاص .
سمعت صوت ريلام تصررررخ
مهييييب راااااح امووووت .
عمر مهيب وروحه .. ....
تركت هيام دفعته عني بقوة حتى هي وكعت بالكاع ..
ورحت لريلام دنكت عليها شفت ايدها وساعدها كله مصلووووخ وتبجي خلت راسها على صدري وتبجي بحررركة والم موجوعة .
كتلها بخوووف عمري لاتبجين هسه اخذج اوديج للمستشفى يعالجوج .
سمعت هوسة صارت يمي والكل اجه للمطبخ بس اني ما اهتميت ولا رديت على اسألتهم ، رفعتها من الكاع وطلعتها من المطبخ وركضت بيها للسيارة .
فوتتها بالورى وهي تلووووب من الوجع تمنيت الوجع بيه ولا بيها شون احمله عنج وشون احميج من الالم .
والله كرهت نفسي بهالدقايق واللحظات العصبية تمنيت ماجاي للدنيا ولا اشوفها هيج كبالي .
سمعت صوت عمتي وراي تسألني شبيها وشون احتركت ؟
صيحت بدون وعي : ما اااا دري سألي بنتج العايقة هياااام .
_ انت مو جنت بالمطبخ مهيييب احجيى لك وين رايح انتظرني تلبس واجي وياك .
صعدت بالسيارة وسقتها بسرعة شفت الفلاح فتح الباب الرئيسية طرت بيهاااا ، شفت عمتي بالمراية تأشرلي انتظر مهتميت وطلعت .
واسمع تأوهات وجعها ، ضغطت على الستيرن قوووي
تمنيت اشيل الوجع عنها شيصير لو اني محترك احسن ولا هي يربي رقيقة شون تتحمل هالوجع .
واالله احس روحي شاغت مو روحها احس الجاي صلخ جلدي مو جلدها گلبي محترك حررررگ عليها امشي بالسيارة واسب بالسواق الي يصيرون كدامي ويأخروني .
يرجعلي عقلي لحظات واتذكر هي تخاف من العصبية ومن السرعة ومنا محروكة وتلوب .
مخليه ايدها الصاحية على زندي وراسها ع الكشن الوراي وتبجي وتكول مهيب راح اموووت عفية موووتني الالم ماينحمل .
اني فقدت ونسيت نفسي اجاوبها بلا وعي مني
عمري حبيبتي ريلام فدوة تحملي هاي وصلنه وصلنه حياتي .
وصلنه للمستشفى نزلتها جان شالها مخربط عدلته الها ودخلت شعرها بملابسها وجوه شالها .
اجيت اشيلها تمتمت متوجعة وتبجي اكدر امشي .
دخلنه للمستشفى اخذوهه ينظفون الها الجرح وهي متوجعة وتبجي وتصرخ .
كلت للدكتور بعصبية انطيها مسكن شي مو هيج تخليها تتوجع .
هو خلى ايده على صدري وكال اطلع خلينه نشووف شغلنا .
لزمت ايده عصرتها قوي وخزرته .
سمعت صوت ريلام تكول بوجع مهييب .
باوعتلها جانت عيونها تتوسل بيه لخاطرها ابتعدت وطلعت .
بقيت انتظر ، يتصلون بيه ومااجاوبهم اجيت اكسر التليفون احس نار تطلع من گلبي . واذا طلعت من جوفي تحرك كل الكون .
لشويه اجت الممرضة كالت فوت اختك تريدك .
صفنت بوجهه ثانية وحدة وبعدها سألتها منو گلج هي اختي ؟
جاوبتني بسرعة : هي گالت .
تنفست بعصبية وفتت عليها نايمة ع السدية ركضت الها بست راسها وباوعت لعيونها وايدي على راسها .
كالت مهيب ..
حجيت بلهفة وخوف : يابعد عمر مهيب وروحه
كوليلي شون تحسين هسه ؟
نظرات عيونها تغيرت صرت اشوف بيها الخوف ..
همست بتعب اريد ماما .
هسه اخابرهم تدللين .
فرح .. كلشي ماحصلت من اسمي وماشفت الفرح يمكن فرحتي الوحيدة لمن الله رزقني ابني واتمنى مايحرمني منه .
لان تعودت اخذ من الفاء فراق ومن الراء رعب
والحاء حزن ، حرب ، حرمان ، حسد وحقد وماعرف شمضموملي .
اجتني موج وجهه يشمر الوان وبيدها داني
باوعتلها شكو شصاير .
كالت ريلام وسكتت تباوعلي .
نزلت من السرير بسرعة برهبة سألتها شبيها ريلام .
يكولون احتركت بالجاي ..
لا يا الله لااا يا الله ، موووج انت متاكدة ؟ خاف ذيج هيام مو هيه ؟
لا والله متأكدة هيه ومهيب موديها للمستشفى .
خليت اديه على راسي لاياربي كلشي ولا ريلام والله حبابة وفقيرة وقلبها طيب جنها نسمة هوا باردة بعز الصيف ماتستاهل والله ماتستاهل .
مرت الدقايق عصيبة كولش ، محبوسة بالغرفة وما اكدر انزل ، موج كلساع ادزها تروح تشوف وضع ريلام شنو اجت لو بعدها ؟
لليل يله دخلت موج كالت اجت ريلام .
طفرت من مكاني صدك اجت وشلونه وضعها ؟
خطية متوجعة حيل
وينها هسه هيه بغرفتها ؟
اي بغرفتها ..
فتحت الباب وطلعت ، حسيت بموج تلزمني من ملابسي ، باوعتلها معصبة ومستفسرة .
كالت بنبرة مقنعة : البسي يمعودة كوة تردين تجيج الحجاية .
_ معليه بيهم خل يحجون هم رادوني يمهم وهم يكولون عني مخبلة خل يستلمون لعد .
_ انت تضرين نفسج ماتضرينهم وخطية حمدان انت مو تحبي التزمي بالعدة مالتج فرررح وهمين لخاطر بابا خطية ترى هم تجي حجاية .
كلامها خلاني اتراجع فعلا ولبست بسرعة وطلعت واني متوجهة لغرفة ريلام دخلت شفت هيام يمها وامها .
رحت يمها بستها على خدودها وموج فاتت وراي
حبيبي دانيال ظل يبجي يريدها تشيله وهي خطية
هم ظلت تبجي ، موج قربته منها وباسته على خده
هو تمسك بملابسها قوي كوة شلعته موج منها .
ام رحاب كالت مدام انتوا يمها انزل اني احضر العشه للخطار امشي هيام ساعديني .
وطلعن اثنينهن .
سألتها ريلام شون احتركتي ؟
ظلت تحجي وهي متوجعة : جنت واكفة على الطباخ اسوي بيضة للطفل الي لكوه ، الجاي جان يفور اجت هيام سحبته وانكب عليه .
لطمت خدي : عزاااا بعينها ان شاءالله الحقيرة اكيد هيه حركتج .
حسيت على موج تدغني التفتت شفت هيام واكفة
وعيونها تشع منها خباثة كره وحقد .
كالت : انت هيييه شنو حركتها احجي عدل ترى كله جان مجرد حادث لو انت تخبلتي رسمي هسه وبشهادة الكل بعد الي سويتي بأول يوم الفاتحة وجاي تتهميني الي بحرك اختي .
وكفت على حيلي لعد منو سحب القوري وكلبه عليها غيرج انت ؟
_ انت بعدج مصرة اني حركتها ريلام احجي شي ؟
ريلام دارت وجهه منها وهيام طلعت برى الغرفة وطبكت الباب حيل ، فز دانيال وظل يبجي اخذته موج وطلعت .
شفت دموع ريلام تنزل ، مسحتهم وبستها
سالتها شبيج عمري ليش تبجين احجيلي شنو الي صار ؟
بغصة جاوبتني والعبرة خانكتها : فرح انت مثل ما كلتي مهيب من صدك يحبني واليوم تأكدت من هالشي .
بقيت اباوعلها باستغراب : هالشي اله علاقة بالحادث الي صارلج ؟
بجت بحركة وظلت تحرك براسها يمين ويسار
_ لأ بس حرام اني اخته وهو ما معترف بهالشي اني اخته بالرضاعة .
مسحت دموعها وظليت العب بشعرها وهي استمرت تحجي وهم تبجي دموعها مابطلت تنزل مثل المطر .
_ اليوم النظرات الي شفتها بعيونه تختلف لهفته خوفه كلامه سويت نفسي نايمة اسمعه يهمس يمي احبج .
خفت فرح خفت وجسمي ارتعد واني وحدي يمه بالمستشفى وبعدين بالسيارة .
حسيت داخلي صار ثلج وحاولت ابقى هادئة ، توسلت بي يجيب ماما ميقبل خفت منه حيل .
مااكدر استوعب يحبني واني من كل عقلي معتبرته اخويه واشاقي ومفرعة كدامه شمدريني بحقيقة مشاعره .
فرح .. ما عرفت شنو اجاوبها بس سألتها وانت ريلام شنو رأيج بي ؟
كالت بفزع : فرح مهيب اخويه تعرفين يعني شنو اخويه ومحرم عليه . هذا الحب حراام حررام .
_ انت شمدريج ؟ مامعقولة خالج علي الدر ماحسب حساب هاي اللحظة وسمح لمرته ترضعج .
_ ما اعرف ما اعرف فرح اني بعد حتى ما اكدر اخلي عيني بعينه ولا احجي ويا ولا اسمع منه شي ابد . ولااريد اشوفه .
خليتها نامت دموع الالم مبللة رمشها ، وغاسلة خدها خطية مصدومة جانت معتبرته اخ الها .
غطيتها عدل باوعتلها جانت ملامحها مسيطر عليها الحزن مااتستاهل الحزن والالم مو الها .
طلعت من الغرفة بعد ماسديت الباب وراي بهدوء وميتة قهر عليها .
شفت بلقيس لازمة موج وتحجي عليها .
_ انت كلج ضيفة هنانه هذا مو بيتج وعيب عليج تسوين بلبلة بين الاخوات كل الي صار حادث وبنتي مستحيل تحرك اختها .
رحت بسرعة مشيت وصرت يمهم وكفت متفاجأة
_ شبيج بلقيس انت شنو دتحجين ويه اختي هي شنو سوت حتى تكوليلها هيج .
باوعتلي : يعني ماتدرين مو جنتي موجودة انتن شون تتهمن هيام بحرك ريلام شبيجن تخبلتن انت واختج ؟
تفرعن الشيطان فوك راسي وعطت بنص وعي
_ اختي شعليها كلمة وحدة ماحجت ، انت شوكت تخلين حد لبنتج ام الفتن والجذب شنو من تربية مربيتها جان تعبتي نفسج وربيتيها شوية عدل مثل
ما ام مهيب الله يرحمها ربت ريلام .
اني كلت هيج وهي تخبلت وظلت تصيح
_ امشي المخبلة انت تعلميني شون اربي الله يطيح حظج اله اخليهم يشمروج بالشارع وياخذون ابنج منج ما اطلع بلقيس بس بسيطة .
_ هههاي خوفتيني وانت منو يابه حتى تخلينهم ياخذون ابني ؟ الشيخ بنفسه طلب ابقى هنا مو بكيفج انت وتطرديني.
ظلت موج تسحب بيه وتكولي امشي امشي لخاطر ريلام خطية تعبانة .
هديتها مني بقووة وخررري خلي اروح للشيخ خلي يحط حد لهاي المهزلة مايصير هيج .
بلقيس : اي هي سمعتكم تحجون ويه ريلام وتحرضوهه على اختها بلله انت مخبلة وادري بيج تكرهين هيام بس اختج شكو تحط روحها بين الخوات .
موج بهدوء : ما اعرف شنو تريد تثبتلج بنتج لمن وصلتلج هالكلام الغلط بس كلش عيب عليها اني ما حجيت وهاي ريلام كدامج شاهدة روحي احجي وياهه كبل لا تتهميني بدون وجه حق واني محترمة نفسي ووجودي بهذا البيت بس الظاهر اكو الي مايحترم .
جرتني موج ودخلنه للغرفة موج كالت راح اخابر احمد يجي عليه حتى اروح بعد ما اتحمل ابقى ابد .
موج اني ادري بيها هاي هيام مريضة تريد بس تضوجني وراحت كالت هالكلام لامها بس والله ما ابقى هنانه اني همين خلي نلم اغراضي واروح وياج .
والشيخ اني احجي ويا .
وفعلا لميت اغراضي وخليتهم بكم جنطة ، اكثر شي ملابس دانيال ونزلنه جوة . سألنه عن الشيخ
كالوا راح يودي الطفل لاهله .
طلعنه كعدنه بالحديقة ننتظر ولابسين والجنط يمنه
رادت موج تخابر احمد بس كتلها انتظري .
ورى نص ساعة يله دخلت سيارة للكراج ونزل منها الشيخ وشرار ولهيب . من شافنه كاعدين برى استغرب واجه باتجاهنا وظل يباوع على الجنط وعلينه .
رحت وكفت كباله وحجيت بنبرة حزم ..
_ شوف شيخ علي اني مستحيل ابقى هنانه ما اتحمل مشاكل هستوها هيام سوتلها مشكلة اكبر من راسها وعلى اثرها انهانت اختي بدون ذنب .
باوع لموج وكال بويه موج اخذي الولد من اختج ودخلوا الجنط جوة او صعدوهم فوك وانت فررررح تبعيني للمكتب .
وكفت بمكاني عبالك من صدك معتبرني مخبلة وما مهتم .
كتله هواي واثق من نفسك كتلك اني ما ابقى هنانه بعد وانت لازم تتقبل موضوع طلعتي من البيت اليوم قبل باجر .
صعد بايتين من الدرج الي بواجهية البيت وهو منطيني ظهره كال : اني انطي الاوامر ما استلمها كتلج دخلي للمكتب خلي احجي وياج وابنج انطي لأختج خلي تاخذه وتصعد .
جانت نبرة صوته تخفي هواي شغلات ، دخل لغرفة المكتب وجانت تحيط بي هالة من القوة . عرف بيها دخلت وصارت ويا بنفس المكان بقى منطيها ظهره
حتى يحرر نفسه من تفكيره بيها ، ويركز على الموضوع الي راح يحجون بي .
فرح .. انطيت دانيال لموج ودخلت وراه لغرفة المكتب المقر مالته الي ينطي بي اوامره ، عبالك بس من هالمكان يكدر يتحكم وينطي اوامر .
اجاني صوته وهو منطيني ظهره : احجي شعندج ؟
نبتت اظافري براحة چفي ، انتظرت حتى تنتظم انفاسي ورحت صرت مقابيله باوعت لعمق عيونه .
_ الظاهر يا شيخ انت ماتكدر تخلي حد لهيام واني بصراحة اعرف تنتظرني مشاكل هواي هنانه لذلك اني قررت اخذ ابني واروح احسن والدرب مو بعيد تكدر تجي وتشوفه بآي وقت .
باوعلي بنظرة فاحصة ولنفس الوقت نظرة رجل لامراة
بلهجة لا ابالية كال وهو يبتعد بخطواته عني ويتوجه لمكتبه كال خلصتي ؟
_ لا ما خلصت هذا الموضوع ماينتهي اله لمن اطلع من البيت .
_ شنو الي صار واستجد هسه ؟ انت كلساع برأي مو قررتي تبقين؟ انت تعرفين هيام كلش زين ماريدج تحجين وتقنعيني انت ماندكيتي بيها لان صرت اعرفج وانت هم تعرفين هيام طفلة او بالاحرى عقلها طفولي .
قاطعته : لأ هيام مو طفلة وانما مامرباية .
انفجر غضبه فجأة ووالشر صار يطلع من عيونه
ظل يهتف بوحشية ..
: اخر مرة من احجي تقاطعيني واخر مرة تكولين عنها هالكلام ما اسمح الج .
ولا تظليني تصرعيني وتهددين اروح واروح بكل مشكلة وعركة نسوان اذا تردين تطلعين ذاك هو الباب يوسع فيييل روحي ذاك الدرب بس الولد يبقى هنانه .
اريد احجي سكتتني نظرات عيونه القاسية واالباردة
كمل كلامه : مو جديدة عليه عركاتج ويه هيام ولا جديدة عليج انتِ تعلمي شلون تتعاملين وياها ماظل اعلمج انه .
ابتسمت بسخرية ولا مبالاة اباوعله واعتبره عدو لدود وهو يحاول بكل ما اوتي من قوة يبعد نظراته المتوعدة
عني .
ترى اني اعرف وافهم كل زين انت ما إلك ادنى حق بأبني انت مجرد عمه مو أبوه!!! واذا بقوتك وجبروتك تستولي عليه اخذه منك بالمحاكم .
كعد باريحية على الكرسي ومد ايده وبنبرة قوة ممزوجة بسخرية اكبر تكلم : مادرست قانون ولا حصلت ماجستير ولا مشيخة جم سنة حتى انتِ تتغلبين عليه وتكدرين تلوين ذراعي .
انه اكدر اثبت انج ما مؤهلة لتربية الطفل فلا تخليني اتخلى عن شهامتي وياج الولد يبقى هنانه يعني يبقى هنا وهذا اخر كلام عندي .
انت تردين ترحين الله وياج روحي وحدج وابد لاتحلمين تاخذين الطفل .
بس اريد اذكرج بشغلة انت غافلة عنها وناسيتها حصتج بورث حمدان الله يرحمه لاتجين وتطلبينها مني اخذيها من حسان وانه ابد ماراح اتدخل ولا ارجعلج حقج لا تحلمين بمساعدتي ومساندتي .
جاوبت بعصبية وكل اعماقي مهتزة : حسان شكو وشعليه حسان بعد ؟
جاوب بقوة وثقة : حسان وحمدان اخذوا حقهم من ورث ابوي وامهم وهسه حصة حمدان يم حسان .
الولد ابنج وابن اخوي مسؤؤليتي انه اتكفل بي منا لمن يكبر ويصير رجال ويعتمد على نفسه بس انت مالي شغل بيج اذا طلعتي منا ولا تجين تشكين يمي عن اي شي يصير بيج وانت طالعة من هذا البيت .
بصوت مهتز جاوبته الي اعرفه بس حسان اخذ حصته .
ابتسم بسخرية : انت ينطبق عليج المثل الي يكول نايم ورجلي بالشمس .هذا الشي يفوق قدرتج على الاستيعاب تفكيرج محدود ومحصور .
يباوعلي وبعيونه نظرة متلذذة برجفة شفافي و بارتباكي الواضح وصدمتي
بلعت ريك بصعوبة وهو ظل يراقب الدهشة بعيوني ..
احس راسي يدور مثل المروحة .
ونبضاتي المتسارعة تغزو عروقي كلها .
كرامتي تحرضني على رفض الهزيمة بس هيهات ..
توجهت لباب المكتب الي يطل على داخل البيت دااطلع بس احس اختنكت .
غيرت مساري ورحت للباب الثاني الي ع الكراج وطلعت خاسرة من يمه ومثل كل مواجهة بيني وبينه احس نفسي طالعة من حرب وخسرانة كل جيوشي وبس اني باقية متشتتة ومهزومة .
حسيت نفسي محتاجة الهوى حسيت بنفسي انذبحت وصرت اشكي لطيف حمدان الي التفكير بي ملىء عقلي ليش حمدان ليش بشنو قصرت حتى تعتبرني سراب .
لا بحياتك مريحني ولا بمماتك ، ضيعت حق ابنك وسلمته لحسان وتريدني ادافع وارجع حقه بنص الوحوش .
ماهمك ضعفي وقلة حيلتي ، مرضي ؟ ابنك!!!
ليييش ؟؟
صرت ابجي بحركة وكعدت بالزرع وماهمني شنو اكو بالزرع حشرات او اي شي والدنيا ليل بس احس برطوبة العشب على رجليه .
حسيت بشخص يمي واجاني صوته ..
_ كومي فرح كومي ليش كاعدة هنا .
عرفته من صوته هذا مهيب ..
ظليت ابجي : ابوك يريد يحبسني هنا ماعرف شنو غايته .
جاوبني : اكيد غايته يحميج ويدافع عنج كله لمصلحتج ومصلحة ابنج .
يحميني ليش ومن منو ؟
اكيد من حسان بعد منو لا تتوقعين بعد ما مات عمي حمدان الله يرحمه حسان راح ينسى حقده .
الشر متغلغل بدمه اكيد مايتركج بحالج ابوي مايسوي شي بدون حكمة اخذي كلامه وكعدي هنا معززة مكرمة .
كلام مهيب دوخني وسطرني ، رجعت للبيت وابالي الف حسبة والف سؤال ومالهم جواب .
موج ...
دخلت فرح للمكتب واني اخذت داني وشلت جنطة وحدة من الكاع ننفذ اوامر الشيخ عيني اكيد هسه تطلع فرح خاسرة كل شي من يمه ومستسلمة مثل كل مرة .
طبيت للبيت بعدني بالكليدور وانسحبت من ايدي الجنطة بقووة بحيث اجه يسحب اصابعي وياهه .
التفتت عليه شفته شرار الي اخذها .
كتله بعصبية شبيك على كيفك جعصت اصابعي وكسرت اظافري هو هيج ياخذوها الجنطة كول احجي استأذن !
التفتلي يباوعلي بسخرية : هاي فوكاهه بعد فووكاهه والله يا الله فوك ما اريد اساعدج بس متستاهلين .
_ هو هيج تساعد وانت منو كلك اني محتاجة مساعدتك يا اخي .
رفع حاجبه كال : اخي ؟ يطبج طوووب شيليها لوحدج انت .
وشمر الجنطة يم رجليه وراح باوعلي بنظرة عود هو عصبي وراح.
قوست شفايفي ومديت لساني وكلت عود يخوفني هو والله يا الله ماتخوف جلبي .
شلت الجنطة اخخخ ثكيلة اشو صارت ثكيلة هسه شسوالها هذا .
صعدتها فوك للغرفة ورجعت نزلت دا اصعد الثانية
ذيج كبيرة شوي واني بيدي داني مابيه اشيلها .
خلي فرح تجي تصعدها ، بس هسه هي بيا حال !
اكيد الشيخ ديرزلها وهي تتخبل من رزالته اصلا هالفترة كلش كارهته هيه .
صعدت شفت باب غرفة ريلام مفتوحة ويمها على السرير كاعد شرار ويحجي وياهه .
فتت بالغرفة هيام جانت واكفة يم الميز
ظلت تخزر بيه تساءلت شبيها
هاي شنو مشكلتها خزرتها اني همين .
ورحت باتجاه شرار ومديتله داني ظل يباوعلي مستغرب ..
كززت اسناني وكتله اخذه .
كال تأمريني لو تطلبين مني ؟
بنفس النبرة جاوبته اخذه ..
كال ما اشتغل عندج يله .
قربت داني منه اكثر وهو انجبررر ياخذه لان داني تمسك بقميصه .
بقى رافع راسه يباوعلي مستغرب واني درت ظهري ونزلت جوة صعدت الجنط اثنينهم ورجعت لغرفة ريلام .
ورحت جريت دانيال من شرار واخذته هو كال منو كالج تاخذينه ؟
واني دااطلع كتله محدددد ودرت وجهي ورحت لغرفة فرح وسرعت خطواتي .
هه عباله بس هو يعرف يستفز اني هم اعرف استفزه .
ظليت افتر بالغرفة وبيدي تليفوني واراسل احمد دخلت فرح مفرفحة وداني حبيبي نايم على كتفي خطية ماانتبهت اله خليته بالسرير مالته
وهي راحت وشمرت نفسها ع السرير مالتها وتشهك .
رحت يمها اخذت راسها خليته على صدري وامسح دموعها وابوس بكصتها والله ولا ارتاحت هالبنية
راح تموت شسوو بيها .
شبيج فرح حبيبتي اهدي شكالج علي ؟
وهي تبجي جاوبتني : اني مااستاهل هالخذلان منه مااستاهل .
_ منو تقصدين ؟
_ حمدان ماخذ حصته ومخليها ويه حصة حسان واني ماكالي ولا ادري ليييش!!!
سكتتت ثواني احتاريت شنو اكللها غمضت عيوني بتفكير وهي تبجي وحاضنتني .
سألتها : علي شكالج شيسوي ؟ يرجعلج حقج منه لو لا ؟
هزت راسها كبريائي ماسمحلي اكوله يرجعلي حقي منه وهو يكول راح يتكفل بدانيال منا لمن يكبر واني راح ابقى محبوسة بهذا البيت طول عمري .
كامت من حضني : علي مغرور ومتسلط وثاق من نفسه هواي ويريد يسيطر عليه ويتحكم بيه بس والله يحلم .
سكتت شويه باوعتلها رغم الحزن والذبول هي حلوة وتجذب خاف الشيخ مخلي عينه عليها لعد ليش يريدها يمهم ، استغفر الله اني شون افكر .
_ فرح ءءاا خاف اباله شي او عنده غاية .
_ اي مهيب كال يريد يحميني من حسان تصدكين انت حسان يسويلي شي بعد ما كتل اخو اي والله كل شي يصير اني هم اشوف هيج .
استغفر الله واني وين راح بالي!! باوعتلها صافنة .
_ اي هو ادرى بأخو كل شي يسوي وهنا ائمن الج اني اشوفه الرجال حقاني ويعرف الحق من الباطل .
باوعتلي باستهزاء ودأرت وجهه وتمددت على السرير وصفنت . رحت يمها : اكولج فرح عفية ماوصيج على نفسج بعد اني لازم اروح هسه حخلي احمد يجي عليه .
كامت تباوعلي : ولج وين تجيبين احمد بهالليل الساعة راح تصير ب ١١ اكعدي وسكتي وباجر ولي جنج ضجتي مني .
مديت ايدي وخرت شعرها من على وجهه
_ لا ياعمري لاتكولين هيج شفتي شسون هيام وبلقيس بيه واني لا حاجيه ولا كايلة .
_ يولن وهاي هيام احط النعال بحلكها اذا حجت وياج بعد هو علي كالي عرفي شون تتعاملين وياهه واني راح اعرف اربيهه من جديد خاف هم ماربوها .
_ ولج عوفيها تولي زعطوطة اظل اعلم بيج اني شون وياج .
_ انجبي موج وديري بالج على دانيال اني رايحة اشوف ريلام .
فريت بيدي وهي طلعت انوب نست تلبس جريتها من ملابسها باوعتلي خزرتني تخوف خزرتها عيونها كبار وحمر من كد البجي والله احس راح تعمى هلكد ماتبجي : لبسي حجابج لايحجون عليج ..
وابتسمت الها وهي بعدها مخنزرة .
خلت الكبوس مال الكلبية مالتها على راسها وطلعت .
فرح ... طلعت ورحت لغرفة ريلام فتحت الباب بسرعة وفتت درت وطبكته وباوعت وكفت بمكاني واشوف كتلة الغرور والتكبر كاعد يمها على السرير .
مخلي ايده على راسها ومبتسم ويسولف وياهه
اجت عيني بعينه . نظرات الاعداء المعتادة .
لابس دشداشة سودة نفسها الجان بيها قبل شوية
بس نازع البشت والغترة .
لزمت الكبوس من يم ركبتي من شفته ونطيت ظهري دا اريد اطلع من الغرفة واروح ما احب ابقى ويا بمكان واحد بعد الي سمعته منه اليوم .
مديت ايدي لمسكة الباب وداافتحها واطلع
وكفني صوته الغليظ : فرررح .
ما اللتفتت عليه ولا باوعت اله بقيت على وكفتي واريد اسمع منه .
كال مو كلتي عندج تسجيلات لحسان وينها جيبي موبايلج اشوفها .
سكنت عن الحركة ثواني وبعدها التفتت عليه
واباوعله بتحدي هو دار وجهه مني بغرور وتكبر .
ويتجنب يباوع الي .
قلصت عيوني واني اباوعله بمكر
نطقت : حذذذذفته ، انتَ مو ما صدكتني ؟ ليش ابقي بعد .
هز راسه بحيلة ودهاء وتفهم ، احساسي يكولي
هو ديكول عني بداخله "مخبلة" " مخبلة" .
طلعت من يمهم ورحت للغرفة شفت موج تسطر بالكنتور باوعتلي : ها شونها ريلام خطية .
جاوبتها بسرعة : خالها يمها مادري بيها .
بيدها ملابس تباوعلهم وتحجي وياي
_ اكلج هاي ملابسج السود خليتهم هنانه والالوان كلهم شلتهم ليفوك خليتهم بجنطة لان بعد متحتاجينهم
وماوصيج على نفسج بعد والله ما ودي اعوفج واخليج وحدج بس تعرفين بابا وخالة هم محتاجيني ياريت يقبل الشيخ اخذج وياي بس هالفترة .
_ ادري موج لاتلحين سطرتيني سطر شكد تلحين لخاطر ربج افتهمت افتهمت مو طفلة ولاتصيرين مثلهم وعبالج اني مخبلة .
واني هم مو بعيدة عنكم كلها ساعة اني ويمكم او
انتوا يمي ولاتخافين عليه اني اتحمل واكدر امشي اموري .
** ** **
لهيب ..
رغم ريلام احتركت خطية ومهيب اخذهه للمستشفى ونخابر عليه مايرد المطي شغللنه بالنا عليهم .
ليوين يله جاوب وطمنه عليها وكال عالجوها ونظفوا الحرك شويه وتطلع ، ابوي من تطمن على ريلام
كال يله نرجع الولد لاهله مايصير نبقي عدنا بعد ولا دقيقة .
وانطلقنا سيارتين وتوجهنا لشمال بغداد ، صح راح يصير ليل والطريق طويل وعدنا ناس تجي بس ابوي اجل كل شي حتى يوصل الولد .
وصلنا للمنطقة الي كالت عليها المرة
سألها ابوي انت متأكدة ؟ هنانه
كالت اي والله شيخ هنانه اخذته من يم هذا المحل ..
ابوي سأل الولد علاوي بويه تندل بيتكم وينه ؟
الولد ارتبك واحتار وظل يباوع وهم دنيا ليل وهو طفل مامعقولة راح يدلينه على بيتهم بالمضبوط
ابوي كال شرار لهيب روحوا ودوا الولد لهذا ابو المحل وشوفوا يعرفه لو لا ؟
كلنه بصوت واحد صار . نزلنه من السيارة وفتنه للمحل
سلام عليكم ..
ابو المحل وعليكم .
شرار قرب الطفل من اكتافه باتجاه ابو المحل
بلا زحمة عليك تعرفه هذا الولد تندل بيتهم ؟
ابو المحل عاف الي بيده وخلاه على الرف واجه باتجاهنا وظل يباوع للولد وكرفص صار بمستواه
هذا عليوي ولك انت عليوي مو ؟ ابن ابو هدى ؟
هلي وين جنت ولك ابوك راح يموت من وراك وامك تنوووح عليك وصوتها يوصل لراس الشارع .
شرار بتساؤؤل : يعني تعرفه ؟
جاوب بهمة : اي اي اعرفه هذا ابن ابو هدى انتوا وين لكيتوا متين جبتوا منو انتوا ؟
شرار : مادلينه على بيتهم رحم الله على والديك .
اي اي ادللوا اجي وياكم بس اقفل المحل هو بيتهم شويه منا .
طلعنه من المحل شرار راح شرح لابوي كلشي واني صعدت الطفل بالسيارة وانتظرت ابو المحل
يقفل محله حتى يجي ويانه .
وفعلا وصلنه لبيت الطفل ونزلنه من سياراتنه
بس زكي ومرته بقوا بالسيارة .
وكفنه اباب بيتهم باب طلاكة وحدة وبي صبغ محتوت والباقي مزنجر مبين حالتهم تعبانة .
ابو المحل دك الباب وظل يصيح
ابو هدى ابو هدى تعال رجعولك ابنك .
دقايق وطلع رجال منها مبين عمره بالخمسين او نهاية الاربعين ظهره محني لابس دشداشة هيه بيضة بس صايرة على رصاصي من كد ما عتيكة وفوك راسه
جفية بيضه هم عتيكة ومهترئة .
باوع علينا انصدم بينا يمكن عبالك دنك واكفين كدامه
والدنيا ليل وظلمة شويه .
الطفل هد ايد شرار وراح يركض لابوه حضنه من رجلينه .
الاب وكع بالكاع وظل يبجي ويصيح علي بووويه يااابويه وين جنت ووووين جنت حبيبي ولك متت والله حياتي بشوفتك بي كلي وين رحت وخليتني .
على صوته طلعت مرة مبينه شابه مو كلش جبيرة
كعدت يم الرجال بالكاع وحضنته وظلت تبوس بي
ومبينه امه استغربنا وظلينه نباوع لبعض .
لشويه وظل يصيح انتوا خاطفين ابني احجووا انتوا جنتوا خاطفينه ولكم شتردون منه شتردوون ؟
هدى...
طلعت اركض على صوت نحيب ابويه ومرته تركض وراه شفت بابا كاعد على الارض وهو يبجي وبين احضانه نعومة طفل انفقد واعلنه بداخلنا عن موته
حالة ذهول وسكوون والفرحة يتخللها خنجر مسموم من الم الفقدان
شهرين وهو ماكو ما خلينه مكان يعتب علينه ما دورنه عليه اخر شي ايسنه وضلينه نتناسى بس ما نسيناه هيهات هذا قطعة من الكلب هذا وصية امي المرحومه
هذا اخويه الغالي اذكر امي لحد الان وهي على فراش الموت : يمه هداوي ديري بالج على اخوج هو امانتج خلي تچوه الج وسند تحطين راسج على اجتافه
من انفقد ولحد الان اني المسؤؤلة عن فقدانه وكل واحد يجي يلطخ بيه تلطخ ويتهموني بالتقصير
الناس ما ترحم ومرة ابويه دكول بعتي حتى ما يعيش عندي
اخذته من احضان بابا واني مصدومة ومنهارة واتفحص بي وهو فتح عيونه بفرحه بريئة وهمس ...هدااوي
حضنته باقوى ما عندي والدموع تنزل مثل نهر جاري وممصدكه ولا مستوعبه علاوي رجع لأحضاني عبالي مات وانتهى من الوجود ضميته الصدري واني ابوس بكتفه : يروح هداوي وعمر هداوي
ضليت ابوس بي واشمه واضمه الصدري انتبهت على الناس الواكفه سمعت ابويه كلهم بعصبية ...انتم خطفتوا احجوا والله اسجنكم
اني ابويه من كال هيج تخبلت ضليت انطح وكفت بغضب عااارم : ولكم تخطفون اخوويه ولكم تخطفوونه شهرين وهو ماكوو واحنه نحن ونون عليه والله اليوم افضحكم بالشارع اليوم .
كملت بصياح : حرررامية يا ناس يا عالم ذووول حراميه ذول الباكوا علاوي اخويه
رد عليه واحد منهم وجهه شايل حقارة ابليس كلها ومبين اخبث من الخباثه بمجرد ما باوعتله كرهته الغرور يمه الغرور ...يعني الغرور كاعد ومتربع بوجهه
كال بعصبية...احترمي نفسج ما نريد نتجاوز عليج ولج بطول اصبعي ولسانج اطول منج أحنه ولد حموله وشيوخ شنو حرامية
تجاهلت كلامه ودنكت على اخويه رفعت تشيريته واني اشوف اخاف ماخذين كليته بس كل شي
ماكو كلت يمكن اخذوهن بعمليه ليزر وماكو جرح
وكفت بقمة غضبي...والله ما احترم نفسي اذا شفت الناس ما محترمه ولكم شلون تاخذونه ليش انوب
ما خذين كلياته وبايعيهن اكييد وهسه رجعتوا بدون كليات.
واحجي بصياح ولميت العالم عليهم ..وخليت المايشتري يتفرج .
ركعني ابويه بيده على وجهي وصاح بعصبية
_ طبي جوه بنت النعال فضحتينه خلينه نشوف شبيها الوادم منو اخذه
صرخت بصوت عالي ودموع تتجاره..همه مبينين حراميه حركوا كلوبنه ان شاء الله تتلكوها بعزيز كلبكم
محد حجه ويايه وكلها تستغفر اله ابويه وابو خنزوره والشيخ الجبير يكول لابو خنزوره ولك اسسكت خليها حرمه لا تحط عقلك وياها...
رد على ابو بغضب ...بابا هاي مصختها ما تعرف شتحجي .
حطيت ايدي على خصري واني افور من عصبيتي وصوتي عالي : شنوو بابا؟ زلمة شكدك شكبرك تكول بابا شواربك احوك منهن ابساط يا حرامي
ما حسيت اله براشدي من ابوي انركعت بالباب حسيت الزنجار لزك بملابسي
دفعني ودخلني جوه وعلاوي يركض ورايه ويبوس بيه حتى لا ابجي حبيبي شكد حنين
دخلت مرة ابويه تصيح : كبر الفج يا هديوه يالجايفه فشلتينه كدام الشيوخ ولج يمعزايه يمدولبه ولج هذول هم جابوا الطفل مو بايگينه يالادبسز
طار شعوري وخفت ولطمت خدي : يبوو عزا العزاني طلعوا مو حراميه واني فضحتهم فضيحه طششتهم بالمنطقه...
دخل ابويه متعصب وهو لازم عگاله وصاك على اسنانه تقرب مني بعصبية وركعني بالعگال عطت واني الزم ايده : فدوه يابه والله من قهرتي على اخويه والله
احتدت ملامحه ورجع ضربني اكثر من خمس مرات
تلشوطت تلشوط واني الزم بالعكال وابجي وهو يغلط _ بنت النعال بنت المطي فضحتينه فضيحه والله اذا ما زوجتج بثوابج ما اطلع عيال ابن وادي
شمر عكاله عليه وطلع وعلاوي باوعلي بعيون دامعه ومد شفايفه يريد يبجي سحبته الحضني وهمست من بين دموعي : لا تخاف حبيبي مابيه شي والله مابيه
جاوبني بدموع وعيون ناعسه...هداوي ليش تغلطين على عمو لهيب انتي مو حبابه هو والله حباب يكول انت حلو لعد اختك شلون
رمشت عدة رمشات بصدمه : يااا مايستحي يغازل بيه كدام اخويه كلت هذا مو راحه وسرسري هم زين ماقصرت ويا ..
....
لهيب...
بحياتي كلها ما شفت هيج وحده سز مثل هايه شكد فريت دول وعشت بروسيا بس مثل هيج انحطاط ماكو حتى هيام المكروهة هم مو مثلها .
لا تخاف من ابو لا تستحي من رجال والله وروح امي لو الي سلطه عليها اله اعيد تربيتها من جديد
الرجال ابوها اعتذر منه وكال : بويه ادخلوا ادخلو والله اني اعتذر منك البنيه شويه محروك كلبها على اخوها وصار سوء فهم
ابوي لف سبحته على ايده وكال : ادخلوا بويه ادخلوا
همست قريب من شرار...بنت الكلب بنت الزمال تمنيت روحي واحد من محارمها اله اطلع حليب امها من خشمها طايحة حظ اخلاقها سز
رد شرار بضحك : غير نسابتك شنسوي
رفعت حاجب باستنكار : نسابة منوو؟ وروح امي لو اضل بدون مره ما اناسبهم ما رايد روحي اناسب هيج عائلة اخلاقها شافطه
شرار : هههه غير انت مخلي اخوها بحضنك وكلساع وكتله اذا انت هيج حلوه اختك شلون وهسه توصل لابوها وتعال يلهيب تزوجها
جاوبته بصدمة : اتزوجها والله لو يصيغونها ذهب ما اتزوجها..
ولك هاي لو بروسيا ومن صدك خاطف منهم طفل جان كالت بكل انوثتها ايها المعتوه لماذا خطفت صغيري ساشكوك للرب
وهاي بطول النعال ولا خلت شوارب لا خلت كليات ولا خلت أعضاء شويه ودكول انت اسامة ابن لادن
شرار : جااا تجيب العراقيه النچره ويه الصفر اليابسات
هزيت ايدي : والله يعمي هيج عراقيه متنراد
شرار : لا تنراد تصيرلك حزام ظهر وتهد وراك ...ان شاء الله مرتك
باوعتله بنظرات متوعدة : ان شاء الله مرارة الموت بحلكك لك عار اي والله انت مو عم عااااار
رد عليه من بين اسنانه : اكل نعللللل
مجاوبته انتبهت على ابوي يسولف شلون ام زكي خطفت الولد واخذتها واتهمت اخته بايعته الها .
والله اني هم مااستغرب كل شي يطلع منها ام لسان متر ام طول شبر ، طولها ويه لسانها يتناسب تناسب عكسي .
الرجال استنكر الكلام عن بنته وكال : مستحيل بنتي هيج تسوي هاي جذابه ولو اني ابصم بالعشره بنته تسوي مصايب واحتمال تطلع مسؤؤله عن تفجيرات 2008
مسحت وجهي بسخريه ودرت وجهي وشرار ضربني عرف بيه ممصدك بكلامه
ابوي رد عليه بتواضع : ونعم منها اي اكيد ام زكي جذابه وانت شنو التامر عليه احنه راضيين بي واهم شي رجعنه ابنك الحضنك وجمعنه شملكم
هو سحب ايد ابوي راد يبوسها بشكر وامتنان بس ابوي سحب ايده بسرعة : استغفر الله عمي لا هذا واجبنه وانا شيخ عشيرة....ال..ان شاء الله ما اخلي حقك يضيع
وام زكي لازم تتحاسب بالقانون حتى تكون عبره الغيرها وما تاخذ شي مو ملكها...
الرجال مبين فقير كال بحيرة شسوي شييخ اني ما اعرف بهاي الأمور القانونية وانت مبين رجال واعي
ابوي رد عليه ببرود : اشتكي عليها وخلي القانون ياخذ حقك
هو تشكر من ابوي وكال من باجر اقدم دعوة احنه خلينه ورجعنه للبيت خلصناها تعب بتعب اليوم
اليل كله ما نمت افكر بهاي ام لسان الادبسز شلون فشلتني تمنيت اكلها اكل بسنوني
نمت للضهر كعدت شفت البيت هوووسه شفت عمتي بلقيس
كتله باستغراب..شكوو منو هنا
ضحكت : هذا الطفل الي ضاع اجو عمامه وابو وجابوا طلي فده للطفل لان مرة زكي انسجنت
هزيت راسي ورحت للاستقبال شفتها هوسه وكفت بالباب كلت السلام عليكم
كلها ردت السلام وابو الطفل وكف سلم عليه شبكني وطاحلي بوووووس حسيت فجوجه دخلت بخدي اول مره اشوف رجال هيج يبوس..
ابتسمت بوجهه مجامله وكعدت على القنفه هو الرجال كعد ومبين متوتر ومتردد
_ اني والله كلللش ممنون منكم وما اعرف شلون اجازيكم رجعتوا وليدي شمعة بيتي
ولازم اوافيكم حقكم الهذا السبب انه وولاد عموتي وعمامي. ...انطيناكم بنيتي هداوي هديه الكم
رد عليه ولد عمه وعمامه : ونعم منك ابو هدى ما تقصر الله يهنيكم ويعلى من مقدار الشيخ و ولده
اما احنه جنه بحالة صدمه همست بقهر ام لسان هديه النه؟
يتبع .