عرض مشاركة واحدة
قديم 04-09-20, 08:58 PM   #21

Rewayt_dalia
 
الصورة الرمزية Rewayt_dalia

? العضوٌ??? » 446329
?  التسِجيلٌ » Jun 2019
? مشَارَ?اتْي » 80
?  نُقآطِيْ » Rewayt_dalia is on a distinguished road
افتراضي


.
.
.
الــــــبـــــــارت الخــــــامـــــس العـــــــــشــــر
.
.
.
ببيت بو خآلد .. اخذتها لعند المغاسل وغسلت لها وجهها واخذتها لغرفتها وجلست معهآ شوي وبهدوء : ماتبين تتكلمين
هزت راسها بمعنى " لا "
منار : تمام ياقلبي براحتك بس تأكدي بإن قلبي لك مفتوح بأي وقت حبيتي تفضفضين فيه انتي اختي ميهاف لاتنسين مثل ماانا اجي واشكي لك وقت ماحتجت انتي ريحي نفسك واشكي الي بداخلك
ابتسمت وهي تبلع غصتها من غير ماترد ومن بعدها طلعت منآر وراحت رجعت كل شي بمكانه وطفت الفلم وصعدت لغرفتها وعلى صولها سمعت جوالها يرن اخذته ورفعت حاجبها بتعجب من شافت اسمه ، مسحت وجهها بيدها وهي تسحب نفس عميق وترد : ألو
فز بجلسته وهو الي كان متوتر : السلام عليكم
منار وهي تجلس : وعليكم السلام
فهد : شخبارك منار
منار : الحمدلله طيبه انت شلونك
حب هالبادره منها : بخير .. واكتفى بهالرد
استمر صمت لدقايق وهالشي زاد من توتر الاثنين
منار كسرت الصمت : متى بترجع للشرقيه ؟
فهد بتنهيده : الله ييسرها ونرجع بكره ان شاءالله
منار : ان شاءالله ................. فهد
فهد : سمي
منار وهي تدوس على قلبها : انتبه لنفسك بكره وخذ بالك من الطريق
ابتسم وهو موسع عيونه مستتغرب : ان شاءالله
منار : تصبح على خير
فهد وهو باقي تحت تأثير استغرابه : وانتي من اهله
وسكر منها وهو مصدوم ماتوقع هالبادره منهاا ابدا خصوصا هي الضحيه الكبيره من هالزواج ! ابتسم وبعينه كبرت وهو يشوف انها تسعى لشي اهو يبيه ..
____________________
يـوم جـديد ، على الساعه 10 الصبآح
فهد ومعاذ وطلال بالسياره ماسكين خط للشرقيه ومعاذ ورا جنب طلال الي كان فاقد للوعي تماماااا بفعل منوم جابه معاذ واعطوه لطلال بكميه وافره وقدرو انهم يطلعونه من الفندق .. وماباقي من الطريق الا حول السآعه ويكونون وصلو للشرقيه .. فهد وهو كل شوي يرفع عيونه للمرايه : هاا شالوضع عندك
معاذ : يابن الحلال ركز بطريقك ماهو بصاحي قبل مانوصل انسى
فهد وقلبه مقروص : ياخوفي يصحى واحنا ماوصلنا ويقلب الدنيا فوق روسنا
معاذ وهو يناظر طلال الي مو حاس بشي ابدا : لالا تطمن انت بس
______________________
ببيت بو فهـد ،،
نرجع بالزمن للوقت الي سألت رهف الشغاله .. الشغاله " إحسان " اول ماسمعت سؤال رهف طاح قلبها ببطنها وماعرفت وش تقول !
رهف وهي ترفع صبعها بتهديد : اسمعي لاتفكرين تكذبين لاني شفتك بعيني وانتي تاخذين شي من تحت الطاوله اختصري على نفسك وقولي وش اخذتي ولا صدقيني والله الي رفع سبع وبسط سبع مايردني عنك الا الشرطه حتى مو بس فهد
إحسان توسعت عيونها بخوف : ليه انتي سوي كذا معاي
رهف صرخت : لأنك سراقه وكذابه تنكرين انك اخذتي شي من الغرفه ؟؟
إحسان : انا ماسرقت
رهف : وش الي اخذتيه اجل وخبيتيه بجيوبك ؟
إحسان بدا الخوف يبين على ملامحها بشكل فاضح قدام رهف بلعت ريقها وسكتت وهي صاده
رهف رصت على اسنانها : اخلصي تكلمي وش الي اخذتيه ؟ جيبيه قدامي اشوف
إحسان سلمت امرها : انا يجيب .. بس انا مالي دخل انا مو مسؤول عن الشي هذا
رهف عقدت حاجبينها : وشو ذا مافهمت كلامك ؟
طلعت إحسان لبرا الحوش ولحقتها رهف وجلست إحسان وهي تنبش بيدينها في التراب وطلعت قطعه صغيره ملفوفه لف ومربوطه بخيط سميك اسود ورفعته لرهف : هذا
رهف ضرب قلبها ضربات قويه وسريعه تعبر عن خوفها : وش ذااااا
إحسآن وهي متلعثمه : في احد يقول حق انا احطه بغرفة بابا طلال
رهف شحب لون وجهها وصرخت : سسححرررر ؟
ارتعبت إحسان من صراخ رهف وركضهت لداخل وهي تنادي امها بخوف فضييع وطلعت من جديد معهآ وهالشي حسس إحسان بقرب نهايتها خلاص !
ام فهد بدون ماتمسك نفسها صفعت إحسان على خدها وانهالت فيها ضرب وهي تصرخ وتسب فيهاا بأنها الي تسببت بولدهاا الين ماسحبتها رهف قبل لاتذبح إحسانه الي ضمت نفسها حمايه من ام فهد
ام فهد مقهوره : مممنن الي ماتخاف ربهااا وطلببت منك ذاا الششيي تككللممي الله يااخخذذذذك تكلمي
إحسان وهي تسكر اذانها بضياع وتتذكر تهديدات هدى وخايفه تفضح اسمها قدامهم وبنفس الوقت خايفه من ام فهد الحين
بعد محاولات من ام فهد ورهف بأنها تعترف لكن محاولاتهم باءت بالفشل اخذوها لغرفتها وقفلو عليها الباب .
.
باليوم الثاني .. رند منهارره ورهف تحاول تهديهاا : خلااااص ياامي طلال ماباقي الا شوي ويكون عند الشيخ وعلاجه من بعد رب العالمين بيكون على يد هالشيخ والشي الي كان عافس طلال وعرفناه
رند بصراخ : وانا وش يضمن لي بأن الي فكرت تضرني مره مراح تفكر تضرني ثاني
مياده بطرف عين : يعني مو انتي ؟
رند لفت لها وهي تمسح دموعها : مو انا الي افكر اهدم حياتي بيدي ولو انتي ملاحظه اكثر من تضرر اهي انااا من ورا هالسحرر ومافي احد عاقل يفكر يضر نفسه
مياده ببرود : قلت يعني يمكن السحر انقلب عليك
رند وهي تخزها : يمكن عمري صغيير واي صغيير كثير بالنسبه لك بس الحمدلله انه عقلي اكبر واكبر منك بكثير واترفع عن الرد عليك ، وطلعت من الصاله
مياده بغيض : شفتووو شفتووو قليلة الخاتمه وشلون تكلمني
رهف : جزاك واقل من جزاك بدل ماتفكرين من الي يبغى الضرر لاخوك ومرته تبين بس تدقرين بالبنت تستاهلين ماجاك
مياده لفت لأمها : ييممممهه !
ام فهد ببرود : مو فاضيه اضيع وقتي معك مياده انا عقلي بأخوك وبعدين مالك نيه ترجعين لزوجك وش تسوين عندي هنا لزوجك عليك حق ناسيه ؟
مياده : اااييي مليتي مني صح ؟ ومرت ولدك عسل على قلبك بس خلها تنفعكم وقامت وهي تتصل على السايق يجهز السياره ..
____________________
عنـد فهـد ومعآذ ،
نزلو طلال لعند الشيخ ودخلوه بصعوبه وهو بدا يفوق شوي وشوي
الشيخ والي معه مسكوه بقوه يثبتونه مكانه وصوت القرآن مسموع
الشيخ رفع راسه لهم : الي عليكم سويتوه جزاكم الله خير
فهد يناظر اخوه بخوف : ياشيخ كيف بيجلس وهو يبي يطلع بالقوه مايبي صوت القرآن
الشيخ بهدوء : ماعليك يافهد تطمن الي مثله الله يكون بالعون كلهم كذا انت خذ خويك وروح طمن الاهل طلال بيتعالج بإذن الله وبيطلع الي فيه وبيرجع لكم مثل ماكان
فهد : آمين آمين ... يعني امشي الحين ؟
الشيخ : توكـل بحفظ الله
وطلع فهد وقبل لايمشي القى نظره على اخوه الي باين نفوره من المكان والصوت ووجهه انقلب مثل البارح ، سحبه معاذ من يده وطلعو وركبو للسياره
معاذ : بدل مانت قالب خلقتك كذا ابتسم واحمد ربك بأنك قدرت تجيبه
فهد والهم كاسيه : شلون ابتسم معاذ وانا اشوف اخوي الصغير وكأنه ابوي ! شكله ماخذ من العمر عشرين سنه قدام ..
معاذ تنهد : هم وبإذن الله بينزاح
____________________
ببيت بو خـالد ،
دخلت الجناح وهي ترمي شنطتها بقهر واضح وترمي عباتها على الكنب وتدخل الغرفه وهي ماهي عارفه وش تسوي من عصبيتها .. طلع من دورة المياه وهو يجفف شعره بالفوطه وانصدم من وجودها لكنه ابد مابين هالشي وتصنع اللامبالاه وحتى مانطق بحرف
وهي تلاحقه بعيونها وقلبها يغلي زود وماقدرت تمسك نفسها : فيه شي اسمه اسأل عن زوجتي اقول وش فيها ببيت اهلها يمكن مريضه يمكن بتموت تراني محسوبه زوجتك
خالد من غير مايناظرها ويفتح دولابه : صوتك باين مافيه الا العافيه اسأل ليش ؟
مياده بنرفزه : سؤال مراح يقلل من قدرك لو سألت عني
خالد قلب شفته : مو همي لو فيك شي كان وصلني خبر
مدت يدها وسكرت باب الدولاب بقوه وفكها يرجف من غيضها : اننااااا زوووجتك زوووجتك تفهم وش معنى ذي الكلمه ! ماني اختك اسمع خبر سفرك قدام الكل واسمع خبر وصولك منهم والحين تقول لو فيني شي كان وصلك خبر وش فييك انت ؟ ناسي انك زوجي
خالد ببرود سحب يدها من على الدولاب : مياده ! توني متروش وراسي هاجد مابيك تصدعينه لي وان كان براسك شي ارجعي لبيت اهلك خليني مرتاح كذا ، واخذ ملابسه وراح يلبس وهي واقفه بمكانها وتقطع شفتها من القهر واول مارجع راحت ومسكته من ذراعه بقوه : تفكر هالاسلوب بيجيب راسي ؟
ابتسم بسخريه تفضح نفسها قدامه وكل شي باين !! : اي اسلوب ؟
مياده : اسلوبك المعفن ذا مسوي فيها بارد ومو مهتم لي يعني بتجيب راسي تراك ماهميتني هااا افهم ماهميتنيي
خالد سحب ذراعه من يدها ببرود مستفز : اشوف الاحسن انك ترجعين بيت اهلك تريحين اعصابك شكلك تعبانه ،
وراح رتب شعره وتعطر ووقف يلبس ساعته وهي تناظره بغيض ودمها يفور : ماتسوي كذا الا شايف لك شوفه ثانيه صح ؟ تهملني ومااهمك معناته في وحده ثانيه بقلبك صصح ؟
ماقدر يمسك نفسه وابتسم وهو يهز راسه من غير مايرد
مياده من غير وعي : اي مو هذي المرجله عنددكم بس ترى اذا كان هذا بفكرك انك بهالحركات ترجال تراك مانت رجال وخذ الحكي مني
عرف مقصدها تبي تستفزه وتثير اعصابه الا انه مااعطى كلامها اهميه وبحركه نرفزتهااا اكثرر .. اشر بيده على راسه بتكشير : ازعااااج مززعجه .. وطلع من عندها وهي تحس بشي يمغص بطنها من شدة الغضب .. جلست على السرير وهي تتنفس بعصبيه جنونيه مالقت من يلقيها وجه بالعكس الكل مطنشها وهذا اكثر مايذبحها ..
___________________
بعد صلاة العصر ببيت بو فهد ..
سحبها بالقوه لبرا وركبها السياره وهي تنتفض وترجف من الخـوف ، واخذ القطعه الملفوفه معه وتوجه لـ مركز هيئة الامر بالمعروف والنهي عن المنكر .. وهناك استلمو إحسان واخذو القطعه من فهد وعاينوها واكدو انها سحر 100?‏ ،
وبعد مرور سآعات قررو انهم يحجزون إحسان عندهم بعد ماشافو منها رفض تام انها تصرح بأسم الي أمرتها تحط السحر بغرفة طلال ..
___________________
ببيت بو خـآلد ،
ام خالد شهقت : حسبي الله ونعم الوكيل عليها من شغاله ياانها لعبت بحسبة ذا الولد وش بيسوون معها الحين ؟
ام فهـد بضيق : والله مدري ياام خالد دعواتك انها تعترف وتقول من هي ساس البـلا
ام خالد : لا ان شاءالله تعترف مراح تتحمل الحبسه يوم يومين بالكثير وبتعرفونـ... " شهقت وهي تقوم " : بسم الله الرحمن الرحيم .. ياام فهد اكلمك بعدين مع السلامه ، وقفلت منها وراحت بسرعه للمطبخ وصصرخت وهي تشوف هـدى طايحه مغمى عليهآ ، جلست على ركبها وهي تضرب وجهها بشويش وتنادي اي احد يجيها ويساعدهآ وبهالوقت ماكان فيه الا الخدم الي جاو شالوها وحطوها في الصاله وبعد محاولات .. فتحت عيونهآ وهي معقده حاجبينهآ وشوي شوي يرجع لذاكرتها وش سمعت قبل لاتطيح .. ام خالد وهي تمسح على راسها : بسم الله عليك وش صار لك
هدى وقلبها يرقع بشكل جنوني من الخوف : مدري دايخه وتعبانه
ام خالد : ماتشوفين شر خلك مرتاحه وانا اقوم اجهز لك شي دافي تاكلينه
مسكتها هدى : لا مايحتاج شوي واصير زينه ... وبتردد ..: كأني سمعتك تتكلمين عن طلال ولايتروالي ؟
ام خالد تنهدت : اي حسبي الله على بليس واهله تخيليي رهف بنت عمك كشفت شغالتهم وهي تشيل قطعه صغيره من غرفة طلال ولحقتها وخوفتها الين ماطلعته وعرفوه ياعزتي له مسويين له سحر الي مايخافون الله واخذها فهد لهيئة الامر بالمعروف بس ماهي راضيه تعترف وتقول من الي قال لها تحط السحر بغرفة طلال وحبسوها عندهم لحد ماتعترف
هدى بخووف فضيع : يعني لمتى بيحبسونها ؟ عادي يطلعونها وهي ماعترفت
ام خالد : والله مدري ماعلينا الا ندعي انها تعترف وهذا مو هم اهم شي الحين طلال بدا يتعالج والسحر ولقوه بس هم يبون يعرفونها عشان يعاقبونها
هدى توترررت بشكل جنوني وقآمت بتروح لغرفتها الا استوقفتها ام خالد : خلك مكانك جسمك مو متوازن
هدى من غير ماتلف وجهها : بنسدح بسريري اريح لي ، ومشت وهي تتخبط بخطواتها وتحس بعظامها تطقطق من خوفها الشي ياخوفها يضغطون على الشغاله وتقول اسمها !
_______________________
بعـد مرور ايـآم واسآبيع شهر وزياده ، .. ببيت بو فهـد ،
قامت من بينهم وطلعت لغرفتها هي وطلال وهي تجر اذيال الخيبه معهآ ، حابسه شي كبير بداخلها هم يهد جبآل
لفت لما سمعت صوت الباب ينفتح وشافتها رهف لاحقتها وكأنها عارفه وش فيها وبهدوء نطقت : لاتبررين له
رهف : رند طلال مو متحاشيك بس انتي لاحظي انه من ذاك اليوم ماعاد رجع للبيت ومايتواصل الا مع فهد
رند وهي ترفع راسها وتناظر لفوق تداري دموعها وترجع تناظر رهف : انـا زوووجته افهمي يرحم لي اهلك انا بكمل شهرين وانا على ذا الحآله انتظره بس يجي يدخل هالغرفه ابيه ابييييهه مسامحته وراضيه فيه بكل حالاته تعبت وانا انتظر هاللحظه ناسيه كل الي صار بس خليه يرجع
رهف وهي تحط يدها على يد رند : ماسمعتي فهد وش قال ؟ من تعالج وبدا يرجع لعقله وش صار وهو مو قادر يرجع ويحط عينه بعين احد مننا
رند بإصرار : بس حناا نبييييه
رهف : وهوو يبينااا والله يبيناا بس عطيه وقت بعد
رمت بجسمها على السرير : اااااهه وانا وش بيدي غير اني اعطيه من الوقت مايكفيه عشان يرجع لي طلال الي عهدته
_____________________
بواحد من فنآدق الخبر ..
ضاغط على راسه بتعب فضيع وصداع اهلكه والحبوب مرميه على جنب واكياس وجبات واكل وعصآير ،
قآم عبد العزيز وطلع من غرفته وهو يحوس شعره بنعاس وانتبه لطلال وتنهد بيأس وجلس جنبه : وبعدين ؟
مازهقت انت مامليت
نزل يدينه من على راسه وهو يناظر مضيق عيونه : وش تبيني اسوي
عبد العزيز : قوم ياخي ابدأ صفحه جديده بحياتك الي راح ولى خلاص وماكان بيدك عليه حيله والحين يوم انك تشافيت ماطبيت ولامره بيتكم يارجال الكل يبيك ويسأل عنك امك خواتك وزووجتك الي اكثر من تأذى منك وصبر وللحين تنتظرك
طلال : وانا شاللي ذابحني غير اني آذيت وحده شافت مني شري قبل خيري
عبد العزيز : ووحدتك هذي وش نهآيتها ؟ لاتزيد النار حطب وحاول ترجع المياه لمجاريها
سكت طلال وهو يسمع لنصايح عبد العزيز الي اعتاد عليها يوميا من جا واستقر بالفندق هالفتره
____________________
ببيت بو خآلد .. قفلت شناطها وكل شي يخصهآ رتبته وجهزته عند باب غرفتهآ وبعد المغرب بتطلع راجعه لبيتهم .. انتهت مدة جلستها بهالبيت بعد ماحققت مطلبها ونفذت وعدهآ الي وعدت فيه امها ومن اليوم ماعاد لها مكآن هنا ابـد ،
وكآخر يوم لها حبت تتمتع فيه مع اخت دنيتها منآر الي كانت حيل متضايقه انها بتفارق ميهآف بعد مالقت فيها الصديقه والاخت الكبيره والصغيره بنفس الوقت .. الاخت الي تسمع توبيخها ونصايحها ويجي يوم وتنعكس الادوار
وميهآف الي كان الموقف صاعب عليها الا انها قوويه حيل بأنها تخفي مشآعرها وقادره انها تخفي نزيف قلبها والوجع الكبير الي تحس فيه من تصرف عبد العزيز الي قبل مده تحجج بطلال وانه حاب يجلس معه هالفتره لحد ماتزين اموره وطلع من البيت ومن يومها ماشافته ، الشي الكبير الي ذابحهآ بأنها كيف بتطلع من هالبيت وعينهآ محرومه منه من مده ..
______________________
في المستـشفى ..
الدكتور بيده اوراق وواقف مقابل عبدالله الي مستلقي وبذراعه مغطي عيونه ويتكلم باللي يذكره ويعرفه من زمان
ويتبين للدكتور بأن عبدالله قدر انه يسترجع ذاكرته وان كان باقي شي بسيط ف هو بسيط حتى انه مايذكر
فجأه عبدالله بعد مدة صمت تكلم : بسألك عن شي يادكتور
الدكتور : تفضل
عبدالله : بعد مافقت من الحادث وفقدت ذاكرتي عشت اشيا كثيره بحياتي والحين كل شي رجع مثل ماكان ليه ماني قادر انسى وش عشت وقت الفقدان ؟
الدكتور : ذاكرتك تأثرت بسبب حادث وفقدت كل الي فيها ولطالما انت فقت من هالحادث فتبدأ الذاكره تخزن كل شي من جديد وماتنسى شي بمعنى اصح مافيه شي يروح من ذاكرتي وقت ماكنت فاقد للذاكره
عبدالله هز راسه بالايجاب وتعابير وجهه تميل للاحباط : يعطيك العافيه
عبدالله هز راسه بالايجاب وتعابير وجهه تميل للاحباط : يعطيك العافيه
الدكتور : الله يعافيك .. وعلى بكره ان شاءالله تقدر تطلع والحمدلله على السلامه
عبدالله بهدوء : الله يعافيك .. واول ماطلع الدكتور لف على جنبه وهو يضغط على مخدته وهو يتمنى من كل قلبه بفقد ذاكرته للمره الثانيه وينسى انسانه عشقها عشق المجانين وزود عليه عشقها تعب وحالةٍ رديه
____________________
الجبيل .. بو ثامر : جهزتو انفسكم ؟
ام ثامر : اذا تبي الصراحه لا! وش يوديني لناس ماعرفهم ولايعرفوني اذا انت بتروح ف هي بنت اخوك انا مايعنيني
بو ثامر : عاد هذا كلام تقولينه ياام ثامر؟
ام ثامر من غير نفس : هذا الصدق
بو ثامر مارد عليها ولف لولده الوحيد ثآمر : جهز نفسك لاتنسى هالاسبوع ورانا نزله للشرقيه الزواج يوم الخميس جهز امورك وفرغ نفسك " ولف لنهى زوجة ثامر " : وانتي يانهى مانتي بجايه معنا ؟
نهى : لا ياعمي انا تعبانه بالحيل اشيل عمري وامشي وش ينزلني معكم للشرقيه
ثامر : حنا نكفي يبه الحريم مالهم لزمه
بو ثامر يناظر زوجته : كان بودي تجون معنا على الاقل تتكلمون مع ام دلال وتساعدينها بالطريق وحنا راجعين
ام ثامر كشرت : وبنتها وش مهنتها ؟ ملزومه بها انا ؟ حلوه هذي بعد
بو ثامر هز راسه : الله يصلحك المهم لاتنسين تخبرين الخدم يجهزون الملحق عشان اذا جاو يرتاحون فيه واي بعد تراني هاليومين افكر بموضوع مهم من بعد جيتهم لهنا
ثامر : وش هو ؟
بوثامر : خله لين بعد مايجون بكم يوم اشوف الوضع بعيوني وبعدها احكم واقرر القرار الاخير
ام ثامر : اييي عاد بخصوص ايش
بو ثآمر : الموضوع يخص ثامر تحديدا بس انا مأجله لوقت مايجون ، وقام واستوقفه كلام زوجته : اسمع عاد لاتقول ثامر يطلع يعيش ببيت بلحاله عشانهم ترى رجلي على رجله مايطلع من هنا لو على موتي هذا انت سامع
بو ثامر مكمل طريقه : يصير خير
ام ثامر تكلم ثامر : سمعت انت ولا ماسمعت طلعه من هنا مافيه
نهى : هدي بالله ياعمتي محنا طالعين تطمني
ام ثامر بغيض : هذا الي ناقص عشان ست الحسن ولدي يطلع ببيت بلحاله مدري وش له المخاسير والبيت هنا يطرد فيه الخـيل ..
_____________________
السـآعه 8 الليل ،
عند ميهـآف
وصلت لبيتهم ونزل معها السايق يساعدها بتنزيل الشنط لعند الباب واول مادخلت وسكرت الباب وقفت وهي تتأمل الحوش الصغيير وتبتسم بألم طفيف لوهله تذكرت ابوها تذكرت هبل رند تذكرت امها كيف كانت وكيف صآرت ، ذكريات اوجعت قلبها للحظات
وسرعان مانفضت ذكرياتها وسحبت شناطها معها ودخلت للبيت الي كان يعكس لها جوو الهدوء .. هدوء كئيب مظلم ، حطت شناطها بالصاله وهي تنآدي : دلال ... دلآل
بغرفة ام دلال ..
سمعت صوت اختهآ وعضت شفتها بخوف وتوتر وهي تمسح على وجهها ، قامت بسرعه وهي تحط صحن الاكل على الطاوله وتطلع لأختها وتستقبلها وتحاول ماتبين شي لكم هيهات !
ميهآف وهي تناظر دلال بشك : وش فيك ؟ مو طبيعيه صاير شي ؟
دلال طاح قلبها ببطنها : لا .. بس مدري احس من يقرب الزواج اتوتر ويزيد خوفي مدري ليه بس عادي خوف طبيعي يعني لاتحاتين
ميهاف : اااممم الله يتمم على خير يارب حاولي ماتتوترين وكل يوم نامي بدري تدرين ذا الشي يأثر حيل على صفاوة بشرتك وماتكون فيك هالات
دلال : اكييد طيب بتنامين الحين ولا وش بتسوين ؟
ميهاف : لاويين انام بدخل لامي ياعمري مشتاقه لها
دلال بإندفاع وكذب : لا وينك ووين امي نايمه من وقت بكره اول ماتصحين تعالي شوفيها
ميهاف بطرف عين : شدعوه ! تراني بنتها دلالوه ماني غريبه حتى لو اني انام بحضنها وين المشكله
دلال ابتسمت بإرتباك : لا بس قلت يمكن تبين تشوفينها وهي جآلسه
ميهاف : بروح افصخ عباتي وادخل لها .. تتبعتها دلال بنظراتها واول مادخلت للغرفه عضت شفايفها دلال من جديييد الله لو ميهآف تشوف حال امها كيف صار ؟ الله لو تشوف الاهمال لوين وصل ؟ الله لو تشوف امها كيف صارت ووجهها وكأنها تملك من العمر 70 سنه !! قبلها بيومين بس ! ساءت حالة ام دلال وخبرتها الممرضه واخذوها على طول للمستشفى وهناك اخذو الخبر الصاعقه !
ام دلال مُهْمَله لأقصى حد واضطرو انهم يفتحون تحقييق مع الممرضه ودلآل وياخذون الاسباب الي خلتهم يهملون ام دلال لهالدرجه مما ادى ..لـ احتمالية رفض جسم ام دلال لتقبل العمليه توصل نسبته لـ 85 ?‏
بعد ماكانت احتمالية شفاءها توصل لهالنسبه انعكست الوضع وصار احتمالية فشل العمليه توصل لهالنسبه .. ،
قطع تفكير دلآل فتحة الباب ودخول ميهاف وتعابير وجهها كلها شوق ولهفه .. لفت لها بصمت مضطرب ماهي قادره تنظطق بحرف ، ومشت ميهاف لأمها وجلست جنبها وشوي شوي تعقد حاجبينهآ وهي تتحسس وجه امها ويدينها وحرارة جسمهآ بدا قلبها يخفق بسرعه من خوفها وبصوت عالي : دلاااااال وش فيها امممي ؟
مالقت رد ولفت لوراها وتشوف ان دلال تاركه الغرفه لفت لأمها بفك مرتجف من الغضضب
وتفتح الادراج وتلقى اوراق سحبتها وهي تقرا التاريخ وكان قبل امس ، وبدت تقرا الحاله وتوقيع دلال بالخط العريض ، بلعت ريقها وهي تررجف وقامت وهي تكرفس الورقه بيدها وبعيونها نار تشتعل واول ماطلعت وسكرت الباب صرخت بغضضب : دلااااااااااااال
____________________
ببيت بو خآلد ،
صوت الاغآني يصصدح بالمكان والي يسمعه يقول بهالبيت اكيد عرس !
وقفت رقص اول ماطفى صوت الاغاني ولفت بعصبيه : هههييييي
منار بحده : وش ذا الازعاج مهبوله انتي
هدى : ياليييل حرام الواحد ينطرب يستانس ؟ خليني ارفه عن نفسي شوي
منار : رفهي عن نفسك بغرفتك مو هنااا
هدى ترفع شعرها ذيل حصان وهي تزفر : مشت ست الحسن ورجعتي لنفسيتك
منار : اتركي البنت بحالها ، وبعدين تعالي قولي لي قبل كم يوم بس مرابطه بغرفتك وحالتك حاله ومن احد كلمك صارختي وبكيتي والحين غنآوي وترقصين ؟ انهبلتي خلاص قضيتي ؟
هدى تسبل بعيونها : وان شاءالله تبيني مثلك اقعد مهمومه طول العمر هه ماعاش ولاانولد الي يبكيني ويهمني طول العمر
منار : اي ماقلنا شي بس ياانك تبكين او ترقصين ؟
هدى : شي كنت شايله همه وخايفه منه وقضضى بببححح ماعاد فيه ف خليني احتفل بنفسي
منار استغربت ورفعت حاجب : خفتي ؟؟ انتي !!
هدى تمشي للسماعه وتبتسم بسخريه : شفتي كيف ! قدرو يخوفوني بس يخسون
منار تناظرها بغرابه وبخاطرها " الله يستر منك "
_____________________
عنـد ميهاف ودلال ،
مشت وهي تدور بالصاله ومالقت احد طلعت للحوش على طول ولقتها واقفه ومعطيتها ظهرها
مشت لها بعصبيه مجنونه ومن دون سابق انذار مسكتها من ذراعها ولفتهآ لها بكامل جسمهآ وتمد يدها بكـف جامد طبع اثره على خد دلال الي كانت غاصه بدموعهآ وانفجعت من تصرف ميهآف وماتكلمت
ميهاف وهي تفتح الورقه بوجه دلال وتصآرخ : ووشش ذااا ؟؟ ووشش ذااا ياازززفففتت هذي الامانه ؟ هذي الي حلفتك بالله تحطين بالك عليهاا وتكون اول اهتماماتك ؟
ولا خلاااص صار عندك زوج ونسيتي امك ؟ امك ذي امك جعل عيونك للعمممىىى ؟
دلال وهي تمسح دموعها وماكانت عارفه وش تقول : غصب عنني ميهاف والله مو بيدي انششغلت انشغلت ولما جات الممرضه خـ...
قاطعتهاا بصرخه : وتبببببن بالممرضه الي جبتيهااا ماشفنا من وراها خييرر
انهارت دلال وهي تحس بذنب كبير تجاه امها
رمت الورقه على الارض وهي مصدومه للحين : انااا تركت دراستتي الي متفوقه فيهاا وتركت مسستبقلي ! ورحت اشتغل بشي انا ماعرف فيه شي فووق طاقتي .. تحملت نظرات الشفقه ونظرات الرحمه وتحملت نظراات الذل والمهان كله عشان امي ترجع مثل اول تححملت كل شي وضغطت على نفسي لدرجة احس اني بأي لحظة بنفجر في الكل طلعت من بيتناااا خاااااادمه تعرفييين وش معنى خاااااااااادمـــــــه ؟؟؟ " وجلست وهي تسحب بلوزة دلال من ياقتها ": خاادمه يعني اجلس من نومي كل يوم والبس مريول وحجاب الخدم واطلع انظف كل شي يطري على بالك مطبخ حمام غرررف واساعد بالطبخ وارجع لغرفتي تالي الليل وافرغ همي لمخددتتي واحتسب واصبر واوكل امري لله واقول هااااانت هاااااانت انا هنا لفتره بسس فتره اجمع شقاي ومن تتعالج امي وترجع توقف على رجلينها كل شي بيرجع مثل ماكان واحسن وكذا الاقيك مسويه بأمي ؟
دلال غطت وجهها بيدينها وانهارت اكثرر وتصيح بصوت مسموع
وقفت وهي تحاول تبين قوتها قدر المستطاع وتأشر صبعها بتهديد : بس والله العظييم ان صار بأمي شي ماني بمسامحتك ليوم الدين ولساني مايطب لسسانك وحالك من حال رند ثنتينكم جنيتو على والديني الله ياخخذذكم الله ياااخخذذذكككمم ، ورجعت لداخل وهي تتماسك اكثر وتدخل لغرفة امهآ وترفع اللحاف وتدخل مع امها بالسرير وتبدا تدعي الله ان مايصيبها اي مكروه ،
________
عند دلآل
قامت بعد مادخلت ميهاف وراحت اخذت جوالها واتصلت بمعاذ ورد عليها بهدوءه المعتاد : ياهلا والله
وكانت صدمته بشهقة بكي : مـ..ـحتاجتك
فز : بسم الله عليك دلال وش فيك ؟
دلال ببكي : ااممي معاااذ
معاذ بدا الخوف يسري بعروقه : استهدي بالله عشان اقدر افهم لك وش تقولين وش فيها عمتي وش صاير ؟
حاولت تكتم بكيها بيدهاا وشوي شوي بدت تسرد له كل الي صآر
وهو انصصدم ماكان عنده اي خبر ماقالت له عن شي ابد ! .. وصار يخفف عليها ويهديهآ ويتوعد ويتحسب بالممرضه الي كانت سبب بكل شي ،
_____________________
بعـد يومين ،
بييت بو خـالد ،
بعد ماتصلت فيه امه وطلبت منه يجي اليوم ويتغدا معهم ،
لبى طلب امه وجا وتغدو الكل مع بعض ..
وكان الكل بطبيعته ماعدا ثنتين .. منآر ومياده ،
عن منار كانت متكيه وجهها على يدها وتاكل بملل واضح وعيونها تناظر فراااغ عقلها مو معهم ابد
عبد العزيـز وهو منتبه لها من اول ماوصل : عسى ماشر منار وش فيك ؟
رفعت راسها وهي رافعه حاجبينها : هلا ! مافيني شي
عبد العزيز : عقلك مو معك وتلعبين بالاكل صار لك ساعه ماحطيتي لقمه بفمك
هدى قاصده : من مشت حبيبة القلب وهي معتفسه
قبضه قلببه بشكل جنوووني ولف لها بسرعه عاقد حاجبينه : منو ؟
هدى : ميهااف خلاص ماعادت هنا رجعت بيتهم قبل امس عشان كذا منار مالها خلق شي
ام خالد بإبتسامه : يابنتي وش له مضيقه خاطرك كذا متى ماشتقتي لها تزورينها او تزورك الدنيا ماخلصت
منار بضيق : تعلقت بوجودها هنا جنبي بكل وقت ولو اني مو حابه سبب وجودهاا بس ابيها ترجع
ام خالد : مايصير .. بعد البنت عندها اهل وبيت ومصيرها بترجع لهم وانتي عارفه هي جت هنا ليه
منار : عارفه يممه والله عارفه وقلت لك ماني حابه السبب ذا ماني حابتها تشتغل بس يمه حبيتهاا كثيير تعودت على وجودها صارت اختتي الي انتي ماجبتيها
خالد ماعجبه : ليه مانتي معتبره هدى اختك ؟
هدى بزلة لسان : مانيب اخت احد !!
بو خالد بإندفاع : افاااا
هدى بلعت ريقها : السموحه مو بقصدي
ام خالد وكانت عارفه طبيعة علاقة هدى بمنار ف ماعلقت .. التفتت لمنار : قلت لك مافي شي صعب متى مابغيتيها روحي لها او هي تجيك عادي
منار ماده بوز : ان شاءالله.. عند عبد العزيز الي كان مركز بصحنه اوبمعنى اصح يدّعي التركيز ، بينما عقله وقلبه انخطفو لمكآن ثاني ، كان يهز رجوله بتوتر وااااضح ومابين الدقيقه والثانيه يضغط على جبينه بإنزعاج يحس بشي انسلب منه وماهو قادر يقعد على حيله وبين هالشي على وجهه وعيونه تتنتقل بين الاشياء بتوتر
بدر الي كان جنبه حس بهزة رجوله : عز وش فيك خضيت امي بهالههزز
كآن ياكل ومو سامع بدر الين ماحط بدر يده على فخذ عبدالعزيز بقوه يوقفها ، انتبه ولف لاخوه : وش فيك ؟
بدر : انت الي وش فيك هزيتني معك
ابتسم بارتباك : مدري وش جاني صدعت ودي اقوم ارتاح شوي
ام خالد : ماكملت صحنك يمه ماشبعت
عبد العزيز : لا يمه صحني الثاني ذا الحمدلله الله يديمها من نعمه .. عن اذنكم
حطت اللقمه بفمهآ وهي تبتسم بنصرر وترضي غرورها " مردك لي ولاستين الف من ميهاف ياخذونك مني "
____________
بعـد الغدا ،
وهي راجعه من عند المغاسل مغسله يدينهاا وقفت وهي تسمع همس من ورا الجدار
خالد : ابيك بموضوع ضروري
ام خالد : وش فييك قل لاتخوفني
خالد : ابيك تخطبين لي
ام خالد شهقت : ثاااانيه ؟ لييييه
خالد : يمه وقت ثاني اقعد معك واقولك وش هي اسبابي بس مو الحين ابي اتكلم معك والبيت فاضي ، بس تأكدي ان الزواج الثاني بيكون راحتي
ام خالد ماكان عندها ايي ردد صدمها صدمه قويه .. خالد رجع : وااي ابيك تسألين عن البنت زيين يمه مابيها كاشفه وجهها ولاابيها متعوده على الطلعات لوحدها ولاابيها من العيله لامن قريب ولامن بعييد
ام خالد تناظر ولدها وودها تاخذه وتصفقه تحسه انهبل
استأذن من عندها وراح لشقته فوق يريح ، وكالعاده انسدح على الكنبه بعد ماتوسد مخدته وتغطى باللحاف ، وقبل لاينام سمع صوت الباب ينفتح وتدخل هي وتسكر الباب .. تصنع النوم وتغطى وهو يسمح برؤيه بسيطه عشان يشوفهاا
كان وجهها مخطوووف لونه وتمشي وهي تتحسس صدرها ووجهها ومفهيه مو حاسه بنفسهاا ، دخلت للغرفه تاركه الباب مفتوح وانسدحت بعبايتهاا وهي تتنفس ببطئ وصعوبه بلعت ريقها بخووف جنوني من ان تكون لها مرت رجل تشاركها بزوجها ..
تمتم بخاطره " انا لك يامياده اذا ماكسرت ذا الغرور ماكون خالد ولد ابوي "
_____________________
يـوم الزواج ..
كانت بغرفتها ومدنقه وهي ترص على مسكتها بغبنه واضحه وصوتها يرجف : انا السبب رند انا السبب لو صار بأمي شي مانيب مسامحه نفسي
رند بهدوء : دلال كل شي مقدر ومكتوب انتي انشغلتي بدوامك وبالتجهيز والبيت فاضي لاانا ولاميهاف فيه وقبل لاتجي الممرضه كنتي بإجازه عشان تهتمين بأمي بس بعدها خلاص اعتمدتي
دلال وهي تلوم نفسها : بس مافي شي يمنعني على الاقل قبل انام اجلس معها لو نص ساعه انا يارند ابتعدت عن اممي كثير كنت لاهيه والله لاهيه وماحسيت بهالذنب الا لما جا ذاك اليوم وماصحت امي خفت رند انها ماتت طرت فيها للمستشفى ويوم قال الدكتور حالتها ضاقت فيينيي وجت ميهاف وزادت الطين بلّه شوفيها حتى ماجت للزواج
رند ميلت شفتها : وميهاف من متى تعذر وتسامح ؟ على طول هي الصح وحنا الغلط وتكبر المواضيع
دلال تسحب نفس عميق : لو معاذ مارضى بآخر الوقت يخلي الزواج بالشرقيه كنت ممكن اكنسل الزواج بكبره
شهقت رند : انهبلتي
دلال : كنت بضطر اترك الشرقيه قبل كم يوم ومن بعد الي صار احس صعبه ومستحيل اترك الشرقيه الين ماتتشافى امي
رند بطفيف ابتسامه : ادعي لها
قطع عليهم دخول جمانه اخت معاذ وتعطيهم تصفييره قويه تعبر عن مدى اعجابها : هنيا لك هنيا لك معاااذ عز الله انك طحت ومحد سمى عليك
ضحكت دلال بخجل وشوي شوي دخلو البنات ومن بينهم منار وهدى وميـاده وكل وحده لها غايه من دخلتها
مياده كانت تبي تشوف دلال وكيف زينتها .. وابهرتها وماعطتها اي مجال انها ترمي عليها كلام جارح وتهينها وللحظه طرى ببالها معاذ وجلست تتخيل كيف بتعيش دلال معه .. حسدتهاا بالحيل وودها لو هي بمكانها الحين ،
وعت على صوت منار وكم بنت وهم ذايبين بجمال دلال الي كان بارز اليوم مع فستانها الناعم وطرحتها والي تهني معاذ فيها ، حست بسكاكين تنغرس بصدرها انسحبت من بينهم وطلعت وهي تكفكف دموعها
هدى كانت تراقب نظراتها وتقلب ملامح وجهها وعرفت ان باقي تفكر بمعاذ ماعقلت رغم انه بعيد عنها ومستحيل يفكر فيها مجرد تفكير ،
لفت لدلال ورند : اجل وين ميهاف ماشوفها معكم !
دلال بهدوء : امي تعبانه هالفتره ولازم احد معها
هدى رفعت حاجب : وماتشاركك فرحة زواجك ؟
دلال : فرحتها لي بالقلب لكن امي اولى من كل شي
برمت شفتها مو معجبها الكلام وسكتت ..
_____________________
عند عبد العـزيز ،
طلع من بيتهم متوجه للقصر واتصل على طلال ورد عليه : الو
عبد العزيز : ياهلا .. ها جهزت ؟
طلال بتعجب : ومن قايل لك اني بروح
عبد العزيز : طلاال وش متفقين عليه حنا؟
طلال : مااذكر اني عطيتك كلمه ووعد اني بروح لاهو زواج اخوي ولاولد عمي مو ملزوم
عبدالعزيز : انا ماصدقت على الله تجي مناسبه تخليك تطلع من حكرتك وبعد رافض تطلع وش ناوي عليه انت ؟
طلال : لو مفكر اني اشوف احد بروح اشوف امي هي اولى من اي احد بس للحين مو مستعد اني اقابل احد واجلس معه
زفر عبد العزيز بيأس : خلاص براحتك اناا بعد ماطلع بمرك
طلال : زين ، وسكر منه ورما الجوال جنبه وجلس يقلب بقنوات التلفزيون بملل فضيع وهو متكي على يده وعقله مشغول بشي ثاني بعيد عن الي يشتغل قدامه صار له من تعالج وتشافى فتره طويله بس لهاليوم ماهو عارف كيف بيقابل رند ؟ كيف بيعتذر منها على كل الي سواه معها والاهم انه ماوفى بوعده لهاا واخلف صحيح ماكان بيده وساويسه معبيه راسه بذاك الوقت بس بنفس الوقت يحس بلوم وذنب فضيع تجاهه وهي امانه عنده وامانه كبـيره ،
____________________
في القـصر ، وعند الرجال
وقفة ابو ثامر بالوجه ورزته ببشته وبجنبه ولده ثامر الي ياخذ من ابوه شبه قوي الفتت انتباه الكـل وماهم عارفين من يكونون
هالاثنين خصوصا انهم واقفين بعد بو معاذ وبو خالد ويتلقون تبريكات المعازيم .. خالد وهو يهمس لأبوه : مو معقولين يبه لازم حد يروح ويكلمهم اشكالهم جديده والناس تبارك لهم ؟ على اي اساس
بو خالد يركز النظر بأبو ثامر لعله يعرفه : اول مايدخلون الرجاجيل لقاعة العشا ابتكلم معه كلامك عدل .. وماامداه كمل كلامه الا ويشوف ابو معاذ متوجه لأبو ثامر ،
خالد : يبه الحقه
بو خالد سمع لولده وراح ورا بو معاذ وسلمو على بو ثامر وعلى وجيههم شوي من الاحراج .. بو معاذ : السموحه ياخوي لكن شد انتباههي رزتك ووقفتك بيننا وماذكر اني شايفك من قبل
بو ثامر : معك حق انا محد من الموجودين يعرفني ماني عايش بالخبر لكني قريب من اهل العرس
بو خالد : قريب؟
بو ثامر وعينه بعين بو معاذ : انا عـم البنت الي بياخذها ولدك معاذ الله يحفظه
بو معاذ وبو خالد نااظرو بعض والصدمه باينه بعيونهم
بو معاذ : البنت مالها اعمام وانا متأكد من ذا الشي كيف تقول عمها ومن وين طلعت
بو ثامر : سالفه طويله ماتنحكى بهالوقت وهالمكان لكن انا عمها اخو ابوها الله يرحمه واكفيك بهالكلام وبعدها لنا قعده ان شاءالله
بو معاذ بتأثير الصدمه للحين : على خير .. ومشى لمكانه وجلس على الكرسي وجنبه بوخالد : مايعدي بكره الا وانت عارف منه كل شي
بو معاذ وعيونه على بو ثامر الي يبين من وقفته ونظرته للناس انه قـوي وشكله من رجال اول وكلامه واسلوبه ياخذ من سلوم الاووليين بكل شي
____________________
عند الحريم ،
بعد مادخل معاذ وجلسو بمكانهم على المنصه ويستقبلون الناس وتباريكهم
مسكت جمانه يد امها ورقصت معهآ على الخفيف ماحست الا باللي تسحب يدها من يد امها وكانت بعبايتها المفتوحه وتكشف لبسها وحاطه الشيله على راسها اي كلام ،
انصدمت جمانه من مياده وتنصـدم زود وهي تشوف مياده تتمايل قدامها برقص هاااادئ
انتفضت جمانه وصارت تناظر حولها تبي من ينقذها من هالموقف الغبي
ومياده تبتسم بوووهم مو حاسه على نفسها وطاحت عينها بعين دلال الي موسعه عيونها على اكملهم من هول ماتشوف قدامهاا
حست بيده شدت على يدها بقوه لفت ومحجرها ممتلي دموع تبي تبرير للي يصيير
معاذ كان ضغطه مرتفع من وقاحة مياده الي وصلت لأقصى حد وماتحمل دموع حبيبته وبهاليوم بالذات
ماحس بنفسه الا ماسك وجهها من خدها ويقربها منه ويميل وجهه شوي ويبوس خدهاا بلطف وهدوء ويرفع شفايفه لأذنها : عيوني ماتشوف غيرك لو قدامي مليون بنت
سحبت يدها من يد جمانه والغيره تحررق قلبهاا سوت هالحركه عناد وكيد بخالد الي قرر يتزوج عليها وكأنها بترضي نفسها بهالحركه ! لكن الصدمه الي شلتها تهميش معاذ لحركتها وبوسته لدلال قدامها وقدام الكل ومو شي جديد عليها لكن بكل مره تبني امال وبكل مره تخيب ، لكن من دون يأس ،
نزلت من على المنصه وهي تنتفض وترععد من غضبهاا وكانت عيون امها عليها بعصبيه زاايده عليها مرات ومرات وكأن هالبنت نزلت راس امها بالحضيض
طنشت امها وصعدت الدرج مالها مزاج تكلم احد ومامدى دخلت الغرفه وقبل لايتسكر الباب الا ولفت من قوة صقعته بالجدار لفت بسرعه وارجمها كـف على خدها وبعده ثاني وثالث لعلها تصحى من وهمها ،
ضربتها امها بلا وعيي وكانت تشتم فيها من قلب ومياده سااااكته وراضخه لكل شي ومستسلمه بين يدين امها الي حاستها حووس
ابتعدت امها عنها وقبل لاتطلع من الغرفه : لاعاد اشوفك داخله بيتي يامسودة الوجه ، وطلعت وصفقت الباب معها
ظلت بمكانها تناظر طيف امها الي اختفى وتتنفس ببرود فضيع بظن امها انها كسرت راس مياده لكن هيهات ! ماهي طالعه من القصر الا وبعد ماتسوي الي براسها
____________
بعـد مرور الوقت ومعاذ يده بيد دلآل توجهو للغرفه فوق وتصورو شوي وبعدها استأذن وقال انه ينتظرها بالسيآره على ماتلبس وتجيه
ركب سيارته وهو متوتر من حركات مياده الي ماهي راضيه تخلص
ماكمل عشر دقايق من ركوبه للسياره الا وانفتح الباب وركبت بجنبه
لف لها وهو مبتسم لكن اختفت ابتسامته وصرخ : نعععععممم
مياده بعناااااد وجنون فزت مسكته من ياقة ثوبه وباليد الثانيه شدت يدينه ببعضهم وقربت منه بحركه سريعه وباسته بشفته وهي ترععد وعيونها هيمانه
دفها بقوه لحد ماصقعت بالباب وصرخ فيهااا : الله ياخخذذذكك يااقذر ماخلق ربي يشهد الله ان حرام بحق خالد تكون على ذمته وحده مثلك وصخه وقذره ، وفز لعندها وهو يفتح الباب وبيدفها الا مسكته : بستها كحركة عناد لي وشوفني جيت اخذ حقي قبل لاتذوقه هي الليله
انصصصدم اكثر وطير عيونه فيهاا !
مياده : لو اتزوج ولو تتزوج انت بدل الوحده اربع بتبقى لي يعني ليي وماني بخايفه من شي لو اني اتططلق من الزفت بس مانام وببالي شي ابيه حتى لو اكبر شي يجي ببالك ، ورمت يده ونزلت بسرعه ودخلت للقصر
فك ازرار ثوبه وعيونه مجمرررين واسند جسمه وراسه على المرتبه وللحظه كشر وفتح علبة ماي وشربها دفعه وحده ورماها من النافذه
شوي وركبت دلال بجنبه التفت لها بتوتر وابتسم بصمت وحرك للفندق
بعـد ماوصلو ودخلت اخذت شاور وغيرت ملابسهآ وهو قبلها وينتظرها بالصاله وحركات مياده راكزه براسه وهو معصبب انه مو قادر ينسى ، قآم بفقدان للصبر وفتح الباب وكانت تجفف شعرها بالمنشفه ، رفعت راسها له وانحررجت وفكرت انها طولت عليه خصوصا قال انه طلب عشا خفيف لهم ، ابتسمت بارتباك وهي تنزل المنشفه من يدها لكن ماوعت الا بيدينه تحوط خصرهآ ويسحب المنشفه ويرميها لبعيد
ضرب قلبهاااا وبلعت ريقها وهي منزله راسهآ وصدرها يرتفع وينزل بشكل وااضح ودقات قلبها فاضحتهآ
من غير صبر يبي يمحى الي بعقله رفع وجهها من ذقنها وقبلهآ بهدووء وبحركته زادت رجفتها بين يدينه ، مااعطى اهتمام لخوفها وحملها بخفه وو ..
____________________
يـوم ثآني ،
صحت من النوم وكالعاده بلحالها بالغرفه ، بقت ثواني تتأمل السقف وتتذكر هي وش سوت البارح !
ابتسمت كأنها مجنونه وتمرر يدها على شفايفها وتتذكر الموقف وتتسع ابتسامتها اكثر واكثر ، الي بيشوفها بيقول انهبلت وقضت
التفتت للجوال واخذته تتفقد الواتس والا برقم غريب مع مقاطع فيديو ،
استعدلت بجلستها وهي تحمل المقاطع وشغلت اول واحد .... وتدنق راسها معقده حاجبينهاا مستتغررربه ! هذذي اهي وهي ترقصص وباين تمايلها بدلع قدام معاذ
رمشت مستغربه من هاللي مصورها وش يبي ؟
شغلت المقطع الثاني وكانت الطامه بالنسبه لهااا وهي تركب سيارة معاذ ومن سوء حظها انوار القصر كانت عاكسه على المرايه الاماميه وبينت كل الي صار لان التصوير كان من قدام السياره
ماكملت المقطع وطفته وكتبت بسرعه : مين ؟ وش تبي ؟
بلعت ريقها وهي تبتسم على جنب بخوف واضح وقلبها صار يرقع، ابعدت اللحاف عنها وقامت تغسل وجهها وهي تفكر من الي مصورها !!
_____________________
ببيت بو دلآل ،
سمعت صوت الباب وقامت تشوف من .. واول مافتحته وشافته رجال رجعت بتسكره بسرعه الا حط رجله : صبر صبر يابنت
ميهاف : من انت ؟ وش تبي ؟
بو ثامر : خليني ادخل للمجلس بالاول
ميهاف تنرفزت : نعم حلو حلو ادخل رجال غريب بالبيت توكل بس توكل
بو ثامر لف لولده الي كاتم ضحكته : ومن قال اني غريب
ميهاف : ليكون ابوي ولا ااخوي وانا مدري وش ذا المحارش بعز الظهر ستغفر الله احترم الشيب الي بشاربك ياخي وفاارق
بو ثامر زفر واحتدت نبرته : ميهااااااف
وكأن احد رجمها على وجهها من سمعت اسمها شبصت يدينها بالباب اكثر وبلعثمه : م مـ..ـن انت ؟
بو ثامر وهو يتنهد الشمس صلخت له ظهره : افتحي يابوك الشمس حرقت ظهري
ميهاف خافت : ايي من انت عاد قول لي عشان ادخلك
ثامر : عممك يابننت عمك افتحي الباب وخلينا ندخل
ميهاف بصوت عالي : خخيييرر ! وش عمه بسم الله
ثامر : مراح يكون عمك اخو امك طبعا ! يابنت افتحي وقفتنا ذي غلط
ميهاف تنرفزت : يقول عمي !! ومن وين ان شاءالله فجأه طلعت من تحت الارض فقع انت فقع ؟ انا اقول توكل مو فاضيه لك ورب البيت
ثامر فقد صبره ودف الباب بقوه وانفتح لهم ودخل بو ثامر وهي شبصصت ورا الباب وحطت الشيله على وجهها
بسرعه من الخوف بو ثامر ويده تمنع ولده يتقدم وبالثانيه سحب الشيله من على وجهها : افتشي انا عمك
ناظرته ميهاف مستغرربه وماهي قادره تنطق
بو ثامر : المجلس وين ؟ ولد عمك بيدخل
ميهاف اشرت بيدها للمجلس ووقف بوجهها وطلب من ولده يدخل للمجلس على طول ، ودخل ثامر للمجلس
بو ثامر : انا ادري وش الي يدور براسك الحين وانا جاي وعندي كلام كثير بس بالاول ابيك تجهزين الشاي والقهوه بو معاذ ابو زوج اختك دلال بيجي بعد شوي شافني البارح بالزواج ويبي يعرفني اكثر وقلت له يجيني هنا وشكله ماهو جاي بلحاله
ميهاف شوي شوي تزيد صدمتها وتناظر عمها بنظرات مو مفهومه
ابتعد عنها وفسح لها الطريق : اسستعجلي وانا عمك
مشت من عنده ودخلت وهي مابين الصحوه والحلم ماتدري الي صار صدق ولاحلم وشوي وبتصحى منه! عم عاااد ومن متى ؟؟؟
ييوووه لو بس تقدر تتصل على خواتها وتقول لهم ! مالقت بوجهها غير منار بهالوقت ومن غير اي تردد اتصلت عليها وطلبت منها تجيها الحين وبعد ماسكرت قامت حطت القهوه والشاهي يستوون وراحت تغير ملابسها
_____________________
ببيت بو خـالد ،
نزل من على الدرج وهو يثني شماغه ووراه خالد : وتهقى انه صادق ؟
بو خالد : ماظنتي به كاذب لان مافي شي يجبره لا مال يبي يستولي عليه ولاشي وحتى البيت الي هم فيه اجار يعني مافي شي يجبره يكذب
خالد : بس وش ذا العم الي طلع لهم فجأه ؟
بو خالد : والله علمي بعلمك بس كلمني بو معاذ وهذا هو طلع من البيت الحين ويبيني معه
وقف خالد وهو يشوف ابوه يطلع ويسكر الباب معه وراح جنب امه الي كانت سرحانه وتفكر بكلام بو خالد
خالد : سرحانه ب وشو يالغاليه
ام خالد : ياولدي اقولبها براسي يمين وشمال على قد ماقعدت مع ام دلال بس ولا مره جابت طاري ان لبناتها عم ! معقوله عاشت مع زوجها فوق العشرين سنه وهي ماتدري اذا لزوجها اخوان ولالا
خالد : ويمكن تدري بس ماهي حابه تفتح هالمواضيع
ام خالد وهي تزم شفايفها : الله يستر مدري ليه قارصني قلبي ماورا جيته ذي خير والا وش مطلعه عقب هالسنين هذي كلها ومحد يعرفه ؟
التفتو على صوت خطوات منار وهي نازله للدرج وحامله عباتها بيدها ومامداها جلست الا وعز وبدر داخلين البيت بعد ماكانو عند طلال سلمو وجلسو
ام خالد وهي تناظر بنتها : وين ؟
منار وهي تلبس عبايتها : يمه اكيد قالك ابوي بالرجال الي جاي لميهاف وخواتها ويقول انه عمهم اتصلت فيني قبل شوي وقالت اجيها ضروري وانا ابيها من الله
عبد العزيز باستقطاب ينقل النظر بين امه واخته : عم وشو ؟
خالد : لو انك مسبق جيتك بنص ساعه سمعت السالفه من ابوي
بدر : وش السالفه عاد
قال لهم خالد كل شي من البارح ،
كان الاستغراب بايين على ملامح عبدالعزيز بوضوح بعكس بدر مااعطى اهتمام لهالموضوع
عبد العزيز : طيب وش جابه الحين والبنات مايعرفونه
ام خالد : هذا الي رايح له بو معاذ الحين وطلب بعد يجمع البنات كلهم ويحكي قدامهم
منار قامت على اتصال فهد: يلا عن اذنكم، وطلعت ركبت السياره وسلمت على فهد ورند الي طلب بو ثامر وجودها اليوم ..
___________________
بالفـندق ،
قامت من على الطاوله بضيق يكسي وجهها ، سحب يدها : دلاال افرديها
دلال : افرد وشو يامعاذ افرد وشو ؟ ماني قادره اتهنى بشي من مناسباتي ؟ لاملكه لازواج وش باقي ؟
معاذ : اذا مالك رغبه بالروحه لهناك مو لازم
دلال استنكرت : واترك خواتي لوحدهم يقابلون الي طالع لنا بصفة العم
معاذ بنبره هادئه عشان تهدأ: معناه لازم تهدأين شوي عشان تروحين وتعرفين كيف تتكلمين معه
رفعت راسها وهي تزفر بضييق وحست بيده تلامس خدها بلطف ، فتحت عيونها ببطأ وهي تبتسم غصب
ابتسم لإبتسامتها وقرب اكثر منها بقبله على جبينهآ : انتظرك تجهزين
اتسعت ابتسامتها وهي تقوم : إن شاءالله ..
___________________
بعد مرور الوقت والكل اجتمع ببيت بو دلال
وبو ثامر سرد كل الي عنده اولا للرجال ، وثم طلب البنات عنده وعاد نفس الكلام ..
كانت الصدمه مغطيتهم ثلاثتهم واجبرتهم الصمت ،
الا ان ميهآف وقفت بعناد ورفعة راس : ماعندي اعمام من انولدت ولين اموت
بو ثامر بتفهم : هذا الكلام الي ربيتي عليه ولولا وفاة ابوك ماكنت طلعت لحياتكم
ابتسمت بسخريه واطلقت ضحكه نرفزت عمها وتعمدت تتكلم السوري : هههههههههههه بالله شو ! " ولفت لخواتها " لك اسمعو يابنات عشان ابي مات صرنا بنعرف ان في إلنا عم
بو ثامر ونجحت ميهاف يإستفزازه : ماعجبتني نبرة كلامك
ميهاف بحده وتخز عمها : بقريح ! عساها ماعجبتك ماهو بهمي اصلا
بو ثامر : الظاهر انك ماتعرفين الادب ولاتعرفين كيف تتكلمين مع الي الاكبر منك
تكتفت وهي تجلس مقابلته وترفع رجل على رجل : اعرف مع الناس الي تستاهل
دلال ورند كانو ساكتين وبداخلهم صددمـه قويه اختهم تغيرررررت بالحيل ! مين الي كان لسانها طويل وفيها حيل للهواش غير رند ؟ هي الي دايم معروفه بهالاسلوب بعكس ميهاف .. تتحاشى الهواش وطولة اللسان ودايم بحالها وش الي تغير ؟ وش صار لها عشان تصير بهالقوه قدام رجال اكبر من ابوها .. بس باين انها اخذت من الدنيا كفايتها عشان تغيرها هالتغير الملحوظ
بو ثامر احتدت ملامح وجهه ورمى الاورق على الطاوله : هذي الاوراق الي تثبت لكم اني عمكم وكل اوراق العايله وكل شي حابين تتأكدون منه ، ومن هنا لين تتأكدون بكلم الشركه يجون ويساعدونكم بتفضية هالبيت
دلال : ليه ؟
بو ثامر : بكره بإذن الله راجع للجبيل ومالكم قعده هنا باخذ ميهاف والوالده ، وبخصوص العلاج نقلت كل الاوراق لمستشفى الهيئه الملكيه في الجبيل وبإذن الله بتتشافى
لحظات صمـت مرت وعيون البنات عالقه ببعض
لفت بغضب جامح : وبإذن من كل هالقرارات ؟ من الي قال اننا بنروح معك للجبيل ؟
بو ثامر : بصفتي ولي امركم ماني محتاج اخذ اذن من احد
وقفت وهي تصصرخ : ماااااانت ولي امررر احححد هييييه !! ومحنا بحاجتك عاد عشان تااخذناا معك حنا قادرين نعيش
بو ثامر وقف بوجهها وبصوت جهوري : وكيـف بتعيشيين ؟ بوظيفة الخدم الي ورثتيها من امك ؟ وبتركك لدراستك وبهالوقت يعتبر جاهل من يسويها
ميهاف وهي ترص على اسنانها : مافيها شي وظيفتيييي
بو ثامر : كل البلى فيهاااا ماهو ابوي الله يرحمه تجي له حفيده مثلك انتي وتوطي راسه بالتراب بشغلتها ذي
ميهاف : ماهو على كيفك وكلامك ذا بلله واشرب مويته محنا بجايين معك لو تسوي وش ماتسوي والبيت يتعذرك الحين
بو ثامر وبعيونه شرار من لسان ميهاف : بالاوراق الي حطيتها فيه ورقه تثبت اخلاء طرف هالبيت وماعاد باقي لكم شي بالخبر انا طالع الحين والشركه بتجي عقب كم ساعه بتلم العفش الي تحتاجينه واظن ملابسكم كافيه الملحق عندي بالبيت فيه اثاث مانتم محتاجين هالوصخ تاخذونه معكم
لمعت عيونهآ بدموع متجمعه ماتبيها تنزل قدامه .. الحين صار الاثاث الي ابوي جمع عرق جبينه وشراه اسمه وصخ ؟
ناظرته بعيون يتطاير منها الشرار : انقلع انت وولدك من هنا
بو ثامر يأشر بسبابته : نذرٍ علي من تجين لأعيد تربيتك من جد وجديد
بنبره جامده : بعيد عن شواربك
ماقدر يستحمل وفزز بيصفعها على خدها لولا دلال الي وقفت بوجهه ونزلت يده : مو بنات محمد الي ينضربون
زادت من غضبه وبتهديد : بنشووف ، وصد طالع من المجلس ومن البيت بكبره وهو يهدد ويتوعد ماكان متوقع هالصعوبه في كلامه معهم
ثامر باستغراب لعصبيته : وش ذا الحمق يبه وش صاير ؟
بو ثامر وهو يركب ويصفق باب السياره : بنات عمك ماهم متربيات عمك ماعرف لهم ولالتربيتهم كل وحده لسانها يلوط اذانها
ثامر وهو يشغل السياره : تربيهم من جديد يالغالي لاتشيل هـم ،
____________________
بعد ماطلع بو ثآمر من البيت راحو دلال ورند لغرفة امهم وكل وحده مسكت لها جانب وخاطرهم مكسـور من البعد الإجباري الي حل عليهم
بينمآ ميهاف توسدت روحها الثانيه منار وانخرطت ببكي عجزت انها تهدا منه ، كانت رافضه كل شي رافضه انها تبتعد عن هالبيت الي بكل زاويه لها فيه ذكريات ورافضه تبعد عن منآر والاهم قلبها الي بتتركه في زوايا هالمدينه .. عبد العزيز..
ومنار تحاول انها تهديها لكنها فشلت بكل الطرق ،
وبعد مده نطقت بهدوء : مانتي قايمه تجهزين شناطك وشناط امك ؟
ميهاف بضعف وعلى وشك انها ترجع تنهار من جديد : ماعرف وش اخذ معي وش اخلي
منار : اساعدك بكل شي تحتاجينه
ميهاف : ماابغى اترك هالبيت ولااترك الخبر بكبرها
منار تنهدت : فتره وتعدي قولي ان شاءالله
ميهاف بهدوء : ان شاءالله
منار : دلال ورند لسى عند امك ؟ مراح ياخذون اغراضهم
ميهاف بجمود : مدري عنهم ، وقامت سحبت كرسي وحطته مقابل دولابهم وصعدت عليه وهي تسحب شناط من فوقه ويتناثر عليها الغبار وتحمي عيونها بيدينها وتطيح الشناط على الارض وهي تناضرهم بعيون ضيقه
نزلت من على الكرسي وهي تنفض يدينها
وفتحت دولابها وبدت تفرغه في الشناط وتاخذ كل شي مهم ممكن انها تحتاجه وكل هذا بمساعدة منآر ، وانتقلو لغرفة ام دلال وجمعو كل ملابسها واغراضها الثانيه
كانت السآعه 2 الفجر ، دلال ورند كل منهم رجعت لبيتها بعد ماقالو انهم مو بحاجة لشي من ثيابهم والاغراض الثانيه خذو الشي المهم وطلعو بعد ماودعوهآ وكان وداعها لهم بـارد نوعا ما وبالخصوص رند وكانت نظراتها لها بأنك انتي السبب بموت ابوي وبضياعنا الحين .. بعـد ماخلصو منار وميهآف من تفضية البيت من الاغراض حتى الثلاجه ودواليب المطبخ فرغو كل مافيه للسايق الي اخذ رند ..
كانو جالسين في الغرفه بتعب بعد الكرف الي كرفوه
منار بهدوء : متى بتمشون بكره ؟
ميهاف سرحانه :.. منار هزتها : ياهووو
فزت : همم هلا !
منار : متى بتمشوون من هنا
ميهاف بكره لهالطاري : مدري ماقال الشيبه بس غالبا بعد الظهر
منار نزلت راسها بضيق : مارضيت ببعدك عني والبيوت قراب صرت انتظر بعدك بالمدن
وكأنها لامست جرح ميهاف الي دنقت براسها وهي تضغط على جبينها ودموعها تسابق بعض قاست هالكلام على عز الي ماتدري كيف بتطيق فراقه
فزت منار بسرعه وسحبتها لحضنها : شش ماقصدت ماقصدت ازيد من همك ميهاااف ... خلاص الله يرضى عليك اهدي
ماردت بكيها يمنعها تلفظ بكلمه وتتشبث بمنار اكثر كأنها تشم باقي ريحته في اخته وتحتفظ فيها
..
_____________________
ببيت بو خآلد ،
على وشك انه يفقد صبره بعد ثواني ! مل انتظارها بهالمكان وهو الي راسل لها ماتبطي وتجي بسرعه .. سمع الخبر الطامه بالنسبه له من فم امه وهي تتكلم بالجوال مع منار وحس بالكون يضيق فيه شوي شوي طلع لبرا على طول يلقط باقي انفاسه وجلس على الكرسي واتصل بأخته تستعجل رجعتها لكنها طولت ،
على الساعه 3 .. لف على ضوء انوار سيارت داخله البيت فزز وقلبه يضرب بجنووون وسرعه فضيعه
نزلت منار ووقفت الين ماطلع فهد من البيت بسيارته وكانت متمالكه نفسها بالقوه ، وماان لفت بتدخل للبيت الا شافت عبد العزيز مقبل لها ، اسرعت بخطواتها له وكأنه فهم من طريقة خطواتها وفتح ذراعينه لها وارتمت بحضنه واجهشت ببكي كانت حابسته من مده طويله وبكلمه متناثره : بـ..ـتـ..ـروح
رفع راسه للسما بتنهيده هزت كيانه وهو يمسح على راس اخته يهديها
ابعدت عنه بترجّي : كلم ابووي خليه يكلم عمها ويتركهم يعيشون هنا مابيها تروح تكفى عزز طلبتك والله ان قلبي مو قاوي
كان وجهه شاحب اللون بالحيل ابعد اخته عن طريقة ورجع لكرسيه بخيبه وجلس وهو يتنهد بنفس متقطع وبداخله حتى لو كانت تبي غيره ومافكرت فيه بس شوفتها قريب منه تكفيه وتغذي قلبه على الاقل لو يسمع اخبارها .. انقطعت افكاره لدقآيق ودقايق طويله ومـآوعى الا على اخته وهي تهز وجهه بخوف وذعر وتمسح على وجهه بالماي
رمش بصعوبه وهو يستوعب انه فقد الوعي قبل دقايق .. ومن شافته رجع لوعيه سحبته لحضنها وهي تحمد ربهاا وتزفر براحه : بسم الله عليك وش صااار لك
عبد العزيز بتعب : بس ماني ماكل شي لاتخافين
ناظرته بتكذيب لكلامه ومااعطاها فرصه وقف بترنح شوي الا وقفت تسنده : اجججلس مكانك
عبد العزيز يثبت توازنه : ابروح اتمدد بغرفتي كنت منتظرك تجين لااكثر
ناظرته بإمتعاض وبخاطرها "يامكبر كذبك" مشت معاه تساعده الين ماوصل لغرفته وساعدته بأنه ينسدح وكان باين عليه الارهاق بشكل واضح
اوجعها قلبها على اخوهآ وكأنها عاشت نفس هالشعور من فتره ماهي بعيـده ذاقت طعم البعد ذاقت طعم الفراق ذاقت انها ماتهنت بوصال من حبته وهي تدري ان اخوها عاشق لميهآف وعلى قد ماغطى على مشاعره وامتنع بأنها تنفضح الا ان عند منار كان كل شي واضح وضوح الشمـس .. ضاق خاطرها وطلعت من عنده بعد ماطفت الانوار على ظنها انه بينام ،
___________________
صبـآح يوم جديد
الساعه 10
بيت بو دلال كان يعج بالفوضى والعمال يفرغون البيت والمسعفين خذو ام دلال بسيارة الاسعاف ومسكو خط الجبيل ..
كانت واقفه وعيونها تتنقل بين ارجاء البيت تحمل باقي الذكريات وتحاول تتحاشى عمها وولده الي واقفين بالحوش ويسولفون براحتهم
بعد ماخلصو من تفضية البيت تقريبا طلعت معهم وركبت سيارة عمهآ بصمـت من غير ماتنتبه لوجود سياره واقفه على مسافه قريبه منهم وصاحبها يراقبها ويتأمل نظرات منها ،
كانت ورا ثامر بالضبط وماله فرصه انه ياخذ لمحه منها ويشوف كيف شكلها بنت عمه طويلة اللسان الي رفعت ضغط ابوه البارح ؟
كانت ولأول مره تلبس النقاب بحياتها ، بعد مارماه عليها عمها بو ثامر وطلب منها تغطي وجهها
دموعها كانت مستمره معها طول الطريق وماان مسحت دمعه الا وتسابقت باقي الدموع وتبلل وجهها كانت مدنقه راسها وذكرياتها ماوقفت لحظه .،
وقفت سيارة بو ثامر ورفعت عيونها تناظر البيت الي وقف عمها جنبه ، ماكان يبهر العين بس بالنسبه لبيتهم ابهرها وعلى طول قارنت بيتهم بهالبيت ، سحبت نفس عميق ونزلت من السياره ومشت ورا عمها وولده ودخلو للبيت
وكانت السآعه على 2 ونص الظهر
وقفت عند باب الصاله بتردد وحيره ماتدري وين تروح ،
وبعد مرور دقايق على وقفتها بهالشمس الحارقه فتح عمها الباب وبنبره جافه امرها بأنها تدخل وتسلم على مرت عمها وزوجة ثـامر ،
دخلت وكان ثامر بالجهه الثانيه .. نزعت النقاب وعيون مرت عمها تترقب ، توجهت ميهاف لها ومدت يدها لها بقصد السلام
كان وجه ميهاف احمرر وعيونها مثل الجمر دليل كبير بأنها صاحت الين ماقالت امين ومع ذلك ملامحها اثارت نار الغيره بصدر ام ثامر وعادت لها ذكريات امها معها مدت يدها ببرود وسلمت عليها وانتقلت ميهاف لنهى الي ماكلفت على نفسها وقامت لها واكتفت بسلام باليد ،
وقفت ميهاف وهي تناظر قدامها بضياع وتسمع عمها : من اليوم ورايح بتعيشين بالملحق الي برا الين ماترجع امك وتعيش معك فيه وترى عمليتها بكره
ميهاف ببرود : ابغى اروح لأمي المستشفى الحين
بو ثامر وغضبه مازال : مافيه روحه
رفعت راسها تناظره بصدمه : بتحرمني من امي ؟
بو ثامر : الين ماسوو عمليتها ورخصوها بتجيك هنا ماعندنا بنات يطلعون ويروحون مستشفيات
ميهاف بصوت عالي : بس هـذي امممي تفهم
...........: تكلمي بأدب قص بهاللسان .. كانت نبره قاسيه وجافه تعلن عن بدأ حياه صععبه بتعيشها بهالبيت وماكانت هالنبره من عمها ! كانت من مرت عمها الي تجدد كرهها لأم دلال من شافت بنتها وهي تحمل كل معاني الجمال بوجهها
ميهآف رمشت بإنكسار تخفيه : انا ماني عبده عندكم عشان تعاملونني بذا الاسلوب امي ومن حقي اشوفها واقعد معها واهي بأمس حاجتي الحين
ام ثامر : كنتي خدامه عند غيرننا مافيك فرق عن العبده ومااظن يصعب عليك تصيرين عبده عندنا
بو ثامر رمى عليها نظره يجبرها تسكت ماحب اسلوبها مع بنت اخوه وان كان هو تعامل معها بحده لكن هي اجبرته
ام ثامر طنشت زوجها : امك بيدين الدكاتره الحين وهم اعرف منك وامك ماهي بحاجتك تطمني .. ونـادت بصوت عالي للخدامه وطلبت منها تاخذ ميهاف للملحق .
.
وقفت بمكاني مهزوز كيآني ومافيني حيل اناظر احد ، ادري بعيوني نظره تكسر الخاطر ومابي احد منهم يشوفها
رفعت راسي على صوت الخدامه وهي تطلب مني الحقها مشيت بثقل وطلعت مرورا بهالشمس الحاررقه على امل وصولي للملحق انعم ببرود المكيف وهذا ماقاله عمي بأنهم مجهزين الملحق ومستعدين لوصولي اتم استعداد ،
وماان فتحت الخدامه الباب ودخلت وراها الا واخذت نصيبي من كمية الاتربه الموجوده رفعت يدي اشغل الانوار وشلتها بسرعه بإنزعاج من الغبار الموجود بالجدار وعلى ازارار الكهربا ،
، لفيت للخدامه وهي تقول : انتي في نوم هنا ماما قول
ماقدرت امسك لساني وقلت : ليه المكان كذا ؟
الخدامه : ماما قول ، وطلعت بسرعه بعد ماعرفت شعور مرت عمي تجاههي باين انها تكرهنا كره العمى ،
شغلت الانوار وانا اناظر المكان بخيبه كبيره وتوجهت بسرعه للمكيف وشغلته واول ماشتغل نفض بوجهي كمية ترااااب وهوا حااار ابتعدت عنه بسرعه وانا اكح بإنزعاج
ماكان في مكان يسمح لي بأني اجلس ، والمكان ماخذ نصيبه من الغبار فصخت عبايتي وعلقتها على الباب وشمرت كمومي وبديت بشغلي الشاق واني انظف هالمكان واخليه مكان صالح للعيشه فيه .. .
.
____________________
المستـشفى ،
الدكتور وهو موجه الشعاع بعيون ام دلال ويفحصها ثم يستعدل بوقفته وهو يهز راسه بالنفي : انا اشوف التأجيل بوضعها احسن بكثير
الدكتور الثـآني : مع الاسف هذا الي طلع معي لكن المسؤول عنها طلب اجراء العمليه بأسرع وقت
الدكتور الاول تنهد بعدم رضا وهو يناظر ام دلال ،
الدكتور الثاني : راح نكثف العلاج والعنايه خلال الساعات الجايه وان شاءالله انها تكون مساعده بأن جسمها يتقبل العمليه
الدكتور وهو مو مقتنع : ان شاءالله
.
.
.
نـــــــــهـــــــــاية الـــبـــــارت




Rewayt_dalia غير متواجد حالياً