[Cloud24]

(( الجزء الثـــالــث ))


×


عــادت ايامك في خجل
تتسلل في الليل وتبكي
خلف الجدران
الطفل العائد أعرفه
يندفع .. ويمسك في صدري
ويشعل في قلبي النيران
هدأت ايامك من زمن
ونسيتك يوماً لا أدري
طاوعني قلبي .. على النسيــان .


×



أمنية تقاطع عمر وهي تدف الباب وتدخل الغرفه وبوسط صدمته تقفل الباب وراها بالمفتاح وهي تبكي : ليش تجيني بالمستشفى وتأملني فيك ثم تروح تزوج غيري

عمر بتوتر وهو عارف انها تتصرف بجنون لو جا ابوه ولا عمه !؟ : انا ماأملتك بشي اطلعي ياأمنية الله يستر عليك

أمنية سحبت المفتاح من الباب وراحت بسرعه للباب الثاني وقفلته بالمفتاح
عمر تقدم بسرعه ويبي يسحب المفتاح قبل تسحبه هي بس ماقدر لانها ثبتت جسمها ع الباب ولاقدر يقرب منها : أمنية تعوذي من ابليس وش تسوين

أمنية تدخل المفاتيح بجيب بنطلون بجامتها .. وتنزل لثمتها ع وجهها المحمر ودموعها بدت تنزل : لانكذب ع بعض انت من زمان تدري اني احبك وتجيني بالمستشفى خايف علي وتدافع عني ماكان همك اني كاشفه عندك كذا ليييه لاني انا رح اكون زوجتك فعادي تشوفني صح

عمر واقف بنص الغرفه خايف من اهله ومرتبك هذي مجنونه مو صاحيه للموقف الي هم فيه : اعطيني المفاتيح ونتفاهم وقت ثاني تمام ابوي وابوك برا مصيبه لو شافونا كذا

أمنية ابتسمت من بين دموعها : وش بيسوون

عمر من شاف ابتسامتها غسل يده انها تخاف وتستوعب .. قرب منها مسافه بسيطه بحذر : بيضربونك وانا لاني اخاف عليك ماابي يدرون

أمنية بهدوء وهي فاهمه حركاته حتى هو صدق انها مجنونه : ليش ماتتزوجني انا مو حلوه مو ماليه عيونك هااه

عمر خطف نظره سريعه عليها .. وارتبك لما سمع ابوه ينادي .. وهمس وهو يقرب منها بتوتر : حلوه وتهبلين عطيني المفتاح الحين واتزوجك بكره

أمنية وقلبها يدق بقوه متوتره وضحكت تخفي ارتباكها : ههههه وعد

عمر ابتسم يسلك وكانه معه طفله : وعديين يله هااتي

أمنية تطلع المفتاح من جيبتها وتضمه وسط يدها : امم لاا مااثق

عمر تقدم بسرعه متنرفز وهو يسمع ابوه ينادي ثانيه .. أمنية لفت تجري بتنحاش ماتدري لوين بس صدق خافت

عمر صار يجري وراها بياخذ المفتاح بالغصب لمتى ينتظر تفهم المجنونه بتفضحه ..
أمنية نطت فوق السرير وهي ترجف وتناظره واقف عند الطرف وركبته ع السرير .. اخذت نفس بخوف وكأنها توها تستوعب تهورها المجنون : اهدى اهدى انا اعطيك لاتقرررب والله اصرخ

عمر شاد ع اسنانه وماد يده لها : بسسررعه

أمنية انقهرت ان كل هالعصبيه عشان مايتأخر عن خطبه ساره .. نطت من الجهه الثانيه ناويه تنحاش فالحمام
بس بيده مسك طرف جلالها وبنفس اللحظه تعثرت بالزوليه وطاحت ع وجهها

عمر جلس ع ركبه ويحاول يمسك يدها وهي شااده قبضتها بقووه وتحاول تقوم رغم الم راسها من طيحه الارض .. بس تفاجأه بعمر يمسك يدها الثنتين مانعها تقوم .. احتقرت نفسهاا هي الي سمحت له يقرب منها كذا كله عشان ساره الله ياخذها

أمنية بقهر وكرره تحاول تسحب يديها منه : والله اصررخ وخر ياقليل الادب

عمر يناظر وجهها المحمر وشعرها الي بدا يظهر من الجلال : انا قليل الادب الي داخل غرفه رجال مو محرم لي ومقفله عليه الباب ماابيه يطلع

أمنية لما حست بيدينه قدرت تفكفك اصابعها عن المفتاح .. رفعت راسها وعضت يده بقووه خلته ينتفض ويقوم عنها

أمنية فزت بسرعه رغم الم راسها وهي كارهه نفسها شلون ارخصت نفسها بهالشكل .. رمت المفتاح عليه ..مفتاح الباب الخارجي وضرب بصدره وطاح عند رجوله : تفوو ع الحب الي بيذلني لك انقلع تزوج انا مجنونه انا مدمنه انا قليله ادب اخلاقي صفرر رح تزوج ساره حبيبه الكل ولا عاد اشوفك موطوط ببيت ابووي وياليت تقش اهلك معك

ولفت فتحت الباب بتطلع ..

طوقه الي كانت جايه تعجله .. ضربت يدها ع صدرها لما شافت أمنية فتحت الباب وعمر واقف بنص الغرفه وشكله مبهدل : ياااويلي انتِ وش تسوين هناا

أمنية : انقلعي عن وجهي

عمر بصوت عالي : اصلاً انا مااتشرف فيك زوجه وام لعيالي وقحه وقليله حياا

طوقه تناظرهم مفجوعه خييررر !!؟ .. أمنية تمر من عندها وجلالها ع كتفها بكل برود هذي الي ماعاد فيها لاحيا ولا دين ..

لفت ع عمر : هذي وش تسوي عندك شصار بتفضحناا انت رايحين نخطب لك

عمر يحاول يهدي اعصابه ويعدل ثوبه : ماسويت لها شي هي جتني وطردتها

طوقه تاخذ نفس : المجنونه بتبلاك جعلها ماتربح الحمدلله محد شافكم انت اسكت لاتقول لاحد ابوك لو درا مصيبه

عمر يلبس شماغه واعصابه ثايره ..

طوقه : يله كمل بسرعه واطلع لابوك انا بروح البس عباتي


*


مرت هالاسبوعين سريعه ..
واليوم ملكه عمر وساره .. في استراحه بسيطه ومعازيم قليل عائليه يعني

أمنية جالسه جنب شيهانه وهي كاشخه .. هذي اول مناسبه جماعتهم يشوفونها بعد ماانتشر عند الكل انها مجنونه .. تحس بالانظار عليهاا وكأنهم مستغربين هدوئها وينتظرون اي حركه تثبت انها مجنونه

حضرت اليوم اولاً تثبت لنفسها صدق قرارها نزعت حب عمر من قلبها ورمته بااقرب زباله بعد ذيك الليله بكت لين الصبح بكت لين وجعها قلبهاا اصعب شعور لما تكره نفسك بسبب تصرف انت اقدمت عليه بكامل عقلك ..
كلماته لها اخر شي جلست ترن براسها "انا مااتشرف فيك زوجه وام لعيالي وقحه وقليله حياا"
وهو صاادق لازم تستوعب انه بصفها ويعرف انها مظلومه غير عن انه يتشرف فيها ولا مايشرف وهي زادت الطين بله بروحتها له .. خلاص عمر مو لها .. لازم تحترم نفسها وماتخسر نفسها اكثرر ..
بتحضر ملكته وزواجه وكأنه شخص عااادي

وفعلاً تحس بهالشعور المريح .. ماهمها نظرات عمتها طوقه المحتقره من بعد ماشافتها طالعه من غرفه عمر
محتقره وبنفس الوقت خايفه ان أمنيه تسوي شي تخرب ملكة ولدهاا

أمنية ابتسمت لطوقه وكأنها تقول اي خليك كذا خايفه مارح اطمنك اني عفت ولدك هههههه

شيهانه تاكل بقلاوه : ذوقيها امون مرره مزبوطه

أمنية توسعت ابتسامتها بعد ماشافت طوقه تصد عنها بقلق وتبعد .. لفت ع شيهانه واخذت بقلاوه واكلتها : اممم صاادقه

شيهانه تصب لامنية فنجال قهوه : خذي كملي اللذاذه

ام تركي وقفت عند راسهم : جالسات كأنكم ضيوف ليه ماتوقفون معناا

شيهانه تأشر ع بطنها حامل بالشهر 6 : بدبتي اطلع خلني جالسه ابرك لي مافي احد غريب

ام تركي تناظر أمنية : وانتِ

أمنية رفعت عيونها لها : انا ضيفه

ام تركي تلوي فمها : ملكه ولد عمك وش ضيفه !!

أمنية تهز كتفها ببرود : ايه ولد عمي مو اخوي

شيهانه : اجلسي بس يااختي تقهوي البنات ماشاءالله مكفيات

ام تركي جلست تنهدت : اييه يقولون منصور يراجع فيك عند دكتوره نفسيه كيف عاد

أمنية ابتسمت بصدق لعمتهاا الي جنونها عرفها بجوهر هالعمه طيبه وماترضى بالظلم والغلط .. تنصر المظلوم وقفت معها وهي كارهتها وقفت معها رغم قلة ادبها عليها قدام ضيوفها ..
حمتها من ولدها ومن عمها سعود ..
لمعت الدموع بعيونهاا : ايه ومنتظمه ع حبوب صرفتهم لي وانا احسن بكثيييير عن قبل انا بخير الحمدلله

ام تركي اخذت الفنجال من شيهانه : الحمدلله

أمنية رفعت عيونها تناظر السما .. اجمل شي انهم رتبو الطاولات كذا بحوش الاستراحه المكان مفتوح .. ونسمه بارده منعشه ..
لفت تناظر البنات يرقصون وساره جالسه ع الكوشه وهي مو مركزه مع سوالف عماتهاا .. من اليوم تتصدد عن ساره
تأملتها بفستانها الوردي المنفوش .. جميله ساره .. اكيد بتعجب عمر مؤدبه حتى فستانها محتشم
انا ليش جالسه اكيد ساره تفكر اني للحين ابيه ومقهوره .. لازم اقوم ارقص اييه استمتع بهالليله والجو العليل لي زماان مارقصت

وقفت ولفت ع عماتها : انا بروح عند البنات

شيهانه : خذي راحتك ياقلبي

أمنية مشت وهي ترفع خشمها ولاتناظر الي تمر من عندهم .. بنت منصور ماتبي شفقه من احد .. بنت منصور اصحى منكم كلكم ..

نجلا اول ماشافتها جايه ابتسمت بفررحه .. وراحت قالت لهم يشغلون اه ياليل لشيرين .. أمنية تحبها وكانت ترقص وتستهبل عليها كثيير

نجلا مطنشه امها وجدتها واذا شافوهاا خل تتمرد شوي .. استقبلت أمنية وهي تصارخ بحماس وتغني تحمس أمنية ترقص نفس زماان :اااه ياليييل اااه ياليييل

أمنية ضحكت وبدت تتمايل مع الاغنيه وتردد وهي تضحك لنجلا : اييه يعني غراامك ودعني

نجلا ترقص معها .. والبنات كأنهم خايفين من أمنية المجنونه محد صار يرقص وفضو لهاا المكاان

أمنية ترقص باانسجاام مع الكلماتت الي جاات بوقتها

إبعد واهجر يا أناني
ما أنا عارفة هترجع تاني
إبعد واهجر يا أناني
أنا عارفة هترجع تاني
لكن عمري ماهرجعلك
لو حتى بكيت
طول عمرك
إيه يعني غرامك ودعني…

أمنية ترقص وهي تحس باانتعااش تحررت من مشاعرها ايييه تحررت ولايهمهاا شي الا نفسهاا وملعوون ابو الحب الي يذلها ويرخص نفسهاا

اووعى لاتتغر يااقمرري
انا قلبي يهووى بأمرري
وبأمرري هيبعد عنك
خليك كدا عاايش وحدك

اييه يعني غراامك ودعني ..

*
جميله تقرص سهام الي واقفه جنبها : انا اشهد ان تركي ماشاف هالزين ولا ماخلاهاا

سهام متنحه في أمنية : اي والله

جميله تتكلم بسرعه : الحمدلله ان ابوها ماعالجها قبل تتزوجه الحمدلله تركي ماعنده صبر ع المهابيل الحمدلله انه صدق ان أمنية تموت قبل تورث ابوها وياكل فلوسها

سهام لفت عليها : هشش لااحد يسمعك وخرري بس بروح عند اختي

*

بعد ماراحو المعازيم وبقى بس القريبين .. دخل عمر اللي رفض يدخل اول شي بوسط الحريم .. هالحين يشوف المتغطيات ينعدون عالاصابع

وصل لساره وأمه تمشي معه .. ناظرها توقف بنعومه .. مد يده وسلم عليها مصافحه
وجلس جنبها والكل يبارك لهم .. والبنات يصورونهم

طوقه تصفق بشويش : يله نخليهم بروحهم الكيكه واكلناها قبله

ام تركي : مالك داعي ياعمر كان دخلت وقطعتو الكيكه مع بعض حتى الشبكه امك لبستها اياهاا

عمر خطف نظره لساره يجس النبض لاتكون متضايقه : دخلتي هالحين اروق

طوقه ومبسوطه لرايه لان أمنية هالحين ماهي موجوده نفس قبل شوي : اي والله اروق يله ياجماعه امشوو ندخل جوا

عمر بعد ماراحو وفضى المكان لف ع ساره جميله وناعمه : شلونك ساره

ساره همست بدون ماترفع عيونها له : بخير الحمدلله وانت

عمر : الحممدلله مبسوط ضايقتك اني مادخلت من اليوم

ساره بسرعه : لا عادي الي يريحك اصلاً كان زحمه

عمر مو عارف وش يقول .. سكت يفكر وش يفتح سالفه معهاا

ساره تناظر الطاوله قدامها القهوه والعصير : تتقهوى

عمر : لاا تسلمين كثرت قهوه مارح تخليني انام اليوم

ساره رفعت نظرها له بنعومه : ايه اليوم سبت وانت عندك دوام بكره هههه انا عندي اوف

عمر ابتسم : اووه بدينا نذاله

ساره مبتسمه : امم مااقصد


*

ومن شباك الدور الثاني تناظر .. اليوم حالفه تختبر نفسها وتنجح .. هذا هي تشوفه جالس معها ع الكوشه وتبسم ونظرات
هاا شفتي اموون هذا عمر زوج ساره تماام ساره الي يتشرف فيها زوجه وام لعياله
خلاص كذا وضحت الصوره .. تماام حلو يله دقي ع ابوك وروحي بيتكم
وتروشي ونامي احلااا نومه انتِ حررره


*

طلع من دوامه .. ركب سيارته وع طول شغل المكيف الجوو حاار وبقوه الظهر .. الصبح برد والظهرر حر خييير الشتا للحين مستحي يدخل بقوه
فتح جواله وروتينه الي كل مايفضى لازم يدخل ع حساب نجلا يخاف يفوته شي لان لاحظها مرات تكتب وشوي تحذف

ماتابعها بس يراقبها من بعيد فضول وده يعرف هالبنت الي عاش معها نص طفولته وش صار ميولها لما كبرت
ومن مراقبته لحسابها .. عرف عنها اشياء كثيره
" تتحلطم وتفضفض بالكتابه ، تحب اغاني شيرين هي وأمنية ، والروايات ، ماتعرف تطبخ ، والاهم تكتب روايه "
شافها تتحلطم عشان اكثر من دار نشر رفضو روايتها ..

صار عنده فضول يقرأها بس مو عارف كيف .. وده انها تيأس وتنشرها بالنت عشان يقرأها

قفل جواله لما ماشافها كاتبه شي جديد نفس اخر كلام قبل 12 ساعه
" سعيده سعييده اخوي تزوج صديقتي المفضله الحمدلله "


*

من بعد ماقالت له أمنية "لا عاد اشوفك موطوط ببيت ابوي" وهو مانام في غرفته ..
البيت صاير زي الفندق يبدل ويطل ع اهله ويروح الاستراحه جلسه اكل نوم فيها .. حتى ابوه قعد يهاوش ليه مايجلس بالبيت ولازم يبطل هياته
وهو يتعذر انه مايحس بالوقت وينام بدون ماينتبه .. بس لمتى !!؟
لازم يعجل يدور شقه ويأثثها لزواجه حتى لو مطول الزواج تكون الشقه جاهزه وينام فيها .. ولاتذله مدلعه ابوها ..
صح ان نص البيت لابوه وتتحمله غصب عنها وعمه مو بزر مااحد اجبره راضي يقاسم البيت مع اخوه
بس هو كاره يعيش معها بنفس البيت وبينه وبين نفسه خايف من جنونها تبلاه ببلوه

اليوم جا ع العشا عشان يسكت ابوه وبعد ماينام يطلع للاستراحه ..

وع سفره العشا ..

منصور ياكل بهدوء وساكت يحس بكتمه ونبضات قلبه تزيد .. من الصبح هالشعور ملازمه

سعود : ومتى ودك العرس يكون

عمر : لما تخلص هالسنه ان شاءالله وتتخرج ساره بس عاد التاريخ ع حسب حجز القاعه

سعود : دور بس في اول شهر 10 الحق الاجازه من اولها

عمر يناظر عمه وهو من اول ماجلس حس انه مو معهم : ايه اشوف عمي انت وش رايك

منصور ترك الملعقه وهمس بتعب : ودوني المستشفى



*


منيره جالسه ع سجادتها تسبح وتدعي .. مرض منصور هد حيلها .. تشوف ولدها الناجح المحبوب هده المرض .. تدري ان الفراق يوجع وهوماهده كثر فراق بدريه
من بعد الحادث الي صار لهم وهو يشكي اوجاع عمره ماشكاها كان دايماً بصحه وعافيه
بدريه بنت جيرانهم وصديقه شيهانه حبها اول مراهقته تعلق فيها وجننهم لين رضو يزوجوها له
غطت وجهها بيدها وبكت خووف فقد ولدها الغالي

أمنية تنزل الدرج وهي لابسه عباتها بتروح لأبوها بالمستشفى ولا عليها من عمها الي منعها امس تروح .. شافت جدتها تبكي ع سجادتها
انقبض قلبها .. لا لا ماتبي تشوف انهيار جدتها لأول مره .. بسرعه مشت لباب البيت وفتحته وطلعت

ركبت مع السواق الي طلبته .. وقالت له يروح للمستشفى ..



*

في غرفه منصور ..

قرب الكرسي من سرير عمه مثل ماطلب : سم ياعمي قول اسمعك

منصور بلل شفاته وبهدوء : الموت حق وانا عارف ان مابقى لي من العمر شي

عمر : بعييد الشر عنك كم يوم وتط

منصور يقاطعه بحركه من يده وعيونه تطلبه مايقاطعه ..

عمر تنهد : طيب

منصور : بنتي ياعمر اخوي مارح يرحمها بعد عيني وانت عارف هالشي "اخذ نفس" انا كتبت كل حلالي بأسمها

عمر يناظره يشجعه يكمل ..

منصور تنهد : أمنية ضعيفه مااقدر اتركها لحالها بياكلونها تركي طلب يتزوجها عشان حلالها انا داري ولامحد يقبل فيها

عمر انقبض قلبه وفهم وش الي يمهد له عمه .. بس ماقدر يقاطعه .

منصور يشد ع يد عمر : انت الوحيد الي اثق ان بنتي معه بامان توقف معها وتنصرها لاظلموها ولارح تزيغ عينك ع حلالها ابيك تملك عليها وتصير في ولايتك قبل اموت ماابي سعود يتولاها

عمر همس : يمكن هي ماتبي

منصور يهز راسه : بترضى ماعندي غيرك اثق فيه

عمر يتجاهل كل شعور نفور يحسه اهم شي يريح عمه ومايخذل ثقته فيه : ابشر ياعمي بالي تبيه بس ارتاح

منصور : لا كلم المحامي ذيب يدبر امور زواجكم مو لازم احد يعرف حتى أمنية نخلص هالموضوع بيننا الحين

عمر ماامداه ينطق حرف .. الا الباب ينفتح لف بيشوف
أمنية الي يميز عيونها وطولها وجسمها لو تكون بين ميه بنت بيعرفهاا

أمنية تجاهلت الجالس قريب من ابوها وابتسمت تحت النقاب تداري ألمها : صباح الخير ياابووي

منصور فتح يدينه بحب : تعالي ياكل اهلي

عمر وقف : استاذن انا

أمنية تقدمت بسرعه لابوها وحضنت ابوها وهو شبه جالس ع السرير ..

منصور يلمها وهز راسه لعمر ..

عمر طلع من الغرفه قفل الباب وراه .. وغمض عيونه يحس حمل ثقيل ع كتوفه
بس فكره فقد عمه ترهقه .. وأمنية !! اذا فقد امها ضيعها اجل بعد ابوها وش بيصير فيها

طلع جواله من جيبه بيتصل ع المحامي ذيب يعجل .. خايف ع أمنية لايمكن يسمح لها تضيع مره ثانيه
بيملك عليها بدون مايفكر بساره وكيف وامه وجدته وابووه .. بيخلي كل شي بوقته

هالحين لازم يلحق يضمن أمنية بولايته قبل ابوه وهو اخبر الناس باابوه .



*

جالسه بالصاله وجو البيت كئيب ابوها اعطاهم اياها ع بلاطه ان منصور شكله قريب ..

طوقه طلعت من غرفه منيره تنهد : الله يصلح ابووك ع هالاسلوب مسكينه جدتك بالعافيه نامت

نجلا : الله يسامحه الاعمار بيد الله يتكلم كأن الدكاتره عالمين الغيب

طوقه جلست عندها بالصاله وتنهدت : صادقه والله أمنية للحين ماجت

نجلا : لا احسن لها تجلس هالفتره عند عمتي شيهانه

طوقه : الله يقوم منصور بالسلامه

نجلا تنهدت : اميين يارب

طوقه وقفت : انا بروح انام قبل يجي ابوك قسم باالله ماني طايقته

نجلا فتحت جوالها وهي عادي تعودت ع حشهم ببعض ..
دخلت تويتر تشوف الرساله الخاصه

( السلام عليكم
... هذا ايميلي ممكن ترسلين لي روايتك اقرأها
زميلي صاحب دار نشر وماابي اكلمه عن الروايه وانا ماقرأتها )

رجعت تقرأ الاسم تستوعب "عبدالرحيم ال.."

دخلت ع حسابه ولقت عمتها شيهانه تتابعه .. دخلت ع الصوره الشخصيه صورته بشكل رسمي
هذا هو رحيم ماتغير حيل نفس الملامح الهاديه
خيييرر وش عنده يرسلي ..
اكيد عارفني .. ومن متى الميانه الاخ يقاله يبي يتوسط لي ..
طنشت رسالته ولاتبي ترد عليه وجلست تقرأ في حسابه

دخلت ع الرابط الموجود بالتغريده ..
مقال .. قرأته بكل انسجام واعجاب بكتابته اول مره تقرأ له قد سمعت عمتها تقول انه يكتب بس مااهتمت تبحث وتشوف

صارت تقرأ تغريداته ومنها اخذت انطباع عنه
هادي يحب الكتب التاريخيه والحضاره وله فالسياسه .. محترم بردوده مع متابعينه .. يحب كاظم الساهر .. ومحمود درويش

ضحكت لما قراءة مقال له منزل رابطه عن الام ..
فعلاً الكتابه تغر تقرأ كلامه تحس انه بار بأمه مو شخص قاطعها عشان رضا ابوه .. مسكت نفسها لاترد انت اخر واحد يتكلم عن الام انت حارق قلب امك وداري للاسف .



*

في بيت شيهانه ..

صار لها يومين في بيت عمتها من بعد ماشافت انهيار جدتها وهي كارهه ترجع البيت .. شافت ابوها بالمستشفى طيب مافيه شي
ليش يبالغون .. ليش جدتها تبكي هالشكل .. كم يوم يرتاح وبيطلع عادي

واحسن قرار انها تجلس عند عمتها شيهانه ..

جالسه ع الارض تلعب شيش مع التوم

وشيهانه جالسه ع الكنب تناظرهم وهي تشرب شاهي : قايله لك لاتعطينهم وجه رح يبهدلونك

أمنية : تتعاونون علي والله لااطقطقكم كلكم عمتي انتِ المفروض رايد تسمينه ناقص زايد وناقص هههههههههههههه

رايد بقهر يضربها بقس ع ركبتها : ناقص بعيينك

أمنية ترد له الضربه : وجعع لاتضرب حديد هذي مو يد

زايد بطفش : هشش خلوني اركز

أمنية : هالحين ناقص انت ليش مو شاطر نفس زايد

رايد يناظرها بحقد : لاتقولين ناقص

أمنية تضحك وترمي الشيش : طيب طيب رايد قلي ليش ماتحب المدرسه وتصير شاطر ترا بعدين زايد يروح ثاني وانت تبقى باول

زايد يتكتف : رايد شاطر بس انه ملقوف فالفصل

رايد ياخذ الشيش ويرمي دوره : اييه شاطر


*


شيهانه مشت من عندهم وراحت لزوجها الي ارسل لها تجي .. حست ان عنده شي ضروري

وماخاب ظنها من شافت وجهه مايبشر بالخير : وش صاير

فارس يتقدم لها بهدوء : اخوك منصور عطاك عمره

شيهانه غطت فمها بيدهاا واطرافها بردت وعقلها يحاول يستوعب ..
فارس حضنها : انا لله وانا اليه راجعون خلك قويه ياشيهانه عشان تقولين لبنته

شيهانه بكت : لا لا مااقدررر

فارس يشد عليها ويحاول يصبرها : لا اله الا الله

شيهانه تبكي : ااه يااخوي الغالي ااه ي أمنية انا شلون اقول لها والله مقدر مافيني حيييل

فارس لما شاف انهيار شيهانه تركها تجلس .. واتصل ع امه واخته يجون ماله غيرهم يكونون مع شيهانه وأمنية وقت تعرف الخبر .. لان اكيد شيهانه بتنهار زياده مع أمنية
سعود قاله الخبر ووكله مهمه شيهانه وأمنية .. لان ام سعود تعبت لما عرفت وهو معها


*

أمنية استغربت لما شافت ام فارس واخته لها زماان عنهم .. اوف مايجون الا فجأه وهي كذا ببجامتها
ويدخلون كذا عادي بدون لايدقون الباب ولا شي !!

راحت سلمت عليهم .. والتوم انبسطو بشوفه جدتهم

زهراء مسكت التوم كل واحد بيد : تعالو معي لبابا

أمنية تأشر ع المجلس : حياكم الحين تجي عمتي

ام فارس ابتسمت بحنيه ولفت ذراعها حول كتف أمنية وهي تمشي معها : شلونك يابنتي كيف صحتك

أمنية تهز راسها وهي متضايقه من هالحنيه المزيفه بنظرها : بخير الحمدلله تفضلي

جلست ام فارس تنتظر بنتها تجي وتجي معها شيهانه وهي تستغفرالله وتناظر أمنية بحزن

أمنية وقفت بتروح تشووف عمتها وهه هذي هي جايه مع زهراء .. بس ماعجبها شكل عمتها عيونها حمرا وخشمها .. باكيه .. ليه !؟
لايكون جلستي عندها سببت مشكله مع زوجها ..

شيهانه رجفت شفاتها ببكا لما شافت نظرات أمنية القلقه ..

ام فارس قربت من أمنية : اذكري الله يابنتي ابوك عطاك عمره انا لله وانا اليه راجعون

شيهانه ع طول غطت وجهها بكفوفها وبكت ..

أمنية تناظر عمتها تبكي .. وام فارس وبنتها يترقبون ردة فعلهاا تحس جسمها كله قشعرر ونبضات قلبها تزيد.. : ابوي طيب لما زرته !!؟

ام فارس : توفى العصر عسى الله يرحمه ويغفرله

أمنية صارت ترجف والعبره بحلقها صرخت عشان تروح هالعبره الي تخنقق : ابووي طيييب بخييير اقولك انتِ شقاعده تخرففييين

واتجهت بسرعه للباب تبي تطلع ماتدري ويين وهي تصارخ بصدمه : وييين ابوي وييينههه

ام فارس تجري وراها تحاول تهديها ..

عمر الي توه وصل بعد ماكلم فارس يتأكد ان أمنية درت ولا لاء وقاله انه ينتظر امه واخته يعلمونها .. لازم يكون موجود يخاف تسوي بنفسها شي..

وهو واقف مع فارس عند الباب سمع صراخها يقرب بسرعه تحرك .. وقابلها عند الباب قبل تطلع مسك ذراعهاا : ويين طالعه أمنية اذكري الله قولي لا اله الا الله

أمنية ودموعها اخذت مجراهاا وكلها ترجف وتأشر وراهاا وشفاتها ترجف وصوتهاا : تقول ابوي ماات

ام فارس طلعت .. وشافت أمنية ورجال ماتعرفه يحاول يحضنها وهي تدفه وتبكي : اقرأ عليها ياولدي

أمنية ناظرت ام فارس بخوف وتشبثت بعمر : هذي هي الكذابه ابوي مايخليني امي رااحت وهو بقى لي لااا مايروحون كلهم بدوووني لااا

عمر والعبره خانقته حضنهاا : اذكري الله ي أمنية اذكري الله

أمنية تحس جسمها مافيه طاقه وراسها يغلي ماعاد تسمع صار ثقلها كله ع عمر وغابت عن الوعي ..



*

مررت ايام العزا ثقيله ع الكل ..
..

ام منيف تمد كوب الاعشاب لااختها ام سعود : سمي وانا اخيتك هالدنيا دار عبور ياالله حسن الخاتمه عسى الله يرحم ويغفر لموتانا وموتى المسلمين

ام سعود اخذت الكوب وشربت شوي وتنهدت : اميين ميير انا الحين قلبي ع بنت الغالي ليت بس يطلعوها من هالمستشفى

ام منيف : يطلعوها وش تسوي هناك احسن لها البنت منهاره ماتحط لقمه بفمها خلها عندهم المغذي ينفعهاا وابرهم الي تهديهاا الله يربط عقليبهاا لاتعود لجنونها بعد ماعالجها المرحوم

نجلا دخلت وهي لابسه عباتها ومتحجبه وبيدها نقابهاا وبهدوء : تبون شي انا بروح عند أمنية

ام سعود : ابد الله يسلمكم

نجلا هزت راسها ولبست نقابها وطلعت لعمر الي ينتظرها بالسياره ..

عمر حرك السياره بهدوء وصوت القران الواطي معطي جو السياره سكينه وطمأنينه ..

نجلا لمت يديها لصدرها وتتأمل من الشباك .. فعلاً دنيا عبور
الواحد لازم يعمل لااخرته وش ينتظر
لمعت الدموع بعيونهاا فقد عمها موجع حييل .. يااربي اربط ع قلوبنا شلون بتصبر ع الحياه بدونه هو كان بلسم البيت احن عليها من ابوها

عمر وقف عند المستشفى ونزل واخذ الشنطه الي جابتها معها نجلا لأمنية ..

نجلا نزلت وقفلت بابها : ارتاح انا ادخل لحالي وتجيك عمتي

عمر يمشي قدامها : لا مرتاح واكيد عمتي شيهانه معها اغراض انزلهم معها

نجلا مشت معه : الي يريحك

دخلو المصعد ..
نجلا تناظر عمر وبهدوء : لاتقلق هي بخير

عمر بدون مايناظرها : شايفها بعيوني ذابله مافيها روح

نجلا بااستغراب : وين شفتها

عمر ببساطه : اطل عليها كل يوم .

نجلا سكتت ماعلقت اصلاً صدمتها الثانيه بعد ايام العزا عمر قالهم ان عمها منصور زوجه أمنية ووصاه عليها قبل يموت .. تنهدت بضيق ع ساره الي ماكلمتها ولا تدري كيف وضعها .. فتح المصعد وطلعو .. وكان في واحد بيدخل بس وقف عمر يسلم عليه

ماناظرته صدت ومشت عنهم لغرفه أمنية ..

عبدالرحيم بعد ماخطف نظره لنجلا بدون ماينتبه عمر : لا خلاص انا اودي امي بيتها

عمر : وينها عمتي ماطلعت

عبدالرحيم : الحين جايه وراي تقول بس تطمن ان اختك وصلت عند أمنية

عمر يمسح ع ذقنه المهمل : اهاا زين انت متى بترجع المدينه

عبدالرحيم : اليوم ان شاءالله ابوي عطاني اربع ايام

عمر لمح عمته من بعيد تطلع من غرفه أمنية : ياليت والله ماتقطعها ماتدري شكثر جيتك ساعدتها وهونت عليها فقد عمي

عبدالرحيم : ان شاءالله ماعليك


*
*

نجلا تغرف من الشوربه بصحن : جبت لك شوربه جدتي مسويتها مخصوص عشانك من قدك منيره حنت عليك

أمنية همست : اذا اكلت شي بستفرغ ماني قادره والله

نجلا تحط يدها ع ثلاجه الحليب : طيب حليب !؟

أمنية هزت راسها بلا ..

نجلا تصب كوب حليب : عشان جدتي تكفين اشربي لو نصه والله انها ماتنام زين تحاتيك

أمنية والعبره خانقتهاا : لاتضغطين علي وربي مو قاادره

نجلا جلست ع الكرسي وبيدها كوب الحليب شربت منه وهي ساكته بتتركها ع راحتها تهدى شوي ..

أمنية : ابي اطلع احس اختنقت هناا

نجلا : مو عشان تطلعين لازم تاكلين ياقلبي

أمنية تنهدت وصدت بضيق ..

نجلا نزلت كوبها وراحت عند السرير : سوي لي مكان جنبك

أمنية زحفت ع اليمين وهي ساكته

نجلا انسدحت جنبها وتتبسم : الحمدلله اننا رشيقات ولا تخيلي انام ع هالكرسي ياحبيبتي ي عمتي نامت عليه باالله

أمنية : ايه

نجلا لفت ذراعها ع كتف أمنية وسندت راسها ع صدرها : نامي ياقلبي ارتاحي

أمنية غمضت عيونها وع طول نزلت دمعه سريعه : كيف اعيش بدون ابوي

نجلا تمسح ع شعرهاا : الله رحييم مايخلي عبده امس وانا اقرأ بالجزء الثاني من سوره البقره اقرا كل وجه اقراه اقرا تفسيره ووقفت عند استغفرالله مو حافظه بس بمعنى ان العبد لازم يبتلا بنقص بالمال او بالانفس وغيره ومعنى الانفس يعني موت الاحباب هذا ابتلاء لازم يكون عندك يقين اننا كلنا ميتين الدنيا مو مكاننا احنا رايحين بس بالدور راح عمي واحنا وراه النقطه مو هناا لاا عند ايش تسوي ايش تاخذي معك للمكان الي بنروح له واذا احد راح قبلنا لازم نذكره الحمدلله ربي فاتح مجال للدعاء للصدقه

أمنية وكلام نجلا برد ع قلبهاا كلام تعرفه زيين بس لما تنحط بالموقف تنسى كل شي تحتاج من يذكرها ويوعيهاا..

نجلا : اممم احسني تكلمت كثير خلاص نامي واذا صحيتي لازم تاكلين عشان نطلع من هالمستشفى تمامم ؟؟

أمنية همست : تمام


*

طلعت الممرضه من الغرفه وناظرته : كلوو نووم

عمر ابتسم : شكراً

وبعد ماراحت اتجه للباب .. فتحه بشويش ودخل وقفله وراه بنفس الهدوء

مشى بااتجاه السرير وعيونه عليهاا .. نايمه بحضن نجلا وشعرها مغطي وجهها

راح للكرسي وشاله بشويش .. نزله بجهة أمنية وجلس وهي يراقب اذا حسو فيه ولاا
سند راسه ع حافه السرير وعيونه عليها تتأملها بصمت

نجلا الي حست فيه من اول مادخل وهي كانت تنتظره من الاساس قال كل يوم يطل عليها فتوقعت هالوقت .. فتحت عيونها وهمست : هذي مو طله هذي نومه

عمر فز منفجع من صوتها الي جاه وهو سرحان خلعه .. ضرب راسه بحديده المغذي وحاول يثبت لايطيح
وحركاته سببت ازعاج بالمكان الهادي .. ونجلا الي تحركت وتأشر له بسم الله

كل ذا كان شي طبيعي تصحى أمنية ..
أمنية فتحت عيونها بخوف وتناظر نجلاا : هاااه !!؟

نجلا ارتبكت وصدت نظراتها عن جهة عمر عشان ماتلف أمنية وراهاا : ولا شي بسم الله عليك بس ينظفون دورة المياة

عمر جالس ع الارض عند راس السرير وهو مرتبك ويتحسب ع نجلا بداخله .. لو لفت أمنية بتشوفه .. مصيبه البنت مو ناقصه

نجلا ترجع راس أمنية ع صدرها : كملي نوم باقي الفجر مطول

أمنية غمضت ع طول تكمل نوم مابعد صحصحت اصلااً ..

شوي كذا .. نجلا اشرت بيدها لعمر يطلع

عمر وقف وناظر أمنية الي وضحت له ملامحها هالمره

نجلا تأشر له بيدها وحركات عيونها اطلع بسرعه ..

عمر سافهها ويتأمل أمنية يحاول يطمن روحه انها بخير .. تقدم بتهور وباس يمين جبينها بسرعه وطلع

نجلا تناظره بصدمه .. تنفست براحه بعد ماطلع مجنوون


*

سعود جالس بحديقه البيت يفكر كيف يدير امور العايله بعد وفاه اخوه الي كان شايل عنه كل هالمسؤوليه ..
هالحين محلات منصور من يشرف عليهم .. صح ان عمر يعرف للشغل وحتى منصور عرض عليه يشتغل معه ورفض يبي يشتغل بشي حكومي ..
لازم يقنعه يرجع يمسك شغل عمه مثل ماكان زمان يساعده

طوقه نزلت صينيه الشاهي قباله ..

سعود : وين امي ماتجي تقهوا معي

طوقه : صار ع وفاه اخوك اسبوع امك ماهي مثلك قلبها قوي وتكمل حياتها عادي وتتقهوا

سعود رفع عيونه لها وهو جالس : اشوف لسانك طايل هالفتره كنت خايف ع نجلا من بلوه منصوره والظاهر انها اثرت عليك انتِ

طوقه ماتقدر تناقره اكثر تخاف : المهم تبي شي ثاني انا عندي شغل

سعود يحرك يده : الله معك

شوي كذا وهو يتقهوا .. دخلت سياره عمر انتفخ صدره يحس انه للحين مقهور منه شلون يتزوج بدون مايقوله ليه املك ع الساكت مع منصورولا شاوروه حتى ..

شيهانه نزلت من قدام .. ولفت ورا فتحت الباب تساعد أمنية

عمر نزل وناظر ابوه بتوتر خايف يقول شي لأمنية وهي مابعد درت ان ابوها زوجها له .. يبي يقولها بنفسه بس ترتاح مايبي تنصدم

سعود يناظرهم بدون مايعلق بكلمه وهو يشرب شاهيه ..

شيهانه تمسك يد أمنية وتمشي معها .. ولما مرور من عند سعود : شلونك ياابو عمر

سعود بهدوء : بخيرر الحمدلله

أمنية تجمعت الدموع بعيونها .. حست نبرته فيها تهديد ووعييد .. سندها راح

عمر قرب من ابوه وباس راسه وجلس قباله : شلونك ياابوي

سعود : قلنا بخير

عمر صد يناظر عمته وأمنية لما دخلو البيت ورجع ناظر ابوه : عمي كان مستعجل وكل شي سويناه بيوم حتى التحاليل تو طلعناها وتدبرالامر المحامي

سعود : وليه تزوجها من الاساس انت خاطب وبعدك مااعرست تروح تزوج ع مرتك

عمر : هذي رغبه عمي وماقدرت ارده

سعود بقهرر : تزوج مدمنه مخدرات ومجنونه صااحي انت !! مو كل شي يقوله عمك توافق هو يدري ان بنته بلوه ومحد بيقبل فيها راح دبسك فيها لييه تقبل

عمر : تزوجتها وخلاص ولاني ضايمها أمنية ماغلطت هي ضحيه وبتعيش معي معززه مكرمه هي وصاه عمي

سعود بصرامه : وصيه عمك وتبيها ع ذمتك خلها متعه ولاتخلف منها سوودت وجهي عند ابو ساره "حط يده ع فمه لما جا عمر يتكلم" اصص ولاكلمه قم انقلع عن وجهي ولاتناقشني

عمر وقف وهو كاتم غيضه ابوه متى يستوعب انه كبير رجال لازم يحترمه ..
مشى لسيارته .. حرك بسرعه طالع من البيت
كان يتمنى بس يتزوج ويطلع يعيش برا هالبيت ويرتاح .. شوف الحين وين وصل

ناظر جواله رقم يتصل .. رفع جواله ورد : هلا

جاه صوت انثوي مو غريب عليه : السلام عليكم

عمر : وعليكم السلام

تنهد بضيق لما سمعها تقول : انا ساره ي عمر ليش تسوي فيني كذا "وبان بصوتها البكا" تتزوج علي واحنا بعدنا مملكين انا وين اودي وجهي من الناس وش بيقولون عني

عمر : ساره الظروف ماهي ع كيفي انتِ اختياري وتبقين زوجتي معززه مكرمه وأمنية بنت عمي مالها غيري وصاني عليها عمي ومو انا الي اخذله ساره والله عمي له فضل كبير علي ابسط شي اسويه اخليه يموت وهو مرتاح ومتطمن ع بنته

ساره صرخت : بنته حيييه تحسب اننا بنعيش بسلام مع بعض لاا انت ماتعرفها انا كنت صاحبتها زمان اعرف طبعها وحركاتها هالبنت ماتتعاشر

عمر يقاطعها : وش ماكانت انا مااقدر اتركها

ساره تقاطعه بنفس الصراخ الباكي : لييه ترا انت اكثر من تأذيت منها تتذكر لما صادك ابوك تدخن وضربك ترا هي الي علمت عليك

عمر بهتت ملامحه وهو يتذكر ذيك الضربه وهو بأول جامعه كانت اخر مره ضربه ابوه بس كانت مؤلمه بالعقال نسته شي اسمه دخان .

ساره : اييه وحتى لما تروح تسهر عند اخوياك كانت تقفل الابواب عشان تضطر تدق ويعرف ابوك انك سهران برا ويهاوشك صدقني كل المشاكل الي صارت لك هي وراها حقووده تكره تشوف الناس مستانسين

عمر الي تحليله اختلف عنها .. أمنية كانت تحبه والاشياء الي يسويها وماترضيها تحاول تخربها عليه

ساره : الووو انت معي تكفى عمر طلقها ابوك الحمدلله بعده عايش يهتم في بنت اخوه

عمر يقاطعها بصرامه : هالموضوع لاتناقشيني فيه ترضين فيني وهي ع ذمتي ع العين والراس ماترضين خلاص كلن بطريق وماتشوفين شر.

ساره : جزاك الله خير

وقفلت بوجهه .. ورمت الجوال قبالها وقعدت تبكي
اول سرقت زوج اختها تركي والحين هي حسبي الله فيهاا



*

منيره جالسه فالصاله .. قفلت الجوال والضيق بوجهها

طوقه الي جالسه قبالها وخافت من مكالمه ام تركي : وش صايررر

منيره تنهدت : شيهانه سقطت الله يعوضها

طوقه : ياحرام اكيد هي تعبت بين العزا وأمنية بالمستشفى

منيره : اي والله

طوقه : يله اهم شي هي تكون طيبه كيف ام تركي عندها جابت لها اكل ولا اسوي

منيره : لا عندها وجابت لها بتجلس ثلاث ايام ويطلعونها

طوقه وقفت : اجل بكره انا بسوي اكل واروح لها

منيره مسكت يد طوقه باامتنان اهتمامها فيهم هالفتره وقلبها عليهم الا من طيب اصلها : اصيله ياام عمرر والله ان اختي ربت الله يخليك لعيالك

طوقه ابتسمت : امين ويخليك لناا


*


بعد اسبوعين ..

بغرفه أمنية ..
خلصت صلاتها وجلست ع سجادتها بدون ماتفصخ جلال صلاتها .. كانت تردد اذكار الصباح
وبعد ماخلصت انسدحت ع سجادتها تحس بسكينه وطمأنينه
امس حلمت في امها وابوها .. كانو يوصوها على نفسها وتسمي عيالها عليهم
ابتسمت وهي تتذكر الحلم وهمست : ان شاءالله مااتأخر واجيكم

غمضت عيونها وماتدري كيف غفت .. اصلاً مااستوعبت انها نامت الا لما قامت مفجوعه من فتحته الباب بقووه

سعود والشر يطلع من عيونه : قومي البسي عباتك والحقيني بسررعه

أمنية قلبها يدق بقووه من الفجعه ومن عمها همست : وين بتاخذني

سعود تقدم ووقف بنص الغرفه : ع جهنمم يله تحرركي




*

نهايه الجزء الثالث ..