[اسيرهـ الخيال]

.
.
.



السلام عليكم ورحمه الله وبركاته
صباحكم جو جمميل من بعد الأمطار ..


اعذروني إذا البارت موطويل ..
يمكن تشوفونه بسيط بس كلها أحداث تتبع الأحداث الجايه
وماودي استعجل بالأحداث .. وكل موقف بالروايه بياخذ حقه بإذن الله ^^

البارت القادم بيتم تحديده بعد نهايه كل بارت
وماودي اعطي مواعيد للبارتات ومايكون البارت جاهز
فخلونا ع هالطريقه افضل ^^



بسم الله نبدأ

.
.
.

الجزء الثاني




الفراق ،
البعد ،
الرحيل ،
الوداع ،
تختلف الكلمات والألم واحد ..
وكيف بألم نشعر به لحدث مجهول لا نعرفه ..


الشرطـة !! ذهابنا لم يفدنا بأي شي .. بل زادت الشكوك لديّ ، وحسن الذي لايريد التعمق بأفكاري السوداء كما يقول وأراد أن يصدق كلام الشرطة .. كيف يريدني ان اصدق ماقاله (مادري شلون تبونا نحولها قضية خطف او اختفاء .. لان مبين عندنا انها سافرت بره الديره ، وانا بنفسي تأكدت من جمارك المطار .. إلا اذا تبون نحقق اكثر احنا حاضرين) .. رفض حسن وكل اللي يفكر فيه سمعة اخته بين الناس .. لا الومه فهي صديقتي والمقربه لي اكثر منهم .. ولكن قلبي ليس مطمئن ، لا اشعر بالراحه ولكن سافعل كما قال حسن وسأحافظ ع سمعتك ياصديقتي .. سمعتك التي بدأت بالتلوث منذ تخرجنا من الثانوية وسفرك لامريكا للدراسه .. وقتها كان الموضوع مكروه لعائلاتنا او لمجتمعنا كيف تسافر لوحدها ومن غير مرافق !!! .. وعند عودتك وانتي دكتورة ولست خريجة فقط من كلية الطب .. اصبحت قدوة لهم ولأبنائهم !! حقا أكرههم وسأحافظ عليك ياصديقتي أعدك ..

قبل المغرب بساعة عدنا للمخيم .. وكان يجب علينا اخبار امي وابي بالموضوع ولكن بصورة اخرى عكس مانعرفه انا وفوز .. دخلت لخيمة والدتي وكان والدي متواجد .. اتصلت باخي عبدالله حتى يستمع لحديثي .. وفوز كانت بخيمتنا فلا اريد ان يزل لسانها بغير الكلام الذي اريد ان اقوله لامي وابي الكبار بالسن واخاف عليهم اكثر من خوفي ع نفسي وعيالي ..
عبدالله : علامك يا ابو يوسف صاير شي ؟؟
حسن بابتسامه : لا ابد .. بس مرينا البيت انا وفوز بعد مراجعتها ولقيت سندس موصيه الخدامه تقولنا اخبارها
ام عبدالله : شنهوو اي اخبار ؟
حسن بهدوء وصوت ثابت : يمه سندس سافرت
ابو عبدالله بصدمه : سافرت !!! وينها رايحه يومنها ماتعلمنا ؟؟
حسن : اللي اعرفه يبه انها مسافره مع دوامها بحمله من حملات الاغاثه اللي يدزونهم للدول المنكوبه واللي ديرتنا متكفله فيهم ودايما تمدهم بالمساعدات الطبيه
ابو عبدالله بعصبيه : وعلامها ماقالت لنا ان ودها تروح معاهم .. تدري اني ماني رافض روحتها .. مارفضت سفرتها وغربتها طول السنين تبيني ارفض عمل الخير !!
عبدالله باستغراب : اي والله ابوي معاه حق .. تسافر من ورانا مايصير يااخوك
حسن : كانت مستعجله وانا بنفسي تطمنت من مدير المستشفى وقالي بنفسه لاتحاتونها واهي اول مايستقر وضعها بتكلمنا وتطمنا
ام عبدالله ببكي وخوف .. فالموضوع خطأ .. من سيصدق كلام مثل هذا ؟؟ التفتت لابنها وهي تمسح دموعها بطرف طرحتها السوداء
ام عبدالله : تكفى ياامي لاتفجعني باختك .. اهي فيها شي ؟؟ قولي لاتخش عنني
ابو عبدالله بشخصيته الحاره : قووول هرج ينفهم يا حسسسن .. انت وراااك شي .. ع بالك جهههال ينقص عليهم بهالكلام
عبدالله : سندس شفيها ياحسن ؟؟؟ وينها فيه ؟؟
حسن باستسلام .. كان يعرف وزوجته تعععرف فهذا الموضوع يجب ان تعرف به عائلته كلها حتى يمثلون امام الناس ان الامور بخير ولديهم علم بسفر اختهم !!
حسن بحزن : يبه والله انا مثلكم مادري شنو صاير بالضبط .. تعبت من التفكير ومن فوز وافكارها السودااا .. خفت اصدق افكار فوز .. خفت والله وقلت لازم اصدق كلام المدير والشرطه .. اي يبه مرينا الشرطه وتدري كان تعاملهم معانا قمه بالبروود ويقولون لنا انها سافرت !! تأكدوا من المطار وطلعت مسافره صج ؟؟؟ شنو تبيني اسوي الله يخليك يايبه ؟؟ والله مادري شسوي موقادر افكر .. كل اللي فكرت فيه سمعة اختي خفت الناس يتكلمون عنها
ام عبدالله ببكي : ياويلي يابنتي وووين اراضييج ؟؟؟ وين رحتي ياقطعة من قلبيي كافي بعععد ياامي ككككافي
عبدالله الحاضن لوالدته التي لو تتوقف دموعها ، لم يعرف ماذا يقول وهو الكبير .. عقله توقف عن التفكير ولا يعرف هل ممايقوله اخيه صحيح ام لااا .. والده الجالس ع طرف الجلسة الارضيه ورأسه المثبت للأسفل .. لايعرف مايفكر به .. فالموضوع غريب وخطير ومخيييف !!! فعلا ما المطلوب منا ان نفعله ..
ابو عبدالله بحده : اسمعوا انت وياه .. ماابي احد يدري باللي احنا ماندري عنه .. اختكم سافرت مثل ماقالوا وبس .. واحنا عندنا خبر بسفرتها .. غير هالكلام مافي
عبدالله : ابشر يبه
ابو عبدالله : وانت ياعبدالله لاتقول شي لمرتك .. وباجر تنقله لخواتها وامها وعمك .. موناقصين تحقيق بشي نجهله
حسن : يبه الله يطول لي بعمرك .. انا بسال اكثر وبحاول الاقي طريقه اتواصل فيها مع سندس .. لا تحاتي الله يخليك لنا

انكسر ضلع آآخر بصدره ، والسبب ايضا ابنته سندس .. لا يزال يذكرها فتاة مراهقة بعمر ال14 ربيعاً .. وحماسها بقولها (يبه انا قررت شنو بصير لما اكبر .. ابي اكووون دكتووورة وجراحه) وكلمتي لها اللي ماهقيت اني مجبور اطبقها بعد 4 سنين بسس (تبشرين باللي يوقف معاج يااحلى بنت .. انتي بس شدي حيلج وجيبي النسبه الحلوه ونشوفج احلى دكتورة) .. وسافرت اخر العنقود بعد نسبتها المرتفعه المبيضه للوجه .. سافرت ببعثه لامريكا وقلبي معها .. وكلام الناس حتى الاقرب مني اخوتي الرافضين لقراري وموافقتي بسفرها .. والآآآآآآن ماذا حدث لك ياصغيرتي؟ اين انتي ؟؟ هل فعلا سافرتي هذه المره من غير موافقتي وعلمي .. سافرتي للمجهول الذي لا اعلمه .. يااااااااارب احفظ صغيرتي من كل مكروووه يااااارب صبرنا ع مصيبتنا المجهوله ..


.


خيمة الحريم اللي يتجمعون فيها ع قهوه العصر والعشى ، والبنات يقعدون فيها وقت السهر ، الساعة 11 والبنات ضحك وسوالف ولعب ، فوز المتواجده بالجسد وروحها تفكر بصديقتها التي لاتعرف أين هي ؟ .. التزمت الصمت مثل ماقال لها عمها ابو زوجها .. فهي بالتاكيد لن تخبر احد بما تعرفه ..
رهف : والله ودي بوجبه من اي مطعم الحححين
غلا : اي والله رهووف كلمي واحد من اخوانج
رهف : وودي بس اخاف انزف ، عزيز مستحيل اكلمه ، ومحمـد نايم ماتشوفين مرته راحت له
جوود : خلاص شوفي بددر
فوز بمحاوله للانسجام مع البنات : اذا بتطرشوون انا معاكم ابي بعد
هناء : انا ماابي عليكم بالعافيهه ، بروح لبعلي توه مكلمي يقول بينام
ليال : خليه ينام وراج رايحه له !!
نوره بنت عمهم الكبير : اخذيني معاج ياام محسن بروح اشوف عيالي بعد هالمصبنه (الصبيان المشاغبين) لازم صراخ وتسحب حتى يناموون
اسماء : قلت لج يااختي لا تخيمين الا وابوهم معااج بس ماتسمعيني
نوره : وابوهم اسحبه من دوامه وافوت هالجمعه لا والله ماعلي منه اهم شي وناستي ووناسه عيالي
غلا : والله انج تفهمين يااختي الكبيره
رهف : فكونا منكم الحين بكلمه وبشوفه
ليال : اقول ياحريم جنهم طردوونا ؟؟؟
هناء : قومي بس ياام سلووم ، هذول ليلهم طويل ماوراهم ورعان يقعدون عليهم بالليل .. الا ام يويو غريبه مارحتي لحسونج
فوز بضحكه : نايم من زماان وانا وحده مافيني نووم .. وعيالي نايمين اسم الله عليهم
ليال : ااي ليلكم طووويل انا اخذوني معاكم ياحريم .. يلا تصبحون ع خير

طلعوا ليال وهناء واسماء ونوره ، وبقوا البنات يكملون سهرتهم ، اشرت لهم رهف يسكتون بعد مارد عليها بدر
...: الووو
رهف : تكفى يااخوي طالبتك
بدر : علامج خرعيتي شفيييج ؟
رهف : تكفى يااخوي لاترد طلب اختك الوحيده
بدر وصوت الشباب عنده : اخلصي شتبين ؟؟
رهف : نبي وجبات من ماكدونالدز ، والله جووواعه اكسب فينا اجر
بدر : ياليل الليل انتوا موتوكم متعشين ؟
رهف : ووووي قبل 3 ساعات خلاص انهضم الاكل
بدر : اقوول لايكثر انتي ومنو اللي تبوون ؟
رهف : عاااش اخووي والله قلت محد بيبيض وجهي عند البنات الا بدوري حبيبي
بدر : انزين انتي ومنو هالبنات اللي عندج وبيضت وجهج عندهم ؟
رهف : ام يوسف وبنات عمي ثامر جود وغلا
بدر : اجل تستاهلون اللي يجيبلكم
رهف واهي تشوف البنات : بعددي والله اخووي حبيبي .. جعلني ارقصص ع عرسك قوول آميييين
بدر : اقول انطمي لااهون ، لاوصلت المطعم كلمتج اخذ الطلبات

صكرت رهف من بدر واهي تكلم البنات : يقول اذا وصل المطعم بيدق ياخذ طلباتنا
غلا بلقافه : اقول رهووف .. اخوج ليش لي الحين ماتزووج ؟؟
رهف : وانا شدراني عنه .. كاهو عندج اذا وصل بعد شوي اساليه
جود بغيره مكتومه : صح غريبه اللي بعمره من شباب العايله كلهم تزوجوا او ملجوا .. يمكن حاط وحده بباله ولا قال لكم
فوز : او يمكن مايبي الحين .. يعني يعيش حياته واهو عزوبي ولما يشبع يتزوج
رهف : انا احس جذي .. بدوور اخووي نظامه كل يوم نادي ومباريات مع ربعه مااشوفه يقعد بالبيت الا قليل
جوود بتغيير للسالفه اللي تضايقها : الا فوز .. سندس وين سافرت ماقالت لكم ؟
فوز بارتباك اخفته : لا والله ماادري .. ويقول حسن نظامهم مايعلمون وين يرسلون الدكاتره بالعاده
غلا : والله محد فاهم الحياه الا سندس .. عايش حياتها وطاقه الناس بالطووفه .. كان ودي اصير مثلها بس النسبه ماساعدت

فوز جان زين اللي ببالج يا غلا بلاج ماتدرين سندس شفيها وشنو خاشه بقلبها .. سندس اللي تعذبت من كلام الناس طول هالسنين .. بنت محسن فصخت الحيا قامت توقف مع الرياجيل .. بنت محسن مسافره بروحها لامريكا وقاعده فوق السبع سنين هناك لا محرم يقعد معاها وين ابوها واخوانها ؟؟ ... تنكر انها متاثره بهالكلام بس ماتقدرين تخبين علي صديقة سنيني كلهـــا .. الله يحفظج وين ماكنتي وانا متأكده بإذن الله بتردين لنا بالسلامـه وتسولفين لي عن مغامراتـج ..