///ضحيه لمن لايرحم///
//بقلم زهراء الحسناوي//
#بارت٦
الاخذ منكم الفصليه
دنشدو بحالها شسوة?
من الجوع ومن الهضم تتلوه
من حبها حرمتوها
من ولف الجهل گوة غصبتوها
ماكو اضلم من اليسعون باالفرگه
وجابوها دفع للدار
لاديرم ولاحنه ولاصفگه. 💔
اجاد الشاعر بمعالجته لواقع امض مرارة من الحنضل
(الفصليه)
تلك الفتاة التي سلب حقها بأن تعيش بكرامه وان تعامل كأنسانه لها كيان ووجود وحقوق
يقول بول ايلوار (لا اجد وقاحه فكريه تفوق وقاحه الرجال بوضع التشريعات التي تخص المرأة )
ويقول جودت التميمي في هذه القصيدة ولااعتقد يعرف اي منهم الاخر يقول
چا هيجي حكم ديوانك المهيوب ودلاله ?
علي تحرم فناجينه وگهوته وگعدة ارجاله
ارئ ان مساوة الرجل بالمرأة ليس تحررآ للمرأة فقط
بل انعتاق للرجل من عبوديته لذاته
فعلئ الانسان لايأبه ويهتم لمصلحته الشخصيه
علئ حساب مصلحة الاخرين
حتئ وأن كلفه ذلك الأنفراد عن السرب والانعزال
والا سيكون عبدآ لذاته
وجودت التميمي كاتب قصيدة جابوها دفع للدار
صاحب هذا المبدأ انفرد عن مجتمعه وابناء جيله
وتحرر من ذاته الئ درجه حرم علئ نفسه مجالسه اصحاب الشأن الرفيع كما كان شائع انذاك من الشيوخ
ومسنني القوانين القبليه المجحفه ومشاطرتهم
الحديث ولايخفئ. مايترتب علئ صاحب مثل هكذا مبدأ من تحقير ونبذ مجتمعي
ومع ذلك نرئ جودت لم يردع عن ابداء رأيه وشق طريقه
وهذا برأيي منتهئ الحريه لانه وكما
قال نيلسون مانديلا (ليس حرآ من يهان امامه شخص ولايشعر بالاهنانه)
كان الكاتب جودة التميمي مريض حد الاعياء ومتعب ويعاني بمعاناة ابناء جيله بل كان مثقلا حد التعب
بسبب مايسود مجتمعه وهذا اوضح بقوله
يديوان السلف بسك
تعبنه من الفصل والثار والنهوة
وخصوصا المرأه انذاك فقد كانت حريتها مصادرة
علئ جميع الاصعدة من قبل الرجل
ليس لشيء
بل لمجرد هو رجل وهي امرأة
وهذا منتهئ الغرابة والتعجب
فنزف جودة مشاعرة المناصرة والمشتركة مع كل امرأة مضطهدة علئ شكل هذه القصيدة
فرفعها وصدح بها بلبل الجنوب عبادي العماري
لتكون شعارآ علئ مر السنين ضد العادات السقيمه
والتقاليد الرجعيه الواهيه
الذي من شأنها الحط من قيمة الانسان ونفي دورة الاجتماعي
الديوان -المجلس الذي يرتاد ابناء القبيله لسن القوانين والمناقشات
بسك-كفاك او يجب ان تنتهي
فحطنا -تعبنا لدرجة الاعياء وتسارع النفس
النهوة-هي منع زواج البنت لغير ابناء عمومتها
نحن الأن في أوج عصور التقدم والتمدن والنضوج الديني لسنه 2020 ومع كل الاسف الئ يومنا هذا
لازالت هذه التقاليد في بعض العشائر ساريه المفعول
ف مابالنا ?
والئ اين نسير وتسير بنا قافله الوجع ?
،،،،،،،،،،،،،،،،،،،،،،،،، ،،،،،،،،،،
///ضحيه لمن لايرحم///
//بقلم زهراء الحسناوي//
،،،،،،،،،،،،،،،،،،،،،،،،، ،،،،،،،
غصون،،عرفتو منو اني من خلال كلام زينب
الي هي موبس بنت عمي لا اعتبرها اختي الماجبتها امي وصديقتي عشنه سوة وربينه سوة وحتئ مصايبنه اتشاركناها سوة
جنت مدلله عند ابوي لو اطلب عيونه يشلعهن وينطيهن الي لان ماعندة بنيه غيري
ماجنت اضن هذا الدلال يجي يوم وينتهي
بيوم المصيبه الصارت واحمد قتل حسين موفقط بيت عمي الي اتاذو وانما حتئ احنئ طاحت علئ روسنه المصيبه بسبب اخوي مثنئ الي ماجان يختلف عن احمد بشي نفس الاسلوب ونفس الاطباع ومثل ماجان احمد شالع گلب عمي
مثنئ كذلك شالع گلب ابوي بسوالفه التعبانه
اذكر بيوم الدخل ابوي للبيت وسمعت يگول ل امي وهو يبجي راح انطي المدالله مالتي فصليه
مدري شصار بيه عباالك الدنيا وگعت علئ راسي
عشت هاي الايام برعب جنت اسمع قبل من اهلي عن. الياخذوها فصليه اشلون تنضلم واشلون يعذبوها عيالها ابسط شي تنمنع. من ابسط حقوقها
حتئ عقد محكمه مايعقدولها
وراح تضل طول عمرها خدامه الهم تشبع ذل ومهانه
كل ذنبها انو نولدت بمجتمع فاشل يبجل الذكر وينفي الانثئ تحت منفئ العادات والتقاليد والاعراف العشائريه الفاشله
من جابونه البيت الشيخ عبالك سبايه وگعن بيد كفار انولينه وليه من مرت الشيخ وبنته وحفيداته هاي التضرب وذيج التدفرنه برجلها وهاي التتفل علينه
زينب تمثل القوة وتدعي عدم الخوف لكن هذا الشي ضاهريا فقط اما عن داخلها اعرفها كلش زين انسانه رقيقه كلش اذا عيونها ساكتات اكيد گلبها يبجي دم
اخذنه الشيخ دخلنه ع السيد اني وزينب مارفعت راسي ولاشفت الراح يعقدني علي شاب لو شايب
ضليت مدنگه ولازمه بثوب زينب مثل طفل يتشبث بثوب امه يلتمس الامان منها هذا كان حالي
كملنه عقد وطلعنه كل ضني العقدني عايش بنفس بيت الشيخ بس الصدمني من سمعت المرة تحجي هي والشيخ
گالتلي گومي
ضليت صافنه ولازمه زينب ارجف خايفه لان ماعندي غيرها اتحامئ بيها
بجيت
فرفحت
انهاريت
بس بدون فايدة المرة لزمت ايدي وگومتني وزينب عيونها متشخصه الصوبي ولازمتني من ايدي
كلهم واگفين بس احس ماكو غير زينب
المرة جرتني من ايدي گالت امشينه
روحي ضلت يم رفيجتي وبنية عمي احس طلعت مجرد جسد
شنو الينتضرها?
وشنو الينتضرني?
كل وحدة من عدنه راح تعيش مستقبل. مجهول
مانعرف شنو ضاملنه الوكت من لچمات ومصايب اكثر
بعدني ب اول يوم واشتاقيت ل ابوي وامي واخواني ولمتنه العصريه بالحديقه مال بيتنه
اتمنيت اركضضض واشمر روحي بحضن امي واگلها ضميني يمه بحضنج
مشيت برجليه نحو المجهول المرة لازمتني تجرني وراها طلعنه من البيت وگفنه باالممر مدنگه ودموعي من عيوني للگاع ابد مارفعت راسي
سمعت صوت يمنه يتقدم بااتجاهنا
صار قريب گال
ذياب،،ياالله يمه امشينه
غصون،،مشيت وراهم المرة وگفت يم السيارة فتحتلي الباب مال كشن الورة وصعد طفل يمي گعد
والمرة گعدت بالسدر
درت وجهي للجامه ماشفت بس واحد لابس دشداشه بيضه خطف يم باب السايق التفتت للجامه حتئ ماشفت شكله واحس عيوني ورمت وغوشت مااشوف من البجي من سمعت بروحي راح اروح فصليه لليوم هنه يجرن مابطلن بجي
طول الطريق ساكتين ربع ساعه وگفت السيارة گدام بيت حتئ ماانتبهت البنائه
الطفل فتح الباب ونزل قبلي واني ضليت گاعدة خايفه
اليسوق نزل والمرة دنگت راسها عليه وايدها منتجيه ع الباب گالت
ام ذياب،،ياالله خاله انزلي
غصون،، نزلت وياها ومااعرف شنو الينتضرني بهذا البيت
،،،،،
زينب،،راحت غصون. وراحت روحي وياها كنه وحدة تتحامه بالثانيه
بس هسه منو الي?
گاعدة بمكاني خايفه من عيونهن ونضراتهن الماتمت للخير بصله ابد مبينات من وجوهن ناويتلي نيه كشرة
حجت ام لواء
ام لواء،،يمه حنان اليوم السابع مال حسين والزلم طابه طالعه وانتي لسه مالزمتي عدة
حنان،،عمه خليها ورة الاربعين الزم عدة
ام لواء،،مايصير ياعمه هذا يبقئ طوق من نار حول رگبه رجلج ف الزمي عدة وخلي وليدي يرتاح بگبرة
حنان،،وليش مافهمت
ام لواء،،يمه العدة لازم تنلزم من يوم موت زلمة المرة
لان سامعه من امهاتنه قبل يگولون العدة مثل الحبل الحار يلتف حول رقبه الميت وماينحل منا لمن مرته تلزم عدة وتخلصها
حنان،،واذا مثلا المرة مالزمت عدة وماتت شنو راح يصير?
ام لواء،،نفسه الحبل الي ملفوف علئ رگبة زلمتها راح يحلو ويلفو علئ رگبتها من اتمون ومالازمه عدة لان هذا دين يبقه برگبه المرة لازم توفي حتئ زلمتها ينام بگبرة مرتاح
ف الاحسن روحي لهلج خلصي اشهر العدة يم اخوانج ماكو يمكم غريب حتئ تنضبط العدة مالتج
حنان،،لاعمه مااروح خليني اهنا بغرفتي مااطلع
ام لواء،،مايصير ياعمه اهنا حسن ولواء يشوفوج حتئ لو بالخطفات ومايصير
حنان،،عمه. والله مااطلع من همه موجودين بس خليني اهنا
ام لواء،،براحتج يمه بس كون اتحافضين ع العدة وماتنشافين لوينسمع صوتج
زينب،،ماحسيت غير بدمغه علئ راسي رفعت راسي وجان اشوفها جنه
جنه،،شعندج گاعدة اهنا تتسمعين للسوالف
گومي ياالله روحي اگعدي بالمخزن
وعزلي الغراض الموجودة بي وطلعي الوصخ
زينب،،ضليت صافنه بوجها امها كملت كلام بدل بتها
ام جنه،،سطرج العباس ماتگومين بس ضاله صافنه مثل المطي
زينب،،گمت من مكاني طلعت من يمهن المصيبه تيهت مااندل المخزن ضليت امشي علئ كيف واتلفت البيت جبير وبي اهواي بيبان ياباب اليوديني للمخزن ماادري
صارت بوجهي الاسمها غفران اخت جنه ف بدون قصد انضرب متني بمتنها لان تمشي مستعجله التفتتلي ودفعتني
غفران،،اووول الچفن اشبيييج عمييه??
زينب،،ردت احجي اجت ام سجاد زمخت بغفران
ام سجاد،،شنوو هذاا صوتج خااله?
عود اگول انتي العاقله
غفران،،خاله ماتشوفيها تمشي مثل الخوثه ماتندل دربها
زينب،،عافتنه وطلعت لزمتني من متني ام سجاد تمشي وتمشيني وياها وصلنا للمخزن اتعمدت احفض. الطريق حتئ مااتصادم وياهن ويفشلني
اباوع المخزم هوسه وبالاركان حفر صغار مبينات مال فار وجريذيه
بگلبي اگول همزين مااخاف من الفار لان بيتنه جان متروس فار يلعب بالكناتير لعب
بس الحلو بيهن ماجانن يعضن ملابسنه وااماذياتنه
امي مرات تضحك اتگول حتئ الفار يستخطينه
مايعضعض ملابسنه يدري ماعدنه غيرهن
ذني الفارات مؤدبات
جنت اخرب ضحك علئ كلام امي الي من. هسه اشتاقيتلها واشتاقيت لبوي ولمريم وزينه
ماادري ابوي شنو حالته هسه اكيد تعبان لان انطاني غصب عني
ام سجاد،،بنيتي لتخافين اني يمج
زينب،،بمجرد ماسمعت كلمه بنيتي بلسانها غورگن عيوني بالدموع
ماتدري شگد محتاجه الامان وخاصتا الامان الي التمسته بكلمة بنيتي منها
كعدت بالگاع دمعتي بطرف عيني بس تأبه النزول
ربتت علئ متني المرة وكملت كلامها
ام سجاد،،گومي ييمه هاي قسمتج من الله مكتوبلج التعب من زغرج
انتي ضحيه حالج حال اخوي حسين
زينب،،كملت كلامها وهي ترفع الگونيه مال الملابس من الگاع فتحت الكنتور وحطتها
الباب مال الكنتور الثاني واگع بس موجود مرچي ع الحايط
ام سجاد،،ضلي اهنا هسه اجي
زينب،،طلعت المرة الايصيحولها ام سجاد شويه ورجعت بيدها جاكوج وبراغي ودرنفيس
ام سجاد،،راح ارفع الباب انصبه وانتي الزمي حتئ اثبت البراغي
زينب،،متعجبه علئ هاي الانسانه ولاحسبالك منهم
رفعت الباب الها وهي بدت تحط البراغي وتشد
الليطه مال الكنتور الفوگ مكسورة عدلتها بالجاكوج
ام سجاد، ،طلعي الملابس الموجودة بالكونيه حطيهن بالكنتور دبري بيهن امورج منا الكم يوم بين ماارجع البغداد اربع ايام وارجع لهنا حتئ احضر الجمعه مال المرحوم لان العشاير الماسامعه الخبر تريد تجي الجمعه يسوون عراضه
زينب،،المرة تحجي اليسمعها يگول تعرفني من اسنين هي تحجي واني بس عيوني يتحركن واذاني يسمعن
جرت حسرة ودنگت من شافتني ضايعه وتايها
ام سجاد،،الج الله يخاله
الله يعينج ويعينه علئ مابتلانه بي
زينب،،احاول اركز وياها بس تفكيري كله يم غصون
اتخيل جاي يضربوها وهي بطرك روحها
فززني صوت ام سجاد وهي لازمه طرف گونيه الطحين اكو هواي گواني مليانه طحين كل كم كيس محطوط بجها
صاحتلي اساعدها اتگابلنه ع الكياس سندناهن بجها وحدة سفطناهم
جابت مكانسه انطتني كنسنة المخزن
وهي وياي ماعافتني لان تدري اني بس جسد يمشي بالي ابد مو يمها
بيت جديد
عالم جديد
عائله جديدة
كلشي يختلف عن حياتي قبل والله اذا اگلكم بمحنتي حتئ اشتاقيت للهايشه الجنت دوم ادردم عليها من احش الها علف
صارت اكبر امنياتي افز من كابوسي والگه روحي ابيت اهلي نايمه بفراشي وغرفتنه التنگط ماي من تمطر الدنيه
كملنه تنضيف اباوع الروحي كلي طحين من ساسي الراسي وخاصتا اللون الاسود بسرعه يبين بي التراب
وانوب هو اشلون ثوب ينبجي علئ حاله
نكثت ملابسي استحي اگلها اريد اسبح
شويه وجابت افراش قديم اقدم من ثوبي
اسمعها اتصيح الله واكبر شنو سالفتكم ?
عرفت امها ماقبلت تنطيها افراش زين تفرش بي المخزن
دخلت بيدها الفراش
ام سجاد،،گابليني يخاله خل نفرشه الج حتئ اتنامين بي
الك الله يالفقير اذا عكست وياك تعكس فرد نوب
هو گالها ابو المثل التكرها امه تكرها كل الامه
زينب،،شويه صار المخزن احسن من وضعه قبل لاينفرش
هم زين اكو ضوة بي بس مابي لامروحه ولاكلشي والجو حار
صار الليل. واني وحيدي گاعدة اسمع بس صوت حجيهن وبواجي ام لواء تنعئ علئ ابنها
من القهر نسيت روحي ماماكله صار يومين بس عبالك شبعانه مالي نفس بكلشي
اريد اگوم اتوضه واصلي. بس خايفه تطلع بوجهي وحدة منهن
شويه واجت ام سجاد بيدها صينيه بيها تمن ومركه وگرصه خبز
گتلها بصوت ناصي خاله بس اريد اتوضه حتئ اصلي
ام سجاد،،گومي يخاله لاتضلين خاتله عوديهن علئ شوفتج وبالتالي راح ينسن بالتدريج وادعي الله يحنن الگلوب عليج
زينب،،خنگني كلامها وانجمعت العبرة بريگي ابلعها ماتنبلع گتلها خاله
ماينسن
ام سجاد،،ييمه شايفه من واحد يسوي عمليه ويصحه من البنج ?
اول مايصحه ويروح مفعول التخدير راح يضل يصيح من الالم ياخذله شوطه شويه ويخف الالم تدريجيا لان يكون الدكتور انطا مسكن الالمه
واهلي وضعهم هسه مثل المسوي عمليه هم ياخذولهم فورة لان جرحهم جديد وبالتالي الله يدز عليهم الصبر والسكينه لتسكين هذا الالم وبمرور الوقت باذن الله يلتأم الجرح وينسون وتنسي السالفه يخاله وتصير سوالف
هسه كومي وياي توضي حتئ تصلين وتاكلين
گمت طلعت وراها امشي مدنگه
احساس صعبب جدا شما اوصف بشاعته مااوصل لربعه
صارت بوجهي جنه تخوصرت وباوعت علئ ام سجاد
جنه،،خاله صدگ تحجين?
بعد اخذيها بالاحضان واكعدي واسيها لان اجت فصليه
ام سجاد،،كافي خاله بعدج هلكدج وحامله حقد من تكبرين شتسوين?
لتنسين انتي بنيه وبنت بيت لتضلمين هاي المسكينه حتئ الله مايضلمج
زينب،،خزرتني جنه وطلعت من المطبخ توضيت ورجعنه للمخزن جابتلي سجادة وتربه مديتهن ولبست عباتي وتوجهت للصلاة
اول ماوجهت وجهي لله عز وجل دموعي بدن يتسابقن بالنزول
اريد اصبر نفسي مااگدر كملت و بقيت ساجدة ع التربه
اني دائما اقرة ادعيه واحفضهن
ومن. ضمن الادعيه دعاء الفرج للحجه صاحب الزمان. عجل الله فرجه
واني علئ نفس الوضعيه گصتي ع التربه ساجدة
قريت
ألهي عظم البلاء وبرح الخفاء وانكشف الغطاء وانقطع الرجاء وضاقت الارض ومنعت السماء وانت المستعان واليك المشتكئ وعليك المعول في الشدة والرخاء
اللهم صل علئ محمد وال محمد اولي الامر الذين فرضت علينا طاعتهم وعرفتنا بذالك منزلتهم
ففرج عنا بحقهم فرجآ عاجلآ قريبآ كلمح البصر او هو اقرب يامحمد ياعلي ياعلي يامحمد اكفياني فأنكما كافيان وانصراني فأنكما ناصران يامولانا ياصاحب الزمان الغوث الغوث الغوث
ادركني ادركني ادركني
الساعه الساعه الساعه
العجل العجل العجل
ياارحم الراحمين بحق محمد واله الطاهرين
كملت الدعاء وعدلت كعدتي مسحت دموعي ولميت السجادة
جريت الصينيه اريد اكل خليت اول خاشوگه تمن ورفعتها
اتذكرت يوميه لمتنه ع العشه
ادفع عمري الباقي كله في سبيل ترجع لمتنه اني واهلي واخواني
خليت الاكل بحلگي ضليت افر باللگمه منا وارجعها منا ماتنبلع
دخلت ام سجاد شايله زوليه صغيرة وياها مخدة
حطتهم بالگاع
ام سجاد ،،اكلي خاله من الصبح انتن اهنا ماماكلات شي
زينب،،هزيت راسي بأسئ بمعنئ مااشتهي
ام سجاد،،والله ييمه ازمئ وتعدي بس گولي ياالله
ولتنسين قول الله تعالئ ماضاقت الافرجت
مهما انحجبت الشمس وغيمة الدنيا يجي يوم تنكشف وتطلع شمس جديدة ع البشر
اكو ملك بقديم الزمان طلب من الوزير مالته ينقش جمله ع المحبس مالته وشرط يكتب ع المحبس جمله تخلي اذا كان حزين يفرح
واذا كان فرحان يعتدل يعني مايخلي نفسه فرحان زيادة ع اللزوم
ف الوزير كتب ع المحبس(هذا الوقت سيمضي)
وفعلا يخاله لا وكت الحزن يدوم ولاوكت الفرح يدوم ولابد مايفرجها الله بيوم
زينب،،مدنكه استمع الكلامها الي يطيب الخاطر ويهدئ النفس
گتلها ونعم بالله
فرشتلي الزوليه وحطت عليها المخدة گالت امي نامت ماگدرت افوت اخذ دوشگ من نضيدتها اتحملي اليوم
عرفت ماانطنها افراش وهي مالگت غير هاي الزوليه القديمه تفرشها الي
هي اخذت الصينيه واني مددت بالفراش واتغطيت بعبايتي
انفتح الباب دخلت الاسمها حنان ضلت واگفه بمكانه رفعت اصبعها تتوعد
حنان،،وروح حسين بس هاي الليله الج تنامين براحه
لان مااريد عمتي ام سجاد تزعل
انتضريني بس ياجر تروح وشوفي شسوي بحالج
نجوم الضهر اخليج تشوفيهن والله
زينب،،طلعت ورگعت الباب وراها عرفتها ماراحت لزمت عدة يم اهلها لان تريد تنتقم مني
ضليت متمددة حسبه تجيبني وحسبه تاخذني
مادريت بروحي شوكت غفيت من التفكير والتعب النفسي
ماحسيت غير ايدي احسها انشلعت
طفرت مرعوبه.......يتبع
،،،،،،،،،،،،،،،،،،،،،،،،، ،،،،،،،،،،،
السلام عليكم بنات طبعا اني گتلكم الجمعه باذن الله ابدي انزل البارتات لان قسما بذات الله دااكتب
وهم الاحداث اخذها بشلاع الگلب من صاحبة الرواية وبنهاية القصه راح تعرفون ليش لان مااريد احرگ عليكم الاحداث
ف نضام النشر حيكون بين يوم ويوم
يوم الكم حتئ اتفاعل وياكم واجاوبكم عن اسألتكم
ويوم لعائلتي لان عندي طفله السنه اتسجلت بالاول ابتدائي ودااقريها تدرون انتو المدارس الاهليه بدت الدوام
يعني اعتبرو هذا اليوم راحه الي لان القصه تختلف وبعيدة كل البعد عن القصص الاخرئ لانها تسرد احداث صعبه من رحم الواقع
فلتستعجلون حتئ مانضلم النشر ونستعجل بالتنزيل
علئ كلمة شرف تتكاتل الناس
شعجب ننطيها فصليه بسهوله??
|