#ضحية_لمن_لايرحم
زهراء الحسناوي
#البارت٧مفاجئه 🤗
كأني بلسان حال الفصليه
،،،،،،،،،،،،
مادنگت راس ولامطيحة اعگال
وبنات الطايفه يضربن مثل بيه
انه شارب لخوتي ورافعه الهم راس
ويسموني كله المرة البدويه
من امر اعله المضيف يكول عني الشيخ
هذيج الصايرة لخوتها خاچيه (عبايه)
هذيج التنعدل عدله البيريه
هذيج الراهيه التشبه الگمريه
حسبالي النخوكم جايبين مراد
لو فد كلمه حلوة وبيها قدسيه
سمعت شروطكم تردوني للحطاب
تشعلوني بحقد حتئ ابقئ جمريه
تطيبون الجرح،،بس انه جرحي يطيب?
راح يضل جرحكم للعمر بيه
شلتو اتفاگكم ع الباطله
وتردون اشيل ذنوبكم واني ادفع الديه
انه بنية سلف خلاني ابوي اعگال
مو سلعه رخيصه بچف حراميه
ترة بعض العشاير بخت عدها وراي
مايرضون هيج انعامل بنيه
واخر شي بعد گولو للشيخ الجاي
زينب اتگول عيب انوخذ فصليه
،،،،،،،،،،،،،،،،
للشاعر قحطان المالكي
،،،،،،،،،،،،،،،،،
زينب،،طفرت من مكاني مرعوبه ايدي بيها دم
شفت الفارة انهزمت من گدامي خرب بحضج
جا انه يم اهلي فاراتنه مؤدبات وانتي بأول يوم الي
اعتبريني خطار واجلي عضتج الباجر
انتبهت علئ روحي اعاين علئ ايدي واحشش بدون ماانتبه ابتسمت علئ حالي
وين جنت اوين صرت
عاينت للشباك. طر الفجر گمت من مكاني فتحت الباب وطلعت الحوش هدوووئ يخوف بس انه متعلمه من ابوي يگعدنه كلنه نصلي صلاة الفجر بوقتها بس احمد لو شيصير مايگعد
بس ابوي ابد مابطل محاولاته ويه احمد
مرات امي اتگله عوفه لااتعب نفسك بسببه
ايگلها كل راع مسؤؤل عن رعيته
واني مسؤؤل عنه امام الله باجر بيوم الحساب اني الاتحاسب علئ ابني
بس من احاول وياه اكون اديت فرضي امام الله سبحانه وتعالئ واطلع من خطيته
وصلت للمغسله مال المطبخ اتوضيت واني اتلفت خايفه
حتئ من جنت يم اهلي اخاف اطلع وحدي
مرات للتواليت من اريد اروح اخذ مريم وزينه
امي تضحك عليه اتگلي ماخذتلج جيش وياج للتواليت
رجعت بسرعه دخلت للمخزن صليت وكملت بس حسيت روحي جوعانه ماماكله صار كم يوم
رجعت اتمددت بالفراش واتغطيت بعباتي گلت شويه وتروح الجوعه وانام
هسه تروح هسه انام وعلئ هاي الحسبه لمن طلعت الشمس واني اتلوة من الجوع
ماعندي ساعه اشوف الوكت بس مبينه الساعه ب6لو ب7الصبح
شويه وانفتح الباب دخلت ام سجاد بيدها صينيه. احس جابتلي اكل من الجنه مو اكل عادي
حتئ ماانتبهت للمرة شنو حجت وياي وشگالت لان اكلت من قريح گلبي احس مالحگ اترس حلگي من الهبوط الصار عندي ردت اگول ل ام سجاد تلفلي لفه تساعدني حتئ اكل بسرعه
ام سجاد،،علئ كيفج يمه لاتغصين
شوفي اشلون جعتي لان مااكلتي ويمكن ماماكله قبل ماتجين لهنا
زينب، ،هزيت راسي بمعنئ اي
ام سجاد،،بنتي اني راح ارجع البغداد لان مناك ويلادي وابوهم وحدهم واليوم صارلي ثمن ايام اهنا اشتاقيت لويلادي وبيتي
اني كم يوم واجي بس اوصيج شتسمعين غلسي ولاتحجين
زينب،،صدگ خنگتني العبرة گتلها خاله ليش هيج تعامليني واخوي كتل اخوج?
ام سجاد،،ييمه انتي گلتيها بلسانج اخوج كتل اخوي يعني مو انتي
وانتي ضحيه حالج حال اخوي الله يرحمه
يبنيتي انتي مالج ذنب بالصار وجاي ادفعين ثمن غلطة اخوج
اني الله فوگي يشوف ويسمع وعندي بنيه مااريد الصار بيج يصير ببنيتي
كلشي دين بدين حتئ دمعة العين
اذا اني ضلمتج باجر الله يطلع حوبتج ابنتي ويحرگ گلبي بيها
زينب،،دنگت واللگمه بحلگي الله يخليها الج
ام سجاد،،ياالله اني ماشيه بس والله گلبي راح يضل يمج
زينب،،بوستني وطلعت ولاجنها بتهم
ردت ابجي وراها احسها طوق النجاة الي
مرات من يصادفك بشر. ماتعرفه بسوگ لو بمكان لو بزيارة شخص غريب عنك بس تلگاه بسرعه ياخذ ميانه وياك عبالك يعرفك من اسنين
وام سجاد مثل هذا البشر اليكدر يخليك تحبه من اول حديث بينكم
بعد ماراحت المرة بربع ساعه انفتح الباب ودخلت الاسمها جنه وامها ومرت حسين
ام جنه، ،ياالله يالمسعدة انهضي اتحلحلي مو مخلصتها نوم وخدر
حنان، ،والله ياعمه اول مرة اشوف فصليه مدلله
جنه،،گومي ولج يالله لاتضلين خاتله
ام جنه،،اسمعيني زين اريد البيت كله يلمع كون يلهث من النضافه
هسه كلهم الولد طلعو اريد تصعدين للطابق الفوگ تنضفي وبعدين تنزلين للطابق الجوة
هااا واصعد وراج اشوف تنضيفج اذا لگيت شي وصخ بالقران امسح بيج الارضيه كلها
جنه،،ياالله انهضي لاتضلين تتصفنين
زينب،،گمت وياهن وحدة گدامي واثنين بصفي يمشن دفعتني مرة حسين
جنه جابتلي مكناسه وماسحه وغراض التنضيف شمرتهن گدامي
وصعدت قبلي للطابق الفوگ
بعدني علئ اول بايتين اريد اكمل طريقي
ام جنه گالت البتها
ام جنه،،جنه يمه اقفلي كنتور خالج خاف هاي ايدها طويله واتبوگه افلوسه
زينب،،بلعت الغصه وكملت طريقي لفوگ
وكفت يم غرفه فتحتها گالت
جنه،،هاي غرفة خالي حسن
والبصفها غرفة خالي حسين وذيج الاخيرة بنهاية. الممر غرفة خالي لواء نضفي عدل واذا لگيت اترابايه ع الميز اشلع جلدج
زينب،،طلعت وعافتني المكان جديد مااعرف منين ابدي
عدلت الجربايه وفتحت البردة هويت الغرفه
بعدها كنستها ورتبتها
كملت ورحت للغرفه البصفها فتحت الباب. ردت ابجي بعدها بيها ريحة عرس مبينه من شوفتها
بسرعه اتخايلي العريس موجود اتذكرة بيوم الحنه مالته من شفته من السطح يركص الجوبي
رغم معاملة حنان بس لحد الان عاذرتها
عزلتها ورتبت غراضها كملتها وطلعت
رحت للغرفه الاخيرة فتحتها ترتيبها يختلف
مرتبه مايحتاجلها تنضيف اهواي
رحت للغرفه الاخيرة فتحتها ترتيبها يختلف
مرتبه مايحتاجلها تنضيف اهواي
بس عدلت سريرها ومسحت الميز وهو نضيف بس خاف يجن ومايلگنه ممسوح
كملت وشلت الغراض ردت اطلع انفتح الباب ودخل لواء
جفلت بس ماارتبكت كانه شخص عادي حاله حال اي انسان عادي بحياتي هو اتفاجئ بوجودي بغرفته
من شافني اريد اطلع وگف علئ صفحه فتحلي مجال بسرعه عبرت من يمه مدنگه
،،،،،
لواء،،گعدت من الصبح رحت البيت صويحبي علاوي اخذت اخو مرتضئ وطلعنه رحنه الصاحب الموكب القريب عليها اخذنه من عندة غراض الجادر جبنه الحديد والجادر بسيارة حمل ورجعنه لهله
التمت شباب المنطقه الي كلهم متاذين علئ ابن منطقتهم وصديقهم
نصبنا وحضرنه بلغنه العالم الفاتحه العصر
كلنه گتلهم اني راجع للبيت اسبح وابدل وارجع
رجعت وبوجهي صعدت الغرفتي فتحت الباب فاجئتني مرة غريبه بالغرفه اللحضه نسيتها وراحت عن بالي هاي الفصليه
نزت من شافتني بس بسرعه رجعت طبيعيه عبرتني مدنگه ولاكانه اني گدامها
دخلت للغرفه سبحت وبدلت ورجعت البيت علي لان بلغنه العالم الفاتحه ساعه 2الضهر
اجت العالم وانفتح الجرح من جديد بچينه عيونه بس مايرجعون
،،،،،،،،،،
غصون ،،دخلتني المرة للبيت طلعت بنيه يطلع عمرها بالعشرينات تباوعلي بنضرات بيهن علامه استفهام والرجال دخل من باب ثاني الداخل البيت غير الباب الدخلنه احنه منه الابنيه بقت تباوعلي
سالتها المرة
ام ذياب،،ها يمه عذورة منو يمنه ??
عذراء،،بس نور حماتي جبتها وياي لان ضايجه
غصون ،،دخلت للمطبخ بنيه حلوة كلش حلوة عيونها خضر كبار وبيضه عبالك ماشايفه الشمس من بياضها دخل الرجال رفعت راسي اجت عيني بعينه دار وجها وحجه وياهن بس اول شي سلم عليهن
رجعت دنگت بس جسمي يرجف خايفه
ذياب،،يمه راح اصعد اناملي ساعه تعبان
ام ذياب،،مايصلح نوم العصر يايمه
عذراء،،تعال اگعد يمنه فدوة لاتنام وبعدين نورة اجت وياي لان ضايجه من البيت
غصون،، رفعت راسي انتبهتله خزرها
دار وجها وصعد الدرج صاير گبالي
الابنيه سألت منو هاي??
ام ذياب، ،مرة ذياب
عذراء،،شنووووو
ام ذياب،،صوتج يمه
وانتي بنيتي والله حتئ ماعرفت اسمج لسه
غصون،،رفعت راسي گتلها اسمي غ غصون
ام ذياب،،گومي وياي يمه فوتي اسبحي خل اطلعلج هديمات من هدوم سارة عايفتهن اهنا
غصون،،انتبهت للابنيه ام عيون الخضر عبالك مصدومه واكفه بمكانها فاتحه عيونها علئ وسعهن تباوع للاسمها عذراء ماعرفت شبيهن تركتهن وگمت ورة المرة الي لحد الان مبين عليها مخافة الله كلامها بهدوئ وجها يبعث الطمئنينه للنفس والروح
دخلت وگفت بالحمام وهي راحت جابتلي دشداشه سودة وخاولي وحجاب مبينات جدد
ام ذياب،،فوتي يمه ذبي ثوبج الابسته مفتگ من ضهرة والبسي ذني
غصون،،شي بيه جاي يرتاح تدريجيا
سديت الباب وگعدت اني وهدومي بالگاع رفعت ايدي سديت حلگي لايسمعون صوت نحيبي
بجيت بقهر ومن كل گلبي بس بدون صوت
صعب بيوم وليله تنقلب حياتك رأسا علئ عقب
بيوم وليله تلگه نفسك بمكان غريب عليك ويم ناس ماشايفهم ولاتعرفهم قبل واول دخلتك الهم اتكون عروس البيت
العروس الي انسلبت كل حقوقها بان تكون عروس حالها حال اي بنيه تعيش فرحه هذا اليوم
فتحت الماي وبديت اسبح كملت بدلت شفت مشط معلگ مشطت بي لفيت شعري ولبست الحجاب
ردت اطلع اترددت خايفه ضليت واگفه ورة الباب وادري اتاخرت كلش
سمعت صوت دگه خفيفه ع الباب
ام ذياب،،ها خاله كملتي?
غصون،،همست بصوت دوب اني اسمعه اي كملت
فتحت الباب وطلعت صارن گبالي البنات اثنينهن
يباوعلي ويتهامسن بينهن بس الاسمها نور عيونها مگلوبات حمر ومبينه ضايجه والثانيه لازمه ايدها تهدي بيها
دخلت ورة ام ذياب للمطخ جرت الكرسي وحطت ايدها علئ متني
ام ذياب،،اگعدي بنيتي لاتستحين صرتي من عدنه
غصون،،بداخلي اگول ياالله اذا كانت هاي العائله اتخاف الله وماراح تضلمني اريدك يارب العالمين بحق اسمك العضيم الاعضم تسخر نفس الناس. الزينب وماتخليهم يضلموها
فزيت من صفنتي علئ صوت الاسمها عذراء والابنيه واكفه وراها
عذراء،،يمه شنو السالفه ترة كلشي مامفتهمين شنو مرة ذياب واشلون اتزوج وحسين صارله اسبوع من مات?
ام ذياب،،بنيتي عوفي السالفه هسه عيب حماتج وياج خل نحضر العشه هسه وبعدين نحجي
غصون،،ماحجت بس مبينه علئ ساعه تنفجر كل ماارفع راسي اشوفها تباوعلي
ام ذياب وكفت يم السنگ تتوضه التفتتلي
گالت تتوضين حتئ تصلين?
هزيت راسي بمعنئ اي
گمت يمها توضيت گالت تعاي نصلي بغرفتي
رحت وراها دخلتني الغرفتها استحيت ارفع راسي
جابتلي جادر صلاة انطتني وجابتلي سجادة وتربه وكفت بصفها صلينه سوة
كملت التفتتلي مبتسمه
ام ذياب،،قبل الله
غصون،،قبل الله اعمالج
لميت السجادة وهي هم لمت سجادتها
العشه هي خلت الجدور ع النار وگالت البتها عينج ع الاكل لايحترگ
اتقربت گعدت يمي لزمت ايدي خلتها بحضنها
ام ذياب،،شوفي يمه ادري بيج خايفه وادري بيج سامعه ضلم الفصليات والضيم التشوفه من عيالها
بس يبنيتي اني مرة اتخاف الله وانضلمت اهواي بحياتي كلش اهواي اكثر مماتتصورين بس مانسيت قول الله تعالئ
(ان بعد العسر يسر)
ييمه فترة انضلمت بيها وجزت وراحت وصارت سوالف ولان سكتت ربج انصفني واخذ حگي من البشر الضلموني
والله ييمه وداعة ذياب وحيدي من شفتج انتي والفصليه الثانيه احس گلبي انمرد عليجن
انتي امج داعيتلج صرتي عندي بس الثانيه مااعرفها شتصير منج?
غصون،،انهضمت وماسيطرت علئ دموعي گتلها بنت عمي
ام ذياب،،بنت عمج الها الله ييمه وانشاءالله اتكون الوادم اتغيرت ويخافون الله بيها
غصون،،عرفت اكو لغز بكلامها كتلها يعني زينب راح. تتعذب?
ام ذياب،،خليها يم الله بنيتي وگولي ياالله وداعتج شكو انسان يضلم انسان ثاني بغير حق يجي يوم الله ياخذ حقه كامل ومكمل ويجازي المضلوم ويضلم الضالم مثل ماضلم انسان ماله ذنب
غصون،،تحجي وتتحسر كملت كلامها
ام ذياب،،بنيتي البيت بيتج واني عمتج ويشهد الله ورسوله لو ماسالفه حسين وعيب جان رحت جهزتلج جهاز كامل حتئ لو ماكو عرس وهوسه لان رايحلنه ميت بس ع الاقل سويت شي بسيط
گومي هسه خل نتعشه وبعدين اسولفلج عمتج اشافت ضيم
گلبي ارتاحلج ييمه لان الي نضرة وحدة للبشر اعرفه من وجها واعرف بنادم الزين من الشين
غصون،،گمت وراها دخلنه للمطبخ الاسمها نور گاعدة ساندة راسها بثنين اديها علئ ميز الطعام
وعذراء تصب وتحط المواعين ع الميز
ام ذياب گالتلي اگعدي گعدت كدام الابنيه صارت گبالي وام ذياب فتحت الثلاجه جابت فواكه وروبه حطتهن ع الميز رجعت جابت الخبز والخواشيگ
وگعدت يمي وعذراء بصف نور واثنينهن يتخازرن وياي مخازر اريد افهم عليمن ماادري
بس ام ذياب اتعشت وعذراء عشت ابنها الاجه ويانه
ونور مااكلت ابد وكل مااتگلها المرة اتعشي اتجاوبها مااشتهي
وحتئ اني احط الخاشوگه بحلگي احس اللگمه ماتبلع لان يباوعلي واني منا لسه خايفه بس المرة طمنتني بسوالفها
ام ذياب،،يمه ليش صافنات اتعشن
انتي خاله نور ترة موخطار اكلي
نور،،شكرا خاله بس صدگي مااشتهي قابل مستحيه?
غصون،،اني هم مااكلت لان كلها تباوعلي
كملنه وام ذياب تسولف ويه نور تسألها عن دوامها وعن الكوليه مالتها الافتهمته كليه صيدله مرحله رابعه
عذراء تنقل بالاكل تحط بالسنگ وامها ونور يسولفن واني مدنگه بس استمع الهن وباالي كله يم اهلي يم ابوي اكثر شي افكر شنو حالته واليوم اني مويمه ولاگدام عينه اخاف يتمرض گلبي عندة
عيوني نترست دموع بلعت ريگي انسمعت صوت الغصه الصارت ابلعومي رفعت راسي نور وعذراء وام ذياب يباوعلي المرة حست بيه گامت گالت
ام ذياب،،گومي وياي خاله خل احضرلج غرفه
غصون،،گمت وياها وعفنه البنات اثنينهن بلمطبخ بمجرد ماوصلنه الباب قبل مانطلع سمعت صوت عذراء اتگلها
عذراء،،ولج اشبيج انگلب وجهج??
خل افهم السالفه لا من هسه وجهج يبجي
غصون،،،صار صوتهن بعيد مااسمعهن فتحت المرة باب مال غرفه مفروشه زوالي ومرتبه مبينه مال گعدة
ام ذياب،،هاي الغرفه خاليها الگعدتنه نگعد بيها من نتعشه لو نتابع تلفزيون
بس اليوم تنامين هيج بيها وباجر نرتبها انشاءالله
غصون،،عفناهن بالمطبخ والمرة تحجي وياي بس شي بداخلي مرتاح مومثل الصبح من اجينه شبعنه كتل وتكفخ لسه راسي يوجعني من دمغاتهن
طلعت المرة شويه وجابت دوشگ سفنج جديد وبطانيه بالباكيت مالتها ومخدة حطتهن بالغرفه بس حطت الدوشگ فرشته بصف الحايط الي گدامي التلفزيون مغطه يمكن لان حزنانين هاي عاداتنه بالعرب والريف من يموت شخص قريب عليك اتغشي التلفزيون مايشتلغل اربعين يوم يضل مطفي
گعدت المرة يمي گالت خل اكملج سوالفي ييمه حتئ گلبج يرتاح وماتگولين راح انضلم اهنا
صرت استمع الكلام ام ذياب وكل كلمه تحجيها گلبي ينقبض اكثر ويضل بالي يم زينب
المرة تحجي واني بداخلي اگول
شنو ذنبج يازينب وگعتي بيد هيج ناس?
يتتتتبع،،قرائه ممتعه
|