عرض مشاركة واحدة
قديم 07-08-21, 01:55 AM   #1

طارق خلف

نجم روايتي وقاص في قسم قصص من وحي الأعضاء و كاتب بقسم روايات من وحى الخيال


? العضوٌ??? » 166781
?  التسِجيلٌ » Mar 2011
? مشَارَ?اتْي » 240
?  نُقآطِيْ » طارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond reputeطارق خلف has a reputation beyond repute
افتراضي ديوان "بوح القلب المجروح"




ديوان بوح القلب المجروخ

طارق الصاوى خلف
:7R_001:
مفتتح البوح
سيف لسانك دبحنى
لما شفت الضهر محنى


==============
سامحنى يا روح الروح
سامحنى مضطر أبوح
أبوح و أنوح
و أكتب ع اللوح
خواطر منثورة و أشعار
راح أقول
و أزرع
ف المقطع راس للغول
عارف اللى يهبش فيه
م اللى أذونى
من أول بت
فى شارع عتمة
وسط خرابة
بتلعب فيها مع الوطاويط
ضحكت البت ام لبانة
رنانة
تشبه حنكفه
قول شيخة منسر
مدت ايدها
ف حضن جيبى
خدت القرشين.
ودا عيبى
إن الراجل ما بيصرخش
-------------------
فى سنة أولى
قبل عقلى ما يتفتح للتعليم
معملتش ذنب
و الابلة ما خدنيش على جنب
طلعت روحى معايا
وسط السابوره
عرضتنى زى خروف العيد
‏ورتهم
مريلتى الوسخة
ضحكوا الولاد
نزلت دموعى جوا ضلوعى
وما قولت لهمش
إن الست الوالدة ماتت
وستى عينيها الممسوحة
ما تميزش اللون
------------------
ربعت ع الدكة لوحدى
كنت يا ولدى
سفروت ف الجرى
والجرى نص المجدعة
قطرتنى
كلاب السكة
لانى غريب
و رجلى باينه م الشورت
ملبستش لسه جلابيه
عيشه هباب
ف هباب
دا كتاب مكتوب
ع النن
لازم أ اقراه
أحكيه
لجل أفوق
أفوق و أروق
-------------------
الأوده بالقفل مشمعة
و طبيخنا بامية مقمعة
فوت م الشراعه
بسرعة فار
دسيت رغيف ناشف
فى الطبيخ السخن
لقمة هنية
فى دروة حيطة
كلتها
حنيت بالتراب ايدى
مسحت الشفايف ف الجدار
نويت
ف وقت الشجار
أحلف
و ربنا الغفار
انى لو شفت الطبيخ
انحرق بالنار
---------
عيشة مرار ف مرار
خلاص
نويت ع الـ نتحار
كل اللى يقدر يضربك
ميتأخرش
ومهما صحت
القلوب حجر ما بتتأثرش
جريت لفتحة الهدار
شفت وجه ملاك بيسجد
ف المصلية
اتوضيت
صليت وراه ركعتين
فرد منديله
وناولنى ثمرة م الجنة
مسح صدرى
ركب حصانه
والتفت ليه
بوصيك – ياولدى - حافظ ع الأمانة
جتتك مش ملك ليك
يا ولد
---------------------------
رجعت تانى للحياة
وانت مستبشر
درب المهانة طويل
وانت بتكبر
الطوبة تقسم ضهرك المحنى
و انت يا عين الأمل
ماشى أوام دوغرى
لا تبص لحظة وراك
ولا تشتكى قهرى
يا دهرى إيه علتى
انى اتفضح بدرى
حافظ آيات ربنا
فى دراستى متفوق
الست
تكتم ضحكتها
والولد الشقى اللى
ف أيدها
بيذيع خبر معروف
معلوف يا خروف
يا حمار ناطق
وابن حداية
قرار وخده يا وحش
هتعيش عزيز
بقرن طور
تواجه الحمقى
دا القط
يثبت مليون فار
ولا تزعل ولا تحتار
واضرب
الخوف هيخاف من غضبك
-------------
و شلتك رجليك
و ركبت القطر للثانوى
وبدأت م الأول
الشر بيطرح ثمره المر
بكل مكان
وانا عمرى ما كنت
ف لحظة جبان
و اللى باع نفسه
ف أول العركة
واد متهوبوش الجان
القبضة عارفه طريقها
للمناخير
ضربة مباغته
للى يعاند
خناقة و التانيه
اتسيطت
قالوا دا صايع بحر
لحد
ما قدرت تعيش ف سلام
------------
سألنى
الدكتور ف الجامعة
لما خدنى إليه الأمن
فيه بلطجى
طولك بالذمة؟!
لكن لجل جسارتك
فى طحن شحطين
عفونا عنك
------------------------
صدقت البنات ف الكلية
باستثناء نرفت
إنى
بلعب ف مصارعة اقزام .
ويسألونى يا كابتن
عن وقت إذاعة الحلقة
فى التلفزيون
كان لازم ألعب كارتيه
و كنت مرشح لحزم إسود
وشارة كابتن
عاز الكابتن حسنى يضحك
قالى تنزل مع راضيا كومتيه
راضيا نمرة
تغلب عشرة
افتكرت انها فى الجولة
راح تفعص حشرة
واديتها تحية بغمزة رمش
ضحكة
هزت عجيزتها
صرخت صرختها
تسقط من زعقتها الحامل
قلت لنفسى
هتحمل أول هجمة
أصد و ارد
صدفة غريبة
أنفك حزامها
بضربة رجل
شكلت عليها
مجموعة حركات
جريت قدامى
انسحبت
وشلونى يومها على الأكتاف
ورمونى
جنب شريط القطر
وقالوا لى لو شفناك
ف النادى هتشبع ضرب
آه منه الغدر
------------------------
نرفت بنت لقيتها جنبى
بعد الدش البارد من غادة
نيرفت
بتحب تحط
صابعها فى طاقة مناخيرها
وتوسع فيها بالمنديل
وانا بقرف
لكن فيها ميزة
بتمسك لسانها وقت الدرس
أما أمانى بالعة إذاعة
ولما طردنا معيد السكشن
طلعت هضبة ورها الجرذ
رجعت لنرفت
استحملت هبلها الطافح
ولما قربنا تتخرج
قلتلها تعالى
نرسم علاقتنا
ف الايام الغامضة الجايه
حطت فى ودانها صابعها
‏قالت اوعى تقول
‏راح اقول واقول
‏يانرفت
عينك مستودع أسرارى
اتمناك لليلى نهارى
على باب الجامعة
نرفت ضاعت
تاهت ملقيتهاش
-------------------------
لما انسد فى وشى الباب
قلت أرحل يا أحباب
بعت قيراط
ورثته عن أمى
وقلت اخد بالأسباب
قمت مسافر دوغرى
على بغداد
ف علاوى الحلة
تهت أدور
ع المنصور
وجميلة الحلوة
وصتنى اطلع ع الدور
شفت المادنه
خطفت قلبى
النور فى الضلمة
فتح
و جانى من ربى
ملهوف حطيت رجلى
ع الأسفلت
الشنطة فى إيدى
رميتها
وجريت ف الشارع
مش شايف حد
الروح عطشانه
والباب الاخضر مفتوح
وسجدت شكر ف مقام العسكرى
ودعيت ربنا
يفتح أبواب الرزق
--------------------------
البدلة اللى فصلتها
لحفلة خطوبتى
بعد ما تخرجت م الجامعة
فار ملعون نقرها من ضهرها
عرفت أن الفشل
رفيق وصاحب رحلتى
ف غربتى
السكة مقفولة
بترباس
ضربات فى الراس
م الفقر و قلة الحيلة
مشيت معايا سنين
الدنيا بالشقلوب
------------------------------
‏الآنسة اللى قابلتنى لأول مرة
‏عند محطة الاتوبيس
‏واللى عدت فجأة عليا
‏قالت بنجور
‏بنجور بنجور
شميت ريحة
مزيل عرقها
لاحظت
لهفتى
قالت ‏
سلتو بليه
‏ما انت أصغر منى يا بيه
‏خلينا أصحاب
‏ما تزعلنيش
‏لتقوم زعابيب امشير ف عنيك
‏انسى يا طارق
‏انسى وبلاش
‏احرق قلبك
‏ونسيت وبعدت
وانتى يا ريرى
لسه ف جوفى
نار وكانون يشوى مشاعرى

‏ ------------------------------
‏قل خالى
واحنا بنخطب بنت الحافى
زينهم اشترى جرار
أفهم يا حمار
عالم أشرار
البنت عايزة دقة وزار
وخروف أجلخ
تدبحه قدمها
يروح العمل المرشوش
على كتف المأذون
وفهمت
يا خال
اتاريها موال
لما تنزل سقف احلامك
الدنيا
تقرقض فيك
وبتجى عليك
لكن لما بترفع
صوتك
الدوشة حواليك
بتخف
و العربية اللى ماكنتش هتخدك
ترجع و تلف
وتقولك على فين يا باشا
وأنت تتحكم فى السواق
------------------------------
قعدت
أيدى على خدى
‏اللى كان ملطشة المهابيل
آه يا ليل يا قمر
و البت عملت مؤتمر
قلت هشارك
قمت فارك
طلعت عربيتك على الاستاد
يا حلوة
خلاص جبرت
مش عايزك تانى
كفاية زمانى
منك نجانى
‏------------------------
مش هزعل
لو جانى
بعد ساعات الموت
ما فيش مهرب
ولا حد يفوت
لكن خوفك
خلاك لعبة فى يد الخلق
خلاك تتنازل
تطيع و تطاوع
ولا عدت تلاوع
الموت مكتوب
مكتوب وانت مسلوب
من أى مقاومة
نخيت
لجل تعيش
والموت
ما فيش منه هروب
-----------------------
ولدى حبيبى
محمد طارق
راجل فى الشكل
يا طفل الروح
يا صحبى
معايا وين ما اروح
فاكر مرة ف نص الليل
واحنا راجعين م النادى
وأنت تنادى
صوتك رايح
وانا بجرى وراك
وانت فيتوان
وانا مش لحقك
وقعت
رجعت
تقعد جنبى
وتشد ايديا
و كلاب م الجبل
جايه علينا
عصاتك
عارفة وجهتها
لكنك خفت
صرخت
هربوا من غضبك
ولاد الكلب
والكلبة
تبصبص ليك
عينها ف عنيك
فكيت زنقتك
انكسفت
هزت ديلها
و مشيت
ورجعنا البيت
نمت اتغطيت
وصحيت الصبح
تدور ف البيت ع الكلب
----------------------------
قالوا ممسوس
ولدك ملموس
عشقاه جنيه
دخلتها عليه
رذلة شوية
خيبة قوية
لما مشيت فى الشارع تصرخ
نجاج ماتت
ماتت ماتت
ما كنتش عارف
ان نجاح الساكنة
ف قلبك
هى رمانة توازنك
لما انسحبت من دمك
زاد همك
وصرخت صرخت
فينك يا نجاح
انا مش مرتاح
عطرك فواح
لسه فى انفى
------------
آه يا ضنايا
كنت ياولدى حزين
وبجد
ما كناش فاهمين
إن الجنية
الملهية
الانانية
قلبت حالك
وبقيت
زى وابور الجاز
تهب تحرق حوليك
غضبك طوفان
وايديك طرشه
محتار
النار جواك
إفران قايده
تطفيها بكف ينزل
على وشك أو وشى
كنت اختار خدى
استحمل واخفف عنك
ظهرى انكسر
قدرى
صابنى العرج
بدرى
وانت يا حبيبى
ف سكتك
قطر دايس
على قضيب معطوب
شويه هدوء
يا محمد
حبة سكون
لحظات كمون
استراحه
بين شوطين
عذاب
آه يا كتاب
ع سبوره غابشة
سطر
مش باين
عايز مترجم الاحلام
يفك شفرة الايام
قال العجوز
وهو بيطل عليا م المادنة
الصبر مفتاح
يفتح الفتاح
لسه مشوارك طويل
ليلتك بستين ليل
ونهارك جمر
بيولع ف ديلك
وانت
الشعر شاب
دبل الشباب
داب م الوجع
--------------
ولدى
لو الموت
المفرق بينا زارنى
اوعاك
تخاف
تاكلها حاف
باب من الزرق
هيفتح
قول يا بركة الصبر
يدق بابك الرزق الحلال
ربنا عالم بحالك
اصمد يا ولدى
أوعاك
تنكسر
------------------------
أبوك المجروح
وأنت بتنظر
مش فاهم حاجة
عارف أن العبد
تطلع له راسين
والحوكى فى المادنه يطل عليك
والعكش ع الفرسه
يوزع أكل ف الليل ع البط
عربية نقل العفش
لما تسمع نفيرها بتنط
و تفكر
أنه جاب م البلد القط
علشان
تلاعبه
تطلع عينه
يا محمد ولدى يا خُط
------------------
يا ولدى
أنت فى عين الرب
الحارس
رازق للغلبان
مش خايف
والله منا خايف
فى شبابى ضيعت الزاد
--------------------------
كل العصيان ف أيدين الخلق
نزلت فوقى
انا
خدت نصيبى حى
جاهز متجهز
لطلوع الروح
قلبى مشروح
والبسمة هتداوى جروحى
و ها غادر
مدبوح
واللى قطعوا لحمى
سوونى
حطونى ف تنور
بيفور
أوام
هاغور من قدمهم
قدمها
اللى بتقولى ريحة بقك
و سنانى واقعة
صابر على وجعى
وجاضم
قابض على جمرى
ومسلم للقادر أمرى
بابلع آهاتى
ومستنى أشوفهم
وهما لابسين الحتة
و يداروا منى الجنة
يخدوا العزا
لقطة قدام الناس
وف آخر الليل
أخوات يوشع
هيقولوا
أهو كلب و راح
ريحنا و ارتاح
-------------------
ياما بلعت لسانى
وسكت
خرست
والست قالت لى ملعون
ملعون ملعون
اللى يحط اللقمة
فى بقه
يهون
ويطلع منه الدبش
أه منه آه
الكبش اللى نطحنى
وأنا بتوسل ليه
يسبب لى
آخر حتة بتفشخر بيها
‏وهو بيقطم صابعى المقطوع
‏ويقول متشال متشال
هتشال
يا عمود النور
السنة سوده
لكن
افعالى البيضة معاك
بعد ما نفذت التهديد
هتخليك
قدام نفسك فرخ صغير
و اطمن
أنا مش هتغير
ولا هدعى عليك
قلت هشيلك
أنا ‏هتشال
وانت هتتشال
‏واللى يشيل فينا
اجره على الله
الله الله.
-----------------------------------
‏يامفارق فارق
‏ ‏طارق
كان
فخر أبوه
مجد لابنه
‏اللى هيشيل من بعده الهم
‏لكن يا بنى لا تهتم
‏انت سند
واخوك محتاج
أوعاك تستنى خال أو عم
لا تقول قرابة
ولا صلة و لا دم
اللى نسيوا أبوك
ينسوك
ربك ستار
‏مش كل كلام
لحظة غضبك يتقال
قفلت خزانة السر
رميتها ف بير
---------------------
الباقى معايا يادوب
‏موال
وكلام يتقال
‏عن أموال سايبه و يا xxxx
‏و ذريبة سميها دار
‏وقول بابا
‏ساب الخير كله
‏بابا يابا
‏قول و فضفض
‏خلى صوتك يعلا أكثر
‏قول كمان
‏ ع الهوان
‏اللى ظلمك ارتقى
‏واللى سبك جه بكى
اللى حاول يكسرك
‏شاف مرونة حركتك
‏قام مصاحبك
--------------------
‏أنت الشريف
صفحتك بيضا و نضيف
‏همك رغيف
‏تطعم ولادك بالهنا
‏و ام الهنا
شدا الحزام بتجلدك
لما انسحب كرسى من تحتك
كنت بارد
تلج سايح
وهما نار مقدروش يحرقوك
قعدت
على الأرض
وقمت
فارد ضحكتك
دبحتهم
لما انسحبت من معركة
صالت خيولهم
وأنت ف نظرهم جبان
فرار
ولحظة عايرتك
نزلت دموعك
لجل ما تواسى
المكر اللى باعك
‏انت اللى أعطاتهم بحلمك
نقاط ضعفك
قعدوا
الغلابة
‏يحلبوا الجمل اللى نخ
-----------------------
الراحة حلوة
‏استريح
‏تحت شمس النار
‏جوه فرن بيخبزوا فيه الألم
‏خد قد شوقك
يا كبير
‏الجمل
ملك الصحرا
ضهره انحنى
و رقبته معوجة
‏اشمعنى أنت تتعدل
------------------
‏القطة دبحوها
‏عشان تخاف
الخوف سرداب
‏بيسحب القلوب
‏ وقلبك مخضر
‏فى ساعة الجد يفر
‏حكايات البنات
‏سراب
وانت فاشل
من غير اختبار
قالوا إنك
‏ف كل التجارب سقطت
‏متقولش حظ
متقولش هما استكردوك
‏من كام سنة
وانت بتعافر
‏عايز سلطة
‏صحيح حلمك فتفوته
‏قد مد بصرك
‏لكنهم
وافقين سدين سكتك
لو ركبت الخيل
أو طُلت نجمة
اللى مكتوب تعيش
مصلوب
على جدار المرار
ما فيش فرار
ع المدار
الحبل ع الجرار
اللى فات مرار
واللى جاى
على مهله
استريح
ممكن يطول
الانتظار
طارق الصاوى خلف





التعديل الأخير تم بواسطة رانو قنديل ; 04-11-21 الساعة 03:48 PM
طارق خلف غير متواجد حالياً  
التوقيع
شـكــ وبارك الله فيك ـــرا لك ... لك مني أجمل تحية .
طارق الصاوى خلف
رد مع اقتباس