عرض مشاركة واحدة
قديم 14-01-10, 01:58 PM   #7

شموخ بنية

? العضوٌ??? » 106284
?  التسِجيلٌ » Jan 2010
? مشَارَ?اتْي » 33
?  نُقآطِيْ » شموخ بنية is on a distinguished road
افتراضي

الحلقه الثالثه ..



..........: نورو واخيراً رضيتي تتطلعين
طالعته وهزيت راسي بمعني هي
...........: شي طيب عاد سيري اقعدي ويا البنات شو فايده الطلعه دامج روحج
نوره : هي ييت ادور على شي
.........: صح صح وين ولاعتكم ابوج طفرني عشرين الف مرة طرشني اشلها وما حصلتها
فتحت الطبلون وطلعت الولاعه وعطيتها اياه
ولّع الولاعه ويابها قريب عنّي
خفت وايد وايد بغيت اصيح أنا أخاف من النار وايد ما احب النار
نوره : فهد لاااااااااه
فهد : بعدج خوّافه هههههه انزين خلاص يلا شكراً ع الخدمه
نوره : العفو
راح فهد

فهد بعده على طبعه الحبوب الاجتماعي عكس حمد اللي مرابع يوسف حمد اصغر من يوسف بسنه أما فهد تؤام عليا
رحت صوب البنات وشفتهن يسولفون شفت منى بغيت أحسدها على يوسف الصراحه
أنا اللي كنت اقول باجر البنات بيحسدوني على يوسف طلع العكس أنا اللي بحسد
وأنا اللي اقول باجر حياتي تتغير مع يوسف .. أي تتغير واي خرابيط شكلي وايد حلمت

طالعت صوب عليا شفتها حظها عليا الصراحه عيال عمتي حياتهم حلوه حمد غامض يشتغل مع يوسف شركاء وظابط بعد
أما عليا بتخلص دراسه هالسنه وبتعرس وفهد بعد هاي آخر سنه أما ميثا فعمرنا
بس عيال عمتي نادر ما يجتمعون ويانا مرتين فالشهر .... أكثر شي يروحون عند أهل أبوهم
و هالشي واجب عليهم
هاي حياة عيال عمتي باختصار

أما عيال عمي يوسف غامض جدا جدا جدا انسان طموح
وياسر بعده سنه ثانيه والجوهره وجواهر فعمري وطبعهم عكس بعض
وعلاوي عمره ثمن سنوات فعمر عدول أخوي

خوالي ما اعرف عنهم الكثير لأنه سالفتهم سالفه يالله الله يفرجها وترد حياتنا بسيطه مثل قبل ما نبا بيزات ولا فلل ولا سياير المهم نكون عايله متكامله محد يفرقها

طالعت صوب البنات مره ثانيه ووعاني من تفكيري صوت ميثا
ميثا : جواهروووه بنت خالج منوه تموت ع يوسف اعوذ بالله مادري شو جايف فيها
جواهر : ادري انها تموت على يسوف مادري شو جايفه فيه

والله لو أنا مكانج يا منى وواحد يرمس على يوسف لقص لسانه قص واذبحه وادفنه فقبره روحي .. بس منى غير بارده بارده وايد

منى : انته بحري وانا اليم يقولون اللي يقولون انا فحبك متيم خل الحساد يموتون
انقهرت وايد بارده منى
منى : وبعدين هاك اليوم عموتي اللي هي أم ريل المستقبل قالت العرس جريب
يوسف لا لا تعرس يوسف دخيلك
جواهر : زين ونحن آخر من يعلم يلا اول ما نرد نروح الاتليه وبنفصّل
ميثا : ريلي ع ريلج
جواهر : الحساب عليج

يا برودة دمكم أنا اللي بموت من اللي قاعده اسمعه وانتو عادي عندكم جذا بفصل وبرقص وبلبس
ما اقول غير آه آه محد فـ هالدنيا يفهمني
ضاع الأمل ضــــــــــــــــــــــــ ـاع
وانطفت كل الشموع بدربي انطفت
أصلاً هي ما يوم ضوت عشان تنطفي يارب ساعدني يارب

ميثا : بنات نشو نروح نساعد الامهات عسب ننجب الغدا
أول جمله سنعه تنطقها ميثوه فالرحله هاي ولا هي ما يطلع منها كلام مفيد ابد
قمنا رحنا نساعد وعقب ما غلفنا ألاكل وحطيناه عدل الشباب منهم يو يشلونه نحن قعدنا فـ صوب
عمتي زقرتني استحيت منها وايد
عمتي أم حمد : نواري نوراي
نوره : هلأ عموه
عمتي أم حمد : تعالي فديتج شوي
ميثا : سيري سيري يمكن فيه واحد ياي بفرسه وبيشلّج
نوره : يا سخفج وبرودة دمّج

ميثا استغربت أنا فالعاده أخذ هالسوالف كشي عادي أول مرة أكبر الموضوع جذا أنا أبد ما أحر بسرعه أعصابي هاديه
تجدمت عن عمتي

نوره : نعم عموووه
عمتي : حمد وفهد سلمو على نواري
حمد : هلأ بنت خالي اشحالج
نوره : بخير
حمد : زين ييتي بتستانسين ويانا
هزيت راسي ما عرفت شو ارد
فهد : نواري لك انتي هون ونحنا ما بنعرف
شو هالفضيحه فهود فضحني غربلاته
فهد : الوالده تراني سلمت عليها قبل شوي بس عادي نسلم مره ثانيه
عمتي أم حمد : ما ادري متى ميثوه وفهود يعقلون
فهد وهو رايح : يوم بتزوجوني أقول لج
عمتي أم حمد : ههههههه الله يخسه على سوالفه
ياسر ياي : سمعنا فيه عرس
عمتي أم حمد : هي عرس ولد عمتك فهد والعروس وحده تبا تنتحر
بغيت أضحك وأنقع من الضحك
ياي حلوه طلعتنا تفتح النفس أحلى عن قعدة البيت
بغيت أدق سلف وارد ريوس لأني شفت يوسف ياي صوبنا

مابا اتعلق فيه زياده مابا يوسف بيجتلني جذا كل ماله قاعد يعذبني أكثر وأكثر ليش جذا يوسف ليش
حرام عليك يوسف أنا شو سويت لك اللي اذكره انّي ما شفتك غير من ايام صار لي سنوات مب سامعه عن أخبارك بعد حرام عليك حرام
بس صوت ياسر وقفني

ياسر : اشحالج اليوم نواري
نوره : تمام الحمدلله
ياسر : ها لابي عيبج
استغربت تميت أطالع صوبه شو السالفه جيه يسألني أنا أصلاً متى شفت لابه
عشان يسألني عنّه تميت مستغربه شو السالفه يا ربي
يوسف ياه صوبنا

شو السالفه شكلهم شفتات ناويين يذبحوني عيال العم والعمه متفقين علي

يوسف : اشحالج عمتيه شو مسويه ...؟
صوته ييب لي الرعب والرعشه شخصيته قويه وايــــــد
عمتي أم حمد : بخير ربي يعافيك ولدي اشحالك انته ..؟
يوسف : بخير دامج بخير
عمتي أم حمد : ولدي بغيتك تسير صوب الجمعيه اللي قريبه من هالمنطقه شي أغراض ناقصه

طول هالطلعه كل شي يطلبونه من يوسف
حرام عليهم انهد حيله من كثر ما يلبي لهم طلباتهم جنّه مافي أحد غيره اهني
بس أكيد لأنه عنده خبره بهالسوالف ما شالله عليه يعرف عن كل شي

يوسف : انشالله عمتي تامرين أمر
يوسف توّه بيروح وهو لاف صد صوبي
الحمدلله هالحزة ما كنت قاعده أطالعه ولا كنت بتفشل عدل

يوسف : اشحالج نوره ..؟
نوره : تمام
يوسف : مديم حالج
يوسف : عمتي عقب شوي بتصل بج لمّا أوصل الجمعيه
عمتي أم حمد : الله وياك
رووح يوسف

أنا غبيه ليش ما قلت له ومن صوبك أو اشحالك انته ..؟ والله انّي غبيه ضيعت فرصه علي
طالعت صوب منى وأنا مقهوره حاولت ما ابين ملامحي للي يمبي
شفت منى ولا همها وتسولف مع البنات يا حظج يا منى

أكيد ما يهمج دامج تدرين انّه يوسف يحبج وانتي تحبينه يعني ما في قوه فالكون تقدر تفرقككم عن بعض ... غير هادم اللذات وسارق أحلى اللحظات
الموت حق علينا ولله فراق الحبيب وهو حي ويحب غيري أهون من انّي أحظر عزاه ولله
الله يوفقك يا يوسف بس انت لي بسوي المستحيل عشان أحصلك بسني عايشه بـ جحيم
تبا بحبك تعيشني بجحيم أكبر
والله ما استحمل مشكله وحده زياده على مشاكلي بتهدم حياتي كلها كلها
ما عاد فيني صبر نفد صبري خلاااااص آهـــ من قساوة الزمن
حتى فـ حبي ما توفقت
كل شي انسرق مني كل شي
ما بقا لي شي كل شي فـ حياتي صار طعمه مالح مافي شي حلو
سعادتي انسرقت منّي
العطف والحنان اللي اباه ومحتايتنه انسرق منّي بلحظه
واليوم آه شو أقول حبّي حبّي بعد انسرق عنّي

حرام عليهم ليش جذا ليش ,,,,,,ليش يا زمن تقسى علي ما في حد غيري فـ هالدنيا تذوقه مرارتك
والله انّي ذقت مرارتك لما حفظت طعمها بسني تعبت ... لو بذوقها بعد بتسمم من كثرها بحياتي
خلاص ما عاد باقي فيني صبر لو الزمن بيزيد جرعه وحده من مرارته بحياتي بنتهي بموت مثل المريض اللي يبون يخدرونه وبالغلط يزيدون الجرعه يموت
أنا حياتي وقصتي مع الزمن أشبه بالمريض وجرعة المخدر ...

عقب دقايق معدوده نجبنا الغدا تغدينا عقب الغدا البنات قالو بنتمشا
قمت وياهم تمينا نتمشى
جسدي معاهم بس بالي مكان ثاني وأقول ليتني ما ييت هالطلعه وعشت بأحلامي الورديه
بس زين ييت عشان أقوم من أحلامي بسني اش كثر أحلم وأحلم يكفي لازم أعيش حياتي الواقعيه وأانسى أحلامي
أنا لازم أعيش حياتي الواقعيه وأجازف عشان حبّي بس خلاص دام حددو الزواج ما باليد حيله
لازم أدور لي على أحد غير يوسف يساعدني أتعدى أزمتي هذي وأتخلص من همومي
منو هالشخص ياربيه
كنت بقول الجوهره بس الجوهره روحها يبالها حد يساعدها
بس أنا مستحيل اتخلى عن يوسف بهالسهوله
يوسف حلم حياتي من طفولتي يوسف الأمل اللي كنت عايشه عليه قبل نومي وبعده
صحاني من أحلامي صوت ميثوه
ميثا : نواري حوووووووه
نوره : هلأ
ميثا : وينج من ساعه أزقرج
نوره : عن المبالغه الزايده ميثوه
ميثا بخيث : هاااه منو العرب اللي قاعده تفكرين فيهم خبرينا
نوره : استريحي عيم هب عرب عايبنج جذا !!
جواهر : ههههه حلوه هاي .. المهم اش رايكم نلعب لعبة الصراحه
لقيتها فرصه لي وأحلى فرصه بحياتي

نوره : موافقه ,,
جواهر : وانتو بنات ..؟
ميثا : كلهم موافقين هب لازم تسألينهم يكفي بوسهم موافقه ما عليج منهم
استانست قلت أكيد ميثوه تقصدني
جواهر : وامنو بوسهم انشالله ..؟
مثيا : أوفكووورس الآنسه ميثاني
جواهر : واااااااااااااااااااااااا ااااااااااااااااع
ميثا : جيه هب عايبنج ترا لو هب عايبنج عادي اجلبي ويهج هب لازم تلعبين ويانا تراج
جواهر : آخر زمن بوسنا ميثاني هاللي ناقص
عليا : عز الله الدنيا اختربت
ميثا بشفقه : الحين لو خالد بوسكم جان ما عبرتيني بعد
عليا : أوفكورس انتي اصلا ما تيين ظفر خلّود تراج
ميثا : مالت عليج وعلى خالد أوف
منى : بلا هذركم الزايد هاه يلا نلعب ..

بغيت اقول لها بنات عم وعمة يسولفون انتي اش لج رازه ويهج اجلبي ويهج بس تداركت روحي
الجوهره بهدوووووء انسحبت بدون ما تنطق أي كلمه استغربت من موقفها نستني غضبي بعد

نوره : بنات أي ويل بي باك
جواهر : صادق عمّي يوم قال نورو ترمس أجنبي وايد
نوره : اش لج انتي هههه باباتيه عايبنه جذا
جواهر : جيه تبين تروحين
كنت قاعده اطالع الجوهره فضّلت السكوت ما رديت على جواهر
نوره : برد لكم بعد ثواني عن تلعبون بدوني هاااه بزعل تراني .. أوكي
جواهر طالعتني : ماشي فايده ترا كلنا رمسناها والله كذا مره هاي مو أول مره دوم جذا
نوره : نحاول بعد شو بنخسر يعني
جواهر : انزين برايج أنا قلت لج ..
نوره : يمكن محاولتي تنفع لا تنسين انّي ربيعتها روح بالروح قبل السالفه اللي صارت
جواهر : هيه اللي يشوفكن أول ما يقول هذي نوره وهذي الجوهره ثنتينكن تحولتن وتغيرتن واييييد عن أول
نوره : مو وقت النقاش الحين بروح بشوفها ولي باااااااااااك
جواهر : محد مخربنج غير هالانجليزي مالج
نوره : هههههههه حاولي ترا ما بتقدرين تغيرين فيني بابا عايبنه طبعي
ميثا : حوووووووه خلصونا بسرعه ترا ورانا لعبه
عليا : هههههه اللي يسمع يقول وراها عيال هب لعبة مراهقات هههه
نوره : هههه يلا برد لكن بسرعه عن تلعبون وتخونون فيني
جواهر : ييبي وياج غرشه ما شي عندنا اهني غرش ماي
نوره : أوكي ..

ابتعدت عن البنات حسيتهن بيرمسون عني
ما ادري ليش حسيت بيقولون نوره وايد تغيرت آآآه شكلهم بعدهم مايدرون
مايدرون اللي فالقلب يضل فالقلب ولا يمكن يطلع ما يدرون همومي اليوم زادت ما قلّت مثل ما
يقولون

تقدمت من الحريم وشفت الجوهره فـ صوب قاعده روحها
ابتسمت للي قاعدين
حسيتهم مستغربين منّي أنا أو من وجودي ما أدري ليش ..؟ بس لازم كل هالسنوات بعيده عنهم لازم يستغربون
لهم الحق والله ما اعراضهم على استغرابهم لو انا منهم جان سويت مثلهم
بس حسيت وجودي أسعد الكل ,,, الكل كان مستانس من تواجدي وياهم
رديت لهم الابتسامه

حرمة عمي أم يوسف : نواري البنات ما يشربون جاي حمر ..؟
نوره : اممم ما أظن عموه ويانا بارد اهناكي
حرمة عمي أم يوسف : الله يا هالبارد اللي صار ما يفارق الثلاجات حتى فكل زاويه فالبيت

ابتسمت على سوالف الكبار لو يبدون عن سالفه يودون خط عاد
تمنيت هاللحظة لو أمي قاعده ومجتمعه مع عمتي وحرمة عمي جان حياتي غير ما بكون فـ هالحاله وتفكيري ما بيكون مشتت
رحت صوب الجوهرة
نوره : جوجوتي تعالي نلعب حراااااااام تعالي عشان خاطري
الجوهره بهدو : مالي خاطر والله
نوره : جوجوتي حرام تعالي دخيلج
لو انّي ما كنت بستفيد من هاللعبه كنت بقعد مع الجوهره بس أنا بستفيد منها وايد وايد
الجوهره : بعدج تتذكرين دلعي
نوره : أكيييييييد في وحده تنسى دلع تؤام روحها
الجوهره ابتسمت بهدوء : نونه
فرحت وايييييييييييييييييييييد محد يزقرني نونه نادر ما يقولون لي نونه الجوهره الوحيده اللي كانت تقول لي نونوتي استانست عن خاطر
نوره : أوكي جوجوتي تعالي نروح نلعب
الجوهره : مابا العب ما احب هاللعبه أكرهها والله
نوره : اوكي لا تلعبين بس ايلسي شوفيننا
الجوهره من بعد صمت دام لحظات حسيتها سنوات لأني قلت يمكن بتقول شي عن صمتها
عن حياتي يمكن عندها الاجابه

الجوهره : أوكي
زخيت ايد الجوهره رحت خذيت غلفة ماي شربت ربعها وخلّيت الجوهره تشرب منها
حركتنا ونحن صغار لازم نشرب من نفس الدبه نقول جذا يقوا حبنا أنا والجوهره لبعض
ضحكت والجوهره ابتسمت وبس

مرينا صديت وراي ما ادري ليش
شفت نظرات مرة عمّي صوبي حسيتها مستانسه ما ادري ليش ..؟ بس أكيد للجوهره
وحركت نظري شفت عمي وابوي جنهم يسولفون عنّي
وكانو عيال عمي بنفس الجهه بس اابعد شوي حسيتهم يطالعوننا مستانسين او يطالعوني أنا بالاحرى أكيد بيقولون الجوهره بترد لطبيعتها من بعدي

بس الله الاعلم الجوهره مو حزينه عشاني أحس في سبب ثاني ما اعرفه بس يمكن عشاني الله العالم
بس انا منو بيردني نوره .. منو بيرد نوره هذيك الحيويه الحبوبه الدفشه نفس الوقت ..؟
وصلنا صوب البنات قعدنا عالرمل

ميثا : حشا ما صارت روحه أعوذ بالله كل ها تأخير
نوره : احمدي ربّج يبت لج الدبه أصلا انتي ويا هالراس
ميثا : هههه يلا يلا نبدا

بدينا نحرك الدبه ونسأل بعض كل وحده تحاول تطلع اشيا مخبايه فـ حياة ربيعتها
بس انا مرادي ما تحقق للأأسف ما رمت اسأل السؤال اللي أنا أباااه ما قدرت

عليا : أنا تعبت بنش ما اروم اتم أكثر
قامت عليا شفتها فرصه مكان عليا يساعد وايد وحلو بعد
رحت مكانها بسرعه وقعدت
جواهر : غش أمييييه يلا نشي ردي مكانج
توهقت شو اقول انا الحين
نوره : الشمس حرقتني هناك على ويهي
جواهر : أي شمس ما شي ضو بعد
نوره : ما تشوفين الضو الفاتح على عيوني عيوني تعورني
وجيه لما أقنعت جواهر
بدينا نلف الدبه نلف ونلف ونسأل لدرجة حسيت الاسئله خلصت ومرادي ما تحقق بعده
فجأأأة وقفت الدبه المكان اللي أنا أباه يااااي الحمدلله يـــــــــارب الحمدلله

نوره : اممم يا ربيييييييه شو أسأل
جواهر : خلصينا بسرعه
نوره : امممم منى انتي كيف حبيتي يوسف أو بالأحرى شو سالفتكم ..؟
منى : شكلها السالفه وايد هامتنج
نوره : اممم نوعاً ما ... تقدرين تقولين فضول عيبتني قصتكم
منى : الله يسلمج فيه مره كنت رايحه بيت قوم ميثاني ويا جواهر وعيال عمهم كانو هناك
وكانو مسويين عزيمه وجان بالغلط أطلع يدام يوسف ومن جذا بدت قصتنا
نوره : آهاا شي طيب

يعني شافها وشافته هاك اليوم يا ربييييييه بس يوسف ما يحب العزايم ليش راح ليش ..؟
يمكن مكتوب هاليوم يحبون بعض منى ويوسف هي ليش لأ
ولعبنا بعد بس للأسف ما يتني فرصه ثانيه عشان أسأل منى وتعبنا
ع الساعه اربع ونص نشينا رحنا صلينا العصر هاليوم وايد أخرّنا صلاتنا
لدرجه عمّوه حفصة يت صوبنا تباغم نشو صلو ونشو صلو ههههه
طول الوقت كنت أحس روحي أحسد منى زياده وزياده ليش خذت يوسف منّي حرام عليها
بس يوسف يمكن ما يحبها أكيد يوسف ما يحبها يحبني أنا

كيف يحبني ..؟
وهو لا داري عن هوا داري واراضيي وأنا اللي صار لي سنوات قاطعه وما اسأل عن حد
عقب جذا ع الساعه خمس الا ربع البنات قالو لازم نقطع نبا نخمّس وجذا
جان باباتيه و يوسف كل واحد أدرى عن الثاني فسواقة البر أنا ركبت ويا بابا وبصراحه كان ولا اروع
ما اخاف يوم اركب ويا باباتيه لو وين نكون أحس معاه بأمان وعقب ما نزلنا مدوخات هههه

قال عمّي لازم باباتيه و يوسف يسوون حركات بالسياير
بس هالحزة الظاهر قوم منى روحو أحسن
هالحزة شفت مانع يركب السياره والشباب سلمّو عليه ماشالله عليه كامل والكامل الله
بصراحه بغيته يتم بس للأسف ابا منى تروح ماباها تتم
وراحو أهل ميثاني اللي هم عيال عمهم عددنا قل ما بقا غيرنا نحن و عيال عمّي وعمتي
الشمس خفّت... الجو روعه.... في ضو شمس بس خاااااااااااافت وايد وحلو الساعه 5 ونص تقريبا
أول شي يوسف ركب السياره ماشالله عليه تم يلعب بها لعب جنه بلاي استيشن خفت عليه وايد
عقب باباتيه قال بيتحدا يوسف يوسف نزل وبابا ركب السياره قالو لازم تكون نفس السياره
وباباتيه تم يلعب بها لعب وأنا خايفه الصراحه خفت عليه أكثر عن يوسف
وماشالله عليه مو بس جنه يلعب بها يلعب فـ ابوها وابو اللي يابها لدرجه يوم السياره صعدّها على عرقوب عود قلبي بغا يطيح
مو بس بيطيح الا طاااااااااااح من مكانه خلاص
وعقب بابا ياه صوبنا بالسياره ونزل

باباتيه : ها شو رايكم ..؟
يوسف راح صوب بابا وتخاشمو
يوسف : يا حييك والله
عمّي : انت الوحيد اللي تقدر على يوسف
باباتيه : أكيد عمّه أنا تربيتي يسوف صح

وغمز ليوسف ويوسف ضحك وياه حسيت علاقة يوسف فــ بابا وايد قويه وايد
والظاهر دوم السباقات تكون بين باباتيه ويوسف... سيارات،، كره... كل شي ...بس متفقين دوم
الله يديم المحبه بين الجميع صحاني من تفكيري وتحليلي لشخصيات كل من حولي صوت ..

............: لا عاد أنا أبا راي نواري فـ سواقتي
جواهر : أأأأأأأأأأ ......قبل كلّه تاخذون رايي الحين يوم يت نوراي تاخذون رايها نسيتوني
نوره : هههه باباتي أنا
باباتيه : ها شو رايج
نوره : طرطريشن والله ... أثرك خطير وأنا ما أدري
عمّي : ترا ابوج يسو اخس عن جذا
نوره : أووووه هو جذا بس أنا قلبي طاح لو أكثر الله يستر
عمي : ههههه بنات ترانا بنتعشا اهني
ميثا جنها مب جايفه خير : صدق
عمي يقلدها : هي صدق
نوره : ههههه وناسه طلعتكم والله
عمتي أم حمد : دوم نقول حق ابوج ييب نوره وييبها يقول ما تبا
نوره : ههههه ها قبل الحين خلاص كل يوم بيي

شفت صوب يلسة الرياييل الشباب مشغولين بسوالفهم
رحنا أنا جواهر وميثاني نصلي المغرب لأنه أذّن عليا والجوهره راحو رواحهن ما بقى من الحريم غير عموه ومرت عمي

صلينا وعقب سرنا صوب البارد وهالسوالف خذينا لنا اأشيا ورحنا قعدنا على عرقوب صغير شوي
شفت صوب الجوهره قاعده هاديه ويا عموتي وحرمة عمي أما عليا راحت السياره ترمّس خالد أكيد
ونحن نرمس شفت صوب الأهل مرّه ثانيه ما ادري ليش

شفت يوسف وياسر وحمد وفهد وعموري فديته قاعدين ويا عموتي وحرمة عمي
أما عمي و ابوي و ريل عمتي قاعدين يسولفون و عدول وعلاوي قاعدين يمبهم فديته عدول يحب علاوي وايد ويحتك مع الناس بسرعه
كان فخاطري أعرف عن شو يرمسون الأولاد ويا عموتي وحرمة عمي فيني فضول
أكيد يوسف قاعد يحدد يوم ملجته خطوبته شي جذا ... غرت وايد
يلا بسأل عموري يوم نرد البيت .. شو اللي بيصبرني الين نرد البيت
قطع علي تفكيري صوت ميثاني وهي تقول

ميثا : نوّار نوّار شفتي منى
سدّت نفسي بـ هالطاري شو ياب طاريها بعد هاي الثانيه
نوره : بلاها منى بعد ..
ميثا : بلاج ..؟
نوره : ما شي فيني رقاد
ميثا : لا بس شفتي عيال عمّي هالحلوين ..؟
نوره : كان فيه وايد حلوين .. تقصدين منو بالضبط ..؟
جواهر : ابييييييييه مغازلجيه نورو
نوره : ههههههه أتمصخر تراها هاي بنت عمتج ذالتنا كل الشباب عندها حلوين ماشي واحد خسف هههههه
ميثا : لا لا .. اللي كان لابس اسود وابيض
نوره : هيه جفته يوم يركبون سيايرهم
ميثا : تعرفين منو هاااه انزين ..؟
نوره : لا ما اعرفه ما حصل لي الشرف بعدني
ميثا : هذا يوسف
انصدمت : هاه يوسف ... منو يوسف ..؟
ميثا : يالذكيه .. ها يوسف ولد عمي اللي جاف منى يوم العزيمه وصارت السالفه
نوره : صدق ها اللي تحبه منى ويحبها
ميثا : هي في يوسف غيره .. يوسفنا هب خاطب
نوره : لا لا .. صح
جواهر : بلاها البنيه ..؟
ميثا رفعت كتوفها بمعنى اش دراني
نوره : هههه هي أنا عبالي هي تحبه وبس .. لكن طلعت خطيبته
ميثا : هي ولا شقايل تعلن قصة قيس وليلى يدامنا
نوره : هههه صدقج

هالحزة ردت لي الروح حسيت المياه رجعت لمجاريها ارتحت نفسياً جسدياً ..كل شي وكل ظلع فيني ارتاح كأنه هم وانزاح من علي
خلاص بعيش حياتي مستانسه خلاص يوسف لي أنا وأخيراً السعاده فتحت لي أبوابها وأخيراً بنسى همومي ومشاكلي وبعيش حياه يديده
بقلب صفحتي الجديمه وبفتح صفحه يديه بيضا بمليها الوان و ورود
تعبت من اللون الرمادي كان عام فــ حياتي كان مسيطر علي بس اليوم خلاص حياتي تلوّنت

ييييي يتني الضحكة على أفكاري الغبيه اللي راودتني اليوم ع الفاضي خرّبت طلعتي وسويتها
هم ونكد دوم أنا جي أسبق الأحداث ..
حرام علي ظلمت منى بأفكاري فقيره البنيه مالها ذنب بس أنا اللي أتسرع يلا الله يهنيها مع يوسفها
ويهنيني مع يوسفي هههه

تنهدت عن خاطر عشان أطلّع الهموم اللي بداخلي
وأنا أدعي انشالله هذا آخر يوم بعيشه جذا انشالله من اليوم ببدا حياة يديدة لازم أغير سستمي وروتيني وأعيش حياتي مثل الكل


فجأأأة فزعت
ميثا : حووووووه
نوره : هاااااه بلاج ..؟
ميثا : بلاج تتنهدين ..؟
جواهر : جنه هموم الدنيا عليج
نوره : ههههه لا بس من البرد حسيت روحي بختنق

بالفعل يا جواهر هموم الدنيا علي بس أنا بحاول أني أشلّها من علي وأنساها او بالاحرى اتناساها

خلاص تعبت من كثر الهموم بجرب أعيش يوم بدون هموم شو بيستوي بي آه يا يوسف ما تدري اش كثر عذبتني وياك اليوم مو بس اليوم دوم انت جذا دوم

ميثا : بناتات قمنا نروح صوب ماما وعموه..
جواهر : هي هي هي ارمسي جذا من أول عسب تشوفين يسور يا أم اللقاءات
نوره : ههههه قصدج أم السعف والليف هههه ميثاني

ميثا كشّت علينا : مالت .. أصلاً ما عندكم نظر أنا أم الذوق كلّه لو تدرون يعني
جواهر : هههه ضحتكيني .. بس نورو عليها أوقات تعليقات تسكّت بصراحه

ميثا تترجى : يلا حرام قمنا دخيلكم الله يخليكم ويزوجكم للي تتمنونه ..
جواهر : أنا أبا فهييييييييييد هذا عسب أأدبه الصايع
نوره : هههه وأنا أبا واحد ييي لي وأنا في غفله وأمّس الحاجه له ،،وهو على خيله

ميثا : جوجو تراج وايد تحلمين انّه فهود ياخذج وهو يعرف طينتج هههه ، وانتي نورو عنسي عقب فأحلامج بيي ها اللي قاعده تتمنينه

نوره أهز راسي بالنفي : هأأأأ هأأأأ بييني اليوم قبل باجر صدقيني هههه
جواهر : وانا بخطف فهود وبخليه يوافق انّه نعرس
ميثا : حشا بنات آخر زمن لا يستحن ولا يحشمن
نوره : هالله هالله يعني انتي اللي تحشمين .. أقول جوجو خلاص ما بنروح صوب قوم ماماتج

جواهر : أوكي نواري .. وبعدين اش لنا فـ بعض الناس خل يروحون روحهم جنهم رزه هههه ونحن ما بنسير
نوره : عفيه عليج شطوره جوجو
ميثا وقفت : ماااااالت عليج انتي وياها وع ع ع أصلاً محد يطلب منكن شي

نوره : يعني انتي اللي ينطلب عنج هااا ..؟
ميثا : بروح روحي أحسن لي هه قومو عنّي
جواهر : اشوفج تحركي زين

ميثا تجدمت .. طالعتها ... ميثا بتسويها ... ميثاني جريئه وعادي تقول حق ياسر أحبك يدام الخلق كلّه
نوره : شو هاي خبله عادي عندها رايحه صوبهم
جواهر تحرك ايدها بمعنى اتريي : تريي وشوفي
نوره : أوكي

تمينا نراقب صوب ميثاني تجدمت وايد وقربت لهم صدّت وشافتنا ابتسمت ابتسامة نصر
نوره : ابييييييه طالعيها وصلت لهم
جواهر : تريي انتي شوي

ردينا نطالع ميثا أول ما قربت عنهم شوي راحت خذت بوطل ماي وردت ريوس بسرعه ويت صوبنا

جواهر : ههههه يالردييه رديتي ها وين ميثاني القويه أونها عاد
نوره : ههههه وأنا أقول ميثوه جنها رايحه بـ تقول له أحبك وتعال اخطبني هههه

ميثا : مالت عليكن محد يتمسخر وياكن .. أوووف عُقد انتو من يرابعكن أصلاً مدري كيف أنا مستحملتنكن وقاعده وياكن

جواهر : لو هب عايبينج نحن اجلبي ويهج هب لازم تقعدين ويانا
ميثا : لا لا القعده وياكن أحسن عن القعده ويا العيايز ههه .. ولا جوجو وعلايه أم العقد هاييل

جواهر : عاد صخّي وبلاها الرمسه الزايده علينا مفهوم
ميثا : مفهوم ماما لا تعصبين خخخ نورو بلاج صخّيتي انتي الثانيه
نوره : تعالو نرقد ع الرمل شوي
جواهر : فكره يلا... والله طرطريشن
ميثا : لا لا ,, هب ناقصه يدخل فـ شعري رمل ويقمل هههه

نوره : لابسات شيل نحن عادي يلا عاد بلا دلع
جواهر : ترا ميثوه ما تغسل شعرها عدل عسب جذا تخاف يقمل هههه
ميثا : جوجو ان ما صخيتي قسم بالله بــ هالرمل ع عيونج

جواهر : يا أم قمل انتي هع هع ها اعترفي يلا
ميثا : اللي على راسه بطحه يتحسس بها يا أم القمل

جواهر : شو دخل المثل فـ سالفتنا ها ولا تتهربين
ميثا : جب جوجو عن المصاخه لا افلعج بنعالي الحين

نوره : وع ع ع لوعتن بجبدي انتي وياها غيرو السالفه ولا بقوم
ميثا : اونها تهددنا عاد ,, خفنا ترانا

جواهر : ارمسي عن السالفه لمّا نخليها تزوع ههههه
ميثا تدق بصدرها : أفا عليج أعجبج أنا ..

قمت من مكاني بثقه وطالعت صوبهن بنظره غرور وتخصرت
نوره : تمّو رواحكن ويا سوالفكن اللي تلوع الجبد شراتكن أوكي .. أنا سايره أحسن لي

ميثا :سيري شو يعني
جواهر : ع بالها تهددنا هالثانيه ويا شكلها

تحركت عنهم ومشيت وابتعدت عنهم شوي سمعتهن يزقروني بس طنشت يلا هم اللي قالو لي سيري عادي وأونج تهددينا خل يستحملون الحين

قعدت ع الرمل بتعب آ ه آ ه آ ه والله تعب الواحد يصعد على عرقوب لو كان صغير بعد يتعّب الصعود
شفت تحت آثار أقدامي ياااي حلوه الصوره للاستهبال

تميت أناظر حولي كلهم تحت بس أنا اللي فوق وااااو الحياه حلوه لو عشناها بحلاوه ولو العكس نحن اللي بنتحمل نتايج أفعالنا

طالعت صوب عموري بعده ويا الشباب ماشالله عليه الله يحفظه الحين هو فـ الصف الخامس وقاعد ويا الكبار عاد يوم يكبر صدق بيقعد ويا الشواب شكله هههه

شفت علاوي وعدول قراب عنّي شوي

نوره : عدول علاوي تعالو صوبي
عدول وعلاوي لفو يبون يشوفون وين مصدر الصوت

نوره : أنا نوره ... تعالو اهني صوبي
عدول ركض وعلاوي سوّا نفسه يو ركض صوبي

وتمو يركبون العرقوب نزلت أنا عشان أساعدهم وكل شوي كنت أتزحلق وأطيح وأوقات أنجو هههه وأطالع صوبي ليكون في حد شافني فشله
وركبنا فوق قعدنا ع الرمل

نوره : يلا يا شطار كل واحد يقول عن مدرسته سالفه يلا اطربونا
علاوي : ما نحب المدرسه نحنا انتي ليش تقولين جيه
عدول : هي كل يوم نروح المدرسه حتى فـ الاجازه انتي تقولين مدرسه

نوره : ههههه خس بليسكم وانتو صغار تفكيركم جذا عاد يوم تكبرون شو بيصير
عدول : أنا بصير مثل باباتي ريال عود وأشتغل
علاوي : وأنا بستوي نفس يوسف لأنه نفس عمّي خليفه .. صح عدول

طالعتهم هاييل حياة الطفوله يا حلاتها بس نفكر فألعابنا وشو بنصير لمّا نكبر
بالفعل هاي حياة الطفوله أكبر همومنا ألعابنا ... بس لما نكبر نعرف انّه الالعاب كانت أحلى هم فحياتنا لّما نشوف الهموم اللي هي بالفعل تستحق ينقال لها هموم

تذكرت مره دشيت منتدى كان فيه عضوه حاطه توقيعها
الطفل يقول : ماما أبي هم ,, حليله بعده ما يعرف انّه الهموم ماتت بها ارواح ..

بالفعل عجبني كلامها وايييد ... حلوه حياة الطفوله بس لو نعرف شو مخباي لنا بعد الطفوله جان كرهنا الطفوله وابوها .. نعمه من رب العالمين انّه ما نعرف باجر شو بيستوي بنا ..

وعاني من تفكيري صوت عدول وعلاوي وهم يباغمون خوفوني وايد

عدول خايف : نوراي عقرب عقرب صرصور عود
علاوي يرتجف : نواري ازقري بابا بسرعه بسرعه عقرب

شفت صوب العقرب خفت حسيت روحي بيغمى علي ابتعدت ومعاي علاوي وعدول وتميت أباغم وأصرخ بأعلى صوتي وأنا أطالع صوب العقرب عسب ما يضيع عن عيني

نوره وأنا ارتجف وخايفه: بــــــــــــابــــــــــ ــااااااااااااا تعال بسرعه عقرب عقرب

شفت صوبهم بابا والشباب يايين بسرعه صوبنا عسب يشوفون العقرب لأنه ظلام وكان وياهم التورج ( البيجلي )
كنت خايفه لما حسيتهم يمبنا خفت عليهم زياده

قبل شوي كنت قاعده اهني ع الرمل لو العقرب لدغني شو كان بيستوي بي
يمكن كنت بموت أحسن عشان أفتك من الحياه
لاه بس بابا وعمور وعدول محتايني ليش احرمهم منّي وأنا ذقت مرارة الحرمان ليش أذّوقها لغيري

شفت صوب الأولاد يسألون وينه العقرب
أشرت على مكانه وأنا خايفه : اهني محد يجرب صوبه

بابا حطا الضو عليه وشافه
جان يروح صوبه زياده تقرب عساس بيذبحه
نوره : لا بابا لا تجرب صوبه

بابا تجرب أكثر وقال لي اسكتي وحق اللي حولنا بعد
قرب منّه وايد

لا اراديا دموعي نزلت وخفت وايد على بابا حرام نحن محتاجينه ليش يسوي جذا

قلت بدموع وأنا ارتجف : بابا نحن نباك حرام عليك لا تحرمنا منّك وقسم بالله اذا استوا بك شي بفر روحي ع العقرب هذا

شلاه بايده اهني الصاعقه
تعديت كلهم ورحت له ركض حضنته
نوره : أبـــــويه ..


شموخ بنية غير متواجد حالياً   رد مع اقتباس