[شموخ بنية]

الحلقه الرابعه ..



باباتيه تم يضحك

استغربت طالعته وحضنت ايده بايدي قلت اذا بيموت بموت وراه ما استحمل العيشه من بعده

ابويه تم يضحك بصوت عالي وعيال عمّي وعمتي بعد ضحكو والبنات كانو جراب عنّا

طالعت ابويه : بابا فيك شي
ابويه : هههههههههههههه نورو طلعتي خوافه

نوره : بابا بلاك العقرب وين راح ..؟
باباتيه : ها مب عقرب نورو منو قال لج عقرب
نوره : عود شكله يشبه العقرب ... حتى عمور وعدول قالو جذا

باباتيه : الحين انتي تصدقين اليهال يوم يقولون ها عقرب

قفطت عن خاطر غير انّه الشباب يو صوبنا عسب يساعدونا وهناك آخر شي هب عقرب والله فشله انحرق ويهي

نوره : انزين أنا اش دراني اذا ها عقرب ولا لأ ما جد شفت عقرب فـ حياتي
باباتيه واللي حولي ضحكو حتى ميثاني وجوجو
باباتيه : صار خير بس المره اليايه مب تباغمين وتخوفينا عليج سمعتي

نوره : ها يزاي الحين يوم انّي خفت عليك كنت بجتل روحي وياك ترضا ادش النار
فهد : ههههه عمّي بصراحه عندك بنت مضحيه يا حظك ,, هب أبوي الله باليه ببنات لو شافو قطو يفرونا عليهم هههه

باباتيه : طبعا هاي نوار هههههه
ميثاني تخصرت : لا والله الحين أنا اللي جيه
نوره : وقته المثل الحين ..اللي على راسه بطحا يتحسس بها

ميثاني بتوعد : على آخر عمري فهود يرمس عنّي جذا هيين ..
بس ميثا صخّت لما طالعت نظرات حمد لها حمد انسان ما يحب المزح هاك الزود انسان جاد وايد فـ حياته

يوسف : يلا شباب شكله الكباب بيحترق
باباتيه : هي نورو ويا عقربها نستنا

ضحكنا وأنا بعد ضحكت على غبائي هههه والكل رد لوضعه الاولي وقعدنا نحن البنات ويا عمو وحرمة عمي لأنه خفنا بصراحه ههههه

تمينا نسولف ونسولف لما ملينا نحن البنات بعد صلاة العشا رحنا رفعنا سيتات الجمس مال عمّي لأنها وسيعه من ورا وايد وهي مب مال طلعات بر لأنها تغرّز وايد

ميثاني قعدت يدام مكان السايق سووت روحها تسوق
وعلايه يمبها أونها حركات دلوعه ونحن ورا فاستراحتنا هههه

جواهر : حوووه راجو سوق عدل
ميثاني : ماما راجو فـ عين مال انتي الحين كلاس أنا زوز مال بنتي مال انته
جواهر : سوق وانت منطم

علايه : ماما لا ترمسين ريلي جذا حرام عليج
جواهر : والله لو انج طالعه على اختج الجوهره وخذيتي ولد عمج جان صرنا مليونيرات بس هب عقلج ها الراقد

علايه : ماما كل شي نصيب عاد
ميثا : ماما لا تسويين قرقر واجد بعدين أنا مافي يقدر يشوف طريق

نوره : راجو ايب هادا مااماا
جواهر : انتي سونيا اسكتي أخاف باجر تاخذين ولدي بعد

نوره : فكره واجد هولوه مدام
جواهر : وانته أول قبل ما تاخذ بنيتيه لو انّي اباغم تشوف الدرب الحينه يوم خذيتها ما تقدر تشوف الدرب مره وحده ياااااااااالخرط عاد
نوره : آه آه آه ملل يلا عاد بنات بلاها هالسوالف والله ملل

علايه : ههه هي من الملل سوينا االمستحيل صدقج
جواهر : لو هب عايبنكن انزلو برايكم
الجوهره نزلت على طول وراحت صوب عمو وحرمة عمي

ميثا : صدقها ان ما تدلن .. ترا شي اربع بيبان ودبه عوده عسب تنزلون
علايه فونها رن أكيد هذا خلّود

ميثا : حبيب القلب دق ونزلت .. وانتي نواري من بيدق عليج عسب تنزلين
نوره : مليــــــــــــــــقه .. انزل احسن لي

رحت قعدت يمب الجوهره ابتسمت لي رديت لها الابتسامه
يدامنا كان فيه نار وتدفي الواحد عدل

كنا أنا وجوجوتي .. هب جوجو المصرقعه هذيج.. المؤدبه جوجوتي أنا والشيطانه جوجو ميثاني ... قعدنا أنا وجوجوتي نتدفى يدام النار

نوره : حلوه النار صح
الجوهره : بس نار جهنم غير
استغربت أنا قصدي ع الدفا ليش جلبت السالفه
نوره : هي هذيج تعذب وايد وتحرق أخس عن نارنا العاديه

الجوهره : طالعي طالعي
طالعت صوب ما تأشر الجوهره شفت عموتي راحت تركب السياره ووياها حرمة عمي
نوره : جيه سوو جذا

الجوهره رفعت جتفها بمعنى ما تدري
نوره : بشوفهم وبرد لج
الجوهره هزت راسها بمعنى أوكي
رحت صوب السياره شفت عموتي وحرمة عمي

حرمة عمّي نزلت الشباك حقي وابتسمت لي رديت لها الابتسامه
حرمة عمي : هلا نواري بغيتي شي
نوره : لا بس جيه ييتو السياره .. تعالو اقعدو ويانا
عموتي : توكم يالبنات تتذكرونا هههه

حرمة عمي : صدقها من الصبح رواحكن.. وأونكن ما نبا نقعد مع الحريم
نوره : عاد بنات انتو ادرى
حرمة عمي : ندري فديتج .. بس برا برد عسب جذا دخلنا نتدفا وبنرد لكم
نوره : اوكي بسير عند الجوهره

وابتسمت لهم لفيت تقدمت صوب الجوهره بس فيه واحد قاعد ويااها .. أوهو علينا الحين بقعد ويا منو وشاللي قعدّه ويا الجوهره وقفت مكاني افكر وين بقعد
بس سمعت صوت اللي قاعد يمب الجوهره ومعطيني ظهره يقول

..........: نواري تعالي أنا بنش
زين الحمدلله ورحت صوب الجوهره قعدت يمبها
نوره : شو يبا ياسر عنج
الجوهره : شافني روحي قال بيقعد وياي قلت له نوراي وياي
نوره : آهـــاااا

شفت ماشي فايده من الجوهره ابد ما تناقش جان اقول ارمس أنا وخلها تسمع
نوره : ترا عمو وأمج فالسياره لأنه برد وايد
الجوهره : هي برد
وبديت ارمسها عن الدراسه لأنّه محال بترمس عن شي ثاني ما ادري ليش ..؟
سولفنا وضحكنا ولعبنا وتعشينا ومن بعد ما لمينا أغراضنا وحطيناها فالسياير كل واحد ركب سيارته

على آخر شي سلمت على بنات عمي وعمتي

عمتي : تعالي ويانا انزين اليوم ارقدي عندنا من زمان ما رقدتي عندنا

جواهر : لا لا لو تبا خل تيي عندنا هي بيتنا ما طبته انتو عالأقل اسبوعياً تيي عندكم
فهد من سيارته : حسد أعوذ بالله حسد
جواهر : لا صدق نواري بيتنا حرام بيتنا
ميثا نزلت من السياره : لا بيتنا بيتنا

باباتيه نزل من السياره : لا بيتكم ولا بيتهم بترد البيت وياي اباها فـ سالفه
الله يستر شو سالفته بعد .. شو يبا بي باباتيه

جواهر : خبريني السالفه اوكي نواري
ابتسمت على خبال جوجو

ميثاني : لا بتخبرني أنا قبلج صح نواري
جواهر : لا أنا قبل سمعتي .. صح نواري
ابويه : لا انتي ولا هي .. سالفه بين بنت وابوها انتو ليش رازات فيسكن

باباتيه يعامل الكل حسب سنهم جنه فـ عمر الكل ابد ما يتشدد هاك الزود بس ان دقّت فـ راسه محد يمنعه عن الللي يباه هذا بابا باختصار

فهد : هههه قفطه انتي وياها .. يلا كل وحده تركب السياره وفكّونا ترا اليوم سبت باجر ورانا جامعه ودوامات

جواهر بصوت واطي محد سمعها غيري أنا وميثاني
جواهر : أقول لكم ابا أكسر خشمه ها ,,, شوفو شو بسوي به .. وبخليه ييي لين عندي روحه
بس للأسف باباتيه بعد سمع
باباتيه : بنشوف منو بيفوز قطوتنا ولا فارنا أوكي

جوااهر قفطت عن خاطر أنا بعد بصراحه قفطت تخيلت لو عمّي يسمعني أأأه هههه بقفط
وركبنا السياير كان منهد حيلي رقدت على طول فالسياره من التعب وايــد تعبت

ما حسيت بالوقت الا لمّا بابا قومني من الرقاد
باباتيه : نواري ماماتي قومي وصلنا البيت

طالعت حولي نحن فالبيت الحين قمت بتكاسل وتحركت وأنا اير روحي فيني رقاد من بعد يوم شاق ومتعب ملئ بالمغامرات وحلو نفس الوقت ممل بعض الشي ومضحك أغلب الوقت

دخلت حجرتيه بتكاسل أبا افر روحي ع السرير بس أنا ريحتي فحم ونار بمرض لو ما تسبحت
دخلت الحمام على طول وخذيت لي دش ساخن لبست وطلعت شفت شكلي مبين علي التعب من بعد يوم متعب وحلو نفس الوقت

فريت روحي ع السرير حسيت منهد حيلي خلاص فيني رقاد ما استحمل أقعد ثانيه وحده زياده
ما حسيت بروحي الا وحد قاعد يمط بطانيتي

فتحت عيني بكسل طالعت يميني ويساري ما شفت حد فركت عيوني ما شفت حد تخرعت
بس ما حسيت الا وحد ينط فوق السرير

نوره : آآآآآآآآآآآآآآآآآآع
جواهر : ههههه مفاجأه حلوه صح

نوره : غربلاتكن شو اللي يايبنكن هالحزه ..؟
ميثا : اذا ما تبينا عادي بنرد بيوتنا ترا ما فيها شي غير انه بنزعل
جواهر : أميه نشي ترا الساعه 1 ونص الظهر لو الضحا قلنا هي بس الحين الظهر ماماتي

قمت مفزوعه : هاااااااااه وحده الظهر
ميثا : ونص
قمت بسرعه : البيت بيتكم سوو اللي تبون تسوونه

خذيت ملابسي ودشيت تسبحت طلعت ما شفت جواهر وميثا صليت وكشخت لأنه البنات عندي اليوم لازم أكون كاشخه حطيت ميكب نعوم وخفيف بس جحال وبودره وقلوس لأنه بابا ما يحب أحط وايد يقول جذا أحلى علي لأني أشبه ماماتي وايد آه آه مع هالذكرى ....بس أيام الأعراس برايي اللي أبا أسويه أسويه

نزلت أزقر جواهر وميثاني دورت عليهن ما حصلتهن
نوره : جوجو ميمي وينكن ..؟
محد رد عليه

نوره : جوجو وصمخ وانتي يالعنزه ميمي أحيدج تسمعين سماسيم البيت بعد.. ردو علي وينكن ..؟
نوره : أووووووف صدق مذله هالبنات والله يحشرون الواحد

تجدمت من المطبخ أول ما دشيت المطبخ شفت شي .. الله لا يراويكم جوجو وميمي يساعدون اسيل يوم تطبخ الغدا

نوره : أبوي بنتسمم اليوم شكلي بموت
جواهر : بتاكلين أصابعج عقب الغدا صدقيني
ميثا : المهم راي خالي ما نبا رايج سمعتي اوكي

نوره : من زين اكلكم الحين آآآه .... زين ييتو عندي اليوم
جواهر : هي زين وايد .. وهناك الحرمه ناسيه انّه عندها ضيوف فالبيت
ميثا : صدقج مودرتنا رواحنا ولا جنها هي راعية البيت

نوره : ههههه تعالو متى ييتو انتو ..؟
جواهر : الساعه وحده بالضبــــــــــــــــط
نوره : شي طيب .. انزين وين عمور وعدول ..؟

جواهر : الله يسلمج عمور راح ويا عمي شركتهم هاي مال ال****ات
نوره : قصدج مكتب ال****ات
جواهر : هي هذا اللي يقولون له شركة عمي مادري المهم عموري راح وياه

ميثا : يا ريــــــــــــــــت لو خالي عنده شركة ****ات عوده ..جان يوميا أنا منقطه في دبي مول
نوره : ههههه الله يغربل تفكيرج .. والله لو جذا عاد فلوسنا كلها خلصت .. وعدول وينه ..؟

جواهر : راح بيتنا يلعب ويا علاوي
نوره : حرااام بيطفر بأمج حليلها روحها تعبانه من طلعة أمس

جواهر : اش دراج أمي تعبانه هااا ...( بمكر) ولا ترمسين يسووور من ورانا ونحن ما ندري
ميثا تباغم : جــــــــــــــــب جواهر الطفسه .. وانتي نورو لو سمعتج ترمسين يسور بذبحج تراني

جواهر : بسم الله الرحمن الرحيم بلاها هاي
نوره : ههههههه تغار على بعض الناس ... وانتي جوجو حسني الفاظج فاهمه يالغبيه هههه وبعدين أنا شو ابا في يسور وانا ما صار لي غير يومين شايفتنه

جواهر : عاد يسوف ..؟ صح! .....ولا اش دراج فأمايه انها مريضه ها ..؟
نوره : أمسات كان ويها محمر وايد ويوم بستها كانت مسخنه يالخبله

جواهر : حشى مب حاسه .. شو حاسه سادسه عندج انتي ..؟
نوره : قل أعوذ برب الفلق ..عن الحسد أميه مب ناقصه أنا

ميثا : جوجو الحقي عالعيش مالج
نوره : هههه مريحيني اليوم ما بساعد اسيل

اسيل ضحكت كانت مستانسه على سوالفنا حليلها فقيره على نياتها اسيل ما بتفتّن عنّا
ع الساعه هنتين ونص طلعنا من المطبخ قعدنا فالصاله أنا وميثاني تمينا نطالع مسلسل و جوجو على طول راحت صوب اللاب عسب تحدر الايميل

قعدنا نسولف نطالع تلفزيون نفس الوقت ع الساعه ثلاث تعبت من كثر ما اتريا بابا غير انّي يعت وايــــــــــد

لهالدرجه مب حاس فيني ما قال يتصل بعد حرام عليه ويمكن هاي آخر سنه بكون موجوده في مثل هاليوم فــي هالبيت عقب يمكن مثل هالايام بكون فالجامعه حرام بابا افهمني دخيلك
وقفت يدام الدريشه العوده اللي فالصاله طليت على حوينا ما شفت سيارته

اتصلت فيه وايد حتى جواهر وميثا اتصلو وياي ما رد
الله يستر وايد خايفه عليه

قعدنا نتريا ونتريا اتصلت على عموري بعد ما يرد تعبت وايد نفسياً
اتصلت على مكتبه بعد ما يرد اتصلت عالشركه على قولة جواهر بعد محد رد علي أكيد الدوام خلّص هالحزة

نوره : بنات أنا خايفه وايد
ميثا : هدّي نواري انشالله خير بس انتي لا تخافين
نوره : محد يرد علي لا بابا ولا عموري

جواهر : يصير خير تعالو نتغدا نحن لأني يعت وايد
نوره : وباابا .. والحل بنات ..؟ حرام فكرو في شي أبا ارمسه
جواهر : اتريي بتصل في يوسف يمكن عنده

نوره : هي بسرعه دخيلج شوفي اذا عنده
طالعت جواهر وهي تضغط ارقام التلفون بتوتر أكيد هي بعد متوتره شراتي
ترييت فالبدايه ما رد عليها يوسف عقب ثواني رد

جواهر : هلااا يوسف ......... انزين هاي نواري تسأل عن عمّي وينه ........... أوكي خلاص ............اسأله ما نترياه ..........أوكي خلاص ............مع السلامه

نوره : هااااا شو يقول بابا عنده وهم وين ..؟
جواهر : هههه شوي شوي عمّي ما بيطير هي باباتج في بيتنا هو وعموري وعدول
نوره : آهاا يلا نتغدا انزين

رحنا يبنا لنا الغدا وحطيناه عالسفره وشغلنا التلفزيون وتمينا ساكتين ونطالع الفيلم كان مرعب وايد بس انا ما همّني الفيلم أنا اللي يهمني حرام عليه بابا في مثل هاللحظه وهالوقت يودرني ليش يسوي جذا حرام عليه ... لو أدري انّه أهله ينسونه بنته جان ما وافقت اروح عندهم من الأساس

وقطع تفكيري لقطه مرعبه فالفيلم واندمجت مع البنات عقب الغدا .. ما كملنا الفيلم وايد يخّوف رحنا ودينا المواعين المطبخ عقب صلينا العصر
بعد صلاة العصر طلعنا فالحوي الباب العود كان مسكّر قعدنا عالحشيش وتمينا نسولف

الجو كان روعـــــــــهـ ما فيه شمس الجو مغيّم وبارد... الشتا وايد حلو أحبه
سولفنا واستانسنا عقب دشينا داخل لأنه برد
شغلنا الدفايه وميثوه هالمره ما قعدت ع اللاب هالمره جوجو قعدت

نوره : حشا شو من ناس انتو ما تملون من هالنت
جواهر : الغبي اللي يمل منّه
نوره : الله يكملكم بعقلكم والله متفيجات
ميثا : بنات دشيتو أمس المنتدى
نوره : لا أنا ما اتفيجت أدش أمس أصلاً ما أدش وايد حتى يتومه ما تدش وايد
جواهر : أنا مطيحه أربع وعشرين ساعه حادره المنتدى هع

ميثا : المدير والمراقبين والمشرفين والأعضاء ..........
نوره : ناقص تقولين وين بيوتهم هههه
ميثا : المهم لاعت جبودهم من جوجو هههه متعرفه ع الكل ما خلّت حد

نوره : لا حلاته أصلاً يوم تكونين مجهوله يا ماما
جواهر : كل واحد ورايه تعالو تعالو شي فلكر خاص بالمنتدى
ميثا : صدق والله واخيراً

نوره : ونــــــــاســهـ بنحط أي شي بنصوره اهني وااااااااو شكلي بحط صور طلعة أمس مال البر ... الصور طر
جواهر : لأ .. أنا بحطهم
ميثا : لا انتي ولا هي أنا بحطهم فهمتو

نوره : خلاص لا انتي ولا هي ولا أنا بعطيهم حق بنت ييرانا تحطهم ههههههه
ميثا : ليكون منوووه
نوره : لا لا شو دخل منى فالسالفه ..هاي وحده ثانيه

نوره : ممكن اللاب شوي جواهر
جواهر : هااااج بسرعه رايحه اييب لي ماي وارد اشوفج مخلصه
نوره : هههه حشا مالنا وتنازعني .. أوكي اوكي

حدرت المنتدى شفت اللي ابا اشوفه حتى أعضاء المنتدى حاسين فيني اليوم ومتذكريني بس ابوي بعده ما تذكرني ليش يابوي ليش هاييل الغرب تذكروني وانت بعدك ليش ليش ..؟ ،،،استانست .. فديت أعضاء المنتدى دوم متذكريني ابد ما نسوني

ردت جواهر وسحبت اللاب عنّي
قعدنا لمّا أذن المغرب رحنا حجرتيه صلينا وردينا الصاله
جواهر : سؤال بنات منو فيكن اليوم صلّت الفير بدون جذب
ميثا : والله أنا كنت هلكانه وماما وعتني وما قمت

جواهر : وانتي نوره
نوره : اللي اتذكره بابا وعاني حسيت فيه بس مره ثانيه غطيت فـ سابع نومه وما حسيت الا يوم ييتو هلكت من أمس

ميثا : وانتي يالفالحه بس متفيجه تسألينا ..يلا ارمسي انتي صليتي ..؟
جواهر : أكيد الحمدلله صليت وقريت قرآن بعد

نوره : ماشالله عليج ... ما هلكتي من أمس
جواهر : يا ماما أنا كنت مواصله الين الفير .. كنت قاعده ع الايميل هع
ميثا : دام قاعده ع الايميل وانتي من يومين مب راقده ما بييج رقاد ها الايميل يا ماما

نوره : الله يستر على بناتنا والله هههه دام هاي سوالفهن
...........: وشو سوالفهن يا حلوه
تضايجت توّك تذكرتني وينك عنّي من الصبح توّك رجعت وحسيت فيني توّك

جواهر : هلأ والله هلأأأأ
باباتيه : هلأ بقطوتنا اش حالها القطوه ترا الفار يسلم عليها

يتني الضحكه بس ما ضحكت يا فضيحتج يا جواهر بس أنا مستغربه لو أنا مكان جواهر جان بابا زعل منّي وايد ليش ما نازع جواهر أمس يلا يمكن في علاقه بين جواهر وبابا لأنها وايد قريبه منّه .. صح في بنات يقولون كل شي لـ أعمامهم بس مستحيل بابا يوافق انّه جواهر تسوي هالشي مهماً كان .. يلا يمكن يتحراه طيش يهال هب طيش شباب بس بابا متشدد من هالناحيه ..

،، شفت صوب بابا ياه قعد يمبي بيني أنا وجواهر
باباتيه : ميثوه نواري اش حالكن ..؟
أنا و ميثا : بخير

جواهر : حشا ما عندكن مذهب نشّو سلمو على عمي فديته .. أنا الوحيده اللي في هالعايله عندي مذهب أما الباجي الله العالم مادري من وين وارثين هالطبع ..

ميثا : لو جواهر عندها مذهب عاد السما والأرض بينجلبون هههه
جواهر : جيه حبيبتي .. جواهر بلاها هب عايبتنج يعني

ميثا : قومي قومي .. وبعدين خالي تعال جيه ما يلست يمبي هااا ..؟ يلست يمب هالحشاكل .. زعلانه منك هه
بابانيه تم يضحك وأنا ما رمست قلت يمكن يحس فيني يحس انّه مقصر معاي اليوم وايد

باباتيه : بنات تلبسن بنروح بيت حفصه
بغيت أقول له مابيي معاك بتم فالبيت بس جواهر وميثا راحو ركض يلبسن عبيهن
قعدت فـ مكاني شوي قلت يمكن يتذكرني

باباتيه : نورو يلا سيري البسي عباتج !!
للأسف حتى قعدتي وسكوتي ما أثرو بك ما ذكروك وما حسسوك بي قلتها من قبل لو معرفتنا
لأهلك بتنسيك اياني وبتنسيك عيالك جان ما رحنا لهم ولا رجّعنا العلاقات شرات قبل .. بس كل شي مكتوب ولازم نتحمل .. ما ينفع الصوت بعد ما يفوت الفوت

طالعت بابا وابتسمت له ابتسامة حزن ورحت البس عباتي حتى شخطة جحال ما حطيت خل يدري انّي تعبانه نفسياً تعبانه بسبته ناسيني فأحلى أيام حياتي

شو دراني يمكن هاليوم ما بينعاد يمكن أفارق الدنيا وما بيعيش هاليوم مره ثانيه معاي بيتحسر على نسيانه لي هاليوم بالذات

نزلنا وركبنا السياره خلينا ميثاني تقعد يدام لأنها أكبرنا .. الفرق بينا تقريبا أيام أو شهور بس لا أكثر
طالعت برا طول الوقت كنت ساكته واسمع تعليقات جواهر وميثاني مع بابا علاقته معاهم جداً مفتوحه غير عن علاقته معاي مادري ليش هالشي خلاني أغار

وصلنا بيت عمتي وكنّا قاعدين ندش الصاله شفت عموري فتح لنا باب الصاله دشينا
دموعي على طول خانتني وطااااااااحت على خدودي ما قدرت أمنعها

عموتي أم حمد : هلا نواري هلأا والله بعروسنا
حضنت عمتي وبادرتني الشعور ذاته نفس الشي مرت عمّي يعل ما خلا منهم

صديت وراي شفت ابوي قاعد يطالعني وعلى ويهه ابتسامة فرح حزن ما أدري شفته رحت صوبه بسرعه

نوره : أنا أحبك أبوي أحبك عساني ما انحرم منّك ..

ابويه : بس عاد ليش هالدموع ..؟
مسح دموعي : يتزعليني منّج

حضنته أقوا ابا احسس روحي ما بنفترق ابد ابد انشالله.. انت النور اللي فتحت عيوني عليه بـ هالدنيا
نوره : آسفه أنا ضنيت بك السو ابويه
باباتيه : ادري ويا شكلج على طول تفهمين غلط هههه

ابتسمت له وجوجو طفّت ليت الصاله
هابي بيرث دي تو يو .. هابي بيرث دي تو يو هابي بيرث دي نونه هابي بيرث دي تو يو ..
وطفينا الشموع

جوجو شغّلت الليت
عليوه كانت قاعده تصوّر

علايه وهي تصورني : الله يسلمكم هاي عيوزنا نواري اليوم دشّت ثمنتعش سنه ههههه
باباتيه : محد عيوز غيرج بنتي بعدها شباب دام ابوها شباب تبينها تكون عيوز ما يصير طالعي روحج

علايه : ههههه ماماتي ترا خالي قصده انتي وبابا كبرتو خلاص هههه شيبتو
عمتي أم حمد : محد تارس قلبي ع الناس غير هالبنيه والله هههه

نوره : وربّي فرحتوني وايـــــــــد ما اعرف شو اقول لكم
ميثاني : عن المنكر الزايد .. وبعدين تعالي شو هاي وربّي بعد متعلمتنها من السعوديات هااا

نوره : هههه دواكم انتي وجوجو عقب ، ما خبرتوني ها .. ؟ وأنا اوني حاطه فـ قلبي من الصبح وزيغتوني على بابا
باباتيه : ياه صوبي يود السجينه حط ايده فوق ايدي وقطعنا الكيكه حسيته موقف رومنسي

هههه يارب ريلي يطلع على بابا حنون عليه وايد
قطعنا الكيكه والبنات عطوني هدايا وعقب بابا قال بيودرنا نحن البنات روحنا بيطلع ويوم نخلص اتصل به عسب يمرني

تمينا قاعدين نسولف استانست وايد مع البنات .. أول مره اسوي يوم ميلادي جيه مع الأهل دوم روحي مع بابا وخواني

حتى جوجوتي استانست ضحكت شوي ويانا عقب علايه بدت تصورنا بالفيديو عموه ومرت عمي كل شوي يقولون خوزي ها عنّا هههه
علايه : نونه نونه طالعي الفيديو

نونه : هههه اشحالكم
علايه : شو شعورج اليوم
جواهر من وراي : حشا جنها أول مره تسوي عيد ميلاد

نوره : ههه بالفعل اول مره احتفل مع الاهل
علايه : آخر يوم ميلاد لج ابوج شو سوّا لج
نوره : اممم بس عزمني على مطعم راقي هههه ما سوينا حفله
علايه : يلا انشالله كلنا نتمنى لج حياة سعيده طول عمرج

هالحزة دعيت آميييييين يارب آمييييييين
علايه حطّت كامها عالاستاند
علايه : بنات يلا نتيمع حوالين نواري بسرعه

تيمعنا تصورنا صوره وايد حلوه حسيتها بتبقى ذكرى حلوه طول عمرنا بس شكلي ما كان مبين انّه يوم ميلادي ما كنت لابسه هاك اللبس الحلو وايد ولا حاطّه ميكب ههه عادي المهم اهلي واحبابي يمبي هاذي راحتي .. راحتي مو بس بلبسي وميكبي وكشختي بدون اهلي ما بيكون لها طعم بتكون مالحه ولازم نزيدها شوية سكّر

بعد العشا بصراحه ما تعشيت مفوله من الكيك والحلو ههه اتصلت على بابا ياه يمرني طلعت من باب الصاله
كنت قاعده اتقدم من السياره شفت سياره ثانيه واقفه يمب سيارة ابوي

ابوي كان واقف وياه ويرمس ركزت شفت هذا حمد ولد عمتي ويسولفون ويا بعض
وصلت للسياره توني طالعت شكلي فالمخفي العاكس شفت طرف شيلتي شوي ويفتح جان ارص عليه وكنت ابا افتح باب السياره
باباتيه : نورو تعالي اهني هييج السياره ولد عمّج بياخذ اهله وياها

رحت صوب ابوي حمد كان واقف يمبه استحيت
حمد : اشحالج نوره ..؟
نوره : تمام
ابويه : اركبي
نوره : هالسياره
بابا : هي

ركبت وانا اشوف سيارة ابوي ليش مع ولد عمّي ومع أي واحد ياسر ولا يوسف
ابوي وحمد كانو يرمسون عن الشغل اللي اعرفه حمد ضابط فـ الشرطه بس بعد يشتغل مع قوم بابا ويوسف فـ ال****

حلو الشخص يكون له أكثر من طموح ويحقق كل طموحاته
وأنا اطالع صوب سيارة باباتي ليش غيرو السياير يلا يمكن ها بعد شغل
شفت جواهر طالعه ركض من بيت عمتي وشكلها وحده عبيطه الصراحه هههه

بس يا حظها ع الروح الرياضيه والحيويه والله أحسدها ع هـ الروح ماشالله عليها الله يحفظها
الجوهره ومرت عمّي طلعو كانو يايين مرت عمّي كان وياها وايد أغراض

طبعاً الحريم جذا تطلع من بيت أختها أو أخت ريلها ولا راعية البيت معطتنها ترس أشيا ههه ما ادري شو بصراحه .. بس اللي شدني باب السياره مال السايق تبطل

قلت أكيد هاي جواهر ناطه من ورا السيت ليدام مو بعيده عليها يعني
بس اللي فاجئني
باباتيه : خير يوسف جيه نزلت ..؟
يوسف : الوالده وياها اغراض ،، بحطهم فالدبه

باباتيه : هالله هالله فالدرب شكلها الدنيا بتمطر
يوسف : عمّي بيتنا فرة حصا .. انتو ماشالله ساكنين فآخر الدنيا هههه
باباتيه : صدقك يلا الله وياك

تحركت سيارة يوسف واختفت عن نظري
يا ربيييه يوسف اللي كان داخل وأنا ما ادري ع بالي محد داخل وأسوي استعراض يدام الجامه ومستانسه بـ شكلي فضيحه شو بيقول الحين بنت عمّي تدري انّي داخل وتسوي غصب جذا ..

باباتيه : نواري شو الحفله اليوم
وحرّك السياره
نوره : بصراحه طرطريشن .. والله فاجئتني مشكور أبوي
باباتيه : يلا زين استانستي وما زعلتي هههه .

نوره : بس انت أول زعلتني اليوم :: لا وعيتني من الرقاد ... ولا رديت علي يوم اتصلت ...
باباتيه : هههه اولاً وعيتج لمّا صوتي بح .. وثانياً كنت أبا اسوي لج مفاجأة ،، حشى نورو مستويه حارّه
نوره : هههه خلاص رضيت انزين

وصلنا البيت رحت خذيت لي دش يدفيني .. وايد بارد الجو هاليومين بعد ما طلعت بغيت ارقد ما ياني رقاد اليوم شبعت رقاد عدل
شفت جهازي تعايزت أشغله ادق الفصمه ومادري شوه .. جان اروح صوب اللاب ويبته شغلته

طرا على بالي اشتقت لها وايـــــــــــــــد ما تدري ابغلاها في قلبي مفتقدتنها وايد .. اليوم يعتبر من أيامي السعيده وينج عنّي
فتحت اللاب قلت اليوم لازم أشكي لها عن حياتي .. لازم تعبت أبا أشكي لـ حد فـ هالدنيا صحيح انّي أشكي لأابوي بس بعد في أشيا ما اقدر أقولها لأابوي
على طول هلّت دموعي

قلت : وينج عنّي وينج ..؟ في أحلى أيام حياتي .. تعالي امايه شوفي شو استوا بي من عقبج كلهم يقطون اللوم عليج بس أنا أدري مالج ذنب وأبوي بعد يدري ما جد يوم رمس عنّج غلط ..
دوم يقول لي طالعه ع أمج طالعه ع أمج لو انّه شاف فيج شي غلط ما كان قال جيه ...

........: نوووووووووره
نقزت من مكاني
نوره : آآآآآ
ياه بعصبيه وسحب اللاب توب من ايدي
باباتيه بعصبيه : أنا جم مرّه قلت لج ودري هالسوالف عنج شو ما تفهمين

دموعي تهل : أنـــ...ــا آســـ..فـــ..ـه ما كان قصدي
باباتيه : ترا أمج أكبر غلط فــ حياتي
دزني بقوه : وقسم بالله ان عدتيها يا ويلج
وشل الفلاش عنّي وطلع

رميت روحي ع السرير بقوه وصحت بـ حراره وحرقه

شو هذا في أب يقول لبنته أمج أكبر غلط فـ حياتي .. يعني ما يحبنا ،، يعني يتمنى لو نحن مو عياله ما يبانا فـ هالدنيا والله لولا نار جهنم جان مووت روحي ..

حتى عن ذكراج حرموني .. أمي تعالي أنا محتايتنج محتايه تضميني لصدرج الدافي أباج يمبي .. أمي كلهم متحكمين فيني كلهم .. لو انتي عايشه جان محد مس شعره وحده من شعري حتى أبوي اللي هو أبوي أوقات يقسى علي لأغلاط أنا ما أقصدها
ويوم أسأله عن سبب طلاقكم يقول مالج خص وبندي على هالسالفه

فهموني حد منكم يفهمني ع الأقل .. كل الدنيا تقول شي وشي وأبوي يقول شي وعمتي تقول شي ،، كلهم يقولون اللي يبون.. بس أنا ما با أسمع حد منهم ، أبا أسمعج انتي أبا أعرف الحقيقه منّج

خوالي دوم يرمون العتب على أبوي ، و أهل أبوي يرمون العتب على أمي منو الصادق منووو
بس أنا مستحيل أكره لا أمي ولا أبوي ما بصدق حد فـ هالدنيا غيركم ليش تركتينا أمايه ليش..؟
أبوي ما يبا يرمس .. ويوم ابا اقول له عن خصوصياتي أخاف يعصب ليش يعاتبني يوم أشكي لج حرام خل يحس فيني شوي

رقدت وأنا مقهوره من داخلي مقهوره على فراق أمي ليش كل البنات عندهم أمهات وأنا لأ
لدرجه انّي فحفلة يوم الأم ما أحظرها .. ما أقدر أشوف أمهات البنات وأنا أمي مو موجوده
ما حسيت بروحي الا وعدول يقول لي

عدول : نواري بيبي .. تعالي نتريق
نشيت شفته ابتسمت له : بيبي والله .. منو وين متعلمنها انت الثاني
عدول : انتي دوم تقولين حق صديقتج بيبي

نوره : هههه يلا فديتك ثواني وبيي
رحت تسبحت ولبست عسب اتريق وأنا نازله شفت أبوي وعمور وعدول يتريقون
نوره : السلام عليكم
الكل : وعليكم السلام

قعدت عسب اتريق حسيت روحي مب مشتهيه يالله يالله شربت من الحليب بس
باباتيه : بلاها عيونج ورمانه
نوره : انت أدرى ..

وقمت من ع السفره حتى ما فكّرت أطالع ويه ابوي .. أنا طول عمري ارد على من ما يكون ، الا ابوي فـ حياتي ما عليت صوتي عليه .. والله غصب عنّي اليوم قلت لك جذا بابا .. يا بوي سامحني يابوي والله مب مستحمله روحي ..

دخلت حجرتيه وفريت روحي ع السرير بديت اشاهق من كثر الصياح حاولت صوتي ما يعلا عسب محد يسمعني ..

آآآه يا بوي والله ما اقصد .. بس انت ابد ما استقبلت منّي أي سر اقول لك اياه حتى يوم بـ الغلط نسيت دفتر يومياتي مرّه فـ الصاله قريته بديت تصارخ علي وتقول شو هـ المصاخه ماباج تكونين شرات هـ البنات ..

والله يابوي أشرف بنت فـ العالم بعد يمكن تحب .. يعني غلطتي انّي شكيت لهــ الدفتر .. غلطتي انّي شكيت لـ جماد لا يهش ولا ينش .. ليش يعامل خلق الله بـ انفتاح ..أما أنا بنته قطعه منّه مافكّر يوم يفتح لي قلبه وافتح له قلبي .. المفروض يكون اكثر انفتاح وياي أنا لأني بنته مالي غيره ...

..............: نوره تصيحين ..!!!!!
نوره : حرام عليكم محد يحس فيني محد ..
............. : أنا قلت لج من البدايه ما تسويين هالحركه صح !!! ولا أنا غلطان

نوره : انتو كان عندكم أم تقول لكم ها غلط وربتكم ما تعيدون الغلط .. أما أنا ما عندي أم تعلمني شو الصح !! من الغلط ..
.............: أعتقد انّج كبيره وتعرفين الصح من الغلط

نوره : ابوي انت فـ حياتك ما فكّرت تعرف شو اللي فـ داخلي .. طول عمرك تسألني نوره ناقصج شي متضايجه من شي .. بس في عمرك ما خليتني أفتح لك قلبي وأقول لك كل شي ..

ابويه بسخريه : مثل شو يعني .. تحبين ها قصدج ..؟ صــــــــــح!!
نوره : مو بس جذا من كل النواحي

ابويه : وقسم بالله يا نوره ان دريت انّه عندج سوالف جي ولا جي يا ويــــــــــلج بتشوفين شي ما يسرج
بديت اصيح أكثر وأكثر : هذا وأنا تربيتك انته وتشك فيني .. عاد الناس يوم يقولون شي ما ينلامون

ابويه : اللي بيرمس عنّج بكسر راسه ..
نوره : وانت قبل شوي رمست عنّي .. جيه ما تخلي الناس ترمس عنّي ..؟

ابويه : نوره هدّي شوي
نوره بانهيار ودموع : بابا انت قـــــــــــــــــــــاسي قاســــــــــــــــــــــ ـــــي تعرف شو يعني قـــــــــاسي ..؟
ابويه ولأول مره فـ حياتي أشوف دموعه

أبوي الجبل اللي ما يهزه ريــــــــــــــح دموعه نزلت ... ابوي اللي الكل يهاب منّه لقوة شخصيته دموعــــــــــــ...ـــــــ� �ــه نزلت

هذا مو ابوي ها شخص آخر.. ابوي ابد مافي كلمه فالــكون خلته ينزل دموعه
هذي اصدق دموع يقولون دموع الرجل .. فـ ما بال واحد طول عمره ما بجى ولا نزلت دمعه منّه حتى لفراق أغلى ناسه ......

رحت لــــــــــحظنه وأنا اركض ضميته بقـــــــــــــوه .. أقوى ما عندي
وأنا أصيح : بابا أنا آسفه .. والله مب قصدي ..

ابعدني عنّه لدرجه حسيت انّه بيفرني صوب اليدار خلاص هذا أجلي .. هذا يوم موتي ..
مسح دموعه ع السريع بعدها ما وصلت يمكن لنص خدّه بعد

رفع كفّه خلاص ابوي بيكفخني اليوم .. أول مرة فـ حياتي بنضرب من أغلى شخص فـ حياتي من أبوي عزوتي وظهري

لكنّه فاجئني لما قرب كفّه من ويهي ومسح دموعي وضم راسي لصدره
ابويه : حتى فـ كلامج يا نوره تشبهين أمّج
نوره : بس بابا بس .. ما با أشبهها أعرف انّي بشبهي لها المتك وايد
ابويه : نوره بنتي سامحيني ..

نوره : لا ابوي لا تكمل انت ما غلطت فـ حقي طول عمرك وانت حنون بس أنا يمكن من سالفة أمس عقلي صابه شي .. ابوي لا تاخذ فـ خاطرك ..

ابويه : بنتي أنا ما أحب انّج تتعلقين بالشي اللي تسوينه .. أكبر غلط سويتيه أمس .. ممكن أعرف شو بتستفيدين يوم اتطالعين صورة أمج وتصيحين .. انتي جذا تعذبينها فـ قبرها

نوره : بابا أنا آسفه أدري يوم تطالع صورتها تتذكر حياتك معاها والله آسفه خلاص ما بعيدها
ابويه مسح على شعري بحنان : نوره اذا فـ خاطرج أي شي قولي لي اياه بسمعج بدون ما اتضايج
نوره : ابوي بصراحه انت ليش متفتح مع الكل الا معاي ..؟

ابويه : نوره كلهم عندهم أمهات يودونهم عن غلطهم يوم يغلطون ..........
كملت عنّه : الا أنا بنيه وحيده لا أخت ولا أم محد بيودني عن غلطي

ابوي سكت تم يطالعني
نوره : ابويه انا تربيتك لا تخاف علي والله ما بغلط فـ حياتي هذا عهدٍ علي
ابويه : محد معصوم عن الغلط

قعدت ع السرير وابويه قعد يمبي
نوره : وين عمر و عادل
ابويه : ولد عمتج ياه وشلاهم بيروحون الالعاب
نوره : ابويه ممكن أسألك سؤال وما تعصب
ابويه : اسألي ..
نوره : ممكن أعرف شو سالفتك مع أمي ..؟

ابويه عصّب : جم مره قلت لج لا تيبين هالطاري
نوره : ابوي انت قبل شوي وعدتني تفهمني وتعاملني عدل حرام عليك يومياً نحن نسمع كلام وكلام بس ما نعرف نصدق منووه دخيلك ابوي ..