يتبع .......
الفصل الثالث :
سلامات ياسلطان ماتشوف شر يالغالي
الله يسلمك يابو سعود لاتحاتي
وايش اللي لاتحاتي ... تراها ماهيب اول مره وانا اخوك اذا تحسب اني ماادري عنك تراك غلطان .. كلن ملاحظ تعبك ياسلطان
هيه يانايف انا همي هم وانا اخوك
افا مهموم وانا حي اطلب عزك وانا اخوك
بيعني في السوق
اشتريك ماابيعك وقام وحب خشم اخيه الكبير .... السالفه كايده ولا ابي ام العيال تدري هي والعيال بيتروعون علي .. وبيحاتوني ..
قول وانا أخوك
انا من شهرين تعبت شوي قلت خلني اسوي شوية تحاليل علشان اشوف ويش سالفة التعب اللي يجيني ورحت عيادة الدوحة وسويت التحاليل تحاليل شامله
زين بشر ويش طلعت نتيجة التحليل
القلب وانا اخوك لقو عندي شريان متسكر
هينه لاتشيل هم وياما ناس سوو عمليات قلب واجد ونسبة نجاحها مضمونه والحمد لله وبعدين الطب تطور بس لازم تبلغ سعود علشان يعرف يتصرف بأقرب وقت ويكلم دكتور ويحدد لك موعد مستعجل ..
يعني هذا رايك
ايه نعم هذا اللي المفروض يكون
خلاص بكلم سعود وبشوف ويش بيسوي
.................................................. .......... .................................
بدور : ايه ياسوير كنها ماصدقت على الله انش تكلمينها
ساره: طبعا ياحبيبتي انا ساره لازم تحب يدها مقلوبه اني التفت لها وكلمتها
بدور: بس تدرين انا مارتحت لها ماتعجبني البنت اللي مثلها
ساره : ليش انتي شايفه عليها شي
بدور : والله سمعتها في المدرسه زفت وكلن يقول شتبي فيها بنت عمش
ساره : اللي يسمعش الحين يقول مرافقتها ... كل اللي حصل اني كلمتها علشان الكتاب اللي عندها
بدور : وانتي حبكت تاخين كتابها
ساره : والله انا كتابي ضايع ويوم رحت لأمينة المخزن علشان اشتري منها كتاب قالت لي فيه بنيه في صفش عندها كتاب زايد لأنها عايده السنه
بدور : المهم خلينا من سيرتها .... متى بتزوريني
ساره : والله انا آخر وحده زرتش الدور عليش انتي وخواتش .... بدور شرايش تقولين لأمش تمسين عندي
بدور : والله يابنت العم مااعتقد انها بتوافق
ساره : فديت قلبش حاولي فيها
بدور : بشوف بس ماضمنها لش
.................................................. .......... .................................
يمه .... يمه ... وينش
وجع بدور ليه الصوت العالي
الجازي شفتي امي وينها ابيها
الجازي : شتبين فيها
بدور : توني مسكره من السوري بنت عمي وقالت لي تمسين عندي قلت لها باشوف امي
الجازي : من الحين اقولش لاترزين وجهش عندها لانها بتفشلش
بدور : وليه ان شاء الله
الجازي : لأن امتحانش قرب ولاهو من زين نتيجتش الاوليه فابلعي العافيه واحفظي ماي وجهش
بدور : بس امتحاناتي بعد ثلاث اسابيع اف مايسوى كله دراسه اللي يسمعكم يقول بنخترع الذره .... المهم خلصيني امي وين
الجازي : تحت في الصالة عندها جارتنا حنان
بدور : الله كملت ... حنون ام العلوم وكالة السي إن إن عندنا
.................................................. .......... ................................
مادريتي يام سلطان ... شفتي بيت بوفايز
بوفايز ماغيره جاركم ...
ايه يام سلطان ..
شفيهم .. عسى مهوب صاير لهم شي
هذا الله يسلمش خدامتهم تبي تسافر ويوم ودوها المطار ... خلوا ولدهم فايز يفتشها تعرفين يافاطمه الخدم مامنهم أمان ... المهم مااطول علييتش السالفه
لقوها يام سلطان سارقه ساعات البنات ولقوها لافه في شعرها خصل شعر... الله يستر ماادري منين ماخذته ... حسبي الله عليهم مهما سويتي لهم مايبين معاهم مشربين السحر من يومهم صغار ..
الله يستر علينا وعلى المسلمين .
يمه .. يمه
تعالي يابدور انا هنا .. تعالي ياامش محد غريب ... مابه الا خالتش حنان
بدور : السلام عليكم ... شحالش خالتي ..
حنان : الحمد لله ... شلونتش انتي يمه .. وشنو اخبار الدراسه .. هدى بنتي ذابحه نفسها من الدراسه ولاهي ملحقه بعد
بدور ( ياالله ويش بسكتها ذي .. لاوكــــل مــاشافـتني بنتي هدى وبنتي هدى .. آآآآآف )
بدور ... يمه بدور
هلا يمه آمري
انتي اللي تبيني
ايه يمه السوري كلمتني وتبيني امسي عندها قلت لها بشوف امي
مالش حاجه ...
يمه الله يخليش ... هي آخر مره امست عندي تكفين ... تكفين
زين والمدرسه بكره
بروح معها ولاتخافين بآخذ كتبي وملابسي ....بس انتي وافقي
المره ذي بس ولاعاد تعودينها
بدور : ياسلااااااااااااااااااااا ااااام الحين اكلم السوري
.................................................. .......... .................................
وفي المساء عند الكورنيش جالس يشوف الناس من حوله اللي يسوي رياضة
واللي راكب العباره واللي جالس يتمشى مع اهله وفي الجهة الثانيه عند حديقة البدع عــوايل فـــارشين لهم بسطه وقاعدين عليها واللي يلعب عياله في الالعاب
كل لاهي في ذا الدنيا بعالمه الاهو قاعد يشوف ويسمع سوالفهم وضحكهم وبينه وبين نفسه يتذكرها مع كل ضحكة يسمعها من الاطفال حوله مانساها مثل مانساها غيره عاش معها عمره كله واعتنى فيها على صغر سنه في ذاك الوقت ويوم فقدها .... فقد حنانها مع انه مالمسه منها مره طول عمره يسأل ليش انا واخوي ماعرفناها ليش ماحسينا مثل غيرنا باهتمامها فينا وخوفها علينا .....
( هييه يايمه الله يرحمش ويغفرلش ويوسع عليش قبرش ويبرد عليش من براد الجنه )
السلام عليكم .... بو سلطان
سعود : هلا ومرحبا .. شحالك عاش من شافك
فارس : طيب طاب حالك ...
سعود : زين شفناك يارجال ماعاد تبين ابد
فارس : انا اللي ما ابين والاانت ياسعود قطعتنا مره وحده ولاعاد شفناك .. ماتقول عندي خوالي وعيالهم اشوفهم اسلم عليهم ياخوك ترانا لحم ودم .
سعود : ويش ذا الكلام انا ماقطعت ودايما اكلم خالي
فارس : زين متى بتزورنا ترانا اشتقنا لسهراتنا مع بعض
سعود : قريب .... بزوركم ونسهر ونرجع ايام مضت
.................................................. .......... .................................
اقولش ماهو بطايق مني شي يمه دايم يرفع صوته علي ويفشلني قدام عيالي والخدامات تراني زهقت ماصارت حياه ذي
اصبري وانا امش هذا رجلش وابو عيالش وولد خالش اذا ماصبرتي عليه من بيصبر ... يمكن الرجال عليه ضغوط .. بال ماتوسعين عليه تضيقين خلقه شوفيني وانا امش مرت علي اشياء الله العالم بها وما سويت سواتش
خلود وهي تدخل عليهم سمعت كلامهم ...
خلود : هذي عمايل يدش وسعود ماقصر عليش بشي
هيا : انتي اسكتي ماحد طلب رايش .... كرميني بسكاتش
خلود : لا ماني ساكته .. انتي ماتشوفين نفسش من يوم جبتي ذا العيال اهماتي بنفسش .. الرجال ياحبيبتي يبي اذا دخل بيته يشوف مرته متعدله ومتكشخه وتتفنن في نفسها هذا حقه عليش ويبي الكلام الحلو اللي يبرد قلبه مهوب الكلام اللي يغث .... اصحي على نفسش قبل لاتتحسفين بعدين
هيا : الله يسامحش ياخلود غديت انا الغلطانه ... هااااه يمه عاجبش كلام بنتش
منيره : يمه كلام صح يابنيتي ماغلطت وهي لوانها تحبش ماتكلمت
هيا : مشكورين يجي منكم اكثر ... وقامت تدعي خدامتها تجيب عيالها علشان يروحون البيت
خلود : ياهيا وانا اختش اسمعي كلامي قبل لايفوت الفوت وماينفع الصوت
هيا : يله ياعيال مشينا
منيره : ماكنش قسيتي عليها مهماكان هذي اختش
خلود : يمه سعود ماقصر معها بس دايما هي تنكر الشيء اللي يسويه يمه الرجال ان صبر اليوم ماراح يصبر العمر كله
منيره : ليه انتي تعرفين شيء
خلود : لايمه بس ماادري انا عندي احساس واحساسي مايخيب
.................................................. .......... ...............................
في جامعة فيرجنيا تك حيث يدرس الطلبة المتفوقون والمتميزون من جميع أنحاء العالم من جميع التخصصات، تحملهم من العالم العربي وآسيا الشرقية لتصل أعدادهم إلى ما لا يقل عن ثلاثة آلاف طالب مسلم كل عام ! وهذه الجامعة المبشرة بالوعد الإنساني المميز بين الجامعات العالمية هي الأقرب بين المؤسسات العلمية والأكاديمية والتكنولوجية في الدنيا التي تقع في قلب أهدا مدينة في الولايات المتحدة ( بلاكسبيرغ ) العابقة بالبحيرات الهادئة والأشجار والغابات والجمال الطبيعي .
تتربع في ساحاتها وبنائها المعماري ومنشآتها المدروسة بإتقان وذوق معماري خلاب وتجد الساكنين والمبعوثين على مكرمات البرامج الداعمة للعلم من طلبة العالم وأكثرهم من شرق آسيا والعالم العربي ، يروحون ويجيئون ولهم مسجد ولهم صلاة وصيام وقيام واحترام !!
ولا من يتدخل في صفة الطالب أو أصله وفصله بل هناك لجنة الطالب المسلم التي تعتني بأمور الطلاب المسلمين والعرب ،، وتهتم بشؤونهم بأمر وإدارة من رئيس الجامعة .
تلك الجامعه التي يدرس فيها مغتربنا عسى ربي يفرحه بشوفة هله ....
يجلس في زاويه هادئه بعيدا عن الضوضاء من حوله امامه كتابه ليراجع الملخصات التي قام يلخيصها لمساعدته في امتحانه القادم ... عكر عليه صفو هدوئه زميله طلال ودخوله عليه ..
طلال : مرحبا ابو الشباب
فيصل : هلا طلال .. شلونك وينك من الصبح ماشفتك .. طلعت بدري اليوم ماهي بعادتك .
طلال : ياخوك عندي مقابله مع دكتور الماده الي ماقدمتها وبنشوف يقدر يعدها والا يعطيني شي اسويه ابي اخلص ..
فيصل : انت ماقلت ان مقابلتك يوم الاحد
طلال : لا مقابلتي الاثنين اليوم ان شاء الله
فيصل هاه على خير ان شاء الله
وفجاءة سمعوا أصوات صياح واطلاق نار والطلاب حولهم حالتهم حاله يتراكضون ويتزاحمون وكانوا في حالة هياج تام وذعر شديد شوي واحد من الطلبه يصدم في فيصل .... مسكه فيصل وسأله عن اللي صاير وويش سالفة الأصوات اللي سمعها ..
فيصل : Excuse me. What's going on ?
لوسمحت .. ايش اللي حصل ؟
الولد : There are those who opened fire on a group of students.
هناك من اطلق النار على مجموعة من الطلاب .
وراح الولد منهم بسرعه وفيصل علم طلال باللي صاير واثنينهم راحوا يشوفون ويش صار على الطلاب .
.................................................. .......... ..........................
ترن ... ترن ... آآآآآآآآآآآآآآآلو من
سعود ... سعود انت تسمعني .. قوم صحصح معي .. يااااااااااااااسعود
هلا معاك ... معاك ... خير ويش اللي صاير مصحيني من الصبح وانت داري اني اداوم متأخر ... انشاء الله يكون شي مهم اللي انت مخرب نومتي عليه ..
ياسعود قوم الله يخليك ماني متفيق لك اسمعني ..... يوه تدري شلون افتح الجزيره وشوف الاخبار تتكلم عن مجزره صارت في جامعة فيصل ...
سعود : ويش تقول ياسلطان من جدك .. زيييييين فيه مصابين ... خلاص سكر .. سكر .. ويقوم سعود بسرعة وياخذ ريموت التلفزيون ويحطه على الجزيره ...
(في صباح يوم الاثنين المرافق للسادس عشر من شهر أبريل في تمام الساعة السابعة والربع سمع اطلاق رصاص إحدى الطالبات وتدعي ( إيميلي ) وكذلك أطلق النار على أحد الطلبة وهو ( راين ) .. كما أصيب آخرون..وقتها بدأ رجال الشرطة بالبحث عن قاتل هارب .. ولكن للأسف لم يتم إبلاغ الطلبة وتحذيرهم توقعاً منهم أن الطلبة سيكونون بأمان بداخل القاعات الدراسية وسيتم الابلاغ عن عدد الضحايا في وقت آخر ......... )
الله يستر ... يارب انك تستر على اخوي فيصل .. امي وابي بروح اشوفهم قبل لايتروعون . هيا عطيني ملابسي بسرعه ...
ياترى فيصل بيكون من ضمن ضحايا فيرجينيا تك ؟؟
بنعرف في الفصل الرابع ....
|